myth_72
THE POWER OF MYTH -7
Bunchhai huan'ik
AIWJINGG HUN'INX QXOW
air tauwquer bagjiux, dag diyc simx
bagjiux si simx ee quancatjaiw,
jin vunxhun siwqer srunn
hixlok ee simx
inx horsiong did diyc hyhaii
jixir qenquad sii
uanbuanw ee air dyrr dirr hiax
bagjiux knuar tangr simx
duer diyc iwjir,
knuar diyc :ee, sniu diyc :ee,
snex cud hixlok,
air cutsir ar, hibang
an'uir diyc inx ee ving'iuw
inx si jinjniar ee aiwzinn
bagjiux vuh cud huemm, simx hro mm singsik
air si inx ee qetqyw
~~ GUIRAUT DE BORNEILH
AIWJINGG, UI' JAP-ZI SEWQIW QONGW KIW
B: aiwjingg si jiacc kuah ee juxdee, zuqyw guaw qongw “lanw laii dramm ~ aiwjingg!” liw e ui' dyhh kaisiw?
J: guaw e ui' jap-zi sewqiw Aujiux ee sujingg gimcniur sizinn qongw kiw.
B: inx si sniaw?
J: si qoxjaw FRANCE danglamvo ee quiwjok, aurlaii dirr qitnax soxjai/ Aujiux qokk derkux dy' cuthen. Dirr Dikqog, inx hyrjyr cniur aiwjingg qnux :ee (MINNESIGNER), MINNE si diongsewqiw Dikbunn aiwjingg ee iwsur.
B: inx qamxx si hitt xee sidai ee sizinn?
J: inx si sizinn byy m driyc! Si jit qrunn u digding digjid ee sizinn. Gimcniur sizinn liuhingg ee sidai si jap-zi sewqiw. Jingxqyy sujingg sizinn tuantongw dirr 1209 nii soxui ALBIGENSIAN (jap-id ~ jap-snax sewqiw dirr FRANCE lamvo ALBI derhngx vutjiw u sewlat ee huanxtenjuxqaur jongpair, si INNOCENT III huad kiw :ee ) qaixqik unrdong, ui' FRANCE siausid. Jitt xee unrdong si Aujiux ligsuw-siong qongzin siongrr hamwqow ee jongqaur unrdong ji' id.
Sujingg sizinn si hro langg lensiongw diyc dongsii ALBIGENSIAN-diongx jiamrr hingx ee MANICHEISM, jiacc hro qauwhue cingduu. Qisit, ALBIGENSIAN qaixqik unrdong bogviaux, si jiamduir dongsii huxvai ee qauwhue sinjid zinguann. Incuw, sujingg sizinn duiww aiwjingquanx ee juanxhuar, suacc jin' hogjap ham' jongqaur sing'uac lam jywhuew.
AIWJINGG JUANXHUAR ?
B: Aiwjingquanx ee juanxhuar? Jex si sniaw iwsur?
J: Sujingg sizinn duiww aiwjingg simlixhak jin' hingwtauu. Inx si sehongx dairsingx kuriuw henrdai aiwjingquanx ee jit qrunn langg --- zinruii, aiwjingg si jit jiongw langg duiww langg ee quanhe.
B: Dirr jex jinwjingg, aiwjingquanx qycc si jnuaxngiu?
J: aiwjingg jixsirr erdangr ciwqig singwiok ee sinn EROS. EROS ee aiwjingg m si sujingg sizinn soxx qinggiam diyc hitt jiongw dui zip aiwhyy ee qamxqag/ ham' qywzinn buquanx :ee. Dongsii ee langg vingrr m jaix AMOR (FRENCH air ee iwsur). AMOR si sujingg sizinn zinrkyw qywzinn ee air, EROS/ AGAPE (sinn duiww sewqanlangg ee air) m si qywzinn ee air.
B: Cniaw qaixsueh.
J: EROS dairviauw sneliw iogbang, duiww duiwhongx sinkux ee zedqongg, ham' qywzinn insor buquanx.
B: AGAPE neh?
J: AGAPE ee air si beh liw air liw cuwvnix ee langg cniurr air jurqiw qangrngiu --- jingsinsingr ee air, m quanw jitt xee langg si jnuaxngiu.
B: jex m si EROS-sid ee qigjingg, guaw zinruii hex si juvix.
J: byy cyr! Si juvix, packuix jurqiw ee simhingx, danrsi m si cniurr AMOR qywzinn :ee.
B: AGAPE si jongqaur ee ciongdong.
J: driyc lar! Sujingg sizinn qra AMOR zinruii si jiwqyx ee jingsinn texgiam, EROS ee qinggiam si virr cniuxduat diyc ee qamxqag. Dirr Inwdo, aiwsinn si jit xee qauciangg/ uahlik ciongbuanw ee siauwlenlangg, ciuw tec jit qix qxiongx, jit tangw buanw ~ ee jnxir, dagg qix jnxir dyrr u miahy hyrjyr “siw ee kow” “packuix simmngg”... dringw. Jinjniar aiwsinn si e duar hro liw jiaxee qamxqag ee. Aiwjingg ee qamxqag juanzenn si sneliw/ simliw ee voghuad.
Lingrgua jit jiongw air, AGAPE, air qecviah ee langg cniurr air jurqiw, bylun jitt xee langg si'angw, diyh'air air ix, in'ui si liw cuwvnix :ee.
Zuqyw si AMOR, si jit jiongw sunzenn qywzinn ee air, hitt jiongw laijurr jit bak nih sir luiw bagjiux siy' dag, cniurr sujingg sizinn tuansuad soxx biysiaw :ee, langg ham' langg ee air.
AIR UI' BAGJIUX DAG DIYC LUERSIMX
B: liw ee ceh u jit siuw six, biysiaw diyc jitt lui sir liuw bagjiux qang siqanx horsiong siy' knuar ee qinggiam : air ui' bagjiux dag diyc luersimx...”
J: jitt jiongw qinggiam ham' dongsii qauwhue soxx jicii ee itcer sionghuanw. Hex si qywzinn/ qywvet ee qinggiam, guaw qycc zinruii jitt jiongw qinggiam si dairviauw sehongx siongrr sunn/ uixdai ee jinghuaa, marr si jiurr guaw soxx bad :ee, ham' qitnax tuantongw byy qang :ee.
B: anne qongw .laii, kir air ee iongxkir jniajyr qywzinn kingxding jurqiw ham' tuantongw sna' duiwkongr ee iongxkir. Duiwkongr qauwhue tuantongw ee iongxkir, dirr sehongx bunhuar ee enxvenr zuarr diongriaur?
J: diongriauwsingr dirr: tuisag sehongx bunhuar qiongdiau qywzinn ee diongriaur/ duiww jursinx qinggiam ee sinwsimx, qywzinn duiww zinsingr/ sing'uac/ qewdat ee qinggiam, (m si qexjong qongw quaw vadd langg qongw .quer, u tew byy hxunn ee ue.) iong laii duiwkongr juanduanr/ dan'id susiongw texhe ee habhuatsingr. Uanjuann tongxid ee jewdo si qihaisid texjer, singsanw laijurr qang jit qingx cniuxsiongx/ muixx jit vxo qihaii ee qonglingg uanjuann siyqang :ee.
B: liw bad qongw .quer, sehongx longrban aiwjingg si ui' “jurzenn vunxlingg ciauuat jongqaur sinwdiauu (LIBIDO OVER CREDO)” kaiwsiw ee, liw ee iwsur si ... ?
J: Jongqaur sinwdiauu qongw “guaw siongsinr”, siongsinr :ee vutjixsirr huatlut, si virr siongrder jerdorhuar ee huatlut, zircniaw langg si kyxlingg ham' siongrder jingven :ee. Jiaxee siongrder jewding ee huatlut si guaw srinx-siong dimdang hurdamx, byy junsiuw jiaxee ludhuad si jit hxang juerog, marr ham' guaw ingxquiw ee digjid iuxquanx.
B: hex dyrr si jongqaur sinwdiauu?
J: driyc! Jongqaur sinwdiauu. Liw sinr Ix, rair kir qra zinrjue, m si duiww sinjid zinguann qongw “sinhu, jiokhog guaw, jitt lexvair guaw viauxhen liauw be baiw!” kiokk si jit diauu jit diauu qiamxcax jurqiw ee guanje, sngr jongxqiong huan diyc quiw diauu, itdit sniu jurqiw huan liauw guanjue. Dirr jitt xee quewdingg, liw suacc venwjyr jinjniar ee juerzinn! Jex sursit si kenjig singjunn ee iwjir. Jongqaur sinwdiauu dyrr si anne.
B: jurzenn vunxlingg neh?
J: hex si snewmia ee ciongdong, laijurr simdiongx.
SIMX SI KAIHONGR HRO LINGRGUA JIT XEE LANGG EE KIWQUANX
B: jitt xee simx si ---
J: simx si jit xee kaihongr hro lingrgua jit xee langg ee kiwquanx. Zinlui ham' dongrbut byy qang ee digjid, dongrbut jixu quansimx jurqiw ee lirig.
B: anne qongw, liw soxui longrban aiwjingg m si tamsimx/ qikjingg/ jongqaur jinghuaii?
J: byy cyr! Tuantongw bunhuar hun'inx si qadingg anvaii. Uanjuann m si qywzinn duiww qywzinn ee quatding. Qaur dnaxx, Inwdo vywjuaw iauxx u jit nuaa qongxqyr, teqiongx hro hun'inx dionglangg kandingx luxjuw juliau. E qir did guaw siybad ee Inwdo qadingg, jaboxqniaw beh cutqer, kiokk byy qnir quer birlaii angsair, dyrr e itdit mng ix ee hniadi “ix snex jyr sniaxkuanw? Puehux si cimsig iacc si cnixsig? ...”
Diongsewqiw ee hun'inx su'iaur qingquer qauwhue ee zinrkyw, incuw sujingg sizinn id-duiww-id ee aiwjingg lixsiongw, duiww qauwhue si jin' huihiamw :ee.
B: qamxx qongw si irqauwdoo hing'uii?
TRISTAN EE AIWJINGG QXOW
J: vutjixsirr irqauwdoo hing'uii, hex si tongqanx/ simlingg :ee, hun'inx uanjuann siarhue anvaii, ui' bagjiux sanxsingx cud aiwjingg, dyrr kuriuw kacc quann ee jingsinn qewdat.
Kyxvixqongxx, dirr TRISTAN ee longrbanrsuw, ISOLDE singx ham' MARK Ongg dingrhunx, nng langg byy qniwbin quer. TRISTAN ee zimrbu si horsangr ISOLDE qaur MARK Ongg ee sniavyw uanhunx. ISOLDE ee maxmah junxvi liauw jit jiongw aiwjing'iyc, beh hro beh qethunx ee siauwlenn lamluw limx, inx dyrr e horsiong sanxsingx jinjniar ee aiwjingg. Jitt tiab aiwjingg viwhngx si he dirr ISOLDE lingbuw hiax, lingbuw beh ham' ISOLDE jywhuew kir MARK Ongg hiax. Lingbuw jit xe srid qakcad, TRISTAN/ ISOLDE iwgua limx lyc aiwjing'iyc, inx zinruii hex si poxtongx ee jiuw, suacc sui' hro duiwhongx ee air soxx jiamwiuw, qisit, inx jaw dyrr horsiong iwair ar, jixsirr jurqiw m jaix ziiw, jitt tiab aiwiyc jixvutqyr diamxdyc inx jaw dyrr junjai ee aiwjinghuew, zimrhylangg dy' e qir did jurqiw siauwlenn bad u luirsu ee qamxqag.
Ui' sujingg sizinn ee quandiamw, bunrdee cud dirr MARK Ongg/ ISOLDE nng langg, suibongw beh qethunx ar, danrsi byy jinjniar kurvi aiwjingg ee diauqnia, simrjiww byy knuar quer duiwhongx. Jinjniar ee hun'inx rair erdangr zinrbad diyc, jurqiw ham' duiwhongx si ittew ee. Sneliw ee qethap jixvutqyr si kingxding jitt jann iwgi ee singwlew. Hun'inx berdangr qra jitt ngg hxang dendyxvingw, singx ui' sneliw ee hingwcur kaisiw, jaiww tesingx qaur jingsinn jancur, si byy kyxlingg :ee. Rair ui' air ee jingsinlat kaisiw --- dyrr si AMOR.
B: Qidog qongw “simliw ee tongqanjiaw” si simliw/ simlingg tongxid jongrtair ee pywhai.
J: hun'inx narr m si iu' simx anvaii, si siarhue laii anvaii, dyrr sngr simlingg jongrtair ee pywhai. Hex dyrr si diongsewqiw qongdingg aiwjingg hro langg ee qamxqag, ham' dongsii qauwhue ee taiwdo uanjuann byy qang. Aiwjingg (AMOR) jitt xee zri ui' aurbin siaw quer laii si ROMA, dyrr si ROMA ee tenjuxqauwhue, zinruii hun'inx kurvi jingwdi/ siarhue ee vunxjid. Aurlaii jiacc u qiongdiau qywzinn suanxdik ee habhuatsingr ee huanxdong unrdong cuthen. Guaw qra hyrjyr junjiaur liw ee didqag.
Jex dongzenn marr u huihiamxsingr. Dirr TRISTAN ee longrbanrsuw, jitt duir siauwlenlangg ixqingx juiwbee dirr aiwjing'iyc-lai, lingbuw marr huathen m driyc ngiu, jauw kir cue TRISTAN qongw “liw ixqingx lim lyc sixbongg”, “guaw ee sixqii, liw jriw :ee si, aiwjingg ee kow?” TRISTAN rinr, --- jiax si qowsu juxiaur diongrdiamw ji' id, luan'air-diongx :ee ingwqaix qamxqag diyc aiwjingg ee vnertair jiacc diryc. In'ui jit xee langg iauxx bue qinglik diyc ham' duiwhongx ittew ee qamxqag, si byy vanrhuad dirr jitt xee sewqair did diyc uanjuann buanxjiog ee.
TRISTAN suar lyc qongw “zuqyw liw qongw guaw e siw. kir ee iwsur si, duer diyc aiwjingg laii :ee, qik dua tongwkow, anne hex dyrr si guaw ee sing'uac. Zuqyw liw ee iwsur si, dirr dairjir henx cud laii ar, guaw e siurr diyc jikhuat, anne guaw e jiapsiu. Zuqyw liw ee iwsur jriw, dirr dergak lenrhuew-diongx ingxuanw ee cuxhuat, guaw marr jiapsiu.” jex jinjniar si giamdiong ee dairjir.
B: duiww diongsewqiw ee tenjuxqauwdoo laii qongw, inx siongsinr u jit xee kurtew ee dergak junjai. Narr anne, TRISTAN jitt dnxua ue ee diongriauwsingr dirr dyhh?
J: duiww ix laii qongw, aiwjingg viw siw/ tongwkow/ zimrhyy dairjir qyckacc diongrdua ee su. Jex si kingxding zinsingx tongwkow ee uixdai hongsid.
B: ix gamguan suanw air ee tongwkow, m quanw duer laii :ee si, ingxuanw byy tingjiw ee kow/ ingxqiuw dergak ee kenxjig.
J: zimrhyy duer diyc didqag soxx suanw ee jitgiap, dy' qaix kuriuw jitt jiongw jingsinn. Dyrr si qongw, byy langg erdangr qra guaw jurr jitt xee suanxdik hnaw jauw. Bylun huatsingx sniaw, jex dy' si duiww guaw snewmia/ hing'uii ee kingxding.
B: suanxdik aiwjingg marr qang?
J: si ar, aiwjingg ee suanxdik marr siyqang.
B: liw bad siaw quer duiww dergak ee knuawhuad, cniurr tendongg hitt ngiu. Dirr liw qaur hiax au, liw e jaix hiax si siongrr sikhap liw ee soxjai, si liw juewau beh kir ee xui.
J: Hex si G. BERNARD SHAW (1856-1950) ee quandiamw, sidjer-siong marr si DANTE (1265-1321) ee quandiamw. Dergak ee dinghuat si liw zinruii ingxqiuw ee henrser.
B: TRISTAN beh air ix ee aiwjingg/ beh air ix ee qamxqag, marr guanrir uirr jex sriu kow.
JIURR HUN'INX, DERGAK EE LENRHUEW SI HUANLOK :EE
J: byy cyr! W. BLAKE (1757-1827) dirr <Tendongg Dergak ee Hun'inx (THE MARRIAGE OF HEAVEN AND HELL)> anne siaw “ dng' guaw qniaa quer dergak-huew sii ... jiaxee huew duiww tnisair laii qongw si qik dua ee buatuax.” ngua jit qxur qongw, duiww hiaxee dirr dergak-lai (m si tnisair) ee langg, lenrhuew vingrr m si kow :ee, si huanlok ee huew.
B: guaw e qir did dirr DANTE <Sinn Kxig (DIVINE COMEDY)> ee “lenrqnax”, DANTE dirr dergak jauxcue ligsuw-siong uixdai jingzinn, singx knaur diyc HELEN, qycc knaur diyc CLEOPATRA, suar lyc laii knuar diyc TRISTAN, qamxx u sniaw diongriauwsingr?
J: DANTE ixx qauwhue ee quandiamw cuthuad, inx srinx jairr dergak sriu jin jetbuaa. E qir did hnor? Ix marr knuar diyc nng xee laijurr qang sidai ee ITALY siauwlenlangg --- FRANCESCA qapp ix ee siyxjig PAOLO, inx nng langg sanxsingx liauw aiwjingg, DANTE qig jit xee siarhuerhagqax ee juser qongw “cinair :ee, jex si jnuaxngiu huatsingx :ee? Si sniaw guan'inx jyrsingg :ee?”
Qycc laii si Sinn Kxig siongrr u miaa ee jit dnxua, FRANCESCA qongw, PAOLO ham' ix jre dirr huehngg jit jangg ciu-kax, tak diyc LANCELOT/ GUINEVERE ee qowsu, “dng' gunw tak diyc inx derr id vaiw siy' jimx sii, gunw horsiong siongr duiwhongx, hitt zit, gunw jnuaxngiu dyrr byy hxuad tak zimrhyy mic lor.” hex dyrr si inx kaisiw duirlyc ar.
Jitt jiongw bixbiau qinggiam kiokk virr kenxjig jyr guanjue, sujingg sizinn soxx huanxduir :ee dyrr si jitt jiongw qongxhuad. Aiwjingg si snewmia siongrr quann diamw/ snewmia ee iwgi.
B: jex qamxx m si WAGNER dirr uixdai quaqiok TRISTAN qapp ISOLDE soxx qongw :ee “ hro guaw dirr jitt sewqanx iongxiuw jurqiw ee tende, bylun si virr pah zip dergak iacc si virr qiuwsiok.”
J: byy cyr! Si TRISTAN qongw :ee.
B: iwsur si, beh guaw ee aiwjingg/ beh guaw ee sing'uac.
J: jex jiacc si guaw beh air ee sing'uac, guaw guanrir uirr jex huwcud zimrhyy dairger.
B: su'iaur quaw iongxkir, qamxx m si?
J: qamxx qongw m si? Dyrr sngr qandna' liamrtauu dinxdang .jit .xe?
B: qamxx qongw m si? Liw iong :ee si henrjairsid.
J: byy m driyc!
B: dirr henrdai siarhue marr si anne?
J: si lar.
KAISIW U LONGRBAN SNIURHUAD
B: liw qongw diyc qoxdai aiwjingg senhongjiaw ee knuawhuad, beh jyr jurgnow sidhen ee juxlangg, quatding jurgnow sidjen ee hongsid, dongsii inx marr liauxqaiw aiwjingg si dairjurzenn siongrr junquir ee sanxbut, ui' inx jursinx texgiam-diongx did diyc diwhui, m si tauwquer qauwdiauu/ jingwkuann/ zimrhyy henriuw ee siarhue qong'ig qaiwliam did diyc. Jex si m si sehongx tuantongw qra surbut qaux qaur qywzinn vunxlangg/ si longrban sniurhuad ee kixguann?
J: juadduir si anne. Danghongx bunhuar marr erdangr huathen jit quaw luirsu ee le, vingrr byy huatdenw jniajyr jewdorhuar ee siarhue hertongw. Jitt jiongw qaiwliam dirr sehongx sewqair ixqingx jniajyr lixsiongxhuar ee aiwjingg.
B: dyrr si ui' jurqiw texgiam did diyc ee aiwjingg? Jiong' jurgnow texgiam jywuii diwhui ee jnuaguann, qamxx si?
J: byy cry! Hex dyrr si soxui qywtew. Sehongx tuantongw siongrr dinquir :ee, si singzin/ jundiong muixx jit xee langg si uac lingr lingr ee sidtew. Siarhue qonglingg si beh vue'iongw qywtew, vingrr m si ixx qywtew laii ji'uan siarhue.
B: zuqyw si anne ee ue, siarhue-siong jit quaw qongqiong tuantew venwsingg jnuaxngiu? Cniurr dairhak/ qongsix/ qauwhue/ jingwdi qiqor --- zuqyw muixx jit xee langg uirr jauxcue jurqiw ee aiwjingg? Jex qidiongx qamxx junjai ciongtut? Qywzinn/ siarhue ee duiwlip? Itding rair u sikdongx ee qaiwhan laii hanrjer qywzinn duer diyc didqag/ singwiok/ iogbang/ aiwjingg/ ciongdong jyr dairjir ee huanruii --- narr byy, dyrr e sanxsingx siarhue vut'anx/ naurdong/ simrjiww byjingwhuw jongrtair, suacc e hro jit xee qongqiong tuantew dirr jitt jiongw jinghongw-ha, byy hxuad junuac lyc laii. Liw jinjniar zinruii bylun e diwsuw sniaw qetqyw, lanw dy' qaix duisuii jurqiw ee didqag/ aiwjingg?
J: liw rair iong liw ee taukag, u langg qongw, jit diauu ec bih bih ee lo si huisiongg huihiamw ee dyrlo --- cniurr tiwtaudyx ee dybah.
B: anne, taukag/ simx qamxx m si suacc duiwlip kiw laii?
J: m si, tauu/ simx horsiong qaix si vyxcii habjog quanhe, taunauw rair suisii vyxcii cingcnew, vutquanxsii simx qaix mng taunauw.
B: qamxx e u simx inxdy taunauw ee sihau?
J: erdangr anne, dysor sijun si siongrr lixsiongw :ee. Diongsewqiw kisu go-bixdig, erdangr unriong dirr jiax, si jetiok/ iongxkir/ air/ hin/ diongsingg/ lexgii. Lexgii si jundiong sing'uac-diongx siarhue qauwquix.
AIWJINGG RAIR HAM' QITNAX SURBUT QIONGRJUNN
B: anne qongw, aiwjingg vingrr berdangr dandok junjai, rair ham' qitnax surbut qiongrjunn.
J: air si siarhue jerje qonglingg ji'id. Iwdoo ixx moxjiongw qonglingg kongwjer jingxqyy hertongw ee, m si vangjan qenwlip hertongw ee dedsu, si e jyrsingg siarhue siauxqongg cywluan ee. Dirr diongsewqiw sidai, suibongw sujingg sizinn huanxkongr qauwhue ee uikuann, mrqyxx marr jundiong inx sing'uac ee siarhue, inx soxx jyr ee muixx jit qnia dairjir dy' rair qinqir siarhue quijig. Nng xee buxsu duiwdin si uirr dyrdig jnevniar, m si pywhai qaujenr quijig. Jitt hxang lexgii rair qir diauu ~.
B: dongsii qamxx u huatlut quijig? Aiwjingg quijig neh? Vixzu qongw, duiww tongqanx qamxx u quihuan? Dirr hitt xee sidai zuqyw jit xee langg bagsinn m si ham' kanciuw sna' jiapciog, jitt xee langg e jnuaxngiu huanxingr?
J: hex si qongdingsid aiwjingg quanhe ee kaisiw, kaksit u iuhir quijig, dag'ee dy' qinqir quijig laii sngw. Hiaxee langg u jit tyr jurqiw byy sriok qauwhue ee hertongw, si uirr erdangr hyhaii, did diyc anwsngr e diyc ee qetqyw. Soxx jyr :ee muixx jit hxang dy' u jit tyr quihuan ee quijig, siaw cingcyw dairjir qaix anxjnuaw jyr, jiacc erdangr jyr hyxser ... dringw. U langg qongw, soxui gersut si jiong' surbut venr kacc hyw. Dirr aiwjinggg ko'aw, liw kyxlingg vun-kax-vun-ciuw, danrsi narr beh erdangr jiangxag mow quaw hro qamxjingg viauxdat qyckacc sunrli/ buanxjiog ee quijig, qamxx m si kacc hyw?
B: incuw duer diyc kisu jingsinn ee singdiongw, longrbanrsid aiwjingg marr siwqer koksanr.
J: guaw zinruii nng hxang si qang jit huesu. Dongsii si jit xee jin' qiquair ee sidai, itcer dy' huisiongg jankog/ iaxbann, byy diong'iongx ludhuad, muixx jit xee langg diyh'air kyr jurqiw, muixx jit hxang dairjir kyxlingg virr langg' cimhuan. Danrsi, janvok ee kuanqingw, u jit qrow bunbingg ee lat, luxzinn si jitt qrow lat ee diongtiau/ inx qenwlip liauw aiwjingg iuhir quijig, javox rair qinqir luxsingr iauqiuu ee aiwjingg iuhir.
UNZIUU AMWSI JUVIX
B: luxzinn zuhyy jiangxag ji'puewsingr ee ingxhiongxlat?
J: zuqyw jit xee javox dang liauw liamrtauu beh ham' jit xee luxzinn qauhap, luxsingr dyrr kia quann bin ar. Luxzinn niudo jurqiw hro jit xee javox, juangiap ee qongxhuad si “linbinw”, luxzinn huwcud linbinw, kyxlingg si unxjunw duiqiujiaw dirr singwlingg qangwlimzit (WHITSUNTIDE, qyc'uahjed au derr cid xee lexvaiwzit, hanwbunnvanw juwqaiw.) jimx ix ee amrqunw... dringw luirsu ee su, iacc si jit vaiw huwcud juanvo ee air, hex rair knuar ix vingqow haursuanxzinn qywsingr ee qetqyw laii dring.
B: anne qongw, si u quijig laii quatding cikcir qetqyw lor?
J: byy cyr! Zircniaw u jit hxang qivunw iauqiuu, si haursuanxzinn rair u unziuu ee simx/ u linglik air langg' ee simx, vutjixsirr ciongbuanw iogbang ee simx. Luxsingr erdangr cikgiam cud qingwjingx air ee haursuanxzinn, si m si jinjniar u unziuu ee simx/ u air langg ee linglik.
Dongsii, in'ui jiaxee siokluw longxx si quiwjok cutsinx, inx bylun viauxhen jankog/ unziuu ee singwqeh sii, huisiongg quanwlen/ ciuxuanw jin' gauu. Guaw byy zinruii henrdai u vanrhuad cikgiam jit xee langg ee simx, si m si kuriuw unziuu ee kiwjid/ simrjiww byy zinruii muixx jit xee langg dy' u unziusimx ee lixsiongw si qongw e tongx :ee.
B: duiww liw laii qongw, unziusimx ee qaiwliam amwsi liauw sniaw?
J: viauxsi jit xee langg u linglik kir --- mr, beh anxjnuaw qongw? quanqenr ee zri si juvix.
B: iwsur si ?
J: jywhuew sriu kow. Juvix (COMPASSION) jitt zri aurvnuar zri si “zedjingg (PASSION)”, “siurkow” ee iwsur, jingvnuar zri “COM” , si “ham ... jywhuew” ee iwsur. Dikbunn laii qaixsueh qyckacc cingcyw : MITLEID, MIT si “qapp”, LEID si “koxlan/ siurkow” ee iwsur. Aiwjingg cikgiam dirr vunxjid-siong si rair kakding, jitt xee lamsingr e uirr air zimxsiu itcer, m si uirr jingiok jiacc anne.
B: Joseph, jitt jiongw aiwjingg cikgiam suibongw huatguann jurr sujingg sizinn sidai, 1950 nidai jaxqii iuguann dirr TEXAS dangvo liuhingg.
J: hex si aiwjingg quandiamw ee lat. Laijurr jap-zi sewqiw FRANCE danglamsingw, dirr zi-jap sewqiw ee TEXAS qycc knuar e diyc.
B: qinrnii laii marr m si hiacc liuhingg ar. Guaw ee iwsur si, byy kakding ham' guansiw aiwjingg cikgiam qycc u zuarr je si qangrkuanw :ee. Guaw qac'ir jitt jiongw ciwgiam --- kyxlingg, guaw byy kakding ...
J: u quaw ciwgiam e hro jit xee siaulenqex kir vyxue jit jxy qiyy, dirr moxjiongw tingdo-siong, diongsewqiw ee qautongx suacc hro jiaxee siauwlenqex joxgai be dinxdang. U ee cikgiam si giac cingr siyjenr. Jit xee byy zimrhyy quijig, byy dong'ir huwcud jurqiw jingg, dyrr qiyr haursuanxzinn jyr snewmia morhiamw ee luxzinn, e virr zinruii si iaxbanlangg; jit xee byy qingquer zimrhyy cikgiam dyrr huwcud jurqiw ee luxzinn, marr e virr zinruii si birkaihuar :ee. Hex si jit jiongw be baiw ee simliw vingqow iuhir.
B: sujingg sizinn ee bogviaux m si beh qaixduu hun'inx/ siarhue hnor? Inx m si beh siauduu singwhing'uii/ iogbang/ qiamxduu siongrder ee jingsinn? liw bad anne siaw “qongw qyckacc sikdongr .quaw, inx didjiab taur quer air ee cikgiam laii ylyw snewmia, inx zinruii aiwjingg si jit qrow tongquer ganwjuiw ee singhuaa ligliong, jiong' jurqiw ee simhingx pah kuix, jiapsiu sngx-dnix-kow-lruac ee snewmia, si jit xee langg jurgnow jybun/ huanlok.” inx m si beh pywhai banrsu banrbut hnor?
UIRR HITT XEE DIGDING LUXZINN EE AIR
J: m si, liw rair bingvik, sanxsingx jitt qrow lat ee dongrqix m si dirr inx srinx-siong, si jit jiongw qikhuad qywzinn kir texgiam/ tesingx jurgnow ee dongrqix, hex si uanjuann byy qang :ee. Inx vingrr byy didjiab qongqig qauwhue, si jiong' snewmia tesingx qaur jit jiongw jingsinn texgiam ee jancur.
B: aiwjingg dirr guaw ee binrtaujingg. AMOR si denxhen dirr ganxjingg ee dyrlo, bagjiux ...
J: --- bagsinn qaujiab, dyrr si hitt jiongw qaiwliam. “air ui' bagjiux, dag diyc simx, bagjiux si simx ee quancatjiaw.”
B: sujingg sizinn duiww PSYCHE (HELLENE/ ROMA sinue ee linghunn zinqechuar, ciangjai huawsinx jyr u sxit buexiac-aw bixluw, si EROS ee aiwzinn) jaix quaw sniaw? Dag'ee dy' tniax quer iuxquanx PSYCHE ee qowsu --- EROS air diyc PSYCHE --- dnaxx dag'ee dy' erdangr jiapsiu, lanw rair liauxqaiw jurqiw simliw ee qongxhuad. Sujingg sizinn duiww zinlui ee linghunn jaix zuarr je?
J: inx huathen jit xee byy hxuad iong itvnuasingr gixgenn viauxdat ee qywvet linghunn binrbak. Qywzinn ee texgiam/ duiww jurqiw jitt xee texgiam ee zinrdongqamw/ qycc rngiuu zip jitt xee texgiam-diongx ... dringw, longxx si iuxquanx linghunn qywtew binrmau ee jit quaw diongrdiamw.
B: jiax qongw ee aiwjingg, jriw :ee m si huanwhuanr ee aiwjingg, si duiww mow digding luxsingr ee air?
J: si uirr hitt xee digding ee luxsingr.
B: liw zinruii uirsniaxmic lanw e air diyc mow jit xee digding :ee, m si qitnax langg ?
J: guaw byy jiacc kingxding. Aiwjingg si jit qnia jin' ywvir ee dairjir. Singx si huatcud denrpyx, qycc laii e u qik dua ee tongwkow, sujingg sizinn ylyw air ee kow/ isux byy hxuad dri :ee, jixu guanlaii sionghai ix ee buxkir jiacc erdangr dri hyw.
B: iwsur si?
J: si guaw ee zedjingg jyrsingg jitt xee siongkauw, si guaw duiww jitt xee digding qywzinn ee air, sanxsingx jitt xee qik dua ee kow. Ui'id erdangr rix hyw siongkauw :ee, si kuix cingr ee langg. Jitt qix jewjy siongkauw ee cingr, ixx siongrdingsingr hingtair cuthen dirr jerje diongsewqiw qowsu ee aiwjingg dongrqix. Jixu cingwcuir jaiww jiapciog siongkauw sii, jiacc e dri hyw aiwjingg congwsiongx.
SINGWVUEX TUANQII
B: singwvuex ee tuansuad, qamxx m si u luirsu ee qaiwliam?
J: jitt xee siudyrngi-vanw ee qowsu, singwvuex ham' Qidog ee zedjingg iuxquanx, si juewau amwdngr ee singwcanvuex, marr si Iasox jurr sibzirqer virr tauw lyc laii sii, jriab ix hueh ee singwvuex.
B: singwvuex dauwdew dairviauw sniaw?
J: iuxquanx singwvuex laiguann u jit dnxua jin' u iwsur ee qongxhuad. Jit xui jaxqii siaw qowsu :ee qongw, singwvuex si ui' dionglip tensair jurr tendongg jah laii :ee, tendongg hitt jit dniuu, siongrder ham' SATAN sxen-og dairjenr, u quaw tensair kia dirr SATAN hitt vingg, uree kia dirr siongrder jitt vingg.
Singwvuex si iu' hitt xee dionglip ee tensair jah laii sewqanx ee, dairviauw zi-cuwguann duiwlip, si qniax/ iogbang, sxen-og jiqanx jit diauu simlingg tongdy.
Singwvuex tuanqii ee juxdee si qongw toxde/ qokqax/ jingxqyy zinlui quanhuaii ee lingxhik dy' ixqingx virr hnghuir danr jit vnix, hyrjyr hngvox. cnevox ee guancox qycc si sniaw ngiu? Sing'uac dirr hngde ee langg quer diyc jit jiongw byy jinsit ee sing'uac, si langg' anxjnuaw jyr, liw duer lehh jyr, langg qiyr liw jnuaxngiu jyr, liw jiauww jyr, kiokk byy iongxkir quer jurqiw beh air ee sing'uac, hex dyrr si hnghuiwde, duxx si ELIOT dirr ix ligsuw dngg six “hngvox” soxx qongw ee iwsur.
Dirr hngde, surbut ee viauxsiong byy hxuad dairviauw luerjai jinsit, dirr jiax sing'uac ee langg qyckacc si quer diyc byy jinsit ee sing'uac. “guaw itsingx jurlaii byy jyr quer guaw beh jyr :ee, itdit si jiauww langg' beh guaw jyr :ee kir jyr.” liw qamxx erdangr liauxqaiw?
B: singwvuex jniajyr sniaw ...?
J: singwvuex dyrr jniajyr --- qaix anxjnuaw qongw? Singwvuex dairviauw jiauww jurqiw hongsid sing'uac ee langg soxx liauxqaiw/ drat qaur ee jinsit, dairviauw zinlui sidjenr iwsig jongrtair siongrr quann jingsinn amwlat.
Vixzu qongw, singwvuex ongg si jit xee qoxjiux ee siawlenlangg, jitt xee tauhamm m si ix jurqiw ngiaa diyc ee. U jit zit, ix ui' sniavyw kiaa bew cud laii, dua sniax huachiux “AMOR”. Siauwlenlangg dongzenn erdangr anne huah, mrqyxx jitt jiongw hing'uii byy sikhap singwvuex qamwhorzinn ee sinhun. Dng' ix kiaa hiongr jingg sii, u jit xui dongsii virr dongwjyr penqig hueqauwdoo, ui' ciurnaa kiaa bew ciongx cud laii. Inx nng langg dy' jiong' jurqiw ee dngg cingr siongwjingx duiwhongx, singwvuex ongg ee dngg cingr taii siw irqauwdoo, irqaurdoo dirr siw jingg, qibsii jiong' singwvuex ongg iamx driau.
Jitt xee qowsu ee iwgi, diamw cud Qidokqaur jiong' dairjir/ linghunn hunli, snewmia ee uahdang/ simlingg ee linghik tiah kuix, jurzenn/ ciaujurzenn ee undenw vunlii. Qidokaur jiong' dairjurzenn jinjinar iamx quah ar. Aujiux bunhuar ee linghunn/ sing'uac marr incuw virr iamx ar. Laijurr surbut/ simlingg qethap ee jinjniar lingsingr ixqingx virr mosad! Irqauwdoo qycc viauxsi sniaw? Ix laijurr EDEN Hngg qaugua, virr knuawjyr jit xui jurzenzinn, ix ee dngg cingr kig “singwvuex”, jriw dairjurzenn dairviauw singwvuex vunxsinx. Simlingg sing'uac si zinlui snewmia ee jit dniuu dua enwhue, si snewmia ee pangx iujingx/ zinsingr sing'uac kuix huex qetqyw qapp sidjenr, m si tiap dirr dingxbin ciaujurzenn ee bixdig.
Jinsit ee snewmia si dairjurzenn ee cuanxkuir, m si laijurr ciaujurzenn uikuann ee quihuan --- si singwvuex unxhamm ee iwbi.
B; jex qamxx si THOMAS MANN qongw diyc zinlui siongrr jongqyx cutdiyh ee iwsur? Zinlui qethap liauw jurzenn/ linghunn ee congwjy.
J: byy cyr!
B: jurzenn/ linghunn itdit snah qriuu ham' jitt jiongw qinggiam sna' duw. Jiaxee longrban tuanqii beh jauxcue singwvuex, si jitt nng xee hunlii surbut jaiww qethap ee siongrdingx, dongsii marr dairviauw qethap soxx duar laii ee hyvingg.
QIKJINGG UI' VOGLIK LAII
B: Qamxx m si qikjingg ee longrban?
J: m si, qikjingg si ui' voglik sanxsingx :ee, m si qenrkongx ee viauxdat hongsid.
B: liw duiww longrbanrsid aiwjingg ee knuawhuad zuhyy? Duiww lanw qywzinn u sniaw iwgi?
J: jex qra lanw qongw, zinlui uac dirr nng xee byy qang ee sewqair, jit xee si lanw jurqiw ee sing'uac sewqair, lingrgua jit xee si guarjai siarhue jixding hro lanw ee sing'uac hongsid. Diongriaur ee kywdee si zuhyy uicii nng vingg hyhaii quanhe. Lanw laii qaur sewqair, dongzenn rair ixx jitt xee siarhue jyr qicow laii sing'uac, byy anne jyr, e jin' hamwqow, naxx byy jinjniar uac lehh. Dongsii jit xee langg qycc berdangr hro siarhue qamwdog ix ee sing'uac, muixx jit xee langg dy' rair u jurqiw jit tyr qewdat hertongw, u sii kyxlingg ham' siarhue duiww qywzinn ee qitai ciongtut, byy hro siarhue laii jiapsiu. Mrqyxx snewmia iauwqinw :ee, si uac dirr jinjniar jicii liw ee siarhue huandiuu-lai.
Jitt sii dyrr e cuthen bunrdee --- ixx jenwjingx siqii jyr le, virr diaur zibgnow ee siauwlenlangg, rair binrduir jit hxang dua quatding: siarhue iauqiuu liw jyr ee dairjir, liw erdangr jyr qaur sniaw tingdo? Cniurr taii siw liw byy siybad ee cnehunrlangg, uirsniaxmic? Jitt lui ee dairjir huisiongg suxx langg gignaiw.
B: jex dyrr si lanw qongw .quer :ee, zuqyw siarhue ee muixx jit liap simx si vut'anx :ee, muixx jit duir bagjiux si pupiyr ee, jitt xee siarhue dy' byy hxuad junjai.
J: hex dongzenn, danrsi liw qamxx jaix u quaw siarhue si byy vit'iaur junjai :ee?
B: inx jaxban e ---
J: --- inx e jurqiw uaxqaiw.
B: sujingg sizinn huntiah liauw qu siarhue.
J: guaw byy zinruii si inx qra qu siarhue qaixtew.
B: qamxx si aiwjingg?
J: si aiwjingg byy cyr! Danrsi ham' sujingg sizinn si qang jit huesu. Jiurr mow xee iwgi qongw, MARTIN LUTHER si jit xui Qidog ee sujingg sizinn, duiww zuhyy jiacc sngr si sinjid zinguann, u ix jurqiw ee sniurhuad, jex jinjniar si vangvai driau jingxqyy diongqow sewqiw qauwhue, qycc ingxuanw byy hxuad jaiww kuehok guanjong.
Liw jaix, sukyw Qidokqaur ee ligsuw si huisiongg simsig :ee. Siongrr jaw ee go sewqiw, u jerje qidokdoo/ u jerje byy qang hingtair ee Qidokqaur. Qaur derr sir sewqiw ee THEODOSIUS siqii, ROMA Dewqog ui'id habhuad jongqaur dyrr si Qidokqaur, ui'id virr unxjunw ee Qidokqaur hingtair, jixu BYZANTINE ee Qidokqaur. Dongsii pywhai irqaur qauwdngg qoxjig ee tingdo, dirr sewqair ligsuw-siong jin' lann jaiww cue diyc luirsu ee le ar.
B: iu' qauwhue jojid pywhai?
J: qauwhue jojid cud ciuw pywhai. Uirsniaxmic qidokdoo berdangr ham' qitnax jongqaur qiongrjunn? Inx u sniaw bunrdee?
B: liw zinruii neh?
KUANLIK CIONGDONG SI AUJIUX LIGSUW SIONGRR QIVUNW :EE
J: si kuanlik, si kuanlik! Guaw zinruii duiww kuanlik ee ciongdong, si Aujiux ligsuw siongrr qivunw :ee, qycc cimhuan liauw lanw jongqaur tuantongw.
Quanhe singwvuex ee tuansuad u jit diamw jin' cuwbi. Jiaxee tuansuad si dirr Aujiux u Qidokqaur go-vah dxangx au jiacc cuthen. Dairviauw nng xee tuantongw ee ionghap. Dairiog dirr jap-zi sewqiw buexqii, FLORIS siudyrngi ngirdniuw JOACHIM siaw liauw linghunn snax xee sidai. Ix qongw, zinlui jurr EDEN Hngg duirlyc au, siongrder uirr voxqiur jitt xee jaieh, qra linghunn guanjig dingsinx inxzip ligsuw-diongx, suanw liauw jit xee binjok jyr qautongx qangqu, jex si tnive/ ISREAL ee sidai. Zenau dirr jitt xee binjok jniajyr tuandy binjok au, dyrr erdangr jniajyr siongrder huawjyr bacsinx ee qesix, anne, u singwjuw ee cutsir, linghunn derr zi xee sidai si singwjuw/ qauwhue ee sidai. Jitt sii jingxqyy zinlui, m si dan'id jingxjok, dy' jiapsiu diyc siongrder jingsinn iwjir soxx tuann cud ee sinwsid.
Derr snax sidai si didjiab ham' qywzinn qautongx ee singwlingg sidai, qinqir 1206 nii jitt xee dethagqax qongw :ee, dongsii duxx si singwlingg sidai kaisiw sihau. Zimrhylangg jixiaur erdangr jiong' sinn ee bingrling iongzip/ cua zip jurqiw ee snewmia-diongx, dyrr ham' Iasox uanjuann siyqang. Jex si derr snax sidai ee iwgi. Qauwhue jojid qra ISRAEL dongwjyr quewkir ar, qauwhue jojid marr hro jitt jiongw qywzinn ee texgiam knuawjyr quewsii ee jewdo.
Linghunn derr snax sidai inxkiw jit dua dxuix unxsu bih zip ciurnaa jyr lisewqox jiapsiu texgiam. Derr id xee virr zinrding dairviauw jitt xee unrdong ee singwded si ASSISI, ST. FRANCIS, dairviauw liauw Qidog huawsinx, si singwlingg dirr budliw sewqair ee henxhen.
Jex si jauxcue singwvuex vuerau ee qowsu. Sunqiuu singwvuex ee ngidyh buxsu GALAHAD, ham' Qidog byy cavet. Dirr singwlingg qangwlimjed (PENTECOST) ee enwhue, GALAHAD cing iamrangsig jenwqah, virr cua qaur AUTHUR ee hongqiongx. Jitt xee jetbok si singwlingg ixx huew ee hingsid qangwlimm qaur suxdoo ee dua enwhue. Liw jaix, lanw muixx jit xee langg dy' kyxlingg jniajyr GALAHAD, si GNOSTIC duiww Qidokqaur ee libdniuu. Ui' THEODORUS sidai draii dirr derha ee GNOSTICS juliau, lanw erdangr did diyc jitt jiongw sniurhuad.
Qinqir GNOSTICS ee THOMAS hok'imx, Iasox bad qongw “ ui' guaw cuir jiac :ee, jiong' jniajyr guaw, guaw marr e jniajyr ix.” jex dyrr si unxqamm dirr singwvuex hiaxee longrbanrqow ee qaiwliam.
B: liw qongw, jap-zi ~ jap-snax sewqiw, si zinlui qamxjingg/ jingsinn iwsig siongrr diongriaur venwhuar qaidnua ji' id, marr si viauxhen cud sinx texgiam aiwjingg hongsid sidai.
J: si.
HUN'INX M SI LUAN'AIR
B: jex ham' ciauuat zinlui qamxjingg ee sinjid zinguann juanjewjuxgi si siy' duiwlip :ee. In'ui sinjid zinguann iauqiuu lanw, digvet si siauwlenn jaboxginxaw, ham' qauwdngg/ verbuw jixding ee duiwsiong qethunx. Jex duiww simlingg ee qamxjingg jyrsingg jnuaxngiu ee ingxhiongw?
J: guaw singx duiww lingrgua jit vorhun huedab. Lanw rair zinrdix diyc, dyrr sngr muailangg kansingg ee hun'inx, angbow qadingg sing'uac marr erdangr vue'iongw cud air ee quanhe. Ngua jit qxur ue, dirr jitt jiongw qingquer anvaii ee hun'inx, si u jerje aiwjingg junjai :ee, qadingg ee air, si duiww snewmia honghur ee air. Danrsi kiokk byy hxuad did diyc lingrgua jit vorhun, zinrdongg lingrgua jit vnuar linghunn soxx cua cud laii, e hib langg hinn-gongg ee aiwjingg qamxqag, jex si sujingg sizinn soxx iauqiuu :ee, marr si lanw henrdai lixsiongw ee aiwjingg.
Mrqyxx liw jaix, hun'inx dyrr si huninx, m si luan'air, si uanjuann byy qang ee nng huesu. Hun'inx si duiww liw jurqiw jitt siwlangg ee singlok, ham' liw hun'inx dauwdin :ee, sidjer si liw lingrgua jit vnuar, dairviauw liw duiww jurqiw itsingx siongrr juxiaur ee quanhuaii, linw si ittew :ee, narr m si anne, liw dingxii byy qethunx. Luan'air m si anne, si duiqiuu kuaiwlok hiangxsiu ee quanhe, dng' venr qaxx byy kuaiwlok sii, quanhe dyrr qetsog ar.
ANGBOW DAGG ZIT DECC AIR QYCC LIONGRJINGG
B: longrban ee qamxjingg qamxx e dirr hun'inx qewsiok?
J: mow quaw hun'inx si anne, qitnax :ee m si. Sujingg sizinn tuantongw ee dua bunrdee dirr inx duiww “driongx” ee iauqiuu.
B: liw qongw ee “driongx” si sniaw iwsur?
J: byy kipenr/ byy venwjid/ bylun qingquer jnuaxngiu ee ciwlen qapp koxlan, dy' vyxcii jinrjingg.
B: cingqauwdoo knuar hun'inx jyr “qauwhue-lai ee siyw qauwhue”. Dirr hun'inx-diongx, lanw dagg zit decc air/ decc liongrqaiw, si air qapp kuansur itdit vutduan jinwhingg ee singwlew.
J: guaw sniu henrsit sewqair, “koxlan” jiacc si hun'inx ee jinjniar iwgi, qywzinn qamguan hogjiongg viw jurqiw qyckacc quann ee surbut. Jinjniar ee hun'inx sing'uac/ luanjingg, ingwqaix si anne ee quanhe, henrdai marr rair anne jiacc driyc. Liw qamxx liauxqaiw guaw qongw ee iwsur?
B: byy, jitt diamw guaw byy liauxqaiw.
J: cniurr ximx-xiongg ee siongrdingx, guaw si xiongg, kanciuw si ximx, im'iongg si gunw nng xee. dng' guaw rair hisingx sii, guaw m si uirr kanciuw hisingx, guaw si uirr im'iongg jitt xee quanhe laii hisingx, vyr uansiuu si uanjuann hud m driyc duiwsiong ar. Snewmia dirr jitt jiongw quanhe, liw jitmaw cuanxkuir ee soxjai, hun'inx dyrr si anne. Luan'air, jixiaur nng langg erdangr puewhap, moxjiongw uirr duiwhongx uac ee quanhe, marr erdangr uicii jit dnxua siqanx.
B: sinsingr hunx'inx, taur quer siongrder qethap jniajyr jingxtew, byy kyxlingg virr zinlui tiacsnuar?
J: jex jixsirr kaisiw, hun'inx qra jitt jiongw sinn-guaw ittew ee quanhe, dingsinx jyr liauw siongrdingsingr ee juwqaiw.
B: jixsirr kaisiw?
J: hun'inx si duiww zinlui lxamm-luw qang guantauu vunxjid ee siongrdingsingr zinrdix.
TIRESIAS TUANSUAD
B: liw qamxx jaix iuxquanx cnemee sendix TIRESIAS qoxlyw ee tuansuad?
J: hex si jit xee uixdai ee qowsu. TIRESIAS u jit zit qniaa quer ciurnaa, knuar diyc nng jiah dngdecc qaubuew ee juaa. Ix qra qnuaw-aw he dirr inx ji' qranx, venr cud jit xee luxzinn. Zenau, jitt xee luxzinn u jit zit qniaa quer ciurnaa, knuar diyc nng jiah juaa decc qaubuew, qra qnuaw-aw he dirr inx diongqanx, qycc venr dngw laii lamzinn. Zenau, mow jit zit, dirr qokhue sanjongx, ZEUS ee snualun ...
B: OLYMPUS Snuax ?
J: si ar, OLYMPUS Snuax, ZEUS ham' ix ee kanciuw jnelun, lamluw qauhap dauwdew si javox/ iacc si jabow hiangxsiu kacc dua ee tiongwlok? Dongzenn byy langg u hxuad quatding, liw erdangr qongw jiaxee sinn jixsirr jingxtew ee jit bin. “lanw laii mng TIRESIAS!” u langg la uetauu.
“uirsniaxmic jabow viw javox qex tiongr qauw vaiw?” inx kir cue TIRESIAS mng anne ee bunrdee. Qetqyw m jaix anxjnuaw, ZEUS kanciuw tenhiy HERA tniax liauw jin' siurkir, dyrr qraTIRESIAS pah qaxx cnemee, ZEUS zinruii jurqiw qaix uirr jex hurjig, dyrr hro cnemee :ee TIRESIAS u sendix ee vunxlingw. Jiax u jit xee dyrliw --- dng' liw knuar be diyc vunsnuar juwiwlik ee qokk jiongw henrsiong sii, rair kyr didqag, laii ham' surbut qivunw hingtair --- soxui ee hingtaiwhak, huatsingx lenjiab.
B: virr juaa juanxhuar jyr jabow/ qycc venwjyr javox ee TIRESIAS, dongsii iongxiuw lamsingr/ luxsingr ee qinggiam, viw qywvet lamsinn/ luxsinn jaix :ee qyckacc je, jex si sniaw dyrliw?
J: jitt diamw byy cyr, jin jit vo qongw, TIRESIAS siongrdingx dairviauw lxamm-luw ittew ee sursit. Dng' ODYSSEY virr sangr qaur luxmoo CIRCE imqanx sii, duw diyc TIRESIAS liauxqaiw diyc lamluw ittew au, jiacc did diyc kexbonng.
B: guaw ciangjai sniu, zuqyw lamsingr erdangr ham' ix luerjai ee luxsingr kinghiongr jiapciog, luxzinn ham' ix luerjai lamsingr kinghiongr jicjiab, kyxlingg e jaix sinn soxx jaix ee dairjir, marr kyxlingg ciauquer sinn soxx jaix :ee.
J: hex si lanw taur quer qethunx did diyc ee sinwsid. Hun'inx s liw ham' jurqiw luerjai luxsingr kinghiongr jiapciog ee hongsid.
B: dng' liw duw diyc mow langg, tudzinn qamxqag “guaw jaix jitt xee langg” “guaw sniu beh jaix jitt xee langg”, hitt jiongw dirr luan'air sanxsingx huathen jurgnow ee qamxqag si jnuaxngiu jit huesu?
J: hex si jit xee bxi, henxhen cud cniurr birlaii ham' jitt xee langg jywhuew sing'uac ee itcer, liw qamxqag naxx jaix ix dyrr si jiong' beh ham' liw birlaii quer zidjiw ee langg.
B: hex qamxx si laijurr qiwig-diongx, jixsirr m jaix/ be zin tihh ziiw? Lanw ixx jex jyr lenjiab, jywuii ham' jitt xee duiwsiong hordong ee jit jiongw hongsid ---
J: cavutdyx si liw duiww birlaii jyr huanxngiar, birlaii ee liw decc ham' jitmaw ee liw duiwue. Jitt diamw ham' siqanx ee sinviwsingr/ ciauuadsingr iuxquanx. Guaw sniu lanw dag diyc jit xee huisiongg sinvir ee henrsiong.
B: dirr liw ee snewmia-diongx, liw si m si qandna' qra dongwjyr jit jiongw ywvir? Iacc si zinruii langg kyxiw singqongx iongxiuw hun'inx, ixqibb hun'inx ji' gua ee lingrgua jit jiongw quanhe?
J: ui' qisut bin laii qongw, si ersaih qongw “dongzenn, uirsniaxmic m si neh?”
B: sursit naxjunxx si, hun'inx quanhe hanrjer duiww luan'air soxx beh huwcud :ee, zircniaw hrur hro luan'air :ee, e qiamxjiyw duiww hun'inx quanhe ee diongsingg.
J: guaw sniu, qywzinn rair jurqiw cue cud qaixquad ee vanrhuad. Dirr liw duiww hun'inx u liauw singlok au, iuguann kyxlingg u qihue duw diyc iwair ee langg; zuqyw byy duiww jitt xee iwsinn :ee jywcud huanxingr, liw kyxlingg --- anxjnuaw qongw neh? --- kyxlingg e hro ciongbuanw uahlik air ee texgiam jniajyr amwdam.
B: guaw siongsinr jex si bunrdee ee hudsimx. Narr qongw bagjiux si simx ee taudin, qycc jinjniar cue diyc simx qionglet beh air :ee, anne simx qamxx si qandna' erdangr iauqiuu jit vaiw?
AIR BERDANGR HRO LANW BE HUATSINGX QITNAX QUANHE
J: cniaw hro guaw didjiap qongw, air berdangr hro lanw duiww qitnax quanhe byy huanxingr. Danrsi si m si erdangr iongxiuw jit xee jinjniar uanjingw ee aiwjingg, dongsii qycc duiww hun'inx diongsingg? Guaw byy zinruii si u kyxlingg :ee.
B: hex si in'ui ...?
J: quanhe e incuw pywlec. Driongx byy qimwjiw liw u qamxjingg, diyrsngr si ham' lingrgua jit xee irsingr ee luan'air quanhe. Dirr kisu longrban qowsu, biyue ee hitt jiongw duiww qitnax luxsingr, ixqibb jurqiw aiwzinn ee unziuu quanhe, si huisiongg iugnaw textiab :ee.
B: sujingg sizinn cniuwquax hro aiwzinn tniax, suibongw inx quanhe jinwdenw ee hibang huisiongg bongbiauw, marr si qangrkuanw.
J: si.
B: sinue si m si zinruii iongxiuw air, jaiww sitkir, vixqaur kacc hyw?
J: qivunw-siong, sinue byy jinjniar cuxliw qywzinn aiwjingg bunrdee. Liw jaix, muixx jit xee langg soxx suanw ee hun'inx duiwsiong, dy' si hensit in'enn diauqnia. Vixzi, liw sriok mow xee jongqaur, liw kacc e ham' mow langg qethunx, kacc be duw diyc qitnax langg, dagg hxang dairjir an' jitt xee guan'inx/ dyrliw tuilun.
B: anne aiwjingg/ dyrdig u snaiw quanhe?
J: aiwjingg uihuan dyrdig.
B: uihuan dyrdig?
J: si ar, jixiaur sunzenn ee aiwjingg, dyrr be ixx siarhue dong'ir ee hongsid viauxhen cud laii, jex marr si aiwjingg jiacc sinvir ee enqor. Aiwjingg ham' siarhue detsu buquanx, si viw siarhue quihuan ee hun'inx kacc quann ee jingsinn texgiam.
B: dng' lanw qongw siongrder si air sii, si m si longrban ee air? Sinue si m si qra siongrder ee air/ longrban aiwjingg lenjiab kiw laii?
J: kaksit si anne, air si singwlingg sniuxsur, viw hun'inx kacc quann, si sujingg sizinn ee lixliam. Qaxsuw siongrder si air, anne air dyrr si siongrder. ECKHART bad qongw “aiwjingg m jaix kow.” duxx si TRISTAN soxx qongw “guaw guanrir uirr guaw ee air jiapsiu dergak ee kow”.
B: liw marr e qongw, air vitzenn cua cud koxlan.
J: hex si lingrgua jit xee qaiwliam. TRISTAN si qinggiam air, ECKHART si dramm air. Aiwjingg ee kow vingrr m si lingrgau jit jiongw kow, si snewmia vunxsinx ee kow. Dyhh u kow, hiax dyrr si snewmia ee soxjai, liw erdangr anne knuawtai.
B: PAUL dirr Siniog, Kolinto u jit dnxua ue “air kyxiw zinxsiu itcer, singdamx itcer”.
J: hex si qangrkuanw jit qnia su.
SATAN SI SIONGRDER EE AIWZINN
B: guaw siongrr qac'ir ee sinue ji' id, si laijurr PERSIAN ee qowsu, qongw SATAN virr sangr zip dergak, si ix taiww air siongrder soxx drir.
J: si ar, hex si ISLAM duiww SATAN ee qivunw qaiwliam. Inx zinruii SATAN si siongrder siongrr tniawtangr :ee. Lixqaiw SATAN u jerje hongsid, danrsi jiaxee lixqaiw dy' si qenwlip dirr erbin jitt xee bunrdee-siong, uirsniaxmic SATAN virr pah zip dergak? Qowsu viaujunw hingtair si anne: siongrder congwjy liauw tnisair, qaudai inx qongw, linw qandna' erdangr duiww jurqiw qnialew diwqingr. Zenau, siongrder congwjy liauw langg, qra langg dongwjyr quann quer tnisair ee snewmia hingtair, qycc iauqiuu tnisair uirr langg hogbu, danrsi SATAN byy guanrir duiww langg qnialew diwir.
Guaw e qir .did, sewhanr Qidokqaur tuantongw soxx qauwdy :ee, qra jitt xee jinghingg qaixsueh SATAN jurgnow diongsimx jokquair, jiacc byy air hiongr langg qnialew. PERSIAN qowsu qongw :ee, si SATAN taiww air siongrder, qandna' beh hiongr siongrder qnialew. Siongrder ixqingx qaixvenr ix huatcud ee sinwsid, liw qamxx knuar e cud? Danrsi SATAN iuguann junjiaur siongrder duiww inx soxx huatcud :ee, suacc hro SATAN bersaih uihuanw jiaxee guanjig. Dirr ix simlai --- guaw m jaix SATAN si m si u simx, berdangr duiww siongrder ixgua ee langg hogbu, in'ui ix qandna' air siongrder. Siongrder suar laii duiww SATAN qongw “mair hro guaw knuar diyc liw!”
Itvnuax soxx biyue ee dergak, siongrr tongwkow ee lenrgak dyrr si byy qingwair siongrder junjai ee soxjai. SATAN jnuaxngiu erdangr zimxsiu lenrgak ee jingqingw? Qandna' ui' ix qiwig-diongx siongrder ee sniax did diyc an'uir, in'ui dng' siongrder qongw “kir siw hyw lar!” hex si air ee viauxhen.
B: dirr zinsingx kaksit si anne, siongrr tongwkow ee dergak si ham' liw soxx air :ee hunlii, jitt diamw si guaw iwair jitt xee PERSIAN sinue ee guan'inx. SATAN si siongrder ee aiwzinn ---
J: ix ham' siongrder hunlii lor, duiww SATAN si huisiongg kow ee dairjir.
B: PERSIAN u lingrgau jit xee quanhe verbuw kixquann ee qowsu.
J: byy cyr! Hex si jit xee uixdai ee qowsu, siongrr jaw inx si ittew :ee, zenau duarhanr venr jyr jit jangg ciu. Aurlaii, inx vunkuix venwsingg nng xee langg, qycc kaisiw sne'iongw qniaxzii. Inx huisiongg tniawair ginxaw, dyrr qra jiac driau. Siongrder sniu, “bersaih anne.” dyrr qra verbuw duiww juxluw ee air qiamxjiyw, jniajyr vah hunx ji' qauw jap qauw diamw qauw, anne verbuw dyrr be qra qniaw jiac driau.
B: jitt xee sinue si sniaw iwsur ---
J: guaw tniax qongw “ jitt xee kiwbi jiacc hyw ee mic, guaw beh jiac lyc kir.”
AIR EE LIGLIONG
B: jex si air ee lat.
J: si air ee lat.
B: soxiw air ee qiongdo rair qangr qe.
J: si. Guaw bad knuar quer jit vxag doo, si jit xee qycc jit xee vutduan tunx mic ee cuir, cuir-lai u jit liap simx, si qra liw jiac driau hitt jiongw air, buxcinx rair hagsip qangr qe hitt jiongw air.
B: siongrder, qar guaw dirsii mair jipquad.
J: si lar, dirr Inwdo u jit xee ser jongqaur gisid jo maxmah mair jip'id, digvet si duiww qniaw ee qamxjingg. Qadingg ee jongqaur dyrsu e laii qaur cur-lai, iauqiuu maxmah qra siongrr dinquir ee mic hro ix, kyxlingg si huisiongg quiwdiong ee juvyw/ qitnax ee mic, dirr vutduan iauqiuu maxmah qaux cud vyxvuer mic ee quewdingg, maxmah yc erhiauw hongwkir ix zinruii siongrr quiwkir ee mic, juewau rair hongwkir ix ee qniaw.
B: soxiw air vauquad kow qapp hiw.
J: si lar. Air si snewmia ee dyc huew diamw, zinsingx si vikow, air marr si. Air zuxx qiongg, kow zuxx dua.
B: mrqyxx air erdangr zimxsiu itcer.
J: air vunxsinx si kow, jinjnair uac lehh ee kow.