Daigiw Siuiongw Qongxue

(Jit-vah-snax-jap-lak) M tangx tec quewtauu, vuthongg juer quewtauu

Piwlun qongxx jiax u jit hxang kacc hyw ee dairjir, iacc si kacc iuxig ee dairjir, vadd langg beh hro .lanw, dagg xee iarr air beh dic. Mrquxx lanw m tangx congwkangx hai vadd langg sniu beh dairsingx qra ix tec .laii. Guaw knuar sewqanx ee langg, bagjiux-jingg narr u hitt xee lirquann iacc si hyw derui dilehh, diyrr duiww kacngx-au kir ing amr vo vaitig .langg, qaqi unrdong kir sniu beh did diyc hitt xee lirquann. Jitt kuanw jinjniar bersaiw .did. Iurr jit hxang si qapp jitt xee duiwhuanw. Narr knuar qnir u lirig diyc sewqanx ee dairjir, ingwqaix diyhh viw vadd langg dairsingx kir congr jiacc hyw. Cincniu qokhongg jinxjer jusen hitt kuanw juer hyw su ee qiawhuwqimx, benw danxhau langg kuanwiuw, lanw juer tauu kir qiawhur diyrr kacc simsig. Iaxx iarr cincniu vadd langg beh vunx hro .lanw, beh sniuxsur .lanw, si lanw ingwqaix did :ee iarr bersaiw tec quewtauu. Mrquxx duiww qokqax ee surgiap ixqip siarhue ee qongqiong ee dyrdikdig ee dairjir, narr si lanw juer erdid laii :ee, ingwqaix diyhh vniar lat kir juer jiacc ersaiw .did. Jongw qongw jit qxur, lanw ingwqaix tec, m tangx tec quewtauu, ingwqair juer, vuthongg juer quewtauu.

(Jit-vah-snax-jap-cid) Bxan hxang su decc sunkuann

Cincniu snix druar dirr aur too nirr ee ser jiah tangg, si qik lacsab :ee qik qniax langg :ee. Mrquxx jitt jiah tangg jid’err venwhuar vnir juer sxenn, jiac lorjuiw, hiyh dirr quann longwsongr ee ciurqix-aw-buew dirdecc hauw, hitt xee sniax kacc ngiaa zinqanx ee imgak, jin’ hyw tniax. Iurr cincniu nua cau-aw, vunxjniaa l.-lacsab-s. Narr vnir juer jit xee huexqimqox, vangr cud jit jiongw u u qongcaiw, naxx qimx huew ee qngx dirdecc vuex laii vuex kir, hro langg knuar liauw jin’ suiw. Jiauww jitt xee lixkir qra ix knuar, huanrr jin’ cingkir jin’ suiw :ee, dairkair si dui’ hitt xee lacsab ee soxjai cud .laii. Hitt xee qongbingg iuguann si jurr oamr cud .laii. M na anxnix, lacsab iarr si jurr cingkir laii, oamr iarr si jurr qongbingg laii. Cniaw linw juqunx qra ix knuar lehh. Dagg xee soxjai hiamm :ee cincniu saixziy, narr dnax kir ingr cann ingr hngg, diyrr e juer did vuiliau, hro gnoxqog e kuair dua jangg, qaur buew vnir juer biw lor cair lor laii duiww lanw ee cuir zip lyc kir vxag-lai. Qaur hitt xee sii m si lacsab ee mic, si jin’ cingkir, jin’ hyw jiac ee mic. Jitt xee jin’ cingkir ee mic, dui’ lanw ee vakdow-lai qycjaiww cud .laii ee sii, iurr vnir juer lacsab mic. Huanrr tnikae ee bxan hxang su, dui’ dairqiok qra ix knuar, byy jit xee byy decc sunkuann. Soxiw cingkir :ee lacsab :ee m si nng hxang, senrog, quiwjen, quanqe, duarsiyw, bersaiw did qra ix caved. Suizenn anxnix qongw, narr si kacc penx dirr byy caved, hitt xee vingdingw diyrr si pnaiw. Jongw si henrsii sewqanx bersaiw did u caved, iarr bersaiw did byy caved. Jex si tingdo ee bunrdee, dikdiongx kyxiw.

(Jit-vah-snax-jap-veh) Hyw ee qonglyy, hyw ee undig

Langg cutsir dirr jitt sewqanx, juer jit xee javolangg, sniu beh congr jit xee qingtenx-dongrde ee dua surgiap, hex si ingwqaizenn :ee. Jongw si iarr diyh’air jai’ngiaw byy surgiap ee soxjai u surgiap, byy qonglyy ee soxjai u qonglyy dilehh. Narr itbi rid diyc qonglyy, itbi qor hitt xee surgiap ee hinghaii, diyrr surgiap iarr srid .kir, qonglyy iarr e jauw .kir. Langg hyvid diyhh kir qriuu dua qonglyy, jit siwlangg erdangr byy quewsid, hex diyrr si jin’ hyw ee qonglyy mah. Cincniu siaxsir .langg, qiuwjo .langg, hitt kuanw sngr si hyw su. Jongw si lanw beh six undig hro .langg, hitt jun narr u tyw zinjingg ee simqnuax dilehh, diyrr suizenn qyckacc hro langg’ budjid-siong ee unhui, iarr bersaiw did qongw si undig, huanxdngw hro vadd langg uanwhun. Soxiw lanw langg ingwqaix diyhh qaqii qinxsin, m tangx hai diyc vadd langg, iurr byy hro langg uanwhun, hex diyrr si jin’ hyw ee undig. Sewqanx ee langg longxx berhiauw sniu qaur jitt kuanw ee hyw ee qonglyy, hyw ee undig, suar qriuu qxongx byy qxongx, six xunx byy xunx, hex vutkimx- vuthuat, diyrr si singwzinn soxx qongx ee ue. Juewlangg ingwqaix diyhh anxnix juer jiacc hyw.

(Jit-vah-snax-jap-qauw) M tangx sniu’ quer lryy, iurr m tangx sniu’ quer dam

Lanw beh juer dairjir, higsi beh vran dairjir ee sii, jimjiog qycc jimjiog, qavue benxle, longxx byy hiyckunr, hyw kiokk si hyw. Mrquxx narr sniu’ quer koxsimx, sniu’ quer tualyy, langg diyrr e sen, suar byy hex ingg qangx tangx vueiongw simsingr, iaxx suar byy ingg qangx tangx an’uir lanw ee simsinn. Cincniu jitt kuanw, pacpnaiw qaqi ee sinkux, diyrr suizenn u air beh congr surgiap, air beh lip qonglyy ee hibang, iarr berdid tangx jiauww lanw ee iwguan, qetqiok lryy zii buqongx. Soxiw sniu liauw tywdongr, ingwqaix beh juer diyrr jabhunx junxvi, jabhunx zedsimx, vniawser kir congr. Jongw si m tangx hro simx-srinx sniu’ quer lryy, ingwqaix beh juer diyrr juer, ingwqaix air hiyh diyrr hiyh, zit zit jiauww anxnix juer, m tangx vuanwdoo zii huir, diyhh juer qaur hro ix uansingg jiacc hyw. Jongw si duiww hitt xee dairjir, kacc c.-cinwcaiw-c., byy m.-mijnix-j., hitt kuanw jid’err knuar cincniu vutjiw qysiong ee kuanw. Mrquxx vangr byy iauwqinw diyrr suar vnir juer lingxdam, byy zedsimx. Suizenn u juer surgiap, dniardiyc byy qiuwjer sewqanx ee langg, iurr byy lirig diyc sewqanx ee surgiap, jongw diyh’air dikdiongx jiacc hyw.

(Jit-vah-sir-jap) Diyhh hanghok moquiw

Cincniu liriok, tiongwlok, siurkir, huanlyw, jawkix, jitt kuanw ee liamrtauu, e joxgai diyc siusinx siuxdy. Jitt hy liamrtauu hudqax qongw huanlyw-xmoo, dy’ si moquiw. Lanw langg narr air beh did juriuu anlok, diyrr vutdikvud diyhh jiong’ jitt xee moquiw qra ix qnuaw .kir, jiacc be behik .langg, tiaulann .langg, hai siw .langg. Mrquxx jitt xee moquiw m si dirr lanw ee sinkux-gua, diyrr si dirr lanw ee simqnuax-lai. Sikkiax iarr vutqyr e hanghok jitt xee simlai ee moquiw, zii congr sxingg jewdo jiongwsingx ee dua dyrliw. Jitt xee moquiw narr erdangr qra ix hanghok, diyrr henrcud vunxlaii ee jinsimx, dagg hxang dairjir sriu ix ee bingrling kir juer hyw, dikkag m qnaw lamrsamw sniu, luanrsuw juer. Mrquxx guarbin u jiongxjiongw ee moquiw laii beh cimhai .lanw, behik .lanw, hex si lanw qaqi ee simuann-iwmaw tiaur cud kir guarbin, beh qapp ix qyqyy dnii jiacc e anxnix. Soxiw jitt xee simuann-iwmaw, narr qra ix vak diauu lehh, hro ix be jauw .cud .laii, diyrr itcer guarbin ee moquiw be cimhai .lanw.

(Jit-vah-sir-jap-id) Duiww siauxzinn duiww qunjuw ee taiwdo

Lanw langg si hy juer langg, iarr m si sinn, iarr m si senx, beh nacc e juadduir byy quewsid, dniardiyc u quewsit, iarr u juer m driyc, hongwqiamx cincniu siauxzinn, siongsiongg kuair juer m driyc, quewsid iarr vixqauwdig kacc je. iaxx arr duiww hitt xee m driyc, duiww hitt xee quewsid, cinwcaiw langg dy’ beh qra ix jikvi, jex si ingwqaizenn :ee. Jongw si ix soxx juer m driyc hitt xee juerog, jinjniar e hro langg’ kyxngor, rair qra ix huat. Mrquxx duiww ix hitt xee langg m tangx jikvi sniu’ quewtauu, lingkyw qra ix texsud, qra ix tniawtangr, suar qra ix jixdy cua duiww hyw ee hongbin kir jiacc hyw. Iurr cincniu jiamr dua derui, soxx qongw dua liap ee langg, qunjuw ee langg, jurzenn u jit xee jurqyx-jurdai, jurjunx-junrhu ee taiwdo, cinwcaiw langg dy’ jurzenn e junqingr .ix, jongvair .ix. Mrquxx duiww ix ee lexsor, rair duxhyw jiacc hyw. Narr sniu’ qau lew diyrr suar vnir jniaa tiamxmi. Narr kacc byy lew, suar e ho’ngg qongw qiaugno vutsunr, m bad lexsor. Duiww siauxzinn duiww qunjuw ee taiwdo iarr diyhh dikdiongx jiacc hyw.

(jit-vah-sir-jap-zi) Ingwqaix ciauquer qongbingg cam’ zingi

Cincniu qongbingg-huwquir, diyrr si hyw miasniax, dua qonglyy, dua hyxgiac, sewqanx ee langg, iarr air beh did, air jitt xee qongbingg-huwquir ee simqnuax, kiokk m si m hyw. Mrquxx air miaa air lxi ee simqnuax dirr lanw ee vakdow-lai, jiamr dua xui hitt xee langg diyrr birbenw did vutqyr juer jit xee qongbingg-huwquir ee lojaii, diyrr si uirdiyhh qongbingg-huwquir beh ngwbang qongbingg-huwquir. Hitt kuanw ee simqnuax ingwqaix diyhh jyc hetqak. Lanw ee bagjiux diyhh qyckacc knuar kacc hng, lanw ee simqnuax diyhh vangr kacc dua jiacc ersaiw .did. Qongw hy juer tuatsiok ee langg, cincniu zingi dyrdig, lanw langg diyh’air jiauww jitt xee kir qniaa, sngr si derr id iauwqinw :ee. Mrquxx jitt xee liamrtauu dirr lanw ee simqnuax-lai, trad qaxx muaw muaw, diyrr iurr birbenw did vutsii hro hitt xee zingi dyrdig soxx ceing. Cniurr jitt kuanw ee langg dniardiyc be huathuix ix ee dua ciuxuanw, zimrir kir dua uahdang. Soxiw narr vangwsag jitt kuanw ee liamrtauu, erdid tangx dat diyc bugnow busig ee simde, diyrr ersaiw did qongw si singwzinn. Jongw qongw diyrr si, narr pau tuad cud qonbingg-huwquir ee simqnuax, jiacc u tangx did qongbingg-huwquir. Narr si ciaucud zingi dyrdig jiacc u tangx did diyc hitt xee dyrliw.

(Jit-vah-sir-jap-snax) Diyhh ing zingi pah ngiaa huwquir, diyhh ing zinlik jipuer tenzenn

Setsuw ix narr ing qongbingg-huwquir laii duiwdik lanw, lanw diyrr ing zingi dyrdig kir duiwtai .ix, jex diyrr si ing tenjiog kir duiwtai zinjiog. Juer qunjuw ee langg soxx diwdiong, diyrr si tenjiog, m si zinjiog. Vadd langg did diyc zinjiog, juer qaur jit xee dua srinn, lanw iarr mrbenw hro Ix longxlok. Sewqanx ingxx u langg knuawkinx zingi dyrdig, dirr huwquir langg ee binrjingg, taukag cih cih, siangx ciuw vair vair, quwjai hro ix ceinng, suar berhiauw tangx qenwsiaur. Iaxx arr lanw langg narr juansimx cud lat kir juer, diyrr e pah ngiaa jurzenn, bylun simxmih dairjir, benw qniax juer be sxingg. Simqnuax narr juanid, diyrr jiong’ lanw ee singwjid iarr e hro ix qaixngua, kacc ziok :ee iarr e vnir juer qiongg, kacc qniahniaa :ee iarr e vnir juer kacc iongxqamw. Soxiw langg narr did diyc jiwkir, did diyc sinwliam, qycc did diyc hionghyy, diyrr dniardiyc e jinghok jurzenn. Tnide congwjy bxan mic, langg iarr si tnide soxx congwjy. Tnide congwjy langg, u jit xee boo. Jongw si vingsiongg ee langg jiauww hitt xee boo congwjy. Huisiongg ee langg diyrr tuad cud hitt xee boo ixgua. U jit xee digvet zinqeh dilehh, soxiw qongxx qunjuw vutsiu jyrbut ji’ dyjur.

(Jit-vah-sir-jap-sir) Diyh’air vaiduu siogjingg

Jurr qoxjaw ixlaii, u dua qenwsig, dua ciuxuanw, erdangr congr sxingg qyuanw uixdai ee surgiap, hitt kuanw ee langg ersaiw did qongxx huisiongg ee dairzinbut. Suizenn byy hitt kuanw ee dua qenwsig, dua ciuxuanw, byy congr dua surgiap, mrquxx erhiauw did vaiduu hubingg liriok jitt kuanw ee siogjingg, hitt xee langg ersaiw did qongxx si bingliuu. Iurr cincniu genxqiur hagbun, huatqenr qoxjaw langg iauxx bue qongw ee sinx hagsuad, dirr hitt susiongw-qxair congr jit xee sinx qixguann. Hitt kuanw jikqigdig ee qanghux, dniardiyc si huisiongg ee dua zinbut jiacc juer erdid laii. Jongw si erhiauw vaiduu sing’iok hitt xee langg, suizenn be u jikqigdig ee qanghux, iarr ersaiw did hro ix zip singwzinn ee lairbin. Soxiw lanw langg iauwqinw diyhh jiong’ hubingg liriok itcer qra vaiduu. Iurr m tangx in’ui hro bud’iok laii iaudong qaqi ee simqnuax jiacc hyw.

(Jit-vah-sir-jap-go) M tangx sniu bingli, iauwqinw si kiwjed

Cincniu zit zit jiac cnicair, cing vowsnax, hitt kuanw jiac pnaiw cing pnaiw ee sanwhiongx langg, inx ee simqnuax dairkair si jin’ cringx jin’ vec, qaxnaxx gxik lehh. Iurr cincniu zit zit jiac hibah, cing diuduan, hitt kuanw jiac hyw cing hyw ee huwquir langg, ix ee luxvi lojaii vutsii taukag cih ~ ~ hro ix ceing, qyjciaww qongw hyw ue, sun ix ee ir, longxx m qnaw gik .ix. In’ui anxnix, inx huwquir langg ee taukaknguaw suar gong .kir. Huanrr lanw langg ee simqnuax jin’ damvok, longxx byy sniu beh did diyc miasniax liriok ee liamrtauu, diyrr mrbenw duiww vadd langg kir kap tauu. Mrquxx ix narr si sniu beh jiac hyw cing hyw ee liamrtauu zuxx qiongg zuxx zet, ix ee kiwjed diyrr jurzenn e siaubet. Juer sinsu ee langg narr byy kiwjed, diyrr qapp lojaii byy qyc’ngiu, itding hro sewqanx ee langg pixvok.

(Jit-vah-sir-jap-lak) M tangx srid juxir, iurr m tangx luerjir

Lanw narr si hro lanw ee tauqex tniawtangr, iacc si hro lanw ee juxqongx tiongxiong, lanw vutjiw dik’ir-iongiongg ee sii, diyh’air uat tauu knuar jing’au, jimjiog qor jyxiu, jabhunx juwir jiacc ersaiw .did. Hex si anwjnuaw? Huanrr jiongxjiongw ee jailan, dairkair si langg dik’ir ee sii e snix .cud .laii, soxiw narr liyc liyc aw srid dniudii liac dua gro, jaie diyrr e laii, beh siamw iarr be siamw be li, dniardiyc e dua qankow. Qycc jit diauu si qapp jex duiwhuanw. Lanw juer su juer liauw dua sitvai, higsi jiac taulo gu diyc pnaiw un, hro inx tauqex iacc si jniurqnuax knuar byy kiw, byy tangx did diyc ix ee sinwiong. Lanw dua dua sit’ir ee sii, iarr mrbenw luexjir, diyhh qex jit jann hunwle jiacc hyw. Sengiuu ee siogguw decc qongw, “Sitvai si e snix cud singqongx ee qunvunw”. Lanw langg ee dua ciuxnguaw, dairkair si dirr hitt xee dua sitvai ee diongqanx jiacc e bualen. Soxiw qoxjaw langg iarr u qongw, vai au hik huanw singqongx. Suizenn berdid tangx jiauww lanw ee iwguan, iarr dikkag m tangx luexjir, qyckacc qoxbuw iongxkir, sniu beh juer ee dairjir m tangx diongjiw, juer qaur hro ix uansingg jiacc hyw.

(Jit-vah-sir-jap-cid) Lanw m tangx dogg jiamr hingrhog

Huanrr sewqanx ee langg dagg xee iarr air did diyc hyw miasniax, lip dua qonglyy. Mrquxx langg narr ixqingx did diyc hyw miasniax, liap dua qonglyy, diyrr itdit qor hitt hxang, longxx m kingw jiong’ hitt xee hokkir vunx hro .langg. Sewqanx ee langg narr knuar diyc vadd langg u did diyc dua derui, hyw miasniax, dua qonglyy, diyrr himsen .ix, uanwdor .ix, urdangsii suar beh hamrhai ix iarquxqnaw. Soxiw narr u did diyc jitt kuanw dua hingrhog ee langg, m tangx sniu qaqi jit xee langg dniardnia dogg jiamr, jongw diyhh vunx quiw hunx aw hro vadd langg. Jex diyrr si siamw hitt xee jaie laii anjuann qaqi ee derui derr id an’unw ee huatdo. Iurr cincniu pnaiw pinxhing, vai miasniax, sewqanx ee langg dagg xee dy’ byy air. Jitt kuanw qaqi jin’ byy air ee dairjir iarr m tangx sniu juanvo beh hro vadd langg kir dnax. Lanw qaqi ee simqnuax vutsii sniu hingrhog dairqex hiongw, jaie dairqex vi. Iaxqycc jinr jit jann, vadd langg byy air ee dairjir, lanw iarr qra ix inxsiu quiw hunx hro vadd langg dnax kacc kinx jiacc hyw. Vadd langg cuiwciux quanw ix lauu dycc jit vingg, u jitt kuanw simqnuax duiwtai vadd langg si bersaiw .did. Jongw qongw diyrr si henrsii soxx qongw hy juer qiongrjunn-qiongringg si derr id iauwqinw.

(Jit-vah-sir-jap-veh) Jinx ee vut qapp jinx ee dy

U langg qongw lanw langg narr air beh juer vut, diyhh m tangx jiac cyx, rair jiac cair, iarr m tangx satsingx, m tangx sniu pnaiw simx, m tangx juer pnaiw su, siw liauw jiacc erdangr juer vut. Iaxx qongw lanw langg narr beh did jinx ee dyrliw, diyh’air jersenn, bagjiux kreh kreh, m tangx dua cuanxkuir, knuar qaqi ee simqnuax jiacc ersaiw .did. Narr u lang sniu anxnix, jex dua dua gorqaiw. Beh juer vut, beh di diyc dyrliw, byy hiacc uilann. Soxx qongw jinx ee vut, jinx ee dyrliw, ciangjai dirr lanw ee qadingg-lai, ciangjai dirr hitt lanw zit zit soxx juer dairjir ee lairbin. Lanw langg narr py diyc singsit ee liamrtauu, u vinghyy ee iwkir, hnuahiw ee binrsig, qycc qongxue kacc unsunn, dirr hitt qadingg-lai, dagg xee sna’ textiab, qui’ nii diongx qui’ qex ee langg h.-hnuahiw-h. dirdecc sing’uac, hex dagg langg diyrr si vniwjniaa jit xee jinx ee vut, hitt xee qniadac diyrr si hac jinx ee dyrliw, longxx benw jiac cair vair vut, longxx benw kreh bak jersenn. Guaw knuar sewqanx ee langg, simqnuax sniu amjam. Narr m qac’ir, kap diyc dy’ siurkir, air siy’ ma, air uanqex, ursii juer vutjingr ee dairjir. Hitt kuanw ee langg hy juer qxuiw. Ix suizenn jiac cair vair vut, liam omidohut, nacc erdangr juer vut, nacc erdangr did diyc dyrliw?

(Jit-vah-sir-jap-qauw) Diyh’air lauu quaw ude

Lanw langg ingwqaix diyhh zit zit siuiongw, zit zit loxlik, jingsinn-siong budjid-siong, jikju jin’ je ee guanliau, hro lanw did diyc jabhunx ee sewlik, jabhunx ee lirquann, tangx hro suisii tec cud laii ing si jin’ iauwqinw. Jongw si narr beh ing hitt xee kuiwlat, juer dairjir ee sii, jongw diyh’air lauu quaw ude cunn au vo, dikkag m tangx longxjongw tec cud laii ing jiacc hyw. Vutlun cinwcaiw hxang, lanw narr u jitt kuanw lauu ude ee simqnuax kir juer dairjir, congjy bxan mic ee lanw ee jruw, itding m qnaw qangr jaie hro .lanw. Suizenn hitt xee suacsinn iarr dniardiyc m qnaw ciongx diyc .lanw, jongw si lanw narr knuar diyc hitt xee dairjir, sniu beh did jin’ dua ee lirig, soxu ee kuiwlat juer jit xe vniar cud laii juer, iurr sniu beh did diyc jin’ dua ee qonglyy, taukaknguaw soxu ee diwsig qui’ee vniar cud laii sniu. Cincniu jitt kuanw qriuu qaxx jabhunx buanxjiog, diyrr dniardiyc e hro tnide quixsinn jikhuat, lueriux-guarhuan juer jit xe qaur, sniu beh juer hitt xee surgiap iarr dniardiyc e sitvai. Iurr jailan qaur, lanw qaqi ee sinkux e guihiamw, nacc u tangx ngwbang lip dua qonglyy, did dua lirig neh?

(Jit-vak-go-jap) Uahdang qapp anjing

Langg ee hingdong ersaiw did qra ix hunved jit xee si uahdang, jit xee si anjing. Hex air uahdang ee kuanxsid, cincniu jit pax dingx-aw diaur dirr txangx-aw-gua, u hongx ee soxjai, vutsii decc iyy longxx be anding. Gauu uahdang ee langg, suix diap aw quw, kacngx jre be diauu, vutsii decc jauxjongg. Hex air anjing ee kuanxsid, cincniu huew srid .kir ee huexhux, cincniu hiyc dax .kir ee cirubok, longxx byy jit diamw aw uahkir. Lanw narr si hitt kuanw, qapp sixlangg byy cax. Guaw duxaw qongw jitt kuanw kacc penx dirr jit vnix, iarr byy dikdiongx. Lanw langg jongw diyhh dirr htt dingrhunn-jixsuiw ee diongqanx, rair u enhuix-guiok ee kiwsiong jiacc ersaiw .did. Dingrhunn-jixsuiw diyrr si longxx byy dinxdang, longxx byy dongriauu, dnia dnia dirr hitt xee soxjai ee hunn cam’ juiw, diyrr si qongxx jing jing ee kuanxsid. Enhuix-guiok diyrr si barhiyc dirr vnuar tnidignw decc vuex, hii-aw dirr hitt txamm-aw-lai decc siuu decc tiaur, diyrr si qongxx uadpuad decc uahdang ee kuanxsid. Jongw qongw diyrr si lanw langg iarr m tangx sniu’ quer uahdang, iarr m tangx sniu’ quer anjing. Hitt xee hingdong narr dikdiongx, diyrr ersaiw qongxx si erhiauw dyrliw ee langg.