aiqyx
1 Ai'ar! Jitt xee sniaa jiongjingg vecsnir muaw muaw, dnaxx jnaixngiu qodnuax decc jre!
Jiongjingg dirr ledqog diongx juer dua :ee, dnaxx qingwzenn cincniu qnuaxhu;
Jiongjingg dirr jiaxee singw-diongx jrunx ix juer ongho :ee,
Dnaxx jniaa juer jinwqongr :ee.
2 Ix mii-qranx dua tikaur, bagsaiw lrauu qaur muaw bin;
Dirr itcer cin'air ee langg ee diongqanx byy jit xee an'uir ix;
Ix ee ving'iuw longxx ing kuixjar kuanxtai ix,
Inx jniaa juer ix ee duiwdik.
3 Judah in'ui duw diyc koxlan, qycc in'ui sriu diyc jerje lykow, dyrr censuaw qaur guarvangx;
Ix diamr dirr ngirvangx diongx byy tangx cue diyc anhiyh;
Duizib ix :ee dirr ec ec ee soxjai longxx zib diyc ix.
4 Zion ee lorqingr visiongx, in'ui byy langg hur ix ee jecqii;
Ix ee sniamngg longxx lingxjing, ix ee jewsix toxkuir;
Ix ee jairsikluw qanlann, ix vunxsinx iarr iukow.
5 Ix ee duiwdik juer tauu, ix ee qiusiuu hingtongx;
In'ui Jehovah uirdiyhh ix jerje vuergik, hro ix siurkow;
Ix ee ginxaw hro duiwdik liac .kir.
6 Zion ee jaboxqniaw, ix ee suiw itjin byy .kir;
Ix ee quiwjok cincniu cue byy cauxdniuu ee lok.
Inx byy kuiwlat, siurr qnuaw dirr duizib ee langg ee binrjingg.
7 Jelusalem dirr huanrlan kunxdiok ee sii,
Dyrr duisniu jaxsii itcer hnuahiw ee su;
Ix ee vecsnir ham lyc dirr duiwdik ee ciuw, byy langg qiuwho ix ee sii,
Duiwdik knuar .qnir dyrr tixciyr ix ee lingxjing.
8 Jelusalem dua dua huanrjue; soxiw jniaa juer byy cingkir ee mic;
Vingsor junqingr ix :ee, dnaxx knuar qnir ix ciacsinx lortew, dyrr longxx knuawkinx ix;
Ix qaqi iarr toxkuir, dywter.
9 Ix ee uwuer dirr ix ee snaaxqix; ix byy sniu diyc ix ee qetqiok;
Soxiw duw diyc huisiongg ee longvue; byy langg an'uir ix.
Jehovah ar, qriuu Liw knuar guaw ee koxlan, in'ui duiwdik qaqi kuadua.
10 Duiwdik crunx ciuw, cniuw ix itcer ee vyxmic;
Ix knuar qnir guarvanglangg zip ix ee sxingr sow,
Dyrr si Liw bad huanhur m tangx zip Liw ee hue-diongx :ee.
11 Ix ee vecsnir longxx toxkuir, siwqer cue jiahmic;
Inx ing hyw mic ngua bixniuu, rair qiur sniwmia;
Jehovah ar, qriuu Liw knuawqor; in'ui guaw si jin' vijen.
12 Huanrnarr dui' jiax quer ee langg ar, jitt xee su qamxx qapp liw byy qansiap mah?
Cniaw knuar guaw soxx duw .diyc ee iubun, u simxmih iubun tangx vixping,
Dyrr si Jehovah dirr Ix dua siurkir ee zit soxx qniaa dirr guaw :ee.
13 Ix dui' dingxbin qangr lyc huew, zip guaw ee qud laii kacc ngiaa ix;
Ix dniux lybang, dnivnuar guaw ee kax, hro guaw uat dywdngw;
Ix hro guaw tong' zit lingxjing, hrun .kir.
14 Guaw juerquar ee dnax, si Ix ee ciuw soxx vak :ee;
Qaw qui' diauu, he dirr guaw ee amrqunw; hro guaw ee kuiwlat byy .kir;
Jruw qra guaw qaux dirr duiwdik ee ciuw, guaw soxx dixdngx be diauu :ee.
15 Guaw sniaa-diongx ee iongxsu, Jruw m dic ix;
Jruw jiyjip dua ee hue laii qongqig guaw, jewab guaw ee siauwlenlangg;
Jruw dac Judah ee jairsikluw, cincniu dirr jiuxkud diongx.
16 Guaw in'ui jiaxee dairjir tikaur, guaw ee bagjiux bagsaiw cerce dryr;
In'ui hucii guaw ee sniwmia laii an'uir guaw :ee, lirkuix guaw jin' hng.
Guaw ee qniaxzii byy i'uaw, in'ui duiwdik kacc ngiaa.
17 Zion crunx ciuw, byy langg an'uir ix;
Lun qaur Jakob, Jehovah ixqing’ cud bingrling, hro siw'uii ee langg juer ix ee duiwdik;
Jelusalem dirr inx diongqanx, cincniu byy cingkir ee mic.
18 Jehovah si qonggni, in'ui guaw u vuergik Ix ee bingrling;
Jiongww vecsnir ar, cniaw tniax, knuar guaw ee tongwkow;
Guaw jiaxee jairsikluw qapp siauwlenlangg longxx hro liac .kir.
19 Guaw qiyr cin'air ee langg, jongwsirr inx kipenr guaw;
Guaw ee jewsix, guaw ee dniuxlyw, decc cue qiuwmia ee bixniuu;
Hitt sii dyrr dng kuir dirr sniaa-lai.
20 Jehovah ar, guaw dirr huanrlan diongx cniaw Liw laii qamwcad;
Guaw ee simdngg qiauqaw, guaw ee simx dirr guaw ee lairbin luan caucaux; in'ui guaw dua dua vuergik.
Dirr guarbin dyqiamr hro langg siw qniaw; dirr cur-lai cincniu u sixsid.
21 Inx tniax qnir guaw toxkuir, iarr byy langg an'uir guaw;
Guaw ee duiwdik longxx tniax qnir guaw soxx duw .diyc ee huanrlan, in'ui Liw juer jitt xee su, inx longxx hnuahiw;
Liw beh hro vywqyr ee zit qaur, inx dyrr cincniu guaw.
22 Guan inx pnaiw ee soxx qniaa, longxx vaii dirr Liw ee binrjingg;
Liw uirdiyhh guaw itcer ee juerquar, jnaixngiu kuanxtai guaw, qriuu Liw jiauww anxnix kuanxtai inx;
In'ui guaw ee toxkuir jin' je, guaw ee simx iarr hrun .kir.
2 Ai'air! Jruw siurkir, hro ox hunn ziakamr Zion ee jaboxqniaw;
Ix jiong' Islael ee suiw dui' tnix hed lyc de;
Dirr Ix siurkir ee zit, iarr byy liam diyc Ix ee kadah'iw.
2 Jruw tunxdac Jakob itcer kiarkiw ee soxjai, iarr byy linbinw;
Ix siurkir ciax dyw Judah jaboxqniaw ee uersow, hro ix dyw qaur vnide;
Ix lingziok jitt qog, qapp ix ee quiwjok.
3 Ix ee siurkir jin' let, itjin jam dng Islael ee qag;
Dirr duiwdik ee binrjingg, qiux Ix ee jniar ciuw;
Ix cincniu siwuii tunbet ee huexiam, jiong' Jakob siyliyx .kir.
4 Ix kuix qringx cincniu duiwdik, Ix kia lehh giac kiw jniar ciuw cincniu qiusiuu,
Iarr itjin jaubet bagjiux soxx hnuahiw :ee;
Dirr Zion jaboxqniaw ee vowvnii, vniar cud Ix ee dua siurkir cincniu huew jidngiu.
5 Jruw vnir juer cincniu duiwdik, tunbet Islael;
Ix tunbet itcer ix ee qiongden, Ix huixhuai ix hiaxee uersow;
Dirr Judah jaboxqniaw ee diongqanx, qetnix jerje visiongx qapp vi'aix.
6 Ix cud lat tiachuiw Ix ee livax, cincniu huehngg;
Ix huixhuai Ix jurhue ee soxjai;
Soxx dniardiyc ee jecqii qapp Anhiyczit, dirr Zion longxx be qir .did;
Jehovah hro ix anxnix;
Qycc dirr Ix ee siurkir tongwhun diongx, knuawkinx qun'ongg qapp jewsix.
7 Jruw kiwsag Ix ee jewdnuaa, iamwngor Ix ee sxingr sow;
Jiong' Ix ee qiongden ee cniuu qaux dirr duiwdik ee ciuw;
Inx dirr Jehovah ee cur huarhua hauw, cincniu dirr jecqii ee zit jidngiu.
8 Zion jaboxqniaw ee sniacniuu, Jehovah quat'ir beh tiachuiw;
Ix kanx jinsnuar, diddit huixbet, ciuw byy qiux dywdngw;
Ix hro guarcniuu qapp sniacniuu longxx vi'aix; juer jit xe suevai.
9 Ix ee mngg dimm lyc de, Jruw huixhuai ad jric ix ee mngqongg;
Ix ee qun'ongg qapp quiwjok druar dirr byy huatlut ee ledqog diongx;
Ix ee sendix byy did diyc Jehovah ee kexsi.
10 Zion jaboxqniaw ee diongxlyw jre dirr tokax, jing jing byy sniax;
Ing tohunw samw taukag; ing muavor haa iyx;
Jelusalem ee jairsikluw taukag cih lyc de.
11 Guaw ee bagjiux lrauu bagsaiw drir qaur en'ng, guaw ee simdngg qiauqaw.
Guaw ee qnuadnaw dui lyc de, in'ui guaw ee vecsnir ee jaboxqniaw duw diyc huixbet;
Qycc in'ui ginxaw qapp jiac linx :ee, dirr sniaa-lai ee quelo hrun .kir.
12 Inx dirr sniaa-lai quelo hrun .kir, cincniu siursiongx :ee,
Dirr laurbuw ee simhuaii kuir beh dng;
Hitt sii duiww laurbuw qongw: Gnoxqog qapp jiuw dirr dyclyc?
13 Jelusalem ee jaboxqniaw ar, Guaw beh jnaixngiu uirr liw juer qanjingr? Guaw beh ing simxmih piwzu liw ar?
Zion ee jairsikluw ar, Guaw beh ing simxmih vixping liw, hro liw did diyc an'uir ar?
In'ui liw ee siongcuir dua cincniu haiw; jirjui e rix hyw liw ar?
14 Liw ee sendix ter liw knuar huqew qapp gugong ee ngirsiong;
Byy henw cud liw ee juerquar, tangx hro liw siurr liac :ee dywdngw .laii;
Dogdok ter liw knuar huqew ee kexsi, qapp siurr censuaw ee indnuax nardnia.
15 Qniwnarr quewlorlangg longxx qra liw pah pog-aw;
Inx ngr Jelusalem ee jaboxqniaw tixciyr iyy tauu, qongw:
Jitt xee sniaa qamxx si langg soxx cxingx jabjiog suiw, juer juann de soxx hnuahiw :ee mah?
16 Liw ee duiwdik longxx ngr liw dua dua kuix ix ee cuir;
Inx tixciyr qycc qarkiw, qongw: Guan u tunbet ix :ee;
Jex jinjniar si guanw soxx ngwbang ee zit; dnaxx guanw u duw .diyc, guanw u knuar .qnir.
17 Jehovah u jniaa Ix soxx dniardiyc;
Ingwgiam Ix jaxsii soxx bingrling ee ue;
Ix ciax dyw, iarr byy vyxsiyh;
Hro duiwdik dui' liw dairet,
Hro liw ee duiwdik ee qag giac quann.
18 Inx ee simx qiuqiyr Jruw;
Zion jaboxqniaw ee cniuu ar, liw diyhh mizit lrauu bagsaiw cincniu kex;
Liw m tangx hiyckunr, liw ee bagjiuzinn diyhh lrauu bagsaiw byy suah.
19 Mii-qranx ngua qnxex ee sii, diyhh kiw laii qiuqiyr;
Dirr Jruw ee binrjingg vniar cud liw ee simx cincniu juiw;
Liw ee ginxaw dirr queci kauw in'ui iaux hrun .kir;
Liw diyhh uirdiyhh inx ee sniwmia ngr Jruw giac ciuw laii qidyw.
20 Jehovah ar, qriuu Liw qamwcad, knuar Liw ngr jirjui anxnix qniaa!
Hurzinlangg qamxx tangx jiac inx soxx snix :ee, ciuw soxx py ee ngex-aw mah?
Jewsix qapp sendix qamxx tangx dirr Jruw ee sxingr sow siurr taii mah?
21 Ginxaw qapp laurlangg dyw dirr quelo ee tokax,
Guaw jiaxee jairsikluw qapp jongwdingx dyw dirr dyx-xe;
Liw siurkir ee zit taii siw inx; Liw taii siw inx, iarr byy linbinw.
22 Liw qiyr siwuii tangx qniahniaa :ee qaur dirr guaw, cincniu dirr jecqii ee zit.
Dirr Jehovah siurkir ee zit, byy langg u tuatli, iarr byy langg lauu lehh;
Guaw soxx py soxx riyx :ee, duiwdik qra ix taii siw liauw liauw.
3 In'ui Jruw siurkir ee qnuaiw-aw laii duw diyc qankow :ee, guaw dyrr si hitt xee langg.
2 Ix cua guaw, hro guaw qniaa dirr oamr, byy dirr qngbingg.
3 Ix jinjniar tong' zit dauc dauc cud ciuw qongqig guaw.
4 Ix hro guaw ee bah qapp puee dalax .kir; Ix ad jric guaw ee quttauu.
5 Ix kiw toduix qongqig guaw, ing koxdok ee mic qapp qanlann uikunr guaw.
6 Ix hro guaw druar dirr oamr ee soxjai, cincniu siw quw quw ee langg jidngiu.
7 Ix ing livax uii guaw, hro guaw jauw be cud, Ix hro guaw ee ticlen naxx dang.
8 Guaw aiqiyr qriuu vangjan ee sii, Ix hro guaw ee qidyw be did diyc tniax .qnir.
9 Ix ing quer pah ee jiyhtauu trad bat guaw ee lo, Ix hro guaw ee lo uankiaux.
10 Ix duiwdirr guaw cincniu himm baihok lehh, cincniu sraix diamr amwbat ee soxjai.
11 Ix hro guaw belo, qra guaw tiahcuir, hro guaw lingxjing.
12 Ix kuirx qringx, ing guaw juer jniwvew.
13 Ix ing jniwde ee jnxir sria zip guaw ee jongrhuw.
14 Guaw jniaa juer guaw ee vecsnir ee ciywvnir; inx tong' zit ing guaw juer quakig.
15 Ix ing koxdok ee mic ciongmuaw guaw, ing indinn qra guaw quanr qaur qniax.
16 Ix ing suabuxliap pacjic guaw ee cuiwkiw, ing huexhux samw guaw ee sinkux.
17 Liw hro guaw ee simx lirkuix ving'anx hng hng; guaw be qir did hokkir.
18 Guaw dyrr qongw: Guaw ee kuiwlat suevai, qycc guaw dirr Jehovah hiax, longxx byy ngwbang.
19 Qriuu liw qir did guaw ee kunwkow, guaw ee qanlann, cincniu indinn koxdnaw.
20 Guaw ee simx duisniu jiaxee, dyrr dirr guaw ee vxag-lai utbun.
21 Guaw ee simx dywdngw sniu jitt xee su, soxiw guaw u ngwbang,
22 Guanw byy drir qaur bedbyy, si dui' Jehovah jiaxee ju'air; in'ui Ix ee linbinw buqiongjin.
23 Jruw ee zinjuu dagg jaxkiw nguarsinx; Liw ee singsit qigqii kuacdua.
24 Guaw ee simx qongw: Jehovah si guaw ee qigiap, in'ui anxnix guaw beh ngwbang Ix.
25 Qniwnarr tingwhau Jehovah, cuerqiuu Ix :ee, Ix beh six xunx hro ix.
26 Ngwbang Jehovah ee jinxqiur, jing jing tingwhau, jex si hyw.
27 Langg siauwlenn ee sii vue ix ee dnax, jex si hyw.
28 Ix diyhh qaqi jre, byy juer sniax, in'ui jitt xee dnax si Jehovah he dirr ix ee sinjniu.
29 Ix ee cuir diyhh ngar dirr din'aix, qiamxcaiw u ngwbang.
30 Ix diyhh quwjai langg pah cuiwpew, muaw muaw siurr lingziok.
31 In'ui Jruw dikkag byy ingxuanw kiwsag langg.
32 Jruw suizenn hro langg iubun, iauxquxx beh jiauww Ix vacvnuax ee ju'air, huad cud linbinw.
33 Ix hro langg siurkow iubun, m si Ix soxx qamsimx.
34 Langg jiong' sewjniu siurr qnuaiqnax :ee dac dirr kax-xe.
35 Iacc si dirr Jiww quann :ee ee binrjingg uankud langg,
36 Iacc si uan'ongw langg ee anwqnia, jex si Jruw soxx byy hnuahiw.
37 Narr m si Jruw soxx bingrling, jirjui e qongw ix jiurjniaa?
38 Hyw pnaiw dai qamxx m si cud dirr Jiww quann :ee ee cuir mah?
39 Langg uac dirr sewqanx, in'ui qaqi ee juerquar siurr hinghuat, sniaw su ai'uanr?
40 Lanw diyhh singxcad, cakyw lanw ee lo; qycc uat dngw laii qruix Jehovah.
41 Lanw diyhh henwsimx giac ciuw, ngr tnidingw ee Siongrder.
42 Guanw huanrjue vuergik, Liw byy siawbenw.
43 Liw ing siurkir dar guanw, duizib guanw; Liw qniaa jaubet, iarr byy linbinw.
44 Liw ing bat hunn ziakamr qaqi, drir qaur qidyw be e taur .quer.
45 Liw hro guanw dirr banrvecsnir ee diongqanx jniaa juer uwuer siurr kiwsag ee mic.
46 Guanw ee duiwdik longxx ngr guanw dua dua kuix cuir.
47 Qniahniaa qapp hamrknix, janhai qapp huixbet, longxx qaur dirr guanw.
48 Guaw ee vecsnir ee jaboxqniaw duw diyc huixbet, in'ui anxnix guaw lrauu bagsaiw cincniu kex.
49 Guaw ee bagjiux lrauu bagsaiw, byy tingg byy suah,
50 Diddit tingwhau Jehovah ngar lyc knuar, dui' tnix qamwcad.
51 In'ui guaw ee sniaa jiaxee jaboxqniaw, hro guaw ciokbok siongsimx.
52 Byy indnuax qapp guaw juer qiusiuu :ee duizib guaw, cincniu zib jiauw-aw jidngiu.
53 Inx hro guaw ee sniwmia siw dirr hamrknix, ing jit der jiyhtauu tun dirr guaw ee dingxbin.
54 Jerje juiw rimx quer guaw ee taukag; guaw qongw: Guaw byy mia lar.
55 Jehovah ar, guaw dui' cimx ee hamrknix qiuqiyr Liw ee miaa.
56 Liw bad tniax guaw ee sniax; guaw ee tehkuir qiuqiyr, Liw byc did ngx hnirkangx m tniax.
57 Guaw qiuqiyr Liw ee zit, Liw qinruaw guaw, qongw: Mrbenw qniax.
58 Jruw ar, Liw srinx guaw ee uan'ongw, Liw qiuwsiok guaw ee sniwmia.
59 Jehovah ar, Liw knuar qnir guaw soxx sriu ee uankud, qriuu Liw qra guaw pnuawduanr.
60 Inx uanwhun guaw, bohai guaw, Liw longxx u knuar .qnir.
61 Jehovah ar, inx luexme guaw, bohai guaw, Liw longxx u tniax .qnir;
62 Iarr tniax qnir hiaxee kiw laii qongqig guaw ee langg soxx qongw :ee, ixqip tong' zit soxx sed beh hai guaw ee qewboo.
63 Qriuu Liw quanknuar, inx jre lehh iacc si kiw .laii, longxx ing guaw juer inx ee quakig.
64 Jehovah ar, Liw diyhh jiauww inx ee ciuw soxx juer :ee, laii vywingr inx.
65 Liw diyhh hro inx ee simx qonggni, hro Liw ee jiuwjow qaur dirr inx.
66 Liw diyhh huad cud siurkir duiqnuaw inx; dui' Jehovah ee tnie jaubet inx.
4 Ai'ar, ngqimx tewqngx! Hyw qimx venwsig.
Sxingr sow ee jiyc hed dirr dagg diauu queci kauw.
2 Zion vyxquir ee jiongww qniaw tangx vixping hyw qimx.
Henrjai jnaixngiu knuar juer siyhuilangg soxx juer ee huikir!
3 Iaw qxauw siongrcniaw ing nitauu hro ix ee qniaw suh;
Guaw ee vecsnir ee hurzinlangg huanxdngw vnir juer janzimw, cincniu kongwiaw ee dyjiauw.
4 Jiac nix ee ngex-aw, ix ee jic dasyr, kic dirr jniurqniux;
Ginxaw tyw vniaw, byy langg vreh hro ix.
5 Vingsor jiac hyw mic :ee, dnaxx dirr quelo byy i'uaw.
Vingsor kunr dirr ju'angg ziog'aw, danxx dyw dirr vunwsywduix.
6 Guaw ee vecsnir ee jaboxqniaw ee juerquar, viw Sodom ee juerog kacc dang;
Ix bak nih quw dyxhuai, m si langg ee ciuw hro ix anxnix.
7 Zion ee sewqax vingsor viw seh kacc cingkir, viw lingx kacc vec,
Inx ee sintew viw angvyxgik kacc angg, cincniu lamvyxjiyc ee qngqut.
8 Dnaxx inx ee bin viw huextnuar kacc ox, dirr quelo nirr byy langg e zin .did;
Inx jit dingg puee vnrix jit dingg qud, qodaa cincniu jit qix dacaa.
9 Hro dyx taii siw :ee viw gy siw :ee, iauxx kacc dit;
In'ui si kiamwkueh canhngg ee toxsanw, jiamrjiam siaubyy, cincniu cxir cak taur .quer.
10 Jusimx ee hurzinlangg cinciuw juw ix ee qniaw;
Guaw ee vecsnir ee jaboxqniaw duw diyc huixbet ee sii, ing jitt xee juer bixniuu.
11 Jehovah itjin huad cud Ix ee siurkir, vniar cud Ix ee dua siurkir;
Kiw huew dirr Zion, siyx ix hiaxee derqix.
12 Derjniu ee qun'ongg, qapp sewqanx kiarkiw ee vecsnir,
Longxx m sinr duiwdik qapp qiusiuu e zip Jelusalem ee sniamngg.
13 Jex si in'ui ix ee sendix ee juerog, ix ee jewsix ee quewsid;
Inx dirr sniaa-lai lrauu langg ee huih.
14 Inx dirr quelo cincniu cnimii :ee luan luan qniaa, qycc hro huih bag lasamm,
Drir qaur langg m qnaw bongx inx ee snxax.
15 Langg huah inx, qongw: Siamw kuix, byy cingkir :ee! Siamw kuix, siamw kuix, m tangx bongx;
Inx dyjauw siwqer liux ee sii, ledvangx diongx ee langg qongw: M tangx hro ix iauxx qiawkax dirr jiax.
16 Jehovah siurkir qnuaw inx, byy qycc quanwqor inx!
Langg byy jundiong jewsix, iarr byy qingr diongxlyw.
17 Guanw iauxx decc ngwbang vangjan, drir qaur bagjiux en'ng, iuguann si kangx kangx;
Guanw dirr liaubang ee soxjai, liaubang jit xee be e qiur langg ee qog.
18 Inx cincniu paclac :ee duizib guanw ee kavo, drir qaur guanw m qnaw qniaa dirr guanw ee quelo!
Guanw ee qetqiok qin lar, guanw ee zidjiw muaw lar; in'ui guanw ee qetqiok qaur lar.
19 Duizib guanw :ee, viw kongdiongx ee ingjiauw kacc qinw!
Inx dirr snuax nirr duizib guanw; dirr kongwiaw baihok dngdanw guanw.
20 Jehovah soxx buah iuu :ee, tangx vixping guanw pnirkangx lai ee kuir, dirr inx ee hamrknix lai hro langg liac .diyc!
Lun qaur ix, guanw bad qongw: Guanw beh dirr ix ee diwimr xe, uac dirr ledqog diongx.
21 Kiarkiw Uz-de Edom ee jaboxqniaw ar, jueww liw hnuahiw kuaiwlok!
Jongwsirr koxvuex iarr beh pangg qaur liw hiax; liw beh limx qaur juir, qaqi trngr tecteh.
22 Zion ee jaboxqniaw ar, liw ee juerquar ee hinghuat ixqing’ jin lar.
Jehovah dikkag byy hro liw qycc siurr liac;
Edom ee jaboxqniaw ar, Ix beh vran liw ee juerquar;
Ix beh henxbingg liw ee juerog.
5 Jehovah ar, qriuu Liw qiwliam guanw soxx duw .diyc ee su;
Knuar guanw soxx sriu ee lingziok, laii qamwcad ix.
2 Guanw ee sanxgiap qruix dirr guarvanglangg,
Guanw ee cuwtec qruix dirr vadd jok.
3 Guanw si byy laurve ee qozii,
Guanw ee laurbuw cincniu qnuaxhu.
4 Guanw diyhh cud ginn jiacc u juiw tangx limx,
Guanw hniaa caa iarr diyhh brew.
5 Duizib guanw :ee cic diyc guanw ee amrqunw;
Guanw iawsen, be did diyc hiyckunr.
6 Guanw dauhangg Egiptlangg qapp Assylialangg,
In'ui beh did diyc bixniuu tangx jiac vaw.
7 Guanw ee ledjow huanrjue, dnaxx inx byy .kir lar;
Guanw diyhh damdngx inx ee juerquar.
8 Lovok quanxhad guanw;
Byy langg qriuu guanw tuatli inx ee ciuw.
9 Guanw vniar sniwmia laii did diyc bixniuu,
In'ui u dyqiamr dirr kongwiaw.
10 Guanw ee puehux ox cincniu huexloo,
In'ui qihngx laii huatzet.
11 Inx dirr Zion qiongqanx hurzinlangg,
Ixqip Judah jiaxee sniaa ee jairsikluw.
12 Inx vak hiaxee quiwjok ee ciuw, qra inx diaur li de;
Qnir diyc laurdua ee bin, iarr byy junqingr.
13 Siauwlenlangg qrngx jiyhby,
Ginxaw dnax caa, drir qaur vuahdyw.
14 Laurlangg byy qycc jre dirr sniamngkauw,
Siauwlenlangg byy qycc jokgak.
15 Guanw ee simx kuaiwlok ixqing’ suah,
Guanw ee tiauwbuw vnir juer vi'aix.
16 Guanw taukag dingw ee benxliuu qalauc,
Guanw u jaieh ar! In'ui guanw u huanrjue.
17 In'ui anxnix, guanw ee simx hrun .kir;
In'ui anxnix, guanw ee bagjiux huex.
18 Si uirdiyhh Zion Snuax pahngx;
Snuakauw qnia'iuu dirr hitt dingxbin.
19 Jehovah ar, Liw si ingxuanw dilehh;
Liw ee vyxjy dairdai byy suah.
20 Liw sniaw su ingxuanw be qir did guanw?
Sniaw su kiwsag guanw qaur hiacc quw?
21 Jehovah ar, qriuu Liw hro guanw uat dngw qruix Liw; guanw dyrr uat dngw.
Qriuu Liw nguarsinx guanw ee zit, cincniu jaxsii jidngiu.
22 Liw itjin qiwsag guanw,
Siurkir guanw qaur qik.