SXER TUANN SXER
(ID)
Tuapniax tuapniax, simqnuax kixlyc be dnia. Snuax qingg haiw qet, lo qniaa qaur jinrqag. Jitt daux, qamxx dyrr si ix jitt sxer ee juadhongniaw?
Zinsingx giamxzenn jit dniuu bang. Ix ee bang, sowsiongg si koxsiab, samvutgorhau qycc u sngbuix quawcamx dilehh, qamdnix si hranw did quiw sii. Kacngqud iux iux aw tniar jinx duw jinx. Jitt diab, siangx kax hen duw hen dac dirr too, bak-jingg itcer diksit m si huanwqingw. Snax dxangx jingg ee jit xee ziddaur au, duxduxx dua hanr jaboxqniaw jyr muaxguec ee huandngw zit, kunr byy vaw binn jit xe srid jimjiog, autobaik lee cann, langg dngwlakje, vuac jit xe iyqud qiongrbeh kuikingx .kir. Gni banw qiongg tuax qnuaw kir juer kangkuer, iarr byy knuar isingx. Jurr hiangwsor qaur jiangwsii, qenww narr kaux snghongx, jingwtauu dyrr giaa kiw laii tniar. Jitt kuanw ee koxcow, jaiqiyh :ee dngrr vnuar langg.
“Huanrqanx si kow haiw, byy-ven.-byy-qair, qankoxqer cud vutjin. Kunxqiuu suhu qra derjuw tiwdo, qiuwjo qankoxlangg jaw jit sii an’ jitt xee koxqingw tuatsinjauw.”
“Sijuw sniax sniax qxur qxur, kow .zri vutlii cuir. Dauwdiw si anxjnuaxngiu aw ee kow hxuad? Cutqelangg jinjniar aiwqii.”
“Derjuw vutjiongxjinr dagg hxang dy’ kiamwkueh, dogdok kiamwjuw muaw tnix venww de, kiarnii kiarguec dongdongx decc qa’ngg lajiyh, jewhang jit snuapniaa. Vuac lyc qniaxzii-knex vee-kangr-iah, nng xee iur qniaw, dua hanr :ee decc tak iyjien, ser hanr :ee cimxcimxx decc yc qniaa, cur-lai qo’ qo’ guaw jit xee u lirlo, jiah’ing qewqer knuar guaw, sinkux iuqycc vutsii kamxkyw, jnia' tapkap. Kiw jaw jre amr siangx tauu ox, snax~sir xee taulo decc juer, qangrkuanw muixx guehzit dy’ taptauu. Nidangx guehjeh iarr m qnaw hiyh, jiokk saksinx, hro jnii ziog qaxx qiongbeh jauw byy lo.”
“Vudsi m si hro langg piacvi ee soxjai, kensimx-ken’ir he jindniux beh siuhing :ee jiacc tangx laii. Siogdinn ee su byy jinrqaix vangwhet, Amitohut liam taur zit, qiuwqizenn iarr si ongxhuir.”
Qyjingx ee kaipuar dirr dxangx gua jingg, jyrjiw dirr snuabuew ee jit jxy qoxsi. Itlorbuew, huesniu byy kir juer, byy tranr jingdoo jiac vudvng. Tuax srinx buaa mia jyr vnuar siw, dorjiac iuguann je qanqer. Simtauu narr u dikdnia, cuiwkixqinx qa lehh, auxbann aw iaxx erdid quer. Sewsu busiongg byy dairuaa, horjuiw dirsii beh an’ tnidingw puah lyc laii be itlut tihh, byy iong’unw zimrhyy langg qruar byy su vaii.
“Dut lanw qongxx si itvunw banrli, jiyhox lanw kiarkax vngx singliw. Qycc qongw siongrr qex vnuar dxangx dyrr tangx vnivunw. Lanw si sniu qongxx jiaujiyw aw singliw bongxx qing’ingg, tangx qra liw draur pnikinx. Kiamr langg’ ee qu siaur narr liongrjaw cinghuann, dyrr kacc benw dagg qywguec decc lrap hitt hy gnoxhoxlai. Langg ee simx qeh dorvag jinjniar lann did liau. Sxor jap nii ee qowqaux, beh sniaw jaix jnii iarr qra lanw hiautunx cnuax cnuax .kir kuanw lecc jauw. Dngcuesii kir qra ginhangg taijiyh si iong cur cutdenw kir ho’ngg juer kimliac. Sngr sii sngr zit, dnaxx jitt sniax qaur han kiamwkuanw byy hnaii, lanw ee kiarqecur m qnaxx e ho’ngg cehongx ciongx lyc qongx.”
Qeau naxx qongw naxx hauxcanx. Virr vywdix hiangwsii, bagjiux kixer, kabuew tauwdit cnelingw .kiw .laii, qaur jitquw iuguann jiokk qiksimx. Crua diyc amkamw bow narr si tnix sowding, qimdnuar qniaa duiww kutbuexlo sngr habdongx?
Vutdix-vutqag, dua kuir trow jit xe. Sniu kiw ongxsii ee qingxgu, binrjingg ee lo iuqycc amr jutjud knuar be diyc jionglaii, itsingx tangx qongw venww srinx kow. Qoxjaw ee kuanwsewquax u decc liam qongxx juer guu rair tuax, beh si cutsir juer langg snevunw diyhh sriu buaa. Buaa liauw quewquar iuqycc sraiw jinrvong, hethanr quatding beh qetqyw qaqi ee sniwmia. Juirlangg u qraur qeh genn-snax-guw-sir laii decc qra ix viw dngg lun dew?
“Lanw taur siwlangg q.-quiqiw-q., t.-tiabsit-s., byy sniaxmih pnaiw dikhing. Au sxir ee sninii-guehzit, diyhh hro lanw driyc sii qycc driyc xui, diyc lanw laii hyw mia .jit .vaiw.”
Beh jauw jinwjingg kensimx dauhe. E-be, beh jurjin :ee jngzenn byy vaxcii.
“Mamax, vavax lehh?” u cing doriamw ee ser hanr ginxaw mng.
“Vavax quewhuanx kir guarqog tanwjnii,” jyr laurbuw :ee dab.
“Acc ix dirsii e dngw .laii?”
“Liw narr u quaix, ix jin’ qinw dyrr e dngw .laii.”
“Anne guaw beh quaix quaix, guaw beh air vavax qnuaxqinw dngw .laii.”
Dingw zit aw kir iuwdirhngg jriab jaboxqniaw, vut’iwqanx tniax diyc jit duir qniaxbuw-aw dirr siamxqag jit qxur laii jit qxur kir decc duiwqongw, hitt xee jinx qxingw jinw dirr taukag-lai qycjaiww liu jit vaiw.
Cur nirr jit siangx qniaxzii aurzit aw duarhanr si hyw si baiw, jitt sniax kir kunr cauxvox dyrr bxan hxang vangwhe. Inx narr junw e tangx v.-ving’anx-a. diongxdai singzinn, aurquer qycc sui’ langg u huatdenw dyrr jin’ qajair. Cenvuthing narr qniaa duiww oamr hang kir lehh? Kiamr jit xee niuve dirr inx sinkuvnix kanqiyr qamxx qongxx byy dirduardai?
Beh zip quixbunquanx, qutziok cinjingg quacsag be li hionghiongg qiux kax. Vangr be lyc simx, tensor juwdnia jitt diauu kolyhmia diyhh qycc tuax qycc dxyy, beh qnir Giamlyy bag’e vutven, aursii jiacc venrknuar.
“Vavax!”
“Vavax!”
Knuar diyc vercinx huee qamngg, duarjew siyxdi qig ping dua sniax decc qiyr, hnuahiw qaxx diyy ciakciag. Uad dywdngw ee lo nirr, jitt bo uahqingw dirr taukag-lai jiabjiap decc cuthen. Qnua lrauu jiab dih, qnuaxkax :ee tiamw kiokk si tiamw, li cur zuxx qin, jingsinn qycc suacc zuxx qiagsiag.
(ZI)
Nii vingww quer Diongciux. Cutguec, langg diyrr beh sxiab-qiuw. Jit xee juxkeh druar Tyaxhngg. Cingjaw, qxex vyr xinn dyrr lyc bincngg kuanw qniartauu. Dnaxjingw jevi beh cutmngg, cur nirr nng xee tak juankyx :ee, jit xee iauxx decc dang bin kunr, jit xee duxaxjiacc jingsinn, bak sarsi decc pacham.
Pacsngr beh tyw jnii ar ee kuanw, autobaik ee endangg jitt quiw zit aw jiokk gauu aicanx, cinwcaiw dinxdang diyc dyrr kongwkongr qiyr, be kamx did sraiw qinxliauu. Iarr diyhh vangwjaw kixqniaa jiacc si vo. Id~zi-jap dxangx dngnii-tangwtnix jauw papax, hongx kaux, ho puah, zit pak, jit daii 125 :ee qui’ sinkux ee qesix nguar qaxx beh taur. Enzin, ciadingx, cialenw, bateri, byy qaxx jit hxang byy hai .kir, pnaiw qaxx jin’ jiauu diyc. Dandanx huexjux-aw dy’ m jaix tuir quer quiw liap kir ar, byhqongxx nng vingg ciaciuw ee dongxaxpuee.
Autobaik ee juxlangtauu iarr byy tangx zuarr knuiwuac. Qachahvax sanw kikkih, tong’ srinx iuqycc jiax sngx hiax tniar, danqyx-uansanr, qoo, buah, tunx, quanr, jauw iyhdiamr viw kir cur nirr ee jauwkax iauxx qyckacc jiap. Jaw qniaa nguar hiyh jiokk suwsiongg, snax dxngr samvutjingr jiac. Crinr vng dngx iaux langg. Gorsii-buew, an’ tauwjaw qaur jinw iauxx longxx byy limjiac, diddit decc pah iau'eh. Lorvongg jit dnar decc kad yy-aw mirsnuar byy ixaxui diyhh kia lecc jiac iarr bongxx jiongjiu. Qiyr jit nguaw dua cuir tunx, snax xee vnuar ciuw qnir nguaw-drew, gnoxcanx dyrr anxnix junw .quer. Liamw cuiwtauu, jiac jit xee vnuar iauvaw dyrr hyw.
“Kow Sangr, jitt quer hro liw jiokk huiwing simsinn, sidjai jin’ loxlat!”
“Siyxdi vutjaii jyr kitjiac-singliw. Si tauqex byy hiamki guanrir laii kansingg. Vadd zit aw narr u duw diyc bunrdee, vutlun duarser hxang, denrue vutqisii jikquanw kar .laii.”
Duw diyc hyw kectauu, hyw-ir-hyw-sinn, simqnuax cingcaiw. Beh kir vaiwtamr xe jit xee qowkeh, nng lenw :ee decc kiaa, quax-aw qycc naxx decc hnaix.
“Pnaixser lar. Jitkuir ciuw-lai u kacc sywsiab, piyr u qra liw kuix kacc quw .damrvyc .aw.”
Qidnuax dingxbin ee zidjiw liyw .jit .xe, simqnualai amwvutjni decc cyh cyh me, byy uersnuar ee siyxcetciuw qinw qra dre zip kir snaaxquii. Beh siux jitt jruw ee siaur, tauu jiww buew jauw snax jua ar. Dikqypiyr kacc qniu dngrr vnuar bunn. Byy air uirr siyc siyc aw singliw liauw gong kaqud.
Buaa puee buaa qud, siar srinx siar mia juer taulo, qu kiamr hingg qaxx beh li ar. Zit junw mii, mii junw zit, ehng’amr huedngw cur iuqycc pah amwbox. Tiamw qaxx beh uaxingw, suwjix-vikhaii buanxsinx sngsew dac zip mngg, knuar diyc haursnix sngw denrdong sngw qaxx juu ~ ~, honghuew huad, iam pongwpongr.
“Guaw cimxx kuiqix narnia, iarr longxx iauxx bue sngw .diyc.” Qniaw hunhue.
“Sngw hex si beh siw? Bycaiw sniwmia” Baghuew-bagdag, laurve qawsi qniaw, jit qxur ue snax qxinx lak dang.
“Liw marr e pah baciog golok a! Guaw sngr gem marr qangrkuanw? Qamxx u sniaw jingjuac?” Qniaw dywvog vren uerqud.
“Hex jiacc si byy qangg! Guaw si jyr nijeh iacc ingg zit jiacc u i.” Laurve vnuar sniax vnuar qra had dywdngw, pnaiw piah .kiw .laii.
“Guaw qaqi u junxjad, jit qangx sngw vnuar diamxjingx, siongrqex jit diamxjingx suah. Liw baciog si longxx vuac taur mii :ee.” Qniaw cuir m siw, qycjaiww vyc'ue.
“Linw haghau ee sensnix si anxjnuaw decc qar :ee? Qar qaxx linw jiacc gauu jner cuir jner jic!” Laurve kiwgik, dangwbak sraiw snaqakqingx dng' bin hattauu. “Linw ve tnix qngx bxauw vniar qaur amwiu, mngxdngr dy’ iauxx bue hauwqox lehh! Iarr u tangx cancniu liw jiacc liongwtinr, qui’ amr diamr cur tentew. Qongw qaxx linw jiaxee byy ciux aw laurdua, cing ree diyr buec, hyw mia m jaix!"
Qaur jiax sixcuir, haursnix kitt laurve pongwdingx, aur tauu aur bin, simdew iaxx vuthogzinn ee kuanxtew.
“Linw laurbuw kir dyhh? Tacc e byy dilehh?” Cue byy cuwlairlangg, davolangg mng qniaxzii.
“U langg ongxsingx. Ix kir qa’ngg jorliam vuatdo.” Haursnix inwdab, byy hyw sniasaur.
“Si’angw quewongw?”
“Iarr jaix?” Haursnix cingwqingx.
“Acc linw a’jew lehh? Ehngx iuqycc byy dngw .laii?” davolangg qycjaiww mng.
“Kir cantniax snuaxtanr lar.”
“Qinaxzit vaiwsir ne! Ix si m si qycc qapp langg’ siy’ ngua qangx?”
“Byy lar.” Haursnix duiwcuir rinr. “An’ qinaxzit kiw, ix qex jit xee taulo. Dingw guehzit inw .diyc .ee. Ix u qra a’buw qongw. A’buw tauu jiww buew longxx jaix.”
“Tagcecginxaw, qandna’ qor tanwjnii, beh nacc tak u ceh?”
“Quewnii-sii, a’vxeh a’qxu hro guaw qapp a’jew ee decdow, liw jongw qra siux siux .kir, qycc m hro guanw kir sinwjiyh jyr dairhuiwsingx. Byy kacc kinn kacc qutlat tanr, juwcechuir beh dyhh snix?” Haursnix vrag uerqud lauwlaur qongw. Qniaxve-aw qycjaiww kiw uercnix.
“Linw nng xee qniww narr siux diyc jit xee angvaux, guaw diyhh vnivnii hiaxee jnii cud .kir qapp langg’ vueduer jiacc be sitlew. Dyrr qra liw qongw quer byy siaur vaiw ar. Liw jiacc huantaiw, vangvangx dy’ be huanjuanw!” Laurve dngbin qra hattauu, sniasueh vangr jiokk ann.
“Si’angw qiyr liw beh snix?”
“Guaw zuarr hiyrhuew lehh, liw dy’ m jaix!”
Haursnix iurqycc huan diyc laurve ee cingwlo, veaxqniaw duiwkee. Dua sniax iaxauu qig amrqunxquix, zirviw longxx byy hyw cuir. Hurzinlangg liamrqingx dngw .laii jniawdngsii. Langdngg jaix bagtauu dang liammix tingg cuir. Laurbuw-aw juer tolangsimx giab dirr diongx:a e pnaiw qamxjingg.
“Binxsiur :a beh hag sexnguaxqix. Inx tauu:ee m. Nng xee ang’axbow uirdiyhh jitt jann iuqycc dah jenwvnii, ruanx qaxx be siudniuu. Qongxx lenrr lirenn dy’ huah cud cuir.” Zip laii dirr kunwvangg, hurzinlangg naxx decc ngua kunwsnax, cuir drang cuir naxx decc qongw hro angx tniax.
“Qongw qaxx linw jitt xee ser hanr siyxmue, jnia’ be katqunx, u qraur m zinrhun," jyr angx :ee tror qiamsiamx. "Jyr langg’ luerjo, qui’ qangx qanda’ beh air sosongw. Lanxdnua pix snxax, jingg:a tyw beh dnic jit daii hangx snxax :ee jiacc vnuax jit cud, jitmaw lenrr nguaw dy’ byy air sew. Dua kax qew ser dxee. Quibuew byy cniar jit xee qui' lo hro ix saih :ee qnaxx dy’ be quewzit tihh?”
Hurzinlangg qiux zip kir mijiycpue-lai, byy-genn-byy-giw. Denrhuew qimr huax, angsair ee cuir iaxx m diam, cauhcauc liam be suah. Hnirkangx jyy, juer bow :ee dyw tanxkix kreh bak sriu, byy-cuir-byy-jic.
(SNAX)
Baciokkax benw jiyx, bylun jaw qangrr nguar, denrnauw kuiqix, vutkux sii dy’ tangx sngw, jit ciongr, nng ciongr, qyckacc quw marr sna’ vruee qaxx qaur, longxx benw knuar-si.-knuar-hau.
Ixjaw syx baciokziw, qapp langg’ decc i si vuac sit :ee. Sux qxiauw itsimx beh pacpnii beh qiur vunw, ngiaa qxiauw tranr dng’ ongrciuw beh qex lenw .quaw, baciokdyh knii diauu diauu dang kacngx. Gem dyrr byy qangg. Su’ngiaa byy jniver cutzip, hingwdauw jurdew dyrr u cax, ingxingw sngw byy jit ciongr dyrr senrtauu. Iuxsnuar denrsirdaii vah tongw daii, iuqycc jun byy jit daii air knuar :ee. Ovar puac lehh, laii kir snaqag qonghngg suh jit xee aw ciurbok ee jingkir kacc qnia srinx.
Quisinwtnix, be qniaa be jauw :ee ho’ngg sag cud laii jnawzit :ee muaxsiwsnuax. Dngw bak jid’err knuar, lingbyxciax qapp lun’iw u go cid veh daii. Qniaa kahuex. Qonghngg lairdew siwqer longxx u posed dngg iw, kax narr sngx dyrr bongxx jre. Knuar tnidingw ee hunn vuex, tniax ciu-dingw ee jiauw tii, beh cue langg qongw tnix sueh hongde marr benw qniax byy, u jerje tangx hongrvuee.
“Linw sunx or?” Ozisang qiw sewngex mng obasang.
“Hner a.” Obasang ciyr bunw bunw.
“Jiokk hamx, hangwlingx qaxx! Liw jnia’ gauu riyx!”
“Jitt xee lairsunx lar. Guarsunx nng xee tak qokhau-aw ar.”
“Jnia’ hyw mia.”
“Acc liw sunx quiw xee ar?”
“Byy a, beh dyhh snix? Cur nirr nng xee dy’ longxx iauxx bue qewcua lehh.”
“Jitmaw ee siauwlenn :ee kixqex siqniaa nguar byy siqniaa jaw. Marr uree qethunx kiokk si u qethunx, byy air snix marr byy ix hxuad.”
“Vinjai inx lar. Henrjniaa jyr langg’ ee sirdua, quanxkux jit sii jit sii ser, byy tangx cincniu ixjaw hiacc kuah.” Ozisang qongw diyc jiokk qamxkair.
“Anne qongw marr urngiaw. Dit vutdit, lanw je huer langg sindew qor hro iongw kacc siddiyc.”
Qongdniuu ee soxjai, langg j.-jniurlyc-l. Nngw vox snax diamw vnuar quer, dngw cur jinwjingg beh singx uad kir ginhangg. Muixx guehzit ee lyqangx vyxhiamw iongxsiamrginn ingwgiac qinaxzit rair zip kauxjy. Ejaiw qiawqimpo tec kir lur byy kangx qniaa. Diyhh knuar diyc jnitauu k.-kaksit-s. u zip .laii, simx jiacc e dikdnia, langg jiacc e ciaucik.
“Maax lehh?” Qniaw harvanx dngw .laii decc mng laurve.
“Linw dua hanr a’ii ee simvu snex ar. Linw buw :a kir knuar ngix:a.” Laurve dab.
“Amr dxngr jiac sniaw?”
“Denrqyx u vng.” Laurve cuir qongw quaww ciuw viw. “Gasloo-dingw u jit dniaw jab’yqnex, qongxx tng .jit .xe dyrr erdangr jiac.”
“A’jew e dngw laii jiac bor?” Haursnex qycc mng.
“Inx qongsix jiautai inx kir erqangw iulamw, lexvair-amr jiacc e dngw .laii. Ehngx qandna’ lanw nng xee.”
Haursnex dimr tauu, zip kir vangqingx ngua jit sux cocing :ee, cud .laii dyrr uad kir jauwkax kuanw beh hro nng xee veaxqniaw jiac amr.
“Liw narr u ginxaw, vavax ersaiw qra liw draur qor. Liw benw huanlyw ginxaw diyhh cniar guarkauxlangg cua kacc qau surlo be hongwsimx.”
Laurve qapp qniaw nng xee dirr jiahvngrtniax, qokk langg binrjingg jit vnuaa qnevng, naxx decc jiac, u huer langg tehtauu sueh kiw.
“Jabow ving’iuw dy’ iaxx byy. Sniu qaxx hiacc hng .kir!” Haursnix naxx qongw naxx hnair tauu.
Jiac vng vaw, nguaxped sunrsuawciuw sew .kiw .laii. Hurzinlangg beh uaw qauw diamw dngw .laii, vingww dih dax ee nguaxdi qapp tngsii jongw qra siux zip kir nguaxduu-aw lairdew.
“Laukax qaiw snxax :ee jai'ngiaw lanw jejex iaxx bue juer dniardiyc, mijnix minua beh qiyr lanw vangr hun'aw. Tauduw aw an’ inx diamwbin qniaa .quer, iuqycc qra guaw giuw .kir. Hmlanglew cunvan beh tanr qaxx diyc ee kuanw.” Cuann cingkir ee lairsnakor beh sew sinkux, hurzinlangg qongw diyc ciyr tauu ciyr bin.
“Ix qamxx m si trer tauhunx :ee? Qaqi pnai hongqimx, qycc qnaw ter langg knuar hongsuiw! Vutlokvutsog.” Davolangg byy hyw cuir.
“Qongw dyrr qongw, qamxx diyhh anne pnaiw cuir pnaiw pni? Hyw hyw dairjir quer liw ee cuir cud .laii dy’ be tniax tihh.” Hurzinlangg bin-aw siab siab.
“Ix jiacc gam bak kir qingw diyc jit xee bre linggingw :ee. Sniaw langg qycc qnaw beh sinwdiong ix? Guaw decc qongw ix vutjurliong, qamxx u qra ongxkud?”
“Qer diyc jit xee byy diongwliongg ee angx, hingr qxiauw hingr vxuex-diongx but qycc m tyxtanr. Lirenn si qovutjiongx, ix u snax xee qniaxzii rair cnia’iongw.” Sraiw snaqakbak, hurzinlangg ter langg’ vutvingg.
“Qokk langg jyrgiap qokk langg dnax lar. Qaqi ee vakdoxpuee, beh snix m snix, ix qamxx be juxdit'ir?”
Cuir bih bih, hurzinlangg jitt dxauw byy qra rinr, snaaxkor moh lehh qniaa duiww huloqingx. Mngsnir vyc vxanw byy qangai, jetdng ang'axbow ee dakkee jin' u lorsaiw.
UNRDONG
(ID)
Viix! Viix! Viix! Viix!
Hyw cancniu qunvingx lruii jenwqow laii beh tyw mia, vi’aw-sniax cuiqinw, hro langg’ tniax diyc simx qniax qniax.
“Tauu vaiw laii camqax?” Unsunn ee binrbak hyxlew aw mng.
“Hner a.” Snia’auu liyc liyc aw e junr.
“E qniax be?”
Dimr tauu, dyww mng qongxx, “Liw nacc qaxnaxx longxx be qniax?”
“Lanw decc jyr ee dairjir si driyc :ee, mrsaiw qniax.”
Dangsir juewsig, tnix ciauxciauw aw qngx. Dinwvog :ee vaii kir jiokk hanggnow, tranr hyrling roo qyckacc uaw. Inx sui’ langg dir taumauu, pix horsinqah, uihongx limxlimw; jit ciuw vinvaii, jit ciuw giaa vang, jidjuiw satkir tingtingg jin' hnialuac.
“Liw laii jiax, linw daux ee langg u qra liw janwsingg bor?” Sinx yc snuax :ee mng.
“Inx druar dirr haixgua, kacc byy decc cab sewsu.” Lauxjiauw qongw. “Acc liw lehh? Linw sirduarlangg qamxx uana qapp lanw qang qog :ee?”
“Qang qog kiokk si qang qog, iarr diyhh amwjuewjni cud .laii, m qnaw hro inx jaix.”
Zit jniursinn. Nng daii juixlingciax pah tauu din. Juixjiak duarbyw qix hiongr langjingr denxuix. Jre dirr derbinrjniu :ee tauu ngr qe benw langg’ qar, venww srinx damm decdeh naxx juixcuw byy ix daruaa.
“Dag’ee siy’ qing, ciuw banw hro ann. Juixpaur narr tingg, inx suisii dyrr e dangrciuw.”
Lauxjiauw snuawla, hiongr siwkolinwdngw qangg din :ee diamxdnaw. Jniw jiauw-aw simjong piagpiak dnua, sinkux gihgic junx. U decc sniurtewhuew :ee, jitquw jiacc beh pah tewdangqow u kacc drii ar.
“Banrvutzi ho’ngg pah qaxx diyhsiongx, ocnex qikhueh, kangcuir knuar qnir qnir, qauwsiqaur, jiawgann sniaxhuer jiacc qaudair e quer?”
Sniu qaxx dax simx, jit liap taukag qiongrbeh viakpuar.
“Ang’axbin narr hro qiwjiaw hib .diyc, sinbunn bre, denrsi vyr, cuwvnix-taubuew, cindongg-jiksunx, qiw qiw duc duc. Nng xee lau :ee iuqycc qik siyh binrpuee.”
Jit xee simqnuax jiokk zuluan.
“Qamxx e lauu jit xee anwdew dilehh? Suar .lyc qycc diyhh qui’ nidangx jauw huatngi iarqyxqnaw?”
Amwsniu qaur jiax, qui’ee sinkux kiw qalunxsunw.
Sniar duw sniar, urngiaw juiw jid’err byy cru, cing jewhok :ee dyrr snax xee jit jxox laii decc giuw langg. Vutquanw jniw qangrr lau, jit xee suar jit xee sui’ xee aw ho’ngg qrngx jauw. Kiuw kiuw lrak lrak jit kunr, qapp qecviah :ee ciuw sryw qingwqyckacc ann, cutbuew iuguann ho’ngg vrag kuix.
“Bruw jnia’ mii. Hyw dngw .kir ar.”
Qingxcatqnuax siwjangr snix, kax lyr ciuw lyr, mrbenw pnaiw cuir lagdauw dyrr jiokk u hangxtauu. Camjip qetauu unrdong, laii benw vywdix, kir benw siy’ srii. Qniaa dngmngg :ee cincniu haixingw, lyhkyw iacc diamrdni vutciangjai, dngg nii tangr tnix longxx byy decc hiycqangx. Kacc je si laii oenw draur sna’ jan. Qaur-sii-qaur-jun, iarr diyhh singx sitvuee, sui’ langg surlongg-qangsiongx kir.
Jit daii jurlenxciax quaww jit diauu lren-aw lren lehh ho’ngg qruax dirr hang-aw-lai ee denrtiau, jiac tnilo dngdanw jniawjuw laii kanx. Gu’axkor qah siajuh ee cingrcah, jit dingw pacjiauxby kamr tauu kamr bin, si lamm si luw dy’ hunx byy sniaw e cringx, byc sueh qongxx pni bak cuir beh ho’ngg knuar e bingg. Syxsimx jun .kuix. Hang-aw hangrsunx pnaiw dngxsec, jurlenxciax diyhh dywter lux jiacc tangx kir qaur duarlordng. Jit din qingxcad dirr ding’axkax kreh bak vnuar tedyw. Jurjuanxciax kiaa qingquer, tauu damr qe, ciadac kixlyc qinw viangwviangr, u singg cadtaux decc jauxpiah dairzinn.
Vreh jnriu snuax ee zidqiuu e tnee bak, byy cniu tauduxaw hiacc ziuu, hiacc hyw dauwdin. Qelo ee ciax iarr naxx laii naxx je. Tauu vrangx qongciax kacc dew jua :ee, uree jauw beh jit langwtangr ar.
“Liw jiacc gauu jaw! Si duxx dngw .laii iacc beh cud .kir?”
Jiacc decc cue xui beh hiyh ciax, juwsiw drng diyc druar qecviah ee oksangr.
“Duxduxx jiacc dngw .laii.”
“Kir unrdong or?” Oksangr qycc mng.
“Hne… hner a.”
Rinr diyc tic tic tuc tuc, kabkax kabkax tangx junw .quer. Syxsii kinx aw jun .kuix. Hyw qajair, qelai :ee longxx iauxx bue kunr cniw. Liamx kax qniaa kir vangqingx, snaaxkor qui’ sxux jongw ngua longxx mrbenw qex sulu.
“Tauduxjiah dirr mngkadaux duw diyc qecviah ee siyxjiaw, qaxnaxx si qui’ amr byy dngw .laii, dnaxx aw jiacc zibmngg.”
Cniuu cenw, viah vyc, hurluxlangg ee qongxue-sniax, jiacc jiacc aw vreh jnriu cngg beh qinw vow bin :ee tangx tniax qaxx bingg duw bingg.
“Acc ix si kir dyhh?” Davolangg mng qeau.
“Guaw knuar ix b.-bongrjong-j., qongxue iuqycc vutbingg-vutvik vuanwtuntor, dingrsi u juer sniaw qenwsiaur dai uir langg’ jaix. Iarr qnaxx jarmee qapp langg’ decc kunr, na lecc sniaw langg daux, qnuaw tauwjaw qniax kir duw diyc sigsai :ee.”
Vunw byy ee dairjir, qongw qaxx u kax u ciuw, u qix u lex. Surjuw dnir cinwciyr, bagjiux hahgiy dirr cngg-aw huanx laii vingw kir qui’ diamxjingx, quw quw jiacc lyc binn.
(ZI)
Jit qnrua syxsii dangrdimr dangrdimr dirr ciuxtauu, qongx :ee sxux :ee tongdongg kenx kenx juer jidhuew. Siangdingg mngg quaww siangdingg sryw, beh air dycc jit qix, bagjiux diyhh vreh hro qimx knuar hro jimjiog jiacc be sitcyr.
Tangnii-aw giuw .kuix, danghngx ee zidtauqongx jiksii hiongr ix denw ing’uix. Jarborehngx, cnriu diamwtangx :ee si ix. Ejaiw, vuic diamwtangx :ee uana qang jit xee. Dnuasinx pitmaw dirr Daiuann jauxjyc byy-luir.-byy-tui, si daur si amr byy jiac byy hiyh, hnirkangx iarr jin' cingjing, benw qniax u jabliamrzuu :ee. Samvutgorhau kar jit tongx aw denrue vywdix cuwlairtauu mair ho’ngg quawlu i.-ingqaix-q.
“U sniaxmih dairjir bor?” Venrtywue mng venrtywsu.
“Qinaxzit u siux diyc jit dniux IRS qiar .laii ee didnuax.”
“IRS! Inx beh congr sniaw?”
“Knuar byy sniaw u. Liw suer qamxx vyr ar?”
“Jaw dyrr vyr kir liauw ar.”
“Acc qamxx u uanlap?”
“Dniardiyc si u a! Jex iarr diyhh mng?” Daiuann jitt vingg :ee cuiwtauu giamxgni. “Liw qra lueriongg hib .lyc .laii EMAIL hro :guaw.”
“Jiacc duxx jiac amr vaw, dngdecc kingg nguaxjnuaa. Kacqycc aw jiacc erdangr cuxliw.”
Denrue siux snuar, suawciuw qra denrnauw kuix .kuix. Jrih puex, tak puex, siaw puex, qang sijun qycc beh knuar snuar-dingw ee sinbunn, ganw jingx ciuw kuair, vnuar kxig quw dy’ m pacsngw.
“Iuqycc hro liw pacbuanxdingw vniar derr id! Liw jarhngmii qycc dirr jiax qiawpox byy dngw kir kunr, driyc bor?” Cimxx aw dac zip mngg ee vangcex-aw siyxhew decc mng.
“Byy lar. Guaw marr duxjiah jiacc qauwui.”
Jitqangx dngdew aw zip sitdniuu. Denrnauw sui’ daii aw ho’ngg qiyr jingsinn jycsid. Gorsii beh u hiabgirhue, hnuartauu :ee limsii-lim’iau huad mesiji dihue. Qokk langg qanwvan diyhh suawser, virvan juliau rair sraiw qinxliauu.
“Jiac qinw e longr puar nguaw. Beh pacdngg qniaa, lanw iarr diyhh jiauww qongvormngg ee quidiauu jiacc si e siaur.” Qunsux sudsenx huad qylun.
“Enqimx quandee vutjiap’id, caa kangx biw beh jin. Narr byy sniu quaw venwlenw, kiongxpnar lanw si decc tuax jetquir narnia.” Siauwvangg qongw dair iu’iongg bin.
“Guanjaw dyrr qongw rair vniar dua dur :ee. Linw dy’ m tniax guaw ee cuir, nacc u huatdo?” Giaa vid huad sinbunn :ee cud sniax dua cuiwdauw.
“Qapp qnuagee duiwqec byy beh jiauww hxuad, lanw jiax muixx jit xee decvyh samvutzirsii diyhh kir jauw huatngi.” Qunsux huntiah.
“Siw dy’ m qniax ar, iarr suacc u decc qniax jauw huatngi?” Qiaukeh qehqniu qongw dua qxur ue, byy decc keckir.
“Beh liac liac vindy, snensiw lanw uana knuar qaxx jiokk huar. Kuilui diyc u boxqniaw rair cri :ee dyrr quer berdid kir!” Qunsux hyw cuir nuarjic.
“Qongw jit qxur byy su’ngiaa :ee. Lanw kangx ciuw vec iyy vniar qaur henrvo jitt xee qongqingw marr sngr jit xee tuikad, junw siux siux .kiw .laii, langg’ ingqaix be qra lanw knuar sueduee jiacc driyc.” Giaa vid :ee iuqycc cud sniax.
“Lanw laudingw :ee bad laii decc jiy’iyx, qongxx inx ee dniuu lanw narr u kir siy’ dne kacngx, inx beh kingg jit qingx aw .cud .laii hro lanw unrjog.” Siauwvangg sueh kiw qiamx quxgi.
“U tongx oox!” Qunsux jorquw. “Muixx guehzit narr tangx liamxsingw jit diauu cuwsuewjnii, lanw gnirgiac e qex jiokk lirkuir, be cancniu jitjuiw jiacc vecvnix .diyc.”
“Qamxx hyw?” Giaa vid :ee huanxqongw. “Kir qa’ngg qiawqux, cutzip qeqiamw rair knuar langg’ ee taubin. Qnaxx iarr diyhh u qaqi ee soxjai kacc dingrdongr.”
U kekangx, nng vingg longxx qongw jit pnir jinglixue decc giuw dua syh.
“Cuwsuer guaw laii huadlyc. Iaxx vnuar dxangx jiacc anrmuaw, qaur sihau jiacc laii gimxgi, lanw dag'ee qycc vniar knuar mai.”
Qiaukeh tiaur cud laii dngw su, dairjir syx ngii jiamrcniaw varlun.
Erdauwvox, denrue qapp denrjuxpuex u laii diyrr u ongw, cuir qongw quaww ciuw siaw, brangg suacsuah. Jniar sinsii, kangkuer qaur jit xee diaudnua. Qavix jit vxuex jairciuw, ingg cuir bongxx uersenx.
“Dagg hxang dy’ qniax siw siw, be cxunx kax cud ciuw jiokk utjud.” Giaa vid :ee tror dua kuir.
“Liw decc sniu sniaw? Qamxx si pacsngr beh qra giuw .lyc .laii?” Qiaukeh mng, dit duw dit.
“U huatdo bor?” Giaa vid :ee dyww mng ix.
“Yh value.” Qiaukeh hnair tauu.
“Anxjnuaw qongw?”
“Ix ee zinkir iaxx u, qycc jiokk jiahsniax, ganxjingg iaxx cue byy langg hro ix be denxtar. Jitvo beh lud ix ee qxuann, jingwdongsingr kacc byy qraur, qnaxx e dyxtauu.”
Qiaukeh vaii jingliw. Giaa vid :ee tniax qaxx qycjaiww duarsimkuir.
Guec diongqia, vanrqongtniax jamxzenn aw jibliauu, jiahtaulorlangg jauw qaxx beh liauw. Derqiuu ee lingrgua jit vingg cax vnuar qangx, Bixqog ee dangvo henrcuxsii decc gniajih zidtauu. Narr u tamx binn iacc kunr quer binn :ee, jiangwsii jit tongx denrue kir, duxhyw junw laurjingx qra inx qiyr jingsinn.
“Liw qiar .laii ee denrjuxpuex guaw u knuar ar. Liw longxx benw causimx. Guaw e cuxdir.” Qapp cinlangg tongx denrue, qiaukeh jit sniax dyrr puawdee.
“Dauwdew si anxjnuaw? Qamxx si liw jingg xe huerginn dngw Daiuann hitt diauu decc cud bunrdee?” Dirr Bixqog :ee mng qinw qinw.
“Liw mair hiacc qau simsux lar, cur nirr qor hro hyw kacc sidjai.”
Vanrqongsig iuqycjaiww sokjing, denrnauw qapp denrue kax jriab kax tewkinn. Vyletangx-gua dua diamw ho decc lyc. Amr ho diauu mii. Piiw qra pix .kuix, pomihiuu junw pue. Denrhuew acbuew, jit qangx ee sittauu jniawjniar siusuah.
(SNAX)
Imlingw hongx dirr duarqelo qiangwqiangr hauw, qimdnuawzit settaiw qnuaa. Ciuw gann kax gann. Luanxby, ciuxlongg, qapp amrmuax iarr jiauu cutdong, byhsuecqongxx suat’ix iacc mipaur. Sunvo laii .quer ar. Duewau dyrr beh duiwpig ee kuanxsir. Ciuxqix-aw jitt kuanw dng’ qniasii ee qesix sui’ langg jit qix, beh log’imx iacc log’ngiaw longxx unw dakdag. Aurquer Daiuann si beh qniaa hiongr jingg iacc dywter lux, kia dirr jitt xee ligsuw ee aiwkauw, u muaw cingx muaw bxan ee siongwpnir qapp ngiaxpnir juer jingwqenr.
“Inx hiaxee dua qnuahow kaix dua jnii, vniawsir qra juxde sangr kir Bixqog iacc Kanada decc sovoo, jiacc qiyr lanw Daiuanlangg diyhh juer Cinalangg. Vadd langg ee qniaw siw be liauw marr m si anne.” Taujangx jenw jebii ee jabow dairhagsingx qongw qaxx krir-drngg-krir-do, hor ciuw hor qiyh.
“Liw jitmaw si qiw a’Qiong :a iacc KMT?” dir hongby ee javox dairhagsingx mng, ceciuw, bagtauu kiycqingw,
“Qamxx u juac?” Bin hueziaur, taumngg camx vec ee a’vxeh vorvinn capcuir. “Jitt nng xee dyrr siangsnex-aw dongw, jingwtauu longxx marr siysiang.”
“Urngiaw dyrr driyc.” Javox dairhagsingx kiw air ciyr.
“Qaqi ngi’axhuex jiokk jiahsongg, suacc kiauu dangx iauu saix, itbi decc hiamm langg’ dua angg huex m jaix baiw.” Jit xee jauxtanwlangg qig sauciyr.
“Sniaxmih iwsur?” Byy-tau.-byy-su, javox dairhagsingx tniax qaxx sec saixbuexlee, bongx byy tausu.
“Lanw jitt vingg :ee u nng vunw horjiaur uana duarbuw din, sirser dirr haixgua tagceh itdit qaur cud siarhue longxx dirr hiax. Jitt vaiw ee duartaulauw, jiurr guaw soxx jaix, ix siongrr byy dirr Qajiux u jit qingx cur.” Soxiuxlaii, jauxtanwlangg dauc dauc aw vaii.
“Anne vixping byy qongdy.” Lau a’vxeh jin' vutbak. “Inx jairjaw hro qokbinn jingwhuw let dirr ox miadnuax berdangr dngw .laii, byy dirr hiax hag cur, liw beh qiyr inx kunr tnilo juer pulongrjiaw? Inx ee ginxaw dirr guarqog cutsir, duarhanr dirr hiax jiac taulo suar kixqex marr qaizenn a!”
Ue qongw liauw u jiahqax drat jingliw, jairdniuu :ee jerje dimr tauu, janrcuir :ee marr be jiyw.
“Jurr jyr ginxaw dyrr tniax guanw vaa :a decc qiau jingwhuw. Dangxjinx jiyx ix qniaa qetauu qapp qnuatniax duxjuiw, suacc hro ix me kong’amx. Mrjiacc qniwnarr u sniaxmih duselow ee kangtauu, dnuaxdnuaw diyhh qorr taubuex :ee, hro ix jaix dyrr be dit ar.” Javox dairhagsingx iuqycc la jit xee uertauu .cud .laii.
“Guanw laurve qyckacc camw.” Jabow dairhagsingx sun uerbuew. “Iarr mrbenw ix cuttauu, narsaiw vaiwtog ix ciamx jit xee aw miaa tangx qra amxqnuax giuw .lyc .laii, ix dy’ m kingw.”
“Linw duiww sirduarlangg m tangx sna’ kiwhiamm. Diyh’air jai’ngiaw, kacc dingw jit vuer :ee qenww qongw diyc jingwdi, inx simdew dysiauw longxx e kiongxhongg, e u qniahniaa.” Ozisang naxx qongw naxx decc kamm qasaur.
“Ozisang, liw qapp guanw vaa :a qaxnaxx dyrr qang renn :ee, jnuaxngiu liw dy’ m qniax?” Javox dairhagsingx jin’ hnowhenn.
“Guaw si lyhanwkax, jit kox logcingr, byy cuwlai :ee tangx hro guaw damhuann.” Ozisang dnir kenciyr.
“Liw itdit longxx byy crua or?” Jabow dairhagsingx mng, catcad qibingg.
“Lirenn .kir ar.” Rinr diyc byy ir byy ir.
“Linw byy ginxaw?” Jabow dairhagsingx qycjaiww mng.
“U jit xee haursnex, bue buanw go huer dyrr duer inx buw :a qer. Qaxnaxx qongxx m na jiac inx aurjig ee sner, lenrr miaa dy’ qexngua dingg qycc hy. Cuxvo ix junw dirr guaw binrjingg kia, guanw veaxqniaw iarr qnaxx byy jaidiau siy’ zin.”
Qnuacinr ee hongx decc kaux, qowsu tniax diyc qatiamx hibii. Jit qxur siy’ an’uir ee ue dy’ iauxx be hur qongw, vyrqizenn u langg dirr jitt diap hiongr qnuagee kenx qenng. Camcix capjap ee langqunn sna’ tanwhanw, caddnaw iacc jiauxaxdnaw, u huer :ee iacc siauwlenqex, tongdongg sna’ jnex beh cud ciuw.
“Jarhngx ervox ee Daivag qetauu vyrdong, tongqiong u zi-jap-snax langg siurr ku’ah. Ejaiw zit vnuar vox, qasiok kir derhngx huatngi niaw langg. Juaxpiyr qapp vyxqetjng u jiauvi, virqyr suawsuar virr niaw .cud. Jairvyw :ee bering did cutqingw, diyhh diamr Daiuann tingwhau erzit aw qiamxcatqnuax diauwsinr.”
Jitt diauu sinbunn jit huningx limw limw, kia dirr denrsirqix taujingg :ee simqnuatauu ver ver jxig jxig. Jit dxangx vexvnuar ee qangjingg vangr juiw lrauu, jitt sniax rair dingg qoxboo, kax kacc dua srinx.
Qipiyr hen qycc ven, jingrr jaw qaur dnaxx laii Daiuann longxx pah ongxhogdnuax. Jit tongx denrue cuir jen cuir, mng narr u xui, ciuw qnrua hingliw jit qnia si benw sniaw kuanw.
Itsingx ee air
Formosa
Lirkuix si qojiongx bunai
Cniaw danxtai
Qinxjuahban
Gunw dikkag e dngw .laii
It’id siy’ srii dongrqangx, dirr bangrlo-dingw qiawue junw .quer. Huelingqix-dingw, ciuxqix-aw byy sursaiw, simqnuax liac tanxhnuaii, liongrjaw vangr ix hiyh lexvair.