Tendongg Lo
Duarlo ee jurdongrciax ex ex keh keh. Qewdingg :ee jiyx kxeh cangr tauu bri. Huatjaii-aw kixlyc hxuer cnibongrjong. Pauxlo be kamx did hrau, bus dingw:a kyw duddut. Jurqa'iong :ee jniawvingg ee sinwhyrdingx sih qui' vox quw, uad be quer dirr lordng dongwdauw jinjniar jiahlat. Cue kangwkiac nngr quer laii jngr quer kir, nng lenw ee autobaik iarr laii decc cah huex-aw. En'auu soxjai, qui' jua qanwlo qinrqong qunw, lacvah-sniax suar suar dann. Tnix beh narr u kamr quar, liongrvid jitquw e henx .kiw .laii.
Bagjiux-jingg ee qxingw jinx duw jinx, hen duw hen, simx rair cincniu snuadingw ee ojuiw hiacc cingjing. Suhu ee qawsi, tniax liauw u lyc hni iarr rair zip simx jiacc u lorsaiw.
"Hyw simx hyw liong ee dairdig, quiw kox aw hro ciac'axhanr diriaux lehh," lau a'vxeh dirr laurzet ee qetauu decc qa'ngg vunx, kiauqux kiauqux, snakor p.-puawnua-n.
Kowdeaw zimm jit dniux juaxpiyr .cud .laii, cuiwdunpuee jit sniax "banranx" quawcamx lehh, kensimx-ken'ir ee jiokguan si nga.
Qang tnix qycngiu guec. Vehsinlangg kiukiam singxing hag huanwcur, huwho lau'axcur vedjongx druar qaxx jin' sovyy, pulongrjiaw dagg amr kunr tnilo kacc qniu hitt hy qiongrbeh kir kunr cauxvox :ee, unrmia qokk vutsiongdongg. Dirr hongdinn sewqanx kiarkiw, jusimx buanxqnii beh jiksen iarr diyhh ganxsig qacpah, qongdig jiacc e ngii ngii muaw muaw. Bad u hongsniax qongxx sniaa-lai jit xee qnrua nngw naa :ee u de u cuwtec, snuadingw jit xee qaiwjuw u bow u sewii. Tutqunr venxsenx-aw tong' siwqer si, cutqii ee pacpenwvo samvutjingr nguarsinx. Ho'ngg lud .kir, jnii liauw iauxx sngr siyxkuaw, simlingg sriu congwsiongx, kangcuir siux piw narr suacc u kii jiacc si dua sitdig. Langg' ee simx dirr vxag-lai yh quanhongg. Qaqi ee liamrtauu dyrr quanxqor e diyc, s.-sikig-k. dy' m tangx u jauxjuac si junxjinn, juer og juer dok cax lirqingx.
"Tniderbuew ar. Dergagmngg kuix hna hna. Cniwgno qaix diyhh tanwqinw!"
Jongqauwsux mijnix-minua duiww sewsioklangg kuanwiuw. Jit vo qniaa jit vo dnia, jitt sii jitt diap, simx ving'unw kia dirr qiglok jingrtow kacc siddiyc.
Yh'aw
Zuahdak-k. ee Cid~Veh-guec jiacc jiacc aw quer, ciuhongx cib lehh cib lehh amwjuewjni laii. Tingwhau qaur ciurhiyc-aw angg :ee angg, lud :ee lud, mizit vnivunx quer ciuhunx. Jecquir vaixngua, cxunx-hxa-cxiux-dxangx quewvanx, banrdairnii ixlaii byy qexvnir.
"Jaixsii yc zri, yc diwsig. Ervox yc quaix, yc siuhing. Diaudo diyhh tranr jniw, ham'iongw pinxsingr vaii derr id, kywtingg an' siyxhak qaur jniurdingx."
Guehbuew juwceh, quewguec zip iuwhak. Vavax mamax ee tniawsiyh qapp quanqor druu jairgua, jiongqimx-zirho, tagcecginxaw u tnide ee jniawhuad hucii, sintew qapp simqnuax iongxqnia-q. Taujingg ee lo junw k.-kamket-k. be vnetnaw, be qniaa uaicuac .kir, ve-aw buw-aw ee simx iarr tangx vangr kacc kuix.
"Dikhing quann-qe iacc simhing hyw-baiw, quewkir ee in'enn kakkag u qauqilenn. Vutziqyr, iarr diyhh ping sueong, jitt sxer ee jyrhuar jiacc si jiwiaur."
Kuanwsewbunn kenwqow ixlaii byy decc jiyxkueh. Suhu ee kuanwqair iarr duarsiwqer u, dirr snua'ngi, qongxvyr, iacc denrsirdaii. Niaa m si caiwqox, diax m si jaijingx. Sianglangg an' co' sionghue qaur ziho qetlenliw, liw simx qramx, guaw jxingg guan, su'ngiaa beh dramx. Iuwzii cutsir dyrr sidsit pah byy diyc sngr soxx drir. Dirr huandinn siogser pacgyy, ciywsniax jit qnxex, kauwsniax jit mee, kow cud viw vutdingw. Qniaw si qutziogcinx, iycua m qniax tiamw marr m uir lrow. Aursuu aurquer iarr diyhh dirr koxhaiw pudimm, juer langg' sirdua sniu diyc m qramx bacbah :ee diyh'air liongrjaw sniu lo.
"Ginxaxlangg air cittyy si tensingx-jurzenn, sngxhua virr jewhan jiokk jnia' kyxlenn."
Simqnuatauu bad u lingrr jiongw snia'imx laii decc vnrix ciuxbuew. Srux jingg sniu au, nng vingg longxx trer jit vo.
"Tingwhau qaur ginxaw juer jap-lak huer dngw daurlangg, beh jiac cyx iacc cutqex ix qantangx qaqi juxir. Dirr hex jinwjingg, iarr diyhh dirr yh'aw siusen kacc dingrdongr."
Hagdngg ee jxingx-sniax pah lak hiangw. An' jitt diap kiw, ginxaw ee sowhingg qniavangr sriu sensnix qaiquanw. Byy sxux byy penx ee simqnuax tangx duiwdux hann dxangx. Derqix u jai, tniawsimx qycc tangx snetnuar, qongdig buanxjair, mrsaiw qycc cue aurviacsnuax.
Buexqiok
Vnerngi taujingg jitt xee angg dingx u kacc quw, dngdecc quer bexlo :ee ciaciax dngw. Tranr decc danw cnix dingx, ciatangx-gua ee diamwho, jre dirr qongciax-dingw :ee tangx knuar jimjiog. Vnuawkamxaw ee diamwkauw, quexjiw vaii jnia' jap jiongw jairr langg' qingw, quexjixhangg ee a'vxeh byy tangx lingxtingw. Sinx sid qamxaxdiamr ee jurdongrmngg byy ingg ciccih, liammix kuix liammix qnuix, cutzip ee langkeh naxx pacpangx.
Sigsai ee qingxdir, qiwdii limw limw aw beh juer dorjer, a'qongx ee duiwnii-qi dirr xe guec.
"Guaw narr u anwjnaixngiu, linw dyrr m tangx qra guaw cacqongw."
Jairsnix sindew iauxx iongw iongw ee sijun, a'qongx bad cuir drang cuir jit qxur ue sna' qar. Busiongg laii longr mngg, u pnirlakqongw e cuanxkuir :ee sen' jauxtuad dy' m diyc .did. Jre qiuwhorciax beh kir i'ngi hitt dangjun iauxx jaix langg, huandngw zit a'qongx dyrr dngxcnix, vnirser siongdiong. Sirser kir qaho-vnervangg bairvne, sui' xee bagkox angg qiwqir cud .laii. Luarduarlangg nng qix ciuxqud binrdingw, duardangg sewdangg :ee cah qaxx muaw muaw si, cuir dingxtauu qycc draur jit qix sokqaqongw, hro langg' knuar diyc jiokk m qramx, jiokk qankow simx. Jit diauu snewmia siongrau nng lexvair longxx dirr vnercngg dyw lehh, qaur buexzit simjong dnia .kir byy qycjaiww pangw, a'qongx itdit byy qihue kaikauw ham' qniaxsunx-aw iacc vangcinlangg siy' srii.
"Drir sixjingr ee qongbinn uirr beh tauwdew qexduu vnertniar higjiaw kiongxhongg ee buatuax, u juangiap sensnix uijingr, henrlangg ee iwhiongr qaiwdyw longxjongw, tangx jur basia anlok siser. Bue singdingx :ee, diyhh horqenwzinn sing'unw. Kongqen :ee iarr erdid libzi qongw jairsenx."
Ciax-dingw ee denrsi-qongxqyr u ngiaw byy sniax. Jingwqenr narr byy dingr vecsnir ee ir, ngiaxpnir qyckacc cutvan, itbuew byy sursaiw.
Jnriu ciax hitt quw, zidtauu iauxx iam pnawpnar. Beh qaur jam jinwjingg, luii dann siccuah. Lyc qongciax qniaa byy nng vo lo, dua ho puah lyc laii, lyc qaxx pipipewper. Jaxvox cutmngg u suawciuw qra horsnuar drew zip kir pnai'aw lairdew jin' qaijair, jinw tamxmew qra cniaw .cud .laii, haursniqex simqnuax dikdnia, hongho m qniax.
Qanghux
Jnia' jap dxangx ee qangjingg vangr juiw lrauu, cuiwtauu qa'ngg qongw be m qramx qiuwsit si tanx :ee. Langg ee siurguann u hanrqair, jiac vah-zxic si ciaudingw dngg sniwmia. Jongwiongw qibsii curcingr pacpunw liauw. Beh kir ee lo, dingrhiongr si u, e sxingg be sxingg byy koxx dnia. Beh air banrlenn qiuxuanw, u puawvnirlo ee qirge qycc knii lehh byy liauw sii, tanwqinw qra hed diux kaihuad sinx vo jiacc si jniawdoo. Lixlo vaii kiw siwtin u kiokjed, duw diyc sigsai :ee dyrr sna' jiy'iyx. Cid uanx veh juai, cuwcur vongrviah, samvutzirsii qycc diyhh jiac pongwvniaw.
"Berhiauw sraiw junn hiamm kex ec. U harsaux sunzenn liw decc qongw :ee," buxqurviauw dua cuiwdauw, jit sniax qra voghuee.
"Quntauvo jairr langg' len. Hyw-baiw capjauw u jit xee junxqur?" dongcongx lyxiuw gauu uann ue.
Lingw juiw jit langg jit kog dng' bin puah, zedjingg naxx iam huew iarr qiongrqiong beh huax .kir.
"Liw qongw :ee zip jxingg zip lriw. Dohap-siong, guaw e kir qra liw qoxcuix draur tuanlyy," bingg duw bingg, jiksunhniadi drang cuir m drang ciuw.
"Danxhau cur nirr jiauu andah hyxser, guaw dyrr tangx laii tua ciuxge," jairjaw ee dongliauu dngr hingkamw, cuir vuex vuex.
Qewcig u, qunjongx marr ven ven, jenwqiyh kox be uaw, jenwdin henrvutdnaw qringx be jniaa ngiu, simqnuax jin' yjyx.
"Qnuacaa zip jidvnuar, haurkax haurciuw qiamx puxbak. Qanghux dingg pah kiw, yc e jniurciuw qnaxx marr be uanjuann," banx jig naxx qongw naxx decc kamqasaur.
"Iarqnaw lanw ee qesitauu byy qraur jiamlai. Narr qra jringw kacc jniurjniar, jurzendig langg dyrr uaw .laii ar," iauxx cnikax ee girde bunharsingx qixgi.
Tangx hysimx-hyqnuax jringx derqix :ee, bak-xe byy qaxx jit xee. Hukax samvutsii, jin kyr jit xee qenjongr ee simqnuax tner diauu lehh. Puar snxax jitvow, caiwvoxqinx qarqiamm.
"Kixqangx lor!"
U tniax diyc zidtauqongx diamr dirr dangvingg huacsniax.
Cingxtunn
Lux qngtauu si uirr beh qriuu tauxvangr, ham' quatsimx iacc denxjangx tauwted byy sna' kanlenn. Taujangx lauu dngg iacc qrax dew, beh hro dit iacc kiuu, si je si jiyw, oqimqut higjiaw vec cangcangx, jiongqimx ziho, simtauu be qycjaiww dnivnuar. Jerjiyw singw quaw cingkir juiw sew tauu marr sngr qongdig jit jann.
Vunwsywciax bue qaur, sniax singx qaur. U vunwsyr beh cringx :ee tangx liauu liauu aw si, benw qnuaxqinw-q iacc vikciog. Huewjuaw, sokqax, vylequanr, qapp caiwkax longxx rair vunx qui' lui, jit qniaa ciuxtauu ingxingw snax~sir qnia. Jiac :ee ing :ee u kiamriog, vunwsyr iarr duer lecc jiyw .kir. U juanqax jyr genxqiur jyr sidgiam, qongxx toxde siaulap sokqalog-aw beh qanngg, byy cingx nii iarr diyhh quixlyrr vah dxangx.
Qimjuaxloo jyr vunwsywlangw decc ingwiong an' qurnii itdit qaur henrjai. Iudniaw tec kir jingr huex, lordaii qex jit jangg qauxdingcuex qex jiokk laurzet. Qiciax dingw guehzit cuxliw driau ar. Qongmaxkamw byy qycc diamw hniux. Jnar :ee, jenx :ee, jnir :ee iacc jaux :ee longxx jinrliong kacc mair. Bau :ee, cuex :ee, drun :ee dngrr iuenx jiacc e jniurzet. Anwjnuaw liaurliw jiac diyc kacc qenrkongx cniaw anwha, cur-lai jiyw tun'aix, cingsimx bingbak dyrr tanr .diyc .ar.
Qra jarhngx hunxcnix ee lahzit lir driau, qimdnuawzit ee sikjuiw ngua angg :ee, sinr Tenjuw iacc Qidog :ee qongxx si anhiyczit. Lexvair, benw cutkinn, benw bualat jycsid. U he quat'ir dirr jitt qangx an' tenx bingg qaur mihngx qig diam m qongxue, kiarr cuir-aw iarr tangx dirr hiyckunwzit qiamw jit hxang kangkuer. Ham'iongw simhing snax dxangx go dxangx, itsiqanx simqinghuew dyc suacc laii pnaiw cuir lagdauw iacc snex genn jy giw decc liab dangx liab saix dyrr hiauhing ar. Iarr diyhh jit cuir qamm jit jic kacc unw.
Cuir jiamx jic lrai ingxingw lang'enn baiw. Pau uanr qapp diongwhun dirr simlai naxx sapsew marr m tangx jikhe lehh. U jaidiau muakamr snilangg bak, qiuwqingr tnix .jaix .jaix, guaw .jaix .jaix. Beh air a.-anlok-l. byy-dam.-byy-huann, simqnuakud-aw diyhh vniar hro cing'iux jiacc dongr e quw.
Tnix jnee pak puerdnuax, ho puah sew tokax. Dngrdiamxdinn, dagg qangx dy' hyw tnix.
Snetnuar
Ganw jingx ciuw kuair, liusimx-diwir, au jxy jair jit xee nng huer ngix, ticbew decc kiaa qex jiokk juwsinn. Bad u lauxvuer :ee qangxqaur qongxx ginxaw muixmuiw si posad huawsinx, jiongquix beh laii jan liongxcinx siuhing buaa singwpiah. Singwpiah venr hyw venr baiw vutciangjai. U qniaxzii rair cniadii, qingqah qex kacc u dyrr kaksit urngiaw. Tnix kua .lyc .laii, diyc qaur lanw rair tnaw. Benw qongw sniaw. Hix kax lramw srinx, ginxaxngix henrhen dy' dxyy byy hxuad tihh.
"Jitt duir ang'axjiaw marr decc cuwbi. Siy' jiyx kir isingquanw vak vak .kiw .laii, jiacc laii decc jauw qozirngi qra langg' snix :ee py dngw laii riyx."
Cinjniaa go guec, qoii-qurqim gri qaxx herhe diy. Beh qra vuacvnix iacc dniwcnix junw byy tniax .diyc dy' lann.
Lamjingx-luxhed, jap guec bak jit suac, ang'ngix :a ciksinx-lortew laii dirr liongxqanx. Snix cutsir sui' xee draur jit qix pni qor cuanxkuir, jit qix cuir bagjiux vreh qimx dyrr beh tyxjiac. Derqiuu ee zinkauw henrjingg qongxx vingww cid-jap tongxtauu. Ser hanr ginxaw iauqix srid dxngr ee sinbunn cud vutdiu. Jarhngx ee cirvyr bre qongxx jit duir sinr Tenjuw ee ang'axbow snex derr go xee, ginxaw puawvni byy jnii knuar isingx jin' qanqer. Bangrlo siausid vyr qongxx lairsnuax jit xee cimxx siw laurve ee qadingg, drir hiwlyy ee laurbuw qnaa snax xee iur qniaw, qesu vecvnix, juann brang senrsimx sijer pacqiur. Sinbunn si jinx si qew byy der tangx jaqiur. Duiwbin jit duir siauwlenn angbow lirenn, vangr lau qongvyy-aw cua sunx pacialinx. Qongsunx qapp maxsunx ee vngrdngr kaiing jin kyr qnuatniax dagg guehzit ee voxjo, jyxiurlinn knuar hen hen.
Siangx kax lab kixlyc, ticbew qingquer jit qingx venridiamr. Jit senx modelu dirr qenwvunwduu lairdew kia tringg tringg, sinkux-dingw ee ngiuhogjongx jiokk duarvan. Cing jitt sxux kir jiac enwjiuw vacbin be cutsongg, jiokk jiahbak dy' e.
"Mamax, bax bax," jre dirr aurdauw :ee vorvinn juer sniax. Ue benw je, jit qxur vnuar qxur dy' tingww qiyr duarlangg qingxcniw.
Tauu uat dngw laii duiwdiongx, bagjiux qycjaiww dingrsinn knuar lo. Saixpunw ing byy liauw sii. Beh henwciuw marr diyhh kaix dirr ginxaw ee sinjniu kacc jniawvnuaa.
"Nex nex, daw daw," angg angg iur iur qiamx laujii, sewhanwlangg jiac vngrknax diongngx.
Digsuanw
Ganxjenn u nng diauu lo tangx qingw. Qa cuiwqinx quewvec jitt quanx vniar u quer, tangx qycc jiac lecc id~zi-jap dxangx qongxx kyxviw dyh-dingw nrix qamx. Acc narr beh qig hangx hangx vangr lecc quewjingr, juxdi-isingx lig bagbaii cuixliong, qongxx qnaxx tuax be qaur jiac dangjec'ngii.
M si iamwser byy siyh mia. Idi ee quewdingg, sindew qongxx e sriu dua dnaxdiap, buerjingrbue, qutbah singx tniar lecc danw. Huatvne liauxau byy jycsid byy lirlo, liongrsiongw iyhhuir qycc be si siyxkuaw, simqnuax jauluan, guanaxx huanlyw lecc danw.
"Sniwmia vangwsuah taiww nngxjniaw. Bylun uirr jnii, uirr miaa, uirr air, uirr qaqi, uirr cinlangg, iacc uirr tong' suwhaiw, jit kauw kuir iaxx decc cuanw, sui' langg dagg qangx dy' diyhh qauvniar. Vniar surgiap, vniar haggiap, marr rair vniar sintew iongxqnia."
Laircinx guarcig jiabjiap kuanxkngr, jerje juceh marr u juan cavutdyx jitt hy kuanw ee bunn decc qikle. Langg uac lehh beh hiongxlok qapp hiongxhog, jiac qaur quiw huer jiacc u qauwgiac, junw jaw siw erdangr jaw ciausingx? Cutsir juer langg qoxnarr uirr beh lirig jiongwsingx, dangsii dywjow, CP ee puewdah tangx hyw qringx qaxx siongrr quann?
"Hyw siw qapp be diwvni, binrjingg nng jiongw iyhpnir, liw e qingw dycc jit liap?"
Bad u langg dirr bangrlo-dingw cud jitt xee detauu beh qiyr bangriuw tiausuanw. Cocox knuar .diyc dyrr jamxzenn aw u qamxciog. Buexciuw dycc jit vingg kacc dua tong byy kir qra juwir. Si siyx si lingw, si qiamm si jniaw, jairr langg' cuiwjic decc damx. Vng byy decc cniar langg' jiac, iyhbi siysiangg, qindux longxx diyhh qaqi tunx lyc vxag jiacc u junxsngr.
Langg ee itsingx qongxx si qapp bang jidvnuangiu. Bixbang, hiongbang, zusuwbang, diyhh danw senzinn laii tokbang jiacc tangx cingcniw iarquxqnaw.
Lau
Dirdangsii aw, siauwlenn kuanw si ylyw ee uergiw, si qywzinn singjiu, camxcaiw qycc si siarhue derui ee denxhen. Buerjingrr lau, tauu vehmngg qiamx bin liksunn, ingxingw si lik taiww jin jyr quewquar soxx drir. Voxiyc m qramx tnia, niw taujangx dxiamr iurr byy beh qniaa, ho'ngg liahjuer si lau a'qongx lau a'maw marr duxaxhyw nardnia.
Denrciax kahmngg beh qycc kixqniaa. Binrjingg kia jit xee u huer kuanw ee hurzinlangg, u qig guarkir, jrngx kir vutjiw diaudah, taujangx u seto qycc si ox simwsimr. Lanw taukag-dingw vnuar ovec, jyrui si rair niu ix jre iacc benw?
Dingxvuer siongsiongg qawsi ervuer diyhh qingwdiong sirdua, qongxx m tniax laurlangg genn, jiahkuix jairr ganxjenn. Sna' jrunx sna' cunn kiokk si rair, jiac lau m zin lau higjiaw hunw qruad qau qau :ee, diyhh anwjnuaw duiwtai jiaxee lenlyw :ee kacc duiwlangg lehh?
Cud denrciajam, bixiongg ciuxsut ee kanwvanw tatdyxqex. "M tangx ixx guarviauw qa'ngg lunrduanr". Bylun sehngx iacc danghngx, jitt kuanw ee sioggixue longxx u der tniax. Daiuan'ue u qongw, "suiw tauu suiw bin caur kacngx", qycc u qongw "jiauw suiw dirr mngcaiw, langg gauu dirr vaklai". Vaklai u-byy liamsii-liamjun vutdig liauxqaiw, mngsig vehpuw byy sincaiw jiyw langg air. Desig, jangsig, ciacsig, danghnglangg niw qaxx venr qimsimngg marr be hanxqenr. Dahgni m niw narr byy jit xee lixkir tner lehh, kiwpig denw be cud .laii qycc dyww huanrgiauu qnaxx dy' e. Kyxviw jingwlangg pangg siyjiuxvuex qo' qo' lanw limx dee, indnuax kixliw byy qaudair e pnaiw singkir.
Guaw ee juxdniux, liw ee libdniuu, ix ee qewdadquanx, dangsii inx siuw, dirsii diyc lanw niu, jaix jinwter qycc iarr erhiauw liong-dair.-liong-siauw, hagbun knix cimx byy drew yc be taur. Knuar e liauxted si derqix, vangr e lyc qiamxcaiw jiacc jaix snesixmngg dirr dyhh.
Qrer
Ciauqib cirdniuu, mic'axvar bre qaxx dagg hxang u. Kixqyx, kixbinw, kixtog, piautauu quaww qewqeh longxx dah dirr binrdingw, u kuec'ing :ee, beh air zuarr je qaqi tec. Jiac biw, jiac pxangw, iacc jiac mi jairr langg' kuaiwir. Siogqer ee qniartauu qex jiokk belangg, kacc u siautauu soxx dongzenn. Siar sioghuer, lirsunn beh jniurkamw, sngwvnuaa rair jimjiog tag. Liauw jnii byy vowbak, jitt kuanw singliw vitzenn byy langg beh juer.
Bylun jiac :ee, cing :ee, ing :ee, iuxhingg :ee iacc buhingg :ee, tangx qongw qniarqnia longxx u jit xee qrer. Kir uaw mngcuiwkauw ee tonghorqui quewginn, jnicar cutmngg, mihqnia venr lanw ee. Vnivnii qewjnii brew .dngw .kir, u langg jad qeqiamw kiam kiam aw ing, u langg sanwpunw ing. Tauwdew byy tiachongx dunxtiap dirr cur nirr buexsinx venr vunwsyr :ee marr vutsiauw.
Singliw-hxuer be qongxue, tauu jiww buew iujai langg' cuxdir. Langg qapp langg dauwdin, amwjni decc cinr langg' ee qinniuw, langxknuar duiwhongx duiww lanw u sniaw hyxcur, jitt hy kuanw dai hro langg jai'ngiaw qnaxx e huanrhiamm. Lanw knuar langg' puw puw, knuar qaqi bu bu qycc ongxongw byy diwqag, duiww cin'iuw, duiww siarhue, simrjiww duiww juanqiuu u sniaw lirig, u zuarr je langg bad huaa .quer.
"Hisingx hiangxsiu, hiangxsiu hisingx", kauxhy ee qingxqair quann kiokk si quann, iong qorr huah :ee sidjai qex kacc kuair. Susimx qapp iogbong, cutsir lyc too dair diauu diauu. Zuhyy siar srinx li, qangxdairlangg ee siokdee.
Genr
Cnixbinn ee kofi, byy limx e kiamr sinn. Diauu hrunx diauu jiuw qongxx yh qraiw, diauu qavix iarr siysiangg. An' ingquer junw qunxjuiw decc quanr, qaur jiangwsii qiamw qaxx cunx jaixkiw bagjiux vreh qimx jit vxuex, lunrjinx, iarr jin' tangx qra qaqi ylyw.
Nng huer vnuar ee ginxaw dirr kectniax decc sngw ang'axmic. A'maw dirr jauwkax cuann daur, qiyr a'qongx siyw ngiaw lehh. Hut .jit .xe prongr ar jit sniax, suar .lyc, dyrr tniax diyc ginxaw decc mawmar hauw.
"Liw sidjai jiokk be qaudiong tihh. Qui' jaixkiw qanda' iauwqinw knuar liw hitt xee vywjuaw. Cxenx vuthing narr cud iwgua, binaxzit ee tauu diauu ngua vyr lanw daux, liw dyrr jaix kow," lau vyy-aw lexliam lau angx jiokk qudcuir, qycc longxx byy decc qnuaix aurbuexmngg.
Ziddiongdaur, dua hanr :ee snuawyc, jid'err zip mngg sui' decc cue IPAD beh sngw gem.
"Jiac daur vaw, qongqyr siauw liauw jiacc erdangr sngw."
Ginxaw ee laurbuw jiwsamx-jiwsur qaudair ee ue, ginxaw ee a'maw jit zri jit qxur naxx cincniu decc suantok singwjiw.
Denrsi qapp denrnauw knuar quewtauu quw, tagceh be juwsinn, juanqax jiabjiap siaw bunjniux decc jauxtaur cud qingxqyr. Sirduarlangg brew hro qimqniaw ee lexmngc, quer snezit :ee jrih quer ciuw hitt diap dyrr juwdnia dimbee.
Denrue decc giangx, puewdat beh laii jinwjingg singx lenlok. Go hunjingx au, mihqnia moh laii qaur mngcuiwkauw.
"Si'angw ee kuaiwdiw?"
"Linw mamax ee lar."
"Nacc e dagg vaiw longxx ix ee?"
"Liw laurbuw hiacc gauu brew, liw m jaix?"
Maxsunx :a jit qxur laii jit qxur kir.
Mngxvox harvanx-siqanx, ginxaw ee laurve laurbuw sna' tapkax dngw qaur cur.
"A'dxi-aw jiac bue?" haursnix mng laurbuw.
"Ejaiw cutmngg u qongw benw cuann ix ee. Linw cair jongw gneh gneh kir puer," laurbuw dab.
"Ix si decc byy ingg sniaw?"
"Ter langg' decc suanxqiw unrdong lar."
"Si u qangjnii tangx tec iacc byy?"
"Iarr suacc u!" laurbuw rinr. "M si ve iarr m si hniax, hiacc vniawsir m jaix decc congr sniaw? Genwtauu qaxx byy buew."
Jiac amr vaw, simvu decc sew nguaxvnuaa. Nng xee ginxaw sngxhua herhe diy, dirr qui' cuwqingx decc jauw siy' zib.
"Kir cue linw vavax mamax lar. A'maw decc knuar denrsi."
Jit qangx ee kangkuer suah, lensiogqiok knuar qaxx dng' hingwdauw siongrr qniax langg' caxvanx.
"Guaw kacc nguar beh cud .kir. Ving'iuw jiyx guaw luax baciog."
"Jit ciongr nng ciongr dyrr hyw dngw .laii, m tamgx qycc pah tauwmii."
"Minaxjair hiyckunwzit, byy qangai lar."
"Qui' amr byy kunr, sintew e pachai!"
Siauwlenn bow tniar angx. Anada tniax e zibniw bor vutciangjai.
"'Quer qaxx jiokk hibii, uac qaxx jin' byy hingwbi. Byy tauu junn dingrquix sraiw be hng.' Bincngg-tauu jit dniux uisux danqanw qaudair, qniaa dexlo ee cinglenn dirr kecgu siyx huextnuar. Laurbuw qnuaw qaur xui qnir diyc ixx juadkuir ee qniaxzii, nngw kax kud .lyc vangr sniax hauxkaur. Huatqenr sitew ee luxdiongx sueh qongxx..."
Jitt diauu sinbunn iauxx bue vyr suah, denrsi dyrr ho'ngg qimr srid, cuwvnix bogguu ee sniax puu juann byy paiwpuex, pah kok ee unrlut be tuatic iarr byy sraiw qinxliauu, quilo vnii pypyx.
Horer
Juxqiongx-lai ee snewmia qaiwid iauwqinw dycc jit jann? Duw diyc dua do jertex :ee, iauxx byy hiacc hnowsusiong cimxsit kir mng .quer. Jiong' simx viw simx, siwjix-vikhaii juann srinx byy puawpah kia tauu kxamw vycdnia byy jinggi. Dair sinmia cutsir pnaiw iyci siangvingg kow, ginxaw sindew siurkow, duarlangg simqnuax qankow.
Suar .lyc kacc duiwdiong sniaw? Narr dangxjinx lyc kir jasunn jongxsngr, druu kiw qniarsinx, jingqongx kiauxqud ee ginxaw liongrvid marr langlangg air. Sirser qar be e, sirdua e qex jiokk tiamxtauu. Singliw-cuir cud qongxqyr rair duawin :ee caixbew inx ee huewmic, qongxqywsuu muixmuiw e denw qongxx jiac inx ee jewpinw, vakdow-lai ee ginxaw aurzit aw e zuarr aw nirr iongxjongr qycc zuarr aw nirr cangmiaa. Co' jyr langg' verbuw :ee hnirkangx kinx, uirr bue cutsir ee qniaw, sniaxmih jnii dy' qramx kaix.
Binrde qapp singwde dycc jit xee jiamr derr snax u qauvniar. Qoxjuix qycc quailuaix ee ginxaw ingxingw did langg tniar. Be tangx liongxqiamx qiyr lanw qingw jit hxang, sniu laii kixdyr, vruac vruex kacc singw loxlat.
Hyw dikhing vaii byy snesiur, senrliongg ee simqnuax kacc jiyw langg junwbun. "Hyw-simx-hyw-hing, byy snxax tangx cing". Sewsu lingxluanw, qoxjaxlangg qamxsiu u diyc, bad qaxx u taur. U snxax byy snxax qokhe, jitt hy qniaw hen dyrr yh snex. Muixx jit xee angngex-aw vunxsinx venrsi iogliam ee sanxbut. Hurjingx qapp buxhed u qnaa citjingg-liog'iok ee singhunx, beh snix cud zin'iok dngrsix ee au dai, jin kyr qiinx dudvenr huanrser huanrser.
Cutqex qycc jiongsiwlangg m bad qewcua :ee, inx ee iogbong vixqauwdig u kacc qe. Jiawiong henrdai ee kyqix, qra huesniurqax iacc sinhu ee jingtangg qapp siuluw iacc luxnii ee nxng jokhap. Jit dai suar jit dai, zinlui enxhuar jyr byy air snetnuar qaxnaxx marr byy snaw dua honghai, duiww derqiuu dingxquann soxu snex kax duar ciuw ee uahbut ithuad si hok'imx.
E sxingg be sxingg, u hau byy hau, diyhh cir knuar mai jiacc jaix. Qamxx si hamwsniu qongw tenked? Jairr togjiaw juxdniux.
Cid Dy Lunhuee
Pah amwbox, niaxlo k.-kamket-k., vo vo qinxsin qycc diyhh kinx kax qniaa, kenxe did diamrjing dyrr m tangx juer sniax. Vnuar snuax u langg decc kiarhongx laii qongw, sewzi byy sitvunw. Narr pnaiw xe hro sunlyy :ee duw .diyc, jit vaiw dy' jiac be sriaux.
Qihaii dang ngic'ngih, jingwqingx beh qnuaxkax vniar sokdo marr qinxqniu byy lo laii. Qangxx vah nii ee ngbacciu, qongxx si Zidvunw sidai jingr :ee. Jitt juiw sraiw u quer bew, knuar qac'ir ee tauwtnicur dyrr tangx sangr gendingrgunn qapp langg' pah dniartauu.
Kiw dirr snuadniuu ee nng janr lxauu-aw, cimjniw-aw u huesnuax hidii, qycc u aurqaiwtoo tingww jxaix huex jingr cair jingr quexjiw. Cakox pox ee lauvangx, qnuaa .langg dirr cur-lai iarr tangx tngwciackax benw cing cenxtuax. Zidqanx ee jiauw-aw-sniax jiokk dingwtniax, imsniax saiwquer denrdaii vywsangr ee qauhiongxgak. Vadd langg tniax diyc qiamxcaiw jin' cywhni, iarqanx ee horquaii og'ik hauw, jairr ix si decc pnuarkunr. Diamr snuax tauqex ee sinhun siauwsniu jiokk quw ar, e-be, jin kyr jitt dxauw.
"Beh dyw ar! Kia kacc vnix:a kir."
Denrdong-duarqur ee sniax jiacc cimxx tingg, qanghutauu cud hyrling.
Benw vunw ee singliw, beh herciuw jinwjingg dyrr u bingpinw, qongxx siugiac pac'unn vnivunx. Jnicar iauxx bue zip hauvaux, beh air suix air lapuew si tranr dohap, byy decc knuar sii knuar zit.
"Snuadingw ee lau qoxciu, censuer iaa je mixmuaw. Dandanx suh kongkir, limx horjuiw, hyx zit, langg' inx u jaidiau dirr derqiuu kia nng~snax-cingx gua dxangx. Lanw jiaxee cohux-siogjuw, siyjiuw suix, hibah hermia hud, qinw qinw dyrr siw drngg nua do marr sngr habqaizenn byy uan'ongw."
Qongw ee langg angg bak angg pnirtauu. Ue jiacc suah, sui' krox jit xee uc'aw dua dua sniax.
"Huewtauu jiac qaxx sngr cingx :ee dyrr venr jnix .kir .ar, hex u decc zuarr hyw?" Limm Simbok duiwcuir rinr. "Narr u tangx dua pax buew, jiac lecc veh~qauw-jap dyrr jiok'ir ar."
Siyjiuw pangg kiw, vxuex-drew beh dax, angsig ee igtew juad .cud .laii dih diyc tokax lrai siamxsiamw ee qesix, hionghiongg knuar, qapp huicjuiw hunrjniaa hunrjniaa.
"Byy giaa cyr ciu dyx, simqnuax ingg lylyx. Liw air beh ham' kimsiur tangtua pnuarlam, aurquer, ngua liw laii druar lairsnuax, qui' siwlangg longxx benw isuaw."
"Acc liw lehh? Liw beh druar dyhh?"
"Guaw jarhngx hro liw pud driau, snakaliauu decc danxvan dautaix."
"Liw e laii tyxsiuu .be?"
"Qongw tyxsiuu taiww dimdang. Jitt liap cniqiuu ee ciurbok diddit jiyw .kir, ram ram ee ciurnaa ho'ngg jauu qaxx vnir kuttausnuax. Zinlui amtamx, okcog ee simqnuax qra toxde pachiongx suar u uewkir. Beh anwjnuaw qra hiaxee lausiongg vniar hetqak, hro jurzenqair muixx jit cunr de qngqueh byy lasamm, lanw narr u tangx cutsir jyr langg, derr id iauwbu dyrr vaii jitt hxang."
Kunr jit muaw, qui' sinkux qaucqnua jingsinn. Lyc bincngg, bagjiux iauxx sabuix sabuix, kaliauu kir drong diyc ping dirr viacqag ee quwkiw byy sewzi. Higsinx be dixdik dyqur ee ticqngr, kangcuir jit srunn, huicjuiw-aw cabcap dinx.
Lriw
"Giabjer lunhuee, langg tauwsinx sibkir. Tanwjaw cnixgno, diwir siuhing, did qaixtuad tangx ongxsingx setenx qiglok," siangx ciuw qiokqiongx iplew, jingkok sun uerbuew.
"Lanw dair guanjue laii cutsir. Diyhh sinr Jruw. Jruw e sia lanw ee jue," tuandy qaur jit xee diaudnua, jit sniax "Amen" lamxbuew.
"Qiinx ee enxhuar m si itsii-itkig tangx juewjniaa :ee, ingxingw diyhh cingvah cingban nii jiacc knuar e cud huanxvenr. Henrdai ee bunbingg si quer traix quer li ee jit xee quewdingg," cuerqnir Denrsirdaii dersangr diwsig, vutsii u sinx ee huatqenr.
"Panda jitt hy dongtbut, byw :ee jit dxangx siauw byy quiw qangx. Qaur-sii-qaur-jun, qangx :ee kiokk dniardnia byy hingwtauu. Iarr bogquair inx qiongrbeh jehjingw diyhh siurr vyxiok. Narr ham' zinlui taucuir singtnuar ee sokdo sna' vixduir, nng jiongw singbut tangx qongw tnix cax dirr de," logo u jit jiah cnxiu dirr dingxbin ee cianel anxnisnix qongw.
"Langg air beh taujiac si tensingr. Javox :ee draur huexqir iacc jabow :ee u hniatauu longxx si qi'enn qaur, byy jyr :ee birvitzenn dyrr kacc gauu. Ervag dagg qangx jiauww jiac jiauww pah qaxnaxx zinrhun aw zinrhun, dingxquar qamxx byy dagg sii dy' decc samxsniu? Lanw sui' langg bongx simqnuax mng qaqi knuar mai," liongxsingr juanqax dirr damgenn jetbok kaihyx qongw dua qxur ue.
"Vuerlunn, gik tnix gik lriw, siongx langg siongx jurqiw. Langg e vehcadcuir si tensingx-jurzenn iacc u ngiu knuar ngiu cniaw anwha. Lanw siarhue narr iong'unw, vangwbak, qra dyrdirquanx jinrqaix hniwdanwsag, quibuew qnaxx e hai langg hai jursinx," hxongg huad krir tuad, bunsu bin du du.
"Dyrdig jitt hy mic si jairr langg' ciycdauxcinr decc liong dairsiauw, m si bxow sniaw langg iong huah :ee junxsngr. Qoxjaw langg decc qongw, snax qnuatniax m qnaw duanr langg' qasiongsu. Qaqi ee genhingg qor hro jniurjniar kacc sidjingg," juanqax dywtir gauu sna' kaux.
"Sioggixue qongw, 'senrog jiongiuxvyr', uree jiktauu uree jikbuew. Juirlangg lun kiw kacc zibjingg zibliw qycc u-jam-u-jad, vinjai lanw quanjiongr lixhue. Ehng'amr ee jetbok dyrr qaur jiax. Jriog muixx jit xui banrhog, hyw bang lentap. Amwanx!"
Denrsi ced huax, sokjing qiamx byy bangw. Ginxaw beh dua, duarlangg beh uac, jiac qapp kunr si qidew. Cunx :ee, tongvnuaa lauu hro tnix qngx minaxjair.
Lau Dngsiu
Huad amwsaix, diamw ding'iuw, jit zit iuqycc beh quer ar. Jiac amr vaw, vitamin dysiauw aw bongxx tnia, jongwiongw niqanx qaur dnaxx sxor jap nii jiac quanwsir ar. Haurgiam u-byy iacc zuarr dua, sidjai qongw byy lo laii. Jit qangx aw byy tunx, simqnuatauu e ciac'iac.
Quanxaxquar jun .kuix, langxknuar cunx snax~zi-jap liap, dingrquix dongr be qaur quer guec. Ongxquer iauxx u vnuar quanr, dua hanr :ee vnuar dnraw qui' sniux qiar qinw qinw. Dnaxx jinw dy' beh guehvnuar ar. Jaboxqniaw qurnii ursinx jurr anne sijid dngw kir hro angx cri. Taujniu-aw siongrdingw guec jiacc jyr dorjer. Cur nirr kaiing cuxvo jin kyr hordniuw. Jiahtaulorlangg, sinhong dorsiw :ee, longxx byy hnuaijna. Jnijuiw beh cutsin, siauwlenn ang'axbow qnaxx diyhh kir damx iamm creh cor jiacc u huatdo.
"Vycqnaxx si riyx ngix:a byy ingg qaxx be qir tihh. Guaw laii kar denrue qra jiywhue .jit .xe," qongw suah, cuwlairlangg sui' beh kir cue ciuxqix-aw laii kar.
"Benw benw benw!" lau angx huacsniax atjiw qinxjiabkuair. "Be qir did junw duw suah. Qorr tyw :ee jiacc u, hex dyrr pnaiw qiok ar."
"Qaqi ee jaboxqniaw iarr m si vadd langg. Mng .jit .xe tacc u iauwqinw?"
"Dyrr qongw mrbenw. Byy jiac be siw lar."
"Acc byy, guaw laii brew hro liw jiac, hyw bor?" bow hyxlew aw mng.
"Iarr m si m bad zri iacc m jaix lo, beh brew, guaw qaqi erhiangw kir. Liw benw qra guaw huanlyw," qongw qaxx cnix qinx dniur am, javolangg cenxsingr, ue zimw be diauu.
Byy vne byy tniar jiac vah huer, langlangg himsuan lau hyw mia. Qnuahuw kaivan qokbinn-lenqimx, jit quaw jiyx vyxhiamw :ee hanw qongxx qinxjuahban e dyw. Qaqi dongqisii u hnuarsngr knuar, lap qui' siwlangg ee lyqangx-vyxhiamw diyhh jongw qra siux .dngw .laii kacc dingrdongr. Muixx guehzit zip kauxjy :ee, langg' inx si uac zuxx quw niaw zuxx je. Jyr jit vaiw tehniaw :ee dyrr jin' gairgiyc. Air mia diyh'air jiac. Vngrdngr diyhh iong ginaxtauu kir dauxngua, be tnidingw lag .lyc .laii, cur nirr bincngx-kax marr byy vowngx.
Jingsinn hyw qaxx. Zit .sii, anlog'iw jre lehh dyrr dokqux, qaur amwiu dendyww kunr be kir. Ingg kax dirr cur-lai bongxx qniaa, siangsii nng qix ciuxqud iarr naxx hed. Cinvingg-qowiuw qang renn :ee, u bagjiux jniurer iacc drir lairjiongr :ee, u ciuw be jiclat :ee, siongrr je :ee si iyqud hongtniar qapp hongsib diwsuw kax tiux, be qniaa. Laurdendyr qaxx lenrr bow qapp qniaxzisunx dy' be zin .did .ee, duardniu qurnii duxx juer diongsiu.
"Liuqiuu, nng-bxan u tangx jau. An sii an kig quaww an liong. Banrkuir kaciuw syy syy, drong laii drong kir e cniuw byy."
Byy girniu, SMART PHONE qeqiamw cic, bangrlo-dingw ee luxiuu-qongxqyr qngx .jit .xe sih .jit .xe jiokk ngiarbak. Zidvunw, tosang cutsir hitt jun ee joxqog luerde, jurr jyr ginxaw ee sii dyrr itdit sniu beh kir, qaur dnaxx iauxx bue qexsimguan. Okinaua jairde qongw Zidgiw, auxbann aw ingqaix marr junxsngr.
"Sinx Daipiyr nng-bxan kox, jit qruir snax guehzit ee soxhuir jit vaiw kaix jin, qamxx hyw?"
"Tranr kax iauxx e qniaa. Jitt vrangx quewliauu kiongxqniax byy au vaiw."
Qunwqniu ee simqnuax u tuathuar. Zirjnaiw cutbew, crann crann vywmiaa, laurlangqniar diyhh singx ciauu hro jniar.
Vnivuic
"Ihak dua jinwdenw, ling'iyc dri gamm u hahjingr. Diwimr juann zinlui, genxhuad-tuandui qxongx kacc dua tnix."
Dingx dirr tauu vanw tauu, jitt diauu sinbunn tong' tnie jiauu hongdong.
"Iyhbi tangx qiuwmia. Jer iyc qapp cir dok diyhh siw zuarr je vehniauxciw iacc vadd jiongw jingsnix? Qamxx m diyhh qongding jit qangx juanling qra inx qamxliam? Iyhbuah idi langg byy hunx derqair iacc zinjingw. Jitt xee jeczit tong' sewqair hahlo, qaidongx viw Iasosnix iacc sinbingsnix iaxqyckacc tonghingg."
Sinvyr ee qonglun-dnxuaa, qinaxzit u langg daubunn anxnisnix aw ciongwgi.
"Ciah ciuw kixqex, q.-qing'ingg-i., sanwciah ginxaw venr dua tauqex."
Hoxngsig ee cecpuee, cechy u anqimx, "Cuttauu ee Iauwqnia: Bang puewdah Qinggiap". Duanrqir jitt vunw dongci. Veh'ue-vehzi, bue jniurdingx ee tagcecginxaw marr knuar u.
"Huwsiongx jnii dua vah, jniqngwtauu iuqycc srngr ann ann. Jnisniax liagliak hauw. Jywqanglangg decc toxkuir-vunhnaix, inx kiokk diam diam dnir vutdongw."
Ter tanwjiahlangg vutvingg, jabjir jit lexvair cud jit vaiw.
"Qisut qapp sinwliam jyr uaxdua, qensimx-qowir, hngvox venr canhngg, suaboo qam'uw iarr tangx cutkauw longsanxbut."
Jit qrii iuu jit qog, guehkanx jitt vrangx laii qaur Diongdangx soxjai.
"Jah qiquancingr qapp duarpaur zip mngg dac hxo, cuttauu-lyhqag dua siwqer kuix de, kailo. Srer cud bunai, guanjingg jurbinn isuaw kir pende. Cimhuan qatec :ee ziog qaur der beh qra inx kiyh dang suer."
Siysiang ee hiwbunn jit cud jriab jit cud vixlenn, ligsuw-hagqax jiauww sit qiwjair.
"Taiwkongx ijurbinn m si iausniu. Qenwdir sinx tnide dirr lingrr liap hingcnix, sngr sii sngr zit vutvid vah dxangx."
Hueqiqog ee NASA cuicig zucuw zucuw, jevnuax jevnuax, zidvyr amwvyr longxx u bre sinbunn.
"Derqiuu uer byy qraur, E.T. kaiqix kiarkiw ee soxjai iarr beh uer laii draur. Simx byy cingkir, kir qaur dyhh punw qaur dyhh."
Bangrlo ee hiongdamm, duhcaur juanbunqax, ing amwmiaa huatviyw, byy-qimr.-byy-ki.
Dosuquanw sec jit linr, tauu hrunx hrunx, nauw dun dun, bagjiux jniurer kiw en'ng.
"Anwjnuaw vaiviw jiacc habliw? Jnuaxngiu jyr duiww zinlui iurkacc iuxig? Sniaw kuanw ee jingwcig girliw si? Si jiauww qongquad iacc iuxsiqnuax gixdnia kacc tywdongr kacc habgii?"
Ingxqow qaur dnaxx sxor cingx dxangx, dethak ee lunrven m bad tingg cuir. Juqui-dingw, m quanw uisimx iacc uibut, qingsux qapp guarceh qeww dydyx byy kuathuat.
Hiycho jauw zip laii qongjingr sed ee suquanw, dirr lairbin iuhongx beh qui' ervox. Dirr jitt xee qongqiongrqair, byy dniudii laii :ee, siy' srii si qex :ee.
"Simx jniar byy siaa jiac tenliongg, gendong-quxjiw si sxen si og, inqyw u vyr benw huanhyw."
Ho suah tnix jnee, giaa tauu knuar diyc hunxviah-dingw u cud zirvec.
Huesniu Quer Kex
Cunho jiokk vniawser lyc tauwmee, qaur qaxx zit beh jniurqangx jiacc jaix siyw hiyccuanw. Tnix barbu qngx dyrr kixsinx cud huesniuramx, nng xee qaiwtauu u uwhy ee jingdoo vorqniaa qaur jit diauu jiyhkex-qnii, henrqnir diyc kex lrauu juiw taur, suiciuw jah kor trngr cauxnixaxee, byy derr zi qxur.
"Kejuiw sna' jinglauu herhe qiyr. Suhu juvix narr tangx ngai sinwluw quer kex, dua-un.-dua-dig, guanw e qiwsimx qiwqnuax ingxqiuw qamxliam," uertew byy-lamx.-byy-le, juniuu snesingg qud qud, kax jiamx ciuw iur, ni'uw-qongwduan cing qaxx nngw pangxpangw.
"Lamluw siursiu vutcinx. Jin' duiwvutju. Sijuw qnaxx diyhh dngdanw tewjuiw iacc iongtog tazinn," tesuu-tokqor, siyw huesniu iyy ciuw nih bak.
"Guaw ngai liw quer."
Siang qauwmngg ee suhniadi juxdniux vutsiongdongg. Dua huesniu dniux bexser, uat dngw srinx, juniulangg vingww pag dirr ix kajiacpniax, siangx ciuw qruax dirr ix qingqactauu.
Ziogtew nngxluanw, ho'ngg ngai :ee qui' srinx pangx punwpunr. Kex-drew jiyhnng duarser liap, vo vo diyhh qig simsimx. Byy dniudii dac liux dac cux .kir, snakor jniursib siyc siyc aw dairjir, vuac qaxx tauu puar hni uec sixun hro juiw lrauu .kir dyrr hiauhing a.
Longrhiamw lriauu juiw, anzenn kixsnuax, qoniuu-aw iptauu suecsia. Huesniursnax ee erkaqux damm jniucjniuh, cutqelangg diyhh singx qra jun dax jiacc tangx qycc qnuaxlo.
"Vudqax derjuw qapp luxqair u jitew ee jicjiab jin' bydiok. Lanw si u siurqair ee bikiu."
Beh kir qiuhuar ee lordiongx, giga muaw vxag, siyw huesniu-aw juer jit xee tauw.
"Guaw dy' longxx hongwha, lenrr qasex dy' hro zidtauu pak qaxx dax secseh ar. Liw qanxdyw iauxx m qra jitt jann vangwhed, qaur jinw qycc knii diauu diauu lehh?"
Dua huesniu qra dywhib. Siyw huesniu cih tauu, bin-aw angg qiwqir.
Lyc au .guec, dua huesniu kuicyx qycc siogqex, qangsanx co' qenwgiap, crua bow danw qniaw cutsir. Lyc au .nii sxingg jingwqyw, siyw huesniu itdoo sriux koxhing, jinxjog u dua jingjinr.
Haur
Dingw guehzit vuerbong deh juaw. Jiac jangr knuar langg' iah lingjunn diyhh qycc danw lecc jnia' qywguec. Dirr Daiuann, jex diongx:a siongrr jiwjiw iauxx u jit xee jeh rair singx quer.
Jaxkixvox, dua hanr qniaw qapp simvu cua laurbuw kir iuguanw dac cauxcnix, diongdaur dyrr dirr jiurqin ee cantniax ingrvng. Nngw vox dngw qaur cur, urhuewlangg kir vangqingx bii .jit .xe. Amwsii cid diamw vnuar dirr hiwdniuu u duarvanhir tangx hyw knuar. Qewcud ee jaboxqniaw piyr jaw jaw dyrr tiah hyw ar, qaur-sii-qaur-hau sraiw jurqa'iong :ee laii jair ix kir, dingw zit aw buxaxqniaw sianglangg u iog dniardiyc. Dirr ngirde tagceh ee banx qniaw jitt vrangx berdangr dngw .laii, hinghaur a'buw iong qorr qiar lexbut.
Juanling sriok niunew ee jeczit dirr lexvair. Qecdngw qangx vaiwid jaixkiw, ciuxqix-aw cimxx cimxx kixqangx, LINE dyrr diangdiangx qiyr.
Angg Taiwtair:
Suacc u decc zuarr hyw mia? Iarr byy sidhuir hro :lanw.
(dingxvox 8:15 ixx tak 3)
Naa Taiwtair:
U qraur kaiing dyrr junw .quer lar. Inx siauwlenn :ee u qniaw rair cri.
(dingxvox 9:28 ixx tak 3)
Ngg Taiwtair:
Ginxaw iauxx beh qapp lanw jitt hy u cauwlaurhenr :ee dauwdin diyh'air taux ciyr, m tangx qycc hiamm a. Guanw qniaw buerjingg crua dyrr vnuax cud kir druar. Jimxmaw lenrr quewnii dy' toksurqor m dngw .laii, micsaiw qongw qaxx sniaw byxcinx jed nguaxqyx jed .kir.
(dingxvox 10:17 ixx tak 3)
Vec Taiwtair:
Qamxx m si qongxx ix surgiap qaiww byy ingg, dngw laii jit jua iuqycc jit qniaa sir~go miaa.
(ervox 12:10 ixx tak 2)
Naa Taiwtair:
Guanw qniaw ham' inx laurve dongrvutdong dyrr qauwnau sna' dakcuir. Druar jywhuew iarr byy decc kacc hyw.
(ervox 2:28 ixx tak 1)
Vec Taiwtair:
Siauwlenlangg u inx qaqi ee qenwqaiw qapp sniurhuad, knuar lanw jiaxee qu taunauw m quewbak qeqiamw marr e. Inx narr ving'anx mair ziaw cud su, cunx :ee dyrr hamr hamr a, duiww qniaxzii sirser qacqer si qex pilyy lar.
(ervox 4:27)
Gnirtew qapp nngxtew jiauvi, henrdairlangg uaxlua kyqix sanxpinw, lenrsenx qikqow benw sna' duxtauu. Zit beh lyc, tnivnix u gnoxcaixhunn, jit qangx sud .jit .xe iuqycc quer ar.
Bang Brang Bxang
(Ang'axqer)
Siuwle ee hingtiyy, diaudad ee qiau'iongg, ciuxqix-aw hipsiong benw zip dexpnir. Qingw siongrr suiw siongrr tig :ee, bangrlo kaitongx, pox dirr Binrceh vunx langg' knuar si nng vo vnuar. Qorr vunxmiaa, vedmiaa, iaa ciokhy juwceh jairr langg' air, quww langg' hy. Dangmiaa siangzirsner byy siongqanx. Ang'axbin u bingg, cinvingg-qowiuw jai'ngiaw si "guaw" kacc quandiong. Dingw zit aw qiar .cud ee hiaucingw qaur jinw byy-im.-byy-sinr. Qamxx si bangrlo u quaiwjuac iacc qix-aw hai .kir? Qoxving'iuw jiokk quw byy laii qniakaqaur. Lanw soxx qongw soxx juer u dyc'ui qycc kir ditsid diyc ix, qaqi kiokk byy diwqag qnaxx si.
(Siuwjaii)
Kiw vid, tnrix vid, vangr vid, vinjai simjniaa kimoji. Kekyw u liauu u diau, jarhngx ervox snax go lak qxur qangxlun tenbunn, qimtenx derliw beh siaw qui' pnix. Bangriuw cing'iongg qongxx pokqow-tongqimx m qnaw drngx. Vaklai u qryx byy kanghix, sanwdnaw pah hxingx sueh si, dua bin be angg qiqix. Samdingw zirhy :ee jongw tangx qauvuee. Bangrlo-dingw sigsai :ee, sewsu-zinjingg benw vueduer. Junw u kiwbi be siongdoo, ue qongw be jiahqax :ee, suiciuw qra srair .kir sanx driau si bersux decc quah quxcair. Tangx sigsai :ee je bixmuaw naxx sualeaxkag, qnia'uir anrliong, benw kuawsimx e kueckiamr.
(Qongjuw)
Uahqingw qapp bixbi, beh kiycjip "janw", jitt nng hxang vutsux siongrha, dnuaxdnuaw vaii taujingg miaa. Dangngiuu, sengiuu, dingxqangw, erqangw, sngw qaur dyhh, jiac qaur dyhh. Dingw vrangx u langg kanx ciuw, jitt jua beh dnuax vuex. Cinjniaa go-jap iacc ving'iuw cid-jap qui' din siy' jiyx kir tittyy iulamw iarr vutjiw aw jiap. Zidjiw huacaiw m si juixvec, duiww vixgnow longxx qaudair e quer. Mraxqycc jiahmia :ee iarr u jit vo baiw, langg' knuar quw e sen. Unreh dakkap samsii-gordiauu. Qongw simjniaa, tauw utbun, lenrr quw byy tong'ongw :ee iarr e laii qra lanw siyh siyh sna' an'uir.
(Qojiauw)
Jap qix jingxtauu-aw u qraur auw, cec'iuw sniu' je lylitix, jin' sapsew. Bangrlo byy qaiwhan, byy rue aiwiongxsnuar. Dirr cur nirr cic zirvnuaa gryy niauxcuw-aw, suwhaiw sec taur taur. Iaxqyckacc tangx ylyw :ee, byy mee byy zit zxic-sir siyxsii qexsinx, amwnguawjiauw iarr u siongrr cnrix ee siausid iacc diwsig tangx kipsiux. Gersut qapp imgak, jit xee knuar doo jit xee tniax sniax, jitt hy kuanw :ee kacc nngxliyc kinkuaw. Dethak ee lunrven rair ing diyc taukag. Qiklixkir u hyw byy baiw, samvutsii aw hro nauxqinx unrdong .jit .xe, jiac lau kacc be vuttuu iacc dongwgong. Huanw siarhue iarr hyw, qanngg, qodagpiah iarvar, susu byy air longriongg, juxdniux byy hingr denxkangx, cnilangg m tangx gong tauu gong bin beh laii damxhongw. Qapp diqaux qongw sukia'ue jiacc si lanw ee kuiwkauw.
(Denrsi Sinbunn)
Honghuexcniuu kitt hairkeh cimdin, siongrqaiww sipair ee siarqunn-bangrjam qimjaw vairbew, qangdingsux iauxx decc cniuxqiur voxtag. Byy biw duw diyc zunrguec. Denrsinr qongsix siy' pacden inxsimx dng .kir, erdauwvox qaur dnaxx longxx byy huatdo lensnuar jniurbang. Iongrho hotnix huanwde, bersux sewqair buadzit.
Enn
Danqanw ee hingliw, ciuxybut jit qnia. Sewnngw jongw cringx, qehuew jiauu vangr, xe zit aw, sinkux dngrr luix, dro sniwmia diyhh pongw vxuah qiukid. Siuhing jniurlo, kuix kax dyrr qniaa. Siy' srii siy' sangr jin' dongrqangx, jenxhingg qex tuavuic. Qongw hongdinn knuawpuar taiww dimdang. Uirr beh qriuu dy tangx li kow did anhann, bylun qusu iacc vehdingx, jiauwliw longxx tniax e lyc.
Dyrdniuu diyhh piacjing, amngi iacc vudsi byy dirr dong marr dirr snuadingw. Snualo qiarsialux, diyhh unn aw si vreh. Buerjingrr qaur, dirr snuavag ee cimx snuax nxaa-lai suacc tniax diyc u langg decc hauw. En' caccnix sun sniax cue, dirr uaxpenvnix huatqenr diyc jit qingx tiaukacur ee erhok jre jit xee mauccuir, gniaucsniauh gniaucsniauh ee a'vyy.
Cik'uaw qinrjingg sna' jiycmng. A'vyy :a vehmngg tauu, cuiwpuew moh moh, baudunn, bag'yx tab tab. Knuar diyc langg laii, qinw qinw kanx ciuxngw-kauw crid bagsaiw.
"Guanw qniaw sinkux u hamrsamr, ongxzit aw kixvni. U kir biy nirr qriuu iyhciamx, jiac be kixsig dyrr qnuaxqinw qiu'ix. Jngx-aw-lai ee sensnix sen' knuar dy' rix be hyw, dingw vrangx laii, qycc suacc hnair tauu qiyr lanw diyhh junxvi vran horsu. Guanw haursnix cutsir hitt jun, snisii-zidguec u cniaw langg' knuar. Knuawmiarsenx huanhur qongxx dingnii diyhh kid bow, quer zi-jap byy puer tauduir u vnireh. Lanw m sinr sniar qra vangr bangg, byy ingrqangx qra qenwdir qeau. Guanw daux sanr giucgiuh, langg hyw hyw dy' yh juewcinx. Dnaxx jitt sniax dyw dirr bincngg siw gen gen, beh taixdyw u qoniuu-aw beh puer .ix? Guaw jit xee lau qnuaxhu, jongw :a qiong :a, jin kyr jitt xee dnuasniqniaw. Cuxkir beh qo si'angw? Qnaxx diyhh kir uaw lxii uaw viah?" hambak, bagsaiw bue dax qycjaiww lrauu, lau a'vyy lamrluir hauw, qiongrbeh exauu be dngw sniax.
"Lanw si beh cutqex ee langg, jnuaw tangx kir qewangx?"
"Siuhing, qiuwzenn iarr uirr beh dro jiongwsingx. Bagjingg u lyhlan :ee rair lanw jo inx qraiw xeh. Qenwsuw-vutqiur hen qapp lanw ee huatguan sna' vuergik."
"Onglok-cuir, hoo luiwluir. Qra dingxjinx sinr daucdauh birbenw taiww gongrtyc."
"E jniaa be jniaa, diyhh cokknuar jiacc jaix qangbuw. Vangr jit xee qolyw pauruanr suar ham lyc juadde, tenliw-liongsimx qaudair be quer, siusingg jingwqyw iarr ingxx byy vyc."
Simqnuax hunx jyr nng vingg, id laii id ongw vren kiw jiokk qikqax. Amwsniu jit vox quw, he jindniux u juxqenr. Snuadingw ee cauxamx qimzit juwdnia e qiamw siux jit xee jaiqox.
Dongzit uanhunx. Amwtauu, duarangg ee lahdiauu decc siyx, sinniuu-aw taur mii byy kunr juan'ir kanwqor qaxnaxx decbeh trec .kir ee sinqniaxsair. Qxex tii, tnix tiah hxac. Dirr bincngg-dingw dyw :ee jingsinn, kaiganw tiw qimx liac jre dirr bincngdy ee juniuu qimx qimx siongr.
"Sidjai taiww kiauwbiau, taiww cutqii! Iarr diyhh zxinn, iarr diyhh sinn. Liongrsiongw linw vingsingx u juer jikdig, qongjow u decc vyxvir," sensnix laii ongxjinw, bai byy jxingr tangx hyw rix, itbi huah kaxquair, vut'uad.
Iyhcauw benw jnuax, iyhtngx benw limx, guandew jit xee gniauh gniauh hiamw didkuir :ee henrvo kinqnia iongw linglingg, jychngg iacc kuisnuax longxx byy decc huah qanlann. Jitt quer byy hro Giamlyy siux .kir, javolangg u did diyc diamxhuar, duer bow sinr vut j.-jurzenn-z. Qniaw byy srid .kir, byy vanrpuex qycc kiyh diyc jit xee simvu, cur nirr laurhuexaw jiahcair liamrqingx hnuasimx-hixguan, byy vne byy tniar kunr kunr aw lau .kir, virr jiap'inw kir sehongx q.-qaizenn-z.
Danhux-jiaccex, siauwlenn angbow nng langg siong'ix sna' tniawsiyh. Zit .sii, juer angx :ee cutgua jycsid, juer bow :ee kuanw cur-lai, cair bongxx jingr. Qesu iarr hunliw. Bow sew snxax, angx srinn cingx juiw tua; bow saur der, angx lux tokax. U jit zit jiac daur vaw liauw u horir, bow kir dniadauw siux snxax, ngiaw qnir diyc cur taujingg ee bagsamngg uanxzenn u langngiaw. Qinruaw kir knuar. Jit xee genwsenx genwsenx, binrsig vehcic vehcic ee ginxaw dirr inx vnuar mngg-aw ee mngvingg vnuar tedyw, sinkux-dingw ee snxax jaux jaux, l.-lamrluir-l., tngwciackax, kax ox sysyy bersux qiapquanx :ee, kavniliamm ee olaixhueh ox qui' lringg. Hiamr angx laii qra ginxaw py .zip .kir. Limx quaw amxmueaxtngx liyc aw kacc u kuiwlat, ginxaw kuix cuir uan uan aw sueh kiw.
"Guanw laurbuw dingw nii quewsinx, guanw aurjig dyrr m hro guaw kir tagceh. Muixx qangx diyhh dnax juiw puar caa juer huan'axguu, an' tauwjaw juer qaur amr longxx berdangr hiyckunr qycc qanda' erdangr jiac jit dxngr. Jid'err m cingwir, ix quntaubuw dyrr laii jringx guaw ee vakdoxvnix, urdang'aw si giaa cuee-aw sud katuiw. Jitt vaiw tuatdyy narr hro liac .dngw .kir, guaw unxdangr e hro pah qaxx vnuawsiyxsiw."
Ang'axbow tniax liauw jiokk vutzimw. Bow kir cuann poqair, angx kir laur siyx juiw beh hro sexik. Jiac vaw, sinkux sew cingkir, iarr tiamw iarr air kunr, dyw lyc bincngg, uaddngxsinx nia dyrr kaisiw hnuaa hnuaa qiyr.
Qecdngw qangx tauwjaw tnix jiacc cimxx jiauu qngx, u langg laii dirr kauxbin decc kar mngg, mngkenx-aw longr qaxx beh hai .kir. Air cutgua jyr kangkuer :ee decc sew ciuxbin, virvan jaxkixdngr :ee vuhiax vangr lehh ser vo jauw hiongr duarmngg.
"Linw jarhngx u knuar diyc jit xee ginxaxlangg an' jiax quer bor?" kia dirr jiyhgimm-aw ee javolangg duarbuw hanr, caqangsnix, jiuwpni, bacvniaxbin, bagjiux cnex ginwginr.
"Gin.. ginxaxlangg! Sniaxmih ginxaxlangg?" sinwluw vnuar tuntor, rinr qaxx tic tic tuc tuc.
"Cur nirr ginxaw taux jauw byy hamrjue. Taujongg langg' daux ee ginxaw si rair jyx qnuahuu," dua sniax himx, javolangg og kiagkiak.
"Beh cue qniaw diyhh kir vadd xui. Cur nirr jinw dna' guaw qapp guanw bow, haursnix jaboxqniaw longxx iauxx bue cutsir," Senrlamm denw kiwpig, an' cur-lai uaw laii qapp qeau kia dangjee.
Og hanr pni-aw bongx lehh, beh jauw jinwjingg qycc hiongr lairbin giyw .jit .xe.
"Byy sidjai ee ue, guaw dyrr si byy jaidiau qongw cud cuir," siuwluw trow dua kuir.
"Guaw jaix," senrlamm qongw, bin dair unsunn. "Qongw vehcat narr junw e lyc dergagsniaa, iarr diyhh guaw laii kir."
Angjiaw-aw hyhiap u qangrsimx, qra srid kir songcinx ee javoginxaw zin jyr kewqniaw byy ngirgi. Lenqex-qapkauw longxx qui'ix juer Vut ee derjuw, jensir nixgnow u sna' qet'enn.