Guaw tniax .diyc .ee si anne:
U itsii, Vuddy dirr Shravasti Sniaa ee Jeta Jonggiamm Cuwsiar qiawkax, qapp jit-cingx nng-vah go-jap xee dua bikiu dauwdin. Inx qewqer byy uilau ee dua Arhat. Vuddyy ee derjuw druar dirr sewqanx, senrhing ciauuad iuxuii jiongxjiongw, erdangr dirr siogser dertow singjiu uidig qapp lexgii. Jurr Vuddyy juanw huatlunn, inx u qewdat Vuddyy uiliuu jiokhur. Dingxjinx cingjing dirr Vinaya, dirr samqair juer cuartauu. Dorhuar jiongwsingx tuatli lunhuee. Inx iong bubanrsor ee ingwvenr hingmoo laii dorhuar jiongwsingx tuali lunhuee. Qaixqiur jiongwsingx tangx qapp birlaii tuatjauxli, hro inx tangx ciautuad huanqanx jiongxjiongw ee tuatui. Inx ee miaa si Dua Diwhui Shariputra, Maha Maudgalyayana, Mahakaushtila, Purnamaitreyaniputra, Subhuti, Upanishad, qapp qitax :ee dangjee jre dingxui. Qycc u bubanrsor Pratyekabuddha, iauxx bue siurqar, qapp co' hautsimx beh siuhing :ee dangjee laii Vuddyy jiax, ham' jiongww bikiu dirr zuac .langg piacjing ee soxjai jerqimr jursingw. Sibhongx ee posad iarr laii jubun, uirr beh juaddng simlai ee giaugii, kimqingr sunrhok juvix qycc giamsiok ee Zulaii, beh qiucuw jingbit vudliw. Hitt sii Zulaii jniurjy hyxser, uirr huathue dairjiongr qangxsuad cim'yr vudhuad. Huathue jingwlangg soxx did .diyc .ee m bad jingrr u. Kalavinka senqax gag'imx hiangw venww sibhongx qokqair. Cincniu Gange Hyy ee suax hiacc je ee posad laii dyrdniuu jurhue. Manjushri Posad dirr inx lairdew jre dingxui.
Hitt jun, Prasenajit Qok'ongg anvaii caiwdyh qra inx laurve juewqi, iaucniaw Vuddyy laii ongqiongx, cinsinx kir qionggingg Zulaii. Ix set'enn cuanvan pongpair ee liaurliw, qewqer byy der viw ee hyw jubi, qycc cinsnix cutcniaw jiongww dua posad. Sniaa-lai qycc u diongxjiaw qapp qusu qang sijun iarr cuann vngrcair laii hro huesniu, tingwhau Vuddyy laii ee sii tangx qra cik'ingr. Vuddyy huanhur Manjushri cepair posad qapp Arhat jiapsiu qokk qiongjaix juxlangqax ee kuanxtai. Dandanx Ananda jinwjingg sriu vadd langg iaucniaw, cutgua iauxx bue dywdngw, byy sngr jairgiac. Byy lau juqeh ee bikiu iacc Acharya qapp ix jywhuew, dirr dngw .kir ee lo nirr, Ananda dandok jit langg, hitt zit iauxx byy sriu qiongqib. Hitt sii, ix tec cenxvuah dirr soxx qnia'iuu ee sniaa en' lo kithuar. Simdiongx anwsngr juewau vowsix hitt xee dyrr sriu ix qiongjaix, m quanw si cingkir iacc lacsab, kshatriyas junquir miasnir iacc chandalas jenrbinn, ix duiww inx vnivnii juvix, byy qingw vibii quiwjen, huatsimx beh singjiu itcer jiongwsingx bubanrsor qongdig. Ananda jai'ngiaw Zulaii Sewjunx jikvi Subhuti qappMahakashyapa, qongxx inx juer Arhat, simx byy vingdingw. Ix giongxbong Zulaii kuitiah byy pensux laii dorhuar jiongwsingx, tangx benw kir giaugii qapp huixvongr. Ix qingquer sniadii, knuax knuax aw qniaa quer sniamngg. Jonggiamm ee uigii, jingrsiog junsiuw jaiqair ee dingrhuad. Hitt jun, Ananda in'ui jiauww cuwsu kithuar, qingquer jit qingx jaboxqingx, jygu diyc jit xee qiyr Matangi ee jabow iong hihuar siasut qra jokhuad. Jabow iong Brama tendnuaa ee jiuwgiw qra ix snriaa zip imlok ee vangqingx, qycc qniaa imhing qra ix bongsydni, qaur qaxx qiongbeh huixhuai ix siuw qaiwlut ee sintew.
Zulaii jaix Ananda jygu diyc siausut, qetsog vngrdngr qnuaxqinw dngw .laii. Qok'ongg, dairsinn, dniulyw, qapp qusu longxx laii qinduer Vuddyy beh tniax vudhuad ee iauwjiw. Hitt sii, Sewjunx an' ix benxliuu sria cud vah gua jiongw dinvyw qngsnuar, byy soxx qniahniaa qongbingg. Qngsnuar diongqanx snix cud u cingx gua pnir hiyc-aw ee vyxgik lenhuex. Lennhuex-dingw u jit senx Vut, kax tiabvnuaa, suanqangw jingwsinn ee jiuwgiw. Ix huanhur Manjushri iong jitt xee hujiur kir vyxho Ananda. Siaog ee jiuwgiw siaubet, Ananda qapp Matangi ee jaboxqniaw laii qaur Vuddyy jiax. Ananda qnir diyc Vuddyy, qnialew, visiongx tikaur. Ix auwnauw ithiongr qenwbunn je byy tangx sixjiongx, dyrhing iauxx bue jiaujngg. Inkunn iongcniaw sibhongx Zulaii, iong siongrr kixtau siongrr lieven ee huatdo jo ix tangx did jniajuer posad, drat qaur shamatha, Samapatti, qapp Dhyana ee dyrhing. Hitt sii, qycc u naxx Gange Hyy ee suax hiacc je ee posad qapp jiongww sibhongx dua Arhat qapp Pratyekabuddha, inx longxx jiokk sniu beh air tniax. Ix trer dngw kir qaqi ee jyrui, diam diam niaxsiu jiww sxingr iauwjiw.
Vuddyy qra Ananda qongw, "Liw qapp guaw si jikveh hniadi, vnevnee tenlunn jinghun. Dongcox huatsimx, dirr guaw ee Jniawhuad, liw u qnir diyc sniaxmih singwqingw, hro liw liammix quacsiar sewqanx cimho ee un'air?"
Ananda rinr Vuddyy qongxx, "Guaw qnir diyc Zulaii snax-jap-zi jiongw siongwtew, singwqingw juadbiau, hingtew qngx ngiawngiar bersux liulii. Guaw vutsii qaqi decc sniu, jitt xee siongwtew m si sik'iok soxx snix .cud .laii .ee. Sniaxmih enqor? Iogbong ee krir liamlyy, cauwcner qaudnii, lxangg qapp huih capjap, berdangr snix cud cinggnaw bixbiau canwlan ee jiw-qimx qngsnuar. Uirdiyhh jitt xee enqor, simx vutjiw giongxbong, jiacc laii duisuii Vuddyy tir tauu cutqex."
Vuddyy qongw, "Jin' hyw, Ananda. Linw jiaxee qaidongx jai'ngiaw itcer jiongwsingx an' dngguancex ixlaii snesiw lunhuee siy' suar, longxx in'ui m jaix diyhh vutsii quju dirr jinsimx sunjing qongbingg ee budtew. Iong dirr jerje bongrsiongw, jiaxee bongrsiongw byy jinsit, mrjiacc u (snesiw) juanxlunn. Liw dnaxx beh genxqiur busiongg posad jinsit kexhuad qongbingg ee jursingr, ingwdongx jinsimx huedab guaw soxx mng ee bunrdee. Sibhongx Zulaii qang jit xee dyrhuad siuhing, cutli snesiw, qewqer iong jingwdit ee simx. Simx sniu :ee qapp cuir qongw :ee longxx jingwdit. Cincniu anne, an' tauu jiww buew, diongx:a dyrr ingxuanw byy jiongxjiongw uixkiog qapp byy jingwdit ee soxjai."
"Ananda, guaw jitmaw mng liw. Dongcox liw huatsimx si uirdiyhh Zulaii snax-jap-zi jiongw siongwtew ee enqor. Liw iong sniaw laii knuar? An' sniaw laii qamxsiu hnuhaiw?"
Ananda qra Vuddyy qongw, "Sewjunx, cincniu jitt jiongw ee hnuahiw, guaw iong simx qapp bak laii qamxsiu. Dui' bagjiux knuar qnir Zulaii juadbiau ee siongwtew, simx snix cud hnuahiw. Soxiw guaw huatsimx, guanrir kiwsag snesiw."
Vuddyy qra Ananda qongw, "Cincniu liw soxx qongw :ee, jinjniar soxx hnuahiw :ee si dirr simx qapp bak. Narr byy jaibad simx qapp bak dirr dyc'ui, dyrr berdangr hanghok dinser ee huanlyw. Piwlun qok'ongg sriu diyc cadqunx soxx cimhuan, huad vxingx jingtyw. Jenwvingx qaidongx jai'ngiaw cadqunx dirr dyc'ui. Suxx liw lunhuee juanxser, quijue dirr simx qapp bak. Guaw jitmaw mng liw, dandanx simx qapp bak, jitmaw dirr dyc'ui?"
Ananda rinr Vuddyy qongxx, "Sewjunx, itcer sewqanx jiongwsingx longxx jiong' disingr ee simx kngr dirr sinkux lairdew. Knuar Zualii cinlenhueganw iarr snix dirr Vuddyy ee bin dingxqaunn. Guaw dnaxx quanknuar (bak, hni, pni, jic) jitt sir jiongw pupiyr qinkir snix dirr guaw ee bin. Disingr ee simx kaksit druar dirr sinkux lairdew."
Vuddyy qra Ananda qongw, "Liw jitmaw dng' jre dirr Zulaii Vut ee qangxdngg. Liw knuar Jeta Ciurnaa jitmaw dirr dyc'ui?"
"Sewjunx, jitt qingx je janr lxauu ee cingjing qangxdngg dirr Qiphuir Qodok Huehngg. Dnaxx Jeta Ciurnaa kaksit dirr qangxdngg guarbin."
"Ananda, liw jitmaw dirr qangxdngg lairdew singx knuar .diyc .ee si sniaw?"
"Sewjunx, guaw dirr qangxdngg lairdew, singx knuar Zulaii, jiacc knuar dairjiongr. Liauxau qycc knuar hiongr guarkauw, jiacc knuar diyc hiaxee huehngg."
"Ananda, liw anxjnuaw tangx knuar diyc huehngg?"
"Sewjunx, jitt qingx dua qangxdngg mngtangx kuix kuix, soxiw guaw dirr qangxdngg tangx knuar kir qaur hng hng ee soxjai."
Hitt sii, Sewjunx dirr dairjiongr-diongx crunx cud qimsig ee ciuxqud bongx Ananda ee benxliuu, qra Ananda qapp juui dairjiongr kaisi:
"U jit xee u samadhi dyrhing :ee miaa qiyr Dua Vut Benxliuu Huersiuw Shurangama Ongg, ix u cenban jiongw huathingg. Sibhongx Zulaii an' jit xee huatmngg ciauuat qaur cimbiau jonggiamm ee lo. Linw dnaxx jimjiog tniax."
Ananda kaur tauu jiapsiu ju'air ee vudjiw.
Vuddyy qra Ananda qongw, "Naxx cincniu liw soxx qongw :ee, srinx dirr qangxdngg, tang'axmngg kuix kuix tangx knuar diyc hng hng ee ciurnaa. Marr u jiongwsingx dirr jitt xee qangxdngg lairdew, byy knuar diyc Zulaii, suacc knuar diyc qangxdngg guarkauw :ee."
Ananda rinr qongxx, "Sewjunx dirr qangxdngg, byy qnir diyc Zulaii suacc qnir diyc ciurnaa qapp jnuajuiw, beh tacc u jitt hy kuanw?"
"Ananda, liw iarr si anne. Liw ee simlingg itcer bingcingx. Narr liw henrjai binghen ee simx sidjai dirr sinkux lairdew, hitt sii diyhh dairsingx jonghap liauxqaiw sinkux luervo. U quaw jiongwsingx singx qnir sinkux-lai jiacc quanknuar guarvo surbut. Dyrr sngr berdangr qnir diyc simx, qnuax, vii, qapp ui, knuar be diyc jingxqah qapp taujangx decc dngg, qinbah qapp huecmec decc unrdong. Narr jinjniar jonghap bingcingx :ee tacc e m jaix? Vitdnia m jaix luervo, qycc qongw sniaxmih jaix guarkauw? Soxiw qongxx ingqaix tangx jaix liw qongw u qakgno e jaibad ee simx druar dirr sinkux-lai si by'ngiaw :ee."
Ananda ngar tauu qnalew duiww Vuddyy qongw, "Guaw tniax Zulaii jitt xee Jniawhuad ee gixsniax, liauxgno diyc guaw ee simx qisit druar dirr sinkux guarkauw. Si anxjnuaw e anne? Piwlun dinghuew dirr sxig-lai diamw dyc, jitt pax dinghuew vitdnia e singx jiyr qngx sxig-lai, suar .lyc mngg-au qapp mngdniaa. Itcer jiongwsingx knuar m bad sinkux luervo, dogdok knuar duiww sinkux guarkauw :ee. Qaxnaxx dinghuew dirr sxig-gua berdangr zip jiyr sxig-lai. Jitt xee dyrliw u dniardiyc bingvik dyrr byy soxx behik. Dyrr cincniu Vuddyy liauxted dyrliw, dyrr byy qycc u bongrsiongw ar."
Vuddyy qra Ananda qongw, "Jiaxee bikiu duxx duer guaw laii Shravasti Sniaa, jiauww sunsu kithuar jaicair, liauxau, dngw laii qaur Jeta Ciurnaa. Guaw jiac ar. Jiauww liw knuar, bikiu jit langg decc jiac, jiongwlangg e vaw be?"
Ananda rinr qongxx, "Be vaw, Sewjunx. Sniaxmih enqor? Jiaxee jiongww bikiu suizenn u drat qaur Arhat qongqyw, mrqycc srinx qapp mia qoklangg longxx byy qangg. Tacc e qongw jit langg jiac e hro jingwlangg vaw?"
Vuddyy qra Ananda qongw, "Liw e qakcad tangx jaiqnir ee simx narr kaksit dirr sinkux guarkauw, srinx qapp simx qniaa qokk lo, jurzenn byy siongqanx. Anne, simx soxx jaix :ee, srinx berdangr qakcad .diyc. Srinx u qakcad .diyc .ee, simx berdangr jaix. Guaw dnaxx iuwnngw naxx xmii ee ciuw hro liw knuar, liw bagjiux knuar ee sii, simx erhiauw hunven bor?"
Ananda rinr qongxx, "Erhiauw, Sewjunx."
Zulaii qra Ananda qongw, "Narr erhiauw, anxjnuaw qongw simx dirr guarkauw? Soxiw qongxx tangx jaix liw soxx qongw e qakcad tangx jaiqnir ee simx druar dirr sinkux guarkauw si byy jitt kuanw :ee."
Ananda qra Vuddyy qongw, "Sewjunx, naxx cincniu Vuddyy soxx qongw, byy knuar qnir luervo, soxiw byy druar dirr sinkux lairdew. Srinx qapp simx siy' jaix byy siy' li, soxiw simx byy druar dirr sinkux guarkauw. Guaw dnaxx suniuu, jaiqnir ee simx dirr jit xee soxjai."
Vuddyy mng qongxx, "Dirr dyc'ui?"
Ananda qongw, "Jitt xee e liauxqaiw tangx jaiqnir ee simx berdangr jaix lairdew suacc tangx qnir guarkauw. Guaw sniu si amwhok dirr qinx lairdew. Bersux u langg iong juixjnix ee nguaw kamr dirr nng luiw bagjiux, be gai diyc ix knuar .qnir. Hitt xee qinx sui' qnir sui' dyrr e hunvet. Soxiw guaw e qakcad tangx jaiqnir ee simx byy qnir diyc luervo si in'ui ix dirr qinx lairdew ee enqor. Guarkauw :ee knuar hunbingg byy jiongwgai, si in'ui amwhok dirr qinx lairdew ee enqor."
Vuddyy qra Ananda qongw, "Naxx cincniu liw soxx qongw :ee, simx amwhok dirr qinx nirr kyxviw juixjnix ee vixlun. Hitt xee langg iong juixjnix kamr bagjiux, ingdongx qnir e diyc sanhyy. Ix qamxx qnir e diyc juixjnix?"
"E, Sewjux. Hitt xee langg iong juixjnix kamr bagjiux kaksit qnir e diyc juixjnix."
Vuddyy qra Ananda qongw, "Liw ee simx naxx cincniu hro juixjnix kamr lehh, knuar e diyc sanhyy, jnuaxngiu knuar be diyc bagjiux? Narr knuar e diyc bagjiux :ee, bagjiux qapp guarkauw ee qxingw qangrkuanw, byy qapp simx siysuii. Narr berdangr knuar diyc bagjiux, uirhyy qongw jitt xee e qakcad qapp jaiqnir ee simx amwhok dirr qinx lairdew, kyxviw iong juixjnix kamr bagjiux. Soxiw qongw tangx jaix liw qongw e qakcad qapp jaiqnir ee simx amwhok dirr qinx lairdew naxx juixjnix kamr bagjiux si byngiaw :ee."
Ananda qra Vuddyy qongw, "Sewjunx, guaw jitmaw qycc u jitt kuanw ee sniurhuad. Si jiongwsingx ee jongrhuw cangr dirr sinkux lairdew, kanghed dirr guarkauw. Cangr diauu lehh dyrr oamr, u kanghed jiacc bingqngx. Jitmaw guaw bin duiww Vuddyy bagjiux kuix kuix knuar diyc bingqngx, qiyr juer qnir diyc guarkauw. Bagjiux kreh kreh knuar diyc oamr, qiyr juer qnir diyc lairdew. Jitt xee qongxhuad sniaw kuanw?"
Vuddyy qra Ananda qongw, "Liw bagjiux kreh kreh knuar diyc oamr ee sii, jitt xee amr qxingw qapp bagjiux soxx knuar :ee u siongdongg bor? Narr u siongdongg, oamr dirr ganw-jingg, nacc tangx qongw dirr lairdew? Narr qongw dirr lairdew, dirr amr sxig lairdew byy zidtauu iacc guehniuu ee qngsnuar, jitt xee sxig-lai ee oamr dyrr longxx si liw ee jongrhuw. Narr byy siongdongg, nacc qongw knuar e diyc? Narr qongxx qapp guarkauw byy siongqanx, sunzenn qnir diyc lairdew laii hingsingg. Bagjiux kreh kreh qnir diyc oamr qiyr juer qngsnuar dirr sinkux lairdew. Bagjiux tiw kuix qnir diyc bingqngx, jnuaxngiu be qnir diyc bin? Narr knuar be diyc bin, an' lairdew laii soxx qnir dyrr be tongx. Narr qnir e diyc bin, jitt xee liauxgno diqnir ee simx qapp ganw-qinx dyrr dirr guarkauw ee hikongx, nacc si dirr lairdew? Narr dirr hikongx, dyrr m si dirr liw ee sinkux lairdew. Iarr dyrr si qongxx Zualii jitmaw qnir diyc liw ee bin, iarr e qnir diyc liw ee sinkux. Liw bagjiux jaix'ngiaw, sinkux byy qakdix, liw vitdnia e qongw u srinx qapp ganw nng xee diqag. Dyrr si liw jit srinx ingqaix u nng xee vut. Soxiw qongxx ingqaix jaix liw qongw qnir diyc oamr qiyr juer qnir diyc lairdew si byy jitt kuanw :ee."
Ananda qongw, "Guaw vutsii tniax Vuddyy duiww siwhngx jiongwsingx kaisi. Simliam hingkiw, jiongxjiongw hxuad duer lecc snix .cud .laii. Hxuad hingkiw, jiongxjiongw simliam iuqycc duer lecc snix .cud .laii. Guaw dnaxx iwsiu, jitt xee iwsniu ee vunxtew kaksit si guaw ee simsingr. Duer soxx gu .diyc .ee, simliam suisii dyrr kiw. Iarr dyrr si simx byy dirr sinkux laidew, guarkauw, iacc diongx:a jitt snax xee soxjai."
Vuddyy qra Ananda qongw, "Liw jitmaw qongw hxuad hingkiw, jiongxjiongw ee simliam duer lecc snix .cud .laii. Duer soxx gu .diyc .ee, simliam suisii dyrr hingkiw. Simx byy vunxtew, dyrr byy soxx gu .diyc. Narr byy vunxtew erdangr u soxx gu .diyc .ee, tangx jaix jap-qauw qaiwjiw in'ui cid jiongw din'aix gu .diyc soxx hingkiw si qongw be tongx :ee. Narr u vunxtew, liw iong ciuw qaqi kap simx ee vunxtew. Liw soxx tangx qakdix ee simx si an' lairdew cud iacc si guarkauw zip? Narr an' lairdew cud, qaidongx tangx knuar diyc sinkux lairdew. Narr an' guarkauw zip, qaidongx singx knuar diyc viauxbin."
Ananda qongw, "E knuar .qnir .ee si bagjiux. E qakdix simliam :ee m si bagjiux. Jex m si qnir ee dyrliw."
Vuddyy qongw, "Narr bagjiux erdangr knuar .qnir, liw dirr sxig-lai, mngg tangx knuar qnir liw bor? Narr e, jiongxjiongw ixqingx siw .ee iauxx u bagjiux dilehh :ee qaidongx longxx tangx qnir diyc mihqnia. Narr e knuar qnir mihqnia, nacc tangx qongw juer siw ar? Ananda, qycc liw e qakcad u qakdix ee simx narr vitdnia u vunxtew, si jit xee vunxtew iacc je xee vunxtew? Jitmaw si dirr liw venww sinkux iacc byy venww sinkux? Narr dna' jit xee vunxtew, liw iong ciuw kap jit xee qitew, kax qapp ciuw sir qix ingqaix longxx u qakdix. Narr longxx u qakdix, ingqaix byy kap diyc dycc jit xui. Narr u kap .diyc, liw qongw :ee dna' jit xee vunxtew dyrr berdangr singlip. Narr je xee vunxtew, dyrr u je xee langg, dycc jit xee jiacc si liw? Narr simx dirr venww sinkux, dyrr qapp taujingg soxx kap :ee siysiang. Narr byy dirr venww sinkux, liw kap diyc tauu iarr dyrr si kap diyc kax. Tauu u soxx qakdix, kax ingqaix byy qakdix. Jitmaw liw suacc m si anne. Soxiw qongxx ingqaix jaix duer soxx gu .diyc .ee suisii simliam dyrr hingkiw si byy jitt kuanw :ee."
Ananda qra Vuddyy qongw, "Sewjunx, guaw iarr bad tniax quer Vuddyy qapp Manjushri dingxdingw jiaxee hxuad-ongjuw damlun sidsiong ee sii, Sewjunx iarr qongw simx byy dirr sinkux lairdew, iarr byy dirr sinkux guarkauw. Cniurr guaw qaqi suniuu, lairdew knuar be diyc, guarkauw byy horsiongx qakdix. Lairdew byy qakdix ee enqor, simx dirr lairdew dyrr byy tongx. Srinx qapp simx horsiongx u qakdix, simx dirr guarkauw iarr be tongx. Dnaxx jitmaw inx horsiongx u qakdix, qycc lairdew knuar be diyc, soxiw qongxx simx qaidongx dirr diongx:a."
Vuddyy qongw, "Liw qongw dirr diongx:a, jitt xee diongx:a vitdnia byy sitbee, vutding u jitt xee soxjai. Jitmaw liw iwsniu simx dirr diongx:a, diongx:a si dirr dyc'ui? Si dirr mow jit xui iacc si dirr sinkux-dingw? Narr dirr sinkux-dingw, dyrr si dirr vnix:a m si dirr diongx:a. Dirr diongx:a dyrr qapp dirr lairdew qangwkuanw. Narr dirr mow jit xui, qamxx u jit xee viauxziah? Byy viauxziah dyrr qapp byy jit xee xui qangrkuanw. Viauxziah si byy kakding :ee. Sniaxmih enqor? Narr u langg qra viauxziah junw jyr diongx:a ee sii, dirr dangvingg knuar dyrr si saivingg, dirr lamvingg knuar dyrr vniwjniaa vakvingg. Viauxtew qacc hunwluan, simx qaidongx dyrr jabluan."
Ananda qongw, "Guaw soxx qongw ee diongx :a m si jitt nng jiongw. Naxx Sewjunx soxx qongw :ee, bagjiux qapp sikdinn si en'iuu tangx snix cud ganxsig. Bagjiux e hunved. Sikdinn byy qakdix. Snix cud ganxsig hitt xee diongx:a, simx dyrr dirr hitt xui."
Vuddyy qongw, "Liw ee simx narr dirr ganxqinx qapp sikdinn diongx:a, jitt xee simx-tew si u liongxqiamx iacc byy? Narr u liongxqiamx, budtew qapp simx-tew jabluan. Budtew m si sim-tew soxx tangx liauxqaiw :ee, nng vingg dyrr vniwjniaa duiwdik duiwlip. Qongw diongx:a si dirr dyc'ui? Liongxqiamx narr be tongx, simx m jaix tangx qakdix dyrr byy qaqi ee texsingr, diongx:a e si sniaw kuanw? Soxiw qongw qaidongx jaix simx dirr diongx:a si byy jitt kuanw :ee."
Ananda qra Vuddyy qongw, "Guaw ingxsii knuar qnir Vuddyy qapp Mahamaudgalyayana, Subhuti, Purna, Shariputra jitt sir xee dua singdoo dauwdin juanw huatlunn ee sii, dniardnia qongw u qakdix e hunved ee simsingr, byy dirr lairdew, byy dirr guarkauw, iarr byy dirr diongx:a, ix byy dirr zimrhyy soxjai. Soxu itcer longxx be jipsiuw :ee miaa qiyr juer simsingr. Narr guaw byy jipsiuw, anne dyrr qiyr juer simsingr si bor?"
Vuddyy qra Ananda qongw, "Liw qongw u qakdix e hunved ee simsingr ingxx byy jit xee jipsiuw ee soxjai. Sewqanx hikongx, juixdew, liogde, qapp tnidingw vuex :ee, jiaxee soxu budtew qapp qingxsiong miaa qiyr juer itcer. Liw byy jipsiuw, simsingr u junjai iacc byy? Narr byy junjai, anne dyrr qapp qux ee mox iacc tor ee qag qangrkuanw, nacc tangx qongw sniaxmih byy jipsiuw? U byy jipsiuw :ee m tangx qiyr juer byy. Byy siongwtew :ee dyrr byy junjai, m si byy junjai :ee dyrr u siongwtew. U siongwtew dyrr u junjai, nacc qongw byy jipsiuw? Soxiw qongxx qaidongx jaix itcer byy jipsiuw :ee miaa dyrr qiyr juer u qakdix ee simsingr, jitt kuanw qongxhuad si byngiaw :ee."
Hitt sii, Ananda dirr jingwlangg-diongx an' jerjy ee soxjai vreh kiw, jniawvingg qingqah teh teh, jniawvingg katauux qui lehh, habjiongw qiongqingr duiww Vuddyy qongw, "Guaw si Zulaii siongrr sewhanr ee siyxdi, did Vuddyy ju'air tniawsiyh. Suizenn jitmaw cutqex, iuguann kywser Zulaii tniawsimx suacc laii qiautauu jurqyx. Diyrr sngr qenwbunn je, iauxx be tangx drat qaur (diwhui) byy uilau ee qongqyw, berdangr hanghok Kapila jiuwgiw, suacc hro ix soxx dngxvnir jaux zip jaboxqingx. Jex ingdongx si in'ui m jaix jinsingr qingxqair soxx drir. Dogdok guan Sewjunx huad dua juvix dua lenbinw, kaisi guanw jiaxee qniaa duiww shamatha ee jniar lo, hro hiaxee icchantika (kiwjuat senrhing dng senrqinx :ee) kiwduu mlechha (siaog ee jaibad qapp qenwqaiw).”
Jiaxee ue qongw suah, Ananda qui' sinkux pak dirr tokax (qingwvair). Ix qapp jingwlangg giac tauu kia lehh, kenqingr ngwbang tniax qnir Vuddyy ee qawsi.
Hitt sii, Sewjunx dui' ix ee bin hongwsia cud jiongxjiongw ee qngx. Hitt xee qngx jiokk canwlan cincniu cingx vah xee zidtauu qangrkuanw, qngx ngiawngiar. Poxtenha Vut Sewqair snix cud lak jiongw jinxdong. Sibhongx cincniu din'aix hiacc je ee qoktow jidsiqanx kuihen. Vut ee uigii qapp sintongx hro soxu sewqair qapjniaa juer jit xee sewqair. Jitt xee sewqair-diongx soxu itcer jiongww dua posad, qewqer druar dirr ix vunxqog habjiongw tniax kaisi.
Vuddyy qra Ananda qongw, "Soxu jiongwsingx, an' byy kaisiw ixlaii, in'ui jiongxjiongw dendywtauu ee iwliam qapp qniavangr, jiongxjiongw ee giabjer jurzendig naxx aksha quexjiw e kiyh uaw .laii, hro soxu siuhingrlangg berdangr siulen jniaa busiong potee, suacc dna' drat qaur sniabunn iacc kaigno-enn ee qaidnua, ixqip jniaa jyr qokk jiongw jyxdy moqongx qapp moqongx ee cuwlairlangg. Jex longxx in'ui m jaix nng jiongw qinvunw, suacc luanrsuw siuhing hagsip. Naxx cincniu juw suax beh vniwjniaa hyw jiahmic. Junw qingquer cincniu din'aix hiacc je giahsor ee qiab(kalpa) iarr berdid jniaa.
Mng qongxx si dycc nng jiongw? Ananda, tauu jit jiongw si an' byy kaisiw ixlaii snesiw ee qinvunw, dyrr si liw jitmaw qapp soxu jiongwsingx qra in'enn knii diauu lehh liahjunw si jursingr :ee. Derr zi jiongw si an' byy kaisiw ixlaii potee Nirvana guanvunw cingjing ee vunxtew, dyrr si liw jitmaw jaibad guanbingg, e snix cud itcer in'enn :ee, knii diauu in'enn e laii sitlyc :ee. In'ui soxu jiongwsingx sitlyc jitt xee guanbingg ee vunxtew, suizenn qui' zit siuhing, suacc byy jurqag, uanongw hamrzip qokk jiongw lunhuee ee og qxingw."
"Ananda, liw jitma beh jaix shamatha ee lo, huatguan beh jiong' snesiw vangwli. Guaw jitmaw qycc mng liw."
Jitt sii, Zulaii qra qimsig ciuxqud giac .kiw .laii, kud gnoxlunjnaiw, mng Ananda qongxx, "Liw jitmaw knuar e diyc be?"
Ananda rinr qongxx, "Knuar e diyc."
Vuddy mng qongxx, "Liw knuar diyc sniaw?"
Ananda rinr qongxx, "Guaw knuar diyc Zulaii ciuxqud giac .kiw .laii qycc kud ciuxjnaiw vniwjuer qongbingg quntauu, jiywqngx guaw ee simx qapp bak."
Vuddyy mng qongxx, "Liw iong sniaxmih knuar?"
Ananda rinr qongxx, "Guaw qapp jingwlangg qangrkuanw, iong bagjiux knuar."
Vuddyy qra Ananda qongw, "Liw jitmaw huedab guaw. Zulaii kud jnaiw vniwjuer qongbingg quntauu, jiywqngx liw ee simx qapp bak. Liw ee bagjiux tangx knuar .qnir. Liw iong sniaxmih simx jaix guaw ee quntauu qong'iau?"
Ananda qra Zulaii qongw, "Jitt diap beh sunmng guaw simx dirr sniaxmih soxjai. Acc guaw iong simx tauwted cuiqiur, sui' hxang aw jaursimm. Jitt xee erdangr cuiqiur :ee guaw dyrr qra knuar juer si simx."
Vuddyy qongw, "Luanrsuw qongw, Ananda, jitt xee m si liw ee simx."
Ananda qniax jit diyy, lirkuix jyrui, habjiongw, vreh kiw srinx qra Vuddyy qongw, "Jitt xee narr m si guaw ee simx, qaidiongx qra qiyr sniaw?"
Vuddyy qra Ananda qongw, "Jitt xee si ingxquer ee qindinn, hibuu bongrsiongw behik liw ee jinsimx vunxsingr. In'ui liw an' byy kaisiw qaur qaxx jitt sxer longxx zin cat juer qniaw, sitlyc liw guanvunw ee simsingr, mrjiacc dirr lunhuee juanw byy tingg diongx siurkow."
Ananda qra Vuddyy qongw, "Sewjunx, guaw ee Vuddyy tniawsiyh siyxdi. Simx u iwhiongr Vut, soxiw guaw cutqex. Guaw simx m na dandanx junhong Zulaii, simrjiww qaur bersux Gages Hyy ee suax hiacc je sowliong ee qoktow, kir suhau soxu ee Vut qapp senrdiwsig. Guaw huatguan bingxiongw siuhing itcer qanlann jingwhuad jingwsu, longxx vin' jitt xee simx. Dyrr junw guaw vongwhuiw jingwhuad, senrqinx ingxuanw tuatter, iarr in'ui jitt xee simx soxx drir. Narr junw jitt xee m si simx, guaw dyrr ham' tohunw iacc cauxbok qangrkuanw byy simx. Qapp jitt xee u qakdix ee simx vunlii, guaw dyrr sniaxmih dy' byy. Anxjnuaw Zulaii qongw jitt xee m si simx? Guaw sidjai jiokk qniahniaa. Qycc jiaxee dairjiongr byy jit xee byy gignaiw. Dogdok ngwbang Sewjunx huad dairvisimx, qra guanw jiaxee iauxx bue liauxgno :ee kaisi."
Hitt sii, Sewjunx qra Ananda qapp juui dairiongr kaisi, beh hro inx ee simx jinwzip hamzimw byy singsuw ee jingwhuad qingxqair. Ix jre dirr sraix-aw jyrui, bongx Ananda ee taukag, qra qongw, "Zulaii dniardnia decc qongw, soxu inenhuad soxx snijniaa :ee longxx vutqyr si simx soxx henxhen. Itcer inqyw qapp sewqair din'enn longxx si in'ui simx laii jniaa kuanxtew. Ananda, narr soxu sewqair itcer, qidiongx simrjiww qaur cauxqihiyc ee hiyhbang, ciuu qinguann longxx u ix vunxtew ee singr. Dyrr sngr hikongx iarr u jit xee miaa qapp siongwtew, hyhongw cingjing bibiau bingcingx ee simsingr, itcer iwliam ee qunxguann suacc dendyww byy vunxtew ee singr? Liw narr jip'ir beh qongw hunven an' qakdix qapp quancad laii liauxqaiw vunxtew ee singr dyrr si simx, jitt xee simx dyrr ingqaix ham' itcer siktew, pangkuir, kiwbi, qapp bongkap soxu siogdinn surhang qecli, lingrgua u ix jiaujngg ee singr. Kyxviw liw jitmaw tniax guaw qangxhuad, jex dyrr si in'ui u snia'imx jiacc laii u kuved. Dyrr junw itcer qenwbunn qapp qakdix longxx bedjuat, luerjai cisiuw cing'iux jigjing, kuved dinser soxu hxuad ee huanwngiaw iuguann dilehh. Guaw m si jikjue liw jipsiuw dirr jitt xee byngiaw ee simx, si beh rair liw qra jitt xee simx jimjiog cuicig, narr qra liogdinn vangwli iuguann u kuved ee singr, anne jitt xee dyrr jinjniar si liw ee simx. Narr jitt xee e kuved ee singr lirkuix liogdinn byy vunxtew ee singr, jitt xee dyrr si liogdinn kuved ee singr soxx henxhen ee ngiaw narnia. Liogdinn m si vutsii dnia dnia be qaixii. Narr juanxvenr, bedbyy ee sii, jitt xee simx dyrr naxx cincniu qux ee mox iacc tor ee qag, liw ee hxuad-srinx dyrr bersux juaddng .kir. Narr anne, si si'angw laii siulen jinwzip hamzimw byy singsuw ee jingwhuad qingxqair?"
Jitt xee sijun, Ananda qapp juui dairjiongr diamrjing gonggniac. Vuddyy qra Ananda qongw, "Sewqanx itcer yc siuhing :ee, uree bagjingg suizenn tangx singjiu qauw janr camsendnia, (huanlyw) berdangr lrauu .cud, dna' jniaa juer Arhat. Jex longxx in'ui jipquad dirr snesiw bongrsiongw, liahduargo qiycsirr jinsit. Soxiw qongxx liw dnaxx suizenn qenwbunn je, kiokk iuguann berdid singjiu jiww sxingr ee qongqyw."
Ananda tniax liauxau, qycjaiww visiongx lrauu bagsaiw, sinkux pag dirr tokax, habjiongw qui lehh qra Vuddyy qongw, "Jurr guaw dui' Vuddyy huatsimx cutqex, kywser Vuddyy ee hing'uix qapp sintongx, dniardnia qaqi decc sniu qongxx, siulen mrbenw lylok qaqi, liahjunw Zulaii e huirsur guaw samadhi, m jaix srinx qapp simx vunxlaii dy' berdangr sna' dairter, suacc laii sitlyc guaw ee vunxsimx. Suizenn srinx cutqex, simx byy jinwzip singwdy, piwlun sanr qniaw vangwsag laurve liujauw .kir. Qinaxzit jiacc jaix suizenn qenwbunn u je, narr m siuhing, m tniax Vudhuad, naxx langg cuir qongw jiahvng, quibuew be vaw. Sewjunx, guanw jiaxee jitmaw hro nng jiongw jiongwgai soxx kandnii, sidjai si in'ui m jaix jigjing ciangjai ee simsingr. Dogdok ngwbang Zulaii kyxlenn guanw ee kiamwkueh, huad bibiau bingqngx ee simx kaisi, laii kuix gunw ee dyrganw."
Hitt sii Zulaii an' hingkamw ee swastika (bxan .zri) vangwsia cud vyxjiyc ee qngsnuar, hitt xee qngsnuar qngx ngiarngia u cingvah jiongw sig, sibhongx cincniu din'aix hiacc je ee Vuddyy Sewqair longxx jiyr .diyc, iarr quanr dirr sibhongx Vudqog soxu Zulaii ee taukag-dingw , liauxau saur qaur Ananda qapp juui dairjiongr.
Vuddyy qra Ananda qongw, "Guaw jitmaw uirr linw qenwjy dairhuad, iarr hro sibhongx itcer jiongwsingx did diyc bibiau qibit ee huatgi, tangx cingkir bingtongx ee simsingr, did cingjing ee huatganw. Ananda, liw singx huedab .guaw. Knuar qnir diyc qongbingg quntauu. Jitt xee quntauu ee qongbingg si in'ui sniaw laii jniaa :ee? Anxjnuaw laii jniaa quntauu? Liw anxjnuaw e knuar .diyc?"
Ananda qongw, "Vuddyy qui' sinkux bersux Jambu Hyy ee qimx-aw, qng'iam naxx vyxsnuax, cingjing byy uwuer, soxiw u snix cud qongbingg. Guaw kaksit an' bagjiux knuar diyc gnoxlunjnaiw kud zip dni lehh henxbingg hro langg knuar .diyc, soxiw u quntauu ee siongwtew."
Vuddyy qra Ananda qongw, "Zulaii qinaxzit beh qra linw sidjai qongw. Soxu u diwhui :ee beh jiyh piwzu laii did diyc liauxgno. Ananda, kyxviw guaw ee quntauu. Narr byy guaw ee ciuw dyrr byy guaw quntauu ee hingboo. Narr byy liw ee bagjiux, liw dyrr knuar be diyc. Ixx liw ee ganw-qinx laii vixlun guaw quntauu, dyrliw qamxx u qangrkuanw?"
Ananda qongw, "Qangrkuanw, Sewjunx. Qacc byy guaw ee bagjiux dyrr knuar be diyc. Ixx guaw ee ganw-qinx laii vixlun Zulaii ee quntauu, dyrliw siy' cancniu."
Vuddyy qra Ananda qongw, "Liw qongw siy' cancniu, sursit m si anne. Sniaxmih enqor? Dyrr cincniu byy ciuw ee langg qui' siwlangg dy' byy quntauu. Hiaxee byy bagjiux :ee m si juanzenn byy soxx qnir. Anxjnuaw qongw? Liw cir mai dirr lo nirr sunmng cnimii :ee qongxx liw knuar diyc sniaw? Hiaxee soxu cnimii :ee vitding qra liw rinr qongxx, 'Guaw jitmaw bakjiux-jingg qandna' knuar diyc oamr, cunx :ee sniawmih longxx byy knuar .qnir.' An' jitt xee dyrliw laii knuar, bagjiux-jingg knuar .diyc .ee si amr, duiww ganxsig vunxsinx u sniaw sunxhai?"
Ananda qongw, "Soxu cnimii :ee bagjiux-jingg dna' knuar diyc oamr, nacc qongw ix tangx knuar .qnir?"
Vuddyy qra Ananda qongw, "Soxu cnimii :ee byy bagjiux, qandna' knuar diyc oamr, qapp u bagjiux ee langg srinx dirr amr sysyx ee sxig-lai, jitt nng jiongw oamr u jingcax iacc byy?"
"Narr anne, Sejunx, dirr amr sysyx ee sxig-lai :ee qapp hitt din cnimii :ee, jitt nng jiongw oamr siy' vixping byy sniaw jingcax."
"Ananda, narr byy bagjiux ee langg bagjiux-jingg juanvo oamr, hutzenqanx bagjiux hogbingg, tangx knuar diyc bagjiux-jingg ee huandinn siogsu, knuar e diyc jiongxjiongw siktew, jex qiyr juer ganw-qnir. Hiaxee dirr amr sysyx ee sxig-lai bagjiux-jingg juanvo oamr :ee, hutzenqangx did dinghuexqngx, iarr huandinn sioksu dirr ganw-jingg, qnir jiongxjiongw siktew ingqaix qiyr juer dinghuew-qnir. Narr dinghuew-qnir, dinghuew e knuar .qnir dyrr berdangr qiyr juer dinghuew. Qycjaiww qongw dinghuew knuar .diyc qapp liw sniaw dirdai? Soxiw qongw ingqaix jaix dinghuew e henxbingg siktew. Narr anne, e knuar .diyc .ee si bagjiux m si dinghuew. Bagjiux erdangr henxbingg siktew. Narr anne, qnir e diyc vunxsingr :ee si simx m si bagjiux."
Ananda suizenn qycc tniax diyc Vuddyy anne qangxsuad, qapp juui dairjiongr cuir ixx diam diam, simx iauxx bue liauxgno, iauxx decc ngwbang Zulaii juvix huat'imx suanqangw, habjiongw cingsimx kia lehh danxtai Vuddyy juvix ee qawsi.
Jitt sii, Sewjunx crunx cud tula mihuebang qngqut ee ciuw, gnoxlunjnaiw tenw .kuix, qawsi Ananda qapp juui dairjiongr qongxx, "Guaw cocox singjiu Vuddy ee sii, dirr Lok-aw Hngg, uirr Ajnatakaundinya go xee bikiu qapp linw siwjiongr qangxsuad qongxx, 'Itcer jiongwsingx be tangx jniaa juer Bodhi qapp Arhat, longxx in'ui hro siogdinn ee huanlyw laii soxx damgno.' Linw hitt jun inhyy kaigno tangx jitmaw singjiu diwhui singwqyw?"
Hitt sii, Ajnatakaundinya kia .kiw .laii qra Vuddyy qongw, "Guaw dnaxx dirr dairjiongr lairdew nihuer siongrr je, qycc dogdok guaw did diyc 'liauxted' ee bingbunn, in'ui u liauxgno 'kecdinn' ee iwbi jiacc tangx laii singjiu qongqyw. Sewjunx kyxviw luxkeh dirr luxsia hiyckax, bylun si jiahvng iacc hiyckunr, jiac suah iacc quewmii .quer, hingliw kuanw hyxser qycjaiww hiongr taujingg ee lo kixqniaa, be anzenn druar .lyc .laii. Narr si juxlangg, jurzenn dyrr be kixdingg jenongw. Jiauww znne sniu, byy druar qiyr juer langkeh, druar .lyc .laii qiyr juer juxlangg. 'kxeh' ee iauwjiw dyrr si be druar .lyc .laii. Qycc cincniu dnaaw lyhho liauw, cing'iux ee zidtauu sringx kir qaur tnidingw, zidtauqngx tauwquer pang, henxhen jiywqngx kongdiongx soxu din'aix ee siongwtew. Din'aix e isuaw. Hukongx jigjing be dinxdang. Jiauww anne sniu, cing'iux jigjing qiyr juer kangx, e isuaw :ee qiyr juer din'aix. Din'aix ee iauwjiw dyrr si e isuaw."
Vuddyy qongw, "Byy m driyc."
Jitt sii, Zulaii dirr jingwlangg diongx:a auw gnoxlunjnaiw. Auw liauw qycc tenw .kuix, kuix .kuix qycc auw. Ix qra Ananda qongw, "Liw jitmaw knuar diyc sniaw?"
Ananda qongw, "Guaw knuar diyc Zulaii ee vacvyw-lunn ciuxjniuw dirr jingwlangg diongx:a kuix .kuix qycc hap uaw .laii."
Vuddyy qra Ananda qongw, "Liw knuar diyc guaw ee ciuw dirr jingwlangg diongx:a kuix .kuix qycc hap uaw .laii. Si in'ui guaw ee ciuw u kuix u hap, iacc si in'ui liw knuar diyc u kuix u hap?"
Ananda qongw, "Sewjunx ee vyxciuw dirr jingwlangg diongx:a u kuix u hap. Guaw knuar diyc Zulaii ee ciuw qaqi kuix .kuix qycc hap .kiw .laii. M si guaw qnir ee vunxsingr qaqi kuix .kuix, qaqi hap .kiw .laii."
Vuddyy qongw, "Si sniawmih dinxdang, sniaxmih diamrjing?"
Ananda qongw, “Vuddyy ee ciuw decc dinxdang. Acc guaw qnir ee vunxsingr iarr byy diamrjing. Dycc jit xee byy dniardiyc?"
Vuddyy qongw, "Byy m driyc."
Zulaii jurr anne an' vacvyw-lunn jiangw-diongx cud jit jua vyxqngx vuex duiww Ananda ee jniawvingg. Hitt sii, Ananda uat tauu hiongr jniawvingg knuar. Ix qycjaiww vangwsia cud jit jua qngx vuex duiww Ananda dywvingg. Ananda iuqycc uat tauu hiongr dywvingg knuar.
Vuddyy qra Ananda qongw, "Liw ee tauu qinaxzit inhyy uat dinxdang?"
Ananda qongw, "Guaw knuar diyc Zulaii huad cud bixbiau vyxqngx vuex duiww guaw ee jyxiurvingg, mrjiacc knuar dywvingg qycc knuar jniawvingg, tauu qaqi dyrr e dinxdang."
"Ananda, liw uirdiyhh knuar Vut ee qngx, tauu dywvingg jniawvingg uat dinxdang. Si liw ee tauu dinxdang, iacc si qnir ee vunxsingr decc dinxdang?"
"Sewjunx, guaw ee tauu qaqi dinxdang. Acc guaw qnir ee vunxsingr vingrr byy dniardiyc .kir. Si dycc jit xee decc dinxdang?"
Vuddyy qongw, "Byy m driyc."
Jurr anne Zulaii qra soxu dairjiongr qongw, "Narr qycc u jiongwsingx qra e dinxdang :ee miaa qiyr juer din'aix, qra be dniardiyc :ee miaa qiyr juer kxeh. Linw knuar Ananda tauu qaqi dinxdang, qnir ee vunxsinx be duer lecc dinxdang. Qycc liw knuar guaw ee ciuw qaqi kuix .kuix qapp hap uaw .laii, qnir ee vunxsinx vingrr byy tenw .kuix iacc qud zip. Jnuaxngiu linw jitmaw knuar dinxdang juer srinx, knuar dinxdang juer qxingw? An' kixtauu qaur lorbuew, simx simx liam liam :ee dyrr si snix cud qapp bet .kir, suacc sitlyc jinsimx jursingr. Qniavangr qeww dendywtauu, jursingr vunxsimx jauxjuac, liac kecdinn surbut juer jurqiw. Dirr lunhuee lairdew lunjuanw marr si qaqi jyr did laii :ee."