inghionggloinxgenn
inxgenn
Phil Cousineau (Bunchhai huan'ik)
INXGENN -------- Phil Cousineau (jitt vunw ceh juxvenx)
Campbell quxdngg iusniuw dirr sinue haixngiuu, si hagsudsingr/ lingsingr ee tamwqiuu. Tauwquer dairliong knuar ceh/ siaxjog/ siwqer iulamw, ixqibb ham' vunw sewqiw u ingxhiongxlat lamluxsingr sna' qaungua iwqenr, huathen juann sewqair sinue uisanw denxhen cud suxx langg sniu be qaur ee luirsursingr, inwjingr ix jurr hagsingx sidai dyrr qensinr ee sinwliam: jurzenn ee hudsimx kuriuw qinvunw tongxitsingr.
Campbell ciangjai inxiong Inwdo qxow qingdenw <THE VEDAS> ee jitt qxur ue, “jinliw jixu jit xee, singwzinn ixx qokk jiongw miahy cinghox.” jyr ix quandiamw ee juwqaiw. Jonghap ligsuw vutvenr ee jinliw, diamw dyc ix ee snewmia : tauwquer sinue laii tongtaur kyhak-jongqaur/ simlingg-sinkux/ danghongx-sehongx, jniajyr ix jitsiwlangg ee jiwgiap.
Dirr < Cingbin Inghiongg > ee dahuertauu, Campbell qongw “hibang guaw tauwqeur vixqaur laii qaixsueh sinue luirsursingr ee qangjog, e jo ganxjingg byy qaiww juadbang tongxid sewqair ee surgiap, m si ixx Qidokqauwhue/ mow jit xee jingwdi duarqog ee miagi tongxid, si dirr zinlui horsiong lixqaiw ee iwgi-siong tongxid.”
Campbell genxqiur sinue, jongqaur bunhak vixqaur ligsuw honghuad, cue cud luirsursingr, ham' tuantongw hagjiaw qiongdiau cavedsingr, u jin' dua byy qang. Ix siongsinr, dirr byy qang bunhuar cingban cavet sinue lueriongg iwsiong-lai, junjai siytongx ee juxdee/ guanhingg, siongsinr tauwquer dingsinx qaixsueh sinue jit quaw guancox (PRIMORDIAL) iwsiong --- cniurr “inghiongg” “sixbongg/ qyc'uac” “dongluw u srinx” “singlok ji' de”... dringw, erdangr henkuix zinlui simlingg qiongrdongg qinguann, simrjiww hro lanw bingvik, linghunn si jnuaxngiu knuawtai lanw jurqiw.
Sinue si “sinn ee ang'axbin”, tauwquer sinue, lanw erdangr hro jurqiw ham' junjai lenjiab .kiw .laii, sidjai jin' quaiwqii! Campbell anne qongw. Ix siongsinr, lanw venrzin jiaxee iwsiong ee ciausiqansingr (TIMELESSNESS), soxx qamxsiu diyc simlai dua dinxdang, jiokgiac jingwbingg soxu zinlui snewmia dy' si ui' qang jit xee iau'uanw soxjai ee lingsingr qinqix rig laii ee.
Cniurr EINSTEIN jinrlik uirr guarjai sewqair qokk jiongw lingliong qenwlip jit xee “tongxid-lun”, Campbell iwjir uirr lanw qokk jiongw luerjai ee lingliong tuanwlen jit xee tongxid ee lixlun, zinruii, soxui “sinn”, vutqyr si jiaxee zinlui luerjai lingliong ee zinqechuar, si budlixhagqax soxui ee “sidjai ee qetqor jojid (FABRIC OF REALITY)”, Campbell hyrjyr “vyxjiyc ee bangrlo (THE NET OF GEMS)” --- jitt xee laijurr Inwdorlangg uxdiu-lun ee unxhamm, dongsii qycc si Campbell qra sinue/ jongqaur/ kyhak/ gersut ... jingxhap jyr jit xee cingcyw ee iwsiong, zinruii si jiaxee byy qang lingxhik ee laursux soxx jinrlik jyr ee qang jit hxang su, zinlui lingsingwsuw juanvo quewdingg, si qang jit xee hertongw decc jok'iong ciongdong (ARCHETYAL IMPULSES) --- hiaxee si “qang jit siuw uixdai ee quax.”
Campbell si jit xee pywhai gnoxsiong ee hagjiaw/ laursux/ jokqax, soxx qniaa ee lo, ham' ix dirr cingbin sinue soxx huathen ee “dywciuw lo (LEFT-HAND PATHS)”, amr ~ aw qniaa siy'uaw, m quanw si < KENA UPANISHAD> soxx qongw ee “jit diauu naxx lairdybah ee qiyy”, iacc si Vudqaur soxx qongw ee “diongdy”, iacc si singwvuex tuansuad hitt diauu “byy lo” ee ociurnaa. Ix jiauww didqag, dirr tuantongw hagsudqair ixgau, en' diyc jurqiw hagsut “dy (TAO)”, lingrgua kuix cud jit diauu lo, qniaa zip duiww sinue lingsingr/ simlixhagsingr ee quanjiaur, snapy jiongww singwdoo/ SHAMAN dangqix soxx didjiab texgiam ee ciauuat jinsit (TRANCENDENT REALITY), sinviwjuxgirjiaw qongw si uxdiu iwsig (COSMIC CONSCIOUSNESS) ee didjiab diqag, huisiongg jiapqin ham' jiongww sinn cinsinx sna' duw. Hex si jit jiongw kuriuw dirliaulat ee simlingg dongrcad (VISION), ui' huisiongg hunwluan ee viauxbin knuar diyc dedsu, dirr oamr ee hudsimx liac diyc kingxding suiw ee snewmia (LIFE-AFFIRMING BEAUTY). Zuqyw cniurr TENNESSEE WILLIAMS soxx qongw “ ui' vutduan liusid-diongx cniuxduat diyc ingxuanw, hex si zinlui junjai (HUMAN EXISTENCE) ee dua jawpenr.” anne, cniurr Campbell erdangr qinggiam ingxuanw ee langg, dyrr qaix virr hyrjyr penr lanw :ee, si lanw lingsingr dyrsux.
Campbell soxx qniaa :ee, si jit diauu huijingwtongw ee hagsut lorsnuar, jitt diamw --- ix air qunw sngxciyr anne qongw --- hro ix sitkir laijurr qangrvuer hagjiaw ee ingiau tiongxair. Danrsi zinrbad ix ee langg longxx jaix, ix duiww jurqiw dog'iuw ee digjid/ vnuawtangxsaix, si qik jursinr ee, bad anne laii hinghiongg inx laursux Inwdo hagqax HEINRICH ZIMMER “hnuahiw jimr dirr jurqiw genxqiur-diongx”, jex henxzenn marr hah'iong ix jurqiw. Ix qydo ee snewmia/ hagsut zedjingg dairsingx qamxziamw diyc SARAH LAWRENCE Hag'ngi ee hagsingx, aurlaii did diyc jerje gersudqax ee himbo. Ix qra susiongw juanxhuar jyr tamwhiamw, qra diwsig juanxjyr diwhui, qycc hiongr ix ee togjiaw/ tniajiongr henkuix sinue ham' langg ee siongquansingr. Campbell juadduir m si genxqiur iur sapsab ee dejaii, dua sniax hongsinn ee langg, si cniurr Huatqoklangg hiacc iugnaw hyrjyr ANIMATEUR, dyrr si naxx sinn ee kip'inxlat, m na qra jin' hogjap ee hagbun iong jin' uahtiaur ee hongsid siaurqair hro itvnuax tniajiongr, qycc qiywcnew VLADIMIR NABOKOV(1899-1977) soxx qongw ee FRISSON --- langg zinrbad diyc jursinx snewmia ee jinliw soxx inxkiw ee qoxbuw qigdong. Qandna' jitt hxang lew, dyrr hro ix jniajyr lanw jitt xee sidai siongrr sriu qingwair ee laursux ji' id.
Suibongw qar ceh go-jap-gua dxangx, siaw quer zi-jap gua vunw duwjog, Campbell kiokk zinruii, ix ee qongwhenr jixvutqyr si hro langg' jit qix “packuix MUSE lingxhik ee sryw”. Jitt xee byy ngiaw byy hxingg, kiokk si lingqamw/ siongxsiongrlat ee jnuaguann, jixdy jnuaxngiu sokjy lanw ee snewmia. Jiurr jitt diamw, Campbell erdangr qongw si henrdai ywvir tuansiurjiaw (MYSTAGOGUE), inxcua lanw cngtaur ywvir bunvunw, vauquad BEOWULF/ GILGAMESH/ THE TIBETAN BOOK OF THE DEAD/ ILIAD/ ODYSSEY/ ARTHUR tuanqii/ Bixqog INDIAN sinue, Inwdorqaur/ Vudqaur/ Qidokqaur ee singwdenw, simrjiww cniurr J. JOYCE/ THOMAS. MANN/ P. PICASSO ... dringw henrdai sinue qowsingjiaw ee jokpinw. Iong henrdai gixgenn qongw cud jiaxee jonggiamm ee dairjir/ qowsu/ iwsiong sii, qar lanw “zuhyy tak sinue” (cingbin inghiongg ee guanvunw cecmiaa), qra inx knuawjyr siongrdingx/ amwqamm/ vixzu, cniurr tak six hongsid, iong linghunn laii tak inx.
Campbell duliauw u lixqaiw “ unxhamm venwhingg (METAMORPHOSIS)” ee tenhun ixgua, marr iongxiuw qingdenw qywsingwhuar (PERSONALIZED) ee linglik. Tauwquer giamqeh ee hagsut honghuad qapp en' jurr HERMES --- congwjy qaixsuechak (HERMENEUTICS-INVENTIVE), Campbell uirr qoxlyw sinue quanwjur sinx snewmia --- cniurr ALBERT CAMUS(1913-60) soxx qongw, jex si muixx jit dai ee langg rair jyr :ee, danrsi dirr ix jinwjingg, u jitt jiongw linglik ee hagjiaw byy quiw xee. Campbell juewau jit jed kxyr ARTHUR tuanqii ee genxtyxhue-diongx, ix anne tiaujenr: dauwdew lanw si junxvi kir duicue singwvuex? Iacc si lauu dirr hngvox? Dyrr si qongw, si junxvi kir duiqiuu linghunn congwjywsingr tamwhiamw hro jurqiw uac dirr sinue-lai? Iacc si qandna' kakvyw qingjer sing'uac, hro sinue uac dirr simlai dyrr hyw?
Jitt xui zibsinn hixqongg (ECSTATIC) hagjiaw jaiww cuthen, jerje ixqingx dirr kyhak lixsingwsidai byy sniax .kir ee susiongxqax jaiww crur huanxciy cud inx susiongw ee gng'ngiaw. Campbell hnuahiw tecnew ix ee tniajiongr “suxx langg lanbongg :ee, m si duicue quewdingg ee kow, si did diyc hiauxgno sii ee hixqongg.” u sii qycc e voxciongx jit qxur, “snewmia m si danxtai qaixquad ee landee, si decc danxtai sing'uac ee ywvir.”
Danrsi sniu beh drat qaur jitt jiongw qingxqair, zuhyy kyxlingg?. Lanw ui'id erdangr jyr :ee, si m si jixu danxtai ham' gnoxzenn snaduw? Dirr jitt xee “kiwsag sinue (DEMYTHOLOGIZED)” ee sidai, lanw rair jnuaxngiu qra sec dngw laii hro mair dylii sinue ee cuhiongr?
Henrdairlangg qaix zuhyy dirr ixqingx “byy qycc u zibsinn (DIS-ENCHANTMENT)” ee kuanqingw-diongx sing'uac? Campbell u jit xee dog'iuw ee dab, cue cud liw snewmia jinjniar u qoxbuw jok'iong ee qigjingg, duisuii ix, dirr byy lo ee soxjai cue lo hiongr jingg qniaa. Ix soxx iong ee suu si “duiziog liw luersimx didqag ee hixlok”, dng' liw bingkag texgiam diyc “AHA!” sii, dyrr jaix liw jauxjongg dirr ywvir-siong ar.
Campbell vutduan duer ix luersimx didqag ee hixlok byy tingg, loxlik jauxcue sinue, tuansuad/ ginxaxqow/ binqanx qowsu/ bunhak/ six, jiaxee naxx bangrqingw vuerau soxx amwhamm ee hyhaii. Ix siwqer tamwcue, hro langg' sniu kiw sizinn J. KEATS (1795-1821) anne hing'iongg W. SHAKESPEARE “kunn diyc zinlui linghunn sec (CIRCUMNAVIGATION OF THE SOUL)”. Narr qongw S.Freud/ C.JUNG tauwquer cimjann simlixhak ee genxqiur, qra hitt xee virr jap-qauw sewqiw budjitjuxgirjiaw dongwjyr puar ree danwdiau ee linghunn quanliam kiuw dngw laii, anne Campbell/ MIRCEA ELIADE/ C.LEVI-STRAUSS ... dringw jitt puex jongqauwsuxqax/ zinluirhagqax soxx jyr huanr-bunhuar tamwsyh, si hoghingx liauw lanw ixqingx qiongbecc siw .kir ee sinue, hro inx dirr linghunn qowsu/ iwsiong, did diyc dingsinx andah. M quanw hap kiw laii/ iacc si vunkuix knuar, inx dy' cniurr JUNG soxx qenwgi :ee, tauwquer dingsinx venjid qoxdai sinue qowsurbang (STORY-WEB), “bangrsiongxjiaw hro sinue qewsiok hiongr jingg qniaa.”
Campbell tamwcue ee lo, qra cua zip ingxuanw dethak (PERENNIAL PHILOSOPHY) ee lingxhik, jitt xee jongwle ee susiongw, dirr qoxdai Inwdo/ Diongqog dethagqax, SUFI pair/ Qidokqaur ee sinviwjuxgirjiaw, ixqibb cniurr WAIT WHITEMAN(1819-1892)/ ALDOUS HUXLEY(1894-1963) anne ee sizinn/ dethagqax, longxx qnir e diyc, si zinlui linghunn siongrr cimx ee dexjann/ sinsingr sidjer (DIVINE REALITY) ee jit bin qniar: liw dyrr si ix (TAT TVAM ASI), siongrder ee qog jitt sii jitt kig dirr lanw lairbin. Zuqyw lanw erdangr didjiab hiauxgno jurgnow siongrr vunxjid ee ywvir kongqanx, dyrr e sui' bingvik, lanw ham' jurzenlat juanzenn ittew, lanw jurqiw si juanxhuar quewdingg juewau viwbit. Campbell jiacc e qongw “liw si liw itdit siwqer jauxcue, sniu beh jaix ee ywvir.”
Campbell siongsinr, jitt jiongw lingsingr ee quanjiaur, m na si ciauuat siqanx, marr ciauuat derkux. M quanw si duiww SHAMAN dangqix/ qoxdai singwzinn ee diwhui qawsi, iacc si dongdai gersudqax/ kyhagqax congwjyrsingr ee didqag linglik, dy' huaipy qangrkuanw ee junqingr, cniurr jerje ingxuanw dethagqax hitt ngiu, Campbell duiww zinruii jixu jiyxsowlangg jiacc si siongrder suanxbinn ee juxdniux, m na byy zinrdongg, simrjiww qamxqag kyxciyr :ee. Ix zinruii, sinbingg kexsi m si jiyxsowlangg erdangr dogjiamr cuarcaux, si soxu langg qiongriuw :ee, qencii “muixx jit xee binjok dy' si siongrder ee suanxbinn.” muixx jit xee sinbingg dy' si jit xee unxhamm/ jit xee ang'axbin, soxx jixhiongr :ee, si ywvir jiongqik qinqix/ si uxdiu ciauuat lingliong ee vunxguann/ si muixx jit xee langg jursinx ywvir ee vunxguann.
Quiw jap nii laii, busor huaipy siongrr dua zedsingg ee langg, sniu beh ui' Campbell hiax jaix zinsingx jiongqik iwgi si sniaw, juewau ix kiokk iwsig diyc “dng' langg qra liw qongw inx decc jauxcue snewmia iwgi sii, inx sursit-siong si decc cue duiww snewmia cimx cimx ee texgiam.”
Jyr jit xee quansimx snewmia ciaubudjid, huisiongg langg texgiam ee sinuerhagqax/ quanjur henrsiong vuerau jinsit (THING-BEYOND-APPEARANCES) ee isux, hongrhenr itsingx, rue cud jit dniux linghunn luxiuu/ luerjai cimdo ee derdoo, henxsi hitt xee vyxquir derhik si biziok simlingg byy hxuad cngx .quer, rair u qenqiongg simlingg jiacc e ing tihh. Campbell anne tuilun: zuqyw sinue cniurr bang hitt ngiu, si laijurr simlingg siongrr cimx soxjai, lixsow-dongzenn ersaih qra lanw cua dngw kir, laii ee lo si dngw .kir ee lo, si ciauuat soxu sinwgiongw/ suar dinxdang qowiuw quiding ee venqair, jit jiongw jinjniar quanhe diongriaur dairjir ee jauxcue, tonghiongr jinjniar qywtexsingr ee dyrlo, huequix guancox qinggiam (ORIGINAL EXPERIENCE) ee luxdingg, tuanwlen iwsig jursinx ee huanrle (PARADIGM), jongw qongw jit qxur, si inghiongg ee luxdingg:
Inghiongg ui' zidsiongg sing'uac ee sewqair cuthuad, qniaa hiongr jiongxjiongw morhiamw, jinr zip jit xee ciaujurzenn ee sinqii lingxhik: dirr hiax ham' qokk jiongw kaxquair ee lat sna' duw, ngiaa diyc quatdingrsingr ee singwli. Zenau inghiongg ui' sinviwde jah dngw laii jyrhog inx donglui ee ligliong.
”dan'id sinue (MONOMYTH)” si Campbell sinwliam ee hudsimx, ix siongsinr itcer sinue dy' si qang jit xee sinue ee denxhen, jitt xee quanliam dyrr cniurr diongsewqiw dongrbut gugenn sraix-srinx/ ringx-tauu ee quaiwsiur (GRYPHON) qang, m si hud .jit .xe dyrr u :ee, si jit diamw jit diamw dauc ~ aw hingsingg, dngqii jinwhingg congwjyrsingr jonghap ee qetqyw, si Campbell duiww ix soxx giongxbo dairsux ee quanqenr quanliam. Jiaxee dairsux vauquad JOYCE/ THOMAS MANN/ H.ZIMMER/ EVELYN UNDERHILL/ ANANDA K. COOMARASVVAMY/ ORTEGA Y GASSET(1883-1955), “quatsimx jniajyr jurqiw si jit jiongw inghiongg kiwkair (WILL TO BE ONESELF AS HEROISM)”GASSET siaw lyc jitt dnxua jin' u ingxhiongw lat ee bunzi.
Jitt xee “dan'id sinue”, sursit-siong si jit xee META MYTH, si duiww zinlui lingsingwsuw tongxitsingr ee dethak qaixsueh/ qowsu vuerau ee dua qowsu. Jiyh iong Zidvunw qoxdai senjongx qong'anr ee ue laii qongw, si ui' dan'id sinue ee pah pog'aw sniax, qangxsueh poxpenwsingr jurgnow juanxhuar ee tamwqiuu. Inghiongg lo si quanhe jurgnow cimdo tamwsyh ee iongxkir/ si congwjyrsingr qyc'uac ee iwsiong/ si lanw luerjai ingxuanw ee sunkuann/ si jit xee jin' quaiwqii ee huathen : huathen jauxcuerjiaw soxx cue ee ywvir si duicuerjiaw jursinx. Inghiongg ee luxdingg si qra nng xee jin' iauuanw ee quanliam vak jywhuew ee siongrdingx: jit xee qoxjaxlangg duiww lingsingr ee tamwqiuu, qapp jit xee henrdairlangg duiww jurgnow zinrdongg ee tamwqiur. Jitt nng jiongw “sursit-siong si siyqang :ee, inx ee hingjong suibongw cenvenr-banrhuar, lanw jongxsi erdangr dirr inx lairdew cue diyc hitt xee hro langg qniax jit diyy/ ingxqiuw be venr ee qowsu.” Campbell anne qongw.