derr sxamx-snax jniux
DERR 33 JNIUX
LUN HUIH EE VNI QAPP SIMJONG-VNI
Vinhed-jxingr jiurr si vnirlangg ee huih, qapp ciachuicqiuu ixqip huicqiusor (huiqiuu-lai ee angg jid, haemoglobin), u qiamxjiyw.
Vinhed ee guaninx si jin’ je, dirr jiax be benw did diyhh qanxsingw qongw. Cincniu sidbut vutjiog, siauhuar-vutliongg, langg kia dirr akjag ee cur, cur-lai ee zidqngx be tangx jiyr .zip .kir. Iarr qycc jit hxang ee guaninx, jiurr si dui’ cud huih cincniu snix lairdirhut (內痔核), acc si snix uiwiongg, banrsingr ee vni, dirr singkux snix oksingr ee jingxiongg (惡性腫瘍, cancer), langg jiac simxmic dok iyc, dirr vakdow-lai u qiawsingtangg (寄生蟲). Jiaxee si in’ui vadd mic vni laii drir vinhed :ee, si in’ui qokk jxingw qinxqib, acc si quxdngg ee vni laii kiw :ee.
Jingwjong: Jiurr si binrsig ngg ng, vec vec, cnix cnix, hokib qankow, kax ciuw sngx, taukag hinn acc si tniar, byy air jiac vng, ursii viwqed, siauhuar vutliongg. Cuiwdunn, bagjiux qetmoc, cuiwkixhnua, qapp dagg ui ee liammoc kacc byy angg. Narr jiong’ huih laii giam, si kacc cringx, qiamxjiyw huicqiuu qapp huicqiusor.
Dirliauhuad: Diyhh dyw dirr bincngg hiyckunr anjing liauhuad; jiac hyw ee sidbut, juwir dairven, kongkir qapp zit ee qngx kacc je. Ursii kir druar snuadingw acc si haixvnii. Kacc siyxsix jiauwqor. Guaninx ee dirliauhuad. Iarr diyhh jiac ferrum qapp arsenicum ee iyc. Narr u simxmic vadd mic vni, cincniu snix lairdi, acc si snix uiwiongg, acc si vaklai u tangg, hiaxee diyhh suar idi. Narr u viwqed soxx ing ee iyc si aloes, cascara sagrada, qapp magnesii sulphas.
Oksingr vehhuicvni (惡性白血病, Pernicious anaemia): Jitt xee vni si jin’ lirhai. Ix ee guaninx iauxx bue jaix, qiamxcaiw si in’ui dirr singkux-lai u simxmic dogjid, acc si dirr dxngg-lai u kipsiux simxmic dogjid, drir qaur jitt hy vni. Ix ee jingwjong si cincniu dingxbin ixqingx qongw, qanda’ kacc siongdiong. Lxamm viw luw kacc siongg duw .diyc, iarr si 30 huer isiong ee langg. Siauwlenlangg hranw .did. Binrsig vec qycc ngg, cincniu kacc vec ee qet’aw hitt hy. Mehpog kacc qinw, sueziok, byy jiauww cuwsu; hokib, kacc qinw qycc dew. Auxtor. Langg narr u jitt hy vni, kuair kuair dui’ pnirkangx cud huih, acc si cud huih dirr bagjiux. Oksingr vehhuicvni be dnaxdiab .did; ursii e kacc hyw damrvyc, mrquxx kacc siongg dirr jit nii ee diongqanx vnirlangg e quewongw.
Dirliauu: Vnirlangg diyhh dyw dirr bincngg, anjing dirliauhuad, byc did hro ix qaqi dinxdang juer dairjir. Cuir diyhh sew cingkir. Diyhh ing ju’iongw-sidbut hro ix jiac, cincniu gulingx, qenng, gubacjiab, gubah ced iur iur. Ursii diyhh ing qiongsimjex cincniu brandy jiuw. Jiac iyc byy simxmic qonghau, ursii arsenicum si hyw, iarr tih ee lui tangx ing. Ursii isingx jiong’ qutcuew hro ix jiac, qiamxcaiw e lirig jitt hy vnirlangg, mrquxx si jiamrsii nardnia.
Het’iuxvni (血友病, Haemophilia): Langg narr u jitt hy vni dui’ siyxkuaw ee indnuax kuair kuair lrauu huih, ursii banw cuiwkiw liauxau, huih dniardnia lrauu yh did jriw. Jiaxee vnirlangg kacc siongg siauwlenn ee sii jiurr quewongw. Byy huatdo tangx dnaxdiap. Jitt hy vni si uituann ee vni, iarr si dui’ hurzinlangg laii uituann. Piwlun laurbuw narr u het’iuxvni, ix ee davoginxaw e duw .diyc, jongw .si jaboxginxaw be, kacc siongg si anxnix. Narr u soxjai decc lrauu huih, ing adrenalin chloride (1:1,000) laii jriw, hro ix be lrauu.
Jixvanx-vni (紫斑病, Purpura): Dingrgi: Kaksit jitt hy vni m si vni, si quixnarr kuanw vni ee jingwjong, ix ee kuanxsid si dirr puee-xe u cud huih, acc si cud vanx(?), soxiw qiyr juer jixvanx-vni. Jiaxee vanx(?) ursii kacc siyxkuaw, ursii kacc dua. Ix ee digqingr si jit mm. Jiww sir mm. (Snax mm. Si cavutdyx jit hunx ee dngg.)
Jitt xee vni tangx hunx juer quixnarr kuanw, dirr jiax qanda’ beh qongw nng kuanw, jiurr si dnuasunsingr jixvanx-vni (單純性紫斑病, haemorrhagic purpura).
Jitt xee dnuasunsingr jixvanx ee vni si kacc kinx :ee, iarr cud huih dirr puee-xe nardnia, kacc kuair hyw. Jitt xee kacc siongg si ginxaxlangg duw .diyc .ee.
Cuthuicsingr jixvanx-vni si kacc siongdiong ee vni. Vnirlangg sueziok, siwuii jixvanx, ix ee sig si jixsig; liammoc-xe iarr u cud vanx(?), cuir-lai, ui-lai, dxngg-lai longxx u.
Dirliauu: Anjing liauhuad. Vnirlangg diyhh dyw dirr bincngg. Diyhh qingw liudong ju’iongw ee sidbut. Diyhh hyw ee kongkir, iarr diyhh qiongjongwjex. Jixhuih ee iyc si calcii chloridum acc si calcii lactas, 1.3 grm., jit zit snax vaiw. Iarr jiaxee iyc ursii si hyw ing, acidum sulphuricum aromaticum, ergota, acidum tannicum, adrenalin.
Simjong-vni (心臟病, Heart disease): Lanw diyhh e qir did simjong ee tew jiurr si qinbuh soxx jniaa :ee, simx ee guarbin u moc vaux lehh si vutjiw qngqut qycc zun, qiyr simlongg (心囊, pericardium); simx-lai u jit xee qut qut ee moc qiyr juer simjong-lairmoc (endocardium). Jiaxee jojid longxx e duw diyc iamrjingr, acc si simxmic vadd kuanw ee vni.
Dirr jiax beh iokliok qongw:
Simlongg-iam (心囊炎, Pericarditis).
Simqix-iam (心筋炎, Myocarditis).
Simjong kokdiongx (心臟擴張, Cardiac dilatation).
Iusimx (脂心,脂肪心臟, Fatty heart).
Simjong-lairmoc-iam (心臟內膜炎, Endocarditis).
Simjong-venrmoc-iam (心臟瓣膜炎, Valvular disease).
Jingbyrven viwsyw vutjuann (僧帽瓣閉鎖不全, Mitral regurgitation).
Jingrbyrven hiabjig (僧帽瓣狹窄, Mitral stenosis).
Dairdongrmec jidving (大動脈疾病, Aortic disease).
Sentensingr simjong-vni (先天性心臟病, Congenital heart disease).
Hiabsimx-jxingr (狹心症, Angina pectoris).
Dongrmec-liuu (動脈瘤, Aneurysm).
Simlongg-iam: Jitt hy vni ee guaninx si:
1. Qipsingr luxmajitsux (僂痲質斯, rheumatism), acc si luxmajitsusingr vnixtyjnuaa-iam (扁桃腺炎).
2. Tuanziamxvni cincniu hiwiam, singhongzet (猩紅熱, scarltet fever), dringw hxang.
3. Sanxziogzet (產褥熱, puerperal fever), vairhuicjingr (敗血症, septicaemia), quthuairjux (骨壞疽).
4. Qethudjingr (結核症).
5. Banrsingr sinrjong-vni (慢性腎臟病).
6. Huxvairsingr simqinx-iam (腐敗性心筋炎), uiwiongsingr simjong-lairmoc-iam (潰瘍性心臟內膜炎).
7. Byy dniudii cak diyc hingkamw.
Simlongg guanvunw si qut qut ee liammoc, cincniu hingmoc ee kuanw. Narr huat’iam, jitt xee liammoc venwngua, si cox cox liamm liamm; byy zuarr quw dirr simlongg-lai u cud simlong’ik kacc je, ursii 1,000.0 c.c. jiww 1,500.0 c.c. ee je.
Jingwjong: Dirr guaninx vni ee diongqanx u qycc qetnix simlongg-iam ee jingwjong, jiauww qir dirr erdew: hingkamw dywvingg dirr simx ee taujingg tniar. Jitt xee tniar si dui’ simlongmoc ee nng vingg siy’ buaa .diyc; isingx narr ing tniajinxkir laii tniax, u buaa .diyc ee sniax. Texunx kacc qnuaii. Simlongg narr u jikju simlong’ik, jiuu simlongmoc nng vingg be sna’ buaa .diyc, anxnix be tniar, iarr hitt sijun hitt xee buaa .diyc ee snia’imx byy .kir. Vnirlangg ee binrsig si cnilamm, ix ee jinghingg si qankow, iux tauu kow bin, jin’ siongdiong ee kuanxsid. Hokib kunwlann. Simx decc pog byy jiauww cuwsu, iarr qinw, kacc sueziok.
Dirliauu: Diyhh hro vnirlangg dyw lehh, byc did hro ix dinxdang cud lat, siongsiongg hro ix e jingriongw .did, byc did kir qiauxziauw ix. Narr vnirlangg u diyhh dinxdang ee dairjir, kanwho diyhh vangjan ix. Diyhh qingw liudong ju’iongw ee sidbut. Jixtniar ee huatdo diyhh ing unx vavor he simx ee soxjai, m tangx sniu’ dang. Ursii ing vingx vavor. Narr simlongg u jikju simlong’ik sniu’ je, tangx ing linimentum iodi qra cad puehux dirr simx ee taujingg. Ursii isingx diyhh ing gokii laii suh huih ee hxuad. Ursii ing vingx. Ursii isingx diyhh cngciwsut, jiong’ hitt xee ik(?) tiux .kiw .laii.
Iyhbut liauhuad: Ether, strychnina, spiritus ammoniae aromaticus, alcohol. Narr decbeh hyw ee sii diyhh ing qiongjongwjex.
Simqinx-iam: Jitt xee vni si simx ee qinbah huat’iam, u hunx qipsingr :ee, banrsingr :ee. Qipsingr :ee si dirr vadd hy vni ee diongqanx cincniu siyxdngzet, sidhudiklixax, singhongzet, simjong-lairmoc-iam, jiacc kiw. Dirr jitt hy vni ee sii, simqinx e snix quixnarr ee ser liap lang’iongg. Hitt hy banrsingr :ee, kacc siongg si 35 huer isiong ee langg e duw .diyc.
Simjong kokdiongx jxingr si simx diongwdua. Langg narr u simjong-venrmoc-iam, iusimx, simqinx-iam, e duw diyc simjong kokdiongx jxingr.
Iusimx: Jitt hy vni s simx qinbah ee diong’ngx u kacc je iujid dilehh, acc si simx qinbah vniwjniaa iujid. Simx si viw vingsiongg sii kacc dua, kuair kuair vniwjniaa simx kokdiongx jxingr. Iusimx (脂心) ee guaninx si laurlangg, banrsingwvni, ok’igjingr, vinhed, jiac jiuw, phosphorus qapp arsenicum ee diongwdok, simlongg-iam, simjong vuidua (心臟肥大, cardiac hypertrophy).
Jingwjong si guanin vni :ee, vinhed, taukag hinn, hokib kunwlann, kax e jingw, mehpog ursii ban ban, iarr byy simxmic lat.
Simjong-lairmoc-iam si simx ee lairmoc huat’iam; kacc siongg iamrjingr si uaw dirr venrmoc ee soxjai. Iam u hunx qipsingr simjong-lairmoc-iam qapp banrsingr simjong-lairmoc-iam. Iarr qipsingr :ee u hunx liongsingr simjong-lairmoc-iam, qapp uiwiongsingr simjong-lairmoc-iam.
Liongsingr simjong-lairmoc-iam ee guaninx kacc siongg si dui’ luxmajitsux ee vni hitt lui jiacc kiw; acc si dui’ tuanziamxvni. Jitt hy vni ee soxjai kacc siongg si simx jyxvingg ee venrmoc huat’iam. Jitt xee venrmoc-iam narr kacc kinx, hyw liauxau, ursii hitt xee venrmc e hyw cincniu jaw ee kuanw; mrquxx hitt xee simx venrmoc in’ui huat’iam, ursii qed qui’ vax, anxnix jiurr hitt xee langg itsingx u drir quxdngg ee simjong-vni.
Uiwiongsingr simjong-lairmoc-iam, si vutjiw siongdiong ee vni, kacc siongg langg narr u jitt hy vni, be dnaxdiap .did. Ursii simx venrmoc puawnua, ursii venrmoc snix jin’ je huat’iam ee liab’aw qiyr juer simx venrmoc iamrliap (心瓣膜炎粒, vegetations on heart valves); ursii jitt hy ee liab’aw snruar snruar siwqer u suar zip dirr dongrmec-lai, simkuann qaur dirr singkux ee jongrkir, drir qaur jongrkir iarr huat’iam. Jiaxee huat’iam ee liab’aw narr tuann qaur dirr nauw, hitt xee langg jiurr u vuanwsinx-vutsui ee jxingr (vuanwsinx bavir); narr qaur dirr sinrjong jiurr kiw sinrjong-iam, ziy-lai e u huih; narr qaur dirr vijong, vijong e tangwtniar jingxdua. Jitt hy uiwiongsingr simjong-lairmoc-iam, kacc siongg nng~snax zit kiw, qaur lak lexvair uijiw jiurr siw.
Dirliauu: Langg narr u jitt hy vni derr id iauwqinw si diyhh anjing dyw dirr bncngg, iarr m tangx hro ix dinxdang. Jitt hyw hiyckunr ee lixkir si beh hro huih ee sunkuann kacc ban, hro venrmoc ee iam kacc kuair trer. Iarr qycc jit hxang si air dihongg hiaxee huat’iam ee liab’aw, simx venrmoc iamrliap dui’ venrmoc zip huih kir vadd xui.
Simjong-venrmoc-iam: Dirr dingxbin qongw kiw simjong-lairmoc-iam ee sii, u qongw hitt xee kacc siongg u lenlui diyc venrmoc, anxnix kiokk si urngiaw, jitt hy simjong-venrmoc-iam kacc je si dui’ simjong-lairmoc-iam jiacc kiw. Simx ee jyxvingg soxx juer ee qangx si viw iurvingg ee qangx kacc je, iarr jyxvingg ee huic’ab (血壓, blood pressure) si kacc qnuaii, soxiw venrmoc-iam kacc siongg si dirr jyxvingg ee venrmoc, jiurr si dairdongrmehven (大動脈瓣, aortic valve), qapp jingbyrven (僧帽瓣, mitral valve).
Simjong-venrmoc-iam u nng kuanw:
1. Venrmoc siursiongx jiurr qiux kacc dew, be did qnuaix qaur bat, hitt lairbin ee huih, jiurr iuguann e tangx qycc lrauu dywdngw .laii, jex miaa qiyr juer venrmoc viwvyw vutjuann (瓣膜閉鎖不全, regurgitation).
2. Jiaxee venrmoc soxx siuw ee qangx e vnir ec, qiyr juer venrmoc hiabjig (瓣膜狹窄, stenosis).
Narr beh qongw bingg simjong venrmoc-iam ee kuanxsid, beh qingw jingbyrven viwsyw vutjann (僧帽瓣閉鎖不全, mitral regurgitation). Ee vni laii suatbingg. Simx pokdong ee sii, hitt xee huih u sag dui’ iursig qaur hiwdanrdongrmec, iarr dui’ jyxsig qaur dairdongrmec. Setsuw jingbyrven be did qnuaix qaur bat, jyxsig-lai ee huih jiurr e tangx laii qaur jyxvongg. Narr si huih cincniu anxnix lrauu dywdngw .laii beh anwjnaixngiu? Jyxsig byy lat tangx sag longxjongw ee huih zip dairdongrmec, soxiw jyxvongg diyhh cud kacc je lat beh vangjan jyxsig ee byy qraur. Dui’ anxnix jyxvongg narr juer qangx kacc je, ix ee viah jiurr si simqinbah, e kacc qau, qiyr juer simjong vuidua. Qiamxcaiw anxnisnix jiamrsii simjong e huad .did, jiong’ huih sag cud dirr dairdongrmec. Jongw .si byy zuarr quw jyxvongg byy huad did da’uaa, ix sinx ee qangx sniu’ quewtauu, drir qaur jyxvongg kokdiongx (左房擴張). Jyxvongg-lai ee huih be tangx longxx ip dirr jyxsig, uree tingjiw, qiyr juer huic’ik utjig (血液鬱積, stagnation of blood).
Diyhh e qir .did, jyxvongg ee huih si dui’ hiwjong laii, soxiw byy zuarr quw hiwjong-lai ee huih utjig. Hiwjong ee huih si dui’ iursig laii, soxiw hitt xee iursig decc cud lat kacc je air kacc ngiaa hiwjong-lai ee joxdongr, air sag huih hro ix e sunkuann dui’ hiwjong qingquer. Anxnix iursig e vuidua, iarr byy zuarr quw ix ee lat e qiamxjiyw, iarr huic’ik utjig qaur iurvongg. Jitt xee si in’ui snajiamven ee kangx u venr dua, snajiamven (三尖瓣) qnuaix be bat, huih u lrauu dywdngw laii qaur iurvongg; byy zuarr quw dirr hardairjingrmec iarr huic’ik utjig. Narr si anxnix byy zaurr quw, huih utjig dirr jongrkir, ui, qnuajong, vijong, sinrjong, qapp kax ee soxjai. Dui’ anxnix jingrmehqngw-lai ee huih utjig, mngsewqngw-lai ee huih sniu’ je, huicjniux jiurr e siamr .cud .laii, zip dirr qetdewjid, qiyr juer juixjingw.
Juixjingw dairsingx knuar qnir ee soxjai si dirr kavnuaa. Decbeh amr ee sii jiacc knuar qnir, in’ui qui’ zit qniaa laii qniaa kir, huih e duirlyc erdew ee soxjai. Jitt xee juixjingw naxx quw naxx je. Narr juixjingw ee soxjai ing jngxtau’aw qra cic, ix jiurr lab jit u; be cincniu hyw bah, narr ciuw qiac .kiw .laii, puee iarr duer ix puu .kiw .laii. Hitt xee juixjingw naxx quw e jnriu qaur katiw, vakkangx (腹腔), hingmohkangx. Vakkangx narr jikjuiw, jitt hy qiyr juer vakjuiw (腹水, ascites); hingmohkangx narr jikjuiw, jitt hy qiyr juer hingjuiw (胸水, pleural eflusion). Narr juixjingw qaur hiacc siongdiong jingwtauu si dang, kacc dua bin byy zuarr quw e siw.
Hitt xee juixjingw u nng hxang iauwqinw ee jxingr:
1. Dui’ simjong-vni laii kiw, jitt xee kacc je si dairsingx dui’ kax jingw .kiw .laii;
2. Qycc jit kuanw si dui’ sinrjong-vni kiw, jitt hy kacc je si dairsingx dui’ bin nirr kiw; kunr .kiw .laii ee sii, jiurr kacc kuair knuar qnir jitt hy ee juixjingw.
3. Jingwjong: Simjong-vermoc-iam ee jingwjong kiokk si jin’ je, mrquxx kacc siongg hunx juer sir kuanw:
1. Simquir kongwsing (心悸亢盛, palpitation), jiurr si simjong pok ok cingw. Jitt hy jingwjong dagg langg ursii u; piwlun, narr hutzenn qniax, acc si hnuahiw, bad u simx pok pok cingw, mrquxx kuair kuair qycc hyw hyw.
2. Hokib kunwlann (呼吸困難) cuanxkuir jin’ qankow.
3. Tniar.
4. Qexsiw (syncope), jiurr si simx pokdong (心搏動) hutzenn suah, ursii si jiamrsii nardnia, narr si quw jurzenn langg e siw
Simimx: Isingx narr beh jinxduanr jitt hy vni, ix ing tniajinxkir tniax qnir hingkamw quixnarr soxjai, dirr hiax u tniax qnir simx ee imx, tangx jaix simx u uanjuann acc byy. Narr simjong-venrmoc-iam hitt xee imx u qyc’ngiu qiyr juer jab’imx (雜音, murmur). Jitt hy jab’imx si dui’ simx ee venrmoc u qyc’ngiu, cincniu simjong-venrmoc hiabjig, huih qniaa be vnivang.
Dirr dingxbin u qongw huik’ik utjig ee lixkir, iarr u qongw hiwjong-lai ee huih u utjig, qapp vakdow-lai ee huih iarr si anxnix. Dui’ anxnix vnirlangg u sraur, hokib kunwlann, ursii kak huih. Qnuajong be qniaa ix ee jok’iong, soxiw vnirlangg ursii u ngtanw. Dui’ ui nirr huih yh did dywdngw laii qaur simx, soxiw siauhuar-vutliongg, ursii tror huih. Sinrjong iarr be qniaa ix ee jok’iong, ziy kacc jiyw, ziy-lai ursii u nngrvehjid qapp huih.
Dirliauu: Diyhh anjing dirliauhuad. Vnirlangg decc dyw ee sii simjong ee qangx si kacc jiyw, soxiw kacc u qihue tangx idi. Vnirlangg bylun simxmic su, kanwho diyhh unziuu siongser qra ix liaurliw. M angx cniqongg laii qiauxziauw ix, hro ix simx-lai utjud. Langg narr u jitt hy jxingr, dirr vni dang ee sii kanwho diyhh jin’ siyxsimx, qniax liauw kuair kuair e snix ziogsiongx.
Vnirlangg narr beh huansinx, diyhh vanjan ix, ix m tangx qaqi cud lat.
Vnirlangg ee ziy dagg zit diyhh qra ix nriuu knuar zuarr je. Isingx narr jaix vnirlangg ee siauxven si je acc si jiyw, ix jiurr e jaix soxx ing ee huatdo u duxhyw acc byy.
Simjong-vni ee langg, ursii mii .sii kacc siongdiong, be dyw, be kunr .did. Diyhh jiong’ dua der iw hro ix tex lehh, acc si qixdyh hro ix pah lehh, anxnix kacc e an .did (derr 117 doo).
Jiaxee vnirlangg ursii hokib kunwlann, be dyw dirr bincngg. Narr si anxnix diyhh ing teiw hro ix vnuar tedyw. Ursii isingx jiong’ ammoniae carbonas, ether qapp scilla hro jiac.
Juixjingw: ursii ing lirziyjex hro vnirlangg ee ziy kacc je, iarr ing harjex, hro ix dui’ duardngg ha kacc je juiw cud .laii, anxnix jitt xee huatdo e hro ix sriaux .kir. Ursii diyhh ing cngciwsut (穿刺術, aspiration). Jitt xee huatdo si ing vangr juiw tywqngxjiamx (gun juer ee qngw) hro juiw lrauu .cud .laii. Jitt xee huatdo ursii ing dui’ hingkangx (cnghingsut), acc si vakkangx (cngvaksut), acc si harjix puee-xe, hro juiw cud .laii. Derr id iauwqinw si diyhh cingkir. Jitt hy ciuxsut hxuad, qir dirr derr 424, 544 bin.
Sidbut: Diyhh qingw liudong ju’iongw ee sidbut; jurzenn u juiw ee jid m tangx sniu’ je; kacc kuair siauhuar :ee; m tangx juer jit xe jiac sniu’ je, qniax liauw e qiauxziauw simjong. Narr unn unn aw qetnix ix ee sidbut si kacc hyw; vnirlangg tangx jiamrjiam kacc cud lat, mrquxx iauwqinw si diyhh sisiongg tranr isingx ee bingrling laii qniajuer.
Iyhbut liauhuad: Narr u simjong-vni, isingx kacc siongg jiong’ digitalis ee iyc hro vnirlangg jiac. Digitalis ee jok’iong si nng hxang, simqinbah qiux ee lat u kacc iongw, iarr simpokdong u kacc ban; dui’ jitt nng hxang, huih e kacc kuair sunkuann. Digitalis si lirziyrjex, soxiw jiac jitt xee iyc ee vnirlangg e vaised kacc je ziy. Langg narr decc jiac digitalis, jiac zi-jap zit, zen’au diyhh langr cid zit, in’ui jitt hy iyc e jikju dirr singlux laii diongwdok; jitt xee qiyr juer tiokjig jok’iong (蓄積作用 297 bin). Ursii jitt hy ee vnirlangg be kunr .did, narr anxnix isingx soxx beh ee iyc si paraldehyde, sulphonal, hyosyamus, iarr ursii potassii bromidum. Ursii diyhh ing qiongsimjex (強心劑) cincniu ether, strychnina, spiritus ammoniae aromaticus. Ursii amyl nitris hyw ing, mrquxx diyhh jiauww isingx ee bingrling jiacc tangx tec hro jiac.
Dairdongrmec jidving: Jitt hy dairdongrmec jidvni (大動脈疾病) si cincniu simjong-vni sna’ drangg, si dui’ ix ee venrmoc u qyc’ngiu cincniu ixqingx u qongw kiw. Ursii hitt xee venrmoc ee soxjai u hiabjig, ursii vnir kacc dua. Iarr dairdongrmec ee lairmoc ursii u banrsingr ee huat’iam. Jitt hy vni, lxamm viw luw kacc je; si dui’ quewlyy, quer imxjiuw, acc sim muidok jiacc kiw. Ix ee dirliauhuad si jiauww qir dirr dingxbin.
Sentensingr simjong-vni (先天性心臟病, Congenital heart disease): Jitt hy jxingr jiurr si ginxaw iauxx dirr juxqiongx-lai ee sii, decc dua be duxhyw. Hitt xee be duxhyw, kacc siongg si nngrngikangx (卵圓孔, foramen ovale) byy bat, acc si simx jyxiursig ee diong’ngx ee viah u kangx, acc si hiwdairdongrmec hiabjig (肺大動脈狹窄).
Jingwjong: Bin nirr qapp kax ciuw ee jngxtau’aw longxx u cnilamsig. Ix ee jngxtau’aw-buew vnir kacc dua. Narr siyxkuaw cud lat jiurr pnihpnic cuanw, iarr sraur, kuair kuair qamxmo. Jitt hy ee langg kacc siongg siauwlenn ee sii, dui’ hiwiam jiacc siw.
Dirliauu: Diyhh siyxsimx jiauwqor. Kiarkiw ee soxjai qapp soxx cing ee snaaxkor, longxx diyhh e siyly. Byc did hro ix siurkir; narr duarhanr ee sii, byc did hro ix juer dairjir quewtauu, iarr diyhh jiac kacc u ju’iongw ee sidbut.
Hiabsimx jxingr: Jitt hy hiabsimx jxingr (狹心症) si simx tniar ee jxingr. Kacc siongg si 40 gua huer ee davolangg. Hitt xee tniar si vutjiw dang, vnirlangg decc sniu decbeh siw ee kuanw. Tniar si dirr simx ee taujingg, zen’au dui’ dywvingvnix diddit tniar, dui’ dingxbin ee qingtauu ee soxjai vutjiw tniar. Vnirlangg decc tniar ee sii, kacc siongg diam diam, bin utjud, binrsig kacc vec, iarr lrauu cinwqnua.
Dirliauu: U jit kuanw ee iyc vutjiw hap dirr jitt hy vni, jiurr si amyl nitris. Jitt xee iyc kacc siongg kngr dirr jit liap vyleqanx-aw, anxnix kacc lirven tangx ing. Narr beh ing ee sii, tec jit liap congr hro ix puar, he iyc dirr binrqinx nirr, hro vnirlamgg liamvnix kib zip; anxnix e kacc knuawuac. Ursii diyhh qra ix juwsia morphia, iarr ursii diyhh ing chloroform hro ix kib zip damrvyc. Narr si vnirlangg hutzenn u jitt hy tniar, diyhh liamvnix cniaw isingx laii knuar. Kanwho tangx ing qaiwluac vavor, he hingkamw dirr simx ee taujingg, iarr ing siyjuixquanr hro ix ee kax kacc siyx.
Dongrmehliuu: Dongrmehliuu (動脈瘤, aneurysm) si dongrmec u jit soxjai huat’iam, jingxdniur .kiw .laii. Si in’ui dongrmec u jit soxjai kacc vyc kacc lramw (kacc je si dui’ muidogsingr dongrmec-lairmoc-iam); huih narr qniaa qaur hitt der, sriu diyc hitt xee dua ee aplik, soxiw hitt der dniur dua .kiw .laii, dongrmec hro qig liauw kokdua jiurr vniwjniaa jitt hy dongrmehliuu. Hitt siwvnix ee soxjai, qud acc si jongrkir, in’ui anxnix hro ix deh .diyc, keh .diyc jiurr kiw vni. Narr kiwqngw hro ix deh .diyc, hokib jiurr kacc qanlann. Setsuw u qud ee soxjai hro deh .diyc, narr quw hitt xee qud e sriaux .kir, iarr e tniar. Ursii jitt hy liuu e puar, huih lrauu dui’ lairbin zip .kir, acc si lrauu dui’ guarbin cud .laii; narr byy qnuaxqinw jriw huih, jiurr byy quiw hunx quw e siw .kir.
Dirliauu: Hiyckunr, ursii vnirlangg diyhh dyw dirr bincngg. Diyhh ju’iongw ee sidbut, iarr diyhh jiac kacc jiyw; liudong mic cincniu juiw qapp gulingx diyhh qiamxjiyw, air hro singkux-lai ee huih qiamxjiyw juiw ee jid, ngwbang dongrmehliu-lai ee huih e kacc kuair vniwjniaa huicder. Dirr jit zit ee diongqanx soxx jiac ee juiw m tangx quer 300.0 c.c. Kacc siongg ing ee iyc jiurr si potassii iodidum. Iarr u qycc quixnarr kuanw ciuxsut, isingx ursii juer, air hro dongrmehliuu-lai ee huih vniwjniaa huicder. Jit hxang si ing snuar vak hitt diauu dongrmec uaw dirr dongrmehliuu ee soxjai. Narr anxnix juer, liuu-lai ee huih e vniwjniaa huicder, iarr huih e sunkuann dui’ vadd diauu lo kir, jiurr si dirr hitt xui ee ser diauu dongrmec e kokdua, juer sinx ee lo. Narr knuar derr 465 b doo jiurr e bingvik.
Jingrmec-iam: Jitt xee vni jiurr si jingrmec ee lairmoc-iam, u hunx juer nng kuanw: dansunsingr jingrmec-iam (單純性靜脈炎, simple phlebitis), huawlangsingr jingrmec-iam (化膿性靜脈炎, suppurative phlebitis). Guaninx jiurr si jingrmec sriu diyc siongx; acc si hitt xee derr zi kuanw, si dui’ dirr jingrmec druar ee soxjai u lang’iongg, acc si byy cingkir ee siongx. Dui’ jiax bisingbut u zip dirr jingrmec, hro ix huat’iam ursii jingrmec-lai ee huih vniwjniaa huicder, qiyr juer huiccuanvni (血栓病, thrombosis), iarr hitt der huih qiyr juer huiccuanx (血栓, thrombus; derr 466 doo).
Jingwjong: Hitt diauu jingrmec narr qra ix bongx si cincniu jit diauu syh-aw, u jingw. Dingxbin ee puehux huad angg, iarr tniar. Hitt qix kax acc si ciuw kacc siongg jingw .kiw .laii. Texunx kacc qnuaii. Narr si huawlangsingr :ee jitt hy vni si guihiamw, ursii ix ee jingwjong si cincniu langdok jxingr (膿毒症, pyaemia).
Dirliauu: Vnirlangg diyhh dyw dirr bincngg; hitt qix kax longxx m tangx dinxdang; diyhh ing mihuex qra ix vaux, ing aurbin ee huwbok vak hro hyxser; huwbok congr liauw kax diyhh kuar kacc qnuaii. Ursii ing buah qoiyc ee hxuad, acc si lotio plumbi cum opio siau’iamrjex. Ursii ing glycerinum qapp belladonna qra cad hitt xee huat’iam ee soxjai. Kanwho diyhh jaix jitt hy vni si vutjiw iauwqinw diyhh anjing dirliauu acc quw. Narr byy suewzi, dui’ hitt xee huiccuanx (血栓, thrombus) vunli juer jit der, acc si quixnarr der, jiauww huic’ik sunkuann qaur dirr kacc ser diauu huicqngw, be tangx quer u joxdongr ee soxjai. Hitt der lag .kiw .laii, kir dirr vadd ui qiyr juer cuantad (栓塞, embolus). Hitt der cuantad ursii qaur simx nirr, drir qaur simjong-lairmoc-iam, acc si qaur haur hir hro kiw hiwiam, acc si qaur nauw hro langg vuanwsinx vutsui. Soxiw si derr id iauwqinw diyhh siyxsimx jiauwqor. Narr diyhh qra ix dinxdang, diyhh sewzi, iarr m tangx qra ix kap .diyc. Narr si u huawlangsingr jingrmec-iam (化膿性靜脈炎) jitt hy vni si vutjiw guihiamw, ursii narr beh qiur mia, diyhh jiong’ hitt qix kax, qra ix cetdng.
Jingrmec lordiongx (靜脈怒張, Varicose veins): Jitt hy vni jiurr si jingrmec kokdiongx, huatdua be qycc qiux .kiw .laii ee iwsur. Kacc siongg duw .diyc ee soxjai si singkux kacc qe ee xui: cincniu qongbunn ee lairbin, dirr hiax qiyr lairdirhut (內痔核, internal piles); qapp harjix (derr 466a doo). Dirr jiax beh qongw harjix ee guaninx si in’ui jingrmec ee viah u sentensingr ee sueziok; jitt hxang si dui’ cutsir, ix ee jingrmehviah si kacc lramw. Narr si u simxmic joxdongr hro huih kacc yh did dywdngw kir simjong, cincniu dingrvii(ding vii?), anxnix jiaxee jingrmec e kokdiongx. Acc si langg kia dit dit sniu’ quw, acc si dnax dang dnar, anxnix ursii e drir qaur jitt hy vni. Ursii guarbin ee puehux e puar, qiyr juer jingrmec lordiongx ee uiwiongg. Jiaxee jingrmec ursii e puar, dui’ anxnix cud huih.
Jingwjong: Kax tniar, kax sngnngxtniar; kia, acc si qniaa ee sii kuair iawsen. Kax ursii e jingw, e lingw .kir, iarr baa baa.
Dirliauu: Guaninx dirliauhuad. Narr u viwqed, dairven diyhh juwir. Ursii diyhh hro ix dyw dirr bingcngg hiyckunr, ursii diyhh ciuxsut. Ingqaix diyhh jiong’ pingduar vak kax beh vangjan huih ee sunkuann.