Ezla
1 Dng' Persia Ongg Kylus guannii, in'ui beh ingwgiam Jehovah tog Jelemiah soxx qongw ee ue, Jehovah dyrr qikdong Persia Ongg Kylus ee simx, hro ix suanvor dirr tong' qog, qycc siaw .cud .laii, qongxx Persia Ongg Kylus anxnix qongw,
2 "Tnidingw ee Siongrder Jehovah jiong' tnie ee banrqog sniuxsur guaw, qycc bingrling guaw dirr Judah ee Jelusalem qra Ix kiw dxen.
3 Linw diongqanx qniwnarr juer Ix ee vecsnir :ee, tangx jnriu kir Judah ee Jelusalem, dirr Jelusalem qycc kiw Jehovah, Islael ee Siongrder ee dxen, guan ix ee Siongrder qapp ix dilehh; Ix jinjniar si Siongrder.
4 Qniww soxx cunx ee langg, bylun qiawkax dirr simxmih soxjai, hitt soxjai ee langg diyhh ing qimx, ginn, jaibut, jingsnix, vangjan ix; lingrgua iarr diyhh uirr Jelusalem Siongrder ee dxen, qamsimx henr lexmic."
5 Dui' anxnix Judah qapp Benjamin ee jogdniuw, jewsix, Levilangg, qniwnarr hro Siongrder qikdong ix ee simx :ee, longxx kiw .laii, beh jnriu kir Jelusalem, kiw Jehovah ee dxen.
6 Inx siwuii ee langg dyrr ing ginkir, ing qimx, jaibut, jingsnix, vyxvuer, voxjo inx; lingrgua qycc u qamsimx henr ee lexmic.
7 Kylus Ongg iarr jiong' Jehovah dxen-lai ee kiwqu tec .cud .laii, dyrr si jingg Nebuqadnezar dui' Jelusalem vnuax .laii, he dirr ix hiaxee siongrder ee biy :ee.
8 Jiaxee kiwqu, Persia Ongg Kylus tog quanw kowvangg ee Mitledat tec .cud .laii, diamxsngr ix, qaux hro Judah ee siuxlingw Sesbazar.
9 Inx ee siauwgiac qir dirr erbin; qimvnuaa snax-jap der, ginvnuaa jit-cingx der, dyx zi-jap-qauw qix,
10 Qimngaw snax-jap der, ginnguaw derr zi van :ee sir-vah id-jap der, vadd ngiu ee kiwqu jit-cingx qnia; qimx, ginn ee kiwqu qiong go-cingx sir-vah qnia;
11 Duar siurr liac ee langg dui' Babylon jnriu qaur Jelusalem ee sii, Sesbazar jiong' jiaxee longxx duar .jnriu .kir.
2 Jingg Babylon Ongg Nebuqadnezar hro langg liac qaur Babylon, Judah Singw vecsnir diongx u langg dui' siurr liac qaur ee soxjai dyr laii Jelusalem qapp Judah, dagg langg dyr kir ix ee sniaa;
2 Dyrr si qapp Zelubbabel, Josua, Nehemiah, Selaiah, Rleelaiah, Mordekai, Bilsan, Mispar, Bigvai, Rlehum, qapp Baanah, jitt quaw langg snaqab dyr .laii .ee.
3 Islael ee vecsnir ee langgiac qir dirr erdew. Palos ee horer, nng-cingx jit-vah cid-jap-zi langg.
4 Sefatiah ee horer, snax-vah cid-jap-zi langg.
5 Alah ee horer, cid-vah cid-jap-go langg.
6 Pahat Moab ee horer, dyrr si Josua qapp Joab ee horer, nng-cingx veh-vah id-jap-zi langg.
7 Elam ee horer, jit-cingx nng-vah go-jap-sir langg.
8 Zattu ee horer, qauw-vah sir-jap-go langg.
9 Zackai ee horer, cid-vah lak-jap langg.
10 Bani ee horer, lak-vah sir-jap-zi langg.
11 Bebai ee horer, lak-vah zi-jap-snax langg.
12 Azgad ee horer, jit-cingx nng-vah zi-jap-zi langg.
13 Adonikam ee horer, lak-vah lak-jap-lak langg.
14 Bigvai ee horer, nng-cingx lenn go-jap-lak langg.
15 Adin ee horer, sir-vah go-jap-sir langg.
16 Ater ee horer, sriok Hezekiah :ee, qauw-jap-veh langg.
17 Bezai ee horer snax-vah zi-jap-snax langg.
18 Jolah ee horer, jit-vah id-jap-zi langg.
19 Hasum ee horer, nng-vah zi-jap-snax langg.
20 Gibbarlangg, qauw-jap-go xee.
21 Betlehemlangg, jit-vah zi-jap-snax xee.
22 Netofahlangg, go-jap-lak xee.
23 Anatotlangg, jit-vah zi-jap-veh xee.
24 Azmavetlangg, sir-jap-zi xee.
25 Kiliat Jealimlangg, Qefilahlangg, Beelotlangg, qiong cid-vah sir-jap-snax xee.
26 Rlamahlangg, Gebalangg, qiong lak-vah zi-jap-id xee.
27 Micmaslangg, jit-vah zi-jap-zi xee.
28 Betellangg qapp Ai ee langg, qiong nng-vah zi-jap-snax xee.
29 Nebolangg, go-jap-zi xee.
30 Magbislangg, jit-vah go-jap-lak xee.
31 Vadd xee Elam ee horer, jit-cingx nng-vah go-jap-sir langg.
32 Halim ee horer, snax-vah zi-jap langg.
33 Lodlangg, Hadidlangg, Onolangg, qiong cid-vah zi-jap-go xee.
34 Jeliqolangg, snax-vah sir-jap-go xee,
35 Senaahlangg, snax-cingx lak-vah snax-jap xee.
36 Jewsix, Josua ee qrex, Jedaiah ee horer, qauw-vah cid-jap-snax langg.
37 Immer ee horer, jit-cingx lenn go-jap-zi langg.
38 Pasur ee horer, jit-cingx nng-vah sir-jap-cid langg.
39 Halim ee horer, jit-cingx lenn id-jap-cid langg.
40 Levilangg Hodaviah ee horer, dyrr si Josua qapp Kadmiel ee horer, cid-jap-sir langg.
41 Cniuwquax :ee, Asaf ee horer, jit-vah zi-jap-veh langg.
42 Qor mngg :ee, Sallum ee horer, Ater ee horer, Talmon ee horer, Akkub ee horer, Hatita ee horer, Sobai ee horer, qiong jit-vah snax-jap-qauw langg.
43 Dxen-lai juer ceing :ee; Ziha ee horer, Hasufa ee horer, Tabbaot ee horer;
44 Kelos ee horer, Siaha ee horer, Padon ee horer;
45 Lebanah ee horer, Hagabah ee horer, Akkub ee horer;
46 Hagab ee horer, Samlai ee horer, Hanan ee horer;
47 Giddel ee horer, Gahar ee horer, Rleaiah ee horer;
48 Rlezin ee horer, Nekoda ee horer, Gazam ee horer;
49 Uza ee horer, Paseah ee horer, Besai ee horer;
50 Asnah ee horer, Meunim ee horer, Nefisim ee horer,
51 Bakbuk ee horer, Hakufa ee horer, Harhur ee horer;
52 Bazlut ee horer, Mehida ee horer, Harsa ee horer,
53 Barkos ee horer, Sisela ee horer, Temah ee horer;
54 Neziah ee horer, Hatifa ee horer.
55 Solomon ee lovok ee horer, dyrr si Sotai ee horer, Hassofelet ee horer, Peluda ee horer;
56 Jaalah ee horer, Darkon ee horer, Giddel ee horer;
57 Sefatiah ee horer, Hattil ee horer, Pochelet Hazebaim ee horer, Ami ee horer.
58 Dxen-lai juer ceing :ee, qapp Solomon ee lovok ee horer, qiong snax-vah qauw-jap-zi langg.
59 Dui' Tel Melah, Tel Harsa, Qelub, Addan, Immer jnriu .laii .ee, be e jingwbingg inx ee jongjok sewhe jinjniar si Islaellangg iacc m si;
60 Inx si Delaiah ee horer, Tobiah ee horer, Nekoda ee horer, qiong lak-vah go-jap-zi langg.
61 Jewsix ee horer diongx, u Habaiah ee horer, Hakkoz ee horer, Barzillai ee horer; Barzillai crua Gileadlangg Barzillai ee jaboxqniaw juer bow, soxiw ing inx ee miaa laii cxingx.
62 Jiaxee qrex, dirr jogpow diongx cue inx ee sewhe, iarr cue byy, soxiw sngr juer byy cingkir, m jrunw inx drngx jewsix ee jithun.
63 Jongxdog qra inx qongw, m tangx jiac jiww sxingr ee mic, tingwhau u Ulim qapp Tummim ee jewsix kiw .laii.
64 Huerjiongr qiong u sir-bxan nng-cingx snax-vah lak-jap langg.
65 Ixgua iauxx u inx ee lovok luxvi, cid-cingx snax-vah snax-jap-cid langg; lamluw cniuwquax :ee, u nng-vah langg.
66 Inx ee bew, cid-vah snax-jap-lak jiah; inx ee lyy, nng-vah sir-jap-go jiah;
67 Inx ee logdyy, sir-vah snax-jap-go jiah; luu, lak-cingx cid-vah zi-jap jiah.
68 Inx qaur Jehovah ee dxen dirr Jelusalem ee sii, u jogdniuw quixnarr langg, uirdiyhh Siongrder ee dxen, qamsimx laii henr, beh qycc kiw dxen dirr ix ee soxjai.
69 Inx jiauww ligliong hongrhenr zip qangdniaa ee huxkor, qimx lak-bxan jit-cingx dalic; ginn go-cingx mina; qapp jewsix ee lexhok jit-vah niaw.
70 Dui' anxnix, jewsix qapp Levilangg, vecsnir diongx jit vorhun ee langg, qapp cniuwquax :ee, qor mngg :ee, dxen-lai juer ceing :ee, qokk kiarkiw dirr inx ee sniaa; Islael jingwlangg iarr kiarkiw dirr inx hiaxee sniaa.
3 Qaur derr cid guec, Islaellangg ixqing' kiarkiw dirr inx hiaxee sniaa, hitt sii vecsnir cincniu jit langg jurjip dirr Jelusalem.
2 Jehozadak ee qniaw Josua, qapp ix ee hniadi hiaxee jewsix, qapp Sealtiel ee qniaw Zelubbabel, qapp ix ee hniadi, longxx kiw laii kiw Islael Siongrder ee dnxuaa, tangx henr siyjer dirr hitt dingxbin, jiauww Siongrder ee lovok Moses ludhuad ee ceh soxx qiwjair :ee.
3 Inx kiw dnxuaa dirr qu ee xui, in'ui qniax hiaxee qog ee vecsnir; qycc dirr hitt dingxbin henr siyjer hro Jehovah, dyrr si jaxkiw, ehngx ee siyjer.
4 Iarr siuw Dacliau'axjeh, jiauww soxx qiwjair :ee; qycc henr dagg zit ee siyjer, jiauww inx ee siauwgiac, jiauww dniardiyc ee le, cincniu dagg zit soxx ingqaix diyhh juer :ee.
5 Zen'au henr jiauwsiongg ee siyjer, qapp muixx guec ceid ee jrer, ixqip Jehovah hunvet juer sxingr ee jecqii ee jrer; qycc henr dagg langg qamsimx hnuahiw henr ee jrer hro Jehovah.
6 Dui' Cid-guec ceid kiw, inx henr siyjer hro Jehovah. Danrsi Jehovah ee dxen ee derqix, iauxx bue he.
7 Inx qycc ing ginn hro jiyhcniu, bagciu; ing limjiac ee mic, qapp iuu, hro Sidonlangg, Tylelangg, hro inx jiong' vikhniuciu dui' Lebanon unr qaur haiw qaur Joppa; si jiauww Persia Ongg Kylus soxx unxjunw :ee.
8 Inx qaur Jelusalem Siongrder ee dxen hiax, derr zi nii Zi-guec, Salatiel ee qniaw Zelubbabel, Josadac ee qniaw Josua, qapp qi'uu ee hniadi, dyrr si jewsix, qapp Levilangg, qapp itcer dui' siurr liac ee diongqanx dyr laii Jelusalem ee langg, longxx kixciuw, pair Levilangg, dui' zi-jap huer ixjniu, dokqangx kiw Jehovah ee dxen.
9 Dui' anxnix Josua, qapp ix ee qniaw qapp hniadi, Kadmiel qapp ix ee qniaw, Judah ee qniaxsunx, qapp Henadad ee qniaw, qapp inx ee qniaw, inx ee hniadi Levilangg, longxx kiw .laii, dokliw hiaxee dirr Siongrder ee dxen juewqangx ee langg.
10 Kiw cur ee saihu he Jehovah ee dxen ee derqix ee sii, jewsix cing lexhok, giac hyrtauu. Asaf ee qniaxsunx Levilangg tec lavuac, longxx kia lehh beh ylyw Jehovah, jiauww Islael Ongg David soxx dniardiyc ee le.
11 Inx uree cniur uree duer, ylyw qamxsia Jehovah, qongw, "In'ui Ix si hyw, Ix ingxuanw six ju'air hro Islael." Inx ylyw Jehovah ee sii, jiongww vecsnir dua sniax huah, in'ui Jehovah ee dxen ee derqix ixqing' he lehh.
12 Jongwsirr u jerje jewsix, Levilangg jok-diongx ee laurdua, dyrr si bad knuar qnir jingg ee dxen hiaxee laurlangg, dnaxx cinbak knuar qnir he jitt qingx dxen ee derqix, dyrr dua sniax tikaur; iarr jerje langg uirdiyhh hnuahiw dua sniax huah.
13 Drir qaur vecsnir be e hunvet hnuahiw huah ee sniax qapp vecsnir tikaur ee sniax; in'ui vecsnir dua sniax huah ee sniax hro hitt xee sniax tuann qaur jin' hng.
4 Judah Benjamin ee duiwdik tniax qnir hiaxee siurr liac .dyr .laii ee langg, uirr Islael ee Siongrder Jehovah kiw dxen,
2 Dyrr laii qnir Zelubbabel, qapp jok-diongx ee laurdua, qra inx qongw, "Cniaw jrunw guanw qapp linw snaqab kir, in'ui guanw cue linw ee Siongrder, qapp linw jidngiu. Dui' Assylia Ongg Esarhaddon duar guanw jnriu jitt xee de ixlaii, guanw siongsiongg henwjer hro Siongrder."
3 Zelubbabel, Josua, qapp qi'uu Islael jok-diongx ee laurdua, qra inx qongw, "Guanw beh kiw guanw ee Siongrder ee dxen, linw byy hxun; guanw qaqi beh uirr Jehovah, Islael ee Siongrder hiablik kixjy; si jiauww Persia Ongg Kylus Ongg soxx bingrling guanw :ee."
4 Dui' anxnix, hitt soxjai ee vecsnir hro Judahlangg ciuw nngw .lyc .kir; dirr inx kixjy ee sii qiauxziauw inx.
5 Dui' Persia Ongg Dalius jerui ee sii, cniar girsu, joxjiw inx, beh vairhuai inx ee qewik.
6 Dirr Asuelo juer ongg jerui ee kixtauu, duiwdik siaw jauwjniux qryr Judah qapp Jelusalem kiarkiw ee vecsnir.
7 Qycc dirr Artajerjes ee niqanx, Bislam, Mitledat, Tabeel, qapp inx ee dongw, jnriu viyw jraur Persia Ongg Artajerjes; jitt xee viyw si ing Alamaic ee bunzi siaw :ee, huan'ik juer Alamaic ee kniukauw.
8 Jongxdog Rlehum, suqir Simsai, beh qryr Jelusalemlangg, iarr jnriu viyw jraur Artajerjes Ongg; hitt xee viyw cincniu anxnix:
9 Jongxdok Rlehum, suqir Simsai, qapp qi'uu ee dangpnua,
10 Qapp dua junquir ee Asurbanipal soxx censuaw qi'uu ee vecsnir, andir dirr Samalia ee sniaa, qapp Duarhyy gua qi'uu ee vecsnir, longxx siaw; ununn.
11 Hitt xee jraur Artajerjes Ongg viyxjniux ee cauxqyw qir dirr erbin, "Liw ee lovok Hyy-gua jiaxee langg ununn:
12 Ongg diyhh jaix dui' liw hiax laii, qaur guanw jiax ee Judahlangg, ixqing' qaur Jelusalem, qycc kiw jitt xee huanxvuan qycc pnaiw ee sniaa, ixqing' kiw sniacniuu, he derqix.
13 Dnaxx ongg diyhh jaix, inx narr kiw jitt xee sniaa, sniacniuu kiw hyw, dyrr jinwqongr, quansuer, jniniuu, inx longxx m lap; qaur buew ongg beh sriu sunxsid.
14 In'ui guanw jiac ongqiongx ee iamm, m ingqaix knuar ongg siurr kuisunw, soxiw jnriu viyw jraur ongg.
15 Cniaw cakyw ledjow ee qiwlok, dirr qiwlok e cue .diyc, dyrr jaix jitt xee sniaa si huanxvuan ee sniaa, juer led'ongg qapp dagg singw ee hai. Dui' jaw ixlaii, hitt diongqanx siongsiongg u huanxvuan ee su; jitt xee sniaa siurr huixhuai dyrr si dui' jitt xee enqor.
16 Guanw qinxsin jraur ongg jaix, jitt xee sniaa narr qycc kixjy, sniacniuu kiw hyw, dui' anxnix Hyy-gua ee de liw dyrr byy hxun."
17 Hitt sii ongg dyrr cud zurjiw hro jongxdog Rlehum, suqir Simsai, qapp inx qi'uu ee dangpnua, dyrr si kiarkiw dirr Samalia, qapp Hyy-gua qi'uu ee langg, qongw, "Guan linw ving'anx, ununn.
18 Linw soxx jnriu hro guanw ee viyw, ixqing' bingg bingg tak dirr guaw ee binrjingg.
19 Guaw ixqing' cud bingrling, cakyw liauw dyrr jaix jitt xee sniaa dui' jaw ixlaii jinjniar vuervuan led'ongg, qidiongx siongsiongg u bohuanw vuergik ee su.
20 Jiongjingg Jelusalem liglaii u dua qun'ongg tongxhad Hyy-gua juann de; jinwqongr, quansuer, jniniuu longxx lap hro inx.
21 Dnaxx linw diyhh huad bingrling hro hiaxee langg tingg qangx, byy kiw jitt xee sniaa, tingwhau guaw qangwjiw,
22 Linw diyhh qinxsin, m tangx encenn; sniaw su iong'unw jitt xee hai kacc dang, drir qaur led'ongg siurr kuisunw ar?"
23 Artajerjes Ongg ee siongrzu tak dirr Rlehum, qapp suqir Simsai, qapp inx ee dangpnua ee binrjingg, inx dyrr qnuaxqinw kir Jelusalem qnir Judahlangg, ing sewlik qiongvig inx tingg qangx.
24 Dui' anxnix Jelusalem Siongrder ee dxen ee qangdniaa dyrr tingjiw. Tingg qaur Persia Ongg Dalius jerui ee derr zi nii.
5 Hitt sii u sendilangg, dyrr si sendix Haggai, qapp Iddo ee sunx Zeqaliah, hrong Islael Siongrder ee miaa, dui' Judah qapp Jelusalem ee Judahlangg tuann sendix ee ue hro inx.
2 Dui' anxnix Sealtiel ee qniaw Zelubbabel, qapp Jehozadak ee qniaw Josua, longxx kiw laii dangrqangx kixjy Siongrder ee dxen dirr Jelusalem. U Siongrder ee sendix qapp inx dirr hiax, vangjan inx.
3 Dngsii Hyy-gua ee jongxdog Tattenai, qapp Setar Bozenai, qapp inx ee dangpnua laii mng qongxx, "Jirjui cud lring hro linw kiw jitt xee dxen, cniaa jitt xee cniuu ar?"
4 Guanw dyrr qra inx qongw, kiw jitt qingx dxen ee langg qiyr simxmih miaa?
5 Siongrder ee bagjiux knuawqor hro inx tingg qangx, tingwhau jitt xee dairjir qaur Dalius, did diyc bunsux laii huehog jitt xee su.
6 Hyy-gua ee jongxdog Tattenai, qapp Setar Bozenai, qapp ix ee dangpnua, jraur Dalius Ongg ee viyxjniux qir dirr erdew.
7 Inx jraur ongg ee viyxjniux lai u qongw, "Guan Dalius Ongg banrsu ving'anx.
8 Ongg diyhh jaix, guanw kir Judah Singw, qaur jiww dua Siongrder ee dxen, jitt xee dxen si ing dua der jiyc kixjy :ee, ngii-aw cah zip cniuu-lai, juewqangx jin' qinw, inx ee soxx juer hingtongx.
9 Hitt sii guanw mng hiaxee dniuxlyw, qra inx qongw, 'Jirjui cud lring hro linw kiw jitt xee dxen, cniaa jitt xee cniuu ar?'
10 Qycc mng inx ee miaa, beh qir inx ee siuxlingw ee miaa, tangx jraur hro ongg jaix.
11 Inx anxnix rinr guanw qongxx, 'Guanw si tnide ee Siongrder ee lovok, qycjaiww kiw jerje nii jingg soxx kiw ee dxen, dyrr si Islael ee jit xui dua qun'ongg soxx kiw soxx cniaa :ee.
12 Dogdok in'ui guanw ee ledjow ziaw tnidingw ee Siongrder ee siurkir, Ix jiong' inx qaux dirr Qaldealangg Babylon ongg Nebuqadnezar ee ciuw; ongg dyrr tiachuiw jitt qingx dxen, liac vecsnir qaur Babylon.
13 Dng' Babylon Ongg Kylus guannii, Kylus Ongg cud lring diyhh kiw jitt qingx Siongrder ee dxen.
14 Siongrder dxen-lai qimx, ginn ee kiwqu, dyrr si Nebuqadnezar dui' Jelusalem ee dxen-lai tec .cud .laii, duar kir he dirr Babylon ee biy :ee, Kylus Ongg dui' Babylon ee biy-lai tec .cud .laii, qaux hro ix soxx setlip ee jongxdog, miaa qiyr Sesbazar; qra ix qongw,
15 Diyhh duar jiaxee kiwqu kir he dirr Jelusalem ee dxen, iarr diyhh kiw Siongrder ee dxen dirr ix ee guan'ui.
16 Dui' anxnix jitt xee Sesbazar laii he Jelusalem Siongrder ee dxen ee derqix; jitt qingx dxen dui' hitt sii qaur dnaxx kiw iauxx bue hyw.'
17 Dnaxx ongg narr liac juer hyw, cniaw cakyw ongg dirr Babylon ee qokkor, knuar Kylus Ongg qyxzenn u qangwjiaur dirr Jelusalem kiw Siongrder jitt qingx dxen iacc byy. Cniaw ongg dirr jitt xee su qangwjiw laii jixsi guanw."
6 Dui' anxnix Dalius Ongg cud lring, langg dyrr kir cue denxceh ee huxkor, dyrr si dirr Babylon kngr vyxmic ee soxjai.
2 Dirr Ecbatana, Media Singw ee qiongx-lai, cue diyc jit vunw, hitt lairbin qiwjair qongxx,
3 "Kylus Ongg guannii, Kylus Ongg cud lring, lun Jelusalem Siongrder ee dxen, qongw, diyhh kiw jitt qingx dxen juer henwjer ee soxjai, he ix ee derqix, qenqor, dxen quann lak-jap dxng, kuah lak-jap dxng;
4 Ing dua jiyc snax unn, sinx ee caa jit unn; qinghuir diyhh kaix ongqex :ee.
5 Qycc Siongrder dxen-lai qimx, ginn ee kiwqu, dyrr si Nebuqadnezar dui' Jelusalem ee dxen-lai tec cud laii duar kir Babylon :ee, diyhh qycc hingg ix, duar qaur Jelusalem ee dxen; qokk jiauww guan'ui he dirr Siongrder ee dxen.
6 Dnaxx dirr Hyy-gua ee jongxdog Tattenai, qapp Setar Bozenai qapp linw ee dangpnua, linw diyhh lirkuix inx,
7 M tangx joxjiw kiw Siongrder ee dxen ee qangx, cutjai Judah ee jongxdog, qapp Judah ee dniuxlyw, dirr guan'ui kiw Siongrder jitt qingx dxen.
8 Guaw qycc qangwjiw linw diyhh jnaixngiu qniaa dirr Judah ee dniuxlyw, vangjan inx kiw jitt qingx Siongrder ee dxen, dyrr si diyhh dui' Hyy-gua ee hiongwsuer diongx tiux cud ongg ee ginhang, qinw hro hiaxee langg juer qinghuir, benw did damqyh.
9 Inx soxx diyhh ing ee guqangw-aw, mingiuqangw, mingiuu-aw, juer siyjer henr hro tnidingw ee Siongrder, ixqip siyxbec, iamm, jiuw, iuu, longxx jiauww Jelusalem ee jewsix soxx qongw :ee, dagg zit hro ix, m tangx sitgo;
10 Tangx hro inx henr pangx pangx ee jewsu hro tnidingw ee Siongrder; qycc uirr ongg qapp ongg hiaxee qniaw ee uahmia laii qidyw.
11 Guaw qycc qangwjiw, narr u langg quexngua jitt xee bingrling, dyrr beh dui' ix ee cur tiah jit qix ngii-aw laii quxkiw hitt langg, qra ix driaur dirr hitt dingxbin hro ix ee cur uirdiyhh anxnix juer cewdii.
12 Narr u ongg qapp vecsnir kixciuw quexngua jitt xee bingrling, huixhuai dirr Jelusalem jitt qingx Siongrder ee dxen, guan andir Ix ee miaa dirr hiax ee Siongrder bedbyy inx. Guaw Dalius cud jitt xee bingrling, diyhh qinw qinw qniaa ix."
13 Dui' anxnix Hyy-gua ee jongxdog Tattenai, qapp Setar Bozenai, qapp inx ee dangpnua, in'ui Dalius Ongg soxx cud ee lring, dyrr qinw qinw qniaa ix.
14 Judah ee dniuxlyw in'ui sendix Haggai qapp Iddo ee sunx Zeqaliah ee sendi'ue, dyrr kixjy laii hingtongx. Inx juntanr Islael Siongrder ee bingrling, qapp Kylus, Dalius, qapp Persia Ongg Artajerjes ee siongrzu, kixjy uanqangx.
15 Dng' Dalius Ongg jerui derr lak nii, Adar Guec cesnax, jitt xee dxen dyrr kiw hyw.
16 Islaellangg, jewsix, qapp Levilangg, qapp qi'uu siurr liac .dyr .laii ee langg, longxx h.-hnuahiw-h. qniaa hongrhenr Siongrder ee dxen ee lew.
17 Qniaa hongrhenr Siongrder ee dxen ee lew, dyrr henr guqangw jit-vah jiah, mingiuqangw nng-vah jiah, mingiuu-aw sir-vah jiah. Qycc jiauww Islael ee jipair ee siauwgiac, henr snuangiuqangw jap-zi jiah; uirr Islael ee jingwlangg juer siogjuerjer.
18 Dyrr pair jewsix jiauww ix ee vannlet, Levilangg jiuaww ix ee cuwsu, hogsai diamr dirr Jelusalem ee Siongrder, si jiauww Moses ee ceh soxx qir :ee.
19 Jniax-guec jap-sir, siurr liac .dyr .laii ee vecsnir siuw Vnuaquewjeh.
20 Jewsix qapp Levilangg snadangg cingkir qaqi; inx longxx cingkir; qycc uirdiyhh siurr liac .dyr .laii ee langg, qapp inx ee hniadi hiaxee jewsix, iarr uirr qaqi taii Vnuaquewjeh ee ngiuu-aw.
21 Siurr liac .dyr .laii ee Islaellangg, qapp qaqi hunvet lirkuix jitt soxjai guarvanglangg ee uwuer, laii qui'uaw inx, laii cue Jehovah, Islael ee Siongrder :ee, longxx jiac ix; h.-hnuahiw-h. siuw Duqnawjeh cid zit quw;
22 In'ui Jehovah hro inx hnuahiw, qycc hro Assylia Ongg ee simx uat dngw ngr inx, laii qenqor inx ee ciuw, juer Siongrder dxen ee qangx, dyrr si Islael ee Siongrder.
7 Jiaxee su ixau, dirr Persia Ongg Artajerjes jerui ee sii, u jit xee Ezla, ix si Selaiah ee qniaw, Azaliah ee qniaw, Azaliah si Hilkiah ee qniaw;
2 Hilkiah si Sallum ee qniaw, Sallum si Zadok ee qniaw, Zadok si Ahitub ee qniaw;
3 Ahitub si Amaliah ee qniaw, Amaliah si Azaliah ee qniaw, Azaliah si Melaiot ee qniaw,
4 Melaiot si Zelahiah ee qniaw, Zelahiah si Uzi ee qniaw, Uzi si Bukki ee qniaw,
5 Bukki si Abisua ee qniaw, Abisua si Finehas ee qniaw, Finehas si Eleazar ee qniaw, Eleazarsi si jewsitauu Aalon ee qniaw.
6 Jitt xee Ezla dui' Babylon jnriu .laii, duiwdirr Jehovah, Islael ee Siongrder sniuxsur Moses ee ludhuad, ix si binxjet ee qinghagsu. Ongg jrunw ix itcer soxx qriuu :ee, si jiauww Jehovah, ix ee Siongrder ee ciuw vangjan ix :ee.
7 Artajerjes Ongg derr cid nii, Islaellangg, jewsix, Levilangg, cniuwquax :ee, qor mngg :ee, dxen-lai juer ceing :ee, qokk u quixnarr langg jnriu Jelusalem.
8 Ongg derr cid nii Go-guec, Ezla qaur Jelusalem;
9 Jniax-guec ceid, ix dui' Babylon kixsinx, Go-guec ceid dyrr qaur Jelusalem, in'ui ix ee Siongrder six xunx ee ciuw vangjan ix.
10 In'ui Ezla ixqing' quat'ir beh qangxqiur Jehovah ee ludhuad laii qniaa ix, qycc jiong' ludle huatdo laii qawsi Islaellangg.
11 Jewsix Ezla si qinghagsu, si tongdat Jehovah qaiwbing ee ue, qapp Ix soxx sniuxsur Islael ee ludle ee qinghagsu. Artajerjes Ongg sur ix ee zurjiw qir dirr erdew, qongw,
12 "Led'ongg ee ongg Artajerjes, qiar hro jewsix Ezla, tongdat tnidingw Siongrder ee ludhuad ee qinghagsu, uanjuann :ee, ununn.
13 Diamr dirr guaw ee qog-lai ee Islaellangg, jewsix, Levilangg, qniwnarr qamguan jnriu kir Jelusalem :ee, guaw qangwjiw hro inx qapp liw kir;
14 Liw qiwzenn si ongg qapp ix cid xee bosu soxx crex :ee, jiauww liw ciuw-lai Siongrder ee ludhuad jacad Judah qapp Jelusalem;
15 Qycc duar ongg qapp ix ee bosu soxx hnuahiw henr ee qimginn, beh hro Islael ee Siongrder, dyrr si druar dirr Jelusalem :ee;
16 Iarr duar liw dirr Babylon juann singw qniww soxx did .diyc ee qimginn, qapp vecsnir jewsix soxx hnuahiw henr ee lexmic, dyrr si inx uirdiyhh Jelusalem inx ee Siongrder ee dxen soxx hnuahiw henr :ee.
17 Soxiw liw diyhh diwir ing jiaxee qimginn brew guqangw-aw, mingiuqangw, mingiuu-aw, qapp inx ee sowjer, inx ee quanwden, henr dirr Jelusalem, linw ee Siongrder ee dxen ee dnxuaa.
18 Soxx cunx ee qimginn, liw qapp liw ee hniadi knuar juer hyw :ee, dyrr anxnix ing ix, longxx diyhh jiauww linw Siongrder ee jixir.
19 Soxx qaudair liw ee kiwqu, juer liw ee Siongrder dxen-lai ee loring :ee, liw diyhh qaux dirr Jelusalem ee Siongrder ee binrjingg.
20 Linw ee Siongrder ee dxen narr iauxx u kiamwing simxmih, liw soxx ingqaix diyhh ing :ee, liw tangx dui' ongg ee huxkor tec ix.
21 Guaw Artajerjes Ongg vunxsinx qycc qangwjiaur hro Hyy-gua, itcer quanw huxkor ee qnruax, qongw, 'Tongdat tnidingw Siongrder ee ludhuad ee qinghagsu, jewsix Ezla, bylun duiww linw tyw simxmih,
22 Linw diyhh diwir qniaa ix; qiongqib ix ginn qaur jit-vah telent; bec, qaur jit-vah bat; iuu qaur jit-vah bat; iamm byy han gxiac.
23 Qniwnarr tnidingw ee Siongrder soxx bingrling :ee, diyhh uirdiyhh tnidingw ee Siongrder ee dxen jimjiog juer ix; sniaw su hro siurkir limqaur ongg, ixqip ongg ee qniaw ee qog ar?
24 Guaw qycc bingrling linw, qniwnarr jewsix, Levilangg, cniuwquax :ee, qor mngg :ee, qapp dirr Siongrder ee dxen juer ceing ee langg, m tangx siux inx ee jinwqongr, quanser, jniniuu.'
25 Ezla ar, jiauww liw ee Siongrder sniuxsur liw ee diwhui, setlip sursux, simxpnuawqnuax, dirliw Hyy-gua ee vecsnir, dyrr si itcer bad liw ee Siongrder ee ludhuad :ee; hiaxee m bad :ee, linw diyhh qawsi ix.
26 Qniwnarr byy beh tranr liw ee Siongrder ee ludhuad, qapp ongg ee ludhuad, dyrr diyhh siyxsimx dring ix ee jue, higsi hro ix siw, higsi ciongqunx, higsi cauqex, higsi qnuaiqnax.
27 Ylyw lanw ledjow ee Siongrder Jehovah, in'ui Ix he jitt xee iwsur dirr ongg ee simx, qetnix ingqngx dirr Jelusalem Jehovah ee dxen;
28 Qycc hro guaw dirr ongg, qapp ix ee girsu, qapp ongg itcer u quanser ee siuxlingw ee binrjingg did diyc undenw. Jehovah, guaw ee Siongrder ee ciuw vangjan guaw, guaw dyrr iongxqamw; jurjip Islael hiaxee taulangg, qapp guaw jnriu .laii."
8 Artajerjes Ongg jerui ee sii, qapp guaw dui' Babylon jnriu .laii ee langg, inx ee jogdniuw, qapp inx ee sewhe, qir dirr erbin.
2 Sriok Finehas ee horer u Gersom, sriok Itamar ee horer u Daniel, sriok David ee horer u Hattus.
3 Sriok Palos ee horer, dyrr si Seqaniah ee horer, u Zeqaliah; qapp jiauww ix ee sewhe laii sngr, u davodingx jit-vah go-jap langg.
4 Sriok Pahat Moab ee horer u Zelahiah ee qniaw Eliehoenai, qapp davodingx nng-vah langg.
5 Sriok Sekaniah ee horer u Jahaziel ee qniaw qapp davodingx snax-vah langg.
6 Sriok Adin ee horer, u Jonatan ee qniaw Ebed, qapp davodingx go-jap langg.
7 Sriok Elam ee horer, u Ataliah ee qniaw, Josua, qapp davodingx cid-jap langg.
8 Sriok Sefatiah ee horer, u Mikael ee qniaw Zebadiah, qapp davodingx veh-jap langg.
9 Sriok Joab ee horer, u Jehiel ee qniaw Obadiah, qapp davodingx nng-vah id-jap-veh langg.
10 Sriok Selomit ee horer, u Josifiah ee qniaw, qapp davodingx jit-vah lak-jap langg.
11 Sriok Bebai ee horer, u Bebai ee qniaw Zeqaliah, qapp davodingx zi-jap-veh langg.
12 Sriok Azgad ee horer, u Hakkatan ee qniaw, Johanan, qapp davodingx jit-vah id-jap langg.
13 Sriok Adonikam ee horer, dyrr si lorbuew :ee, inx ee miaa si Elifelet, Jeuel, Semaiah, qapp davodingx lak-jap langg.
14 Sriok Bigvai ee horer, u Utai, qapp Zabud, qapp inx ee davodingx cid-jap langg.
15 Guaw jiyjip jiaxee langg dirr hitt diauu lrauu zip Ahava ee hyy-vnix; guanw dirr hiax druar dirr vowvnii snax zit; guaw caknuar vecsnir qapp jewsix, knuar byy Levilangg dirr hiax.
16 Guaw crex langg driaur hiaxee taulangg, dyrr si Eliezer, Aliel, Semaiah, Elnatan, Jalib, Elnatan, Natan, Zeqaliah, Mesullam; qycc driaur qauwuann Joialib qapp Elnatan.
17 Guaw crex inx kir Kasifia ee soxjai, qnir hitt xee taulangg Iddo, qycc qra inx qongw, inx dirr Kasifia ee soxjai diyhh dui' Iddo qapp ix ee hniadi, dyrr si dxen-lai ee ceing, qongw simxmih ue, qiyr inx uirr lanw ee Siongrder ee dxen duar ceing ee langg laii.
18 In'ui u did diyc lanw ee Siongrder six xunx ee ciuw vangjan guanw, inx dirr Islael ee jingsunx, Levi ee sunx, Mahli ee horer diongx, duar jit xee tongdat ee langg laii; qycc u Selebiah qapp hiaxee qniaw, qapp ix ee hniadi, qiong jap-veh langg.
19 Qycc u Hasabiah, Melali ee horer; Josua, qapp ix ee hniadi, qapp inx ee qniaw, qiong zi-jap langg.
20 Qycc duar dxen-lai juer ceing :ee laii, dyrr si jingg David qapp jiaxee siuxlingw soxx pair juer Levilangg ee ceing :ee, qiong nng-vah zi-jap xee; inx ee miaa longxx u dingqir.
21 Hitt sii guanw dirr Ahava ee hyy-vnix suanvor qimwjiac, tangx hro guanw dirr lanw ee Siongrder ee binrjingg qaqi kiamvix, qriuu Ix hro guanw qapp guanw ee ginxaw, qapp itcer soxu :ee, longxx did diyc vnitnaw ee lo.
22 In'ui qriuu ongg vuah jit dui vorvingx bexvingx, vangjan guanw dirr lo nirr dixdngx duiwdik, guaw liac juer qenwsiaur; in'ui guanw bad duiww ongg qongw, guanw ee Siongrder ee ciuw vyxho itcer qriuu Ix ee langg; dogdok Ix ee linglik qapp siurkir, qongqig itcer kiwsag Ix ee langg.
23 Soxiw guanw uirdiyhh anxnix qimwjiac, qriuu guanw ee Siongrder; Ix dyrr tniax guanw.
24 Dui' anxnix guaw hunpair jewsix ee taulangg jap-zi xee, dyrr si Selebiah, Hasbiah, qapp inx ee hniadi jap langg.
25 Guaw dyrr jiong' lanw ee Siongrder ee dxen ee lexmic, dyrr si qimx, ginn qapp hiaxee kiwqu, si ongg qapp ix ee bosu, ix ee siuxlingw, qapp dirr hiax ee Islael jingwlangg soxx henr :ee, longxx pingg laii qauhur inx.
26 Guaw dyrr pingg laii qaux dirr inx ee ciuw, u ginn lak-vah talent, ginkir dang jit-vah talent; qimx jit-vah talent;
27 Qimnguaw zi-jap der, dang jit-cingx dalic; qimx nawnar hyw ee dangkir nng der, vyxquir cincniu qimx.
28 Guaw duiww inx qongw, "Linw juer sxingr qruix Jehovah, jiaxee kiwqu iarr si sxingr, hiaxee qimginn si qamsimx henr hro Jehovah, linw ledjow ee Siongrder :ee.
29 Linw diyhh qinxsin qowsiuw, didqaur linw dirr Jelusalem Jehovah ee dxen ee vangg-lai, dirr jewsix ee taulangg qapp Levilangg, ixqip Islael hiaxee jogdniuw ee binrjingg pingg ix."
30 Dui' anxnix jewsix Levilangg siux qimginn qapp kiwqu, jiauww inx ee kindang, beh duar qaur Jelusalem, lanw ee Siongrder ee dxen.
31 Jniax-guec jap-id, guanw lirkuix Ahava ee hyy-vnix, beh kir Jelusalem; lanw ee Siongrder ee ciuw vyxho guanw, qiur guanw tuatli duiwdik, qapp baihok dirr lo nirr ee langg ee ciuw.
32 Guanw qaur Jelusalem, diamr hiax snax zit.
33 Qaur derr sir zit, dirr lanw ee Siongrder ee dxen pingg hiaxee qimx, ginn qapp kiwqu, qaux dirr jewsix Uliah ee qniaw Melemot ee ciuw; qapp ix dauwdin :ee, u Finehas ee qniaw Eleazar; qycc qapp inx dauwdin :ee, u Levilangg Josua ee qniaw Jozabad, qapp Binnui ee qniaw Noadiah.
34 Itcer jiauww inx ee siauwgiac, jiauww inx ee kindang qaux ix; dngsii iarr qir inx ee kindang.
35 Siurr liac ee langg dui' siurr liac ee diongqanx dyr .laii .ee, henr siyjer hro Islael ee Siongrder, dyrr si uirr Islael jingwlangg henr guqangw jap-zi jiah, mingiuqangw qauw-jap-lak jiah, mingiuu-aw cid-jap-cid jiah; qycc henr snuangiuqangw jap-zi jiah juer siogjue ee jrer. Jiaxee longxx si juer siyjer henr hro Jehovah :ee.
36 Inx jiong' ongg ee zurjiw qaux hro ongg ee zinsinn, qapp dirr Hyy-gua hiaxee jongxdog; inx dyrr vangjan vecsnir qapp Siongrder ee dxen.
9 Jiaxee dairjir ixqing' juer bingvik, jiaxee siuxlingw laii qnir guaw, qongw, "Islael vecsnir qapp jewsix, qapp Levilangg, byy qaqi hunvet lirkuix jiaxee soxjai ee vecsnir, tranr inx kyxngor ee su, dyrr si tranr Kanaanlangg, Hitlangg, Pelezlangg, Jebuslangg, Ammonlangg, Moablangg, Egiptlangg, Amolilangg ee su.
2 In'ui inx uirr qaqi qapp inx ee qniaw, crua inx ee jaboxqniaw juer bow, drir qaur sxingr ee horer qapp hitt soxjai ee vecsnir camcab; qycc siuxlingw qapp inx ee qnuadniuw juer inx ee juerkuex.
3 Guaw jid'err tniax qnir jitt xee su, dyrr tiah lic guaw ee snxax qapp pxaur, cuah guaw ee taumngg qapp cuiwciux, gonggniac decc jre.
4 Qniwnarr uirr Islael Siongrder ee ue laii gniauhgniauc cuah :ee, longxx jurjip qaur guaw jiax, uirdiyhh siurr liac .dyr .laii ee langg soxx huan ee jue. Guaw dyrr gonggniac decc jre, qaur henr ehngjer ee sii.
5 Henr ehngjer ee sii, guaw dui' guaw ee utbun kiw .laii, snxax, pxaur tiah lic, siangkax qui .lyc .kir, ngr Jehovah, guaw ee Siongrder giac kiw ciuw, qongw,
6 "Guaw ee Siongrder ar, guaw qenwsiaur lauwkuir, m qnaw giac tauu ngr guaw ee Siongrder Liw, in'ui guanw ee jue rimx quer taukag, guanw ee juerog duw tnix.
7 Dui' guanw ledjow ee zit qaur qinaxzit, guanw ee juerog jin' dang; uirdiyhh guanw ee juerquar, guanw qapp guanw ee led'ongg, jewsix, longxx qaux dirr guarvangx led'ongg ee ciuw, siurr dyqiamr, siurr loxliac, siurr cniuxqiab, bin qenwsiaur, cincniu qinaxzit ee kuanw.
8 Dnaxx did diyc Jehovah, guanw ee Siongrder jiamrcniaw six xunx hro guanw, qra guanw lauu jiaxee dytuad ee langg, hro guanw cincniu did diyc ticdingx dingr dirr Ix sxingr ee soxjai, hro guanw ee Siongrder tangx jiywqngx guanw ee bagjiux, hro guanw dirr lole diongx qycc uac. Guanw si lole.
9 Danrsi dirr lole diongx, guanw ee Siongrder byy kiwsag guanw, qycc hro guanw dirr Persia led'ongg ee binrjingg did diyc undenw, hro guanw qycc uac e qycc kiw guanw ee Siongrder ee dxen, siuliw hiaxee huixhuai ee soxjai, hro guanw dirr Judah qapp Jelusalem did diyc u cniuviah.
10 Guanw ee Siongrder ar, qiwzenn anxnix, guanw iauxx u simxmih ue tangx qongw ar?
11 In'ui guanw ixqing' kiwsag Liw ee bingrling, dyrr si Liw tog Liw ee lovok, jiaxee sendix soxx bingrling :ee, qongw, 'Linw soxx kir beh singjiab juer giap ee de si uwuer ee de, uirdiyhh hiaxee qog ee vecsnir ee uwuer, qapp inx kyxngor ee su; in'ui inx hro juann de dui' jitt vnix qaur hitt vnix, muaw muaw lasamm.
12 Soxiw m tangx jiong' linw ee jaboxqniaw qer inx ee qniaw, iarr m tangx qra linw ee qniaw crua inx ee jaboxqniaw, ingxingw m tangx qra inx doboo ving'anx, qapp inx ee lirig; anxnix linw dyrr tangx qiongsing, jiac jitt soxjai ee hyw mic, suar lauu hro linw ee qniaxsunx ingxuanw juer giap.'
13 Guanw in'ui guanw ee pnaiw soxx qniaa, qapp guanw ee dang jue, ixqing' duw diyc jex itcer ee su, guanw ee Siongrder ar, Liw hinghuat guanw, kacc kinx guanw ee jue soxx ingqaix did .diyc .ee; qycc qra guanw lauu jiaxee tuatli ee langg;
14 Guanw qamxx tangx qycc vuergik Liw ee bingrling, qapp qniaa kyxngor ee su ee vecsnir qetcinx mah? Narr anxnix, Liw qamxx byy beh siurkir guanw, qaur bedbyy guanw, drir qaur byy jit xee lauu lehh, byy jit xee dytuad mah?
15 Jehovah, Islael ee Siongrder ar, Liw si qonggi, guanw jiaxee lauu lehh ee langg jiacc did diyc dytuad, cincniu qinaxzit. Knuar ar, guanw dirr Liw ee binrjingg u juerog; in'ui anxnix byy langg dirr Liw ee binrjingg kia e diauu."
10 Ezla qidyw, zinrjue, tikaur, pag dirr Siongrder dxen-jingg ee sii, u dui' Islael diongx laii ee lamluw ginxaw jurjip dirr ix hiax, jniaa dua hue. Vecsnir kaur qaur jin' camw.
2 Sriok Elam ee horer, Jehiel ee qniaw, Sekaniah, rinr Ezla qongxx, "Guanw dirr jitt xee soxjai ee vecsnir diongx crua guarvanglangg ee jaboxqniaw juer bow, qanhuan lanw ee Siongrder; jongwsirr Islaellangg dirr jitt xee su iauxquxx u tangx ngwbang.
3 Dnaxx diyhh qapp lanw ee Siongrder lip iog, jiong' jiaxee byy qapp inx soxx snix :ee, longxx hro inx cud .kir, jiauww guaw ee jruw qapp hiaxee in'ui Siongrder ee bingrling gniauhgniauc cuah ee langg soxx girdnia :ee, jiauww ludhuad laii qniaa.
4 Liw kiw .laii, in'ui jitt xee su si liw soxx ingqaix vran :ee; guanw beh vangjan liw, liw diyhh hyxdnaw laii juer ix."
5 Ezla dyrr kiw .laii, hro jewsix hiaxee taulangg, qapp Levilangg, qapp jingwlangg jiuwjua, beh jiauww jitt xee ue kir qniaa; inx dyrr jiuwjua.
6 Ezla dyrr dui' Siongrder ee dxen-jingg kiw .laii, zip Eliasib ee qniaw Jehohanan ee cur, qaur hiax byy jiac vniaw, byy limx juiw; in'ui ix uirdiyhh siurr liac .dyr .laii ee langg soxx huan ee jue laii visiongx.
7 Inx dirr venww Judah qapp Jelusalem siurr liac .dyr .laii ee langg jingg suanvor, qiyr inx longxx jurjip dirr Jelusalem.
8 Qniwnarr byy tranr hiaxee siuxlingw qapp dniuxlyw soxx girdnia snax zit lai byy laii :ee, dyrr beh caux ix soxu ee giap, beh qig ix cud siurr liac .dyr .laii ee langg ee hue.
9 Dui' anxnix Judah qapp Benjamin jingwlangg snax zit lai longxx jurjip dirr Jelusalem; hitt zit si Qauw-guec zi-jap; jingwlangg longxx jre dirr Siongrder dxen-jingg kuankuah ee soxjai; in'ui jitt xee su, qycc in'ui lyc dua ho, dyrr gniauhgniauc cuah.
10 Jewsix Ezla kiw .laii, qra inx qongw, "Linw u jue, linw crua guarvangx ee jaboxqniaw juer bow, qetnix Islaellangg ee jue.
11 Dnaxx diyhh ngr Jehovah, linw ee ledjow ee Siongrder zinrjue, qniaa Ix soxx hnuahiw :ee, qaqi hunvet lirkuix jiaxee qog ee vecsnir, qapp guarvangx ee jaboxqniaw."
12 Huerjiongr longxx dua sniax rinr qongxx, "Jiauww liw soxx qongw quanhe guanw :ee, guanw beh qniaa ix.
13 Danrsi vecsnir jin' je, qycc duw diyc dua ho ee sii, guanw be e kia dirr guarbin, jex iarr m si jit zit nng zit ee su, in'ui guanw dirr jitt xee su u dua dua huanrjue.
14 Dnaxx diyhh uirr juann hue setlip lanw ee siuxlingw, qniwnarr lanw ee sniaa-diongx crua guarvangx ee jaboxqniaw :ee, diyhh jiauww dniardiyc ee qrii laii. Hitt xee sniaa ee dniuxlyw sursux diyhh qapp inx laii, didqaur lanw ee Siongrder uirdiyhh jitt xee su ee siurkir siux dywdngw."
15 Dogdok Asahel ee qniaw Jonatan, Tikvah ee qniaw Jahzeiah huanxduir jitt xee su; qycc u Mesullam, qapp Levilangg Sabbetai janwsingg inx.
16 Siurr liac .dyr .laii ee langg anxnix qniaa. Jewsix Ezla qapp jogdniuw quixnarr langg, jiauww inx ee jongjok, longxx jiauww inx ee miaa siurr pair; dirr Jap-guec ceid inx snaqab jre, jacad jitt xee su.
17 Qaur Jniax-guec ceid, qniwnarr crua guarvangx ee jaboxqniaw :ee, jiacc longxx craa bingvik.
18 Dirr jewsix qniaxsunx diongx craa cud crua guarvangx ee jaboxqniaw :ee dyrr si Jehozadak ee qniaw Josua ee qrex, qapp ix ee hniadi Maaseiah, Eliezer, Jalib, qapp Gedaliah.
19 Inx dyrr kanx ciuw qetbingg beh lii inx ee bow, in'ui huanrjue. Inx dyrr henr ngiuu-qrunn diongx jit jiah mingiuqangw laii siogjue.
20 Immer ee qniaxsunx diongx u Hanani qapp Zebadiah.
21 Halim ee qniaxsunx diongx, u Maaseiah, Elijah, Semaiah, Jehiel, qapp Uziah.
22 Pasur ee qniaxsunx diongx, u Elioenai, Maaseiah, Ismael, Netanel, Jozabad, qapp Elasah.
23 Levilangg diongx, u Jozabad, Simei, Kelaiah, dyrr si Kelita; qycc u Petahiah, Judah, Eliezer.
24 Cniuwquax ee langg ee diongqanx, u Eliezer. Qor mngg ee langg ee diongqanx u Sallum, Telem, Uli.
25 Islaellangg Palos ee qniaxsunx diongx, u Rlamiah, Iziah, Malqijah, Mijamin, Eleazar, Malqijah, qapp Benaiah.
26 Elam ee qniaxsunx diongx, u Mattaniah, Zeqaliah, Jehiel, Abdi, Jelemot, qapp Elijah.
27 Zattu ee qniaxsunx diongx, u Elioenai, Eliasib, Mattaniah, Jelemot, Zabad, qapp Aziza.
28 Bebai ee qniaxsunx diongx, u Jehohanan, Hananiah, Zabbai, qapp Atlai.
29 Bani ee qniaxsunx diongx, u Mesullam, Malluc, Adaiah, Jasub, Seal, qapp Jelemot.
30 Pahat Moab ee qniaxsunx diongx, u Adna, Qelal, Benaiah, Maaseiah, Mattanii, Bezalel, Binnui, qapp Manasseh.
31 Halim ee qniaxsunx diongx, u Eliezer, Issijah, Malqijah, Semaiah, Simeon,
32 Benjamin, Malluc, qapp Semaliah.
33 Hasum ee qniaxsunx diongx, u Mattenai, Mattatah, Zabad, Elifelet, Jelemai, Manasseh, qapp Simei.
34 Bani ee qniaxsunx diongx, u Maadai, Amlam, Uel,
35 Benaiah, Bedeiah, Qeluhi,
36 Vaniah, Melemot, Eliasib,
37 Mattaniah, Mattenai, qapp Jaasu.
38 Vaniah ee qniaxsunx diongx, u Binnui, Simei,
39 Selemiah, Natan, Adaiah,
40 Macnadebai, Sasai, Salai,
41 Azalel, Selemiah, Semaliah,
42 Sallum, Amaliah, qapp Josef.
43 Nebo ee qiaxsunx diongx, u Jeiel, Mattitiah, Zabad, Zebina, Jaddai, Joel, qapp Benaiah.
44 Jiaxee langg longxx crua guarvanglangg ee jaboxqniaw juer bow; qidiongx iarr u langg dui' jiaxee jaboxqniaw snix qniaxzii.