Peter 2
PETER EE DERR ZI DNIUX PUEX
1 Jesus Krist ee lovok, iarr si Ix ee suwdoo, Simon Peter, siaw puex qiar hro hiaxee qapp guanw snaqab did diyc qangg jit ngiu vyxvuer ee sinr, dirr lanw ee Siongrder qapp Qiuwjuw Jesus Krist ee gi :ee:
2 Guan undenw ving'anx dui' linw cimx jaix Siongrder qapp lanw ee Jruw Jesus, qetnix jerje hro linw.
3 Siongrder ee quanlingg ixqing’ ing itcer quanhe uahmia qapp qingwkenn ee su sniuxsur lanw, si in'ui lanw cimx jaix hitt xee ing qaqi ee ingqngx qapp hyw dig driaur lanw :ee;
4 Dui' jiaxee, ixqing’ u vyxvuer qapp qik dua ee ingwunw sniuxsur lanw, beh hro linw dui' jiaxee ingwunw tuatli sewqanx dui' su'iok soxx drir ee vairhuai, did diyc u hxun dirr Siongrder ee singwjingg.
5 Uirdiyhh anxnix, linw diyhh jin lat unkunn, dirr linw ee sinr qetnix hyxdig, dirr hyxdig qetnix diwsig,
6 Dirr diwsig qetnix junxjad, dirr junxjad qetnix tunlunw, dirr tunlunw qetnix qingwkenn,
7 Dirr qingwkenn qetnix tniar hniadi, dirr tniar hniadi qetnix tniar jiongww langg.
8 In'ui linw narr u jiaxee qaur ciongmuaw, dyrr beh hro linw dirr cimx jaix lanw ee Jruw Jesus Krist siong vutdir vinrdnua byy qetsit.
9 In'ui byy jiaxee, langg dyrr cnimii, jixu knuar qin qin, ixqing’ be qir did ix jingg ee jue u sexcingx.
10 Hniadi ar, soxiw diyhh qyckacc unkunn, laii qenqor linw ee siurr driaur siurr qingw. In'ui linw qniaa jiaxee, dyrr ingxuanw be vuac dyw.
11 Si dui' anxnix beh dua dua sniuxsur linw zip lanw ee Qiuwjuw Jesus Krist ingxuanw dilehh ee qog.
12 Soxiw linw suizenn ixqing’ jaix jiaxee su, qycc qenqor dirr soxu ee jinliw, guaw beh siongsiongg hro linw qir .did.
13 Guaw iauxx diamr dirr jitt xee vowvnii ee sii, diamw cnew linw hro linw e qir .did, guaw pacsngr si ingqaix;
14 In'ui guaw qaqi jaix tiah guaw ee vowvnii ee sii qin lar, jiauww lanw ee Jruw Jesus Krist soxx jixsi guaw :ee.
15 Guaw iarr beh unkunn, hro linw dirr guaw quewsir liauxau, vutsii e qir did jiaxee su.
16 In'ui guanw vingsor hro linw jaix lanw ee Jruw Jesus Krist ee quanlingg qapp Ix ee qangwlimm, m si ing qikiauw byy ngiaxjiah ee ue, si cinbak knuar qnir Ix ee dua uigiamm.
17 In'ui Ix dui' Ve Siongrder did diyc junquir ingqngx, hitt sii dui' qik dua ee ingqngx u jitt hy sniax qaur dirr Ix, qongw, "Jitt xee si Guaw tniar ee Qniaw, Guaw soxx hnuahiw :ee."
18 Jitt xee sniax dui' tnix cud, guanw qapp Ix dirr singwsnuax ee sii tniax .qnir.
19 Qycc lanw u sendix ee ue e qyckacc qenqor, linw diwir jiaxee si hyw, cincniu dingx jiyr dirr oamr, qaur dirr tnixqngx, kexbingcnix cuthen dirr linw ee simx ee sii.
20 Derr id, diyhh singx jaix, qniwnarr Singwqingx diongx sendix ee ue, byy tangx tranr sukiax ee iwsur laii kuitiah.
21 In'ui be u sendix ee ue dui' langg ee iwsur cud, si dui' Siongrder laii ee langg, hro Singwsinn qamxdong laii qongw.
2 Narr si dirr vecsnir ee diongqanx, bad u qew ee sendix, anxnix dirr linw ee diongqanx iarr decbeh u qew ee sensnix, amwjni inxjinr hiaxee hai langg qaur dimlunn ee ngirduanx zip .laii, lenrr sioghuee inx ee Juxjnaiw inx iarr m zin, qaqi cruw qinw qinw qaur ee dimlunn.
2 Beh u jerje langg tranr inx ee sia'imm, jinliw ee lo beh uirdiyhh inx laii siurr huixvongrr.
3 Inx dui' tamsimx beh jyrjog ue laii lud linw; dui' jaw ixlaii, inx ee simxpnuar byy encenn, inx ee dimlunn byy hiyckunr.
4 In'ui Siongrder qiwzenn byy siyh huanrjue ee tnisair, qra inx hed dirr amwhuw, qra inx qaux dirr oamr ee knix, hro inx siurr qimr tingwhau simxpnuar;
5 Qycc byy siyh qoxjaw ee sewqair, hro duarjuiw qaur dirr hiaxee byy qingwkenn ee langg ee sewqair, dogdok vyxho suantuann girliw ee Noah hitt veh langg;
6 Qycc hro Sodom qapp Gomorlah hiaxee sniaa juer huexhux, gixdnia inx bedbyy, he lecc juer au sewdai byy qingwkenn ee langg ee qamwqair;
7 Dogdok jinxqiur girlangg Lot, dyrr si siongsiongg uirdiyhh buliw ee langg soxx qniaa ee sia'imm laii cimx cimx iubun :ee.
8 Jitt xee girlangg kiarkiw dirr inx diongqanx, iarr knuar .qnir, iarr tniax .qnir, zidzit in'ui inx vuthuad ee soxx juer laii koxcow ix gi ee simx.
9 Jruw jaix tangx jinxqiur qingwkenn ee langg tuatli iuxhik, iarr jaix tangx siuqimr vutgi ee langg qaur simxpnuar ee zit siurr hinghuat;
10 Qyckacc iauwqinw si hiaxee tranr ziogtew qniaa dirr uwuer ee su'iok, iarr biauxsi vran jingwsu :ee; inx duardnaw, jursi, setdok junquir :ee iarr byy qniax.
11 Suizenn tnisair ee kuiwlat quanlingg kacc dua, iauxquxx m bad dirr Jruw ee binrjingg ing vongwdok ee ue jikjue inx.
12 Dogdok jiaxee langg, cincniu byy lingsingr ee uahmic, singsingg diyhh hro langg liac laii vairhuai :ee, setdok inx soxx m jaix :ee, beh dirr inx ee vairhuai laii siurr vairhuai;
13 Duw diyc qankow, juer vutgi ee qangjnii. Inx liac zit .sii ee enwlok juer hnuahiw. Inx si lasamm :ee, si u hacuu :ee, inx qapp linw dangjee jre ensiac, dui' inx ee kuixked laii kuaiwlok;
14 Inx ee bagjiux longxx si imsig, huanrjue byy suah, behik simx byy qenqor ee langg, inx ee simx quanwsir tamjaii, habqaix siurr jiuwjow.
15 Inx lirkuix jniawlo laii sitbee, tranr Beor ee qniaw Balaam ee lo, ix si rid diyc vutgi ee qangjnii,
16 Danrsi uirdiyhh qaqi ee huanrhuad laii duw diyc jikvi; be qongxue ee luu-aw qongw langg ee ue, laii joxjiw sendix ee lamrsamw.
17 Inx si byy juiw ee jnuaa, qongg hongx soxx saur ee hunbu, u o.-oamr-a. lauu lecc tingwhau inx.
18 In'ui inx qongw kanghux kuakauw ee ue, dirr ziogtew ee su'iok, ing sia'imm laii iuxhik hiaxee duxduxx tuatli qniaa cabiu ee langg ee ciuw :ee.
19 Inx ingwunw inx juriuu, kiokk qaqi juer vairhuai ee lojaii, in'ui langg hro simxmih kacc ngiaa, dyrr juer hitt hxang ee lojaii.
20 In'ui inx ixqing’ dui' cimx jaix Qiuwjuw Jesus Krist laii did diyc tuatli sewqanx hiaxee uwuer, narr qycjaiww hro hiaxee ueuer soxx dnii soxx apjer, dyrr hitt hy langg lorbuew ee su viw dairsingx kacc siongdiong.
21 In'ui qiwzenn jaix gi ee lo, suacc qingwzenn vuerbiu soxx tuann hro inx sxingr ee bingrling, inx lingkow longxx m jaix kacc ngiaa.
22 Hitt hy langg ee qingxhongw jinsit hap dirr sioggiw soxx qongw, "Qxauw dywdngw jiac ix soxx tror :ee; dix ixqing’ sew, qycc nuar dirr tobee ee diong'ngx."
3 Soxx tniar ee hniadi ar, guaw henrjai soxx siaw hro linw :ee si derr zi dniux ee puex; jitt nng dniux si beh hro linw qiwliam, laii diamw cnew linw sunjuann ee simx,
2 Hro linw qir did sxingr ee sendix camwgiw ee ue, ixqip Qiuwjuw duiww linw ee suwdoo soxx bingrling :ee.
3 Derr id diyhh jaix :ee, dirr hiaxee lorbuew ee sizit beh u hiwhiog ee langg cud .laii, jiauww qaqi ee su'iok laii qniaa :ee hiwhiog qongxx,
4 "Ix ingwunw qycc laii, dnaxx dirr daxlyc? In'ui dui' ledjow kunr .kir ixlaii, banrhang mic dui' kixtauu congwjy jiauww qu byy qyc'ngiu."
5 In'ui inx hiaxee langg qowir be qir .did .ee, dyrr si dui' jaw u jiaxee tnix, qycc u de dui' juiw cud, dui' juiw laii jniaa, longxx si dui' Siongrder ee dy;
6 Dng' hitt xee sewqanx, jiaxee tnix qapp de hro juiw huanwlam laii bedbyy.
7 Dogdok henrjai jiaxee tnix qapp de si dui' jitt xee dy kngr lehh, laii tingwhau huew, lauu lecc qaur byy qingwkenn ee langg siurr simxpnuar qapp bedbyy ee zit.
8 Soxx tniar ee hniadi ar, u jit hxang linw m tangx be qir .did, dyrr si Jruw knuar jit zit cincniu jit-cingx nii, jit-cingx nii cincniu jit zit.
9 Jruw byy encenn dirr soxx ingwunw :ee, cincniu langg uree knuar juer encenn :ee, Ix si kuan'iongg linw, m air u langg dimlunn, si air langg longxx huanxhuew.
10 Danrsi Jruw ee zit beh qaur dyrr cincniu cat qaur, hitt zit, hiaxee tnix beh u dua sniax huer .kir, hiaxee guanjid siurr siyx laii siaubet, de qapp qidiongx soxu ee mic iarr siyliyx .kir.
11 Banrmic qiwzenn beh anxnix siaubet, dyrr linw dirr sxingr qapp qingwkenn diyhh juer simxmih hy ee langg,
12 Laii ngwbang suar cuivig Siongrder ee zit qaur? Hitt zit qaur, jiaxee tnix e hro huew siaubet, guanjid siurr siyx, dyrr rngiuu .kir.
13 Narr si jiauww Ix soxx ingwunw, lanw ngwbang sinx ee tnix sinx ee de, gi diamr dirr inx diongqanx.
14 Soxiw, soxx tniar ee hniadi ar, linw qiwzenn ngwbang jiaxee, diyhh unkunn hro linw byy lasamm, byy hacuu, anzenn qnir diyc Ix.
15 Qycc diyhh knuar lanw ee Jruw ee kuan'iongg juer jinxqiur ee in'iuu; cincniu guanw soxx tniar ee hniadi Paul, jiauww soxx sniuxsur ix ee diwhui, iarr bad siaw puex hro linw.
16 Dirr ix longxjongw ee puex decc lun jiaxee su iarr si anxnix qongw. Qidiongx u yh did bingg :ee, hex m jai'ngiaw, byy qenqor ee langg quexsueh liauxau, suacc hro ix cuac .kir, cincniu quexcuac qi'uu ee Singwqingx, drir qaur qaqi dimlunn.
17 Soxx tniar ee hniadi ar, anxnix linw qiwzenn dairsingx jaix, diyhh dihongg, benw did hro buliw ee langg ee cabiu soxx inxiuw, laii sitlyc qaqi ee qenqor.
18 Dogdok diyhh jinwvo dirr lanw ee Qiuwjuw Jesus Krist ee undenw, ixqip bad Ix. Guan ingqngx qruix Ix, dui' henrjai qaur ingxuanw ee zit. Amen.