1. Suiw ar! hyw ar! lanw Daiuann

Uaar! Daiuann, sengiulangg ylyw liw suiw, cinghox liw qiyr jyr Bixle Dxyw(Formosa), liw sidjai jiokgiac e kamx .did. Iauxquxx liw lauxsit si jin' kuaiwlok ee soxjai, qauwgiac erdid hro langg aiwsiyh vangr be li. Uaar! Daiuann, qycjaiww liw qiamxx m si guanw ee iynade, hro guanw ee sinquann qutbah vuidua ee hniuliw mah? Guanw ee simx sidjai jit kig quw dy' yh did duiww liw laii lirkuix.

Guarqoklangg ylyw lanw ee Daiuann siuwle; urngiaw, lauxsit byy cywgo. Lanw Daiuann ee snuax qik hiongjongr, qik u venwhuar, qycjaiww si qik congcuir, qik cnexbak, sisiongg u ginsig ee hrunx, dirr hiaxee cnex linglingx ee snuajiamx ee diongqanx decc qunw decc giaa. Soxiw jre junn dui' haiw diongngx hng hng knuar, dikkag si huisiongg suiw. M na anxnix, jiurr si dui' qin qin knuar, Daiuann tauu qaur buew vutlun dyxlyc jit soxjai, ciurbak vutsii cnecuir, huecauw vutsii iamrsing; u qikaw ee buexiac dirr hitt diongqanx decc bruw, hyw sniax ee tangtua jiauxjiah decc tii decc cniur, uanxzenn si jit xee dua qonghngg. Lanw Daiuann, si dirr Taiwvingg Xngiuu ee lairdew, jit xee m dua m ser ee dyxsu, tangx qongw si haixgua ee senqingw. Ix ee siwbin dy' si duarhaiw ee juiw vaux vaux lehh, vadd dah ee siogdinn dy' ing'iax yh did qaur. Ix ee snuajiamx sidjai si quann qycc dua, sewqair ee hongho dy' cueag yh did diyc. Qycjaiww kiwhau si jin' unhyy, zuahtnix byy hro lanw diyhh cincniu Lamngiuu ee langg vutsii rair lramm juiw, qnuatnix iarr byy qiyr lanw cincniu vakhngx ee langg vutsii diyhh ngaa huexloo; hro lanw ee sinkux jin' kinx, iurqycc hro lanw ee simqnuax jin' jiyw kiamwkueh. Lanw Daiuann ee de, kuacdua byy cincniu Diongqog, Inwdo hitt kuanw, m iong'unw snuakimm iaxsiur ee pauxjauw; jongw si siyxser iarr jiokgiac e tangx iong'unw quixnarr vah bxan langg, iurqycc dertow qiamxx m si jin' vuii, cutsanw qiamxx m si jin' honghur mah? Lanw ee snuax-lai u dua jangg ciu cyr be liauw, u jniulyw si sewqair soxx hihanw :ee, u ngqimx, iarr u jiyhtnuar. Acc siwuii ee haiw-lai u cud hii, hee, byy hanrliong; qinghii si cincniu cur hiacc dua; iamm iurr si dnax be liauw. Narr qongw qaur vnede, cann nirr u siangx dxangx tangx siux, hngg nirr qamjiar qapp jingxjingw ee jabqog vutsii dy' siux be jin, qycjaiww lanw ee oliongdee qiamxx m si jin' pangx mah? Aixar! Lanw Daiuann sidjai si jit xee tensingx jurzenn ee dua qimkor! Aixar! Daiuann jinjniar si bixle ee dyxsu, jinjniar si vinghyy ee hniuliw, sidjai si byy u kiamwkueh ee anlok qog! Guaw e tangx piwzu jit qxur qongxx, "Daiuann si naxx jit senx lenhuex-vyxjy-dingw ee Quansewimx."

2. Dui' derliw laii qongw, uanxzenn jit xee siyw Dangngiuu

Sewqair ee derbin, hunquah jyr snax kuanw: Jit kuanw qiyr jyr zeddaiwde, jit kuanw undaiwde, qycc jit kuanw dyrr si handaiwde. Lanw langg soxx kiarkiw ee derbin, knuar qnir vnee vnee, qisit m si vnee :ee, si ngii :ee. In'ui de si ngii ngii cincniu qiuu, soxiw lanw soxx kiarkiw jitt xee de si qiyr jyr derqiuu, langg qapp cauxbak jauxsiur dyrr si dirr derqiuu ee binrdingw decc uac. Tangx qongw derqiuu si cincniu jit liap jinjniar dua ee hoxtauqamx; qampuee pongwquann ee soxjai dyrr si snuax, taplyc ee soxjai jikjuiw dyrr si haiw; acc vnuawdo ee soxjai dyrr si zeddaiwde, vnuawdo qapp taubuew ee diongqanx dyrr si undaiwde, tauu qapp buew ee soxjai dyrr si handaiwde. Zeddaiwde si derr id zuac, undaiwde kacc siyly, handaiwde dyrr jin' qnuaa.

Jiong' derqiuu qra ix puar jyr nng vingg, jit vingg si qiyr jyr Dangngiuu, qycc jit vingg si qiyr jyr Sengiuu. Lanw Daiuann si dirr Dangngiuu ee lairbin. Lanw ee Daiuann iurr duxx si dirr zeddaiwde qapp undaiwde ee qauqair. Lanw dxyw-lai ee snuax iurr jin' quann, soxiw vnede suizenn si zuac, zuxx jnriu snuax-dingw dyrr zuxx liangg zuxx lingw. Narr si vadd soxjai zuac dyrr si zuac, qnuaa dyrr si qnuaa, lanw Daiuann in'ui si dingxbin soxx qongw hitt kuanw ee derser, soxiw drangg jit xee sijun, air zuac ee soxjai iarr u, air unluanw ee soxjai iarr u, air lianglingw :ee iarr si u.

Jionglaii snuax-lai hiaxee langg, in'ui lanw narr kacc tniawtangr inx, narr qapp lanw hyhyw byy sna' hai, iarr lanw ee diwsig jailingg kacc huatdat, kuiwlat kacc ciongjiog ee sii, snuax-lai snuax-dingw itcer longxx kaikunw, dua ciurnaa diyhh qra ix kuix, qimginn jiyhtnuar jiongxjiongw ee kongwsanw narr u, dyrr qra ix qrut; e tangx jaijingr ee soxjai dyrr jaijingr, be :ee dyrr hro ix jyr bogdniuu cri guu, cri ngiuu, cri jingsnex. Jit bin jiong' jiaxee soxx siusingg ee lirig laii kuix duarlo, jy huexciax denrciax, iacc si sed jin' unxdangr ee huihingqix, huihingjunn, qautongx hro ix dua lirven. Acc qycc jit bin, qenwsed hiongcuanx cirqex dirr qik hyw qingxdir, qik cingliangg ee soxjai. Narr si anxnix, qiamxx m si quiw diamxjingx, iacc si quiw hunjingx ee diongqanx, dyrr e tangx dirr zuac ee soxjai qniaa qaur liangg :ee, dirr liangg :ee qniaa qaur qnuaa ee derhngx mah?

Cincniu anxnix laii qongw, dirr lanw Daiuann qinrqin jit diab aw quw ee qanghux, air snuax dyrr u snuax, air haiw dyrr haiw, beh zuac dyrr u zuac, qnuaa dyrr u qnuaa. Soxiw tangx qongw Daiuann si jit xee siyw Dangngiuu. Lanw Daiuann u jitt kuanw tenzenn ee hyw qxingw, hyw kiwhau, jionglaii narr si qycc ingrsimx qex langg ee qanghux dua dua laii jingxdunr, dikkag e jniaa jyr Dangngiuu ee dua qonghngg, hro Dangngiuu ee langg jib'uaw laii hiongxhog anlok.

3. Dui' langg laii qongw, si jit xee siyw sewqair

Dui' derliw laii qongw, lanw ee Daiuann si hiacc u cuwbi ee soxjai, jongw .si narr dui' langg ee hongbin laii qongw, si iauxx qyckacc simsig, kacc u iwgi, tangx qongw si jit xee siyw sewqair.

Tong' derqiubin soxu ee langg, jongxqiong qongxx u jap-lak-ig gua (jit-ig si jit-bxan ee jit-bxan). Jiaxee langg dairkair hunx jyr go jxingw, dyrr si vehsig :ee, ngsig :ee, ciacsig :ee, jangsig :ee, osig :ee. Sengiulangg (poxtongx qongw Angmnglangg), dyrr si vehsig :ee, in'ui inx ee puebah ee sig si jin' vec; lanw dyrr si ngsiklangg; Lamngiuu ee Malailangg dyrr si jangsig :ee, Bixqog qin snuax ee soxjai u jit jxingw puebah jin' angg ee langg, jex dyrr si ciacsiklangg; iauxx u jit jxingw dyrr si ix ee puebah ox qaur cincniu huextnuar, diamr dirr Afrika qapp Amerika ee soxjai.

Jitt go jxingw langg bunbingg ee tingo vutjiw u jingcax. Uree si jin' gauu, jin' iongw, jin' hyxgiac; jongw .si uree si jin' gong, jin' hamban, jin' sanwhiongx. In'ui jitt kuanw, dairqex ee kuiwlat byy vnee, diwqaur snex cud jiongxjiongw vuthing ee dairjir; kiauw :ee penr gong :ee, u :ee jiac byy :ee, qiongg :ee ab dyw ziok :ee. Tangx qongw quewkir ee sewdai, jitt go jxingw langg dairqex si siy' taii decc quewzit.

Cavutdyx lak nii jingg, Sengiuu u dua siy' taii. Jitt xee siy' taii si jurr kaix tende ixlaii jueww derr id dua :ee, dirr Dairjingr snax nii Veh-guec taii kiw, taubuew taii u go nii. Dirr jitt xee jenwjingx siw ee langg, u jit-cingx bxan; diyhsiongx ee langg, si nng-cingx bxan; jongxqiong sixsiongx u snax-cingx bxan langg. (Lanw Daiuann longxjongw jiacc u snax-vah-qauw-jap-bxan langg). Qycjaiww soxx kaix ee jenwhuir si snax-cingx jit-vah-ig ginn (Henrsii Zidvunw juann qog ee qokhuir jit nii si cavutdyx jap-sir-ig ginn). Qinrqin dui' anxnix, dyrr jiokgiac tangx jaix jitt vrangx Sengiuu ee dua jenwjingx qaur jnaixngiu camw! Knuar qnir jitt kuanw ee camw su, qinrlaii sewqair dagg jxingw langg, dy' longxx cimx cimx qamxqag jenwjingx si m hyw, dikkag diyh'air vinghyy. Vutlun dycc jit jxingw langg dairqex longxx rair siy' jundiong siy' jiauwqor; gauu :ee kancua gong :ee, iongw :ee jiauwqor ziok :ee; u :ee voxjo byy :ee; jiacc e ing .did. Quanhe jitt jann su, tong' sewqair ee langg henrsii huisiongg zinrjinx decc genxqiur.

Led'ui, sewqair ee dairser si anxnix: dnaxx cniaw uat tauu knuar lanw ee Daiuann. Lanw jitt xee siyw siyw ee Daiuann u quiw jxingw langg decc jywhuew diamr? Tangx qongw si u snax jxingw. Jit jxingw, si Luerderlangg; jit jxingw si Snualairlangg (poxtongx longxx si qiyr inx Cnihuanx, jex si jin' kingved langg, byy jundiong langg ee ue, guan qapp dairqex ixau qiyr inx "Snualairlangg"); iauxx qycc jit jxingw, dyrr si lanw Vunxdyxlangg. Jitt snax jxingw langg ee binrsig, qutqeh kiokk si dairkair u qiongrtongx, mrquxx soxx ing ee genguw byy siang, hongsiok iarr qyc'ngiu, quewkir ee ligsuw iarr jingcax; soxiw tangx qongw si qyc'ngiu ee jingxjok. M na jingxjok qyc'ngiu, bunbingg ee tingdo iarr si vutjiw u jingcax. (Dairkair e tangx qongw, Luerderlangg si kacc gauu, kacc u lat; lanw Vunxdyxlangg viw inx dyrr kacc sux; Snualairlangg dyrr sux inx iauxx kacc je.) Dui' anxnix knuar, guaw qnaw qongw, Daiuann si jit xee zinjingw ee denxlamxhuerdniuu. Sewqair narr e henr cud vinghyy, guaw sniu diyhh dui' Daiuann dairsingx; tangx qongw lanw Daiuann si Sewqair vinghyy zinlui hyw hyw ee ciwgiamrsow. Uaar! Led'ui dongvaux, lanw uirdiyhh zinlui ee hyhyw, sewqair ee jinwvo, m jaix lanw u simxmih junxvi tangx vangjan Snualairlangg ee hiongwsiong; acc lanw u simxmih kuiwlat tangx qapp Luerderlangg vingwqar-jekux, siy' kanx ciuw jywhuew qniaa hiongr jingg mah? Uaar! Daiuann qyxzenn si sewqaiwdig ee Daiuann; jongw .si m jaix lanw u sewqaiwdig ee simx .byy? Daiuann si jit xee siyw sewqair, Daiuann si zinlui hyvingg ee genxqiuwsow.

huedngw tauu iac