Didusix

Lu Juxbingg huanik

Jitt jit qangx, Sikqiax Vudjow laii qaur Qiglok Sewqair ee lenhuex-dii vnix:a, simjingg jin’ kinsangx, naxx sanwvo naxx knuar huex. Juixdii lai lenhuex vehsig ee huevan, vec qaxx naxx gxik-aw lehh, huesimx itdit bunr cud quw quw be snruar ee pangbi, jitt jun si Qiglok Sewqair jaixkiw sii.

Sikqiax Vudjow diam diam kia dirr juixdii-aw vnix, byy dniudii, ix anww lenhiyc pang ngr juixdii-aw erbin itdit knuar .lyc .kir, lenhuex-dii ee juiw si tauwted qngcingx, quixlyhh ig bxan lxiw cimx, soxu ee qongqingw longxx knuar qaxx c.-cingcyw-c. Lenhuex-dii erbin quiw ig bxan lxiw jniawsi dergak ee soxjai. Sikqiax Vudjow ee tenganw naxx cniu se’ngiuu diauwqniar, knuar diyc Nairhyy Qiyy, jiamsnuax, huexhaiw, huecdii, cam’ je je cuxhuat juerzinn ee hingqu. Dergak diongx cicamw kiongxvor ee jingqingw longxx dirr bagjiux jingg.

Dyrr dirr jitt sii, Vudjow knuar diyc dergak drew u jit xee qiyr jyr Qenrdaddyx ee lamjuw, cam’ qitax je je ee huanrlangg dng' dirr huecdii lai puu .jit .xe dimm .jit .xe gniauhgniauc suanx.

Jitt xee Qenrdaddyx jairser si jit xee taii langg vangr huew, buog-vutjog ee dua toxhuiw, dua cadtauu, jitt jun dng' dirr jiax jiapsiu koxhingg. Suibongxx anxnex, Sikqiax Vudjow iauxx si decc knuar ix jairsnex u jyr quer siaxmic hyw dairjir bor, tangx jniaa jyr qaixqiur ix ee lixiuu.

U ar, dirr ix jaxsii, u jit qangx, ix duiww ciurbok jin’ om ee nxaa-diongx qnuaw lo, lo-diongx u jit jiah didux beh jnaw quer dua lo. Qenrdaddyx jit kax giaa quann dyrr beh dac .lyc .kir, tangx qinw qycc qnuaw lo. Hionghiongg ix sniu qongxx, dongr lehh, jitt jiah didux ser bongxx ser, marr si jit diauu snewmia, anxnex dyrr qra dac .siw, qamxx m si sniu’ quer kyxlenn lehh? Dyrr lunw .jit .dah .quw .ar, danw hitt jiah didux jauw jiacc qycc qnuaw lo. Jex quewkir ee jit dnxua dairjir, Vudjow knuar qaxx jiokk dingxjinx, jex marr si Qenrdaddyx hranw hranw u ee jit sud aw senrliam, jiyh jitt xee siyw siyw senrliam, Vudjow quatding beh qaixqiur Qenrdaddyx jit vaiw. Knuar Qenrdaddyx u huatdo dyy cud dergak bor?

Jnia’ duxhyw vnix:a cuiwcnix lenhiyc dingxquann, u jit jiah didux dng' decc tror cud ginsig ee sisnuar, sisnuar iauxx qycc qngx sicsih. Sikqiax Vudjow crunx cud jingxtauu-aw qra didusix liamr dng jit jad aw, sidenw huatlik, sisnuar dyrr venr jyr dngg longlongx, cngx quer lenhuex-dii juiw-drew, itdit dinx .lyc .kir, qaur qaxx iauuanw ee dergak diongx.

Dergak-drew si jit kud jiokk dua ee huecdii, bibii aw qngsnuar. Qenrdaddyx cam’ qitax je je huanrlangg dirr dii-diongx bogbok siuu. Huecdii si amwbinbongx, bibii aw qngsnuar si an' jiamsnuax dyjiamx sria .cud ee qngsnuar, jiongww juerzinn kir hro huecjuiw rimx qaur naauu, langg marr tiamw marr qankow, beh aix marr aix byy sniax. Siwkouii aw si diam jiucjiuh, naxx dirr jit xee bongrkud lairdew qangrkuanw. Dyrr junw qongxx u tniax diyc siaxmic sniaimx, hex marr si huanrlangg jit~nng sniax toxkuir ee cuanxkuir sniax nia. Huanrlangg dirr jiax longxx qingquer quixlyhh xee dergak ee jetbuaa, iurr tongwkow iurr tiamxtauu, lenrr kaur cud sniax ee kuiwlat marr longxx siausid .kir ar.

Lenrr Qenrdaddyx jitt kuanw ee dua cadtauu, marr hro jiongw jiongw ee dergak siuliw qaxx naxx jit jiah beh siw ee canqab-aw, cuir-aw hob .jit .xe hob .jit .xe, itdit dirr hiax qunxqaw.

Dyrr dirr jitt sii, Qenrdaddyx byy-dniu.-byy-dii dnax tauu, knuar diyc taukag dingw jit diauu ginsig ee sisnuar an' iauuanw ee hitt vingg tauu dngg liuliux dinx qaur jiax laii.

Dergak-drew sidjai si jin’ amr, didusix qanda' u hibii ee siamxqngx. Knuar diyc didusix, Qenrdaddyx simlai jiokk hnuahiw, ix diam diam byy cud sniax, naxx liac ann jitt diauu didusix, naxx qycc itdit vreh .kiw .kir, knuar erdangr qinw lirkuix jitt xee dergak bor. Dirr jiax sidjai si jiokk tongwkow, erdangr jauw dyrr rair jauw, narr si kacc hyw un, huanrser dyrr anxnex vreh qaur qiglok sewqair marr byy dikkag, hitt sii dyrr benw jiapsiu dysnuax huexhaiw ee cuxhuat ar. Sniu qaur jiax, Qenrdaddyx qra didusix liac qycc kacc ann, qycc kacc pemia vreh. Ix vunxdew dyrr si jit xee dua toxhuiw, dua cadtauu, guiiamm cauxviah, huantenx quacqag si ix suwsiongg quanwsir ee vunxsu, vutquanw sii jyr ee dairjir. Sun diyc didusix vreh si jin’ qanxdanx.

Mrqycc dergak qapp qiglok sewqair ee lortingg si m na quiw bxan lxiw, hro liw zuarr gauu vreh, marr m si jiksii dyrr e qaur :ee. Vreh ar vreh, vreh u jit .kunr .aw, Qenrdaddyx ixqingx siykuaw tiamw ar, dyrr dongwdiam duarlat cuanxkuir .jit .xe, langg knii dirr didusix dingxquann.

Jitt sii ix bagjiux byiwdiongx giyw duiww dergak hitt vingg .kir, pemia vreh jitt dnxua lo iauxx si byy vec jyr qangx, guanlaii jimr dirr laidew ee huecdii, jinw si dirr hng hng ee oamr diongx, kiongxvor ee jiamsnuax marr qanda' u knuar diyc bibii aw ee siamxqngx, mrqycc ixqingx li jiokk kuix ar. Knuar jitt xee vanrser, qewsiok vreh .kiw .kir, beh dyy cud dergak iarr m si byy kyxlingg ee dairjir.

Singx mair sniu qiglok sewqair, erdangr lirkuix dergak jiacc qycc qongw. Qenrdaddyx jitt sii suacc dua sniax huah, “Jauw .cud .laii ar, jauw .cud .laii ar” Jiokk quw dyrr m vad cniu anxnex hnuahiw .quer.

Hionghiongg, bagjiux qycc giyw kacc jimjiog .jit .xee, didusix hng hng hitt vingg, je je huanrlangg naxx qauxhia lehh, jit vaii dngg dngg, duer dirr aurviah, vniawmia decc vreh. Duxjiah qaqi vreh ee sii, byy kir knuar vnix:a ee langg, qycc qongw, inx marr byy cniu guaw kaciuw jiacc mexliac, mrqycc vreh quw marr si duer qaur xui. Jitt sii Qenrdaddyx suacc gang .kir, cuir-aw kuix kuix, qanda' qimqimx siongr. Qycc laii, ix huanlyw .kiw .laii, ix sniu diyc qanda' qaqi ee singkux dy’ u qraur dang ar, qycc qex jiacc je langg, jitt diauu didusix qamxx jicjair e daiuu? Narr banrid vnuawlo dng .kir, byy qanxdanx vreh qaur jiax, si m si qycc rair vuac dyw dngw .kir? Siangrr diongriaur si guaw, juadduir berdangr qycc dngw kir dergak, qycc qongw, jitt diauu didusix si guaw dairsing giuw .diyc .ee, inx cunx ee langg nacc ersaiw qapp guaw siy’ cniuw iong lehh?

Dyrr dirr ix jurgenn-jurgiw ee sijun, quiw vah xee, quiw cingx xee huanrlangg ixqingx vreh qaur ix ee singkux vnix, dirr bibii aw siamxqngx ee didusix dingxquann, vaii jit diauu lyclyh dngg ee duirgnow, jitt sii narr byy qinw cuxliw, didusix itding e dng .kir, Qenrdaddyx dyrr dua sniax huah, “Ueer, linw jiaxee huanrlangg, si si'angw unxjunw linw vreh .kiw .laii, jitt diauu didusix si guaw ee, lyc .kir, lyc .kir.”

Dyrr dirr jitt sii, guanvunw hyw hyw ee didusix, dirr Qenrdaddyx dingxquann nng~snax ciyh ee soxjai viak jit snaix dng .kir. Qenrdaddyx ee singkux srid kir jicjair, dyrr kaisiw lag .lyc .laii, zuxx lag zuxx qinw, jngr quer hongcniuu, cniu jit liap qanlok, pah ngikox aw sec, itdit sec, itdit lag, qycc lag lyc kir cimx cimx ee oamr huecdii lairdew.

Qiglok sewqair jitt vingg tauu ee didusix, cunx jit quec dongrdong hnair, jin’ byy kuiwlat dirr byy cnxix byy guec ee vnuar tnidingw, ginsig qngx sih .jit .xe, sih .jit. xe.

Sikqiax Vudjow kia dirr lenhuex-dii vnix:a, qra jitt jann dairjir jurr tauu qaur buew longxx knuar qaxx jiokk cingcyw. Byy zuarr quw, Qenrdaddyx ixqingx cniu jit liap jiyhtauu dimm dirr huecdii lairdew, Sikqiax Vudjow muaw bin juvix, linbinw huanhux vutduan jyrgiap, vutduan lunhuee. Mrqycc qiglok sewqair ee lenhuex jit diamw aw dy' byy diwqag diyc jex, ix vec qaxx naxx gxik-aw ee hueluiw dirr Sikqiax Vudjow ee kavnuaa syx .jit .xe syx .jit .xe, huesimx marr byy tingkunr itdit bunr cud ho’nng jiokk songxkuair ee pangbi. Qiglok sewqair jitt sii ixqingx si diongdaur ar.

guanjokjiaw: Akutagawa Ryūnosuke 芥川龍之介