Suatluw

Dirr Musasi Qog ee jit xee jngtauu, u qiyr jyr Mosaku cam’ Minokiji ee cywcahux nng langg. Qowsu duxx kaitauu ee sii, cywcaa saihu Mosaku si jit xee lau langg, acc Minokiji si saiaxqangx, jap-veh huer ee endauu siauwlenqex.

Muixx jit qangx, inx nng langg longxx rair dauwdin kir li jngtauu nng lxiw, dyrr si henrjuxsii cid qongliw vnuar, ee jit dah ciurnaa hiax cywcaa. Beh kir ciurnaa ee diongdoo, itding rair qingquer jit diauu dua kex. Kex-vnix u dorjunn tangx dah. Guanvunw dirr kex-vnix mow jit soxjai u dah jit jxy qiyy, mrqycc qenwnarr dua juiw jit laii, dyrr qra qiyy ciongx jauw .kir. Poxtongx caqiyy iauxx si be kamx did dua juiw ee cuawlauu.

Mosaku cam’ Minokiji dirr jit xee jiokk qnuaa ee amwtauw, caa cyr hyw beh dngw .laii ee sii, drng diyc jit dniuu dua hongseh, qniaa lo venr qaxx jin’ ban. Nng langg qaur dirr dorjuntauu sii, knuar diyc dorjunn kyr dirr duiwhnua, juntauqex ixqingx dngw .kir ar. Sniu beh siuu juiw quer .kir, mrqycc kejuiw si lingw qycc ganr, qovutjirjiongx, saihu saiaw nng langg dyrr dirr juntauqex hiyckunr ee lxiauu-aw bih .jit .xee. Sniu diyc erdangr jiamrsii dirr jiax piaclan bih hongseh, nng langg qamxqag jiokk hyw un :ee.

Lxiauu-aw lai byy huexloo, marr byy kiw huew hangx siyx ee xui, qanda’ jit xee cutzibkauw, byy tang’axmngg, mrqycc u nng der tatami. Nng langg qra mngg qnuaix lehh, jangsuix iuguann cing diauu lehh, langg tnex lyc laii hiyckunr. Dirr lxiauu-aw lai, qamxqag liyc aw kacc be hiacc qnuaa, knuar vanrser, hongseh ingwqaix byy zuarr quw dyrr e tingg jiacc driyc.

Lau langg Mosaku jin’ qinw dyrr zibbinn. Mrqycc siauwlenqex Minokiji jiokk quw ee siqanx longxx jin’ cingcnew. Sngwsngr hauw ee hongx-sniax, dua seh pah dirr camngg ee sniax, hro ix hnirkangx qiongg beh dongr be diauu.

Kejuiw si goggok decc qiyr, liauaxcur naxx cniu haixbin ee junjiah iyy lehh iyy lehh, vutsii qycc e huad cud snirsnuaix snirsnuaix ee sniax, ho’ngg simx qniahniaa ee dua hongseh taur byy tingg.

Kongkir suii diyc siqanx quer .kir naxx laii naxx lingw. Minokiji dirr jangsuix erdew kurku junx, mrqycc qaur lorbuew, tiamw .qaur .der .ar, langg marr si kunr .kir.

Siqanx m jaix quer zuarr quw, siauwlenqex ee bin kir hro naxx saivakho ee ser liap secqag pah .diyc, langg marr jingsinn .kiw .laii. Liauaxmngg ho’ngg qiongg longr kuix .kir, jiyh diyc mngg-gua vehseh ee qngx ciyrsia, Minokiji knuar diyc cur-lai u jit xee juann singkux vec sicsiag ee jabow. Jitt xee jabow kuu dirr Mosaku vnix:a, ix ee cuir hiongr diyc lau langg itdit vunn hongx, si jit sog jit sog ee vec enx. Cavutdyx qang jitt xee siqanx, ix uat tauu knuar duiww Minokiji jitt vingg laii, langg marr sui’ dah qaur siauwlenqex ee singkux dingw. Siauwlenn sniu beh huah sniax, mrqycc huah longxx byy sniax.

Jabow qisit si jit xee siauwluw, ix ban ban aw ngar qe, itdit qaur bin beh duw diyc Minokiji jiacc dongwdiam. Siauwlenqex knuar diyc binrtaujingg si jit xee jiokk suiw ee jabow-ginxaw, mrqycc hex bagjiux si hiacnir hiong’og, kiongxvor.

Jabow-ginxaw bak byy dngxlunn qra Minokiji jinn u .jit .kunr .ar, jiacc qongw,

”Guaw vunxlaii ersaiw cniu hitt xee langg qangrkuanw duiwhur .liw, mrqycc quaw suacc m qramx .kiw .laii. Liw si jiacc siauwlenn, iurqycc jiacc endauu, guaw be qycc hai :liw. Acc mrqyc liw cenban m tang qra ing’amr knuar .diyc ee dairjir qongw ho’ngg jaix, lenrr linw laurbuw dy’ berdangr, narr byy, guaw itding qra liw taii .siw… guaw qongw ee ue qir diauu oox.”

Qongw uann jiaxee ue, singkux uat jit xee hiongr, langg dyrr duiww mngkauw jauw .cud .kir. Jitt sii, Minokiji ixqingx e dinxdang ar, langg qinw vreh .kiw .laii, jauw anww mngg-gua .kir, sniaxmic longxx byy knuar .diyc.

Jitt sii hongx qapp seh pemia qngr duiww cur zip .laii, Minokiji qra mngg qnuaix lehh, qycc iong quixlyhh qix cakox qra mngg duw lehh. Tauduxjiah ee dairjir, ix iauxx decc sniu qongxx si hongx qra mngg qiongg sag .kuix, vig’ix siauwluw si ix knuar m driyc, hex si mngg-gua secqngx huanxsia niarnia, itcer ee itcer si hiacc qinw. Si m si qaqi decc binbang lehh?

Ix qra lau saihu qiyr jit sniax, lau langg longxx byy inwsniax. Amwbinbongx dangdiongx, ix crunx ciuw kir bongx lau langg ee bin, qanxnaxx bongx diyc vingx lehh. Mosaku ixqingx siw ar, sintew marr qenx qaxx ding kokkog, m si binbang, Minokiji langg qniax qaxx gongg .kir, siag dyw dirr tokax.

Tnix pacpuw qngx ee sii, hongx qapp seh longxx tingg ar. Qaur qaxx zidtauu cud .laii, dorjunn tauqex marr laii qaur lxiauu-aw, ix knuar diyc siw qaxx ding kokkog ee lau saihu, vnix:a si srid kir diwqag ee Minokiji, ix qinw qra siauwlenqex quanr siyjiuw, cic hingkamw, lixlak beh vnuar qangx, jin’qinw Minokiji dyrr cingcnew .kiw .laii. Qycc vnuaciax qui’ vox quw, dairjir jiacc huadlyc hyxser.

Hitt xee kiongxvor qniahniaa ee hanlingw amwmii, lau saihu ee siw qapp vig’ix siauwluw kiongxhad ee ue, jiongxjiongw byy songxkuair ee qingquer hro siauwlenqex puawvne jiokk quw. Mrqycc ix longxx byy qra hitt amr ee dairjir qongw ho’ngg jaix.

Diauliw qaxx uanjuann huehok ixjingg ee iongxqnia, Minokiji qycc kaisiw jyr ix guanvunw ee kangkir--zip snuax cyr caa. Jitt jun si qaqi jit langg, caa pnai dngw qaur cur, inx laurbuw e qra draur tec kir ci-aw bre.

Siqanx laii qaur qecdngw nii qnuatnix. U jit amr, Minokiji caa cyr hyw beh dngw cur ee vnuar lo nirr, byiwdiongx drng diyc jit xee jabow-ginxaw, qo’ jit langg decc qnialo. Jitt xee siauwluw sinjaii jiauu lyr, sanxtiux santiux, vutjiw aw suiw, qapp Minokiji horsiongx jiyhox sii, qongw ue sniaimx dyrr naxx cincniu jiauw-aw decc tiqiyr ee sniax, ho’ngg hnirkangx jiokk songxkuair :ee.

Suar .lyc, nng langg uaw jywhuew vnivaii qniaa, kaisiw qongw jin’ je ue. Jabow-ginxaw qongw ix ee miaa qiyr jyr Asuad, jitt jun inui verbuw longxx quewongw, pacsngr beh kir Qangho. Dirr dua sniaci hiax, u quiw xee sanwciah cinjniaa, inx qongxx beh qaiwsiau kangkuer ho jyr, cincniu jyr huwho zinqex ee qanxvi iacc si qor dxiamr ee siauwsuw-aw.

Minokiji duiww jitt xee co’ sigsai ee siauwluw knuar qycc knuar, qanxnaxx kacc jaw bad dirr dyhh knuar .quer ee kuanw. Ix qamxqag jitt xee jabow-ginxaw zuxx knuar zuxx suiw, dyrr mng ix u jyr .langg bor. Siauwluw qongw ix longxx iaxx bue qapp langg dring quer cinjniaa. Suar .lyc, ngua siauwluw mng Minokiji u crua bow iacc si u dring quer cinjniaa .bor. Minokiji qra rinr qongxx, cur nirr u laurbuw rair hongriongw, crua qeau jitt jann dairjir inui qaqi iauxx jiyw huer, byy qra jex dongwjyr iauwqinw ee dairjir, jurtauu dyrr longxx m bad sniu quer.

Nng langg qongw uann jiaxee simlairue, u .jit .dah .quw .ar byy qycc cud sniax, diam diam decc qniaa lo. Mrqycc sioggiw u qongw, “Simlai u iwair, bagjiux naxx cuir e qongw ue.” Beh qaur jngtauu ee sii, nng langg dyrr horsiongx u qac’ir ar.

Jitt sii Minokiji cutjiyx Asuad laii cur nirr jiamrsii siyw hiyckunr .jit .xe. Asuad jabow- ginxaxlangg kixtauu viwsur qenwsiaur, u jit jam aw dunwdnex diuduu, mrqycc lorbuew iauxx si qapp Minokiji dangjee qniaa.

Dngw qaur cur, siauwlenqex ee laurbuw jiokk hnuahiw, qinw qra inx nng langg gniajih .zip .laii, uirr inx laii cuann siyx tngwtngr ee qnedngr. Asuad ee qixjiw qniadac si jiokk iugnaw dausaux. Minokiji inx laurbuw jiokk qinw dyrr qac’ir diyc jitt xee jabow-ginxaw, krngr ix qra kir Qangho cue cinjniaa ee dairjir renn anww aurviah .kir, lingrzit aw jiacc qycc pacsngr. Dyrr anxnex, jin’ jurzenn, Asuad ee Qangho hingtingg jiamrsii laii junw suah .kir. Jabow-ginxaw marr dirr Minoxkixjih ee cur nirr druar .lyc .laii, venr jyr Minoxkixjih ee qeau.

Laurbuw beh siw ee sii—qanda’ crua Asuad zip mngg ee go nii au--, duiww jitt xee simvu soxx qongw ee ue longxx si tniawsiyh qapp ylyw ee gensuu. Asuad ter Minokiji longxjongw snex jap xee ginxaw, vutquanw javox jabow longxx jiokk suiw, puehux jiokk vec, jin’ hyw knuar.

Qang jngtauu ee langg longxx qra Asuad knuar jyr qapp inx tensingx dyrr byy qangrkuanw. Canjngx itvnuax jyh cansid ee jaboxlangg longxx jin’ kuair lau. Mrqycc, Asuad ixqinx si jap xee ginxaw ee laurbuw, iauxx si cam’ cocox aw qer zip laii jngx nirr qangrkuanw, iuguann hiacc siauwlenn, vec paupaux, suiw dangdangx.

U jit amr, ginxaw longxx kunr .kir, Asuad dirr dinglangw erkax jyr jiamjiw-qangx. Minokiji duiww diyc Asuad knuar, bak byy dngxlunn jinn jiokk quw, qongw,

”Knuar diyc liw dirr dinglangw erkax, ciuw naxx jyr jiamjiw ee binrhingg, hro guaw sniu kiw jap-veh huer siauwlenn sii soxx duw .diyc jit qnia sen’ sniu dy’ sniu byy ee dairjir. Sudongsii, guaw drng diyc jit xee qapp liw qangrkuanw suiw, juann singkux vec sicsiag ee jabow-ginxaw. Ix ee binrhingg, texhingg qapp liw u qraur singg.”

Asuad bagjiux byy ui’ ciuw nirr ee kangkir suaw kuix laii knuar Minokiji, jriab .lyc rinr qongxx,

“Qinw qra hitt xee langg ee dairjir qongw hro guaw jaix, liw si dirr dyc’ui drng diyc ix?”

Minokiji dyrr ui’ tauu qra hitt amr dirr dorjunn tauqex ee lxiauu-aw lai qingquer ee kiongxvor dairjir longxx qongw hro Asuad tniax --- hitt xee vig’ix siauwluw dah dirr lau saihu Mosaku singkux dingw vunhongx cuex vec enx, lau langg byy sniax byy sueh dyrr siw .kir,

--- vig’ix siauwluw qycc dah dirr Minokiji ee singkux dingw, kinx kinx aw qapp ix qongw ue.

Qongw qaur jiax, ix tingg .jit .xe, qycc qongw,

”Guaw vutquanw si dirr binbang diongx iacc si cingcnew sii, itdit longxx qanxnaxx knuar diyc hitt xee langg. Dongzenn hex m si sewqanx ee langg. Guaw jitt jun iaxx qycc jiokk qniax hitt xee langg, sidjai si jiokk qniax, suibongxx ix si hiacnir suiw, puehux si hiacnir vec. Kingjinx qongw, guaw soxx knuar :ee si jingwqingx ee suatluw iacc si binbang, guaw qaqi marr m jaix.” Minokiji ue u liyc aw tihtuc .kiw .laii.

Jitt sii, Asuad qra ciuw nirr ee jiamx qapp snuar longxx pniax driau, langg kia .kiw .laii, tauu ngar qe duw diyc Minokiji ee bin, dua sniax hiux,

”Hitt xee jabow-ginxaw dyrr si guaw, guaw Asuad, Asuad dyrr si suatluw. Guaw dongsii u qra liw qongw .quer, liw narr qra hitt amr ee dairjir siablau .cud .kir, guaw dyrr sui’ beh qra liw taii .siw. Dnaxx narr m si knuar diyc dngdecc kunr ee jiaxee ginxaw, guaw dyrr itding qra liw taii .siw. Cuxau liw diyhh jimjiog huiwsimx, hyxhyw aw jiauwqor cniaiongw jitt din ginxaw. Narr si ginxaw u sniaxmih vutbuanw qapp pauruanr, guaw longxx e jaix, marr e qra liw hyxhyw aw lixlak qapp povaii. Liw diyh’air e qir .did.”

Jaboxlangg hiuqiyr qaur siongrr dua sniax ee sii, ixqingx dirr quixlyrr dxng gua, sinaimx cniu hongx decc hauw, jiamx jiamx iur iur. Ix huar jyr jit sog qngx sicsih ee vehsig hun’enx, duiww endangg-kangx uanx lehh qiux lehh cngx .cud .kir. Byy zuarr quw, ix ee hingngiaw dyrr longxx siausid .kir ar.