1 Moses dirr Jordan Hyy-gua, dirr kongwiaw Suf duiwbin ee Alaba, dyrr si dirr Palan, Tofel, Laban, Hazelot, qapp Dizahab ee diongqanx, duiww Islael ee jingwlangg soxx qongw ee ue, qir dirr erdew.
2 Dui' Holeb qingquer Seir Snuax ee lo qaur Kades Barnea, u jap-id zit ee lorjam.
3 Dirr derr sir-jap nii ee Jab'id-guec ceid, Moses jiauww Jehovah itcer soxx bingrling ix :ee, longxx qra Islaellangg qongw.
4 Hitt sii ix ixqing’ pah ngiaa kiarkiw dirr Hesbon ee Amoli Ongg Sihon, qapp kiarkiw dirr Edlei, Astalot ee Basan Ongg Og.
5 Moses dirr Jordan Hyy-gua ee Moab-de, kixtauu tuann jitt xee ludhuad, qongw,
6 "Jehovah, lanw ee Siongrder dirr Holeb huanhur lanw qongxx, 'Linw kiarkiw jitt xee snuax ixqing’ quw lar;
7 Diyhh kixsinx uat dngw qaur Amolilangg ee snuade, qapp qinruaw hiax ee dagg soxjai, dirr Alaba, dirr snuade, dirr vni'ngiuu, dirr lamhngx, enhaiw itdair, Kanaanlangg ee de, qapp Lebanon, qycc qaur duarhyy, dyrr si Viklat Hyy.
8 Dnaxx Guaw ing jitt xee de vailet dirr linw ee binrjingg, linw diyhh zip kir did diyc ix laii juer giap, dyrr si Jehovah duiww linw ee jow Ablaham, Isaac, qapp Jakob jiuwjua beh sniuxsur inx qapp inx ee horer ee de.'
9 Hitt sii guaw qra linw qongw, 'Linw ee jiksingg, guaw qaqi jit xee damdngx be kiw.
10 Jehovah, linw ee Siongrder, hro linw qetnix jerje. Knuar ar, linw qinaxzit cincniu tnidingw ee cnxix hiacc je.
11 Guan Jehovah, linw ledjow ee Siongrder, hro linw viw henrjai qex cingx vxue je, iarr jiauww Ix soxx ingwunw linw :ee suwhog linw.
12 Linw ee dang dnar, linw ee jiksingg, qapp linw ee uanqex, guaw qaqi jit xee taixtyw damdngx e kiw ar?
13 Linw diyhh jiauww dagg jipair, qingw u diwhui, u qenwsig, u bingbong ee langg, guaw setlip inx juer linw ee siuxlingw.'
14 Linw rinr guaw qongxx, 'Liw soxx qongw :ee si hyw, tangx qniaa ix.'
15 Guaw dyrr jiong' linw dagg jipair ee siuxlingw, dyrr si u diwhui, u bingbong ee langg, setlip inx juer siuxlingw, dyrr si cenjongw, vecjongw, gnoxsibhudiongw, sibhudiongw, qapp iuxsix, jiauww linw ee jipair, laii quanxliw linw.
16 Dngsii guaw bingrling linw ee simxpnuawqnuax qongxx, 'Linw dirr linw hniadi diongx simxpnuar, higsi langg qapp ix ee hniadi, iacc si qapp inx diongqanx ee cutguarlangg u sna' qryr, diyhh jiauww qongdy pnuawduanr;
17 Simxpnuar ee sii, m tangx knuar langg ee guarmau, ziok qapp qiongg vnivnii diyhh tniax; m tangx qnia'uir langg, in'ui simxpnuar sriok dirr Siongrder; linw yh qaixquad ee su, hro ix qaur guaw jiax, guaw dyrr pnuawduanr ix.'
18 Hitt sii guaw jiong' linw soxx ingqaix qniaa ee su longxx bingrling linw.
19 Lanw jiauww Jehovah, lanw ee Siongrder soxx bingrling lanw :ee, dui' Holeb kixsinx, qingquer linw soxx knuar qnir hitt xee dua qycc tangx qniax ee kongwiaw, duiww Amolilangg ee snuade ee lo; lanw dyrr qaur Kades Barnea.
20 Guaw duiww linw qongw, 'Linw ixqing’ qaur Jehovah, Amolilangg ee snuade.
21 Knuar ar, Jehovah, linw ee Siongrder, Ix ixqing’ jiong' hitt xee de vailet dirr linw ee binrjingg. Linw diyhh jiauww Jehovah, linw ee ledjow ee Siongrder soxx duiww linw qongw :ee jnriu .kir, laii did diyc ix juer giap; byc did lunw.'
22 Hitt sii linw longxx jiurqin guaw, qongw, 'Lanw diyhh crex langg dairsingx kir, qra lanw taux knuar hitt xee de, huehog lanw, knuar lanw diyhh dui' simxmih lo jnriu .kir, simxmih sniaa zip .kir.'
23 Jex ue guaw knuar juer hyw. Guaw dyrr dui' linw diongqanx qingw jap-zi langg, muixx jipair jit langg;
24 Inx dyrr uat dngw srinx jnriu snuade .kir, qaur Eskol ee snuaqog qra taux knuar.
25 Inx ciuw nirr tec hitt soxjai ee quexjiw, duar laii qaur lanw hiax, huehog lanw qongxx, 'Jehovah, lanw ee Siongrder, soxx sniuxsur lanw :ee, si hyw ee toxde.'
26 Danrsi linw m kingw jnriu .kir, vue Jehovah, linw ee Siongrder ee bingrling;
27 Qycc dirr linw ee vowvnii lai ai'uanr qongxx, 'In'ui Jehovah uanwhun lanw, soxiw cua lanw cud Egipt-de, beh jiong' lanw qaux dirr Amolilangg ee ciuw, jaubet lanw.
28 Lanw beh jnriu kir dyclyc ar? Lanw ee hniadi hro lanw sitjir, qongw hiax ee vecsnir viw lanw kacc dua kacc lyr, sniaa kuacdua qycc qenqor, quann qaur duw tnix; qycc guanw dirr hiax knuar qnir Anac-jok ee langg.'
29 Guaw dyrr duiww linw qongw, 'Byc did lunw, byc did qniax inx.
30 Qniaa dirr linw ee binrjingg ee Jehovah, linw ee Siongrder, beh ter linw qaujenr, cincniu Ix dirr Egipt uirdiyhh linw laii qniaa dirr linw bagjiux jingg itcer ee su;
31 Qycc cincniu Ix qniaa dirr kongwiaw, dirr hiax linw knuar qnir Jehovah, linw ee Siongrder dirr linw itcer soxx qniaa ee lo u jnaixngiu riang liw, cincniu langg riang ix ee qniaw jidngiu, qaur linw qaur dirr jitt xee soxjai.'
32 Danrsi linw dirr jitt xee su m sinr Jehovah, linw ee Siongrder.
33 Ix dirr lo nirr, dirr linw ee taujingg decc qniaa, qra linw cue anx ngiaa ee soxjai; mii .sii ing huew, zit .sii ing hunn, jixsi linw soxx diyhh qniaa ee lo.
34 Jehovah tniax qnir jiaxee ue ee sniax, dyrr siurkir, jiuwjua qongxx,
35 'Jitt xee pnaiw sewdai ee langg, quatduanr byy jit xee e knuar qnir Guaw jiuwjua sniuxsur linw ledjow ee hyw de;
36 Jixu Jefunneh ee qniaw Kaleb beh did diyc knuar .qnir; qycc Guaw beh ing ix soxx dac .diyc ee de sniuxsur ix qapp ix ee qniaxsunx; in'ui ix juansimx duer Jehovah.'
37 Jehovah uirdiyhh linw ee enqor iarr siurkir guaw, qongw, 'Liw iarr be did diyc zip hitt xee soxjai;
38 Qinsuii liw :ee, Nun ee qniaw Josua, ix beh zip kir hiax; liw diyhh iongxjongr ix ee simjir, in'ui ix beh hro Islaellangg singjiab hitt xee soxjai;
39 Qycc linw ee ginxaw, dyrr si linw soxx qongw beh siurr liac :ee, qapp qinaxzit linw hiaxee berhiauw hyxpnaiw ee qniaxzii, beh zip kir hiax;
40 Guaw beh jiong' hitt soxjai hro inx, inx beh did diyc juer giap. Lun qaur linw, linw diyhh uat dywdngw kixsinx, dui' Angg Haiw ee lo kir kongwiaw.'
41 Hitt sii linw rinr guaw qongxx, 'Guanw dikjue Jehovah; dnaxx guanw beh jiauww Jehovah, guanw ee Siongrder itcer soxx bingrling :ee, jnriu kir qaujenr.' Dui' hitt diap linw dagg langg duar qunkir, suiven jnriu kir snuade.
42 Jehovah qra guaw qongw, 'Liw diyhh qra inx qongw, m tangx jnriu .kir, iarr m tangx qaujenr; in'ui Guaw byy dirr linw diongqanx, qniax linw e taii sux duiwdik.'
43 Guaw dyrr qra linw qongw. Danrsi linw m tniatanr, vuergik Jehovah ee bingrling, jurjuanx jnriu kir snuade.
44 Diamr dirr Snuax nirr ee Amolilangg dyrr cud laii qongqig linw, cincniu pxangx duiqnuaw linw jidvnuax, dirr Seir taii ngiaa linw, didqaur Hormah.
45 Linw dyrr dywdngw .laii, dirr Jehovah ee binrjingg tikaur. Danrsi Jehovah m tniax linw ee sniax, iarr m ngar hnirkangx ngr linw.
46 Linw dyrr diamr dirr Kades jerje zit, jiauww linw diamr dirr hiax ee zit.
2 Jitt diap liauxau, lanw uat dywdngw kixsinx, dui' Angg Haiw ee lo kir kongwiaw; si jiauww Jehovah soxx duiww guaw qongw :ee; lanw sec Seir Snuax jerje zit.
2 Jehovah huanhur guaw qongxx,
3 'Linw sec jitt xee snuax quw lar; diyhh uat dngw ngr vaksir kir.
4 Liw diyhh huanhur vecsnir qongxx, Esau ee qniaxsunx, linw ee hniadi diamr dirr Seir, linw beh qingquer inx ee qingxqair, inx beh qniax linw; soxiw linw diyhh vutjiw qinxsin,
5 M tangx qapp inx jingjenr inx ee de, dyrr narr jit kaziac'ui, Guaw longxx byy hro linw, in'ui Guw ixqing’ jiong' Seir Snuax hro Esau juer giap.
6 Linw diyhh ing ginn dui' inx brew bixniuu laii jiac, iarr diyhh ing ginn dui' inx brew juiw laii limx.'
7 Jehovah, linw ee Siongrder, dirr linw ee ciuw soxx juer itcer ee qangx, suwhog linw; linw dirr jitt xee dua ee kongwiaw decc qniaa, Ix longxx jaix. Jitt sir-jap nii, Jehovah, linw ee Siongrder qapp linw dilehh, linw longxx byy kiamwkueh jit hxang.
8 Dui' anxnix, lanw lirkuix lanw ee hniadi Esau ee qniaxsunx, kiarkiw dirr Seir :ee; dui' Alaba ee lo qingquer Elat, Eziongeber.
9 Lanw dyrr uat dngw qingquer Moab ee kongwiaw ee lo kir. Jehovah duiww guaw qongw, 'M tangx qiauxziauw Moablangg; iarr m tangx qapp inx qaujenr; inx ee de, Guaw longxx byy beh hro liw juer giap; in'ui Guaw ixqing’ jiong' Ar hro Lot ee qniaxsunx juer giap.'
10 (Jaxjingg u Emimlangg kiarkiw dirr hiax, vecsnir je, dua qycc lyr, cicniu Anakimlangg jidngiu.
11 Inx iarr hro langg sngr inx juer Rlefaimlangg, cincniu Anakimlangg jidngiu; danrsi Moablangg cxingx ix juer Emimlangg.
12 Jaxjingg Holilangg iarr kiarkiw dirr Seir. Esau ee qniaxsunx suawjiab ix; inx dirr inx ee binrjingg jaubet inx, laii druar dirr inx ee soxjai, cincniu Islael dirr Jehovah sniuxsur inx juer giap ee de soxx qniaa :ee.)
13 Dnaxx linw diyhh kiw laii quer Zeled Kex.
14 Dui' lanw lirkuix Kades Barnea, qaur quer Zeled Kex ee zit, qiong snax-jap-veh nii; qaur hitt dai ee buxsu longxx sixbyy dirr qun'ngiaa diongx, jiauww Jehovah duiww inx soxx jiuwjua :ee.
15 Qycc Jehovah ee ciuw qongqig inx, dui' qun'ngiaa diongx jaubet inx, qaur inx longxx sixbyy.
16 Buxsu dui' vecsnir diongx longxx jaubet sixbyy ixau,
17 Jehovah huanhur guaw qongxx,
18 'Liw qinaxzit diyhh dui' Moab ee qingxqair Ar qingquer;
19 Qniaa qin Ammonlangg ee duiwbin, m tangx qiauxziauw inx, iarr m tangx qapp inx jingjenr. Ammonlangg ee de Guaw byy hro linw juer giap, Guaw ixqing’ sniuxsur Lot ee qniaxsunx juer giap.'
20 (Hitt xee de, Rlefaimlangg diamr dirr hiax, Ammonlangg cxingx inx juer Zamzummim.
21 Hiaxee vecsnir je, dua qycc lyr, cincniu Anakimlangg jidngiu. Danrsi Jehovah dirr Ammonlangg ee binrjingg jaubet inx, inx dyrr did diyc inx ee de, suawjiab kiarkiw;
22 Cincniu Ix uirr Esau ee qniaxsunx, kiarkiw dirr Seir :ee, bet Holilangg dirr inx ee binrjingg, inx dyrr suawjiab kiarkiw inx ee de qaur qinaxzit.
23 Qycc u Avimlangg kiarkiw dirr hniusia, suar qaur Gaza :ee; dui' Kleta cud .laii ee Kletalangg bet inx, laii kiarkiw dirr inx ee xui.)
24 Jehovah huanhur qongxx, 'Dnaxx linw diyhh kiw .laii, kixsinx quer Arnon ee snuaqog. Knuar ar, Guaw ixqing’ jiong' Amolilangg Hesbon Ongg Sihon, qapp ix ee de, qaux dirr liw ee ciuxtauu; liw diyhh kixciuw did diyc ix ee de, kir qapp ix qaujenr.
25 Dui' qinaxzit kiw, Guaw beh hro tnie banrvecsnir tniax qnir linw ee miasniax :ee, qniax linw, lunw linw; qycc in'ui liw gniauhgniauc cuah, tongwkow.'
26 Guaw dyrr dui' Kedemot ee kongwiaw, crex suwjiaw kir qnir Hesbon Ongg Sihon, ing hyvingg ee ue qongw,
27 'Qriuu liw iong'unw guaw dui' liw ee de qingquer; guaw beh qniaa dua lo, byy penx jyw, byy penx iu.
28 Liw tec guaw ee ginn, bre bixniuu hro guaw jiac, tec guaw ee ginn, ing juiw bre guaw limx; dogdok jrunw guaw vorqniaa quer .kir,
29 Cincniu diamr dirr Seir ee Esau ee qniaxsunx, qapp diamr dirr Ar ee Moablangg kuanxtai guaw jidngiu, tingwhau guanw quer Jordan Hyy, zip Jehovah guanw ee Siongrder soxx sniuxsur guanw ee de.'
30 Danrsi Hesbon Ongg Sihon m kingw hro lanw dui' ix hiax qingquer, in'ui Jehovah, liw ee Siongrder hro ix ee singwjingg qowjib, simx gni, uirdiyhh beh jiong' ix qauhur dirr liw ee ciuw; cincniu qinaxzit jidngiu.
31 Jehovah qra guaw qongw, 'Knuar ar, dui' jitt diap kiw, Guaw beh jiong' Sihon qapp ix ee de, qauhur dirr liw ee binrjingg; liw dnaxx diyhh did diyc ix ee de juer giap.'
32 Hitt sii Sihon qapp ix ee jiongww vecsnir cud laii dixdik lanw, qaujenr dirr Jahaz.
33 Jehovah, lanw ee Siongrder jiong' ix qauhur lanw; lanw dyrr pah siw ix, qapp ix ee qniaw, ixqip ix ee jiongww vecsnir.
34 Dng' hitt sii lanw cruw ix longxjongw ee sniaa, jaubet u langg kiarkiw ee sniaa, lenrr hurzinlangg qapp ginxaw, byy lauu jit xee;
35 Dogdok jingsnix qapp soxx cniuw dagg xee sniaa ee jongbut, longxx cruw laii juer qaqi ee loring.
36 Dui' Arnon ee snuaqog vnix ee Aloer, ixqip snuaqog diongx ee sniaa, qaur dirr Gilead, byy jit xee sniaa qenqor, hro lanw cruw ix byy diyc; in'ui Jehovah, lanw ee Siongrder longxx qauhur lanw;
37 Jixu Ammonlangg ee de, Jabbok Hyy-vnix ee de, qapp snuade jiaxee sniaa, qapp Jehovah, lanw ee Siongrder soxx qimr lanw kir ee de, longxx byy uaw qin ix.
3 Lanw dyrr uat dngw srinx jnriu Basan ee lo kir; Basan ongg qapp ix ee jiongww vecsnir longxx cud laii dixdik lanw, dyrr dirr Edlei qaujenr.
2 Jehovah qra guaw qongw, 'Byc did qniax ix, in'ui Guaw ixqing’ jiong' ix qapp ix ee jiongww vecsnir, qapp ix ee de, longxx qaux dirr liw ee ciuw; liw diyhh kuanxtai ix cincniu kuanxtai diamr dirr Hesbon ee Amoli Ongg Sihon jidngiu.'
3 Dui' hitt diap, Jehovah, lanw ee Siongrder iarr jiong' Basan Ongg Og, qapp ix ee jiongww vecsnir, longxx qaux dirr lanw ee ciuw; lanw dyrr pah siw inx, byy lauu jit xee.
4 Hitt sii lanw cruw ix soxu ee sniaa, byy jit xee sniaa byy hro lanw cruw ix, qiong lak-jap xee sniaa; jex si Argob ee juanqingw, dyrr si Og ee qog dirr Basan :ee.
5 Jiaxee longxx si qenqor ee sniaa, u quann ee cniuu, u mngg, u qxongg; jiaxee ixgua iauxx u jerje byy sniacniuu ee votauu.
6 Lanw itjin bet inx, cincniu jingg kuanxtai Hesbon Ongg Sihon jidngiu, bet u langg kiarkiw ee sniaa, lenrr hurzinlangg qapp ginxaw;
7 Dogdok itcer ee jingsnix, qapp sniaa-diongx ee jongbut, lanw longxx cruw laii juer qaqi ee loring.
8 Hitt sii lanw dui' Jordan hitt vingg, nng xee Amoli Ongg ee ciuw, cniuw ix ee de, dui' Arnon ee snuaqog qaur Hermon Snuax.
9 (Jitt xee Hermon, Sidonlangg cxingx ix juer Silion; Amolilangg cxingx ix juer Senir.)
10 Lanw cniuw vni'ngiuu dagg xee sniaa, Gilead juann de, Basan juann de, didqaur Salekah qapp Edlei, longxx si Basan Ongg Og qog-lai ee sniaa.
11 (Rlefaimlangg soxx lauu :ee, jixu cunx Basan Ongg Og. Knuar ar, ix e bincngg si tih ee bincngg, dngg qauw dxng, kuah sir dxng, longxx si ing langg ee dxng juewvan; henrjai qamxx m si dirr Ammonlangg ee Rlabbah mah?)
12 Hitt sii lanw did diyc jitt xee de; dui' Arnon ee snuaqog vnix ee Aloer kiw, ixqip Gilead snuade ee jidvnuar, qapp qidiongx ee sniaa, guaw longxx hro Rleubenlangg qapp Gadlangg;
13 Gilead qi'uu ee de, qapp Basan juann de, Og ee qog, guaw hro Manasseh ee vnuar jipair; Argob juann de, Basan juann de, jex qiyr juer Rlefaimlangg ee de.
14 Manasseh ee qniaw Jair jiamr Argob juanqingw, didqaur Gesurlangg qapp Maakahlangg ee qauqair; dyrr jiauww qaqi ee miaa cxingx Basan-de juer Hovot Jair, qaur qinaxzit.
15 Guaw qycc jiong' Gilead hro Maqir.
16 Dui' Gilead qaur Arnon ee snuaqog, ing snuaqog juer qaiwsnuar, didqaur Ammonlangg qauqair ee Jabbok Hyy, guaw jiong' jex hro Rleubenlangg, qapp Gadlangg;
17 Qycc jiong' Alaba, qapp uaw qin Jordan Hyy ee de, dui' Galilee didqaur Alaba ee haiw, dyrr si Iamm Haiw, ixqip Pisgah snuax-kax dangvnix ee de, longxx hro inx.
18 Hitt sii guaw huanhur linw qongxx, 'Jehovah, linw ee Siongrder ixqing’ jiong' jitt xee de hro linw juer giap, linw diongqanx e qaujenr :ee, longxx diyhh duar qunkir, dirr linw ee hniadi Islaellangg ee binrjingg quer .kir.
19 Danrsi linw ee bow, linw ee ginxaw, linw ee jingsnix, (guaw jaix linw ee jingsnix jin' je) tangx diamr dirr guaw soxx hro linw :ee dagg xee sniaa,
20 Qaur Jehovah sniuxsur ving'anx hro linw ee hniadi, cincniu ixqing’ sniuxsur linw jidngiu; qycc inx iarr did diyc Jehovah, linw ee Siongrder, ing Jordan hitt vingg ee de sniuxsur inx, zen'au linw dagg langg tangx dyr laii guaw sniuxsur linw juer giap ee de.'
21 Hitt sii guaw huanhur Josua qongxx, 'Liw cinbak knuar qnir Jehovah, liw ee Siongrder duiww jitt nng xee ongg soxx qniaa itcer ee su, Jehovah iarr beh duiww linw soxx beh quer .kir ee dagg qog anxnix qniaa.
22 Linw byc did qniax inx; in'ui ter linw qaujenr :ee, si Jehovah, linw ee Siongrder.'
23 Hitt sii guaw kunxqiuu Jehovah qongxx,
24 "Jruw Jehovah ar, Liw ixqing’ kixtauu henxcud Liw ee dua uigiamm, qapp Liw ee dua kuiwlat dirr Liw ee lovok, in'ui dirr tnix nirr, dirr de nirr, iauxx u simxmih siongrder e qniaa cincniu Liw soxx qniaa :ee, qycc cincniu Liw ee dua quanlingg ar?
25 Qriuu Liw iong'unw guaw quer .kir, knuar Jordan Hyy hitt vingg suiw ee de, hitt xee suiw ee snuade, qapp Lebanon.'
26 Danrsi Jehovah in'ui linw ee enqor, siurkir guaw, m tniax guaw. Jehovah duiww guaw qongw, 'Anxnix liw qraur gxiac lar, liw byc did qycc duiww Guaw tee kiw jitt xee su.
27 Liw diyhh jnriu Pisgah ee snuax-dingw, giahbak ngr saix, ngr vag, ngr lamm, ngr dangx, cinbak knuar; in'ui liw quatduanr be e quer jitt xee Jordan Hyy.
28 Danrsi liw diyhh huanhur Josua, hro ix jongwdnaw qenqor; in'ui ix beh dirr jitt xee vecsnir ee binrjingg quer .kir, singjiab liw soxx beh knuar .qnir ee de.'
29 Dui' anxnix lanw diamr dirr Betpeor duiwbin ee snuaqog diongx.
4 Islael ar, dnaxx guaw soxx qawsi linw ee ludle huatdo, linw diyhh tniax laii juntanr, tangx hro linw uac lehh, zip .kir, laii did diyc Jehovah, linw ee ledjow ee Siongrder soxx sniuxsur linw ee de.
2 Guaw soxx bingrling linw ee ue, linw m tangx qetnix, iarr m tangx qiamxjiyw ix; tangx hro linw jipsiuw Jehovah, linw Siongrder ee bingrling, dyrr si guaw soxx bingrling linw :ee.
3 Jehovah in'ui Baal Peor ee su soxx qniaa :ee, linw cinbak knuar .qnir; in'ui qniwnarr tranr Baal Peor ee langg, Jehovah, linw ee Siongrder longxx dui' linw diongqanx dubet inx.
4 Dogdok linw qapp Jehovah, linw ee Siongrder qetlenn :ee, qinaxzit longxx uac lehh.
5 Knuar ar, guaw iarr bad ing ludle qapp huatdo qawsi linw, jiauww Jehovah, guaw ee Siongrder soxx bingrling guaw :ee, hro linw juntanr dirr linw soxx beh zip kir singjiab ee de.
6 Soxiw linw diyhh jipsiuw laii qniaa ix; jex dyrr si linw ee diwhui cangmiaa dirr ledqog ee binrjingg. Inx jid'err tniax qnir jex itcer ee ludle, beh qongw, 'Jitt xee dua qog jinjniar si u diwhui cangmiaa ee vecsnir.'
7 Dyclyc jit xee dua qog u siongrder qapp ix cinqin, cincniu Jehovah, lanw ee Siongrder, dirr lanw qniwnarr qiuqiyr Ix ee sii, qapp lanw cinqin ar?
8 Qycc u simxmih dua qog u ludle qapp huatdo cincniu guaw qinaxzit dirr linw ee binrjingg soxx tuann itcer ee ludhuad hiacnirr qonggi ar?
9 Soxiw diyhh qaqi qinxsin, iarr diyhh qinxsin siuw linw ee simx, benw did linw be qir did cinbak soxx knuar .qnir ee su; qycc benw did jiaxee su dirr linw uac lehh ee sii lirkuix linw ee simx; iarr diyhh ing jitt xee qawsi linw hiaxee qniaw, hiaxee sunx.
10 Liw dirr Holeb Snuax kia dirr Jehovah, linw ee Siongrder ee binrjingg, hitt zit Jehovah duiww guaw qongw, 'Liw qra Guaw jiyjip vecsnir, Guaw beh hro inx tniax qnir Guaw ee ue, hro inx uac dirr sewqanx ee zit, tangx hagsip qingwuir Guaw; qycc tangx qawsi inx ee qniaxzii.'
11 Hitt sii linw qinruaw, kia dirr snuax-kax, snuax nirr u huexiam cringr qaur tnidingw, iarr u badhunn o.-oamr-a.
12 Jehovah dui' huexiam diongx qra linw qongxue; linw tniax qnir qongxue ee sniax, byy knuar qnir simxmih sxiong; jixu sniax nardnia.
13 Ix jiong' soxx bingrling linw diyhh siuw ee iog jixsi linw, dyrr si jabdiauqair; iarr qra siaw dirr nng xee jiyhvix.
14 Hitt sii Jehovah qycc bingrling guaw, jiong' ludle huatdo qawsi linw, hro linw dirr soxx beh quer .kir, laii did diyc juer giap ee de juntanr laii qniaa ix.
15 Soxiw linw diyhh digvet qaqi qinxsin, in'ui Jehovah dirr Holeb Snuax dui' huew-diongx qra linw qongxue hitt zit, linw byy knuar qnir simxmih hingsiong;
16 Qniax linw vairhuai qaqi, uirr qaqi diaukig gnoxsiong, hongw simxmih hingjong, bylun si lxamm,
17 Iacc si luw ee hiongjong; iacc si derjniu jauxsiur ee sxiong; iacc si kongdiongx vuejiauw ee sxiong;
18 Iacc si derjniu decc syy ee mic ee sxiong; iacc si de-xe juiw-diongx hilui ee sxiong.
19 Qycc qniax linw giagbak ngr tnix knuar Jehovah, linw ee Siongrder soxx hunpair hro tnie banrqog ee zit, guec, cnxix, dyrr si tnidingw ee banrsiong, linw dyrr siurr inxiuw, qingwvair hogsai inx.
20 Danrsi Jehovah duar linw cud Egipt, tuatli jur tih ee loo, beh juer Ix qaqi sanxgiap ee vecsnir, cincniu qinaxzit ee kuanw.
21 Jehovah qycc in'ui linw ee enqor siurkir guaw, jiuwjua m hro guaw quer Jordan Hyy, iarr m hro guaw zip Jehovah, linw ee Siongrder soxx sniuxsur linw juer giap ee suiw de.
22 Guaw diyhh siw dirr jitt xee de, be e quer Jordan Hyy. Danrsi linw beh quer .kir, laii did diyc hitt xee hyw ee de.
23 Linw diyhh qaqi qinxsin, qniax linw be qir did Jehovah, linw ee Siongrder qapp linw soxx lip ee iog, uirr qaqi diaukig gnoxsiong hongxhud simxmih mic, dyrr si Jehovah, linw ee Siongrder qimr linw :ee.
24 In'ui Jehovah, linw ee Siongrder dyrr si zet zet ee huew, quatduanr m iong'unw u vadd xee siongrder.
25 Au .laii linw quw quw kiarkiw dirr hitt xee de snix qniaw, tuann sunx, dyrr diaukig gnoxsiong, hongw simxmih mic ee sxiong, pacpnaiw linw ee simsut, qniaa Jehovah, linw ee Siongrder bagjiux diongx knuar juer pnaiw ee su, ziaw Ix siurkir;
26 Guaw dyrr qinaxzit qiyr tnix qiyr de laii qanjingr, linw beh dirr quer Jordan Hyy did diyc juer giap ee de qinw qinw bet qaur jin. Linw ee zidjiw be e dirr hitt soxjai did diyc quxdngg, beh itjin dubet.
27 Jehovah beh hro linw siwsnuar dirr ledvangx; dirr Jehovah soxx cua linw qaur hiaxee qog, linw cunx ee langgiac jiyw jiyw.
28 Dirr hiax linw beh hogsai langg ee ciuw soxx jy ee siongrder, dyrr si caa :ee, jiyc :ee, be e knuar .qnir, be e tniax, be e jiac, be e pni :ee.
29 Danrsi linw dirr hiax narr beh cue Jehovah, linw ee Siongrder, narr ing jinrsimx jinrsingr cue Ix, dyrr beh duw .diyc.
30 Zid'au linw duw diyc koxlan, soxx qongw jiaxee su limqaur linw, linw beh qui'ngr Jehovah, linw ee Siongrder, laii tniax Ix ee sniax;
31 In'ui Jehovah, linw ee Siongrder si linbinw ee Siongrder, Ix byy beh vangwsag linw, byy beh jaubet linw, iarr byy be qir did Ix qapp linw ee ledjow soxx jiuwjua ee iog.
32 Cir mng quewsinx ee sii, dyrr si linw ixjingg ee sii, dui' Siongrder congwjy langg dirr sewqanx hitt zit ixlaii, dui' tnix ee jitt vnix qaur tnix ee hitt vnix, u cincniu hitt hy ee dua su mah?
33 Bad tniax qnir u anxnix mah? Bad u simxmih vecsnir tniax qnir Siongrder dui' huew-diongx qongxue ee sniax, cincniu linw tniax .qnir .ee, iarr iauxx e uac lehh mah?
34 Iacc si bad u simxmih siongrder cir anxnix juer, ing ciwlen, sinziah, qrii su, qaujenr, dua quanlingg ee ciuw, crunx cud ee ciuxqud, qapp dua tangx qniax ee su, uirr qaqi dui' vadd qog diongx cruw jit qog, cincniu Jehovah, linw ee Siongrder, dirr Egipt, dirr linw ee bagjiux jingg, uirr linw soxx qniaa itcer ee su ar?
35 Ing jex henxhen dirr linw, hro linw jaix Jehovah Ix si Siongrder, Ix ixgua byy u vadd xee.
36 Ix dui' tnix hro liw tniax qnir Ix ee sniax, uirdiyhh beh qawsi linw, qycc dirr derbinrjniu hro liw knuar qnir Ix ee dua huew, qycc linw tniax qnir Ix ee ue dui' huew-diongx cud.
37 In'ui Ix tniar linw ee ledjow, soxiw qingxsuanw inx ee horer, ing dua quanlingg cinsinx duar linw cud Egipt,
38 Beh dui' linw ee binrjingg qnuaw cud viw linw kacc dua kacc bingw ee qokbinn, beh cua linw zip .kir, ing inx ee de sniuxsur linw juer giap, cincniu qinaxzit jidngiu.
39 Soxiw qinaxzit linw diyhh jaix, simx iarr diyhh sniu, tnidingw dere jixu Jehovah, Ix si Siongrder, ixgua byy vadd xee.
40 Soxiw linw diyhh siuw Ix ee ludle qaiwbing, dyrr si guaw qinaxzit soxx bingrling linw, hro linw qapp linw ee horer tangx did diyc hokkir, qycc qetnix linw ee zidjiw quxdngg dirr Jehovah, linw ee Siongrder, soxx sniursur linw ee de qaur ingxuanw."
41 Hitt sii Moses dirr Jordan gua, ngr zit cud ee soxjai hunvet snax xee sniaa,
42 Hro taii siw langg ee langg, dyrr si vingsor byy qet'uanr, cywgo taii siw ix ee cuwvnix :ee, tangx dyjauw kir hiax. Ixqing’ jauw zip jiaxee sniaa ee jit xee, dyrr did diyc uac;
43 Dyrr si kongwiaw vni'ngiuu ee Bezer, uirdiyhh Rleubenlangg sed :ee; Gilead ee Rlamot, uirdiyhh Gadlangg sed :ee; Basan ee Golan, uirdiyhh Manassehlangg sed :ee.
44 Jitt xee si Moses dirr Islaellangg ee binrjingg soxx vailet ee ludhuad;
45 Jiaxee si Moses dirr Islaellangg cud Egipt liauxau, soxx tuann hro inx ee jingwqir, ludle, huatdo.
46 Dirr Jordan Hyy-gua, Betpeor duiwbin ee snuaqog diongx, dirr Hesbon kiarkiw ee Amoli Ongg Sihon ee de, dyrr si Moses qapp Islaellangg cud Egipt liauxau soxx pah :ee.
47 Inx did diyc ix ee de, qapp Basan Ongg Og ee de, dyrr si nng xee Amoli ee ongg, dirr Jordan gua, ngr zit cud ee soxjai;
48 Dui' Arnon snuaqog vnix ee Aloer, didqaur Selion Snuax, dyrr si Hermon Snuax;
49 Ixqip Jordan gua, dangsir Alaba ee juann de, didqaur Alaba ee haiw, uaw qin Pisgah ee snuax-kax.
5 Moses qiyr Islael jingwlangg, duiww inx qongw, "Islael ar, linw diyhh tniax guaw qinaxzit soxx tuann hro linw tniax ee ludle huatdo, hro linw tangx hagsip, jipsiuw laii qniaa inx.
2 Jehovah, lanw ee Siongrder dirr Holeb qapp lanw lip iog.
3 Jehovah byy qapp lanw ee ledjow lip jitt xee iog, si qapp lanw jiaxee, dyrr si qapp lanw qinaxzit itcer uac dirr jiax ee langg lip :ee.
4 Jehovah dirr snuax-dingw, dui' huew-diongx bin duiww bin, qapp linw qongxue.
5 (Hitt sii guaw kia dirr Jehovah qapp linw ee diongqanx, beh jiong' Jehovah ee ue tuann hro linw, in'ui linw uirdiyhh hitt xee huew laii qniax, byy jnriu snuax.)
6 Jruw qongw, 'Guaw si Jehovah, liw ee Siongrder, bad cua liw dui' Egipt-de, dui' juer lojaii ee qrex cud .laii .ee.
7 Guaw ixgua liw m tangx u vadd xee siongrder.
8 M tangx uirr qaqi diaukig gnoxsiong, vutlun tnidingw, dere, qapp dere juiw-lai soxu ee mic, longxx m tangx jrngx inx ee sxiong; m tangx quirvair inx,
9 Iarr m tangx hogsai inx; in'ui Guaw Jehovah, liw ee Siongrder, duanwduanr m iong'unw ing vadd xee siongrdr pitpuer Guaw. Uanwhun Guaw :ee, Guaw quiqiu ix ee jue; dui' ve qaur qniaw, qaur snax~sir dai;
10 Tniar Guaw, siuw Guaw qaiwbing :ee, Guaw six xunx hro ix, didqaur cingdai.
11 M tangx lamrsamw cxingx Jehovah, liw Siongrder ee miaa; in'ui lamrsamw cxingx Ix ee miaa :ee, Jehovah dikkag byy liac ix juer byy jue.
12 Diyhh siuw Anhiyczit, liac ix juer sxingr, jiauww Jehovah, liw ee Siongrder soxx bingrling liw :ee;
13 Lak zit lai diyhh diyhbuaa juer liw itcer ee qangx;
14 Dogdok derr cid zit, dyrr si ngr Jehovah, liw ee Siongrder laii siuw ee anhiyh. Jitt zit, liw qapp liw ee qniaw, jaboxqniaw, lovok, luxvi, guu, luu, jingsnix, ixqip diamr dirr liw diongqanx ee cutguarlangg, itcer ee qangx longxx m tangx juer; hro liw ee lovok, luxvi, tangx cincniu liw anhiyh.
15 Liw iarr diyhh qir did liw jingg dirr Egipt-de juer lovok, Jehovah, liw ee Siongrder ing dua quanlingg ee ciuw, crunx .cud .laii ee ciuxqud, cua liw dui' hiax cud .laii; in'ui anxnix, Jehovah, liw ee Siongrder bingrling liw siuw Anhiyczit.
16 Diyhh hauwqingr liw ee laurve, liw ee laurbuw, jiauww Jehovah, liw ee Siongrder soxx bingrling liw :ee, hro liw dirr Jehovah, liw ee Siongrder soxx sniuxsur liw ee derhngx, zidjiw quxdngg, laii hiongxsiu hokkir.
17 M tangx taii siw langg.
18 Iarr m tangx qniaa qan'imm.
19 Iarr m tangx tautec.
20 Iarr m tangx juer qew ee qanjingr, hamrhai liw ee cuwvnix.
21 Iarr m tangx tamx liw ee cuwvnix ee bow; iarr m tangx tamx liw ee cuwvnix ee cur, qapp ix ee canhngg, ix ee lovok, ix ee luxvi, ix ee guu, ix ee luu, qapp liw ee cuwvnix itcer soxu :ee.'
22 Jiaxee ue si Jehovah dirr snuax-dingw dui' huew-diongx, hunn-diongx, oamr diongx, dua sniax huanhur linw juann hue :ee; iarr byy qycc qetnix. Ix iarr qra siaw dirr nng der jiyhvix, qaudair guaw.
23 Hitt diap huexiam siyx dirr snuax nirr, linw tniax qnir hitt xee dui' oamr diongx cud .laii ee sniax, linw ee jipair longxjongw ee siuxlingw, qapp linw ee dniuxlyw laii jiurqin guaw.
24 Linw qongw, 'Knuar ar, Jehovah, lanw ee Siongrder henxbingg Ix ee ingqngx, qapp Ix ee jiww dua, hro guanw knuar; guanw qycc tniax qnir Ix ee snia'imx dui' huew-diongx cud; qinaxzit guanw iarr jaix Siongrder qapp langg qongxue, langg iauxx e uac.
25 Dnaxx guanw mihsaiw diyhh siw ar? In'ui jitt xee dua huew beh siybet guanw; guanw narr qycc tniax qnir Jehovah, lanw Siongrder ee sniax, dyrr e siw.
26 In'ui qniww u ziogtew :ee, jirjui cincniu guanw tniax qnir ingxuac Siongrder dui' huew-diongx qongxue ee sniax, iauxx e uac lehh ar?
27 Liw diyhh jinwjingg kir, tniax Jehovah, lanw ee Siongrder soxx beh qongw itcer ee ue, jiong' Jehovah soxx duiww liw qongw itcer ee ue, liw diyhh duiww guanw qongw; guanw beh tniax, iarr beh qniaa ix.'
28 Linw duiww guaw qongxue, Jehovah tniax qnir linw qongxue ee sniax, Jehovah duiww guaw qongw, 'Guaw u tniax qnir jitt xee vecsnir qongxue ee sniax, dyrr si inx soxx duiww liw qongw :ee; inx soxx qongw ee ue longxx hyw.
29 Guan inx jrunn jitt hy simx, laii qingwuir Guaw, siongsiongg siuw Guaw itcer ee qaiwbing, hro inx qapp inx ee qniaxsunx ingxuanw did diyc hokkir.
30 Liw kir qra inx qongw, linw jueww linw dyr kir inx ee vowvnii.
31 Lun qaur liw, liw diyhh kia dirr Guaw jiax, Guaw beh jiong' liw soxx diyhh qawsi inx itcer ee qaiwbing, ludle, huatdo, qra liw qongw, hro inx dirr Guaw soxx sniuxsur inx juer giap ee de qniaa ix.'
32 Soxiw linw diyhh jiauww Jehovah, linw ee Siongrder soxx bingrling linw :ee, diyhh jipsiuw laii qniaa ix; m tangx penx dirr jyw, penx dirr iu.
33 Jehovah, linw ee Siongrder soxx bingrling linw ee lo, linw uac lehh, did diyc hokkir; iarr hro linw ee zidjiw, dirr linw soxx beh singjiab ee de, did diyc quxdngg.
6 Jex si Jehovah, linw ee Siongrder soxx bingrling qawsi linw ee qaiwbing, ludle, huatdo, hro linw dirr linw soxx beh quer kir did diyc juer giap ee de laii qniaa ix;
2 Tangx hro linw qapp linw ee qniaxqniaw sunsunx, itsingx qingwuir Jehovah, linw ee Siongrder, jipsiuw Ix itcer ee ludle, qaiwbing, dyrr si guaw soxx bingrling linw :ee, hro linw ee zidjiw did diyc quxdngg.
3 Islaellangg ar, linw diyhh tniax, diyhh jipsiuw laii qniaa ix; hro linw tangx dirr hitt xee lrauu linx qapp bit ee de, did diyc hiongxhog, langgiac qetnix qigqii je; cincniu Jehovah, linw ledjow ee Siongrder soxx ingwunw linw :ee.
4 Islaellangg ar, linw diyhh tniax, Jehovah, lanw ee Siongrder, si dog'id ee Jehovah,
5 Linw diyhh jinrsimx, jinrsingr, jinrlat, tniax Jehovah, linw ee Siongrder.
6 Guaw qinaxzit soxx bingrling linw jiaxee ue, diyhh qir dirr linw ee simx;
7 Iarr diyhh ing jex kinn kinn qawsi linw ee qniaxzii, bylun linw jre dirr cur-lai, qniaa dirr lo nirr, kunr iacc si kiw .laii, longxx diyhh qangxlun;
8 Iarr diyhh vak dirr linw ee ciuw juer qiwhy, dir dirr linw nng luiw bagjiux ee diong'ngx juer qiwliam;
9 Qycc diyhh siaw dirr linw ee cur ee mngkia, ixqip linw ee mngg.
10 Jehovah, linw ee Siongrder cua linw zip Ix dui' linw ee ledjow, Ablaham, Isaac, Jakob, jiuwjua beh hro linw ee de; dirr hiax u sniaa dua qycc suiw, m si linw soxx kixjy :ee;
11 Iarr u cur jikju muaw muaw ee hyw mic, m si linw soxx jikju :ee; iarr u kuix ven ee juixjnew, m si linw soxx kuix :ee;
12 Iarr u pudyhngg, qnanaxciu, m si linw soxx jaijingr :ee. Liw jiac qaur vaw, hitt sii linw diyhh qinxsin, benw did linw be qir did Jehovah, dyrr si cua linw dui' Egipt-de, juer lojaii ee qrex cud .laii .ee.
13 Linw diyhh qingwuir Jehovah, linw ee Siongrder, hogsai Ix, qiw Ix ee miaa jiuwjua;
14 M tangx tranr vadd xee siongrder, dyrr si linw siwuii ee vecsnir hiaxee siongrder.
15 In'ui dirr linw diongqanx ee Jehovah, linw ee Siongrder, duanwduanr byy iong'unw ing vadd xee siongrder pitpuer Ix; si qniax Jehovah, linw ee Siongrder e dua siurkir liw, dui' derjniu dubet linw.
16 Linw m tangx cir Jehovah, linw ee Siongrder, cincniu linw dirr Massah cir Ix jidngiu.
17 Diyhh diwir siuw Jehovah, linw Siongrder ee qaiwbing, qapp Ix soxx bingrling linw ee jingwqir, ludle.
18 Jehovah soxx knuar juer jingwdit, juer hyw :ee, linw diyhh qniaa ix, hro linw tangx hiongxhog, qycc tangx zip kir did diyc Jehovah duiww linw ee ledjow soxx jiuwjua ee hyw de;
19 Beh dui' linw ee binrjingg qnuaw cud linw longxjongw ee duiwdik, jiauww Jehovah soxx qongw :ee.
20 Jionglaii linw ee qniaw mng linw qongxx, 'Jehovah, lanw ee Siongrder soxx bingrling linw jiaxee jingwqir, ludle, huatdo, si simxmih iwsu ar?'
21 Linw diyhh qra linw ee qniaw qongw, 'Jingg guanw dirr Egipt juer Falaoh ee lojaii, Jehovah ing dua quanlingg ee ciuw, cua guanw cud Egipt.
22 Jehovah dirr guanw ee bagjiux jingg, ing dua qycc lirhai ee sinziah, qrii su, qniaa dirr Egipt qapp Falaoh, ixqip ix ee juann qrex;
23 Dui' hiax cua guanw cud .laii, beh cua guanw zip .kir, jiong' Ix duiww lanw ledjow soxx jiuwjua ee de sniuxsur lanw.
24 Jehovah bingrling lanw qniaa jiaxee itcer ee ludle, laii qingwuir Jehovah, lanw ee Siongrder, hro lanw siongsiongg did diyc hokkir, did diyc Ix vyxjuann lanw ee sniwmia, cincniu qinaxzit ee kuanw.
25 Lanw narr jiauww Jehovah, lanw ee Siongrder soxx bingrling :ee, dirr Ix ee binrjingg jiauww Ix itcer ee qaiwbing laii qniaa, jex dyrr si lanw ee gi.'
7 Jehovah, linw ee Siongrder cua linw zip linw soxx beh kir did .diyc ee de, dui' linw ee binrjingg qnuaw cud jerje vangqog, dyrr si Hitlangg, Girgaslangg, Amolilangg, Kanaanlangg, Pelizlangg, Hivilangg, qapp Jebuslangg, qiong cid jok, longxx viw linw kacc dua kacc bingw.
2 Jehovah, linw ee Siongrder jiong' inx qauhur linw, hro linw pah ngiaa ix, hitt sii linw diyhh itjin bet inx, m tangx qapp inx lip iog, iarr m tangx linbinw inx;
3 M tangx qapp inx qetcinx, linw ee jaboxqniaw m tangx qer hro inx ee qniaw, iarr m tangx qra linw ee qniaw crua inx ee jaboxqniaw.
4 In'ui inx beh hro linw ee qniaw uat dngw byy duer Guaw, kir hogsai vadd xee siongrder; drir qaur Jehovah dua siurkir linw, qinw qinw bet linw.
5 Danrsi linw diyhh anxnix kuanxtai inx. Tiachuir inx ee jewdnuaa, pacuir inx diaukig ee tiau, cyr inx ee Aselah, ing huew siyx inx soxx jrngx ee gnoxsiong.
6 In'ui linw juer singwqed ee vecsnir, qruix dirr Jehovah, linw ee Siongrder. Jehovah, linw ee Siongrder dui' derjniu banrvecsnir diongx qingw linw, digvet juer Ix qaqi ee vecsnir.
7 Jehovah tniar linw, qingw linw, m si in'ui linw ee langgiac viw vadd qog kacc je, si in'ui linw ee langgiac si banrqog diongx derr id jiyw :ee;
8 Si in'ui Jehovah tniar linw, qycc in'ui beh qniaa Ix duiww linw ledjow soxx jiuwjua :ee, Jehovah jiacc ing dua quanlingg ee ciuw cua linw cud .laii, dui' juer lojaii ee qrex qiuwsiok linw, tuatli Egipt Ongg Falaoh ee ciuw.
9 Soxiw linw diyhh jaix Jehovah, linw ee Siongrder, Ix si Siongrder, si sinwsit ee Siongrder, uirdiyhh tniar Ix, siuw Ix qaiwbing ee langg, qniaa Ix ee iog qapp ju'air, didqaur cingdai.
10 Qniwnarr uanwhun Ix ee langg, Ix beh dngbin vywingr laii bet inx; uanwhun Ix ee langg, Ix beh dngbin vywingr ix, byy beh encenn.
11 Soxiw linw diyhh jipsiuw guaw qinaxzit soxx bingrling linw ee qaiwbing, ludle, huatdo, laii qniaa ix.
12 Au .laii linw narr tniax jiaxee huatdo, jipsiuw laii qniaa ix, Jehovah, linw ee Siongrder in'ui anxnix beh qra linw qniaa Ix duiww linw ee ledjow soxx jiuwjua ee iog qapp ju'air.
13 Ix beh tniar linw, suwhog linw, hro linw hing'ong; iarr beh dirr Ix duiww linw ee ledjow jiuwjua sniuxsur linw ee de, suwhog linw ee txex soxx snix :ee, linw ee de soxx cud :ee, qapp linw ee gnoxqog, linw ee jiuw, linw ee iuu, ixqip linw ee guu-aw, qapp linw ee ngiu'axqniaw.
14 Linw beh did diyc suwhog ngiaa quer banrvecsnir; linw diongqanx ee lamluw byy jit xee be sing'iongw; linw diongqanx ee jingsnix byy jit jiah be snitnuar.
15 Jehovah beh hro itcer ee vnirjingr lirkuix linw; linw soxx jaix Egipt dagg ngiu ee pnaiw jingwtauu, Ix byy hro linw duw diyc jit hxang; si beh hro itcer uanwhun linw ee langg duw .diyc.
16 Jehovah, linw ee Siongrder soxx beh qauhur linw ee vecsnir, linw diyhh longxx bet inx; linw ee bagjiux m tangx kyxlinn inx, linw iarr m tangx hogsai inx ee siongrder; in'ui jex beh juer hai linw ee lybang.
17 Linw narr simlai sniu qongxx, 'Jiaxee qog viw guaw kacc dua, guaw taixtyw e qnuaxdiok inx ar?'
18 Liw mrbenw qniax inx; dikkag diyhh qir did Jehovah, linw ee Siongrder ngr Falaoh qapp Egipt juann de soxx qniaa ee su;
19 Dyrr si linw cinbak knuar .qnir ee dua ciwlen, sinziah, qrii su, qapp dua quanlingg ee ciuw, qapp crunx .cud .laii ee ciuxqud, longxx si Jehovah, linw ee Siongrder soxx ing laii cua linw cud :ee; Jehovah, linw ee Siongrder iarr beh anxnix qniaa dirr linw soxx qniax itcer ee vecsnir.
20 Qycc Jehovah, linw ee Siongrder beh crex dua jiah pxangx, vuex qaur inx diongqanx, didqaur inx soxx crunx laii siamxbih :ee, bet dirr linw ee binrjingg.
21 Linw mrbenw qniax inx; in'ui Jehovah, linw ee Siongrder si dua qycc tangx qniax ee Siongrder, dirr linw diongqanx.
22 Jehovah, linw ee Siongrder beh dirr linw ee binrjingg jiamrjiam dubet jiaxee qog; linw m tangx qinw qinw bet ix qaur jin, qniax iaxsiur qetnix jerje laii hai linw.
23 Jehovah, linw ee Siongrder beh jiong' inx qauhur linw, hro inx dua qniax ziauxluan, didqaur inx bedbyy;
24 Qycc beh ing inx hiaxee ongg qaux dirr linw ee ciuw, linw beh dubet inx ee miaa dirr tnie; dikkag byy jit langg e kia dirr linw ee binrjingg, didqaur linw bedbyy inx.
25 Inx soxx diaukig inx ee siongrder ee sxiong, linw diyhh ing huew siyx ix; ix ee sinjniu ee qimginn, linw m tangx tamx, iarr m tangx tec ix juer qaqi :ee; qniax linw e uirr jitt xee ham lyc lybang; in'ui jex si Jehovah, linw ee Siongrder soxx iamwngor :ee.
26 Qniwnarr tangx iamwngor ee mic, linw m tangx duar zip linw ee cur, qniax linw iarr jniaa juer tangx jiuwjua :ee, qapp hiaxee mic jidngiu; linw diyhh qigqii tongwhun, qigqii iamwngor; in'ui si tangx jiuwjow :ee.
8 Guaw qinaxzit soxx bingrling linw itcer ee qaiwbing, linw diyhh jipsiuw laii qniaa ix, hro linw tangx uac, langgiac qetnix jerje, tangx zip kir did diyc Jehovah duiww linw ee ledjow soxx jiuwjua ingwunw ee de.
2 Linw iarr diyhh qir did Jehovah, linw ee Siongrder jitt sir-jap nii cua linw dirr kongwiaw ee lo, si beh hro linw kiamvix laii ciwgiam linw, beh jaix linw ee simlai jnaixngiu, kingw siuw Ix ee qaiwbing iacc byy.
3 Ix hro linw kiamvix, hro linw iaugy, ing linw soxx m bad, linw ee ledjow iarr m bad ee manna ngiuxci linw, hro linw jaix langg m si qandna’ uaxkyr vniaw laii uac, langg si uaxkyr Jehovah ee cuir soxx qongw itcer ee ue laii uac.
4 Jitt sir-jap nii linw ee snakor byy puar, linw ee kax iarr byy pongwpa.
5 Linw ee simx diyhh jaix, Jehovah, linw ee Siongrder qauwdog linw, cincniu langg qauwdog ix ee qniaw jidngiu;
6 Qycc linw diyhh jipsiuw Jehovah, linw ee Siongrder ee qaiwbing, laii qniaa Ix e dyrlo, laii qingwuir Ix.
7 In'ui Jehovah, linw ee Siongrder cua linw zip hitt xee suiw ee de. Hitt xee de u kex, u juixjnuaa, u cim'enx, dui' snuaqog qapp snuax lrauu .cud .laii;
8 Si cud siyxbec, duarbec, pudyciu, buhuaqyxciu, siahliuciu ee de, iarr cud qnanaxciu qapp bit ee de.
9 Linw dirr hitt soxjai jiac mic ciongjiog, dirr hiax linw iarr byy kiamr jit hxang, hitt soxjai ee jiyhtauu si tih, dirr ix ee snuax tangx qrut dangg;
10 Linw beh jiac qaur vaw, dyrr uirdiyhh Ix soxx sniuxsur linw ee suiw de, laii ylyw Jehovah, linw ee Siongrder.
11 Linw diyhh qinxsin, benw did linw be qir did Jehovah, linw ee Siongrder, byy siuw Ix ee qaiwbing, huatdo, ludle, dyrr si guaw qinaxzit soxx bingrling linw :ee;
12 Qniax linw ixqing’ jiac vaw, ixqing’ kiw suiw ee cur laii kiarkiw;
13 Linw ee guu, ngiuu qetnix, linw ee qimginn qetnix, linw soxu :ee logxx qetnix,
14 Hitt sii linw ee simx jurqyx, be qir did Jehovah, linw ee Siongrder, dyrr si cua linw dui' Egipt-de, juer lojaii ee qrex, cud .laii .ee.
15 Ix cua linw qingquer hitt xee dua qycc tangx qniax ee kongwiaw, hiax u huexjuaa, get'axtangg, dasyr byy juiw ee de. Ix bad uirdiyhh linw hro juiw dui' ding ee jiyhvnuaa lrauu .cud .laii.
16 Qycc dirr kongwiaw, ing linw ee ledjow soxx m bad ee manna ngiuxci linw, si beh hro linw kiamvix, ciwgiam linw, hro linw qaur buew did diyc hokkir;
17 Qniax linw simlai sniu qongxx, 'Did diyc jitt xee dua ee qigiap si dui' guaw ee kuiwlat, guaw ee ciuw ee linglik.'
18 Danrsi linw diyhh qir did Jehovah, linw ee Siongrder; in'ui linw did diyc dua qigiap ee kuiwlat, si Ix hro linw, beh jniaa Ix soxx dui' linw ee ledjow jiuwjua ee iog, cincniu qinaxzit ee kuanw.
19 Jionglaii linw narr be qir did Jehovah, linw ee Siongrder, tranr vadd xee siongrder laii hogsai ix, qingwvair ix, guaw qinaxzit giamgiamm qingxqair linw, linw dikkag bedbyy.
20 Jehovah dirr linw ee binrjingg soxx bedbyy hiaxee qog, linw iarr beh anxnix bedbyy; in'ui linw m tniatanr Jehovah, linw ee Siongrder ee ue.
9 Islaellangg ar, diyhh tniax. Linw qinaxzit beh quer Jordan, zip kir singjiab hiaxee viw linw kacc dua, kacc bingw ee qog, did diyc kuacdua qycc duw tnix ee sniaa.
2 Hitt xee vecsnir, dua qycc lyr, si Anac ee jok, linw soxx jaix :ee, iarr bad tniax qnir u langg qiw inx qongxx, 'Jirjui dirr Anac-jok ee binrjingg kia e diauu ar?'
3 Qinaxzit linw diyhh jaix, Jehovah, linw ee Siongrder juer liw ee taujingg quer .kir, cincniu zet zet ee huew; Ix beh bedbyy inx, hro inx dua dua taii sux dirr linw ee binrjingg. Linw diyhh qnuaw inx cud, hro inx qinw qinw bedbyy, jiauww Jehovah soxx duiww linw qongw :ee.
4 Jehovah, linw ee Siongrder, dui' linw ee binrjingg qnuaw cud inx liauxau, linw simlai m tangx sniu qongxx, 'Jehovah cua guaw zip laii singjiab jitt xee de si in'ui guaw ee gi'; qisit Jehovah si uirdiyhh hiaxee qog ee pnaiw, jiacc dui' liw ee binrjingg qnuaw inx cud.
5 Linw zip kir singjiab inx ee de, vingrr m si in'ui linw ee gi, iarr m si in'ui linw ee simx jingwdit; si in'ui jiaxee qog ee pnaiw, Jehovah, linw ee Siongrder jiacc dui' linw ee binrjingg qnuaw inx cud .kir; qycc in'ui Jehovah beh qenqor Ix duiww linw ee ledjow Ablaham, Isaac, Jakob, soxx jiuwjua ee ue.
6 Linw diyhh jaix, Jehovah, linw ee Siongrder ing suiw ee de sniuxsur linw juer giap, m si in'ui linw ee gi, si in'ui linw si amrqunw gni ee vecsnir.
7 Linw diyhh qir .did, m tangx be qir .did, linw dirr kongwiaw ziaw diyc Jehovah, linw ee Siongrder ee siurkir; qaur linw laii qaur jitt xee soxjai, linw siongsiongg vuergik Jehovah.
8 Linw dirr Holeb Snuax qycc ziaw Jehovah siurkir, drir qaur Ix siurkir linw, beh bedbyy linw.
9 Dngsii guaw jnriu snuax, beh niaxsiu jiyhvix, dyrr si Jehovah qapp linw lip iog ee vxix. Hitt sii guaw diamr dirr snuax nirr sir-jap zit sir-jap mii, byy jiac vniaw, byy limx juiw.
10 Jehovah ing nng der jiyhvix qaudair guaw, si Siongrder ing jngxtauu-aw siaw :ee. Hitt dingxbin soxx siaw :ee, si jiauww Jehovah dirr duarhue ee zit, dirr snuax-dingw, dirr huew-diongx, duiww linw soxx qongw itcer ee ue.
11 Sir-jap zit sir-jap mii liauxau, Jehovah ing hitt nng der jiyhvix, dyrr si iokvix, qaudair guaw.
12 Jehovah duiww guaw qongw, 'Liw kiw .laii, qinw qinw dui' jiax lyc .kir; in'ui liw ee vecsnir, liw dui' Egipt cua .cud .laii .ee, ixqing’ vairhuai qaqi; inx kuair kuair pen'uaix Guaw soxx bingrling ee lo, in'ui inx uirr qaqi jur jit senx gnoxsiong.'
13 Jehovah qycc huanhur guaw qongxx, 'Guaw knuar jitt xee vecsnir, knuar ar, si amrqunw gni ee vecsnir.
14 Liw cutjai Guaw, Guaw beh bet inx, dui' tnie catbet inx ee miaa; Guaw beh hro liw jniaa juer jit qog, viw inx kacc qiongg kacc dua.'
15 Guaw dyrr uat dngw srinx lyc snuax, snuax hro huew siyx dyc, nng der iokvix dirr guaw nng qix ciuw nirr.
16 Guaw jid'err knuar, linw ixqing’ dikjue Jehovah, linw ee Siongrder, uirr qaqi jur jit jiah guu-aw, qinw qinw uaicuac Jehovah soxx bingrling linw ee lo.
17 Guaw ing hitt nng der vxix dui' guaw ee siangciuw hed .lyc .kir, pacjic dirr linw ee bagjiux jingg.
18 Guaw pag dirr Jehovah ee binrjingg, cincniu jingg ee kuanw, sir-jap zit sir-jap mii, byy jiac vniaw, byy limx juiw; in'ui linw soxx huan itcer ee jue, qniaa Jehovah knuar juer pnaiw ee su, ziaw Ix siurkir.
19 Hitt sii Jehovah dua m qamguan, siurkir linw, guaw dyrr jin' qniax, in'ui Ix siurkir beh bet linw; danrsi hitt vaiw Jehovah qycc tniax guaw.
20 Jehovah iarr siurkir Aalon, beh bet ix, siangg hitt sii guaw iarr ter Aalon qidyw.
21 Hitt sii guaw qra linw huanrjue ee mic, dyrr si linw soxx jur ee guu-aw, ing huew siyx ix, qycc duii ix, gingw qaur iur iur, iur qaur cincniu tohunw. Guaw ing jitt xee tohunw ia dirr dui' snuax-dingw lrauu .lyc .laii ee kex.
22 Linw iarr dirr Tabelah, dirr Massah, dirr Kiblot Hattaavah, qycc qig kiw Jehovah ee siurkir.
23 Jehovah crex linw lirkuix Kades Barnea, qongw, 'Linw jnriu kir singjiab Guaw soxx sniuxsur linw ee de.' Hitt sii linw uivue Jehovah, linw Siongrder ee bingrling, m sinr Ix, iarr m tniax Ix ee ue.
24 Dui' guaw bad linw ee zit, linw siongsiongg vuergik Jehovah.
25 Guaw in'ui Jehovah qongw beh bet linw, dyrr pag dirr Jehovah ee binrjingg, pag lehh sir-jap zit sir-jap mii.
26 Guaw qidyw Jehovah qongxx, 'Jruw Jehovah ar, qriuu Liw ee sanxgiap, dyrr si Liw ing dua kuiwlat sioghuee :ee, ing dua quanlingg ee ciuw cua cud Egipt :ee;
27 Qriuu Liw diyhh qir did Liw ee lovok Ablaham, Isaac, Jakob, byc did qiwliam jitt xee vecsnir ee gnirsimx qapp inx ee pnaiw, inx ee jue;
28 Qniax Liw cua guanw cud laii hitt soxjai ee langg qongw: Jehovah in'ui be e cua inx zip Ix soxx ingwunw inx ee de, qycc uanwhun inx, soxiw cua inx cud .kir, beh bet inx dirr kongwiaw.
29 Mrquxx inx si Liw ee vecsnir, Liw ee sanxgiap, si Liw ing Liw ee dua quanlingg, ing Liw crunx .cud .laii ee ciuw, soxx cua .cud .laii .ee.'
10 Hitt sii Jehovah qra guaw qongw, 'Liw diyhh pah nng der jiyhvix, cincniu jingg ee kuanw, jnriu snuax laii Guaw jiax; qycc diyhh juer jit xee caa ee qxui.
2 Liw jingg soxx pacjic hiaxee vxix, hitt dingxbin ee ue, Guaw beh siaw dirr jiaxee vxix ee dingxbin; liw diyhh he inx dirr qxui-lai.'
3 Guaw dyrr ing jyrqiapcaa juer jit xee qxui, qycc pah nng der jiyhvix cincniu jingg ee kuanw. Guaw cinciuw tec jitt nng der vxix jnriu snuax.
4 Jehovah jiong' Ix dirr duarhue ee zit, dirr snuax-dingw, dui' huew-diongx qra liw qongw ee jabqair, jiauww jingg soxx siaw ee kuanw, siaw dirr hiaxee vxix nirr; Jehovah dyrr jiong' hiaxee qaudair guaw.
5 Guaw uat dngw srinx lyc snuax, jiong' hiaxee vxix he dirr guaw soxx juer ee qxui, jiauww Jehovah ee bingrling; qaur dnaxx iauxx dirr hiax.
6 (Islaellangg dui' Beelot Bene Jaakan kixsinx, qaur Moselah. Aalon siw dirr hiax, dyrr baijongr dirr hiax; ix ee qniaw Eleazar suawjiab ix damdngx jewsix ee jithun.
7 Inx dui' hiax kixsinx, qaur Gudgodah, qycc dui' Gudgodah qaur Jotbatah, dyrr si u kejuiw ee de.
8 Hitt sii Jehovah hunvet Levi jipair, qrngx Jehovah ee iokqui, kia dirr Jehovah ee binrjingg laii hogsai Ix, hrong Ix ee miaa laii jiokhog, qaur qinaxzit.
9 Soxiw Levi dirr ix ee hniadi diongx byy hxun byy giap, Jehovah si ix ee sanxgiap, jiauww Jehovah, linw ee Siongrder soxx duiww ix qongw :ee.)
10 Guaw qycc cincniu tauu vaiw diamr dirr snuax-dingw sir-jap zit sir-jap mii; hitt vaiw Jehovah iarr tniax guaw, Jehovah m qramx bet linw. Jehovah qra guaw qongw,
11 'Liw kiw laii juer tauu qniaa dirr vecsnir ee binrjingg, hro inx zip kir singjiab Guaw soxx duiww inx ee ledjow jiuwjua beh hro inx ee de.
12 Islael ar, dnaxx Jehovah, linw ee Siongrder rair liw simxmih ar? Qamxx m si dogdok rair linw qingwuir Jehovah, linw ee Siongrder, qniaa Ix itcer ee dyrlo, tniar Ix, jinrsimx jinrsingr hogsai Jehovah, linw ee Siongrder;
13 Siuw Jehovah jiaxee qaiwbing, qapp Ix ee ludle, dyrr si guaw qinaxzit soxx bingrling linw :ee, dyrr si uirdiyhh beh hro liw did diyc hokkir :ee mah?
14 Knuar ar, tnix qapp jiaxee tnix ee tnix, de qapp derjniu soxu :ee, longxx sriok Jehovah, linw ee Siongrder.
15 Jehovah dogdok hnuahiw linw ee ledjow, tniar inx, qingw inx ee horer dirr banrvecsnir diongx, dyrr si linw jiaxee, cincniu qinaxzit dyrr si.
16 Soxiw linw diyhh qra linw ee simx qniaa qatlew, m tangx gni linw ee amrqunw.
17 In'ui Jehovah, linw ee Siongrder, Ix si jiaxee siongrder ee Siongrder, jiaxee jruw ee Jruw. Ix si jiww dua ee Siongrder, u linglik qycc tangx qnia'uir :ee; byy ing guarmau cruw langg, iarr byy siurr vowlo.
18 Ix uirdiyhh qozii qapp qnuaxhu pnuawduanr; qycc tniar cutguarlangg, hro ix jiahcing;
19 Soxiw linw diyhh tniar cutguarlangg, in'ui linw iarr bad cutgua dirr Egipt-de.
20 Linw diyhh qingwuir Jehovah, linw ee Siongrder, hogsai Ix, qetlenn Ix, qiw Ix ee miaa laii jiuwjua.
21 Ix si linw soxx ylyw :ee, si linw ee Siongrder, uirdiyhh linw juer hitt xee dua qycc tangx qniax ee su, si linw cinbak soxx knuar .qnir .ee.
22 Linw ee ledjow cid-jap langg lyc Egipt, dnaxx Jehovah, linw ee Siongrder hro linw cincniu tnidingw ee cnxix hiacnirr je.
11 Soxiw linw diyhh tniar Jehovah, linw ee Siongrder, siongsiongg siuw Ix soxx huanhur linw siuw :ee, qapp Ix ee ludle, huatdo, qaiwbing.
2 Linw qinaxzit diyhh jaix, in'ui guaw m si qapp linw ee qniaxzii qongw, inx m jaix, iarr byy knuar qnir Jehovah, linw ee Siongrder ee qauwdog, uigiamm, dua quanlingg ee ciuw, qapp crunx cud ee ciuxqud;
3 Ixqip Ix ee sinziah, Ix ee soxx juer, qniwnarr dirr Egipt diongx duiww Egipt Ongg Falaoh, qapp ix ee juann de soxx qniaa :ee;
4 Iarr Ix jnaixngiu kuanxtai Egipt ee qunvingx, qapp inx ee bew, inx ee ciax; inx duizib linw ee sii, Jehovah jnaixngiu hro Angg Haiw ee juiw rimx inx, bedbyy inx qaur qinaxzit;
5 Qycc Ix dirr kongwiaw jnaixngiu kuanxtai linw, qaur linw laii jitt xee soxjai;
6 Qycc Ix jnaixngiu kuanxtai Rleuben ee qniaxsunx, Eliab ee qniaw, Datan qapp Abilam; de jnaixngiu dirr Islaellangg ee diongqanx kuix cuir tunx inx, qapp inx ee qequanr, ixqip inx ee vowvnii, qapp itcer qinduer inx ee uahmic;
7 Jixu linw cinbak knuar qnir Jehovah soxx juer itcer ee dua su.
8 Soxiw linw diyhh siuw guaw qinaxzit soxx bingrling itcer ee qaiwbing, hro linw jongwdnaw, e zip kir singjiab linw soxx beh quer kir singjiab ee de;
9 Iarr hro linw ee zidjiw quxdngg dirr Jehovah soxx qapp linw ee ledjow jiuwjua sniuxsur inx qapp inx ee horer ee de, dyrr si hitt hy lrauu linx qapp bit ee de.
10 In'ui linw beh zip kir singjiab ee de, m si cincniu linw cud .laii ee Egipt-de. Linw dirr hiax ia jxingw, ing kax dac laii quanwag, cincniu caiwhngg;
11 Dogdok linw soxx beh zip kir singjiab ee de, dyrr si u snuax, u snuaqog, laii singsiu tnix ee horjuiw ee de,
12 Si Jehovah, linw ee Siongrder soxx quanwqor ee de, dui' nii-tauu qaur nii-buew, Jehovah, linw Siongrder ee bagjiux siongsiongg knuar ix.
13 Linw narr liusimx tniatanr guaw ee qaiwbing, dyrr si guaw qinaxzit soxx bingrling linw :ee, tniax Jehovah, linw ee Siongrder, jinrsimx jinrsingr hogsai Ix,
14 Dyrr Ix beh jiauwsii lyc linw ee de soxx kiamwing ee ho, dyrr si jingg ee ho, au ee ho, hro linw tangx siusingg linw ee gnoxqog, linw ee jiuw, liw ee iuu;
15 Iarr hro linw ee can'iaw huad cauw, cri linw ee jingsnix; linw iarr beh did diyc vaxjiog.
16 Linw diyhh qaqi qinxsin, benw did linw ee simx siurr bee, drir qaur linw uaicuac, kir hogsai vadd xee siongrder, laii qingwvair ix;
17 Drir qaur Jehovah dua siurkir linw, hro tnix qnuaibat byy lyc ho, de iarr byy cutsanw; linw dyrr dirr Jehovah soxx sniuxsur linw ee suiw de qinw qinw bedbyy.
18 Soxiw linw diyhh qra guaw jiaxee ue qir dirr linw ee simx, linw ee nauw; iarr diyhh vak dirr linw ee ciuw juer qiwhy, dir dirr linw nng luiw bagjiux ee diong'ngx juer qiwliam;
19 Iarr diyhh ing jex qawsi linw ee qniaxzii, bylun linw jre dirr cur-lai, qniaa dirr lo nirr, kunr iacc si kiw .laii, longxx diyhh qangxlun;
20 Qycc diyhh siaw dirr linw ee cur ee mngkia, ixqip linw ee mngg;
21 Hro linw ee zidjiw, qapp linw ee qniaxsunx ee zidjiw, dirr Jehovah duiww linw ee ledjow jiuwjua sniuxsur inx ee de, did diyc qetnix jerje, cincniu tnix kamr de ee zit hiacc quw.
22 Linw narr juwir jipsiuw guaw soxx bingrling linw itcer ee qaiwbing, laii qniaa ix, tniar Jehovah, linw ee Siongrder, qniaa Ix itcer ee lo, qetlenn dirr Ix,
23 Jehovah dyrr beh dui' linw binrjingg qnuaw cud jex itcer ee qog, linw iarr beh did diyc viw linw kacc dua, kacc qiongg ee qog.
24 Qniwnarr linw ee kajniuw soxx dac ee de, longxx beh qruix hro linw, dui' kongwiaw qapp Lebanon, dui' hitt xee hyy, dyrr si Viklat Hyy, qaur saivingg ee haiw, longxx beh juer linw ee qingwqair;
25 Beh byy jit langg e kia diauu dirr linw ee binrjingg. Jehovah, linw ee Siongrder, beh hro linw soxx dac ee juann de longxx qniax linw, lunw linw, jiauww Ix soxx duiww linw qongw :ee.
26 Knuar ar, guaw qinaxzit jiong' jiokhog qapp jiuwjow vaii dirr linw ee binrjingg;
27 Linw narr tranr Jehovah, linw Siongrder ee qaiwbing, guaw qinaxzit soxx bingrling linw :ee, dyrr si jiokhog;
28 Linw narr m tranr Jehovah, linw Siongrder ee qaiwbing, uaicuac guaw qinaxzit soxx bingrling linw ee lo, kir tranr vadd xee siongrder, linw vingsor soxx m bad :ee, dyrr si jiuwjow.
29 Jionglaii Jehovah, linw ee Siongrder cua linw qaur linw soxx beh zip kir singjiab ee de, linw diyhh he hitt xee jiokhog dirr Gelizim Snuax, he hitt xee jiuwjow dirr Ebal Snuax.
30 Jitt nng xee snuax qamxx m si dirr Jordan Hyy hitt vingg, zit lyc ee lo ee aurbin, dirr kiarkiw Jordan ee Kanaanlangg ee de, qapp Gilgal sna' duir, uaw qin Moleh siongrciu mah?
31 In'ui linw beh quer Jordan Hyy, zip kir singjiab Jehovah, linw Siongrder soxx sniuxsur linw juer giap ee de, linw beh dirr hiax kiarkiw.
32 Linw diyhh jipsiuw laii qniaa guaw qinaxzit dirr linw ee binrjingg soxx vailet itcer ee ludle huatdo.
12 Linw dirr sewqanx itsingx ee zit, dirr Jehovah, linw ledjow ee Siongrder soxx sniuxsur linw juer giap ee de, diyhh jipsiuw laii qniaa ee ludle huatdo, dyrr si jiaxee.
2 Linw soxx beh qnuaw, laii singjiab ee ledqog, qniwnarr inx hogsai inx hiaxee siongrder ee soxjai, bylun dirr quann snuax, dirr siyw snuax, dirr longxjongw cniucuir ee ciurkax, longxx diyhh huixhuai inx;
3 Linw iarr diyhh tiachuiw inx ee jewdnuaa, paccuir inx diaukig ee tiau, ing huew siyx inx ee Aselah, cyr inx soxx diaukig ee siongrder ee sxiong, iarr diyhh dui' hitt soxjai dubet inx ee miaa;
4 Linw m tangx cincniu anxnix laii hogsai Jehovah, linw ee Siongrder.
5 Dogdok Jehovah, linw ee Siongrder jionglaii dui' linw jiongww jipair diongx soxx beh qingw ee soxjai, tangx dirr hiax andir Ix ee miaa, dyrr si Ix kiarkiw ee soxjai, linw diyhh kir hiax cue Ix;
6 Jiong' linw ee siyjer qapp vadd hy ee jrer, jap hxun cruw jit hxun ee mic, qapp ciuw nirr ee quxjer, ixqip sria guan ee jrer, qamsimx henr ee jrer, ixqip guu-qrunn ngiuu-qrunn diongx taujuiw snix :ee, longxx diyhh duar qaur hiax;
7 Dirr hiax, linw dirr Jehovah, linw ee Siongrder ee binrjingg uirdiyhh linw ee ciuw soxx juer itcer ee su, did diyc Jehovah, linw Siongrder suwhog :ee, linw qapp linw ee qequanr longxx diyhh limjiac hnuahiw.
8 Lanw qinaxzit dirr hiax soxx qniaa ee su, si dagg langg qniaa ix qaqi knuar juer driyc :ee, linw jionglaii m tangx anxnix qniaa.
9 In'ui linw henrjai iauxx bue u qaur Jehovah, linw ee Siongrder soxx sniuxsur linw ee anhiyh qapp sanxgiap.
10 Danrsi linw quer Jordan, did diyc kiarkiw dirr Jehovah, linw ee Siongrder sniuxsur linw singjiab ee de, qycc hro linw tuatli siwuii longxjongw ee duiwdik, did diyc anhiyh, laii an'unw kiarkiw;
11 Dyrr beh u jit soxjai, si Jehovah, linw ee Siongrder qingw laii andir Ix ee miaa :ee, qniwnarr guaw soxx bingrling linw :ee, dyrr si linw ee siyjer, qapp vadd hy ee jrer, jap hxun cruw jit hxun ee mic, qapp ciuw nirr ee quxjer, ixqip liw dui' Jehovah soxx he guan qik hyw ee mic, longxx diyhh duar qaur hiax.
12 Linw qapp linw ee qniaw, jaboxqniaw, lovok, luxvi, longxx diyhh hnuahiw dirr Jehovah, linw ee Siongrder ee binrjingg. Levilangg diamr dirr linw ee mng-lai :ee iarr si anxnix, in'ui inx dirr linw diongqanx byy hxun byy giap.
13 Linw diyhh qaqi qinxsin, m tangx dirr linw knuar qac'ir ee soxjai henr linw ee siyjer;
14 Dogdok dirr linw jiaxee jipair diongx ee jit xee, Jehovah soxx beh qingw ee soxjai, linw dirr hiax diyhh henr linw ee siyjer; qycc dirr hiax qniaa guaw itcer soxx bingrling linw :ee.
15 Danrsi linw dirr linw dagg xee mngg-lai, tangx jiauww Jehovah, linw ee Siongrder soxx sniuxsur linw ee hokhun, jiauww linw ee simx soxx air, taii jingsnix jiac bah; bylun cingkir ee langg, byy cingkir ee langg, longxx tangx jiac ix, cincniu jiac ling'iongg qapp lok jidvnuax.
16 Danrsi huih m tangx jiac, diyhh vniar dirr de nirr, cincniu vniar juiw jidngiu.
17 Linw ee gnoxqog, jiuw, iuu, jap hxun ee jit hxun, higsi guu-qrunn ngiuu-qrunn diongx taujuiw snix :ee, higsi linw he guan henr :ee, qamsimx henr :ee, higsi ciuw nirr ee quxjer, longxx m tangx dirr linw ee mngg-lai jiac ix;
18 Dogdok dirr Jehovah, linw ee Siongrder ee binrjingg jiac ix, dyrr si dirr Jehovah, linw ee Siongrder soxx beh qingw ee soxjai, linw qapp linw ee qniaw, linw ee jaboxqniaw, lovok, luxvi, ixqip diamr dirr linw mngg-lai ee Levilangg, longxx diyhh jiac ix; qniwnarr linw ee ciuw soxx juer :ee, dirr Jehovah, linw ee Siongrder ee binrjingg, tangx hnuahiw.
19 Linw diyhh qaqi qinxsin, dirr linw ee derhngx, jit siwlangg m tangx vangwsag Levilangg.
20 Jehovah, linw ee Siongrder jiauww Ix soxx ingwunw linw :ee, kuikuah linw ee qingxqair ee sii, linw ee simx air jiac bah, soxiw qongw, 'Guaw beh jiac bah', dyrr tangx jiauww linw ee simx soxx air :ee laii jiac bah.
21 Jehovah, linw ee Siongrder soxx qingw beh andir Ix ee miaa ee soxjai, narr lirkuix linw jin' hng, dyrr tangx jiauww guaw soxx bingrling linw :ee, jiong' Jehovah sniuxsur linw ee guu, ngiuu, cruw laii taii ix, tangx jiauww simx soxx air :ee dirr linw ee mngg-lai jiac ix.
22 Linw jiac ix, cincniu jiac ling'iongg qapp lok jidvnuax, byy cingkir qapp cingkir ee langg vnivnii tangx jiac;
23 Dogdok linw diyhh quat'ir, m tangx jiac huih, in'ui huih si uahmia; linw m tangx jiac bah, suar jiac ix ee uahmia;
24 M tangx jiac ix, diyhh vniar dirr de nirr, cincniu vniar juiw jidngiu;
25 M tangx jiac ix; anxnix linw qniaa Jehovah soxx knuar juer driyc ee su, linw qapp linw ee qniaxsunx dyrr e did diyc hokkir.
26 Dogdok linw soxu ee sxingr mic, qapp linw soxx he guan :ee, diyhh duar qaur Jehovah soxx beh qingw ee soxjai.
27 Linw ee siyjer, bah qapp huih, diyhh henr dirr Jehovah, linw ee Siongrder ee dnxuaa-dingw; linw jewmic ee huih, diyhh vniar dirr Jehovah, linw ee Siongrder ee dnxuaa; hitt xee bah, linw tangx jiac.
28 Linw diyhh jipsiuw, tniatanr guaw bingrling linw itcer ee ue, qniaa Jehovah, linw ee Siongrder soxx knuar juer hyw, knuar juer driyc ee su; anxnix linw qapp linw ee horer dyrr tangx ingxuanw did diyc hokkir.
29 Jehovah, linw ee Siongrder dui' linw ee binrjingg dubet linw soxx beh kir singjiab ee qog, linw singjiab ix, laii kiarkiw ix ee de.
30 Hitt sii, linw diyhh qaqi qinxsin, m tangx dirr inx dui' linw ee binrjingg dubet liauxau, ham lyc inx ee lybang, laii duer inx; iarr m tangx tamwtniax inx ee siongrder ee su, qongw, 'Jiaxee qog jnaixngiu hogsai inx ee siongrder, guaw iarr beh anxnix qniaa.'
31 Linw m tangx duiww Jehovah, linw ee Siongrder anxnix qniaa; in'ui inx duiww inx ee siongrder qniaa Jehovah itcer soxx tongwhun iamwngor ee su; simrjiww qra inx ee qniaw jaboxqniaw ing huew siyx, henr hro inx ee siongrder.
32 Qniwnarr guaw soxx bingrling linw :ee, linw longxx diyhh jipsiuw laii qniaa; linw m tangx qetnix, iarr m tangx qiamxjiyw.
13 Linw diongqanx narr u sendix iacc si bang qnir bang :ee kiw .laii, duiww linw henxcud sinziah, qrii su, duiww linw qongw,
2 'Lanw laii kir tranr liw vingsor soxx m bad ee vadd xee siongrder, laii hogsai inx', ix soxx henxbingg ee sinziah, qrii su, dyrr narr ingwgiam,
3 Linw iarr m tangx tniax hitt xee sendix, iacc si hitt xee bang qnir bang :ee ee ue; in'ui Jehovah, linw Siongrder decc cir linw, rair jaix linw si jinrsimx jinrsingr tniar Jehovah, linw ee Siongrder iacc byy.
4 Linw diyhh sunrtanr Jehovah, linw ee Siongrder, qingwuir Ix, siuw Ix ee qaiwbing, tniax Ix ee ue, hogsai Ix, qetlenn Ix.
5 Hitt xee sendix, iacc si hitt xee bang qnir bang :ee, ixqing’ ing ue vuergik Jehovah, linw ee Siongrder, dyrr si cua linw cud Egipt-de, sioghuee linw tuatli juer lojaii ee qrex, inx anxnix beh qra linw vuic lirkuix Jehovah, linw ee Siongrder soxx bingrling linw qniaa ee lo, linw dyrr diyhh hro ix siw; anxnix dui' linw diongqnx druu kir hitt xee pnaiw.
6 Narr si linw qangg buw ee hniadi, iacc si linw ee qniaw, linw ee jaboxqniaw, iacc si linw simhuaii diongx ee bow, iacc si cincniu liw sniwmia ee ving'iuw, amwjni inxiuw linw, qongw, 'Lanw laii kir hogsai vadd xee siongrder, dyrr si liw qapp liw ee ledjow vingsor m bad :ee;
7 Si liw siwuii jiaxee qog ee siongrder', lirkuix linw qin :ee, iacc lirkuix linw hng :ee, dui' jitt xee derqik qaur hitt xee derqik :ee,
8 Linw m tangx tranr ix, m tangx tniax ix, bagjiux m tangx siyh ix, linw m tangx kyxlinn inx, iarr m tangx kngwbat ix;
9 Linw dikkag herciuw beh hro ix siw, zen'au jiongww vecsnir iarr herciuw;
10 Linw diyhh ing jiyhtauu dimr hro ix siw; in'ui ix sniu beh qra linw vuic lirkuix Jehovah, linw ee Siongrder, dyrr si cua linw cud Egipt-de, juer lojaii ee qrex :ee.
11 Anxnix, Islael jingwlangg dyrr beh tniax .qnir laii qniax; byy qycc qniaa jitt hy pnaiw dai dirr linw diongqanx.
12 Dirr Jehovah, linw ee Siongrder soxx sniuxsur linw kiarkiw dirr jiaxee sniaa ee jit xee, linw narr tniax qnir qongxx,
13 U huixlui dui' linw diongqanx cud, quaiw kiarkiw inx ee sniaa ee langg qongxx, 'Lanw laii kir hogsai vadd xee siongrder, linw jingg soxx m bad :ee';
14 Linw dyrr diyhh tamwtniax, cakyw, siongser mng. Knuar ar, qyxzenn si jinx, jinjniar u jitt xee kyxngor ee su qniaa dirr linw diongqanx;
15 Liw dikkag diyhh ing dyx taii siw kiarkiw hitt xee sniaa ee vecsnir, jiong' vecsnir, ixqip ix soxu :ee, ix ee jingsnix, itjin ing dyx bet ix;
16 Linw diyhh ing soxx cniuw hitt xee sniaa ee mic, tiap dirr queci nirr, ing huew siyx hitt xee sniaa qapp soxx cniuw itcer ee mic, hro Jehovah, linw ee Siongrder; hitt xee sniaa ingxingw juer toduix, byy tangx qycc kiw.
17 Hitt xee ingqaix huixbet ee mic, longxx m tangx jit diamw aw diauu dirr linw ee ciuw; hro Jehovah suah Ix ee dua siurkir, undenw linw, linbinw linw, hro linw qetnix langgiac, jiauww Ix duiww linw ee ledjow soxx jiuwjua :ee;
18 In'ui liw tniax Jehovah, linw ee Siongrder ee ue, siuw Ix itcer ee qaiwbing, dyrr si guaw qinaxzit soxx bingrling linw :ee, laii qniaa Jehovah, linw ee Siongrder soxx knuar juer hyw :ee.
14 Linw si Jehovah, linw ee Siongrder ee qniaxzii, m tangx uirdiyhh sixlangg quah qaqi ee sinkux, iarr m tangx qra linw nng luiw bagjiux ee diong'ngx tir qngx qngx;
2 In'ui linw juer sxingr ee vecsnir, laii sriok dirr Jehovah, linw ee Siongrder; Jehovah dui' derjniu banrvecsnir diongx, laii qingw linw juer Ix digvet ee vecsnir.
3 Qniwnarr kyxngor ee mic, linw longxx m tangx jiac.
4 Linw soxx tangx jiac ee jingsnix dyrr si jiaxee;
5 Guu, mi'ngiuu, snua'ngiuu; lok, qapp ling'iongg, siyxlok, iaw snua'ngiuu, bilok, ciacngiuu, qnxiux.
6 Jingsnix diongx, qniwnarr vunx dxee, dxee tiah juer nng vingg :ee, huancauw ee jingsnix, linw longxx tangx jiac ix.
7 Danrsi hiaxee huancauw :ee, iacc si tiah dxee :ee ee diongqanx, linw m tangx jiac :ee, dyrr si jiaxee; logdyy, tor, sahuanx, in'ui inx u huancauw, byy vunx dxee, duiwdirr linw si byy cingkir.
8 Dix, in'ui ix u vunx dxee iarr byy huancauw, duiwdirr linw si byy cingkir; inx ee bah linw m tangx jiac; siw :ee iarr m tangx bongx.
9 Dirr juiw-diongx linw soxx tangx jiac :ee, si jiac :ee;
10 Qniww u sxit u lrann :ee, linw longxx tangx jiac; qniww byy sxit byy lxann :ee, linw longxx m tangx jiac; duiwdirr linw dyrr byy cingkir.
11 Qniww cingkir ee jiauw, linw longxx tangx jiac ix;
12 M tangx jiac :ee dyrr si ringx, hiaux, diaux;
13 Jenx, siyxingx, xenx, qapp ix ee lui;
14 Itcer ee oax qapp ix ee lui,
15 Dyjiauw, qangx ee dyjiauw, hi'ingx, ciok'ingx qapp ix ee lui;
16 Amwqongjiauw, qo'ngg, niautau'ingx, te'oo,
17 Cauwtau'ingx, lojii, hyc,
18 Vehlingrsix qapp ix ee lui, diwqewjiauw, venxhog.
19 Qniww u sxit, e syy ee mic, duiwdirr linw dyrr byy cingkir, linw longxx m tangx jiac ix;
20 Qniww e vuex, cingkir ee mic, linw longxx tangx jiac.
21 Qniww qaqi siw ee mic, linw longxx m tangx jiac; tangx hro linw mngg-lai qiawkax ee langg jiac, iacc si bre hro guarqoklangg jiac; in'ui linw si sxingr ee vecsnir, sriok dirr Jehovah, linw ee Siongrder. Juw snua'ngiuu-aw, m tangx ing ix ee buw ee linx.
22 Linw diyhh jiong' linw ia jxingw soxx cutsanw :ee, dyrr si linw ee canhngg dagg ngiu soxx cud :ee, jap hxun tiux jit hxun.
23 Linw ee gnoxqog, jiuw, iuu, jap hxun ee jit hxun, qapp guu, ngiuu taujuiw snix :ee, linw diyhh jiac ix dirr Jehovah, linw ee Siongrder ee binrjingg, dyrr si Ix soxx beh qingw laii andir Ix ee miaa ee soxjai, hro linw hagsip siongsiongg qingwuir Jehovah, linw ee Siongrder.
24 Dng' Jehovah, linw ee Siongrder suwhog linw ee sii, Jehovah, linw ee Siongrder soxx beh qingw andir Ix ee miaa ee soxjai, narr lirkuix linw taiww hng, hitt diauu lo taiww dngg, drir qaur linw be e duar jiaxee mic qaur hiax,
25 Linw dyrr tangx ngua ginn, jiong' ginn vaux .kiw .laii, nic dirr liw ee ciuw-lai, kir Jehovah, linw ee Siongrder soxx beh qingw ee soxjai.
26 Liw ing jitt xee ginn, jiauww simx soxx rair brew ix, qniwnarr linw ee simx soxx iwair :ee, higsi guu, higsi ngiuu, higsi jiuw, higsi qau jiuw. Dirr hiax linw qapp linw ee qequanr, dirr Jehovah, linw ee Siongrder ee binrjingg, jiacc laii hnuahiw.
27 Diamr dirr linw mngg-lai ee Levilangg, linw m tangx vangwsag ix, in'ui ix dirr linw diongqanx byy hxun byy giap.
28 Dagg vaiw qaur snax nii muaw, linw diyhh jiong' hitt nii ee toxsanw jap hxun tiux jit hxun, kngr dirr linw ee mngg-lai;
29 In'ui Levilangg dirr linw diongqanx byy hxun byy giap, ix qapp cutguarlangg, ixqip qozii, qnuaxhu, diamr dirr linw mngg-lai :ee, longxx tangx laii jiac qaur vaw; drir qaur Jehovah, linw ee Siongrder dirr linw soxx juer itcer ee su, suwhog linw.
15 Dagg vaiw qaur cid nii ee lorbuew, linw diyhh qniaa tauxvangr.
2 Tauxvangr ee le, dyrr si anxnix; huanrnarr jewjuw jiyh cuwvnix :ee, diyhh tauxvangr, m tangx duiww linw ee cuwvnix qapp hniadi duityw; in'ui Jehovah ee tauxvangr ixqing’ suanvor lar.
3 Narr si guarqoklangg, linw tangx qra ix duityw soxx kiamr :ee; dogdok linw ee mic dirr linw ee hniadi :ee, linw ee ciuw diyhh tauxvangr ix.
4,5 Linw narr liusimx tniax Jehovah, linw ee Siongrder ee ue, jipsiuw laii qniaa guaw qinaxzit soxx bingrling linw jex itcer ee qaiwbing, dyrr beh dirr linw diongqanx byy songwhionglangg; in'ui dirr Jehovah, linw ee Siongrder soxx sniuxsur linw juer giap ee de, Jehovah beh dua dua suwhog linw.
6 In'ui Jehovah, linw ee Siongrder beh jiauww Ix soxx ingwunw suwhog linw; linw beh jiyh hro jerje qog, qycc linw mrbenw jiyh; linw beh quanxhad jerje qog, qycc inx be quanxhad linw.
7 Dirr Jehovah, linw ee Siongrder soxx sniuxsur linw ee de, narr dirr linw jit xee sniamngg lai, linw ee hniadi diongx, u jit xee songwhionglangg qapp linw dilehh, dyrr m tangx duiww linw songwhiongx ee hniadi gni linw ee simx, qiux linw ee ciuw;
8 Dikkag diyhh duiww ix kuix linw ee ciuw, jiauww ix soxx kiamwing :ee jiyh ix, vow ix ee byy qraur.
9 Linw diyhh qaqi qinxsin, qniax linw simlai u pnaiw liamrtauu, qongw, 'Derr cid nii, tauxvangr ee nii, qin lar', linw songwhiongx ee hniadi, linw longxx m hro ix ginn, drir qaur ix uirdiyhh linw qiuqiyr Jehovah, linw dyrr u jue.
10 Linw dikkag diyhh hro ix; hro ix ee sii, simlai m tangx huanlyw; in'ui dui' jitt xee su, Jehovah, linw ee Siongrder beh dirr linw itcer soxx qniaa :ee, qapp linw ee ciuw soxx juer :ee, suwhog linw.
11 In'ui dirr hitt soxjai, songwhionglangg ingxx be dng. Soxiw guaw bingrling linw qongxx, dirr linw ee qingxlai, dikkag diyhh duiww linw ee hniadi, songwhiongx :ee, kiamwkueh :ee, laii kuix linw ee ciuw.
12 Linw ee hniadi diongx, narr u jit xee Hebla ee davolangg, iacc si Hebla ee jaboxlangg, bre hro linw, hogsai linw lak nii; qaur derr cid nii, dyrr tauxvangr ix kir juriuu.
13 Linw tauxvangr ix kir juriuu ee sii, m tangx hro ix kangciuw kir;
14 Diyhh dui' linw ee ngiuu-qrunn, gorqakdniuu, jiuxkud diongx, tec jerje hro ix; jiauww Jehovah, linw ee Siongrder soxx suwhog linw :ee, laii hro ix.
15 Diyhh qir did linw dirr Egipt-de juer lojaii, Jehovah, linw ee Siongrder qiuwsiok linw; in'ui anxnix, guaw qinaxzit bingrling linw jitt xee su.
16 Ix narr duiww linw qongw, 'Guaw byy beh lirkuix liw', in'ui ix tniar linw qapp linw ee qequanr, qycc in'ui diamr linw hiax kia jin' hyw;
17 Linw diyhh ing jngxaw dui' mngg nirr qngr ix ee hni-aw, ix dyrr ingxuanw juer linw ee lovok. Linw kuanxtai linw ee luxvi iarr si anxnix.
18 Linw tauxvangr ix kir juriuu ee sii, m tangx liac juer kikkuix, in'ui ix hogsai linw lak nii, viw cniawqangx :ee dingvue dat. Jehovah, linw ee Siongrder, beh dirr linw soxx juer itcer ee su, suwhog linw.
19 Qniwnarr guu-qrunn ngiuu-qrunn, taujuiw snix :ee, qangx :ee, linw diyhh hunvet juer sxingr, qruix hro Jehovah, linw ee Siongrder; guu-qrunn taujuiw snix :ee, m tangx juer qangx; ngiuu-qrunn taujuiw snix :ee, m tangx jenw ix ee xmngg.
20 Linw qapp linw ee qequanr, dagg nii diyhh dirr Jehovah, linw ee Siongrder ee binrjingg laii jiac, dyrr si dirr Jehovah soxx beh qingw ee soxjai.
21 Narr u puawsniur :ee, higsi vaixkax, higsi cnimii, bylun u simxmih pnaiw ee puawsniur, longxx m tangx juer jrer henr hro Jehovah, linw ee Siongrder;
22 Tangx dirr linw ee mngg-lai jiac ix; byy cingkir qapp cingkir ee langg longxx tangx, cincniu jiac ling'iongg qapp lok jidngiu;
23 Dogdok m tangx jiac ix ee huih, diyhh vniar dirr de nirr, cincniu vniar juiw jidngiu.
16 Linw diyhh juwir Abib Guec, laii siuw Jehovah, linw ee Siongrder ee Vnuaquewjeh; in'ui Jehovah, linw ee Siongrder dirr Abib Guec ee mii .sii cua linw cud Egipt.
2 Linw diyhh dirr Jehovah soxx beh qingw laii andir Ix ee miaa ee soxjai, dui' linw ee ngiuu-qrunn guu-qrunn, ing Vnuaquewjeh ee jingsnix, henwjer hro Jehovah, linw ee Siongrder.
3 Liw m tangx ing u qnar ee vniaw camx lecc jiac; cid zit quw linw diyhh ing byy qnar ee vniaw camx lecc jiac, dyrr si kunwkow ee vniaw; beh hro linw itsingx ee zit qir did linw cud Egipt-de ee zit; in'ui linw cud Egipt-de ee sii jin' qnuaxqinw.
4 Dirr linw ee siwqingw lai, cid zit quw longxx m tangx knuar qnir qnar; tauu jit zit ehngx soxx henr ee jewbah, m tangx lauu jit diamw aw qaur tnix qngx.
5 Dirr Jehovah, linw ee Siongrder soxx sniuxsur hiaxee sniamngg lai, linw m tangx henr Vnuaquewjeh ee jrer.
6 Dogdok diyhh dirr Jehovah, linw ee Siongrder soxx beh qingw juer andir Ix ee miaa ee soxjai, qaur ehngx zit lyc ee sii, dyrr si linw cud Egipt ee sii, diyhh henr Vnuaquewjeh ee jrer;
7 Diyhh dirr Jehovah, linw ee Siongrder soxx beh qingw ee soxjai, qra vig laii jiac; qeh jaxkiw, linw uat dyr kir linw ee vowvnii.
8 Linw diyhh jiac byy-qnar-vniaw lak zit; derr cid zit linw diyhh siuw Jehovah, linw ee Siongrder ee giamsiokhue; longxx m tangx juer qangx.
9 Linw diyhh uirr qaqi sngr cid xee cid zit; dui' linw kixtauu ing liam'aw quah gnoxqog ee sii, dyrr sngr cid xee cid zit.
10 Linw diyhh dirr Jehovah, linw ee Siongrder ee binrjingg siuw Cidcidzidjeh; jiong' linw ee ciuw ee lexmic hongrhenr, si jiauww linw ee simx soxx guan :ee, iarr jiauww Jehovah, linw ee Siongrder suwhog linw :ee.
11 Linw qapp linw ee qniaw, jaboxqniaw, lovok, luxvi, qapp diamr dirr linw sniamngg lai ee Levilangg, ixqip dirr linw diongqanx qiawkax :ee, qapp qozii, qnuaxhu, longxx diyhh dirr Jehovah, linw ee Siongrder soxx beh qingw, andir Ix ee miaa ee soxjai, dirr Jehovah, linw ee Siongrder ee binrjingg hnuahiw.
12 Linw diyhh qir did linw dirr Egipt bad juer lojaii; linw diyhh jipsiuw laii qniaa jiaxx ludle.
13 Gorqakdniuu qapp jiuxkud soxx cud :ee, linw siukngr liauxau, diyhh siuw Daccauxliau'axjeh cid zit.
14 Siuw jeh ee sii, linw qapp linw ee qniaw, jaboxqniaw, lovok, luxvi, qapp diamr dirr linw sniamngg lai ee Levilangg, ixqip qiawkax :ee, qapp qozii, qnuaxhu, longxx diyhh hnuahiw.
15 Dirr Jehovah soxx beh qingw ee soxjai, liw diyhh siuw Jehovah, linw ee Siongrder ee jeh cid zit; in'ui Jehovah, linw ee Siongrder dirr liw itcer ee budsanw, qapp linw ee ciuw itcer soxx juer :ee, beh suwhog linw, linw dyrr jin' dua hnuahiw.
16 Linw itcer ee davodingx, diyhh dirr Duqnawjeh, Citcitjeh, Dacliau'axjeh, jit nii snax vaiw, longxx qaur Jehovah, linw ee Siongrder ee binrjingg, dirr Ix soxx beh qingw ee soxjai. Iarr m tangx kangciuw qaur Jehovah ee binrjingg;
17 Dagg langg diyhh jiauww ix ee kuiwlat laii henr, dyrr si jiauww Jehovah, linw ee Siongrder soxx sniuxsur linw ee hokhun.
18 Linw diyhh dirr Jehovah, linw ee Siongrder soxx sniuxsur dagg xee sniamngg lai, jiauww linw hiaxee jipair, uirr qaqi setlip simxpnuawqnuax qapp qnuadniuw; inx diyhh jiauww qonggi ee pnuawduanr, laii simxpnuar vecsnir.
19 Linw ee simxpnuar m tangx uan'ongw, m tangx knuar langg ee guarmau, iarr m tangx siurr vowlo, in'ui vowlo e hro diwhui ee langg bagjiux cnimii, qycc e hro girlangg ee ue vingw dywdngw.
20 Linw diyhh duizib jiww qongx jiww gi, hro linw e uac, singjiab Jehovah, linw ee Siongrder soxx sniusur linw ee de.
21 Liw uirr qaqi soxx kiw Jehovah, linw ee Siongrder ee dnxuaa, m tangx dirr hitt vnix:a jraix simxmih ciurbak, juer Aselah;
22 Iarr m tangx uirr qaqi cai diauwkig ee tiau; jex si Jehovah, linw ee Siongrder soxx uanwhun :ee.
17 Qniww u puawsniur, iacc si u simxmih pnaiw ngiu ee guu, ngiuu, linw m tangx jewhenr hro Jehovah, linw ee Siongrder; in'ui jex si Jehovah, linw ee Siongrder soxx iamwngor :ee.
2 Dirr linw diongqanx, dirr Jehovah, linw ee Siongrder soxx sniuxsur linw hiaxee sniaa ee diongqanx, narr duw diyc u langg, higsi lxamm, higsi luw, qniaa Jehovah, linw ee Siongrder soxx knuar juer pniaw :ee, uivue Ix ee iog,
3 Kir hogsai vadd xee siongrder laii qingwvair ix, higsi zit, higsi guec, iacc si tnidingw ee banrsiong, si guaw soxx m bad bingrling :ee;
4 Narr u langg qra linw qongw, linw iarr ixqing’ tniax .qnir, dyrr diyhh siongser tamwtniax. Knuar ar, qyxzenn urngiaw, sidjai u jitt xee kyxngor ee su, qniaa dirr Islael diongx,
5 Linw diyhh jiong' qniaa jitt xee pnaiw dai ee davolangg, iacc si hurzinlangg, tuax qaur sniamngg gua, ing jiyhtauu dimr hitt xee davolangg, iacc si hurzinlangg, hro ix siw.
6 Diyhh vin' nng xee qanjingr, iacc si snax xee qanjingr ee cuir, ingqaix siw :ee diyhh hro ix siw; narr vin' jit langg ee cuir juer qanjingr, dyrr m tangx hro ix siw.
7 Qanjingr :ee diyhh juewtauu herciuw dimr ix, zen'au jiongww vecsnir dyrr dui' linw diongqanx druu kir hitt xee pnaiw.
8 Linw sniamngg lai narr u uanqex ee su, higsi in'ui lrauu huih, higsi in'ui sna' qryr, higsi in'ui sna' pah, si linw soxx be hiauxdid duan :ee, linw dyrr diyhh kiw .laii, kir Jehovah, linw ee Siongrder soxx beh qingw ee soxjai,
9 Qnir jewsix Levilangg, qapp dngsii ee simxpnuawqnuax, laii mng inx; inx beh jiong' pnuawsuu jixsi linw.
10 Inx dirr Jehovah soxx beh qingw ee soxjai jixsi linw ee pnuawsuu, linw diyhh jiauww anxnix qniaa. Qniww inx soxx qawsi linw :ee, diyhh jipsiuw laii qniaa;
11 Diyhh jiauww inx soxx beh qawsi linw huatdo ee jongjiw, iarr diyhh jiauww inx soxx qra linw qongw ee pnuawduanr laii qniaa; inx soxx jixsi linw ee pnuawsuu, linw m tangx penx jyw pen iu.
12 Narr u langg jurjuanx qniaa, m tniax jewsix, dyrr si dirr hiax kia lehh laii hogsai Jehovah, linw ee Siongrder :ee, iacc si m tniax simxpnuawqnuax, dyrr diyhh hro hitt langg siw; anxnix linw dyrr dui' Islael diongx druu kir hitt xee pnaiw;
13 Vecsnir beh longxx tniax qnir laii qniax, byy qycc jurjuanx qniaa.
14 Linw qaur Jehovah, linw ee Siongrder soxx sniuxsur linw ee de, did diyc hitt soxjai laii kiarkiw ee sii, narr qongw, 'Guaw beh setlip ongg juer guaw ee tauu, cincniu guaw siwuii ee ledqog jidngiu',
15 Linw dikkag diyhh setlip Jehovah, linw ee Siongrder soxx qingw ee langg juer ongg, juer linw ee tauu. Dui' linw ee hniadi diongx setlip jit langg juer ongg, juer linw ee tauu; guarqoklangg, m si linw ee hniadi :ee, linw m tangx setlip juer linw ee tauu.
16 Danrsi ongg m tangx uirdiyhh qaqi qetnix jerje jiah bew, iarr m tangx uirdiyhh beh qetnix kacc je jiah bew, hro vecsnir dyr kir Egipt, in'ui Jehovah bad bingrling linw qongxx, 'Linw byc qycc dui' hitt diauu lo dyr .kir.'
17 Ix iarr m tangx uirr qaqi crua jerje horhuix, qniax ix ee simx e vuerbiu. Ix iarr m tangx uirr vunxsinx jikju jerje qimginn.
18 Ix jre ix ee qok'ui ee sii, diyhh ing jit vunw ceh causiaw jitt xee ludhuad, dyrr si dui' hitt vunw jrunn dirr jewsix Levilangg hiax ee bingrling.
19 Hitt vunw diyhh he dirr ix hiax, jit siwlangg diyhh tak ix, tangx hagsip qingwuir Jehovah, ix ee Siongrder; diyhh jipsiuw jitt xee ludhuad itcer ee ue, qapp jiaxee ludle laii qniaa ix,
20 Benw did ix jurqyx laii knuawkinx hniadi; qycc benw did ix penx jyw penx iu laii lirkuix jitt xee qaiwbing, tangx hro ix qapp ix ee qniaxsunx dirr Islael diongx qok'ui quxdngg.
18 Jewsix Levilangg, tong' Levi ee jipair, inx dirr Islael diongx byy hxun byy giap. Inx soxx beh jiac :ee, dyrr si Jehovah ee huexjer, qapp Ix ee giap.
2 Inx dirr inx hniadi diongx byy sanxgiap. Jehovah juer inx ee sanxgiap, jiauww soxx duiww inx qongw :ee.
3 Jewsix dui' vecsnir soxx ingqaix did .diyc ee hxun dyrr si jiaxee; qniwnarr henr guu iacc si ngiuu juer jrer :ee, diyhh jiong' jingg tuiw, qapp nng xee cuiwpew, qapp do, hro jewsix.
4 Linw ee gnoxqog, linw ee jiuw, linw ee iuu, kixtauu siusingg :ee, qapp kixtauu jenw ee ngiumngg, longxx diyhh hro ix.
5 In'ui Jehovah, linw ee Siongrder dui' linw jiongww jipair qingw ix, hro ix qapp ix ee qniaxsunx, hrong Jehovah ee miaa kia lehh, hogsai Ix qaur ingxuanw.
6 Narr u Levilangg bylun qiawkax dirr Islael diongx dyclyc jit jxy sniamngg lai, dui' hiax cud .laii, juansimx iwair qaur Jehovah soxx beh qingw ee soxjai,
7 Dyrr ix beh hrong Jehovah, ix Siongrder ee miaa hogsai, cincniu ix jiongww hniadi hiaxee kia dirr Jehovah binrjingg ee Levilangg jidngiu;
8 Dirr ix bre joxqongx ee giap ixgua, ix soxx did .diyc jiaxee hunrgiac diyhh qapp inx vnii je.
9 Linw narr qaur Jehovah, linw ee Siongrder soxx sniuxsur linw ee de, linw m tangx yc hiaxee qog soxx qniaa ee kyxngor ee su.
10 Linw diongqanx m tangx u langg hro qniaw, jaboxqniaw qingquer huew; iarr m tangx qniaa siasut, jiamvog, knuar mia, juer saiqongx;
11 Rue huu, juer dangqix, qniaa mosut, kanbongg;
12 In'ui qniwnarr qniaa hiaxee su :ee, longxx si Jehovah soxx iamwngor, iarr si uirdiyhh jiaxee kyxngor ee su, Jehovah, linw ee Siongrder dui' linw ee binrjingg qnuaw inx cud.
13 Linw duiwdirr Jehovah, linw ee Siongrder, diyhh juer uanjuann ee langg.
14 In'ui linw soxx beh singjiab hiaxee qog, longxx tniatanr jiamvog :ee, qniaa siasut :ee; lun qaur linw, dyrr Jehovah, linw ee Siongrder m jrunw linw anxnix qniaa.
15 Jehovah, linw ee Siongrder beh dui' linw diongqanx, dui' linw ee hniadi, hingx kiw sendix cincniu guaw, linw diyhh tniatanr ix.
16 Jiauww linw dirr Holeb jurhue ee zit, duiww Jehovah, linw ee Siongrder itcer soxx qriuu :ee, qongw, 'Byc did hro guanw qycc tniax qnir Jehovah, guanw ee Siongrder ee sniax; iarr byc did hro guanw qycc knuar qnir jitt xee dua huew, benw did guanw sixbyy.'
17 Jehovah dyrr duiww guaw qongw, 'Inx soxx qongw :ee si hyw.
18 Guaw beh dirr inx hniadi diongx, qra inx hingx kiw jit xee sendix cincniu liw, Guaw beh jiong' Guaw ee ue he dirr ix ee cuir, ix beh jiong' Guaw itcer soxx bingrling :ee duiww inx qongw.
19 Ix tog Guaw ee miaa laii tuann Guaw ee ue, langg narr m tniax, Guaw beh vran ix.
20 Danrsi sendix jurjuanx tog Guaw ee miaa, qongw Guaw soxx byy bingrling ix qongw ee ue, iacc si hrong vadd xee siongrder ee miaa laii qongw, hitt xee sendix diyhh siw.'
21 Linw ee simx narr sniu qongxx, 'Jehovah soxx byy qongw ee ue, guanw beh tacc e jaix ar?'
22 Narr u sendix tog Jehovah ee miaa laii qongw :ee, hitt xee su narr byy jniaa, iarr byy ingwgiam, jex si Jehovah soxx byy qongw :ee, si hitt xee sendix jurjuanx laii qongw :ee; linw byc did qniaa ix.
19 Jehovah, linw ee Siongrder jionglaii jenxduu hiaxee qog, dyrr si Jehovah, linw ee Siongrder ing inx ee de sniuxsur linw :ee, linw singjiab inx, laii kiarkiw dirr inx ee sniaa, qapp inx ee cur.
2 Hitt sii linw dyrr diyhh dirr Jehovah, linw ee Siongrder sniuxsur linw juer giap ee de, qra ix hunvet snax xee sniaa.
3 Diyhh jiong' Jehovah, linw ee Siongrder soxx sniuxsur linw singjiab qaiwsnuar lai ee de, hunx juer snax kux, qycc qra ix kuix lo, hro hiaxee taii langg :ee longxx tangx jauw kir hiax.
4 Taii siw langg :ee jauw kir hiax, dyrr tangx did diyc uac, hitt xee le dyrr si anxnix; qniwnarr vingsor byy qet'uanr, cywgo laii taii siw ix ee cuwvnix,
5 Cincniu qongxx langg qapp ix ee cuwvnix kir ciurnaa, beh cyr ciurbak, ciuw giac voxtauu jid'err cyr, beh cyr hitt xee ciu, voxtauu lud .kir, siongx diyc ix ee cuwvnix drir qaur siw, jitt xee langg diyhh jauw qaur hiaxee sniaa ee jit xee, dyrr tangx uac lehh,
6 Benw did vyr zinbing :ee, dng' ix simhuew dyc ee sii, duizib taii langg ee langg, in'ui lo jin' hng, zib .diyc dyrr taii siw ix. Qisit ix byy ingqaix siw, in'ui vingsii inx byy uansiuu.
7 Soxiw guaw bingrling linw diyhh sed snax xee sniaa.
8 Jehovah, linw ee Siongrder, narr jiauww Ix duiww linw ee ledjow soxx jiuwjua :ee, kuikuah linw ee qingxqair, jiong' soxx ingwunw sniuxsur linw ee ledjow ee juann de hro linw;
9 Guaw qinaxzit soxx bingrling linw itcer ee qaiwbing, linw narr jipsiuw laii qniaa, tniar Jehovah, linw ee Siongrder, siongsiongg qniaa Ix hiaxee dyrlo, dyrr dirr jitt snax xee sniaa ixgua, diyhh qycc uirr qaqi qex sed snax xee sniaa;
10 Benw did byy jue ee huih lrauu dirr Jehovah, linw ee Siongrder soxx sniuxsur linw juer giap ee de, drir qaur lrauu huih ee jue qruix dirr linw.
11 Danrsi langg narr uanwhun ix ee cuwvnix, bih lehh, jiacc kiw laii pah ix, sionghai ix qaur siw, dyrr jauw qaur hiaxee sniaa ee jit xee;
12 Ix ee sniaa ee dniuxlyw dyrr diyhh crex langg, dui' hiax duar ix cud .laii, qaux dirr vyr zinbing ee langg ee ciuw, hro ix siw.
13 Linw ee bagjiux m tangx kyxlinn ix, dirr Islael diongx diyhh druu kir jue ee huih, hro linw tangx did diyc hokkir.
14 Dirr Jehovah, linw ee Siongrder soxx sniuxsur linw singjiab ee de, m tangx isuaw cuwvnix ee qaiwjiw; hitt xee si jingg ee langg soxx cai dirr linw suawjiab ee giap ee lairbin :ee.
15 Qandna’ jit langg be tangx kiw laii qanjingr langg simxmih pnaiw, simxmih jue, dikkag diyhh vin' nng xee qanjingr ee langg ee cuir, iacc si snax xee qanjingr ee langg ee cuir, jiacc tangx dring ix ee anr.
16 Narr u lamrsamw qanjingr :ee kiw laii qongqig boxlangg, qanjingr ix qniaa pnaiw,
17 Dyrr jitt nng xee sna' jner ee langg diyhh kia dirr Jehovah ee binrjingg, qapp dngsii ee jewsix, qapp simxpnuawqnuax ee binrjingg.
18 Simxpnuawqnuax diyhh siongser camng. Knuar ar, narr juer qanjingr ee langg, qyxzenn si qew qanjingr, ing qew qanjingr beh hai ix ee hniadi,
19 Linw dyrr diyhh kuanxtai ix, cincniu ix sniu beh kuanxtai ix ee hniadi :ee, anxnix dui' linw diongqanx druu kir hitt xee pnaiw.
20 Qi'uu ee langg tniax .qnir, longxx beh qniax, dyrr dirr linw diongqanx byy qycc qniaa jitt hy pnaiw.
21 Linw ee bagjiux m tangx kyxlinn ix, diyhh ing mia vuee mia, bagjiux vuee bagjiux, cuiwkiw vuee cuiwkiw, ciuw vuee ciuw, kax vuee kax.
20 Linw cud kir qapp duiwdik qaujenr ee sii, knuar qnir bew, ciax, ixqip vecsnir viw linw kacc je :ee, mrbenw qniax inx; in'ui cua linw cud Egipt-de ee Jehovah, linw ee Siongrder qapp linw dilehh.
2 Linw decbeh limdin qaujenr ee sii, jewsix diyhh qaur vecsnir ee binrjingg suanvor, duiww inx qongw,
3 'Islaellangg ar, linw diyhh tniax. Linw qinaxzit beh qapp vecsnir duiwdik qaujenr, m tangx sitdnaw, m tangx qniax, laii gniauhgniauc cuah, iarr m tangx in'ui inx laii lunxneh;
4 In'ui Jehovah, linw ee Siongrder dyrr si qapp linw snaqab kir :ee, beh ter linw qapp duiwdik qaujenr laii jinxqiur linw.'
5 Hiaxee qnuadniuw iarr diyhh duiww vecsnir suanvor, qongw, 'Jirjui kiw sinx cur iauxx bue qniaa logsingg ee lew ar? Ix diyhh dyr kir inx daux, qniax ix dinrbongg, vadd langg suacc laii qniaa logsingg ee lew.
6 Jirjui jingr pudyhngg, iauxx bue u ing diyc ix ee quexjiw ar? Ix iarr tangx dyr kir inx daux, qniax ix dinrbongg, vadd langg kir ing ix.
7 Jirjui pingwdnia bow, iauxx bue crua ix ar? Ix iarr tangx dyr kir inx daux, qniax ix dingrbongg, vadd langg crua ix.'
8 Hiaxee qnuadniuw qycc diyhh duiww vecsnir suanvor, qongw, 'Jirjui qniahniaa sitdnaw ar? Ix tangx dyr kir inx daux, qniax ix ee hniadi ee simx siau'ngiuu, cincniu ix ee simx jidngiu.'
9 Hiaxee qnuadniuw duiww vecsnir suanvor bingvik, diyhh setlip hiaxee qundniuw juewtauu laii cua vecsnir.
10 Linw uaw qin jit xee sniaa beh pah ee sii, diyhh dairsingx duiww ix suanvor hyvingg ee ue.
11 Ix narr ing hyvingg ee ue daphog linw, qra linw kuix sniamngg, hitt diongqanx soxu ee vecsnir longxx beh juer linw ee ce'ing, laii hogsai linw.
12 Ix narr m kingw qapp linw hyhyw, huanxdngw beh qapp linw qaujenr, linw dyrr diyhh uikunr ix.
13 Jehovah, linw ee Siongrder ing ix qauhur linw, linw dyrr diyhh ing dyx itjin taii siw ix hiaxee davodingx;
14 Dogdok hurluw, ginxaw, jingsnix, qapp sniaa-lai itcer soxx cniuw ee mic, linw tangx cniuw ix laii juer qaqi ee loring; linw soxx cniuw linw ee duiwdik ee mic, dyrr si Jehovah, linw ee Siongrdr soxx sniuxsur linw :ee, linw tangx jiah'ing.
15 Lirkuix linw hng hng hiaxee sniaa, m si jiaxee ledqog ee sniaa, linw diyhh anxnix kuanxtai ix.
16 Dogdok sriok jiaxee vecsnir ee sniaa, Jehovah, linw ee Siongrder ixqing’ sniuxsur linw juer giap, qidiongx qniww u cuanxkuir :ee, linw m tangx hro ix uac lehh;
17 Diyhh jiauww Jehovah, linw ee Siongrder soxx bingrling linw :ee, jiong' Hitlangg, Amolilangg, Kanaanlangg, Pelizlangg, Hivilangg, Jebuslangg, itjin qra bet,
18 Benw did inx qawsi linw yc itcer kyxngor ee su, dyrr si inx duiwdirr inx ee siongrder soxx qniaa :ee, drir qaur linw dikjue Jehovah, linw ee Siongrder.
19 Linw narr quw quw uikunr jit xee sniaa, qongqig beh cruw ix, dyrr m tangx ing voxtauu pah pnaiw ciurbak; in'ui linw tangx jiac ix ee quexjiw, soxiw m tangx cyr ix. Can'iaw ee ciurbak qamxx si langg, hro linw qra uikunr mah?
20 Dogdok linw soxx bad, m si tangx juer jiahmic ee ciu, tangx qra cyr .lyc .laii, qra huixhuai, ing ix laii juer qrongx sniaa ee kiwqu, qongqig hitt xee qapp linw qaujenr ee sniaa, qaur qongpuar ix.
21 Dirr Jehovah, linw ee Siongrder soxx sniuxsur linw juer giap ee de, narr duw diyc siurr taii ee langg dyw dirr can'iaw, m jaix si jirjui taii .siw .ee,
2 Linw ee dniuxlyw qapp simxpnuawqnuax diyhh cud laii nriuu ix, dui' siurr taii ee langg hitt dah, didqaur siwuii hiaxee sniaa,
3 Knuar dyclyc jit xee sniaa lirkuix siurr taii ee langg derr id qin, dyrr hitt xee sniaa ee dniuxlyw diyhh dui' guu-qrunn diongx cruw jit jiah m bad ing ix laii juer qangx, m bad quawdnax ee gujingw-aw.
4 Hitt xee sniaa ee dniuxlyw diyhh kanx gujingw-aw qaur u dnglaujuiw ee snuaqog, byy jingr byy jyh :ee, dirr hitt xee snuaqog qongwjic gujingw-aw ee amrqunw.
5 Jewsix Levilangg ee qniaxsunx diyhh qinruaw, in'ui Jehovah, linw ee Siongrder qingw inx laii hogsai Ix, tog Jehovah ee miaa jiokhog; soxu sna' qryr, sna' pah ee su, longxx diyhh jiauww inx ee ue laii gixduanr.
6 Hitt xee sniaa ee jiongww dniuxlyw, dyrr si lirkuix siurr taii ee langg derr id qin :ee, diyhh dirr hitt xee snuaqog diongx, soxx qongwjic amrqunw ee gujingw-aw ee dingxbin laii sew ciuw;
7 Iarr beh rinr qongxx, 'Guanw ee ciuw m bad lrauu jitt xee huih, guanw ee bagjiux iarr m bad knuar .qnir.
8 Jehovah ar, qriuu Liw siawbenw Liw ee vecsnir Islael, Liw soxx sioghuee :ee, byc did hro byy jue ee huih qruix dirr Linw ee vecsnir Islael.'
9 Anxnix lrauu hitt xee huih ee jue qapp ix byy qansiap, dyrr dui' linw diongqanx druu kir lrauu byy jue ee huih ee jue. Anxnix, linw u qniaa Jehovah knuar juer hyw :ee.
10 Liw cud kir qapp liw ee duiwdik qaujenr ee sii, Jehovah, linw ee Siongrder jiong' inx qaux dirr liw ee ciuw, liw iarr liac inx kir.
11 Hitt sii dirr siurr liac ee langg ee diongqanx, narr knuar qnir u bixluw, liw iarr luanbo ix, beh crua ix juer bow;
12 Dyrr tangx cua qaur liw ee qrex, ix dyrr diyhh tir taumngg, siux jngxqah,
13 Trngr kir ix siurr liac ee sii soxx cing ee snxax, diamr dirr liw ee qrex aikaur verbuw jit guehzit; zen'au liw tangx qapp ix dangvangg, liw juer ix ee diongrhux, ix juer liw ee bow.
14 Au .laii liw narr byy hnuahiw ix, dyrr diyhh hro ix cutjai ix ee iwsur cud .kir, quatduanr m tangx berjnii, iarr m tangx qra dongwjuer luxvi kuanxtai ix; in'ui liw ixqing’ qapp ix singcinx.
15 Langg narr u nng xee bow, jit xee si ix soxx tniar :ee, jit xee si ix soxx uanr :ee, longxx u qra ix snix qniaw, danrsi dua-qniaw si soxx uanr ee bow snix :ee.
16 Qaur hro qniaw singjiab giap ee zit, m tangx lip siurr tniar ee bow snix ee qniaw juer dua-qniaw, vnuaa quer jinx ee dua-qniaw,
17 Dyrr si siurr uanr ee bow ee qniaw; diyhh zin soxx uanr ee bow ee qniaw juer dua-qniaw, jiong' soxu ee giap hro ix siangx hxun, in'ui ix si kuiwlat ee kixtauu, dua-qniaw ee bingrhun si ix ee.
18 Langg narr u banrpuee gnoxgik ee qniaw, m tniax inx laurve ee ue, iacc si laurbuw ee ue, inx suizenn qingxqair ix, ix iuguann m tniax inx.
19 Ix ee ve qapp ix ee buw diyhh liac ix, tuax ix cud, duar qaur vunxsniaa ee dniuxlyw hiax, dyrr si ix vunxsoxjai ee sniamngg;
20 Qra hitt xee sniaa ee dniuxlyw qongw, 'Guanw jitt xee qniaw banrpuee gnoxgik, m tniax guanw ee ue, lamrsamw kaijnii, tamx jiac, hnor jiuw.'
21 Hitt xee sniaa ee jingwlangg dyrr diyhh ing jiyhtauu dimr hro ix siw; anxnix dyrr dui' linw diongqanx druu kir hitt xee pnaiw. Islael jingwlangg longxx beh tniax qnir laii qniax.
22 Langg narr huan ingqaix siw ee jue, siurr vanrjue siw, linw narr diaur ix dirr caa nirr,
23 Ix ee sinsix m tangx diaur dirr caa nirr quer mii, dikkag diyhh dirr hitt zit baijongr ix, benw did pah lasamm Jehovah, linw ee Siongrder sniuxsur linw juer giap ee de; in'ui siurr diaur siw ee langg si siurr Siongrder soxx jiuwjow :ee.
22 Linw narr knuar qnir linw ee hniadi ee guu, iacc si ngiuu, qniaa belo, linw m tangx dnir byy knuar .qnir, linw dikkag diyhh hro ix dywdngw laii linw ee hniadi hiax.
2 Linw ee hniadi narr lirkuix linw hng, iacc si linw m jaix guu si jirjui ee, dyrr diyhh kanx qaur linw ee cur, lauu dirr linw hiax, tingwhau linw ee hniadi laii cue, linw jiacc hingg ix.
3 Linw ee hniadi ee luu, iacc si ix ee snxax, bylun ix sitlyc simxmih, ix sitlyc, linw soxx kiyh .diyc .ee, longxx diyhh anxnix qniaa, m tangx dnir juer byy knuar .qnir.
4 Linw narr knuar qnir linw ee hniadi ee luu, iacc si guu, vuahdyw dirr lo nirr, m tangx dnir juer byy knuar .qnir, dikkag diyhh vangjan ix, huu ix kiw .laii.
5 Hurzinlangg m tangx cing davodingx soxx cing :ee, davodingx iarr m tangx cing hurzinlangg ee snxax; in'ui qniwnarr anxnix qniaa :ee, si Jehovah, linw ee Siongrder soxx iamwngor :ee.
6 Linw narr dirr lo nirr duw diyc jiauxsiu, higsi ciu nirr, higsi dirr de nirr, lairbin u jiauxaxqniaw, iacc si jiauxnng, jiauxbuw ngar jiauxqniaw, iacc si vu nxng, linw m tangx liac jiauxqniaw suar liac jiauxbuw;
7 Dikkag diyhh vangr jiauxbuw kir, jiauxaxqniaw linw tangx liac .kir. Anxnix linw dyrr tangx hiongxsiu hokkir qycc jiac dngg huewsiu.
8 Linw narr kiw sinx cur, diyhh juer lanqanx dirr cur-dingw, benw did langg dui' hiax vuac .lyc .laii; lrauu huih ee jue qruix dirr linw ee cur.
9 M tangx ing nng ngiu ee jingxjiw ia dirr linw ee pudyhngg, qniax e juer jit xe byy .kir, dyrr si linw soxx ia ee jingxjiw qetsit :ee, qapp linw ee pudyhngg qetsit :ee, longxx byy tangx ing.
10 M tangx ing guu qapp luu snaqab lee cann.
11 M tangx cing camcab ee vowliau, ngiumngg qapp iuwdue hab'id :ee.
12 Linw soxx muax ee snxax diyhh dirr ix ee siwuii juer ciux.
13 Langg narr cuarbow, qapp ix dangvangg, au .laii uanwhun ix,
14 Huixvongr ix pnaiw dai, pacpnaiw ix ee miaa, qongw, 'Guaw crua jitt xee jaboxqniaw, qapp ix dangvangg, knuar ix byy jairsikluw ee vinqir';
15 Jaboxqniaw ee verbuw diyhh tec jaboxqniaw jairsikluw ee vinqir .cud .laii, duar qaur ix sniamngg ee dniuxlyw hiax.
16 Jaboxqniaw ee laurve diyhh duiww dniuxlyw qongw, 'Guaw ing guaw ee jaboxqniaw hro jitt xee langg juer bow, ix uanwhun ix.
17 Knuar ar, ix huixvongr ix pnaiw dai, qongw: Guaw knuar linw ee jaboxqniaw byy jairsikluw ee vinqir. Jitt xee si guaw ee jaboxqniaw jairsikluw ee vinqir.' Verbuw dyrr jiong' hitt xee vor vaii dirr vunxsniaa dniuxlyw ee binrjingg.
18 Hitt xee sniaa ee dniuxlyw diyhh liac hitt xee langg laii jikhuat;
19 Iarr diyhh huat ix jit-vah ginn, hro jaboxqniaw ee laurve, in'ui ix u qabuu Islael jairsikluw ee pnaiw miaa. Jaboxqniaw iuguann juer ix ee bow, jit siwlangg m tangx lii cud ix.
20 Danrsi jitt xee su narr si jinx :ee, jaboxqniaw byy jairsikluw ee vinqir,
21 Inx diyhh liac hitt xee jaboxqniaw qaur ix ee laurve ee cur ee mngkauw; ix vunxsniaa ee langg diyhh ing jiyhtauu qra ix dimr siw, in'ui ix dirr Islael diongx qniaa qenwsiaur ee su, dirr ix ee laurve ee qrex qniaa imluann; anxnix dyrr dui' linw diongqanx druu kir hitt xee pnaiw.
22 Narr duw diyc u langg qapp qer diongrhux ee hurzinlangg dangvangg, qanhux qapp hitt xee hurzinlangg longxx diyhh hro inx siw; anxnix dyrr dui' Islael ee diongqanx druu kir hitt xee pnaiw.
23 Narr u jaboxqniaw, si jairsikluw :ee, ixqing’ juer langg dniardiyc, u langg dirr sniaa-lai duw diyc ix, qapp ix dangvangg;
24 Dyrr linw diyhh liac jitt nng langg cud kir qaur hitt xee sniamngg, ing jiyhtauu dimr siw inx; jaboxqniaw in'ui ix dirr sniaa-lai iauxquxx byy hauxqiur; davolangg, in'ui ix lingziok ix ee cuwvnix ee bow; anxnix dyrr dui' linw diongqanx druu kir hitt xee pnaiw.
25 Danrsi narr u langg dirr can'iaw duw diyc ixqing’ pingr dniardiyc ee jaboxqniaw, hitt langg qra ix qiongqanx, qandna’ hitt xee qra ix qiongqanx ee langg diyhh siw,
26 Danrsi hitt xee jaboxqniaw linw m tangx jnaixngiu vran ix, in'ui hitt xee jaboxqniaw byy juer ingqaix siw ee su. Jitt xee dairjir si cincniu jit xee langg kiw laii qongqig ix ee cuwvnix, taii siw ix jidngiu.
27 Ix dirr can'iaw duw diyc hitt xee ixqing’ juer .langg .ee jaboxginxaw; jaboxginxaw hauxqiur, iarr byy langg qiur ix.
28 Narr davolangg duw diycc bue pingr langg ee jairsikluw, knii ix, qapp ix sutongx, byy langg knuar .qnir,
29 Dyrr hitt xee qapp ix sutongx ee davolangg diyhh tec go-jap xee ginn, hro jaboxginxaw ee laurve, in'ui ix ixqing’ lingziok ix; qycc diyhh crua ix juer bow, jit siwlangg m tangx lii ix.
30 Langg m tangx crua laurve ee aurbow juer bow, m tangx henx kuix ix ee laurve ee snua'axqix.
23 Qniwnarr guarsinx siursiongx :ee, iacc si siurr iamquah :ee, m tangx zip Jehovah ee hue.
2 Sutongx laii snix ee qniaw m tangx zip Jehovah ee hue; suizenn qaur ix ee jap dai, iarr m tangx zip Jehovah ee hue.
3 Ammonlangg iacc si Moablangg, m tangx zip Jehovah ee hue; suizenn qaur inx ee jap dai, ingxuanw be tangx zip Jehovah ee hue;
4 In'ui linw cud Egipt ee sii, inx byy ing jiahmic qapp juiw, dirr lo nirr gniajih linw; qycc in'ui inx duiwdik linw, cniar Mesopotamia ee Petorlangg, Beor ee qniaw, Balaam laii jiuwjow linw.
5 Danrsi Jehovah, linw ee Siongrder m tniax Balaam; Jehovah, linw ee Siongrder hro hitt xee jiuwjow venr juer jiokhog; in'ui Jehovah, linw ee Siongrder tniar linw.
6 Linw jit siwlangg qaur ingxuanw m tangx qra inx doboo ving'anx qapp hokkir.
7 M tangx uanwhun Edomlangg, in'ui ix si linw ee hniadi; m tangx uanwhun Egiptlangg, in'ui linw bad cutgua dirr hiax;
8 Inx soxx snix ee qniaxsunx qaur derr snax dai tangx zip Jehovah ee hue.
9 Linw ee qundui cud kir qongqig linw ee duiwdik, dirr ngiavnuaa diyhh qaqi qimwqair itcer ee pnaiw su.
10 Linw diongqanx narr u langg, dirr mii .sii soxx duw .diyc .ee, laii bag byy cingkir, ix dyrr diyhh cud kir qaur ngiaa-gua, m tangx zip ngiaa-lai;
11 Qaur beh amr ee sii, ix diyhh ing juiw sew, qaur zit lyc jiacc tangx zip ngiaa.
12 Linw dirr ngiaa-gua qingw jit xui tangx cud kir qaur guarbin ee soxjai;
13 Dirr linw ee kiwqu lai diyhh u tuc'aw; linw dirr guarbin cutqiongx ee sii, diyhh ing ix qrut too, jiacc uat dngw srinx, kamr linw soxx vangr :ee;
14 In'ui Jehovah, linw ee Siongrder siwqer qniaa dirr linw ee ngiaa-lai, beh jinxqiur linw, jiong' linw ee duiwdik qaux hro linw; soxiw linw ee ngiavnuaa ingqaix diyhh u singwqed, benw did Ix knuar qnir linw diongqanx u uwuer, dyrr lirkuix linw.
15 Narr u lovok tuatli ix ee juxlangg, jauw qaur linw hiax, linw m tangx jiong' ix qaux hro ix ee juxlangg.
16 Ix beh qapp linw diamr, dirr linw hiax kia, dirr ix soxx qingw linw jit xee sniamngg lai ee soxjai, dyrr si soxx hnuahiw :ee, linw m tangx kihu ix.
17 Islael ee luxjuw diongx m tangx u qirluw.
18 Islael ee lamjuw diongx m tangx u luandongg. Ciongqix soxx did .diyc ee jnii, iacc si qauxlui ee qangjnii, linw m tangx duar zip Jehovah, linw ee Siongrder ee dxen laii sria guan; in'ui jitt nng hxang longxx si Jehovah, linw ee Siongrder soxx iamwngor :ee.
19 Linw ee hniadi duiww linw jiyh jniginn, iacc si jiyh jiahmic, jiyh qniwnarr e snix lirsig ee mic, linw longxx m tangx tec ix ee lirsig;
20 Linw jiyh guarjok ee langg, tangx tec ix ee lirsig, danrsi jiyh linw ee hniadi dyrr m tangx tec ix ee lirsig; jex tangx hro Jehovah, linw ee Siongrder dirr linw soxx kir beh did diyc juer giap ee de, dirr linw ee ciuw soxx juer itcer ee su, suwhog linw.
21 Linw duiww Jehovah, linw ee Siongrder he guan, sria guan, m tangx encenn; in'ui Jehovah, linw ee Siongrder dikkag beh duiww linw tyw. Linw narr byy sria guan, dyrr u jue;
22 Linw narr byy he guan, dyrr byy jue.
23 Qniwnarr dui' linw ee cuir soxx cud :ee, jiauww linw ixqing’ he guan dirr Jehovah, linw ee Siongrder laii qamsimx henr :ee, dyrr si linw ee cuir soxx rinw, linw diyhh jipsiuw laii qniaa ix.
24 Linw zip linw ee cuwvnix ee pudyhngg, tangx cutjai iwsur jiac pudyy qaur vaw, danrsi m tangx drew dirr linw ee kiwqu lai.
25 Linw zip linw ee cuwvnix iauxx bue quah ee gnoxqog diongx, tangx ing ciuw diah ix ee sui; danrsi m tangx ing liam'aw quah linw ee cuwvnix ee gnoxqog.
24 Langg narr cuarbow, zen'au knuar ix ee bow m dingwir, in'ui ix jaix ix u byy habgii ee su, dyrr tangx siaw lisux hro ix, qaux ix ee ciuw, crex ix lirkuix ix ee qrex.
2 Hurzinlangg lirkuix ix ee qrex liauxau, tangx kir qer vadd langg.
3 Narr si au jit xee diongrhux uanwhun ix, iarr siaw lisux qaux ix ee ciuw, qiyr ix lirkuix ix ee qrex, iacc si ix au jit xee diongrhux crua ix juer bow dyrr siw,
4 Dyrr hitt xee jingg ee diongrhux ixqing’ qiyr ix kir :ee, berdid tangx dirr ix pah lasamm ixau, qycc crua ix juer bow; in'ui jex si Jehovah soxx iamwngor :ee; m tangx hro Jehovah, linw ee Siongrder soxx sniuxsur linw juer giap ee de laii huanrjue.
5 Sinx cuarbow ee langg m tangx kir qaujenr, iarr m tangx qaudair ix vanrliw simxmih su; tangx hro ix dirr qrex-lai cinghann jit nii, tangx hro ix soxx crua ee bow hnuahiw.
6 M tangx ing langg ee jiyhby, iacc si jiyhby ee dingxdunw, juer junxdngr; in'ui jex si ing langg ee sniwmia juer junxdngr.
7 Narr duw diyc langg quaiw Islael diongx jit xee hniadi, kuanxtai ix juer lojaii, iacc si bre ix, hitt xee quaixqunr dyrr diyhh hro ix siw; anxnix, dyrr dui' linw diongqanx druu kir hitt xee pnaiw.
8 Taixqyx ee pnaiw jingwtauu, linw diyhh jin' sewzi. Jewsix Levilangg itcer soxx qawsi linw :ee, diyhh jiauww anxnix laii qniaa; guaw soxx bingrling inx :ee, linw diyhh jipsiuw laii qniaa.
9 Jaxjingg cud Egipt ee sii, Jehovah, linw ee Siongrder dirr lo nirr duiww Miliam soxx qniaa :ee, linw diyhh qir .did.
10 Linw bylun ing simxmih jiyh cuwvnix, m tangx zip ix ee qrex tec junxdngr,
11 Linw diyhh kia dirr guarbin, tingwhau qra linw jiyh ee langg tec junxdngr cud laii hro linw.
12 Hitt langg narr si songwhiongx, linw m tangx lauu ix ee junxdngr quer mii;
13 Zit lyc ee sii, dikkag diyhh ing hitt xee junxdngr hingg ix, hro ix ing ix ee snxax qah decc kunr; ix dyrr qra linw jiokhog. Jex dirr Jehovah, linw ee Siongrder ee binrjingg, beh sngr juer linw ee gi.
14 Kunwkow, songwhiongx ee cniawqanglangg, bylun si linw ee hniadi, iacc si cutguarlangg diamr dirr linw ee de, dirr linw ee sniamngg lai :ee, linw m tangx kihu ix.
15 Ix ee qangjnii linw hitt zit diyhh hro ix, m tangx tingwhau qaur zit lyc liauw; in'ui ix songwhiongx, quawsimx dirr hitt xee; qniax ix in'ui linw laii duiww Jehovah auqiyr, linw dyrr u jue.
16 M tangx in'ui qniaw laii hro laurve siw, iarr m tangx in'ui lauve laii hro qniaw siw; dagg langg diyhh uirdiyhh qaqi ee jue laii siw.
17 Linw simxpnuar, m tangx uan'ongw cutguarlangg qapp byy ve ee qniaw, iarr m tangx tec qnuaxhu ee ijniuu juer junxdngr.
18 Linw diyhh qir did linw dirr Egipt bad juer lojaii, Jehovah, linw ee Siongrder qiuwsiok linw dui' hiax cud; soxiw guaw bingrling linw diyhh anxnix qniaa.
19 Linw dirr cann nirr siuquah gnoxqog, narr be qir did jit sog dirr cann nirr, m tangx qycc uat dngw kir tec, diyhh lauu hro cutguarlangg qapp qozii qnuaxhu, drir qaur Jehovah, linw ee Siongrder beh dirr linw ee ciuw soxx juer itcer ee su, suwhog linw.
20 Linw pah linw ee qnanaxciu ixau, m tangx qycc srunn hitt xee ciurqix; diyhh lauu hro cutguarlangg qapp qozii qnuaxhu.
21 Linw banw linw ee pudyy, soxx cunx :ee m tangx qycc banw, diyhh lauu hro cutguarlangg, qapp qozii, qnuaxhu.
22 Linw iarr diyhh qir did linw dirr Egipt-de bad juer lojaii; soxiw guaw bingrling linw diyhh anxnix qniaa.
25 Langg narr u uanqex laii duiwsinr, qnuahuw pnuawduanr ix, dyrr diyhh dring girlangg juer gi, dring pnaiw langg juer pnaiw.
2 Pnaiw langg narr ingqaix siurr pah, simxpnuawqnuax diyhh hro ix pag dirr de nirr, dirr ix ee binrjingg, jiauww ix ee jue, jiauww siauwgiac pah ix;
3 Dogdok tangx pah ix sir-jap xee, m tangx quer siauwgiac; narr quer siauwgiac, pah ix kacc je xee, dyrr linw ee hniadi hro linw knuawkinx.
4 Guu decc lrunw gnoxqog, m tangx langw ix ee cuir.
5 Hniadi snaqab kiarkiw, qidiongx narr jit xee siw, byy qniaw, sixlangg ee bow m tangx qer guarlangg, ix diongrhux ee siyxdi diyhh zip kir ix hiax, crua ix juer bow, laii jin siyxjig ee vunxhun;
6 Ix soxx snix ee dua-qniaw, diyhh suawjiab siw ee hniax ee binghun, benw did ix ee miaa dirr Islael diongx siaubet.
7 Hitt langg narr m guanrir crua ix ee hniasyw, ix ee hniasyw dyrr diyhh qaur sniamngg ee dniuxlyw hiax qongw, 'Guaw ee diongrhux ee siyxdi m kingw dirr Islael diongx qra ix ee hniax tuann jit xee miazi, byy beh qra guaw jin siyxjig ee vunxhun.'
8 Ix sniaa-lai ee dniuxlyw dyrr diyhh qiyr ix laii, qra ix qongw; ix narr jip'ir, qongw, 'Guaw byy beh crua ix';
9 Ix ee hniasyw dyrr diyhh dirr dniuxlyw ee binrjingg jiurqin ix, trngr hitt langg kax nirr ee ree, pruir nxua dirr ix ee bin, qongw, 'Qniwnarr byy beh uirdiyhh hniax qenwlip ix ee qrex :ee, diyhh anxnix kuanxtai ix.'
10 Dirr Islael diongx, ix ee miaa beh cxingx juer trngr ree :ee ee qrex.
11 Narr u nng langg sna' pah, qidiongx jit langg ee bow qinruaw laii, beh qiur ix ee diongwhux tuatli pah ix ee langg ee ciuw, crunx ciuw knii diauu hitt langg ee ertew;
12 Dyrr diyhh jam dng hurzinlangg ee ciuw, bagjiux m tangx kyxlinn ix.
13 Linw ee dre-aw lai m tangx u nng ngiu ee pingjiw, u dua liap :ee, u ser liap :ee;
14 Cur-lai m tangx u nng ngiu ee jinx, dauw, uree dua, uree ser;
15 Diyhh ing junw junw qongvingg ee pingjiw, junw junw qongvingg ee jinx, duaw, tangx hro linw dirr Jehovah, linw ee Siongrder soxx sniuxsur ee de jiac dngg huewsiu;
16 In'ui qniwnarr qniaa jiaxee dairjir, qapp qniaa vutgi :ee, longxx si Jehovah, linw ee Siongrder soxx iamwngor :ee.
17 Linw diyhh qir did linw cud Egipt ee sii, Amaleklangg dirr lo nirr soxx kuanxtai linw :ee.
18 Inx dirr lo nirr duw diyc linw, dng' linw kunwkow iawsen ee sii, u jnaixngiu pah linw au dui, dyrr si dirr linw aurbin ee luanxziok :ee; inx iarr byy qnia'uir Siongrder.
19 Soxiw qaur Jehovah, linw ee Siongrder qiur linw tuatli siwuii longxjongw ee duiwdik, dirr Jehovah, linw ee Siongrder sniuxsur linw juer giap ee de, did diyc ving'anx, hitt sii linw diyhh jiong' Amalek ee miazi, dui' tnie catsiaux, m tangx be qir .did.
26 Linw ixqing’ qaur Jehovah, linw ee Siongrder soxx sniuxsur linw juer giap ee de, singjiab laii kiarkiw,
2 Dyrr diyhh dui' Jehovah, linw ee Siongrder sniuxsur linw ee de, jiong' soxx siux dagg hxang kixtauu sik ee toxsanw, tec damrvyc, he dirr kingx nirr, kir Jehovah, linw ee Siongrder soxx beh qingw andir Ix ee miaa ee soxjai.
3 Diyhh kir qnir dngsii juer jewsix :ee, qra ix qongw, 'Guaw qinaxzit duiww Jehovah, guaw ee Siongrder qongw bingg guaw ixqing’ qaur Jehovah duiww lanw ee ledjow jiuwjua sniuxsur lanw ee de.'
4 Jewsix dyrr dui' linw ee ciuw jrih hitt kingx, laii he dirr Jehovah, linw ee Siongrder ee dnxuaa-jingg.
5 Linw diyhh dirr Jehovah, linw ee Siongrder ee binrjingg qongw, 'Guaw ee jow si jit xee decbeh siw ee Alanlangg, lyc kir Egipt, qiawkax dirr hiax, langgiac jiyw jiyw; dirr hiax jniaa juer jit qog, dua qycc qiongg, langgiac qycc je.
6 Egiptlangg pnaiw kuanxtai guanw, koxcow guanw, ing koxqangx qiyr guanw juer;
7 Dui' hitt diap, guanw aiqiuu Jehovah, guanw ledjow ee Siongrder. Jehovah tniax guanw ee sniax, knuar qnir guanw ee koxcow, guanw ee diyhbuaa, guanw ee apvig;
8 Jehovah dyrr ing dua quanlingg ee ciuw, qapp crunx cud ee ciuxqud, qapp dua tangx qniax ee su, qapp sinziah, qrii su, cua guanw cud Egipt,
9 Qycc cua guanw qaur jitt soxjai, ing jitt xee de sniuxsur guanw, dyrr si lrauu linx qapp bit ee de.
10 Knuar ar, jitt xee de kixtauu sik :ee, Jehovah ar, Liw soxx sniuxsur guaw :ee, guaw dnaxx ixqing’ duar .laii.' Au .laii linw diyhh jiong' ix he dirr Jehovah, linw ee Siongrder ee bingrjingg, dirr Jehovah, linw ee Siongrder ee bingrjingg qingwvair Ix.
11 Linw qapp Levilangg, ixqip linw diongqanx ee cutguarlangg, diyhh in'ui Jehovah, linw ee Siongrder soxx sniuxsur linw qapp linw ee qequanr itcer ee hokhun laii hnuahiw.
12 Dagg vaiw qaur derr snax nii, dyrr si jap hxun tiux jit hxun ee nii, linw tiux itcer ee toxsanw jap hxun ee jit hxun, vunx hro Levilangg, qapp cutguarlangg, qapp qozii qnuaxhu, hro inx dirr linw ee sniamngg, tangx did diyc jiac vaw.
13 Linw qycc diyhh dirr Jehovah, linw ee Siongrder ee binrjingg qongw, 'Guaw ixqing’ dui' guaw ee qrex tec cud sxingr mic, suar hro Levilangg qapp cutguarlangg, qapp qozii qnuaxhu, si jiauww Liw soxx bingrling guaw itcer ee qaiwbing. Liw ee qaiwbing guaw longxx byy huan .diyc, iarr byy be qir .did.
14 Qusongx ee sii, guaw m bad jiac sxingr mic; byy cingkir ee sii, guaw m bad tec .kiw .laii, iarr byy ing ix juer sixlangg ee loring; guaw tniatanr Jehovah, guaw Siongrder ee ue, longxx jiauww Liw itcer soxx bingrling guaw :ee laii qniaa.
15 Qriuu Liw dui' tnix nirr, dui' Liw kiarkiw ee sxingr sow, ngar lyc knuar, suwhog Liw ee vecsnir Islael, qapp Liw soxx duiww guanw ee ledjow jiuwjua :ee, dyrr si lrauu linx qapp bit ee de.'
16 Qinaxzit Jehovah, linw ee Siongrder bingrling linw qniaa jiaxee ludle huatdo; soxiw linw diyhh jinrsimx jinrsingr jipsiuw laii qniaa ix.
17 Qinaxzit linw singzin Jehovah juer linw ee Siongrder, rinw beh qniaa Ix ee dyrlo, siuw Ix ee ludle, qaiwbing, huatdo, tniatanr Ix ee ue.
18 Jehovah qinaxzit iarr singzin linw juer Ix qaqi digvet ee vecsnir, jiauww Ix soxx ingwunw linw :ee, hro linw siuw Ix itcer ee qaiwbing;
19 Qycc hro linw duiwdirr ingqngx, miasniax, junquir, vnuaa quer Ix soxx congwjy banrqog ee vecsnir, hro linw qruix dirr Jehovah, linw ee Siongrder, juer singwqed ee vecsnir, jiauww Ix soxx qongw :ee."
27 Moses qapp Islael jiaxee dniuxlyw bingrling vecsnir qongxx, "Linw diyhh siuw guaw qinaxzit soxx bingrling linw itcer ee qaiwbing.
2 Linw quer Jordan, qaur Jehovah, linw ee Siongrder soxx sniuxsur linw ee de, hitt zit diyhh kia quiw der dua jiyc, ing hxex qra buah.
3 Linw ixqing’ quer .kir, diyhh siaw jitt xee ludhuad itcer ee ue dirr hitt dingxbin, tangx hro linw zip kir Jehovah, linw ee Siongrder soxx sniuxsur linw ee de, dyrr si lrauu linx qapp bit ee de, jiauww Jehovah, linw ledjow ee Siongrder soxx ingwunw linw :ee.
4 Linw ixqing’ quer Jordan, dyrr diyhh dirr Ebal Snuax kia guaw qinaxzit soxx bingrling linw hiaxee jiyc, ing hxex qra buah.
5 Dirr hiax diyhh uirr Jehovah, linw ee Siongrder kiw jit jxy dnxuaa, dyrr si jiyc ee dnxuaa, dirr hitt dingxbin m tangx drang diyc tickir;
6 Diyhh ing byy quer pah ee jiyc kiw Jehovah, linw ee Siongrder ee dnxuaa;
7 Dirr hitt dingxbin diyhh henr siyjer hro Jehovah, linw ee Siongrder; qycc diyhh henr siarunjer; iarr dirr hiax jiac, dirr Jehovah, linw ee Siongrder ee binrjingg hnuahiw.
8 Linw diyhh jiong' jitt xee ludhuad itcer ee ue, siaw bingg dirr hiaxee jiyc nirr."
9 Moses qapp jewsix Levilangg huanhur Islael jingwlangg qongxx, "Islael ar, diyhh jing jing laii tniax. Qinaxzit linw jniaa juer Jehovah, linw ee Siongrder ee vecsnir,
10 Soxiw diyhh tniatanr Jehovah, linw ee Siongrder ee ue, qniaa Ix ee qaiwbing ludle, dyrr si guaw qinaxzit soxx bingrling linw :ee."
11 Dng' hitt zit Moses bingrling vecsnir qongxx,
12 "Linw quer Jordan liauxau, Simeon, Levi, Judah, Issaqar, Josef, qapp Benjamin, jiaxee jipair, diyhh kia dirr Gelizim Snuax laii jiokhog vecsnir;
13 Rleuben, Gad, Aser, Zebulun, Dan, qapp Naftali, jiaxee jipair, diyhh kia dirr Ebal Snuax laii suanvor jiuwjow.
14 Levilangg diyhh dua sniax duiww Islael jingwlangg qongw:
15 Qniwnarr langg jewjy gnoxsiong, kig :ee, iacc si jur :ee, Jehovah soxx iamwngor :ee, dyrr si saihu ee ciuw soxx juer :ee, cai dirr amwjni ee soxjai, hitt langg diyhh siurr jiuwjow. Vecsnir longxx diyhh rinr qongxx, 'Amen'.
16 Knuawkinx laurve iacc si laurbuw :ee, diyhh siurr jiuwjow. Vecsnir longxx diyhh qongw, 'Amen'.
17 Isuaw cuwvnix ee qaiwjiw :ee, diyhh siurr jiuwjow. Vecsnir longxx diyhh qongw, 'Amen'.
18 Hro cnimilangg qniaa m driyc lo :ee, diyhh siurr jiuwjow. Vecsnir longxx diyhh qongw, 'Amen.'
19 Simxpnuar laii uan'ongw cutguarlangg qapp qozii qnuaxhu :ee, diyhh siurr jiuwjow. Vecsnir longxx diyhh qongw, 'Amen'.
20 Qapp laurve ee aurbow dangvangg :ee, diyhh siurr jiuwjow, in'ui ix u henx kuix ix ee laurve ee sna'axqix. Vecsnir longxx diyhh qongw, 'Amen'.
21 Bylun qapp simxmih sriur qauhap :ee, diyhh siurr jiuwjow. Vecsnir longxx diyhh qongw, 'Amen'.
22 Qapp siang ve ee jixbe, iacc siang buw ee jixbe dangvangg :ee, hitt langg diyhh siurr jiuwjow. Vecsnir longxx diyhh qongw, 'Amen'.
23 Qapp dniurmw dangvangg :ee, diyhh siurr jiuwjow. Vecsnir longxx diyhh qongw, 'Amen'.
24 Amwjni pah siw cuwvnix :ee, diyhh siurr jiuwjow. Vecsnir longxx diyhh qongw, 'Amen'.
25 Siurr vowlo laii hai siw byy jue ee langg :ee, diyhh siurr jiuwjow. Vecsnir longxx diyhh qongw, 'Amen'.
26 Byy qensiuw jiaxee ludhuad ee ue laii qniaa :ee, diyhh siurr jiuwjow. Vecsnir longxx diyhh qongw, 'Amen'.
28 Linw narr diwir tniax Jehovah, linw ee Siongrder ee ue, siuw Ix itcer ee qaiwbing laii qniaa, dyrr si guaw qinaxzit soxx bingrling linw :ee, Jehovah, linw ee Siongrder beh hro linw vnuaa quer tnie banrqog.
2 Linw narr tniax Jehovah, linw ee Siongrder ee ue, dyrr jiaxee soxx jiokhog :ee beh zib linw, beh qaur dirr linw;
3 Linw dirr sniaa-lai beh did diyc hokkir, dirr cann nirr beh did diyc hokkir;
4 Linw ee sinkux soxx snix :ee, linw ee toxde soxx cud :ee, linw ee jingsnix soxx cud :ee, ixqip guu ee gu'axqniaw, ngiuu ee ngiu'axqniaw, longxx beh did diyc hokkir.
5 Linw ee kingx-aw qapp linw ciaux mi ee kiwqu, longxx beh did diyc hokkir.
6 Linw zip .laii beh did diyc hokkir, cud .kir iarr beh did diyc hokkir.
7 Linw ee duiwdik kiw laii qongqig linw :ee, Jehovah beh hro inx taii sux dirr linw ee binrjingg; inx dui' jitt diauu lo cud laii qongqig linw, beh dirr linw ee binrjingg dui' jitt diauu lo laii jauw.
8 Jehovah beh bingrling hokkir hro linw, dirr linw ee cikcngx, qapp linw ee ciuw soxx juer itcer ee su; iarr beh suwhog linw dirr Jehovah, linw ee Siongrder soxx sniuxsur linw ee de.
9 Linw narr siuw Jehovah, linw ee Siongrder ee qaiwbing, qniaa Ix ee dyrlo, Jehovah beh setlip linw juer Ix qaqi sxingr ee vecsnir, jiauww Ix soxx duiww linw jiuwjua :ee;
10 Tnie banrvecsnir knuar qnir linw sriok dirr Jehovah ee miaa-xe, dyrr beh qnia'uir linw.
11 Linw dirr Jehovah duiww linw ee ledjow jiuwjua sniuxsur linw ee de, Jehovah beh hro linw ee sinkux soxx snix :ee, jingsnix soxx cud :ee, toxde soxx cud :ee, ciongjiog u cunx.
12 Jehovah beh qra linw kuix Ix tnix nirr vyxvuer ee kowvangg, lyc qibsii ee ho dirr linw ee de, dirr linw ee ciuw soxx juer itcer ee su suwhog linw. Linw beh jiyh hro jerje qog, qycc linw mrbenw jiyh.
13 Linw narr tniatanr Jehovah, linw ee Siongrder ee qaiwbing,
14 Dyrr si guaw qinaxzit soxx bingrling linw :ee, jipsiuw laii qniaa, byy penx jyw, byy penx iu, laii uaicuac guaw qinaxzit soxx bingrling linw jiaxee ue, kir tranr vadd xee siongrder laii hogsai, Jehovah dyrr beh hro linw juer tauu, byy juer buew; linw beh diamr dirr dingxbin, byy diamr dirr erbin.
15 Linw narr byy tniatanr Jehovah, linw ee Siongrder ee ue, byy jipsiuw laii qniaa Ix itcer ee qaiwbing, ludle, dyrr si guaw qinaxzit soxx bingrling linw :ee, jiaxee jiuwjow dyrr beh zib diyc linw, beh qaur dirr linw.
16 Dirr sniaa-lai linw beh siurr jiuwjow, dirr cann nirr linw iarr beh siurr jiuwjow.
17 Linw ee kingx-aw qapp linw ciaux mi ee kiwqu, longxx beh siurr jiuwjow.
18 Linw ee sinkux soxx snix :ee, linw ee de soxx cud :ee, ixqip guu ee gu'axqniaw, ngiuu ee ngiu'axqniaw, longxx beh siurr jiuwjow.
19 Linw zip laii beh siurr jiuwjow, cud kir iarr beh siurr jiuwjow.
20 In'ui linw qniaa pnaiw laii kiwsag Jehovah, Ix beh dirr linw ee ciuw soxx juer itcer ee su, hro jiuwjow, ziauxluan, jikhuat, qaur dirr linw, didqaur linw siurr huixbet, qinw qinw bedbyy.
21 Jehovah beh hro un'ik dnii linw, qaur Ix bedbyy linw dirr linw soxx zip kir singjiab ee de.
22 Jehovah beh ing siausanw, zedvni, huat'iam, dogzet, dyqiamr, qodaa, qapp hiuxnua qongqig linw; jiaxee longxx beh duizib linw, qaur linw bedbyy.
23 Linw taukag dingw ee tnix beh vnir juer dangg, kax-xe ee de beh vnir juer tih.
24 Jehovah beh hro linw derjniu ee ho vnir tohunw, vnir suax; Ix beh dui' tnix lyc dirr linw, qaur linw bedbyy.
25 Jehovah beh hro linw taii sux dirr linw duiwdik ee binrjingg; linw dui' jitt diauu lo cud kir dixdik inx, beh dirr inx ee binrjingg dui' jitt diauu lo laii dyjauw; linw beh dirr tnie banrqog diongx liulok.
26 Linw ee sinsix beh hro kongdiongx vuejiauw qapp derjniu ee jauxsiur juer jiahmic, iarr byy langg qnuaw ix.
27 Jehovah beh ing Egipt ee dog'iongx, dircngx, senw, be rix .did .ee, laii pah linw.
28 Jehovah beh ing denqongg, cnimii, simx ee qniahniaa, pah linw;
29 Linw beh dirr ziddiongdaur siwqer bongx, cincniu cnimii ee amwbongsax. Linw ee lo be hingtongx, siongsiongg duw diyc jewab, cniuxduat, byy langg jinxqiur linw.
30 Linw beh pingwdnia bow, vadd langg qapp ix dangvangg; linw beh kiw cur, byy tangx kia dirr hitt lairbin; linw beh jaijingr pudyhngg, iarr be did diyc jiac ix ee quexjiw.
31 Linw ee guu taii dirr linw ee bagjiux jingg, linw byy tangx jiac .diyc; linw ee luu dirr linw ee bak-jingg siurr cniuxduat, m hingg linw; linw ee ngiuu beh qruix linw ee duiwdik, byy langg ter linw qiur ix.
32 Linw ee qniaw jaboxqniaw beh qaux dirr vadd qog ee vecsnir, linw ee bagjiux beh knuar, tong' zit liaubang ix, qaur sitbingg, linw ee ciuw iarr byy lat tangx juer simxmih.
33 Linw ee toxsanw, qapp linw diyhbuaa soxx did .diyc .ee, beh hro linw soxx m bad ee qokbinn jiacc liauw liauw; linw qandna’ siurr kihu, siurr apjer.
34 Linw uirdiyhh linw ee bagjiux soxx knuar .qnir ee su, beh drir qaur denqongg.
35 Jehovah beh ing be rix .did ee dog'iongx pah linw, dirr linw ee katau'ux, katuiw, dui' linw ee kajniuw qaur taukag dingw.
36 Jehovah beh censuaw linw qapp linw soxx setlip quanxhad linw ee ongg, qaur linw qapp linw ee ledjow soxx m bad ee qog, dirr hiax, linw beh hogsai vadd xee siongrder, si caa :ee, jiyc :ee;
37 Linw dirr Jehovah soxx beh cua linw qaur ee ledqog diongx, beh hro langg gonggniac, hro langg juer uervnir, siurr qicir;
38 Linw beh duar jerje jingxjiw qaur cann nirr, danrsi soxx siux :ee si jin' jiyw, in'ui cauxmeh beh jiac ix.
39 Linw beh jaijingr pudyhngg laii siujingw ix, danrsi byy tangx limx juiw, byy tangx banw quexjiw, in'ui tangg beh jiac ix.
40 Tong' qingxlai linw beh u qnanaxciu, danrsi byy ix ee iuu tangx buah linw ee sinkux, in'ui linw ee qnanaxciu be diauu liap.
41 Linw beh snix qniaw jaboxqniaw, byy tangx juer linw ee, in'ui inx beh hro langg liac .kir.
42 Linw ee ciurbak, qapp linw ee toxsanw, cauxmeh beh itjin jiac ix.
43 Linw diongqanx ee cutguarlangg beh naxx sringx naxx quann, linw beh naxx qangr naxx qe.
44 Inx beh jiyh linw, danrsi linw byy tangx jiyh ix; inx beh juer tauu, linw beh juer buew.
45 Jiaxee jiuwjow beh longxx qaur dirr linw, beh duix linw, beh zib diyc linw, qaur linw bedbyy, in'ui linw byy tniatanr Jehovah, linw ee Siongrder ee ue, byy siuw Ix soxx bingrling linw hiaxee qaiwbing ludle.
46 Jiaxee jiuwjow beh qaur dirr linw qapp linw ee horer, juer sinziah qrii su, qaur ingxuanw.
47 In'ui linw byy uirdiyhh linw ee hyxgiac, ing hnuahiw ee simx kuaiwlok ee iwsur, laii hogsai Jehovah, linw ee Siongrder;
48 Soxiw linw beh duw diyc iaugy, cuiwdax, tngwteh, byy vnuar hxang mic, hogsai Jehovah soxx crex laii qongqig linw ee duiwdik; inx beh ing ticdnax qruar dirr linw ee amrqunw qaur bedbyy linw.
49 Jehovah beh dui' hng hng, dui' derqig, cua jit qog cincniu ringx :ee vuex laii qongqig linw.
50 Hitt xee qog ee ue, linw berhiauw tniax; hitt xee qog ee langg bin hiongg qaiwqair, byy textiab laurlangg, iarr byy linbinw ginxaw.
51 Inx beh jiac linw ee jingsnix soxx snix :ee, qapp linw ee toxsanw, qaur linw bedbyy. Linw ee gnoxqog, jiuw, iuu, ixqip guu ee gu'axqniaw, ngiuu ee ngiu'axqniaw, longxx byy qra linw lauu lehh, qaur inx bedbyy linw.
52 Inx beh uikunr linw dirr linw dagg xee sniamngg lai, qaur linw soxx uaxkyr quann qycc qenqor ee sniacniuu longxx dyxhuai dirr linw ee juann de; inx beh uikunr linw dirr linw dagg xee sniamngg lai, dirr Jehovah, linw ee Siongrder soxx sniuxsur linw ee juann de.
53 Linw ee duiwdik uikunr linw, linw dirr kunxvig kunwkow ee diongqanx, beh jiac linw ee sinkux soxx snix :ee, dyrr si Jehovah, linw ee Siongrder soxx sniuxsur linw ee qniaw jaboxqniaw ee bah.
54 Linw diongqanx iuwsiur vutjiw sewzi ee langg, bagjiux beh grinn ix ee hniadi, qapp ix simhuaii diongx ee bow, ixqip qi'uu soxx cunx ee qniaxzii;
55 Drir qaur ix byy beh ing ix soxx jiac qniaxzii ee bah, vunx jit diamw aw hro inx diongqanx ee jit langg, in'ui linw dirr dagg xee sniamngg lai, siurr duiwdik uikunr, dua dua kunxvig linw ee sii, ix byy cunx vnuar hxang.
56 Linw diongqanx iuwsiur sewzi ee hurzinlangg, vingsor m qnaw ing kajniuw dac de :ee, beh grinn ix simhuaii diongx ee diongrhux,
57 Qapp ix ee qniaw, ix ee jaboxqniaw, ixqip ix sinkux soxx cud ee xuix, qapp ix soxx snix hiaxee qniaw; in'ui dirr linw siurr uii, hro duiwdik dirr linw jiaxee sniamngg lai kunxvig linw kunwkow ee sii, ix in'ui vachang mic kiamwkueh, soxiw beh taux jiac ix.
58 Narr linw byy jipsiuw laii qniaa jitt vunw ceh soxx qir ludhaud itcer ee ue, byy qingwuir u ingqngx tangx qnia'uir ee miaa, dyrr si Jehovah, linw ee Siongrder,
59 Jehovah dyrr beh ing qiquair ee jaieh, dyrr si qik dua qik quw ee jaieh, qapp qik dang qik quw ee vni, qaur dirr linw, ixqip linw ee horer;
60 Iarr beh hro linw soxx qniax Egipt hiaxee vnirjingr longxx limqaur dirr linw, iarr beh dnii dirr linw ee sinkux;
61 Lenrr hiaxee byy qir dirr jitt vunw ludhuad ee ceh ee jaieh vnirjingr, Jehovah beh hro ix longxx qaur dirr linw, qaur linw bedbyy.
62 Linw jingg suizenn cincniu tnidingw ee cnxix hiacc je, danrsi in'ui linw byy tniatanr Jehovah, linw ee Siongrder ee ue, soxiw linw soxx cunx ee siauwgiac dyrr beh jiyw jiyw.
63 Jingg Jehovah liac suwhog linw, hro linw hing'ong juer hnuahiw, au .laii Jehovah iarr beh liac huixbet linw, bedbyy linw juer hnuahiw; linw iarr beh dui' linw soxx zip kir singjiab ee de siurr vuic .kiw .laii.
64 Jehovah beh hro linw siwsnuar dirr banrvecsnir diongx, dui' de jitt xee qigtauu qaur de hitt xee qigtauu; linw beh dirr hiax hogsai vadd xee siongrder, si linw qapp linw ee ledjow soxx m bad, caa :ee, jiyc :ee.
65 Dirr hiaxee qog-lai, linw be did diyc anzenn, linw ee kax iarr be did diyc hiyckunr. Jehovah iarr beh hro linw dirr hiax simx pogpok cingw, bagjiux sitbingg, jingsinn suevai.
66 Linw ee sniwmia dirr linw ee binrjingg byy-dnia-byy-diyc, linw mizit qniahniaa, linw ee sniwmia byy unxdangr.
67 Linw in'ui simlai soxx qniahniaa :ee, bagjiux soxx knuar .qnir .ee, jaxkiw beh qongw, 'Kow be did jitt sii amr!' amwsii beh qongw, 'Kow be did jitt sii tnix qngx!'
68 Jehovah beh hro linw jre junn dyr kir Egipt, dui' hitt diauu lo, dyrr si guaw bad duiww linw qongw linw be qycc knuar .qnir .ee; dirr hiax linw beh bre vunxsinx hro duiwdik juer lovok luxvi, danrsi byy langg brew."
29 Jiaxee si Jehovah, dirr Moab-de, bingrling Moses qapp Islaellangg lip iog ee ue, si Ix dirr Holeb qapp inx soxx lip ee iog ixgua :ee.
2 Moses driaur Islael jingwlangg laii, qra inx qongw, "Jehovah dirr Egipt-de, dirr linw ee bagjiux jingg duiww Falaoh, qapp ix ee jiongww zinsinn, ixqip ix juann de, soxx qniaa itcer ee su linw longxx u knuar .qnir,
3 Dyrr si linw cinbak knuar .qnir ee dua ciwgiam, qapp sinziah, qapp hiaxee dua qrii su.
4 Danrsi qaur qinaxzit Jehovah iauxx byy hro linw e hiauxgno ee simx, e knuar .qnir ee bagjiux, qapp e tniax .qnir ee hnirkangx.
5 Guaw cua linw dirr kongwiaw sir-jap nii, linw sinkux ee snxax byy puar, kax nirr ee ree iarr byy puar;
6 Linw byy jiac vniaw, iarr byy limx cringx jiuw qau jiuw; jex si beh hro linw jaix Ix dyrr si Jehovah, linw ee Siongrder.
7 Linw qaur jitt soxjai, Hesbon Ongg Sihon, Basan Ongg Og, cud laii qapp lanw qaujenr;
8 Lanw dyrr qongqig inx, cruw inx ee de, hro Rleuben ee jipair, Gad ee jipair, qapp Manasseh vnuar jipair juer giap.
9 Soxiw linw diyhh jipsiuw laii qniaa jitt xee iog ee ue, tangx hro linw dirr itcer soxx qniaa ee su hingtongx.
10 Qinaxzit linw jingwlangg, linw ee siuxlingw, linw ee jipair, linw ee dniuxlyw, linw ee qnuadniuw, Islael ee davodingx,
11 Linw ee qniaxzii, linw ee bow, qapp linw ngiaa-lai ee cutguarlangg, dui' linw ee puar caa :ee qaur linw ee cnriu juiw :ee, longxx kia dirr Jehovah, linw ee Siongrder ee binrjingg,
12 Hro linw zip dirr Jehovah, linw ee Siongrder ee iog, iarr zip dirr Jehovah, linw ee Siongrder qinaxzit qapp linw soxx jiuwjua :ee;
13 Hro Ix jiauww Ix soxx bad duiww linw qongw :ee, qycc jiauww Ix duiww linw ee ledjow Ablaham, Isaac, qapp Jakob soxx jiuwjua :ee, qinaxzit setlip linw juer Ix ee vecsnir, Ix juer linw ee Siongrder.
14 Guaw m na qapp linw lip jitt xee iog, qapp jitt xee jiuwjua,
15 Iarr si qapp hiaxee qinaxzit qapp lanw drangg kia dirr Jehovah, lanw ee Siongrder ee binrjingg :ee, ixqip qinaxzit byy qapp lanw drangg dilehh ee langg zip :ee;
16 (In'ui lanw jnaixngiu diamr dirr Egipt-de, qycc lanw jnaixngiu qingquer linw soxx dui' hiax quer ee ledqog, jex si linw soxx jaix :ee;
17 Linw iarr knuar qnir inx diongqanx tangx iamwngor ee mic, qapp inx hiaxee caa, jiyc, qimx, ginn ee gnoxsiong;)
18 Qniax linw diongqanx, higsi qajok, higsi jipair, inx ee simx qinaxzit vuerbiu Jehovah, lanw ee Siongrder, kir hogsai hiaxee qog ee siongrder; qycc qniaa linw diongqanx u pnaiw qinx snix cud dok cauw qapp indinn.
19 Ix tniax qnir jitt xee jiuwjow ee ue, simlai iuguann qaqi an'uir qongxx, 'Guaw suizenn qniaa dairjir, simx gni, jiong' dax :ee, damm :ee longxx huixbet, guaw iauxquxx e ving'anx';
20 Jehovah byy beh siawbenw ix, Jehovah ee siurkir qapp dowki, beh siyx hitt langg, jiong' jitt vunw ceh soxx qir itcer ee jiuwjow, longxx beh qaur dirr ix ee sinkux. Jehovah qycc beh dui' tnie catbet ix ee miaa,
21 Iarr beh jiauww jitt xee ludhuad ee ceh soxx qiwjair ee iog itcer ee jiuwjow, dui' Islael jiongww jipair ee diongqanx hunvet ix, hro ix duw diyc jaieh.
22 Au dai, linw horvuer ee qniaxsunx, qapp hng hng laii ee guarqoklangg, knuar qnir hitt soxjai ee jaieh, ixqip Jehovah soxx hro inx duw .diyc ee vnirjingr,
23 Qycc knuar qnir venww de u ziu'ngg, u iamm, u huew siyx, byy jingwjyh, byy cutsanw, lenrr cauw iarr byy huatsnix dirr hiax, cincniu Sodom, Gomollah, Admah, qapp Zeboiim huixhuai, dyrr si Jehovah dua siurkir ee sii soxx huixhuai :ee jidngiu.
24 Hiaxee ledqog, inx longxx beh qongw, 'Jehovah sniaw su duiww jitt xee de anxnix qniaa ar? Jitt xee siurkir hiacc bingxlet si simxmih iwsur ar?'
25 Langg beh qongw, 'Si in'ui inx kiwsag Jehovah, inx ledjow ee Siongrder ee iog. Hex si Ix cua inx cud Egipt-de ee sii soxx lip :ee.
26 Inx kir tranr vadd xee siongrder, hogsai ix, si inx vingsor soxx m bad ee siongrder, Jehovah m bad hunpair hro inx :ee.
27 Soxiw Jehovah huad dua siurkir dirr jitt xee de, jiong' jitt xee ceh soxx qir itcer ee jiuwjow, longxx qangr lyc dirr inx.
28 Jehovah dirr siurkir diongx dua siurkir, tongwhun, vuic inx cud inx ee de, hed inx dirr guarvangx, cincniu qinaxzit jidngiu.'
29 Viwbat ee su, sriok dirr Jehovah, lanw ee Siongrder; henxbingg ee su, si ingxuanw sriok dirr lanw qapp lanw ee qniaxsunx, beh hro lanw qniaa jitt xee ludhuad itcer ee ue.
30 Jiaxee dairjir, dyrr si guaw soxx vailet dirr linw ee binrjingg ee jiokhog qapp jiuwjow, jionglaii qaur dirr linw, linw dirr Jehovah, linw ee Siongrder soxx qnuaw linw qaur ee ledqog diongx,
2 Linw ee simx dyrr e qir .did. Linw qapp linw ee qniaxsunx narr jinrsimx jinrsingr qui'ngr Jehovah, linw ee Siongrder, tniatanr Ix ee ue, jiauww guaw qinaxzit itcer soxx bingrling linw :ee,
3 Dyrr Jehovah, linw ee Siongrder beh hro linw siurr liac ee langg dywdngw .laii, beh linbinw linw, beh jurjip linw dui' Jehovah, linw ee Siongrder soxx siwsnuar linw qaur ee ledqog dywdngw .laii.
4 Linw siurr qnuaxdiok :ee, narr u dirr tnivnix :ee, Jehovah, linw ee Siongrder iarr beh dui' hiax jurjip linw, duar linw dui' hiax dyr .laii.
5 Jehovah, linw ee Siongrder beh cua linw zip linw ee ledjow soxx singjiab ee de, Ix iarr beh hyw kuanxtai linw, hro linw ee langgiac qetnix viw linw ee ledjow kacc je.
6 Jehovah, linw ee Siongrder beh dirr linw ee simx, qapp linw ee horer ee simx, qniaa qatlew, hro linw jinrsimx jinrsingr tniar Jehovah, linw ee Siongrder, hro linw tangx did diyc uac.
7 Jehovah, linw ee Siongrder beh jiong' jex itcer ee jiuwjow he dirr linw ee duiwdik, qapp uanwhun linw, kunxvig linw ee langg ee sinjniu;
8 Linw beh dywdngw tniatanr Jehovah ee ue, qniaa Ix itcer ee qaiwbing, dyrr si guaw qinaxzit soxx bingrling linw :ee.
9 Linw narr tniatanr Jehovah, linw ee Siongrder ee ue,
10 Jipsiuw jitt xee ludhuad soxx qir ee qaiwbing ludle, qycc jinrsimx jinrsingr qui'ngr Jehovah, linw ee Siongrder, Jehovah, linw ee Siongrder beh hro linw ee ciuw soxx juer itcer ee su, qapp linw ee sinkux soxx snix :ee, jingsnix soxx cud :ee, toxde soxx cud :ee, ciongjiog u cunx; in'ui Jehovah beh qycc hnuahiw linw, suwhog linw, cincniu jingg hnuahiw linw ee ledjow jidngiu.
11 In'ui guaw qinaxzit soxx bingrling linw ee qaiwbing, m si linw soxx juer be qaur :ee, iarr byy dirr hng hng.
12 M si dirr tnix nirr, drir qaur linw qongw, 'Jirjui uirr guanw jnriu tnix, duar laii guanw jiax, hro guanw tniax .qnir laii qniaa ix ar?'
13 Iarr m si dirr haixgua, drir qaur linw qongw, 'Jirjui uirr guanw quer haiw duar laii guanw jiax, hro guanw tniax .qnir laii qniaa ix ar?'
14 Jitt xee ue qapp linw jin' qin, dyrr si dirr linw ee cuir, dirr linw ee simx, hro linw tangx laii qniaa ix.
15 Knuar ar, guaw qinaxzit u ing uac qapp hokkir, siw qapp jaieh, vailet dirr linw ee binrjingg;
16 Dyrr si guaw qinaxzit bingrling linw tniar Jehovah, linw ee Siongrder, qniaa Ix ee dyrlo, siuw Ix ee qaiwbing, ludle, huatdo, hro linw tangx uac lehh, qetnix langgiac. Jehovah, linw ee Siongrder dyrr beh dirr linw soxx beh zip kir singjiab ee de suwhog linw.
17 Setsuw linw ee simx vuerbiu m tniatanr, qycc siurr iuxhik, kir qingwvair vadd xee siongrder, hogsai ix,
18 Guaw qinaxzit dyrr bingg bingg qra linw qongw, linw dikkag beh bedbyy. Dirr linw quer Jordan zip kir singjiab ee de, linw ee zidjiw be e quxdngg.
19 Guaw qinaxzit qiyr tnix qiyr de duiww linw juer qanjingr, guaw ing snix, siw, jiokhog, jiuwjow, vailet dirr linw ee binrjingg. Linw diyhh qingw uahmia, hro linw qapp linw ee horer longxx e uac lehh,
20 Laii tniar Jehovah, linw ee Siongrder, tniax Ix ee ue, qetlenn dirr Ix; in'ui Ix si linw ee uahmia, linw ee zidjiw quxdngg iarr jairdirr Ix, hro linw tangx kiarkiw dirr Jehovah duiww linw ee ledjow Ablaham, Isaac, qapp Jakob jiuwjua soxx beh sniuxsur inx ee de."
31 Moses ing jiaxee ue kir qra Islael jingwlangg qongw. Duiww inx qongw,
2 "Guaw qinaxzit jit-vah zi-jap huer, be qycc jiauwsiongg cutzip. Jehovah iarr bad duiww guaw qongw, 'Liw be e quer jitt xee Jordan.'
3 Jehovah, linw ee Siongrder beh cua linw quer .kir, beh bedbyy jiaxee qog dirr linw ee binrjingg; linw beh singjiab inx. Josua beh cua linw quer .kir, cincniu Jehovah soxx bad qongw :ee.
4 Jehovah beh kuanxtai inx, cincniu jingg zit kuanxtai Ix soxx bet Amolilangg nng xee ongg, Sihon qapp Og, ixqip inx ee de jidngiu.
5 Jehovah beh qra inx qaux dirr linw ee binrjingg. Linw diyhh jiauww guaw soxx huanhur linw itcer ee bingrling kuanxtai inx.
6 Linw diyhh iongxqamw jongwdnaw, byc did qniax inx, iarr byc did lunw inx; in'ui Jehovah, linw ee Siongrder qapp linw kir, Ix byy lirkuix linw, iarr byy vangwsag linw."
7 Moses qiyr Josua laii, dirr Islael jingwlangg ee binrjingg duiww ix qongw, "Liw diyhh iongxqamw jongwdnaw, in'ui liw beh qapp jitt xee vecsnir kir, zip Jehovah duiww inx ledjow jiuwjua beh hro inx ee de; liw iarr beh hro inx did diyc ix juer giap.
8 Jehovah beh qniaa dirr liw ee binrjingg; Ix beh qapp liw dilehh, Ix byy lirkuix liw, iarr byy vangwsag liw; byc did qniax, iarr byc did lunw."
9 Moses siaw jitt xee ludhuad, qaux hro qrngx Jehovah iokqui ee jewsix, Levi ee qniaxsunx, qapp Islael ee jiongww dniuxlyw.
10 Moses bingrling inx qongxx, "Muixx cid nii ee lorbuew, dyrr si dirr tauxvangr ee nii dniardiyc ee qrii, Dacliaujeh ee sii,
11 Islael jingwlangg laii qaur Jehovah, linw ee Siongrder ee binrjingg, dirr Ix soxx qingw ee soxjai. Hitt sii linw diyhh dirr Islael jingwlangg ee binrjingg tak jitt xee ludhuad hro inx tniax.
12 Linw diyhh jurjip vecsnir, davox, ginxaw, ixqip linw sniamngg lai ee cutguarlangg, hro inx tniax, hro inx hagsip, tangx qingwuir Jehovah, linw ee Siongrder, jipsiuw laii qniaa jitt xee ludhuad itcer ee ue;
13 Iarr hro inx m jai'ngiaw ee qniaxzii did diyc tniax .qnir. Dyrr dirr linw quer Jordan soxx singjiab ee de, jiauww linw diamr dirr hiax itcer ee zit tangx hagsip qingwuir Jehovah, linw ee Siongrder."
14 Jehovah duiww Moses qongw, "Knuar ar, liw siw ee qrii qin lar. Liw driaur Josua laii, snaqab kia dirr huerbo diongx. Guaw beh ing jitzim bingrling ix." Moses dyrr qapp Josua kir snaqab kia dirr huerbo diongx.
15 Jehovah dirr huerbo lai, huntiau diongx henxhen; huntiau tingg dirr huerbo ee mngg ee dingxbin.
16 Jehovah qycc duiww Moses qongw, "Knuar ar, liw beh qapp liw ee ledjow snaqab kunr. Jitt xee vecsnir beh kiw .laii, qniaa sia'imm laii tranr ix soxx beh kir diamr hitt soxjai guarbin ee siongrder, lirkuix Guaw, vue Guaw qapp inx soxx lip ee iog.
17 Hitt sii, Guaw beh duiww inx huad cud siurkir. Guaw iarr beh lirkuix inx, ngx bin m knuar inx. Inx beh siurr tunbet, duw diyc jerje jaieh huanrlan. Hitt zit inx beh qongw, 'Lanw duw diyc jaieh huanrlan, qamxx m si in'ui lanw ee Siongrder byy dirr lanw ee diongqanx mah?'
18 Hitt zit in'ui inx pen'ngr vadd xee siongrder soxx qniaa itcer ee pnaiw, soxiw Guaw quatduanr ngx Guaw ee bin.
19 Dnaxx liw qaqi diyhh siaw jitt xee quax, ing hitt xee qawsi Islael ee qniaxsunx, hro inx ee cuir liam, hro jitt xee quax qra Guaw juer qanjingr dirr Islael ee qniaxsunx.
20 In'ui Guaw cua inx zip Guaw duiww inx ee ledjow soxx jiuwjua hitt xee lrauu linx qapp bit ee de; inx did diyc jiac qycc vaxjiog, sintew vuii, dyrr beh pen'ngr vadd xee siongrder hogsai inx, knuawkinx Guaw, vue Guaw ee iog.
21 Qaur inx duw diyc jerje jaieh huanrlan ee sii, jitt xee quax beh dirr inx ee binrjingg juer qenwjingr laii qanjingr inx; in'ui inx ee qniaxsunx ee cuir beh liam, byy be qir .did. Henrjai Guaw iauxx bue cua inx qaur Guaw soxx jiuwjua ee de, inx soxx jrunn ee liamrtauu, Guaw ixqing’ jaix."
22 Dng' hitt zit Moses dyrr siaw jitt xee quax, jiong' ix laii qawsi Islael ee qniaxsunx.
23 Jehovah huanhur Nun ee qniaw Josua qongxx, "Liw diyhh iongxqamw jongwdnaw, in'ui liw beh cua Islaeldlangg zip Guaw soxx jiuwjua hro inx ee de. Guaw beh qapp liw snaqab dilehh."
24 Moses ing jitt xee ludhuad ee ue siaw dirr ceh nirr, itjin siaw bingvik.
25 Moses dyrr huanhur qrngx Jehovah iokqui ee Levilangg, qongw,
26 "Jiong' jitt xee ludhuad ee ced he dirr Jehovah, linw ee Siongrder ee iokqui vnix, tangx dirr hiax juer linw ee qanjingr.
27 In'ui guaw jaix linw si vuergik :ee, si amrqunw gni :ee. Knuar ar, Guaw qinaxzit iauxx uac lehh qapp linw dilehh, linw siongrcniaw vuergik Jehovah, hyhongr guaw siw liauxau ar?
28 Diyhh jurjip linw jiaxee jipair ee dniuxlyw qapp qnuadniuw longxx laii, guaw beh qongw jiaxee ue hro inx tniax, iarr beh qiyr tnix qiyr de hro inx juer qanjingr.
29 In'ui guaw jaix guaw siw liauxau, linw beh juanzenn vairhuai, uaicuac guaw soxx bingrling linw qniaa ee dyrlo. Zid'au linw beh duw diyc jaieh, in'ui linw beh qniaa Jehovah soxx knuar juer pnaiw ee su, ing linw ee ciuw soxx juer ziaw Ix ee siurkir."
30 Moses jiong' jitt xee quax ee ue, tauu qaur buew qongw hro Islael juann hue tniax.
32 Jiaxee tnix ar, ngar hnirkangx, guaw beh qongxue;
Guan de iarr diyhh tniax guaw ee cuir soxx qongw :ee.
2 Guaw ee qawsi beh cincniu ho qangr lyc,
Guaw ee ue cincniu lorjuiw decc dih;
Cincniu mngx mngx ee ho lyc dirr iur iur ee cauw,
Cincniu dua ho lyc dirr caiwsex.
3 In'ui guaw beh suantuann Jehovah ee miaa;
Linw diyhh jrunx lanw ee Siongrder juer dua.
4 Juer Jiyhvnua :ee, Ix soxx juer :ee si uanjuann,
Ix ee lo longxx si qongvingg;
Si jinsit ee Siongrder, longxx byy vutgi;
Ix si qonggi, qycc jingwdit.
5 Jitt xee quaipiah uankiaux ee sewdai qaqi vairhuai;
M si Ix ee qniaw, is inx ee verving.
6 Gugong budix ee vecsnir ar,
Linw anxnix vywdab Jehovah mah?
Ix qamxx m si linw ee laurve, brew linw :ee mah?
Ix u congwjy linw, qenwlip linw.
7 Diyhh qir did qoxjaw ee zit,
Siauwliam ligdai ee nii;
Mng linw ee laurve, ix beh jixsi linw,
Mng linw ee laurdua, inx beh qra linw qongw.
8 Jiww quann ee vunxgiap hro ledvangx.
Vunkuix sewqanx langg ee sii,
Dyrr dniardiyc vecsnir ee qaiwhan,
Jiauww Islaellangg ee siauwgiac.
9 Jehovah ee hunrgiac si Ix ee vecsnir;
Ix soxx did .diyc ee sanxgiap si Jakob.
10 Ix duw diiyc ix dirr pahngx ee de,
Dirr honghuer, iaxsiur hauw ee kongwiaw,
Ix uisec ix, knuawqor ix,
Vyxho ix cincniu bagjiuzinn.
11 Qycc cincniu ingjiauw la ix ee siu,
Dirr ringx-aw dingxbin et ix ee sxit,
Tiw kuix sidqow laii srinn ix,
Jair ix dirr ix ee sidqow.
12 Jixu Jehovah cua ix,
Byy vadd xee siongrder qapp ix dilehh.
13 Dyrr hro ix kiaa dirr derjniu quann ee soxjai,
Did diyc jiac cann nirr ee toxsanw;
Qycc hro ix dui' jiyhvnuaa suh bit,
Dui' huexjiyc suh iuu;
14 Iarr jiac gulin'iuu, qapp ngiuu'iuu,
Vuii ee ngiu'axqniaw,
Basan soxx cud ee mi'ngiuqangw qapp snua'ngiuu,
Qapp siongrr hyw ee siyxbec;
Iarr limx pudyjiab ee jiuw.
15 Jesulun vuiii dyrr awvar,
Linw ixqing’ vuii, qycc dua liap, bah jin' pauh;
Ix dyrr lirkuix congwjy ix ee Siongrder,
Knuawkinx qiur ix ee Jiyhvnuaa.
16 Inx ing vadd xee siongrder qig Ix dyr .kir,
Ing kyxngor :ee, ziaw Ix ee siurkir.
17 Inx jewhenr siaquiw, m si jinx ee Siongrder,
Si inx vingsor soxx m bad ee siongrder,
Si sinx :ee, qinrlaii jiacc u :ee,
Si linw ee ledjow soxx byy qnia'uir :ee.
18 Snix linw ee Jiyhvnuaa, linw byy siauwliam Ix,
Snix linw ee Siongrder, linw be qir did Ix.
19 Jehovah knuar .qnir, dyrr uanwhun,
In'ui Ix ee qniaw jaboxqniaw qig Ix ee enqor.
20 Dyrr qongw: Guaw beh dui' inx ngx Guaw ee bin,
Knuar inx qetqiok jnaixngiu;
Inx si quaipiah ee joglui,
Byy sinwsit ee qniaxzii.
21 Inx ing hitt xee m si Siongrder :ee, qig Guaw ee dowki,
Ing inx ee huqew ee mic, ziaw Guaw ee siurkir;
Guaw dyrr ing m si juer vecsnir :ee, qig inx ee dowki;
Ing gugong ee qokbinn, ziaw inx ee siurkir.
22 In'ui dirr Guaw ee siurkir diongx u huew dyc .kiw .laii,
Siyx qaur imqanx qik cimx ee soxjai,
Iarr siyx de qapp de ee cutsanw,
Iarr kiw huew siyx jiaxee snuax ee derqix.
23 Guaw beh jikju jaieh dirr inx ee dingxbin,
Ing Guaw longxjongw ee jnxir laii sria inx.
24 Inx beh in'ui iaugy laii siausanw,
Siurr iamrzet qapp dogjingr tunbet;
Guaw beh hro inx duw diyc iaxsiur ee cuiwkiw,
Qapp juaa ee dok.
25 Guarbin u dyqiamr,
Lairbin u qniahniaa, hro langg sixbyy,
Hro siauwlenn ee davolangg, qapp jairsikluw,
Jiac linx :ee, qapp vec taumngg ee langg, longxx bedbyy,
26 Guaw qongw: Guaw beh hro inx siwsnuar dirr hng hng,
Dirr langg ee diongqanx druu inx ee miazi;
27 Danrsi Guaw qniax duiwdik qig Guaw,
Qniax inx ee duiwdik gorhue,
Qniax inx beh qongw: Si guanw ee ciuw giac quann,
M si Jehovah qniaa jiaxee su.
28 In'ui inx si be hiauxdid sniu ee vecsnir,
Dirr simlai byy cangmiaa.
29 Guan inx u diwhui, e bingvik jitt xee,
E sniu inx ee qetqiok.
30 Narr m si inx ee Jiyhvnuaa bre inx,
Narr m si Jehovah jiong' inx qaux hro langg,
Jnaixngiu jit xee e qnuaw inx jit-cingx?
Nng xee e hro inx jit-bxan dyjauw ar?
31 Inx ee jiyhvnuaa byy cincniu lanw ee Jiyhvnuaa,
Lenrr lanw ee duiwdik iarr anxnix pingpnuar.
32 Inx ee pudyciu si dui' Sodom ee pudyciu tuann :ee,
Iarr dui' Gomollah ee hngg cud :ee,
32 Inx ee pudyy si dok ee pudyy,
Qui' pax longxx si kow :ee;
33 Inx ee jiuw si lringg ee dok,
Si okjuaa janhai ee dok.
34 Jex qamxx m si jikju dirr Guaw jiax,
Hongbat dirr Guaw vyxvuer ee kowvangg mah?
35 Sin'uanx vywingr jairdirr Guaw,
Dirr inx ee kax dahdenx ee sii;
In'ui inx duw diyc jaieh ee zit qin lar,
Soxx beh duw .diyc ee su e qinw qinw qaur.
36 Jehovah knuar qnir Ix ee vecsnir kuiwlat ixqing’ byy .kir,
Hiaxee kusog :ee, juriuu :ee, longxx byy lauu jit xee,
Dyrr beh ter inx sin'uanx,
In'ui Ix ee lovok laii tewhuew.
37 Ix beh qongw: Linw ee siongrder,
Linw soxx uaxkyr ee jiyhvnuaa;
38 Dyrr si jiac linw jewsu ee iuu,
Limx linw quanwden ee jiuw :ee, dnaxx dirr dyclyc?
Tangx hro inx kiw laii vangjan linw,
Vyxho linw.
39 Linw dnaxx diyhh knuar, Guaw, Guaw dyrr si Ix,
Guaw ixgua byy u Siongrder;
Guaw hro langg siw, Guaw hro langg uac,
Guaw sunxsiongx ix, Guaw idi ix;
Byy jit xee e dui' Guaw ee ciuw qiur cud.
40 Guaw giac kiw ciuw ngr tnix qongw,
Guaw qiw Guaw ee ingxuac laii qongw;
41 Guaw narr jiphingg simxpnuar,
Dyrr beh hinghuat Guaw ee duiwdik,
Vywingr uanwhun Guaw ee langg.
42 Guaw beh hro Guaw ee jnxir limx huih qaur juir,
Guaw ee dyx beh jiac bah,
Dyrr si siurr taii siurr liac ee langg ee huih,
Duiwdik siuxlingw ee tauu ee bah.
43 Ledqog ar, longxx diyhh qapp Ix ee vecsnir snaqab hnuahiw;
In'ui Ix beh uirr Ix ee lovok ee huih sin'uanx,
Vywingr Ix ee duiwdik,
Beh sriok Ix ee de qapp Ix ee vecsnir ee jue.
44 Moses ing jitt xee quax itcer ee ue, liam hro vecsnir tniax. Nun ee qniaw Josua iarr qapp ix dilehh.
45 Moses duiww Islael ee jingwlangg qongw jiaxee itcer ee ue bingvik, dyrr qra inx qongw,
46 "Guaw qinaxzit soxx duiww linw qanjingr itcer ee ue, linw diyhh kngr dirr simx nirr; iarr diyhh huanhur linw ee qniaxsunx jipsiuw laii qniaa jitt xee ludhuad itcer ee ue;
47 In'ui jex duiwdirr linw m si kangx kangx ee su, si linw ee uahmia; iarr beh in'ui jitt xee su, linw quer Jordan liauxau, beh zip kir singjiab hitt xee de."
48 Dngzit Jehovah huanhur Moses qongxx,
49 "Liw jnriu kir Abalim Snuax, Nebo ee snuatauu, qapp Jeliqo duiwbin ee Moab-de, knuar Guaw sniuxsur Islaellangg juer giap ee Kanaan-de.
50 Liw beh siw dirr liw soxx jnriu .kir ee snuax, laii dywjow, cincniu liw ee hniax Aalon siw dirr Hor Snuax, laii dywjow jidngiu;
51 In'ui liw dirr Zin ee kongwiaw, Kades ee Melibah ee juiw, dirr Islaellangg diongx dikjue Guaw, byy jrunx Guaw juer sxingr.
52 Liw tangx dirr duiwbin knuar hitt xee de, danrsi berdid tangx zip kir qaur Guaw soxx sniuxsur Islaellangg ee de."
33 Siongrder ee lovok Moses, dirr ix iauxx bue siw ee dairsingx, qra Islaellangg jiokhog; soxx jiokhog ee ue qir dirr erdew. Ix qongw:
2 Jehovah dui' Sinai laii,
Uirdiyhh inx dui' Seir kiw .laii;
Dui' Palan ee snuax jiyr cud qngx,
Dui' banrban sxingr :ee hiax laii;
Dui' Ix ee jniar ciuw uirdiyhh inx huad cud zet huew ee ludhuad.
3 Ix vutjiw tniawtangr hiaxee vecsnir,
Ix hiaxee sxingr :ee longxx dirr Ix ee ciuw;
Inx jre dirr Ix ee kax-xe,
Tniasiu Ix hiaxee ue.
4 Moses ing ludhuad tuann hro lanw,
Juer Jakob huerjiongr ee sanxgiap.
5 Vecsnir ee siuxlingw,
Islael ee jiongww jipair snaqab jurhue ee sii,
Ix dirr Jesulun juer ongg.
6 Guan Rleuben uac lehh byy siw,
Guan ix ee langgiac byy jiyw.
7 Ix qra Judah jiokhog, anxnix qongw:
Qriuu Jehovah tniax Judah ee sniax,
Cua ix qaur ix ee vecsnir hiax;
Ix bad ing ix ee ciuw uirr qaqi qaujenr;
Liw beh vangjan ix dixdngx ix ee duiwdik.
8 Lun Levi, qongw:
Liw ee Tummim qapp Liw ee Ulim, qapp Liw singwqed ee langg snaqab dilehh;
Liw dirr Massah bad cir ix,
Dirr Melibah ee juiw bad qapp ix sna' jnex.
9 Ix lun qaur ix ee laurve, ix ee laurbuw, dyrr qongw, 'Guaw m bad knuar qnir ix';
Iarr byy singzin ix ee hniadi;
Iarr byy singzin ix ee qniaxzii;
In'ui inx qniaa Liw ee ue,
Siuw Liw ee iog.
10 Inx beh ing Liw ee huatdo qawsi Jakob,
Ing Liw ee ludhuad qawsi Islael;
Inx beh ing hniux he dirr Liw ee binrjingg,
Qapp qa'nngg jiah ee siyjer he dirr Liw ee dnxuaa-dingw.
11 Guan Jehovah suwhog ix ee sanxgiap,
Jiaplap ix ee ciuw soxx juer ee qangx;
Hiaxee kiw laii qongqig ix qapp uanwhun ix ee langg,
Guan Liw pacjic inx ee iyx, hro inx be qycc kiw .laii.
12 Lun Benjamin, dyrr qongw,
Jehovah soxx tniar :ee beh qapp Ix anzenn kiarkiw;
Jehovah tong' zit vyxho ix,
Ix iarr beh diamr dirr ix ee qingtauu diongx.
13 Lun Josef, dyrr qongw,
Guan ix ee de did diyc Jehovah suwhog,
Did diyc tnidingw ee vyxmic, qapp lorjuiw,
Ixqip dere soxx kngr ee juixguann;
14 Did diyc zidtauu soxx snix ee vyxmic,
Guec soxx cud ee vyxmic;
15 Did diyc qoxjaw ee snuax ee jiwvyw,
Qapp ingxsewdai ee snuaniaw ee vyxmic;
16 Did diyc de ee vyxmic qapp qidiongx soxx ciongmuaw :ee,
Ixqip diamr dirr ciwpuer lai :ee ee unhui;
Guan hiaxee longxx qruix dirr Josef ee taukag,
Qruix dirr hitt xee qapp ix ee hniadi vunkuix :ee ee taukag dingw.
17 Cincniu guu ee taujniu snix :ee, ingqngx sriok dirr ix,
Ix ee qag si iaw guu ee qag;
Ing inx laii dag banrvecsnir, qaur dirr derqik;
Jex si Eflaim ee banrban,
Manasseh ee cingcingx.
18 Lun Zebulun, dyrr qongw,
Zebulun ar, liw cutgua tangx hnuahiw;
Issaqar ar, dirr liw ee vowvii lai tangx kuaiwlok.
19 Inx beh driaur jiaxee vecsnir qaur snuax nirr,
Dirr hiax beh henr qonggi ee jrer;
In'ui inx beh kipsiux haiw nirr ee hongsing,
Qapp suax nirr soxx kngr ee vyxvuer.
20 Lun Gad, dyrr qongw,
Kuikuah Gad :ee did diyc ylyw;
Ix bih lehh cincniu buw ee sraix,
Ix tiah lic ciuxqud qapp taukag.
21 Ix uirr qaqi virvan dairsingx did .diyc ee giap,
In'ui dirr hiax u sed ludhuad :ee ee hunrgiac lauu lehh;
Ix qapp vecsnir ee siuxlingw snaqab laii,
Qniaa Jehovah ee qonggi,
Qapp Islael snaqab qniaa Ix ee pnuawduanr.
22 Lun Dan, dyrr qongw,
Dan si ser jiah sraix,
Dui' Basan tiaur cud.
23 Lun Naftali, dyrr qongw,
Naftali ar, did diyc unhui ciongjiog;
Iarr did diyc Jehovah ee suwhog muaw muaw :ee,
Beh did diyc saisir qapp lamsir juer giap.
24 Lun Aser dyrr qongw,
Guan Aser in'ui qniaw je laii did diyc hokkir,
Did diyc inx ee hniadi ee hnuahiw;
Tangx ing ix ee kax unr dirr iuu nirr.
25 Liw ee mngqongg si tih :ee, dangg :ee;
Liw ee zidjiw jnaixngiu, liw ee kuiwlat iarr beh anxnix.
26 Jesulun ar, byy u cincniu Siongrder :ee,
Ix jre tnix laii vangjan liw,
Iarr jre qiongcongx, henxbingg Ix ee ingqngx.
27 Ingxuac ee Siongrder juer liw kiarkiw ee soxjai,
Ingxuanw ee ciuw dirr liw ee erbin;
Ix dirr liw ee binrjingg qnuaw duiwdik,
Qycc qongw: Huixbet ix.
28 Islael anzenn kiarkiw,
Jakob ee horer qaqi druar dirr gnoxqog qapp jiuw ee de;
Ix ee tnix iarr dih lyc lorjuiw.
29 Islael ar, linw u hokkir;
Jirjui cincniu linw jitt xee hro Jehovah soxx jinxqiur ee vecsnir ar?
Ix si linw ee dinvaii, vyxho linw,
Si linw ing'iau ee dyqiamr;
Linw ee duiwdik beh dauhangg linw;
Linw beh dac dirr inx quann ee soxjai.
34 Moses dui' Moab vni'ngiuu jnriu Jeliqo snaduir ee Pisgah snuatauu. Jehovah hro ix knuar Gilead juann de didqaur Dan;
2 Naftali juann de, Eflaim Manasseh ee de, Judah juann de qaur saix haiw;
3 Lamhngx qapp qiyr juer Jyxciu Sniaa ee Jeliqo snuaqog ee vni'ngiuu, qaur Zoar. Jehovah duiww ix qongw,
4 "Jitt xee de dyrr si Guaw duiww Ablaham, Isaac, Jakob, jiuwjua qongxx, 'Guaw beh sniuxsur linw ee horer :ee.' Dnaxx Guaw ho liw cinbak knuar .qnir, danrsi liw be did diyc quer kir qaur hiax."
5 Jehovah ee lovok Moses dyrr siw dirr hiax, dirr Moab ee de, jiauww Jehovah soxx qongw :ee.
6 Jehovah qra ix baijongr dirr Moab-de, Betpeor snaduir ee snuaqog; qaur qinaxzit byy langg jaix ix ee bong.
7 Moses siw ee sii, jit-vah zi-jap huer, bagjiux byy huex, jinglik byy sueter.
8 Islaellangg dirr Moab vni'ngiuu uirdiyhh Moses aikaur snax-jap zit; uirdiyhh Moses iubun aikaur ee zit muaw lar.
9 Nun ee qniaw Josua did diyc diwhui ee sinn ciongmuaw, in'ui Moses bad hnua ciuw dirr ix ee dingxbin. Islaellangg dyrr tniatanr ix, jiauww Jehovah soxx bingrling Moses :ee laii qniaa.
10 Au .laii Islael diongx byy qycc hingx kiw sendix cincniu Moses. Ix si Jehovah bin duiww bin soxx bad :ee,
11 Jiauww Jehovah crex ix dirr Egipt-de, duiww Falaoh qapp ix longxjongw ee zinsinn, ixqip ix ee juann de soxx qniaa dagg ngiu ee sinziah qrii su; iarr jiauww dua quanlingg ee ciuw, dua tangx qniax ee su, dyrr si Moses soxx qniaa dirr Islael jingwlangg ee bagjiux jingg :ee, au .laii, byy qycc u jit xee cincniu ix.