1. U jnii sraiw qxuiw e ex bry

"U jnii sraiw qxuiw e ex bry." Jitt qxur siogguw u hamm quixnarr kuanw ee iwsur. Poxtongx decc iong ee iwsur si m hyw. Poxtongx si qongw sewqanx qanda' u jnii dyrr hyw, jnii si jueww iauwqinw, jueww quiwkir, narr u jnii mrbenw qycc vadd mic dy' longxx jyr e qaur. Jex si qiyr jyr vaiwqimxjuxgi ee soxx sniu, si knuar jnii quewtauu dang ee langg ee kauxkir, vutjiw u dua m driyc. Jairr sewqair jitt kuanw vaiwqimjuxgi ee kasiaur si huisiongg je. Sengiuu u jit jxingw qiyr jyr ibudjuxgi ee hagbun, iarr si qongw uxdiu ee diongqanx qetqiok si qanda' u mic, ixgua byy vadd hxang, langg ee simsux hingdong dy' longxx si dui' mic laii, siurr mic ee jipuer. Soxiw jitt kuanw langg benw qongw iarr si knuar jnii cincniu snewmia.

Jnii kiokk si iauwqinw, diyhh vyxdiong, jongw .si m si cincniu vaiwqimjuxgi ee langg soxx qongw hitt kuanw ee quiwkir. U langg qongw, "Jnii sir kax, langg nng kax." Jnii qiamxx u qaur hiacnirr uac? Jnii qiamxx m si jnii mah? Jnii si sixmic lar, jnii si langg jyr :ee, byy langg, dyc'ui u jnii neh! Si u langg jiacc u jnii, m si u jnii jiacc u langg.

Vaiwqimjuxgi ee langg jiurr si dywvingw qongw; ix qongw, "Diyh'air u jnii jiacc u langg." Dauwdiw qiamxx sidjai si anxnix? Lanw qongw jnii, narr siaw Hanwzi diyhh siaw (財), imx tak "jaii". Jitt zri (財) si nng zri laii habjniaa :ee, jiurr si (貝) qapp (才) laii habjniaa :ee. (貝) jitt zri ee imx tak "vuer", jiurr si hamkag, hunxgiykag jitt jiongxlui, "kag-aw" ee iwsur. (才) jitt zri ee imx tak "jaii", jiurr si langg ee "jaijingg", "jailingg", "jaidiau" ee iwsur. Tangx jaix "jnii" jiurr si "kag-aw" qapp "langg ee jaijingg" laii jniaa :ee.

Henrqimx kiokk m si anxnix, jex si qoxjaw ee dairjir. Qoxjaw kixcox kixcox ee sidai, langlangg byy jyr singliw bexbe ee surgiap. Hitt jun ee langg narr air mic, longxx diyhh jiar qadi ee kuiwlat kir caixcuw, iacc si jiong' qadi soxx u ee mic qapp vadd langg qaungua qadi soxx byy :ee. Jiauww anxnix jyr, si jin' byy lirven, soxx beh qaungua ee mic diyh'air vnuax laii vnuax kir. Au-laii langg damrvyc kacc jinwvo, jiurr sniu cud jitt xee huatdo, jiurr si kir haiw-qnii kiyh jiongxjiongw ee kag-aw laii, jiong' hitt hy kag-aw jyr jnii iong, tec kag-aw hro langg, langg jiurr tec soxx kiamwing ee mic hro lang, mrbenw tec mic kir ngua mic.

Anxnix si qex jin' lirven. Jongw .si byy tywdongr. Jnaixgniu qongw? In'ui langg beh kiyh kag-aw si kacc kuair, qycjaiww kag-aw iarr si kacc kuair pnaiw, kuair puar. Soxiw langg au-laii jiurr ngua kuanw. Lnagg ee diwsig jaijingg zuxx jinwvo, qauwbuew suar erhiauw juw dangg, juw ginn, juw qimx. Erhiauw si erhiauw, jairr hitt sii kiokk m si hiacnirr kinkuair ee daijir. Soxiw jiurr iong dangg jur jnii, acc qauwbuew jiurr iong ginn jur duarginn, ginqag-aw; iong qimx jur qimqag. Anxnix kiokk jiurr qex jin' dua lirven.

Jongw .si langg ee diwsig simsux si cincniu juiw decc lrauu, si vutsii decc jinwvo, soxiw iarr byy liac anxnix jyr jiaujngg. Qaur juewqin byy zuarr quw, hiamm jnii kacc dang kacc pongrsongx, huiwkir tec, huiwkir sngr, huiwkir siux, jiurr jiong' jnii hruer driau, qanda' iong kinsingw kinsingw ee dangsenw ginqag qapp qimqag. Jongw .si anxnix iauxx hiamm huiwkir, suar sed jiongxjiongw ee ginpiyr qimpiyr dirdecc ing. Kacc jaw jap-cingx ee jnii siangx ciuw jiurr qnrua byy hxuad, henrsii jap xee ginn ee ginpiyr tingwhyw sreh diamr pnirkangx lai. Tangx jaix qoxjaw ee jnii qapp henrsii ee jnii byy siang.

Qoxjaw ee jnii si iong kag-aw jyr, henrqimx si iong qimx iong ginn iong juaw jyr. Langg si uirdiyhh air venrli jiacc sed jnii. Jnii si ioksog ee viauxqir. Jnii si langg qapp langg jywhuew ioksog jywjniaa :ee. Acc langg e tangx jywhuew sed ioksog si in'ui dairqex u sinwiong. Tangx jaix si u langg u sinwiong jiacc u jnii, duanwzenn m si u jnii jiacc u langg.

Jnii si langg sed :ee, jongw .si qiamxx e tangx luan luan jewjy .did? Air jnii qiamxx e suisii u? Dikkag m si. (財) jit zri "jaii" .zri ee lairdew, si u jit zri (才) dilehh, acc jitt zri jiurr si "jaijingg" iacc si "linglik" ee iwsur.

Dui' anxnix, lanw e tangx qauwgiac bingvik jnijaii ee iwgi. Jnijaii si simxmic? Jnijaii si langg jyr :ee, si langg iong ix ee jaijingg soxx jyr :ee. Qycjaiww jnijaii diyhh vutsii qapp jaijingg jywhuew. Ngua jit qxur ue qongw, langg soxx sed soxx jy ee jnijaii qetqiok si simxmic, be tangx jyr sniaw su. Jnijaii diyhh vutsii uaw dirr u jaijingg ee langg jiacc e u loriong.

Qycjaiww qongw jit qxur, jnijaii si jaijingg linglik ee viauxqir, soxiw byy jaijingg byy linglik ee soxjai si m ingqaix u jnii. Narr si u hiaxee jnii jiurr tangx qiyr jyr si pnaiw jnii, m na byy loring, dendyww e snex cud pnaiw su laii. Soxiw tangx jaix jnii byy dagg hxang e. U jnii qiamxcaiw e tangx sraiw qxuiw jyr quixsu; jongw .si qanda' jnii dikkag byy hxuad did langg da'uaa. Guanlaii jnii si diyhh hro langg sraiw, m si beh sraiw langg.

Vaiwqimjuxgi ee langg si knuar jnii kacc dang snewmia, qnir diyc jnii jiurr vair jiurr qui. Jitt kuanw langg zidzit si qanda' decc qra jnii crid sxenx, uirdiyhh jnii tuabuaa, jyr jnii ee lojaii. Qanda' uirdiyhh jnii decc uac ee langg lauxsit si zidzit uirdiyhh jnii decc(deh) siw.

"U jnii sraiw qxuiw e ex bry." Jitt qxur ue qiamxx longxx byngiaw iacc m si? M si juanzenn byngiaw, kiokk iarr u jit bin ee jinliw. Huatqog u jit qxur siogguw qongw, "Jnii si bxan ongg ee ongg." Lauxsit jnii narr si qruix dirr u jailingg u dikhing ee langg ee ciuw-lai, sidjai e tangx jywjniaa jin' je jin' dua ee dairjir. Dirr dingxbin u qongw jnijaii si langg ee jailingg kuiwlat ee viauxqir, iauxx e tangx qycc qongw, jnijaii iarr si bxan hxang mihqnia ee jongxdairviauw.

Soxiw narr u jnijaii, simx sniu hitt hxang mic, hitt hxang mic jiurr qaur; qanda' u jitt hxang jnii, jiurr qapp u bxan hxang ee mihqnia si siy' siang. "U jnii sraiw qxuiw e ex bry." Jitt qxur ue narr si iong jyr qongxx, vutlun simxmic tnix ox de amr ee dairjir, jiurr si huan diyc simxmic kacc dua ee dang jue, iong jnii jiurr e tangx cuxsiaux .kir. Langg suizenn si jin' caur, jinjniar byy zinqeh, jongw .si qanda' narr u jnii, jiurr jiksii e tangx vnir jyr pangx, vnir jyr dua dua u bingbong, jitt kuanw si m driyc, si huisiongg ee cywgo.

Mrquxx narr si qongw jnii si langg ee jailingg ee viauxqir, qycjaiww m si vah hxang mihqnia ee jongxdairviauw, soxiw u jnii si vutjiw lirven, vutjiw e tangx vangjan langg jywsu, e tangx singjiu langg ee hyw jiwkir, jex kiokk si sidjai. Dui' jitt xee iwsur qongw, jnijaii diyh'air dua dua laii vyxsiyh.

Kongxjuw u qongw, "Jnijaii narr si u lo tangx kir qriuu, suisi qra langg kanx bew ee dairjir, guaw iarr si hnuahiw jyr." Ix qongw jitt qxur ue si jabhunx viauxbingg jnijaii diyhh vyxdiong. Jongw .si ix iarr u qongw, "Jyr hitt hy vutgi ee dairjir laii did diyc hyxgiac, jitt kuanw hyxgiac, guaw qra knuar jyr cincniu dirr tnidingw decc vuex ee hunbu." Knuar jnii cincniu snewmia, uirdiyhh jnii, kacc simxmic okcog gnersimx ee dairjir dy' qnaw kir jyr ee langg, tniax diyc jitt qxur ue diyh'air dingrsinn sniu jit xe knuar.

2. Hyxgiac qiamxx jniasit qycc hiacc hyw?

Anwjnuaw jiacc si hyxgiac? Jex kiokk beriongrdid kinx kinx qongw, jongw .si poxtongx si jiw u jnii u mic dirdecc qongw. Hyxgiac dairkair si langlangg soxx iwair, sanwhiongx si langg soxx kirkig. Langg narr si jyr qaur puawvne byy jnii tangx jiac iyc, duarqnuaa ee sii qanda' diyhh knuar boxqniaw dirdecc junx, u hyw su longxx diyhh vangr decc danxhau vadd langg jyr. Qaur dirr jitt kuanw ee sanwhiongx, sidjai iarr si jiokgiac tangx siongsimx.

Suizenn si anxnix qongw, hyxgiac iarr duanwzenn m si u hokkir, m si vutsii tangx qionghiw. Jiauww bagjiux soxx knuar, hyxgiahlangg trow duarkuir viw sanwhionglangg kacc je. Uirdiyhh sanwhiongx qrex-lai snix kiw hongpyx byy vingjing, jex iarr si dniardnia u knuar .qnir.

Jairr Ingqog u jit qxur siogguw qongw, "Sanwhiongx narr dui' duarmngg zip .laii, aiwjingg jiurr dui' txangx-aw jauw .cud .kir." Mrquxx narr zinrjinx knuar, jitt hy su si sriok dirr hitt jxingw byy qauwiok, byy siu'iongw ee kasiaur, jiacc u anxnix. Lanw ee siogguw qiamxx m si qongw, "Qex qingg jiacc e cud u haur ee qniaxzii." Jairr sengiuu iarr u jit qxur qoxjaxue qongw, "Cur zuxx siyw, simx zuxx dua, zuxx ving'anx."

Langg ee jinjingg kacc je si duiwdirr vinkow ee diongqanx laii huathen. Pnaiw pinxhing, qapp langg dowkow siy' uanwhin, dui' hyxgiahlangg ee soxjai huad cud :ee si kacc je. Hyxgiahlangg ee qadingg, liw qra ix cajinx knuar, dairkair longxx si cur-lai vnir jyr jenwdniuu, hniadi venwjniaa siudik. Jurqow qibqimx jiauww ligsuw laii knuar, jniginn sxingg langg si kacc jiyw, hai langg si kacc je. Langg jueww u hokkir ee sii, dikkag u byhan ee ngwbang, qapp dua dua ee ansimx; langg narr juadbang, qycjaiww simlai sisii u qniahniaa, jex si jywlangg siangrr dua ee vuthing.

Sanwhionglangg vutlun qnir diyc simxmic dy' qikaw, ix soxx iauxx bue qaur ee soxjai si jin' je, soxiw ix ee srinx kinx, ix ee simx jin' uahdang, ix jin' jiyw kuawlu, iarr u jin' je tangx ngwbang. Qycc naxx cincniu byy nguax ee bew, qnir diyc dua diauu lo kadee pihpiak qiyr, tauu giac quann qiongqiongg beh jauw .kir.

Hyxgiahlangg jiurr kacc be tangx anxnix, in'ui ix ee jnijaii jiog, ix ee jiahcing vutsii u quewtauu, tangx qongw ix si jiac iar, cing iar, kunr iarr si iar; soxiw ix si jinjniar jiyw jiyw tangx ngwbang, dendyww si uirdiyhh jiac je jiksiongx, cing je kuair qnuaa .diyc. Isingx ee hyw juxqor kacc je jiurr si hyxgiahlangg. Ingqog u jit xee dua cutmialangg qiyr jyr Latsuqimx(Ruskin). Ix qongw, "Dua cauxcur knuar diyc duarcur e qniahniaa ee langg, viw hitt hy kia duarcur dagg hxang knuar liauw longxx si byy hihanw byy simsig ee langg, m jaix qex did zuarr je ee hokkir."

Hyxgiahlangg ee jnijaii m si kngr dirr duarqui-lai, kacc je si kngr dirr simqnuatauu, ix ee vxag-lai longxx si jniginn trad trad lehh; ix soxx cuanw ee kuir longxx u cauwcnihenr, ix hro jniginn deh qaur duarkuir vunn be li.

Sanwhionglangg narr m si hitt hy jin' byy jiwkir byy loring :ee, dikkag m kingw suiven tingr langg' ee ceing, jongw .si hyxgiahlangg tangx qongw mezit dy' si uirdiyhh jniginn decc jauxjongg. Jniginn diyhh vutsii u liutongx jiacc u qewdat. Mrquxx Sewqanx kacc je ee hyxgiahlangg, qnir jit kox jiurr sniu siux jit kox; qnir jit qag jiurr sniu air tec jit qag; ix longxx si sniu zip byy sniu cud. Ix u jnii m si sniu beh ing, si sniu quw quw e tangx nec diamr ix ee ciuxdiongsimx.

Soxiw hyxgiahlangg derr id qankow ee dairjir, jiurr si ix ee ciuw-lai soxx nec ee jnii hro ix jauw byy .kir, jitt jann. Hyxgiahlangg uirdiyhh beh qor ix ee jnijaii be byy .kir, ix si sisii-kikkig decc ing simx ing sinn vniar snewmia. Ix jnaixngiu u ingg tangx qycc sniu vadd hxang, qor simxmic zingi tniawtangr ee dairjir neh? Soxiw Qidog u qongw, "Hyxgiahlangg beh zip Tenqog byy qyc'ngiu logdyy beh nngr jiamx pni."

Henrsii kiokk byy, narr beh si ingxsii cadbew ciongwhingg ee sidai, hyxgiahlangg amwsii si yh did tangx kunr lyc binn. Henrsii suizenn si u ginhangg tangx qiar, u qoxpiyr tangx brew, tywdongr tangx kngr jnii ee soxjai si jin' je, mrquxx qex snex cud jit hxang viw cat qyckacc hai ee surjingg laii. Jiurr si henrsii vutviw ingxvaiw, dnaxx qautongx jin' lirven, jyr singliw ee huatdo qapp qurdew longxx by siang, siwqer ee hangjingg jin' tongtaur, mihqnia ee qewsiaur kixlyc jin' hiongg, ginjuiw ee kixlyc sidjai qniax :langg.

Cincniu dingw vrangx sengiuu dua siy' taii ee diongqanx, lanw jitt vingg jitt sii vutjiw hyw qingxkir. Mrquxx siy' taii liauxau vutdix-vutqag ee diongqanx, jniqui-lai ee jniginn, byy sniax byy sueh qanda' vuex byy .kir, dingw zit vutjiw iu'iac cingwingw ee langg, qinaxzit diyhh hro langg' dac mngg dac hxo, uirdiyhh anxnix kixsiauw iacc si jurjin ee langg si be jiyw, dui' anxnix laii jyr jawkix hai langg ee dairjir, hex si jerje bydangr tangx kir sngr kiw. U jit xee cutmiaa ee dethagqax qiyr jyr Vueqinx (Bacon) u qongw, "Hyxgiahlangg decc sniu jnii ee sii, ix si byy ingg tangx qor ix sintew qapp simqnuax." Sidjai si qongw liauw jinjniar driyc. Byy dikhing byy siu'iongw ee langg laii hyxgiac, si byy qyc'ngiu vnerlangg decc giaa qee; jingcax poxtongx ee qee sii caa jyr :ee, hyxgiahlangg ee qee si qimx :ee. Jongw .si qiwzenn qacc si qee, caa :ee qiamxx m si dendyww kacc qionghiw, in'ui qimx :ee kacc dang, si uadzuxx kacc kyxlinn!

3. Jnaixngiu jiacc sngr si hyxgiac?

Hyxgiac jnaixngiu si m hyw? Dingw jad soxx qongw hyxgiac byy dikkag hyw, si qongw giaa jnii-qee ee hyxgiahlangg, byy jaijingg byy dikhing ee hyxgiac m hyw, m si qongw qenwnarr hyxgiac jiurr m hyw, dagg langg dikkag diyhh longxx jyr sanwsenx jiacc e iong .did. Mrbenw qongw vadd langg; narr si jinjniar ee hyxgiac, guaw si huisiongg air. Jongw .si narr m si jinjniar :ee, mrbenw qongw si Kongxjuw qongw, jiurr si guaw iarr si knuar jyr viw tnidingw decc vuex ee hunbu iauxquxx kacc byy hen. Narr si anxnix, jnaixngiu jiacc sngr si jinjniar ee hyxgiac, jex diyhh laii genxqiur hro ix bingg.

Derr id diyh'air bingvik, siux je iong je jiacc si jinx ee hyxgiac, qanda' duarqui-lai vaw vaw, tokax draii quixnarr jap angr, toxde u quiw cingx quiw bxan qxah, jniginn qanda' vangr decc hro ix snex sxenx, canhngg si vaii decc jyr texben, iacc si vangr hro qniaxsunx kir kaisaiw knuawuac, jex m si hyxgiac, si qapp singkux dngrr vnuar ngii ee langg jit ngiu.

Lanw siongsiongg u knuar qnir jitt kuanw langg, liw narr sngr ix soxu ee qimginn si u quiw jap bxan, craa ix ee canhngg si u quiw vah qxah, lun ix qapp langg qauquanx iurr si jin' kuacdua. Mrquxx qnir diyc qongqiong uirdiyhh siarhue u lirig ee dairjir, beh qiyr ix vuec jit qix koxmngg-aw cud laii henr, ix jiurr hauw qiyr tniar, duiww langg vutsii hauxqiyr ix sanwhiongx qankow. Qycjaiww jiurr si ix qadi muixx zit ee jiac, cing, ing, iarr si qriuu qapp poxtongx ixha ee langg siy' siang kuanw, pauxlo si iong kax, jre ciax si hiamm byy siwdingw :ee. Jongxqongw, narr lun tec cud ix si qriuu jyr byy loriong ee langg, acc narr duw diyc u tangx tec zip, ix jiurr prinw sinx prinw srer iong kacc dua ee vunxjnii dy' si qnaw. Jitt jxingw langg henrsii jairr lanw ee diongqanx m jaix u zuarr je? Jitt jxingw jiurr si jniawvan ee siuxjnilo, beriongrdid sngr si hyxgiac.

Jinjniar ee hyxgiahlangg diyhh e jre zip jre cud, lingjip lingsanr jiacc si. Guanlaii jnijaii si beh hro langg iong, hro langg jyr dairjir ee kiwqu, duanwduanr m si beh hro langg vaii decc knuawhongw. Jniginn diyhh zuxx gauu liutongx jiacc zuxx u qewdat, narr si qanda' dunw siw dirr jit dah, juanx qruix dirr jit xee langg ee ciuw, si qapp dunw vunwsyr dangjidngiu.

Quanhe jnijaii u nng jxingw ee quanli, jit jxingw si soxiuxquann, qycc jit jxingw si suxiongrquann. Sniaxhuer qiyr jyr soxiuxquann? Lanw mair did tec huatlut ee qongxhuad laii qongw, jiauww poxtongx ee lixkir laii lun. Piwlun dirr jiax u jit-vah ginn. Jitt vah ginn dikkag m si qadi u, dikkag u juxlangg. Duiww jitt xee langg qongw, hitt vah ginn si qruar hitt xee langg ee miaa, vadd langg narr m si u tec qapp hitt vah ginn siang qewdat ee mic, qapp jitt xee langg hnuahiw qamguan siy' duiwngua, dikkag be tangx qaixngua hitt vah ginn ee miazi. U hitt vah ginn ee miazi ee langg, jiurr si qongw duiww hitt vah ginn u soxiuxquann. Acc simxmic qiyr jyr suxiongrquann? E tangx juriuu tec hitt vah ginn kir kaiing ee langg, jiurr si u hitt vah ginn ee suxiongrquann. Jinjniar ee hyxgiac, diyhh u jin' dua ee soxiuxquann qapp suxiongrquann.

Jongw .si narr e tangx quw quw u jin' kuacdua ee suxiongrquann, qanda' anxnix inx iarr jiokgiac tangx qongw si hyxgiac. Qiamxcaiw jitt kuanw ee hyxgiac si kacc dasangx kacc sidjai. Guanlaii u jnii u mic qiamxx m si beh iong mah? Soxiw u jnii u mic narr si be tangx ing, iacc si berhiauw ing, hex u si qapp byy siy' siang.

Piwlun qongw, u jit xee hyxgiahlangg siw .kir, ix ee qniaw sewhanr, ix ee jaisanw benw qongw si beh vangr hro ix ee qniaw, soxiw hiaxee jaisanw ee soxiuxquann si sriok dirr hitt xee ginxaw. Mrquxx, in'ui hitt xee ginxaw sewhanr berhiauw simxmic, soxiw zip ix ee jikveh iacc si cincig jyr ix ee horqenwzinn, ter ginxaw jiangxliw hiaxee jaisanw. Dui' anxnix hitt xee horqenwzinn narr si byy u m jingwqingx ee dairjir, ix e tangx ter hitt xee ginxaw juxir, jiong' hiaxee jaisanw qra ix unriong hro ix jyr jiongxjiongw ee surgiap. Narr si anxnix hiaxee jaisanw ee suxiongrquann tangx qongw si qruix dirr horqenwzinn ee ciuw-lai, hitt xee ginxaw si u jit xee kangx miaa, sidjai si horqenwzinn decc hyxgiac. Setsuw hitt xee ginxaw narr si quw quw be duarhanr, iacc si jniaa jyr jit xee vutdiongwiong ee langg, hitt xee horqenwzinn m si quw quw e tangx unriong hiaxee jaisanw mah? Ix qiamxx m si quw quw si hyxgiac?

Dui' jitt hxang cuisiongw .kiw .laii jiurr e bingvik, diyhh u suxiongrquann jiacc si hyxgiac, qanda' u soxiuxquann si byy iwgi, vutqyr narr si u soxiuxquann qycjaiww u suxiongrquann, anxnix si hro hitt xee suxiongrquann e tangx kacc an'unw kacc quxdngg nardnia. Suisi anxnix qongw, jitt xee soxiuxquanlangg narr zuxx jinwvo dikkag e zuxx byy diwdiong. U jnii m qramx iong, iacc si berhiauw iong, qinrqin erhiauw sniu zip byy sniu cud, jitt jxingw langg qiamxcaiw u soxiuxquann, jongw .siw dikkag m si u suxiongrquann, jex si qapp sanwhionglangg byy qyc'ngiu.

Derr zi diyh'air bingvik, vutlun je iacc si jiyw, diyh'air sisii u singsig jiacc sngr si hyxgiac; narr si muixx zit qanda' longxx si kaihuir sriaux byy .kir, longxx byy dingsinx snex cud simxmic vadd hxang, jitt kuanw si longxx u qiamxjiyw byy qetnix, jex jniawjniar si sanwhiongx. Dairqex jaix, liauxbuexqniaw suisi ix ee joxqongx vangr u quiw cingx bxan hro ix, qiuwqingr ix si sanwhionglangg. M na anxnix, qauwbuew lenrr ix ee singkux snewmia dy' suar byy tangx u ix ee hxun. Acc narr si zidzit decc jywqangx, bylun si duiww qadi, higsi duiww siarhue, dagg zit u lirig, dagg zit u cutsig, u kacc qetnix je, anxnix hitt xee langg suisi henrsii bydiok, jongw .si dikkag e tangx sngr jyr si hyxgiac. M na ix hyxgiac, siarhue uirdiyhh jitt jxingw langg e diddit jinwvo, diddit huatdat. Jitt jxingw langg tangx qongw si sewqanx ee qimkongr, dui' hiax beh cud jin' je qimx, hro sewqanx iacc si ix ee qniaxsunx u iuxzi.

Narr tec siyw siyw ee laii qongw, jit xee langg jit zit tanr snax qag, qadi iong nng qag; cunx jit qag tec hro vadd langg, jyr langg' ee lirig; iaxqycc u jit langg, jit zit tanr snax kox, zidzit qadi diyhh sir kox jiacc u qraur, byy qraur iong hitt koginn, ix jiurr iongrsimx kir krig vadd langg :ee laii vow. Cniaw sniu jitt nng langg, dycc jit langg kacc hyxgiac.

Narr tec kacc dua :ee laii qongw, jurqow ixlaii ee dua gauu langg, tangx qongw inx si dua hyxgiac, inx si knuar tong' tnikae jyr inx ee cur, inx tong' srinx ee lat longxx si cud dirr jingwlangg ee diongqanx, hro jingwlangg uirdiyhh inx laii huatdenw jinwvo.

Kongxjuw suizenn jairr Dinqog, jit sii bad byy bixniuu tangx jiac, jongw .si sewqanx dui' ix laii snex ee jaisanw si bydangr sngr. Sikkiax air sewqanx byy qankow, suizenn si jiong' ix ee ongqiongx ong'ui danr hetqak, jongw .si au-laii ix soxx did ee m jaix viw hiaxee qex u quiw cingx quiw bxan vxue. Qidog qadi u qongw, "Dirr tnix decc vuex ee jiauw-aw u siu tangx kunr, jairr kongwiaw decc jauw ee holii iarr u kangx tangx bih, jongw .si guaw si byy kuar taukag ee langg. Liw knuar hitt sii Ix si hydingw ee sanwhiongx. Dnaxx cniaw knuar, henrsii tong' sewqair jnia' vnuar ee langg qiamxx m si uirdiyhh Ix decc cud lat? Ix tangx qongw si jurr u langg ixlaii juer tauu itdingw ee hyxgiac, vutlun dycc jit sidai ee hongder iarr be tangx dat diyc ix ee jit qag-aw!

Derr snax rair cingcyw ee diamw. Hyxgiac m si qongw soxu ee jnii diyh'air qaur zuarr je, si diyhh erhiauw jai'ngiaw qadi ee kuiwlat, jiacc laii sniu lanw soxx e kamx did did e giahsor, qycjaiww diyhh iong juer hyw ee huatdo laii unriong hiaxee. Narr si anxnix, jiurr tangx sngr jyr si hyxgiac.

Anxnix qiamxcaiw qongw liauw kacc huanr, cniaw laii tiah kacc bingg. Jnii si jaijingg ee viauxqir, jex lanw ixqingx u qongw liauw. Langg ee simx duiww jnii lauxsit si byy sniu' iar, mrquxx jnijaii qiwzenn qacc si jaijingg ee viauxqir, diyh'air liong kuiwlat jiacc dniardiyc soxx ingqaix did :ee jiacc si. Narr beh m si anxnix, setsuw jiurr si hro ix qex did kacc je, ix iarr si unriong be tangx kir, anxnix m na hiaxee jnii jxig siw siw, ix ee dnar iarr si qex dang, diyhh siurr jiongxjiongw ee joxgai.

Piwzu jit xee langg beh siudangx, qiyr ix ee qniaxzii longxjongw cud laii draur quah cxig. Quah liauw, sirduarlangg knuar inx longxx qutlat, vutjiw dua hnuahiw, inxjunw inx hniadi qokk langg jin inx soxu ee kuiwlat dnax cxig kir jyr saikiax. Dua hanr :ee, dnax jit-vah qxinx; derr zi :ee, dnax veh-jap qxinx; longxx duxaw hyw, e tangx dnax qaur cur. Derr snax :ee, ser hanr m zinrhun, ix sniu jit sii aw quw ee qankow nardnia, kacc je e tangx kaisaiw kacc knuawuac, soxiw ix jiurr qiongqiongg dner qapp inx duarqyx dnax siy' siang, dnax jit vo, denx nng vo, dnax qaur duarkuir cuanw be li. Byy da'uaa diyh'air vniar jit dua vnuar dirr lo-vnix hro jingsnex jiac, acc qadi qaur cur suar huatzet tauu tniar, lenn dyw quixnarr zit. Ix ee laurve ciyr ciyr, qra ix qongw, "Gong ginxaw, liw m diyhh junxjad qadi ee kuiwlat. Narr beh cincniu liw anxnix, guaw hitt jun diyhh m tangx hro liw, jiacc be hai liw." Lanw qongw, "Tamx .zri, vinn .zri kag." Sengiuu iarr si anxnix qongw, "Langg m si in'ui ix soxx u ee mic kacc jiyw, soxiw jiacc sanwhiongx; dogdok si in'ui ix ee simx m jaix jiog jiacc si."

Jniginn diyhh knuar iong ee huatdo, qapp iong ee soxjai, narr si iong driyc ee huatdo qapp iong dirr driyc ee soxjai, jitt xee jnii e jniaa jyr nng xee iacc si snax~sir xee jnii qau. Acc narr si iong m hyw ee huatdo, laii iong dirr m driyc ee soxjai, suizenn si jniginn jxig qaur muaw cur-lai, jex duanwduanr beriongrdid qongw si hyxgiac, byy qyc'ngiu si jxig qui' qingx ee vunwsyr.

Bixqog u jit xee dua cutmialangg qiyr jyr Hutlankiklimm (Franklin). Ix qongw, "Langg qniaa jit vaiw pnaiw pinxhing ee huiwiong, e tangx iongxiok nng xee ginxaw." Jongw .si guaw sniu qnaxx vutjiw si anxnix. Jiauww guaw ee qinggiam qongw, kaix dirr qongx nirr jitt xee jnii, m na kaix dirr sxux nirr vah xee jnii ee qau. Cniaw knuar, vniar snewmia uirdiyhh jit qex ee boxqniaw cud lat, jiong' itcer soxx u :ee qanda' uirdiyhh qadi laii kaihuir, qingwzenn qaur buew vnir jyr quiw der byy miaa byy sner ee quttauu' jitt kuanw langg m jaix ixqingx u zuarr je. Mrbenw qongw vadd langg, lanw qadi laii jyr knuar, jiong' lanw rair qor boxqniaw ee jnijaii kuiwlat, hunx jit quaw aw duiww siarhue jingwlangg jyr knuar lehh, liw dikkag e qamxqag liw soxx iong ee jit ngii u vah ngii dua, u jit-bxan qasu ee langg, dikkag e tangx venwjniaa vah-bxan ee diongxjiaw.

Led'ui, m tangx qongw guaw si decc qongw hongdongg, jex si dui' guaw qadi ee qinggiam, qapp knuar sewqanx ee sidjingg, iong kakced ee sinwliam dirdecc qongw. Led'ui, cniaw byc gii, singsimx kir jyr knuar, guaw sinr led'ui iarr dikkag e dua sniax huah, qongw, "Driyc!" Qoxjaw Iutair Ixsikledqog ee ongg Soxlybunn u qongw, "U siaxsir, huanxdngw qetnix hyxgiac; u vyxsiyh jnii, huanxdngw sanwhiongx." Sidjai si cenqow ee qimgenn.

4. Sikig si ngqimx

Cenqasix ee tauu jam u jit qxur qongw, "Cuntnix ee amwsii jit kig aw quw e tangx dat did jit-cingx qimx." Jitt qxur six qiglik decc ylyw cuntnix guehqngx sii ee hyw qingxdir, si qongw knuar hitt kuanw ee hyw qingxdir jit diap aw quw, si viw did diyc jit-cingx qimx kacc hyw. Jex si dui' qingxdir laii bad sikig ee quiwdiong. Narr byy u qingxdir hiacc hyw, pacsngr ix qnaxx be hiauw did hitt sud aw quw ee sikig u qaxx hiacc vyxvuer. Suizenn si anxnix qongw, jex iarr iauxquxx e tangx qongw si bad sikig ee qewdat ee langg.

"Sikig si ngqimx." (Time si money) jitt qxur si sengiuu ee siogguw. Lanw dui' jitt qxur ue tangx jaix sengiulangg bad sikig ee quiwdiong, si viw lanw u kacc cimx, kacc qaur tauu. Jitt qxur ue ee iwsur si knuar diyc sikig jiurr jaingiaw sikig ee quiwdiong, si qongw sisii dy' si quiwdiong, dy' si voxvuer; mrbenw qongxx diyhh hyw qingxdir ee sii jiacc si.

Dui' hyw qingxdir jiacc erhiauw sikig si dadjnii :ee, qiamxcaiw duw diyc pnaiw qingxdir pnaiw qingxhongw ee sii, beh qongw sikig viw nuartoo kacc tangx iamwngor, iarquxqnaw. Knuar diyc sikig jiurr jaix sikig si quiwdiong ee langg, vutlun si hyw qingxdir iacc si pnaiw qingxgu, hyxgiahlangg ee jit diamxjingx qapp sanwhionglangg ee jit diamxjingx, ix dy' longxx si knuar jyr jin' dadjnii, vnevnee si quiwdiong. In'ui anxnix, sengiulangg si jin' gauu vyxsiyh sikig, jit diab aw quw dy' byy vangr hro ix kangx kangx jauw .quer .kir.

Lanw ee langg si jin' be hiauw did sikig ee dadjnii, knuar sikig naxx cincniu decc knuar dua kex ee juiw, vangr quwjai ix diddit lrauu .quer .kir. Inx qapp lanw jiurr jin' quw ee ixjingg, qycjaiww si jin' je langg, duiww sikig u jitt kuanw qyc'ngiu ee knuawhuad, diwqaur jairr qinaxzit, inx ee bunbingg qapp lanw ee si dua dua ee qyc'ngiu. Inx decc quewzit ee jubi si qapp lanw dua dua byy siy' siang. Mrbenw qongw sengiulangg si viw lanw kacc erhiauw kuix simqnuax, gauu huatbingg, gauu jewjy qikaw ee mihqnia: qinrqin dui' jitt diamw viw lanw kacc gauu voxdiong sikig ee simsingr laii qongw, jiurr si ixqingx viw lanw jin' huwzu jin' hyxgiac, jin' kuaiwlok, jin' u iwgi lar. Tangx qongw inx ee jit zit qiamxcaiw beh kacc ngiaa lanw ee jit nii.

Sikig hro langg tangx quiwdiong ee lixiuu u nng hxang. Jit hxang si in'ui sikig jid'err quer .kir, jiurr byy qycc dywdngw .laii. Lanw m tangx qongw jarjaxkiw quer liauw, iauxquxx u qinjaxkiw; qinjaxkiw quer liauw, iauxquxx u binaxjaxkiw tangx laii. Suizenn vnevnee si jaxkiw, jongw .si jarjaxkiw qapp qinjaxkiw si byy siang; qinjaxkiw qapp binaxjaxkiw iarr si u jingcax. Jurr qoxjaw ee qoxjaw, qaur au-laii ee au-laii, qinjaxkiw qinrqin jiacc u jit xee, qiamxx m si jin' tangx quiwdiong mah!

Qycc jit hxang si in'ui sikig qapp langg ee uahmia. Sikig ee qingquer qyxzenn si byy hanrliong, mrquxx jairr jitt xee byy hanrliong ee sikig ee lairbin, lanw e tangx uahdang, poxtongx jiacc qinrqin u go-jap nii quw. Jitt go-jap nii ee diongqanx, e tangx jywqangx, vran dairjir, ee sizit si byy zuarr je. Go-jap nii ee diongqanx diyhh kunr liauw jap-lak~cid nii. Tahceh junxvi ee siqanx junw jyr lak nii quw, sewhanr berhiauw vnuar hxang, be tangx congr simxmic; qapp langg iawsen iacc si puawvne jongxqiong junw jyr jap nii quw, itcer kauwduu gua, go-jap nii ee diongqanx e tangx huathuix langg ee kuiwlat jyr dairjir, qanda' jiacc u jap-lak iacc si jap-cid nii quw. Tangx jaix jit siwlangg ee diongqanx uac liauw jueww u kuanxsid, jueww u iwgi ee sizit, vutqyr m jnriu zi-jap nii. Jitt jap-lak~cid nii narr vangr hro ix kangx kangx lrauu .quer .kir, langg u uac si qapp byy siy' siang, hitt xee langg si qapp byy snewmia ee langg jit ngiu.

Liw sniu knuar, sikig diyh'air vyxsiyh iacc mrbenw? Sikig sidjai si ngqimx, m na anxnix, iauxquxx si viw ngqimx qycjaiww kacc quiwkir. Lanw hniadi jixmue ee diongqanx, m jaix si in'ui jnaixngiu, qanda' erhiauw quiwdiong jniginn qapp snewmia, acc knuar sikig cincniu too hitt hy langg jin' je.

Cniaw zinrjinx sniu knuar, qiuwqingr jniginn qapp snewmia dy' longxx si sikig laii hro ix jniaa :ee. Qanda' erhiauw diong jnii air snewmia, berhiauw vyxsiyh sikig, jex si byy qyc'ngiu jiac quexjiw berhiauw qor ciurjangg; driongr jiongrguann suar byy knuar qnir qadi ee sensnix. Guaw dirr jiax beh qiw quiw jann laii jyr jingwqur. Cniaw dairqex jywhuew jimjiog knuar.

Dagg zit dui' qelo quer, vutsii dy' u knuar qnir lanw decc bexbe si jinjniar gauu qongxqer. Bre ee langg jai'ngiaw brew ee langg dikkag e cutqer, ix jiurr jiong' qewjnii qongw hro ix pongwbew pongwbew, quwjai ix kir cud. Brew ee langg iauxx be knuar mihqnia ee hyxpnaiw, kuix cuir jiurr hiamm kacc quir. "Dngsnuakeh, duiwvnuar sreh," jiurr singx qra ix cud jit xe hro ix siok ~ ~, acc jiacc naxx knuar mic naxx cuiciauu.

Dairqex sniu jinx knuar, soxx cuijig ee qewkax jingcax u zuarr je, jex si kuair jai'ngiaw, jongw .si uirdiyhh anxnix soxx liauw e sikig, suizenn si go hunx jap hunx ee quw, jitt go hunjingx jap hunjingx ee qewjnii, sidjai si yh did sngr, jitt go hunjingx quw, jiurr si liauw kir brew ee langg go hunx ee snewmia. Uirdiyhh quiw jiamx quiw qag ee qongxqer qamguan crig liauw go hunx jap hunx ee huewsiu, lauxsit byy viw jex kacc gong :ee!

Jitt kuanw ee bexmic dui' dyxlyc u tangx siok, jitt kuanw ee bexmic jnaixngiu u tangx tanr? Henrqimx qiamxcaiw u tangx qex diongg quiw qag ginn, jongw .si vutdix-vutqag ee diongqanx ixqingx crig liauw quiw hunx ee snewmia. Uirdiyhh siasiauw ee jniginn, kingw vangr quiw hunx ee snewmia, jitt kuanw ee snewmia berbenw sniu' quer siok. Qniwjinx jit hunx ee snewmia narr iong quiw cingx bxan ginn beh qra langg' brew, pacsngr ix qnaxx m. Duiww siqanx ee quanliam byy bingg, be hiauw did sikig ee vyxvuer, soxiw siongsiongg u jitt kuanw gong ee dairjir, dagg zit u huisiongg ee sunxhai, byy lirig.

Bunbinglangg qik gauu diwdiong sikig; inx ee bexbe dikkag byy anxnix, bre ee langg jiauww ix soxx e habvnuaa ee qrer qongw, brew ee langg iarr jiauww ix soxx knuar e dat did qra ix brew. Narr si knuar be hac, ix huansinx uat dngw jiurr qniaa, dairqex jin' cingcyw jin' byy huiwkir jin' singw qangx.

Qycc jit hxang tangx jingwbingg lanw duiww siqanx byy quansimx ee jingwqur, jiurr si lanw m na vanrsu byy jiauww sijun; duiww langg' soxx ioksog ee sikig lanw vutjiw hamrban siuw. Vutlun beh kuix simxmih huerhap, dy' longxx diyhh quewtauu jin' quw, jiacc e tangx jiauu qaur; jit xee langg duw jit xee langg iarr si anxnix. Cniaw langkeh ee sii, si iauxx qyckacc hai. Jiauww qurquanr qongw, diyhh samcuix-gnoxcniaw jiacc si u qraur lew, jongw .si jitt kuanw ee lexsor sidjai si bunbinlangg ee diongqanx soxx byy :ee. Cincniu jitt kuanw decc encenn liauw siqanx, si byy qyc'ngiu jiong' dairqex ee snewmia knuar jyr juiw, ngiuw kiw laii lamrsamw puah hetqak, jex si huisiongg ee dua cywgo.

Sengiulangg decc siuw sikig si naxx cincniu decc qor snewmia; qapp langg iog anxnix, jiurr si anxnix, iog quiw diamw quiw hunx qaur, jiurr si jiauww hitt xee sikig, dikkag byy cax vnuar hunx. Dikqog u jit xee dua cutmialangg qiyr jyr Kongdig (Kant), ix m hanrdnia duiww vadd langg juadduir siqanx, jiurr si ix qadi dy' longxx si jiauww siqanx decc dinxdang jyr dairjir. Ix dagg zit dy' longxx u jit xee dniardiyc ee sikig diyhh cud kir guarbin qniasuaw. In'ui ix longxx u jiauww sijun, soxiw langg narr knuar qnir ix dui' jitt soxjai qingquer, jiurr jai'ngiaw hitt jun si quiw diamxjingx. Jairr sengiuu si liac byy siuw siqanx ee soxx qniaa jyr jit hxang jin' dua ee pnaiw hing'uii.

Derr snax: Lanw berhiauw siqanx quiwdiong ee jingwqur, jiurr si lanw beh cue langg byy knuar siqanx, qycjaiww lanw kir cue langg m jaix si beh cue langg vanrsu iacc si tittyy, vutjiw byy bingvik. Dairkair mrbenw go hunjingx jiurr camsiongg e cingcyw ee dairjir, iarr dikkag diyhh tuax qaur jit diamxjingx iacc nng diamxjingx ee quw. Kixtauu longxx si qongw hiaxee byy dapsab ee ue, naxx cincniu jiongjingg decc siaw puex ee kuanw, tauu tauu aw diyhh singx siaw hiaxee huii :ee, too :ee, siaw qaur qui' dua pxenr, jingwqingx ee dairjir qaur dirr buexliux jiacc siaw quiw zri aw jiurr liauxqiok. Jitt kuanw qiamxx m si dy' huir siqanx, huisiongg ee dua sunxsid mah?

Iauxquxx u kacc hai :ee. Lanw m jaix si in'ui kacc ingg kacc byy dairjir iacc m si? Lanw ee langg jin' air hapsenx qongw pnawdamm, longxx si qongw hiaxee jap-snax tnix-gua ee ing'ue. Dui' jitt kuanw laii liauw ee sikig bydangr tangx kir sngr, jitt kuanw si qapp jiahvaw qanda' dyw decc kunr quewzit jit ngiu, jex si u uac naxx byy uac. Lauxsit si siw siw jiac liauw sewqanx ee iambiw. U jit hy ee pnaiw sibsiok, jnaixngiu siarhue e jinwvo? Dairqex diyh'air lyhsuex, si knuar qnir qnir ee dairjir. Ursii jywhuew hapsenx qongxciyr, kiokk m si longxx m hyw, kiokk iarr si jit jann hiyckunr iongxsinn ee huatdo; jongw .si diyh'air u sijun jiacc hyw, dikkag si beriongrdid hapsenx jyr quewzit.

Dairqex! henrsii ee langg si knuar sikig viw ngqimx kacc quiwkir, kacc dindiong, soxiw vutlun simxmih sijun ee siqanx, jit diab aw quw dy' longxx m qnaw pacsngw, m qnaw byy dniardiyc.

Jitt hxang lanw siangrr derr id tangx jai'ngiaw. Liw knuar, huexciax decc qniaa ee sikig, si longxx u dniardiyc; qyckacc dua liap ee langg ix dy' diyhh junxjad hyxser, laii jiacc jre u ciax. Qadi dner kror kror, iong jit-bxan ginn beh qiyr huexciax danxhau ix jit hunjingx, jex si duanwzenn mrbenw sniu. Jiurr si huexjunn iarr si anxnix. Guaw jitt vaiw jairr Hnuaivinx ee qangxhnua bad knuar qnir jit jiah nng~snax-bxan dxunr ee dua huexjunn, si dui' Bixqog laii :ee, si jurr quixnarr guehzit jingg jiurr dniardiyc hitt zit ervox sir diamxjingx beh qaur hnuarviah :ee. Guaw duxx beh kir jriab jit xee dui' Bixqog dngw .laii ee ving'iuw, kia dirr junn beh uaxhnua ee soxjai danxhau. Ai'ah! Jin' qniax .langg, hitt jiah cincniu snuax hiacc dua ee dua huexjunn, qyxzenn si sir diamw qauwui uaxhnua, cax jit hunx jit biyw dy' byy lar!

Jongxqongw, qinrlaii ee langg byy siuw sikig si be tangx jyr simxmic. Qnuatniax iarr u dniardiyc siqanx, ginhangg iarr u dniardiyc siqanx, vnerngi iarr u dniardiyc, haghau iarr u dniardiyc, jywhir marr si u dniardiyc. Qycjaiww langlangg si byy quiw nii tangx uac, si byy quiw sii tangx jywqangx, soxiw e tangx dniardiyc ee sikig, narr m si junxjad dniardiyc u hyxser, dng' jitt hy siser, m na damgo qadi, vadd langg iarr e siurr lanw jin' dua e damgo.

Ai'ar! Jingww hniadi jixmue, lanw Daiuann ee qinaxzit, dagg hongbin ee qingxhongw sidjai viw langg' vadd dah si jin' dua dua be knuar .did, jex dua vorhun si lanw berhiauw quiwdiong sikig soxx drir :ee. Sikig si ngqimx. M na; iauxquxx si viw ngqimx u qyckacc quiwkir; lanw diyhh jai'ngiaw tangx vyxsiyh. Guaw iong gauu vyxsiyh sikig ee langg tangx qongw jiurr si hyxgiahlangg.

huedngw tauu iac