Daigiw Siuiongw Qongxue

(Jit-vah-zxic-id) Kiwjid simsux cuwbi juxgi anwjnuaw jiacc hyw

Lanw langg ee kiwjid diyh’air cimx qycc kuah jiacc hyw, jongw si m tangx soqongg. Soqongg diyrr si kacc m bad sewsu, qniadac ingxingw byy jiauww quiquw. Iaxx lanw langg ee simsux diyhh kacc jingbit jiacc hyw. Simsux diyrr si suniuu, jongw diyhh jabhunx sniu qaxx qaur, m tangx u kang’axpang hro langg’ e cngx .zip .laii, jongw si iarr m tangx jipquad sixykuaw su, qau jedaiw. Iaxx arr lanw langg ee cuwbi diyhh kacc dam dam jniaw jniaw, jongw si iarr m tangx sniu’ quer dam, sniu’ quer jniaw, penx dirr jit vnix, dasyr byy bi iarr m hyw. Iaxx arr lanw ee juxgi diyhh kacc giamjingr bingvik, iarr m tangx hro langg’ gorqaiw, iarr m tangx venwqingx, jongw si sniu’ quer qiglet, quer tingdo iarr bersaiw .did.

(Jit-vah-zxic-zi) Vunxsimx diyhh jionggiamm vaxag

Lanw ee hnirkangx tniax diyc jin’ hyw ee sniax, bagjiux knuar qnir jin’ suiw ee mic, anxnix jiaxee hnirkangx bagjiux sngr si druar dirr guarbin ee lanw ee dairdik. Iaxx arr lanw ee simqnuax sniu beh dnic beh air, hitt xee jing’iok ee iwsig sngr si druar dirr lairbin ee dua cat. Cincniu jitt kuanw ee dairdik dua cat, druar dirr lanw ee sinkux-gua cam’ sinkux-lai, vutsii decc siongr lanw ee kangpang. Juer juxlangtauu ee lanw ee simqnuax, diyhh e congbingg u vaxag, jre druar diongx dxen, giamjingr cywdir. Hitt xee dua cat, m na m qnaw laii cionghuan, dendyww e hro lanw hanghok, laii juer lanw ee kaciuw, hogjiongg vunxsimx ee bingrling. Soxiw lanw langg jiong’ lanw ee liongsimx, vutsii diyhh jingxdunr hro hyw.

(Jit-vah-zxic-snax) Derr id hyw ee iongxsimx hxuad

Lanw langg ee simqnuax vutsii diyhh hro ix kanghux. Narr si kanghux, hitt xee jingwgi cam’ jinliw diyrr jurzenn erdid zip .laii. Iurr simqnuax vutsii diyhh ciongsit. Narr ciongsit, hitt xee bud’iok diyrr berdid tangx cimzip. Soxx qongw kanghux, diyrr si cincniu bud’iok siasimx. Hitt kuanw ee simqnuax, diyh’air juanvo hro ix byy .kir, anxnix hy juer kanghux. Soxx qongw ciongsit, diyrr si jiong’ jingwgi cam’ jinliw ee simqnuax trad trad dni, anxnix hy juer ciongsit. Soxiw jiong’ jingwgi jinliw narr ciongmuaw dirr lanw langg ee simqnuax, diyrr hitt xee bud’iok siasimx juadduir byy pang tangx cimx .laii. Jex diyrr si derr id hyw ee iongxsimx hxuad.

(Jit-vah-zxic-sir) Ingwqaix duanjingr diyrr duanjingr, ingwqaix ingwvenr diyrr ingwvenr

Qokqax narr taiwvingg ee sii, u hitt xee kacc gauu ee jnaixsiongr, kacc gauu ee dairsinn decc dri qokqax. Qokbinn narr juer hyw, itding e hro sniuw, juer pnaiw, itding e hro huat. Gauu :ee e hro ix caixiong, vuthenn :ee e hro ix venw .kir, jingwsu dniardiyc e qongvnii. Soxiw lanw langg genlun hingdong, iarr diyhh duanjingr. U jingliw ee soxjai, ingwqaix diyhh qnaw qongw qnaw qniaa, kyxbenw sewzi. Narr si qokqax huanxluan ee sii, jingwgenn byy dikkag e hro ix caixiong, juer hyw birvid u tangx sniuw. Jingwsu u pentanw byy qongvnii, soxiw langg narr sniu’ jingwdit diyrr e sriu diyc iwgua ee jaie. Jongw diyhh suiqix ingwvenr, juer su uanuat jiacc ersaiw .did. Iurr qokqa suizenn iaxx bue qaxx zuarr huanxluan, byy dyrdig tangx hyw qniaa, hitt sii jiauww duxaw soxx qongw, ingwqaix duanjingr diyrr duanjingr, ingwqaix ingwvenr diyrr ingwvenr kir vran jiacc hyw. Jitmuaw beh duiwtai langg ee huatdo laii qongw, duiww hyw langg diyhh kacc kuanx, duiww pnaiw langg diyhh kacc giamm. Duiww poxtongx langg kuangiamm vnivnii ing, diyrr si air kuanx diyrr kuanx, air giamm diyrr giamm jiacc hyw.

(Jit-vah-zxic-go) Dirr amr amr byy langg knuar qnir ee soxjai rair jabhunx qinxsin

Suxqir Penxciog Cngqongx Ledduan ee buew jit jam u qongw, hiwkir qapp pnirkangx sna’ tongx. Pnirkangg narr hxyy, diyrr e jaix caur jaix pangx. Qankir qapp bagjiux sna’ tongx. Bagjiux narr hxyy, diyrr jaix vec jaix ox. Pikir qapp cuir lenlok. Cuir narr hxyy, diyrr jaix gnoxqog ee bi. Simkir qapp cuiwjic sna’ tongx. Cuiwjic narr hxyy, diyrr jaix qiamm sngx dnix kow luac ee gnoxbi. Sinrkir qapp hnirkangx sna’ tongx. Hnirkangx narr tongx, jaix qiongx-siongx-qag-diw-uw ee gnoximx. Ix qongw anxnix, soxiw qanjong narr itdanr siurvni, diyrr qapp ix u lenlok ee bagjiux jurzenn e pnaiw .kir, suar byy knuar .qnir. Iaxx arr sinrjong narr u vni, diyrr qapp ix lenlok ee hnirkangx iarr suar byy tniax .qnir. Lanw langg ee vni cincniu jitt kuanw dairsingx dirr hitt langg bagjiux soxx knuar be diyc ee soxjai kiw vni. Qaur buew huad .cud .laii dirr hitt bagjiux soxx knuar e diyc ee soxjai. Soxiw bylun simxmih dairjir, jongw diyhh dirr langg byy knuar qnir ee soxjai rair qinxsin jiacc hyw. Lanw langg narr byy air juer m driyc, byy air u quewsid, diyrr vutsi dirr hitt amr amr byy langg knuar qnir ee soxjai, jabhunx qinxsin, jabhunx dihongg jiacc hyw.

(Jit-vah-zxic-lak) Vutzuu siuxduad erdangr anunw

Narr si kacc ciaciw ee langg, qyckacc u jnii iarr si in’ui gauu ing, soxiw vutsii byy qraur. Narr si kacc kiam ee langg, suizenn kacc sanwciah, mrquxx longxx m qramx ing, soxiw vutsii u qraur ing. Narr si u jaidiau ee langg, diyrr denw ix ee vunxsu, kir juer qokk jiongw ee dairjir. In’ui anxnix ingxingw kir cimhai diyc vadd langg ee lirig. Ix qaqi vutsii decc vniawser dendyww hro vadd langg uanwhun. Iaxx narr si kacc byy vunxsu sniu’ dit ee langg, dagg hxang kacc hamban, byy beh cab dairjir, ingg ingg decc tiongwlok. In’ui anxnix erdangr uanjuann ix vunxlaii ee tensingr. Lanw narr jai’ngiaw jitt xee dyrliw, ciaciw gauu ing, vutsii kaur byy jnii, lingkyw kacc jetkiam, vutsii u tangx hyw ing. Ing ix ee jailingg sniu’ quewtauu, juer dairjir hro langg’ uanwhun, vutzuu siuxduad erdangr an’unw. Jex si qik anjuann ee huatdo.

(Jit-vah-zxic-cid) Beh tagjux simqnuax diyh sew hro cingkir

Lanw beh tagjux ee sii, m tangx sniu dangx sniu saix, dikkag diyhh jiong’ bingli ee simqnuax sew hro cingkir jiacc tangx tak qoxjaxlangg ee jrux, yc qoxjaxlangg ee hyw .cxur jiacc hyw. Narr m si anxnix, lanw ee simqnuax byy cringx kir tagjux, narr tak jit jam qoxjaxlangg juer hyw ee dairjir, ix diyrr kiyh hitt xee dairjir laii juer jailiau tangx kir luan juer. Narr si knuar qoxjaxlangg qongw hyw ee ue, ix iarr tec hitt xee juer jailiau tangx iamxsig ix soxx juer ee pnaiw su. Narr si jitt kuanw, cincniu giaa qesix kir jiyh qiongdy, unrvnuax biw kir hro cat-aw siangg kuanw, knuar guihiamw iacc be guihiamw. Soxiw lanw langg beh tak qoxjaxlangg ee jrux, diyhh dairsingx lanw ee simqnuax hro ix cringx cringx, hro ix kangx kangx jiacc tangx tak. Iaxx arr gunw ee juxde qaqi berhiauw tangx cringx simx, soxiw gunw dik hitt xee iuxig ee jrux hro ix kir tak jiacc hyw. Narr tak m driyc jrux, susiongw vnir pnaiw diyrr byy hxuad tangx qiur.

(Jit-vah-zxic-veh) M tangx hro lnagg’ qongw lau zii vutsuw si ruii cat

Cuntnix jid’err qaur lehh, iarr be qnuaa, iarr be zuac, kiwhau unhyy. Vah kuanw ee huex jiauu kuix, qetnix jit jann ee suiw. Jiauw-aw decc hauw hitt xee snia’imx iarr digvet hyw tniax, hongwqiamx juer langg qajair cutsir dirr jitt sewqanx, jiamr hyw derui, viw vadd langg quann jit dringw. U tangx jiac vaw cing siyx, diyrr ingwqaix huathunw, viw vingsiongg langg qevue loxlik. Yc hagbun, sriux dyrdig, qongw jingwqingx ee girlun, lip jingwdai ee surgiap tangx iuxig sewdy zinsimx jiacc ersaiw .did. Narr berdid tangx anxnix, suizenn dngg huewsiu, u tangx jiac jit-vah huer iarr si byy loring. Bycaiw ix yc hagbun hro langg’ qongw lau zii vutsuw si ruii cat.

(Jit-vah-zxic-qauw) Knuar lanw simqnuax sniu sniaw kuanw

Zidvunw ee siogguw qongw “Qankow si anlok ee jingxjiw, anlok si qankow ee jingxjiw”, jex longxx urngiaw. Lanw dagg hxang dairjir berdid tangx jiauww lanw ee iwguan. Huisiongg qankow ee sii, knuar lanw ee simqnuax sniu sniaw kuanw, simqnuax narr hnua ix hyw, diyrr suizenn dirr qankow ee diongqanx iarr hro lanw ee simqnuax erdangr kuaiwlok. Narr m si anxnix, suizenn dirr hitt dua huatdenw dua iongkir ee sii, iarr birbenw u hitt xee vadd langg soxx m jai’ngiaw ee huanlyw. M na qongw u jitt kuanw ee huanlyw, ursii cincniu hiacnirr dik’ir-iong’iongg ee sii, ingxingw e srid jimjiog suar e ham zip sit’ir qankow ee qingxgu. Suizenn ham zip sit’ir qankow ee qingxgu, narr e hunwle loxlik, diyrr jurzenn e banxhuee hitt xee sit’ir, qaur buew e vnir juer dik’ir. Soxiw lanw langg dik’ir ee sii iarr diyhh qingxqair qinxsin, sit’ir ee sii iarr diyhh hunwle loxlik jiacc erdangr juanxhy-uihog.

(Jit-vah-snax-jap) Dyrdig kacc ngiaa qonggiap quanlik

Qongw huwquir qapp bing’u, knuar hex e did .diyc ee guaninx byy siy’ siangg. Uree erdangr vyxcii kacc quw, uree berdangr vyxcii kacc quw. Ui’ dyrdig did .diyc ee huwquir qongbingg, cincniu dirr huehngg nirr jurzenn huad .kiw .laii ee huejangg, qinx cimx, tauu dua, qix je, hiyc am, iaxx arr erdid tangx uac kacc quw. Narr si ui’ qonggiap did .diyc .ee, naxx cincniu jingr dirr huepunn ee huex, hitt xee qindew viw huehngg :ee jurzenn kacc cenw, be kacc dua jangg, soxiw ursii huex kuix jin’ je, urdangsii aw qui’ jangg e dax .kir. Iaxqycc ui’ quanlik did .diyc .ee, cincniu cah dirr hueqanx nirr ee huex, byy qintauu, soxiw dongr byy quw. Jiauww anxnix knuar .kiw .laii, diyrr e jaix qonggiap kacc ngiaa quanlik, iaxx arr dyrdig kacc ngiaa qonggiap. Soxiw lanw langg narr air beh vyxcii quxdngg ee huwquir bing’u, diyrr ingwqaix ui’ dyrdig kir did .diyc jiacc hyw.

(Jit-vah-snax-jap-id) Jinx bi si sniaxhuer

Cincniu hitt hy pydyy bixjiuw, iacc si samjanbah, si jin’ hyw jiac ee mic. Cincniu tngbit hitt kuanw jin’ dnix ee mic, cincniu qaiwluac hitt kuanw jin’ luac ee mic, longxx u jit jiongw ee hyw bi. Mrquxx longxx byy camx vadd mic qanda’ jiac hitt hxang, diyrr itding e iar, qaur buew lenrr knuar dy’ suar byy air knuar. Hex si anwjnuaw? Si in’ui jitt xee mic suizenn si hyw jiac, mrquxx hitt xee bi si kacc penx ee bi, m si jinx ee bi. Soxiw jiac sniu’ je dyww qankow. Soxx qongw jinx ee bi diyrr si ing biw juw ee vng, ing mirhunw juer ee mirvaux, hitt kuanw suizenn jubi jin’dam, byy digvet hyw jiac, mrquxx dagg zit jiac, jiac kacc quw dy’ be iar, si in’ui qik hyw jinjniar ee bi jiacc e anxnix. Iurr cincniu juer dairjir, juer hitt hy qikaw qyc’ngiu, vutkyw-sugi :ee, higsi qongxue qongw hitt hy iaujnix quixquair ue, jitt kuanw ee langg itding m si yc dyrdig yc qaxx lingtongx ee langg, genxqiur dyrliw genxqiur qaxx jin qigtauu ee langg. Ix qongxue iarr vingsiongg, juer dairjir iarr si poxtongx, dniardiyc byy qyc’ngiu. Kongxjuxqongx vingsii byy qongw quaiwlik luanrsinn ee ue. Henrcuxsii ee langg, uree knuar hudqingx knuar nng~snax iac, yc dithak yc quiw diauu aw diyrr air qongw dua kangx ue. Jnia’ kxtanr.

(Jit-vah-snax-jap-zi) Derr id anjuann ee huatdo

U jit xee kangx kangx ee qxanx-aw, he druar hitt juixqngx-lai. Qxanx-aw-lai byy drew juiw diyrr krix .lyc .kir, diyhh drew vnuar qxanx-aw juiw diyrr e jniar, narr drew qaxx dni dni diyrr dyw .lyc .kir. Jitt kuanw si Kongxjuw qaguw Kongxjuxqongx soxx qongw “___” dyrr si jitt xee iwsur. Iurr cincniu too juer ee drew jnii ee kiwqu, hy juer qongxx pokmuaw. Hitt xee cuir kacc sog, lairdew kangx kangx, benw qniax e dyw. Juer qunjuw ee langg, m qnaw qriuu buanxjiog ee derui, vutsii jrunn jit xee buanw jiausunw ee simqnuax dilehh. Jex dy’ si derr id anjuann ee huatdo.

(Jit-vah-snax-jap-snax) M jaix qankow ee langg ee hyw .cxur

Langg beh dro quer sewqanx, uree sing’uac vutjiw sunrdiau, longxx m jai’ngiaw sewsiong ee qankow vicamw. Naxx cincniu sun hongx sraiw junn, junn longxx byy iyy, diddit qniaa .kir, m jaix langg ee guihiamw. Iaxx arr uree gu diyc jiongw jiongw ee kunwlann, vutsii qapp hitt xee kunwlann dowjingx. Naxx cincniu junn decc haiw diongngx, gu diyc hongtaix, hong’ingw jin’ dua ee kuanw, diyrr si junn hro dua ingw pah quer laii pah quer kir. Junw be dimm .lyc .kir iarr e pacpnaiw .kir, jnia’ guihiamw, jnia’ qankow. U langg sing’uac dirr sewqanx, narr siongsiongg gu diyc jitt kuanw ee qankow, ix diyrr air beh uac, ursii vutdikvud diyhh ing vorsor, sraiw amwqer laii pacduu hitt kuanw ee joxgai. Jongw si m jai’ngaiw sewsiong dua qankow ee langg, kacc byy ziamw diyc sewqanx lacsab ee sibquanr. Soxiw jitt kuanw ee langg tenjinx lanrban, longxx byy jit diamw aw siakiog, lanw jiacc tangx jabhunx e sinwiong .did. Narr si sriu qankow ee langg, sniu liauw longxx vutdid kaikiaur, diyrr ing vorsor beh muapenr langg’ decc quer zit. Hitt kuanw ee langg dniardiyc ix ee taunauw jin’ lrai, qycc u jaijingg u ciuxuanw, juer dairjir iarr jin’ binxjet, mrquxx hro langg’ be ansimx, diyh’air jabhunx dniudii qingxqair jiacc ersaiw .did. Soxiw juer qunjuw ee langg, mrbenw dikkag diyhh bad sewsu. Sewjingg sniu’ srig sniu’ tongx, gauu vnir gauu cngr, lingkyw byy siakiog, kacc poksit, kacc diaudit jiacc hyw. Iurr benw dikkag diyhh sniu’ quer sewzi, sniu’ quer cinced, lingkyw kacc damrvyc, byy kusog, diyhh hongwciongr jiacc hyw.

(Jit-vah-snax-jap-sir) Ingwqaix diyhh u snax hunx ee girhiabsimx

Lanw langg beh qapp ving’iuw qauvuee, jongw diyh’air u snax hunx ee girhiabsimx jiacc hyw. Guaw knuar henrcuxsii sewqanx ee langg, qongxx si dagg xee ving’iuw dirdecc qauvuee, vingsor laii laii kir kir, snaqab qongxue, hnuahiw limx jiuw, jid’err knuar qnir jin’ u zedjingg, jin’ sionghyw ee kuanw. Mrquxx hitt xee ving’iuw, itdanr puawvni, vni quixnarr guehzit, uree lenrr kir siy’ tamr dy’ byy. Iaxx iarr uree sitgiap bydangr tanr, cur nirr taucuir je, snax dxngr byy tangx jiac qaxx vaw. Knuar ix hitt kuanw ee qankow, ix iarr byy sniu beh vangjo .ix. Jex sidjai si jinjniar kyxtanr. Soxiw lanw langg narr beh qauvuee ving’iuw ee sii, ingwqaix diyhh u snax hunx ee girhiabsimx, vutdan vingsii qanda’ laiongw damciaur limx jiuw, diyh’air snaqab benxle, snaqab vangjo, duw diyc qethiongx-hyrhog ee sii, dagg xee snaqab hnuahiw, snaqab huanlyw, jiacc ersaiw .did. Qycc jit hxang diyrr si, langg druar dirr sewqanx, qapp vadd langg snaqab sing’uac, diyrr rair hyw :ee snqab juer, pnaiw :ee snaqab qingxqair. Jongw si hex iarr diyhh knuar tingdo. Lanw ee simqnuax diyh’air u jit xee sowsimx. Sowsimx diyrr si jin’ sunjingr, jin’ cingqed, beh kir hro guarbin ee lacsab ziamw .diyc hitt kuanw ee simx. Setsuw aw narr srid liauw jitt xee sowsimx, qaqi ee simqnuax diyrr vutsii hro sewqanx jiongw jiongw ee dairjir pah lacsab, suacbuew lanw ee simqnuax suacc e hro ix ox .kir.

(Jit-vah-snax-jap-go) Qunjuw qapp siauxzinn byy siysiangg ee soxjai

Juer qunjuw ee langg, ix ee simqnuax longxx byy jit diamw aw viwbit, jin’ si qongbingg-jingwdai, naxx cincniu cingtenx-vigzit, longxx byy jit diamw aw puhunn ziax .did. Narr si siauxzinn diyrr siongsiongg e hro langg’ qongw ix ee simqnuax olokdo, hro langg’ be liau .did. Qunxjuw ee langg m si anxnix. Ix ee simqnuax in’ui jin’ qongbingg, soxiw cinwcaiw langg dy’ e jai’ngiaw. Mrquxx ix ee hagbun jaijingg diwsig, cimx cimx kngr dirr hitt vakdow-lai, naxx cincniu jugiok ee vyxvuer tec kir kngr, hro langg’ berdangr jai’ngiaw. Narr si siauxzinn diyrr air jurkuax, air pongwhongx. Soxiw ix qaqi narr u siyxkuaw jailingg diyrr air hro langg’ jai’ngiaw. Narr jaix jit~nng hxang dairjir, diyrr snix kax snix ciuw, qongw dingvue hro langg’ tniax. Mrquxx ix ee simqnuax decc sniu sniaw kuanw, longxx m kingw hro langg’ jai’ngiaw, iurr beh qapp langg’ qauvuee, iarr byy sing’ir, iarr byy zedjingg, qauvuee kacc quw diyrr e hro langg’ pixvok. Qunjuw ee langg m si anxnix. Ix ee simqnuax naxx cincniu guec hiacnirr qngx, soxiw lanw erdangr ansimx qapp ix qauvuee, qauvuee zuxx quw zuxx u cuwbi. Ix ee hagbun vaw, jaijingg dua, soxiw hro langg air qapp ix jiapqun, air tniax ix qongx ee ue. Jex si qunjuw qapp siauxzinn byy siysiangg ee soxjai.