derr jap-go jniux

DERR 15 JNIUX

TIGVET CRI VNIRLANGG EE HXUAD

Narr si vnirlangg be tunx mic, iacc si naauu u ciuxsudjingr, be tunx mic, diyhh ing digvet ee huatdo laii cri ix. Vnirlangg narr u nauxjikcuexmoh’iam, iacc si sidhudiklixax (veh’aujingr), iacc si tunx mic ee qinbah bavir, ursii diyhh ing ciurlingqngw hro sidbut zip ui nirr. Ing jitt xee huatdo, u nng diauu lo: (1) dui’ pnirkangx, entauu, jiahdy, ui; (2) dui’ cuir, entauu, jiahdy, ui (derr 130 doo).

Tauu jit vaiw dniardiyc rair isingx cri ix, kanwho qapp isingx dairsingx virvan itkair soxx diyhh ing ee mihqnia, jiauww erbin soxx qiw :ee:

1. Cuann jit diauu, qycc nngw, beh dui’ pnirkangx congr mic hro vnirlangg jiac ee ciurlingqngw. Kacc siongg soxx ing ee ciurlingqngw, si decc tongx ziyrdy ee ciurlingqngw (dyrziyrqngw, urethral catheter, Jaques’ catheter, No. 6). (Narr quer ing dyrziyrsut jiurr m tangx ing).

2. Narr si byy qraur dngg, diyhh lingrgua jenw jit diauu ciurlingqngw siy’ jriab; siy’ jriab ee soxjai ing vyleqngw.

3. Binrqinx, binrtangw, siyx juiw, jiong’ ciurlingqngw jimr hro nngw. Jit der ser der dic-aw drew glycerinum.

4. Isingx soxx huanhur ee sidbut, cincniu guling, bactngx, iacc si gulingx praur qenng; iarr diyhh u 100 dxo F. (37.8∘C.) siyx.

5. Jit der, ser der ee vylee laurdauw (funnel), laii draur dirr ciurlingqngw.

6. Ing glycerinum buah ciurlingqngw, beh zip pnirkangx hitt tauu buexliux. Cngx ciurlingqngw derr id diyhh siyxsimx ee su, iauwqinw diyhh diddit kyr ervnix; kinx kinx qra ix cngx .lyc .kir, cenban m tangx duc hro duiww entauu ee dingxbin kir, iacc si hro ix qycc zip cuir-lai kunn lehh. Iauxx u jit kuanw unlann (?) ee soxjai, jiurr si ciurlingqngw ursii e cngx duiww kiwqngw-lai zip .kir; jueww iauwqinw diyhh siyxsimx. Satsuw ciurlingqngw, cngx duiww kiwqngw zip .kir, virlangg dniardiyc e dua sraur, jiurr tangx jaix si cngx m driyc, anxnix diyhh tiux cud laii, qycc cngx zip. Narr ciurlingqngw cngx zipkir liauxau, vnirlangg iuguann jiauww qu decc hokab, jiurr tangx jaix dniardiyc byy cywgo.

7. Narr si nihuer ixqingx diongxsingg ee langg, diyhh cngx duiww cuir kiw, 10 cunr (Zidvunw cunr, jiurrr si 33 cm.) zip kir jiacc habsig. Narr zip jiahdy byy qaur ui, byy iauwqinw. Narr si ginxaw diyhh kacc dew. Dairkair qongw go huer ee ginxaw diyhh cngx 7 cunr jiurr hyw (21 cm).

8. Dairsingx ing jit tngsii lalunn siyx ee qunxjuiw dryr he laurdauw. Narr lrauu hyxser, byy sraur, jiurr tywdongr. Hitt sii diyhh ing gulingx (iacc si hro ix soxx jiac ee mic), unn unn aw dryr he laurdauw, hro ix lrauu .lyc .kir. Jongw .si diyhh siongsiongg hro ix lrauu, m tangx hro laurdauw u langr kangx, in’ui laurdauw jid’err langr kangx, kongkir e jngr zip kir dirr vnirlangg ee ui nirr; anxnix jiurr vnirlangg e auxtor, iarr ui e kokdiong.

9. Narr ixqingx jiac qauwgiac, ciurlingqngw diyhh gnec ann, hro ciurlingqngw-lai ee mic byy lrauu cud, dihongg mic zip kiwqngw; unn unn aw tiux cud laii, sew cingkir, jimr dirr lotio acidi borici.

Narr si cri sewqniaw, iacc qniax ee langg, diyhh qiyr jit langg draur vangjan; jiong’ ix ee ciuw liac ann, byc did hro luan luan ziaur. Acc si ing pingduar, jiong’ nng qix ciuw vak diauu, iarr tangx.

Dingxbin hiaxee huatdo, kanwho diyhh siyxsimx, knuar isingx jnaixngiu juewhuad, longxx diyhh kir hro ix cingcyw. Dairkair isingx vutqyr cri vnirlangg jit vaiw, aurlaii jiurr si kanwho ee gxiac.

Narr si vutsingxzinsu hitt kuanw ee vnirlangg, narr vnirlangg u diab aw quw e jingsinn, diyhh tranr hitt diap, ing tngsii ngiuw damrvyc gulingx, he ix cuiwdunn-vnix, cir knuar ix e tunx iacc be; jongw .si m tangx je, qniax liauw sidbut e dui’ kiwqngw zip kir hir-lai. Narr mic zip kir hir-lai, langg e siw, iacc si vniwjniaa hiwiam.

Ing sew ui ee ciurlingqngw, cri vnirlangg ee huatdo. Jitt xee huatdo si kacc siongg decc cri duarlangg. Iarr ing ciurlingqngw dui’ cuir cngx zip. Huatdo dairkair si qapp qir dirr dingxbin :ee siy’ siang. U digvet ee kuicuiwkir, si caa juer :ee, diong’ngx u jit xee kangx, beh cngx ciurlingqngw ee loring, dihongg vnirlangg beh qa (derr 131 doo).

Ing’iongxquanwdngg (營養灌腸, Nutrient enema): Narr si ui nirr, be e drew did sidbut (in’ui auxtor, ui snix uiwiongg, ui diyhsiongx, naaujingr, cuir-lai ciuxsut ee enqor), diyhh sethuad dui’ diddngg laii quanr en’iongliau. Ursii vnirlangg ciuxsut liauxau jin’ siongdiong; isingx beh huanhur diyhh ing jitt hy ing’iongxquanwdngg.

A. Dairsingx virvan ing’iongxliau beh quanwdngg. Soxx ing ee huatdo, diyhh isingx juxir, jongw .si kanwho diyhh erhiauw congr. Kacc siongg jitt hy ing’iongxliau, diyhh dairsingx ing juirigsiauhuar ee huatdo, virvan hro ven.

Qenng diyhh dog puar, ing dikciamw pah. Zen’au ing soxx beh quanr ee mic longxx la hro jiauu.

Jiauww isingx soxx huanhur tangx camx pudyjiuw, apenr, iacc si simxmic vadd kuanw ee iyc.

B. Quanwdnghuad:

1. Narr vnirlangg dxngg-lai u vunr, hro ix ing’iongxliau si byy loring, soxiw dairsingx diyhh hro ix satbunjuiw quanwdngg. Jitt xee diyhh congr 24 diamxjingx jit vaiw. Sew liauxau, diyhh hiyh jit diamxjingx quw jiacc ciongx ing’iongxliau hro :ix.

2. Dairsingx tec jit diauu cngx diddngg ee ciurlingqngw (iacc si catheter), qycc tec jit diauu2, 3 ciyh dngg vingsiongg ee ciurlingqngw. Ing jit qix vyleqngw jriab dirr hitt diauu cngx diddngg ee ciurlingqngw, qapp vingsiongg ciurlingqngx ee diongqanx; ciurlingqngw ee dingxbin qycc jriab jit der ser der ee laurdauw (juiw-lai, funnel); ing siyx juiw jimr ciurlingqngw diab aw quw.

3. Beh cngx qongbunn ee ciurlingqngw, hitt dingxbin, buah huasuling’iuu (vaseline).

4. Narr vnirlangg e dinxdang, jiurr qah ix tex dywciuxvingg, jiacc qah ix katuiw qiux kiw laii. Ing jimxtauu iacc si mipue quew vnirlangg ee qutvnuaa hro kacc qnuaii damrvy, hro juiw kacc kuair lrauu .zip .kir.

5. Jueww iauwqinw :ee, ciurlingqngw qapp laurdau ee diongqanx, diyhh jiong’ beh quanr .zip .kir ee mic drew hro muaw, byc did hro kongkir dirr hitt nirr, laii zip vnirlangg ee dxngg-lai. Beh quanr .zip .kir ee sii, diyhh ing ciuw duiww ciurlingqngx nic lehh, byc did hro ix lrauu .cud .laii; jiacc jiong’ ciurlingqngw cngx zip kir qongbunn-lai 10, 11 cunr dngg. Byc did hro soxx quanr ee mic lrauu .cud .laii.

6. Derr id iauwqinw :ee, dairsingx diyhh ing hanluanqer knuar undo u 98 dxo F. (36.7∘C.) iacc byy; m tangx kacc qnuaii. Diyhh ban ban quanwzip .Ing 300.0 c.c., quanwdngg diyhh vnuar diamxjingx quw jiacc hyw. Decc cngx, iacc si quanr ee sii, vnirlangg ingqaix m jaix tniar. Narr vniarlangg qongw tniar, kanwho diyhh sewzi cngx, in’ui ciurlingqngw narr sniu’ gni, e siongx diyc dxngg-aw-lai ee liammoc, narr u dok dui’ hiax zip .kir, qniax liauw e hai langg.

7. Mih quanr zip liauxau, ciurlingqngw, diyhh unn unn aw tiux cud laii, jiacc qycc ing mihuex trad qongbunn-kauw diab aw quw, byc did ho mic jauw .cud .laii.

8. Soxx ing .quer ee qesix, diyhh sew, siux kiw laii kngr.

Jyriyc: Ursii ing jit liap iyh’uann, trad zip qongbunn-lai, imdy iacc si ziyrdy-lai, qiyr juer jyriyc (坐藥, suppositorium). U bah juer ee jyriyc, iarr u gulingx juer :ee (derr 132 doo). Hro vnirlangg jyriyc ee sii, diyhh hro ix tex dirr dywciuxvingg.

1. Ing oleum olivae iacc si vaseline buah vnirlangg ee qongbunn.

2. Buah damrvyc oleum olivae, iacc si vaseline dirr hitt liap jyriyc ee dingxbin.

3. Kanwho diyhh ing jit der vor-aw, dnii dirr hitt qix qixjnaiw, iacc si qruar jit xee jngxtau’aw ee ciurlinglongg, jiacc unr damrvyc vaseline. Tec jyriyc, hitt tauu kacc jiamx ee buew:a nngr zip dirr qongbunn-lai, jiacc ing mihuex trad qongbunn-kauw tiab aw quw, byc did hro jyriyc cud .laii. Narr si ing ing’iongxjyriyc hro vnirlangg, dagg zit jit vaiw diyhh satbunn qapp siyx juiw, sew diddngg hro cingkir.

Huanrnarr virvan beh dui’ qongbunn sria .zip .kir ee mic, jueww iauwqinw :ee, diyhh dairsingx knuar hanluanxqer ee undo. Narr kacc siongg dui’ qongbunn decc quanr sidbut ee langg, ursii kacc byy lat tangx siusog; jiurr diyhh hro ix hiyh quiw diamxjingx quw, jiacc qycc quanr, viw dairsingx soxx quanr :ee giahsor diyhh kacc qimaw damrvyc. Ursii qongbunn-kau vutjiw tniar, hitt sii diyhh ing huasulingiuu (vaseline), iacc si pingsng’iuu (unguentum acidi borici), buah dirr qongbunn ee guarbin.

Ursii ui ciuxsut liauxau, (uirluxkuikauxsut, 胃瘻開口術, gastrostomy) diyhh dui’ ui laii cri ix. Isingx ciuxsuit liauw, jiurr ing jit diauu ciurlingqngw, jit tauu cngx zip ui nirr ee diong’ngx, ing snuar vak hro diauu; jit tauu he dirr singkux ee guarbin (derr 132a doo). Beh cri ee sii, laurdauw, jriab dirr guarbin hitt tauu ee ciurlingqngw, aurlaii ing gulingx, iacc si bac’ik, dryr dirr hitt der laurdauw nirr; ingqaix diyhh cri zuarr je, isingx e dairsingx tongdix hro kanwho jaix; iarr tauu jit vaiw iuguann diyhh isingx dairsingx cri inx; zen’au kanwho diyhh cri inx, qokk 4 diamxjingx quw jit vaiw. Ursii uirik e dui’ hitt xee ui nirr ee siongcuir, lrauu cud, soxx cri ee mic duer ix lrauu .cud .laii, jiurr puee e tniar. Jitt kuanw ee vni, juer kanwho ee langg, si byy hiacc iong’ngi.

huedngw tauu iac