Bang Jap Xia

(夢十夜)

derr lak xia

( 第六夜)

Lu Juxbingg huan'ik

U langg decc qongw Unkei dirr Horqog Sxi dngdecc diaukig Dairlik Qimqongx Zin’ongg ee dua vudsiongr. Guaw dyrr naxx sanwvo naxx qniaa laii kir qra knuar mai lehh. Nacc jaix, jaw dyrr ixqingx u jit dua cog jib’uaw dirr hiax ee ingg langg, caxla qunxqaw byy sii tingg.

Sirngi jingg jnia’ jap vo hng ee soxjai u jit jangg ciacsiongg. Hex duarkox ciursinx ciaa ciaa, qra ngirmngg dingxquann ee cuwhia jac lehh, ciuruex itdit crunx uiww hng hng ee tnidingw .kir. Siongciu-hiyc ee cuiwcnex qapp sirngi-mngg ee ju’angg siy’ duiwknuar, qamxqag jin’ lewdauw. Acc hex siongciu jaijingr ee soxjai qapp sirngi marr jin’ suwpuer, ciursinx be kir jac diyc sxi-mngg, ciuruex qycc an’ cuwling vnix:a cngx .quer, qiongg beh kap diyc tnidingw ee vec hunn. Jabjiog si qoxhongx-qoxsig ee sirbiy. Hro langg laii sniu kiw diyc Kamakula ee sidai.

Mrqycc jitt sii dirr jiax cutzip :ee, qapp guaw qangrkuanw si Bingdi niqanx ee langg.

Jitt lairdew ciahux jiamr duardysor. Dniardiyc si dirr hiax danw byy langkeh, byy girniu qniaa quer laii jiax qeqiamw knuar laurzet.

“Hex vudsiongr u qraur dua neh.” Vnix:a u langg qongw.

“Viw kig poxtongx ee langsiongr kacc qankow neh.” Marr u langg anxnex qongw.

Guaw duxhyw u siangrkuanw ee sniurhuad, qycc jit xee javolangg qongw, “Hex Dairlik Qimqongx Zin’ongg neh, jinw iauxx u langg decc kig Zin’ongg or? Guaw qiywsi Zin’ongg longxx si qoxjaw sii kig .ee lehh.” Derr snax xee qongw.

“Unkei beh kig sniaw longxx u hxuad .did, jitt junx sinn si zuarr aw nirr bingxiongw lehh, jaxjingg beh qongw lirhai, dyrr qongxx byy langg e viw Dairlik Qimqongx Zin’ongg qycc kacc lirhai :ee, huanrser viw Zidvunw Buxjunx qycc kacc lirhai lehh.” Jit xee snehun :ee qongw. Ix qra ersinx snaxawqibuew lriuu quann, tauu byy dir by-aw, jit kox tuii tuii, byy sriu sniaw qauwiok ee kuanw.

Unkei jit diamw aw dy’ byy quanw vnix:a knuar laurzet :ee, cag’aw qapp tuii-aw un byy tingg, tauu m bad uat quer laii knuar. Ix kia dirr quantuix dingw, diwsimx it’ir, hyxlew aw decc siusiah Dairlik Qimqongx Zin’ongg ee siangx vingg bin.

Unkei tauu dir ser ser dingw ox sig by-aw. Sinkux dingw cing :ee, naxx cniu qoxjaw buxsu ee qac’aw, ciuxngw dua qaxx qra kajiacpniax ziax qui’ pniaw. Dyrr naxx qui’ vah nii jingg ee qoxjaw langg lehh. Cam’ sir vingg vnix:a caxla qunxqaw, knuar laurzet :ee jin’ byy duiwtin.

Guaw simlai itdit giaugii Unkei nacc e qaur jinw iauxx uac lehh, jin’ si vutkyxsugi, mrqycc guaw guanjai byy jauw, qangrkuanw kia dirr hiax qeqiamw knuar.

Unkei jit diamw aw dyrr byy qamxqag gairgiyc, pemia decc jyr ix ee sittauu. Jit xee dnax tauu knuar Unkei jycsid ee siauwlenqex, tauu uat duiww guaw jiax laii, ylyw qongxx, “Jinjniar si Unkei, bagjiux-lai longxx byy lanw jingwlangg, tenha inghiongg jixu Dairlik Qimqongx qapp guaw Unkei. Jitt jiongw kiwser daddid juncunn.”

Jiaxee uergiw hro langg qamxqag habliw qycc cuwbi, guaw dyrr qra siauwlenqex giyw .jit .xe, siauwlenn :ee naxx dik’ir, suar .lyc .kir qongw, “Liw knuar ix iong cag’aw qapp tui’aw ee ciuxlo, ersaiw qongw si siux-vangr longxx juriuu jurjai lar.”

Unkei jitt jun dngdecc qra hex Zin’ongg cocox ee bagbaii jit cunr jit cunr jin’ jimjiog kig .cud .laii. Qycc laii knuar ix cag’aw-buew u sii kia dit, u sii dywvnaiw, u sii qycc kix kix, tui’aw an’ cag’aw dingw dyrr qra qongr .lyc .kir. Dingrjnix ee cakox muixx hro ix kig jit vxenr, siah jit vxenr, qau qau ee capuer dyrr suii diyc tui’aw sniaimx siwsnuar vuex .cud .laii. Byy zuarr quw, hex pnirkangx ow hyw, Zin’ongg sniurkir huad singwde ee pni-hxingg dyrr puhenr .cud .laii. Unkei Sxaix ee ciuxhuad qapp dylo jit diamw aw dy’ byy encenn, byy dunwdnex.

“Cag’aw iong qaxx jiokk suawciuw, bagbaii iarr hyw, pnirkangx iarr hyw, sniu qaur dah dyrr kig qaur dah.” Guaw simlaii qamxdong, cuir nirr anxnex decc liam.

Hitt xee siauwlennqex jiksii jriab lecc qongw, “Nacc si, hex bagbaii iacc pnirkangx m si iong cag’aw kig .cud .laii :ee, si vunxdew dyrr dirr cakox lairdew cangr bagbaii qapp pnirkangx :ee, si jiyh cag’aw qapp tui’aw ee lat qra ow .cud .laii :ee. Dyrr naxx cincniu qra jiyhtauu dirr too nirr ow .cud .laii qangrkuanw.”

Jitt sii guaw dirr ix ee uergiw diongx jiacc jaix guanlaii diaukig si jitt kuanw ee lixlo. Narr junw qongxx hitt xee siauwlenqex soxx qongw :ee longxx driyc, acc m dyrr vutquanw si si’angw, longxx erdangr jyr daiukig saihu lor.

Guaw suacc qamxqag qaqi marr venr erhiauw diaukig, qnuaxqinw beh cir knuar mai lehh, dyrr byy air qycc lauu dirr hiax. Qinw qnuaw dngw laii cur.

An’ qesix-sniux-aw lairdew qra cag’aw qapp tui’aw ciaux .cud .laii, qniaa laii aurbuew hngg-aw. Hiax u jingg quiw qangx kir hro dua hongx cuex dyw ee cniurciu, vunxlaii beh jyr caa hniaa. Dyrr cniar liauu caa saihu liauu jyr duarser duxhyw ee cakox, qui’ dua dxuix dunw dirr hiax.

Guaw dyrr dirr lairdew qingw jit xee siongrr dua der :ee, hingr cuccuh kaisiw kig. Jin’ vuthing, byy qra Zin’ongg kig sxingg. Derr zi der cakox marr byy cangr siaxmih langtauu dirr lairdew, derr snax der qangrkuanw byy cangr Dairlik Qimqongx. Quikir qra juanvo ee cakox longxx tec laii kig, jiongqibuew marr longxx byy Zin’ongg ee ngiaxjiah. Guaw jitt sii jiacc diwqag diyc Bingdi sidai ee cakox byy kyxlingg cangr Zin’ongg ee vudsiongr. Marr liqaiw qongxx Unkei qaur jinw iauxx qycc uac lehh ee indnuax.

guanjokjiaw: Natsume Soseki 夏目漱石