Hitt sii, Purnamaitreyaniputra dirr jiongwlangg lairdew an' jyrui vreh kiw, jniawvingg qingqah teh teh, jniawvingg katauux kap de, habjiongw qiongqingr duiww Vuddyy qongw, "Dua junuix u dikhing ee Sewjunx, liw gauu uirr jiongwsingx quexbingg enxsuad Zulaii derr id iauwjiw. Dirr suathuad :ee lairdew, Sewjunx suwsiongg cuiquw guaw si vaii derr id :ee. Qinaxzit tniax Zulaii bibiau ee huat'imx, bersux cauwhni :ee beh tniax qnir li ciauquer jit-vah vo gua ee bang-aw decc hnix. Knuar dy' knuar be diyc ar, hyhongw si tniax? Vuddyy suizenn suanqangw suatbingg beh hro gunw siauduu gignaw, jitmaw iuguann berdangr siongser liauxted qauwgi qaur qaxx tauu jiww buew byy gignaiw ee qingxqair. Sewjunx, kyxviw Ananda inx jiaxee suizenn u kaigno, sipkuir huanlyw iauxx bue dubet. Gunw jiaxee dingxdingw dirr huathue lairdew qaur qaxx byy uilau qingxqair :ee, soxu huanlyw suizenn druu jin, jitmaw tniax diyc Zulaii soxx qangxsuad ee huat'imx, iauxx qycc u gignaiw huexgo. Sewjunx, narr junw sewqanx itcer (lak) qinkir, (lak) din'aix, (go) skandha, (jap-zi) cutcur, qapp (jap-veh) hunqair dingxdingw longxx si Zulaijongr, vunxzenn cingjing. Anxjnuaw dudzenn snix cud snuax, hyy, qapp dairde soxu iuxuii ee siongwtew? Jiauww sunrsu venwcenx jiuiuu, qetsog liauw qycjaiww kaisiw. Qycjaiww Zulaii qongw, de, juiw, huew, qapp hongx, inx ee vunxsingr uanbuanw hiongtongx, dirr huatqair siwqer longxx u, cingbingg tettyr ciangjai dilehh. Sewjunx, narr dairde ee vunxsingr venww muaw, nacc tangx iong'unw juiw dilehh? Narr juiw ee vunxsingr siwqer longxx u, huew dyrr be snix .cud .laii. Anxjnuaw qycc tangx bingvik juiw qapp huew nng xee vunxsingr dirr hukongx siwqer longxx u, be horsiongx lingziok siaubet? Sewjunx, dairde ee vunxsingr si satbat, jiongwgai. Kongsingr si hukongx, tongtaur. Anxjnuaw qongw jitt nng xee dirr huatqair siwlinn longxx u? Guaw m jaix jitt xee qauwgi beh qruix hiongr dyhh? Dandanx hibang Zulaii vywiongg dua juvix, uirr guaw qapp juui dairjiongr vuah kuix bebak ee hunn."
Jiaxee ue qongw suah, ix qui' sinkux pag dirr tokax (qingwvair), kimqingr ngwbang Zulaii busiong juvix ee qauwhuer.
Hitt sii Sewjunx qra Purna qapp huathue lairdew soxu qaur qaxx huanlyw druu jin, qim'au benw qycc yc :ee soxu Arhat qongw, "Zulaii qimzit uirr jitt xee huathue suanqangw busiong qauwgi lairdew jinsit busiong qauwgi ee guansingr, hro huathue lairdew linw jiaxee simsingr dniardiyc did sniabunn qongqyw :ee ixqip soxu itcer iauxx did nng jiongw hukongx qongqyw :ee beh hiongwsiong qruix dairsing ee Arhat dringw longxx tangx did diyc uiid jigbet dniude, dyrr si jinjniar ee aranya, dirr jingwkag ee soxjai siuhing. Linw jitmaw jimjiog tniax. Guaw qaidongx uirr linw suatbingg."
Purna dringw inx jiaxee kimqingr Vuddyy ee huat'imx, longxx diam diam tniax.
Vuddyy qongw, "Purna, dyrr cincniu liw soxx qongw :ee, 'Vunxzenn cingjing, anxjnuaw dudzenn snix cud snuax, hyy, qapp dairde?' Liw vingsiongg qamxx byy tniax Zulaii decc suanqangw qongxx qakdix ee guansingr si bibiau bingqngx, vunxguann ee qakdix bingqngx bibiau?"
Purna qongw, "U, Sewjunx. Guaw suwsiongg tniax diyc Vuddyy suanqangw jitt xee ywgi."
Vuddyy qongw, "Liw qongw qakdix bingqngx, si ix ee guansingr bingqngx jiacc qra qiyr juer qakdix, iacc si qakdix byy bingqngx jiacc qra qiyr juer bingqngx ee qakdix?"
Purna qongw, "Narr jitt xee byy bingqngx :ee qiyr juer u qakdix :ee, anne dyrr byy sniaw tangx bingvik :ee ar."
Vuddyy qongw, "Narr byy soxx bingvik, dyrr byy bingqngx ee qakdix. U soxx bingvik :ee m si qakdix, byy soxx bingvik :ee dyrr m si bingqngx. Byy binghen qycc iarr m si qakdix guandew jigjing bingqngx ee singr. Qakdix ee guansingr vitdnia si bingqngx. Narr bongrsiongw junw jyr bingqngx ee qakdix, jitt xee qakdix dyrr m si bingqngx :ee. Knikib bingqngx soxx qenwlip :ee, qacc si knikib bongrsiongw qenwlip :ee, dyrr e snix cud bongrsiongw ee linglik. Dirr byy qangg iacc byy jingcax lairdew, dudzenn hingsingg jingcax. Hitt xee jingcax qycc snix cud jingcax. Knikib jingcax, siy' qangg jurr anne qenwlip. Siy' qangg qapp jingcax huatsnix binghen, knikib jex, byy qangg byy jingcax qycjaiww qenwlip. Cincniu anne ziauxluan, horsiong danxtai snix cud lyhuann. Lyhuann quw .laii huatsnix din'aix. Jursinx siongwtew lyy lyy be cringx, an' jex inw kiw dinsiok ee lykow qapp huanlyw. Jinxkiw dyrr jniaa jyr sewqair, jigjing dyrr jniaa jyr hukongx. Hukongx junw jyr si qangg, sewqair junw jyr si u jingcax. Inx vingrr m si qangg iacc u jingcax jiacc sidjai si iuxuii ee hxuad."
"Bingqngx qakdix qapp kanghux hunrdun sna' vaixter danxtai jurr anne hingsingg dongriauu, mrjiacc u honglenw jipjiangw icii sewqair. Knikib kanghux snex cud iydang. Qenqor qapp bingkag vniwjniaa joxgai. Hex qimsiok si qenqor ee bingqngx qakdix soxx qenwlip :ee, mrjiacc u qimlunn laii vyxcii qoktow. Qenqor ee qakdix hingsingg qimvyw. Iydang ee bingqngx cud hongx. Hongx qapp qimx horsiong luwluac, soxiw e cud huexqngx jiaxee venwhuar ee texsingr. Qimvyw bingqngx snix cud cilun. Huexqngx hiongr quann cingwsiaux, soxiw u juixlunn vauhamm sibhongx sewqair. Huew cingwquann. Juiw harqangr. Inx horsiong huatsnix, qenqor qenwlip. Damlun vniwjniaa duarhaiw. Dasyr vniwjniaa kejiux qapp liogde. Uirdiyhh jitt xee dyrliw ee soxx drir, hex duarhaiw lairdew suwsiongg e kiw huexqngx. Hex kejiux qapp liogde suwsiongg u qanghyy jur zip. Juiw ee srer kacc sux huew ee sii dyrr qetjniaa qysnuax. Soxiw snuajiyc siy' kab e vniwjniaa huexiam, rngiuu .kir dyrr vniwjniaa juixkir. Tosuax ee srer kacc sux juiw ee sii, dyrr u cauxbok e tiuquann. Soxiw ciurnaa om duw diyc huew siyx dyrr vniwjniaa too. Too in'ui qiauxqaw vniwjniaa juiw. Jiaxee horsiong qauqad, suijai huatsnix. Jit xee suar jit xee ee henrsiong vnir jyr jingxjiw. Ixx jex jyr knikib ee inenn, sewqair siysuar byy dng."
"Qycjaiww qongw, Purna, bongrsiongw henxbingg m si iu' vadd hxang kiw :ee, si biaurbingg qakdix sitbee soxx drir. Bongrsiongw qacc qenwlip, bingqngx jingwliw be ciauquer jitt xee huanruii. Ixx jex soxx knikib ee inenn, imsniax ixgua tniax be diyc, siksiong ixgua knuar be diyc. Siktew, pangkuir, kiwbi, qapp bongkap singjiu liauw lak jiongw bongrsiongw. In'ui anne, qenwqak qapp bundix suacc hunkuix. Qangrkuanw ee giabjer siy' qaudnii. Qethap, hunlii, hingsingg, huawqaiw. Bingqngx henxbingg, siksiong dyrr huatsnix. Qnir henxbingg, sniu dyrr hingsingg. Qnir diyc qyc'ngiu :ee, iamwhin dyrr hingsingg. Qangrkuanw ee sniurhuad hingsingg air. Air jiuliuu vnir jyr jingxjiw. Jiaplap sniu vniwjniaa txex. Qauknaa siy' suar huatsingx, kip'inw qangg giabjer :ee, soxiw u in'enn laii snix cud kalaka, arbuda dringw. Taisingx, pacnng, damm-snix, iacc huar-snix, duer inx soxx qamxingr :ee laii snix cud. Nxng dogdok an' sniu laii snix cud. Txex in'ui jxingg jiacc u :ee. Damm ixx camcab laii qamxhuar. Huar ixx tiacli laii qamxingr. Jxingg, sniu, hap, qapp lii itjair horsiong venwhuar qaixii. Soxu sriu ee giabjer duer jex vuex .kiw .laii iacc dimm .lyc .kir. Ixx jex jyr knikib ee inenn, jiongwsingx siysuar byy dng."
"Purna, sniu qapp air qiongrdongg qethap. U air dyrr byy huatdo hunlii. Jurr anne soxu sewqanx verbuw qniaxsunx siysuar cutsir be qnaiwdng. Jiaxee dringw si ixx iogliam ee tambee jyr qinvunw. Tamliam qapp air qiongrdongg ju'iongw. Tamliam byy huatdo tingjiw. Dyrr soxu sewqanx pacnng, huar-snix, damm-snix qapp taisingx duer lat ee qiongg iacc ziok horsiong tunjiac. Jiaxee dringw si ixx satsingx qapp tamliam jyr qinvunw. Langg jiac ngiuu. Ngiuu siw .kir juanw jyr langg. Langg siw .kir juanw jyr ngiuu. Cincniu jitt kuanw simrjiww qaur jap jiongw singbut, siw .kir qycc siw, cutsir liauw qycc cutsir, horsiong laii siy' tunjiac. Og giap diddit snix .cud .laii, itdit qaur birlaii buqiongjin. Jiaxee dringw si ixx tautec ee tambee jyr qinvunw. Liw kiamr guaw jit diauu mia. Guaw hingw liw jewbu. Ixx jex jyr inenn, qinglik cingvah qiab (kalpa), ciangjai dirr snex qapp siw decc dngw. Liw air guaw ee simqnuax. Guaw siyh liw ee jusig. Ixx jex jyr inenn, qinglik cingvah qiab (kalpa), ciangjai decc qaudnii sokvak. Satsingx, tautec, imiok jitt snax xee jyr qinvunx, ixx jex jyr inenn, giabjer qapp qongqyw siy' suar byy dng."
"Purna, jitt snax jiongw dendywvingw e diddit siy' suar, longxx si bibiau qakdix liahjunw liauxted qakdix ee guansingr, knikib liauxted huatsnix cud siongwtew. Jiaxee longxx si an' bongrsiongw ee qnir snix cud. Snuax, hyy, qapp dairde soxu iuxuii ee siongwtew, jiauww sunrsu venwcenx jiu'iuu, knikib jiaxee hukongx bongrsiongw, qetsog liauw qycjaiww kaisiw."
Purna qongw, "Narr junw jitt xee bibiau ee qakdix vunxsingr si bibiau bingqngx, qapp Zulaii ee simx qangrkuanw byy qex byy qiamw. Byy diaurtauu hud .jit .xe laii snix cud snuax, hyy, qapp dairde soxu iuxuii ee siongwtew. Zulaii dnaxx did diyc bibiau kongsingr bingqngx ee qakdix. Snuax, hyy, qapp dairde jiaxee iuxuii ee sipkuir huanlyw anxjnuaw e qycjaiww snix .cud .laii?"
Vuddyy qra Purna qongw, "Piwlun qongxx u jit xee dirr jngtauu sitlo :ee, lamm qapp vag hunx be cingcy. Sitlo si knikib beluan jiacc sanxsingx iacc knikib liauxgno laii snix .cud?"
Purna qongw, "Cincniu jitt xee sitlo ee langg m si knikib beluan, iarr m si knikib liauxgno soxx drir. Anxjnuaw qongw? Beluan guanvunw byy qinkir. Anxjnuaw e kir knikib beluan? Liauxgno dyrr be snix cud beluan. Anxjnuaw e kir knikib liauxgno?"
Vuddyy qongw, "Hitt xee sitlo ee langg dngdecc cue byy lo ee sii, dudzenn u jit xee jaix lo :ee qra vyr lo hro ix bingvik. Purna, liw ee iwsur sniaw kuanw? Jitt xee langg dyrr sngr iauxx beluan. Dirr jitt xee jngtauu e qycjaiww sitlo bor?"
"Be, Sewjunx."
"Purna, Sibhongx Zulaii iarr si anne. Jitt xee beluan byy vunxguann, vunxsingr qiuwqingr si kangx. Ingxsii guanvunw byy beluan, jidsii naxx u qakcad diyc beluan. Qakcad diyc beluan, beluan dyrr bet .kir. Qakdix be snix cud beluan. Iarr cincniu u bagjiujingr :ee e knuar diyc hukongx ee huex. Bagjiujingr narr dubet, dirr hukongx ee huex iarr bet .kir. Vorvinn u jit xee gong langg dirr hitt xee hukongx ee huex soxx bet ee hukongx soxjai danxtai huex qycjaiww snix .cud .laii. Liw knuar jitt xee langg si gong iacc kiauw?"
Purna qongw, "Hukongx lairdew guanvunw byy huex. Bongrsiongw qnir huex snix-bet iacc qnir diyc huex bet .kir ee hukongx soxjai, jex ixx si cywluan dendywvingw :ee. Suacc beh danw ix qycjaiww snix .cud .laii, jex sidjai si denqongg gongrsniu. Tacc diyhh qycc laii quatding jitt xee langg si gong iacc kiauw?"
Vuddyy qongw, "Dyrr cincniu liw soxx lixqaiw :ee. Anxjnuaw qycc mng qongxx soxu Zulaii Vut bibiau qakdix bingqngx ee kongsingr anxjnuaw tangx qycc snix cud snuax, hyy, qapp dairde? Qycc kyxviw qimkongr lairdew jniawqimx camcab. Qimx danid sunjniar be qycc venwjyr capjap. Dyrr cincniu caa vniwjniaa huexhux, be qycc dingg vniwjniaa caa. Soxu Zulaii Vut ee potee Nirvana iarr si cincniu jitt kuanw."
"Purna, liw qycc mng qongxx, de, juiw, huew, qapp hongx, inx ee vunxsingr uanbuanw hiongtongx, dirr huatqair siwqer longxx u, decc huaigii qongxx juiw qapp huew ee vunxsingr jnuaw be horsiong lingziok siaubet. Liw qycc mng qongxx hukongx qapp soxu dairde dirr huatqair muaw siwqer, be habhyy :ee suacc tangx horsiong ionglap. Purna, piwlun qongxx hukongx, ix ee texsingr vingrr m si quntew ee siongr, suacc byy qurjuat qitax itcer siongwtew kir huathuix. Inhyy e anne? Purna, hitt xee hukongx, zidtauu jiyr dyrr bingqngx, hunn dunxjac dyrr oamr, hongx iyy dyrr dinxdang, tnix jnee dyrr dingcingx, juixkir gingg lehh dyrr venr lyy, tosuax jikju dyrr jniaa ohnuaw, juiw cringx dyrr tangx dywjiyr. Liw ee iwsur sniaw kuanw? Cincniu jitt hy qokk hongbin itcer iuxuii ee siongwtew si knikib hiaxee soxx snix :ee, iacc knikib hukongx jiacc u :ee? Narr knikib hiaxee soxx snix :ee, Purna, zidtauu jiyr ee sii qacc zidtauu bingqngx, sibhongx sewqanx vnivnii si zidtauu ee sikcaiw. Anjnuaw kongdiongx qycc qnir diyc ngii ngii ee zidtauu? Narr hukongx si bingqngx :ee, hukongx ingqaix tangx qaqi jiyr qaqi. Anxjnuaw dirr vnuawmii iacc u hunbu ee sii be snix cud qongbingg laii jiauwiau? Qaidongx jaix jitt xee qongbingg m si an' zidtauu iacc hukangx laii :ee, qapp hukongx iacc zidtauu si byy jingcax :ee. Quanknuar .diyc ee siongwtew guandew si bongrsiongw :ee, byy sniaw tangx jixzin suatbingg. Iuqycc beh danxhau hukongx ee huex, dyrr qed jniaa hukongx ee qryw. Anxjnuaw qycc laii mng siongwtew lingziok siaubet ee dyrliw? Quanqnir ee vunxsingr gunvunw jinsit, bibiau bingqngx u qakdix. Bibiau ee qakdix qapp bingqngx ee simsingr si dirr juiw qapp huew jinwjingg dyrr u :ee. Anjnuaw qycc laii mng be horsiong ionglap ee dyrliw? Jinsit bibiau u bingqngx ee qakdix iarr cincniu jitt kuanw."
"Liw liac hukongx juer bingqngx dyrr u hukongx henxhen. De, juiw, huew, qapp hongx it'id hutsnix bingqngx, dyrr e it'id henxhen. Narr soxu itcer huatsnix bingqngx, soxu itcer dyrr longxx henxhen. Anxjnuaw qongw longxx henxhen? Purna, piwlun dirr jit xee juiw-diongx henxhen cud zidtauu ee ngiaw. Nng xee langg dangjee quanknuar juiw-diongx ee zit. Jit xee qniaa hiongr dangvingg, jit xee qniaa hiongr saivingg, dyrr qokk langg u zitdtauu duer inx nng langg kir. Jit xee dangx jit xee saix, taujingg byy jit xee junxkag ee bogpiaux. Ingqaix be pnaiw mng kiw qongxx zidtauu jit xee, anxjnuaw e duer qokk langg kir? Jit vingg jit xee zidtauu qacc u siangx xee, anxjnuaw qandna' henxhen jit xee? Dirr hukongx bongrsiongw lairdew dngxsec, byy zimrhyy vinsinr iacc jingwqur. Purna, liw iong sikdinn hukongx dirr Zulaijongr lairdew horsiong jingvniar horsiong cniuxduat. Acc Zulaijongr suisii vniwjniaa sikkongx, dirr huatqair siwqer venww muaw. Soxiw qongxx dirr Zulaijongr lairdew, hongx cuex dyrr dinxdang, hukongx dyrr dingcingx, u zit dyrr qongbingg, u hunn dyrr oamr. Jiongwsingx beluan, jybun, uivue qakdix suacc qapp siogdinn camcab, soxiw e huatsnix cud siogdinn ee lygiap jiacc u sewqanx ee siongwtew. Guaw si ixx byy bet byy snix ee bibiau bingqngx qapp Zulaijongr habhyy. Acc Zulaijongr bibiau u qakdix, bingqngx uanbuanw jiywqngx huatqair. Soxiw qongxx dirr Zulaijongr lairdew, jit dyrr si byy hanrliong, byy hanrliong dyrr si jit. Ser lairdew henxhen dua, dua lairdew henxhen ser. Byy venwdong ee dyrdniuu dirr sibhongx sewqair siwqer longxx si. Jit xee srinx dyrr vauhamm sibhongx byy qiongjin ee hukongx. Jitt qix xmngg tangx henxhen vyxquir huat'ongg ee qoktow. Jre dirr bisiyw din'aix lairdew iarr tangx juanw dua huatlunn. Bedduu siogdinn laii qapp qakdix habhyy, soxiw tangx huatsnix jinsit bibiau, u bingqngx qakdix ee vunxsingr. Acc Zulaijongr vunxdew dyrr si bibiau uanbuanw ee simliam, m si simx iarr m si kangx; m si de iarr m si juiw; m si hongx iarr m si huew; m si bagjiux, m si hni, pni, jic, srinx, iacc iwliam; m si siktew, m si snia'imx, pangkuir, kiwbi, bongkap, iacc hxuad; m si ganxsig ee derqair. Cincniu jitt kuanw simrjiww qaur m si iwsig ee derqair. M si bingqngx iacc byy bingqngx, iarr m si bedjin bingqngx iacc byy bingqngx. Cincniu jitt kuanw simrjiww qaur m si lau iacc siw, iarr m si bedjin lau qapp siw. M si kow, m si jip, m si bet, m si dy. M si diwhui, iarr m si did .diyc. M si dana, m si shila, m si virya, m si kshanti, m si dhyana, m si prajna, iarr m si paramita. Cincniu jitt kuanw simrjiww qaur m si tathagata, m si arhat, m si samyaksambodhi, iarr m si parinirvana. M si suwsiongg, m si hiongxhog, m si guaw, iarr m si cingjing. Cincniu jitt kuanw longxx m si knikib sewqanx iacc cud sewqanx ee enqor. Dyrr si qongxx Zulaijongr guandew bingqngx bibiau ee simsingr, dyrr si simx, dyrr si kangx; dyrr si de, dyrr si juiw; dyrr si hongx, dyrr si huew; dyrr si bak, dyrr si hni, pni, jic, srinx, iacc ir; dyrr si siktew, dyrr si snia'imx, pangkuir, kiwbi, bongkap, iacc hxuad; dyrr si ganxsig ee derqair. Cincniu jitt kuanw simrjiww qaur dyrr si iwsig ee derqair. Dyrr si bingqngx qapp byy bingqngx; dyrr si bedjin bingqngx qap byy bingqngx. Cincniu jitt kuanw simrjiww qaur dyrr si lau, dyrr si siw; dyrr si bedjin lau iacc siw; dyrr si kow, dyrr si jip, dyrr si bet, dyrr si dy; dyrr si diwhui, dyrr si did .diyc; dyrr si dana, dyrr si shila, dyrrsi virya, dyrr si kashant, dyrr si dhyana, dyrr si pranjna, dyrr si paramita. Cincniu jitt kuanw simrjiww qaur dyrr si tathagata, dyrr si arhat, samyaksambodhi; dyrr si parinirvana; dyrr si suwsiongg, dyrr si hiangxhog, dyrr si guaw, dyrr si cingcing. Cincniu jitt kuanw longxx si knikib sewqanx iacc cud sewqanx ee enqor. Dyrr si Zulaijongr bibiau bingqngx guanvunw ee simx. Lirkuix driyc qapp m driyc. Dyrr si driyc qapp m driyc. Anxjnuaw sewqanx samqair iuxuii jiongwsingx ixqip cud sewqanx tniax quer jniawhuad qapp knikib qakdix jiaxee ixx soxx jaix ee simx laii cikdok Zulaii busiong potee? Iong sewqanx ee gixgenn inw zip Vut soxx jaix soxx qnir. Kyxviw kimm, henn, qapp givee suizenn u bixbiau ee imsniax, narr byy bibiau ee jnaixlo, quibuew be huad cud sniax. Liw qapp jiongwsingx iarr qangrkuanw si anne. Vyxquir ee qakdix qapp jinsit ee simx sui' langg uanbuanw. Cincniu guaw jingxtauu-aw cic .jit .xe, haixinr dyrr huad qngx. Linw ee simliam jid'err giaa kiw, dairsingx dyrr kiw siogdinn ee lygiap. Jex si iu' byy qutlat qriuu busiong qakgno ee dy soxx drir. Tamluann siyxsingg siuhing, did diyc siyw siyw qongqyw dyrr laii buanxjiog."
Purna qongw, "Guaw hiongtongx bingqngx ee vyxquir qakdix ixqip jinsit bibiau ee cingjing vunxsimx qapp Zulaii ee byy jingcax, longxx u uanbuanw. Acc guaw ingxsii an' byy kaisiw ixlaii dyrr jysiu bongrsiongw soxx hai, quxdngg decc lunhuee. Qinaxzit tangx tniax diyc jiww sxingr ee ywgi, qiuwsit iauxx byy tetdew. Sewjunx, soxu bongrsiongw itcer juadbet, dogdok bibiau ee jinsingr ciangjai. Hyw dnaw mng Zulaii, itcer jiongwsingx inhyy u bongrsiongw, qaqi ziajac bibiau ee bingqngx, suar laii sriu dimlunn ee kow?"
Vuddyy qra Purna qongw, "Suizenn liw ee gignaiw u siauduu, iauxx u cunx quaw gihik bue druu jin. Guaw ixx sewqanx bogjingg henxhen ee jiongxjiongw dairjir jitmaw qycc mng liw. Liw qamxx byy tniax qongxx dirr Shravasti Sniaa lairdew u jit xee Yajnadatta, ix vorvinn dirr jaixsii iong qniar jiywbin, hnuahiw qniar-diongx ee tauu, bagbaii, qapp bagjiux tangx knuar hen hen, liauxau, suacc dngw siurkir, jikvi qaqi ee tauu be qnir diyc bin qapp bak. Ix liahjunw si mosinn-aw, byy-in.-byy-dnuax huatqongg ovec jongg. Liw ee siwsur sniaw kuanw? Jitt xee langg sniaw indnuax byy-en.-byy-qor huatqongg ovec jongg?"
Purna qongw, "Jitt xee langg dyrr si simx huatqongg, byy vadd jiongw enqor."
Vuddyy qongw, "Bibiau ee qakdix bingqngx, uanbuanw. Guanvunw uanbuanw bingqngx bibiau qacc qiyr juer bongrsiongw, beh tacc u kixinx? Narr u soxx kixinx, anxjnuw qiyr juer bongrsiongw? Jiongxjiongw bongrsiongw dngxsec horsiong knikib. An' beluan jikju beluan laii qinglik naxx din'aix hiacc je ee qiab hiacc quw. Suizenn Vut huatsnix binghen, iauxx berdangr dngxtauu. Cincniu jitt kuanw beluan ee iniuu, si in'ui beluan jurvunw dyrr u. Iwsig beluan byy in'inn, bongrsiongw byy soxx uaxlai. Iauxx byy snix .cud .laii, beh anxjnuaw dubet? Bersux did diyc potee qongqyw :ee, kunr cniw ee sii decc qongw bang-diongx ee dairjir. Simx dyrr sngr u jingbii u bingqngx, sniaw in'iuu beh kir cruw bang-diongx ee mihqnia? Hongwqiamx qycc byy indnuax, vunxdew dyrr byy soxx u :ee. Kyxviw hitt xee sniaa-lai ee Yajnadatta, tacc u sniaw in'iuu qniax qaqi ee tauu suacc ovec jongg? Hutzenqanx qongluan hiycdiam, liauxqaiw diyc tauu m si an' guarbin did .diyc .ee. Dyrr sngr qongluan byy hiycdiam, tauu marr byy sitlyc."
"Purna, bongrsiongw ee vunxsingx iarr cincniu jitt kuanw, beh tacc u sniaw junjai ee in'iuu? Liw narsaiw byy duer lecc siy' lensuar byy tingg kir hunvet sewqanx, qiabjer-qongqyw, qapp jiongwsingx jitt snax jiongw, snax jiongw knikib ee en'iuu dng .kir, snax jiongw kixinx dyrr be snix .cud .laii. Anne liw simdiongx cniurr Yajnadatta ee qongluan singwjingg dyrr qaqi hiycdiam. Hiycdiam dyrr si potee, cingjing buviw, vunxsimx bingqngx, vunxdew dirr huatqair siwqer dyrr longxx u, m si an' langg hiax did .diyc .ee. Tacc diyhh jiyh lydong qinqud qutlat decc siulen qriuu did bingjingr lehh? Piwlun qongxx u jit xee langg dirr qaqi ee snxax lairdew qad zuir jux, mrqycc qaqi byy diwqag. Ix dirr tahiongx sanr qaxx diyhh hiyh tnilo, diyhh jyr kitjiac siwqer jauxjongg. Sidjer-siong sanwciah laii qongw, vyxjux m bad prangw .qnir. Hutzenqanx u jit xee u diwhuiw :ee qra ix jixsi qongxx u hitt liap jux, simx soxx guan longxx e jniaa. Diwsuw jitt xee langg au .laii vnir dua huwongx, ix jiacc liauxgno vyxjux m si an' guarkauw did .diyc .ee"
Hitt sii, Ananda dirr jingwlangg lairdew dirr Vuddyy ee kax-vnix qnialew. Ix kia .kiw .laii qra Vuddyy qongw, "Sewjunx henrjai qangxsuad taii langg, tautec, qapp qan'imx jitt snax hxang giabjer. Snax jiongw knikib ee en'iuu dng .kir soxx drir, snax jiongw kixinx dyrr be snix .cud .laii, simlai cincniu Yajnadatta hitt jiongw qongluan singwjingg dyrr e hiycdiam. Hiycdiam dyrr si potee, m si an' langg hiax did .diyc .ee. Jitt jiongw inenn cingcyw bingvik. Anxjnuaw Zuelaii vorvinn kiwsag inenn ee ywgi? Guaw an' inenn ee ywgi, simx tangx did diyc kaigno. Sewjunx, jitt ee ywgi m na gunw jiaxee jiyw huer, u siurqar ee sniabunn-vuer :ee u texhue, jitmaw dirr huathue lairdew cniurr Maha Maudgalyayana, Shariputra, qapp Subhuti dingxdingw, inx an' lau vuer ee Brahman hiax tniax Vuddyy ee inenn ywgi, huatsimx kaigno did diyc byy lrau byy huanlyw ee qongqyw. Jitmaw Sewjunx qongw potee m si qinduer inenn ee ywgi. Anne Rajagriha Sniaa Maskari Goshaliputra dingxdingw inx soxx qongw ee jurhuad tenzenn dyrr vniwjniaa derr id ywgi. Dogdok hibang liw dua huad juvix, kaisi kexhuad gunw ee behik qapp iubun."
Vuddyy qra Ananda qongw, "Dyrr cincniu sniaa-lai ee Yajnadatta, ix singwjingg qongluan ee inenn narr erdid bedduu, anne be qongluan ee singwjingg jurzenn dyrr e cud .laii. Inenn qapp jurhuad tenzenn ee dyrliw dyrr si anne nia. Ananda, Yajnadatta ee tauu guanvunw jurzenn dilehh. Guanvunw dyrr an' ix qaqi kiw. Byy an' ix qaqi kiw dyrr m si jurzenn. Sniaxmih kuanw ee inenn diwsuw ix qniax qaqi ee tauu huatqongg ovec jongg? Narr tauu jurzenn dilehh, si inenn jiacc laii huatqongg, anxjnuw inenn byy diwsuw ix jurzenn sitlyc .kir? Guanvunw tauu dyrr be sitlyc. Huatqongg qapp kiongxhongg longxx si bongrsiongw laii snix .cud .laii .ee. Longxx m bad u venwcenx iik, anxjnuaw tec inenn juer jiawduanx? Narr vunxdew qongluan si jurzenn dilehh, vunxdew dyrr e huatqongg kiongxhongg, iauxx bue huatqongg ee sijun, qongluan cangr dirr dyc'ui? Narr byy qongluan si jurzenn dilehh. Tauu vunxdew byy bongrsiongw, anxjnuaw e huatqongg jauxjongg? Narr liauxgno guanvunw u tauu, iwsig diyc qongluann jauxjongg, inenn knikib qapp jurzenn dilehh dyrr longxx si kangpnar lunrsuad. Soxiw guaw qongw snax jiongw giab'enn narr dng dyrr si poetesimx. Potesimx snix .cud .laii, snix-bet ee simx dyrr bet .kir. Jex dna' snix-bet. Byy qikngiu ee jok'uii, bet-snix jiacc tangx longxx bet jin. Narr u jurzenn simx dilehh, anne dyrr bingvik ar. Jurzenn simx snix .cud .laii, snix bet, simx dyrr bet. Jex iarr si snix-bet. Byy snix-bet :ee, miaa qiyr juer jurzenn. Dyrr kyxviw sewqanx soxu ee siongwtew camcab jniaa juer ittew, miaa qiyr juer camcab ee vunxsingr. Byy camcab :ee, cringx juer vunxzenn ee vunxsingr. Vunxzenn m si guanvunw dyrr anne. Camcab guanvunw m si ittew. Camcab qapp vunxzenn longxx siar li. Lii qapp hap longxx m si inx qaqi. Jitt qxur jiacc qiyr juer si byy kangpnar ee lunrsuad. Potee (Bodhi) qapp liappuann (Nirvana) iauqycc jiokk iau'uanw, m si liw qinglik qiapsor decc qutlat siulen tangx jingwgno :ee. Suizenn liw erdangr amwliam sibhongx Zulaii jap-zi vxo qingx qapp bersux Gange Hyy lairdew ee suax hiacc je ee cingjing bibiau ee ywgi, hiaxee dna' hro liw qex qongw quaw kangpnar ee genlun. Liw suizenn damsuad inenn jurzenn, kakding u bingvik liauxqaiw. Zinsewqanx cringx liw juer bad derr id je :ee. Liw ixx bad jerje, siulen qapp hagsip luixjig jerje qiab ar iauxx berdangr benxduu Matangi ee qiaplan. Narr erdangr, tacc diyhh danw guaw ixx Vut taukakdingw sinsingr ee jimgenn, Matangi inx jaboxqniaw simlai ee gioghuew jiacc tinghiyh, suar did diyc Anagamin ee qongqyw, dirr guaw ee huatmngg lairdew, jingjinr u singjiu, aiwiok ee hyy dax .kir jiacc tangx hro liw qaixtuad. Soxiw qongxx Ananda, liw suizenn qinglik jerje qiab ee qiwdii cisiuw Zulaii unxbit bibiau giamqinw ee ywgi, lingkyw jit qangx siulen byy lrau (byy huanlyw) ee diwhui, laii qapp sewqanx hun qapp air nng xee kow li hng hng. Cincniu Matangi inx jaboxqniaw jurr quewkir sxer ixlaii longxx si juer qirluw. Iu' sinsingr ee jimgenn huawsiaux ix ee air ee iogbang, dirr huatmngg lairdew dnaxx huathy qiyr juer Vunxsingr Bikuni (bhiksuni). Ix qapp Rahula ee laurbuw Yashodhara qangrkuanw liauxgno siogser ee inenn, jaix ligser in'ui tamsimx qapp aiwiok laii jiahkow. Inx liamrqip diyhh siulen byy lrauu (byy huanlyw) ee senrgiap byy dikkag tangx tautlii ingdnii, iacc did diyc Vuddyy juer qiwzin. Anxjnuaw liw qaqi penr qaqi, qycc lauu druar knuar qapp tniax ee qaiwlai?"
Ananda qapp juui dairjiongr tniax diyc Vuddyy ee qawsi qapp hunwhuer, gignaiw qapp behik siauduu, simlai liauxgno diyc sit siongr, sintew qapp iwliam longxx kinsangx qapp anhyy, m bad jingrr u. Ananda qycjaiww visiongx lrauu bagsaiw, dirr Vuddyy ee kax-vnix qnialew, qui lehh habjiongw qra Vuddyy qongw, "Busiong dua juvix ee cingcing vyxongg gauu kaikew gunw ee simx. Liw e ixx jiongxjiongw inenn ee ywgi iong lirven honghuad laii qra gunw tehee qoxle, qra gunw soxu ee dimlunn qapp guduu inxcua cud koxhaiw. Sewjunx, guaw dnaxx suizenn singsiu jitt kuanw ee huat'imx, jaix Zulaijongr bibiau u bingqngx qakdix ee simx dirr sibhongqair siwqer longxx si, ionglap qauwiok Zulaii sibhongx qoktow. Itcer cingjing, vyxquir, jonggiamm, byy der viw ee bibiau bingqngx qakdix dirr huat'ongg qoktow. Zulaii suacc qycc jikvi qongxx qenwbunn je vingrr byy qong'iong, qongxx siulen hagsip byy hau. Guaw dnaxx bersux luxhingg beh dauhiyh ee langg, hutzenqanx did diyc tenongg sniuxsur lewdauw ee cuwtec. Suizenn did diyc dua qingx cuwtec, jongw .si rair an’ mngg zip .kir. Dogdok hibang Zulaii byy kiwsag dua juvisimx, kaisi gunw jiaxee dirr huathue lairdew soxu guduu be cingcyw :ee, kiwsag siyxsingg, taubuew did diyc Zulaii busiong liappuann kixcox huatsimx ee lo, hro u siurqar :ee jaix anxjnuaw hanghok ingxzit knikib ee inenn, did diyc Dharani, jinwzip Vuddyy busiong qakdix qapp qenwbunn."
Ue qongw suah, Ananda qui' sinkux pag dirr tokax (qingwvair). Dirr huathue :ee juansimx qitai Vuddyy ju'air ee vudjiw.
Hitt sii Sewjunx kyxlenn huathue lairdew hiaxee knikib qakdix qapp tniax quer jingwhuad :ee, inx dirr potesimx iauxx bue jurjai :ee, ixqip uirdiyhh aurzit aw Vut beddo liauxau, Vudhuad buexqii ee jiongwsingx huad potesimx, kuix busiong bibiau siuhing ee lo. Ix qra Ananda qapp juui dairjiongr suansi qongxx, "Linw jiaxee quatding beh huad potesimx, dirr Zulaii Vut bibiau samadhi be snix iawsen, ingdongx singx bingvik co’ huad qakdix ee simx nng xee qenquad ee ywgi."
"Sniaxmih si cohuatsimx nng xee qenquad ee ywgi? Ananda, derr id xee ywgi si, linw jiaxx narr kiwsag sniabunn laii siulen potee kaninw zip Vut ee qakdix qenwbunn, ingdongx jimjiog quancad knikib de ee cohuatsimx qapp dirr qongqyw ee de soxx did ee qakdix si qangg iacc byy qangg. Ananda, narr knikib de ixx snix-bet ee simx juer qinvunw siulen ee inenn beh laii qiucuw Vut ee kaninw qaur byy snix byy bet, hex si byy hau :ee. Uirdiyhh jitt xee enqor, liw qaidongx quancad bingvik sewqanx soxu kiwku tangx joksingg ee huatdo, longxx e venwcenx huixbet. Ananda, liw quanknuar sewqanx tangx joksingg ee huatdo lairdew dycc jit xee be huixhuai? Jongw .si quibuew m bad tniax quer hukangx e nua .kir iacc pnaiw .kir. Sniaxmih enqor? Kangx m si erdangr joksingg :ee. Soxiw an' tauu jiww buew be hai .kir iacc bet .kir. Anne liw sinkux lairdew, qenqor ee siongwtew si de, damlun :ee si juiw, bongkap siylyx :ee si huew, e iydang :ee si hongx. In'ui hro jitt sir hxang dnii diauu lehh, suacc qra liw bingcingx uanbuanw bixbiau u qakdix bingqngx ee simx hunx juer knuar, tniax, qamxqag, qapp qakcad. An' kaisiw qaur lorbuew, liw longxx dirr jitt go janr lyy dakdag ee qingxgu lairdew."
"Sniaxmih si lyy? Ananda, piwlun qongxx cringx juiw vunxdew si cingkir bingcingx :ee. Hiaxee ing'iax, too, suax, iacc huexhux, inx ee vunxjid si qenqor u joxgai. Jitt nng xee siongwtew ee vunxsingr dyrr si anne, longxx byy siy' sunrlun. U sewqanlangg cruw hex tosuahunw danr zip kir cingkir ee juiw lairdew. Too srid qenqor u joxgai ee vunxsingr. Juiw cingkir bingcingx ee vunxsingr bedbongg .kir. Guarngiu knuar .kiw .laii byy bingg, miaa qiyr juer lyy. Linw ee lyy u go dingg iarr si jitt kuanw ngiu."
"Ananda, liw knuar hukongx dirr sibhongx sewqair venwvenr, hukongx qapp quanqnir byy hunx. U hukongx byy tew, u quanqnir byy qakdix, horsiong qauqnaa hingsingg bongrsiongw. Jex si derr id dingg, miaa qiyr juer qiab-lyy. Liw ee sinkux si sir dua iauwsor laii qapjniaa juer sintew. Knuar, tniax, bongkap, qapp qakdix dongr lehh hro liw u joxgai. Juiw, huew, hongx, qapp too qycc hro liw ee bongkap qapp qakdix horsiong qauqnaa laii hingsingg bongrsiongw. Jex si derr zi dingg, miaa qiyr juer qenr-lyy. Qycc liw simdiongx qiwdii laii venrzin ee quanwsir e huatsnix cud diwsig qapp qenwbunn, vauhamm qapp henxsi cud lak jiongw siogdinn. Lirkuix siogdinn dyrr byy siongwtew, lirkuix qakdix dyrr byy vunxsingr, horsiongx qauqnaa laii hingsingg bongrsiongw. Jex si derr snax dingg, miaa qiyr juer huanlyw-lyy. Qycc liw jaxamr vutsii snix-bet byy tingg, qakdix qapp qenwbunn qenww beh lauu dirr sewqanx, giabjer unrjuanw qenww dirr qokdow decc censuaw, horsiongx qauqnaa laii hingsingg bongrsiongw. Jex si derr sir dingg, miaa qiyr juer jiongwsingx-lyy. Linw jiaxee ee qenwbunn guanvunw vingrr byy jingcax. In'ui jiongxjiongw ee siogdinn laii qecdng, byy inxdnuax laii snix cud jingcax. Vunxsingr lairdew horsiong u qakdix, decc jok'ing ee sii horsiong e uivue. Qangg qapp jingcax srid kir junxjinn, horsiong qauqnaa laii hingsingg bongrsiongw. Jex si derr go dingg, miaa qiyr juer mia-lyy."
"Ananda, liw jitmaw beh hro knuar, tniax, bongkap, qapp qakdix tangx ham' Zulaii ee suwsiongg, anlok, jurgnow, qapp cingjing e jiahqax, ingdongx dairsingx qingxsuanw snix-siw ee qinvunw, jiauww byy snix-bet uanbuanw cingjing ee vunxsingr laii juewjniaa. Iong cingjing kir dngxsec hiaxee hukongx, bongrsiongw, bet .kir, qapp snijniaa, hanghok huedngw qaur guanvunw ee qakdix. Did diyc guandew bingcingx ee qakdix, byy snix byy bet ee vunxsingr si knikib de ee simsingr. Zen'au uanbuanw singjiu qongqyw derqair siulen ee kakjingr. Kyxviw beh qra lyy juiw venr cringx, qra drew dirr jing jing ee kiwku, jing jing cimdimm byy dinxdang, tosuax qaqi e dimm .lyc .kir, cringx juiw dyrr henxhen dirr ganw-jingg. Jex qiyr juer co' hanghak kecdinn huanlyw. Kiwduu tosuax, juiw venr sunjing. Jex qiyr juer ingxuanw dng qinvunw ee bubingg. Bingqngx siongwtew jingbiau sunqed, itcer venwhuar henxhen longxx be jniaa juer huanlyw. Longxx qapp liappuann (Nirvana) cingjing bibiau ee qongdig u jiahqax. Derr zi ee ywgi si, linw jiaxee vitdnia beh huatguan potesimx, dirr posad kaninw snix cud dua iongxbingw, quatding kiwsag soxu iuxuii ee siongwtew, ingdongx jimjiog quancad, siongser cuiqiur huanlyw ee qinvunw. Jitt xee an' byy ixlaii huatsnix giabjer, virr ju'iongw laii snix .cud .ee dauwdew si'angwjyr, si'angw sriu?"
"Ananda, liw siulen potee, narr byy jimjiog quancad huanlyw ee qinvunw, dyrr byy huatdo jai'ngiaw hukongx bongrsiongw ee qindinn si dyc'ui dendywvingw. Soxjai dy' iauxx m jaix, beh anxjnuaw hanghok laii cruw diyc Zulaii qongqyw ee uircur? Ananda, liw quanknuar sewqanx beh qra qad tauw .kuix ee langg byy knuar diyc qad, beh tacc jaix anxjnuaw qra tauw .kuix? M bad tniax qongxx hukongx tangx hro liw huixhuai tiaclic. Sniaxmih enqor? Kangx byy hingsiong, byy qad tangx tauw ee enqor. Anne liw bogjingg henxhen ee bagjiux, hni-aw, pni-aw, cuiwjic, ixqip sintew qapp simliam, jitt lak xui si cadtaux ee dionglangg, qaqi tautec cur-lai ee vyxbut. Uirdiyhh anne, an' byy ixlaii jiongwsingx ee sewqair snix cud dakdnii qapp sokvak, drir qaur dirr jitt xee sewqanx kiqu lairdew berdangr ciauuat."
"Ananda, sniaxmih qiyr juer jiongwsingx ee sewqair? Sxer si censuaw qapp liudong. Qxair si hong'ui. Liw jitmaw qaidongx jaix, dangx, saix, lamm, vag, danglamm, sailamm, dangvag, saivag, dingw, qapp xe jiaxee si qxair. Quewkir, birlaii, qapp henrjai si sxer. Hong'ui u jap xee. Sxer u snax xee. Itcer jiongwsingx bongrsiongw qauqnaa horsiong juewjniaa. Sintew lairdew qinglik venwcenx, sewqair horsiong quansiap. Acc jitt xee qxair suizenn u sed jap xee hong'ui, cingcyw qowding ee xui, sewqanx qandna' tangx knuar diyc dangx, saix, lamm, qapp vag. Dingw qapp xe byy uirdir. Diongqanx byy jit xee qowding honghiongr. Sir hong'ui ee sowbok dikkag si hunbingg :ee, qapp sxer horsiong quansiap. Snax xee sxer, muixx jit xee u sir xee hong'ui; sir xee hong'ui, muixx jit xee hong'ui u snax xee sxer. Snax sringg sir iacc sir sringg snax si jap-zi. Liudong qapp venwcenx tac snax dingg, id qaur jap, jap qaur vah, vah qaur cingx. Taubuew jongxquad, lak xee qinkir lairdew qokk qinkir qokju ee qongdig u jit-cingx nng-vah xee."
"Ananda, liw tangx qycc dirr hitt lairdew kakding inx ee hyw iacc baiw. Kyxviw qongxx bagjiux e quanknuar, aurviah amr, taujingg bingg. Taujingg longxx bingg, aurivah longxx amr. Jniawvingg qapp dywvingg vnix:a quanknuar snax hxun zi. Tongxhap laii lun, soxx juer ee qongdig byy uanjuann. Snax hunx qonglingg lairdew u jit hunx si byy qonghau :ee. Qaidongx jaix bagjiux dna' u veh-vah qongdig. Kyxviw qongxx siwjiuui ee sniax hni-aw longxx tniax e diyc, sibhongx longxx byy uisid. Jid'err dinxdang, dyrr tangx jaix sniax si qin iacc hng. Diamrjing ee sii dyrr byy dexjiw. Qaidongx jaix hni-qinx uanbuanw u jit-cingx nng-vah qongdig. Kyxviw qongxx pni-aw e pnri, qapp cuankuir siongtongx. U cud u zip, mrqycc diongx:a qauqad ee vorhun u kuatham. Qiamxgiam pni-qinx, snax hunx lairdew kiamr jit hunx. Qaidongx jaix pni-aw dna' u veh-vah qongdig. Kyxviw qongxx jic tangx suan'iongg soxu sewqanx qapp cud sewqanx ee diwhui. Gixgenn u derhngx ee jingcax, mrqycc lriw si qongw be liauxjin. Qaidongx jaix jic-qinx uanbuanw u jit-cingx nng-vah qongdig. Kyxviw qongxx sintew tangx qakcad bongkap, si ixx u kab .diyc iacc byy kab .diyc jiacc tangx venrsig. U kab .diyc jiacc tangx qakcad. Narr lirkuix dyrr m jaix a. Lirkuix jiamr jit hunx, kab .diyc jiamr nng hunx. Qiamxgiam srinx-qinx, snax hunx kiamr jit hunx. Qaidongx jaix sintew dna' u veh-vah qongdig. Kyxviw qongxx iwliam diamrjing ionglap. Sibhongx snax sxer itcer sewqanx qapp cud sewqanx ee hxuad, bylun singwhenn iacc huanhux longxx ionglap .zip .kir buqiongjin. Qaidongx jaix ir-qxinx uanbuanw u jit-cingx nng-vah qongdig."
"Ananda, liw jitmaw beh gik snex-siw giogbong ee laujuiw, diyhh dngw kir kingqiur laujuiw ee qintauu, qaur qaxx byy snix byy bet ee qingxqair. Qaidongx qiamxgiam jitt lak xee siurr jok'iong ee qinkir, knuar dycc jit xee si hap, dycc jit xee si lii; dycc jit xee cimx, dycc jit xee cenw; dycc jit xee uanbuanw tongdat, dycc jit xee byy uanbuanw tongdat. Narr erdangr dirr jiax liauxgno uanbuanw tongdat ee qinguann, diwsuw an' byy ixlaii jit kaisiw dyrr bongrsiongw qauqnaa ee giabjer-laujuiw dywlauu, tangx ijiauww uanbuanw tongdat qapp byy uanbuanw tongdat ee qinguann, dagg zit qiapsor qavue siauqiamw. Guaw dnaxx qra jitt lak xee cingjing uanbuanw bingqngx guanvunw ee qongdig uanvi henxhen. Sowliong dyrr si cincniu anne. Suijai liw jimjiog diksuanw jit xee e tangx zip .kir .ee. Guaw qaidongx laii kexhuad bingvik hro liw jingjinr. Sibhongx Zulaii dirr jap-veh qxair it'id siuhing, itjin did diyc uanbuanw busiong potee. Dirr hitt diongqanx iarr byy hyw-baiw ee jingcax. Mrqyxx liw dirr erdew kacc cax ee qaiqib, iauxx berdangr dirr hitt diongqanx uanbuanw jurjai diwhui. Soxiw guaw suan'iongg, hro liw dandanx an' jit xee mngg cimzip. Zip jit xee mngg liauw byy bongrsiongw. Hitt lak xee qakdix ee qingkir jidsiqanx iarr cingjing ar."
Ananda qra Vuddyy qongw, "Sewjunx, anxjnuaw qongw giglauu an' jit xee mngg cimzip erdangr hro lak xee qinkir jidsii cingjing?"
Vuddyy qra Ananda qongw, "Liw dnaxx ixqingx did diyc Srota-apanna ee qongqyw, ixqingx dubet samqair jiongwsingx sewqanx soxx qnir laii duanrjuat gihik, mrqycc iauxx m jaix qinkir lairdew an' byy ixlaii dyrr kaisiw jikju qapp snix cud ee hukongx sipkuir. Jiaxee sipkuir rair qingquer siulen jiacc tangx duanrjuat. Hyhongw jitt lairdew snix, druar, venr, bet,_____. Jitmaw liw cniaw quanknuar bogjingg lak qinkir, si jit jiongw iacc lak jiongw? Ananda, narr qongw jit jiongw, hni anxjnuaw berdangr knuar, bagjiux anxjnuaw berdangr tniax, tauu anxjnuaw berdangr qniaa, kax anxjnuaw berdangr qongw? Narr jitt lak qinkir quatding si lak jiongw. Kyxviw guaw qinaxzit dirr jitt xee huathue qra liw suan'iongg bibiau ee huatmngg. Liw ee lak qinkir dycc jit xee laii niaxsiu?"
Ananda qongw, "Guaw iong hni-aw tniax."
Vuddyy qongw, "Liw ee hni-aw qaqi e tniax, ham' srinx qapp cuir u sniaw dirdai? Cuir laii mng dyrliw. Srinx kiw laii niaxsiu. Soxiw qongxx ingqaix jaix m si jit dyrr si lak, m si lak dyrr si jit. Quibuew berdangr qongw liw ee qinkir guanvunw si jit iarr si lak. Ananda liw qaidongx jaix, jitt xee qinkir m si jit iarr m si lak. An' byy ixlaii dyrr kaisiw dendyr lunter. Soxiw dirr uanbuanw dingcingx diongqanx snix cud jit xee lak qinguann girliw. Liw si Srota-apanna, suizenn erdid tangx siau'ngiuu 'lak', iuguann byy dubet 'jit'. Kyxviw taiwhukongx camcab qokk jiongw kiwbut. Kiwbut ee hingtew u jingcax, hukongx ee miaa iarr u jingcax. Qra kiwbut tec driau laii quanknuar hukongx, dyrr qongw hukongx si jit xee ngiu. Hitt xee taiwhukongx anxjnuaw uirdiyhh liw vniwjniaa qangrkuanw iacc byy qangrkuanw? Qyckacc benw qongw qiyr juer 'jit' iacc 'm si jit'. Anne liw liauxqaiw lak xee siurr jok'iong ee qinkir iarr si jitt kuanw."
In'ui bingg qapp amr nng jiongw siongwtew dirr bibiau uanbuanw lairdew knii diauu dingcingx inxhuad qnir. Qnir jingbii huanxsia cud siktew, siktew qethap vniwjniaa qinkir. Qinkir vunxguann si cingjing sir dua guansor, miaa qiyr juer ganw, guarhingg naxx cincniu pudyy. Pudimm ee qinkir qapp sir sikdinn kuaiwsog dinxdang jauw hiongr siktew. In'ui drang qapp jing nng xee siy' longr, dirr bibiau uanbuanw lairdew knii diauu dingcingx inxhuad tniax. Tniax jingbii huanxsia cud sniatew. Sniax qngw .kiw .laii vniwjniaa qinkir. Qinkir vunxguann si cingjing sir dua guansor, miaa qiyr juer hni, guarhingg naxx cincniu qngw qngw sinx huad ee hiyc. Pudimm ee qinkir qapp sir sikdinn kuaiwsog dinxdang jauw hiongr sniatew. In'ui tongx qapp trad nng jiongw siy' qig, dirr bibiau uanbuanw lairdew knii diauu dingcingx inxhuad pnri. Pnri jingbii huanxsia cud pangkuir. Pangkuir ionglap vniwjniaa qinkir. Qinkir vunxguann si cingjing sir dua guansor, miaa qiyr juer pni, guarhingg naxx cincniu suee suee ee siangx ziauw. Pudimm ee qinkir qapp sir sikdinn kuaiwsog dinxdang jauw hiongr pangkuir. In'ui jniaw bi qapp venwik nng jiongw siy' camcab, dirr bibiau uanbuanw lairdew knii diauu dingcingx inxhuad damx. Damx jingbii huanxsia cud kiwbi. Bi qiauxqaw vniwjniaa qinkir. Qinkir vunxguann si cingjing sir dua guansor, miaa qiyr juer jic, guarhingg naxx cincniu guehvingg. Pudimm ee qinkir qapp sir sikdinn kuaiwsog dinxdang jauw hiongr kiwbi. In'ui lii qapp hap nng jiongw siy' lut, dirr bibiau uanbuanw lairdew knii diauu dingcingx inxhuad qakdix. Qakdix jingbii huanxsia cud bongkap. Bongkap jurjip vniwjniaa qinkir. Qinkir vunxguann si cingjing sir dua guansor, miaa qiyr juer sintew, guarhingg naxx cincniu dyh-aw. Pudimm ee qinkir qapp sir sikdinn kuaiwsog dinxdang jauw hiongr bongkap. In'ui snix qapp bet nng jiongw siy' suar, dirr bibiau uanbuanw lairdew kniii diauu dingcingx inxhuad iwsig. Iwsig jingbii huanxsia cud hxuad. Hxuad lamw uaw .laii vniwjniaa qinkir. Qinkir vunxguann si cingjing sir dua guansor, miaa qiyr juer iwliam, naxx cincniu dirr amr sxig soxx qnir. Pudimm ee qinkir qapp sir sikdinn kuaiwsog dinxdang jauw hiongr hxuad."
"Ananda, cincniu jiaxee lak qinkir in'ui u bingqngx ee qakdix, u bingqngx jiacc u bingcingx ee qakcad. Srid kir hitt xee jingbiau vunxsingr laii knii diauu dirr bongrsiongw e inxhuad cud qngx. Soxiw qongxx liw dnaxx lirkuix amr qapp lirkuix bingg dyrr byy qnir ee sidtew. Lirkuix drang qapp jing dyrr byy tniax ee vunxjid. Byy tongx qapp byy trad, pnri ee qaksingr be snix .cud .laii. Byy venwik qapp byy jniaw bi dyrr byy damx jitt hxang. Byy lii qapp byy hap, bongkap ee qakdix jurr guanvunw dy' byy. Byy bet qapp byy snix, liauxted ee diqnir anzenn qiawkax. Liw qandna' mair duer drang qapp jing, hap qapp lii, jniaw bi qapp venwik, tongx qapp trad, snix qapp bet, bingg qapp amr. Cincniu jiaxee jap-zi iuxuii siongwtew, suijai qra jit xee vuic .kiw .laii, hro inx tuatli knii diauu dirr lairdew decc baihok :ee qruix dngw guanvunw ee jinsit, kexhuad vunxguann bingqngx ee qonghuix. Qonghuix vunxsingr inxhuad henxbingg, cunx :ee e knii :ee hitt go xee ingqaix e jywhuew vuic driau did diyc uanbuanw tuatli, be in'ui jinwjingg siogdinn laii snix kiw soxx qnir soxx jaix. Bingqngx ee qakdix byy qinduer qinkir, mrqycc qiawtog qinkir inxhuad bingqngx. Jurr anne, lak qinkir horsiong u jok'iong."
"Ananda, liw qamxx m jaix jitmaw dirr jitt xee huathue lairdew, Aniruddha byy bagjiux suacc e knuar; UpÁnanda Lringg byy hni suacc e tniax; Ganges Hyy ee luxsinn m si iong pni laii pnri pangbi; Gavampati cuiwjic qyc'ngiu suacc jaix kiwbi; Sunyata Sinn byy sintew suacc tangx qakcad bongkap. Dirr Zulaii ee qngsnuar lairdew huanxsia .cud .laii jiamrsii henxhen. Qacc si hongx ee vunxjid, guandew byy siongwtew. Soxu bet-jin-dnia did jigjing sniabunn qongqyw :ee, kyxviw huathue lairdew ee Mahakashyapa, quxdngg ixlaii ixx bet iwliam ee qinkir, uanbuanw bingqngx, liauxted qakdix, byy knikib simliam."
"Ananda, liw dnaxx soxu qinkir narr uanbuanw vuic driau, lairdew qngliang e huad qngx. Anne pudimm siogdinn qapp kiwbut, sewqanx soxu venwhuar ee siongwtew e bersux siyx tngx rngiuu vingx, jiap’ingr iwliam huar juer busiong qakdix."
"Ananda, dyrr kywviw hiaxee sewqanlangg dirr bagjiux jurjip qnir. Narr qiyr ix qinw qinw qra bagjiux vangr kreh, oamr ee jongrhongw dyrr henxhen dirr binrtaujingg. Lak xee qinkir oamr, tauu qapp kax iarr siysiangg. Hitt xee langg iong ciuw srunn sintew guarbin sec jit linr. Ix suizenn knuar be diyc, tauu qapp kax it'id tangx hunven, zinrdix qapp qakdix qangrkuanw. Knikib qongbingg tangx knuar .qnir. Dirr oamr dyrr knuar be diyc. Byy qongbingg qaqi huad qongbingg, anne soxu oamr ee jongrhongw ingxuanw be oamr. Qindinn qacc siaubet, bingqngx ee qakdix anxjnuaw berdangr vniwjniaa uanbuanw bibiau?"
Ananda qra Vuddyy qongw, "Sewjunx, dyrr cincniu Vuddyy qongw :ee, knikib de huad qakdix ee simx beh qriuu ciangjai dilehh, diyhh qapp qongqyw ee derui qapp bingbok u siy' duiwingr. Sewjunx, kyxviw qongqyw lairdew, Bodhi (potee), Nirvana (liappuann), Jinsit Zucuw, Vudsingr, Amala-Consciousness, Kangx Zulaijongr, qapp Dua Uanbuanw Qniar-Diwhui. Jitt cid jiongw bingbok, bingcingx suizenn u hunvet, cingjing uanbuanw, texsingr qenqor, bersux qimqongx ongg, ciangjai dilehh be pnaiw. Narr qnir qapp tniax lirkuix bingg, amr, drang, jing, tongx, qapp trad, quibuew si byy texsingr. Dyrr cincniu simliam lirkuix taujingg hiaxee sikdinn, qinwvunw dyrr byy soxx u. Anxjnuaw qra jit xee quibuew e dngrbet :ee knuar juer siulen ee in'iuu laii beh did diyc Zulaii cid jiongw ciangjai dilehh ee qongqyw? Narr lirkuix bingg-amr, qnir vitqingr si kangx. Dyrr cincniu byy taujingg hiaxee sikdinn, simlaim ee jursingr dyrr e bet .kir. Jing'au laihuee jimjiog cuisniu qiujingr, guaw zinruii vunxdew dyrr byy guaw simx qapp guaw simx ee soxjai. Narr anne, beh qra sniaw dongwjuer in'iuu laii qriuu did bysiong qakdix? Zulaii jinwjingg qongw cingjing, jingbii, uanbuanw, qapp ciangjai. Jex ue uivue jinsit, jiongqibuew e venwjyr vutqed ee lunrsuad. Anxjnuaw tangx qongw Zulaii si qongw jinsit ue :ee? Brang liw sur dua juvix qra gunw jiaxee guduu jipdiok :ee kaisi."
Vuddyy qra Ananda qongw, "Liw vaxhak je qenwbunn, mrqycc huanlyw (u lrau) bue druu jin, bycaiw simdiongx jaix dendyr kixinx. Jinjniar dendyr henxhen dirr binrtaujingg, suacc jit diamw aw dy' m bad. Kiongxqniax liw ee singsimx iauxx berdangr hro liw sinwhok. Guaw dnaxx cir jiong' sikdinn soxu siogsu laii qaixduu liw ee gihik."
Liammisii Zulaii bingrling Rahula kar jxingx jit sniax, mng Ananda qongw, "Liw dnaxx u tniax .diyc bor?"
Ananda qapp dairjiongr longxx qongw, "Guaw u tniax .diyc."
Jxingx-aw diam .kir byy sniax. Vuddyy qycc mng qongxx, "Linw dnaxx u tniax .diyc bor?"
Ananda qapp dairjiongr longxx qongw, "Byy tniax .diyc."
Hitt sii Rahula qycc kar jit sniax. Vuddyy qycc mng qongxx, "Linw dnaxx u tniax .diyc bor?"
Ananda qapp dairjiongr qycc qongw longxx u tniax .diyc.
Vuddyy mng Ananda, "Liw anxjnuaw tniax e diyc? Anxjnuaw tniax be diyc?"
Ananda qapp dairjiongr longxx qra Vuddyy qongw, "Jxingx-sniax narr kar, anne guaw dyrr tniax e diyc. Kar quw sniax siausid, snia'imx qapp dongrdann siangsiangx byy .kir, anne dyrr qiyr juer byy tniax .diyc."
Zulaii qycc bingrling Rahula kar jxingx, mng Ananda qongxx, "Dnaxx u sniax bor?"
Ananda qapp dairjiongr longxx qongw, "U sniax."
Jit diap quw aw quer snia'imx siausid. Vuddyy qycc mng qongxx, "Jitmaw u sniax bor?"
Ananda qapp dairjiongr rinr qongxx, "Byy sniax."
U .jit .quw .aw, Rahula qycc laii longr jxingx. Vuddyy qycc mng qongxx, "Jitmaw u sniax bor?"
Ananda qapp dairjiongr longxx qongw, "U sniax."
Vuddyy mng Ananda, "Anxjnuaw qiyr juer u sniax? Anxjnuaw qiyr juer byy sniax?"
Ananda qapp dairjiongr longxx qra Vuddyy qongw, "Jxingx-sniax narr dann dyrr qiyr juer u sniax. Dann quw snia'imx siausid. Snia'imx qapp dongrdann siangsiangx byy .kir dyrr qiyr juer byy sniax."
Vuddyy qra Ananda qapp juui dairjiongr qongw, "Linw dnaxx anxjnuaw qaqi ee ue cywluan siy' dahtud?"
Dairjiongr qapp Ananda longxx qang sijun mng Vuddyy qongxx, "Gunw dnaxx anxjnuaw qongw si cywluan siy' dahtud?”
Vuddyy qongw, "Guaw mng linw qongxx u tniax .diyc bor? Linw dyrr qongw u tniax .diyc. Qycc mng linw qongxx u sniax nor? Linw dyrr qongw u sniax. Mrqycc u tniax .diyc qapp u sniax huedab byy jit xee junxdnia. Cincniu jitt kuanw anxjnuaw m si qiyr juer cywluan siy' dahtud? Ananda, snia'imx siausid byy dann, liw qongw byy tniax .diyc. Narr jniasit byy tniax .diyc, tniax ee vunxsingr ixx bet, dyrr qapp dax ciu siysiangg. Jxingx-sniax qycc danw, liw anxjnuaw e jaix? Jaix u iacc byy, si sniax ee siogdinn u iacc byy soxx kiw :ee. Beh tacc si hitt xee tniax ee vunxsingr uirr liw vnir jniaa u iacc byy? Tniax narr sidjai byy junjai, anne si'angw tangx jaix byy junjai? Soxiw qongxx Ananda, sniax dirr tniax lairdew qaqi u snix u bet, m si uirdiyhh linw tniax .diyc iacc byy, snia’imx jiacc laii snix .cud iacc bet .kir. Linw m jaix tniax ee vunxsingr u iacc byy, linw dyrr e dendywtauu liac sniax juer tniax. Anxjnuaw tangx kir quair hiaxee guduu jipbee :ee liac ciangjai juer dngrbet? Vitqingr byy ingqaix qongw lirkuix soxu drang, jing, tatbat, qapp kaitongx dingxdingw jiaxee dyrr qongw tniax byy vunxsingr."
"Kyxiw jit xee kunr dang binn :ee, dirr bincngg jimxtauu-dingw dua kunr. Inx cur nirr u langg dirr ix kunr ee sii iong jingtuii jringx biw. Jitt xee langg bang-diongx tniax diyc jringx biw ee sniax, liahjunw si vadd hxang mihqnia, lahjunw decc longr qow iacc decc kar jxingx, dyrr dirr bang-diongx quair jxingx-sniax liahjuer caa qapp jiyc siy' kok ee hiangxsniax. Hitt jun hutzenqanx jingsinn, ix liammix jai'ngiaw si jingkurtuii ee sniax. Ix qaqi qra cur nirr ee langg qongw, 'Guaw decc binbang ee sii, liahjunw jingku-sniax si qow-sniax.' Ananda, jitt xee langg dirr bang-diongx qamxx e qir did jing, iyy, kuix, hap, tongx, qapp trad dingxdingw jiaxee jongrhongw? Ix ee hingtew suizenn decc kunr, tniax ee vunxsingr byy hunbee. Junw narr liw ee hingtew siausid .kir, siurguann censuaw suevai .kir, jitt xee tniax ee vunxsingr anxjnuaw diyhh uirr liw siaubet? Soxu jiongwsingx an' byy kaisiw ixlaii srunn soxu siktew imsniax kir ziog muixx jitt xee liamrtauu decc liujuanw, jingrlaii m bad kaikew liauxgno cingjing bibiau ciangjai ee vunxsingr. Byy tranr ciangjai ee vunxsingr, suacc ziog soxu hiaxee snix-bet, diwsuw vutduan snix cud jabcyr ee uwziamw decc liujuanw. Narr kiwsag snix-bet laii cisiuw ciangjai ee jinsingr, ciangjai ee qongbingg henxhen dirr binrtaujingg, sikdinn qinkir zinrbad ee simx ingqaix hitt sii ee siaubongg. Susniu qapp siongwtew longxx si din'aix. Zinrbad jing'ir si uwuer. Qapp jitt nng hxang li hng hng, anne liw ee huatganw ingqaix liammix ee cingcyw bingqngx. Anxjnuaw berdangr singjiu busiong qakdix?"