derrzijniux

uanjuann dyrdig

derr zi jniux

DERR ZI JNIUX SIAOG SIMLIXHAK EE COPUEX

Qandna' iong jit jiongw qakdo knuar dairjir si vutjiog ee.

SIAA EE YWVIR

Jingsinkyx isux ciangjai ui' qenrkongx/ vnerjingr ee quandiamw liauxqaiw zinlui, hyrjyr "iliauu hingmoo". Jex si quancad zinlui huisiongg u loriong/ u hau ee hongsid.

Jiauww guaw knuar, GEORGE huan diyc huisiongg digvet ee vnerjingr "qiongvig bongrsiongw jingsinn quanlingjingr". Lanw duiww jitt xee vne vutjiw u zinrbad, GEORGE ee qywanr si denxhingg ee vnerle. Qiongvig bongrsiongw jingsinn quanlingjingr guantauu laii jurr sewhanr, cavutdyx ham' hunwlen kir venrsow dongsii huatsingx, GEORGE be qir did dua langg si anxjnuaw qra hunwlen ee. Ui' hitt jiah niaux qra GEORGE ee vangqingx bruw luan, vaxvah suacc qra pah siw ee sursit laii knuar, erdangr iycsniu, GEORGE kyxlingg ixqingx liauxqaiw : siongrhyw diyhh yc erhiauw kongwjer jurqiw ee dongjingsimx. Bogquair GEORGE duarhanr au, digvet air cingkir, cuxliw dairjir diauu diauu iuxliw. Qiongvig bongrsiongw jingsinn quanlingjingr ee huanrjiaw, ciangjai si anne huatsingx :ee.

Lingrgua jit xee digdingx, si jingsinn isux qongw ee "sinqii ee sniurhuad (MAGICAL THINKING)" ee kinghiongr. Qisiongw ee hingsid jerje ngiu, qivunw-siong, si ui' simsux sanxsingx surqnia ee simwliam. Ginxaw ciangjai e u quaiwqii ee sniurhuad, go huer ee javox ginxaw e sniu, hibang guaw ee mexmeh siw .kir. Qycc laii kyxlingg e hro ix simhuew jiaujyx , qniax he ee guan jinjniar jinsit, mexmeh siw .kir/ Iacc is puawvne, zinrding si jurqiw okliam ee sidhen, ciongbuanw juerokqamw. Qisiongw ee kinghiongr duer diyc nihuer jingqax jiamrr e siaubyy, qaur liauw cingcunx-qrii, dysor kaksinr, qandna' sukyw sanxsingx ee liamrtauu, be kongwjer guarqair uahdang. Mrqycc jysiu quer jerje jingsinn gigtai ee zidongg, kiokk tuad be driau, digvet si bongrsiongw qiongvig jingsinn quanlingg jxingr ee huanrjiaw qyckacc si anne. GEORGE qencii siongsinr jurqiw vuh cud ee iwliam e jniajyr jinsit, si jingsinn quanlingg ee juxiaur henrsiong. Ix zinruii, jit vaiw jit vaiw m quanw zuarr hng, dyrr si diyhh dngw kir bongrsiongw kixguann ee henrdniuu, jingwbingg iwliam cywgno, jiacc jiamrsii did diyc simjniaa ee vingjing.

Jiauww anne qongw, GEORGE ham' moquiw dring iog, qandna' si lingrgua jit jiongw qisiongw ee hingsid ziiw! Naxjunxx hro ix ee koxlan did diyc tongtauw ee honghuad, suibongw hab'iog "uanjuann amcangr dirr taukag-drew", jitt xee qisiongw marr si kunwziauw ix simliw vnerjingr ee denxhingg digdingx. Lanw ersaih ui' anne ee qakdo qaixsueh jiongxjiongw henrsiong. Byy su'iaur qycc cimzip hunsig, qywanr dirr jiax qetsog.

Bunrdee si, GEORGE ham' qxuiw ee quanhe naxjunxx byy snaiw liauxvutkiw. Zuqyw ui' tuantongw qidokdoo ee jongqaur mohingg laii lun, qycc si jnuaxngiu?

Qidokdoo ee "jongqaur hingmoo" si anne : zinlui (iacc si uxdiu banrmic) dirr sxen/ og, siongrder' moquiw ee nng dua lat ji' qranx, vniawmia qunxliongr. Langg ee linghunn si jit dniuu jingdaur ee jenwdniuu, jiapsiu kyxgiam/ vniar su'ngiaa, si zinlui sniwmia ee juanvo iwgi. Ui'id quanqenr bunrdee si, siongrder ngiaa? Moquiw ngiaa? Si'angg ngiaa diyc zinlui ee linghunn. GEORGE ham' qxuiw ciamx iog qenwlip quanhe, si qra jurqiw ee linghunn he dirr guihiamw ee cuxqingw, naxx nxng suisii kyxlingg e longr puar .kir, henxzenn si sniwmia guilan sikig, simrjiww juann zinlui ee siokbing marr kyxlingg hro ix ee quatding soxx ingxhiongw. Jit qrunn tnisair/ jit din moquiw qidyw qamwsi GEORGE, liac ix muixx jit xee liamrtauu, vutduan sanxsingx jiap byy suar ee enxvenr. Juewau, GEORGE hongwkir hab'iog, dngrjuat ham' xmoo ee quanhe, dyy cud dergak jinxqiur jurqiw, jimwdimm dirr siongrder ee undenw nirr, uirr zinlui duar laii hibang.

GEORGE ham' xmoo ciamding ee hab'iog, u sniaw iwgi? Jixsi jingsinn quanlingjingr ee lingrgua jit jiongw vnerdingx? Iacc si ix sniwmia ee iwgi liauxvutkiw ee dngxsehdiamw?

Guaw byy pacsngr dirr jitt vunw ceh nirr, qongzenn huanxduir iliauu hingmoo. Dirr soxu busor kyxlingg ee mohingg nirr, iliauu hingmoo duiww liauxqaiw simliw vnerjingr siongrr u loriong. Mrqycc, dirr digding ee siqanx/ jinghongw ha, qitnax ee hingmoo kyxlingg qyckacc hac.

Lanw diyh'air qingw iuxli ee libdniuu/ kiarkadiamw. Dng' GEORGE qra guaw qongw, ix ham' xmoo dring iog sii, guaw binrlimm ee suanxdik, si knuawjyr lingrgua jit jiongw denxhingg ee jingsinn quanlingg vnerjingr ? Iacc si dyrdig guiqix? Zuqyw guaw suanw derr id jiongw kyxlingg, dyrr byy su'iaur sui' caixcuw hue'ingr. Narr si dyrdig neh? Duiww GEORGE/ siarhue, guaw u jikzim jin itcer, juanlik apjer dyrdig/ tenliongg ee songwsid. Si dycc jit jiongw? Suanw tamwcaa GEORGE cangr dirr simlai ee hab'iog si byy dyrdig :ee, e hro jitt xee pnaiw hing'uii juanvo kamr be diauu henr cud laii, guaw dongzenn suanw kacc u hiwqiogsingr :ee, jex si qinggiam. Narr qongw dirr digding ee siqanx ha, lanw diyhh qingw digvet ee hingmoo, iacc si qaix suanw siongrr juwbak hitt lui; dyrr si qongxx, tiausuanw hro genxqiur surqnia sanxsingx siongrr dua kyxlingg iwgi ee mohingg.

Caixiong dan'id ee hingmoo,m na byy vit'iaur, marr vutkyxcuw. Vakbixlangg knuar guehniuu nirr u jit xee langg, lambiw :ee kiokk qongw si tor-aw. Si'angg driyc? Si'angg m driyc? Nng xee kyxlingg longxx driyc. Sianghongx dirr bunhuar quanliam/ derliw uirdir-siong, qokk kia byy qang ee libdniuu. Lanw soxui ee denxhuan, vutqyr si nng suanw id ee quandiamw ziiw! Zuqyw sniu beh jin lat liauxqaiw guehqiuu/ qitnax henrsiong, dyrr ui' siwjiuuii dyguann qakdo cetzip, siongser qiamxqiam.

Jitt vunw ceh caixiong dybin ee tamwtyw hongsid, qac'ir qanxdanx ee togjiaw kyxlingg e qamxqag byy quanwsir. Jitt xee juxdee daddid uanjingw tamwcaa/ juanbin qaixpuar. Liauxqaiw zinsingr ee og, huisiongg diongriaur! Berdangr ui' dnuax hongbin ee qakdo cuthuad. Henrsit ee duarvorhun, dirr dan'id qetqor huanruii lai qinvunw byy hxuad jiangxag kuacbin iwjir. Bingliauw qivunw ee henrsit, juadduir m si cniurr singjiu jit hxang suxbing, vniawmia juanlik hiongr jingg dyrr hyw ar, vitsu'iaur jit vo jit vo duer dirr aurpiah, jiauww sunrsi dauc dauc uaw qin. Sursit-siong, zuxx jiapqin siaog, zuxx lingxgo duiww siaa ee lanqaiw. Ngua jit qxur ue, duiww siaog ee sinvir quixjar zuxx qingwuir.

Anne, uirsniaxmic beh liauxqaiw neh? Jitt xee bundee ham' hibyy juxgi (nihilism) qang jit xee lunrdiau, jurr taiwqow ixlaii, moqiw dyrr junjai, uirhyy beh caixcuw hingdong? Genxqiur neh? Suibongw lanw duiww cuxqingw qandna' puw puw aw zinrbad, jongxsi ngiaa quer itpenr oamr nirr qunxqaw, kacc u singjiu/ qenwsetsingr, zinlui qiwzenn byy hxuad dongrcad/ quanxliw/ kongwjer/ jixhuix juerog ee linglik. J.R.R.TOLKIEN (1892-1973) anne qongw " jiangxag sewqair soxu jinghongw e suevai/ hing'ong, m si liw/ guaw hunrlai su, mrqycc ui' luersimx kaisiw jingxdunr, uew cud itcer okliam ee qintauu, qra soxu ee siaog danr driau, hro aurdai qniaxsunx juxbinn iongwiuw itpenr cingkir ee toxde, qutlat jycsid, si liw/ gauw berdangr sag driau ee jikzim. Inx ee cuxqingw/ jygu, m si liw/ guaw qansiap/ qaucab :ee."

Kyhak genxqiur ee huanruii (ciokqag) jinrliong crunx dngg/ hng, itdit qaur buhan iauuanw ee soxjai, cimzip tamwsyh uxdiu ee ywvir. Kyhagqax jiamrr hnuahiw suxiong dyngiurhuar hingmoo. Budliw hagqax jingsinn ciongvaw, qra genxqiur jibdiongx dirr guanjuw/ hunjuw..., qokk jiongw sniax/ qngx ee lingxhik. Sinliw hongbin ee hingmoo marr vauhamm jerje, singbut/ simliw/ jingsinn singbut/ siarhue/ singbut siarhue... hagkyx, FREUD hagpair/ lixsingr qamxjingg dirliauhuad (RATIONAL-EMOTIVE)/ hing'uii hagpair/ junjai juxgi...dringw. Suibongw digvet congwsinx ee langg e dirr sinx hingmoo lingxhik dog'iuw miasniax, si kyhak berdangr kiamr ee, mrqycc itsimx sniu beh virr uanjuann liauxqaiw ee venrhuan, kyxlingg simlai jin' cingcyw, qaix cue :ee si erdangr ui' qokk qakdo tamwqiuu zinlui linghunn ywvir ee jinxliauu isux.

Kyhak iuguann iauxx bue drat qaur dyngiu caixlap/ busux-bupenx ee qingxqair. Jitt jniux dingrmiaa " siaog simlixhak ee copuex", uanjuann si in'ui qaur dnaxx iauxx bue cuthen jit jiongw kurtew ee kyhak diwsig quanhe zinsingr ee og, qycc daddid qra let jyr simliw hagkyx. Uirsniaw berdangr? Quiw cingx nii ixlaii, iuxquanx "og" ee qaiwliam, itdit si jongqaur ee diongsimx susiongw, kiokk byy junjai dirr simlixhak ee lingxhik lai --- kyxlingg u langg zinruii jitt nng jiongw ee vunxjid bidced siongquanx. Jiacc vutkyxsugi ee dairjir, qaur dnaxx lanw itdit zinruii kyhagqax/ jongqauwqax juanzenn byy siy' ionghap --- cniurr iuu/ juiw, nng xee horsiong vaitig/ byy hxuad qiongrjunn.

SINGR VUNW OG?

Jap-cid sewqiw buew, G.GALILEI surqnia jyrsingg kyhak/ jongqaur srid hyhaii au, nng xee ji' qranx hingsingg jit jiongw byy singbunn ee siarhue kewiog --- kyhagqax/ jongqauwqax horsiong byy kansiap/ byy kanlenn. Qui' xee sewqair quackuix "jurzenn" "ciaujurzenn" nng xee, jongqauwqair zinruii "jurzenqair" si kyhagqax juanx sriok ee lingxhik, kyhagqair uanjuann byy cab lingqair/ quaiwlik-luanrsinn siongquanx ee qewdadquanx. Sursit, kyhak jurqiw ixqingx dingrgi jyr "byy hamm juxquanx ee qewdat pnuawduan (VALUE-FREE)".

Quewkir snax-vah nii laii, jongqaur/ kyhak itdit hunlii ee jongrtair. Jitt jiongw horsiong tuatli ee jinghongw --- u sii naxx juiw huew be ngaqab tihh, tongsiongg uanbuanw hyhaii --- jurdnia siaog bunrdee qaux hro jongqaur susiongxqax jiangxquanw. "siaog" su'iaur dairsingx qingquer qewdat pnuawduan, hro uanjuann lingg qewdat pnuawduan ee kyhak laii cuxliw jit hxang lunrdee, simrjiww byy virr unjunw :ee.

Mrqycc jiongxjiongw insor, jongqaur/ kyhak qo' langg qaqi qniaa, ixqingx byy hac sidai ar. Dnaxx jerje guan'inx vig inx diyhh dingsinx jingxhap --- siaog vunxsinx ee bunrdee si guan'inx ji' id --- simrjiww hro kyhak diyhh qamm qewdat pnuawduan. Dingsinx jingxhap ee qangjog dirr quewkir jap dxangx ixqingx denxkuix, sursit-siong, si zi-jap sewqiw buew, ligsuw-siong siongrr qamxdong duiwdiong ee dua dairjir.

Kanlenn diyc buhan ywvir, kyhak marr ham' "siaog ee bunrdee" uercingx qaiwsnuar, diauqangx siamxpiah m dramm. Qongw kyhagqax m bad ywvir, vutzuu qongw inx duiww ywvir quewdo lixlunrhuar/ qursid jewiog juxgi quandiamw. Kyhagqax si sriok dywvingg nauw hunsikhingg : caixiong ee viaujunw sunrsi si jit vaiw tunjiac jit diamw aw, zenau tiuter likuix kir qiamxgiam kipsiux ee hitt pniwsix-aw, kyhagqax penair camm ee jiahhuad, byy air cnirr haixang ee dua cuir tunx.

U quaw langg jinwzip jongqaur, si beh dypiah ywvir, marr u lingrgua ee langg, jongqaur si tonghiongr ywvir ee lo, inx hnuahiw caixiong kyhagsid quewdo lixlunrhuar ee honghuad, byy vaitig unriong qyckacc u jingxhablat ee jniawvingg nauw sukyw mosid tamwqiuu : bingngiu/ didquanx/ qamxsiu/ sinwsimx/ kexsi. Duiww jiaxee langg zuxx kokdua kuacbin zuxx hyw.

Sidjer-siong, "siaog ee bunrdee" si qik dua ee ywvir. Byy hiacc qanxdanx dyrr kuthok dirr quewdo lixlunrhuar jewiog juxgi ee huanruii lai. Gunw marr huathen, ersaih qra zinsingr ee og iuxquanx ee mow quaw bunrdee sog ser, laii jinwhingg kyhagsid ee tamwsyh. Suibongw anne, jiaxee cuiwpnir ee bunrdee horsiong ngidnii, kanx jit qix drang juansinx. Iong jerje lat sniu beh jingxliw cud jangxtauu, kunwlann/ lixiuu benxqiongw. U quaw bunrdee, lando si hro lanw sniu be qaur ee, naxx mngpang knuar sewqair. Narr jit kaisiw dyrr cir iong kyhak hongsid, juewau ee qetqyw si bunrdee je quer dap'anr.

Sxen/ og si ittew, sewqanx narr byy sxen, dryy byy langg e kyxlu og ee bunrdee.

Guaw ee huanrjiaw/ vingiuw bad je vaiw mng guaw "PECK isux, sewqanx jnuaxngiu e u og junjai?" u qraur qiquair! Uirsniaw byy langg mng " nacc e u sxen?" hyxcincniu langg jurdong qaxsed : sxen si cutsir jah laii ee,singr vunxsen ee sewqair, hro og ziax baiw .kir. Jiurr lanw duiww kyxhak ee zinrdix, qaixsueh "og" sursut kacc iong'i. Qinqir budlixhak ee jurzenlut laii suecbingg surbut e jiamrr auwcaur, qongw e tongx. Mrqycc sniwmia jinwhuar jyr hogjap dyngiu ee hingsid, kacc lann hro langg liauxqaiw. Qongw kiw laii, ginxaw qongw vehcat/ tautec mic/ kipenr, vutjiw qor langg uanr; duarhanr qaixtauu-nguarbin jniajyr singsit :ee, naxjunxx qyckacc liauxvutkiw. Jiauww quanwle, vindnua viw qutlat kacc je, zuqyw lanw jimjiog sniu jex qidiongx ee dyrliw, qaxsed jex si singr vunw og ee sewqair, vutdix-vutqag sriu sxen ee "nixziamw", jiamrr dngw hyw. M si singr vunw sxen ee sewqair sriu diyc og ee ingxhiongw; anne ee qaxsed, kyxlingg qyckacc habliw --- sxen ee ywvir dua quer og :ee.

Jiaxee ywvir si byy qraiw :ee, vunw jniux ee viaudee dyrr si jit jiongw kikqaiw, dingrjyr "senrog simlixhak ee copuex" ingwqaix kacc hac --- narr berdangr dongsii tamwqiur singr sxen ee bunrdee, dyrr byy hxuad sikdongx tamwshy singr og. Sursit, zuqyw qandna' jiong' diongsimx uanjuann he dirr og ee bunrdee, duiww genxqiur langg ee linghunn, qik guihiamw.

Cniaw e qir .did, og ee lunrdee lanbenw kantuax cud okmoo ee bunrdee, sxen marr e ham' siongrder/ uxdiu banrsiongr hunx be kuix. Dng' lanw erdangr --- guaw siongsinr lanw erdangr, marr ingwqaix --- iong kyhak ee quandiamw, jit diamw jit dih sidjer/ singsimx huntiah ywvir sii, zinlui dngdecc qniaa hiongr ciauuat liw/ guaw soxx lixqaiw/ kokdua kuacbin ee surbut tamwsyh, qaix u qingwuir ee simx. Binrlimm jiacc sinsingr ee ywvir, siongrhyw qir hro diauu, qingwuir/ aiwsimx qiamqor ee taiwdo, qinxsin hiongr jingg qniaa.

EVIL QAPP LIVE -- SIAA QAPP SNIWMIA

"Siaog" jitt xee suu, kiamr dairjiongr zinrkyw ee dingrgi, duxx huanxngiar cud ix ee sinvir lanqaiw. Mrqycc guaw zinruii dirr lanw ee simqnuadew, duiww siaog ee vunxjid, jerjiyw/ qeqiamw iuxsow liauxqaiw. Jitt sii jitt kig, guaw zinruii gunw qniaw veh huer sii ee mngrue : oar! Dadi, "EVIL" dywving siaw si "LIVE"! Siongrr dansunn/ digvet/ ced diyc diongrdiamw ee dingrgi. Siaog ham' sniwmia duiwviw, horsiong duiwlip. Og/ taii langg qongw si qanx, bingkag qongw, og vitding ham' budjingw byy vit'iaur ee dosad/ mohai, naxx cuiwkiw/ cuiwdunn hiacc bidced.

U langg e jiong' "og" qongw qaxx jin' tiusiong, jabjiog ee diwsiksingr, jin' tiusiong hro langg lann liauxqaiw. "mosad" qamxx si tiusiong? George qamxx jinjniar guanrir hisingx inx qniaw ee sniwmia?

"og" "sad" bidced siongquanx, m si qandna' jriw u hxingg bactew ee mosad. Og e jamxsad (jansad) simlingg. Dairviauw sniwmia, iuqii sriok langg mia ee digdingx, vixzuu qamxqag/ venwdong/ iwsig/ singdiongw/ jurgnow quanxliw/ iwjir,,,dringw, lanw si u jin' dua ee linglik dudiau jiaxee digjid ee mow jit hxang, kiokk byy hro bactew siaubyy/ qud huixbet. Lanw kyxlingg e "siongx diyc" jit jiah bew/ simrjiww jit xee ginxaw, mrqycc inx kiokk jit qix mox dyrr byy siongx .diyc. Erich Fromm kuacbin qaiwding " sixtew luann (Necrophilia)" , let cud mow quaw langg duiww langg' ee kongwjer --- hro langg' sriu kongwjer/ jingqiongg ilairdo/ qanziauw tnazinn diwsuw qiamxziok uirr jurqiw setsiongw ee linglik/ siacziok guancongwlik/ kox zip kongwjer ha/ jiapsiu quanxjer --- anne ee sursit, guaw u jin' cimx ee qamxsiu, Fromm qycc kuhunx cud :

"sixtew luann ee langg" --- qra vadd langg qaixvenr jyr unhyy sunrjiongg ee qikiwlangg, vakduat inx ee zinsingr, jiyh jex quipiah zinsingx ee kunwqingw ;

"singbut jurgnow hong'ui vunxlingg :ee (Biophilic Person)"--- texzin/ qoxle sniwmia venwhuar dyngiu, "langg" dog'id-buzi ee digjid.

Jitmaw lanw ersaih qongw, og si junjai dirr zinlui luersimx/ guarjai iwdoo nihsiw sniwmiarlat/ uahlat ee hitt qrow lat. Sxen duxhyw si og ee dywvingxbin, si jo sniwmia lat/ uahlik ee ligliong.

Qinrnii laii guaw ciangjai enxqangw/ tuanqaur. Mng quaw qaqi : qivunw-siong, guaw sniu beh viauxdat sniaw? Muixx jit dniuu enxqangw/ vowdy, si m si longxx sed u jit xee juxdee/ diongsimx iwjir?

U ar! Huanxsingw au, guaw huathen, byy lun guaw ee juxdee si sniaw, jongxsi jinrliong hiabjo langg, iong qyckacc giamsiog ee taiwdo laii knuawtai siongrder/ qidog/ jurqiw.

Lanw ui' cutsir lyc dirr jitt der toxde, langg' qra lanw qongw, siongrder iong Ix ee iwsiong jy liauw lanw, lanw qamxx u zinrjinx jiapsiu jitt xee quanliam? Jiapsiu lanw si siongrder juxbinn ee jikzim? Singzin zinlui ee sniwmia sinsingr berdangr cimhuan?

Sinn/ langg ee quanhe? Iasox qongw "Guaw laii si beh hro inx did diyc sniwmia, zicniaw beh hro in did diyc ciongjiog ee sniwmia" (iokhan hokimx derr jap jniux,jap jed). Ciongjiog, si zuarr bixbiau ee zirganw ar! Jitt xui tuanqii zinbut, henxzenn marr ylyw hun'inx soxx hiangxsiu ee/ hyw jiuw/ sunn iuu/ liongsen hyw vingiuw, kiokk virr dingr siw dirr sibzirqer, quansimx sniwmia ee uahlik viw sniwmia junjai siqanx ee dngg/ dew kacc diongriaur. Iasox byy air u tew byy hunn ee uahsixlangg. Ix bad qongw hiaxee uahsixlangg si " vangr hro hiaxee jingsinn-siong ee sixlangg, kir baijongr bactew-siong ee sixlangg." (maxtair, derr veh jniux, zi-jap-zi jed). Ix quanced sniwmia ee uahlat. Duiww satan jitt xee okmoo,Iasox qongw "ix jit kaisiw dyrr si satzinjiaw." og si uihuanw zindy jurzenn huatjig ee sixbongg --- mosad sinkux/ nihsiw simlingg ee siw. Og ham' jurzenn ee siw byy kanlenn.

Jitt vunw ceh ee jongjiw, si decc qoxle togjiaw zinrjinx binrduir zinlui ee sniwmia, jinr jit vo iong qyckacc giamsiog ee taiwdo knuawtai zinsingr ee og --- giamsiog qaur kyr zinlui ee iwjir jipuer, senriong qokk jiongw lorqingr (vauquad kyhak honghuad), siongser genxqiur. Guaw si beh qoxle qokk xui ui' kiongxvor qnialangg ee janbin, zinrbad og ee guanngiu. Guaw ee vunxir juadduir m si vnertair, sionghuanw :ee, si uirr mairhiongr "... did diyc sniwmia, zicniaw beh hro in did diyc ciongjiog ee sniwmia" ee qingxqair. Zinrbad langg ee og ui'id u lat ee lixiuu, si beh jinrlik jingxqiur langg ee og --- dirr liw/ guaw byy hxuad jingxqiur langg ee og sii --- bogjingg ciangjai si anne --- erdangr cimzip tamwqiur, huathen digding jinghongw ha ee qaixqiur, jiongbuew hro derqiuu-siong kiapser ee jit bin, uanjuann siausid.

Qoxle qokk xui juwbak siaog simlixhak ee huatdenw sii, guaw damlun ee, m si tamwtyw tiusiong ee og, m si tuatli sniwmia qewdat/ sniwmia uahlik, m si cimyr lanqaiw ee simlixhak. Duhuix Dikqog Nazi, narr byy, byy kyxlingg qandna' genxqiur vnerjingr, byy kyxlu dri hyw vne. Siaog simlixhak itding si u iliauu ingwhau ee simlixhak.

Erdangr dri hyw og, si air/ air ee jok'iong/ air hro did qiur. Kiamr air, did qiur ee qihue jiyw qaxx byy kyxlingg. Maudunw ee si, siaog simlixhak vitzenn si air ee simlixhak --- vitding ciongbuanw sniwmia ee dua air. Siaog simlixhak lixlun muixx jit xee vorsor/ ser jat, m na si beh air jinliw, marr dyrr qinxsin junsiuw sniwmia ee air: unjingg/ qongbingg/ ciywiongg/ jurhuad/ hixlok/ hogbu/ciongbuanw zinsingr ee quanhuaii.

Anne, kyxlingg guaw ixqingx duiww kyhak vutqingr ar! Lanw qycc jin jit vo "setdok" oox! Guaw soxx qongw ee kyhagsid simlixhak --- qaxsed jiong' pahngx/ sanwciah/ sixjing/ siaog vaiduu jairgua --- qycc qaxsed siongrdingx hyxgiac/ honghur/ juvix --- vitding uanbuanw jingxhap henrqaidnua byy virr qongzin jyr "huhap kyhak" ee vorhun. Kyxviw qongxx, pendiong dirr bunhak lingxhik, digvet si sinue vorhun. Zinlui ham' okmoo sewdai ngidnii jingdaur, vutdix-vutqag/ amwiwsig ha, ixqingx lingxgno/ did diyc ee qinggiam qauwhun, qurtew vensiaw sinue qowsu. Sinue juxiaur lueriongg si siongser qiwlok jiaxee qinggiam qauwhun ee qongxdua diwsig vyxkor --- zinlui qaur dnaxx iuguann vutduan liutuann sinue. J.R.R.Tolkien(1892-1973) juewqin bre liauw siongrr hyw ee duwjog "The Hobbit And The Lord Of The Rings" snavorkig ee zinbut Gollum, kyxlingg si iuxsuw ixlaii biysiaw siongrr iur ee okmoo qaksig. Jokjiaw si bunhak qauwsiu, duiww zinsingr og ee liauxqaiw, byy sux zimrhyy jingsinkyx isux/ simliw hagqax.

Lingrgua jit bin, "gnersid kyhak (Hard Science)" marr iong laii tyxlun "og", m na Rorschachs bagziah cikgiam/ iauxx vauquad siongrr senjinr ee singhuar quewdingg/ hnuaidid qaudnii dyngiu hogjap ee uituann mosid tongxqer hunsig. Qauwduir vunw ceh guanqyw ee mow xui venjib qongw " Scott, liw m si decc amwsi, siaog mow hongbin kuriuw uituann/ singbut huawhak/ budliw ee digsingr?" jitt xui venjib jin' cingcyw, qokk xui jin' qinw jiong' lingxgno cud, cavutdyx soxu ee vne longxx kanlenn bactew/ jingqamw ee vnerqinx, iuliongg/ jniawtongw ee kyhak/ simlixhak juadduir m si cenxqenr/ ehser.

AIR LIW EE SIAA?

Siaog simlixhak vitding si jongqaur simlixhak, si byy sniaw huaigii ee, guaw ee iwsur si, diyhh vauhamm huhap itcer jongqaur tuantongw ee jingwkag quanliam, qycc diyhh texzin "ciaujurzenn" ee henrjong, byy vit'iaur qra digding ee sinhak vauquad jairlai. Siaog simlixhak itding si ixx "air" "sniwmia sinsingr vutkyw cimhuan" jyr qicow ee kyhak; juadduir m si juanzenn ham' jongqaur uercingx qaiwsnuar ee kyhak.

"og" ee sinhak hingmoo, je jiongw dyngiu, byy hxuad sikdongx kuhunx, cniurr mosad ee zin'uii jai'eh, huexsiyx/ jyr duarjuiw/ dedang...dringw si diwmia ee tenjaix. Guaw jit xui ving'iuw jaix guaw dngdecc siaw iuxquanx og ee ceh sii qongw "kyxlingg liw ersaih janr guaw jit quaw lat, jo guaw liauxqaiw gunw qniaw dair diyc nauxsingr baviwjingr." jex guaw si byy huatdo. Rabbi Harold S. Kushner(1935-) ee duwjog "senrsimx okvyr (When Bad Things Happen To Good People)", jiangxag/ cuxliw tenzenn og ee bunrdee vutjiw uanjingw. Lanw jitt vunw ceh qandna' tamwsyh zinsingr ee og, digvet pendiong "pnaiw langg".

Guaw qra juxdee kngr dirr jinrlat jriw cud bunrdee ee hudsimx, qoxle dag'ee vue'iongw kyhak ee genxqiur jingsinn, qinxsin sukyw/ venrbingg, byy anwsngr tamwqiur qinguann. Suibongw qitnax jongqaur qauwgi duiww siaog simlixhak siongser qiwlok ee be jiyw, iuguann iong qidokdoo ee quandiamw laii huntiah.

Qaur dnaxx zinlui iauxx bue u ciongjiog ee kyhak diwsig jyr qiqud laii huatdenw simlixhak ee singwog lixlun, mrqycc hing'uii simliw hagqax ixqingx diamrdnia liauw hro huatdenw hingsingg simlixhak ee qide. Freud ee amwiwsig quanliam/ Jung ee imngiaw lunrsueh, longxx si qivunw lixlun.

Duiww Fromm jitt xui simliw hagqax ee loxlik, diyhh digvet qongw kacc je .quaw, ix dyy cud A.Hitler vikhai Iutaiwlangg mojiangw au, juanlik genxqiur Nazi okdoo, si derr id xui bingkag dingrcud siaog zinqeh ee luirhingg/ iwdoo cimdo quanknuar oklangg/ qenwgi sewqanx langg jin jit vo genxqiur oklangg ee kyhagqax. Ix ee genxqiur qicow si 1933~1954 nii dua dosad siqii ee Dikqog Nazi lingxdyxzinn. Soxx tamwtyw ee "siaog" juxdee qingquer ligsuw ee kyxgiam jingwbingg, jitt diamw viw guaw jyr :ee kacc iuxli ; kiokk marr si kiamwdiamw ee soxjai, in'ui ix juadduir byy kyxlingg jinjniar sikdongx huhap juxdee; jiaxee lingxdyrzinn longxx si dirr digding siqii/ digding bunhuar/ digding jingwkuann nirr kuriuw qydo jingwdi kuanlik derui ee langg, hingsingg liauw jinjniar ee oklangg cuthen dirr hitt sii/ hitt soxjai ee inwsiong, inxdy togjiaw siongsinr jinjniar okmoo juadduir m si qecpiah cuwvnix ee maxmah/ iacc si xe jit diauu qrex qauwhue ee jipsu. Mrqycc qinqur guaw ee qinggiam, oklangg ciangjai si huanhux-siogjuw, jixvutqyr itvnualangg hionghiongg knuar inx longxx qamxqag vutjiw jingwsiongg.

Iutaiwqaur sinhagqax Martin Buber, kuhunx quanhe og ee nng jiongw sinue. Jit lui si quanhe dimlunn jyr oklangg ee quewdingg. Lingrgua si ixqingx lunn jyr "duirlyc jok", qniaa huexsnuar jiamrr jinwzip xmoo :ee.

George ee qywanr si sriok derr id lui, qniaa pnaiw lo, dimlunn diongx iauxx bue jniajyr oklangg! Ix ham' xmoo ongxlaii, si ix zinsingx dyrdig quanliam ee dngxuad. Zuqyw byy jiongjiw hab'iog, jiong' jniajyr siaok :ee, qajair dirr ix qniaa hiongr sialo, qamxqag juerog, jiacc qaixsiaa-quijniar.

U jit duir angbow, duxhyw cniurr Fromm soxx siaw :ee, huhap derr zi lui --- ixqingx liqingx-vuanrdy, qniaa dirr xmoo ee huexsnuar-dingw.

BOB HAM' IX EE VERBUW

Guaw derr id nii jingsinn vnerhak limcngg hunwlen kywdingg ee diongqii, hitt sii si zi-guec, guaw hurjig druar ngi ee vnerlangg. U jit amr, Jap-go huer ee Bob virr jinxduan utjingr, qipjinw druar ngi. Huerjinw jingg, singx tak liauw ix ee vnerlik bunzi qiwlok :

Bob ee a'hniax Stewart jap-lak huer, qurnii lak-guec giac cingr (kauxqingr 0.22 ee Rifle) ui' taukag vongr siw qaqi. Jit huatsingx, Bob ee viauxhen sngr vingjing, qauw-guec kaihak, singjig itdit duer langg' be diyc. Vunxlaii si diongdnua-jingg ee juixjunw, jitmaw suacc byy jit kyx quer quanx.qamxunrjed jingg, ix ee utjingr venr qaxx jin' binghenw, verbuw huisiongg iusimx, iwdoo beh ham' Bob dramm simsu, Bob zuxx laii zuxx byy beh qongxue, quer liauw singwdanr, qyckacc giamdiong. Quewkir longxx byy anwdew, kiokk dirr hitt sii kaisiw taux langg' ee ciax, qra ciax longr qaxx uaiqyxcihcuac (ix byy sraiw quer ciax), hro qingwcad liac .kir. snax-guec zi-sir huatngi kuidingg, Bob bue muaw jap-veh huer, caiding qauvyw au verbuw qamwquanw, vingrr iauqiuu sui' jinwhingg simliw huxdy.

Vnerngi jorliw qra Bob cua laii guaw ee vanrqongsig. Jap-go huer cingcunx coqii javoginxaw denxhingg ee texqeh : lyr lyr sanw sanw, naxx dikqyx ee ciuw/ kax, puee vaux qud ee sinkux, byy qraur qetsit ; byy hac cing ee snxax, byy jingxliw ee dng taumox, kamr qaur bagjiux, qycc itdit knuar tokax, guaw knuar be cingcyw ix ee bin, kanx ix nngxziok byy lat ee ciuw jre lyc laii, "Bob, guaw si Peck, liw ee juxdi isux. Liw jitmaw qamxqag anxjnuanw?"

Bagjiux itdit siongr dervanw, byy rinr.

Amwsii qamxx kunr u hyxser ?

"Iauxx sngr hyw." Bob qongw dirr cuir lai. Kaisiw kangr ix ciuxqud dingw ee qenpiw. Guaw juwir diyc ix siangciuw longxx si jitt jiongw ee vax.

"Dirr vnerngi e hro liw qinxdniux hnor?"

Iauxx si byy rinr. Bob juansimx quanwjur kangr vax. Gauw diam diam taux knuar .jit .xe hiaxee siongvax. "Cavutdyx muixx jit xee langg derr id vaiw laii druar ngi, lanbenw e qinxdniux. Mrqycc ixau liw e huathen, vnerngi si anjuann ee soxjai. Qamxx ersaih qra guaw qongw, uirsniaxmic liw laii vnerngi?"

"Vxvah/maxmah cue guaw laii !"

"Uirsniaxmic inx anne jyr?"

"Guaw taux kanx langg' ee ciax, qingxcad qongw guaw itding rair laii vnerngi."

"Guaw sniu qingxcad byy qongw liw itding rair laii." guaw hiongr ix qaixsueh. "inx qandna' beh liw kir knuar isingx. Si jaxamr jinxduan liw ee hitt xui isux zinruii liw u giamdiong ee utjingr, siongrr hyw druar ngi. Or! Liw jnuaxngiu e beh kir taux kanx langg' ee ciax?"

"Guaw m jaix!"

"Taux kanx langg' ee ciax, sidjai jin' guihiamw; iuqii liw si qaqi jit xee langg/ byy quanwsir sraiw ciax ; simrjiww byy qawjiaur, qyckacc qniax langg'. Itding u jit qrow qiongg qaxx u lat ee ligliong saixlong liw kir jyr. Liw qamxx jaix si dycc quaw lat?"

Diam diam byy sniax. Guaw marr byy py hibang ix e huedab. Jap-go huer ee javox ginxaw, dirr jiacc kunwqingw nirr, derr id vaiw knuar jingsinkyx isux byy kyxlingg itdit qongxue --- digvet si utjingr huanrjiaw, qyckacc byy kyxlingg. Bob henxzenn jin' utjud. Dng' ix bagsinn suaw li dervanw sii, guaw sun qihue qex knuar ix jit ganw --- sixbin sixbin, bongg bongg, ganxsinn/ cuiwqag byy jit sxix-aw uahlik; bin ee viauxjingg naxx guaw dirr denrngiaw knuar diyc duxx ui' jibdiongngiaa qaixhongr cud laii :ee/ iacc si tenjaix ee siurhairjiaw, cur huexsiyx/ dedang quer, qandna' cunx ix jit xee langg , lingxcinr/ juadbang/ m jaix beh anxjnuaw jiacc hyw ee hxingg.

"Liw siongsimx ?" guaw mng.

"Guaw m jaix."

Kyxlingg ix jinjniar m jaix, cingcunqii ee lamluw duxx kaisiw yc erhiauw qamxsiu jurqiw ee simjniaa, je huanlyy/ qauu qamxsiongx :ee, zuxx iong'i hro simjingg tuax lehh sec, m jaix beh anxjnuaw viauxdat jurqiw ee qamxsiu. " guaw iyh liw u cionghunx ee guan'inx, hro liw visiongx. Guaw jaix, linw a'hniax Stewart qurnii zuac .langg jursad, liw ham' ix ee qamxjingg be baiw hnor?"

"Jin' hyw."

"Qra guaw qongw linw hniadi ee dairjir. Ix siw liw itding jiokk siongsimx, m jaix anxjnuaw kacc hyw?"

Byy huanxingr. Kyxlingg ix qandna' sniu beh qra ciuxqud ee qenpiw kangr kacc cimx .quaw, henxzenn ix byy huatdo derr id vaiw huerjinw dramm a'hniax jursad ee dairjir. Guaw guatding jiamrsii anwha. "Qongw quaw liw ee verbuw, qamxx hyw? Inx ee dairjir qamxx ersaih qongw hro guaw tniax?"

"Inx duiww guaw be baiw."

"Anne jin' hyw, anxjnuaw be baiw?"

"Inx sraiw ciax sangr guaw kir camqax dongjuxqunx huergi.

"Anne si be baiw! Dongzenn marr si verbuw u ingg qaix jyr :ee, liw ham' inx jywhuew sii qamxqag zuhyy? "

"Sngr be baiw."

"Byy bunrdee hnor?

"Ursii guaw hro inx jin' uilann."

"Oor! Kyxviw qongxx sniaw?"

"Guaw hro inx siongsimx."

"Bob, liw si anxjnuaw siongx diyc inx ee simx?

"Guaw qra langg' taux kanx ciax, jitt xee dairjir dyrr hro inx siongsimx. Bob simkuir jin' dang qongw. (m si singwlirjiaw ee hongsinn kauxkir.)

"Liw qamxx byy sniu qongxx taux kanx ciax e hro inx siongsimx?

Bob byy huee guaw ee ue, qingquer jin' dngg ee siqanx, guaw mng "qamxx u sniu diyc?"

"Guaw jaix guaw siongx diyc inx ee simx."

"Liw jnuaxngiu e jaix?" guaw mng.

"Guaw marr m jaix neh!"

"Inx qamxx u huat liw?"

"Byy, inx duiww guaw jin' hyw."

"Anne, liw nacc jaix hro inx siongsimx?

"Inx duiww guaw jin' dua sniax qongxue."

"Oor! Inx uirsniaw su duiww liw dua sniax huah?

"Byy cingcyw."

Bob qor ix jurqiw itdit kangr qenpiw, naxx vnix :a byy langg lehh, tauu ngar ngar, ngar qaxx berdangr qyckacc ngar ar! Guaw sniu jitt sii mng quaw be tniar byy jniu ee bunrdee, jiacc kacc hyw. By itding e hro ix sniu beh kuix cuir qongxue, anne gunw dyrr erdangr kaisiw qenwlip quanhe! "qamxx u cri ser jiah dongrbut?" guaw mng.

"Cri jit jiah qxauw."

"dycc jiongw qxauw?"

"Dikqog jingw, qor ngiuu ee qxauw (Sheep dog)."

"Ix qiyr sniaw miaa?"

"Si buw :ee, qiyr Ethel." Bob qra guaw qingjingr.

'Tniax kiw laii, u cniurr Dikqog miaa."

"Si ar!"

"Dikqog qor ngiuu qxauw, hy jit xee Dikqog miaa." guaw huatviauw iwqenr, hibang dui dam'ue, jaix nng ~ snax hxang dairjir.

"Liw ciangjai ham' Ethel jywhuew?"

"Byy, m si ciangjai."

"Si liw decc jiauwqor?"

"Si ar!"

"Mrqycc liw naxjunxx byy qaiww qac'ir?"

"Ix si gunw vaxvah cri ee qxauw."

"Oor! Danrsi liw decc jiauwqor?

"Byy m driyc!"

"Hyxcincniu m si jin' qongvnee, liw qamxx e siurkir?

"Be."

"Liw u liw qaqi cri ee dongrbut hnor?

"Byy."

Gunw itdit dirr jitt xee uerdee qongw laii qongw kir. Guaw quatding qaixvenr uerdee, qongw quaw siauwlenlangg sigsai cuwbi ee dairjir. " singwdanwjed quer kir byy zuarr quw, liw qamxx u siux diyc sniaw lexmic?" guaw qongw.

"Lexmic byy je."

"Vaxvah/ maxmah itding u sangr liw mic, si sniaw?"

"Jit qix cingr."

"Sangr liw cingr?" guaw suacc gong .kir.

"Byy m driyc!"

"Dycc jit lui ee cingr?" guaw ban ban aw mng.

"Zi-jap-zi kauxqingr ee cingr."

"Zi-jap-zi kauxqingr ee dew cingr?"

"M si, si zi-jap-zi kauxqingr ee Rifle."

Qycc laii, jit dnxua jin' dngg ee diamrjing. Guaw qamxqag gignaiw, m jaix beh anxjnuaw, sniu beh tingjiw huerjinw dngw kir cur nirr. Juewau guaw qiongvig jurqiw qongx cud qaix qongw ee ue "guaw jaix linw a'hniax si iong zi-jap-zi kauxqingr ee Rifle jursad."

"Si ar."

"Jex si liw iauqiuu siux diyc ee singwdanr lexmic?"

"M si."

"Liw sniu beh sniaw lexmic?"

"Bangrqiuu qiuhiax."

"Mrqycc liw did diyc :ee, si jit qix cingr?"

"Driyc."

"Liw siux diyc jit qix linw a'hniax qang hxingg ee cingr, u sniaw qamxsiongw?"

"M si qang hxingg :ee."

Guaw simqnuatauu kacc kinsangx .quaw, kyxlingg guaw hud m driyc .kir! "Sitlew," guaw qongw. "guaw liahqiyr si qang hxingg ee cingr!"

"N si qang luirhingg ee cingr," Bob qycc qongw jit vaiw. "si qang jit qix cingr."

"Qang jit qix?"

"Byy m driyc."

"Liw si qongw linw a'hniax :ee hitt qix?" guaw hin berdangr sui' dngw kir cur nirr.

"Si ar!"

"Liw si qongw, vaxvah/ maxmah qra a'hniax jursad iong :ee hitt qix sangr hro liw jyr singwdanr lexmic?"

"Dryic!"

"Singwdanwjed siux diyc linw a'hniax hitt qix cingr, liw u sniaw qamxsiongw?"

"Guaw m jaix."

Guaw jin' hiyrhuew mng jitt xee bunrdee. Ix nacc e jaix zuhyy huedab jitt jiongw dairjir ee qamxsiongw? Guaw siongr Bob knuar.

Gunw qongw diyc cingr sii, ix ee viauxjingg byy zimrhyy venwhuar ; jyr ix kangr siongkauw ee qenpiw, naxx u tew byy hxunn --- sixbaiw ee ganxsinn/ jit diamw aw jingsinn dy' byy/ sniaxmic ue dyrr byy huatdo hro ix ee simx u jit damw aw qamxdong/ qui' xee vangr gua gua ee dervo. "guaw byy qitai liw e jaix, qra guaw qongw, liw qamxx bad qnir quer a'qongx/ a'maw?"

"Byy, inx druar dirr South Dakota."

"Linw qamxx u cinjniaa?"

"U quaw."

"Liw siongrr qac'ir dycc jit xui?"

"Guaw qac'ir Helen a'ii."

"Ui' ix ee huedab, gauw qamxqag diyc jit sud aw zedjingg. " liw draur ngi sii qamxx beh Helen a'ii laii knuar liw?" guaw mng.

"A'ii druar dirr jin' hng ee soxjai."

"Zuqyw a'ii guanrir ui' hiacc hng ee soxjai laii neh?"

"A'ii guanrir laii siongrr hyw."

Guaw qycc ui' ix ee srinx-siong --- ixqibb guaw jurqiw ee srinx-siong --- cue diyc jit sud sud aw hibang ee qngx. Guaw sniu sui' beh lenlok Helen a'ii, jitmaw guaw diyhh qetsog gunw ee qongxue, guaw zimw be diauu ar. Guaw hiongr Bob suecbingg vnerngi ee jokgiap sunrsi/ qycc qra qongw qecdngxzit e laii knuar ix; horsu e hro Bob jiujuann ee jiauwqor/ e hro ix aiwkunwiyc jiac. Zenau, cua ix dngw kir horliw jam. Siaw uann Bob ee iliauu jinxduan vywqyr au, qniaa cud kir guarbin, qniaa laii qaur diongdingg, tnix duxx decc lyc seh, guaw jin' air lyc seh ee qingxdir. Quiw hunjingx au guaw dngw kir vanrqongsig, ngar tauu cuxliw hiaxee jin' byy cuwbi ee hingjingr qangjog.

Derr zi zit guaw knuar diyc Bob ee verbuw. qongw inx si vniawmia qangjog ee siongrvanrjok. Ix ee vaxvah juanmngg pacjy dyx/ boqu, si juangiap ee qihaisux; jurzin qisut jingqangx iuwlo, maxmah si jit qingx vyxhiamw qongsix ee viwsux. Cur lai jingxliw qaxx dingxjinx cingkir, vutjiw u jursinr. Inx dagg lexvair longxx kir Lordig qauwdngg jyr lexvair. Vaxvah quanwsir vaiwlak mee limx quaw biwluh, maxmah vaiwsir mee si "hurluw vyxlingqiuu amwqongjiauw" ee singguann ji' id. Ang'axbow sincaii diongdingw/ binrkuanw poxtongx/ m si endann/ marr byy sngr baiw ; sriok lyqangx diongsiong qaijann --- ue byy je/ siuw qiwlut/ kax dac sidde, inx naxjunxx sniu byy cuwlai lensuar huatsingx ee camw su; m jaix dairjir cud dirr dyhh. Duarhanr qniaw Stewart jursad, Bob qycc taux kanx langg' ee ciax.

"Isux, guaw dua sniax me guaw qaqi." maxmah qongw.

"Stewart jursad, hro linw qniax .diyc?" guaw mng.

"Vah bin vah dua diyhqniax." vaxvah rinr. "Stewart sik'ingwlik qiongg, dirr haghau viauxhen jin' hyw, qazip dongquntuann. Ix air dirr cuwau can'ngiuu drngx dikciw, vingsii diam diam byy air qongxue, lang'enn vutjiw hyw."

"Jursad jingg, si m si knuar kiw laii byy qaiww susongw/ utbun?"

"Jit diamw aw dy' byy, ham' vingsii siyqang. Dongzenn ix byy air qongxue, byy ham' gunw qongw simlairsu."

"Qamxx u lauu uigenn?"

"Byy"

"Linw sianghongx ee cinjniaa qamxx u langg bad diyc quer simliw vnerjingr? Giamdiong ee utjingr? Iacc si jursad?"

"Guanw daux qajok byy cud jitt jiongw langg." vaxvah huedab. "gunw verbuw laii jurr Dikqog, hitt vingg u jit quaw m si guaw sigsai ee cinjniaa, duiww inx ee jinghongw byy huatdo lyc pnuawduan."

"Duliauw guanw a'maw nihuer je, diyhh druar ngi ixgua, m bad u langg diyc quer simliw vnerjing." maxmah voxciongx qongw. "dongzenn qyckacc benw qongw u langg kir jursad ! Eer! Isux! Liw byy zinruii Bob marr u kyxlingg... kyxlingg jyr gong dairjir?"

"Si ar, guaw sniu u veh ~ qauw snxiaa ee kyxlingg." guaw huedab.

"Oor! Tnix ar, guaw dongr be diauu ar!" maxmah kinsniax decc hauw. "jiaxee dairjir --- guaw si qongw, jurqiw sionghai jurqiw --- si qajogsingr ee uituann?"

"Juadduir si, qinqir tongxqer, siongrr quann vixle ee jursad kinghiongr, cuthen dirr hniadi jixmue nirr bad u langg jursad ee srinx-siong."

"Oor! Tnix ar!" maxmah qycc decc lrauu bagsaiw. " liw si qongw Bob marr u kyxlingg duer inx a'hniax ee kaziacau?"

"Linw byy sniu quer Bob ee jinghongw jin' guihiamw?" guaw mng.

"Byy ar! Jitt ee jinwjingg m bad sniu .quer." vaxvah qongw.

"Guaw jaix Bob simjniaa baiw ixqinqx u jit dnxua siqanx ar!" "linw be damsimx?"

"Dongzenn e iusimx lor!" vaxvah rinr. Inx a'hniax siw , dongzenn siongsimx, mrqycc gunw sniu qongxx quer jit dnxua siqanx dyrr hyw ar!"

"Linw m bad sniu .quer, qra cua kir knuar jingsinkyx ji' lui ee dirliauu?" guaw qewsiok mng.

"Dongzenn m bad." vaxvah rinr, jitt vaiw u damrvyc siurkir! "gunw longxx qongw ar, gunw sniu qongxx ix e huehok, qinvunw byy sniu diyc ix suacc enxvenr qaur jiacc giamdiong ee dervo."

"Guaw jaix Bob ee singjig lag qaxx qaur buexliux kir ar!" guaw qongw.

"Si ar! Jin' qenwsiaur!" maxmah qongw, "ixjingg ix singjig hyw/ pinxhing iusiur."

"Haghau itding jin' iusimx or!" guaw jriw cud. "inx si m si bad ham' linw lenlok, cue cud bunrdee?"

Maxmah knuar kiw laii, u damrvyc vut'anx. "haghau cue quer gunw, dongzenn guaw marr jin' siongsimx. Simrjiww cingxqar camqax haghau diauwkuix ee huergi, camsiongg duiwcig."

"Guaw hibang linw unxjunw guaw vit'iaur sii ham' haghau dramm Bob ee dairjir, anne jyr kyxlingg u jin' dua ee vangjan."

"Dongzenn ersaih."

"Dirr hitt vaiw ee huergi-diongx, haghau hongbin qamxx u langg tegi beh Bob kir knuar jingsinkyx isux?" guaw mng.

"Byy" maxmah dab. Ix naxjunxx jin' qinw dyrr huehok dinwding. simrjiww hro guaw byy kakding duxaw si m si qniax qaxx qiongbecc sidsinn .kir. "haghau kaksit qenwgi Bob qaix jiapsiu huxdy, m si beh ix kir knuar jingsinn isux. Zuqyw haghau jinjniar u iauqiuu, gunw e jiauww vran."

"Si ar, narr si anne, guaw dyrr e jaix dairjir ee giamdiongrsingr." vaxvah voxciongx. "mrqycc inx qongw huxdy, gunw sniu qongxx si haggiap huxdy. Gunw m si byy quansimx Bob ee singjig, duhuix vig qaxx qiogvutqiok, gunw be vig ginxaw tagceh. Ginxaw quanw liauw sniu' giamm byy hyw, qamxx m si neh, isux?"

"Guaw byy kakding cue Bob jiapsiu huxdy dingxii decc vig ix." guaw viauxsi.

"Isux, jex si nng huesu." maxmah qewsiok qongw, guaw qamxqag ziaxkangx simtair je quer hongui :ee. "qawzit ixgua ee siongrvanx siqanx, cua Bob laii laii kir kir jyr huxdy, duiww gunw laii qongw, m si hiacc iong'i. Gunw longxx decc siongrvanx, jiaxee huxdyrguann vaiwlak/ lexvair longxx hiyckunr, gunw byy kyxlingg cingxqar likuix qangjog. Gunw iauxx diyhh tanr jnii quer zidjiw."

Ham' Bob ee verbuw venrlun si m si amwsii/ vaiwlak, cue u jyr huxdy ee soxjai, naxjunxx byy iwgi, quatding qra girdee juanxsuar qaur Helen a'ii. " nng xui, gunw dingxsix/ guaw jin' kyxlingg quatding Bob diyh'air lauu dirr ngi-nirr quancad jit dnxua siqanx --- ix vitsu'iaur u jit dnxua vutjiw dngg ee siqanx tetdew juanxngua sing'uac kuanqingw. Si m si u dycc jit xui cinjniaa erdangr hro Bob qiawduar?"

"kiongxqniax byy or!" vaxvah jin' qinw huedab. "guaw sniu byy u cinjniaa e hnuahiw hro cingcunqii ee ginxaw duer dirr sinvnix. Inx u jurqiw ee sing'uac."

"Bob bad tee kiw Helen a'ii." guaw qenwgi. "kyxlingg byy itding ix guanrir."

Maxmah hionghiongg cab cuir qongw "si m si Bob qra liw qongw, ix byy air ham' gunw druar jywhuew?"

"M si, gunw byy qongw diyc jitt xee uerdee, guaw jixsi sniu cir itcer kyxlingg ee hongsid, Helen a'ii si si'angg?"

"Guaw ee jexjew. Mrqycc ix byy let zip kyxlu jairlai, ix druar li jiax jiwjiyw quiw vah ingliw gua." maxmah rinr.

"Byy hng ar! Guaw si jiamdiur Bob ngua sinx kuanqingw, jiurr su lun su. Jitt jiongw qirlii duxhyw ; qin qaur ix ersaih dngw laii knuar linw; marr hng qaxx hro ix erdangr tuatli a'hniax jursad ee siongsimx de; kyxlingg iauxx erdangr hro ix likuix jitmaw soxx binrlimm ee qitnax aplik."

"Guaw jixsi zinruii byy itding qniaa e tongx." maxmah qongw.

"Oor?"

"Helen ham' guaw ee quanhe byy cinx. Ingwqaix qongw jit diamw aw dyrr byy cinx."

"Uirsniaxmic anne?"

"Gunw jywhuew itdit byy hyxser. Ix jongxsi jit xee qiaugno jurdai ee hxingg. Uirjnuaxngiu kyy dewder, guaw dyrr m jaix ar! vutqyr si jit xee saur tokax ee luxqangx, inx ang'axbow --- erdangr iycsniu diyc inx angx marr byy kiauw --- vutqyr u jit qingx quiboo jin' ser ee cingqed qongsix. M jaix inx vin' sniaw jurzin kacc quann langg jit qxib?"

"Guaw texhue diyc linw jywhuew liauw byy hyxser. Qamxx iauxx u qitnax ee cinjniaa sikhap hro Bob druar?

"Byy."

"Isux, guaw m jaix liw si amr jriw sniaw?" vaxvah cab cuir qongw, " hyxcincniu liw jurzin si qingxcad decc mngrue lehh. Gunw byy jyr m driyc dairjir, zuqyw liw quat'ir beh hro Bob likuix ix ee verbuw, liw byy kuanli. Gunw uirr jitt xee ginxaw hur cud jerje simhueh, gunw itdit si jin jikzim ee hyw verbuw."

Guaw tniax qaxx qiongbecc tror ee qamxqag. "linw sangr hro Bob ee singwdanr lexmic hro guaw jin' iusimx." guaw qongw.

"Singwdanr lexmic?" jitt duir angbow knuar kiw laii jin' gignaiw ee viauxjingg.

"Si ar, guaw jaix linw sangr ix jit qix cingr."

"Byy cyr!"

"Hex si ix sniu beh air ee lexmic?"

"Guaw nacc e jaix ix beh air sniaw?" vaxvah qongxue ee kauxkir duar huexiyc. Jit sxix-aw quw, ix ee sintair juanw jyr ai'ciuu. "be qir .did ix sniu beh air sniaw. Liw jaix, gunw jysiu taiww je ee venwqor. Duiww gunw laii qongw, jex si jin' qanlann ee jit nii."

"Guaw siongsinsr jin' pnaiw quer." guaw qongw, "mrqycc linw uirsniaw sangr cingr neh?"

"Uirsniaxmic sangr? Byy lixiuu m sangr ar! Hex si duiww ix jitt xee nihuer ee javox ginxaw siongrhyw ee lexmic ar. Dysor ham' ix qang niqiw ee javox ginxaw zinruii, cingr dairviauw singlenn."

"Liw qamxx si huanxduir cingr ee zinsu?" vaxvah jaiwdo beh ziaw dairjir ee kauxkir. "qisit marr byy soxui, liw u kxuann huanxduir, guaw vunxsinx marr m si air cingr:ee, bunrdee m si cingr, si iong cingr ee langg."

"Jiurr mow hongbin, dong'ir liw ee knuawhuad." guaw qongw, " Stewart m si u cingr jiacc jursad, itding iauxx junjai qitnax qyckacc diongrdua ee guan'inx. Linw qamxx jaix kyxlingg si sniaw guan'inx?"

"M jaix, gunw ixqingx qongw .quer, simrjiww lenrr Stewart cinwsimx sitjir longxx byy cingcyw."

"Driyc, Stewart simjniaa baiw. Langg narr siaudimm/ utbun byy songxkuair jiacc e jursad. Linw lenrr Stewart koxbun utjud longxx byy cingcyw, dongzenn byy lixiuu iusimx ix sinkux-dingw u cingr. Mrqycc liw jaix Bob utbun/ sitjir ar! Jaw dirr linw sangr ix cingr jyr singwdanr lexmic jingg, dyrr ixqingx jaix qaxx c.-cingcyw-c. ar!"

"Vaiwtog .jit .xe isux, liw naxjunxx byy cingcyw." maxmah jriab lecc qongw, ham' inx angx qang jit xee pnirkangx cutkuir. "gunw jinjniar m jaix e jiacc giamdiong; iauxx decc sniu qongxx si ix a'hniax ee siw hro ix simhuann-iwluan."

"Dyrr anne, linw qra a'hniax jursad iong ee buxkir sangr hro Bob, byy sangr vadd qix, dyrr si a'hniax jursad iong ee jitt qix."

Jitt xui vaxvah sui' cniuxcuir qongw, "gunw brew be kiw sinx cingr, m jaix uirsniawmic liw itdit kiaukix gunw. Gunw jinrliong jiong' siongrhyw ee lexmic sangr Bob, jnii m si snix dirr ciu-aw dingw/ m si ui' tnix-dingw lag lyc laii, gunw jixsi tanr sinsuiw :ee, vunxlaii marr ersaih qra qu cingr brew driau, ngua sinx cingr, kiokk byy anne jyr. Dendyww vyxjunn lyc laii, qycc sangr hro Bob."

"Linw sniu, Bob siux diyc jitt xee lexmic, kyxlingg e anxjnuaw sniu?" guaw mng.

"Liw si sniaw iwsur?"

"Sangr hro Bob a'hniax jursad iong ee buxkir, qamxx m si dingxii beh ix duer inx a'hniax ee kavo qniaa?"

"Gunw byy anne sniu .quer."

"Linw dongzenn byy anne sniu, mrqycc linw qamxx byy zinruii Bob kyxlingg e ongw jitt hongbin sniu?"

"Be, gunw byy zinruii anne. Gunw byy cniu liw sriu quer qauwiok ee diwsig hunrjuw, gunw byy tak dairhak, m bad sniaw sinx quanliam, jixvutqyr si dansunn ee lyqangx qaiqib. Berdangr iauqiuu gunw sniu hiaxee su."

"Kyxlingg bersaih. Mrqycc jex si guaw soxx damsimx :ee, jitt hxang su berdangr byy anne sniu." guaw qongw.

Inx nng langg hrosiong knuar laii knuar kir vutjiw quw. Guaw sniu beh jaix inx si sniaw qamxqag? Knuar kiw laii, uanjuann byy juerokqamw. Siurkir? Qniax? Koxnauw? Guaw m jaix! Uanjuann berdangr qamxsiu inx ee sniurhuad, guaw jin' cingcyw jurqiw ee qamxsiu : inx vaitig guaw, guaw qamxqag jin' tiamw.

"Hibang linw ciammiaa dong'ir hro guaw ham' liw ee jexjew Helen dramm Bob/ Bob ee jonghongw." guaw duiww maxmah qongw. "marr mahuann liw ciammiaa." juanxhiongr vaxvah.

"Guaw m ciamx. Baiw dai berdangr tuann cud kir, guaw be hro liw qra jitt hxang su duiww guarlangg qongw. Liw jurzin qyqyx-jairsiong, zinrding jurqiw si huatqnuax ji' lui ee zinbut."

"Duxhyw dywvingw" guaw lingxjing/ lixsingr qaixsueh. "dyrr si jinrliong qandna' hro qajok lai ee langg jaix. jitmaw si linw/ Bob/ gauw jaix. Guaw zinruii u vit'iaur jiyh Bob a'ii ee lat, jiwjiyw guaw rair jaix ix si m si ersaih dauwsnaqang. Zuqyw linw jewjiw guaw anne jyr, guaw dihyy jit hxang jit hxang hiongr dingxsix vyxqyr. Guaw sniu, gunw ee quatding, u girbu qra Bob ee anr sangwqaux "jiux zidongg vyxho qiok (State Childrens's Protective Agency)", narr si anne, dyrr e u jit xui jinjniar ee huatqnuax laii simxliw. Gunw byy vadd diauu lo, qiogvutqiok anne. Mrqycc guaw zinruii, zuqyw Helen a'ii erdangr teqiong hiabjo, dyrr benw mahuann tongdix jiux jingwhuw, vutqyr, quatdingrkuann dirr linw nng xui srinx-siong, uanjuann iu' linw suanxdik, si m si dong'ir hro guaw ham' Helen dramm?"

"Oor! Isux, gunw angx duxx jit sii hodoo." Bob ee maxmah unhyy duar ciywiongg qongw. "knuar diyc gunw qniaw diyh'air druar jingsinn vnerngi hro ix simx jag, gunw marr byy sibquanr ham' linw jitt jiongw sriu quer qydingw qauwiok ee langg qaudamm. Gunw dongzenn beh ciamx dong'iwsux. Guaw byy huanxduir hro jexjew cam'uw. Gunw e jin itcer kyxlingg kuix hongven ee mngg. Duiww Bob iuxli :ee, jiacc si gunw quansimx ee."

Inx ciamx liauw dong'iwsux au likuix. Hitt amr, guaw ham' kanciuw camqax dongsu jurhue. Viw vingsii qex limx quaw jiuw.

Derr zi zit, guaw lenlok Helen a'ii, ix ham' inx angx naxx qnuaw huew laii cue guaw, jin' qinw liauxqaiw dairjir ee taubuew, naxjunxx vutjiw quansimx. Inx longxx diyhh qangjog, vutqyr jixiaur benw hurdamx Bob jingsinn dirliauu ee huiwiong, jin' guanrir Bob vnuax kir ham' inx druar jywhuew. Hyxzirun, tauwquer inx ee anvaii, guaw jiapciog diyc hitt ee dinr siongrr kuan'uix ee jingsinn isux, dong'ir jriab Bob ee anr, jinwhingg dngqii ee jingsinn mngjinw dirliauu. Bob vunxlangg byy bingvik uirhyy diyhh ham' a'ii / i'dniu druar. Guaw qra qongw, anne si duiww ix kacc hyw ee anvaii, zinruii ix iauxx byy binrduir jinsiongr ee linglik.

Bob jin' qinw dyrr sik'ingr kuanqingw ee qaixvenr. Sursit-siong, qingquer ham' Helen quiw vaiw ee hongxdamm/ binrduir sinx ee sing'uac kuanqingw/ horsu duiww ix jimjiog ee jiauwqor, Bob ee jinwdenw huisiongg qinw. Dirr Bob cud ngi vnuax kir Helen ee daux druar sii --- vanrliw druar ngi ee snax lexvair au --- ciuxqud ee sionghunn longxx qenpiw ar, simrjiww e ham' qangjog zinguann qunw sngxciyr! Lak qywguec au, Helen qra guaw qongw, Bob naxjunxx quer liauw jin' hyw, singjig u duer diyc din ar! Bob ee jingsinn isux qongw, Bob ixqingx duiww dirliauu quanhe qenwlip sinwsimx, duiww verbuw ee simliw jongrtair/ verbuw knuawtai ix ee taiwdo, iauxx si tamwqiuu ee qaidnua. Cuxau, guaw dyrr dng liauw Bob aursiok jonghongw ee snuawsyh. Bob verbuw, derr id vaiw damue quer au, Bob iauxx decc druar ngi ee qiqanx, ham' inx duw quer nng vaiw, dagg vaiw longxx si quiw hunjingx, nng crur ee huerbin longxx si berdangr byy qnir ee jinghongw.

SI'ANGW SI JINJNIAR EE VNERLANGG

Jingsinkyx isux donggiap jiong' jiapsiu jingsinn dirliauu ee ginxaw qongxx si "virr zinrding ee vnerlangg (Identified Patient)", vingrr iong jitt xee laii jriw inx ee verbuw/ qitnax ee zinrdingrjiaw, dah hyrtauu --- jyr m driyc dairjir/ gorqniaa penlo/ diyh'air dirliauu ee viauhy. Caixiong "virr zinrding ee vnerlangg" jitt xee sugiw, si in'ui gunw ixqingx yc erhiauw duiww zinrding quewdingg ee sikdongrsingr jitgii. Dirr gunw kaisiw duiziog qinguann, ongxongw huathen bunrdee ee guantauu m si cud dirr ginxaw, si ginxaw ee verbuw/ qadingg/ haghau/ siarhue. Qanxdanx qongw, gunw ciangjai e huathen verbuw ee vne byy sux ginxaw. Suibongw verbuw zinrding diyhh diaujingw ginxaw ee hing'uii, mrqycc qingsiongg si verbuw vunxsinx/ zinrdingrjiaw, jiacc si vikced su'iaur diaux ee langg; inx jiacc si vnerlangg.

Bob ee qywanr si anne ee anwle. Suibongw ix huan diyc giamdiong ee utjingr, su'iaur qipqiur, mrqycc iubun ee laiguann/ qintauu si laii jurr Bob ee verbuw duiww Bob ee hing'uii, m si Bob qywzinn. Bob utjud/ byy ciywiongg, mrqycc iubun m si vne, ham' ix qangkuanw jinghongw ee jap-go huer javox ginxaw, lanbenw e simjingg byy susongw. Dirr jitt xee cuxqingw ha utjud m si vnertair; si snix cud iubun/ vnertair ee qadingg kuanqingw.

Duiww ginxaw laii qongw --- simrjiww vauquad cingcunqii ee ginxaw --- verbuw cniu siongrder, verbuw itcer jok'uii naxjunxx lixsow-dongzenn. Ginxaw jin' lann u linglik kecquanx jiong' jurqiw verbuw/ vadd langg verbuw jyr vixqaur, marr byy hxuad huhap sidjer pingqow verbuw ee hing'uii. Jysiu verbuw gigtai ee ginxaw tongsiongg e zinrding jurqiw si pnaiw ginxaw. Dirr baiw/ gong zirdingw qongbinn quanliam ha iongxsingg duarhanr ee ginxaw, e qenquad dingrui jurqiw si zirliuu ee jurgnow hingsiong, vueduer inx jidsiwlangg, jin' yh qaixvenr ; byy air ee qadingg, ginxaw zinruii jurqiw langenn baiw... Lanw erdangr quilap haidongg huat'iok siongdingw ee itvnuax huatjig : giamdiong kiamr verbuw air ee ginxaw, e qaxsed jurqiw si bunrdee ee qinguann, iong byy habliw ee huwbin jurgnow hingsiong laii kongwgi.

Bob derr id vaiw laii vnerngi sii, itdit kangr ciuw siongkauw ee qenpiw, jit diamw jit dih sionghai viauxpuee jojid, cincniu puehux erdew draii liauw baiw dai/ siaog, itding rair cue diyc qintauu, qui' xee banw driau jiacc ee cingsimx qangrkuanw. Uirsniaxmic?

Zinrdix huhap jingwsiongg zinsingr ee jingwsionglangg, narr qongxx sinvnix ee cinjniaa/ vingiuw u langg jursad, derr id sii tniax diyc e qniahniaa, qycc laii ee huanxingr kyxlingg e huaigii, si m si jurqiw u m driyc qra langg hai diyc? Bob itding byy lergua. Stewart jursad au byy zuarr quw, ix e huesiongw quewkir soxx huatsingx ee d.-diamxdih-d., vixzuu: jit lexvair jingg me a'hniax si gongrguu; jit qywguec jingg inx uanqex, iong kax tad Stewart ; dagg vaiw a'hniax qongw ix m driyc ee sii, ix jongw e hibang a'hniax siongrhyw siausid byy .kir. Stewart ee siw Bob jerjiyw u jurgnow jikvi.

Qenrjuann ee qadingg dirr dairjir enxvenr qaur jitt xee dervo sii, verbuw ingwqaix cud bin andah Bob/ ham' Bob dramm Steward ee jursad ; suibongw verbuw byy liauxqaiw Steward jursad ee sidjer jinghongw, simlingg puawvne si sursit! Jitt diamw jongw ersaih qaixsueh tihh! Jit xee langg juadduir be in'ui zidsiongg sing'uac iwqenr cutzip/ qongxue siy' tuccaur laii jursad. Narr qongxx jinjniar beh duiqiur jikzim, qaix quair ee si verbuw jurqiw, inx si duiww Steward ingxhiongw siongrr dua ee langg. Guaw siongsinr, Bob byy kyxlingg did diyc cniurr anne ee anuir.

Bob itdit byy did diyc anuir, snix cud iwjir siaudimm, singjig naxx cux liulongg, jidlo qut qaur drew. Jitt xee sikig, verbuw qaix u quat'ir qra jingser giuw dngw jniawbin, narr byy qraur kuiwlat, marr qaix sunqiuu juangiap hiabjo. Vuthing ee si, haghau ixqingx tecud qenwgi, verbuw iuguann byy-iauw.-byqinw. Bob jin' u kyxlingg qra qaqi ee iubun/ jysiu koxtangr ee jetbaa/ byy langg anuir, qaixsueh jyr qaix sriu ee jue/ si vywingr.

Bob ixqingx jurqiw pnuar liauw jue. Singwdanwjed qycc siux diyc "mosad" a'hniax ee cingr. Beh anxjnauw e liauxqaiw jitt hxun lexmic ee "iwgi" neh? Qamxx qongxx beh ix anne sniu : guaw ee verbuw jin' siaa, inx oksingr kiw qongg, rair guaw cniurr a'hniax jurgnow huixbet? Iacc si qongxx, guaw ee verbuw vindnua/ sniu byy taur/ siauxtamx, jiacc qra jitt qix cingr sangr guaw? Guaw ee verbuw m jaix diyhh duiww guaw hyw?... jap-go huer ee diwlingg byy qraur singsik, byy huatdo cingcyw liauxqaiw/ quanjiaur verbuw, si byy kyxlingg anne sniu ee, Bob jurzin siaog. Siongrr kyxlingg zinrding ee si "yc linw a'hniax ee ngiu!".

Qajair Bob byy siu' duer lecc jyr. Ix kir jyr jit hxang pnaiw dairjir: taux kanx langg' ee ciax, qongzinn qra jurqiw dah juerhuan ee hyrtauu, hro og laii huat ix. Ix jinjniar ee iongrir si beh uac lyc laii, byy air cniurr a'hniax anne byy mia.

Ixsiong, si guaw iycsniu ee. Guaw qinvunw byy huatdo jingwkag jaix Bob ee simsu. Dairsingx, cingcunqii ee ginxaw siongrr byy air hro langg' jaix ix ee susu, byy iong'i qongw cud simlairsu, qyckacc benw qongw si qongw hro cnihun ee isux tniax! Dyrr sngr Bob guanrir/ erdangr qongw cud cuir, mrqycc ix duiww dairjir surhang ee zinrbad naxx bongbu lehh, marr jin' yh qongw cringx. Singlenlangg dairvorhun ee sukyw linglik si amwiwsig jinwhingg, iuwdongg/ cingcunqii ee ginxaw laii qongw, cavutdyx soxu ee simdir uahdang longxx sriok amwiwsig. Inx iong biser ee iwsig qamxsiu/ jyr quatding/ hingdong. Diyhh ui' inx ee hing'uii cue cud jinsiongr. Gunw jingsinkyx isux duiww jiaxee tuilun jinrliong jiapqin sursit, si gunw ithiongr ee hunwlen.

Gunw ui' jiaxee tuilun quilap cud, ham' siaog bunrdee iuxquanx ee "haidongg singdiongw huat'iok dingrlut", ginxaw jurr sewhanr knuar/ tniax verbuw ee og, jin' u kyxlingg gorqaiw henrjong, siongsinr jurqiw marr si og :ee.

Dyrr si jin' u diwhui/ simlingg siongrr anding ee langg duw diyc siaa, ongxongw marr e m jaix zuhyy vran kacc hyw. Jit xee sunjinx-busiaa ee haidongg binrduir siongrr air/ siongrr ilai ee langg soxx junjai ee dua og, qaix zuhyy neh? Qycc oklangg qirjuat zinrcyr/ qra jursinx ee og sag hro langg', bogquair ginxaw e hin jurqiw, Bob itdit kangr piw-aw dyrr byy qiquair or!

Qoxquair/ vnertair verbuw cri duarhanr "virr zinrding vnerlangg" ee Bob, m si vne qaxx byy iyc rix, jex si dysor jygu qangkuanw ee ginxaw, hro gunw anwsngr e diyc ee huanxingr. Suibongw Bob virr zinrding dirr mow quaw hongbin u bunrdee, mrqycc jingxqyy surqnia ee og, m si Bob, si lingrgua ee langg. Jex si uirsniaxmic vyxho Bob dang quer dirliauu. Jinjniar ee dirliauu quewdingg, ongxongw diyhh qra byy hac henrsit ee jurgnow hingsiong kiuw jniar quer laii, si rair jin' dngqii ee siqanx, m si hiacc qanxdanx neh!

Jitmaw, binrduir jinjniar bunrdee : "virr zinding vnerlangg" ee verbuw. zinrding inx si u vne ee langg jiacc si jingwkag ee/ si inx su'iaur dirliauu, kiokk benw knuar isux, si uirsniaxmic?

U jit diamw, kyxlingg si siongrr bu'nai ee : inx byy guanrir. Beh jiapsiu dirliauu diyh'air jurqiw guanrir/ jiwjiyw rair u mow quaw tingdo ee iwguan, jiacc e singlip. Qycc diyhh kyxlu si m si u jitt xee vit'iaur jyr jendee/ mow jiongw tingdo singzin jurqiw byy uanbiw. Jerje jingsinn vnerhuan, dirr jingsinn isux kuanr .laii, diyhh sui' jiapsiu dirliauu, inx vunxsinx kiokk zinruii byy vit'iaur. Jiaxee qirjuat jingsinn dirliauu ee langg m si juann longxx si oklangg, sursit-siong duardysor longxx byy sngr og, mrqycc qirjuat jingsinn dirliauu ee langg ham' siongrr og ee okmoo si sriok qang lui.

Bob ee verbuw jerje hunziah henxsi, qirjuat jiapsiu guaw soxx teqiong qokk luirhingg ee jingsinn dirliauu. Inx duiww Stewart ee jursad, byy jit sxix-aw ee juerokqamw. Guaw amwsi inx, haghau iauqiuu Bob diyhh cue isux/ suanw singwdanr lexmic ee pnuawduanrlik u damrvyc bunrdee sii, inx dig'ir ee simtair/ gneraur/ uirr jurqiw venrho. Guaw iwsig diyc inx m si jinsimx sniu beh jiauwqor Bob. Hro Bob qiawduar vadd xui ee sniurhuad, duiww inx laii qongw, si amwsi/ puepingg inx jyr verbuw ee linglik. Inx m na byy singzin jurqiw ee kiamwsid, dendyww jiyh "siongrvanx" ee lixiuu beh amr .quer.

Vunxlaii guaw jerjiyw ersaih teqiong jit quaw dirliauu --- zuqyw qandna' inx kyxlingg qirjuat, anne ee lixiuu iauxx byy qraur cionghun --- jiwjiyw iwdoo jo inx, diyh'air u kacc je ee liongrqaiw/ linbinw ee simjingg/ simtair, lixiuu marr iauxx byy qraur. Lingrgua jit bin, guaw marr huathen, zuqyw inx guanrir jiapsiu jingsinn dirliauu, jiurr inx ee vnerhongw laii knuar, qetqyw jin' kyxlingg si byy iuxhau ee vanrhuad, jiongbuew si e sitvai ee.

U SNUAWSYH DYRR HYW VRAN

Qongw .laii kyxog, kiokk si sursit : siongrr qenrkongx ee langg --- siongrr singsit/ sukyw mosid siongrr byy sriu niuxkiog ee langg --- siongrr iong'i jiapsiu jingsinn dirliauu/ siongrr u kyxlingg did diyc lirig. Zuxx giamdiong ee vnerhuan --- zuxx byy singsit binrduir jursinx hing'uii/ sukyw, zuxx niuxkiog ee langg --- jingsinkyx isux duiww inx ee vangjan, zuxx lann ingwhau. Itdanr vnerlangg qui' taukag ee penqenr/ vehcat qui' tolaku, kiongqniax qiur be uac ar!

Jinxliauu isux ongxongw jiong' jitt lui vnerlangg ee jingsinn vnerliw hyrjyr "cywvai (Overwhelming)". Dyrr si qongw, gunw duiww iwdoo ham' jiaxee langg qenwlip cinbit ee jingsinn dirliauu quanhe quewdingg, soxx kantuax cud hnuaidit hogjap qaujid ee vehcat/ huex qyqyy qongw be cringx ee dongrqix/ uaikiog gnerauw ee gixgenn, qamxqag jin' cywvai. Jinxduan isux m na byy hxuad jingxqiur vnerlangg, dendyww kyxlingg hamrzip lorqobuaii/ jursinx lann vryw. Gunw ee lat qrngx be kiw laii jitt xee dang dnar --- ganxqair byy qraur kuacbin/ byy hxuad jit ganw dyrr knuar tangr uankiaux cim'uanw hitt xee qintauu/ vakdngg sniu' ec, berdangr iong aiwsimx huawqaiw venrlangg ee hin. guaw qamxqag hro Bob verbuw ee vnertair pacvai! Vutjiw inx kyxlingg qirjuat guaw soxx teqiong ee hiabjo, marr jin' liauxqaiw jurqiw ee linglik byy qraur/ byy huatdo hro dirliauu haurqyw henr cud.

Iauxx u jit xee guan'inx guaw byy air cir, guaw dyrr si byy qac'ir inx/ inx hro guaw huanxqamw. Isux jiapsiu jingsinn vnerlangg , siongrjiyw diyhh duiww inx u jit sxix aw hyxqamw/ damrvyc dongjingg inx ee kunwqingw/ duiww inx ee jygu py diyc jit sud aw ee zinrdongg simtair/ duiww inx ee zinqeh u mow jiongw tingdo ee jundiong/ qitai inx huathuix zinsingr ee amwlat. Inx hro guaw longxx byy jiaxee qamxsiu. Guaw byy huatdo siongxsiong inx ham' guaw bin duiww bin jre, quanwjur simlik duiww inx huwcud quanhuaii ee jinghingg. Guaw m na jyr be qraur/ simrjiww byy huatdo ham' inx kia jywhuew. Inx ee cuthen, hro guaw sanxsingx jit qxow lacsab byy cingkir ee qamxqag/ guaw siongrhyw ui' vanrqongsig sui' siausid, jit kig dyrr byy air lauu lyc laii. Guaw e ham' gauw zinruii vnerjingg juadbang ee vnerlangg jywhuew loxlik, hibang kyxlingg si jurqiw jinxduan cywgo. Zuqyw m si, guaw marr ersaih ui' qidiongx caixcuw diyc qinggiam, hagsip guaw soxx byy :ee, mrqycc jex byy sik'iong dirr Bob verbuw srinx-siong. M na inx qirjuat guaw ee dirliauu, guaw marr qirjuat dirliauu inx.

Si'angw ersaih byy jxingg tihh? Jingsinkyx isux duiww vnerlangg sanxsingx ee qamxjingg hyrjyr "huanxjuanxii jok'iong (Countertransference)"--- ersaih vnuax cud zinlui itcer ee qamxjingg, ui' siongrr air qaur siongrr hin, busow-vutvaux. Jitt lui ee ceh be jiyw, jitt xee jok'iong duiww jinxliauu quanhe ee qenwlip m si dua hyw, dyrr si dua baiw. Narr qongxx isux ee qamxjingg viauxdat byy sikdongx, e jiong' huerjinw quewdingg uanjuann niuxkiog/ hamrzip hunwluan/ tutcuee. Narr si unriong hyxser, si liauxqaiw vnerlangg siongrr u hau ee qangqu.

Venrzin huanxjuanxii jok'iong si m si u qraur hyxser, si jingsinn isux siongrr qanlann ee zimrbu. Uirr sidhen jitt hxang, isux diyhh qewsiok vutduan jurgnow hunsig/ hunsig vnerlangg/ u jikzim jurgnow dirliauu/ qra vnerlangg juanxcud qitnax kacc erdangr kecquanx binrduir jitt xee qywanr ee isux.

"Huanxqamw (Revulsion)" ongxongw si qenrkongjiaw duiww oklangg ee qamxsiu. Duw diyc dua qanx dua og ee langg, huanxqamw cavutdyx suisii e voghuad ; binrduir siyw og siyw qanx :ee, kyxlingg duer diyc ham' okjiaw ee quanhe jiamrr jingqax/ zuxx qax zuxx cimx.

"huanxqamw" duiww isux laii qongw, kyxlingg jin' hyw iong, ersaih si jiapqin uanbiw ee jinxduan qangqu --- viw qitnax ee qangqu kacc jinsit/ jin' qinw henxsi cud isux bogjingg ham' oklangg duiwlip, si jit qix lrai dyx, diyhh jin' sewzi iong. Isux ee huanxqamw narr si jurqiw ee simvne, diyh'air u qraur kiamsun, huanxsingw quanjiaur jursinx ee bunrdee, narr byy, itcer ee sionghai longxx kyxlingg huatsingx.

Zuhyy jiong' huanxqamw huawjyr qenrkongx/ jniawbin ee ingwhau? Uirsniaxmic duiww qamxjingg qenrjuann ee simliw isux , huanxqamw si jit jiongw sikdongx ee huanxjuanxii jok'iong? Huanxqamw si zinlui binrlimm tyxiar og ee dairjir sii, inxhuad sniu beh sui' dypiah ee qionglet simjniaa. "jauw naxx vuex" si qenrkongjiaw dirr itvnuax jinghongw ha, binrduir oklangg siongrr sikdongx ee huanxingr! Siaog guihiamw jerje, suxx langg huanxqamw. Jimr dirr siaog sniu' quw, jin' qanxdanx dyrr qra jit xee langg huixbet. Duhuix huisiongg cingcyw jurqiw ee hing'uii/ cuxqingw, narr byy, siamxpiah/ cangwbih kiw laii si siongrr hyw ee duiwcig. "huanxqamw huanxjuanxii jok'iong (Revulsion countertransference)" kyxlingg laii jurr didqag/ vunxlingg, marr ersaih qongxx si siongrder unsur zinlui benw jurqiw hai qaqi ee coqii radar qingxqyr hertongw.

Suibongw jerje juangiap ee ceh, duiww huanxjuanxii jok'iong ee juxdee damlun be jiyw, kiokk byy huanxqamw huanxjuanxii jok'iong ee biyue. U quiw diamw guan'inx erdangr qaixsueh : derr id, jex ham' siaog ee quanhe, m si poxtongx dai, cavutdyx byy huatdo qandna' qongw jit hxang lixiuu dyrr e cingcyw., itding u derr zi, snax..,, derr zi, "siaog" virr jingsinn dirliauu genxqiur knuawjyr bingxsiur, beh jinxduan ciangjai cue byy mngg zip kir, digding ee huanxjuanxii jok'iong marr byy lergua. Derr snax, jingsinn isux kacc je si juvi/ linbinxsimx, narr viauxhen jiacc qiglet ee huwbin huanxingr, ongxongw e sngxhai jurgnow hingsiong. Derr sir, jitt jiongw qionglet ee huwbin huanxingr, jingsinn isux e piacbenw ham' siaog ee vnerhuan qenwlip dngquw ee quanhe. Siongrbuew, qik jiyw ee oklangg guanrir jiapsiu jingsinn dirliauu/ duhuix jinghongw digvet, narr byy, inx qamguan sniu jin vanrhuad dysiamw jitt jiongw "diamxqngx simlingg (Light-shedding)" ee dirliauu quewdingg. Dyrr anne, isux itdit jin' lann u ciongjiog ee siqanx ham' oklangg qiongrdongg tamwtyw inx ee huanxingr/ quanjiaur vunxsinx ee huanxingr.

Siaog ciangjai hro langg sanxsingx jit jiongw huanxingr : gignaiw. Bad u jit xui luxjuw biysut duw diyc oklangg ee qamxqag "hionghiongg guaw naxx sitkir sukyw linglik." binrduir siaog dyrr e sanxsingx jitt jiongw cnigii. Oklangg jurkix kizinn; venjy jit renn quer jit renn jurkix ee vehcat, jit bin kipenr tnazinn. Jinxliauu isux ee gibun narr si vnerlangg soxx inxkiw, diyh'air jitgii si m si vunxsinx srid qakcad inxcud ee, marr itding rair mng "kyxlingg vnerlangg jyr liauw sniaw, hro guaw gignaiw?" derr sir jniux ee qywanr, si byy sukyw diyc jitt xee bunrdee, hro guaw quixarr qywguec itdit byy jinwdo.

Huanxqamw huanxjuanxii jok'iong si binrduir oklangg ee sikdongx huanxingr --- simrjiww piacbebw jurqiw hai qaqi ee huanxingr. Ui'id ee lergua si, jinxliauu isux dirr dongwcaa gignaiw, duiww soxx kiax ee henrhongw jin' u vaxag, u linglik qra huanxqamw huanxjuanxii jok'ing kngr jit vnix, jiacc erdangr quatding ham' oklangg qenwlip jinliauu quanhe. Rix hyw oklangg ee iwjir, juadduir m si cniu canngix diamw juiw hiacc kinsangx/ qanxdanx, diyh'air u jin' dua ee jingsinn/ simlingg ligliong.

Jinxliausux erdangr juanlik huwcud, m na si oklangg hro langg qniax, marr dongjingg inx; inx dngqii byy guanrir viauxtair/ byy air tniax liongdix ee koxkngr, inx si siongrr qniax langg ee zinlui/ uanjuann sing'uac dirr qniahniaa nirr. Qinvunw byy su'iaur qra oklangg pah zip dergak, inx ixqingx qra jurqiw kngr dirr lenrgak lai ar!

M na uirr siarhue, marr uirr liauw oklangg, isux ingwqaix jin soxu linglik jo oklangg tuatli zinqanx lenrgak. Vutqyr qaur dnaxx lanw duiww og ee vunxjid liauxqaiw iuxhan, iauxx bue huathen siaog si jit jiongw digvet qiquair ee vne, qycc kiamr jinxduan ee qikiauw, hro og amwkamr henr be cud laii. Jitt vunw ceh ee jongjiw beh siongser suecbingg , siaog ersaih virr dingrgi jyr moxjiongw simliw vne ee digding hingsid, lanw jiwjiyw qaix cniurr quanjur qitnax diongrdua ee jingsinvne qangrkuanw, iong kyhak ee taiwdo tamwtyw siaog.

Itvnuax jinghongw ha, iongxqamw jinwzip how-siu si habjingg-habliw /daddid cir ee, zuqyw lanw erdangr qra og kuanwjyr jit jiongw vne, m quanw si hiacc guihiamw, oklangg ee jinghongw ersaih dongjingg tihh, liauxqaiw itcer inwtin ee honghuad, qenwlip dirliauu quanhe, lanw ingwqaix qinxsin junxjad ee juvisimx huawqaiw huanxqamw.

Qingquer zi-jap dxangx, qycc hueqor Bob/ ix ee verbuw ee qywanr, guaw byy zinruii luixjig je nii laii ee limcngg qinggiam, cuxliw ee hongsid e u zuarr dua ee qaixvenr. Iuguann zinruii, qra Bob dui' ix verbuw ee sinvnix qiur cud laii si siongrr dairsingx rair jyr :ee. Guaw iauxx si iong dongsii qangrkuanw ee sewsiogquann (Temporal Power) uansingg jitt hxang zimrbu. Zi-jap nii laii, druu liauw guansiw lat ji' gua, si m si iauxx u qitnax surbut erdangr jin' qinw duiww oklangg huathuix ingxhiongxlat, guaw byy sinx huathen. Byy lun si kuaniongg duiwtai/ caixcuw zimrhyy guaw soxx sigsai ee jongqaur hingsid, oklangg itqair byy be cab langg--- jiwjiyw dexqii si anne. U jit diamw ham' zi-jap nii jingg byy qang : dnaxx guaw jaix Bob ee verbuw si oklangg --- hitt sii guaw m jaix, qamxqag inx ee og, kiokk qongw be cud hex si sniaw. Guaw ee jixdy isux byy hxuad hiabjo guaw zinrcingx guaw soxx binrlimm ee jinghongw ; in'ui "og" byy junjai hitt sii ee juangiap suxiong gixsuu nirr; qongxx gunw si kyhagqax, m si tuanqauwsu, vut'ingwqaix iong jitt jiongw gixsuu laii sukyw.

Huerjinw Bob ee verbuw sii, guaw juanzenn m jaix ham' jurqiw jyr duiwtauu/ ciaucig ee, si dycc jiongw lat. Guaw tyxiar/ jit diamw aw dy' byy hnowhenn/ byy sniu beh ham' inx qaucab, m na qingwdiong jitt xee lat/ qyckacc si cniqniax --- qongw be cud ee qniahniaa. Jitmaw marr si e qniax, byy qycc si naxx cnemee ee qniax ar. Jaix jitt xee lat ee miacingx "og" au, kacc u huatdo jiangxag jing'au ee snuawsyh. Qenqor jurqiw ee kiarkadiamw, u qraur lat singsiu duiww og vunxjid ee hnowhenn; gauw dnax e kiw ham' oklangg qaucab ee hiyrqyw. Zuqyw guaw u qihue, dirr hro Bob singqongx cencud ix verbuw ee cur ixau, guaw e iong jin' hamhoo ee uergiw/ nngxser / qanwjiab qra inx qongw, virr huixbet lat huwsinx ee langg vutjiw si Bob, inx jurqiw marr qangrkuanw u huixbet lat dirr inx ee srinx-siong. Narr si siqanx /jingsinn u qraur, guaw e tecud qenwgi, ham' inx jywhuew habjog, iwdoo pah vai hitt qrow lat. Jixiaur inx dong'ir, guaw dyrr e kaisiw jinwhingg --- m si jitmaw guaw duiww inx u kacc hyxqamw/ m si guaw u jabjiog ee vaxag qra inx rix hyw --- si guaw jaix "og" ee miaa au, guaw venr qaxx qenqiongg, erdangr qenqor hagsip/ cir knuar mai ee simtair dauzip, dirr gunw soxx jaix ee lingxhik, juanlat jinwqongx, si berdangr tuisag ee jikzim, jex si guaw ham' ixjaw soxx byy qang ee jywhuad/ sniurhuad.

JUE M SI OG

Uirr beh kacc tetdew liauxqaiw Bob ee verbuw/ jitt lui ee langg (derr snax jniux e siongser tyxlun), dairsingx rair kuvet "og"/ itvnuax ee "jue (Sin)". Vunxjid-siong, oklangg ee digdingx m si inx ee jue, si inx gongrduc/ hnuaivar/ sniu jin itcer huanrjue/ soxx huan :ee u itdiwsingr. U jue m si oklangg juxiaur ee kiamwdiamw, quanqenr dirr inx qirjuat singzin jurqiw u jue.

Bob ee verbuw ham' xe jit jniux soxx biyue ee zinbut, druu liauw "og" ixgua, ham' itvnuax langg byy cavet. Inx druar dirr sniaci, byy li qrunn/ u hyxgiac, u sanr/ kyxlingg sriu quer qauwiok, marr kyxlingg m bad zri/ jiyw inxkiw langg ee juwbak/ inx m si "virr jixding ee juerhuan (Designated Criminals)", dendyww si "kax dac sidde ee qongbinn", vixzuu: juxzidyc ee laursux/ qingxcad/ginghangqax/ qadniuw qauwsu lenhabhue ee uahngiaw hunrjuw.

Jnuaxngiu kyxlingg? Qiwzenn inx longxx si juerzinn, jnuaxngiu kyxlingg m si virr jixding ee juerhuan? Quanqenr dirr "jixding". Inx si dirr sniwmia/ uahlat hongbin huanrjue (Crimes) ee juerhuan. Duliauw qik jiyxsor vaiduu itvnuax hanrjer, cruw diyc qik dua jingwdi kuanlat ee oklangg (cniurr A.Hitler) ji' gua, qitnax ee juerzinn jongxsi simqix dang/ amwbih/ taux taux aw jyr, berdangr bingkag jixmiaa qongw inx si "huatding ee juerhuan". Hiqew/ cangwbih/ ziamuaa...dringw lunrdee, qowsingg jurkix kizinn ee qicow, e dirr jitt vunw ceh nirr itjair tyxlun.

Guaw bad dauzip jerje siqanx huxdy qnax nirr huatding juerhuan. Inx cavutdyx m bad hro guaw qamxsiu diyc si "oklangg", suibongw itjair dionghok ee pywhairlat/ huixbedsingr, mrqycc jitt jiongw pywhai hing'uii qamm u moxjiongw diauqangx luanrbuw ee iwbi. Qycc laii, inx binrduir juxquanw qiquanx sii, ongxongw qirjuat singdamx jyr pnaiw dai qaix pnai ee hingsu jikzim, jongxsi qeqiamw iauxx sngr duiww jurqiw ee okhingg tanxvec. inx jurzin si "singsit ee juerhuan" jiacc hro langg liac diyc/ jinjniar ee oklangg jongxsi siauiauu longx-aw gua. Henxzenn si qongw qaqi ee hyxue, mrqycc marr u damrvyc hac sursit byy lipow.

Zip kir dirr qnax nirr :ee, ongxongw virr anvaii jiapsiu viaujunw hingsid ee jingsinn jinxduan, huanruii vauhamm banrsiong. Guarhanglangg ee qongxhuad, si jiamduir siauxqongg/ ciongdong/ ziaxkangx/ byy liamtiw ee digjid, jinwhingg jinxduan. Bob verbuw ... jitt luirhingg ee langg, byy jiaxee binghenw kiamwdiamw, marr m bad binghenw lag zip itvnuax jingsinvne ee qu hingsid lai, jex juadduir m si oklangg ee simliw qenrkongx, si jingsinn ihagqair iauxx bue lyc jitt xee vne ee dingrgi.

Guaw qra oklangg/ itvnuax juerhuan ee cavet kuhunx, dingxii si rue cud oklangg ee zinqeh digdingx. Ngua jit qxuer qongw, og su langg langg longxx jyr quer, okhingg be hro oklangg jniajyr og.

Siongrr kuacbin "u jue (Sinning)" ee dingrgi si sitvai. Viauxsi muixx jit crur jixiaur byy pah diyc bogviaux, lanw dyrr u jue! Soxui ee u jue, si byy huatdo qewsiok vutduan cud lat, drat qaur jinrsen-jinrbiw ee qingxqair! Lanw longxx jyr be qaur jitt xee dervo, soxiw juann si juerzinn. Langg ciangjai jyr dairjir byy qraur jin lat, muixx jit vaiw byy jin juanlik, dyrr sngr sitvai, dy' u jue --- suibongw byy dac diyc huatlut qaiwsnuar, qongxx si uivue siongrder ee jixir/ crig diyc cuwvnix/ vuervuan jurqiw, jex longxx sngr u jue.

Benw uiwqongw, juerhingg u kinx/ dang. Narr iong juerhingg ee giamdiong tingdo laii sukyw jue/ og, si byy jingwkag. Penr hyxgiac :ee viw penr sanr :ee kacc byy tyxiar, jongw si kipenr hing'uii. Huatlut-siong, sionggiap jawkix/ jyr qexsiaur/ dyy suer/ lrau suer/ kyxcir taux knuar ; angx dirr guarkauw taux jiac, kiokk qra bow qongw qongsix qavanx/ bow denrue qongw sniu' quw, be hur kir sexsnadiamr tec angx ee sxnax...dringw hing'uii, soxx kansiap diyc vehcat/ vuervuan, berdangr itlut dongwjyr siy' qang knuaxtai. Qokk xui kyxlingg juewqin hing'uii longxx jin' qinxsin, dagg vo longxx jinsimx duiwtai, byy dag diyc jiaxee hing'uii, anne, mng liw jurqiw si m si jerjiyw qeqiamw bad penr quer qaqi? Iacc si vuervuan qaqi? --- uanjuann singsit binrduir jurqiw, liw e huathen liw u jue. Narr byy jue, viauxsi liw byy duiww jurqiw singsit ; binrduir jurqiw byy singsit, vunxsinx dyrr si jit jiongw jue. Lanw longxx si juerzinn!

Zuqyw berdangr iong hing'uii ee habhuat/ byy habhuat/ kinx jue /dang jue laii qaiwding oklangg, anne qaix zuhyy lyc "oklangg" ee dingrgi? Jitt xee dingrgi dirr oklangg "je vaiw/ quanwsiwsingr " juerhingg --- oklangg ee huixbet hing'uii jin' pnaiw liac, kiokk digvet itdir. Jex si "liqingx-vuanrdy" ee langg, quat'ir qirjuat zimxsiu jurqiw juerog cimx/ dang ee qamxqag.

Guaw bad jriw cud, George qamxsiu juerokqamw, dirr oklangg ee vnuawlo uat tauu. Jex si ix guanrir --- jiwjiyw ix u jit diamw aw qamxqag --- texhue jurqiw u jue, zimxnai be diauu jurqiw u jue ee qamxsiu, ham' xmoo qraiw iog. Narr qongxx ham' qxuiw ciamx iog ee George longxx byy juerokqamw, anne dyrdig qewsiok dimlunn. Langg qakgno jurqiw u jue, piacbenw luirsu dyrdig songwsid. Guaw ham' Waldener habsiaw "zuhyy huevyr? (What Return Can I Make?)" ee jit dnxua :

Iasox qawsi jiongwlangg damlun "hog"--- kiamsun ee langg u hog ar! Jitt qxur ue u sniaw iwsur?.... kiamvix singzin jurqiw u jue u sniaw liauxvutkiw? Sniu dngw laii qexsen ee Pharisee, kyxlingg e qraiw liw ee gibun. Jiaxee langg longxx si Iasox sidai u jnii u srer :ee, inx ganw-diongx byy langg' junjai, jurzin bad itcer surbut ee jinsiongr, zinrding jyr Jerusalem/ Pakistan ee lingxsiur, juadduir byy bunrdee. Dyrr si jiaxee langg mosad Iasox.

Qowkiamx ee langg byy jyr og, og marr be qangwlimm dirr kiamvix/ huanxsingw vunxsinx hing'uii dongrqix/ damsimx vuervuan jurqiw ee srinx-siong. Sewsiok ee oksiong si hiaxee jurdai hongsinn/ henrdai juxgirjiaw/ jurzin qaqi longxx driyc ee langg, inx byy air hamrzip jursingw ee tongkow vut'anx ee cimknex.

Bingvik jurqiw u jue e qankow, jitt jiongw qamxsiu hro langg piacbenw jyr pnaiw/ be jyr dua og. U sii lanbenw sriu kow tuabuaa, mrqycc si dua hokkir! Zinrjue si ui'id iuxhau hongjiw langg kinghiongr og ee vyxsinhuu. Teresa siuluw anne qongw " zuqyw liw guanrir simkuir vingjing laii zimxsiu kow ee kyxgiam, anne liw si hro Iasox qidog u jit xui hixlok soxjai ee langg."

Oklangg be simvingg-kiwhyy zimxsiu qankow ee ciwgiam. Sursit-siong, inx lenrr ziamw dy' byy air. Ui' Bob verbuw ee srinx-siong, guaw caqag be cud jit sxix aw jurjig ee taiwdo. Dng' oksingr kia kiw, inx tongx be quer kyxgiam.

BYY JUE SIAWBENW

Zinsingr ee og, je jiongw dyngiu, gorhuex-jabsig. Zinlui m guanrir zimxsiu singzin jurqiw u jue ee kow, oklangg jniajyr jue ee "hokkiwde". Qinqir guaw ee qinggiam, tamsimx m jaix buanxjiog si oklangg siongrr henxbingg ee digdingx. Inx sidjai jin' jenrqutsiongr --- jen qaur jautad/ nihsiw jurqiw ee tenhur. "simlingg derdoo" jriw cud, vindnua si siongrr qivunw ee guanjue. Dirr jitt vunw ceh nirr guaw beh qex jit hxang --- gnorban marr si guanjue ji' id, cimsinr jurqiw byy jue :ee, byy jue tangx "siar". Ue qongw dngw laii, dycc jit jiongw jue siongrr dang? Jex u jin' dua ee tyxlun kongqanx. M quanw zuhyy, soxu ee jue itlut vuanrlii liauw sinn/ banrbut sniwmia.

Jauxcue tewsixquiw si oklangg siongrr cnixbak og ee hing'uii. Inx ee simqnuadew byy iong'unw vadd langg qoxbuw inx jyr qanlann ee kangkuer, qniax byy binrjuw, suar lyc laii, inx diyhh dua lat qongqig jikvi inx ee langg/ simrjiww hisingx vadd langg vyxjunn jurgnow hingsiong. Qongw jit xee qanxdanx ee le, lak huer javox ginxaw mng vaxvah " dadi, liw uirsniaw qiyr guarmaw "jenrzinn?" vaxvah dua sniax huah "guaw qra liw qongw quer, liw siongrr hyw mair laii huann guaw, qiwzenn liw laii cue guaw, guaw jitmaw dyrr beh hyw hyw qawsi liw, knuar liw qycc qnaw qongw lacsap'ue! Guaw beh iong sapbunn qra liw cuir hyw hyw sew hro cingkir, hro liw jaix, langg' qiyr liw cuir hap kiw laii, bersaih qongw lacsap'ue, liw narr m tniax, dyrr rair qawsi liw!" vaxvah sunrciuw qra tuax kir igqingx, buxlang jit dniuu, jiyh "sikdongx quanxqar" ee miagi jyr og.

Jingsinn isux soxui dausia qijer, hro tewsixquiw ee hing'uii huathuix jok'iong, jex si oklangg qionglet zinrding jurqiw jiacc si driyc :ee. Inx narr u ham' siarhue sanxsingx ciongtut, benw vutliauw qra itcer quijue siarhue. Inx itding byy singzin jurqiw ee og, vitding knuar vadd langg si og, qra jurqiw ee og qax hro langg, jurlaii dy' be sniu diyc vunxsinx ee og. Jitt xee vaxvah caqag qniaw ee vutqingr/ qongw lacsap'ue, dyrr caixcuw hingdong, beh qra ginxaw ee "lacsab" saur cingkir. Mrqycc liw/guaw longxx jaix, qisit si jitt xee vaxvah vutqingr/lacsab, ix qra jursinx ee og dausia dirr ginxaw srinx-siong, jiyh jin vaxvah jikzin e miagi, bulang qniaw.

Uirr beh cue langg dnax jue, ciangjai e apjer langg, og ee hing'uii dyrr cuthen.virr guaw dah "oklangg" viauhy ee langg , dyrr si sibquanr cue langg jre jue. "simlingg derdoo" nirr, guaw qra siaog dingrgi jyr "unriong itcer ingxhiongxlat --- piacbenw uirr ju'iongw vadd langg ee simlingg singdiongw laii kokciong jurgnow ee hing'uii." ngua ue qongw, binrduir jurqiw ee cywgo, oklangg m na byy beh jurgnow huanxsingw, dendyww qongqig langg'. Narr si simlingg singdiongw, diyhh "langg' u singdiongw ee vit'iaur"sanxsingx zinrdongg. Zuqyw langg' byy hxuad zinrdongg, duliauw siauduu jurqiw byy uanbiw ee jingwqir gua, byy vadd jiongw suanxdik.

Qongw laii qiquair, oklangg ciangjai u huixbedsingr, vutduan sniu beh jiong' og huiw driau. Bunrdee si, inx qra og he m driyc xui --- inx byy hxuad huixbet langg', dendyww e siysiw jurqiw. Sniwmiarlat sisiongg e hro inx uanbiw ee jurgnow hingsiong jyrsingg uihiap, inx ongxongw jiyh jingwgi ee miagi, jin soxu hin, bedbyy hitt qrow sniwmiarlat. Qamxx qongw jitt jiongw cywgo si inx hin sniwmia? Si inx byy hin jurqiw simqnuadew siaog ee hitt vorhun. Guaw huaigii, Bob verbuw diauqangx beh hro Steward/ iacc si Bob siw. Zuqyw guaw duiww inx cionghunx liauxqaiw, kyxlingg e huathen, inx ee mosad hing'uii uanjuann si qigtauu jurgnow vyxho; si sibquanwsingr ee hisingx vadd langg, hro jurqiw uac lyc laii.

Hin qaqi ee langg si byy hxuad hixlok binrduir jurqiw, siurkir jurqiw marr si oklangg cue langg cutjue ee qinguann. Hin qaqi ee kixinx si sniaw? Guaw siongsinr guan'inx m si songwsid tenliongg. Jingsinkyx isux jiong' busor qnuaix dirr qnax nirr/ qnaqak gua, liongsimx bedbyy/ciaugnow songwsid ee langg, hyrjyr jingsinn huanrjiaw/ siarhue vnerhuan, inx huanrjue, juanzenn byy sanxsingx zimrhyy juerokqamw, qycc suwsiongg byy qor hiyrqyw quwjai jurqiw huanrjue. Inx ee juerhingg byy itding e mosid, m si qandna' hanrding cue langg cutjue ziiw! Inx marr byy zinruii dairjir dua diauu, jingsinn vnerhuan naxjunxx m jaix tangx qenwsiaur, jit diamw aw dy' be uirr zimrhyy juerhingg damsimx/ kunwziauw. Dirr lairlii'aw/ siauiauu "qnax" gua, inx qangrkuanw hnuahiw. Inx kaksit iwdoo amkamr huanrjue, mrqycc inx ee iwdoo byy jin' cingcyw ; sinn byy jai qingx/ sniaw longxx byy iauwqinw ; qewue lilixlaklag. Jiaxee langg tongsiongg virr hyrjyr "dyrdig vehcix", duiww jurqiw ee juerhingg naxjunxx uanjuann byy qamxqag/ byy kunwziaw/ byy iusimx.

Jingsinn huanrjiaw/ siarhue vnerhuan m si guaw soxx jriw ee juerzinn. Soxui oklangg si hiaxee uirr juansimx-juan'ir vyxho uanbiw jurgnow siu'iongw, jit kig byy tingg itdit daujur simlik uiho dyrdig uanbiw qew bin ee jit qrunn. Inx qandna' damsimx dyrdig hingsiong, duiww siarhue quihuan/ vadd langg duiww inx ee knuawhuad, vyxcii jin' quann ee binxqamxdo. Jiaxee langg cniurr Bob ee verbuw qangrkuanw, cingrcah texbin/ siongrvanx junxsii/ be jauw suer, jin' lann ui' viauxbin ee jywlangg/ jyr dairjir knuar diyc inx kiamwsid.

"hingsiong/ viauxbin/ viauxsiong" si liauxqaiw oklangg pinxhing berdangr kiamr ee iongrsuu. M quanw inx kiamr jyr hyw langg ee tuisaklik, kiokk juanlik sniu beh viauxhen cud senrliongg ee hxingg --- juann si guirjongx/ qexsenx, sursit-siong, qandna' hiqew/ kipenr/ vehcat. Jex dyrr si qongw inx si "jurkix-kizinn" ee guan'inx!

Qongw inx diauqangx venx vehcat penr langg', kacc cingcyw ee qongxhuad si penr jurqiw --- inx byy hxuad zimxsiu/ marr byy guanrir zimxsiu jikvi jurqiw ee tongwkow. Duiwtai langg/ jyr dairjir uicii itding ee quiqiw, si inx iong laii huanxngiar jurqiw si qongvnee/ jingwgi huawsinx ee jit bin qniar! Narr qongxx oklangg byy vren sirhuix-dyric-cyr, inx qinvunw dyrr byy su'iaur jurkix? Qaqi jaix vunxsinx ee vutgi hing'uii, jiacc e iwdoo buah hunw cad vec. Erdangr anne qongw, inx muapenr hing'uii iong dirr mow quaw qivunw hingsid ee liongdix/ duw diyc dairjir narr zinrding u vit'iaur ziakamr, penwsut dyrr cud jiaux.

Dirr jiax cuthen liauw maudunw. Guaw bad viauxsi, oklangg jurzin uanbiw byy kiamwdiamw, guaw marr siongsinr inx byy itding e hiyxzin vunxsinx siaog ee vunxjid. Sursit-siong, inx si u jitt xee texzin, jiacc e jin juanlik sniu beh dypiah binrduir jurqiw. Siaog ee vit'iaur guansor si byy guanrir zimxsiu juerokqamw/ byy uanbiw ee qamxqag, m si songwsid juerokqamw/ byy texhue cud jurqiw ee byy uanbiw. Oklangg bad caqag vunxsinx ee og, jiacc diyhqip beh dypiah jitt hxang zinrdix, inx byy cniurr jingsinn huanrjiaw hnuahiw binrduir jursinx dyrdig ee vutjiog, inx si dirr iwsig cingcniw ha, vutduan vniawmia sauwduu siaog ee juerjingr. Bob ee verbuw iwdoo hro muixx jit hxang dairjir hablixhuar, narr m si hro guaw liacpuar, ersaih qongw si amx qaxx bat ~ ~, longxx byy pang neh! Bunrdee m si inx byy liongdix, si inx qirjuat singzin liongdix. Langg in'ui iwdoo muakamr/ amwho/ dypiah jinsiongr, venr qaxx siaog. Oklangg marr m si didjiap qniaa og, si inx caixiong uankiaux qanwjiap ee hongsid, ziakamr taujingg bin amwho ha, dirr aurviah bin taux taux jinwhingg. Og ee guantauu m si byy jue, si kaisiw sniu beh dypiah jurqiw u jue.

Oklangg ciangjai ixx guirjongx ee binrmau qnir langg. Inx iwdoo amcangr juerhingg/ sursit jinsiongr jinwjingg, kipenr hing'uii dyrr henr cud laii ar. Inx qra osimx vaux hyxser, qycc cangr kiw laii, ciywiongg qamm diyc dyx-ngiaw, cuiwjic qudliux, hin amwcangr simlai. Oklangg si vaujongx ee qyciuw, inx ee hiqew ongxongw cimx qaxx hro langg tamr be diyc, qandna' erdangr dirr jitt dniuu sinvir / vutkyxsugi ee linghunn jauxsiybih iuhir nirr, ngiaxngiaw liahbongx diyc zinlui linghunn jurgnow dypiah/ jurgnow muakamr, jin' lann suanqyr inx ee okhingg.

"simlingg derdoo" jriw cud, vindnua/ iwdoo dypiah vit'iaur tongwkow si soxu simlingg vnerjingr ee qinguann. Lanw jitmaw qycc beh qongw kiw jitt diamw. Oklangg m si koxtangr ee dypiacjiaw/ m si vindnua langg. Dywvingw :ee, inx e vutduan loxlik vyxcii qydo sriu diongrsi ee jurgnow hingsiong. Dirr duiqiuu siarhue derui ee quewding-diongx, inx kyxlingg guanrir/ simrjiww vikced hibang qinglik qanlann kunwqingw ee jetbuaa, mrqycc jit jiongw digding ee tongwkow inx berdangr zimxsiu: binrduir liongsimx ee tniar/ huexqaiw quewkir cywgo ee kow/ hiauxgno jurqiw u jue/ byy uanbiw ee tongwkow. Oklangg juxiaur dypiah digding hingtair ee kow, ham' simlingg u vne siamxpiah vindnua ee cavet si byy qang :ee.

Oklangg e sniu jin vanrhuad dypiah jurgnow huanxsingw jitt digding ee kow, dirr itvnuax jinghongw ha, inx si siongrr byy guanrir jiapsiu jingsinn dirliauu :ee. Oklangg hin qnir diyc qngx --- qniax qnir diyc hro inx guanhingg henr qngx qngx ee senrliongg ji' qngx/ voglo cud oklangg soxu ee kiamwdiamw, jit sxix aw dyrr jauw be quer/ liacpuar inx vehcat ee jinliw ji' qngx. Jingsinn dirliauu si diamxdingx ee quewdingg; duiww oklangg laii qongw, jingsinn hunsig su'iaur giamqeh jursingw ee qanghux, ham' jursad qang. Huhap kyhak zinsingr og ee diwsig e jiacc jiyw knuar diyc, jixvutqyr oklangg qik byy guanrir langg' kir tamwqiur inx.

Zuqyw liongdix bunrdee m si ok langg jyr og ee juxiaur ziogdiamw, anne qycc e si sniaw? Guaw siongsinr zinsingr og ee qinvunw simliw bunrdee qandna' cuthen dirr qokk jiongw byy qang luirhingg ee jurluann-diongx.

TUAD BE KUIX EE JURLUANN

Jurluann ham' jurgnow juanjur (Self-Absorption) ee viauxhen hingsid je jiongw dyngiu. uree dirr haidongg siqii jingwsiongg, singlenqii suacc m si ; uree si hro langg' sniu be qaur ee venwtair. Jitt xee juxdee jin' diongriaur/ hogjap, dirr jiax guaw jiurr Fromm soxx qongw ee "oksingr jurluann (Malignant Narcissism)" kaisiw qongw kiw.

"oksingr jurluann" ee digdingx si byy guanrir sunrhok. Simlingg qenrkongx ee langg --- kyxlingg sunrhok siongrder/ jinliw/ air/ qysiongw uixdai ee lixsiongw. Inx ixx siongrder ee jixir jyr, m si jairr qywzinn ee hnuahiw. Inx siongsinr jinliw, m si qaqi sniu qaqi driyc. Ixx simair :ee suqiuu :ee, dang quer jursinx ee buanxjiog hixlok. Ham' Bob ee verbuw byy qang. Jongw qongw jit qxur, simlingg qenrkongx :ee, inx bingven senrog/ bongx liongsimx jyr dairjir. Narr qenwsiauwsimx ham' iwjir quatjenr, iwjir itding ngiaa, qenwsiaur dyrr jauw qaxx bih byy lo.

Qokk xui vitzenn duiww oklangg ee simx hiongg/ jxingg vyc/ jip'id inwsiong cimkig; inx iwjiwlik qenqiongg/ jib sixquad/ hnuaiqig acvar, iwdoo giap guarlat kongwjer langg'.

Sinhagqax zinruii siaog si juriuu iwjir ee sanxbut. Siongrder ixx Ix ee hingsiong jy langg, sur hro zinlui juriuu iwjir, teqiong zinlui senrog ee suanxdigquann. Jinwhuawlun huijongqaur ee tyxlun, duiww og sanxsingx cud ee bunrdee, zinruii jinwhuar kacc qe ee singbut sriu didqag vunxlingg ingxhiongw. Ui' qauu jinwhuar laii ee zinlui, daidysor ixqingx tuatli vunxlingg kongwjer ee qaidnua, jinwhuar qaur juriuu iwjir ee jancur! Enxhuar quewdingg hro zinlui erdangr juanzenn qamxsingr, ersaih qongw si sunrhok qyckacc qyjancur ee jixdy guanjig, sunqiuu jurjer ee sinx lorqingr. Mrqycc iuguann u gibun : uirsniaxmic u quaw langg erdangr sunrhok? Uree langg dyrr be tongx?

Lanw cavutdyx e sniu beh mng: siaog ee bunrdee qisit junjai dirr iwjir vunxsinx. Kyxlingg oklangg jit cutsir dyrr jah laii jin' qenqiongg ee iwjir, juadduir byy kyxlingg hiongr jurqiw ee iwjir kuthok. Suibongw qik qenqiongg iwjir si soxu uixdai zinbut ee digdingx, mrqycc cniurr Iasox qidog/ A.Hilter, iuguann erdangr hunvet jyr sxen/og ---Iasox qidog ee iwjir si tnive ee jixir, A.Hilter ee iwjir si qywzinn ee jippiah luanrbuw --- jurdong jurhuad ee iwguan (Willingness) ham' gnersimx lingxhueh jipquad (Willfulness) ee cavet.

Diauqangx m kingw sunrjiongg si oksingr jurluann ee digdingx. Satan/Cain/Abel ee qowsu nirr, knuar diyc : Satan byy hogjiongg siongrder zinruii Iasox qidog dirr ix ee dingxbin, zuqyw Iasox qidog kacc kyxcuw, dyrr viauxsi dirr siongrder ee ganw lai, Satan si kacc baiw :ee ; Satan narr jiapsiu siongrder ee jixir, anne Satan diyh'air jiapsiu jurqiw ee byy uanbiw, jex si ix huisiongg byy guanrir/ byy kyxlingg ee dairjir. Vuanrgik/ duirlyc ee langg jin' pnaiw sunrjiongg. Qang dyrliw, siongrder jiapsiu Abel ee henwjer, amwsi duiww Cain ee puepingg jikvi ; dirr siongrder ee ganw lai, Cain viw Abel kacc baiw. Cain qirjuat singzin jurqiw ee byy uanbiw. Cain benw vutliauw ham' Satan qangrkuanw, jurzin qaqi driyc/ lamriong suhingg/ zimrir huanrjue. Soxu ee oklangg dysor lamriong kuanlik/ huixbet sniwmia, sniwmiarlat, vyxho uanbiw ee jurgnow hingsiong.

Sioggiw qongw "qiaugno :ee itding sitvai", itvnuax qra qiaugno qongw jyr "oksingr jurluann" ee jingsinn vnerliw iongrgiw. Qiaugno si banrog qinguann, bogquair qauwhue jojid qra qiaugno knuawjyr jiongww jue derr id miaa. Qiaugno m si singqongx au lixsow-dongzenn ee singjiurqamw, si cniurr jurluann, kyxlingg qamm diyc hamrjniw/ iuxqnuaiw, qidiongx marr u jit vorhun si qenrkongx ee jursinr/ huhap sidjer ee jurgnow qewdadqamw. Qiaugno u jue ingwqaix si " hiyxding cutsir duar laii ee jue/kiamwdiamw" --- uirr beh buah siaux zidsiongg sing'uac vutdongr ee viauxhen, hiyxzin sursit, simrjiww huatdong qongqig ee jurdai/ gnorban. Bob ee verbuw zinruii inx qra ginxaw jiauwqor qaxx jin' hyxser. Martin Buber zinrding, oksingr jurluanjiaw qencii jit jiongw "uanjuann tuatli pnuawduan ee juxdniux".

Uirjnuaxngiu e u jitt jiongw dig'iuw ee oksingr jurluann? --- qiaugno hongsinn/ jurzin uanbiw ee jurgnow hingsiong. Uirsniaxmic dysor langg tuatli liauw oksingr jurluann ee kanjer, jiyxsor langg suacc sriu kanjer? Jap-go nii laii, jingsinn hagqax ixqingx jiamrr diongrsi jurluann ee henrsiong, duiww ix ee liauxqaiw iauxx si cnemee bongx cnxiu ee qaidnua, gunw byy huatdo hunven qokk jiongw quewdo jurgnow juanjur luirhingg ji' qranx ee kuvet. Jerje langg u binghenw ee jurluann kinghiongr, berdangr jixzin inx si oklangg. Henrqaidnua guaw qandna' erdangr jixcud oklangg dig'iuw ee jurluann ongxongw si iwjiwlik jysiu bujingg pywhai hitt lui. Zinlui uirsniaxmic e si jitt jiongw luirhingg jurluann ee siurhairjiaw, gauw qandna' erdangr vin' jurqiw ee iwsur tuicig.

Ixx guaw ee qinggiam, og jongxsi dirr qadingg-diongx sanxsingx snitnuar. Derr sir jniux cuthen juxqag ee verbuw si og verbuw. Qamxx qongw og e dirr qadingg snetnuar singdiongw? Si qiinx uituann? Ginxaw mohongw verbuw, u ngiu yc ngiu? Ginxaw huanxkongr verbuw, sanxsingx og? Jerje og verbuw ngiuxci ee ginxaw, suibongw jysiu congwsiongx, kiokk byy siaog, lanw beh anxjnuaw qaiwsueh? Qaur dnaxx lanw m jaix guan'inx, rair zinrjinx dairliong kyhak genxqiur, narr byy, birlaii marr berdangr did diyc guan'inx.

JURIUU IWJIR SI ZINSINGR OG JI' ID?

Bogjingg "vnertair jurluann qinguann" ee juxliuu lixlun juxdniux, jurluann si jit jiongw hong'ue henrsiong. Cavutdyx soxu siauwlenn ginxaw longxx e viauxhen cut qionglet hongsiuxsnuar ee jurluann digjid. Zidsiongg singdiongw quewdingg-diongx, qingquer verbuw dingxjinx jiauwqor quanair, dorquer unxding donglenn ee ginxaw, jiacc e jiamrr vaixtuad jurluann ee simtair. Verbuw jankog/ simx hiongg duiwtai juxluw/ haidongg siqii qinglik quer congwsiongx, e hro iuwzii ee jurluann ensiok, ciangjai e dirr zinsingx qanlann sii cuthen, jniajyr vyxho zidongg siqii jurgnow ee simliw uaxkyr. Jitt xee lixlun sik'iong dirr zinsingr ji' og ee qinguann. Diongqow sewqiw qauwdngg ee qenwdiogjiaw, jiong' Gothic qenwdiok ee quaiwbut dohingg --- og ee siongrdingx --- he dirr viah-bin, si beh qnuaxjauw okmoo. Ginxaw kyxlingg e uirr huanxkongr og verbuw ee qongqig jniajyr og ginxaw, lanw ersaih qra zinsingr ee og knuawjyr simmoo.

Iauxx u qitnax ee quandiamw erdangr knuawtai zinsingr og ee qinguann. Sidjer-siong, duliauw jiyxsowlangg si dua sxen/ dua og ji' gua, duardysor si qaiwding dirr sxen/og ji' qranx, lanw ersaih qra zinsingr ee sxen/og knuawjyr moxjiongw lensuar jongtair, cniurr sanr :ee zuxx sanwciah, u jnii :ee zuxx hyxgiac/ senrliongg :ee zuxx sxen, og :ee zuxx auwcaur ee kinghiongr. Fromm ee duwjog "The Heart of Man", duiww jitt xee quandiamw anne siaw:

Langg ee suanxdik linglik duer diyc sing'uac qinggiam vutduan qaixvenr. Qewsiok cywgo quatcig ee siqanx zuxx dngg, zuxx jiapqin ticjiyc simdngg; itdit uicii jingwkag quatcig ee siqanx zuxx dngg, zuxx uaw ziusun kuacdua --- kyxlingg tuatli qurngiu, ngua sinx hueh, dongrlik uahtiaur. Sniwmia ee quewdingg, muixx huac jit vo jursinr ee kavo, dongsii jingqax suanxdik zinsingr dyrdig/ iongxkir/ qakgno...dringw lixsiongw hing'uii ee kuiwlat, juewau suanw vutliongg hing'uii suacc viw lixsiongw hing'uii kacc lann. Narr kuthok/ qniahniaa luanxziog jit vaiw, zuxx iong'i qniaa hiongr qamguan duirlyc, jiongbuew sitkir juriuu. Dirr ingxuanw m jyr m driyc/ ixqingx sitkir jingwkag juriuu jyr dairjir ee nng qigtauu ji' qranx, junjai sngr be uann ee suanxdik juriuu dxo (The Degree of Freedom To Choose). Zinsingx zimrhyy siqandiamw suanxdik juriudo qokk byy qang. Narr suanw sxen ee juriudo dua, qingw sxen kacc qanxdanx; narr suanw sxen ee juriuu kycc ser, dyrr rair cud jerje kuiwlat, tauwquer guarlik ee vangjan/ vin' unrkir/ hyw qienn...laii did diyc. Jerje langg m bad sing'uac gersut, m si cutsir dyrr pnaiw jxingw/ kiamr quer kacc hyw zinsingx ee iwjiwlat, si inx kia dirr sibzirlo-kauw (sibzirlorkauw) ee qauce'diamw, siongr dangx knuar saix, kyxlingg vunxsinx iauxx bue qakcniw/ kuibak, kiokk diyhh jyr quatding. Inx jit diamw aw dy' byy caqag diyc sniwmia huatcud gibun, m jaix jurqiw u qihue jyr qitnax ee suanxdik. Dirr jitt xee quacelo muixx dac cud jit vo, diyhh singzin jurqiw itding rair qycc dngw laii cywgo ee guandiamw, diyhh singzin jurqiw longrhuir siqanx/ jingsinn, zuxx lann singzin qniaa m driyc lo ar.

Fromm knuar zinsingr og ee guantauu si jit jiongw singdiongw kexhuad ee quewdingg : langg m si cutsir dyrr og/ virr vig jyr og, si tauwquer snalensuar ee suanxdik, duer diyc siqanx ee liuxjig jiamrr jniajyr og. Ix ee quandiamw ham' guaw qang, qamm diyc bu'nai --- digvet si ix qiongdiau suanxdik/ iwjiwlat. Mrqycc guaw zinruii ix ee quandiamw jingwkag, byy qraur uanjingw. Jiurr mow hongbin, Fromm ee lixlun byy dirr siauwlenn ginxaw iauxx u jerje qihue unriong iwjiwlik suanxdik jinjniar juriuu sii, jiong' sokjy zinqeh ee qiongdua ligliong dairsingx let zip kyxku. Lingrgua jit bin, ix ee lixlun kyxlingg marr qra iwjiwlik vunxsinx qiongdua ee lat qrow liauw sniu' qe .kir.

Guaw bad knuar quer be jiyw le, u quaw langg qandna' uirr beh hingsuw iwjiwlat ee juriuu, jyr cud og ee quatding. Jiaxee langg duiww qaqi anne qongw " guaw jaix dirr binrduir suanxdik sii, sniaxmic jiacc si jingwkag hingdong, mrqycc guaw juadduir byy guanrir sriu dyrdig quanliam/ simrjiww jurgnow liongsimx ee sokvak." "guaw si uirr sxen laii jyr sxen; uirr guaw ee iwguan suanw og. Guaw beh jyr pnaiw dairjir, si guaw ee juriuu."

Guaw zinruii juriuu iwjir cniurr jerje uixdai ee jinliw, u maudunw ee soxjai. Jiurr mow jit hongbin, juriuu iwjir si sursit. Langg byy su'iaur liam qingbunn/ sriu mow quaw jewiog hanrjer, ersaih jairr sim'ir suanw juriuu. Lingrgua jit bin, langg berdangr suanw juriuu. Langg ee junjai jongtair, derr id si sunrjiongg siongrder, jiapsiu senrir ee koxkngr, derr zi si qirjuat hiongr jurgnow iwjir ixgua ee surbut kuthok, --- jitt jiongw qirjuat hogjiongg ee hing'uii, hro zinlui jurzenn sriu "og sewlik" cesaiw. Langg jiongbuew jiong' sriok siongrder iacc si rmoo. Iasox qidog dongzenn duiww jitt xee maudunw viauxsi iwqenr. Ix qongw "langg narr si beh qiur qaqi ee sniwmia, dendyww e songwsid ; danrsi narr uirr guaw hisingx sniwmia :ee, e qiur diyc ix ee sniwmia." Peter Shaffer(1926- ) siaw ee qiogvunw "Equus (1977)" ee inghiongg zinbut Dysert, siongrr buew anne qongw " guaw berdangr qongw ix si sinsingr, guaw ee dyrhingg iauxx byy hiacc quann, mrqycc guaw beh iong tauu vair ix ee kax, henr cud guaw siongrr dua ee qingwir." Lewis jriw cud "uxdiu byy diongdy, siongrder juxdniux :ee, Satan dyrr huanxduir." guaw zinruii kia dirr siongrder/Satan jniar diongx jiacc si juriuu; byy sriu senrliongg ioksok/ byy virr qigtauu ee jursux jiangxquanw. Mrqycc jitt jiongw juriuu jiong' e puawcuir siwsnuar, hro langg lann zimxsiu. Malachi Martin (1921-1999) qongw "lanw diyh'air dirr jiapsiu/ byy jiapsiu juxjnaiw ji' qranx jyr jit xee suanxdik."

Dirr jiax tamwtyw simliw quanliam beh qetsog sii, liw/ guaw ingwqaix jniawbin knuawtai iwjiwlat ee qaiwliam. Lanw sukyw zinsingr og guantauu ee qokk jiongw kyxlingg insor, guaw zinruii, byy su'iaur digvet qingw cud jingwkag ee insor, danwdiau cywgno :ee. Dirr jingsinn ihak, soxu diongrdua ee simliw bunrdee longxx u jit hxang guanjig : cniurr sidbut u jerje qinx, simliw bunrdee ee guan'inx juadduir vutjiw jit xee; ongxongw si sngr be uann/ horsiong byy qang, siongsinr og ee bunrdee byy lergua. Mrqycc togjiaw siongrr hyw e qir did, ciongbuanw ywvir ee juriuu iwjir marr si zinsingr ji' og guantauu insor ji' id.

huedngw tauu iac