Daigiw Siuiongw Qongxue

(Jap-lak) Qokk langg ansimx-libbing, qokk langg uanbuanw vinghyy si derr id iauwqinw

Langg narr erhiauw knuar lanw qaqi ee jinx simx, tranr hitt xee jinx simx ee qongbingg, diyrr jurzenn erdangr ansimx-libbing. Qaur erdangr ansimx-libbing, diyrr jurzenn be huatsingx vutvingg vutbuanw ee simqnuax. Qokk langg narr byy vutvingg vutbuanw, diyrr tnikae erdangr uanbuanw, dniardiyc sewqair vingjing. Iaxx arr qokk langg ee simqnuax narr kuacdua ving’unw, diyrr tenha taiwvingg, byy knuar qnir pnaiw langg, dniardiyc byy jursiongx-janjik. Mrquxx henrsii ee sewqair, qokqax cam’ qokqax, qywzinn qapp qywzinn longxx m kingw siy’ niu, qokk xee qor qaqi siy’ jingx(jnex) siy’ duat, jex jinjniar kyxtanr. Soxiw guaw krngr linw dairqex simqnuax diyhh hro ix qongbingg, hro ix vinghyy. Qokk xee erdangr ansimx-libbing, erdangr uanbuanw vinghyy si derr id iauwqinw.

(Jap-cid) Tec jnii tec mic beh hro langg’ iarr diyhh knuar kuanw

Suizenn tec jit-cingx qimx beh hro ix hnuahiw, m acc ix iarr byy dikkag e hnuahiw. Suizenn drew jit nguaw vng si siyxkuaw mic, vunx hro decc iaux ee langg jiac, ix diyrr qui’ siwlangg qamw lanw ee xunx. Iarr u hitt hy ee langg, hex si anwjnuaw? Cincniu Bingrjuw qongw “U hitt hy ersaiw did hro :ix, u hitt hy bersaiw did hro :ix. Bersaiw did hro ix :ee, hro ix sniu’ quer unhui.” Soxiw beh hro langg’ diyhh knuar kuanw, u loring jiacc hro :ix, byy loring kyxiw benw hro :ix. Kongxjuw Qongx qongw “qunjuw jiuqib vutjer hur(vur)”. Sioggiw qongw kad(kuah) sii jit diamw cincniu qamlo. Cxenx qimx hro :ix, ix hitt xee langg byy dikkag diyhh ing, soxiw byy qamw lanw ee jxingg. Jit nguaw vng hro :ix, ix hitt xee langg beh iauwqinw diyhh jiac, soxiw qamw lanw ee xunx.

(Jap-veh) Langg m tangx kangx kangx quer jit siwlangg

Jrux nirr u qongw tende busiw-bujiongx, diyrr si qongxx tnide byy kixtauu iarr byy suacbuew, qingquer quixnarr ikban nii iarr byy jinrtauu. Lanw langg singjunn dirr jitt tniderqanx, itdanr siw .kir e qycc laii cutsir iacc be qycc laii cutsir, hex si m jai’ngiaw ee dairjir. Soxiw qongxx zinsingx zuu diaulo, si qongw langg cincniu jaxkiw-sii ee lorjuiw, zit cud diyrr byy .kir, jit siwlangg byy zuarr quw. Langg ee huewsiu suisi u dngg u dew, jongw .si poxtongx si go-jap, jiac qaur cid-jap huer :ee diyrr jiyw. Setsuw erdangr jiac qaur jit-vah huer, narr jiurr tnide ee ingxqiuw laii knuar, sngr si jit bak nih aw narnia. Lanw langg qajair cutsir juer langg, ingqaix diyhh lixqaiw zinsingx ee kuaiwlok, ingqaix hiangxsiu jitt xee kuaiwlok. Iarr diyhh hunwhuad, lip jit xee qonggiap lauu hro au dai, hro ix jit siwlangg u iwgi, dikkag m tangx kangx kangx quer jit sxir.

(Jap-qauw) U dikhing ee langg kacc ngiaa u hagbun ee langg

Poxtongx ee langg narr jywhuew qongxue, dairkair inx longxx berhiauw did qongw jingwqingx iuxig ee ue, longxx qongw hitt hy byy kangx byy sunw :ee. Iaxx air qongw langg’ kacng’aurue, iah langg ee kangpang dirdecc hnuahiw, hitt kuanw sidjai jinjniar m hyw. Vadd langg suizenn u damrvyc aw quewsid, lanw byc did kir jikvi :ix. Vadd langg suizenn u jerjiyw ee viwbit, lanw iarr m tangx qra ix pacpuar. Iaxx iarr vadd langg suizenn bad u dikjue :lanw, lanw iarr m tangx kiyh dirr simqnualai, vutsii sniu beh vywuanx, diyhh itcer vangr hro ix be qir .did jiacc hyw. Narr byy beh qongw langg’ ee pnaiw ue iarr byy beh qongw langg’ ee m driyc, iarr byy beh puar langg’ ee amr su, iarr byy kiyh langg’ ee uansiuu, diyrr ersaiw did qongw u dikhing ee langg. Vadd langg suizenn beh hamrhai :lanw, byy huatdo.

(Zi-jap) Did jit xee sinx ving’iuw m dat diyc cam’ qu ving’iuw hyw

Lanw in’ui cud jurr suiok ee simqnuax, diauqangx six unhui hro vadd langg, qiyr inx laii uaw .lanw. Jitt kuanw ee jywhuad jin’ luatdingw, vutzuu lanw qongw jingwqingx ee dyrliw hro inx janwdongg, hro inx sinwhok, qaur buew sxingg jit xee ulun, lirig sewqanx. Iaxx lanw air beh did diyc jit xee sinx ving’iuw, vutzuu qapp qursii ee hyw ving’iuw jiauwqu qauvuee, zuxuadd cinbit. Lanw qanda’ lip jit xee guarbin hyw knuar ee bing’u, kacc sux juer jit jann hyw su byy hro langg’ jai’ngiaw. Diwdiong jit jxingw byy tangx hyw ee jetgi, vutzuu vingsor juer hyw, vutsii qinxsin, mair u quewsit si derr id hyw.

(Zi-jap-id) M tangx huanxduir jingwgenn iarr m tangx uaw quanser

Cincniu hitt xee qik qongvnii ee iwqenr cam’ u hac dyrdig ee girlun, qokk langg tniax liauw longxx e qamxhok. Lanw narr uirdiyhh qywzindig ee qamxjingg cam’ ix pnaiw, diauqowir huanxduir hitt xee girlun si bering .did. Setsuw narr huanxduir hitt xee jingwqingx ee girlun, jex si lanw jit diamw aw supenx ee simqnuax huatviauw sewqanx, m na hro henrdai ee langg air ciyr, iarr hro au dai ee langg air ciyr, jin’ si qenwsiaur. Narr si byy dikbong, qanda’ kyr sewtauu cam’ juann kyr suiok, itbi tamlamm :ee, jitt nng kuanw langg ee cur-lai lanw dikkag m tangx zip .kir. Narr jid’err zip kir inx cur-lai, uaw ix ee quanser, juer ix ee ziauxgaa, lanw ee zinqeh e suar byy .kir.

(Zi-jap-zi) Qokk jiongw ee jaie dy’ si dirr ciongsing ee sii

Lanw langg qaur buanxlenn huatsingx ee jingwtauu, hitt xee guaninx dairkair si dirr hitt jongwlenn ee sii ixqingx did .diyc .ee. Cincniu dirr jongwlenn ee sii, hetkir jin’ iongw, sringg hitt xee sewtauu longxx m jaix tangx jetjer, luanrsuw limx luanrsuw jiac, pacpnaiw dng’ui, qaur buanxlenn diyrr ingxx e kiw uirgamm. Jingsinn :ee ziogtew :ee sniu’ quer tuabuaa, sniu’ quer huanlyw, pacpnaiw sinmia, qaur buanxlenn diyrr ingxx e diyc lysiongx. Siauwlenn narr juer pnaiw qniaw, qingquer id~ziap nii au, uree e cnimii, uree e naicpni. Iaxx arr lanw ee qaun e suebii, qehuew diddit liauw .kir, jingxjingw ee jaie juer jit xe qaur. Hit xee guaninx iuguann dirr kacc jaw hitt xee langg dngdecc hyw un ee sii u ia juerog ee jingxjiw dilehh, qaur buanxlenn jiacc huad .kiw .laii. Soxiw qunjuw ee langg jai’ngiaw buanw jiausunw ee dyrliw. Dirr dik’ir ee sii, jabhunx qinxsin, urhongg aurlaii.

(Zi-jap-snax) Byy juer hyw su hro langg’ ylyw si m hyw

Lanw sniu beh hro hitt xee langg hnuahiw, jiacc dagg qxur qongw ix ee hyw ue, longxx m qnaw kir pacpnaiw ix ee qamxjingg. Anxnix urdangsii aw qaqi jingwqingx ee iwqenr m qnaw huatviauw, laii sun ix ee byy dyrliw ee girlun. Anxnix nacc ersaiw .did? Lanw lingkyw qongw jingwqingx ee ue, qniaa jingwqingx ee dyrliw, quwjai hro langg’ ma, hro langg’ pixvok iarr byy iauwqinw. Iaxx arr lanw longxx byy juer jit hxang hyw dairjir, dendyww hro langg’ ylyw. Urdangsii aw byy juer pnaiw dairjir, dendyww hro langg’ huixvongr. Bingrjuw qongw, “u vutguu ji’ u, u qiujuann jin’ huiw”. Lanw qaqi jursinr, ylyw iacc si huixvongr, sewqanx ee langg si hro lanw bersaiw did anwsngr u byy. Sewqanx ee langg uree cuir byy jiauww simqnuax, itbi qongw ix ee hyw ue, beh hro ix hnuahiw, beh hro ix tiongxiong laii qriuu jurqiw ee lirig. Jitt kuanw ee langg jin’ je.

(Zi-jap-sir) M tangx quer visiongx, m tangx m koxkngr

Cincniu lanw ee sirduarlangg iacc si hniadi-jixmue itdanr quewsinx, in’ui u qutziok ee quanhe, hitt sii lanw qaqi ee qamxjingg viw vadd langg dingvue qionglet jiacc driyc. Soxiw lanw vuthing gu diyc hitt kuanw ee sii, lanw ee simqnuax diyhh kacc anjing, taiwdo diyhh kacc jiong’iongg, m tangx sniu’ quer visiongx conghonggg sittew jiacc hyw. Iaxx arr lanw narr u knuar qnir lanw vingsor cam’ ix qauvuee ee hyw ving’iuw u quewsid, diyhh hyw iwsur unkunn qra ix koxkngr jiacc hyw, m tangx qniax liauw e pacpnaiw qamxjingg m qnaw qra ix koxkngr, vangr quwjai ix juer pnawi. Hitt kuanw m si qauvuee ving’iuw ee dyrliw. Kongxjuw Qongx qongw “diongqyr zii sxen dy jix, vutkyw jig jriw.” Lanw krngr .ix, ix beh tniax m tniax si ix hitt xee ving’iuw ee jiksingg, lanw m tangx m krngr :ix. Jongw si krngr .ix m tniax, hex si byy huatdo jiacc vangr suah .kir.

(Zi-jap-go) Lanw ee simqnuax u juxjnaiw jiacc hyw

Ursii lanw e siurkir, cincniu dua huew decc siyx. Ursii lanw e kiw iogbong, cincniu qunxjuiw decc qunw. Hitt sii siurkir m suah, cincniu dua huew byy pachuax, zuxx siyx zuxx iam, suar e siyx kir qaqi. Hitt xee iogbong narr byy qiauxjingr, cincniu qunxjuiw decc qunw, dit qunw dit dax, qetqiok suacc siyx siw qaqi. Ingxingw u jitt kuanw ee langg, jex diyrr si berhiauw did qongw siurkir cincniu huew, iogbong cincnu juiw. Juiw huew jitt nng hxang mic bersaiw ing quewdo. Ing quewdo diyrr ziaw dua jaihy, e bongsinx vairqax. Ing sikdo diyrr iuxig lanw ee sinqax sniwmia. Duxaw soxx qongw e dua siurkir, e dua iogbog, jex longxx si jurr lanw ee simqnuax cud .laii. E vinghyy, e zin’air, iarr si dui’ lanw ee simqnuax cud .laii. Hyw-pnaiw jongw si jitt xee simqnuax juewjuw. Derr id iauwqinw si ersaiw did lanw ee simqnuax u juxjnaiw jiacc hyw.

(Zi-jap-lak) Hnowqii iarr m tangx, qodak iarr m tangx

Narr tniax diyc qiquair ee dairjir diyrr dua qniax, narr knuar diyc qikaw ee mihqnia diyrr dua hnuahiw, hitt kuanw ee langg dairkair byy uanxdai ee qenwsig. Hex si jnaixngiu neh? In’ui sewqanx ee dairjir, soxx diwdiong soxx hnuahiw :ee m si qiquair qikaw, vutkyw-sugi ee dairjir, si poxtongx zidsiongg ee dairjir. Iaxx dirr qankow ee qingxgu, e siuw jetgi, doglip qohingg. Hitt kuanw langg m si qongw m si gauu langg, jongw si jitt kuanw si gu diyc huisiongg sii ingwvenr ee juewhuad, m si vingsiongg sii ingxqiuw vutvenr ee jetgi. Lanw singjunn dirr jitt sewqanx, sngr si qiongrdongg ee sing’uac, vingsiongg ee sing’uac. Lanw iarr diyhh sun diyc jingwlangg ee sing’uac jiacc ersaiw .did. Setsuw narr vutsii hnowqii beh simsig, juewlangg qodak, m cam’ sewqqanx ee langg vnii jerkia, diyrr qetqiok byy loring.

(Zi-jap-cid) Beh qapp langg’ qauvuee diyhh juwir jitt nng hxang

U langg jin’ qau ue, u langg byy air qongxue. Hex longxx si quanhe langg ee singwjid, bersaiw did qongw air qongxue ee langg, ix ee simqnuax pnaiw, byy air qongxue ee langg, ix ee simqnuax hyw. Jongw si vingsor aur durdu, qig diam diam, hitt kuanw ee langg, ix ee simqnuadew hro lanw liau be diyc. Dairkair si ix ee simqnuax jin’ ox. Lanw narr gu diyc hitt kuanw ee langg, lanw ee simsu dikkag vutkyw tiacvec duiww ix qongw. Setsuw lanw narr gong gong qra ix qongw, hro ix anwjnuaw vnir dy’ m jai’ngiaw. Qycc jit hxang diyrr si sewqanx u jit kuanw langg jin’ qanhiamw, qew juer hyw langg, cuir gauu qongxue dirdecc penr .langg. Narr si knuar diyc hitt kuanw langg, viauxbin-siong qingr .ix, m tangx dikjue .ix, jixhyw jiamrjiam qapp ix lirkuix, anxnix derr id unxdangr. Narr si gong gong qapp ix qauvuee, diyrr e hro ix lauw .kir.

(Zi-jap-veh) Itding diyhh sniuw itding diyhh huat

Huanrr hyw ee langg itding diyhh sniuw, pnaiw ee langg itding diyhh huat, jex dy’ si vanrliw jingwsu ee dua qunvunw. Setsuw u hyw byy sniuw, dycc jit xee beh kingw juer hyw. U hyw byy huat, dycc jit xee m qnaw juer pnaiw. Narr si anxnix, sniuxhuat longxx byy loring, simrcniaw ursii decc sniuw, byy dikkag si hyw langg, ursii decc huat, byy dikkag si pnaiw langg. Anxnix hyw-pnaiw dendyr, bad dairjir ee langg e qniax. Soxiw u qonglyy dikkag diyhh sniuw, u quewsid dikkag diyhh huat. Soxiw qongxx sniuxhuat rair qongbingg, dikkkag m tangx dendyr ing. Narr si dendyr ing, m na bad dairjir ee langg e qniax, itvnuax ee langg iarr jurzenn e vindnua, byy air zinrjinx, simrjiww byy langg kingw juer hyw. U langg qnaw juer pnaiw, siarhue diyrr e ziauxluan, berdangr anjing. Soxiw dirqog ee langg bersaiw did suiven ing sniuxhuat.

(Zi-jap-qauw) Jitt sir hxang diyh’air jabhunx juwir

Lanw setsuw acc narr byy tamwtniax qaxx jinx, qanda’ tniax jit tauu qongw ee ue, jit xe diyrr sinr sinr, jiauww anxnix qra ix vran. Ursii vran liauw byy qongdy, e hro langg uanr. Soxiw qaqi m tangx u susimx, jongw diyhh tniax liongw vingg qongw ee ue, jiauww qongvnii vran jiacc be kikkuix diyc langg. Iaxx arr ing qaqi ee kuiwlat kir juer dairjir, juer u hxuad iacc juer byy hxuad, qaqi sniu diyrr e jai’ngiaw. Mrquxx lanw ee jinx simx jauw .kir, guarbin ee keckir dendyww zip .laii, simqnuax hunluan suar berhiauw tangx pacsngr, diyrr si longxx byy pacsngr qaqi ee kuiwlat, qaqi sniu qongxx bylun simxmic dairjir juer erdid laii, dua jann dairjir hro langg’ vaiwtog .jit .xe diyrr rinw langg’ qongw hyw, qra ix damdngx kir vran. Qetqiok vran byy ix hxuad, qaqi decc qankow. Jex in’ui hro keckir zip laii soxx drir :ee. Iaxx arr qaqi ee diongxcur beh hro langg’ jai’ngiaw, uirr anxnix qongw vadd langg ee kuatdiamw iarr m hyw. Iaxx qaqi byy jaijingg jin’ hamban, uirr anxnix suacc hiamm vadd langg u vunxsu. Jitt kuanw iarr jin’ bersaiw .did.

(Snax-jap) Simqnuax iarr diyhh siusog iarr diyhh vangr kuix

Lanw ee simqnuax narr snruar snruar, diyrr diyhh qra ix siusog, narr oamr diyrr qycc congr hro ix qongbingg, narr hunbee diyrr diyhh qiyr hro ix qakcniw jiacc ersaiw .did. Iaxx narr si siusog sniu’ ann, diyrr qycjaiww vangr kuix jiacc hyw. Lanw narr erhiauw did tangx siusog, erhiauw did congr hro ix qongbingg, erhiauw did qiyr hro ix qakcniw, erhiauw did qycc hro ix vangr kuix, lanw ee iwsig diyrr zuxx bingvik, lanw ee quancad diyrr zuxx jingwkag, lanw ee qamxjingg diyrr zuxx ionghyy, lanw ee iwjir diyrr zuxx anding, juer dairjir iarr dniardiyc e binxjet, qycc u qixlut :ee. Setsuw narr berdangr anxnix, simqnuax diyrr berdid tangx anjing, juer dairjir birbenw did bongbogdig pywhuairdig, dniardiyc e pacpnaiw lanw ee zinqeh.