Ananda qra Vuddyy qongw, "Sewjunx, Zulaii suizenn suatbingg derr zi ywgi ee huatmngg, dnaxx quancad sewqanx beh qra qad tauw .kuix ee langg, narr m jaix qad ee guantauu, guaw siongsinr jitt xee langg jiongqibuew berdangr tauw .kuix. Sewjunx, guaw qapp huathue lairdew co' yc ee sniabunn iarr si anne. An' byy kaixsiw ixlaii qapp soxu bubingg jywhuew bet .kir jywhuew snix cud. Suizenn did diyc je qenwbunn qapp senrqinx, qongxx qiyr juer cutqex, iuguann bersux qecdngw zit ee malaria. Dogdok hibang liw huad dua juvix, kyxlenn gunw jiaxee dimlunn :ee, jixsi gunw qinaxzit srinx qapp simx ee qad dirr dyhh, an' dyhh laii tauw .kuix. Iarr hro birlaii koxlan jiongwsingx e tangx benw hamrzip lunhuee, be lag zip samqair."
Jiaxee ue qongw suah, ix dyrr qapp soxu dairjiongr pag dirr tokax (qingwvair), bagsaiw naxx horjuiw, singsimx qitai Vuddyy Zulaii busiong ee kaisi.
Hitt sii Sewjunx linbinw Ananda qapp huathue lairdew soxu co' yc :ee, iarr uirr birlaii itcer jiongwsingx jixdiamw li sxer in'enn laii junw jyr jionglaii ee bagjiux. Ix iong Jambunada jixsig-qimsig huad qngx ee ciuw syx Ananda ee tauu. Hitt sii sibhongx soxu vut ee sewqair kiw lak jiongw jinxdong. Druar dirr sewqair cincniu din'aix hiacc je ee Zulaii an' inx ee tauu qokk huad cud vyxqngx. Hiaxee qngx qang sijun an' hitt xee sewqair laii qaur Jeta Hngg quanr dirr Zulaii ee taukag-dingw. Jex si juui dairjiongr jingrlaii m bad duw .quer .ee. Jurr anne Ananda qapp juui dairjiongr longxx tniax diyc sibhongx naxx din'aix hiacc je ee Zulaii iong byy qang cuir cud qang imx qra Anana qongw,
"Jin' hyw, Ananda. Liw beh liauxqaiw soxu snix .cud ee bubingg. Hro liw dirr snex-siw lunhuee dingwqinx :ee dogdok liw ee lak qinkir, byy vadd hxang. Liw qycc beh jaix busiong potee. Hro liw tangx qinxkuair kakjingr anlok, qaixtuad, jigjing ciangjai ee busiong qongqyw :ee marr si liw ee lak qinkir, byy vadd hxang."
Ananda suizenn tniax diyc jitt kuanw ee huat'imx, simx iauxx be bingvik. Ix kauwtauu qra Vuddyy qongw, "Anxjnuaw qongw hro guaw snex-siw lunhuee qapp ciangjai anlok bibiau :ee vnivnii si jitt lak qinkir, byy vadd hxang?"
Vuddyy qra Ananda qongw, "Qinkir qapp din'aix qang guantauu. Sokvak qapp qaixtuad m si nng hxang. Iwsig ee vunxsingr si hubuu byngiaw :ee, uanzenn kangx huex. Ananda, an' din'aix huad qenwdix, knikib qinkir dyrr u siongwtew. Siongwtew qapp qenwdix longxx byy jursingr, qapp qauknaa ee lodig siysiang. Diwsuw liw jitmaw dirr qenwdix dingxbin qenwlip qenwdix, jex dyrr si bubingg ee vunxguann. Qenwdix dingxbin byy qenwdix, jex jiacc si liappuann byy lrau (huanlyw) jinjniar cingjing ee qingxqair. Anxjnuaw qongw jitt lairdew qycc e ionglap vadd jiongw mihqnia?"
Hitt sii Sewjunx beh qycjaiww suanqangw jitt xee ywgi, dyrr liam jimgensix:
Jinsit vunxsingr, iuxuii si kangx :ee.
Knikib laii snix cud, diwsuw naxx huanwqingw.
Byy soxx jyr, byy snix kiw iacc bet .kir.
Byy sidjai, cincniu kangx huex.
Gengiw bongrjong henxhen soxu jinsit.
Bongrjong qapp jinsit nng xee vnivnii si bongrjong.
Qexngiaw qapp jinsit longxx m si jinsit.
Anxjnuaw tangx qongw qnir diyc soxx qnir :ee?
Hitt diongqanx byy sidjai ee vunxsingr.
Soxiw qongxx naxx cincniu qauqnaa ee lodig.
Pah qad qapp tauw .kuix soxx knikib :ee longxx siysiang.
Singwzinn qapp huanhux soxx qniaa :ee si qang jit diauu lo.
Liw quanknuar qauqnaa hitt lairdew ee vunxsingr.
Kangx qapp u jitt nng xee longxx m si.
Behik amwox dyrr si bubingg.
Kexhuad bingqngx dyrr qaixtuad.
Jiauww sunrsu qra qad tauw .kuix.
Lak xee qad tauw .kuix, jit iarr suar byy .kir.
Suanxdik jit xee uanbuanw tongdat ee qinx,
Jinwzip snex-siw laujuiw vniwjniaa jniawqangw ee qakdix.
Adana si jiokk bibiau iuwzi ee iwsig.
Sipkuir hingsingg juixciangg, cuaclauu.
Kiongqniax jinliw si jinsit iacc qexngiaw suacc hunx be cringx,
Guaw hranw did kaisi enxsuad.
Qaqi ee simx jipsiuw qaqi ee simx.
M si huanwqingw :ee venwsingg huanwsiongw ee hxuad.
Byy kir jipsiuw, lenrr m si huanwqingw :ee iarr suar byy.
M si huanwqingw dy' be snix .cud .laii,
Huanwsiongw ee hxuad beh anxjnuaw e singlip?
Jex qiyr juer Bibiau Lenhuex.
Qimqongx Ongg vyxquir ee qakdix,
Bersux huanwqingw ee samapatti,
Jit diak quw dy' tangx ciauuat co' yc :ee.
U jitt xee Abhidharma (huatmngg),
Qycc u sibhongx Bhagavan,
Tangx jidlo qniaa duiww Nirvana (liappuann) ee mngg .kir.
Jurr anne, Ananda qapp juui dirjiongr u tniax diyc Vuddyy Zulaii busiong juvix ee qauwhuew. Vuddyy soxx gimm ee jimgensix ee ywgi jingcaiw bingqngx, bibiau ee dyrliw cingjing tauwted. Inx simx kuix bak bingg, qamxtanr qongxx m bad jingrr u.
Ananda habjiongw, qnialew, qra Vuddyy qongw, "Guaw dnaxx tniax diyc Vuddyy byy ziakamr ee dua juvix, tniax diyc vunxsingr cingjing bibiau ciangjai jinsit ee vudhuad quwdau, simlai suacc iaxx byy drat qaur qraiw kuix lak xee, jit xee bet .kir ee qingxqair, ixqip qra qad tauw .kuix ee sunrsu marr byy liauxqaiw. Brang liw sur dua juvix, qycjaiww kyxlinn jitt xee huathue lairdew qapp jionglaii ee jiongwsingx laii sisiar huat'imx, tangx sew druu cimdimm ee amjamx."
Hitt sii Zulaii dirr sraix-aw jyruii qra nirvana lairdew snxax siyw jingxliw, suar qra samghati guarkauw snxax giuw hro vnii. Ix qra cid vyw dyh giuw uaw .laii, ciuw crunx hiongr dyh-dingw cruw Suyama Tnix soxx hongrsangr ee huacaiw qin'aw, dirr dairjiongr binrjingg qra pah jit xee qad henxsi hro Ananda knuar, qongw, "Jex miaa qiyr juer sniaw?"
Ananda qapp dairjiongr longxx qra Vuddyy qongw, "Jex miaa qiyr juer qad."
Jurr anne Zulaii qra huacaiw ee qin'aw jih jih lehh qycc pah jit qad, qycjaiww mng Ananda, "Jex miaa qiyr sniaw?"
Ananda qapp dairjiongr qycc qra Vuddyy qongw, "Jex miaa iarr qiyr juer qad."
Jurr anne jiauww cuwsu jih huacaiw ee qin'aw, longxjongw pah lak xee qad. It'id pah juer qad ee sii, ix longxx e tec ciuw-diongx soxx pah ee qad suawjiab mng Ananda qongxx, "Jex miaa qiyr juer sniaw?"
Ananda qapp dairjiongr iarr qycjaiww cincniu anne jiauww sunsu inr Vuddyy qongxx, "Jex miaa qiyr juer qad."
Vuddyy qra Ananda qongw, "Guaw taukixsingx qra qin'aw pah qad. Linw qra hy miaa qiyr juer qad. Jex jih hyw ee huacaiw qin'aw sidjai si jit diauu. Derr zi qapp derr snax vaiw, anxjnuaw linw qycc qra hy miaa qiyr juer qad?"
Ananda qra Vuddyy qongw, "Sewjunx, jitt diauu vyxquir ee huacaiw sisnuar soxx jrid ee qin'aw suizenn vunxjniaa si ittew. Kyxviw guaw soxx sniu :ee. Zulaii pah jit xee qad, dyrr did diyc jit xee qad ee miaa. Narr pah vah xee qad, jiongqibuew u vah xee qad ee miaa. Hyhongw jitt xee qin'aw jixu lak xee qad. Quibuew byy qaur cid xee, iarr byy dirr derr go xee dyrr tingg .lyc .laii. Anxjnuaw Zulaii dna' inxjunw taukixsingx hitt xee, derr zi qapp derr snax dyrr berdangr qiyr juer qad?"
Vuddyy qra Ananda qongw, "Jitt diauu vyxquir ee huacaiw qin'aw, liw jaix jitt diauu qin'aw guandew dna' jit diauu. Guaw pah lak xee qad ee sii, miaa qiyr juer u lak xee qad. Liw jimjiog quancad. Qin'aw ee vunxtew si qangrkuanw :ee. In'ui pah qad suacc u jingcax. Jex sniaxmih iwsur? Taukixsingx pah ee qad miaa qiyr juer derr id. Cincniu jitt kuanw qaur derr lak xee qad snix .cud .laii. Guaw jitmaw beh jiong' derr lak xee qad hy miaa qiyr juer derr id. Erdangr bor?"
"Berdangr, Sewjunx. Lak xee qad narr junjai, jitt xee derr lak xee vitqingr m si derr id. Dyrr junw guaw qinglik qui' siwlangg jinrlik venrqaiw, beh anxjnuaw u jaidiau suxx jitt lak xee qad ee miaa luan .kir?"
Vuddyy qongw, "Byy m driyc. Hueqor guanvunw ee kixinx qeww jit diauu qin'aw soxx jy :ee. Beh hro ix jabcyr hunwluan, jiongqibuew si berdid jniaa :ee. Anne liw lak xee qinkir iarr si cincniu jitt kuanw. Vitqingr vunxdew siysiang, snix .cud .laii .ee suacc u jingcax."
Vuddyy qra Ananda qongw, "Liw vitdnia decc hiamm jitt lak xee qad, hibang dna' juewjniaa jit xee, mair juewjniaa lak xee. Anxjnuaw tangx did dna' juewjniaa jit xee lehh?"
Ananda qongw, “Jitt xee qad narr junjai, sirhuix dyrr jit xee suar jit xee snix kiw. Dirr hitt diongqanx jurzenn snix jitt xee qad, m si hitt xee qad; hitt xee qad m si jitt xee. Zulaii qimzit narr jongw qra qaixduu, qad narr byy snix cud, dyrr byy hitt xee iacc jitt xee. Hy miaa qiyr jit :ee dy' byy ar, lak beh an' dyhh snijniaa?"
Vuddyy qongw, "'Qraiw kuix lak xee, jit xee bet .kir' iarr si cincniu jitt kuanw. In'ui liw an' byy kaisiw ixlaii simsingr qongluan. Qenwdix luanrsuw huad. Bongrsiongw huad be suah. Lygiap soxx qnir huad cud din'aix. Kyxviw pilyy ee bagjiux dyrr e knuar diyc qongluan ee huex. Dirr cingjng jinglen bingqngx lairdew byy in'iuu decc ovec sniu. Itcer sewqanx ee snuax, hyy, dairde, snesiw, qapp liappuann longxx si in'ui qongluan pilyy laii snix cud dendyr ee hihuax siongwtew."
Ananda qongw, "Jitt xee lygiap qapp qad qangrkuanw, rair anxjnuaw qaixduu?"
Zulaii iong ciuw qra pah qad ee qin'aw hiongr dywvingg giuw, mng Ananda qongxx, "Anne u tauw .kuix bor?"
"Byy, Sewjunx."
Liammix ix qycc iong ciuw penhiongr jniawvingg giuw, qycjaiww mng Ananda qongxx, "Anne u tauw .kuir bor?"
"Byy, Sewjunx."
Vuddyy qra Ananda qongw, "Guaw jitmaw iong ciuw, jniawvingg qapp dywvingg longxx giuw, quibuew berdangr tauw .kuix. Liw qamxx beh tegi jit xee qongxx beh anxjnuaw tauw .kuix ee hongven hxuad?"
Ananda qra Vuddyy qongw, "Sewjunx, qaidongx an' qad ee simx hiax tauw .kuix, qad dyrr snruar .kir .ar."
Vuddyy qra Ananda qongw, "Byy m driyc, byy m driyc. Narr beh qra qad qaixduu, qaidongx an' qad ee simx hiax laii tauw. Ananda, guaw qongw vudhuad an' inenn laii snix kiw, m si cruw sewqanx camcab cauwjok ee siongwtew. Zulaii huatsnix binghen sewqanx cud sewqanx ee hxuad, jaix hitt xee qinvunw ee in'iuu duer soxx knikib :ee laii snix cud. Cincniu jitt kuanw simrjiww qaur Ganges Hyy ee suax hiacc je ee sewqair ixgua ee jit dih ho iarr jaix hitt xee sowliong. Henxhen dirr taujingg ee jiongxjiongw, cingg-aw dit :ee, ciwper kiaux :ee, tengyy vec :ee, oax ox :ee, longxx tangx liauxqaiw guandew ee in'iuu. Soxiw qongxx Ananda, duer liw simdiongx suanxdik ee lak qinkir. Qxinx ee qad narr druu, siogdinn ee siongwtew jurzenn e bet .kir. Soxu ee bongrsiongw siausid bedbongg, jinsit vunxsingr jitt sii byy henxhen, beh hysii henxhen? Ananda, guaw dnaxx mng liw. Jitt xee Suyama qin'aw lak xee qad henxhen dirr binrjingg, erdangr qang sijun qra tauw .kuix, dangjee qra qaixduu bor?"
"Berdangr, Sewjunx. Jitt xee qad vunxdew si jiauww cuwsu qad :ee. Qinaxzit qaidongx jiauww cuwsu laii tauw .kuix. Lak xee qad qang tew. Pah qad byy qang sii, anne qad tauw .kuix anxjnuaw tangx dangjee qaixduu?"
Vuddyy qongw, "Lak qinx ee huanlyw qaixduu iarr si anne. Jex lak qinx ee huanlyw cocox qaixduu ee sii, singx did diyc langg kangx .kir. Kangx ee vunxsingr uanbuanw bingqngx, singjiu hxuad did qaixtuad. Qaixtuad hxuad liauw, soxu ee kangx longxx be qycc snix. Jex qiyr juer potee samadhi, drat qaur byy snix byy bet qapp snix kiw zimxnairsimx ee qingxqair."
Ananda qapp juui dairjiongr singsiu Vuddyy kaisi, diwhui qapp qakdix uanbuanw tongdat, byy jit diamw aw gignaiw iacc behik. Jidsii habjiongw, hiongr Vuddyy ee siangx kax qnialew, suar qra Vuddyy qongw, "Guanw jiaxee qimzit srinx qapp simx longxx cingbingg, kuaiwlok byy gignaiw. Suizenn qycjaiww liauxgno qraiw lak brongg id ee ywgi, mrqycc iauxx bue drat qaur uanbuanw tongdat ee qinvunw. Sewjunx, guanw jiaxee piaulingg, jikju qiapsor naxx qozii kunr tnilo. Sniaw kuanw simsux iacc sniaw kuanw kyxlu, byy vanrpuex tangx did Vuddyy sur tenlunn. Bersux prangw .qnir ee iur qniaw hutzenn gu diyc ju'air ee buxcinx. Narr qycc jurr anne duw diyc tangx singjiu dyrgiap ee qihue, soxx did .diyc ee jingbit gengiw narr iauxx qapp vunxdew liauxgno :ee siysiang, anne dyrr qapp byy tniax .diyc byy jingcax. Brang liw sur dua juvix, sur hro guanw ywvir giamqinw ee dyrliw, tangx singjiu Zulaii juewau ee kaisi."
Jiaxee ue qongw suah, Ananda qui' sinkux pag dirr tokax (qingwvair), liauxau trer .dngw .kir, amr amr aw ngwbang Vuddyy tangx tuansiu ywvir ee vudliw.
Hitt sii Sewjunx hiongr dairjiongr lairdew juui dua posad qapp juui huanlyw druu jin ee dua Arhat kaisi qongxx, "Linw jiaxee posad qapp Arhat, linw dirr guaw ee jniawhuad lairdew did diyc singjiu, mrbenw qycc hagsip. Guaw dnaxx mng linw. Siongrr kixtauu huatsimx liauxgno jap-veh qxair, sniaw siongrr uanbuanw tongdat? An' dyhh hongven zip samadhi?"
Kaundinya dringw go xee bikiu an' jyrui vreh kiw hiongr Vuddyy ee kax qnialew, suar qra Vuddyy qongw, "Guanw dirr Lok Hngg qapp dirr Qxex Hngg knuar qnir Zulaii cocox singjiu Vuddy. An' Vuddyy ee imsniax liauxgno bingvik sir xee singwder. Vuddyy mng bikiu. Guaw dairsingx qongw u liauxqaiw. Zulaii inwjingr guaw ee mia juer Ajnata. Bibiau imsniax giambit uanbuanw. Guaw an' imsniax did Arhat. Vuddyy mng uanbuanw tongdat ee dairjir. Jiauww guaw soxx giamrjingr :ee, imsniax vaii derr id kxamw."
Upanishad an' ix ee jyrui vreh kiw, hiongr Vuddyy ee kax qnialew, suar qra Vuddyy qongw, "Guaw iarr u knuar diyc Vuddyy cocox singjiu vuddy, qongxx diyhh quanknuar byy cingjing siongwtew laii snix cud iamwngor cutli ee simx. U liauxgno diyc soxu sikdinn ee vunxsingr, an' byy cingkir vehqud qapp biser din'aix longxx qruix dirr hukongx, kanghux qapp siktew byy jingcax. soxiw singjiu byy yc ee dyrhing. Zulaii inwjingr guaw ee miaa juer Upanishad. Din’aix siktew qaxx jin, bibiau siktew giambit uanbuanw. Guaw an’ siksiongr did Arhat. Vuddyy mng quanhe uanbuanw tongdat. Jiauww guaw soxx giamrjingr :ee, siksiongr vaii derr id kxamw."
Pangkuir Jonggiamm Ginxaxtunn an’ jyrui vreh kiw, hiongr Vuddyy ee kax qnialew, suar qra Vuddyy qongw, "Guaw tniax qnir Zulaii qar guaw diyhh jimjiog quanknuar soxu iuxuii ee siongwtew. Guaw hitt sii qapp Vuddyy qywsii, diamr diamrjing ee soxjai cingjing siulen. Guaw knuar qnir soxu bikiu siyx dimjuixhniux. Hex pangkuir diam diam laii qaur pni-aw lairdew. Guaw quancad jitt xee pangkuir, m si hniubok iarr m si kanghux; m si enx iarr m si huew; laii byy xui, kir iarr byy xui. An' jex iwsig diyc siau’ngiuu, suar huatsnix binghen byy lrau (huanlwy). Zulaii inwjingr guaw juer Pangkuir Jonggiamm ee miahy. Siogdinn ee kuir jit xe aw quw siaubet .kir. Bibiau pangkuir giambit uanbuanw. Guaw an' pangkuir jonggiamm did Arhat. Vuddyy mng quanhe uanbuanw tongdat. Jiauww guaw soxx giamrjingr :ee, pangkuir jonggiamm vaii derr id kxamw."
Iyc Ongg qapp Iyc Junx nng xee dharma ongjuiw, ixqip dirr huathue lairdew go-vah Brahma tnisinn an' jyrui vreh kiw, hiongr Vuddyy ee kax qnialew, suar qra Vuddyy qongw, "An' byy kaisiw ixlaii qingquer sxor qiab dirr sewqanx juer liong'ix. Cuir damx jitt xee Saha sewqair ee cauw, bok, qimx, qapp jiyc. U miaa :ee sowbok u qaur jap-bxan veh-cingx jiongw. Jurr anne jiauu jaix kow, sngx, qiamm, jniaw, qamx, qapp hiamx dingxdingw ee kiwbi, ixqip soxu camcab soxx snix ee venwhuar. Si lingw iacc zet, u dok iacc byy dok, jiaxee longxx jaix taur taur. Jurr singsiu Zulaii qawsi, liauxted diyc kiwbi ee vunxsingr m si kangx iarr m si u; m si srinx iacc simx, iarr be lirkuix srinx iacc simx. Hunvet kiwbi ee in'iuu, an’ jiax did diyc kaigno. Singsiu Vuddyy Zulaii inwjingr guanw nng hniadi Iyc Ongg qapp Iyc Junx nng xee posad ee miaa, jitmaw dirr huathue lairdew jyr dharma ongjuw. Knikib kiwbi laii qakdix bingqngx suar vreh kir qaur posad ee xui. Vuddyy mng quanhe uanbuanw tongdat, jiauww guaw soxx giamrjingr :ee, kiwbi ee in'iuu vaii derr id kxamw."
Bhadrapala qapp ix jap-lak xee posad dangpnua an' jyrui vreh kiw, hiongr Vuddyy ee kax qnialew, suar qra Vuddyy qongw, "Guanw jiaxee taukixsingx dirr Uigiamm Imsniax Vud'ongg hiax tniax diyc dharma laii cutqex. Dirr jingdoo sexik ee sii jiauww quanwle zip kir igqingx. Hutzenqanx liauxgno diyc juiw ee en'iuu. Ix be qra din'aix sew cringx, iarr be qra siongwtew sew cringx. Dirr hitt diongqanx, byy soxx indnuax laii did diyc anzenn. Quewkir sxer ee sibkir byy be qir tihh, simrjiww qaur jitmaw duer Vuddyy cutqex, siuhing did diyc mrbenw qycc hagsip ee qongqyw. Vuddyy qra guaw hy miaa juer Bhadrapala. Bibiau ee bongkap henxbingg, cuttuad qaur jniaa juer Vuddyy derjiw. Vuddyy mng quanhe uanbuanw tongdat. Jiauww guaw soxx giamrjingr :ee, bogkab ee in'iuu vaii derr id kxamw."
Mahakashyapa qapp Jxiw-Qimx-Qngx bikiuni an' jyrui vreh kiw, hiongr Vuddyy ee kax qnialew, suar qra Vuddyy qongw, "Guaw dirr ixongw ee qiab, dirr jitt xee seqair ee sii u vut cutsir, miaa qiyr juer Zidguaddingx. Guaw tangx cinqin ix tniabunn dharma laii siulen qapp hagsip. Vut beddo liauxau, guaw qiongqib sharira, diamw dingx tangx hro qongbingg jiapsuar, qycc iong jxiw-qngx-qimx buah vut ee sxiong. An' hitt sii ixlaii, singsingx-sewser sinkux ciangjai uanbuanw, jxiw-qimx-qngx jurjiap. Jitt xee Jxiw-Qimx-qngx bikiuni dyrr si guaw ee qasiok. Guanw qang sijun huatsimx. Guaw quanknuar sewqanx liogdinn venwcenx, vairhuai, dogdok diyhh ixx kongjig laii siulen bet, jin, dnia, srinx qapp simx jiacc erdangr dirr bersux dag jingxtauu-aw hiacc dew ee siqanx-lai dro quer cingvah qiab Guaw jiauww kanghux ee dharma jniaa juer Arhat. Sewjunx qongw guaw si dhuta vaii derr id :ee.Bibiau ee hxuad kaiqaiw bingqngx, tangx siaubet soxu ee huanlyw. Vuddyy mng quanhe uanbuanw tongdat. Jiauww guaw soxx giamrjingr :ee, hxuad ee in'ui vaii derr id kxamw."
Aniruddha an' jyrui vreh kiw, hiongr Vuddyy ee kax qnialew, suar qra Vuddyy qongw, "Guaw cocox cutqex ee sii, dniardnia dy' air kunr. Zulaii me guaw qapp jingsnix qang lui. Guaw tniax diyc Vuddyy qra guaw me dyrr jurgnow jikvi qaxx decc kaur, cid qangx longxx byy kunr, siangx ganw suar sitbingg. Sewjunx qar guaw siulen logqenr jiauwbingg qimqongx Vajra Samádhi. Guaw benw knikib bagjiux dyrr tangx quanknuar diyc sibhongx. Jingbit jinsit dongrcad liauxzenn, bersux decc quanknuar ciuw-diongx ee quexjiw hiacc bingg. Zulaii inwjingr guaw jniaa juer Arhat. Vuddyy mng quanhe uanbuanw tongdat. Jiauww guaw soxx giamrjingr :ee, huantauu knuar laii cue qinguann, jitt xee vaii derr id."
Kshudrapanthaka an' jyrui vreh kiw, hiongr Vuddyy ee kax qnialew, suar qra Vuddyy qongw, "Guaw qiwdii baiw, hamrban uadliam, be vaxhak. Kixcox duw diyc Vuddyy ee sii, tniax diyc vudhuad laii cutqex. Uadliam Zulaii jit qxur jimgensix, jit-vah qangx lai, e qir did taujingg, be qir did aurviah; aurviah e qir .did, taujingg dyrr be qir .did. Vuddyy kyxlenn guaw gugong, qar guaw diyhh anhann quju, diaujingw cuanxkuir. Guaw sisiongg quancad hokib, an' biser qaur byy .kir. Snix kiw, druar lehh, venrhuar, bet .kir, soxu ee siongr longxx dirr jit diab quw lai. Simx kaikew qaur dua byy jiongwgai ee qingwqair, simrjiww qaur huanly jin druu vniwjniaa Arhat. Dirr Vuddyy jyrui erdew, Vuddyy inwjingr guaw juer mrbenw qycc hagsip :ee. Vuddyy mng quanhe uanbuanw tongdat. Jiauww guaw soxx giamrjingr :ee, dngw laii diaujingw cuanxkuir zip kongsingr, jitt hxang vaii derr id."
Gavampati an' jyrui vreh kiw, hiongr Vuddyy ee kax qnialew, suar qra Vuddyy qongw, "Guaw u kauxgiap. Dirr quewkir qiab u buxban shramana, mrjiacc jit sxer suar jit sxer longxx u naxx guu decc huancauw ee vnerjingr. Zulaii qar guaw itbi cingjing simde jitt hxang huatmngg. Guaw tangx bet simx zip samadhi. Quancad jubi liauxqaiw diyc m si siongwtew iarr m si budjid. Ciauuat sewqanx soxu huanlyw qaidongx u did .diyc. Duiww lai qaixtuad srinx qapp simx, duiww gua qra sewqair vangr hng hng .kir. Lirkuix snax hxang u, bersux jiauw-aw vangr cud lamx. Lirkuix amjamx, siauduu din'aix. Hautganw cingjing, jniaa juer arhat. Zulaii cinsinx inwjingr guaw u dinglimm mrbenw qycc hagsib ee dyrlo. Vuddyy mng quanhe uanbuanw tongdat. Jiauww guaw soxx giamrjingr :ee, huedngw jubi dngw kir qakdix, jitt hxang vaii derr id."
Pilindavatsa an' jyrui vreh kiw, hiongr Vuddyy ee kax qnialew, suar qra Vuddyy qongw, "Guaw co' huatsimx duer Vuddyy siudy, sxor vaiw tniax Zulaii qongw soxu sewqanx lairdew byy jit hxang kuaiwlok ee su. Dirr sniaa-lai qra langg' vunx, simlai decc sniu siulen ee huatmngg. Jit xe byy jimjiog, lo-diongx u dok ee cir suacc kir siongx diyc kax, qui' sinkux tangwtniar. Guaw ee simlai u qakdix, jaix jitt xee tniar jin' qankow. Suizenn qakdix u qamxqag tniar, qycc qakcad diyc cingjing ee simx byy tniar iarr byy tniar ee qamxqag. Guaw qycc susniu, jiauww jitt kuanw, jit xee sinkux suacc u nng xee qamxqag? Sukyw jitt xee liamrtauu byy zuarr quw, srinx qapp simx hutzenqanx kangr .kir. Sxamx-cid zxic-id qangx lairdew, soxu ee huanlyw sriaux jin, jniaa juer arhat. Zulaii cinsinx inwjingr guaw u drat qaur mrbenw qycc hagsip jitt xee qongqyw. Vuddyy mng quanhe uanbuanw tongdat. Jiauww guaw soxx giamrjingr :ee, dngw laii qaur sinkux sunzenn ee qakdix, jitt hxang vaii derr id."
Subhuti an' jyrui vreh kiw, hiongr Vuddyy ee kax qnialew, suar qra Vuddyy qongw, "Guaw an' quxdngg qiab ixlaii, simx dyrr byy jiongwgai. E qir did snix cutsir u naxx Ganges Hyy lairdew ee suax ee sowliong hiacc je vaiw. Cocox dirr buxtaix dyrr jaix kanghux jigjing. Cincniu jitt kuanw simrjiww qaur sibhongx longxx jniaa kanghux, iarr hro jiongwsingx giamrjingr diyc kongsingr. Singsiu Zulaii kexhuad vunxsingr qapp qakdix si jinsit kanghux. Kongsingr uanbuanw bingqngx, jniaa juer arhat. Jidsiqanx jinwzip Zulaii vyxquir bingqngx kongsingr ee haiw, ham' Vuddyy soxx jaix soxx qnir siysiang. Vuddyy inwjingr guaw jyr mrbenw qycc hagsip :ee. Dirr vunxsingr kanghux qaixtuad jitt jann, guaw si busiong jiamr tauu kxamw. Vuddyy mng quanhue uanbuanw tongdat. Jiauww guaw soxx giamrjingr :ee, soxu siongwtew jinwzip byy. Soxu longxx byy, byy longxx jin bet. Huedngw hxuad qruix byy, jitt hxang vaii derr id."
Shariputra an' jyrui vreh kiw, hiongr Vuddyy ee kax qnialew, suar qra Vuddyy qongw, "Guaw an' quxdngg qiab ixlaii, simx qapp qenwsig dyrr cingjing. Cincniu jitt kuanw snix cutsir u naxx Ganges Hyy ee suax ee sowliong hiacc je vaiw, sewqanx qapp cutsewqanx jiongxjiongw venrhuar, jid'err knuar dyrr tongdat, m bad u jiongwgai. Guaw dirr lorsiong duw diyc Kasyapa hniadi sui' xee decc suansuad inenn, liauxgno diyc simx byy qaiwhan, suar duer Vuddyy cutqex. Qenwsig qakdix bingqngx uanbuanw, did diyc dua byy qnia'uir ee qongqyw, jniaa juer arhat, kiarr Vuddyy ee dua derjuw. Guaw an' Vuddyy ee cuir qongw .cud ee dyrliw laii cutsir, duer hxuad laii huawsnix. Vuddyy mng quanhe uanbuanw tongdat. Jiauww guaw soxx giamrjingr :ee, simx qapp qnir huad qngx, qngx qaur qik jaix qenwsig, jitt hxang vaii derr id."
Poxhenn posad an' jyrui vreh kiw, hiongr Vuddyy ee kax qnialew, suar qra Vuddyy qongw, "Guaw jyr Hxuad Ongjuw qinduer Zulaii u Ganges Hyy lairdew ee suax ee sowliong hiacc je sxer. Sibhongx Zulaii qawsi inx u posad-qinx ee derjuw siulen poxhenn dikhing dyrr si duer gua ee miaa laii setlip :ee. Sewjunx, guaw iongrsimx tniax, hunvet jiongwsingx soxu ee qakdix qapp qenwsig. Narr junw dirr Ganges Hyy lairdew ee suax ee qaiwhan guarkauw u jit xui, qidiongx u jit xee jiongwsingx simdiongx kexhuad bingqngx laii siulen poxhenn dihing, guaw e dirr hitt sii jre lak gee ee cnxiu, hunx jyr cingvah xee srinx qaur inx hiax. Dyrr sngr inx ee giabjer jin' cimx, berdangr qir diyc guaw, guaw e dirr amwdiongx qra inx syx tauu, qra inx knuawqor qapp an'uir, hro inx u singjiu. Vuddyy mng quanhe uanbuanw tongdat. Guaw qongw guanvunw kixinx, simx tniax .diyc kexhuad bingqngx, hunvet jurjai, jitt hxang vaii derr id."
SundarÁnanda an' jyrui vreh kiw, hiongr Vuddyy ee kax qnialew, suar qra Vuddyy qongw, "Guaw cocox cutqex duer Vuddyy jinwzip siudy. Suizenn u junsiuw qaiwlut, dirr siulen samadihi ee sii, simx suwsiongg e hongr hongr, be tangx did diyc byy lrau (huanlyw). Sewjunx qar guaw qapp Kaushthia quancad pnirtauu ee vec daimw. Guaw kixcox jimjiog quancad. Qingquer sxamx-cid zxic-id zit, knuar diyc pni-aw lairdew cutzip ee krir naxx enx. Srinx qapp simx lairgua hunbingg, uanbuanw dongrcad jitt xee sewqair, jit siwqer jniaa jyr hukongx cingjing, bersux liulii, enx ee siongwtew jiamrjiam siausid, pni ee kuir jniaa jyr vehsig :ee. Simx kuix, huanlyw jin bet. Soxu cutzip ee kuir huar jyr qongbingg jiywqngx sibhongx sewqair, jurr anne did arhat. Sewjunx anwdnia guaw e did potee ee qongqyw. Vuddyy mng quanhe uanbuanw tongdat. Kuir siausid, quw .laii dyrr did diyc kexhuad bingvik, bingqngx uanbuanw, huanlyw jin bet, guaw zinruii jitt hxang vaii derr id."
Purnamaitreyaniputra an' jyrui vreh kiw, hiongr Vuddyy ee kax qnialew, suar qra Vuddyy qongw, "Guaw an' quxdngg qiab ixlaii, venrvog ee jaidiau byy jiongwgai. Suan'iongg suatbingg kow qapp kangx, tangx cimzip dat qaur jinsit ee siongr. Cincniu jitt kuanw simrjiww qaur Gange Hyy lairdew ee suax ee sowliong hiacc je ee Zulaii viwbit huatmngg iarr jaiqiyh. Guaw dirr jingwlangg-diongx bibiau kaisi, vniwjniaa sniaw dy' m qniax. Sewjunx jaix guaw u venrvog ee jaidiau, iong imsniax dngw huatlunn qar guaw anxjnuaw huat'iongg. Guaw dirr Vuddyy sinvnix vangjo Vuddyy dngw huatlunn. In'ui snia'imx naxx sraix decc qiyr, jniaa jyr arhat. Sewjunx inwjingr guaw juer busiong qangxsuad vudhuad. Vuddyy mng quanhe uanbuanw tongdat. Iong huat'imx hanghok mosinn qapp duiwdik, siaubet soxu huanlyw, guaw zinruii jitt hxang vaii derr id."
Upali an' jyrui vreh kiw, hiongr Vuddyy ee kax qnialew, suar qra Vuddyy qongw, "Guaw cinsinx duer Vuddyy vnuaa quer sniaa cutqex, cinsinx quanknuar Zulaii lak nii laii siurkow inkinn siulen, cinsinx qnir diyc Zulaii hanghok soxu mosinn, jewab guardy, qaixtuad sewqanx sox tam'iok ee huanlyw. Guaw singsiu Vuddyy qawsi siuw qaixlut. Cincniu jitt kuanw simrjiww qaur snax-cingx uigii, ixqip veh-bxan biser giabjer, simsingr giabjer qapp ziaver giabjer, jinrqaix cingjing. Srinx qapp simx jigjing, jniaa jyr arhat. Guaw si Zulaii jiongww sinwdoo lairdew decc qiwlok uiho quiqiw :ee. Vuddyy cinsinx inwjingr guaw ee simx u cisiuw qaiwlut qapp siusinx. Jingwlangg cuiqiw guaw si tauu miaa. Vuddyy mng quanhe uanbuanw tongdat. Guaw sinkux u jipsiuw, sinkux did diyc jujai; suar .lyc simx u jipsiuw, simx did diyc tongdat, liauxau srinx qapp simx itcer tongdat sunrli. Guaw zinruii jitt hxang vaii derr id."
Maha Maudgalyayana an' jyrui vreh kiw, hiongr Vuddyy ee kax qnialew, suar qra Vuddyy qongw, "Guaw dongcox dirr lo nirr juer kitjiac, duw diyc Uruvilva, Gaya, qapp Nadi jitt snax xee Kasyapa hniadi decc suan'iongg qangxsuad Zulaii inenn ywgi. Guaw liammix huatsimx did diyc dua tongdat. Zulaii sur guaw qasex cing dirr sinkux. Taumox cuiwciux jiauu tir driau. Guaw dirr sibhongx iulik, longxx byy quawgai. Sintongx kexhuad bingqngx, virr cuiqiw si busiong, jniaa juer arhat. M na Sewjunx, sibhongx Zulaii iarr janwtanr guaw sintongx ee lat uanbuanw bingqngx cingjing, jurjai byy soxx qnia’uir. Vuddyy mng uanbuanw tongdat. Dngsec zip jigjing, simx huad qngx binghen, cincniu lyy juiw jerdew, quw .laii venr dingcingx qngliang. Guaw zinruii jitt hxang vaii derr id."
Ucchushma dirr Vuddyy binrtaujingg, habjiongw hiongr Vuddyy ee siangx kax qnialew, suar qra Vuddyy qongw, "Guaw dniardnia sniu kiw quxdngg qiab ixjingg ee sxingr si je tam'iok. Hitt sii u cutsir jit xee miaa qiyr juer Kangx Ongg ee Vut. Ix qongw imhing quewdyx vniwjniaa bingw huew jurjib. Ix qar guaw siwqer quancad venww srinx qapp suwqix soxu lingxluanw ee krir. Sinlingg ee qngx dirr lairdew jurjip, qra imhing ee simx huar juer diwhui ee huew. Jurr anne, soxu ee Vut longxx qiyr guaw juer Huew Tauu. Guaw ixx huew-qngx samadhi ee lat jniaa juer arhat. Simx huad dua guan, narr soxu ee Vut singjiu dyrhing, guaw beh juer u lat :ee cinsinx hanghok mosinn qapp duiwdik. Vuddyy mng uanbuanw tongdat. Jimjiog quancad srinx qapp simx ee lingxluanw bongkap, liutongx byy jiongwgai, soxu huanlyw qacc siausid, dyrr snix cud dua vyw huexiam, vreh kiw busiong ee qakdix. Guaw zinruii jitt hxang vaii derr id."
Cisiuw Posad an' jyrui vreh kiw, hiongr Vuddyy ee kax qnialew, suar qra Vuddyy qongw, "Guaw sniu diyc ingxzit, poxtenha ee Qonghuix Zulaii dirr sewqanx cuthen ee sii, guaw si jit xee bikiu. Guaw dniardnia dirr iauwlo, dorjuntauu, iacc cande jiaxee hiamxog ehseh ee soxjai. Narr u kamxket ee lo e honggai iacc sunxhuai bexciax :ee, guaw longxx e qra tun vnii. Ursii jy qiyniuu, ursii pnai suatoo. Jiacnirr qutlat sinkow, qingquer buliong Vut dirr sewqanx cuthen. Narr u jiongwsingx dirr cirdniuu rair langg draur tec mihqnia, guaw e singx kir qra draur tec, kir qaur inx beh qaur ee soxjai. Mihqnia kngr lehh dyrr jauw, be qra qiucuw dapsia. Vipashyin Vut dirr sewqanx cuthen ee sii, sewqanx je qihngx. Guaw ngai langg, bylun hng iacc qin, qandna' cruw jit sxenw jnii. Iacc si u guciax hamr zip lamwtoo, guaw u sinlat, qra inx draur sag cialenw, hro inx an' koxnauw-diongx qaixtuad. Hitt sii qok'ongg sed jaidngr enwsik kuanxtai Vut. Guaw dirr hitt sii siujingw lo laii kuanxtai Vut. Vipashyin Zulaii qra guaw syx tauu suar qra guaw qongw, simde vnijniar, sewqair ee de itcer longxx e vnii. Guaw ee simx jiksii kaigno, knuar qnir sintew biser ee din'aix qapp sidjai sewqair soxu biser din'aix dringw longxx byy cavet. Biser din'air qaqi u vunxsingr, be horsiongx kir bongkap, simrjiww vingkir iarr be kir kab .diyc. Guaw dirr dharma ee vunxsingr lairdew liauxgno diyc kongbuu snix cud zimxnai, jurr anne jniaa juer arhat. Simx dngw laii dnaxx zip posad ee qongqyw, tniax diyc juui Zulaii suanqangw bibiau Lenhuex Vuddyy soxx jaix soxx qnir. Guaw dairsingx did diyc jingwbingg jniaa juer siongrr taujingg :ee. Vuddyy mng quanhe uanbuanw tongdat. Jimjiog quancad sintew qapp qaiwhanr, jitt nng xee siogdinn longxx byy cavet. Guanvunw si Zulaii-jongr, hukongx bongrsiongw huad cud din'aix. Din'aix siausid, diwhui uanbuanw, singjiu busiong dyrhing. Guaw zinrui jitt hxang vaii derr id."
Guehqngx Dongjuw an' jyrui vreh kiw, hiongr Vuddyy ee kax qnialew, suar qra Vuddyy qongw, "Guaw sniu kiw diyc ingxsii naxx Gange Hyy ee suax sowliong hiacc je ee qiab, u miaa qiyr juer Juiw Tnix ee Vut cursir. Ix qar juui posad siulen hagsip quancad juiw laii zip samadhi. Quancad sinkux lairdew, juixsingr be u siy' qec. Kixtauu an' pnirjuiw qapp cuiwnua, jiauww jitt kuanw qaur nuarjnuaa, sniuu, jingjuiw, huicjuiw, qapp dairven siyxven dingxdingw jiaxee, dirr sinkux lairdew ongxhuee decc sec, longxx qapp juixsingr siysiang. Guaw knuar qnir sinkux lairdew ee juiw qapp dirr guarkauw sewqair pudimm ee cuwqingx, ongqiongx, vyxtac, iacc soxu pangkuir ee haixjuiw dringw longxx byy cavet. Guaw dirr hitt sii cocox singjiu jitt xee quancad, qandna' knuar diyc juiw, byy quancad diyc byy sinkux. Hitt jun si bikiu, dirr sxig-lai jersenn. Guaw u jit xee derjuw, an' txangx-gua tamr knuar sxig-lai, qandna' qnir diyc sxig-lai cingjuiw muaw siwqer, byy knuar qnir vadd hxang mic. Ginxaw budix, tec jit liap jiyhtauu kenx duiww juiw-lai, qig juiw u sniax, quanx jingg qor au dyrr jauw .kir. Guaw jersenn cutdnia liauxau, jidsii qamxqag simx tniar, kyxviw Shariputra jysiu qxuiw sionghai qangrkuanw. Guaw qaqi decc sniu, dnaxx guaw ixqingx did diyc arhat ee qongqyw, qapp vni ee inenn li hng hng jiokk quw ar. Anxjnuaw qimzit hutzenn simx e tniar? Guaw qamxx byy tewvo iacc sitcyr? Hitt sii dongjuw liammix laii guaw binrjingg, qongw jinwjingg hitt qnia dairjir. Guaw dyrr qra ix qongw, 'Liw qycc qnir diyc juiw, tangx qra mngg kuix .kuix, zip kir juiw-lai qra jiyhtauu kiyh .kiw .laii.' Dongjuw siurqar. Au .laii guaw jersenn zibdnia ee sii, ix qycc qnir diyc juiw, jiyhtauu qangrkuanw dirr hiax. Ix kuix mngg qra jiyhtauu kiyh .kiw .laii. Guaw au .laii cutdnia, sintew qapp kixcox qangrkuanw. Duw diyc Buliong Vut, simrjiww qaur duw diyc Snuax, Haiw, Jurjai, Tongx Ongg Zulaii, jiacc texcad diyc srinx brongg. Qapp sibhongx qaiwhan soxu pangkuir haixjuiw ee vunxsingr habbyy, jinsit kanghux, byy zi byy cavet. Jitmaw Zulaii sur miaa qiyr guaw juer Sunjinx Ginxaw, cam'uw posad ee hue. Vuddyy mng quanhe uanbuanw tongdat. Juixsingr itbi liutongx, singjiu zimxnai byy snix ee uanbuanw potee. Guaw zinruii jitt hxang vaii derr id."
Liuliqngx Hxuad Ongjuw an' jyrui vreh kiw, hiongr Vuddyy ee kax qnialew, suar qra Vuddyy qongw, "Guaw sniu kiw ingxsii qingquer Ganges Hyy ee suax ee sowliong hiacc je ee qiab, u qiyr juer Buliong Sniax ee Vut cutsir. Ix kaisi posad guandew qakdix ee bibiau bingqngx, quanknuar jitt xee sewqair qapp jiongwsingx ee ziogsinx, longxx si bongrsiongw knikib hongx ee lat decc unrjuanw. Guaw dirr hitt sii quancad sewqair kiarkiw ee xui, quancad sewqair dinxdang ee sii, quancad ziogsinx dinxdang iacc hiycdiam, quancad simx ee liamrtauu dinxdang. Soxu ee dinxdang dna' jit xee ngiu, longxx byy cavet. Guaw jidsii liauxgno jitt din dinxdang ee vunxsingr, byy an' dyc'ui laii, iarr byy ui hyw kir. Sibhongx biser din'aix qapp dendyr ee jiongwsingx vnivnii hibuu cnibongrjong. Cincniu jitt kuanw simrjiww qaur snax-cingx daircenx sewqair lairdew ee soxu jiongwsingx. Kyxviw dirr jit xee kec'aw lairdew drew jnia' vah jiah bangxtangg, ciucciuh luan qiyr. Dirr huncunr ee kongqanx pet sxit qaxqunw. Duw diyc Vut byy zuarr quw, guaw dyrr singjiu byy snisiw hamzimw ee qongqyw. Hitt sii simx kuix, dyrr qnir diyc danghongx Vutdong Vut Qog. Jyr Hxuad Ongjuw, hongrtai sibhongx ee Vut. Srinx qapp simx huatqngx, tetdew dongrcad byy jiongwgai. Vuddyy mng quanhe uanbuanw tongdat. Quancad hongx ee lat byy soxx uaxkyr, liauxgno potesimx, zip samadhi, u hac sibhongx Vut soxx tuann uiid bibiau ee simx. Guaw zinruii jitt hxang vaii derr id."
Hukongx Vyxjongr Posad an' jyrui vreh kiw, hiongr Vuddyy ee kax qnialew, suar qra Vuddyy qongw, "Guaw qapp Zulaii dirr Zindnia Bingqngx Vut hiax did diyc byy vniqair ee srinx. Hitt sii ciuw tec sir dua vyxjux, jiyr qngx sibhongx naxx biser din'aix hiacc je ee vudtah, huawjuer hukongx. Qycc dirr jursimx henxhen dua uanbuanw ee qniar. Hitt lairdew kngr jap jiongw bibiau ee vyxqngx, quanr zip sibhongx hukongx qaiwhan. Soxu ee ongqiongx vyxtah longxx zip laii qniar-lai, zip laii guaw ee sinkux. Sinkux qapp hukongx siysiang, be siy' honggai. Sinkux tangx zip naxx biser din'aix hiacc je ee qoktow, siwqer juer Vut ee dairjir, did diyc dua qinsuii sunrjiongg ee simx. U jitt xee dua sinlat si in'ui guaw jimjiog quancad sir dua byy soxx rix, snix-bet qewww bongrsiongw, ixqipp hukongx dna' jit xee qapp Vut ee qog guanvunw siysiang. Dirr siysiang jitt xee lriw lairdew did diyc byy snisiw hamzimw ee qongqyw. Vuddyy mng quanhe uanbuanw tongwdat. Quancad hukongx byy vniqair, zip samadhi, bibiau ee lat uanbuanw bingqngx. Guaw zinruii jitt hxang vaii derr id."
Maitreya Posad an' jyrui vreh kiw, hiongr Vuddyy ee kax qnialew, suar qra Vuddyy qongw, "Guaw sniu kiw ingxsii qingquer bersux biser din'aix hiacc je sowliong ee qiab, u hy juer Zit Guec Bingg Dingx ee vut cursir. Guaw duer hitt xee vut cutqex, simx iauxx diwdiong sewqanx ee miasniax, hingr qapp bongrjok qauvuee. Hitt sii sewjunx qar guaw siulen hagsiap dna' simx ee iwsig zibdnia laii zip samadhi. Qinglik busor qiab ixlaii, ixx jitt xee samadhi hogsai naxx Ganges Hyy ee suax hiacc je sowliong ee vut, duiqiuu sewqanx miasniax ee simliamrtinghiyh siaubet byy .kir. Qaur qaxx Diamw Dingx Vut dirr sewqanx cuthen, guaw jiacc singjiu busiong bibiau uanbuanw, simx u iwsig ee samadhi. Simrjiww qaur liauxjin kongbuu Zulaii qoktow, cingkir, lacsab, u, iacc byy, jiaxee longxx si guaw venwhuar soxx henxhen. Sewjunx, guaw liauxgno cincniu jitt kuanw si dna' simx iwsig ee enqor. Iwsig ee vunxsingr u bubanrsor ee Zulaii lrauu .cud .laii. Jitmaw did diyc juer inwqir, tangx jiapsuar vow vut ee xui. Vuddyy mng quanhe uanbuanw tongdat. Jimjiog quancad sibhongx dna' iwsig. Simx ee iwsig uanbuanw bingqngx, zip uanbuanw vniwjniaa jinsit. Qapp inai tazinn ixqip qewsngr jipdiok li hng hng, singjiu byy snix-siw qapp hamzimw ee qongqyw. Guaw zinruii jitt hxang vaii derr id."
Dua Sewlik Jniawhuad Ongjuiw qapp ham' ix qang dringw ee go-jap-zi xui posad an' jyrui vreh kiw, hiongr Vuddyy ee kax qnialew, suar qra Vuddyy qongw, "Guaw sniu kiw ingxsii naxx Ganges Hyy ee suax sowliong hiacc je ee qiab, u miaa qiyr juer Bubanrsor Qngx ee vut cursir. Jap-zi xee Zulaii siysuar dirr jit xee qiab cuthen, juewau jit xee miaa qiyr juer Ciauuat Zit Guec Qngx. Hitt xee vut qar guaw liam vut zip samadhi. Piwlun u jit xee langg ee juandiongw si qir dairjir, u jit xee langg ee juandiongw si be qir did dairjir. Jitt nng xee langg bylun u duw .diyc iacc byy, u qnir .diyc iacc byy, nng langg siy' siauwliam, siauwliam u cimx, simrjiww jit sxer quer jit sxer dy' hingngiaw vutli, be siy' uiqec. Sibhongx Zulaii kyxlenn jiongwsingx bersux laurbuw simx bun qniaxzii. Narr qniaxzii jauw byy .kir, qycc sniu u sniaw loring? Qniaw narr simx bun laurbuw cincniu laurbuw simx bun qniaw, buxqniaw jit sxer quer jit sxer longxx be siy' uiqec iacc hunli. Narr jiongwsingx simlai sniu Vut liam Vut, henrjai qapp birlaii vitdnia tangx qnir diyc Vut, li Vut be hng. Mrbenw jiyh sniaw hongven huatmngg dyrr tangx did diyc kaigno. Cincniu decc jyr hniux :ee, sinkux u pangkuir. Jex diyrr qiyr juer pangkuir qongbingg ee jonggiamm. Guaw guanvunw knikib de, ixx liam vut ee simx zip byy snix-siw hamzimw ee qingwqair. Jitmaw dirr jitt xee sewqair, jurjip liam vut ee langg qruix dngw cingjing qoktow. Vuddyy mng quanhe uanbuanw tongdat. Guaw byy sniaw suanxdik. Jurjip lak qinkir, cingjing liamtauu siysuar, did zip samadhi, jitt hxang vaii derr id."