Hitt sii, Ananda qapp juui dairjiongr tniax diyc Vuddyy ee kaisi qapp qawsi, sintew qapp simlai longxx an'unw vinghyy. Sniu diyc an' guankixtauu byy ixlaii dyrr sitlyc vunxsimx, cywzin, kuhux siogdinn, liac huanwngiaw juer jinsit ee dairjir. Qinaxzit kaigno bersux prangw .qnir ee ginxaw hutzenn duw diyc ju'air ee laurbuw. Inx habjiongw qra Vuddyy qnialew, hibang tniax Zulaii henw cud srinx qapp simx ee jinx, qew, hix, sit; henxsi snix qapp bet, byy snix qapp byy bet jitt nng jiongw tangx kexhuad inx did bingtongx ee jinsingr.
Prasenajit Dairongg kia .kiw .laii qra Vuddyy qongw, "Guaw ingxquer m bad sriu jiongww vut ee hunwhuew qawsi. Qnir diyc Katyayana qapp Vairatiputra. Inx longxx qongw jitt xee srinx siw liauxau beddng dyrr qiyr juer Nirvana(liappuann). Guaw suizenn u duw diyc Vut, jitmaw iuguann u giliam. Beh anxjnuaw kaihuad tangx diqnir jitt xee simx byy snix qapp bet ee qingxqair. Dirr jiax jingwlangg u uilau :ee longxx sniu beh tniax diyc kaisi."
Vuddyy qra dairongg qongw, "Liw ee sinkux jitmaw junjai. Guaw jitmaw qycc mng liw. Liw jitt xee ziogsinx qapp qimqongjiyc qangrkuanw ingxuanw be pnaiw, be nua, iacc si e hiuxnua, e hai .kir?"
"Sewjunx, guaw jitmaw jitt xee ziogsinx jiongqibuew e bedjuat."
Vuddyy qongw, "Dairongg, liw m bad bedbyy .quer, jnuaxngiu jai'ngiaw e bedjuat?"
"Sewjunx, guaw jitt xee busiongg e pnaiw .kir ee sinkux suizenn m bad huixhai .quer, guaw quanknuar bagjingg muixx jit xee liamrtauu decc venwcenx, srid .kir. Sinx ee liamrtauu diddit laii byy tinghiyh, cincniu caa siyx qaxx vniwjniaa hux, jiamrjiam sriaux .kir, byy .kir, In'ui sixbongg be tingsuah, tangx jaix jitt xee sinkux qaidongx quibuew e bet jin."
Vuddyy qongw, "Byy m driyc. Dairongg, liw jitmaw ee huewtauu ixqingx decc lyxsuex ar. Liw jitmaw binriongg qapp ginxaw ee sii beh anxjnuaw vixping?"
"Sewjunx, ixjaw guaw jyr ginxaw ee sii, qihux anggee qimqut. Duarhanr laii venr daurlangg, hetkir jiokk ong. Acc jitmaw si laurhuexaw, hro sueduee vig qaxx beh byy lo. Hingboo dasanw lauxjaux, byy sincaiw. Taumngg vec, binrpuee ziauu. Cunx byy qxuiw dangx tangx uac. Qapp siauwlenn dng' iongw ee beh tacc e viwping .did?"
Vuddyy qra dairongg qongw, "Knuar liw ee hingboo, ingqaix m si hud .jit .xe venr laurkuanw .kir .ee."
Dairongg qongw, "Sewjunx, venwhuar si amr amr aw decc iik :ee. Guaw jinjniar diwqag be diyc. Qnuaa .langg zuac .langg kir qycc laii, jiamrjiam qaur qaxx jitmaw jitt xee ngiu. Sniaxmih enqor? Guaw zi-jap huer ee sii, suizenn qongxx si siauwlenlangg, binrmau ixqingx viw dongcox jap huer ee sii kacc lau kuanw. Snax-jap huer ee sii, viw zi-jap huer ee sii iurr kacc sueziok. Qaur jinw lak-jap-zi huer, uat tauu knuar go-jap huer hitt jun suacc uanxzenn jongwlenn. Sewjunx, guaw u knuar diyc amr amr aw decc iik. Suizenn jitt xee suevai ee venwcenx iik hanrdnia dirr jap nii. Narr qycc hro guaw siongser suniuu, venwhuar nacc dna' jit qixnii, nng qixnii? Sidjai si dagg nii longxx decc quexvnir. Qamxx dna' dagg nii quexvnir? Dagg guehzit iarr si u decc juanxhuar. Suacc dna' dagg guehzit juanxhuar? Qycc si dagg qangx decc venwcenx. Diam diam aw sniu, jimjiog knuar. Kshana kshana diongqanx, jit xee liamrtauu quer jit xee liamrtauu longxx byy tingg kxig. Soxiw guaw jai'ngiaw sinkux quibuew e bedbyy .kir."
Vuddyy qra dairongg qongw, "Liw knuar diyc venwhuar cen'ii byy tingg, liauxgno diyc liw quibuew e bedbyy. Liw qamxx jaix liw sinkux-dingw u be bedjuat :ee?"
Prasenajit Dairongg habjiongw qra Vuddyy qongw, "Guaw kaksit m jaix."
Vuddyy qongw, "Guaw jinw qra liw qongw byy snix-bet ee tensingr. Dairongg, liw qnir diyc Ganges Hyy ee sii quiw huer?"
Dairongg qongw, "Guaw snax huer ee sii, guaw ju’air ee laurbuw cua guaw kir qingwvair Jiva tnivyy u qingquer jitt diauu hyy. Hitt sii dyrr jaix si Ganges Hyy."
Vuddyy qra dairongg qongw, "Dyrr cincniu liw soxx qongw :ee, zi-jap huer ee sii viw jap huer ee sii kacc lau. Itdit qaur lak-jap huer, jit qangx suar jit qangx, jit guehzit suar jit guehzit, jit dxangx suar jit dxangx, jit xee liamrtauu suar jit xee liamrtauu itdit decc venwcenx. Narr anne, liw snax huer qnir diyc jitt diauu hyy ee sii, qaur jap-snax huer ee sii, jitt diauu hyy u byy qangg bor?"
Dairongg qongw, "Qapp snax huer ee sii uanxzenn byy jingcax. Itdit qaur jinw lak-jap-zi huer iarr byy u qyc'ngiu."
Vuddyy qongw, "Liw jitmaw uirdiyhh taumngg vec binrpuee ziauu decc aisiongx. Liw ee bin vitdnia viw ginxaw ee sii kacc ziauu. Anne liw jitmaw knuar jitt diauu Ganges Hyy qapp ingxquer ginxaw ee sii knuar jitt diauu hyy, qamxx u ginxaw qapp laurlangg ee jingcax?"
Dairongg qongw, "Byy jingcax, Sewjunx."
Vuddyy qra dairongg qongw, "Liw bin suizenn kiw ziauhunn, mrqycc liw qnir jingbii ee tensingr m bad kiw ziauhunn. Kiw ziauhunn si venr. Byy kiw ziauhunn si byy venr. E venr :ee e bedbyy. Hiaxee be venr :ee guandew dyrr byy snix-bet. Si anxjnuaw beh qra qaqi kngr dirr snix-siw lairdew? Iuqycc inxjiaur hiaxee Maskari Goshaliputra, inx longxx qongw jitt xee sinkux siw liauxau juann bet."
Dairongg tniax diyc jiaxee ue u siongsinr, jaiqiyh jitt xee sinkux siar li e qycjaiww snix. Ix qapp juui dairjiongr longxx jiokk hnuahiw, did .diyc .ee m bad jingrr u.
Ananda liammix an' jyrui vreh kiw qra Vuddyy qnialew, habjiongw itdit qui lehh qra Vuddyy qongw, "Sewjunx, narr junw jitt xee knuar qapp tniax vutdnia byy snix qapp bet, jnuaxngiu Sewjunx qongw guanw jiaxee sitlyc jinx singwjingg, qniavangr dendywtauu. Brang liw hingx kiw juvix, sew guaw ee din'aix uwuer."
Jitt xee sijun, Zulaii qra ix qimsig ciuxqud vangr .lyc .laii, gnoxlunjnaiw jriw hiongr erdew denxsi hro Ananda knuar, qongw, "Liw jitmaw knuar diyc guaw mudra ciuw si jniawbin iacc dendywtauu?"
Ananda qongw, "Sewqanx jiongwsingx e qra jex knuar juer si dendywtauu. Acc guaw m jaix sniaw si jniawbin, sniaw si dendywtauu."
Vuddyy qra Ananda qongw, "Narr junw sewqanlangg qra jex knuar juer si dendywtauu, anne sewqanlangg qra sniaw knuar jyr si jniawbin?"
Ananda qongw, "Zulaii ciuxqud giac quann, tula mihuex hiacc iur ee ciuw hiongr quann jriw tnidingw, jex dyrr qiyr juer jniawbin."
Vuddyy liammix qra ciuxqud giac quann, qra Ananda qongw, "Narr junw jitt xee dendywtauu, tauu qapp buew duiwngua. Soxu sewqanlangg qewqer hiongrr dingxquann knuar. Anne dyrr jaix liw ee sinkux qapp juui Zulaii cingjing huatsinx siy' vixping tangx kexhuad hiauxliw. Zulaii ee sinkux, miaa qiyr juer jniawbin jaix taur taur. Liw ee sinkux, qiyr juer jinsingr dendywtauu. Qycjaiww liw jimjiog quanknuar. Liw ee sinkux qapp Vut ee sinkux hy juer dendywtauu:ee, si dyc'ui qiyr juer dendywtauu?"
Hitt sii, Ananda qapp juui dairjiongr gongrgiac, giac tauu knuar Vuddyy, bagjiux longxx byy nih, m jaix srinx qapp simx si dyc'ui dendywtauu.
Vuddyy hingx kiw juvisimx, linbinw Ananda qapp juui dairjiongr, huad cud naxx haixingw ee sniax, qra soxu vnivnii dirr huathue lairdew :ee qongw, "Juui senrlamjuw, guaw dniardnia qongw, siksinx qapp simliam soxx knikib ee jiongxjiongw din'enn, qapp simx soxx knikib laii snix .cud ee soxu din'enn hxuad, jiaxee longxx si simx ee henxhen. Linw ee siksinx qapp linw ee simliam qewqer si jingbiau bingtongx jinsit ee simdiongx soxx henxhen .cud .laii .ee. Si anxjnuaw linw jiaxee e laii sitlyc vunxdew bibiau uanbuanw bingtongx ee simx, sitlyc vyxquir bingtongx bibiau ee vunxsingr? Zinrbad liauxgno u beluan. Amwpuw si kangx. Kangx dirr amwpuw lairdew, qetlenn amr jniaa juer siktew. Siktew camcab bongrsiongw. Iwsniu bongrsiongw si siksinx, jurjip din'enn dirr lairdew iydang, hiongr guarkauw lrong. Qunxqaw ziauxluan sidsiong, liahjunw si simsingr. Simx jid'err sitbee, dikkag e liahjunw behik si dirr siksinx lairdew. M jaix siksinx qapp guarkauw ee snuax, hyy, ixqip hukongx dairde longxx si bibiau bingtongx jinsit vunxsimx soxx henxhen .cud .laii ee mihqnia. Piwlun cincniu qra dingcingx vaccingx duarhaiw kiwsag, suacc qra jit xee puu puu priyr priyr ee juixpeh knuar juer si qui' xee haixingw, liaurqiyr ixx knuar jin itcer haiw qapp xngiuu. Linw jiaxee dyrr si dingvue sitbee :ee. Dyrr cincniu guaw qra ciuw kngr .lyc .laii (jitt xee le) qangrkuanw, byy sniaxmih jingcax. Zulaii qongw jitt kuanw :ee si jiokk tangx kyxlenn, linbinw."
Ananda u singsiu Vuddyy juvix qiuwlan cim'yr ee qawsi. Suiciuw, kauxceh, caciuw, ix qra Vuddyy qongw, "Guaw suizenn singsiu Vuddyy jitt hy kuanw ee bibiau giximx, liauxgno bibiau bingqngx ee simsingr guandew si uanbuanw, suwsiongg druar dirr simdew. Acc guaw liauxgno Vuddyy henrvo qangxsuad ee huat'imx, jinw marr ixx jitt xee knikib ee simx. Vuddyy hro gunw giongxbong sinwkyr, vehvec did diyc jitt xee simx, m qnaw qra liahjuer si vunxguann simde. Brang Vuddyy kyxlinn gunw, suanqangw uanbuanw huat'imx, qra gunw gignaiw ee qinbyw vuic hetqag, laii quihok busiong jniawdy."
Vuddyy qra Ananda qongw, "Linw jiaxee iauxx ixx knikib ee simx decc tniax vudhuad. Jitt xee vudhuad iarr si knikib .laii .ee, dyrr byy vudhuad ee jinsingr. Naxx cincniu jit xee langg iong ciuxjingxtauu qiw guec vyr langg knuar. Hitt xee langg sun ciuxjingxtauu soxx qiw, qaidongx knuar guehniuu. Narr knuar jingxtauu-aw liahjunw si guehniuu, jitt xee langg qamxx dna' cywzin guehniuu? Ix marr cywzinn ciuxjnaiw. Sniaxmih enqor? In'ui qra soxx qiw :ee liahjuer si bingguat. Qamxx dna' cywzin ciuxjnaiw? Ix duiww bingg qapp amr uana byy qenwsig. Sniaxmih enqor? Dyrr si qra jingxtauu-aw qiw :ee liahjuer u guehniuu bingqngx ee singwjid, duiww bingg qapp amr nng xee singwjid byy liauxqaiw soxx drir . Liw marr si qangrkuanw. Narr qra kuhunx guaw qongw :ee vudhuad ee imsniax dongwjuer liw ee simx, jitt xee simx jurqiw dukiw kuhunx snia'imx ixgua qycc u hunved ee vunxsingr. Kyxviw u jit xee luxkeh dirr luxquanw hiycmii, jiamrsii tingkax liauw dyrr lirkuix, be itdit druar .lyc .kir. Acc jiangxquanw luxquanw :ee dyrr dyc'ui longxx be kir, ix qiyr juer diamwtauqex. Simx iarr si anne. Narr jinjniar si liw ee simliam, dyrr dyc'ui longxx be kir. Anxjnuaw qongw lirkuix snia'imx dyrr byy hunved ee vunxsingr? Qamxx dna' snia'imx u hunved ee simsingr? Kuhunx guaw ee binriongg, lirkuix soxu sik'enn siongwtew dyrr byy hunved ee vunxsingr. Narr anne, simrjiww sniaxmih hunved ee vunxsingr dy' byy. M si siktew, marr m si kongsingr. Cincniu Goshali inx hiaxee, byy bingvik jitt xee dyrliw, liahjunw lirkuix soxu knikib :ee dyrr byy hunved ee vunxsingr. Anne liw simx ee vunxsingr qokved dngw kir jit xui, nacc tangx qongw ix si juxlangg?"
Ananda qongw, "Narr guaw ee simsingr qokvet u xui hyw dngw. Zulaii suacc qongw, bibiau bingqngx guandew ee simx byy xui hyw dngw? Dogdok brang liw linbinw, uirr guaw laii suanqangw."
Vuddyy qra Ananda qongw, "Liw jitmaw knuar guaw, qnir ee vunxsingr si jinglen guandew bingqngx :ee. Jitt xee qnir ee vunxsingr suizenn m si bibiau jinglen bingqngx ee simx, bersux derr zi xee guehniuu, kiokk m si guec ee ngiaw. Liw diyhh jimjiog tniax. Jitmaw beh qra liw kaisi byy xui tangx huedngw ee qingxqair. Ananda, jitt xee dua qangxdngg, mngg kuix hiongr dangvingg. Zit cud singtenx dyrr qngtangx. Vnuawmii byy guec iacc si hunbu jac guec tnix ox de amr, qangxdngg iuqycc venr amr binbongx. Tang'axmngg u pang, qngsnuar dyrr qycc e siy' tongx. Viacdow qapp cuwqingx, dyrr e jac diauu lehh knuar be diyc. U jingcax ee soxjai, dyrr qycc qnir diyc inqyw knikib. Dirr hukongx lairdew qewqer si kongsingr. Qnir ut'auw vuerbiu ee kiwsiong, in'ui ohnuaw ee ing'iax jikju. Ho duxx tingg, tnix dingcingx, qycc knuar diyc cingjing. Ananda, liw knuar diyc jiaxee soxu venwhuar ee henrsiong. Guaw jitmaw qra inx qokved kngr dngw kir soxx kixinx ee soxjai. Sniaxmih si vunxdew kixinx :ee? Ananda, jiaxee soxu venwhuar, bingqngx dngw kir zidtauu hiax. Sniaxmih enqor? Byy zidtauu dyrr byy qongbingg. Qongbingg ee vunxinx sriok zidtauu, soxiw huedngw kir zidtauu hiax. Amr huedngw kir byy guec ee amwmii. Siongtongx huedngw tang'axmngg. Ziajac huedngw viacdow, cuwqingx. Knikib huedngw e juer kuved ee simsingr. Hukongx huedngw kongsingr. Ut'auw vuerbiu huedngw din'aix. Cingkir bingqngx huedngw ho duxx tingg. Anne dyrr soxu sewqanx itcer longxx sriok dirr jitt quiw lui lairdew. Liw knuar diyc jitt veh jiongw qnir ee vunxsingr qaidongx huedngw hro si'angw? Sniaxmih enqor? Narr huedngw hro bingqngx, byy qongbingg ee sii, dyrr knuar be diyc amr. Suizenn bingg qapp amr u jiongxjiongw jingcax, qnir ee vunxsingr vingrr byy qyc'ngiu. Soxu tangx huedngw :ee jurzenn m si qaur liw jiax. Byy huedngw qaur liw jiax :ee, m si liw qaqi qycc si si'angw? Anne jaix liw ee simx vunxdew bibiau bingqngx cingjing, liw qaqi sitbee, jybun. Songwsit vunxsimx hamrzip lunjuanw, dirr snix qapp siw diongx:a vutsii puu lehh dimm lehh. Mrjiacc Zulaii qra linw qiyr juer tangx kyxlinn :ee."
Ananda qongw, "Suizenn guaw u diwqag qnir ee vunxsingr byy jit xui hyw huedngw. Anxjnuaw tangx jaix jex dyrr si guaw ee jinsit vunxsingr?"
Vuddyy qra Ananda qongw, "Guaw jitmaw mng liw. Jinw liw iauxx bue did diyc byy lrau ee cingjing, be tangx singsiu Vuddyy sinsingr ee ligliong. Qnir ee vunxsingr u qaur qaxx covo ee senn byy jiongwgai ee qingxqair. Aniruddha qnir Jambudvipa, bersux decc knuar ciuw-lai ee amala quexjiw qangrkuanw. Jiongw posad tangx knuar qnir vaccingx sewqair. Sibhongx Zulaii tangx knuar jin naxx din'aix sowliong hiacc je ee cingjing qoktow, byy sniaxmih si inx knuar be diyc .ee. Jiongwsingx juwsinn knuar marr jiacc huncunr narnia. Ananda, guaw jinw qapp liw knuar sir tenongg soxx druar ee qiongden. Diongqanx bylun dirr juixdew siuu :ee, dirr liogde qniaa :ee, iacc dirr tnidingw vuex :ee longxx tangx knuar taur taur. Suizenn u ohnuaw iacc bingqngx jiongxjiongw hingboo siongwtew, jiaxee iarr vutqyr si binrtaujingg ee din'aix, si kuved ee simsingr soxx uiliuu ee jiongwgai. Liw qaidongx dirr jiax hunved jurqiw qapp qitax. Jitmaw guaw beh hro liw dirr qnir lairdew juer qingxsuanw, knuar dycc jit xee si gnoxtew, dycc jit xee si budsiong. Ananda, kingkamr liw soxx knuar ee guantauu, Zidguat Qiongden si budtew, m si liw. Qaur qaxx CiD Qimx Snuax, siwjiuuiii siongser knuar. Suizenn u jiongxjiongw ee qngsnuar, inx iarr si budtew, m si liw. Dauc dauc aw qycc knuar. Puhunn qapp vuejiauw. Hongx dinxdang, ing’iax kiw. Ciurbok, sancuanx, cauxaxqix, jingxjiw, langg, jingsnix jiaxee iarr longxx si but, m si liw. Ananda, jiaxee qin :ee hng :ee qokk u inx budtew ee vunxsingr, suizenn horsiong byy qang. Liw qangrkuanw longxx jimjiog knuar. Cingjing laii qra knuar, soxu qokk lui ee budtew, jurzenn u jingcax. Qnir ee vunxsingr byy jingcax, jitt xee jinglen bibiau bingqngx ee qnir jniasit si liw ee vunxsingr. Narr qnir si budtew, anne liw iarr tangx qnir diyc guaw ee qnir. Narr soxx qnir .diyc .ee qangrkuanw, qra qiyr juer qnir diyc guaw soxx qnir. Guaw byy qnir .diyc ee sii, nacc byy qnir diyc guaw soxx byy qnir .diyc ee soxjai? Narr u qnir diyc guaw soxx byy qnir .diyc .ee, jurzenn dyrr m si hitt xee byy .qnir .diyc ee siongwtew. Narr byy qnir diyc guaw byy qnir .diyc ee soxjai, jurzenn m si budtew. Anxjnuaw qongw m si liw? Qycc liw jitmaw qnir diyc budtew ee sii, liw qacc qnir diyc budtew, budtew iarr qnir diyc liw. Budtew qapp vunxsingr capjap. Liw, guaw, qapp soxu sewqanx itcer dyrr berdangr anzenn singlip. Ananda, narr liw qnir ee sii, hex si liw, m si guaw. Qnir ee vunxsingr dirr jit siwqer, byy qaiwhan. Narr m si liw, acc byy si sniaw? Anxjnuaw liw e giaugii liw ee jinsit vunxsingr? Liw knuar qaqi vunxsingr byy jinsit, suacc laii guaw jiax qiucuw jinsit vunxsingr."
Ananda qra Vuddyy qongw, "Sewjunx, narr jitt xee qnir ee vunxsingr vitdnia si guaw ee, m si vadd langg ee, guaw qapp Zulaii knuar sir tenongg ee singwqingw vyxden, knuar inx druar dirr Zidguat Qiongden, jitt xee qnir ngidni, dirr Saha qoktow muaw siwqer. Dngw laii qaur jingsia, qandna' qnir sirngi. Dirr cingjing ee mngho qapp amdngg qandna' knuar diyc gimjnii qapp hangrlo. Sewjunx, jitt xee qnir si anne. Ix ee vunxtew guandew si dirr venwde muaw siwqer. Jitmaw dirr sxig-lai, qandna' muaw jit sxig. Si jitt xee qnir an' dua sog kacc ser, iacc si viacdow qapp cuwqingx qra joxqeh qnaiwdng? Guaw dnaxx m jaix qidiongx ee ywgi dirr dyhh? Brang Sewjunx sur qongxdai juvix uirr guaw kaisi, suanqangw."
Vuddyy qra Ananda qongw, "Itcer sewqanx dua, siyw, lai, gua, soxu ee hangrdangr, qokk sriok binrjingg ee din'aix. Byy ingqaix qongw qnir ee vunxsingr e tenw kacc dua iacc sog kacc ser. Piwlun cincniu siwqakhingg ee kec'aw, diongx:a knuar .diyc .ee si siwqag ee kongqanx. Guaw qycc mng liw. An' jitt xee siwqakhingg ee kec'aw soxx qnir .diyc ee siwqag ee kongqanx si qowding ee siwqakhingg iacc si byy qowding ee siwqakhingg? Narr junw si qowding ee siwqakhingg, lingrgua tec jitt xee ngikuanw ee kec'aw qra anx dirr hiax, kongqanx ingdongx m si ngikuanw :ee. Narr m si qowding :ee, dirr siwqakhingg ee kec'aw diongx:a ingqaix byy siwqakhingg ee kongqanx. Liw qongw m jaix jitt xee ywgi dirr dyhh. Ywgi dyrr si anne, jnuaxngiu decc mng dirr dyc'ui? Ananda, narr beh zip kir byy siwqag byy ngikuanw ee qingwqair, dandanx qra kec'aw ee hetqak dyrr hyw. Kangx ee hingtew dyrr byy siwqakhingg. M tangx qongw beh kiwsag hukongx siwqakhingg hitt xui. Narr cincniu liw soxx mng :ee, zip laii sxig-lai ee sii, qnir ee vunxsingr dyrr sog kacc ser; giac tauu knuar zit, liw ee qnir qamxx erdangr giuw qaur qapp zidtauu ee viauxbin vnijee? Narr kiw viacdow qapp cuwqingx erdangr qra qnir ee vunxsingr joxqeh iacc qnaiwdng, jngr jit xee ser ser xee aw ee kangx, qamxx byy siy' lenn ee hunziah? Quatding byy jitt hy lriw. Itcer jiongwsingx, an' guankixtauu byy ixlaii, longxx qra qaqi liahjunw si budtew suacc laii sitbee. Sitlyc vunxsimx, sriu budtew laii ijuanw. Soxiw dirr jex lairdew, knuar dua knuar ser narr erdangr ijuanw budtew dyrr qapp Zulaii qangrkuanw, srinx qapp simx uanbuanw bingqngx. Dirr be isuaw ee dyrdniuu, dirr jit qix koxmngg ee buexliux iarr tangx hamsiu sibhongx qoktow ee venww de."
Ananda qra Vuddyy qongw, "Sewjunx, narr junw jitt xee jinglen ee qnir vitdnia si guaw bibiau ee vunxsingr, jitmaw jitt xee bibiau ee vunxsingr dirr guaw binrjingg henxsi. Qnir ee vunxsingr vitdnia si jinsit ee guaw. Guaw jitmaw ee srinx qapp simx qycc si sniaxmih mihqnia? Acc jitmaw srinx qapp simx qoklangg u qaqi ee sidtew, hitt xee qnir ee vunxsingr kuved guaw ee srinx qapp simx byy jingcax. Narr qnir ee vunxsingr kaksit si guaw ee simx, hro guaw jitmaw knuar .diyc, qnir ee vunxsingr sidjai si guaw, acc srinx m si guaw. Jex qapp jinwjingg Zulaii qra Ananda qongw budtew tangx qnir diyc guaw u sniaw byy qangg? Brang liw sur dua juvix, qra gunw jiaxee iauxx bue liauxgno :ee kaisi, qexhuad."
Vuddyy qra Ananda qongw, "Liw jitmaw qongw qnir ee vunxsingr dirr liw binrjingg, jitt xee lriw byy kaksit. Narr jniasit dirr liw binrjingg, liw sidjai u soxx qnir, anne jitt xee qnir ee vunxjid qacc u jit ee xui, dyrr m si berdangr jixbingg .cud .laii .ee. Henrvo qapp liw diamr Jeta Naa decc jre, knuar siwqer ee ciurnaa, junwqaux, qapp denrdongg. Dingxquann knuar qaur zidtauu qapp guehniuu, taujingg binrduir Ganges Hyy. Liw jitmaw dirr guaw sraix-aw jyrui taujingg, ciuw giac .kiw .laii decc qiw qongxx jiaxee jiongxjiongw ngiursniur. Amwngiaw si naa, bingqngx si zit, u joxgai :ee si viah, e siongtongx :ee si kangx. Cincniu anne, tangx qiw cud cauw-aw, ciu-aw, qaur qaxx misix-aw iur ee mihqnia. Duarsiyw suizenn u jingcax, danrsi huanrnarr u hingjong, longxx erdangr qra jixbingg .cud .laii. Narr qnir ee vunxsingr vitdnia dirr liw binrjingg henxbingg, liw ingdongx iong ciuw kaksit qra qiw .cud .laii viauxbingg qongxx dycc jit xee si qnir ee vunxsingr. Ananda, liw qaidongx jai'ngiaw, narr kangx si qnir ee vunxsingr, qacc ixqingx venwsingr qnir, anne sniaw si kangx? Narr budsiong si qnir, qacc si qnir, sniaw si budsiong? Liw tangx jimjiog qaixpyr banrsiong, huntiah cud jinglen, bingqngx, cingjing, qapp bibiau ee qnir ee vunxguann, qiw cud laii hro guaw knuar. Bersux decc qiw cud hiaxee soxu budtew qangrkuanw, cingcyw hunbingg, byy gignaiw."
Ananda qongw, "Guaw jitmaw dirr jitt xee je janr lxauu ee qangxdngg, tangx knuar diyc hng hng knuar ee Ganges Hyy-vnix, dingxquann tangx knuar diyc zidtauu qapp guehniuu, ciuw giac .kiw .laii soxx qiw qapp bagjiux soxx knuar :ee qewqer si budsiong, byy jit xee si qnir ee vunxsingr. Sewjunx, naxx cinxcniu Vuddyy soxx qongw, byhqongxqiyh cincniu guaw jitt hy u lrau co' yc sniabunn qaidnua :ee, simrjiww posad iarr berdangr dirr banrbut ee budsiong taujingg kaipyr cud jinglen ee quanqnir. Lirkuix itcer budsiong, lingrgua u qaqi ee vunxsingr."
Vuddyy qongw, "Byy m driyc, byy m driyc."
Vuddyy qycjaiww qra Ananda qongw, "Dyrr cincniu liw soxx qongw :ee, byy jit xee jinglen ee quanqnir. Lirkuix itcer budsiong, lingrgua u qaqi ee vunxsingr. Anne liw soxx qiw hiaxee budsiong lairdew, byy jit xee si qnir ee vunxsingr. Jitmaw qycc qra liw qongw. Liw qapp Zulaii dirr Jeta Naa decc jre, qycc knuar diyc ciurnaa, simrjiww zidtauu qapp guehniuu. Jiongxjiongw henrsiong longxx byy qang, vitdnia byy jit xee jinglen ee quanqnir si liw tangx qiw .cud .laii .ee. Jiaxee budsiong lairdew liw qycc kir kingqiur, dycc jit xee m si quanqnir?"
Ananda qongw, "Jitt xee Jeta Naa guaw siwqer qra knuar, m jaix hitt lairdew dycc jit xee m si quanqnir? Sniaxmih enqor? Narr ciu-aw m si quanqnir, anxjnuaw qongw qnir diyc ciu-aw? Narr ciu-aw dyrr si quanqnir, anxjnuaw qycc qongw si ciu-aw? Cincniu anne, simrjiww qongw kongbuu m si quanqnir, anxjnuaw qongw qnir diyc kongbuu? Narr kongbuu dyrr si quanqnir, anxjnuaw qycc qongw si kongbuu? Guaw qycjaiww suniuu, jiaxee banrsiong lairdew, narr siongser jimjiog kingqiur, byy jit xee m si qnir ee vunxsingr."
Vuddyy qongw, "Byy m driyc, byy m driyc."
Jurr anne, dairjiongr lairdew coyc :ee tniax diyc Vuddyy jiaxee ue suacc gang gang, m jaix jitt xee ywgi ee taubuew dirr dyhh, jidsii kiongxhongg, srid kir vunxsiongsii soxx qensiuw :ee. Zulaii jaix inx iulu vut'anx, dyrr snix cud linbinw ee simx. Ix an'uir Ananda qapp juui dairjiongr qongxx, "Juui senrlamjuw, busiong huat'ongg soxx qongw :ee si jinsit ee ue, si anxjnuaw dyrr qongw anxjnuaw, be luanrsuw qongw, marr be qongw vehcat. Be cincniu Maskari Goshaliputra sir jiongw be siw ee lunrsuad, hex juann byngiaw, lamrsamw qongw :ee. Linw kir jimjiog cimsux, m hyw qycc aiciuu iubun ar."
Hitt sii, Manjushri Jingwhuad Ongjuw linbinw jiongww sir lui derjuw. Ix dirr dairjiongr lairdew an' jyrui vreh kiw, dirr Vuddyy ee kax-vnix qnialew, habjiongw qiongqingr qra Vuddyy qongw, "Sewjunx, jiaxee soxu dairjiongr, byy liauxgno Zulaii kingqiur sikdinn hukangx nng jiongw jinglen quanqnir ixqip sirhuix ee ywgi. Sewjunx, narr junw taujingg hiaxee sikdinn hukangx dingxdingw budsiong narr si knuar e diyc, ingqaix tangx qiw .cud .laii. Narr knuar be diyc, ingqaix byy sniaw tangx juwbok. Acc inx jitmaw m jaix jitt xee ywgi dirr dyhh, soxiw u kiongxhongg. M si ingxquer senrqinx kinx iacc jiyw. Dogdok hibang Zulaii huad dua juvix kexhuad suatbingg jiaxee soxu budsiong qapp suatbingg jitt xee jinglen ee quanqnir vunxguann si sniaw mihqnia; dirr hitt lairdew anxjnuaw byy si iacc m si."
Vuddyy qra Manjushri qapp juui dairjiongr qongw, "Sibhongx Zulaii qapp Dua Posad dirr ix qaqi soxx druar ee samadhi lairdew, qnir qapp soxx qnir ee din'enn, ixqip soxx sniu ee siongwtew si naxx kongbuu ee huex, vunxdew dyrr byy. Jitt xee qnir qap knikib ee din'enn, ix ee vunxguann si posad bibiau cingjing bingqngx ee vunxtew, jnuaxngiu qongw hitt lairdew u si iacc m si dilehh? Manjushri, guaw dnaxx mng liw. Kyxviw liw si Manjushri, lingrgua qycc u jit xee qiyr Manjushri :ee. Hitt xee si Manjushri iacc m si?"
"Si anne, Sewjunx. Guaw jinjniar si Manjushri, byy lingrgua jit xee. Sniaxmih enqor? Narr u lingrgua jitt xee, dyrr u nng xee Manjushri. Mrqycc qimzit guaw m si hitt xee 'm si' ee Manjushri, dirr qidiongx sidjai byy si iacc m si jitt nng xee siongwtew dilehh."
Vuddyy qongw, "Jitt xee bibiau bingqngx ee quanqnir qapp soxu kongbuu ee siogdinn iarr si qangrkuanw. Vunxguann si bibiau bingqngx busiong posad cingjing uanbuanw jinsit ee simx, suacc lamrsamw kuhunx siogdinn qapp kongbuu, ixqip tniax qapp qnir. Kyxviw derr zi xee guec, dycc jit xee si guec, dycc jit xee m si guec? Manjushri, qandna' u jit xee jinsit ee guec. Diongqanx jurzenn byy junjai si guec iacc m si guec. Soxiw liw dnaxx knuar quanqnir qapp siogdinn, kingqiur jiongxjiongw, jex qiyr juer bongrsiongw, si berdangr dirr hitt lairdew huntiah cud si iacc m si. Si an' jinsit jinglen bibiau bingqngx ee simsingr mrjiacc tangx hro liw qra qiw .cud .laii iacc byy qiw .cud .laii."
Ananda qra Vuddyy qongw, "Sewjunx, dyrr cincniu huat'ongg soxx qongw :ee, qakdix ee din'enn dirr Sibhongx sewqair venwvenr, cingjing, ciangjai, vunxsingr byy snix iarr byy bet. Jex qapp ixjingg Brahmin Kapila soxx qongw hiaxee viwsut ixqip qoo hxex koxhingg soxu guarenn qauwmngg soxx qongw u jinsit ee guaw dirr sibhongx muaw siwqer ee lixlun u sniaw jingcax? Sewjunx marr bad dirr Lanka Snuax uirr jit quaw dua diwhui posad qangxsuad ywgi. Liw qongw, 'Hiaxee guarenn qauwmngg ciangjai decc qongw si jurhuad tenzenn :ee. Guaw soxx qongw ee inenn, m si inx hitt xee jancur.' Guaw dnaxx quanknuar jitt xee qakdix ee vunxsingr si jurhuad tenzenn :ee, byy snix iarr byy bet, qapp itcer hubuu, lamrsamw, qapp dendyr li hng hng. Naxx cincniu m si in'enn, iarr m si inx hitt jiongw jurhuad tenzenn :ee. Liw beh anxjnuaw kaisi hro gunw be ham zip hitt qrunn siasuad lairdew, tangx did diyc jinsit ee vunxsimx qapp bibiau bingqngx u qakdix ee vunxsingr?"
Vuddyy qra Ananda qongw, "Guaw dnaxx anne kaisi hongvenrhuad, qra jinsit qra liw qongw, liw iauxx berdangr liauxgno, iauxx virr jurhuad tenzenn hitt jiongw lunrsuad soxx behik. Ananda, narr vitdnia si jurhuad tenzenn :ee, qaidongx tangx cingcyw venrved cud u jit xee jurzenn siongwtew dilehh. Liw cniaw quanknuar jitt xee bibiau bingqngx ee quanqnir lairdew, sniaxmih si jurzenn siongwtew? Jitt xee qnir ee vunxsingr liac bingqngx jyr jurzenn siongwtew? Liac oamr jyr jurzenn siongwtew? Liac kongbuu jyr jurzenn siongwtew? Iacc si liac satbat jyr jurzenn siongwtew? Ananda, narr liac qongbingg jyr jurzenn siongwtew, ingqaix knuar be diyc oamr. Narr qycc liac kongbuu jyr jurzenn siongwtew, ingdongx knuar be diyc satbat. Cincniu jitt kuanw, simrjiww qra soxu oamr jiaxee siongwtew liahjunw si jurzenn siongwtew, anne dirr bingqngx ee sii, qnir ee vunxsingr dyrr duanrbet ar. Nacc tangx qongw qnir e diyc qongbingg?"
Ananda qongw, "Jitt xee bibiau quanqnir ee vunxsingr vitdnia m si jurhuad tenzenn. Guaw dnaxx kingqiur bingvik si inenn laii snisingg, mrqycc simx iauxx bue bingvik. Beh cingxmng Zulaii, hac inenn snisingg ee singwjid, jitt xee ywgi si anxjnuaw qongw?"
Vuddyy qongw, "Liw decc qongw in'enn. Guaw qycc mng liw. Liw dnaxx in'ui knuar, qnir ee vunxsingr jiacc dirr binrtaujingg henxhen. Jitt xee qnir ee vunxsingr si inui u qngsnuar jiacc u qnir, iacc si u oamr jiacc u qnir? In'ui kongbuu jiacc u qnir, iacc si satbat jiacc u qnir? Ananda, narr in'ui u qngsnuar jiacc u qnir, ingdongx knuar be diyc oamr. Narr in'ui u u oamr jiacc u qnir, ingdongx knuar be diyc qngsnuar. Cincniu jitt kuanw, simrjiww qaur in'ui kongbuu iacc satbat jiacc u qnir, dyrliw qapp in'ui qngsnar iacc oamr siysiang. Qycjaiww qongw, Ananda, jitt xee qnir ee vunxsingr si knikib qngsnuar jiacc u qnir, iacc si knikib oamr jiacc u qnir? Knikib kongbuu jiacc u qnir, iacc si knikib satbat jiacc u qnir? Ananda, narr knikib kongbuu jiacc u qnir, ingdongx knuar be diyc satbat. Narr knikib satbat jiacc u qnir, ingdongx knuar be diyc kongbuu. Cincniu jitt kuanw, simrjiww qaur knikib qngsnuar iacc oamr, dyrliw qapp knikib kongbuu iacc satbat siysiang. Qaidongx jaix jitt kuanw jinglen u qakdix bibiau u bingqngx :ee, m si rinx, marr m si enn. M si jurhuad tenzenn :ee, marr berdangr qongw m si jurhuad tenzenn :ee. Berdangr qongw m si iacc si, berdangr qongw si iacc m si. Qra itcer siongwtew siawli dyrr si itcer hxuad ee vunxsingr. Liw jitmaw anxjnuaw dirr hitt lairdew, simx simx liam liam hiaxee soxu sewqanx siongwtew cinwcaiw hy ee miaa laii jyr kuhux? Bersux iong ciuxjniuw beh kir bongliac hukongx, qandna' qaqi qex pilyy narnia. Hukongx beh nacc suijai liw bongliac e diyc?"
Ananda qra Vuddyy qongw, "Sewjunx, bibiau u qakdix ee vunxsingr vitdnia m si rinx iarr m si enn. Anxjnuaw Sewjunx suwsiongg qra bikiu qangxsuad qongxx qnir ee vunxsingr u sir jiongw soxx knikib ee in'enn? Iarr dyrr si knikib kongbuu, knikib bingqngx, knikib simx, qapp knikib bak. Jitt xee dyrliw anxjnuaw qongw?"
Vuddyy qongw, "Ananda, guaw qongw sewqanx soxu in'enn siongwtew vingrr m si juxiaur ee ywgi. Ananda, guaw qycc mng liw. Soxu sewqanlangg qongw 'Guaw erdangr qnir .diyc.' Sniaxmih qiyr juer qnir? Sniaxmih si qnir be diyc?"
Ananda qongw, "Sewqanlangg in'ui zidtauu, guehniuu, iacc dinghuew ee qngx tangx qnir jiongxjiongw ee siongwtew, jex qiyr juer qnir. Narr byy jitt snax jiongw qngsnuar, dyrr qnir be diyc."
"Ananda, narr byy bingqngx ee sii qiyr juer vutqenr, ingqaix knuar be diyc amr. Narr vitdnia qnir e diyc amr, jex dna' si qnir be diyc bingqngx, anxjnuaw qongw si byy knuar .qnir? Ananda, narr dirr oamr ee sii in'ui byy qnir diyc bingqngx, miaa qiyr juer vutqenr. Dnaxx dirr bingqngx ee sii, byy qnir diyc amr ee siongwtew, qycc qiyr juer vutqenr. Cincniu jitt nng xee siongwtew longxx qiyr juer vutqenr. Narr junw jitt nng xee siongwtew horsiong vnivuic sna' srer, m si liw dirr qnir ee vunxsingr lairdew jiamrsii byy .kir. Jiauww anne tangx jaix nng jiongw longxx qiyr juer qnir, anxjnuaw qongw vutqenr? Soxiw qongxx Ananda, liw jitmaw qaidongx jaix, qnir diyc bingqngx ee sii, qnir m si bingqngx. Qnir diyc oamr ee sii, qnir m si oamr. Qnir diyc kongbuu ee sii, qnir m si kongbuu. Qnir diyc satbat ee sii, qnir m si satbat. Jitt sir xee dyrliw singlip, liw ingqaix jaix, qnir diyc qnir ee vunxsingr ee sii, qnir m si qnir. Qnir li qnir ee vunxsingr hng hng. Qnir berdangr qaur qaxx hiax. Anxjnuaw qycc qongw sniaxmih inenn, jurhuad tenzenn, iacc tongxhap ee siongwtew? Linw jiaxee sniabunn qaidnua :ee, ehdec byy qenwsig, berdangr tongdat cingjing sit sxiong. Guaw dnaxx qra linw hunwsi. Linw qaidongx jimjiog suniuu. Dirr bibiau ee Bodhi lo-siong m hyw pilyy iawlanw."
Ananda qra Vuddyy qongw, "Sewjunx, cniurr Vuddyy Sewjunx uirr guanw jiaxee suanqangw inenn, jurhuad tenzenn, soxu tongxhap ee siongwtew, ixqip byy tongxhap ee siongwtew jiaxee ywgi, suacc iuguann bue kuix simkiaur. Acc jitmaw qycc tniax qnir qongxx qnir diyc qnir ee vunxsingr m si qnir, dingvue qetnix gignaiw iubun. Guan liw qongwdai ee juvix sisiar dua diwhui ee bak laii kaisi, hro guanw jiaxee u qakdix ee simx bingqngx cingjing."
Ue qongw suah, visiongx lrauu bagsaiw, qnialew liauxau niaxsiu singwjiw.
Hitt sii, Sewjunx knuar Ananda qapp juui dairjiongr jin' kyxlendai, dyrr beh qangxsuad Dua Dharani, soxu samadhi bibiau siuhing ee lo. Ix qra Ananda qongw, "Liw qiwdii jin' hyw laii qongw, dna' qetnix quaw qenwbunn narnia, narr dirr jingbii jingrquanx jiywqnir ee shamatha, liw ee simx iauxx bue liauxgno. Liw jitmaw jimjiog tniax. Guaw uirr liw hunved, kaisi, iarr hro jionglaii soxu u lrau(huanlyw) :ee did diyc Bodhi(potee) qongqyw. Ananda, itcer jiongwsingx, dirr sewqanx lunhuee, iu' kuhunx nng jiongw dendyr laii snix cud bongrsiongwqapp sialiam. Hitt xui huatsingx, hitt sii dyrr u giap decc lunjuanw. Qongxx si dycc nng jiongw bongrsiongw sialiam? Jit jiongw si jiongwsingx qokk giap soxx jyrjniaa :ee. Derr zi jiongw si jiongwsingx ngaqab cihun :ee."
Sniaxmih qiyr juer qokk giap ee bongrsiongw sialiam? Ananda, vixzu cincniu sewqanlangg angg bak bak huex, amwsii qnir diyc dinghuew u lingrgua jit xee ngirkohingg ee ngiaw. Go jiongw sig dingtac. Iwsur decc qongw sniaw? Jitt xee amwsii dinghuew qngsnuar soxx henxhen ee ngikohingg ee qngx si dinghuew ee sig iacc si quanqnir ee sig? Ananda, jitt xee narr si dinghuew ee sig, m si bak huex :ee anxjnuaw soxx qnir byy siy' qang? Acc jitt xee ngikohingg ee ngiaw narr dna' bak huex :ee jiacc knuar e diyc. Junw narr si quanqnir ee sig, quanqnir ixx jniaa juer sig, acc hitt xee bak huex :ee soxx qnir .diyc hitt xee ngikohingg ee ngiaw beh qra qiyr juer sniaw? Qycjaiww qongw, Ananda, narr jitt xee ngikohingg ee ngiaw lirkuix dinghuew u qaqi junjai, anne knuar vnix:a ee vinvangx, vowlii, qapp qixdyh marr e u ngikohingg ee ngiaw cuthen. Narr lirkuix quanqnir qaqi junjai :ee, ingqaix m si iong bagjiux knuar. Anxjnuaw qongw bak huex :ee bagjiux qnir diyc ngikohingg ee ngiaw? Soxiw qongw qaidongx jai'ngiaw, siktew kaksit dirr dinghuew. U bagjiujingr jiacc knuar diyc ngiaw. Ngiaw qapp quanqnir longxx in'ui bak huex. Quanqnir u bangbu m si vnirjingr soxx drir. Jiongqibuew byy ingqaix qongw jitt xee ngiaw si dinghuew iacc si quanqnir, higjiaxsi dirr hitt lairdew u m si dinghuew iacc m si quanqnir dilehh. Naxx cincniu derr zi guec, m si siongwtew marr m si ngiaw. Sniaxmih enqor? Knuar diyc derr zi xee si liamr bak soxx jyrsingg ee enqor. Soxu u diwhui :ee, byy ingqaix qongw jitt xee liamr bak si qinguann, higjiaxsi u hingtew iacc byy hingtew. Lirkuix qnir ee vunxsingr m si qnir. Jitt xee le marr si qangrkuanw. Bak huex soxx jyrsingg ee ngiaw, jitmaw beh qiyr sniaw si dingx sniaw si qnir? Byhqongxqiyh beh hunved m si dingx iacc m si qnir."
"Sniaxmih qiyr juer ngaqab cihun ee bongrsiongw sialiam? Ananda, jitt xee Jambudvipa, dukiw duarhaiw ee juiw, diongqanx ee vningiuu liogde u snax-cingx xee jiux. Jniawdiongngx ee dua jiux, dangvingg saivingg liongrqiiog sngr, dua qog dairkair u nng-cingx snax-vah xee. Ijurgua, soxu haiw-diongx ee siyw jiux, hitt diongqanx uree u nng~snax-vah qog, uree jit xee iacc nng xee, simrjiww qaur snax-jap, sir-jap, iacc go-jap qog. Ananda, narr dirr jitt lairdew u jit xee siyw jiuw jixu nng qog. Qidiongx jit qog ee zinbinn qiongrdongg qamxsiu diyc hiong'og ee giab'enn. Jitt xee toxde ee jiongwsingx knuar diyc soxu itcer pnaiw qetdiau ee qingxsiong, qnir diyc nng xee zidtauu, iacc qnir diyc nng xee guehniuu. Qidiongx simrjiww u qnir diyc sitzit sitguec cincniu gigduar ee hxingg, dngbuexcniu vuex .quer siausid, iacc cud king jiongx jiongw hiong'og ee qingxsiong. Dna' jitt qog :ee knuar e diyc. Hitt qog jiongwsingx vunxdew dyrr m bad knur .quer, iarr m bad tniax .quer."
"Ananda, guaw jitmaw uirr liw ixx jitt nng qnia dairjir ee jing'au jiauwhap laii suatbingg. Ananda, kyxviw hiaxee jiongwsingx u qokk giap ee bongrsiongw sialiam, knuar diyc dinghuew-diongx soxx henxhen hex ngikohingg ee ngiaw. Suizenn henxhen naxx jinsit ee qingxsiong, quibuew hitt xee soxx qnir .diyc .ee si bak huex soxx jyrsingg :ee. Bak huex si bak lylok, m si sikdinn soxx jyrsingg :ee. Mrqycc bak huex :ee, quibuew m si quijue quanqnir. Kyxviw liw qinaxzit iong qorr bagjiux quanknuar sanhyy qoktow qapp soxu jiongwsingx, longxx si an' kixtauu byy ixlaii qnir ee vunxsingr u vni soxx jyrsingg. Qnir qapp qnir soxx knikib :ee ham' henxhen dirr binrtaujingg ee qxingw siysiang. Vunxguann bingqngx u qakdix ee qnir soxx knikib :ee bak huex, u qakdix ee qnir dyrr bak huex. Vunxguann bingqngx u qakdix ee simx, qakcad soxx knikib :ee m si ganxjingr. Qakcad diyc qakdix bak huex :ee, qakdix m si dirr ganxjingr lairdew. Jex si sidjai qnir diyc qnir ee vunxsingr. Anxjnuaw qycc qra qiyr juer qakdix, tniax .qnir, jaiqiyh qapp knuar .qnir? Soxiw qongxx liw jitmaw knuar diyc guaw qapp liw, qapp soxu sewqanx jap lui jiongwsingx, longxx si qnir ee vunxsingr u bagjingr, m si jinjniar si bak huex :ee. Hitt xee qnir ee vunxsingr jinsit jingleh, byy ganxjingr. Soxiw qongxx byy qra qiyr juer quanqnir. Ananda, naxx cincniu hitt xee jiongwsingx ngaqab cihun ee bongrsiongw sialiam. Kyxviw qongxx u jit xee u hitt xee bongrsiongw sialiam ee qokk giap :ee qapp jit xee u bagjingr :ee qang jit qog. Hitt xee qnir diyc ngikohingg ee ngiaw :ee si in'ui bak huex bongrsiongw soxx sanxsingx. Jitt xee jingwlangg ngaqab cihun soxx knuar .diyc ee pnaiw qetdiau, vnivnii dirr qnir ee giap lairdew, si og ee giabjer kixdir. Jiaxee longxx si an' kixtauu byy ixlaii bongrsiongw sialiam soxx sanxsingx :ee.
Kyxviw qongxx Jambudvipa snax-cingx jiux lairdew qiamx sir dua haiw, Saha Sewqair, qapp dirr sibhongx soxu u lau (huanlyw) ee qog kiarkiw :ee, ixqip soxu jiongwsingx, vnivnii longxx u jit xee bingqngx, u qakdixbyy, ixqip bibiau byy lrau ee simx, in'ui hro knuar, tniax, qakdix, qapp jaiqiyh jiaxee hubuu bongrsiongw ee vni knikib, camcab jywhuew laii bongrsiongw snix iacc siw. Narr erdangr qapp soxu camcab qapp byy camcab ee inenn li hng hng, dyrr tangx dubet soxu snesiw ee inenn. Uanbuanw potee vunxsingr byy snix byy bet. Vunxdew cingjing ee simsingr, vunxguann ee qakdix suwsiongg dilehh."
Ananda, liw suizenn dairsingx liauxgno diyc vunxguann u qakdix bibiau bingqngx ee vunxsingr m si inenn iarr m si jurhuad tenzenn, mrqycc iauxx bue bingvik jitt xee u qakdix ee vunxguann m si in'ui camcab iacc byy camcab laii sanxsingx :ee. Ananda, guaw jitmaw qycc iong taujingg ee huandinn siogsu mng liw. Liw dnaxx iauxx uirdiyhh itcer sewqanx bongrsiongw ee camcab ixqip soxu inenn ee vinxsingr qaqi decc gignaiw, sniu be crunx. Beh jingwbingg potesimx si camcab kixinx :ee, anne liw jitmaw bibiau cingjing jinglen ee quanqnir si qapp bingqngx camcab iacc si qapp oamr camcab? Si qapp tongtaur camcab iacc si qapp satbat camcab? Narr qapp bingqngx camcab, liw quanknuar qngsnuar, qngsnuar henxhen dirr binrjingg, dyc'ui u camcab quanqnir? Qnir ee siongwtew narr tangx venrved, jabcyr si sniaw hingsiong? Narr junw knuar be diyc, anxjnuaw qongw qnir diyc bingqngx? Narr junw jex dyrr si qnir ee vunxsingr, anxjnuaw qongw qnir diyc qnir ee vunxsingr? Narr qnir ee vunxsingr vitdnia si uanbuanw, dyc'ui qapp bingqngx camcab? Narr bingqngx uanbuanw, dyrr be qapp quanqnir camcab. Quanqnir vitdnia qapp bingqngx byy siyqang. Narr jabcyr dyrr srid kir vinxsngr qapp bingqngx inx miaa ee iwsur. Jabcyr srid kir bingqngx vinxsingr. Qapp bingqngx camcab qycc byy hac lixlo. Hiaxee oamr qapp tongtaur ixqip soxu satbat ee vixzu iarr qangrkuanw si anne. Qycjaiww qongw, Ananda, liw jitmaw bibiau cingjing jinglen ee quanqnir si qapp bingqngx camcab iacc si qapp oamr camcab? Si qapp tongtaur camcab iacc si qapp satbat camcab? Narr qapp bingqngx camcab, qaur qaxx amwsii, bingqngx ee siongwtew bet .kir. Jitt xee qnir ee vunxsingr dyrr byy qapp soxu ee oamr camcab. Anxjnuaw qongw knuar diyc oamr? Narr qapp oamr camcab, jitt xee qnir ee vunxsingr byy qapp oamr camcab, si qapp bingqngx camcab, anne ingqaix be knuar diyc bingqngx. Qacc be tangx knuar diyc bingqngx, anxjnuaw qongw qapp bingqngx camcab? Liauxqaiw bingqngx m si oamr ee ywgi, hiaxee oamr qapp tongtaur ixqip soxu satbat ee vixzu iarr si qangrkuanw."
Ananda qra Vuddy qongw, "Sewjunx, jiauww guaw cimx sniu :ee, jitt xee bibiau u qakdix ee vunxguann qapp soxu siogdinn ixqip simx ee iwliam iacc quawlu longxx byy camcab."
Vuddyy qongw, "Liw dnaxx qycc qongw qakdix si byy camcab :ee. Guaw qycc mng liw. Jitt xee bibiau jinglen ee quanqnir narr byy camcab, si byy qapp bingqngx camcab iacc si byy qapp oamr camcab? Byy qapp tongtaur camcab iacc si byy satbat camcab? Narr junw m si qapp bingqngx camcab, anne quanqnir qapp bingqngx vitdnia u qaiwjiw. Liw cniaw jimjiog knuar. Dyc'ui si bingqngx? Dyc'ui si quanqnir? Quanqnir qapp bingqngx qokk ixx sniaw jyr qaiwjiw? Ananda, narr dirr bingqngx ee venqair byy quanvnir, anne dyrr vitdnia byy siy' qaucab, jurzenn m jaix bingqngx siongwtew dirr dyhh. Qaiwjiw beh anxjnuaw singlip? Hitt xee oamr qapp tongtaur, ixqip soxu ee satbat iarr qangrkuanw si anne. Qycc, bibiau jinglen ee quanqnir narr byy camcab, si byy qapp bingqngx camcab, byy qapp oamr camcab, byy qapp tongtaur camcab, iacc si byy qapp satbat camcab? Narr byy qapp bingqngx camcab, anne quanqnir qapp bingqngx, vunxsingr horsiongx kebew, cincniu hni qapp qngsnuar horsiong byy qaucab. Quanqnir dy' m jaix bingqngx siongwtew dirr dyhh, anxjnuaw laii jingwbingg camcab iacc byy camcab ee dyrliw? Hitt xee oamr qapp tongtaur, ixqip soxu satbat iarr qangrkuanw si anne."
"Ananda, liw iauxx bue bingvik itcer huhoo siogdinn, soxu huanwingw huar juer siongwtew :ee, hitt sii hitt xui snix cud, suisii dirr hitt xui bedjin. Huanwingw bongrsiongw qiyr juer siongwtew, ix ee vunxsingr si jinsit bibiau u qakdix bingqngx ee tew. Cincniu jitt kuanw simrjiww qaur go skandha, lak zip; an' jap-zi cxur jiww jap-veh qxair. Inenn camcab, snix cud hubuu bongrsiongw. Inenn hunlii, hubuu borsiongw ee miaa qiyr juer bet. Byy huatdo jaix snix, bet, kir, laii jiaxee vunxguann si Zulaijongr (Vudsingr). Bibiau bingqngx suwsiongg dilehh. Byy dinxdang, jiuuii bibiau jinsit jurzuu ee vunxsingr. Dirr vunxsingr suwsiongg jinsit diongqanx beh qiucuw kir, laii, bee, gno, snex, iacc siw, sniaxmih dy' did be diyc."
"Ananda, anxjnuaw qongw go skandha vunxguann si Zulaijongr bibiau jinsit jurzuu ee vunxsingr? Ananda, piwlun u langg iong cingjing ee bagjiux quanknuar jinghyy bingqngx ee tnix, qandna' jinghyy kanghux, siwjiuuii byy vadd hxang. Hitt xee langg byy-en.-byy-qor bagjiux byy dngxlunn. Jinn quw kiw pilyy dyrr dirr hubuu-diongx, lingrgua qnir diyc ciongqongg huacaiw, qycc u itcer qongluan bongrsiongw. Qaidongx jaix siktew ee skandha iarr si anne. Ananda, soxu ee ciongqongg huacaiw m si an' hubuu laii, iarr m si an' bagjiux cud. Cincniu anne, Ananda, narr kanghux an' kanghux cud .laii, qycc an' kanghux zip .kir. Narr u cutzip, dyrr m si hukongx. Hukongx narr m si hukongx, jurzenn be ionglap huacaiw siongwtew hingkiw iacc bedjin. Kyxviw si Ananda ee sintew byy ionglap Ananda. Narr junw an' bagjiuw cud .laii .ee qycc an' bagjiux zip .kir, qacc jitt xee huacaiw an' bagjiux cud .laii, qaidongx e tangx knuar .diyc. Narr erdangr knuar .diyc, huacaiw kir liauw dyrr kangx ar, liammisii dyrr knuar diyc bagjiux. Narr berdangr knuar .diyc, huacaiw cuthen ziakamr kanghux, liammisii qaidongx ziakamr bagjiux. Qycc qnir diyc huacaiw ee sii, bagjiux ingdongx byy virr ziakamr, anxjnuaw qra jinghyy kanghux qiyr juer bagjiux cingbingg? Soxiw qongxx qaidongx jaix siktew ee skandha si hubuu bongrsiongw. Ix ee vunxguann m si inenn camcab, iarr m si jurhuad tenzenn :ee."
"Ananda, piwlun qongxx u langg kax dax ciuw dax, qui' sinkux longxx diau'iongw suwsi. Hutzenqanx naxx cincniu qra dorsnix longxjongw kngr jit vnix, byy dakkee iarr byy sunrsu. Hitt xee langg byy-en.-byy-qor iong nng xee ciuxjniuw dirr kongdiongx horsiongx syluac. Dirr nng xee ciuxjniuw-diongx snix cud bongrsiongw ee siab, qut, lingw, qapp siyx dingxdingw soxu ee siongr. Qaidongx jaix qamxsiu ee skandha iarr si anne. Ananda, jiaxee soxu huanwingw jiapciog, m si an' kongbuu laii, iarr m si an' ciuxjniuw cud. Cincniu anne, Anandan, narr an' kongbuu laii :ee, qacc erdangr jiapciog diyc ciuxjniuw, anxjnuaw berdangr jiapciog diyc sinkux? Iarr byy ingdongx si hukongx laii suanxdik beh jiapciog :ee. Narr an' ciuxjniuw cud, ingqaix benw danxtai camcab tongxhap. Qycc in'ui an' ciuxjniuw cud soxx drir, qniwnarr camcab, ciuxjniuw dyrr jaix; qniwnarr hunlii, jiapciog ee qamxsiu dyrr jinwzip. Ciuxqud, ciuxjad, qapp qutcuew ingqaix iarr qakdix diyc jinwzip sii ee jongjig. Vitdnia u jit xee u qakdix ee simx, jaix qamxsiu ee cutzip, jurzenn u jit xee budtew dirr sintew diongqanx decc ongxlaii. Tacc diyhh danxtai camcab tongxhap, jiacc laii qra qiyr juer jiapciog? Soxiw qongxx qaidongx jaix, qamxsiu ee skandha si hubuu bongrsiongw. Ix ee vunxguann mM si inenn camcab, iarr m si jurhuad tenzenn :ee."
"Ananda, piwlun qongxx u langg dramm kiw diyc m'aw dyrr e lrauu cuiwnua; sniu kiw diyc dac dirr snuakamr, kadew dyrr e sngsiab. Qaidongx jaix qamxsiu ee skandha iarr si anne. Ananda, qongw diyc m'aw dyrr lrauu cuiwnua, hex cuiwnua m si m'aw snix .cud .laii .ee, iarr m si an' cuir zip .kir .ee. Cincniu anne, Ananda, narr m'aw snix .cud .laii .ee, m'aw qaqi dramm kiw jiacc habgii, tacc diyhh danxtai langg' qongw? Narr an' cuir zip .kir .ee, qaidongx an' cuir laii tniax, tacc diyhh danw hni-aw laii tniax? Narr dogdok hni-aw tniax .diyc, jitt xee cuiwnua tacc byy an' hni-aw lairdew cud .laii? Sniu kiw diyc dac dirr snuakamr, lunrsuad qapp jitt xee siysiang. Soxiw qongxx qaidongx jaix, sniu ee skandha si hubuu bongrsiongw. Ix ee vunxguann m si inenn camcab, iarr m si jurhuad tenzenn :ee."
"Ananda, piwlun qongxx hionglauu, jit ingw duer jit ingw, jingg ingw qapp au ingg be horsiongx quewqongr. Qaidongx jaix skandha ee qniavangr iarr si anne. Ananda, cincniu jitt xee juixlauu ee vunxsingr, m si knikib kanghux laii snix cud, m si knikib juiw jiacc u :ee; m si juiw ee vunxsingr, iarr m si ham' hubuu qapp juiw sna' li. Cincniu anne, Ananda, narr knikib kanghux laii snix cud, anne soxu sibhongx byy dexjiw ee hukongx longxx venwsingg byy jinrqag ee laujuiw. Sewqair jurzenn longxx dimlunn rimx .kir. Narr knikib juiw jiacc u :ee, anne jitt xee hionglauu ee vunxsingr ingdongx m si juiw, u jit xee ix soxx u ee siongwtew, jitmaw ingdongx henxhen ix ee junjai. Narr dyrr si juiw ee vunxsingr, anne dingcingx ee sii, ingxqaix m si juiw ee vunxtew. Narr ix si ham' kanghux qapp juiw sna' li, kanghux dukiw jursinx ixgua byy u vadd hxang, juiw ixgua byy laujuiw. Soxiw qongxx qaidongx jaix, skandha ee qniavangr si hubuu bongrsiongw. Ix ee vunxguann m si in'enn camcab, iarr m si jurhuad tenzenn :ee."
"Ananda, piwlun qongxx u langg qra jit xee kalavinka juixquanr nng vingg ee kangx trad lehh, diongx:a kangx kangx ee kalavinka tec lehh qniaa cxenx lxiw hng kir qaur vadd xee qokqax sna' hing. Qaidongx jaix iwsig ee skandha iarr si anne. Ananda, cincniu jitt jiongw kanghux m si an' hitt xui laii, iarr m si an' jitt xui zip. Cincniu anne, Ananda, narr an' hitt xui laii, jitt xee kalavinka juixquanr lairdew qacc si drew kanghux kir :ee, dirr kalavinka juixquanr ee vunxde ingqaix u kanghux qiamxjiyw .kir. Narr an' jitt xui zip, kuix kangx beh qra dryr .cud .laii, ingqaix qnir e diyc kanghux cud .laii. Soxiw qongxx qaidongx jaix, iwsig ee skandha si hubuu bongrsiongw. Ix ee vunxguann m si inenn camcab, iarr m si jurhuad tenzenn :ee."