cionghunx huathuix ee amwiwsig -5
Jung (Bunchhai huan'ik)
DERR GO JNIUX GUAW HAM' S. FREUD
Freud si byy kyxlingg dongrcad guaw ee luersimx sewqair,
gunw ji' qranx ee cavet sidjai taiww dua lehh.
bingvik ix qaixsueh moxjiongw bangrqingw si uanjuann byy lat :ee;
diyh'air jurqiw jauxcue bang jinjniar ham'ir.
Jniajyr jit xee jingsinn isux, dahsiong tamwsyh jurqiw diwlik huatdenw ee dyrlo. Guaw jin' tenjinx ui' guarjai/ limcngg qakdo, laii quancad jingsinvne qywanr/ huathen huisiongg u digsig ee jingsinn quewdingg/ byy bingliauw qidiongx ee lueriongg/ iuguann qiwlok .lyc .laii, qycc hunlui ; lanw jurzin ixqingx duiww jiaxee quewdingg u cionghun ee hunsig/ pingqer, dyrr qra dingrgi jyr “vnerlixhak :ee” au, qra kngr jit vnix, byy air qycc cab inx ar. Duer diyc siqanx liujuanw, guaw ee hingwcur jiamrr juanxii qaur kyxiw lixqaiw ee vnerle-siong, cniurr bongrsiongxjingr (Paranoia)/ vak'axpiah jingsinvne (Manic --- Depressive insanity)/ laijurr simliw ee jingsinn jongwgai. Kaigiap au, guaw genqiur liauw Breuer(1842-1925)/ S.Freud (1856-1939) /Janet (1840-1902) ee duwjog, inx ee duwjog kexhuad guaw jerje. Siongrr diongriaur ee si, Freud dirr hunsig/ qaixsueh bang, hro guaw duiww jingsinn hunlehjingr ee qokk jiongw hingsid, bagjiux qngx .kiw .laii. Dirr 1900 nii, guaw dyrr knuar quer Frued “bang ee qaixtiah (The Interpretation of Dreams)”, hitt sii knuar .quer, byy hxuad lixqaiw dyrr kngr jit vnix/ zi-jap-go huer ee qinglik iuguann jin' kueckiamr, byy jaidiau qniaa zip Freud ee lixlun-diongx. 1903 nii, jaiww crur tec laii tak, huathen ham' guaw ee sniurhuad si, qniaa byy qang lo, getqyw siy' qang. Inw gauw hingwtauu ee si, qra amwab qijer(Repression Mechanism) ee qaiwliam ingwiong dirr bang nirr, jitt xee qaiwliam laijurr jingsinn quanlingg vnerjingr ee simliw. Jex duiww guaw jin' diongriaur/ jyr sugiw lensiongw cikgiam sii ciangjai duw diyc amwab qijer. Duiww mow quaw ciwqig sugiw, vnerhuan ee huanxingr m si sui' huedab benw lensiongw/ dyrr si huanxingr ban qaxx likingx/ aurlaii huathen dagg vaiw longxx huatsingx jitt jiongw jongwgai/ si suxiong ee ciwqig sugiw dag diyc jingsinn ee congwsiongx, ciongdng. Dysor jinghongw-ha, vnerlangg vingrr byy iwsig .diyc, jin jit vo mng guan'inx sii, ongxongw jin' qexsenx huedab. “bang ee qaixtiah” qra guaw qongw, amwab qijer dirr jiax kiw jok'iong, guaw quancad ee sursit marr ham' Freud ee lixlun itdir. Incuw, guaw kingxding Freud ee herlet lunrdiamw.
Mrqycc amwab ee jinghingg byy qang. Freud zinruii guan'inx laijurr singr congwsiongx (Sexual Trauma)/ guaw sigsai ee jerje jingsinn vnerle, singr ee jok'iong si kia derr zi xui, qitnax insor kacc diongriaur, vixzuu, siarhue sik'ingr bunrdee/ sing'uac vicamw surqnia soxx duar laii ee apvikqamw/ miasniax ... dringw. Aurlaii guaw qra Freud qongw jiaxee vnerle, mrqycc ix qycc zinruii singr jiacc si kixinx, guaw jin' byy buanxir jitt diamw.
Jit kaisiw, beh qaiwding Freud byy dirr guaw sing'uac-diongx ee uirdir/ taiwdo si byy iong'i ee su. Sigsai ix ee duwjog sii, duxx si guaw uirr jurqiw ee hagsut singgaii jinwhingg qui'ue, qycc siaw singqib lunrbunn sii. Freud dirr dongsii ee hagsudqair bygii si byy sriu huangingg :ee, ham' ix u zimrhyy kanlenn qandna' iuxhai-byli. Jit quaw diongriaur ee langg, dysor dirr suha damlun ix, dirr qokk jiongw dairviauw dairhue-siong, marr qandna' e dirr diongdniuu hiyckunr siqanx jiacc e qongw diyc ix, jingwsid huergi-dingw kiokk be qongw. Incuw, dng' guaw huathen jurqiw ee lensiongw cikgiam ham' Freud lixlun itdir sii, qinvunw byy qaiww tiongr.
U jit vaiw dirr sidgiamsig sukyw jiaxee bunrdee sii, guaw tniaqnir moquiw dirr guaw hnirkangx-vnix qongw : qra sidgiam qetqyw/ soxx did .diyc ee qetlun tec cud kir huatviauw, mrqycc piacbenw qongw diyc Freud. Vitqingr jaw dirr guaw cingcyw ix ee duwjog jingg, sidgiam qetqyw dyrr cud laii ar; mrqycc guaw qycc tniax diyc zi-hy zinqeh ee sniax “byy knuar Freud ee junjai, vutqyr si jit jiongw quixqer/ byy kyxlingg qra jurqiw ee sing'uac kixjy dirr vehcad'ue-siong!” anne, jurr hitt sii kiw, guaw jniajyr Frued ee qongkaix jicijiaw.
Dirr Munich qixhingg jit crur dairviauw dairhue-siong, guaw derr id vaiw uirr Freud venrho, jit xee camqax tyxlunrhue :ee, qongw diyc qiongviksingr jingsinn quanlingjingr (Obsessional Neuroses), diauqangx tiaur quer Freud ee miazi. 1906 nii sii, guaw dirr “Munich ihak jiuvyr” siaw liauw jit pnix bunjiux, jiurr Freud ee jingsinn quanlingjingr lixlun jyr vingsueh, jitt pnix bunn duiww liauxqaiw qiongvikhingg jingsinn quanlingjingr u jin' dua vangjan. Nng xui Dikqog qauwsiu uirr jitt pnix bunn siaw puex qingxqyr .guaw, narr si guaw qewsiok ham' Frued kia qang dinrsnuar, guaw hagsut singgaii jiong' qniaa zip huihiamw soxjai. Guaw huee jit dniux puex “Freud qongw :ee, narr si jinliw, guaw dyrr e kia ham' ix qangrvingg. Narr qongw hagsut diyh'air hanrjer tamwsyh/ cuxsiaux jinliw jitt xee jendee, anne guaw jiong' kiwsag jitt jiongw hagsut naxx danr driau jit siangx puar ree.” guaw qewsiok uirr Freud/ ix ee susiongw qongxue, jex byy viauxsi guaw zinrdongg itcer jingsinn qnualingjingr longxx si singr amwab (Sexual Repression)/ singr congwsiongx soxx jyrsingg, mow quaw vnerle kaksit si anne, mrqyxx qitnax :ee m si. Suibongw anne, Freud iuguann dirr diaujax qenxgiur kuix cud jit diauu sinx lo, hiaxee huanxduir ix :ee, guaw qamxqag jixsirr hongdongg ziiw.
GUAW HAM' S. FREUD DERR ID VAIW QNIWBIN
Guaw dirr “jaxhuatsingr cidaix simlixhak (The Psychology of Dementia Praecox)” soxx viauxdat ee knuawhuad byy did diyc dysowlangg janwdongg. Sidjer-siong, guaw ee dongsu duiww guaw vacvnuax giyhciyr. Mrqyxx tauwquer jitt vunw ceh, guaw jiacc zinrbad diyc Freud/ iaucniaw guaw kir tamwhongw ix/ 1907 nii snax-guec gunw dirr Vienna derr id vaiw qniwbin/ iog ervox jit diamw, gunw qewsiok dramm jap-snax diamxjingx. Freud si guaw duw diyc derr id xui diongriaur zinbut; hitt sii, byy zimhyy langg erdangr ham' ix sna' vixping, ix ee taiwdo pnri be cud cenxqenr, guaw huathen ix qik kiauw/ huanxingr jin' qinw/ vutvinghuann. Mrqyxx duiww ix ee derr id inwsiong kiokk m si jin' bingkag, guaw byy hxuad cingcyw biyue.
Singr lixlun u kip'inw guaw, mrqyxx byy hxuad siauduu guaw ee huaigii. Quixarr vaiw guaw noxlik tec cud iwqenr/ dagg vaiw longxx qongw guaw kiamr qinggiam/ Freud qongw :ee byy m driyc/ hitt sii, guaw kaksit byy qauwgiac ee qinggiam laii jicii guaw soxx huanxduir ee iwqenr. Guaw erdangr lixqaiw, bylun dirr qywzinn/ dethak hongbin, singr ee lixlun duiww Freud laii qongw, si huisiongg diongriaur :ee. Jitt diamw dirr guaw taukag-lai lauu lyc cimkig inwsiong, mrqyxx guaw byy hxuad kakding, qiongdiau singr/ ix juxquanx penqenr, u dycc jiongw tingdo ee kanlenn, erdangr iong laii jicii ix ee singr lixlun, kyxkyr qinggiam qycc u zuarr je?
Druu jex ixgua, guaw marr huaigii Freud duiww sinlingg ee knuawhuad. M quanw si dirr langg srinx-siong/ jit qnia gersudpinw, jixiaur viauxhen cud singlingsingr (Spirituality, jriw diwlik, m si ciaujurzenn), ix dyrr henwcud diuduu, zinruii si sriu singr amwab ee viauxhen, narr si byy hxuad didjiab iong singr qaixsueh, ix dyrr qongw si “simsingr (Psychosexuality)”. Guaw byy dong'ir, jiauww logic tuilun, jitt jiongw qaxsed qamxx m si e inxdy cud bunhuar bedjuat ee vingduan/ bunhuar si jit cud naurqiok/ jixsirr amwab singwiok vnertair qetqyw. “driyc ar!” ix duer lecc qongw, “jinghingg dyrr si anne, si lanw byy lat kongwjingx siurr jxiur miarun.” Guaw byy sniu beh anne qetsog duiwue, mrqyxx gauw qamxqag jurqiw byy hxuad ham' ix jnex tetdew, hro jinsiongr henwcud.
Iuguann erdangr cingcyw huesiongw Freud si jnuaxngiu ham' gauw qongw :ee, “cinair ee Jung, cniaw liw dap'ingr gauw ingxuanw be hongwkir singr ee lixlun, jex si soxu dairjir-diongx siongrr qinvunw :ee. Liw jaix, lanw diyh'air hro jniajyr jit jiongw qauwdiauu, jit jxy bersaih dinxdang ee ongsniaa.” ix jin' qigdong duiww guaw qongw, cniurr jit xee vaxvah ee kauxkir “cinair ee qniaw, cniaw dap'ingr gauw jit qnia su, muixx jit xee lexvaiwzit liw itding rair kir qauwdngg.” guaw u damrvyc diyhqniax, zimxvutju mng, “ongsniaa? --- hongue :ee si sniaw?”
“Lorqomuaii-lai ee ohaixjuiw” diuduu .jit .xe, qycc vow jitt qxur. “quanhe sinvir juxgi.”
Dairsingx hro guaw qamxqag jin' qniax ee si “ongsniaa” “qauwdiauu” jitt nng zri; qauwdiauu si jit jiongw bersaih huanxvog, qandna' erdangr siongsinr ee mic, bogdig jixsirr ingxuanw beh apjer qokk jiongw huaigii/ jex ham' kyhak pnuawduan byy zimrhyy kanlenn/ jixu qywzinn kuanlik ciongdong ee quanhe.
Jex si gunw iuxjingg ee diwmiardiamw. Guaw jaix, jurqiw itding byy kyxlingg jiapsiu jitt jiongw taiwdo. Freud soxx qongw ee “sinvir juxgi (Occultism)”, sidjer-siong si dethak/ jongqaur(vauquad dongdai dngdecc kiw .laii ee linghak) ixqingx dirr jingsinn lingxhik dongrcad itcer. Singwiok ee lixlun berdangr kyr/ byy sidjai, cniurr qitnax ee tuicig, si iauxx bue did diyc jingwbingg ee qaxsed, kyxiw singjunn itding siqii, vutqaix virr knuawjyr sinbut, ingxuanw lauu diauu lehh.
Dongsii guaw sidjai byy qaiww cingcyw, mrqycc dirr Freud srinx-siong, kiokk jin' binghenw quancad diyc amwiwsig ee jongqaur insor, ix si beh guaw jo ix qenwlip jit dy vychnua, hongue jiaxee kuriuw uihiap ee amwiwsig lueriongg.
Jitt vaiw dam'ue hro guaw ee susiongw qyckacc hunwluan; guaw iuguann byy zinruii singwiok si lanw diyh'air junhong kiokk qycc e duar laii guigix ee quanliam. Singwiok duiww Freud laii qongw, si cniurr jongqaur hitt kuanw kensingg laii quancad ee mic, henxzenn je quer qitnalangg ee ham'ir. Binrduir jiacc cimgne ee sinwliam, itvnualangg qandna' erdangr diamrjing byy sniax. Guaw tic-tic-tuc-tuc sniu beh qongw, qycc qongw be cud, byy zuarr quw, gunw qetsog dam'ue ar.
Guaw cimcimx qamxqag gignaiw qycc liongvue/ jaix jurqiw u qihue siambix .jit .xe birdix ee ongqog/ qokk jiongw sinx susiongw hunhunx duiww guaw jiax rig .quer .laii. U jit hxang su guaw jin' cingcyw : Freud ithiongr cionghun liriong jurqiw byy jongqaur, jitmaw suacc congwjy lingrgua jit jiongw qauwdiauu; kacc kakding qongw, ix sitkir jit xee gauu uanwdor ee siongrder, ixx lingrgua jit xee acvar ee singr hingsiong cuxdai siongrder ee uirdir/ jit xee qangrkuanw jipid/ kikvok/ auxbann/ cocann, dyrdig horsiong maudunw, dyrr cniurr kacc qionglet ee jingsinn jok'iong henwcud “sinsingr” iacc si “okmoo” ee hxingg qang, “singr-vunxlingg (Sexual Libido)” tewngua jit xee iapbih/ ziakamr sinn ee jok'iong. Jit jiongw juanxngua ee hyxcur, Freud erdangr qra jitt xee jingsinn sinx guanjig muax hitt niaw kyhak ee guarsnax, uanbiw byy hunziah siauduu itcer jongqaur sikcaiw. Sidjer-siong, jitt jiongw sinvir, nng jiongw hablixsingr byy hxuad horsiong vixqaur ee duiwlibbut (Iahyhuaa/ singwiok) ee simliw digjid iuguann qangrkuanw; qaixvenr :ee jixsirr miahy ziiw. Dongzenn, quandiamw marr duer lecc qaiw, sitkir ee sinn, dnaxx dirr zinqanx cue u ar. Mrqycc, qaiw cinghox duiww kacc qiongdua ee jok'iong laii qongw, u sniaw hunvet? Narr si simlixhak byy junjai, junjai :ee jixsirr kurtew ee budtew, dyrr e vutduan virr huixbet/ cuxdai. Susit-siong, dirr simliw cikgiam-diongx, qinvunw byy sniaw si kacc byy qinxdniux/ jiaujyx/ qiongvig :ee, si zuhyy vaixtuad/ kikhok lanw ee jiaujy/ iuxkuir/ iukow/ ciongdong/ amwiwsig/ vunxlingg ... dringw bunrdee, iuguann byy qaixquad. Narr si byy hxuad ui' qongbingg/ lixsiongxjuxgi ee jitt bin jyr qaur, ui' oamr/ singbudhak laii sunqiuu qaixquad vanrhuad, hibang kyxlingg kacc dua.
Jiaxee sniurhuad naxx dax caa qnir diyc huew itdit dyc kiw laii, dirr guaw ee taukag-lai jit qxingw jit qxingw itdit siamw .quer. Quer jit dnxua siqanx, dng' guaw huesiongw Freud ee singwqeh sii, qyckacc cingcyw henwcud jurqiw ee iwgi, gauw virr Freud mow jit xee singwqeh kip'inw .diyc : ix ee tongwkow! Derr id vaiw qniwbin sii, guaw dyrr inwsiong cimkig, kiokk byy hxuad qaixsueh,itdit qaur guaw qra ix knuawtai singwiok ee taiwdo lenn kiw laii, jiacc hionghiongg gno .diyc. Duiww Freud laii qongw, suibongw singwiok si jit jiongw sinvir, ix soxx iong ee gixsuu/ lixlun naxjunxx jixsirr qra dongwjyr singbudhak-siong ee qonglingg. Qandna' ix qongw .diyc ee sii, jiacc duar diyc qamxjingg, jitt sii ix luersimx ee qikdong/ naxx ingw rig laii rig kir ee cimkig singhun jiacc e puu cud laii. Guaw qamxqag, ix sniu beh qauwdy lanw : ui' luersimx knuar, singwiok vauquad lingsingr, kuriuw vunxjid ee iwgi --- mrqyxx ix kurtew juxgi (Concretistic Terminology)ee sudgiw sniu' ec, suacc byy hxuad viauxdat cingcyw. Ix hro guaw ee inwsiong si, ix soxx jyr ee si vuervuan jurqiw ee bogviaux/ ix jurqiw; vitqingr jaiww byy viw jurqiw si qaqi siongrr dua digzinn qyckacc tongwkow ee dairjir. Iong ix qaqi ee ue laii qongw, ix qamxqag jurqiw sriu diyc jit jiongw “ diongwsiongx ohaixjuiw (Black Tide of Mud)” ee uihiap --- ix viw zimrhyy langg diyh'air vniawmia kir kuthok jitt qrow ohaixjuiw, kiokk qycc jyr be qaur.
Frued jurlaii byy mng jurqiw uirhyy ix e itdit qongw singr, uirhyy e jiacc bee jitt xee quanliam ? Ix itdit byy zinrbad .diyc, ix “dan'id ee qaixsueh” soxx viauxdat ee si, duiww jursinx ee dypiah/ duiww ix jurqiw srinx-siong sinvir vorhun ee dypiah! Jixsirr ix qirjuat singzin/ dyrr byy kyxlingg ham' jurqiw tywhiap. Ix duiww amwiwsig lueriongg ee maudunw/ hohamr si bongbok :ee/ m jaix ui' amwiwsig sanxsingx ee itcer longxx si u tauu u buew, lairgua longxx jiaujngg ee. Dirr lanw damlun guarjai sii (jex si Freud soxx jyr :ee), lanw kyxlu :ee, si jingxtew ee jidvnuar, qetqyw dyrr ui' amwiwsig-diongx sanxsingx jit jiongw huanxjok'iongrlat.
Duiww Freud ee penwbin qongxhuad, lanw byy sniaw vanrhuad. Kyxlingg ix moxjiongw luersimx texgiam e hro ix bagjiux tixkuix, hionghiongg bingvik; vutqyr hitt sii, ix ee diwlik kyxlingg e qycc qra anne ee texgiam qruix dirr “sunn-singwiok” iacc si “simsingr”. Ix itdit si ix jurqiw zinrdix janbin-ha ee hisingpinw, si guaw ganw-diongx ee viqiok zinbut; ix si jit xee uixdai ee langg, marr si jit xee virr jurqiw ee okmoo kongwjer ee langg.
FREUD HUNRDYW
Dirr Vienna derr zi vaiw qaudamm au, guaw marr bad quewkir jin' jiyw langg juwir, Alfred Adler(1870-1937) ee kuanlik qaxsed. Cniurr jerje jyr qniaw :ee qang, Adler m si tniax vaxvah ue :ee, si mohongw vaxvah hing'uii. Jit bak nih, air --- Eros ham' kuanlik cniurr xenn hiax dang ab dirr guaw srinx-siong. Freud cincuir qra guaw qongw, byy tak quer Nietzsche ee duwjog; jitmaw guaw qra Frued ee simlixhak knuawjyr hiongr lixdir ligsuw uaxkyr, dingxii si duiww Nietzsche ee kuanlik guanjig virr sinhuar ee voxciongx. Henxzenn jitt xee bunrdee diyhh qaixsiaw jyr “Freud duiww Nietzxche”, m si “Freud duiww Adler”, jitt xee iwgi ngiaa quer jingsinn vnerlixhak huanrdiuu lairvo sna' jnex. Guaw hionghiongg gno .diyc, qamxqag Eros/ kuanlik tuidongrlik (Power Drive) dirr moxjiognw iwgi-siong naxcniu nng xee iwqenr byy qang ee hniadi/ iacc si cniurr jit xee dan'id uahdong ee jingsinlat ee nng jiongw sanxbut, jitt xee jingsinlat iong horsiong duiwkongr ee hingsid laii viauxhen jurqiw, cniurr jniar-hur den, Eros si virdong/ kuanlik si juxdong (iacc si siy' huanw .quer .laii). Eros duiww kuanlik sag dinxdang u jerje iauqiuu, kuanlik duiww Eros marr qang. Narr byy qidiongx jit xee, kudongrlat ui' dyhh laii? Jit hongbin, langg kuthok sag ee lat; lingrgua jit bin, langg qycc iwdoo juxdong kongwjer. Freud viauxbingg kectew zuhyy kutjiongg jitt jiongw kulat, Adler viauxbingg langg zuhyy liriong jitt jiongw kulat qra jurqiw ee iwjir qiongqax dirr kectew-siong. Nietzsche byy hxuad jipuer jurqiw ee miarun, jixhyw uirr jurqiw congwjy jit xee “ciauzinn”. Gauw ee qetlun si, Freud vunxlangg itding sriu Eros ee kuanlik ingxhiongw, hibang tec quann Eros derui, hro jniajyr jit jiongw qauwdiauu --- cniurr jongqaur ee siuxhorsinn hitt ngiu ee ingxuanw jinglingg. Zaratusta si hok'imx ee suanqywjiaw, jex ixqingx m si sniaw viwbit, Freud dirr jiax marr iwdoo ciauuat qauwhue, qra lixlun sinsingwhuar/ erdangr kingxding ee si, ix anne jyr, vingrr byy hro jiongwlangg jaix/ qandna' huaigii guaw sniu beh jniajyr sendix/ tecud vicamw ee iauqiuu, kiokk qycc dongsii hongwkir. Langg duiww sinvir ee mic ongxongw e u siy' qang ee hing'uii/ in'ui naxx jinsit qycc hihuanr/ sinvir ee texgiam ersaih jin' qysiongw, uixdai, dongsii junjai vibii. Freud narr si erdangr duiww jitt jiongw simliw jinliw --- singr si sinvir :ee, sinsingr qycc siaog --- kacc je kyxlu, dyrr be virr singbudhak quanliam soxx sokvak. Narr si Nietzsche erdangr kia jai jai dirr zinlui singjunn qicow-siong, marr be sniu' lixdir quewdo, suacc qniaa duiww qigtauu .kir.
Dyhh e hro jingsinn sanxsingx hiongdua dinxdang jongrtair ee soxjai, hiax dyrr u sinvir ee texgiam, dyrr si qongw kyxlingg huatsingx i'uaw singjunn ee syh, tudzenn dng .kir ee huihiamw. Narr si huatsingx jitt jiongw jinghongw, u langg e lag zip kir juadduir kingxding ee jongrtair, marr u langg e si juadduir hiyxding ee jongrtair. Ciautuad (vaixtuad duiwlibbut) si danghonglangg ee qaixquad vanrhuad, simlingg ee cinwtuii dirr lixdir/ huilixdir ji' qranx iyvaiw, m si jingwkag/ cywgo ji' qranx. Sinviwbut ee huihiamw e qra langg inxhiongr qigtauu, qowkiamx virr knuawjyr jinliw, jit xee byy diongriaur ee cywgo dingxii diwmia ee dua cyr. Itcer longxx e quewkir --- jahngx ee jinliw, dirr qin'axzit kiokk si kipenr/ jahngx ee hiqew tuilun kiokk kyxlingg si bin'axjair ee kexsi. Simlixhak marr si anne, lanw duiww jex jaix jin' jiyw, byy bingvik hex iwbi diyc sniaw : duhuix iwsig siyxquaw/ qik dexjiam iwsig .diyc, narr byy, sniaw dyrr byy junjai.
Freud qra guaw qongw, ix damsimx jurqiw duiww singr dngwgno ee sinvir qngngiaw e virr “ lorqomuaii ee ohaixjuiw” siaubet. Sinue jingqingw dyrr anne cutsir ar : qongbingg/ oamr denxkuix jnedaur. Jex qaixsueh liauw sinviwsingr, ixqibb Freud uirhyy jiar jurqiw ee qauwdiauu uirr jongqaur ee venrho ciuxdnua. Guaw lingrgua duwjog “LIBIDO ee venwhuar qapp siongrdingx (Psychology of The Unconscious)”, soxx lunrsut inghiongg zinbut uirr jingcuw juriuu jnedaur, Freud duiww jitt vunw ceh qoxquair ee huanxingr, hro guaw jinr jit vo duiww guanhingg dejaii/ sinuerhak ee vuerqingw jinwhingg genxqiur.
Qycc in'ui singr ee qaixsueh/ kuanlik kudongrlik ee ingxhiongw, guaw dirr hitt quiw nii kaisiw sukyw luirhinglun(Typology), qamxqag u vit'iaur genxqiur jingsinn ee duiwlibsingr (Polarity)/ dongrlighak (Dynamics). Marr kaisiw tamwqiur “sinviwlun lorqomuaii ee ohaixjuiw”, jex ensiok quiw jap nii/ guaw vniawmia sniu beh liauxqaiw dongdai simlixhak qicow ee iwsig/ amwiwsig lueriongg ee jiongxjiongw ligsuw qaxsed.
Guaw jin' sniu beh jaix Freud duiww birvog-sendix/ linghak ee knuawhuad. 1909 nii, guaw kir Vienna vaiwhongw ix ee sii, dyrr mng .quer/ ix iong budjitjuxgirjiaw ee penqenr/ huanxvog itcer, zinruii hiaxee si ovec qongw; knuar ix ixx jiacc cenxvyc ee sidjingwjuxgi laii huanxvog, guaw jin' byy qanxdanx laii qaur cuir-vnix, lrai ~ ~ ee jingven gne tunx lyc vxag. Quixarr nii au, ix jiacc zinrbad linghak ee giamsioksingr, vingrr singzin sinvir henrsiong ee jinsit.
Freud anne qongw ee sii, guaw u jit jiongw qycngiu ee qamxqag, guaw ee qecqix naxjunxx vnewjyr tih jyr :ee, decc venr siyx, jniajyr siamxsih angsig qingrqux .kiw .laii, dirr jitt sii, dirr gunw srinx-vnix ee cecqer tudzenn vrong jit sniax, gunw nng xee longxx cuah jit diyy tiaur .kiw .laii, qniax kir hro deh diyc. Guaw duiww Freud qongw “ knuar! Jex dyrr si soxui jiapciog huanxingr ee kecquanx henrsiong (Catalytic Exteriorization Phenomenon) ee le.”
“Ha!” ix huah sniax, “luan qongw.”
“Liw m driyc! qauwsiu. Uirr jingwbingg guaw ee knuawhuad, gauw qnaw qongw, danw .jit .xe iauxx e qycc lingrgua jit sniax!” guaw ue duxx qongw suah, cecquir vrong jit sniax, cniurr derr id sniax hiacc hiangw.
Qaur dnaxx guaw iuguann m jaix uirhyy e jiacc kakding/ dyrr si byy huaigii, jitt xee vrong itding e qycc u jit sniax.Freud gang gang knuar .guaw/ m jaix ix simlai anxjnuaw sniu, ix ee bagsinn iwbi sniaw. M quanw anxjnuaw, jitt qnia su jyrsingg duiww guaw byy sinwzim, guaw qamxqag jurqiw jyr liauw jit qnia ix huanxduir ee dairjir. Cuxau, byy qycc ham' ix tyxlun jitt xee dairjir.
1909 nii duiww gunw ee quanhe u quatding iwgi. Jitt nii guaw virr iaucniaw kir Worcester Mass. ee Clark dairhak, jiurr lensiongw cikgiam qixvan qangxjy. Freud marr virr iaucniaw, gunw jywhuew kir/ dirr Bremen huerhap, vauquad Ferenczi. Dirr Bremen, Freud hunrdyw (jitt hxang su aurlaii jniajyr girlun hunhunx ee jiaudiamw). guaw duiww “totnuar lamwde sitew (Peat-Bog Corpses)” ee cuwbi qanwjiab cioksingg jitt qnia su huatsingx. Dikqog vakvo mow quaw derkux, u sii e huathen jitt jiongw soxui totnuar lamwde sitew. Jiaxee si suxjenn zinlui ee sitew (dirr lamwde rimx .siw/ iacc si virr draii dirr lamwde). Jiaxee sitew soxx jimwaux ee totnuawjuiw qamm u jit jiongw sngx ee singhun, e qra qud huxsit, puehux niw jyr jangsig, puehux/ taumox uanjingw vyxjunn. Ui' vunxjid qongw, jex si jit jiongw jurzenn imwsix (Mummification) ee quewdingg, mrqycc totnuar dangrliong ee aplik qra jiaxee sitew deh vniw. Ow totnuar :ee dirr Holstein/ Denmark/ Sweden longxx bad huathen .quer.
Dirr Bremen sii, guaw ui' vywjuaw-siong tak diyc jitt hongbin ee vywdy/ qra Bremen ee aenn (xenn) qnuacaa ee imwsix ham' totnuawjuiw imwsix hunrluan kir.
Freud jin' byy hnuahiw. “ liw uirsniaxmic jiacc quansimx jiaxee sitew?” mng guaw quixarr vaiw/ ix vutjiw huew dua/ dyrr dirr gunw jywjuew jiac vng sii, damlun jitt qnia su, ix tudzenn hunrdyw. Surau, ix duiww guaw qongw, ix kaksinr jiaxee sitew ee itcer qaudamm, iwbi diyc guaw hibang Freud kacc jaw siw. Jitt jiongw sniurhuad hro guaw qniax jit diyy/ diyhqniax ix ee siongxsionglik, bogquair e hunrdyw.
Dirr lingrgua jit vaiw luirsu ee dairjir-diongx, Freud jaiww crur dirr guaw binrjingg hrun .kir, si 1912 nii Munich qixhingg ee jingsinn hunsig dairhue qiqanx. Huergi-siong, u langg qra girdee juanw qaurAmenophis IV, dyrr si Ikhnaton, damue quewdingg tecud anne jit xee quandiamw: Amenophis duiww vaxvah py diyc hiyxding taiwdo/ huixdiau inx vaxvah soxx kia jiyhtiau-dingw kuriuw sinn ee miaa ee huex, congwlip Itsinqaur (Monotheistic)ee uixdai hing'uii vuerau, hnuaw ~ u jit jiongw sxiuu-ve jingqad. Jitt jiongw qongxhuad qig diyc guaw, guaw iwdoo suecbingg, Amenophis si u cimkig jongqaur sinwgiongw, congwjyrlat :ee/ ix soxx jyr :ee, si berdangr qaixsueh jyr huanxduir vaxvah/ dendyww ix itdit jin' junqingr vyxliuu duiww vaxvah ee qiwliam/ ix ee pywhai jixsirr jiamduir Amon jitt xee sinn ee miaa/ dyhh u jitt xee miahy, dyrr qra huixdiau/ simrjiww jiyhtiau-dingw kig “Amon-Hotep” marr qra hruw driau. Jex ixgua, qitnax Pharaoh marr e iong inx jurqiw ee miaa laii cuxdai qiwliamrvix, diausiong-dingw sinue joxsenx ee zirmiaa, inx qamxqag jurqiw qiwzenn si jitt xee sinn ee huawsinx, dyrr u kuanli anne jyr, mrqycc inx m na byy kaicongr sinx hongqeh, marr byy congwlip sinx jongqaur.
Dirr jitt sii, Freud hrun .kir .ar, nngw qyy ~ ui' iw-aw dingw qut .lyc .laii. Dag'ee qra uii qaxx amr bat bat, m jaix beh anxjuanw vran. Gauw uaw quer qra huu .kiw .laii, ngai dirr qajiah, qniaa zip kir qecviah vangqingx, hro ix dyw dirr pongwiw-dingw. Dirr guaw ngai ix ee sii, diqag huehok jidvnuar/ guaw ingxuanw e qir .did, ix dauu hiongr gauw ee ganxsinn/ dirr ix qui' sinkux byy vnuawdiamw kuiwlat ee sii, ix knuar .guaw/ naxjunxx guaw si ix ee vaxvah. M quanw ix tauu hinn ee guan'inx si sniaw, qidiongx henxzenn u ve taii qniaw ee huanwsiongw.
Hitt sii, Freud ciangjai jywcud jiongxjiongw amwsi, viauxsi ix qra guaw dongwjyr ix ee qewsingjiaw. Mrqyxx jiaxee amwsi hro guaw jin' uilann/ guaw jaix guaw si juadduir be cniurr ix soxx hibang ee hitt ngiu/ iongxho ix ee knuawhuad. Lingrgua jit bin, guaw ee puepingg, jiurr ix knuar byy sniaw hunrliong/ qasiong guaw jin' junqingr ix, byy sniu beh qiongvig ix zinrjinx duiwtai guaw ee knuawhuad. Sidjer-siong, guaw duiww jyr mow jit xee dongxpair ee lingxsiur juann byy cuwbi, marr byy sniu beh pnai susiongw vauhok : derr id, jitt jiongw dairjir byy hac guaw ee tensingr; derr zi, guaw byy sniu beh hisingx susiongw ee doglibsingr; derr snax, anne ee ingiau jin' byy siurr guaw huangingg, hex qandna' e hro guaw penli guaw jinjniar ee bogdig. Guaw quansimx ee si, tamwsyh jinliw, m si qywzinn uibong.
GUAW HAM' FREUD ZUXX QNIAA ZUXX HNG
1909 nii kir Bixqog, tingliuu cid lexvair. Gunw nng xee dagg zit jywhuew, horsiong huntiah duiwhongx ee bang. Hitt sihau, guaw jyr liauw jerje diongriaur ee bang, Freud kiokk byy hxuad qaixsueh. Guaw byy zinruii u sniaw qenwsiaur/ siongrr hyw ee hunsikjiaw kaksit byy hxuad henkuix bang ee bxi, si ciangjai duw .diyc ee sitvai/ byy sniu dyrr anne tingjiw duiww bang ee hunsig. Sionghuanw, duiww guaw iwgi diongrdua/ guaw qra dongwjyr diongxvuer, gunw ee quanhe jin' yh duw .diyc/ jit xee kacc singsik, quanwlen ee langg, guaw si ervuer sinhun. Mrqyxx aurlaii huatsingx jit qnia su, giamdiong dnaxqig jingxqyy quanhe.
Freud jyr liauw jit xee bang --- jitt xee bang soxx vauhamm ee bunrdee, guaw zinruii byy sikhap qongkaix. Guaw jin siongrr dua ee linglik qaixsueh/ qongw narr si ix erdangr teqiong jit quaw suzinn sing'uac sewjed/ dyrr erdangr jywcud kacc je ee qaixsueh. Tniax liauw jitt qxur ue, Freud jin' qiquair knuar guaw .jit .xe --- huisiongg huaigii ee ganxsinn, zenau qongw, “ guaw si be tec guaw ee kuanuix laii morhiamw !” jit qongw cud, uanjuann songwsid kuanuix ar/ cimcimx uwhy dirr guaw ee simqnuax/ quanhe ee qetsog knuar e diyc ar/ Freud ixqingx qra kuanuix tequann qaur jinliw ee dingxbin ar.
Cniurr guaw soxx qongw :ee, Freud duiww guaw hitt sii soxx jyr bang ee qaixsueh, m si byy qraur uanjingw, dyrr si uanjuann byy lat. Jiaxee qamm u jibtew lueriongg ee bang, duar u dairliong siongrdingx jailiau. U jit xee bang duiww guaw digvet diongriaur, si derr id vaiw qra guaw inxdy qaur “jibtew amwiwsig”, vingrr hingsingg “LIBIDO ee venwhuar qapp siongrdingx” ee dahuertauu.
Jit jxy cnehun ee nng janr lxauu, si “guaw ee daux”. Huathen jurqiw qniaa kiw kir zi lxauu, jiax damrvyc cniurr langkectniax, u jin' iuwlo Rococo hongqeh qursid qaku : viacdingw qruar qoxlyw ee cutmiaa dinquir ee doo. Guaw qiquair jiax qingwzenn si guaw ee daux, simlai sniu, “qycc be baiw!” mrqyxx guaw sui' sniu diyc/ vingrr m jaix id lxauu snex jyr sniaw kuanw/ en' lautuix qniaa qaur id lxauu, mihqnia qyckacc qoxlyw, guaw jaix jitt qingx cur ee jit vorhun itding erdangr huedngw qaur jap-go, jap-lak sewqiw/ vaii :ee, si diongsewqiw ee mic/ dervanw pox angjngx, vutjiw amwsamr/ qniaa quer lingrgua jit qingx, simlai sniu “om, guaw diyh'air hyw hyw genxqiur qui' jxy cur.” / qycc laii, jit dy qaurdang ee mngg, cud lat sag kuix/ dirr mngg hitt vingg, guaw huathen jit dy tonghiongr derharsig, jiyhtauu tiah ee lautuix/ duer tuix qniaa .lyc .kir/ huathen jurqiw dirr cuwdingw uanqiongx-hxingg ee bixle vangqingx-lai/ jitt qingx vangg marr jin' qoxlyw, siongser quancad sir pnir viah au, huathen dirr poxtongx ee dua jiyhder dingxbin u tac jit renn ee jxngx, tojniux nirr marr u jxngx-aw ee cuiwpnir/ guaw jaix jitt jxy cniuu erdangr duiziog qaur Roma sidai. Qaur jiax, guaw huisiongg u hingwcur, qyckacc siongser quancad dervanw/ si jiyhpnir pox ee/ huathen qidiongx jit der u jit xee kuann/ crunx ciuw jit giuw/ jiyhpnir qui' der giuw .kiw .laii/ jaiww crur knuar diyc jit dy ec ec ee jiyhtuix tonghiongr derha/ qniaa .lyc .kir/ qniaa zip jit xee jiyhgiamm cak :ee, qe qe ee dong/ jiyhdong ee derbin kamr jit renn qau qau ee tohuex/ tohuex dingw siwsnuar jit quaw quttauu, cohuii-pnir/ cniurr jit jiongw guansiw bunhuar ee uibut/ cue diyc nng xee langg ee taukak'nguaw, qoxjaw qoxjaw ixjingg :ee, decbecc lec jyr cuiwpnir. Jitt sii guaw jingsinn.
Freud duiww jitt xee bang u cuwbi :ee si hitt nng xee taukak'nguaw/ laihue itdit sec dirr jitt hongbin/ vaixlong gauw cue cud ham' jex iuxquanx ee guanrbang/ duiww jitt nng xee taukak'nguaw guaw u sniaw sniurhuad? si sniaw :ee? Guaw dongzenn jin' cingcyw ix ee iwsur, cangwbih dirr bang-diongx sinvir m qongw ee sixbongg guanrbang. “ ix dauwdew sniu beh ui' guaw jiax did diyc sniaw?” guaw simlai sniu. guaw qycc e duiww si'angw py diyc sixbongg ee guanrbang? Guaw duiww anne ee qaixsueh qik huanxqamw. Jitt xee bang iwbi diyc sniaw? guaw u poxpow aw qaiwliam, mrqyxx hitt sii guaw vingrr byy siongsinr jurqiw ee pnuawduan/ sniu beh tniax :ee, si Freud ee knuawhuad/ sniu beh qra yc/ kuthok qongw “guaw ee kanciuw ham' ix ee mexmeh ...” m quanw anxjnuaw, gauw jongxsi diyhh qongw cud daddid guaw jiokhog ee zirmiaa!
Hitt sii, guaw duxx qethunx byy zuarr quw, simlai jin' cingcyw, guaw qinvunw be anne sniu. Mrqyxx narr si guaw qra jurqiw duiww jitt xee bang ee knuawhuad qongw .cud .laii, gunw kyxlingg e inxkiw gorqaiw/ qiglet ee huanxduir/ byy su'iaur uirr jex ham' ix caxnau; guaw marr quawlu qencii jurqiw ee quandiamw suacc sitkir jitt xee ving'iuw. Lingrgua jin' sniu beh jaix ix e zuhyy knuawtai guaw ee huedab, narr si guaw ixx moxjiongw huhap ix ee lixlun ee qongxhuad laii penr ix, ix ee huanxingr si zuhyy. Dyrr anne quatding penr ix.
Jin' cingcyw guaw ee huedab, vutqyr si suiqix ingwvenr! Ix beh dongrcad guaw luersimx sewqair si byy kyxlingg ee/ gunw ji' qranx ee cavet sidjai taiww dua lehh. Sursit-siong, Freud duiww guaw ee huedab naxjunxx cuanw jit kauxkuir. Ui' jitt hxang su, guaw bingvik ix dirr qaixsueh moxjiongw bangrqingw si uanjuann byy lat, jixhyw dirr qauwdiauu sunqiuu iamxsig. Guaw jaix guaw diyh'air jurqiw cue cud jitt xee bang ee jinjniar iwgi.
Duiww guaw laii qongw, jin' binghenw, cur soxx dairviauw ee si jit jiongw jingsinn ee hingsiong --- iarr dyrr si qongw, guaw hitt sii ee iwsig jongrtair ixqibb qaur bogjingg uijiw ee amwiwsig iuxquanx :ee/ duartniax dairviauw iwsig, suibongw qenwdiok hongqeh si qoxdai :ee, kiokk u langg druar.
Dervanw dairviauw ee si amwiwsig ee derr id jann, guaw zuxx cimzip, qingxsiong zuxx cnesox/ oamr. Dirr dong-lai, guaw huathen guansiw bunhuar soxx lauu lyc laii ee mic/ si guaw srinx-siong guansixlangg hitt xee sewqair/ iwsig cavutdyx jin' lann jiapqin, qngx jiyr. Langg ee guansiw jingsinn beh uaw dongrbut linghunn ee snewmia, cniurr suxjenn sidai langg jiamwiuw dongrhet jinwjingg, tongsiongg si iaxsiur jiamwiuw.
Dirr jitt xee qiqanx, guaw ban ~ zinrbad .diyc, Freud ham' guaw duiww lixsingr taiwdo ee cimkig cavet. Guaw si dirr jap-qauw sewqiw buew qik u ligsuw kiwhunx ee Basel singdiongw/ tak liauw jit quaw qoxdai dethagqax ee duwjog/ did diyc simlixhagsuw ee diwsig/ dagg vaiw guaw sniu diyc bang, amwiwsig ee lueriongg sii/ jongw benxvutliauw beh ham' ligsuw sna' vixqaur/ tak dairhak sii itdit iong Krug hitt vunw dethak lau sudenw/ ui' jap-veh, jap-qauw sewqiw coqii ee jokqax digvet sigsai/ inx ee sewqair si hingsingg guaw bang-diongx zi lxauu duartniax kiwhunx ee hitt xee sewqair. Tauwquer duiwviw, guaw sanxsingx anne ee inwsiong : Freud ee diwsiksuw laijurr Buchner/ Moleschott/ Du Bois-Reymond/ Darwin.
Dirr guaw duxx aw soxx biyue ee iwsig jongrtair, jitt xee bang henxzenn vrong diyc qyckacc cimzip ee huanrdiuu/ kuriuw diongsewqiw hongqeh/ byy langg druar, dngg ~ ee dervanw/ Roma sidai ee derharsig/ suxjingg dongrhet, inx iwbi diyc iwsig quewkir ee qokk sidai/ qaidnua.
Dirr jyr jitt xee bang jingg quixarr zit, u quaw bunrdee itdit uisec simtauu: Freud ee simlixhak si qenwlip dirr sniaw jendee? Sriok zinlui dycc jiongw huanrdiuu ee sukyw? Vaitnasingr ee qywzinn zinqeh-jiwsiongrlun ham' itvnuax ee ligsuw qaxding u sniaw quanhe? Guaw ee bang decc uirr guaw qaixdab, jixbingg si iuxquanx bunhuawsuw qicow ee bunrdee --- jit jiongw iwsig kuriuw siy' lensuar jancur ee ligsuw. Guaw ee bang jniajyr zinlui jingsinn ee qetqowdoo, qaxding mowjiongw uanjuann huizinhuar ee (Impersonal) vunxsingr amwcangr dirr jingsinn-ha/ kada hiangw jit sniax, jitt xee bang jniajyr guaw ee jixdy hiongsiong/ dirr birlaii did diyc jingwsit/ qycc si guaw jit kaisiw dyrr byy hxuad huaigii ee. Jex si guaw kixtauu duiww qiamxgiam bih dirr qywzinn jingsinn ha jibtew ee bohoo sniurhuad. Dairsingx, guaw qra knuawjyr kacc jaxqii qokk jiongw qonglingg ee hunziah, aurlaii, qinggiam ee luixjig, u liauw kacc kyxkyr ee diwsig qicow, guaw jiacc liauxqaiw inx si qokk jiongw vunxlingg ee hingsid, iarr dyrr si jiongxjiongw guanhingg (Archetypes).
Guaw itdit byy hxuad dong'ir Freud ee knuawhuad: bang si jit xee “viauxbin (Facade)”, bang ee ham'ir cangwbih dirr aurbin --- jitt jiongw ham'ir suibongw ixqingx virr iwsig jaix, kiokk virr iwsig okdok kauwliuu. Duiww guaw laii qongw, bang si tensingr jit vorhun/ byy kipenr ee iwdoo/ jin siongrr dua linglik laii viauxdat moxjiongw mic/ cniurr cauxbok vniawmia singdiongw/ dongrbut jauxcue jiahmic qriuu singjunn. Sniwmia ee jiaxee hingsid vingrr byy kipenr lanw quancatlik ee iwdoo/ si lanw penr jurqiw, kinsi ee guan'inx/ kyxlingg lanw tniax m driyc/ cauwhni, juadduir m si hnirkangx iwdoo penr lanw. Dirr ham' Freud qniwbin jingg, dyrr zinruii amwiwsig/ amwiwsig ee didjiab suecbingjiaw ---bang, si jurzenn quewdingg/ zimrhyy buxduanr ee qongxhuad/ digvet si quixqer, huecauxvo, longxx berdangr quijue bang. Guaw byy zinruii u sniaw lixliuu erdangr qaxding, iwsig ee jiongxjiongw vniwkangx e kangai diyc amwiwsig ee jurzenn quewdingg; duxhyw sianghuanw, zidsiongg qinggiam qra guaw qongw, amwiwsig ithiongr qiglet huanxduir u iwsig ee jiongxjiongw kinghiongr.
IRQYR VUNDY EE BANG
Iuxquanx jitt jxy cur ee bang, duiww guaw sanxsingx qoxquair ee jok'iong : dingsinx qig kiw guaw duiww kyxqoxhak ee hingwtauu/ dngw laii Zurich au, kaisiw tak Babylon kyxqow ee ceh, ixqibb qitnax sinue ee jiongxjiongw duwjog/ jitt xee quewdingg, byiwdiongx huathen Friedrich Creuzer ee “qoxdai binjok ee siongrdingx juxgi qapp sinue (The Symbolism and Mythology of Ancient People, Leipzig and Darmstadt, 1810~23)”, bagjiux suacc qngx .kiw .laii! Naxx kixsiauw lehh, qra cniurr snuax hiacc quann ee sinue juliau, jin' jiahlat qycc jin' cuwbi knuar uann/ qycc u Gnostic ee duwjog, siongrbuew kiokk lag zip kir hunwluan-diongx, cue byy jangxtauu/ huathen jurqiw itpenr bongbu, cniurr guaw dirr vnerngi jinrlik beh liauxqaiw jingsinvne qywanr, simliw jongrtair ee ham'ir. Guaw naxjunxx srinx dirr jit qingx siongxsiong-diongx ee siauxzinngi, duiwtai jiaxee juliau cniurr guaw ee vnerlangg hitt ngiu jinxduan/ hunsig Creuzer duwjog nirr soxu bew-langg/ ciurnaa-sinn/ javosinn/ jaboxsinn; dirdecc byingg jiaxee sii, byiwdiongx huathen qoxdai sinue/ guansixlangg ee simliw ji' qranx bidced kanlenn, jiurr jitt xee, cimzip tamwtyw genxqiur.
Jitt sii, byiwdiongx knuanr diyc “simlixhak dongwanr (Archivew de Psychologic, Geneva vanw)” kranx cud jit pnix jit xee siauwlenn Bixqoklangg Miller siyxjiaw ee huanwsiongw vywdy, jokjiaw si guaw qingwair/ jusiongg ee ving'iuw ___. Jiaxee huanwsiongw kuriuw ee sinue digsingr, hro guaw luersimx kiw dinxdang, naxx cuihuawjex, duiww guaw dairliong luixjig kiokk byy lixlo ee sniurhuad huatsingx jok'iong/ ban ~ guaw ee ceh “amwiwsig simlixhak”, dyrr si ui' jiaxee sniurhuad/ ixqingx did diyc ee sinue diwsig-diongx laii hingsingg.
Dirr guaw siaw jitt vunw ceh sii, jyr liauw jit xee bang, irqyr guaw jiong' beh ham' Freud vundy.
Siongrr diongriau ee jit xee bangrqingw cuthen dirr Suirsu (Swiss) ham' Oderli (Austria) qauqair ee snuakux, hitt sii qin honghunx, guaw knuar diyc jit xee u nihuer/ cing Oderli dewqog haixquanx ee jewhok/ damrvyc unxqux, qniaa ui' guaw srinx-vnix quer, byy beh cab guaw. Ix ee viauxjingg byy hnuahiw/ simsu jin' dang/ buanxbin koxcow; bang-diongx iauxx u qitnax ee langg, qidiongx jit xee qra guaw qongw, laurlangg m si uac :ee, si quewsinx je nii jit xui haixquanx qnuaguann ee quixhunn. “ix si iuguann byy guanrir siw ee langg ji' id.”
jex si bang ee derr id vorhun. Guaw kaisiw duiww jitt xee bang jinwhingg hunsig, “haixquanx” hro guaw sniu diyc “qiamxjax” ; “qauqair” hro guaw sniu kiw iwsig/ amwiwsig ji' qranx ee qauqair, ixqibb Freud/ guaw nng langg quandiamw ee qaiwhan. Venqair haixquanx jin' giamqeh qiamxjax, dirr guaw knuar .laii, si duiww hunsig ee amwir, vauhok packuix hro qnuaguann knuar, qamxx u uiqimwpinw; dirr jitt jiongw qiamxjax ee quewdingg-diongx, amwiwsig ee qaxsed virr henkuix. Jitt xui nilau ee haixquanx qnuaguann, ix ee qangjog henxzenn byy duar hro ix kuaiwlok/ buanxjiog, incuw duiww jitt xee sewqair py diyc quawqud ee knuawhuad, jex hro guaw byy hxuad byy lensiongw diyc Freud.
Jitt sii, Freud duiww guaw ixqingx sitkir be jiyw kuanuix, vutqyr ix iuguann si jit xee cutsig ee zinbut, guaw dirr ix srinx-siong dausia vaxvah ee hingsiong; jyr jitt xee bang ee sii, jitt jiongw dausia vingrr byy sithau, incuw gunw byy hxuad kecquanx, pnuawduan itdit byy hxuad itdir ee jongrtair. Gunw horsiong ilai/ dongsii qycc u duiwkongr. Dirr jitt xee bang huatsingx sii, guaw duiww Freud iuguann u jin' quann vingqer, qycc duiww ix iuxsow puepingg; jitt jiongw taiwdo byy itdir ee henrsiong, suecbingg guaw iauxx bue iwsig diyc jitt jiongw qiogser, marr byy lyc zimrhyy quatsimx, jex si soxu hingsiong dausia qiongriuw ee digsig. Jitt xee bang hro guaw vutditvud cingcyw jitt jiongw qiogser.
Dirr Freud qywsingr ingxhiongw ha, guaw jinrliong qra jurqiw ee pnuawduan danr jit vnix, qycc amwab guaw duiww ix ee puepingg. Jex si ham' ix habjog vit'iaur ee diauqnia ar! Guaw qra qaqi qongw “ Freud viw liw qex jiokk kiauw/ quanwlen qycc je. Bogjingg liw jixsirr tniax ix qongw/ hiongr ix yc ee hxun.” Hro guaw byy liaursiongw .diyc, dirr bang-diongx qingwzenn qra knuawjyr Oderli ongqog jit xui singwqeh quaipiah ee qnuaguann/ jit xui ixqingx quewsinx, quixhunn iauxx qycc siwqer liuluann ee haixquanx qnuaguann. Jex qamxx si Freud amwsi guaw hibang ix siw .kir ee guanrbang? Mrqyxx guaw huathen jurqiw srinx-siong byy sniaw byy jingwsiongg, vingrr byy py u jitt jiongw sniurbang, in'ui guaw si zuarr hibang byy siyh itcer dairqer ham' ix habjog ee qihue. Tanxvec qongw, zuqyw u susimx jabliam :ee, marr qandna' sniu beh hunhiongw ix honghur ee qinggiam ziiw. Ix ee ving'iuxjingg duiww guaw diongrdua iwgi, guaw sidjai byy lixiuu hibang ix siw. Mrqycc jitt xee bang u kyxlingg si guaw iwsig-diongx duiww ix qydo pingqer/ kimpuer ee jit jiongw voxsiongw/ jixjingr. Jitt xee bang qisit si qenwgi guaw duiww Freud caixcuw qyckacc je puepingg ee taiwdo. Bang-diongx juewau jit qxur amwsi Freud kyxlingg ingxuanw lauu miaa, guaw kiokk hro qniax .diyc.
Jitt xee bang vingrr byy dirr haixquanx qnuaguann jex qetsog, quer liauw jit quaw sihau, guaw qycc jyr liauw derr zi xee bang, jitt xee qamxqag henxzenn qyckacc diongriaur.
Guaw bang qnir jurqiw dirr Iwdairli (Italy) jit xee sniaci, iokk diongdaur jap-zi diamw qaur jit diamw ji' qranx, zidtauu mew qaxx e tngr .langg, jiyr dirr ehbih ee qelo. Sniaci jiauww snuax-hxingg kixjy/ guaw lensiongw diyc Basel jit xee digvet ee soxjai Kohlenberg/ ec ec ee qelo tonghiongr Birsigtal ee snuaqog/ sniaci jiamwbuanw snuaknix/ vorhun qelo si jiyhkamw jit janr jit janr quann kiw kir. Bang-diongx u jit dy jiyhkamw hiongr xe tongx qaur Barfusserplatz, dyrr si Basel, marr si Iwdairli jit xee sniaa, u damrvyc cniurr Bergamo. Duxx zuac .langg, zidtauu dng' iam, banrbut pak dirr dua zidhow-ha. Jit qrunn langg naxx ingw itdit rig duiww guaw jiax laii; siongdiamr dngdecc qnuaix mngg, qelo ee langg qniaa qaxx jin' hiongg, qnuaw beh dngw kir. Zinqunn-diongx u jit xui buxsu, cing jenwqah, ui' jiyhkamw-aw lyc .laii, hiongr guaw qniaa uaw laii, tauu dir kinven tih-by, bagjiux ee xui u pang, sinkux-dingw cing ticlenqah/ muax jit niaw vehsig snxax, dngg qaur katau'ux, dew ciuxngw, jingg-au longxx jrid jit xee angsig sibzi.
Dirr jit xee henrdai sniaci diongdaur harvanx sikig, tudzenn knuawqnir jit xee qoxdai ee sibzirqunx hiongr guaw qniaa .laii. Hro guaw qamxqag qiquair ee si, jiuuii qokk hongbin qniaa dinxdang ee langg, hyxcincniu longxx byy jit xee langg juwir diyc ix, byy langg huetauu knuar ix/ iacc si duer ix aurbin qniaa. Naxjunxx ix si jit xee jongqniawzinn, duliauw guaw ixgua, si'angw dyrr byy knuar .diyc. Mng guaw jurqiw, jitt xee quixhunn dauwdew iwbi diyc sniaw? Naxjunxx u langg huedab (qycc byy langg jairdniuu) “byy m driyc, jex si jit xee junxsii cuthen ee quixhunn. Jitt xee buxsu jongxsi dirr jap-zi diamw qaur jit diamw diongqanx qingquer jiax, dngqii laii, guaw sniu si quixarr sewqiw ar, itdit si anne, dag'ee marr quanwsir ar.”
Jitt xui buxsu ham' hitt xee haixquanx qnuaguann si nng xee duiwviw binghenw ee zinbut; haixquanx ee hingngiaw si “berdangr sngr si tetdew siw .kir ee langg” --- jit xee dngdecc siausid ee quixhunn; hitt xui buxsu kiokk uac lingr lingr, byy viw jex kacc jinsit ar. Jitt xee bang ee derr zi vorhun si sinvir ee, mrqyxx dirr venqair ee qingxsiong jin' poxtongx, marr be hro langg inwsiong cimkig; jixsirr aurlaii decc sniu ee sii, jiacc iuxsow qamxsiu.
SITKIR VING'IUW FREUD AR !
Jyr jitt xee bang quer jit dnxua siqanx, buxsu jitt xee sinvir zinbut hro guaw sniu jin' je/ duiww jitt xee bang bingngiu jit dnxua jin' dngg siqanx au, jiacc liauxqaiw siongquanx ee ham'ir. Bang-diongx guaw ixqingx jaix buxsu sriok jap-zi sewqiw, lenrqimsut kaiwsiw cuthen ee sii, marr si jauxcue sxingr-vxuex (Holy Grail) ee siqii. Jurr jap-go huer derr id vaiw knuar uann jiaxee qowsu au, sxingr-vxuex duiww guaw iwgi digvet. Jerjiyw jaix jiaxee qowsu vuerau iuguann amwbih diyc jin' dua ee viwbit, jitt xee bang soxx driaur ee sxingr-vxuex buxsurtuann/ inx jauxcue sxingr-vxuex quewdingg ee hitt xee sewqair, duiww guaw laii qongw jin' jurzenn :ee. Ui' siongrr cimjann ee iwgi knuar, jex marr si guaw ee tende/ ham' Freud uanjuann byy quanhe. Guaw ee sniwmia itdit decc suncue moxjiongw m jaix/ qongw be cud ee mic, hex jin' kyxlilngg uirr vinghuann ee sing'uac duar laii iwgi.
Jex sidjai suxx langg sitbang, juanw be tingg ee simlingg, vniawmia uew jingsinn cimjnew/ huathen :ee, jixvutqyr si langg jin' sigsai, “qik u zinsingr :ee” jiongxjiongw hanrjer. Guaw dirr jngkax ham' jyccanlangg jywhuew duarhanr, bexdiauu-lai yc byy ee mic, kiokk dirr cosiok/ simsig ee diwhui ham' binqanx qongxkuah ee huanwsiongw-diongx huathen. Luanrlunn (Incest)/ singwvet dendyr (Perversion) guaw byy zinruii u sniaw liauxvutkiw ee sinx huatbingg, marr byy su'iaur digvet qaixsueh. Jiaxee huanrjue hing'uii si qowsingg amwsamr ee jit vorhun, hro guaw cingcyw knuar .diyc, langg junjai ee jiongxjiongw baiw/ og/ byy iwgi, pywhai sing'uac ee cuwbi. Tovunr hro caiwsex singdiongw, si lixsow-dongzenn :ee, dirr anne ee diwsig-diongx, guaw byy hxuad huathen kexsi langg ee dongrcatlat. “ jixu sniacirlangg jiacc e itbuu-soxdix dairjurzenn iacc si langg ee lacsab dai.” inx iawsen jiaxee baiw su, guaw anne sniu.
Duiww dairjurzenn uanjuann m jaix ee langg, dongzenn huan u jingsinn quanlingjingr, in'ui inx byy hxuad sik'ingr henrsit/ cniurr ginxaw hiacc tenjinx/ qra inx qongw sing'uac jiongxjiongw sidjingg si vit'iaur ee/ anne ee kexbongg dongzenn dri be hyw jingsinn quanlingjingr, jixu ui' mohmoc byy ngiaxbak ee lamwde vee cud laii, jiacc u kyxlingg huehok qenrkongx. Mrqyxx inx kiokk sniu' liuluann ixjaw amwab ee jongrtair, dng' lixlun suechok inx/ qycc teqiongx inx lixsingr/ habliw ee bingrling hongwkir jitt jiongw iuwdir, hunsig kiokk byy hxuad hro inx zinrbad byy qang/ kacc hyw ee mic, anne inx beh zuhyy tiauwtuad jitt xee jongrtair? Jex dyrr si inx jyr be qaur :ee, narr m si cue byy kiarkadiamw, qycc jnuaxngiu e anne ? Sing'uac hongsid si berdangr danbin hongwkir, duhuix qaixngua jyr lingrgua jit jiongw. Uanjuann habliw ee sing'uac hongsid? qinggiam qra langg qongw, si byy kyxlingg :ee, digvet si jit xee langg ee vunxjid cniurr jingsinn quanlingjingr hiacc hro langg pnaiw lixqaiw sii.
Jitmaw, guaw liauxqaiw uirhyy Freud ee qywzinn simlixhak duiww guaw sanxsingx jiacc iamrzet ee kip'inxlat/ si guaw qib beh jaix iuxquanx ix “habjingg-habliw ee qaixquad” ee jinjniar iwgi, lixiuu/ uirr beh did diyc jitt xee dap'anr, guaw iauxx junxvi hyw beh jyr diongrdua hisingx! qamxqag guaw iuguann decc jauxcue jitt xee bogviaux. Freud vunxlangg marr u jingsinn quanlingjingr/ jitt xee bygii e virr jinxduan cud/ qycc kyxlingg u hro langg damsimx ee vnerjingr, kir Bixqog hitt jua guaw dyrr caqag .diyc ar. Dongzenn, ix qongw, muixx jit xee langg jerjiyw longxx u damrvyc jingsinn quanlingjingr, lanw rair u zinrbad, horsiong iongzimw. Vutqyr anne byy hro guaw buanxjiog; gauw qycc sniu beh jaix, jit xee langg beh anxjuanw jiacc erdangr piacbenw diyc jitt xee vne/ narr si jyr dyrsux ee langg byy hxuad duiwhur jurqiw ee jingsingg quanlingg, anne bylun si Freud/ ix ee juxde longxx byy hxuad lixqaiw jingsinn hunsig ee lixlun/ sidjenr ee jinjniar iwhamm. Dng' Freud suanvyr, iwdoo qra lixlun/ honghuad qethap, venwjniaa moxjiongw qauwdiauu sii, guaw dyrr byy hxuad ham' ix habjog ar; byy qitnax ee suanxdik ar, jixu tuatli quanhe.
Dirr guaw debecc siaw uann iuquanx LIBIDO jitt vunw ceh “henwjer (The Sacrifice)” jitt jniux sii, guaw jaix, jitt vunw ceh ee cutvanw itding e hro guaw sitkir Freud ee ving'iuxjingg, in'ui guaw qewue beh dirr jitt jniux siaw kuriuw diongrdua qaixvenr ee quanliam, luanrlunn/ qitnax jerje ham' Frued byy qang :ee. jairr guaw lunrdiamw, jixu dirr qik hanxqnir ee jinghongw-ha, luanrlunn iwbi diyc qywzinn jingsinn cywluan/ tongsiongg kuriuw jit jiongw qydo ee jongqaur janbin/ jitt xee dejaii dirr soxu uxdiu kixguanlun (Cosmogony), sinue cavutdyx vnuaenw quanqenr qaksig. Freud qencii jyr zirgi luanrlunn ee qaixsueh, byy vaxag jingsinbin siongrdingx iwgi. Guaw jaix, ix juadduir byy kyxlingg jiapsiu guaw jitt hongbin ee zimrhyy knuawhuad.
Guaw ham' kanciuw dramm jitt hxang su, qycc qra qongw guaw ee quawlu. Ix iwdoo siauduu guaw ee quawgii, zinruii Freud u dorliong, dyrr si byy jiapsui guaw ee quandiamw, marr be tecud huanxduir iwqenr. Guaw vunxlangg marr siongsinr ix be anne. Lensuar nng qywguec, itdit dirr guaw simlai qiauxqaw, byy hxuad siaxjog. Jitt jiongw sniurhuad mair siaw, qra amwcangr .kiw .laii? Iauxx si siaw cud laii, morhiamw kyxlingg e sitkir jiacc diongriaur ving'iuw? Juewau, quatsimx qewsiok siaw .lyc .kir ... aurlaii, guaw jinjniar sitkir jitt xee ving'iuw.
Ham' Freud quatlet au, soxu ee ving'iuw/ sigsai :ee, siy' lensuar likuix guaw. Jitt vunw ceh virr knuawjyr ovec qongw, qasiong guaw si sinvir juxgirjiaw, dairjir byy banxhuee ee kongqanx; jixu ___ /Meader sriu guaw ee ingxhiongw. Vutqyr guaw jaw dyrr knuar e diyc virr qolip/ duiww ving'iuw ee huanxingr byy py huanxsiongw/ jinwjingg dyrr kyxlu .quer .ee/ jaix soxu ee dairjir longxx u honghiamw/ marr diyh'air uirr jurqiw sinwliam viauxbingg libdniuu/ “henwjer” jitt jniux iwbi diyc guaw rair hisingx jurqiw jyr jewpinw/ texhue diyc jitt diamw, guaw siaw .lyc .kir/ suibongw jaix langg be liauxqaiw guaw ee sniurhuad.
Huesiongw .kiw .laii, guaw jaix jixu guaw jiacc e qewsiok genxqiur Freud siongrr u cuwbi ee nng xee bunrdee: “qoxdai kaziah” ham' “singwiok”. Ix zinruii guaw si jit xee knuar byy singwiok qewdat ee langg; qisit, duxhyw dendyr, dirr guaw ee simlixhak, jingsinn uanjingxsingr ee qivunw (m si ui'id :ee)viauxdat, singwiok si jin' diongriaur ee jit kuann. Mrqycc guaw quansimx :ee si, zuhyy ciauuat qywzinn ee iwgi/ singbudhak ee qonglingg/ tamwqiur sinlingg hongbin ee lueriongg, sinvir ee ham'ir, drat qaur qaixsueh Freud itsimx juanjur/ beluann/ kiokk qycc vaxag be diauu ee singwiok jitt xee mic. Guaw qra sniurhuad siaw zip “juanxii quanhe ee simlixhak (The Psychology of Transference)” , “sinvir ee quanlenn (siux dirr 'simliw dirliauu ee sidbu <The Practice of Psychotherapy>' )” jitt nng pnix. Singwiok si sinvir sinlingg viauxdat siongrr diongriaur :ee; sinlingg si “siongrder lingrgua jit bin”, siongrder hingsiong ee amwsamr bin. Jurr guaw dimbee dirr lenrqimsut sewqair ixlaii, sinvir sinlingg ee gibun itdit ngidnii guaw be trer, jitt xee hingwcur ham' Frued derr id vaiw damue jaiww dxo uac .kiw .laii; dongsii singwiok henrsiong cimcimx pah dinxdang Freud, sidjai hro guaw lann lixqaiw.
Freud siongrr dua singjiu vauquad zinrjinx knuawtai jingsinn quanlingjingr/ cimzip dog'iuw ee qywzinn simliw/ u iongxkir hro vnerlangg qongxue/ cimzip inx jinsit simliw-diongx. Vixzuu, ix iong vnerlangg ee ganxqongx laii knuawtai jiuuii sewqair, viw zimrhyy sihau qyckacc cimkig lixqaiw jingsinn quanlingjingr. Dirr jitt hongbin, byy hro penqenr ingxhiongw/u iongxkir qycc singqongx qiuwjingr dairliong penqenr/ cniurr “quriog” jit xui sendix, cud ciuw sag driau qexvauu ee sinbingg/ tiah driau amkamr jiongxjiongw byy lauxsit, hiqew ee vowlii/ byjingg henkuix dongdai auwcaur jingsinn/ binrduir jitt xee qangjog, jysiu lingxcinr duiwtai sii/ vingrr byy qniaqiux. Ix huathen jit diauu tonghiongr amwiwsig ee vnelo/ hro bunbingg hiongr jingg tuidenw. Kingxding bang si iuxquanx amwiwsig quewdingg-diongx siongrr diongriaur ee sinwsid laiguann ee qewdadsingr, ix qra guanlaii ixqingx prangw .kir ee qangqu dingsinx qaux dngw laii zinlui ee ciuw-lai. ui' qinggiam lunrjingr, amwiwsig jingsinn ee junjai/ jitt jiongw jingsinn dirr hitt sii, jixsirr dethak-siong ee qaxsed, iuqii si junjai dirr ___ ee dethak nirr.
Suibongw lanw binrduir amwiwsig ee quanliam ixqingx ciauquer vnuar sewqiw, mrqyxx dongdai bunhuar iwsig iuguann iauxx bue qra amwiwsig ee quanliam/ soxx vauhamm juanvo iwgi siuzip itvnuax dethak-diongx. Qra jingsinn sing'uac-diongx, nng jiongw qigtauu ee qivunw susiongw kipsiux/ siauhuar, si birlaii ee zimrbu.