Guad'ia qapp Bagqniar

(月夜と眼鏡)

Lu Juxbingg huanik

Qeci iarr hyw, iaxgua iarr hyw, jit siwqer longxx hro cuiwcnex ee hiyc-aw dar muaw muaw.

Siqanx si qngcingx guehsig ee amwmii. Diamrjing qelo ee jinrbuew, jit xee lau avyy druar dirr hiax. Lau avyy qo’ jit langg jre dirr txangx-aw-kax dngdecc jyr jiamsnuanr-qangx.

Iuqiac ee dinqngx jin’ unziuu ciy dirr cur-lai muixx jit dah. Lau avyy bagjiux liyc aw bongg bongg, berdangr qra snuar junw junw cngx quer jiamkangx, quixlyrr vaiw dirr dingqngx erkax, liac jiamkangx bibix knuar, qycc iong ziauu ziauu ee jingxtauu-aw-buew itdit tud sisnuar.

Guarvingg guehniuu vyc vyc ee cnex sig qngsnuar ciy dirr siwqer qokk soxjai, hro zinqecur, qelo, snualunn-aw, cam’ dua-ser jangg ciu-aw dy’ naxx jimr dirr lalunn siyx ee juiw diongngx. Hitt kuanw songxkuair si be qongw .did .ee.

Lau avyy naxx jyr ciuw nirr ee girniu, taukag-lai naxx sniu kiw qaqi siauwlenn sijun ee jiongxjiongw cam’ iau’uanw cinjniaa ee dairjir, qycc u dirr guarkauw jit langg singuac dorzit ee jabow sunx hingngiaw.

Diam jiucjiuh ji’ diongx, qanda’ u tniax diyc snaxaxqui-dingw hitt jiah naurjingx kadakog kadakog, hnaiwtuii iyy dinxdang ee sniax. Qycc u an’ langg laii kxeh kir ee dua lo cam’ laurzet qunxqunw ee hang-aw-kauw hiax tuann .laii bre mihqnia ee huah sniax, samvutgorsii qycc u huexciax jauw hng kir vniar qinw ee loglog sniax.

Siqanx naxx quer .kir, lau avyy taukag suacc sinn sinn .kir, lenrr qaqi dirr dyc’ui, decc congr sniaw marr longxx m jaix. Qui’ kox langg cniu dirr binbang-diongx, cac caa cai dirr hiax.

Jitt sii, mngg-gua u kogkog kar mngg ee sniax. Lau avyy hnirkangx dang iarr quixlyrr nii ar, ix tauu uat hiongr sniaimx ee hitt vingg. “Jitt xee sijun ixqingx jiacc nguar, byy langg e laii siy’ cue jiacc driyc, itding si hongx ee sniax, hex hongx byy qongxx qowding cuex dyhh, u sii cuex iaxgua, u sii dua qeci.” Lau avyy anxnex sniu.

Mrqycc sui’ qycc u tniax hex sniax, jitt vaiw si kacc ser sniax ee kavo-sniax, si dirr txangx-aw-kax, jitt vaiw cam’ taujingg byy qangg, lau avyy jingwqingx u tniax .diyc.

“Lau avyy, lau avyy,” u langg dirr txangx-aw-gua qiyr. Lau avyy guanvunw sniu qongxx qaqi hnikangx tniax m driyc, qra crunx .cud .kir beh kuix txangx-aw ee ciuw qycc qiux dywdngw .laii.

“Lau avyy, lau avyy, cniaw qra txangx-aw pah kuix .jit .xe.” Qycc tniax diyc langg decc qiyr, ix dyrr kia .kiw .laii, qra txangx-aw pah kuix.

Guarkauw jit siwqer longxx hro cnevec sig ee guehqngx ciy qaxx naxx zitsii hiacnir qngx ngiawngiar. Txangx-aw-kax kia jit xee m si zuarr quann ee javox langg, tauu dnax quann, knuar an’ cur-lai. Ix kanx jit qix ox bagqniar, dingxdunn lauu cuiwciux.

Lau avyy knuar diyc jitt xee byy sigsai ee javox langg binrmau liauxau, sniu qongxx ix si qniaa m driyc lo, cue m driyc langg jiacc laii qaur jiax, dyrr mngg kiw,

“Guaw m bad :liw, cniaxmng liw si dycc jit xui?”

Javox langg rinr qongxx, ”Guaw si bre bagqniar ee siyw singlixlangg. Guaw u hinghingg-siksig jin’ je bagqniar, tauu jit vxenr laii qaur jiax. Jiax si jit xee hro langg simjingg songxkuair ee qeci, ingamr guehsig jin’ qngx, qniaa ar qniaa dyrr qniaa qaur jiax laii.”

Lau avyy dngdecc uirdiyc bagjiux bongg bongg berdangr qra snuar cngx quer jiamkangx decc koxnauw, dyrr mng,

“Qamxx u hac guaw ee bagjiux, erdangr knuar cingcyw ee bagqniar?”

Javox langg dyrr qra ix pnai ee hitt jiah sniux-aw kngr .lyc .laii, quar pah kuix, ban ban aw qingw, qingw jit qix sikhap avyy ee bagqniar. Byy zuar quw, jit qix dairmo huebunn kingx ee bagqniar dyrr tec .cud .laii, dux hro tamx tauu cud laii txangx-aw-gua ee avyy. Tauqex qongw,

“Narr iong jitt qix bagqniar, vyxjingr liw knuar sniaw longxx cingcyw.”

Jitt sii txangx-aw-gua javox langg kia kax ee soxjai, vec sig, cnex sig, angg sig jiongxjiongw cauw-aw qapp huex, dirr guehqngx erbin, liyc aw amwlyy, horsiongx vixping pemia decc kuix, pangbi itdit bunr .cud .laii.

Lau avyy qra bagqniar jrih quer ciuw, qruar .kiw .laii cir knuar bai. Ix knuar duiww quixlyrr ciyh gua ee sijingx sowzi, lahzit-dingw ee bunzi, jit zri jit zri, longxx knuar qaxx jiokk cingcyw hunbingg.

Jiokk quw m bad anxnex ar, jitt kuanw jinghingg huanrser diyh’air dywdngw kir quixarr jap nii jingg, ix iauxqycc si jabow ginxaw hitt xee sijun. Ix byiwdiongx laii sniu kiw hitt sii venrnarr bagjiux soxx giyw .quer ee longxx qimx qycc bingg, cincniu jitt sii qruar bagqniar qangrkuanw. Ix u qraur hnuahiw:ee.

“Ar, dyrr jitt xee hyw.” Lau avyy quatding beh brew jitt hur bagqniar, dyrr qra jnihang lap cringx, bagqniar siux hyw. Hitt xee lauu cuiwciux, kanx ox bagqniar ee tauqex jin’ qinw dyrr laii lirkuix .kir. Tauqex hingngiaw suibongxx byy knuar .qnir .ar, tokax ee huex, cauw, iuguann dirr kongkir diongx itdit bunr cud pangbi.

Lau avyy qra txangx-aw qnuaix hyw, qycc jre dngw guanvunw ee soxjai. Ix jitt sii erdangr qra snuar jin’ sunrsi dyy cngx quer jiamkangx. Jitt xee sinx bagqniar duiww ix qongw si jit xee qikaw ee vyxvuer, ix qruar .kiw .kir, qycc vrag .lyc .laii, iong jiongxjiongw ee hongsig cir qruar hitt qix bagqniar, jiokk singg ginxaw decc sngw sinx ee ang’axmic. Qycc u jit jann, inui iauxx be quanwsir qruar bagqniar, guarhingg huanrser venr qaxx quair quair, ix anxnex qamxqag, mrjiacc samhuanx lionxcur qruar .kiw .kir, vrag .lyc .laii, qruar .kiw .kir, vrag .lyc .laii.

Siqanx u jit vox quw .ar, lau avyy qra bagqniar vrag .lyc .laii, kngr diamr snaaxqui-dingw naurjingx ee vnix:a. Jin’ nguar lor, rair laii kunr lor, lau avyy dyrr qra kangkuewtauu-aw siux siux kingg kingg lehh, junxvi beh kunr.

Jitt sii, guarkauw mngg qycc u dongdong ee kar mngg sniax, lau avyy qra hnirkangx uat .quer .kir.

“Ar, zuacnirr qi’miau simsig ee amwmii, qycc u si’angw laii lehh? Jiacnirr nguar ar.” cuir naxx qongw, singkux naxx dinxdang. Guarbin suibongxx guehsig qngx ngiawngiar, siqanx kiokk si qnex cimx ee vnuar xia. Lau avyy qniaa duiww mngkauw .kir.

Ser qix ciuw decc pah mngg ee kuanw, jin’ qoxjuix ee dongdong sniax,

“Jin’ nguar neh,” qra mngg kinx kinx aw pah kuix, binrtaujingg kia jit xee jap-zi~snax huer ee suiw suiw jabow ginxaw. “Sniaw langg ee ginxaw jiacc amr qycc jauw cud laii guarkauw luarlua syy?” Lau avyy simlai giaugii.

Jabow ginxaw sniaimx jin’ hywtnaix qongw, “Guaw ho’ngg cniar dirr qeci-lai ee jit qingx pangjuiw jewjy cnxiuw jyr qangx, muixx zit an’ vec muiquir ee hueluiw tiux cud pangjuiw jrngx zip kir qxanx-aw-drew, kangkuer siqanx jin’ dngg, diwsuw amwsii longxx jin’ nguar jiacc erdangr dngw cur. Ing’amr siysiangg, jyr uann kangkuer liauxau, qaqi jit langg, sun diyc guehqngx i.-iyvaiw-v. qniaa ar qniaa, jit xee byy dniudii, suacc kir hro jiyhtauu kee vuahdyw, ciuxjingxtauu-aw kir lur diyhsiongx. Guaw jitt jun jin’ tniar, qiongg beh dongr be diauu, hueh lrauu .cud .laii longxx be jriw. Acc jitt siwkouii-aw dagg xee longxx decc kunr .ar, guaw en’ lo qniaa qaur jiax, qanda’ avyy liw iauxx bue kunr. Guaw jaingiaw avyy liw si jit xee cinced qycc unziuu ee langg, soxiw duxjiah juanqangx pah liw ee mngg.”

Lau avyy qamxqag diyc hex pangjuiw u siap zip kir jabow ginxaw ee singkux-lai, dyrr dirr ix qapp jabow ginxaw qongw ue ee sii, pangjuiw bi itdit cingr duiww pnirkangx lairdew .kir.

Ix dyrr mng jabow ginxaw, “Anxnexsnex or, acc liw qamxx vad .guaw?”

Jabow ginxaw rinr qongxx, “Guaw dniardnia an’ linw cur taujingg qingquer, longxx knuar diyc avyy liw dirr txangx-aw-kax decc jyr jiamsnuar-qangx.”

Lau avyy jin’ hnuahiw, qongw, “A, liw si jit xee quaix ginxaw. Dycc jit qix jingxtauu-aw siongx .diyc hro guaw knuar, guaw knuar u iyc-aw tangx qra liw buah bor?”

Lau avyy dyrr qra jabow ginxaw ciuw kanx uaw qaur dingqngx-kax, dirr hiax jabow ginxaw crunx cud naxx vec cangx-aw ee jingxtauu-aw hro avyy knuar, sui’ knuar diyc vec sig jingxtauu-aw lrauu diyc angg qongwqongr ee hueh.

“Ar, m qramx or, kir hro jiyhtauu lur puar puee ee kuanw,” lau avyy cuir si anxnex qongw, mrqycc bagjiux bongg bongg, hex hueh si an’ dycc xui lrauu .cud .laii iauxx si knuar be jiokk cingcyw.

“Duxjiah ee bagqniar kngr dyhh .kir?” Lau avyy ciuw dirr snaaxqui-dingw bongx ar bongx, bagqniar dyrr dirr sijingx vnix:a, tec kiw laii qinw qruar lehh, dyrr qra jitt xee dniardnia an’ qaqi mngkakauw qingquer ee qoniuu-aw knuar jit xee dingxjinx.

Jit knuar, lau avyy qniax jit diyy, binrtaujingg m si jit xee jabow ginxaw, ix si jit jiah jiokk bixle ee odiap.

Lau avyy sniu kiw jit xee tuansuad qongxx, narr dirr diamrjing liangsongw u guehqngx ee iarmii, dniardnia u odiap e venr jyr langhingg, kir cue jin’ nguar qycc iauxx bue kunr ee zinqecur. Jitt jiah odiap huanrser dyrr si anxnex, ix ee kax siongx .diyc ar, guaw jiokk m qramx :e.

“Quaix ginxaw, laii jiax,” lau avyy jin’ unziuu duiww ix qongw, qongw uann dyrr kia .kiw .laii, qniaa cud mngkauw, uanx hiongr aurviah ee huehngg .kir.

Huehngg-lai vah vah kuanw ee hueluiw pemia decc kuix. Zitsii laurzet qunxqunw, qui’ cog jywhuew dirr hiax qapp huex sngw ee iah’aw cam’ pxangx, jitt jun longxx diam jiuwjiur, decc ciurhiyc erkax hiyckunr jyr binbang. Qanda’ cenxvec sig ee guehqngx cniu liusuiw ban ban aw lrauu .quer .kir. Kacc hng ee livax hiax, qui’ dua cog ee iaw muiquir, naxx vec seh ee hueluiw om om decc kuix.

“Jabow ginxaw jauw dyhh kir?” Lau avyy hiongg hiongg dongwdiam uat tauu knuar aurviah. Guanvunw duer dirr kajiah au ee jabow ginxaw m jaix dirr dangsii, hing’ngiaw suacc laii siausid .kir, lenrr kavo-sniax marr longxx byy tniax .diyc.

“Dagg xee langg longxx hiyckunr ar, guaw marr rair laii kunr ar.” Lau avyy cuir naxx qongw, langg naxx qniaa zip laii cur-lai.

Jex si jit xee guehniuu jin’ lewdauw ee amwmii.

guanjokjiaw: Ogawa, Mimei 小川未明