Sakiamuni Vut tauu vaiw juanw Huatlunn, ix dorhuar junjiaw Ajnatakaundinya. Suacbuew vaiw qangxsuad Vudhuad, ix dorhuar junjiaw Subhadhra. Qaidongx dorhuar :ee jinrqaix dorhuar liauw. Ix dirr nng jangg salaciu diongx:a decbeh jinwzip nirvana. Hitt jun, dirr vnuawmii, jigjing byy sniax, ix uirr jiongww singdoo qangxsuad Vudhuad ee iauwjiw.
Linw jiaxee bikiu, guaw jipbet jinwzip nirvana liauxau, linw diyhh juncunn qingwdiong Praimoksha, kyxviw dirr oamr diongx cue diyc qngx, sanwciaclangg did diyc vyw. Qaidongx jaix jitt xee si linw ee sensnix, knuawtai ix bersux guaw diamr sewqanx qangrkuanw.
Cisiuw qaiwlut :ee m tangx juer bexbe borik. M tangx hag canhngg cuwtec. M tangx tiokci suxiongrlangg, lojaii, iacc jingsnix. Itcer jingwjyh ee sittauu qapp jaivyw longxx m tangx bongx, naxx cincniu jauxpiah huexknix. M tangx cyr caa syx cauw, kaikunw qrut de. M tangx qab iyc-aw iacc jiampog hiongqed. M tangx giac bak knuar cnisiur iacc cuisngr guec ngii guec kih laii qiksngr hyw-pnaiw zirun. Jiaxee longxx byy ingwdongx juer. U jamrjad, jiac u jiauww sii, cingjing jurkyr. M tangx camcab sewsu drir qaur juer suwjiaw. M tangx yc huatsut len sendanx. M tangx qandna' beh qauvuee quiwkir :ee, duiwdiong inx, suacc knuawkinx kacc erjanr :ee. Jiaxee longxx byy ingwdongx juer. Simliam siwjniar qriuu dorhuar. M tangx amkamr kiamwdiamw iong qew bin laii muapenr jingwlangg. Duiww sir jiongw qiongqib longxx u anrliong marr jaix buanxjiog. Cruw .diyc ee qiongqib byy ingwdongx dunxkngr.
Dirr jiax iauwliok qangxsuad cisiuw qaiwlut ee singwjid. Qaiwlut si jingwdoo qaixtuad ee qunvunw, mrjiacc miaa qiyr juer Pratimoksha. Uaxkyr jiaxee qaiwlut tangx did diyc camsenn-dnia ixiqip dubet koxlan ee diwhui.
Soxiw qongxx, jiongww bikiu, qaidongx cisiuw sunjuann qaiwlut, m tangx hro qaiwlut sriu sunxhuai. Narr langg tangx cisiuw sunjuann qaiwlut, ix dyrr tangx u senrhuad. Qaiwlut narr byy sunjuann, qokk hxang senrsu qongdig longxx be hingx kiw. Soxiw qongxx linw diyhh jaix, qaiwlut si siongrqaiww an'unw qongdig ee soxjai.
Linw jiaxee bikiu erdangr cisiuw qaiwlut :ee diyhh jewab go qinkir, m tangx vangr quwjai inx hamrzip go jiongw iogbong. Vixlun knuar guu :ee ciuw tec tng, be vangr quwjai guu kir huan langg' ee xngx-aw. Narr vangr go qinkir quwjai ix kir, m na go qinkir diddit kir byy qaiwhan, qyckacc hai :ee si kongwjer inx be diauu. Iarr kyxviw og bew byy qorr bexqarqniux qra hiabjer diauu, ix e qra langg tuax kir siag lyc knikamr. Narr duw diyc qiapcat, sriu ee kow qandna' jit sxer. Go qinkir inw kiw ee jai'iongx e drir qaur quixlyrr sxer lyhjex, sionghai jiokk dua, berdangr byy qinxsin. Uirdiyhh jitt xee enqor, u diwhui :ee apjer inx ee go qinkir, byy duer inx kir, qra inx lrak diauu lehh bersux duiwtai qiapcat, byy beh hro jauw .kir. Qaxsuw narr vangr hro jauw .kir, quer byy zuarr quw dy' e knuar diyc inx ee bedbongg.
Jiaxee go qinkir, simx si inx ee juxlangg. Uirdiyhh jitt xee enqor, linw qaidongx qra simx kongwjer hro hyw. Simx hro langg' e qniax, viw dogjuaa, bingxsiur, kyxngor ee cadtaux, iacc dua huew qex qyckacc kiongxvor je, byy huatdo piwlun. Naxx cincniu u langg ciuw tec jit quanr bit. Hiongqongg qniasuaw, qandna' qor knuar bit, byy knuar qnir cimx knix. Kyxviw kiw siauw ee cnxiu byy qraur qaux-aw iacc si qausanx-aw dirr ciu-dingw tiaur laii tiaur kir, jin' yh qra inx jewab diauu. Diyhh qnuaxqinw kongwjer, m tangx vangr quwjai inx kir. Vangr quwjai simx ovec jongg :ee langg jauxjingx, su be u senrqyw. Qra simx kongwjer diauu, sniawmih dairjir longxx juer e sxingg. Uirdiyhh jitt xee enqor, bikiu, diyhh qutlat jingjinr laii hanghok linw ee simx.
Linw jiaxee bikiu, kithuar .diyc ee jiahsit diyhh naxx cincniu jiac iyc-aw, hyw jiac pnaiw jiac longxx m tangx qex jiac iacc qiamw jiac. Qiucuw .diyc .ee si iong laii tnia sinqud tangx dri iaugy qapp jriw cuiwdax. Naxx cincniu pxangx caiw huex, cruw bit narnia, be sngxhai diyc huepangbi. Bikiu iarr qangrkuanw. Sriu langg' qiongqib, cruw qaqi ee hunrgiac laii siauduu huanlyw. M tangx qex iauwqiuu sniaw diwsuw sunxhuai diyc senrsimx. Kyxviw u diwhui :ee e junxjad guu ee lat tangx jicjair zuarr je dangrliong, be hro ix quewtauu tuabuaa suacc qra ix ee kuiwlat siauhuir liauw liauw.
Linw jiaxee bikiu, zit .sii qutlat simsinn siulen senrhuad, be kir pacsngw siqix. Mii-tauu iacc mii-buew iarr m tangx hnghuir. Mii-diongx siongrtog qingbunn laii hro qaqi u qenwbunn. M tangx uirdiyhh kunwbinn ee inenn itsingx kangx dro byy soxx did .diyc. Diyhh sniu diyc busiongg ee huew dirr sewqanx siyx. Jaw jit sii qriuu did dorhuar qaqi, m tangx kunr .kir. Jiongxjiongw huanlyw-cadtaux dniardnia tingwhau siqix beh taii langg viw uansiulangg qyckacc lirhai. Liw nacc tangx qycc kunr? Nacc tangx byy cingcniw? Huanlyw jitt buew dogjuaa dirr liw simlai decc kunr, piwlun ox juaa dirr liw cur-lai decc kunr. Diyhh iong cisiuw qaiwlut ee qaux-aw jaw jit sii qra druu danwsag. Kunr juaa qacc vniar .cud .kir dyrr tangx unxsimx aw kunr. Juaa iaxx byy cud .kir dyrr kunr si byy qenwsiauwsimx ee langg. Jaix qenwsiaur pnaixser jitt niaw snxax, dirr soxu jonggiamm-diongx vaii derr id. Jaix qenwsiaur naxx cincniu ticqaux erdangr atjer langg kir juer pnaiw dairjir. Soxiw qongxx, bikiu, linw vutsii diyhh jaix qenwsiaur pnaixser, berdangr jiamrsii qra tewngua driau. Narr m jaix qenwsiaur pnaixser, liw e sitlyc soxu qongdig. Jaix qenwsiaur :ee u senrhuad. M jaix qenwsiaur :ee qapp jingsnex byy qyc'ngiu.
Linw jiaxee bikiu, narr u langg beh qra liw jit jad jit jad ced dng, linw simqnuax diyhh kongwjer hro hyw, m tangx kiw uanwhun. Cuir iarr diyhh qor hro hyw, m tangx qongw pnaiw tniax ue. Narr junw vangr quwjai simx sniurkir, dyrr e gai diyc qaqi ee Dy, qongdig sitlyc. Tunlunw si dikhing, cisiuw qaiwlut iacc koxhingg longxx qapp ix be viw .did. Erdangr tunxlunw :ee tangx qra qiyr juer u ligliong uixdai ee langg. Narr berdangr hnuahiw tunlunw, qra okdok ee jiuwme knuar juer naxx decc limx qamdnix lorjuiw, berdangr qiyr juer zip Dy u diwhui :ee. Sniaxmih enqor? Sniurkir juewjniaa ee sionghai e pywhuai soxu serhuad, pacpnaiw hyw miasniax. Langg' qimser qapp aurser longxx byy air knuar diyc ix. Qaidongx jaix dowhun ee simx viw bingw huew kacc lirhai. Diyhh vutsii dniudii, m tangx hro ix zip .laii. Cniuxqiab qongdig ee cadqow, sniurkir siongrr lirhai. Byy siuhing ee poxtonglangg sriu iogbong iuxsniaa byy huatdo jurgnow kongwjer, ix sniurkir iaxx erdangr liongrjingg. Cutqex siuhing byy iogbong ee langg suacc qra dowhun moh diauu lehh, jiokk m tangx. Dyrr kyxviw cingbingg lingxcinr ee hunn-diongx, byy ingwqaix e dann luii, nar sicnar qangrkuanw.
Linw jiaxee bikiu, diyhh syx qaqi ee tauu. Linw kiwkiyh jngtna, cing sor bin ee snxax, pongw vxuah kitjiac tangx hyw doruac. Linw knuawtai qaqi cincniu jitt kuanw. Narr kiw qiautauu diyhh qinw kiwsag. Itvnualangg dy' m tangx kiw qiautangx, hongwqiamx cutqex zip Dy ee langg. Uirr beh qaixtuad, linw diyhh qiukid laii hanghog linw ee simx.
Linw jiaxx bikiu, tiamxbi ee simx qapp Dy uigik. Soxiw qongxx diyhh hro liw ee simhiongr jingwdit. Qaidongx jaix tiamxbi dna' kimuaa narnia, duiww zip Dy ee langg byy loring. Uirdiyhh jitt xee enqor, linw jiaxee diyhh duanjniar linw ee simx, ixx jingwdit ee vunxjid juer qicow.
Linw jiaxx bikiu, diyhh jaix hiaxee iogbong je ee langg suwsiongg decc duiqiuu lirig, soxiw koxnauw marr je. Qiamwjiyw iogbong :ee, byy soxx qriuu, byy soxx brang, dyrr byy jitt xee kunwziauw. Qandna' qiamxjiyw iogbong dy' qaidongx siulen, hongwqiamx qiamxjiyw iogbong erdangr juewjniaa jerje senrhingg qapp qongdig. Iogbong jiyw ee langg dyrr be tiamxbi laii qiucuw langg' dingwir, zicniaw be hro qokk iogbong ee qinkir tuax diauu lehh. Qiamxjiyw iogbong ee langg simx kuikuah, byy iuciuu iacc qniahniaa, duw diyc dairjir simx cringx ir jiog, vutsii be u vutbuanw. U qiamxjiyw iogbong ee langg jiacc u nirvana. Jex dyrr qiyr juer qiamw iok.
Linw jiaxee bikiu, narr beh qapp koxnauw siar srinx li, diyhh jaix siychun. Jaix siychun jitt xee huatdo si huwzu, kuaiwlok, anhann, qapp unxdangr kiarkiw ee soxjai. Jaix siychun ee langg suizenn kunr tokax iuguann anhyy kuaiwlok. M jaix siychun :ee suizenn druar dirr tendongg iarr be dingwir. M jaix siychun :ee suizenn hyxgiac, bersux sanwciaclangg. Jaix siychun :ee suizenn sanwciah, bersux hyxgiahlangg. M jaix siychun :ee dniardnia hro go jiongw iogbong dnivnuar diauu lehh. Jaix siychun :ee jin' qra inx kyxlenn. Jex dyrr qiyr juer dijiog.
Linw jiaxee bikiu, narr beh qiucuw jigjing qapp buuii anlok, diyhh lirkuix zuluan caxla ee soxjai, qo' srinx kiarkiw unxdun. Druar dirr jigjing soxjai ee langg, tnider Zakra qapp jiongww sinn longxx qra qingwdiong. Uirdiyhh jitt xee enqor, diyhh kiwsag qaqi qapp tnazinn ee langjingr. Anhann qo srinx kiarkiw laii suniuu dubet tongwkow ee vunxguann. Narr air laurzet dyrr rair singsiu laurzet ee koxnauw. Piwlun jit din jiauw-aw jip uaw dirr dua jangg ciu-aw, dua jangg ciu-aw kiongxqniax e dng .kir. Hro sewqandai vak diauu lehh, dimm lyc dirr jingwlangg ee koxhaiw, kyxviw lau cnxiu ham lyc dirr tomuee byy huatdo tuatsinx. Jex dyrr qiyr juer unxdun.
Linw jiaxee bikiu, linw narr qutlat jingjinr, dairjir byy qacc jit hxang kunwlann. Uirdiyhh jitt xee enqor, linw jiaxee qaidongx qutlat jingjinr. Kyxviw juiw lrauu byy tingg ee ser diauu kelauu erdangr qra jiyhtauu jngwkangx qangrkuanw. Narr siuhingrlangg ee simx dniardnia qanxban pahngx, naxx cincniu jngr caa cruw huew, buerjingrr siyx dyrr hiyctiamw. Sniu beh did diyc huew, mrqycc huew yh did did .diyc. Jex dyrr qiyr juer jingjinr.
Linw jiaxee bikiu, diyhh qiqiuu senrliongg diwsig iacc senrliongg jorjan, m hyw samxsniu. Narr byy samxsniu :ee, soxu ee huanlyw-cat dyrr cue be lo zip .laii. Uirdiyhh jitt xee enqor, linw jiaxee, iwliam vutsii diyhh jip uaw dirr simx. Narr iwliam pah sitlyc, soxu qongdig marr suar sitlyc .kir. Narr iwliam ee ligliong u qraur qenqiongg, dyrr sngr ham zip go jiongw iongbong ee cadciuw-diongx iarr be virr ix soxx hai. Kyxviw cing jenwqah zip jenwdin, sniaxmih dy' m qniax. Jex dyrr qiyr juer byy samxsniu.
Linw jiaxee bikiu, simliam u jip uaw :ee, simx jiacc e dikdnia. Simx u dikdnia mrjiacc tangx jaix sewqanx cutsnix qapp bedbyy ee huatsiong. Uirdiyhh jitt xee enqor, linw jiaxee vutsii diyhh jingjinr qutlat siulen dikdnia. Narr u dikdnia, simx jiacc be luan. Kyxviw u siyh juiw ee zinqex gauu dri kekamr qapp juixdii. Siuhing ee langg iarr si anne. Uirdiyhh diwhui ee juiw, gauu siulen camsenn-dnia byy hro qalauc. Jex dyrr qiyr juer dnia.
Linw jiaxee bikiu, linw narr u diwhui dyrr be amtamx, jip'id. Vutsii jurgnow singxcad, be hro qaqi u sitcyr. Narr u anne juer, diamr dirr guaw ee Hxuad lairdew tangx did diyc qaixtuad. Narr byy anne juer :ee, dyrr m si siuhingrlangg, marr m si itvnuax byy siuhing ee langg. Byy jit xee miaa hro :ix. U sidjai diwhui :ee si jit jiah qenqor ee junn, tangx dro quer laurhuer, puawvne, qapp sixsid ee duarhaiw, iarr si bubingg oamr diongx jit pax jiokk qngx ee dinghuew, si itcer vnertniar koxtangr ee hyw iyhhngx, si beh cyr huanlyw-ciu ee jit qix jiokk lrai ee voxtauu. Soxiw qongxx linw jiaxx qaidongx hagsip, suniuu, qapp siulen diwhui laii qaqi jingvow lirig. Narr junw jit xee langg u diwhui ee bagjiux, suizenn byy tenganw, iuguann knuar e bingg. Jex dyrr si diwhui.
Linw jiaxee bikiu, linw narr u jiongxjiongw kangpnar genlun, simx dyrr e luan. Dyrr sngr cutqex iuguann be did diyc qaixtuad. Soxiw qongxx, linw jiaxee bikiu, qaidongx qinw qra e ziauxluan simx ee kangpnar genlun kiwsag. Narr beh did diyc jipbet ee kuaiwlok, dogdok diyhh hyw hyw laii dubet kangpnar genlun ee vairhai. Jex dyrr qiyr juer byy juer kangpnar genlun.
Linw jiaxee bikiu, uirdiyhh icer qongdig, linw vutsii diyhh itsimx kiwsag qokk jiongw hongwdong qapp hihuax, bersux beh qra kyxngor ee cadtaux sag li li qangrkuanw. Dairjuu-dairvix ee sewjunx soxx beh liriog jiongwsingx :ee longxx qangxqair liauxted, linw jiaxee qandna' diyhh qutlat kir sidhingg. Bylun dirr snuax-lai, dirr lamwde, dirr ciu-kax, iacc si dirr ingg qingx jingrjig ee sxig-lai, susniu soxx sriu ee hxuad, m tangx vangr be qir. Vutsii diyhh jurgnow benxle, jingjinr siulen. M tangx vangr siqanx kangx dngw, siw au jiacc drir qaur iuciuu hiyrhuew. Guaw kyxviw hyw ee sensnix, jaix vnerqinx, sueh iyhhngx. Beh jiac iacc m jiac m si isingx ee jiksingg. Qycc kyxviw gauu inxdy :ee inxdy langg qniaa liongsen ee lo. U tniax .diyc .ee m jiauww qniaa, m si inxdy ee langg ee sitcyr.
Linw jiaxee bikiu narr duiww sir xee singwder u giaugii :ee, tangx qnuaxqinw mng. M tangx u giaugii byy beh qriuu qaixquad.
Hitt sii Sewjunx jiauww anne ciangr snax vaiw. Byy langg qra mng. Uirjnuaxngiu e annisnix? Jingwlangg longxx byy giaugii ee enqor.
Hitt jun Aniruddha quancad jingwlangg ee simliam liauxau qra Vuddyy qongw, "Sewjunx, guec tangx venr siyx, zit tangx venr lingw. Vuddyy qongw sir xee singwder be qaixii. Vuddyy qongw kow-singwder jinjniar si kow, be venr kuaiwlok. Jip-singwder jinjniar si rinx, byy vadd jiongw rinx. Kow narr dubet, rinx dyrr bet. Rinx bet, qryw dyrr bet. Bet kow ee dy sidjai si jinx dy, byy vadd jiongw dy. Sewjunx, jiongww bikiu duiww sir xee singwder quatding byy giaugii."
"Dirr jingwlangg lairdew u soxx qaix juer iauxx bue juer :ee, knuar diyc Vuddyy beddo, qaidongx u qamxqag diyc ciukow. Narr u cocox jinwzip Vudhuad :ee, tniax diyc Vuddyy soxx qongw dyrr longxx did diyc dorhuar. Inx qnir diyc Dy kyxviw amwsii qnir diyc sicnar qangrkuanw. Narr qaix juer u juer ixx dro quer koxhaiw :ee e qandna' anne sniu, 'Sewjunx beddo tacc e jiacc qinw?'"
Aniruddha qongw jiaxee ue. Jingwlangg longxx u liauxted sir xee singwder ee iwgi. Sewjunx uirdiyhh beh hro dairjiongr (ee simx) longxx tangx qenqor, dairvisimx qycjaiww uirr jingwlangg qangxsuad.
"Linw jiaxee bikiu, m tangx iuciuu huanlyw. Narr junw guaw druar dirr sewqanx jit qiab (kalpa), qapp linw dauwdin ee zidjiw jongw iarr e jin. Dauwdinw be hunkuix, jiongqibuew si byy kyxlingg. Vudhuad jinwig qaqi qapp tnaxzinn longxx jiauvi. Guaw junw druar quw marr byy kacc je jinwig. Ingwqaix tangx dorhuar :ee, tnidingw zinqangx jinrqaix uansingg. Hiaxee iauxx bue dorhuar :ee iarr longxx u qra juer dorhuar ee inenn."
"An' jitmaw ixau, guaw jiongww derjuw diyhh jiapsiok siuhing. Narr u anne, Zulaii huatsinx dyrr vutsii junjai, be bedbyy. Soxiw qongxx, diyhh jaix sewqandai qewqer busiongg, dauwdin (qyckacc quw) vitdnia iarr e hunkuix. M tangx iuciuu. Sewqanx ee jinsiongr dyrr si anne. Qaidongx qutlat jingjinr tangx jaxzit qiucuw qaixtuad. Ixx diwhui ee qngx dubet qokk jiongw cigaii ee amr. Sewqanx sidjai si guihiamw amxziok, byy dingrdauc qiong'iongw. Guaw dnaxx did diyc beddo naxx cincniu kuduu og vne. Jex si juerog ee mic, qaidongx siar li :ee. Sinkux si jit xee qew miaa, dirr snix-lau-vne-siw ee daurhaiw decc pudimm. Jit xee u diwhui :ee tangx qra ix dubet cincniu taii driau kyxngor ee cat qangrkuanw, beh tacc e byy hnuahiw lehh?"
"Linw jiaxee bikiu, vutsii diyhh itsimx qutlat qiucuw cutli ee dyrlo. Itcer sewqanx e dinxdang qapp be dinxdang ee hxuad longxx si vairhuai qapp vut'anx ee siongwtew. Linw diyhh tingjiw, m tangx qycc qongw. Siqanx decbeh quer .kir, guaw beh beddo. Jex si guaw lorbuew ee qawsi."