Daigiw Siuiongw Qongxue

(Sir-jap-lak) Dangsaix qoxqimx tong’ u ee zinjingg

Sewqanx ee langg narr jid’err sanwhiongx, byy tangx jiac, vakdow iaux, diyrr kir cue u jnii langg, be qor did qaqi ee texbin, itbi qor diyc jiac, kap tauu qiujingg. Iaxx narr si jid’err cut’un, jiamrjiam hyxgiac, snax dxngr u tangx jiac, simqnuax iauxx byy buanxjiog, itdit sniu tamx, sniu jiac hyw cing hyw kia hyw, qaur buew rid diyc miasniax, sniu jiamr derui. Iaxx arr u langg did diyc dua sewlik, dua vur dua liap, dagg langg diyrr longxx jauw duiww inx mngho zip .kir vaqed .ix, aiqiuu .ix. Iaxx narr si hitt xee langg itdanr sitvai qaur jid’err liongvue, diyrr vingsii qapp ix qauvuee jin’ hyw ee ving’iuw iarr byy beh cab .ix, knuar ix naxx cniurr snihunrlangg. Jitt kuanw :ee diyrr si dangsaingiuu jurqow qipqimx tong’ u ee zinjingg, jniawjniar kyxtanr .did.

(Sir-jap-cid) Itliam itgenn itsu iarr diyhh sewzi

Qanda’ sniu jit hxang su, qongw jit qxur ue, juer jit hxang dairjir, iarr diyhh jabhunx sewzi jimjiog jiacc hyw. Dy’ si lanw langg kiw jit xee liamrtauu, ursii e kir huan diyc quixsinn soxx qimr ee dairjir. Lanw langg qanda’ qongw jit qxur ue, ursii e kir pywhuai tnide ee vinghyy. Lanw langg qanda’ juer jit hxang dairjir, ursii hitt hxang dairjir e juer lanw qniaxsunx ee jaie. Soxiw suizenn si itliam itgenn itsu ee siyxkuaw, vingsii iarr diyhh jabhunx juwir, dikkag m tangx lamrsamw sniu, cinwcaiw qongw, lamrsamw juer jiacc hyw.

(Sir-jap-veh) M tangx qipsingr iurr m tangx sniu’ kokhingg

Lanw sniu beh craa jit hxang dairjir, in’ui lueriongg jin’ ngidnii, jin’ hogjap, yh did liac jangw, yh did bingvik. Hitt sii jiamrcniaw jurr anxnix qra ix vangwhe .did, diyrr jurzenn e bingvik. Lanw narr jid’err qipsingr, m.-mijnix-j. qra ix craa, qra ix mng, dairjir dendyww zuu qawqar, zicniaw e hro langg’ uanr, qetqiok lryy zii buqongx. Iaxx narr si lanw ceing vadd langg, qyckacc qar .ix qyckacc qongw .ix, ursii ix longxx m hogjiongg .lanw. Hitt sii lanw iarr m tangx sniu’ quer pngc .ix, lingkyw jurr anxnix vangwhe .did, ix diyrr e qaqi jaix tangx huanxhuew, suar venr juer unsunn, quaix quaix hro lanw ing. Lanw narr sniu’ kokhingg, ix zuxx okpiah, beh qapp lanw huanxkongr, dyww m hyw.

(Sir-jap-qauw) Sinvenr vutkyw sugi ee dyrliw

Pixlun ue laii qongw, lanw sniu beh liac hii-aw, he hibang dirr hitt kex nirr, hutzenqanx dua jiah juixjiauw kir jiac hii-aw. Iurr cincniu cauxqauu siongr jit jiah ser jiah tangg, sniu beh qra ix qa laii jiac, iaxx m jai’ngiaw u jit jiah cikjiauw-aw dirr ix ee kacngx-au qimx qimx siongr, sniu beh liac ix kir jiac. Sewqanx dagg hxang dairjir iarr si cincniu jitt kuanw. Hitt xee qikir ee lairbin qycc u qikir dilehh, hro lanw knuar be .diyc, liac be diyc. Iwgua ee dairjir ixgua e qycc huatsingx iwgua ee dairjir .cud .laii. Soxx qongw sinvenr vutkyw sugi, hro lanw liau be diyc. Suisi ing lanw langg ee diwsig, ing lanw langg ee cikliok, iarr byy ix hxuad .did. Soxiw lanw langg diyhh jai’ngiaw vingsiongg dyrliw ixgua iauxquxx u jitt kuanw vutkyw sugi ee dairjir dilehh jiacc hyw.

(Go-jap) Sriux hagbun jiacc e hamiongw diksingr

Lanw langg ee dikhing m si snisingg diyrr u. Hitt xee langg ee dorliong zuarr dua, ix ee dikhing iarr duer ix jinwvo. Iaxx langg ee dorliong si jiauww hitt xee langg ee qenwsig decc jinwvo. Soxiw lanw langg narr air beh jiong’ qaqi ee dikhing hro ix hiongwsiong, hro ix cimho, diyhh jiong’ qaqi ee dorliong hro ix kuacdua jiacc ersaiw .did. Narr beh qaqi ee dorliong hro ix kuacdua, diyrr diyhh qaqi ee qenwsig hro ix quandua jiacc ersaiw .did. Qenwsig narr beh hro ix quandua, vutdikvut diyhh tak qoxjaw singwhenn ee ceh, yc ix ee dyrliw, jiauww anxnix sidhingg. Jex diyrr si iongxsingg lanw langg dikhing ee dyrliw.

(Go-jap-id) Beh druu pnaiw langg ee honghuad

Uree simqnuax jin’ qanjar, beh hamrhai .langg. Uree u hex iaxsimx kir vaqed .langg. Uree sniu’ tamsimx vutsii ngwbang hiauhing. Uree naxx kuesenx, vutsii sniu beh jenw .langg. Cincniu hitt kuanw ee pnaiw langg, diyhh qnuaw hro ix jauw .kir, druu hro ix byy .kir jiacc ersaiw .did. Jongw si diyh’air kuix jit diauu lo tangx hro jauw. Setsuw narr dagg diauu lo longxx qra ix tatbat, hro ix byy lo tangx jauw, zuxx qiongg(qingg?) zuxx pnaiw, qaxnaxx cincniu uanr niauxcuw qa puar mnghqnia, jiong’ ix niauxcuxkagx juer jidjee qra ix trad .kiw .laii beh hor ix byy lo tangx cud .laii. In’ui anxnix, langg’ qongw qiongg cuw se buu dendyww qa puar hyw mihqnia qang jit kuanw. Soxiw beh druu jitt xee pnaiw langg, iarr diyhh lauu jit xee uahlo tangx hro ix kir, hro ix venr jue rhyw langg, hro lanw be sriu diyc ix ee hai jiacc hyw.

(Go-jap-zi) Diyhh jaix juiw qapp qniar ee jinliw

Cincniu hitt xee juiw, vunxdew si jing, in’ui hongx laii, ingw jiacc kiw .laii. Narr byy hongx, jurzenn byy ingw. Cincniu hitt xee qniar, vunxdew si qngx, in’ui virr din’aix ingx .diyc jiacc byy qngx. Narr byy din’aix, jurzenn e qngx. Lanw langg simqnuax iarr si cincniu hitt kuanw, simqnuax kixdew si cringx, mrbenw ing huatdo qra ix cringx, in’ui u jiongxjiongw ee mic qra ix paclyy .kir. Soxiw narr druu kir hitt hxang mic, simqnuax diyrr jurzenn e cringx. Lanw langg ee kuaiwlok iarr mrbenw tiauqangx kir cue. Jitt xee kuaiwlok m si vadd xui u :ee. Narr jiong’ lanw simqnualai soxx sniu itcer ee qankow longxx druu hro byy .kir, kuaiwlok diyrr jurzenn cud .laii. Guaw tauduxaw soxx qongw jitt xee juiw qapp qniar ee dyrliw, jiong’ hitt xee tec laii siuiongw lanw ee simsinn, lanw ee simsinn jurzenn e cringx, vutsii kuaiwlok.

(Go-jap-snax) Unxqux qapp ansig

Jiong’ siarhue ee dairjir juer jit xe qra ix srii .kir, beh unxqux, iarr diyhh knuar siqix. Diyrr si lanw ixqingx did diyc qongbingg huwquir, dngdecc liongsing ee sii, qewue unxqux, qipliuu-iongxter, lanw qaqi sniu liauw iarr jin’ songxkuair. Iaxx arr sewqanx ee langg knuar lanw anxnix, dniardiyc e dongjingg .lanw, quw quw e siauwliam .lanw. Iaxx narr si ixqingx singqongx, quw quw jiamr hitt xee derui, hro langg’ qnuaw .kir, diyrr lanw qaqi iarr byy simsig, iaxx arr e hro langg uanr. Qycc jit hxang lanw diyhh qingw kacc anjuann ee soxjai kir hiax druar jiacc hyw, diyrr si byy langg qapp gunw siy’ jnex ee soxjai, qik anjuann, qik tywdongr, narr druar hiax benw qniax e hro langg’ vaitig. Lanw langg jongw diyhh jai’ngiaw unxqux ee siqix cam’ ansig ee soxjai.

(Go-jap-sir) Qongw henrdair langg ee pnaiw ue, vutzuu qongw qoxjaxlangg ee hyw ue

Druar dirr qeci ee langg, dairkair si inx longxx simqnuax kacc qankiauw qycc vogjingg. Snuadingw langg inx dagg xee dairkair si kacc pycsit, soxiw qapp qeci ee langg qauvuee, diyhh jimjiog. Narr byy gu diyc pnaiw langg, lanw ee simqnuax iarr e hro ix qamxhuar .kir. Soxiw lingkyw qapp lairsnualangg jywhuew kacc tywdongr. Iaxx arr jauw kir cue huwquir langg, kab tauu aiqiuu, lingkyw kir cue sanwhiongx langg jywhuew qongxue kacc simsig. Qycjaiww tniax ci-lai ee dairjir, kacc m dat diyc tniax cyr caa laurduarlangg ee cniuwquax, iacc si cri guu ginxaw ee liamrqauax iax kacc u cuwbi. Iaxx arr lanw dairqex juewhuew qongw ing’axue ee sii, qongw henrdairlangg ee pnaiw ue, diyrr qongw boxmih langg byy dyrdig, boxmih langg u quewsid, boxmih langg venr jetcyr, boxmih langg kir huanrjue. Anxnix u simxmih loring. Vutzuu jiong’ qoxjaxlangg soxx qongw ee iuxig ee ue, jin’ hyw ee hing’uii tec kiw laii qongw, kacc u tangx did diyc lirig mah.

(Go-jap-go) Dyrdig si surgiap ee qicow

Bylun simxmih surgiap, hitt xee qicow diyrr si dyrdig. Sewqanx soxu surgiap ee diongqanx, m si ing dyrdig juer qicow u tangx did diyc singqongx, hex diyrr si hiauhing did .laii ee singqongx, qaur buew itding e huai .kir. Naxx cincniu derqix congr byy qenqor, kiw quixnarr janr lxauu druar hitt dingxbin qang jit kuanw. Hitt kuanw ee cur dniardiyc dongr byy quw, derqix lab .lyc .kir, cuwkag dyw .lyc .kir. Soxiw sewqanx ee langg beh congr surgiap, dikkag m tangx qanda’ rid diyc lirig, iarr diyhh qor dyrdig, m tangx sitsinr, surgiap jiacc e quxdngg, qycc e huatdenw.

(Go-jap-lak) Lanw langg ee simqnuax si qniaxsunx ee quntauu

Lanw narr ngwbang lanw qaqi qniaxsunx hro ix huatdenw, lanw ingwqaix diyhh jiong’ qaqi ee simqnuax hro ix jingwdit, qniaa jingwqingx ee dyrliw jiacc ersaiw .did. Lanw ee simqnuax ersaiw did juer lanw qniaxsunx ee quntauu, soxiw lanw hyw ee simqnuax, hyw ee dorliong, zit zit juer hyw ee dairjir, vadd zit aw lanw ee qniaxsunx dniardiyc e sriu lanw ee diwimr u tangx hiongxhog. Cniaw linw sniu knuar mai lehh, setsuw hitt xee ciurtauu narr byy dua ee, ciurqunx iarr byy dua pxenr, hitt jangg ciu ee qihiyc itding be am. Qapp jex siangg lixkir, lanw lamrsamw sniu, lamrsamw juer, beh ngwbang lanw ee qniaxsunx ee cutsinx, naxx cincniu beh jnriu ciu beh liac hii siangg kuanw. Jex si dikkag byy :ee.

(Go-jap-cid) Jiong’ qaqi cuicig vadd langg diyrr e gorsu

Pixlun ue laii qongw, u langg sinwiong vadd langg. Hex ho’ngg sinwiong ee langg byy dikkag qongw si dagg xee longxjongw lauxsit langg. In’ui sinwiong ix hitt xee langg lauxsit, soxiw jiong’ qaqi cuicig vadd langg, sniu qongxx vadd langg iarr dniardiyc lauxsit jiacc driyc. Iaxx arr u langg decc caigii vadd langg. Hitt xee ho’ngg caigii ee langg byy dikkag dagg xee longxjongw qajar. In’ui caii ix hitt xee langg vunxsinx si qanjar. Soxiw jiong’ qaqi cuicig vadd langg sniu qongxx vadd langg iarr si anxnix, seqanx ee langg iarr diyhh bingvik jitt diauu dyrliw jiacc hyw.

(Go-jap-veh) Sxen u sxen vyr, og u og vyr

Narr si jiauww tenliw laii qongw, juer hyw u hyw ee vywingr, juer pnaiw u pnaiw ee vywingr jiacc driyc. Mrquxx ursii suizenn u juer hyw su, byy tangx did diyc hyw ee vywingr. Hex cincniu snix dirr cauw nirr ee dangquex siysiangg. Hitt xee dirdecc suanx tokax ee sii, longxx byy knuar qnir. Mrquxx qaur buew kuix huex qed jiw snix dua liap dangquex, diyrr e hro langg’ jai’ngiaw. Juer hyw su iarr qaur buew vit’iuw sxen vyr. Iaxx arr ursii suizenn juer pnaiw, longxx byy knuar qnir pnaiw ee vywingr. Hex cincniu lyc dirr dniaa nirr ee cuntnix-sii ee she siangg kauwn, lenvnix e saiubyy .kir, qaur buew dniardiyc u pnaiw ee vywingr. Sewqanlangg iarr diyhh jaix jitt xee sxen u sxn vyr, og u og vyr ee dyrliw jiacc hyw.

(Go-jap-qauw) Hagbun m si tagjulangg tojiamr :ee

Dyrliw m si singwzinn dogjiamr ee mihqnia, sngr si jit jiongw qongqiong ee mic, cinwcaiw langg ersaiw did tec laii ing, qycc tangx jiauww anxnix qniaa. Iurr cincniu hagbun iarr m si tagjulangg dogjiamr ee mic, qapp lanw langg muixx zit decc jiac ee vng siangg kuanw, lanw langg narr byy jiahvng, vakdow diyrr e iaux, narr byy genxqiur hagbun, diwsig diyrr e tewvo. Jitt xee hagbun si sid’iongrdig :ee, m si ciacixpinw. Soxiw vingsiongg sii yc hagbun, vxag-lai diwsig vaw vaw, vadd zit aw narr beh congr surgiap ee sii, laii ingwiong hitt xee hagbun diwsig, tangx hro hitt xee dairjir kuair singqongx. Jex si jin’ iauwqinw.

(Lak-jap) Diyhh jundiong qursii u sewlik u qonglyy ee langg jiacc hyw

Lanw langg narr gu diyc qursii ee hyw ving’iuw, bylun ix ee qingxgu hyw-pnaiw, iuguann jiauww qursii ee simqnuax qapp ix qauvuee jiacc hyw. Sewqanlangg ee diongqanx, uree qaqi ee derui narr kacc quann, diyrr qamguan vangwsag qursii ee hyw ving’iuw, sniu beh qapp quanser ee langg qauvuee. Jitt kuanw sngr jin’ m hyw. Iaxx arr u langg hiangwsii did diyc dua derui dua sewlik, itdanr sitvai, jitmuaw hamrlyc qankow ee qingxgu, iacc si ixqingx jiac qaur lau, qycc jin’ pnaiw un. Duiww hitt kuanw ee langg dikkag m tangx knuar m kiw, ingwqaix diyhh jabhunx jundiongx .ix, naxx cincniu hiangwsii ix u sewlik ee sii decc jundiong .ix, u hitt kuanw ee lexsor jiacc hyw.