derr cid hxang

Lun Uahmia

1. Birdix snix, endix siw?

Siw qapp uac ee dairjir, duiww huanrnarr u uahmia ee mic laii qongw, si jueww diongrdai ee bundee. Qycjaiww uahmia zuxx ciongmuaw, zuxx qysiong :ee, knuar jitt xee sixuac ee bundee si zuxx quanced zuxx iongrsimx. Langg si jingww uahmia ee tauu, soxiw sixuac ee bunrdee, dirr jingww uahmic ee diongqanx, dyrr si langg qamxqag jueww cimx, genxqiur jueww bingvik.

Sixuac ee dairjir, si bxan hxang dairjir ee tauu itdingw dua :ee. Qycjaiww iarr si jueww qanqer e tangx qaixquad. Langg narr bad jitt xee bunrdee zuxx tetdew tangx qongw dyrr si zuxx bunbingg, zuxx jinwvo, zuxx gauu, zuxx uixdai.

Siw qapp uac jitt nng hxang, si juanzenn dywvingw ee dairjir. Siw narr piwlun jyr amr, uac dyrr si qngx. Acc siw narr piwlun jyr byy, uac dyrr si u; qycjaiww siw narr si lyhqe, uac dyrr si jniurquann lar. Dui' anxnix tangx jaix siw qapp uac si duiwviw, nng hxang sna' duiwjiyr. Soxiw narr e tangx bingvik jit vingg, qycc jit vingg dyrr jurzenn qadi e tangx jaix. Pixlun qongxx, narr jai'ngiaw dangvingg, jurzenn saivingg dyrr e hiauw did. Siw qapp uac nng hxang qyxzenn si byy siang; jongw .si in'ui inx si sna' dywvingw, soxiw narr jaix uac, dyrr e tangx jaix siw; acc narr jaix siw, iarr e tangx jaix uac. Soxiw Kongxjuw ee hagsingx Juxlo mng siw ee dairjir ee sijun, Kongxjuw qanda' rinr ix, qongxx, "Birdix snex, endix siw?" Si qongxx, liw dy' iauxx bue bingvik jnaixngiu qiyr jyr uac, beh tacc erhiauw snaxhuer hy jyr siw? Dirr Kongxjuw ee iwsur dyrr si qongxx, liw narr e bingvik uac ee dairjir, jurzenn siw ee daijir qadi au-laii dyrr e did tangx bingvik.

Uac, si jingwlangg soxx hixair; siw, si banrlangg soxx iamwki. Air uac, m air siw, jex si jyr langg qiongrtongx ee simliw. In'ui si air uac, soxiw langlangg dy' si sniu air quw quw e did .diyc; siw, si langlangg soxx m air, soxiw langlangg dy' si sniu air quw quw e tuatli. "Cutsiw, zibsingx" ee huatdo, jex si langlangg dui' simqnuadew soxx air did .diyc .ee; jongw .si did .diyc liauw ee langg, jurr kaix tende ixlaii, m jaix u quiw langg?

Narr jiauww bagjiux soxx knuar .qnir .ee laii qongw, qaur jit zit dairqex dy' iarr longxx diyhh siw ee kuanw. Suizenn si anxnix qongw, langg iarr dy' longxx si m sixsimx, dniardiyc vutsii m kingw vangwsag jitt jann su. M si m kingw vangr, dyrr si beh vangr iarr si vangr be kuix. Tangx qongw dui' jitt xee sixuac ee bunrdee, jywlangg dniardiyc air bingvik. M na si anxnix; uac, longxx rair quiwdiong vyxcii; siw, longxx air siamxvi iamwngor; jex qaxnaxx cincniu si jywlangg ee girbu. Qycjaiww iarr si jywlangg ee quanli ee kuanxsid. Soxiw tangx jaix, air beh cutsiw-zibsingx ee simqnuax, si jueww derr id vikced. Jitt xee simqnuax soxu huatdong ee sijun, banrsu si dikkag byy cyxcyw, m si ox; dyrr si vec; m si qngx, dyrr si amr; m si uac, dyrr si siw. Longxx si jinx dyx, jinx qiamr ee dairjir; jitt xee simx jinjniar si vyxvuer, qycjaiww iarr si jin' guihiamw. Soxiw jywlangg duanwzenn m si cincniu decc vnuahir, jitt sii jrngx jyr sxingx, kacc tingg jrngx jyr dnuar; dirr vnee-dingw dairqex jyr liauw vutqiong-dairtenx ee siudik, lyc vnee-xe suisii vniwjniaa liw hniax guaw dxi ee hyw ving'iuw. Jywlangg dniardiyc m si anxnix lar! Cuiwciux huad .cud .laii, beh qiyr ix qycc qiux .zip .kir, si dikkag be iong .did; taumngg vec, jnaixngiu e tangx qiyr ix qycc ox neh?

Dairqex diyh'air jaix, langg itsingx ee diongqanx, cuanw jit xee kuir, acc si pah jit xee kacniur, hah jit xee hir, dy' longxx u iwsur, qapp sixuac ee bunrdee dy' longxx u quanhe; duanwduanr be iong did hodoo cinwcaiw jyr.

Sixuac jitt nng jann su suizenn si siongduiwjiyr, jongw .si inx u jing'au qinxban ee hunved. Uac, si dirr dairsingx; siw, si dirr dywbuew; uac, si dirr henrjai; siw, si dirr jionglaii. Lanw beh genxqiur sixuac ee bunrdee, suizenn si qongw vutlun bingvik dycc jit vingg, qycc jit vingg jurzenn dyrr e tangx bingvik; mrquxx siw ee dairjir si sriok dirr au-laii, sidjai si viw uac ee dairjir u kacc yh bingvik; soxiw Kongxjuw jiacc qongw, "Iauxx bue jaix uac, jnaixngiu e tangx jaix siw?" Dyrr si qongw, diyhh dairsingx bingvik uac ee bunrdee, zen'au siw ee dairjir dyrr qadi e hiauw did.

2. Dauwdiw jnaixngiu jiacc si uac?

Dauwdiw jnaixngiu si uac? Qanxdanx e tangx rinr jit qxur, dyrr si qongxx, u uahmia :ee dyrr si uac. Narr si anxnix, qycc mng jit qxur, uahmia si snex jyr simxmih kuanw neh? Beh rinr jitt qxur ue kiokk si byy hiacc kuair; m si jit qxur nng qxur dyrr rinr e laii. Cniaw dairqex dingrsinx snaqab genxqiur knuar.

Cniaw singx duiww lanw ee bagjiux soxx u knuar qnir ee uahmia siongser qiamxdiamw jit vaiw knuar. Huanrnarr uac ee mic derr id diyh'air u venwngua, dyrr si rair sisii singdiongw u huatdat. Cincniu cauxbak kixtauu si jingxjiw, au-laii dyrr huatgee, snex qinx, huatqix, jiamrjiam dua .kiw .laii, vutsii dy' u venwngua, u huatdat. Acc si haiw-lai ee hii hee juixjok, snuax-dingw ee kimsiur tangg-lui, dyrr si lanw langg iarr si anxnix vutsii u venwngua huatdat. Tangx jaix u venwngua, u huatdat, si uahmia tauu jit diauu ee iauwqnia. Cincniu iw, dyh, jxngx-aw, jiyhtauu, jitt lui setsuw u venwngua, ix ee venwngua m si jinwvo huatdat ee venwngua, si jiamrjiam siaubyy tewvo, si naxx venr naxx pnaiw, jitt lui si byy uahmia, si qiyr jyr byy mia ee mic.

Ciurbak qapp kimsiur vnevnee dy' si vutsii u venwngua u huatdat, soxiw dy' longxx si uahmic. Mrquxx ciurbak ee uac qapp kimsiur tangtua ee uac dua dua u byy siang ee soxjai. Huikimm jauxsiur tangtua ee uac, viw ciurbak huecauw ee uac u kacc quann jit kxamw. Ciurbak huecauw suizenn sisii u venwngua huatdat, jongw .si ix narr m si langg qra ix qrut, qra ix qrngx, ix dikkag si be tangx suaw quer ui. Tangtua jiauxjiah dyrr m si anxnix; inx qadi e tngx suaxui kir jiax kir hiax. Tangx jaix kacc quann ee uahmia iauxx u jit diauu ee iauwqnia, dyrr si diyh'air e tangx iong qadi ee simsux juriuu qniajauw dinxdang.

Liw knuar, huexciax jin' gauu jauw, gauu dinxdang; anxnix huexciax qiamxx is u uahmia? Duanwduanr byy. Huexciax suizenn si u decc jauw, decc dinxdang, hex m si cud jurr ix qadi, si sraiw huexciax ee langg qiyr ix dirdecc jauw; sraiw huexciax ee langg narr si m, jit cunr hng ix dy' be tangx suaw jinwjingg. U uahmia :ee m si anxnix; u uahmia ee dinxdang dikkag si cud jurr qadi ee iwsur. Cri guu ginxaw kanx guu kir juiw-vnix beh hro guu limx juiw. Guu cuiwdax dyrr limx; jongw .si narr ixqingx limx qauwgiac, suizenn si ginxaw dua sniax huah ix diyhh qycc limx, guu iarr si jyww ix jairgnow jairgnow; beh limx m limx si cutjai guu qadi juxir, vadd langg be tangx qra ix qansiap. Guu e dinxdang si cutjai ix qadi, soxiw guu si u uahmia. Qycjaiww jitt kuanw ee uahmia si viw ciurbak :ee kacc quann jit kxamw. Guu jitt lui si qiyr jyr dongrbut, ciurbak si qiyr jyr sidbut.

Langg qapp dongrbut dy' longxx si e tangx juriuu qniajauw dinxdang, jongw .si langg ee uac qapp dongrbut ee uac iurr si dua dua u jingcax. Langg ee uahmia iurr si u qycc quann jit kxamw. Langg ee simliw vutjiw kacc hogjap, kacc lingtongx; ix e hiauw did qewik jiongxjiongw ee dairjir, congwsed dagg hxang ee surgiap, jewjy c.-cingban-b. ee mihqnia. Jongw qongw, langg m na e tangx jai'ngiaw ix qadi ee jinwter hingdong, iauxquxx e tangx jai'ngiaw jiuuii ee jongrhongw, e hiauw qra ix anvaii hro ix kacc hyxser, hro ix kacc jinwvo; jex dyrr si langg ee diwsig u kacc ngiaa dongrbut.

Langg m na diwsig u kacc ngiaa dongrbut, dyrdiksimx iarr qex quann bydangr sngr. Dongrbut ee diongqanx kiokk m si longxx byy dyrdig ee simqnuax. Lanw jaix qauxhia suizenn si jin' siyxser ee dongrbut, iauxquxx ix jin' u qongqiongrsimx. Lanw bad knuar qnir qauxhia decc siy' taii, osig :ee taii angsig :ee. Dirr qangxx cingban jiah ee diongqanx, inx iauxquxx si vtujiw hyhiap; uirdiyhh siysiang jingxjok ee hing'ong, vniawmia cud lat qaur siw, longxx byy trer. M na anxnix, vingsii duiww jiahmic inx vutjiw u vundniux; narr si u jit jiah tyw byy jiac, vakdow iaux ee sii, vadd jiah dangpnua jiac vaw ee qauxhia narr knuar qnir, ix dyrr kax tenw kuix, jiong' ix vxag-lai soxu ee jiahmic tror .cud .laii vunx hitt jiah iaux :ee jiac. Jex qiamxx m si jin' u dyrdig, jin' u qongqiong ee simx mah?

Qycjaiww marr si cincniu qebyw decc dog biw hro qeaxqniaw jiac, acc si lairhiyc decbeh buac qeaxqniaw ee sii, qebyw crangr xmngg qok qok qiyr, cud jin ix ee kuiwlat qapp lairhiyc drow snewmia; jex si lanw bagjiux soxx siongsiongg cinx knuar .qnir .ee, dyrr tangx jaix qebyw tniar qniaw ee simx qaur dyclyc.

Suizenn si anxnix, qongw dongrbut ee dyrdiksimx iauxx si jin' iuwdi, duanwduanr be tangx viw did langg, byy cincniu langg hiacc qysiong, hiacc jinwvo. Dongrbut ee dyrdig longxx si duiww ix jit srinx, acc si duiww ix ee drangg lui drangg jok ee lirig snex .cud .laii .ee. Soxiw jit jxingw dongrbut ee dyrdig qapp vadd jxingw :ee, si dikkag be siongtongx, tangx qongw dongrbut ee dyrdig si cenxvyc, jin' ehdec. Langg ee dyrdig duiww dirr lirqixsimx snex .cud .laii .ee, kiokk iarr m si byy, jongw .si hex si iaxbanlangg ee dairjir. Jurr qoxjaw qaur qinaxzit soxx e tangx cxingx jyr singwzinn henzinn, dyrr si siwjniar ee langg. Jitt kuanw langg ee dyrdig, dikkag m si duiww lirig laii jniaa :ee. Langg ee dyrdig si duiww liongsimx qapp tenliw laii :ee lar, viw dongrbut :ee si vutjiw u kacc cimx, kacc kuah, kacc qysiong.

Langg viw dongrbut ee uahmia iauxx u kacc jinwvo ee soxjai. Dyrr si langg u hunved suiw-baiw ee simx; in'ui jitt diamw ee quanhe, langg qapp dongrbut si u tenenx ee jingcax.

Mrbenw qongw langg viw dongrbut, qanda' jiong' bunbinglangg laii viw iaxbanlangg, dyrr ixqingx cax jin' je. Dirr iaxbanlangg ee diongqanx, jitt hxang hunved suiw-baiw ee simjingg, si jinjniar byy huatdat. Guaw bad zip snuax kir knuar snualairlangg ee jngsia, knuar inx ee cur si jin' cinwcaiw, dagg qingx longxx siangrkuanw, u jit sud aw venwkuanw dy' byy. Acc inx ee cur-lai si h.-huehed-h., longxx byy u simxmih anvaii jingxdunr jongsig, qanda' sir pnir viah draur jit xee cuwdingw, acc u entunn didusix vruer vruer liamm liamm neh. Qycjaiww knuar inx ee cur guarkauw, derbin si k.-kamket-k., inx soxx ing liauw ee lasamm juiw jxig qui' kud dirdecc caur; jiyhtauu qapp cauxsab huehed qaur muaw siwqer. Inx soxx cri ee qxex, qxauw saixziy vangr qaur jiax u, hiax iarr u. Guaw knuar liauw simtauu qaxnaxx qiongqiongg beh jadkir. Qniaa qaur lirkuix inx ee sia-gua, dac diyc cnecauxde, jriab diyc snuax-dingw cuex .laii ee liangg hongx, knuar diyc ciurqix dirdecc iyy, tniax qnir jiauxjiah dirdecc hauw, decc gimm, guaw ee simx kixtauu jiacc jiamrjiam kuix. Ar! Iaxbanlangg ee soxjai si viw byy langg ee kongwiaw kacc baiw, kacc kiapsir, u banrban vxue.

Zidvunw luerde guaw iarr si bad kir quixnarr nii. Guaw knuar inx ee qelo qapp cur juac lanw jitt vingg si byy zuarr je. Mrquxx inx ee cuwvnix narr si u kangr de, inx dniardiyc narr m si jxaix ciu, dyrr si jingr huex, acc si hro ix huad cnecauw. Acc narr jit jangg ciu dniardiyc byy vangr hro ix luan luan huad, dyrr qra ix jenw hiyc diauqix hro ix kacc hyw knuar. Narr si byy derdniuu, inx iarr dikkag knuar jit xee knax iacc si tangw, dyrr jxaix huex iacc si vowqingw dirr hitt nirr tangx siongxguanw. Inx ee cur suisi byy dua qingx, jongw .si vutjiw jejingw gnaxdir, vin' narr bagjiux soxx knuar e qaur ee soxjai, dniardiyc si byy suatoo, diduxsix tangx knuar qnir. Huanrnarr ciuw crngx e qaur ee soxjai, vutlun si dyh-dingw, mngsnir, tang'axjiw, acc si tiau-aw, hording, inx vutsii dy' u ziuu u sew. Soxiw tiau-aw, vangdow ee sambah si vutsii ciah lahlac, hro langg knuar liauw simqnuax si jin' cingsongw. Qycjaiww inx cur-lai dniardiyc u he hueqanx qoxvnuaa, cah huex cah cauw dirr hitt lai, acc cah ee huatdo si vutjiw dingxjinx u qangxqiur. Qanda' qar langg jit hxang cah huex ee huatdo decc quer zit ee langg si huisiongg je. Iurr inx ee hurzinn jerje e hiauw gagkir, acc si cniuwquax tiauwbuw. Jongw qongw, Luerderlangg vutjiw diwdiong suiw, vutjiw air gnaxdir.

Narr lun qaur Sengiulangg diong suiw ee simsingr si iauxx qyckacc cimx kacc quann jit qxib. Guaw dirr dingw jam u qongw iaxbanlangg ee soxjai si viw byy langg qaur ee kongwiaw kacc baiw banrban vxue. Dirr jiax guaw qycc qongw, bunbinglangg ee soxjai si viw byy langg qaur ee kongwiaw kacc suiw banrban vxue. Jurzenn ee qingxdir kiokk si suiw, jongw .si u bunbinglangg decc quanxqor ee qingxdir si ithuad qyckacc suiw. Langg qapp langg ee diongqanx, siongrcniaw u jitt kuanw ee jingcax, dui' anxnix dyrr jai'ngiaw langg qapp dongrbut ee diongqanx jingcax u zuarr je.

Lanw ee girlun qaur jiax jin' luanrjap. In'ui qniax liauw sniu' luanrjap, soxiw lanw dirr jiax diyhh laii jongxqed jit vaiw. Dyrr si lanw ixqingx u qongw, uahmia ee derr id iauwqnia si rair vutsii u venwngua, u jinwvo. Derr zi iauwqnia si diyhh e tangx iong qadi ee simsux juriuu laii uahdang. Acc derr snax xee iauwqnia si qongxx, diyh'air u simkiaur, dyrr si vutlun diwsig ee simx, dyrdig ee simx, iacc si hunved suiw-baiw ee simx. (Langg ee simkiaur jixu jitt snax jingxlui). Jitt snax kuanw ee simkiaur diyhh longxx jin' bingbinw, jin' qysiong, jin' ciongjiog, qycjaiww diyhh vutsii uahdang byy tingkunr.

Dingxbin u qongw langg ee simkiaur e tangx hunx jyr snax jingxlui. Jit jxingw si diwsig ee simx, jit jxingw si dyrdig ee simx, qycc jit jxingw si hunved suiw-baiw ee simx. Quanhe jitt snax kuanw simkiaur, lanw dirr jiax sniu air laii qongw kacc cingcyw .damrvyc.

Diwsig ee simx si simxmic? Jitt xee simqnuax si decc bad jingww vah hxang mihqnia qapp dairjir, qapp dagg hxang ee lixkir. Jongw qongw jit qxur, jitt xee simx si decc hunved surbut qapp dyrliw ee jinx-qew. Qycc qongw jit qxur kacc qanxdanx, diwsig ee simx dyrr si bad jinliw ee simx lar. Bad jinliw ee simx si dirr lanw ee sintew-lai, si sriok lanw :ee, mrquxx jinliw m si sriok lanw :ee. Jinliw narr qanda' jit langg ee, hitt xee duanwzenn beriongrdid qongw si jinliw; hitt xee si sukiax ee jingliw. Jinliw si junw langg bad, m junw langg sukiax. Jinliw si qaxnaxx hongx qapp ho, si jitt tniderqanx vunxlaii dyrr u :ee. Bue u langg ixjingg, dyrr ixqingx u liauw lar.

Tniderqanx u juiw iarr u huew, jex si jinsit, si jinliw. Juiw qnir diyc huew e qunw, e dax, jex iarr si jinliw. Juiw qenwnarr qnir diyc huew dyrr vutsii e qunw, jex qiamxx iarr si jinliw mah? Juiw narr qnir diyc huew, urdangsii e qunw; jitt jann si jinliw. Mrquxx narr zin jyr juiw qenww qnir diyc huew vutsii dy' e qunw, jitt jann dyrr m si jinliw, si u cywgo. Jnaixngiu u cywgo? Qex ue mrbenw qongw, jex si qokk langg siongsiongg soxx qinggiam. Narr beh hro juiw qunw, huew diyhh jiog, hniaa qaur juiw e siyx u jit-vah dxo, jiacc e qunw. Soxiw narr qanda' qongw juiw qnir diyc huew, si urdangsii e qunw, m si vutsii dikkag e; anxnix dyrr byy cywgo; jitt xee si jinliw.

Qenwnarr duw diyc jinliw, vutlun sniaw langg dy' air singzin hanghok. Jairr jinliw ee binrjingg langg byy qxuann tangx qongw sirhuix, jixhyw singzin tanwjiongg nardnia. Singzin jinliw ee simx si jairr lanw ee sintew-lai, jitt xee dyrr si diwsig ee simx, acc si qanda' cringx jyr "Diwhui." U diwhui :ee, dyrr si gauu langg, bunbinglangg; byy :ee, dyrr si gong langg, iaxbanlangg.

Dyrdig ee simx iarr si dagg langg soxx u :ee, qanda' si u duarser, cimcenw kuac'ec ee hunved. Langg u dyrdig ee simx, jiacc erhiauw hunved hyw-pnaiw. Soxiw dyrdig ee simx eriongrdid qiyr jyr senrog ee simx. Sxen dyrr si hyw, og dyrr si pnaiw. Sxen si langlangg soxx iwair, og si langlangg soxx m air. Suizenn si anxnix qongw, senrog m si cincniu jinliw qaur dyc'ui dy' siysiang, iarr m si qaur simxmih sidai dy' byy venwngua. Vnevnee jit hxang mic, acc si jit jann su, hyw-pnaiw si beriongrdid kinx kinx qra ix pnuawduanr. Diyhh knuar hitt hxang mic, hitt jann su si cud dirr simxmih sijun, acc si dirr dyclyc. Sidai qapp soxjai narr byy dniardiyc, surbut ee hyw-pnaiw si yh did duanwding.

Piwlun qongxx, pnaiw nidangx, gnoxqog longxx byy siux, bydangr tangx brew jiahmic ee sijun, hyxgiahlangg ee cur u jinjux, u bixniuu; ix qongw beh viauxbingg ix ee hyw dikhing, jiong' ix soxu ee jinjux nriuu qui' jxinx qui' dauw, vunx hro cuwvnix byy tangx jiac ee langg. Jitt kuanw jnaixngiu neh? Si hyw iacc si pnaiw: Narr si hyw nidangx ee sii dikkag si jin' hyw; qycjaiww narr si qautongx lirven, jiong' hiaxee jinjux urdangr tangx kir bre, kir ngua bixniuu, suizenn si viw niubiw hro ix kacc huiwkir, iarr iauxquxx e tangx qongw si qniaa hyw su. Mrquxx nidangx si pnaiw lar, dagg dah dy' longxx pnaiw, dagg langg dy' lamw vakdow decc knuar jnii snex sxenx; jairr jitt hy ee sijun, jit dauw jinjux qiamxx m si viw jit liap bixcig kacc m dat, kacc byy loring mah?

Soxiw tangx jaix hyw-pnaiw ee dairjir si beriongrdid kinx kinx duanr, diyh'air knuar siser qapp knuar soxjai. Suizenn si anxnix qongw, hyw su si dikkag vutsii u, qycjaiww hyw-pnaiw iarr m si qongw eriongrdid luan luan liapjy .did. Narr si in'ui hyw-pnaiw senrog ee guarpuee vutsii ngua, acc dyrr suar qongw sewqanx byy senrog, vutqyr si qongw ngiaa, cniuw ngiaa dyrr si hyw, anxnix dyrr hai lar. Dairqex knuar lanw kax-xe ee kejuiw vutsii dirdecc lrauu, jitt kig soxx knuar ee kejuiw qapp au kig soxx knuar ee kejuiw dangxjinx si byy siang, jongw .si juiw dy' iuguann si juiw lar. Juixguann narr byy dax, kejuiw qiamxx m si vutsii uang'uangx lrauu. Sizit qapp soxjai suizenn si dniardnia air venwngua, jongw .si hyw ee dairjir ingxuanw si be siaubyy.

Langg ee simkiaur u snax bin. Jit bin si bad jinliw, jit bin si bad senrog, qycc jit bin dyrr si ved suiw-baiw. Hunved suiw qapp baiw ee simx, jit miaa qiyr jyr gersudsimx. Bad jinliw qapp senrog :ee, mrbenw qongw iaxbanlangg, dyrr si dongrbut iarr si u damrvyc, jongw .si jitt xee gersudsimx dyrr si dogdok langg jiacc u. Langg narr naxx jinwvo, gersut ee simkiaur si naxx cimx, naxx uahdang. Piwlun jiax u jit der dui' snuax nirr duxjiacc tec .cud .laii ee gxik. Gxik dyrr si gxik, knuar qnir qapp jiyhtauu byy qyc'ngiu; tec hro dix, ix iarr qnaw m pni; tec hro iaxbanlangg, qiamxcaiw kiyh kir quew dyckax. Jongw .si liw narr tec qaux bunbinglangg, ix dyrr hnuatnix-hixde, jiong' hitt der higsi buaa, higsi dog, dyrr kig jniaa jiongxjiongw ee mihqnia; higsi gxik-ciuxkuann, higsi gxik-vxuex, gxik-sraix-aw, gxik Quan'imx; hingjong kiauxbiau, sikdir jin' suiw, qngcaiw e giuw langg ee bagjiux. Qaur jiax jiyhtauu dyrr vniwjniaa jit hxang dua vyxvuer, hro langg knuar liauw diddit u cuwbi. Tangx jaix bad jinliw qapp senrog ee simx, qyxzenn si uahmia iauwqinw ee vorhun. Jongw .si narr byy gersut ee simx, hitt xee uahmia si jin' dasyr byy cuwbi, byy qyc'ngiu hyw gxik jniaa jyr cox jiyhtauu. Kongxjuw juxdniux iong imgak, tongxdi tnikae ee guaninx sidjai dyrr si jitt diamw. Ix knuar cud iongxsingg langg ee gersudsimx si iauwqinw, si e tangx hro tnikae hyvingg. Jitt diamw si ix u dua qenwsig ee soxjai.

Uahmia ee derr snax iauwqnia dyrr si diyh'air u simkiaur, jitt xee simx si dui' snax vorhun laii jniaa :ee, lanw ixqingx u qongw bingg. Jongw .si jitt snax vorhun ee simkiaur duanwzenn m si sna' lirkuix, si dui' jit xee uahmia huad .cud .laii ee jok'iong, vixcuw si longxx u snax quanlenn. Jitt snax vorhun ee jok'iong narr si u jit vo kacc byy uahdang, vadd vorhun iarr e sriu ix ee kenlui. Dui' anxnix hitt diauu uahmia dyrr beriongrdid sngr si guanjuann :ee. Acc jitt snax vorhun ee jok'iong narr si u diauhyy, longxx vnevnee u uahdang. Dui' anxnix hitt diauu uahmia dyrr e huatdat qaur dirr byhan ee soxjai. Jairr jitt uxdiu ee diongqanx, dogdok lanw langg u jit jxingw ee uahmia, soxiw qongw langg si bxan hxang uahmia ee lingdiongw.

3. Ingxuanw ee uahmia

Dirr dingw jad soxx lun u hiacc dngg, qetqiok si qongw jnaixngiu jiacc eriongrdid qongw si uac. Si qinrqin qongw diyhh anxnix jiacc eriongrdid sng jyr uac, vingrr m si qongxx qaur uahmia ee qigdiamw. Uahmia narr si qaur dirr qigdiamw, uanjuann ee dervo, m na qadi vutsii uahtiaur-t., iauxquxx e tangx hro langg uirdiyhh ix laii uac, dairqex ee uahmia beh suar qaur dirr byy hanrliong ee quw. Jitt jiongw qiyr jyr ingxuanw ee uahmia. Ingxuanw ee mia dyrr si qapp Sinlingg jidngiu.

Langg ee uahmia si byy zuarr quw. Siogguw qongw, "Cid-jap ee huewsiu jurr qoxjaw ixlaii dyrr jin' jiyw." Zidvunw Luerde u jit xee cutmialangg qiyr jyr Dairue Diongrsinr(Okuma). Ix vingsor qongw ix diyhh jiac qaur jit-vah-zi-jap-go huer jiacc beh siw. Jongw .si ix suisi gauu, dy' iarr jyr be qaur, qinrqin veh-jap gua huer dyrr dngrkuir. Dirr byy zuarr quw ee sinbunn u vyr, qongw, Diongqog u jit xee lau hurzinlangg jiac qaur jit-vah-veh-jap huer. Qnuahuw liahjyr jin' hanxiuw, duxx junxvi decbeh sangr mic qra ix jiokhy, virvan iauxx bue jniaa ee sii, dyrr quewsinx .kir.

Acc qoxjaw Jinsixhongg tamx diyc ix ee hongdewui, jidsimx iurr jaix langlangg ee snewmia byy zuarr quw, soxiw simlai air did diyc diongsingx-vutlyw ee huatdo. Ix ee zinsinn u jit langg qiyr jyr Cii Hog henwqer, qongw, "Dangvingg haiw-diongx Honglaii Dxyw si senqingw ee soxjai, dirr hiax u senx decc lenrdanx; langg narr jiac diyc hitt hy sendanx, dyrr ingxuanw be siw. Cniaw vewha qaux go-vah miaa donglamm, dongluw, qapp kacc je ee jinjux, vyxgik, ngqimx, vehginn, hro guaw druar kir Honglaii Dxyw. Dikkag e tangx qriuu diyc sendanx, tangx laii hro vewha jiac." Jinsixhongg tamx diyc dngg snewmia, qyxzenn dyrr jiong' Cii Hog soxx cringw ee langg qapp mic qaudair hro ix kir. Jongw .si Cii Hog itkair byy huetauu. Jinsixhongg qycc byy zuarr quw, suizenn si hongder, dy' iarr diyhh jiauww poxtonglangg ee kuanw siw. Au-laii langg jaix Cii Hog m si jinrsimx beh qriuu sendanx laii hro ix, sidjai si knuar qnir Jinsixhongg budy e hai langg, soxiw sun ix ee iaxsimx, penr ix ee jnii qapp langg duar kir haixgua Honglaii Dxyw (Dyrr si henrsii Zidvunw Luerde), cing'ingg quer zidjiw.

Jurr qoxjaw qaur dnaxx, langg uirdiyhh air qadi ee snewmia kacc dngg jitt kig quw, m jaix jyr cud zuarr je ee pnaiw su dy' m jaix. Suizenn si anxnix, qetqiok dagg langg kuiwsix dy' rair dng, bah dy' rair nua, qud dy' rair hux; mrquxx duiww jitt xee ingxuac ee uahmia, dniardiyc langlangg dy' si m sixsimx, dyrr si guaw iarr si hitt lai ee jit langg.

Ingxuanw ee uahmia m si cincniu Jinsixhongg gongrsniu hitt kuanw ee mic lar; m si diamr dirr bah qapp qud soxx jniaa ee singkux, iarr m si ersaiw did iong nihuer qewsngr .did. Ersaiw did iong nihuer qewsngr ee uahmia, setsuw e tangx cincniu lau Pnejow uac veh-vah nii, narr laii vixping ingxuanw, si kacc m dat sijingx diak jit xe ee quw. Lanw rair jaix ingxuanw ee uahmia si be sngr did quw ee uahmia; setsuw si uac jit-cingx nii, jap-bxan nii, acc si c.-cingban-b. nii, iarr iauxquxx si e sngr .did, dikkag beriongrdid qongw si ingxuanw.

Ingxuanw ee uahmia be tangx diamr dirr jit xee ee singkux. Diamr dirr jitt xee sintew ee uahmia si ciurbak ee uahmia, jingsnex ee uahmia, tangtua ee uahmia. Jitt kuanw uahmia ee siangrr qigkamw, dyrr si langg ee uahmia lar. Jiaxee uahmia jongw qongw si u hanrliong :ee. Ingxuanw ee uahmia dyrr m si anxnix, si byy hanrliong :ee, si beriongrdid qioghan dirr jit xee u hanrliong ee hingtew. Be tangx hanrdnia ee uahmia dyrr si ingxuanw ee uahmia; sewqanx soxu itcer u hanrliong ee uahmia longxx si dui' jitt xee cud. U hanrliong ee uahmia jueww quann jueww huatdat :ee dyrr si langg ee uahmia. Byy hanrliong ee uahmia, ingxuanw ee uahmia dyrr si Sinn (Siongrder). Sinn qongw si uxdiu ee juxjnaiw, bxan mic qapp langg qongw si Sinn congwjy :ee; jitt xee iwsur, dyrr si jiauww dingxbin soxx qongw; u hanrliong ee uahmia si dui' byy hanrliong ee uahmia laii ee enqor.

Dingxbin u qongw, langg ee simqnuadew longxx decc ngwbang did diyc ingxuanw ee uahmia. Jitt qxur ue si simxmih iwsur? Diyh'air tiah kacc bingg. Ingxuanw ee uahmia dyrr si Sinn. Qongw beh hibong did diyc ingxuanw ee uahmia, si qongxx ngwbang beh jyr Sinn acc m si? Narr si jitt xee iwsur, si dikkag mrbenw bang, si duanwduanr be e ee dairjir. Cir sniu knuar, jit dih juiw jnaixngiu e tangx jniaa jyr duarhaiw neh? Jit dih juiw soxx jyr e qaur :ee, vutqyr si camx duarhaiw ee juiw-lai, tangx quanhe dirr cri duarhii, puu dua junn ee dairjir nardnia. Jit dih juiw sidjai si be tangx jniaa jyr jit duarhaiw ee juiw; jongw .si jit dih juiw suizenn si siyw siyw, iarr si e tangx lrauu zip dirr duarhaiw ee lairdew, draur jyr duarhaiw soxx e tangx jyr ee su.

Qapp jitt xee piwzu siang iwsur, langg narr sniu beh jyr Sinn, jex si byy qyc'ngiu ginxaw crunx ciuw beh tec guec; m na kax ner quann, dyrr si giaa tuix vreh jnriu kir cuwdingw iarr si mrbenw bang; jex si duanwduanr be e.

Langg soxx jyr e qaur, soxx hibong e qaur ee soxjai, dyrr si tuatli jitt xee u hanrdnia ee ziogtew, dywdngw kir Sinn ee soxjai qapp Sinn hap jywhuew nardnia; acc narr qaur hitt xee dervo, e tangx qapp Sinn jyr siangrkuanw ee surgiap. Anxnix dyrr si zip dirr ingxuanw ee uahmia, dyrr si did diyc ingxuanw ee uahmia. Qaur jiax dyrr si uahmia ee qigkamw, dyrr si byy siw byy qankow sokvak, byy iubun, qik kuaiwlok ee sewqair.

Sinn si Sinn, langg si langg. Jiauww dingxbin soxx qongw, jit dih juiw e tangx lrauu zip haiw, qapp haiw vnevnee dilehh; jongw .si hitt dih juiw duanwduanr m si haiw. Jiauww cincniu jitt xee kuanw, langg suisi e did jiapqin Sinn, qniaa Sinn ee quanlingg, jongw .si langg dniardiyc be tangx jniaa jyr Sinn. Sinn si Sinn qadi; langg duanwduanr be tangx qra ix tnrix jit hxun, acc si qiamw jit hyy.

Dingxbin hitt xee piwlun si qanda' jiyh laii decc suatbingg jit diamw ee iwsur nardnia, m si qongw jit dih juiw qapp jit duarhaiw ee quanhe, si juanzenn cam' langg qapp Sinn ee quanhe siysiang lar. Jit dih juiw suisi jiyw, jit dih, jap dih, vah dih, bxan dih, jiamrr jxig, jiamrr je, qaur buew dyrr e vniwjniaa haiw. Jit dih juiw qyxenn si m si haiw, mrquxx haiw si jinjniar je ee juixdih soxx jxig jniaa :ee, jex si hro langg be qiongg jner .did. Jitt diamw si sursit.

Sinn qapp langg ee quanhe dyrr m si jitt kuanw. Juixdih jxig je e jniaa haiw, jongw .si jiong' tong' tnikae ee langg, longxx qra ix jip uaw .laii, qetqiok iarr si langg lar, duanwzenn be tangx jniaa jyr Sinn. Sinn si Sinn qadi, duanwzenn m si duiww langg laii jyrjniaa ee mic. Lanw ixqingx jaix langg ee uahmia si u hanrliong. Sinn si byy hanrliong. U hanliong :ee jip kacc je, iarr si u hanrliong; kacc jnaixngiu dy' be tangx vniwjniaa byy hanrliong. Dui' anxnix, narr cimx cimx sniu kacc qaur, dyrr qnaxx e tangx bingvik langg be tangx jniaa jyr Sinn ee lixkir.

Dirr jiax, guaw rair qycc piwzu jit hxang qongw. Duiww jitt xee piwzu Sinn qapp langg ee quanhe, qiamxcaiw e kacc bingg. Sinn piwzu jyr langg, acc langg piwzu jyr ue. Langg u byy hanrliong ee simsux. (Jitt qxur siyxkuaw diyhh jimjiog, vutqyr si junw jyr anxnix qongw). Qycjaiww langg ee simsux si byy hingjong, langg beh viauxhen ix ee simsux dyrr si iong ue qongw. Simsux qiwzenn viauxhen dirr ue nirr, hitt xee simsux dyrr venwjniaa u dniardiyc, u itding, u hingjong, u jriw jitt hxang ee dairjir, e jniaa jit hxang ee surgiap. Lanw jaix ue si dui' langg cud, jongw .si ue dikkag m si langg, dyrr si kiyh c.-cingban-b. qxur ee ue uaw .laii, iarr si dikkag be tangx jniaa jyr langg. M na anxnix; ue qapp langg si juadduir byy quanlenn mah? Jit qxur ue narr qongw liauw, acc dyrr vuex byy .kir, acc m si? Duanwduanr m si lar. U jit qxur ue, dikkag u jit xee ee suwbing, diyhh jniaa jit hxang ee dairjir. Hitt qxur ue ee suwbing suizenn diyhh jniaa jit hxang ee dairjir, jongw .si e jniaa iarr si u, be jniaa :ee marr m si byy. Be jniaa, be singqongx ee ue, dui' hitt qxur ue lun, hitt qxur suar venwjniaa byy iwsur ee pnar ue; duiww qongw hitt qxur ue ee langg laii lun, hitt xee langg ee simsux byy singjiu, soxiw derr id dniardiyc, ix si iubun byy ving'anx; derr zi, ix dikkag e qycc ngua ix ee soxx sniu, dingtauu qycc qewik. Anxnix kixtauu hitt qxur ue sngr si lirkuix hitt xee langg, be tangx qycc jyr simxmic. Hitt qxur ue ee suwbing narr si u singqongx, u jiauww qongw hitt qxur ue ee langg ee simjir sidhen, anxnix hitt qxur ue qapp hitt xee langg ee simx u hap, hitt xee langg ee simx mrbenw qycc ciaucik. Hitt qxur ue hap dirr hitt xee langg ee simx, acc hitt xee langg ee simx si ingxuanw qapp hitt xee langg jywhuew; soxiw tangx qongw hitt qxur ue si ingxuanw qapp hitt xee langg vnevnee dilehh.

Guaw mrbenw qycc tiah, pacsngr dairqex ixqingx bingvik liauw. Dairqex, dingxbin ee piwzu narr si byy m driyc, lanw e qir did hitt xee langg dyrr si piwzu jyr Sinn, hitt qxur ue piwzu jyr langg lar. Ue e tangx qapp langg dilehh, dyrr si iwbi langg e tangx qapp Sinn jywhuew ee iwsur. Anxnix hitt xee langg dyrr si did diyc ingxuanw ee uahmia. Diyhh jitt kuanw ingxuanw ee uahmia, jiacc si jinx ee uahmia lar.

4. Ingxuanw ee uahmia jnaixngiu jiacc did e diyc?

In'ui rair hro lanw dirr jiax beh lun ee dairjir kacc e bingg, lanw byc did hiamm huiwkir, jiong' lanw soxx qongw liauw :ee, dirr jiax qycc laii huanx jit vxenr. Lanw dirr vunxhang ee derr zi diauu u mng jit qxur, qongw, "Dauwdiw jnaixngiu jiacc si uac?" Dui' jitt qxur lanw ixqingx u inr siqur. Derr id: diyhh u venwngua, u jinwvo. Derr zi: diyhh e tangx cud dirr qadi ee simx laii uahdang. Derr snax: diyhh u simkiaur. Derr sir: diyhh u hap dirr ingxuanwe e uahmia.

Jairr guaw ee guqenr, dyrr si zin jitt sir diauu jyr uahmia ee piaujunw guanjig. Tong' jitt tnikae ee uahmia u jiongxjiongw, u kacc quann :ee, iarr u kacc qe :ee; jex longxx e tangx iong jitt sir diauu guanjig laii hunved. Ciurbak, huecauw(dyrr si sidbut) ee uahmia si qinrqin hap dirr derr id diauu ee guanjig; kimsiur, hii, tangg, hitt dringw lui (dyrr si dongrbut) ee uahmia si hap dirr derr id, derr zi, nng diauu ee guanjig; cincniu qauu jitt lui, suizenn iarr si sriok dirr dongrbut, jiauww lanw soxx knuar ix ee uahmia, viw vadd hxang dongrbut naxjunw u kacc quann ee kuanw, in'ui ix damrvyc iarr u hap dirr derr snax diauu ee guanjig.

Qaur lanw langg, derr id, derr zi, derr snax, jitt snax diauu ee guanjig dyrr longxx u hap; jongw .si jitt jxingw si vingsionglangg, viw vingsionglangg kacc qangr jit qxib, dyrr si kacc byy hap dirr derr snax ee guanjig. Jitt kuanw langg, si hro langg qiyr jyr jingsnex, in'ui ix li dongrbut byy zuarr hng. Acc langg narr si m na u hac dirr derr id, derr zi, derr snax ee guanjig, iarr si u hac dirr derr sir ee guanjig; jitt hy dyrr m si vingsionglangg, dyrr si singwzinn girsu; jitt dringw langg dyrr si qapp Sinn vnevnee diamr. Vingsionglangg ingxuanw rair vair jitt hy langg jyr Sinn. Jex kiokk si u cywgo, narr si cxingx ix jyr Sinn ee qniaw, dyrr byy m driyc. E tangx jyr qaur Sinn ee qniaw, dyrr si uahmia jinwvo ee qigkamw, jyr langg itsingx ee bogdig, dyrr si jairr dirr jiax.

Dnaxx diyhh jnaixngiu jyr, jiacc e hap dirr ingxuanw ee uahmia? Diyhh jnaixngiu jyr, ingxuanw ee uahmia jiacc did e diyc? Dairqex juansimx qycc laii sniu.

Ingxuanw ee uahmia si simxmic, lanw ixqingx bingvik liauw; acc beh did jitt xee uahmia u brang .byy, lanw iarr ixqingx jaix. Jongw .si beh jnaixngiu did, jnaixngiu jyr. Cincniu Jinsiwhongg ee kuanw, sraiw langg iong jnii brew e diyc .be? Duanwduanr be, duanwduanr byy brang lar. Lanw e qir did ingxuanw ee uahmia, dyrr si byy hanrliong ee uahmia, si bersaiw did iong simxmic tangx qra ix jewhan, iarr si bersaiw did iong simxmic tangx qra ix cikliong. Narr si e tangx iong niguec tangx qra ix cikliong, knuar si dngg iacc si dew, higsi iong singkux qra ix jewhan, knuar si liw ee guaw ee, iacc si vadd langg ee; hitt kuanw dyrr m si ingxuanw ee uahmia.

Qycjaiww lanw u jaix, ingxuanw ee uahmia si beriongrdid hro simxmic tangx qra ix tnrix jit hunx, qiamxx jit hyy, ix si ix qadi. M na anxnix, ix si bxan hxang ee guantauu, si itcer u hanrliong ee uahmia ee tauu; mrquxx lanw m si lanw qadi, lanw si dui' Ingxuanw ee uahmia cud, lanw ee itcer si siurr ix jiangxquanw.

Langg viw dongrbut kacc cutsig ee diamw dyrr si u simkiaur. Langg ee simkiaur soxx uahdang ee soxjai, dyrr si hunved jinx-qew (diwsig ee simx), hyw-pnaiw (dyrdig ee simx), suiw-baiw (gersut ee simx), jitt snax hongbin. Jongw .si simxmic si jinx neh? Simxmic si hyw neh? Acc simxmic si suiw neh? Jitt snax hxang si dui' dyclyc laii? Si langg qadi liapjy :ee acc m si? Duanwduanr m si . jitt snax hxang qapp tniderqanx itcer ee surbut siy' siang kuanw, longxx si duiwdirr ingxuanw ee uahmia cud .laii .ee. Jitt snax hxang dyrr si Sinn ee simsux lar.

Langg ee simkiaur jit jong si cincniu qniar. Jitt snax hxang jinx :ee, hyw :ee, suiw :ee, dui' Sinn huad .cud .laii. Langg ee simqniar narr u hiongr hiax kir, dyrr e qed ix ee hingjong dirr langg ee simqniar-lai; langg dui' anxnix u qamxqag, jiacc erhiauw hunx jinx-qew, ved senrog, qingw suiw-baiw. Langg ee simkiaur erhiauw hunved jinx-qew, senrog, suiw-baiw, hitt xee langg dyrr si qiyr jyr u zinqeh.

Hniadi jixmue, lanw lun qaur jiax, beh did diyc ingxuanw ee uahmia ee lorqingw kiw m si bingvik liauw mah? Dyrr si anxnix lar: langg diyhh ing ix ee zinqeh jyr qicow, byy sriu itcer ee kusog, tuatli longxjongw ee jewhan, byy pau vadd jxingw ee simsux. Qanda' hibong singjiu Sinn ee ir, viauxhen Sinn ee dy, jinrsimx jinrlat byy hiyckunr jyr Sinn ee qangx, qaur kuir dng jiacc vangr suah. Led'ui, jitt quiw qxur ue suisi qanxdanx vingsiongg vingsiongg, jongw .si jitt quiw qxur sidjai dyrr si langg ee liongsimx ee qetjnix, beh did diyc jinx ee uahmia ee viwquad. Lanw narr si kaksit duiwdirr lanw ee simqnuadew u sinn jitt quiw qxur si beh cua langg jinwzip ingxuanw ee uahmia, jiongqimx ixau quatsimx hnuahiw jiauww anxnix jyr. Jitt kuanw langg setsuw si jurr jitt diap siw, iarr si ixqingx zip dirr ingxuanw ee uahmia, ix ee simx dniardiyc u be qongw .did ee hylok.

Lanw e qir did Kongxjuw u qongw, "Jaw bundy, amr siw kyxiw." Dyrr si qongxx, lanww narr si jaxkiw-sii e tangx did diyc dyrliw, singjiu zinqeh, ervox-sii laii siw, iarr si tangx. Jitt qxur ue dyrr si qapp lanw soxx qongw :ee siangrr iwsur. Ingxuanw ee uahmia m si hitt hy air qadi vutsii bagjiux qimx qimx, dngg huewsiu ee langg soxx did e diyc, dyrr diyhh jinrsimx jinrlat jyr Sinn ee qangx ee langg jiacc u hxun.

5. Henrqimx ee Daiuann si Uac iacc si Siw?

Jnaixngiu jiacc si uac? Jitt xee bunrdee tangx qongw lanw ixqingx dairliok suatbingg liauw. Snex ee lo narr si qiwzenn jaix, siw ee lo dyrr si hitt xee ee dywvingw. Lanw narr jiong' dingxtauu soxx qongw bingg hitt sir hxang ee guanliw qir diauu dirr lanw ee simlai, lanw qadi dy' benw qongw, dyrr si siarhue jingwlangg ee sixuac lanw dy' pnuawduanr e hunbingg, e tangx huatqenr qaixqiur ee honghuad.

Henrsii ee Daiuann si siw iacc si uac? Jitt xee bunrdee viw lanw jit langg jit qajok ee sixuac m jaix qex dua u zuarr je? Jongw .si guaw dirr jiax diyhh qycc puebingg qongw jit qxur, ixau soxx beh qongw :ee si qinrqin tec lanw Vunxdyxlangg hongben ee jailiau qongw; kiokk m si qongw jitt kuanw ee verving si qanda' lanw jiacc u. Qycjaiww qanda' Vunxdyxlangg hongben ee jailiau marr si u jin' je, guaw si qinrqin tec quiw diamw kiw laii qongw nardnia.

Derr id. Rair qapp lanw led'ui dui' Daiuann ee hagbun hongbin qiamxdiamw knuar. Hagbun si simxmic? Dairliok tangx qongw, hagbun ee bogdig si beh qriuu jinliw. Soxx rair qriuu ee jinliw, narr si qriuu u diyc, cenw u bingg, hitt xee hagbun ixqingx dyrr si singqongx liauw. Jongw .si, led'ui, dirr lanw ee diongqanx qiamxx m si knuar hagbun si beh qriuu lirig :ee kacc je, qriuu hagbun si beh qriuu jywqnuax qriuu tanwjnii, soxiw narr si be tangx jywqnuax qapp tanwjnii, acc dyrr liahjyr tagceh si byy loring.

Bing Hujuw qiamxx m si ixqingx u qongw liauw. Ix qongw, "Hagbun ee bogdig, m si beh qriuu vadd mic, si qanda' beh qriuu lanw soxx pah m qnir ee simkiaur dywdngw .laii." Lanw soxx pah m qnir ee simkiaur si sniaxhuer? Dyrr si lanw simqnuax ee qniar u cniursenx, jinliw ee ngiaw jiyr be bingg dirr lanw ee simlai ee iwsur. Acc lanw yc hagbun dyrr si beh crid lanw ee simqnuax hro ix bingg, hro jinliw ee ngiaw jiyr e hen dirr lanw simlai. Kyxlinn; mrquxx poxtongx lanw decc knuar hagbun m si anxnix knuar. Kacc je liac hagbun junw jyr beh did lirig ee huatdo, drir qaur lanw ee hagbun ixqingx qodaa siw kir jin' quw, jin' quw lar! In'ui qongw tagceh si beh did lirig, soxiw narr byy lirig tangx did dyrr sniu qongxx, mrbenw tak? Lanw ee langg tagceh :ee jin' jiyw, dyrr si dui' anxnix laii.

Qycjaiww, jinliw si cniaw jit vnix, lirig jyr taujingg; soxiw dairkair ee langg dy' si qoxcniaw hodoo. Longxx si kiyh qoxjaxlangg ee jaupyh, m qnaw cud lat sinx kuix vadd diauu ee hyw lo, huatbingg kacc cimx ee jinliw. Soxiw narr qongw tagceh, dyrr si Suwsux, Gnoxqingx, Qoxbunn; longxx si quixnarr cingx nii ee huewdew. Hitt quiw vunw ceh, m na cecpuee zuxzuxx qaur rngiuu qoqoo, lairbin ee zri iarr ixqingx hro jingwlangg ee ciuxsiyc qoo qaur beh byy bingg .kir. Lanw qongw venwngua jinwvo si uahmia derr id ee diauqnia. Liw knuar, lanw ee hagbun si qinrqin hanrdnia dirr hitt quiw vunw ceh, uahmia dirr dyclyc neh? M na anxnix, iauxquxx u jin' je ee siauxzinn, m na ix byy knuar jinliw dang, byy beh cud lat kir qriuu sinx, dyrr si jingg ee gauu langg koxsimx soxx huatbingg :ee, ix dy' m singsimx siuw, huanxdngw uirdiyhh jit sii qadi ee lirig, jiong' dit dit ee jinliw auw jyr quixnarr jad, jyr ix quer qiyy ee qnuaiw-aw. Aixar! Daiuann ee hagbun si siw iacc si uac?

Derr zi. Cniaw qapp dairqex laii sniu lanw Daiuann ee jongqaur. Lanw Daiuann ee jongqaur si uac iacc si siw? Led'ui cir sniu knuar. Lanw dongvaux ee diongqanx hrong Vudqaur :ee iarr u, hrong Dyrqaur :ee iarr u, hrong Qidokqaur :ee iarr u; vair jiongxjiongw ee jabcuir sinn iarr si u; qycjaiww liac Kongxjuw jyr sinn dilecc vair :ee iarr si u; cai qadi ee joxsenx ee sinjuw decc vair :ee iarr si u. Siogguw qongw, "Jingliw u jit, si byy nng." Jiacc je hxang jongqaur ee diongqanx dikkag u driyc :ee, iarr u m driyc :ee. Driyc m driyc, lanw dirr jiax cniaw mair did lun; lanw cniaw jiauww qokk langg sox sinr :ee, longxx qra ix zin jyr driyc. Lanw soxx air lun :ee, dyrr si qokk langg soxx sinr ee jongqaur si uac iacc si siw?

Cir sniu knuar, simxmic si jongqaur? Lanw narr henx zirdenw kiw laii knuar, dyrr jai'ngiaw "jongx" si "jruw: ee iwsur, iacc "jruw" dyrr si juanjuw jit hxang ee iwsur. "Qxaur" dyrr si qawsi ee iwsur. Soxiw tangx jaix "jongqaur" nng zri hap jywhuew ee iwsur, dyrr si "juanjuw jit hxang ee qawsi." Qongw jit qxur kacc bingg, jongqaur dyrr si langg juansimx kensingg qingwvair Sinn, texliong Sinn ee iwsur, henr qadi jit srinx siuw Sinn ee qawsi, jyr Sinn ee surgiap. E did jiauww anxnix jyr, qadi ee simqnuadew longxx byy hunhyy ee giga, jiong' juansimx juanmia longxx qaudair hro Sinn jiangxquanw, jit sud aw dy' m qnaw tec cud qadi ee susimx. Dui' anxnix jurzenn dyrr e snex cud jin' dua ee ving'anx. Jitt kuanw ee jongqaur, jiacc si u uahmia ee jongqaur.

Jairr lanw Daiuann soxu jerje hxang ee jongqaur, lauxsit qongw, dui' qindew ixqingx dyrr cywgo :ee si jin' je, dyrr si ix soxx qingwvair ee Sinn m driyc :ee u jin' je. Jitt hxang jiauwsit diyh'air girlun jinx, in'ui qniax jyr girlun liauw sniu' kuah, dendyww kacc m hyw, soxiw jiauww dingxbin ee ioksog jitt diamw cniaw mair qongw. Lanw qanda' laii knuar decc vair ee langg, vair liauw simxmih kuanw, si uac ee vaiwhuad, iacc si siw ee vaiwhuad?

Derr zi, vair ee langg byy bingg ix soxx vair ee Sinn si simxmic. Jnaixngiu ix tacc diyhh qingwvair hitt xee Sinn, vair ee langg qapp Sinn si u simxmih quanhe. Vair ee langg jitt diamw longxx byy bingvik si kacc je; vutqyr si qanda' tniax qnir langg qongw Quanimx kacc u sniar, dyrr vair Quanimx; tniax qnir Majow kacc u sniar, dyrr vair Maxjow; tniax qnir diyhh he Singhongg, dyrr vair Singhongg. Narr qongw si huan diyc dycc jit hngx ee Ong'iaa iacc dyrr kiw langg kiw bew beh cniaw Ong'iaa, qanda' luan vair jit dniuu. Hitt senx Sinn ee jixir si dirr dyclyc, vair ee langg longxx byy textiab, longxx byy diwir beh junsiuw.

Qadi jyr hyw acc si jyr pnaiw, u jue iacc si byy jue, e kamx did Sinn ee aiwsiyh vyxho iacc si be, longxx byy sniu; qinrqin sniu jyr u siyx qimx dyrr dikkag u vyxvir, luan luan vair, luan luan qriuu dyrr si. Siyx jit-vah qimx, diamw jit duir jxig, cah snax qix hniux; acc dyrr beh qriuu snex qniaw, snex sunx, juann qex ving'anx dngg huewsiu.

Uree he qongxx, jitt dur jnii narr vyxvir tanr quewciuw, dyrr beh jyr hxir laii sia; kacc hiongtaiw :ee, iarr u he; narr e vuac ngiaa qxiauw, dyrr beh taii dix dyw ngiuu laii qingwhenr. Setsuw dirr Sinn ee binrjingg decc he hiaxee ue, mair did diamr dirr cur-lai liam, narr kuix sniax qongw bingg bingg hro langg tniax, qadi be sniu qenwsiaur ee langg, m jaix u quiw xee! Jitt kuanw qiamxx m si liac Sinn junw jyr jiahjniqnuax decc kuanxtai mah?

Uirdiyhh qadi ee lirig duiww Sinn decc qingwhenr, qapp pnaiw vecsner decc siab og qnuali ee aurciuw u simxmih jingcax? Jitt kuanw ee simliw qetqiok si siw iacc si uac, guan lanw cimx cimx rair singxcad! Qycc cniaw dairqex laii knuar huesniu, dyrsu, dangqix, ang'ii ee soxx qniaa soxx jyr si jnaixngiu?

Jiaxee langg si dirr Sinn qapp langg ee diongqanx, jit vingg ter Sinn tuann jixir, jit vingg ter langg hogsai Sinn, viauxbingg langg ee simguan, hro langg e tangx kacc kuair jiapqin Sinn. Soxiw jitt hy su dyrr diyhh jinjniar cingkir u dikhing ee langg jiacc e kamx did drngx. Sikkiax, Iasox, dyrr si jitt kuanw langg ee jueww lixsiongw, jueww hyw ee bohuan. Sikkiax uirdiyhh air jin ix ee vunxhun, ongqiongx m qnaw druar, hongdewui m qnaw jre, lak-jap gua nii ee diongqanx sriu liauw byhan ee hongsongx, qniasuaw venww tnikae suecbingg qiur kow qiur lan ee jinliw. Narr lun Iasox ee itsingx, si iauxquxx kacc hro lanw tangx qamxqig, Ix uirdiyhh beh tuann Tnix ee jixir, air qiur juann zinlui vutlun simxmih qog ee langg cud juerog, zidzit qniaa hyw su, vangjan qankow langg. Langg' u uanwhin Ix, kunxdiok Ix, Ix iarr dikkag byy hin langg'. Qaur buew hro langg' dingr siw dirr Sibzirqer, hro langg' iong cniudyx cak hingkamw; kuiwsix beh dng ee sijun, Ix iauxquxx si m qnaw be qir did Sinn, iauxquxx si ter langg' qriuu siawjue, iauxquxx si juansimx qniaa zin'air. Jongw .si henrsii dirr lanw Daiuann ee huesniu, dyrsu, jitt jingxlui ee langg soxx jyr simxmih kuanw, benw qongw hro lanw jin' tangx siongsimx tror duarkuir, dyrr si Qidog Qauwhue ee tuandy-sensnix kacc je ee soxx jyr si simxmih ngiu? Huesniu qapp dyrsu kiokk si qapp inx be viw .did, mrquxx inx ee cuir-lai soxx liam ee qingbunn qapp inx ee kaciuw soxx jyr .cud .laii ee surjig, vixqaur knuar si jnaixngiu kacc je? Inx soxx qongw qapp soxx jyr ee qiamxx m si dua dua byy siysiang?

Aixar! Jitt jingxlui ee qangx sidjai si Sewqanx jueww dua ee tenjid. Kyxlinn! Dirr lanw Daiuann suar cavutdyx si venwjniaa cincniu jit hxang tanwjnii ee singliw.

Jitt pnix ixqingx lun taiww dng lar, pacsngr mrbenw qycc qongw simxmic, led'ui iarr ixqingx qauwgiac bingvik liauw. Jongw .si cniaw qycc hro guaw qongw jit qxur jyr jit pnix ee jongxqed. Guaw qongw, qinaxzit ee Daiuann si cincniu jit pxenr ee tiongxvox. Tiongxvox! Tiongxvox si sniaw soxjai? Tiongxvox dyrr si sixkud lar, dyrr si byy uahmia ee soxjai. Led'ui ee diongqanx qiamxcaiw u langg beh me guaw qongw siauw ue! Guaw m si qongw siauw ue, si qongw sidjai. Cniaw tniax guaw huntiah.

Led'ui, tiongxvox soxx u :ee si simxmic? Bong! Quttauu!! decc nua ee sinsix!!! Jiaxee ixgua iauxx u simxmic .byy? U, iarr u cnecauw dirdecc iyy hongx, tangg dirdecc ciax, juaa dirdecc syy, qxauw dirdecc pni, lairhiyc dirdecc krox, decc sec. Ixgua narr si iauxx u dyrr si quiw xee aw inxhunn tamwbong cicamw ee langg nardnia. Dirr tiongxvox si byy u uahmia lar, byy u uahdang kuaiwlok gnaxdir sunqed ee uahmia, qanda' si vehqud sixsix huewbong venwvenr muaw muaw si. Jongw qongw, tiongxvox si u hxingg byy mia ee soxjai.

Guaw qongw henrsii lanw Daiuann kyxviw cincniu jit pxenr ee tiongxvox, dyrr si rair qongw dirr lanw Daiuann henrsii qanda' u hingsig byy jingsinn ee iwsur. Dairqex narr liahjinx qiamxdiamw knuar, pacsngr dikkag e qapp guaw dongqamw. Guaw qycc cir qiw jit~nng hxang jingwbingg knuar. Led'ui cniaw knuar lanw ee hxir. Lun jywhir kiokk duarvorhun si beh hro langg knuar hnuahiw, jongw .si hxir ee haurqyw m na qanda' anxnix, hxir e iong langg ee singwjingg, diongw langg ee qenwsig, si jit jxingw siarhue qauwhuar ee qiquanx. Mrquxx, liw knuar, lanw Daiuann henrsii ee hxir si jnaixngiu? Jywhir ee langg qadi u qamxqag jit xee dua suwbing .byy? Jywhir :ee u liauxqaiw ix soxx jyr dagg cud hxir ee iauwdiamw uahmia .byy? Byy lar! M na ix berhiauw jex, dyrr si ix soxx qongw ee kauxvec soxx cniur ee kikbunn, e bingvik :ee m jaix u quiw langg? Dyrr si knuawhir ee langg iarr si jit ngiu. Vnee-kax ee langg kyxviw ah-aw tniax luii, vnee-dingw iurr uanxzenn cincniu jit qrunn siauw langg decc luan jyc. Soxx vnuax ee cutauu iurr si cenpenx-itlut juann byy venwngua qapp jinwvo, longxx si quiw vah nii jingg ee qu huewsig. Qycjaiww cniaw tniax lanw ee imgak knuar, henpow narr m si "Dua kuix mngg," jiksi "Jiongqunling;" Vakquanw dyrr si "Tensuixquanx." Bxan hxang dy' longxx si qapp Hanwiyc siang jit kuanw, longxx si junsiuw qoxhuad jewjy :ee, m na si dasyr byy birsor, qisit longxx si snepuw cauwsiyc lar!

Led'ui hniadi jixmue! Guaw m si air luan qongw, lauxsit guaw si byy da'uaa. Guaw dnaxx vutzimw qycc qex qongw, jriw guan dairqex siyqab dua quatsimx, genxqiur jursinx jinwcuw ee honghuad, byc did qadi luexjir, byc did bxan hxang qanda' sunquix-dyrqiw giac hniux duer vair. Narr si anxnix dairqex beh jinwvo, e tangx qapp langg drangg jerkia, dikkag si byy zuarr quw. Aixar! Led'ui, lanw narr beh qycc m si anxnix jyr, narr qycc m sisii juwir qadi qaixqig nguarsinx, qanda' gong siuw jiongjenn ee huatdo, jaix jitt xee zidzit decc jinwvo ee sewqair, lanw dikkag diyhh jyr langg' ee buexau dyw decc hro langg' tuax. Led'ui, lanw ee joxsenx soxx vangr hro lanw ee bunbingg qigiap, sidjai si viw vadd langg ee u kacc suiw kacc dua. Mrquxx cud lanw au dai jiaxee vutsiaur qniaxsunx qanda' erhiauw kunr, jiac, jre; berhiauw lylik qing'ingg hro ix suiw qyckacc suiw, dua qyckacc dua. Jit vingg, lanw si naxx qodaa naxx ngsngx; jit vingg, qigiap si naxx honghuer naxx puawsngw, uanxzenn cincniu hyxgiahlangg ee liauxbuexqniaw. Langg qanda' dyw diamr bincngg decc lanxsix, druar cur vangr decc hro hongsuax ingx, didux qnex bxang, jiauw-aw jyh siu, vehhia cngw kangx; byy zuarr quw narr m si druar cur dyw .lyc .laii, qra ix kamr bat .kir, dikkag iarr si hro snuakimm iaxsiur qra ix tuax kir jiac.

Aixar! Dnaxx lanw beh jnaixngiu jiacc hyw neh? Daiuann dnaxx diyhh jnaixngiu jiacc e tangx dui' dirr beh siw, qycc laii uac?

huedngw tauu iac