cionghunx huathuix ee amwiwsig -7
Jung (Bunchhai huan'ik)
DERR CID JNIUXGENXQIUR HAM' DUWJOG
guaw soxx siaw ee itcer, si luersimx kngr dirr guaw qingqah ee zimrbu,
miardiongx juwdnia vutditvud jyr ee dairjir;
rig .kiw .laii guaw simtauu ee su, siaw .lyc .laii
hro qamxdong guaw ee linghunn, dua sniax qongw cud ix beh qongw ee ue.
Dng' snewmia jinwzip au-vnuawsingx, guaw ixqingx dac diyc binrduir amwiwsig ee dyrlo. Duiww jex soxx jinwhingg ee genxqiur si nii-qang-guec :ee, qingquer iokk zi-jap dxangx au, jiacc duiww guaw ee qokk jiongw huanwsiongw did diyc itding tingdo ee lixqaiw.
Dairsingx, guaw diyh'air cue cud luersimx texgiam ee ligsuw anwle, mng jurqiw “jiaxee digding jendee bad dirr ligsuw-siong ee sniaw soxjai cuthen?” narr si byy hxuad cue cud lerjingr, dyrr byy kyxlingg qra guaw ee sniurhuad kurtexhuar. Incuw, jiapciog lenrqimsut kuriuw quatdingrsingr iwgi, teqiongx liauw qaur bogjingg uijiw, guaw iuguann kiamr ee ligsuw qicow.
Hunsig simlixhak (Analytical Psychology), qivunw-siong si jurzenn kyhak, viw qitnax hagkyx kacc iong'i sriu quancatjiaw ee qywzinn penqenr ingxhiongw. Simlixsux narr sniu beh vaiduu pnuawduan ee cywgo, dyrr jinrliong cue diyc ligsuw/ bunhak ee luirsu zinbut. 1918~26 nii qranx, guaw zinrjinx genxqiur Gnostic qauwpair jokqax ee duwjog, inx si siongrr jaw bad binrduir amwiwsig sewqair ee, vingrr tamwtyw qidiongx lueriongg qapp henxzenn sriu didqag sewqair soxx uer ee jiongxjiongw iwsiong. Juliau taiww jiyw, m jaix inx si zuhyy lixqaiw jiaxee iwsiong; qycc laii, jiaxee juliau dairdysor laijurr inx ee huanxduiwjiaw --- dirr qidog cutsir qingquer lak xee sewqiw, qaixsueh qauwgi ee jit pruex jokqax (The Church Fathers). Guaw qamxqag, inx duiww jiaxee iwsiong byy kyxlingg u simliw-siong ee quanliam, Gnositc qauwpair li guaw taiww hng lehh, byy hxuad ham' guaw soxx binrduir ee qokk jiongw bunrdee qenwlip zimrhyy kanlenn. Jiurr guaw soxx jaix, jitt xee qauwpair soxx tuisag ee sinvir didqag ham' jitmaw lenqed ee tuantongw, ixqingx virr cetdng ar, incuw beh cue diyc ui' Gnostic qauwpair(iacc si Neo-Platonism) tonghiongr dongdai sewqair ee qiyniuu ixqingx byy kyxlingg . Dng' guaw kaisiw lixqaiw lenrqimsut au, huathen ham' Gnostic qauwpair ee ligsuw u quanhe, quewkir/ jitmaw erdangr jiapsuar kiw laii. Lenrqimsut si anqix dirr diongsewqiw jurzenn dethak, jit bin tonghiongr quewkir, lingrgua jit bin qycc si birlaii qapp henrdai amwiwsig simlixhak ee qiyniuu.
Freud si jitt hongbin ee kaicongwjiaw, qycc inxzip qoxdenw ee Gnotic qauwpair ee singwiok dongrqix ixqibb siaog lamsingr kuanuix. Gnostic qauwpair ee Iahyhuaa qapp jywbudjiaw sinbingg ee dongrqix, jaiww crur cuthen dirr Freud iuxquanx guansiw hurcinx ixqibb tnuawsnex cud jitt xui lamsingr imamr ee ciaugnow sinue. Sinue-diongx hurkuann congwjy cud byhan ee sitbang, cywqag, tongwkow ee moquiw. Dirr lenrqimsut duiww budjid viwbit ee juanjur nirr, ixqingx laulo cud bud'iok ee kinghiongr, jex hro Freud u amkamr Gnositc qauwpair lingrgua jit xee vunxjid ee jok'iong : jniajyr lingrgua jit xee kacc quann sinbingg ee sinlingg guansiw iwsiong, jitt xui sinbingg sangr jit xee lamrhun dexmic ee kiwku hro zinlui, jit xee sinlingg juanxvenr ee kiwku, si jit jiongw luxsingr guanjig (Feminine Principle), dirr Freud ee qadniuw sewqair, sinn si byy derui :ee. Tenjuxqaur ee susiongw ongqog, siongrder ee buxcinx/ qidog ee sinniuu, juewqin jiacc virr labzip sinsingr ee dongrvongg, jex si qingquer cingx-vah nii ee diuduu jiacc u ee venwhuar, jitt jiongw knuawhuad jiwjiyw did diyc vorhun singzin. Hurkuann dirr Sinqaur/ Iutaiwqaur, iuguann cniurr jaxnii hitt ngiu, vyxiuw jiangxquanw derui. Lingrgua jit bin, dirr dethak iwgi ee lenrqimsut nirr, luxsingr guanjig ham' lamsingr guanjig (Masculine Principle) u siyqang jok'iong.
Dirr guaw huathen lenrqimsut jingg, jyr liauw jit herlet ee bang, bang-diongx laihuee cuthen qangrkuanw ee juxdee. Guaw ee cur vnix :a, u lingrgua jit dongr cur, qycc naxx si hur ee qenwdiok, knuar laii qoxquair. Dagg vaiw jyr bang, dy' qamxqag qiquair, uirsniaxmic cur itdit kia kiw dirr hiax, guaw kiokk duiww ix itbuu-soxdix. Juewau jyr jit xee bang:
Bangrqnir jurqiw qniaa qaur vnix :a, cur-lai u jit qingx qiquair ee dosusig, kyxlingg jap-lak/ jap-cid sewqiw dyrr ixqingx junjai. Jit vunw jit vunw dua qycc qau, iong dix-puee jyr hongbin :ee, en' sir pnir viah vaii, qidiongx u quiw vunw u qoxquair ee dangg-puee rue, cacdoo si guaw m bad knuar .quer, qoxquair siongrdingx hyrqir. Dongsii guaw m jaix inx hex si sniaw loriong, kacc quw quaw jiacc zinrcud si lenrqimsut hyrviaux. Bang-diongx qandna' iwsig diyc jiaxee hyrviaux qapp jingxqyy dosusig u ho'ngg simsinn susongw ee bixqamw. Guanlaii jex si jit xee siujip diongsewqiw ee qoxvanxceh cam' jap-lak sewqiw inwsuatpinw ee siujongsow.
Cur hitt xee birdix ee huwsiok qenwdiok si guaw zinqeh ee jit vorhun, guaw jurqiw ee binrmau; dairviauw sriok guaw moxjiongw iauxx bue iwsig .diyc ee mic, digvet si hitt qingx dosusig kansiap diyc lenrqimsut, hitt sii guaw duiww hex iuguann itbuu-soxdix, mrqyxx jin' qinw dyrr e genxqiur. Iokk jap-go dxangx au, guaw siujip ee ceh ixqingx erdangr jniajyr jit qingx dosusig, cincniu bang-diongx hitt ngiu.
Irqyr guaw e jiapciog lenrqimsut ee bang dirr 1926 nii cuthen.
Duxx jenwsii, guaw dirr South-Tyrol, Iwdairli (Italy) jensnuar, jre jit daii ew ew longbinn ee bexciax, ui' jensnuar dngw laii. Pauwdnuaa dirr gunw jiuuii vogjar, cuiwpnir siwqer luan vuex; gunw diyhh jinrliong qnuaw lo, jinghongw huisiongg huihiamw.
Gunw rair qingquer jit jxy qiyy, nngr quer vongrkangx, vongrkangx ee qingrqux-dingw ixqingx virr jawkaix. Cngx quer vongrkangx qaur hitt tauu sii, gunw taujingg cuthen qngx ngiar ngiar ee zidtauu bixqingw, guaw zinrcud, jiax si Verona huwqin. Dirr gunw erbin dyrr si Verona ci, dirr zidtauu qng'ngiaw-ha, qongcaiw snriaa .langg. Guaw qingqah ee dang dnar qui' xee kinsangx .kiw .laii; bexciax qewsiok qniaa, jinwzip uac tiaur tiaur, itpenr cnex lingwlingr ee Lombard vnengiuu. Jit lo qingquer ciongbuanw cuntnix ee jngkax, knuar diyc be jiyw ee diurcann, iuqnanaw ham' putyciu, lo ee cuahduiwvnix, u jit jxy jin' lewdauw ee dua longjngx, cniurr vag Iwdairli mow xee qongjiog ee qiongden. Jex si jit jxy denxhingg ee longjngx, u jerje huwsiok qenwdiogbut qapp kowvangg. Dyrr cniurr Louvre qang, lo cngx quer jit jxy dua dniaa, qycc ui' jitt jxy qiongden-vnix qingquer. Hitt xee exser ee bexciahux ham' guaw jywhuew cngx quer jit dy mngg jinwzip mngkauxdniaa, tauwquer hng hng ee derr zi dy mngg, gunw erdangr knuar diyc hitt jit pxenr cunsig bixqingw. Siwjiuuii knuar ~ lehh, jniawvingg si longjngx ee jniawbin, dywvingg si suxiongrlangg druar ee soxjai/ bexdiauu/ cikcngx qapp qitnax qenwdiogbut, itdit endngg jit dnxua jin' dngg ee lo.
Dirr gunw qaur dniaa ee dionghngx (qiongden ee dua mngkauw) sii, dimbun ee jit sniax, dniaa nng dy mngg hutzenn qnuaix .kiw .laii. Bexhux ui' bexciax-dingw tiaur .lyc .laii, huah “hyw ar! Jitmaw lanw virr qnuaix dirr jap-cid sewqiw ar.” guaw bukyxnairhyy sniu “ um! Byy m driyc! Qaix jnuaxngiu vran? Jitmaw kaisiw, lanw e hro qnuaix quixarr nii.” dongsii, jit jiongw andah ee sniurhuad rig .kiw .laii simtauu: “qycc quer quiw nii, jongw u jit zit guaw e qycc qniaa cud kir.”
LENRQIMSUT EE SIONGRDINGX GIXGENN
Jyr liauw jitt xee bang au, guaw dirr jit dua dxuix iuxquanx sewqair ligsuw/ jongqauwsuw/ dethagsuw, jiaxee jailiau jauxcue beh air :ee, mrqyxx uanjuann cue byy erdangr jo guaw qaixsueh jitt xee bang ee juliau. Qingquer jin' dngg jit dnxua siqanx au, jiacc zinrbad diyc si lenrqimsut, in'ui huatdenw siongrr ong ee siqii si dirr jap-cid sewqiw. Qongw .laii marr qiquair, guaw uanjuann be qir Herbert Siberer u sniaw iuxquanx lenrqimsut ee duwjog. Hitt sii, guaw ham' ix vyxcii puesinr ongxlaii, bad qra qongw guaw duiww ix ee duwjog pingqer jin' quann. Cniurr ix viqiogsingr ee sixbongg soxx viauxbingg :ee, Silberer duiww jitt xee bunrdee iuxsow huathen, aurlaii kiokk byy hiauxgno (ix jursad ar). Ix bad liriong aurqii ee jailiau, guaw byy did diyc sniaw. Siongquanx lenrqimsut ee aurqii lunrbunn vutjiw qiquair: jixu erhiauw qaixsueh, jiacc ow e diyc vyw.
Knuar uann “qimhuex (Golden Flower)” au, jiamr liauxqaiw lenrqimsut ee vunxjid, jitt pnix Diongqog lenrqimsut ee ngiurvunw si 1928 nii Richard Wilhelm qiar hro guaw :ee. Guaw diyhqib beh jaix kacc je lenrqimsut ee mic, uixtog Munich ee cecsiongx, narr u sniaw lenrqimsut ee ceh, cniaw sui' tongdix guaw. Byy zuarr quw au, siux diyc derr id vunw “lenrqimsut derr zi qngw” (1593 nii), si jit vunw lueriongg qongxkuah ee Ladingx bunn lenrqimsut lunrbunjip, qidiongx u quiw pnix ersaih qongw si lenrqimsut ee qingdenw jokpinw.
Guaw qra jitt vunw ceh kngr jit vnix beh uaw nng nii, samvutgorsii jiacc henx .jit .xe lairbin ee doo, dagg vaiw longxx qangrkuanw ee simjniaa “ luan qongw! byy hxuad lixqaiw!” mrqycc iuguann e inxkiw guaw ee hingwcur, dyrr quatsimx kacc tetdew genxqiur. Derr zi nii dangtnix guaw kaisiw zinrjinx genxqiur , byy zuarr quw huathen jitt vunw ceh kip'inw langg ee soxjai. Jiaxee bunn guaw knuar si m jaix decc siaw sniaw, u quaw siyxjed guaw qamxqag jin' diongriaur, u sii qycc e huathen quiw qxur si guaw qamxqag bad :ee. Juewau, guaw jaix guanlaii lenrqimsut si iong siongrdingx qongxue, jiaxee siongrdingx si guaw ee jingpnua ar! “ah! Jex taiww qibiau !” simlai anne sniu “ guaw itding beh zinrbad inx.” zenau, guaw hro bee .kir ar! Jixiaur jid'err u siqanx, dyrr ngar tauu genxqiur. U jit amr, dng' guaw decc tak ee sii, tudzinn sniu diyc guaw hamrzip jap-cid sewqiw ee hitt xee bang, jitt sii, guaw vaxag diyc bang ee iwhamm ar. “guanlaii si anne! Jitmaw guaw vutditvud ui' tauu kaisiw genxqiur lenrqimsut ar.”
Qingquer jin' dngg jit dnxua siqanx, guaw jiacc dirr lenrqimsut susiongw huatdenw quewdingg ee beqiongx cue cud jurqiw ee lo, mrqyxx Ariadne byy hro guaw snuawsyh jo guaw. Tak jap-lak sewqiw ee jit pnix bunn “detzinn ee muiquiwhngg” sii, mow quaw qiquair ee viauxdat hongsid/ iongrsuu itjairr cuthen, cniurr “hunqaiw qapp qendangr” “sinvir qxongw” “jiyhtauu””vunxguann budjid” “juixginn”. Guaw qamxqag, jiaxee viauxdat hongsid si u digding ee iwhamm itjairr virr suxiong, vutqyr guaw byy hxuad cingcyw dauwdew si sniaw iwsur. Incuw, quatding venx jit vunw sudenw, qaucex camjiaur qidiongx ee iongrgiw. Duer diyc siqanx tuiciauu, guaw luixjig quixarr cingx xee juxiaur iongrgiw/ gixsuu, caux lyc laii ee dik'iaur marr u quixarr vunw. Guaw ixx gixgenhak jyr genxqiur lorsnuar, dyrr cincniu sethuad qaiw jit jiongw birdix gixgenn ee bedee. An' jitt jiongw hongsid jinwhingg, lenrqimsut ee viauxdat iwgi jiamr henwcud. Jitt xee qangjog jit jyr dyrr jap quiw nii.
Jin' qinw knuar .cud .laii, hunsig simlixhak ixx jit jiongw jin' quaiwqii ee hongsid, ham' lenrqimsut, jitt nng jiongw byy singx camsiongg, knuawhuad kiokk itdir. Lenrqimsut ee texgiam dirr itding iwgi-siong dyrr si guaw ee texgiam, inx ee sewqair marr si guaw ee sewqair. Jex si diongrdua huathen : guaw dirr byiwdiongx dag diyc amwiwsig simlixhak ee ligsuw duiwlibbut (Opposite). Ham' lenrqimsut vixqaur, ixqibb hitt diauu hiongr aurbin lenqed Gnositc qauwpair, m bad dng .quer ee diwsig lenduar, uirr guaw ee simlixhak teqiongx liauw kurtew ee lerjingr. Dirr guaw tak jiaxee qoxlyw bunvunw sii, soxu ee surbut qokk u inx jurqiw ee xui: qokk jiongw huanwsiong, guaw dirr sidjenr-diong luixjig ee qinggiam diwsig, ixqibb ui' qidiongx liauxqaiw inx denxhingg digdingx, jiaxee lixqaiw dirr gauw kaisiw diaujax genxqiur qokk jiongw sinue sii, vunxguann ee iwsiong/ guanhingg ee singwjid jiamr juxiaur derui; guaw zinruii byy ligsuw dyrr byy kyxlingg u simlixhak, dongzenn marr byy amwiwsig simlixhak lor! Erdangr kingxding ee, iwsig simlixhak buanxjiog laijurr qywzinn sing'uac jailiau, beh qaixsueh jingsinn quanlingjingr, qyckacc su'iaur jit hxun ixongw ee vnersuw, in'ui jex viw iwsig-lai ee diwsig qyckacc erdangr cimkig huanxngiar. Dirr dirlilauu quewdingg-diongx, dagg vaiw su'iaur jyr byy qanxdanx ee quatding sii, dyrr e jyr bang; qaixsueh bang su'iaur viw qywzinn qiwig qyckacc je ee diwsig.
DONGRCAD ZINQEH VIWBIT
Guaw qra jurqiw duiww lenrqimsut ee genxqiur knuawjyr si guaw ham' Goethe luerjai jiapciog ee jit jiongw ngiaxziah. Goethe ee viwbit si, ix virr jit jiongw guanhingg venwhuar quewdingg jipuer, jitt xee quewdingg, cingx-vah nii laii m bad dng .quer, ix zinruii “Fraust” si “diongriaur qangjog” iacc si “sinsingr qangjog”, si ix ee “juxiaur surgiap”, ix itsingx ee hingdong longxx dirr jitt cud hiwqiok huanruii-lai jinwhingg. Incuw dirr ix srinx-siong uahtiaur :ee, si kuriuw snewmiarlat ee vunxjid, jit jiongw ciauzinn ee quewdingg, si guanhingg sewqair uixdai ee bang.
Guaw jurqiw marr lag .zip qangrkuanw ee bang-diongx, ui' jap-id huer kiw, guaw vutditvud kaisiw jiongsu guaw ee “juxiaur qangjog” --- dog'id-buzi ee surgiap. Guaw ee snewmia virr jit jiongw quanliam/ bogviaux soxx jimwdor, vingrr incuw qethap: knuawtangr zinqeh ee viwbit. Itcer surbut longxx kyxiw qinqir jitt xee diongsimdiamw did diyc qaixsueh, guaw soxu ee duwjog marr si qangxsut jitt xee juxdee.
Guaw jinjniar ee kyhak genxqiur kaisiw dirr 1903 nii ee lensiongw cikgiam sidgiam, jex si guaw jiongsu jurzenn kyhak ee derr id crur genxqiur. “zirsuu lensiongw genxqiur (Studies in Word Association)” jit uansingg, qycc siaw liauw nng pnix jingsinn ihak hongbin ee lunrbunn : “jaxhuatsingr cidaix simliw” qapp “jingsinvne ee lueriongg (The Content of The Psychoses)”. 1912 nii “juanxvenr ee siongrdingx” cutvanw, dongsii marr qetsog ham' Freud ee ving'iuxjingg. Ui' hitt sii kiw, guaw diyh'air jurqiw pah tenha.
Ui' 1913 nii qaur 1917 nii, itdit jin' beluann jurqiw amwiwsig ee jiongxjiongw iwsiong; cuxau, l.-laiongw-o. ee qokk jiongw huanwsiongw jiamrr qiamxjiyw. Dirr jiaxee huanwsiongw iauxx bue uanjuann tewdiau, guaw marr byy qycc beluann dirr huanwqingw-lai sii, dyrr kaisiw kyxiw duiww jingxqyy texgiam caixcuw kecquanx taiwdo, iongrsimx sukyw, qra qaqi tecud derr id xee bunrdee si “langg si jnuaxngiu knuawtai amwiwsig?”dap'anr si “jurgnow cam' amwiwsig jiqanx ee quanhe.”(The Relations Between The Ego and The Unconscious). 1916 nii dirr Paris jiurr jitt xee juxdee qixhingg liauw jit crur qangxjy, jap-zi nii au jiacc dirr Dikgog cutvanw, lueriongg jingqax jerje, guaw dirr bunn-diongx biyue liauw amwiwsig ee mow quaw denxhingg, qycc viauxbingg iwsig duiww amwiwsig ee taiwdo vutjixsirr bavir byy qamxdong.
Dongsii, guaw qycc byingg uirr “simliw luirhingg (Psychological Type)” jyr junxvi qangjog, jitt vunw ceh 1921 nii derr id vaiw cutvanw. Siaw jitt vunw ceh si in'ui guaw su'iaur qaiwding jurqiw ee quandiamw ham' Freud/ A.Adler (1870-1937) byy qang. Iwdoo qaixquad jitt xee bunrdee sii, duw diyc luirhingg ee bunrdee; simliw luirhingg si qywzinn dog'iuw :ee, quatding vingrr hanrjer jit xee langg pnuawduan ee hongsid. Jitt vunw ceh ee bogdig si iwdoo tamwtyw qywzinn duiww sewqair/ tnazinn/ surbut ee quanhe. Ceh nirr tyxlun gorhuex-jabsig ee iwsig janbin, dyrr si taukag-lai iwsig duiww sewqair kyxlingg caixcuw ee taiwdo, ui' limcngg qakdo laii knuar, sngr si jit jiongw iwsig simlixhak. Gauw qra dairliong bunhak jokpinw ionghap zip jitt vunw ceh, Carl Spitteler (1845-1924) jiamr jin' digvet ee derui, inxiong siongrr je :ee si ix ee jokpinw “ Prometheus and Epimetheus”, marr tyxlun liauw F.Schiller (1759-1805)/ Nietzsche, qoxdenw sidai/ diongsewqiw ee diwsiksuw. Guaw bongxdongw qiar jitt vunw ceh hro Spitteler, ix byy huepuex, byy zuarr quw au jyr jit dniuu enxqangw, kingxding qongw, ix hitt vunw “Prometheus and Epimetheus” byy “u” sniaw ham'ir, dyrr cniurr ix e cniur “cuntnix qaur, la--la--la” qangrkuanw.
Jitt vunw ceh hro guaw jin' cingcyw liauxqaiw, muixx jit xee langg ee pnuawduan si ix ee zinqeh luirhingg (Personality Type) quatding ee, muixx jit xee quandiamw vitding si siongquanx ee, sanxsingx rair duiww jitt jiongw jerngiursingr iuxsow voxsiongg ee tongxid bunrdee, didjiab qra guaw inxdy qaur Diongqog “dy” ee quanliam. Guaw ixqingx qongw .quer, luersimx venwhuar huatdenw qapp Wilhelm qiar hro guaw jit vunw Dyrqaur bunvunw jiqanx ee horsiong jok'iong. 1929 nii guaw ham' ix habsiaw “qimhuex ee viwbit”. Dirr guaw ee susiongw/ genxqiur jiapciog .diyc “jurtew” ee qaiwliam sii, jiacc dingsinx cue .diyc dngw .laii jitt xee sewqair ee lo. Kaisiw siwqer enxqangw/ luxhingg, jiaxee lunrbunn/ enxqangxqyw si guaw luersimx tamwsyw, laii vnehingg guarjai sewqair ee cinwtuii, vauhamm togjiaw, vnerlangg hiongr guaw tecud qokk jiongw bunrdee ee dap'anr. (Jung juanjip derr 4,8,10,16 qngw).
”juanxvenr ee siongrdingx” cutvanw au, guaw quanced ee kywdee si Libido lixlun. Gauw qra Libido sniu jyr si kuriuw budliw lingliong ee jingsinn luirsurbut, iacc si jerjiyw si jit jiongw kuriuw sowliong ee quanliam, m si iong jid ee sudgiw laii qaiwding. Guaw ee sniurhuad tiaur cud dongsii liuhingg ee Libido lixlun kurtexhuar ee qu qaiwliam; ngua jit qxur qongw, guaw hibang mair qycc qongw iaux/ cimliok/ singr ee qokk jiongw vunxlingg, si qra soxu henrsiong knuaw jyr jingsinn lingliong ee viauxhen hongsid.
Dirr budlixhak lanw marr qongw diyc lingliong/ qokk ngiu ee viauxhen hongsid, cniurr den/ qngx/ zet ... dringw, simlixhak marr si anne, lanw cuxliw ee diongrdiamw si lingliong, marr e duw diyc sowliong/ qiongdo dua-ser cikliongg bunrdee, jitt jiongw lingliong e ixx qokk jiongw guirjongx cuthen. Narr qongw setsiongw Libido si lingliong, diyh'air caixcuw jonghap/ tongxid quandiamw. Jiwjiyw Libido (m quanw si singwiok/ kuaniok/ jiahmic iacc si qitnax) singwjid ee sowliong, unxbih dirr vuerau. Guaw hibang uirr simlixhak jyr :ee, si hac Logic ee knuawhuad, cniurr lingliongrhak lixlun dirr budliw qokk hagkyx soxx teqiongx ee, jex marr si guaw dirr lunrbunn “lun jingsinn lingliong (On Psychic Energy, 1928)” soxx duiqiuu ee mic; kyxviw qongxx, guaw qra langg ee dongrqix knuawjyr si lingliong venwhuar quewdingg ee viauxhen hongsid, jiaxee dongrqix marr u luirsu zet/ qngx ee lat; henrdai budlixhak be qandna' ui' zedlingg tuilun cud itcer ee lat; qangrkuanw, simlixhak marr qaix qingxqag, mair qra itcer ee vunxlingg longxx qruix dirr singr, jex si Freud kixtauu ee cywgno, aurlaii tecud “jurgnow vunxlingg (Ego-Instinct)”, qaixjingr jitt xee cacyr. Ixau, qycc iong “ciaugnow (Superego)”, hro jitt xee siongrr quann ee derui.
Dirr “jurgnow ham' amwiwsig jiqanx ee quanhe” ee bunn nirr, guaw qandna' dramm guaw duiww amwiwsig ee beluann/ soxx bee singwjid iuxquanx ee dairjir, duiww amwiwsig vunxsinx qongw byy je. Dng' guaw genxqiur guaw ee huanwsiongw sii, jiacc jaix amwiwsig e qinglik / inxhuad venwhuar. Dirr guaw jurqiw sigsai lenrqimsut au, jiacc zinrbad .diyc, amwiwsig si jit xee quewdingg, jingsinn ee juanxhingg/ huatdenw, si jiyh diyc jurgnow ham' amwiwsig ee lueriongg kixjyr naxx qiyniuu ee mow quaw quanhe. dirr qywzinn hongbin, jitt jiongw juanxvenr kyxiw ui' bang/ huanwsiong-diongx tuiduan cud laii; dirr jibtew sing'uac-diongx, juxiaur lauu dirr qokk jiongw jongqaur texjer/ venwhuar ee siongrdingx nirr, taur quer genxqiur jiaxee jibtew juanxvenr quewdingg, liauxqaiw lenrqimsut ee siongrdingx, did diyc guaw ee simlixhak quanqenr qaiwliam : qywtexhuar ee quewdingg.
QIDOG HAM' SIMLIXHAK
Guaw genxqiur qangjog ee qinvunxbin jin' qinw dyrr dag diyc jit xee langg ee sewqaiwquanx/ simlixhak ham' jongqaur jiqanx ee jiongxjiongw quanhe. Siongser genxqiur jiaxee bunrdee, qetqyw siongrr jaw siaw zip “simlixhak ham' jongaur (Psychology and Religion, 1938)”, aurlaii qycc siaw zip “Paracelsica (1942)” --- jingg bunn ee ensiok. “knuawjyr sinlingg henrsiong ee Paracelsica (Paracelsus as a Spirtual Phenomenon)” jitt vunw ceh ee derr zu pnix, ui' jitt xee quandiamw henwcud digvet ee diongriauwsingr. Paracelsus (1493-1541) ee duwjog u honghur ee congwsinx knuawhuad, vauquad cingcyw qaixsueh lenrqimsux soxx tecud ee bunrdee, m quanw jiaxee bunrdee longxx muax sixlangg ee qoxquair guarsnax/ hro guaw vutditvud tyxlun jongqaur ham' simlixhak iuxquanx ee lenrqimsut vunxjid, iacc si qongw jit jiongw jonqaur dethak ee lenrqimsut (camkyw “simlixhak qapp lenrqimsut”). Anne, guaw erdangr dac dirr ui' 1913 ~1917 nii qokk jiongw texgiam ee toxde-siongr/ guaw dirr jitt dnxua siqanx soxx qinglik .quer :ee, duiwingr lenrqimsut vnewhuar quewdingg.
Amwiwsig ee siongrdingx qapp qidokqaur/ qitnax jongqaur ee quanhe bunrdee vutduan dirr guaw simlingg jauxjongg si jin' jurzenn :ee. Guaw m na uirr qidokqaur ee kexsi packuix duarmngg, qycc zinruii jiamwiuw sehonglangg jin' dua ee diongriauwsingr. Mrqycc iuguann su'iaur jiauww dongdai jingsinn soxx congwjy ee jiongxjiongw venwhuar dingsinx knuawtai, narr byy, e ham' sidai tuatjed, duiww langg ee uanjingw (Wholeness) marr be sanxsingx zimrhyy jok'iong. Dirr guaw ee duwjog, itdit qiglik viauxbingg jit diamw. Gauw bad ui' simlixhak qokdo, qaixsued snax-xui ittew ee qauwgi/ Mass bunvunw, bad ham' Zosimus/ Gnostic qauwpair soxx biysiaw ee jiongxjiongw huanwsiong jinwhingg vixqaur, iwdoo hro hunsig simlixhak ham' qidokqaur huatsingx quanlenn. Jitt xee jywhuad inxcud simliw hingsiong ee qidog bunrdee. 1944 nii dirr “simlixhak qapp lenrqimsut”dyrr lunrjingr qidog hingsiong ham' lenrqimsux ee quanqenr qaiwliam “detzinjiyc” jiqanx ee duiwingr quanhe.
1939 nii, jiurr Ignatius Loyola (Tenjuxqaur Iasohue congwlibjiaw) ee “sinlingg siulen (Spiritual Exercise) qixvan tyxlunrhue. Dongsii, marr jinwhingg “simlixhak qapp lenrqimsut”ee siaxjog genxqiur. U zit amr jingsinn, guehniuu bingqngx jiyr zip, knuawqnir bincngg-kax u srinx pnai sibzirqer ee qidok hingsiong, suibongw byy viw jinlangg kacc dua, mrqycc hingngiaw huisiongg cingcyw, guaw iauxx knuar diyc ix ee sinkux si ligsig ee qimx-aw qowsingg. Jitt xee qingxsiong hro guaw dua qamxdong/ jex duiww guaw vingrr byy sniaw digvet, ciangjai dirr kunwbinn vnuawcnew jiqanx knuawqnir jin' uahtiaur ee hingngiaw.
Laijurr “sinlingg siulen” ee bingngiu ji' id ee Anima Christi, hro guaw sniu jerje. Huanwsiong ee cuthen naxjunxx si hiongr guaw jixcud, cimsniu-diongx srid qakcad liauw moxjiongw mic: qidog ee digiuw ee qimx/ lenrqimsux ee ligsig qimx ee luirsu.
Hex ligsig ee qimx si lenrqimsux dirr langg/ buqix jurzenbut-diongx knuar .diyc snewmiarlat ee jid (Living Quality), si snewmia jingsinn/ langg ee linghunn/ hongdai sewqair ee qniaxzii/ hro jingxqyy uxdiu uahtiaur .kiw .laii ee zinlui viauxhen. Jitt xee jingsinn qra jurqiw juanlik sag qaur itcer surbut nirr, simrjiww jinwzip buqibut nirr --- qimsiok/ jiyhtauu-diongx. Guaw ee huanwsiong dyrr si qidog ee hingsiong/ ix dirr budjid-diongx luirsu ee mic --- qongxkuah sewqair qniaxzii ee jit jiongw qethap. Zuqyw m si virr ligsig ee qimx soxx qamxdong, guaw lanbenw e qaxsed, moxjiongw vunxjid ee mic dngdecc ui' guaw “qidokqaur :ee” siriaw siausid; ngua jit qxur ue, guaw tuantongw ee qidog hingsiong iuguann u kiamwsid, iauxx si duer diyc qidokqaur huatdenw ee mow quaw vorhun. Mrqyxx qimsiok hiongr guaw qiongdiau, lenrqimsut jit diamw aw dyrr byy amkamr, qidog quanliam iuguann si jit jiongw uac lingwlingr ee jingsinn budjid qapp siw .kir ee bactew budjid ee qethap.
Dirr “qidokqaur sidai” (Aion, guantauu ee iwsur), jaiww crur genxqiur qidog/ soxx quansimx :ee, m si qokk jiongw ligsuw ee luirsurbut/ si qidog hingsiong ham' simlixhak ee quanhe/ byy qra qidog knuawjyr sitkir itcer guarjai ee zinbut; sionghuanw, hibang viauxhen qidog soxx dairviauw/ ensiok cingx-vah nii ee jongqaur lueriongg ee huatdenw. Guaw diwdang :ee si, cnesiur jiamquar zuhyy irgenn qidog ee lailimm, ixqibb jiauww ix hitt xee sidai ee jingsinn ham' nng-cingx nii qidokqaur bunbingg ee huatdenw quewdingg, langg si zuhyy lixqaiw :ee/ quiw cingx nii laii ee quewdingg soxx luixjig dirr ix jiuuii itcer qoxquair/ u jinggi ee jiongxjiongw qngngiaw, si lanw soxx biyue :ee.
Dirr guaw tamwqiur jiaxee sii, ligsuw zinbut --- Iasox ee bunrdee marr duer lecc cuthen. Jex u jin' diongrdua ee iwgi, in'ui ix ee sidai ee jibtew simsingr (Collective Mentality), marr ersaih qongw si ixqingx jurjip guanhingg, “zinlui” ee guansiw hingsiong, jaw ixqingx jibdiongx dirr ix jitt xui tong' langg jaix ee Iutair irgenjiaw srinx-siong. Zinlui qoxlyw quanliam, jit bin qinx dingr dirr Iutaiwlangg ee tuantongw, lingrgua jit bin dirr Egytpian Horus sinue, qidog qiwguann jit kaisiw dyrr hro langg jiapsiu, in'ui hex si sidai jingsinn ee jit vorhun, quansimx ee juxiaur si “zinjuw”, ham' sewqair ee tongxdirjiaw --- virr sinhuar ee Augustus duarder duiwlip ee siongrder ji' jxuw. Jitt xee quanliam qapp guanvunw Iutaiwlangg ee Messiah bunrdee hunwlam, jniajyr sewqaiwsingr ee bunrdee.
Zinruii Iasox --- jitt xui bagqangx ee qniaw tuanvyr hog'imx, qycc venwsingg qiuwsewjuw, vutqyr si “ dansunn ee gnoxzenn” ee knuawhuad, sidjai si jit jiongw giamdiong ee gorqaiw. Ix itding si kuriuw huihuann tenhun ee langg, erdangr jiacc uanbiw viauxdat/ qongxcud jitt xee sidai poxpenr/ kiokk si amwiwsig ee jiongxjiongw qitai. Byy zimrhyy jit xee langg erdangr jniajyr jitt xee hibang ee tuanvywjiaw, jixu Iasox jitt xui digding ee zinjaii jiacc jyr e qaur.
Hitt xee sidai, siwqer junjai juadduir kuanlik/ sinsingr Caesar soxx dairviauw ee Rome Dewqog congwjy cud ee sewqair/ qokk binjok virr vakduat bunhuar ee doglibsingr/ jingsinn jurjuxsingr. Dnaxx, qywzinn/ bunhuar binrlimm qangrkuanw ee uihiap --- virr dairjiongr tunjiamr. Jerje soxjai cuthen snacsimx qidog qycc cuthen ee zedlet qitai, simrjiww hongsniax qidog jaiwser, jitt jiongw jinghingg boghuix si viauxdat, did diyc qiuwsiok, viauxdat hingsid ham' quewkir zimrhyy dairjir byy hxuad siy' vixqaur, jixsirr “qanggiap qisut sidai” ee denxhingg sanxbut, dyrr si tuanpenr juann sewqair ee “UFO” (vutbing huihingg budtew) henrsiong.
LENRQIMSUT EE JUANXII QUANHE --- HABTEW
Guaw ee bogdig qiwzenn si uirr cionghun lunrsut simlixhak ham' lenrqimsut ee siy' duiwingr (iacc si sionghuanw), hibang ham' jongqaur bunrdee jywhuew tamwtyw, dirr lenrqimsut ee duwjog nirr, erdangr cue diyc zimrhyy iuxquanx simliw dirliauu ee digvet bunrdee. Limcngg simliw dirliauu, juxiaur bunrdee si juanxii quanhe/ Jitt xee ham' Freud iwqenr uanjuann itdir. Lenrqimsut u moxjiongw duiwingr juanxii quanhe ee mic/ kurtew qongw si, habtew (Coniunctio) qaiwliam/ “simlixhak qapp lenrqimsut” jitt vunw ceh nirr, guaw let cud sna' duiwingr ee jingwqir. Nng nii au --- 1946 nii, dirr “juanxii quanhe ee simlixhak (Psychology of The Transference)” jitt pnix bunn, jin jit vo genxqiur jitt xee bunrdee, siaw liauw “sinvir habtew” ee ceh.
Cniurr qywzinn/ kyhak ee bunrdee, guaw qamxqag cuwbi, habtew jit cuthen, bang duer lecc laii/ diaurtauu puu .cud. Qidiongx jit xee bang, habtew/ qidog ee bunrdee jurjip jyr huisiongg henxbingg ee iwsiong.
Jaiww crur bang diyc guaw ee cur u jit jxy guaw jurlaii m bad zip .kir ee huwsiok qenwdiogbut. Quatding zip kir knuar mai lehh, qniaa qaur jit dy qauu/ dang ee mngg jingg. Packuix sii, huathen jurqiw dirr jit qingx sidgiamrsig-lai, txangx-aw jingg kngr jit liauu dyh, dingxbin he buanw jerje vylee kxir ham' dongrbudhak sidgiamrsig ee itcer iongrku, si vaxvah ee qangjoksig, ix byy dirr lairdew. En' viah ee cecqer he quixarr vah xee quanr-aw, lairbin drew qokk ngiu siongxsiong e cud laii ee hilui. Guaw qniax jit diyy; guanlaii vaxvah dngdecc jiongsu hilui ee genxqiur!
Sunknuar siwjiuuii, u jit xee tangli'aw vutsamsii pongr .jit .xe, naxjunxx qionghongx cuex .quer. Hionghiongg, Hans, jit xee ui' jngkax laii ee siauwlenn cuthen, qiyr ix kir knuar tangli'aw aurbin ee txangx si m si byy qnuaix. Ix jiauww guaw ee ue jyr, jit kir dyrr jin' quw, dngw .laii ee sii, guaw knuar ix u kyxpnar ee bagsinn, qongw “moxjiongw mic dirr hiax vutsii cuthen!”
Guaw qniaa uaw .kir, cuthen jit dy tonghiongr maxmah vangqingx ee mngg. Vangqingx kangx ~, jit xee langg arr byy, kiwhunx damrvyc sinvir; vangqingx jin' dua, tenvongg-dingw qruar nng vaii qxui-aw, qokk u jit xee sniux-aw, li de iokk nng ingciyh quann, knuar .kiw .laii naxx huehngg ee ding'aw, muixx jit xee binrjig iokk lak vinghongx ingciyh, qxui-aw qokk jrngx nng dingw bincngg. Guaw jaix jex si jaw dyrr quewsinx maxmah, dngw laii zinqanx sii, druar ee vangqingx, ix he jiaxee bincngg, si hro laii cue ix ee quixhunn kunr iong :ee, si singsiang-singduir ee qxuiw ang'axbow laii jiax quewmee iong :ee, simrjiww zidsii marr e dirr hiax.
Maxmah vangqingx ee jniar duiwbin, u jit xee mngg, packuix jit knuar, qniaa zip jit qingx dua tnxiax/ hro guaw sniu kiw jit qingx dua vngrdiamr ee dua tnxiax/ tnxiax-lai he iyiw, ser liauu dyh-aw/ lewdauw jngsikpinw/ u gagdui decc enxjaur; guaw dirr aurbin ee vangqingx tniax diyc imqagsniax, m jaix ui' dyhh tuann .laii :ee. Dua tnxiax jit xee langg iarr byy, jixu gagdui dua sniax habjaur buxkig/ jinwhingkig.
Vngrdiamr dua tnxiax ee gagdui iwbi diyc, sewsiok/ cue hyxsngw :ee. Si'angw marr be sniu .diyc, dirr jiacc naurcaw ee mngg aurbin e si imqanx, qang jit dongr qenwdiogbut-lai neh! Dua tnxiax jitt xee bang ee iwsiong ersaih qongw, duiww guaw iacc si sewsiok ee giyhciyr, mrqyxx jixsirr guarviauw, vuerau unxcangr :ee si cavet jin' dua ee mic, dirr ziongxnau ee gagtuann sniax-diongx byy hxuad jyr ee kangkuer --- hilui sidgiamrsig qapp diauwquar quixhunn ee ding'aw, jitt nng xee longxx si amwsamr :ee, dar diyc sinvir ee hibii. Guaw qamxqag jiax si oia ee quliude, dua tnxiax dairviauw zidsii sewqair qapp cosiok cenxsniu.
Jitt xee bang siongrr diongriaur ee iwsiong si “sinlingg jiaudairsig”, ixx naurqiok viauxhen habtew ham' hilui sidgiamrsig, amwsi guaw duiww qidog ee qenwqair --- qidog vunxlangg dyrr si hilui. Nng hxang longxx si guaw genxqiur jap gua nii ee kywdee.
Hro langg qamxqag kacc qiquair :ee si, hilui ee genxqiur kiokk si vaxvah decc jyr. Jitt xee bang, ix jniajyr qidokdoo linghunn ee quanxlixzinn, jiauww qoxdai ee quandiamw, jiaxee langg longxx si virr qidog ee mngzinn Peter bxang diyc ee hii, ho'ngg diyhqniax :ee si, maxmah vnewjniaa virr tiacsnuar quixhunn ee vyxhorzinn. Knuar .laii, gunw verbuw longxx damhu “dirliauu linghunn” ee dang dnar, jixvutqyr sidjer-siong, dnar dirr guaw ee srinx-siong. Byy uansingg qycc ab dirr gunw verbuw srinx-siong ee iauxx u mow hxang, iuguann amcangr dirr amwiwsig nirr, danxtai qaixquad, tecnew guaw byy qaixqaud “dethak-siong” lenrqimsut ee juxiaur dairjir, dyrr si habtew, si iauxx bue huedab qidokdoo ee linghunn soxx tecud ee bunrdee. Cuxgua, kanciuw ee jiongsingx zimrbu --- iuxquanx sxingr vxuex tuansuad ee juxiaur genxqiur qangjog marr byy uansingg. Huesiongw guaw dirr “qidokqaur sidai” tyxlun hilui siongrdingx sii, taukag-lai puu .cud .laii qimcuiwangx qapp jauxcue sxingr vxuex ee qingxsiong. Narr m si byy guanrir jongg zip kanciuw ee lingxhik, guaw kingxding e qra sxingr vxuex ee tuansuad lap .zip .laii guaw duiww lenrqimsut ee genxqiur.
Dirr qiwig-lai, vaxvah si sriu .quer Amfortas (sxingr vxuex kisutuann ee lingxsiur)ee siurhairjiaw, si jit jiah siongkauw byy hxuad dri hyw ee qimcuiwangx --- jitt xee siongx si qidog ee siurjue, lenrqimsu uirr dirliauu jitt xee siongkauw, duicue idi ee banrlingiyc. Exkauw ee Parsifal, guaw donglenn qiqanx si jitt jiongw vnerjingr ee qenwjingwzinn, cniurr Parsifal qang, u cuir marr qongw be cud ue, qandna' erdangr iong amwsi :ee. Sidjer-siong, vaxvah jurlaii m bad duiww dongrbut hingsiong ee qidog siongrdingjuxgi sanxsingx hingwcur. Itdit qaur quewsinx, uac dirr qidok irgenn/ ingwunw ee tongwkow-lai, jit diamw aw dyrr byy gno diyc jex si haurlyy qidog ee qetqyw. Ix zinruii jurqiw ee tongwkow si qywzinn ee vnertniar, tniax isux ee dionggenn dyrr e hyw; byy zinruii jex dirr poxpenr iwgi-siong si qidokdoo ee kow. “ Qaliabtair” qongw “henrjai decc uac, m si guaw, si Qidog dirr guaw ee lairbin decc uac.( 2:20)” jurlaii byy jinjniar cimzip ix ee simlingg, jixiaur jid'err sniu diyc jongqaur ee jiongxjiongw bunrdee, vaxvah dyrr qniax qaxx qui' sinkux pipii cuah/ qandna' sniu beh buanxjiog sinwgiongw/ sinwgiongw kiokk pacpuar ix ee sinwgiongw/ jex si hisingx lixsingr ee siarlew. “ m si soxu ee langg longxx erdangr jiapsiu jitt diauu qaiwlut, jixu jitt kuanw unsur ee langg jiacc u. u langg dui' cutsir dyrr byy sikhap qethunx; ... u langg si uirr tenqog ee enqor byy air qethunx. Erdangr jiapsiu :ee dyrr jiapsiu. (Matair 19:11/12)”. bongbok jiapsiu be inxhiongr qaixquad ee lo. Qigqex qandna' guande tingg kax byy jinwvo, xe jit dai qycc rair huwcud diongrdua dairqer.
Jiongww sinn ee dongrbut hingsiong digdingx viauxbingg, jiongww sinn m na tnuar cud qaur ciauzinn ee huanruii, qycc jinwzip byy sriok zinlui ee ongqog-lai. Qokk jiongw dongrbut dyrr si inx ee ngiaw, dairjurzenn vunxsinx qra jitt jiongw ngiaw qapp sinn ee ngiaxsiong lenqed. “qidog ee hii” viauxsi, haurlyy qidog hiaxee langg vunxsinx dyrr si hii --- su'iaur dongrbudsid jiauwqor ee amwiwsig linghunn. Hilui sidgiamrsig si qauwhue “dirliauu linghunn” ee dong'girsuu; qaxnaxx siursiongjiaw hro jurqiw diyhsiongx qang, qangrkuanw, idirjiaw marr erdangr idi jurqiw. Dirr jitt xee bang kuriuw diongriaur iwgi :ee si, kuriuw quatding singwjig ee hingdong si ui' sixjiaw ee iwsig gua hitt xee sewqair, dyrr si amwiwsig sewqair duiww sixjiaw soxx jyr :ee.
Dirr guaw sing'uac ee jitt xee qaidnua, guaw iuguann byy iwsig diyc gauw qingqah jikzim ee vunxjid iwgi, byy hxuad duiww jitt xee bang jywcud ho'ngg buanxir ee qaixsueh, qandna' u qamxqag diyc ham'ir. Dirr guaw siaw cud “dab Job” jinwjingg, guaw iuguann diyh'air kikhok luersimx siongrr dua ee huanxkongr.
Dingxbin hitt dnxua ue erdangr dirr “qidokqaur sidai” cue diyc/ jitt vunw ceh tyxlun diyc qidokdoo ee simliw bunrdee. Job si qidog ee moxjiongw diaurtauu. Jitt nng langg ee quanlenn si sriu koxlan ee quanliam. Qidog si dairter siongrder siurkow ee lyvok, Job marr si. Qidog ee jinghongw si, sewqair jiongxjiongw juerog si koxcow ee qinguann, qidokdoo siurkow si poxpenr ee qetqyw, siamw be quer sanxsingx jit xee bunrdee: si'angw qaix uirr jiaxee juerog dnax jikzim? Qruix qauw drew, congwjy jitt xee sewqair qapp jiaxee juewog :ee, si siongrder vunxlangg, incuw, uirr ter zinlui ee miarun siurkow, Ix jniajyr qidog.
“Qidokqaur sidai” jerje vaiw tec diyc jitt sinsingr hingsiong ee qongbingg/ oamwbin, vixzuu, “siongrder ee hunwno”, qingwuir siongrder ee qaiwlut qapp “mair hro guaw sriu diyc iuxquaiw” ee qiqiuu. Siongrder hingsiong ee maudunw dirr “Job” huathuix qik diongriaur ee jok'iong. Job hibang, dirr moxjiongw iwgi-siong, siongrder e kia dirr ix srinx-vnix laii huanxduir siongrder; jitt sii lanw erdangr uahlingr knuar diyc siongrder si zuarr nirr viqiok ee maudunw, jex si “dab Job” ee juxiaur luiriongg.
YWZINN QENWQAIW EE VIAUXDAT
Guaw siaw jitt vunw ceh iauxx u jit quaw guarjai ligliong. Dairjiongr/ vnerlangg tecud jerje bunrdee, hro guaw qamxqag, duiww henrdairlangg jiongxjiongw jongqaur bunrdee, guaw rair kacc bingkag viauxbingg libdniuu. Je nii laii, guaw itdit diuduu, jaix anne jyr e henx kiw jitt dniuu dua hongpyx. Juewau, bunrdee ee qinxviksingr jipuer guaw, vutditvud huedab. Huedab ee hongsid ham' bunrdee he dirr guaw binrjingg qangrkuanw, ciongbuanw qamxjingg ee texgiam/ iuxir suanxdik jitt jiongw hongsid, uirr piacbenw hro langg zinrding guaw itsimx sniu beh suanvyr moxjiongw jinliw ee inwsiong. Gauw ee “dab Iokvig (Job)” jixvutqyr si viauxdat qywzinn qenwqaiw, hibang erdangr inxkiw dairjiongr cimsniu, byir siongser suecbingg moxjiongw auwbiau ee jinliw. Mrqyxx sinhakqax jikvi guaw ixqingx anne jyr ar, guan'inx si sinhak susiongxqax taiww quanwsir qapp ingxuanw ee jinliw ongxlaii, duiww qitnax jinliw itbuu-soxdix. Budliw hagqax rue cud quanjuw ee qetqowdoo, qongw, jex si guanjuw sii, vingrr m si viauxdat jex si ingxuanw jinliw. Mrqyxx sinhakqax m bad jurzenn kyhak, iuqii si simliw suuii. Hunsig simlixhak ee jailiau (juxiaur ee sursit) qowsingg lunrsut --- ixx itdir ee hingsid dirr qokk soxjai/ sidai ciangjai cuthen ee lunrsut.
Iokvig binrduir soxu paiwvet bunrdee, qangrkuanw laii qaur guaw ee bang-diongx.
Jitt xee bang jit kaisiw, guaw kir knuar jaw dyrr quewsinx ee vaxvah, ix druar dirr jngkax (guaw m jaix sniaw soxjai), knuawqnir jit jxy jap-veh sewqiw ee cur, jerje vangqingx, ixqibb quixarr xui ee huwsiok qenwdiogbut, longxx jamxzenn dua. Aurlaii jiacc jaix, jitt jxy guanlaii si jnuajuiw liauiongw luxdiamr, jerje diongriaur zinbut/ cutmialangg/ ongcinx quiwjok marr bad dirr jiax druar .quer, qidiongx quixarr xee ixqingx quewsinx, sixtew junkngr dirr derharsig/ vaxvah decc knuawsiuw.
Jin' qinw dyrr huathen, vaxvah m na si knuawsiuw narnia, qycc si jit xui u miaa ee hagjiaw (ix quewsinx jingg m si anne). Guaw dirr ix ee cecvangg ham' ix qniwbin, qiquair ee si, mow xui isux (nihuer ham' guaw cavutdyx) qapp inx qniaw (nng langg longxx si jingsinn isux) marr jairdniuu. M jaix si guaw tecud bunrdee, iacc si vaxvah juxdong beh qaixsueh sniaw, ix ui' cecqer tec lyc laii jit vunw jin' dua vunw ee ceh --- dang ~ ee “singwqingx”, ham' guaw dosusig hitt vunw “Merian singwqingx” qangrkuanw. Cecpuee si suahii-puee vaujongx, siamxsih huatqngx. Vaxvah henkuix “quriog juansux” (guaw iyh si henx qaur derr go qngw ), jiurr mow jit jed kaisiw qaixsueh/ qinw qycc liuxliac, jin' vaxhak ee kuanw, guaw suacc duer be diyc. Qandna' juwir .diyc, ix ee ue byiwdiongx tauwlo cud honghur ee diwsig, guaw suibongw liyc aw liauxqaiw jitt jiongw diwsig ee diongriaur, kiokk byy hxuad sikdongx pingpnuar/ jiangxag, knuar cud mow isux qinvunw m bad, ix ee qniaw kaisiw ciyr cud sniax, Inx qamxqag, vaxvah decc jyr ciauquer jurqiw linglik ee dairjir, ix qongw :ee jixvutqyr si laurhuer-aw sehsec liam ee huiwue ziiw. Vutqyr guaw jin' cingcyw, ix soxx qongw :ee m si vnertair ee qigdong, marr m si gongrue; sianghuanw, qongw jiacc je, bad jin' cimx kacc qamxdong langg, jixsirr gunw gong byy hiauxgno ix ee ue. Ix soxx qongw :ee qik diongriaur, cimx cimx kip'inw guaw. E qongw qaxx jiacc qigdong, si ix taukag-drew ciongbuanw cimkig ee quanliam, kiokk rair dirr gunw jitt snax xee naxx cidaix ee binrjingg qongw, guaw qiksimx qycc qamxqag kyxsiyh.
Hitt nng xui jingsinn isux soxx henwcud :ee, si cenxvyc ihak quandiamw/ marr ingxhiongw diyc guaw. Inx nng xui dairviauw guaw ee imngiuaw --- derr id/ zi vanxvunw, dyrr si ve qapp qniaw.
Zenau, qingxsiong qaixvenr. Vaxvah ham' guaw kia dirr cur taujingg, binrduir kngr caa ee cngkor. Gunw tniax diyc dimdang ee sniax, cincniu u langg qra dua der cavanw siwqer luan hed/ qamxqag jiwjiyw u nng xee qanglangg/ vaxvah viauxsi jitt xee xui jywquiw/ si moxjiongw quixquair ee ziangxnaursniax.
Gunw qniaa zip kir cngkor/ siwvnix si qau ~ ee viah. Sun ec bih bih ee lautuix vreh kiw kir qaur zi lxauu, knuar diyc qiquair ee qingxsiong: jit qingx ham' Fatehpur Sikri (Inwdo vakhongx ee sniadinr) Sultan Akbar ee huergirsig itboo-itngiu ee dua tnxiax/ quann ~ ngihingg vangqingx, en' viah si jit dy kuann-hxingg ee cuandngg/ u sir jxy qiyy tongx qaur jit xee binrtangxhingg ee diongsimx/ diongsimx kia jit qix dua ngitiau/ siongrr dingxquann si Sultan ee ngihingg jeriw/ ix je dirr hiax hiongr qunsux, dethagqax qongxue/ jiaxee langg jiauww cuandngg ee ngihingg viah jre. Jingxqyy qowsingg jit xee dua ~ ~ ee Mandala, jin' jingwkag ham' jinjniar ee huergirtniax siy' duiwingr.
Bang-diongx, guaw tudzinn huathen, dionghngx u jit jxy qiardit ee lautuix, didtongx qaur viah siongrr quann ee xui (jiax ham' henrsit uanjuann byy hac). Lautuix ee siongrr dingxguann u jit dy jin' ser ee mngg. Jitt sii, vaxvah qra guaw qongw : guaw beh inxcua liw qaur siongrr quann ee soxjia.” zenau ix qui .lyc .laii, kauwtauu dah dervanw, guaw jiauww ix ee ngiu qui lyc laii, simjniaa huisiongg qikdong, mrqyxx tauu byy hxuad kap qaur dervanw, dairiok iauxx cax jit qonglii, jiwjiyw guaw duer vaxvah jyr ar. Hionghiongg, guaw jaix dingxtauu jitt xee mngg tonghiongr jit xee cnicinr vangqingx, King David ee duarjiongr Uriah druar dirr hiax; King David uirr beh duat Uriah ee kanciuw Bathsheba, qingwzenn bingrling survingx dirr digzinn binrjingg dyjauw, kiwsad Uriah, jin' be qenwsiaur cutbe Uriah.
Quanhe jitt xee bang, guaw iauxx beh jyr quiw diamw qaixsueh: bang-diongx jit kaisiw ee jingqingw biyue ee si, amwiwsig ee zimrbu si zuhyy uansingg ee, guaw qra jitt xee zimrbu lauu hro “vaxvah”, dyrr si amwiwsig. Ix henxzenn bee diyc “singwqingx” (kyxlingg si “congwsewqir”?), qycc qib beh qra ix ee hiauxgo juanxdat hro langg'. Suahipuee viauxsi “singwqingx” vauhamm ee, si amwiwsig ee lueriongg, hii u cuir kiokk be qongxue, byy iwsig. Vaxvah byy singqongx qra jitt nng xee luerhamm tuandat hro langg', guan'inx si, vorhun tniajiongr byy hxuad lixqaiw, vorhun si gugong duar diyc ok'ir.
Sriu jric au, gunw qniaa .quer .laii qelo “lingrgua jit vingg”--- quixquair uahtiaur ee soxjai. Quixquair henrsiong tongsiongg huatsingx dirr duxbecc jinwzip cingcunqii ee siauwlenlangg jiuuii; iarr dyrr si qongw, guaw iauxx bue singsik, byy jurqag. Bang-diongx ee Inwdo viauxbingg si “lingrgua jit vingg”. Dng' guaw dirr Inwdo sii, huergirtniax ee Mandala qetqor kaksit hro guaw inwsiong cimkig/ qamxqag hex jaiww henwcud ham' diongsimx iuxquanx ee lueriongg/ diongsimx si Sultan Akbar ee vyxjy/ ix tongxdir jit xee derkux/ cniurr King David qang, si “jitt xee sewqair ee qunongg”. Mrqyxx dirr King David hitt xui duarjiongr si buqox ee hisingjiaw --- diongho jniawdit ee Uriah/ si King David cutbe jiacc siw dirr duiwdik ee ciuw-lai. Uriah si qidog ee irqyr, mrqyxx qidog jitt xui sinn-langg virr siongrder kiwsag ar. “jxuw ar, liw uirsniaxmic vangwsag guaw?” David jiamwiuw Uriah ee kanciuw. Aurlaii, guaw jiacc bingvik iuxquanx Uriah ee vixzuu dauwdew iwbi diyc sniaw: si duiww “quriog juansux” siongrder hingsiong ee siangdingg maudunw, guaw m na virr vig qongkaix qongw .cud .laii --- jex duiww guaw iuxhai-buli, sixsinn marr ui' guaw ciuw-lai cniuxduat guaw ee kanciuw.
Jex dyrr si bih dirr amwiwsig danw gauw ee dairjir/ jitt xee miarun, jixu jiapsiu. Qaix kaksit kauwtauu qaur de, hro guaw ee kiamsun drat qaur uanbiw. Mrqyxx mow jiongw dairjir hro guaw berdangr uanjuann junjiaur, simrjiww qandna' cax jit qonglii, “itcer jin' hyw, byy qraur jiaujngg.” guaw srinx-siong ee moxjiongw mic m kingw ngawtauu sunrjiongg, qycc quatsimx m jyr jit buew exkauw ee hii; narr m si juriuu ee langg, srinx-siong u jitt jiongw mic, dirr qidog cutsir quiw vah nii jingg “Iokvig qir” be virr siaw .cud .laii. Langg jongw u moxjiongw susiongw-siong ee vyxliuu, dyrr si binrduir sinn ee amwsi marr qangrkuanw, narr byy, jnuaxngiu erdangr iongxiuw juriuu? Narr si jitt jiongw juriuu berdangr duiww uihiap juriuu ee siongrder jyrsingg uihiap, qycc u sniaw loriong?
Incuw, Uriah si sing'uac dirr viw Akbar kacc quann ee soxjai. Cniurr bang-diongx soxx qongw, ix simrjiww si “siongrr quann ee junjai”, jitt jiongw qongxhuad duxhyw sik'iong siongrder, duhuix lanw si dramm Byzantium ee gersudpinw. Dirr jiax, guaw zimxvutjur sniu diyc Vudjow/ qitnax jiongww sinn ee quanhe. Duiww kensingg ee Ajiulangg, Vudjow si jiwqyx-busiong :ee, si juadduir :ee. In'ui jitt xee guan'inx, Theravada Vudqaur(Theravada Buddhism) itdit virr huaigii si businlun, jex sidjai si uanongw. Kyr jiongww sinn ee uilik, langg jiacc erdangr dongrcad jyrbudjiaw, simrjiww virr siurkuann dirr vunxjid-siong siaubet banrbut ee kuanlik, iarr dyrr si huixdiau langg duiww jitt xee sewqair ee iwsig. Dnaxx langg ixqingx kyxiw liriong hongwsia henrsiong laii sngxdng derqiuu itcer qydingw singbut ar. Vudjow duiww sewqair qruix kangx ee quanliam amwsi .quer: tauwquer dua qakgno/ lunhuee (Nadana) --- berdangr piacbenw diwsuw nilau/ vnertniar/ sixbongg ee inqyw quanhe --- erdangr virr pacdng, junjai ee cywqag qetsog ar. Schopenhauer duiww iwjir quilap cud ee hiyxding, irqyr ixqingx vikqin birlaii bunrdee. Jitt xee bang hencud jaw dyrr junjai dirr zinlui ee susiongw/ diaurtauu : jyrbudjiaw ixx jit xee ser kiokk si quanqenr ee insor, ngiaa quer jyrbudjuw ee quanliam.
Qingquer jitt crur bang-diongx sewqair iulamw au, guaw rair dngw laii siaxjog. Dirr “qidokqaur sidai”, kaisiw duw diyc su'iaur hunvet qaixquad jit herlet bunrdee. Guaw bad iwdoo qaixsueh qidog ee cuthen zuhyy huhap jit xee sinx siqanx ee kaisiw, jit xee hilui ee sidai. Qidog itsingx kecquanx ee tenbunn surqnia --- cunhunx (zit-xia vnedngg) jinwzip jap-zi qiongx ee sianghii-qiongx --- jiqanx u dongsisingr, incuw, qidog si “hii” (cniurr dirr qidog jingg ee Hammurabi [ca.1795-1750BC] si “ngiuu” qangrkuanw), qycc ixx jitt xee sinx sidai ee tongxdirjiaw cuthen. Jex dyrr si guaw dirr lunrbunn dongsisingr: jit jiongw hui'inqyw quanhe ee lenqed guanjig (Synchronicity: An Acausal Connecting Principle) soxx tyxlun ee dongsisingr bunrdee.
Dirr “qidokaur sidai” soxx qongw .diyc ee qidog bunrdee, juewau inxdy cud guaw zuhyy qinqir qywzinn ee texgiam laii viauxdat Anthropos, iong simlixhak sudgiw laii qongw, dyrr si jurtew henrsiong bunrdee. “cud jurr iwsig ji' qinx (1954)” guaw iwdoo huedab jitt diamw. Dirr jitt hongbin, guaw quansimx ee si iwsig/ amwiwsig jiqanx ee horsiong jok'iong/ ui' amwiwsig qaur iwsig ee huatdenw --- ixqibb qyckacc dua ee zinqeh (luersimx ee langg)duiww muixx jit xee qywtew ee sing'uac ingxhiongw.
Jitt hongbin ee genxqiur itdit qaur “sinvir habtew” jiacc sngr uanbuanw. Jaiww crur qongw diyc juanxii quanhe ee bunrdee, jiauww guaw guanlaii ee iwdoo siaw, qra lenrqimsut ee juanvo lueriongg knuawjyr jit jiongw lenrqimsut simliw/ cimdo simlixhak ee lenrqimsut qicow laii viauxdat. Dirr “sinvir habtew”, jiwjiyw hro guaw ee simlixhak jit xee henrsit derui, qycc qenwlip dirr ligsuw qicow-siong. Anne guaw ee zimrbu uansingg, qangjog qetsog, marr kia jai ar. Dng' guaw duw diyc qivunw, dyrr jiapciog diyc kyhak lixqaiw/ jawnii ee texgiam/ ixqibb guanhingg ee digsingr lingxhik. Beh duiww jiax jinr jit vo kyhak lunrsut si u kunwlann :ee.
Dirr jiaxee duiww guaw genxqiur qangjog ee lunrsut, dongzenn qandna' si dairkair aw qongw .quer narnia. Guaw qaix qongw kacc je/ iacc si kacc jiyw quaw jiacc driyc. Jex si limsii sanxsingx :ee, jitt sii hingwcur qongw .diyc :ee, naxcniu guaw jitmaw decc qongw itsingx ee qowsu qangrngiu, liauxqaiw guaw qangjog ee langg kyxlingg duiww inx u vangjan, qitnax ee langg diyhh duiww guaw ee quandiamw singx u liauxqaiw jiacc e bad. Guaw ee itsingx si guaw jiongsu .quer ee dairjir, si gauw ee kyhak qangjog; jitt nng jiongw hunx be cud binghenw ee qaiwsnuar, si guaw luersimx huatdenw, henr hro amwiwsig lueriongg ee genxqiur qowsingg guaw jitt xee langg, vingrr qaixjy liauw ix --- guaw ee duwjog kyxiw knuawjyr guaw itsingx qinglik ee qokk diongdoo jam.
Guaw soxx siaw ee itcer, si luersimx he dirr guaw qingqah ee zimrbu, si jit qnia miardiong juwdnia/ vutditvud jyr :ee: siaw lyc laii rig .kiw dirr guaw simtauu ee dairjir, hro qamxdong guaw ee sinlingg dua sniax qongxcud ix beh qongw ee ue. Guaw jurlaii dyrr byy qitai u sniaw qionglet ee huanxingr/ u lat ee qiongrbingg; inx dairviauw si duiww lanw sidai ee voxsiongw, guaw e qongw jiaxee byy langg air tniax ee ue, sidjai jin' bunai. Incuw, ciangjai qamxqag qodnuax, digvet si kixtauu ee sii. Guaw jaix guaw ee ue byy sriu langg huangingg, jitt xee sidai ee langg si jiacc lann jiapsiu duiww u iwsig sewqair soxx sna' huan :ee. Dnaxx, gauw ersaih qongw, guaw did diyc langg qra guaw ee kingxding --- ngiaa quer jerje guaw soxx irliau :ee, jex dendyww hro guaw diyhqniax, qamxqag jixsirr jyr liauw erdangr jyr ee itcer. Byy gibun :ee, guaw jidsiwlangg ee qangjog vunxlaii qaix jyr qyckacc je, marr rair jyr qyckacc hyw jiacc driyc, mrqyxx jerje dairjir si guaw ee lat crunx be qaur hiacc hng kir :ee.