uanjuann dyrdig
derr sir jniux
DERR SIR JNIUX DYNGIU EE ZINSINGR
Oklangg qniax qnir qngx, cimzip huntiah oklangg si kunwlann :ee : hiyxzin jurqiw byy uanbiw/ dypiah jurgnow huanxsingw/ siamxbih zimrhyy erdangr puawqaiw jurqiw ee qihue. Jitt jniux lanw beh qongw ee luxsingr, suibongw u qraur siaa, kiokk qamguan jiapsiu juanbin ee jingsinn hunsig simliw dirliauu.
Jitt xee qywanr jin' jiyw duw diyc, juadduir m si ui'id :ee. Guaw huxdy quer luirsu ee vnerlangg, marr bad jixdy qitnax jinxliauu isux cuxliw luirsu ee anwle. Muixx jit xee qingquer jin' dngg ee liaudingg, juewau longxx sitvai.Sitvai sidjai jin' m si jubi, duiww zid'au simliw dirliauu surgiap/ birlaii zinsingx qui'ue, kiokk u qauwiok iwgi. Sitvai soxx did .diyc :ee, ngiaa quer singqongx jerje. Jitt xee qywqnr ee juxqag, hro guaw jin' dua ee kexsi ! Hibang togjiaw u qanrrkuanw ee qamxsiu. Ui' jitt xui luxsingrCharlyne kaisiw jiapsiu dirliauu/ qewsiok vutduan sir-vah-gua vaiw ee liaudingg/ jingxqyy liaudingg duiww ix uanjuann byy kiw jok'iong. Guaw beh siongser huntiah, hibang erdangr hiabjo cniurr uac dirr Charlyne anne sewqair ee langg.
BELANGG EE BEE
Jitt xee qywanr jit kaisiw dyrr gignaiw jerje.
Charlyne snax-jap-go huer hitt nii ham' javox ving'iuw cexbuew au laii cue guaw, qongw ix jiaujyx iubun ee koxlan, hitt sii utjingr naxjunxx byy giamdiong.
Charlyne snix jyr sewliabjiw/ vutjiw u javox enn / diongvan bixluw/ ciywkuex/ kiauw, u diwhui, kiokk sux driau sing'uac iuhir. ix byy liauxqaiw uirsniaw tak asavutlu ee dairhak, iauxx qycc ciangjai be qibqeh. Dirr jit qingx qauwhue jyr quer jit dxangx girqangx au, viauxhen iusiur, sriu pingr hurjig qauwiok. Lak qywguec au, bogsux qra srii. qongw qaixpingr si bogsux kixkiw-dyxdyw. laii cue guaw ee sii, duxx jriab jit hxun jiapdenrue ee qangjog, dirr jex jinwjingg ngua quer cid xee qangjog! Lingrgua hitt dnxua cexbuew ee luanjingg, iuguann decc kantuax qydnii ! Sursit-siong, Charlyne qinvunw byy hyw ving'iuw.
Be jiyw langg cywvai laii dirliauu. Charlyne kiamr singjiurqamw byy binghenw, m si qaiww qycngiu. Guaw anxjuanw dyrr byy sniu .diyc, ix si guaw "siongrr taukag tniar" ee vnerlangg.
Cimzip liauxqaiw Charlyne ee vuerqingw, huathen ix duiww verbuw naxjunxx u moxjiongw huanwqag. Verbuw hro ix siongrr je ee si jnii, itdit byy kiamr .quer, qitnax hongbin henxzenn byy je, inx itsimx-it'ir siuw diauu qewsingg laii ee jaisanw, duiww Charlyne /mexmeh Adi jit diamw dy' byy quansimx. Maxmah si zedqongg ee juxqauwpair qauwdoo, kuix cuir hap cuir dyrr si jruw Iasox qidog, duiww angx cimx hin kiokk be pnaixser. "narr m si linw nng xee ginxaw, jaw dyrr likuix linw vaxvah ar" dagg lexvai jiwjiyw tniax ix qongw jit vaiw. "Adi/ guaw ixqingx jap-gua dxangx byy druar cur nirr ar, ix iauxx byy likuix." Charlyne ciyr inx maxmah.
Adi jniajyr dongsingwluann/ dirr ginhangg jyr qaxx jin' cutsig/ mrqycc jit diamw aw dyrr byy kuaiwlok. Charlyne jurzin si siangsingwluann :ee, jit huathen jurqiw cuthen bunrdee, dyrr lixkir jabjiog quaiwjue verbuw, "inx nng xee qra guaw hai qaxx u qraur camw! Vaxvah qandna' air qoxpiyr, maxmah kangx cuir vro jic, byy dyrr jruw Iasox." tniax kiw laii, jit duir verbuw kaksit byy aiwsimx, simrjiww si siaog :ee.
Guaw duiww Charlyne ham' guaw ji' qranx ee quanhe qamxqag gignaiw, si Charlyne ham' qitnax qywanr byy qang.
Itvnuax laii qongw, jingsinn isux ham' vnerlangg qongw .quer go ~ lak diamxjingx au, jiwjiyw puee puee aw liauxqaiw, jiamrsii quilap cud jinxduan qetqyw. Guaw ham' Charlyne dramm quer sir-jap-veh diamxjingx au, liac byy ix ee bunrdee, si kiamr singjiurqamw? Si ar! Mrqycc uirsniaxmic?
Guaw tehcud jit quaw digding bunrdee, damrvyc cywvai ee simjingg, benxqiongw dirr simlai rue cud jinxduan qiamxcaa hangbok. Kyxviw qongxx, guaw huaigii ix kyxlingg si qiongxviksingr jingsinn qnualingjingr, mng soxu kyxling ee vnerjingr : si m si cuthen qowding mosid ee hing'uii? Ix uanjuann tniax u, zedsimx qongw cud cingcunqii jit quaw qywsingr ee siyw dongrjog --- itvnuax langg dirr hitt dnxua siqanx lai cuthen luirsu ee hing'uii. Jriw cud ixjingg diyhh jiong' vangqingx liyc aw jingxliw, jiacc ansimx kunr. Jap-snax ~ sir huer sii, kixcngg au, dirr bincngdingw tiaur, rair tiaur quann qauw ingcunr, jiacc kir sexcuir, jap-go huer sii, liauxqaiw diyc jex si longrhuir siqanx ee gong hing'uii ziiw, dyrr tingg driau, cuxau, byy qycc jyr dionghok ee hing'uii! Jiaxee ue hro guaw jaiww crur sanxsingx gignaiw, itdit dirr guaw ee simlai, qycc quer snax-jap-lak vaiw ee liaudingg au, jiacc damrvyc liac diyc ix ee qywsingr.
Qauw qywguec au, Charlyne qaux hro guaw jit dniux ciuxhingg, si dingw qywguec ee jinxliauhuir. Guaw juwir diyc ginhangg ham' jingg quiw vaiw :ee byy qang, mng "liw ngua ginhangg?"
Charlyne dimr tauu "driyc, guaw itding rair ngua ginhangg."
"Itding rair ngua?" guaw hni-aw kia quann.
"Si ar! Guaw ee jipiyr iong uann ar!"
"Liw ee ciuxhingg iong uann?" guaw gong gong qycc qongw jit vaiw.
Charlyne jit diamw aw byy hnuahiw, " si ar! Liw byy huathen? Guaw hro liw ee muixx jit dniux jipiyr, dingxbin ee doo longxx byy qang ee setqer."
"Or! Guaw byy qamxqag, jex ham' ngua ginhangg u sniaw quanhe?"
"Liw ee huanxingr byy qraur hyw, qu ginhangg ee sinx do'ngiu guaw longxx iong .quer ar! Diyh'air lingrgua kuix sinx ee kauxjy, jiacc u sinx ee doo ar!"
Guaw qyckacc gignaiw, " liw jnuaxngiu muixx jit vaiw diyhh iong byy qang ee doo?"
"Jex si air ee viauxhen."
"Air ee viauxhen?" guaw sidjai sniu byy.
"Si ar! Jurlaii dyrr byy air qra qang ngiu ee doo hro langg ciauquer jit vaiw. Ixjaw hitt qingx ginhangg jixu veh jiongw setqer doo. Sursit-siong, guaw si liw jiacc diyh'air ngua ginhangg. Jitt vaiw guaw hro liw :ee si derr qauw dniux jipiyr ar! Dongzenn lor! guaw marr diyhh uirr denrjuw qongsix ngua ginhangg."
Guaw byy ue tangx qongw/ beh qongw byy sniax. Kyxlingg guaw qaix sun qihue sui' tecud ham' "air" iuxquanx ee uerdee, ham' ix tyxlun. Guaw duiww jitt jiongw jiacc ser hxang dairjir kiokk vutduan dionghok qiongrbingg ee huanxingr, qamxqag huisiongg quaiwqii, " tniax kiw laii u damrvyc qowding gisid ee hxingg." jex si guaw soxx erdangr viauxdat siongrr uixuanw ee iwqenr!
"Byy cyr! Guaw sniu liw ersaih qongxx si jit jiongw qowding gisid."
"Mrqycc guaw sniu liw ixqingx byy qowding ee hing'uii mosid ar!"
"Oor! guaw iauxx u jerje qowding hing'uii mosid." Charlyne jin' hnuahiw qongw.
Ix kaksit iuguann jiauww jerje qowding quanwsir. Ixau ee quiw vaiw huerjinw, ix qongw jerje qywzinn quanwsingr hing'uii. Soxx jyr ee muixx jit qnia su cavutdyx jerjiyw ham' moxjiongw qowding hing'uii mosid u quanhe. Henxzenn, Charlyne kaksit u qiongvig zinqeh ee vnerjingr. " qiwzenn liw ee quanwsingr hing'uii jiacc je, anne, uirsniaw sir qywguec jingg mng liw sii, liw qongw byy?" gauw mng.
"Hitt sii guaw dyrr m qra liw qongw sit ue, kyxlingg byy qraur sinwzim liw or!"
"Anne liw qongw vehcat ar!"
"Hex si dongzenn lor!"
"Uirsniaw liw hur guaw jit diamxjingx go-jap kox, qycc byy be qongw lauxsid'ue, hro guaw byy huatdo teqiong jinjniar u hau ee vanrhuad?"
Charlyne kikvok qanhiongg knuar guaw, "duhuix guaw zinruii liw ixqingx junxvi hyw, narr byy guaw be tauwlo zimrhyy sidjingg."
Qiwzenn Charlyne ixqingx "jiauzin" quanwsingr hing'uii, guaw hibang erdangr dirr huerjinw qyckacc tanxvec, qiamxjiyw guaw ee caigii. Mrqycc sursit m si anne. Dendyww hro guaw jiamrr caqag ix si jit xee "uac dirr vehcat-lai". Suibongw birlaii quixarr qywguec/ quixarr nii ee dirliauu siqanx, kyxlingg dirr diuduu ee jinghongw ha, jerjiyw jiong' qywzinn jit quaw dairjir duiww guaw tauwlo, mrqycc jingxtew qongw laii, cniurr bee, daiwgii byy sriaux, si ix beh air :ee, ix qewsiok vyxcii jitt jiongw ingwtin hongsid, si beh kongwjer qiogbin, byy jiong' sinwsid qongw cud laii/ diauqangx unxmuaa. Duiww ix liauxqaiw zuxx cimx, diauqangx hro langg' caigii ee vunxjid, guaw qyckacc qniax.
LUANCINX JINGQED
Charlyne qongw cud quanwsingr hing'uii byy zuarr quw, dyrr kaisiw tauwlo cud ix duiww guaw qionglet ee aiwir.
Duxx kaisiw, guaw jit diamw aw dy' byy diyhqniax. Guaw quansimx ix, ix jongxsi jiauww sii laii, siqanx qaur dyrr huwhuir, naxjunxx jinsimx hibang jurgnow singdiongw, guaw daujur simlik, vikced hibang jiauww ix soxx hibang :ee. Ix soxx qongw ee muixx jit qxur ue/ huatsingx dirr ix srinx-siong ee muixx jit hxang su, m na inxkiw guaw ee cuwbi, marr hro guaw jin' diwdang. Lamsingr jinxliauu isux, luxsingr vnerlangg pyrdiyc air ee jinghuaii unkunn duiwtai, si suwsiongg dairjir. Digvet vnerlangg narr dirr donglenn siqii, berdangr uanmuanw sunrli kikhok iluann verbuw ee kunwqingw, jinghongw qyckacc giamdiong.
Soxu qenrkongx ee haidongg longxx u duiww irsingr verbuw sanxsingx singr iogliam ee qinggiam. Tongsiongg qaur sir ~ go huer siongrr binghenw, hyrjyr 'iluann verbuw kunwqingw', hro ginxaw hamrzip qniahniaa kunwqingw. Haidongg duiww verbuw longrban ee aiwluann si jit jiongw knuar be diyc hibang ee air. Ginxaw qra verbuw anne qongw "guaw jaix linw qra guaw qongw .quer, guaw iauxx bue duarhanr, berdangr ham' liw huatsingx singr quanhe, liw jixiaur juwir guaw ee hing'uii/ qongxue ixqingx duarlanghingg, dyrr e qaixvenr sim'ir ar!" singdiongw jyr duarlangg ee qniadac rair u qiongdua jingsinn ligliong, ginxaw jongxsi byy hxuad singsiu, jingsinn kuiwlat tiamw qaxx dongr be diauu ar, itdanr jiapsiu jurqiw jixsi jit xee ginxaw, berdangr/ byy qycc jaiww sniu beh sunrli tngwkag jniajyr singlenn ee guarquanx, anne jinwter liongxlann ee kunwqingw jiacc qaixquat. Ginxaw gno cud byy kyxlingg hii/ himjiangw longxx beh ee dyrliw --- byy kyxlingg singr jiamwiuw verbuw, qycc jyr jit xee be duarhanr ee ginxaw. Hiangxsiu ginxaw ee venrli, hongwkir vnuawcnisik ee singwiok. Quer jitt quanx, iluauu kunwqingw dyrr qaixduu ar! Muixx jit xee langg erdangr cuanw jit kauw kuir --- ginxaw qyckacc si , inx henxzenn qex jin' kuaiwlok, simjingg kinsangx. Jingsinn lingxhik nirr, donglenqii byy hxuad vaiduu luancinx kunwqingw ee vnerlangg, qaur singlenqii ham' jinxliauu isux ji' qranx, vitzenn diong'enw luancinx kunwqingw. Vnerlangg diyh'air yc hongwkir jiong' jinxliauu isux knuawjyr longrbanrair/ singwair duiwsiong, siongrdingx qra jurqiw dongwjyr jinxliauu isux ee qniaw, qaixquat luancinx kunwqingw. Narr si anne, jingxqyy surqnia ee jinwdenw e jin' sunrli. Vnerlangg did diyc siauqaiw, hiongxsiu jinxliauu isux teqiong cniurr vaxvah ee hiabjo; vnerlangg erdangr itbuu-joxgai kipsiux isux ee diwhui/ aiwsimx.
Jixsi, jitt jiongw hongsid dirr Charlyne/ guaw ji' qranx, qniaa be tongx.
Dirr jitt xee qaidnua, huxdy ee jinwdenw byy sun, si guaw kaisiw hnuaw hnuaw caqag duiww Charlyne ee huanxqamw decc jingqax, jex duiww guaw sngr si byy qaiww jingwsiongg ee qiamgiam. Dng' jit xui belangg ee luxsingr duiww guaw u aiwir, guaw ee bunrdee ongxongw si zuhyy qavue huevyr. Guaw dongzenn duiww jitt xui luxsingr u singr hongbin ee jingiok/ huanwsiongw, juadduir be ingxhiongw guaw ee pnuawduan/ dirliauu isux ee jikzim. Unjingg duiwtai huwcud air ee vnerlangg, duiww guaw laii qongw, m si kunwlann ee dairjir.(guaw huaigii Peck lienn , jin' kyxlingg si ham' vnerlangg u quanhe, hro Lily likuix.qisit, guaw qra sngr siqanx, ingwqaix si lienn au byy zuarr quw dyrr diyhvne.)
Mrqycc ham' Charlyne jywhuew, kiokk si lingrgua jit huesu, guaw duiww ix jit diamw aw dy' byy singr huanwsiongw. Sionghuanw, jixiaur sniu diyc ham' ix u quanhe, dyrr hro guaw e tror. Lenrr kap ix .jit .xe jitt lui ham' singr byy quanhe ee liamrtauu, dy' hro guaw damrvyc kiw huanxqamw. Jinghingg zuxx laii zuxx camw, siqanx ee liusid, sniu beh ham' ix vyxcii qirlii ee liamrtauu zuxx qionglet.
Kyxlingg guaw jiamrr jingqax ee huanxqamw, juadduarvorhun m si singr huanxingr. Qisit vutjixsi guaw duiww Charlyne huanxqamw. Lingrgua jit xui quancad/ diwlik jin' hyw ee luxsingr vnerlangg, dirr mow jit vaiw huerjinw sii, jit kaisiw dyrr mng guaw, "liw qamxx bad hitt xui jongxsi dirr guaw jingg qnir liw ee luxsu?"
Guaw dimr tauu. Ix qongw ee si Charlyne.
"Jitt xee langg hro guaw kiw qebuxpuee, m jaix sniaw guan'inx? Simrjiww byy ham' ix qongw quer ue. Jixvutqyr zip laii haurjinxsig/ tec ix ee guarsnax/ likuix. Jurlaii m bad qongxue, ix dyrr si hro guaw cangr mngqngw."
"Kyxlingg ix byy qraur iuxsen!" guaw amwsi.
"M si --- guaw marr byy guanrir suiven ham' liw ee huanrjiaw qongw dngdew. M jaix rair anxjnuaw qongw, ix ... cincniu u jit qrow siakuir."
Guaw qniax jit diyy, "ix knuar kiw laii jit diamw aw dyrr byy quair, driyc hnor?"
"Be, ix ham' itvnuax jingwsionglangg byy nng ngiu! Cingrcah dnaxvan, cniurr juangiap zinsu, m jaix jnuaxngiu, jongxsi hro guaw byy songxkuair. Guaw berhiauw qongw, mrqycc mng guaw si m si qnir quer siaog ee langg, byy m driyc dyrr si ix jitt lui :ee!"
Bylun guaw huanxqamw si m si juxiaur sriok singr huanxingr, Charlyne huerjinw sii henxlo cud ee singr gixgenn, digvet duardnaw/ guarhiongr. Tongsiongg duiww guaw u iwsur ee luxhuanrjiaw, kaisiw jongxsi viwsur/ ng'iab, Charlyne uanjuann byy qang, ix e diauqangx muakamr jusinr, jiyh jex inxkiw guaw juwir ee iwdosimx, anne dyrr jin' cingcyw ar!
"Liw jin' lingw." iong mng jue ee hongsid qongw. "guaw byy bingvik liw uirsniaw byy be lamw guaw."
"Zuqyw liw su'iaur anuir, anne ersaih tihh. Mrqycc guaw qamxqag liw duar u singr ee iwdoo."
"Hex si liw qaqi diauqangx uilann guaw decc jokquair." Charlyne dua sniax huah."guaw m si sniu beh did diyc singr ee anuir/ qitnax hongbin ee anuir, qycc u sniaw cavet? M quanw dycc hongbin, guaw longxx su'iaur."
Guaw jinrliong qaixsueh jit vxenr quer jit vxenr, "liw erdangr ui' qitnax langg ee srinx-siong did diyc singr anuir, liw huwhuir si sniu beh ui' guaw jiax did diyc kacc byy qangrkuanw ee quanhuaii, liw benw ham' guaw huatsingx quanhe."
"Guaw byy qamxqag liw ee quansimx. Liw auwkasiaur qycc lingxdam, jit diamw aw dy' byy zedjingg. Qiwzenn liw duiww guaw lingx vingvingx, jnuaxngiu erdangr vangjan guaw neh?"
Guaw qaqi marr kaisiw huaigii. Charlyne jongxsi hro guaw e sniu"dauwdew u sikhap jyr ix ee iliausux bor?
Charlyne duiww guaw ee air, duar u jywquiw/ cimziaw ee singhun. Zuac .langg sii dyrr kacc jaw laii, jre dirr huehngg danw. Zuqyw ix singx qongw jit sniax, kyxlingg guaw be qex ue, guaw qac'ir langg ham' huex dauwdin, jex si guaw ham' kanciuw ee cuwbi. Mrqycc Charlyne m bad mng .quer. Quixarr vaiw gunw byy iog ee amwmee, guaw knuar duiww txangx-gua, ix qra ciax tingg dirr gunw daux taujingg, jre dirr amr mimox ee ciax-lai tniax imgak. Hro guaw kiw uiwqnuaa! Mng ix sniaw dairjir ,kinx kinx aw rinr " liw jaix, liw si guaw soxx air :ee, sniu beh jiapqin soxx air ee langg si tenqingx-dergi lixsow-dongzenn ee!"
U jit zit, ham' ix byy iog, jit qniaa zip vanrqongsid dosuquanw, hionghiongg knuar diyc Charlyne jre dirr hiax decc knuar guaw siaw ee jit vunw ceh.
"Liw jnuaxngiu dirr jiax?"
"Jiax sii haurjinxsig, qamxx m si?"
"Liw ham' isux u iog sii, si haurjinxsig, guaw byy knuar huanrjiaw sii, jiax si guaw suzinn druar ee soxjai."
Charlyne jairunw aw qongw " duiww guaw laii qongw, jiax dyrr si haurjinxsig, qiwzenn liw qra cur dongwjyr vanrqongsig, diyh'air u simliw junxvi, kyxlingg e songwsid jit quaw qywzinn unxsux ee kongqanx."
Guaw kakding ix laii cue guaw byy sikdongx ee lixiuu au, qiogvutqiok qra qnuaw. Guaw jitsiwlangg byy cniurr hitt sii qamxqag jurqiw cniurr duw diyc langg' itdit beh kywuaw .laii, simrjiww cniurr virr qiongvig qniahniaa imngiaw ha ee ziogser luxjuw. Sursit-siong, Charlyne u nng vaiw huerjinw au, qra guaw liac ann ~ , narr m si sui' qra sag kuix, ix iauxx sniu beh lamw lehh!
Ginxaw narr byy huatdo qaixduu luancinx jingqed ee juxiaur guan'inx si, sir huer(soxui jingg-luancinx nihuer) ixjingg did be diyc verbuw cionghun ee air/ quansimx. Qaixquad luancinx kunwqingw naxx cniurr kixjy duarlauu ee erkajann, derqix unxjai qenqor, narr byy, jit diamw aw vanrhuad dy' byy huatdo kiw kiw .kir. Jerje henrsiong henxsi, Charlyne jit kaisiw simjingg huatdenw byy qenrjuann, ix ee maxmah niwsnir huwcud air, dirr ix ee qiwig-lai, vaxvah/ maxmah m bad py .quer, ciangjai bang diyc lingx. Jiac mic hongbin, jongxsi qencii cue qiquair ee mic. Ham' langg' jywhuew jiac vng, ongxongw digvet air qiquair ee mic. Ui' jingsinn hunsig ee quandiamw knuar, siongrr qivunw ee bunrdee m si byy qaixquad luancinx jingqed, si cud dirr " jingg luancinx liuluann cuiwiok jxingr (?Pre-Oedipal Oral Fixation)
Charlyne jin' qitai bongx guaw, hro guaw syx, si duiww maxmah tniawair ee qitai --- itdit byy hiangxsiu dngw-jxaii au, maxmah unluanw ee pangbi. Guaw duiww ix jitt jiongw qitai ee iogbang, qamxqag jin' uihiap/ kiw huanxqamw. Bongsyx si ix beh air ee, uirr dirliauu, guaw qaix hro ix buanxjiog? Hro ix jre dirr guaw ee katau'u/ qra lamw/ qra py/ qra bongx/qra syx/ qra jimx, itdit qaur ix vingjing?
Kyxlingg ingwqaix? Kyxlingg vutqaix? Siongser sniu quer au, sniu tongx ar. Dyrr si guaw guanrir jiong' Charlyne dongwjyr puawvne/ vakdow iaux ee ngex-aw jiauwqor, ix kiokk byy guanrir jiapsiu jitt lui ee quanair. Ix byy guanrir guaw qra dongwjyr zidongg, qyckacc benw qongw ngex-aw! Ix qencii guaw byy cuwbi lamw ix si duiww ix byy "singr" ee cuwbi. Ix byy zinruii jurqiw si vakdow iaux ee haidongg, jurzin si cingcunx siauwlenlangg. Cir quer qokk jiongw honghuad, vauquad hro ix dyw dirr te'iw, hiabjo ix iong kacc virdong/ sinwzim/ cniurr ginxaw ee ngiursniur duiww guaw. Guaw ee loxlik juanvo jyr vehqangx. Taubuew sir dxangx ee liaudingg, ix qencii " juxkongr juanqiok" ee jutair duiww guaw. Zuqyw Charlyne beh cniurr jit xui iuwdir ee haidongg, diyh'air jiong' kongwjewkuann qaux hro guaw, hro guaw cniurr verbuw jiauwqor ix, m si iauqiuu guaw dirr singr buanxjiog ix. Ix m jiauww guaw ee hongsid, ix suisii longxx beh jiangxquanw kongwjer.
Simliw hunsig qewqor ee cimdo dirliauu quewdingg, e iauqiuu vnerlangg dirr mow quaw qaidnua jiwjiyw tewhuar qaur moxjingw tingdo. Jex si jit hxang qylando/ e ho'ngg qniax ee iauqiuu. Duiww sibquanr doglip jurjuw/ jurzin simliw singsik ee singlenlangg laii qongw, hro inx ee hing'uii qniadac qycc jaiww huedngw zidongg siqii, ilai langg'/ qamxsingr cuiwziok ee simtair, juadduir m si qanxdanx :ee. Inx zuxx kunwziauw vut'anx --- vnerlangg ee donglenqii zuxx byy buanxjiog .quer/ zuxx tongwkow/ siursiongx zuxx cimx --- dirliauu quanhe ee vue'iongw sii, zuxx lann dngw kir donglenn qaidnua. Jex cniurr huan liauw byy iyc rix ee vne, kiokk byy juadbang. Itdanr erdangr dngw kir qaur donglenn qaidnua, hyw uanjuann dyrr erdangr qitai ar!narr m si, dingxii byy hxuad diongsinx pah derqix. Dyrliw jin' qanxdanx --- byy tewhuar, qiur be uac.
Beh guaw jriw cud Charlyne dngqii jiapsiu guaw ee huxdy, kuanr be diyc rix hyw hibang, ui'id guan'inx, si ix byy hxuad tewhuar qaur iuwdongg siqii. Tewhuar singqongx ee huanrjiaw, dirr liaudingg viauxhen cud ee taiwdo hing'uii, e jit-vah-veh-jap dxo juanxvenr. Inx e henxlo cud ixjaw byy ee lingjing/ vinghyy, hro langg' hongwsimx ee sunjinx kiwjid --- knuar jinghingg ee su'iaur, diyhh siux qaix vangr, jai qycc unw, qycc uac kiw laii ee hxingg. Huanrjiaw/ isux ji' qranx ee hordong m na tongtauw/ sunrli/ simrjiww ciongbuanw hnuahiw/ zukuair ee kiwhunx, jex si jit jiongw drat qaur uanbiw/ ciongbuanw air ee buxluw cinjuw quanhe. Narr erdangr ham' Charlyne drat qaur jitt jiongw jongrtair/ jinghongw kaksit u vit'iaur, anne byy huaigii, guaw erdangr/ guanrir hro Charlyne jre dirr guaw ee katau'u, buanxjiog itcer ee su'iaur. Jitt jiongw qingxqair ee kyxlingsingr jit sxix aw dyrr knuar byy. Suibongw sursit ix ham' ingzii byy nng ngiu, mrqycc ix jit diamw aw dyrr byy dansunn-busiaa, m bad ho'ngg jinjniar hongwsimx. Ix iuguann si ixjaw ee ix, itdit qaur juewau qingwzenn viauxhen cniurr sucunx ee singlenlangg. Liaudingg jinwhingg snax dxangx ee mow jit zit, Charlyne qra guaw qongw "guaw iauxx si byy bingvik."
"Byy bingvik sniaw?"
"Guaw byy bingvik uirsniaw ginxaw berdangr ham' verbuw huatsingx singr quanhe?"
Guaw nairsingr qycc jaiww qaixsueh, verbuw hiabjo ginxaw doglip si verbuw ee jikzim, mrqycc tuatli verbuw doglip, jongxsi luanrlunn quanhe sriu joxdongr.
"Guaw ham' liw huatsingx singr quanhe byy sngr luanrlunn, liw m si guaw jinjniar ee vaxvah."
"Guaw kyxlingg m si liw ee vaxvah, si liw ee jinxdi isux, si vnuaenw vaxvah ee qaksig, guaw ee jikzim si jo liw singdiongw, m si dirr singr hongbin, liw erdangr ui' qitnax qangrvuer srinx-siong did .diyc."
"Guaw ham' liw si vnevuer ar!" qongw qaxx jin' dua sniax.
"Charlyne, liw si guaw ee huanrjiaw, liw binrlimm qokk jiongw dua mahuann, diyh'air u langg vangjan. Guaw beh haibjo liw vaiduu jiaxee kunwqingw, m si ham' liw kunr."
"Guaw si liw ee vnerlangg, guaw ham' liw iuguann si qangrvuer."
"Charlyne, sursit-siong, liw m si guaw qangrunn :ee, liw lenrr qe jancur ee qangjog, dyrr jyr be lensuar/ liw simrjiww jingxliw be cud sriok jurqiw zinsingx ee lo. Ui' simlixhak qakdo knuar liw, liw dyrr si ngex-aw, jex iauxx byy iauwqinw, si liw ee verbuw byy jin jikzim, mair qycc qaxjongx si ham' guaw qangrveur ar! Liw jnuaxngiu m jinrliong simjingg vangr kinsangx, hiongxsiu guaw duiww liw huwcud naxx verbuw ee quanhuaii? Guaw jinsimx iong jitt jiongw hongsid laii air liw. Cniaw liw tingjiw amwsngr guaw si liw singr duiwsiong ee liamrtauu. Charlyne, hongwkir jitt jiongw sniurhuad!"
"Guaw be hongwkir, guaw beh u liw, guaw pacsngr iongxiuw liw."
Suibongw ix ixqingx viauxdat qaxx jiacc cingcyw, guaw iuguann qamxqag Charlyne juxdong viauxsi ee air m si jinsimx-sing'ir, si cutsir dyrr u ee hiqew dongrjog, ixx singr jyr amwho, did diyc ngex-aw jiac lingx ee buanxjiog, qexjiyh singr sriu diyc naxx ingzii ee aiwho --- Charlyne qencii bersaih tiacpuar ix qexsenx ee hing'uii, vunxjid-siong, jitt jiongw henrsiong byy sniaw digvet! Guaw itjair anne qongw "qisit liw hibang guaw cniurr maxmah jiauwqor liw, byy quanhe, jex jin' hyw, guaw hnuahiw anne jyr, jex si liw soxx su'iaiur :ee. Sursit-siong, marr si liw qaix did .diyc .ee. Quewkir liw ho'ngg amwkamr, jitmaw liw dongzenn rair vow dngw laii, qinw qra 'singr' danwdiau! Jitt hongbin liw iauxx bue junxvi hyxser, liw iauxx sniu' siauwlenn. Vangr kinsangx dyw hyxser, qamxsiu guaw ee unjingg/ tniawair/ jiauwqor liw."
Ix jongxsi m kingw, jerjiyw zinrding guaw decc sed hamrjnew --- ix donglenn did .diyc ee buxair kyxlingg si jit xee hamrjnew. Ix ee dexjer/ qirjuat, narr si qandna' qniahniaa, si erdangr kikhok :ee, mrqycc naxx uanjuann si kuanlik jokquair, bunrdee dyrr jin' giamdiong! Jex m na si ix qniax guaw buxsingr ee lat inxcua, si ix byy guanrir dirr dirliauu quewdingg srid .kir/ hongwkir. Ix naxx jin' qiongser qongw " laii qiur guaw, mrqycc mair qaixvenr guaw." ix m na hibang did diyc jiauwqor, marr hibang jniajyr jiauwqor ix :ee ee juxlangg.
Charlyne giamle jikvi guaw kiamr lamw ix ee zedjingg/ iogbang sii, qencii " guaw qandna' beh liw kingxding guaw, zuqyw dirliauu isux lenrr kingxding guaw jitt jit vo dy' jyr byy qraur, jnuaxngiu u linglik dri hyw guaw?" ix qongw diyc diongrdiamw, maxmah duiww ngex-aw soxx huxcud ee air, dyrr si ixx kingxding jyr vunxjid. Itvnuax qenrkongx ee maxmah jixsi uirr ix si ingzii huwcud air; ingzii benw jyr zimrhyy loxlik. Jex si tensingr/ byy diauqnia ee air. Jitt hxun air ciongbuanw kingxding ee sniabingg "qniaw! Liw si guaw buqer ee vyw, jixiaur liw junjai!"
Ingzii nng ~ snax huer, maxmah kaisiw jingqax duiww ix ee qitai, vixzuu, kaisiw hunwlen kir venrsow. Ui' jitt qaidnua kiw, air si moxjiongw tingdo u diauqnia singhun. "vyxvuer, guaw air liw, mrqycc guaw hibang liw ixau bersaih liah ceh!" "guaw hibang liw mair qra daidingx kiuw lyc laii tokax!" "guaw hibang liw jyr quaw hyxdai, kir venrsow vangr, mair hro guaw sew hiacc je snakor!" ginxaw yc erhiauw "hyw" "baiw" "pnaiw", marr yc erhiauw jyr jit xee hyw ginxaw, jiacc e qewsiok sriu diyc vah hxun ji' vah ee kingxding, jitt sii kiw, inx diyh'air did diyc langg' duiww ix ee kingxding, ixau ee zidjiw marr si anne, jiacc e u sniwmia ee kuiwlat. Byy diauqnia ee kingxding qo' han dirr ingziqii. Singlenn ee liw/ guaw, jerjiyw erhiauw uirr beh langg air liw, u jikzim hro jurqiw jniajyr kyxair ee langg.
Charlyne hing'uii diongriaur digjid, si ix iauqiuu --- m driyc, si ix qiongg beh --- guaw air ix; ix m si hibang guaw kingxding ix hing'uii ee viauxhen, si beh guaw kingxding ix ee vunxsingr/ ix ee vnertair. Ix hibang guaw buanxjiog ix, qitai guaw hro ix air; si buxcinx duiww ingzii ee quanair --- jit jiongw jixu ingzii jiacc texhue diyc qewsiok/ vutduan/ byy diauqnia ee air. Lanw ixqingx jingwsit, Charlyne dirr ingzii siqii byy hxuad did diyc buxcinx byy diauqnia kingxding ee air --- si muixx jit xee ingzii ee kuanli. Ix itdit virr vakduat jitt hxang tenhur kuanli. Ix qiongqiuu guaw byy diauqnia air ix --- jitt xui byy qenrjuann ee singlenlangg. Guaw kyxlingg byy huatdo vow ix tensingx kuanli virr duat ee kiamwkuad. Ix qencii guaw cniurr buxcinx tniar ingzii air ix; qencii guaw duiwtai ix vnejerkia ee singlenlangg. Narr byy lergua, ix ee iauqiuu si juadduir byy hxuad sidhen, jitt xee iauqiuu henwcud ix ee vnertair.
Chalyne byy sniu beh did qiur; hibang virr langg air, kiokk byy guanrir vadd langg qaixvenr ix. Suibongw Charlyne qewsiok jiapsiu dirliauu, mrqycc ix sniu beh jiyh dirliauu, drat qaur guaw air ix ee iwdoo, zuxx laii zuxx binghenw; ngua jit qxur qongw, ix sniu beh u guaw ee air, marr beh qewsiok tingxsing ix ee jingsinn quanlingjingr --- hii/ himjiangw nng hxang longxx beh air.
JURLUANN JURVIR
Qaur jiax, Charlyne jip'id ee singwqeh qiongbecc henr cud laii. Itdit qaur liaudingg jinwzip derr snax nii, dng' guaw liauxqaiw Charlyne qisit si jin' qopiah/ jurvir sii, ix ee qowjib jiacc uanjuann henwsinx!
Simlingg qenrkongx ee langg diyhh hro jurqiw erdangr sunrjiongg/ kuthok dirr jancur viw jurqiw kacc quann ee surbut. Dirr mow digding sikig, langg diyh'air sunrjiongg jancur viw jurqiw luersimx iogliam kacc quann ee guanjig, jiacc erdangr dirr siarhue-siong sik'ingr hyxser. Duiww qauwdoo laii qongw, jitt xee jixdy guanjig dyrr si siongrder, "si jiauww siongrder liw ee jixir, m si guaw qywzinn ee iwjir jyr." simdir qenrjuann ee huiqauwdoo marr e hogjiongg qyckacc quann jancur ee ligliong --- kyxlingg jinliw/ air/ su'iaur tnazinn, henrsit ee suqiuu. "simlingg derdoo" duiww simlingg qenrkongx soxx lyc ee dingrgi si : byy qewqaur zimrhyy dairqer, vutduan juanlik zinrcingx henrsit ee quewdingg.
Uanjuann byy hxuad zinrcingx henrsit ee vne si "jurviwjingr (Autism)" --- zirguann laii jurr Hellene ee zirqinx "jurgnow (Atmo)". Jurviwjingr huanrjiaw be qir did henrsit mow quaw diongriaur ee kongqanx. Jiaxee langg bugii si uac dirr jurgnow ee sewqair, itcer ixx jurgnow siongrr dang.
Guaw mng Charlyne uirhyy sniu beh ham' guaw u singr quanhe, ix jongw dab qaxx jin' asali " guaw air liw!" guaw itjairr jitqii si m si jinair, ix byy iong'unw guaw huaigii ix ee air. Dirr guaw knuar .laii, si jurviwjingr ee viauxhen. Ix zinruii dagg qywguec qaux hro guaw byy qang do'ngiu ee ciuxhingg, juann si uirr guaw jyr :ee. Dirr ix ee simlai, guaw ham' hitt qywguec ee dongiu u digvet ee mow jiongw quanlenn, jex juann si ix dnuax hongbin ee sniurhuad. Sursit-siong, guaw m na vutquanw ix caixiong ee jipiyr ngiusid, ix suanw cud ee do'ngiu ham' henrsit nirr ee guaw uanjuann byy kanlenn.
Charlyne jurzin ix air muixx jit xee langg, soxx sriok ee qauwpair ixx "air zinlui" jyr juxiaur ee qauwgi, suisii vunsangr lexmic/ cinced unluanw ee quanair, qniaa pxenr jitt xee sewqair. Mrqycc guaw duiww ix jitt hxun air ee knuawhuad, jurr tauu qaur buew, juanzenn byy qor guaw ee qamxsiu. Jit xee dangtnix amwmee, huerjinw qetsog au quiw hunjingx, guaw dryr jit vxuex Martini qniaa zip kectniax, anwsngr jre dirr huexloo-vnix hiyckunr jit xe, sunsuar knuar quiw dniux puex. Guaw tniax diyc u langg vutduan huad engine ee sniax, qniaa cud kir guarbin, hitt xee langg si Charlyne!
"M jaix dyhh cud bunrdee? Huad be dinxdang!"
"Qamxx si byy iuu ar?"
"Guaw sniu be or!"
"Liw sniu be? Iuviyw jixjiamx ee kikdo zuarr je?"
"Oor! Jixjiamx jriw 'lingg'." Charlyne hnuahiw dab.
Guaw siurkir qycc hyxciyr."zuqyw iuviyw ee jixjiamx si lingg, liw vin' sniaw zinruii m si byy iuu?"
"In'ui jixjiamx ingxuanw jriw lingg."
"Liw si sniaw iwsur? Qamxx qongw viyw pnaiw .kir ar?
"M si, jiwjiyw guaw byy zinruii viyw pnaiw .kir, guaw juadduir be hro muixx jit vaiw qax iuu ee iuliong ciauquer quiw Gallon, anne guaw dyrr vaxab be longrhuir iuu, duw diyc u vit'iaur qex qax quaw, sngw caibee marr jin' cuwbi, jex guaw si jin' gauu."
"Liw iyh m driyc, duw diyc byy iuu u quiw vaiw?" huathen jit hxang sinqii/ qoxquair ee qowding quanwsir au, guaw diyhqniax mng.
"Byy ciangjai huatsingx, jit nii kyxlingg duw diyc jit ~ nng vaiw."
"Jitmaw jitt vaiw si qidiongx ee jit vaiw hnor!" guaw damrvyc gexse. "jitmaw liw pacsngr anxjnuaw vran?"
"Liw narr beh hro guaw zip kir cur nirr kar denrue, gauw erdangr iong denrue huah qiur langg."
"Charlyne, jitmaw amwsii qauw diamw ar, jiax qycc si qaukux, liw sniu vadd langg e anxjnuaw jyr?"
"Qangjog zinguann u sii amwsii e cutdong. Narr byy, ui'id ee vanrhuad si liw jiyh guaw kiwiuu."
"Guaw kiongxqniax byy he qex ee kiwiuu."
"Liw ciasniux ee iuu singx kib jit quaw quer laii ?"
"Ingqaix byy bunrdee, jixsi gunw byy kib kiwiuu ee qangqu."
"Oor! Guaw u iuqongw." Charlyne dab qaxx jin' hnuahiw. "guaw he dirr hinglixsniux, guaw air banrsu junxvi jiujuann."
guaw cue cud tangw-aw/ lrau-aw, iong ix ee iuqongw singx suh jit cuir, hro Charlyne jit Gallon ee kiwiuu. Ix huatdong ciax, likuix. Zip kir cur-lai, qui' singkux kiw qnuaa, Martini unx unx, bi vyc .kir. Qui' cuir ee kiwiubi hro guaw limx jiuw byy jubi. Qui' amr, qui' cur ee kiwiuu cauwbi, jaiww byy qitnax :ee!
Nng zit au, Charlyne laii jinxliauu, viauxsi jingg hitt vaiw huerjinw au, sing'uac jin' vingjing. Juewau, guaw mng ix duiww hitt amr huatsingx ee dairjir, u sniaw qamxsiongw?
"Cuxliw qaxx jin' hyxser ar, guaw jyr qaxx jin' hnuahiw."
"Liw jin' hnuahiw?"
"Si ar! Jin' ciwqig. Drang taukag, sniu vanrhuad qra iuu kib kiw laii, zuhyy huatdong ciax, naxx decc tamwhiamw lehh. Lanw nng xee jywhuew hunhiongw anne ee qinggiam. Liw qamxx jaix? Jex si lanw derr id vaiw dauwdin uansingg jit qnia su. Erdangr ham' liw dirr amr mimox nirr jywhuew jyr dairjir, jin' cuwbi!"
"Liw zinruii guaw u qangrkuanw ee qamxsiu?"
"Guaw m jaix, vutqyr guaw zinruii liw marr vitding qamxqag songxkuair."
"Uirsniaw anne iyh?"
"Guaw marr m jaix, qamxx qongw liw byy qamxqag jin' songxkuair?"
"Charlyne, qamxx qongw liw m bad sniu .quer, jo liw huatdong ciax hitt amr, guaw kyxlingg iauxx u qitnax ee dairjir --- qitnax kacc u iwgi ee su?"
"Be, guaw sniu dag'ee longxx zinruii jo langg si kuaiwlok :ee. Jiwjiyw guaw qaqi si anne, qamxx qongw liw m si?"
"Charlyne, iwgua huatsingx sii, liw si m si u qamxqag byy jurjai? Iaxx si pnaixser? Guaw ter liw cuxliw, liw qamxx u qamxqag be quewsimx?"
"Ar! Arr m si guaw m driyc."
"Qamxx m si ?"
"M si." Charlyne quatduanr dab. "ciax iusniux-lai ee kiwiuu viw guaw soxx jaix :ee jiyw, m si guaw ee cyr. Guaw iyh liw kyxlingg e qongw guaw jaw qaix qoxqer kacc jingkag .quaw. Dairliok qongw, guaw ixqingx jyr be baiw ar! Guaw qongw .quer, jit nii lai qandna' snax ~ sir vaiw byy iuu ee iwgua, jex ixqingx sngr jin' hyw ar!"
"Charlyne, guaw sraiw ciax ee nijux si liw snax vxue quw, mrqycc guaw jurlaii m bad sraiw qaxx byy kiwiuu."
"Henxzenn, liw zinruii jurlaii m bad iong qaxx byy kiwiuu, si jin' liauxvutkiw ee dua dairjir. Guaw ee iwsur si, liw qra jitt qnia su knuar qaxx jiacc giamdiong! Jinjniar m si guaw ee cyr, si liw sniu' taiww je ar!"
Guaw dauhangg! Jitt sii jitt kig guaw jingsinn kuiwlat ixqingx tiamw qaxx be dinxdang ar, byy air qycc siongx nauxqinx ar, ix duiww guaw ee simjingg qamxsiu uanjuann dongwjyr byy junjai.
Jurvir si jurluann jiongbuew viauxhen. Tetdew jurluanjiaw zinrding langg si qangqu, si byy simliw simjniaa ee sidtew. Jurluanjiaw simdiongx junjai ee si, Martin Buber soxui guaw siongrr dua "jurgnow quanherquanx". Suibongw guaw juadduir siongsinr Charlyne jinsimx zinruii ix air guaw, mrqycc Charlyne ee "air" juann si ix taukag-drew ee huanwsiongw, m si kecquanx juanjai ee sursit. Ix jurzin si "jiywqngx zinlui ee qngx", ix soxx qniakaqaur ee soxjai, vitzenn u hnuahiw/ kuaiwlok, mrqycc guaw ham' qitnax ham' ix qauongw .quer ee langg, qamxqag ix tingkax .quer ee xui jongxsi lauu lyc qunxqaw hunwluan/ gignaiw vut'anx.
Diyhqniax ee langg ingxuanw m si Charlyne, dendyww si guaw/ qitnax hro ix congr qaxx bu sawsar ee langg. Kyxviw qongxx, sraiw hng lo, itding e jauw m driyc lo kir. Jitt xee jinghingg, guaw itdit sniu byy --- kyxlingg dap'anr taiww binghenw, guaw jiacc sniu byy guan'inx. Jit sniu diyc jurvir, guaw ee gigniaw jurzenn dyrr kuiqaiw! U jit zit, Charlyne uanr qongw ix vunxlaii beh kir NewYork City, suacc kir NewYork Jiux lingrgua jit xee sniaci, "qniaa 84 hy jiujer qonglo jiacc uad hiongr 684 hy lo" guaw qongw.
"Byy m driyc, gauw ee bogviaux si 684 hy jiujer qonglo." Charlyne hnuahiw dua sniax qongw.
"Liw qniaa hitt diauu lo kir NewYorkCity ixqingx jerje vaiw ar, qycc qongw, hitt xee viauhy jin' binghenw, liw jnuaxngiu e sraiw m driyc?"
"Guaw decc cniur jit der quax, qui' xee taukag decc sniu beh anxjnuaw cniur lyc kir."
"Guanlaii si liw byy juansimx sraiw ciax."
"Guaw duxx aw qamxx m si qra liw qongw .quer?"Charlyne byy songxkuair huee.
"Charlyne, liw ciangjai qniaa m driyc lo, kyxlingg guan'inx longxx si qang jitt xee bunrdee, liw byy juansimx sraiw ciax."
"Guaw byy huatdo dongsii jyr nng hxang su, sniu quadiau, qycc juansimx sraiw ciax."
"Driyc! Liw berdangr sniu beh cniur quax, qycc beh qonglo quanxlixqiok puewhap liw. Zuqyw liw beh qniaa driyc lo, diyh'air juansimx knuar viauhy, zuqyw liw sniu beh hamrzip huanwsiongw ee bongbu nirr, anne dyrr kyxlingg ham' guarqair qab be ba. Charylne, jin' sitlew jiacc didjiap qra liw qongw, mrqycc si sidjingg."
Charlyne ui' pongwiw tiaur kiw laii." guaw byy pacsngr jitt crur ee huerjinw iong jitt jiongw hongsid jinwhingg, guaw byy sniu beh dirr jiax, cniurr jit xee ginxaw qongx vehcat, au lexvair jiacc qycc laii!" ix lingw lingw aw qongw.
Charlyne diongdoo likuix m si derr id vaii! Guaw qangrkuanw cniurr ixjingg vaiwtog ix lauu lyc laii. "Charlyne, liw xee siqanx iauxx u jidvnuar ixsiong, lauu lyc laii, lanw qycc qewsiok, jitt xee uerdee jin' diongriaur."
Guaw be hur dongr, mngg sag jit xe dyrr jongg cud kir.
Jitt kig, guaw marr gno diyc Charlyne lingrgua jit hxang vnerdingx : muixx jit hxang qangjog jyr byy quiw qywguec. Nng nii vnuar ee dirliauu siqanx, ixqingx ngua liauw sir jiongw singwjid uanjuann byy qang ee taulo! Ngua sinx qangjog ee qiqanx, naxx cue naxx hiyh jit dnxua vutjiw dngg ee siqanx. Dirr ngua derr go xee qangjog jingg jit amr, guaw mng ix " qamxx e qinxdniux?"
Jit diamw aw dyrr byy amkamr, henxlo cud diyhqniax ee binriongg "be ar! Uirsniaw diyhh qinxdniux?"
"Narr si guaw kaisiw jyr sinx qangjog, guaw dyrr e qinxdniux. Digvet si, ixqingx hro langg srii quixarr vaiw .quer, anne guaw itding e qinxdniux. Guaw e qniax jurqiw jyr byy hyxser. Sursit-siong, jixiaur guaw jinwzip qangjog quijig byy sigsai ee kuankingw, dyrr e u damrvyc qniax."
"Mrqycc, guaw jin' cingcyw qangjog quijig." Charlyne huanxvog.
Guaw qongw be cud ue, damrvyc cniqniax siongr ix. " liw iauxx bue kaisiw qangjog, jnuaxngiu erdangr cingcyw qangjog quijig?"
"Guaw ee qangjog si damzim jiulip haghau juanbunn huxdy diwlingg jiongwgai hagsingx juanguann ee jorliw. Cniar gauw ee luxjuxquanw qra guaw qongw, vnerlangg ham' ginxaw qangrkuanw, jiauwqor ginxaw guaw uanjuann lairhangg, m quanw anxjnuaw qongw, guaw u jit xee mexmeh, guaw qycc si juxzidyc ee laursux, qamxx m si ?"
Qingquer jinr jit vo ee tamwtyw, guaw jiamrr huathen, Charlyne ee qangjog quijig si jurqiw setding ee, jinwcud sinx kuanqingw jurlaii be qinxdniux, byy quanw dingxsix ee iauqiuu, ix marr vutquanw duiww zinrdix/ sursit ji' qranx soxx sanxsingx ee gibun, uanjuann jiauww jurqiw irsed ee quijig jyr, byy qor diyc tauqex soxx iauqiuu ee qangjog hongsid. Dongsu jin' qinw dyrr hro ix congr qra jin' kunxziauw, benw zuarr quw, inx m si honghuew dyc, dyrr uanjuann dongr ix be diauu! Charlyne venrqaiw, "jiaxee langg jin' jankog." ix jongxsi uanr guaw byy jxingg/ itdit byy bingvik uirhyy langg' berdangr zimxsiu ix. Ix qra jxingg knuar sniu dang ar!
Charlyne dairhak tak be cutgiap ee guan'inx marr cavutdyx puu cud laii ar! Ix jin' jiyw erdangr dirr qihan-lai qaux jokgiap, dyrr si u jyh ar, kiokk m si laursux jixding ee juxdee. Guaw tuijenr Charlyne kir jusunn mow xui simliw hagqax anne qongw "ix IQ quann qaxx erdangr qra junlam vingw dyw." kiokk virr zirliuu dairhak tad cud laii. Guaw vutduan sniu jin honghuad itjairr qra qongw --- u sii uixuanw, u sii qionglet --- qra langg ee junjai vangr gua gua si ix sitvai ee juxinx; jurgnow huixbet si ix qaqi sniu qaqi driyc qiktauu viauxhen. Ix venrho qongw, "siarhue sniu' byy cunqiusingr, langg sniu' bujingg."
Dirr liaudingg beh qetsog sii, guaw jiong' lixlun-siong, simlixhak ee quandiamw, qaixsueh ix ee bunrdee.
U jit zit, ix anne qongw, " hyxcincniu byy jit hxang dairjir u iwgi ee!"
Guaw dner m jaix qongw "zinsingx ee iwgi si sniaw?"
Ix vutjiw huew dyc dab "guaw nacc e jaix?"
"Liw si jit xee kensingg ee qauwdoo, liw soxx sinwgiongw ee jongqaur qauwgi vitzenn bad tyxlun zinsingx ee iwgi."
"Liw sniu beh setqer guaw, tyr guaw ee ue." Charlyne huanxvog.
"Byy m driyc, guaw si sniu beh 'setqer' liw, hro liw knuar cringx bunrdee. Liw soxx sinwgiongw ee jongqaur juxdniux sniwmia ee iwgi hyjai?"
"Guaw m si qidokdoo. Guaw soxx sinwgiongw ee jongqaur dramm air, byy dramm zinsingx ee iwgi."
"Anne, qidokdoo zinruii zinsingx u sniaw iwgi? Liw byy sinr qidokqaur, jiwjiyw erdangr dongwjyr jit jiongw denxhuan ar!"
"Guaw duiww denxhuan byy cuwbi."
"Liw jurr sewhanr dyrr jiapsiu qidog ee qauwiongw, marr u jiongqin nng nii juangiap ee qidokqaur qauwgi vueiok, guaw sniu liw byy kyxlingg budix qaur lenrr qidokqaur juxiaur suaniongg zinsingx ee iwgi/ zinlui junjai ee bogdig, jit diamw aw longxx m jaix ?"
"Langg junjai si uirr ingqngx siongrder." Charlyne iong vnedit/ qerdimm/ byy viauxjingg ee kauxkir qongw cud, cniurr u langg iong cingr vig ix, bin vnex ann ~ qycc qongw jit vaiw "zinsingx ee jongjiw si uirr ingiau siongrder."
"Anne, si jnuaxngiu neh?" guaw mng.
Jitt sii, jit jun ee diamrjing. Hionghiongg, guaw qamxqag ix e hauw cud laii --- jurr guaw huxdy ix, qaix si ix derr id vaiw hauw! " guaw jyr be qaur, guaw simlai kngr be lyc jitt jiongw sniurhuad, anne hro gauw snix vutzuu siw." ix ee sniax decc cuah. Vunxlaii auu dni ee ceckuir, hionghiongg dua sniax hauw cud laii "guaw byy air uirr siongrder uac, gauw byy air, guaw beh uirr jurqiw uac, qandna' uirr guaw qaqi uac!" hro guaw qniax jit diyy.
Jitt vaiw, Charlyne qycc vnuawdoo likuix jinxsow, guaw sidjai jin' dongjingg ix, jin' sniu beh hauw, mrqycc bagsaiw lrauu be lyc laii, "or! Siongrder ar! Ix uac qaxx jin' qodnuax!" guaw kinsniax dirr simlai qongw.
BANG-DIONGX EE CHARLYNE
Huxxdy Charlyne jitt dnxua qiqanx, ix vutduan qencii qongxx,m na air guaw, marr sniu beh jyr "hyw" luxzinn. Jin' jaw ixjingg dyrr huaigii jitt nng hxang qongxhuad, si hiqew byy jinsit --- suibongw kacc jingwkag ee qongxhuad qaix si Charlyne siongsinr vehcat. Mrqycc dirr Charlyne ee amwiwsig, kiokk u jit qrow sniu beh qongw sidjairue ee liamrtauu. Aurlaii enxvenr jyr Charylne ee amwiwsig, jiong' guaw ham' ix ji' qranx ee sidjid quanhe, uanjuann henwlo cud laii.
Liaudingg jinwzip derr sir dxangx byy zuarr quw, u jit zit Charlyne qongw " jaamr guaw jyr jit xee bang. Bangrqingw huatsingx dirr lingrgua jit xee cniqiuu-dingw. Guaw ee dongvaux ham' irjok siy' jenr, dngquw ixlaii, itdit hunx be cud su'ngiaa. Mrqycc guaw jy jit daii sinqii qikir, e qrongx qycc e siuw. Guarhingg huisiongg dua/ quiqeh qrongx-suiw uah'ingw/ vauquad qokk ngiu buxkir hertongw; dirr juiw nirr huatsia juixluii/ dngdingg huexjniwpaur/ punr cud huawhak budjid... dringw jerje qonglingg. U ix singwli dyrr u hibang. Guaw dirr sidgiamsig jyr juewau ciwlen sii, jit xee javox jongg zip laii. Ix si guarcnilangg --- guaw ee duiwdik, guaw jaix ix beh laii pywhai guaw ee qikir, mrqycc guaw byy knuar jairr qanxlai, guaw jaix itding ngiaa. Hitt sii iauxx u jerje siqanx, guaw zinruii erdangr ham' ix jywair, danw vran suah, dirr ix beh pywhai qikir jingg, jiacc qra sag kuix. Sidgiamsig ee vniqag he jitt daii pongwiw, gunw dyw dirr hiax! Dng' gunw beh kaisiw jinwzip jinghongw sii, ix hionghiongg ui' pongwiw tiaur kiw laii, naxx vuex lehh ciongx kir huixdiau qikir. Guaw jit vo huac hiongr qikir jingg, cic hitt liap hongue hertongwee kaiquanx, pacsngr beh hro langg/ qikir jywhuew huiw driau, mrqycc suacc cic be dann. Jitt xui javox cuthen jingg, guaw iauxx bue hur uansingg juewau ee qiamxgiam/ cir cig huatsia hertongw. Guaw naxx siauxqongg itdit cic/ ovec qiuw qnuaw-aw, jiacc dirr qniahniaa sitkongr ee simjniaa cingcniw .quer .laii. Danw guaw huehok dinwjing au, itdit byy liauxqaiw si guaw pywhai ix ee qongqig hingdong? Iacc si ix singqongx qra guaw juann jingsinn jyr hiacc jingbit ee qikir huixbet?"
Charlyne duiww guaw qra qaixdab/ huntiah ee bangrqingw huanxingr qikdong, si jitt dniuu bang suxx langg jurbak ee soxjai ji' id.
"Liw duiww jitt dniuu bang derr id ee qamxqag si sniaw? Gauw si qongxx liw cingcniw au derr id ee qamxqag. " guaw mng.
"Hunwno, guaw jin' siurkir."
"Krir sniaw?"
"Dua penwjuw." " hitt xee javox penr guaw, ix sniu beh air guaw, guaw zinruii ix jinjniar qac'ir guaw, guaw itdit apjer guaw ee lixsingr, danw guaw simx dinxdang au, ix suacc byy air guaw, kia kiw laii beh kir pywhai guaw ee qikir. Qaxjongx air guaw, sursit-siong, ix jixvutqyr uirr qikir jiapqin guaw, ix penr guaw, liriong guaw."
"Liw qamxx m si qangrkuanw penr ix/ liriong ix?"
"Liw si sniaw iwsur?"
"Liw jit kaisiw marr jaix ix uirr qikir laii, qiwzenn liw jaix ix jitt jua lo ee bogdig, guaw dyrr byy liauxqaiw liw uirhyy jiacc siurkir? Qycc qongw, guaw dendyww zinruii liw iwdoo penr ix/ quaiw ix ham' liw dauwdin. Qiwzenn liw hen hen dyrr be ham' ix u quanhe, gauw byy tniax diyc liw dirr bang-diongx qongw air ix/ quansimx ix. Sursit-siong, liw dendyww sniu beh qra hnair danwsag, simrjiww dauwdin au, qra taii siw. Liw qra jitt hxang dairjir hing'iongg qra cincniu jurqiw ersaih sinn m jaix, qxuiw byy diwqag ha, jyr liw soxx beh air :ee."
"M si, si ix kipenr gauw. Ix qexsenx air guaw, sursit-siong ix qinvunw dyrr byy air."
"Liw zinruii jitt xee 'ix' dairviauw si'angw?"
"Or! Kyxlingg si liw, ix ee guarviauw u qraur cniurr liw/ qimx taumngg/ lyr lyr. Guaw uanjuann jingsinn au, pnuawduan si liw. "
"Anne, liw qamxx e zinruii, siurkir guaw penr liw?"
Charlyne knuar guaw ee viauxjingg, cincniu guaw si dongwgong :ee, qongw jit quaw jiongww langg jaix ee huiwue.
"Guaw dongzenn siurkir liw, liw jaix ar, guaw itdit qra liw qongw liw byy qraur quansimx guaw. Liw cavutdyx m jaix guaw simlai decc sniu sniaw? Liw jin' jiyw iongrsimx liauxqaiw guaw ee qamxsiu."
"Zircniaw guaw byy air ham' liw u singr quanhe."
"Si ar, liw marr byy guanrir anne jyr."
"Mrqycc guaw byy anwsngr penr liw, guaw viauxdat qaxx jin' cingcyw, byy iwsur beh ham' liw u singr quanhe."
"Anne liw qongw quansimx gauw, qamxx m si decc penr guaw? Guaw qnaw qongw, liw kaksit jurzin quansimx guaw, mrqycc liw jitt jiongw hing'uii itdit decc penr jurqiw, liw jongxsi qaqi sniu qaqi driyc. Zuqyw liw quansimx guaw, dyrr m si jitmaw jitt xee hxingg. " Charlyne jin' qencii ix ee iwqenr.
"Zuqyw liw bang-diongx hitt xee javox si guaw ee huawsinx, anne qikir qycc si sniaw?"
"Qikir?"
"Si ar, hitt daii qikir?"
"Guaw byy sniu quer jitt xee bunrdee." Charlyne u damrvyc gignaiw huee guaw ee ue." guaw iyh kyxlingg si guaw ee diwlik lor!"
"Liw xee IQ kaksit viw langg kacc hyw!"
"Guaw zinruii liw/ liw caixiong ee hitt tyr dirliauu hongsid, vutduan sniu beh jiamrr qiamxziok guaw ee diwlingg." Charlyne jin' cuwbi qaixsueh. "guaw bad qra liw qongw jiaxee ue, liw simrjiww qycc e quanr guaw jit quaw guaw byy siongsinr ee dairjir, sniu beh vaksiah guaw ee diwhui/ iwjiwlik."
"Mrqycc dirr liw ee bangrqingw nirr, liw ee diwlingg naxjunxx juann iong dirr ham' langg jnedaur. Liw ee diwlik ciongbuanw liauw qikir ee qonghongg hertongw. Ix hro liw ee iongrdoo si duiwhur langg ee buxkir ziiw!"
"Ham' liw qausiap, guaw kaksinr diyhh iong guaw ee diwhui." Charlyne zukuair rinr. "liw marr si jit xee diwhuirhingg ee zinbut, lanw si qyciuw quer jiaux, qniaqii duw diyc duiwciuw."
"Uirsniaw guaw si liw ee digciuw?"
Charlyne jit jun cneqniax. "dirr bang-diongx liw si guaw ee duiwdik, qamxx m si? Liw sniu beh huiw driau guaw ee qikir." qongw cud simlai ue.
"Qaxsed qikir m si diwlingg, si liw ee jingsinn qnualingjingr, anne guaw sniu beh cingduu liw ee jingsinn qnualingjingr, hex si jinjniar :ee."
"M si." Charlyne dua sniax hauw.
Jitt sniax "m si" ee lat jin' qniax langg', hro guaw qniax qaxx qiux dirr iw-aw, ser sniax mng " qamxx m si?"
"M si, byy dairviauw guaw ee jingsinn quanlingjingr."
Guaw jaiww dxo jin' byy kuiwlat runx dirr iw-aw. Jitmaw guaw ixqingx be qir .did Charlyne qra "m si" qongw qra zuarr dua sniax, mrqycc guaw qamxqag ix iong jin soxu ee kuiwlat duiww guaw dua sniax huah.
"Liw uirsniaw byy zinruii si jriw liw ee jingsinn quanlingjingr?" guaw huehunn mng ix, kiongxqniax ix siurkir.
"In'ui qikir suiw qycc hyw." Charlyne hauw cud sniax, qycc qewsiok kinsniax qongw qikir ee guarhingg zuarr suiw "guaw ee qikir si bixle siongrdingx, jing'iur/ hogjap qaxx hro langg m siongsinr, qonglingg je qaxx sngr be uann, si qingquer jin' iuwlo/ sewzi/ qinxsin ee sukyw, kixjy cud laii ee. Jitt daii qikir kurvi jerje ciaujog giviyw/ lingqnia, si jiokk cutsig ee qangdingg, iuxsuw ixlaii siongrr jingbit ee qikir, qinvunw vutqaix huixbet driau."
"Mrqycc hitt daii qikir berdangr huathuix ingwhau." guaw qe sniax vyxciongx.
Charlyne jaiww dxo dua sniax huachiux. " u loriong, dongzenn u loriong! Ix vunxlaii erdangr huathuix jok'iong ee, jixsi guaw siqanx byy qraur, su'iaur qex jit quaw siqanx cikcir, dyrr erdangr hro qikir huathuix qonghau, qycc jaiww uansingg juewau jitt quanx ciuxsiok dyrr hyw ar!"
"Charlyne, gauw kaksit zinruii qikir dairviauw liw ee jingsinn quanlingg jxingr. Liw ee jingsingg quanlingg vnerjingr byy kinx, vnerhongw hogjap, liw ixqingx tuax jerje nii ar! Ix kaksit ter liw jiphingg jerje qonglingg, mrqycc jex jin' mahuann, ciangjai hro liw jyr dairjir byy sunrli, dirr liw su'iaur ee sii, qycc be huatsingx qonglingg. Qycc qongw, qikir si jiamduir jenwsu jewjy ee, si laii vyxho liw ee, jingsingg quanlingjingr marr si hro liw ham' zinqunn/ verbuw hunkuix, iong jitt jiogw hongsid 'vyxho' liw. Mrqycc jitmaw liw byy su'iaur jitt jiongw vyxho ar! Liw diyhh binrduir zinqunn, m si ham' langg duiwlip. Liw benw hitt daii qikir, hex si liw ee joxgai. Qikir qandna' si jit jiongw uirr jenwsu sed ee/ qeclii zinqunn ee buxkir ziiw! "
"Ix m si uirr jenwjingx sed ee." Charlyne huad cud naxx iaxsiur ee aiqiyr. "qikir iauxx u qitnax qonglingg, si kurvi lenhe hyvingg ee loriong."
"Kyxviw qongxx si sniaw iongrdoo?"
Charlyne jaiww crur henwlo cud gignaiw ee bagsinn. Dunwdnex vnuawvox, naxjunxx decc cue qiwig, zenau jin' jingwqingx/ giamsiok/ u siu'iongw jriw cud, "hngc! Kyxviw qongxx, qikir qin erkax ee vorhun erdangr siuho siursngw ee viauxpuee --- jingxqajnaiw siwjiuuii ee viauxpuee, jitt daii qikir dirr jitt hongbin ee haurqyw jin' janw."
Guaw cavutdyx jin' jurzenn jyr cud vutqaix u ee viauxjingg --- dua sniax ciyr cud laii.
Charlyne ui' pongwiw tiaur kiw laii. " jitt daii qikir m si jingsingg quanlingg jxingr." saih bagqag qongw. "liw berdangr qycc jyr anne ee vixqaur. Jitt vaiw huerjinw dirr jiax qetsog." guaw dyrr iauxx be hur tecud huanxvog, ix jit xe uad tauu, qniaa cud jinxsow.
Xe huee Charlyne jiauww siqanx laii, gunw qycc qewsiok lak gywguec ee dirliauu, mrqycc longxx byy qycc jinr jit vo tyxlun/ qaixpuar jitt xee bang. Guaw narr sniu vanrhuad beh jiong' uerdee juanw kir hitt xee bang, ix qionglet dexjer. Ix bad qongw .quer, mair qycc ixx bang-diongx ee mic jyr vixqaur, si jinjniar :ee.
SUX HRO JURQIW
Guaw dirr Charlyne ee bangrqingw virr ix dingrui jyr irjok duiwdik. Dirr henrsit sing'uac nirr, ix ham' guaw byy cnihun. Dagg lexvair laii nng ~ sir vaiw , anne ee huanrjiaw/ isux quanhe ixqingx vutjiw snax dxangx! Guaw bongx liongsimx, sidjai u jin aiwsimx jiauwqor ix, ix marr huwcud jit dua vid jinxliauhuir, ix qongw qaxx naxx jinx :ee, ix air guaw, mrqycc amwiwsig nirr --- zinlui he jinsiongr ee soxjai --- kiokk qra guaw dah digzinn/ guarlaii ee viauhy.
Jiurr moxjiongw hongbin laii qongw, guaw duiww Charlyne marr u luirsu ee zinrdix, e qniax ham' ix huatsingx quanhe, vorhun guan'inx kyxlingg qor diyc vunxsinx ee anjuann soxx sanxsingx ee qniahniaa, guaw vitding jerjiyw marr jiong' Charlyne knuawjyr digzinn lor! Qycc laii, Charlyne luersimx cangr u guaw jurlaii m bad liauxqaiw quer ee sniurhuad, bogquair guaw byy vanrhuad duiww ix sanxsingx qangrlixsimx. Ix byy qra guaw dongwjyr qangrlui, guaw duiww ix qamxx m si qangrkuanw? Ui' tauu qaur buew jixjig guaw byy zinjingbi, berdangr ham' ix sanxsingx qiongrbingg, hro guaw vutdidvud huaigii, kyxlingg ix si driyc ee! Kyxlingg dongcox qaix qra ix siauwqair hro vadd xui kacc u dongjingsimx/ jinxliauu hongsid uanjuann ham' guaw byy qang ee isux, vutqyr sidjai sniu be cud qyckacc sikhap ee zinsuanw. Sursit-siong, ix jingg hitt xui isux dirliauu sitvai, likuix guaw jiax qycc kir cue ee sinx isux marr jin' u kyxlingg ham' guaw qangrkuanw ee unrmia.
Ue anne qongw byy m driyc, Charlyne naxjunxx ciangjai hro mow quaw guaw byy huatdo lixqaiw ee iogbang ciwqig/ qamxdong, jiaxee dongrqix byy cingcyw, m si guaw qywzinn texhue diyc ee. Dyrr si jitt jiongw "byy hap zinsingr" ee digjid ciauquer jingwsiongg ee simliw hordong quanhe, jiacc e hro guaw dah "siaog" ee viauhy. Jixsi guaw byy hxuad uanjuann kakding, dauwdew si siaog hro guaw ham' ix rue cringx qaiwsnuar? Iacc si ham' guaw qniaa byy qang diauu lo, suacc hro guaw dah siaog ee viauhy?
Bylun cxunx/ cxiux zidtauu qngngiaw sii/ iacc si zidtauu lyc snuax anghee buanw tnix, Charylne jongxsi byy jingsinn; siongrr qac'ir dimdimm ee oimtnix, ix e hnuahiw qaxx krox si'aw. M na anne, marr byy air undo kacc quann damrvyc, bu kacc dang .quaw, huex lag qaxx qui' tokax, haixhnua hunn/ bu hunx be cringx ee zuac .langg. Qandna' air byliauu/ byy uahlik ee oimtnix --- cniurr NewEngland snax-guec diongx dangtnix duxx quer, cuiwjiyc muaw lo/ ciurqix/ aur caa/ loqomuaii/ lacsab seh siwqer siwsnuar ee qingxsiong. Uirhyy jiacc hibii bunai/ dimdang iubun/ jiongww langg longxx hiamm ee tnikir kiokk si Charlyne siongrr air :ee? Si ix knuar diyc dag'ee byy songxkuair suacc hro ix hnuahiw? Iacc si dansunn ix qac'ir jitt jiongw hongx hiongg ho qau (dang) ee zidjiw? Arr si jitt jiongw tnikir u itvnuax langg juanzenn cnisox ee digsingr, dag diyc ix simlai mow jit diauu sinqingx? Dap'anr si sniaw? Guaw m jaix.
Qu nii kaisiw huaigii Charlyne siaog digjid sii, dyrr jin' qinxsin/ qniahniaa/ jniawbin knuawtai siaog, suisii junxvi beh ham' ix viw quann qe. Derr id vaiw huaigii ix kurvi siaog digjid, si ix qongw cud sinqii qikir bang ee qui' qywguec jingg. Gauw qra qongw, "Charlyne, liw qniax tenha byy qraur luan, siwqer jewjy hunwluan vut'anx, dirr guaw jiax jyr jinxliauu sii, liw marr qangrkuanw byy beh qaiw. Ixjingg liw jongxsi qongw hex si iwgua, jitmaw guaw jaix jitt jiongw hunziauw ongxongw si liw diauqangx congr :ee, guaw byy liauxqaiw uirsniaw liw qowir anne jyr?
"Hyxsngw ar!"
"Hyxsngw?"
"Si ar! Hro liw kunwziauw, jin' hyxsngw. Guaw qongw .quer, cuwbi hro guaw kuanlik."
"Kyr sidlik did diyc kuanlik, qamxx m si qyckacc cuwbi?"
"Guaw byy anne sniu."
"Liw jiong' jurqiw ee kuaiwlok kiw dirr vadd langg ee tongwkow-dingw, qamxx qongw liw e quewsimx?"
"Si ar! Kyxlingg qra langg' congr qaxx jin' giamdiong, guaw jiacc be quewsimx. Mrqycc guaw be anne, qamxx m si?"
Charlyne qongw :ee marr driyc, ix kaksit be ho'ngg jin' siongsimx, hro langg dongr be diauu ix ee qanziauw, kiw singwde, aur turtu. Mrqycc uirhyy diauqangx itjair anne ? Sidjai qaix duimng guan'inx. "Charlyne, dyrr si liw dair u damrvyc huixbet digjid, guaw iuguann zinruii qra langg sngw songw :ee, jex qeqiamw dair u siaog singhun."
"Si ersaih anne qongw." ix dab qaxx jin' asali.
"Charlyne, gauw byy vanrhuad siongsinr liw." guaw huanxvog. "duxx aw guaw cavutdyc qongw liw si okmoo, liw qingwzenn byy qamxqag."
"Acc byy, liw beh guaw anxjnuaw?"
"Liw jiwjiyw ersaih duiww jurqiw kyxlingg si okmoo, hunwno/ huanxvog ar! Liw ee viauxhen si jiapsiu?"
"Liw qamxx u tniax .quer be baiw ee kux siaa huatsux?" Charlyne hionghiongg mng.
"Byy tniax .quer." uanjuann byy liau diyc ix e anne mng, guaw gong gong dab.
"Hunwno/ huanxvog u sniaw loriong?" ix hnuahiw mng.
Guaw qamxqag jit jun kinbii ee tauu hinn, naxjunxx kir hro quntausaix bog jit xee, dyr dirr tokax vreh be kiw laii.guaw dyr suh jit cuir kuir, jex si jidsiwlangg derr id vaiw kaisiw genxqiur "huan sxuah" "kux siaa" henrsiong. Anne ee juxdee jin' qoxquair, guaw jinjniar m jaix qaix cue sniaw ceh jyr genxqiur jailiau. Mrqycc guaw jaix jitt hongbin juxdee ee jokjiaw, jiwjiyw u langg taukag cingcyw/ jywlangg hurjig/ u aiwsimx decc jyr genxqiur. Quatding sir qywqyec au, qycc ham' Charlyne qongw.
"Charlyne , liw qamxx e qir .did qui' qywguec jingg mng .quer, iuxquanx kux siaa huatsux?"
"Dongzenn, guaw e qir .did lanw dramm .quer muixx jit hxang."
"Qaur dnaxx guaw iuguann jit xee huatsux iarr m bad, mrqycc guaw tak quer jitt lui ee ceh, zuqyw liw su'iaur, gauw siongsinr ersaih vrangx liw cue diyc sikdongx ee zinsuanw."
"Benw ar! Guaw jitmaw duiww singbut jok'iong lat kacc u cuwbi."
"Kyxngor! Charlyne. Lanw dramm :ee si siaog, m si hiaxee byy sniaw iauwqinw ee qinxdniux aplik/ jiaujyx, jex m si be tniar/ be jniu ee siyw movne, si huisiongg kiapser / suxx langg iamwhin ee mic." guaw siurkir qaxx dongr be diauu.
"Anne guaw qra liw qongw, guaw jitmaw duiww singbut jok'iong lat u cuwbi, byy hingr kux siaa. Zuqyw liw qra guaw dongwjyr siaog ee langg, guaw jin' huaigii liw iong sniaw hongsid laii vrangx guaw? Liw jnuaxngiu erdangr hro guaw qamxdong/ hro guaw sinwhok? Qycc jnuaxngiu erdangr u guaw soxx su'iaur ee dongjingsimx, laii duiwtai guaw? Jex jingwbingg guaw itdit qiongdiau :ee : liw qinvunw byy quansimx guaw." Charlyne vnuar qunxsngxciyr qongw.
Guaw suh jit xee kuir, sindir huee dngw laii, binrduir ix saixsingr/ jurzin qandna' ix driyc/ jurgnow huixbet ; jaiww jit crur iauqiuu jurqiw qra dongwjyr ginxaw laii aiwho ix/ iong guaw jyr e qaur qenrkongx hongsid laii quansimx ix. Jex si guaw soxx liauxqaiw ee vanrhuad. Mrqycc, cniurr guaw irliau :ee, ix ee huanxingr iuguann byy qaixvenr. Hibang zuxx laii zuxx bongbiauw, danxtai qijig gua, guaw m jaix beh anxjnuaw ?
Charlyne u jingsinvne, iauxx qycc berdangr qongw jingsinn byy "unxding", qisit ix si iwgua ee unxding! Duiww jurqiw ee jurvir uanjuann byy qamxqag, itdit byy venr :ee si, m guan sunrjiongg jinxliauu "quijig", m guan qongw sit ue, u suanxdik ee tauwlo simsu, duiww liaudingg u vangjan ee diongriaur sursit, iuxsow muakamr, muixx jit vaiw huerjinw, cavutdyx ix juxkongr juanqiok.
Derr sir-vah-zi-jap-id vaiw huerjinw hitt ervox, dng' ix dirr pongwiw-dingw jre jai au, jit kauxkuir itdit qongw cud luersimx ee sniurhuad/ qamxsiu, hro guaw dua dua qniax jit diyy. Charlyne jinjniar si viauxdat jurqiw iwqenr ee qyciuw, byy langg e ngiaa ix. Dirr go-jap hunjingx-lai, ix iuguann amkamr quanqenr ee sinwsid gua, kaksit si jit xee uanbiw byy kiamwdiamw ee vnerlangg. Huerjinw cunx go hunjingx, "jin' himsiongw liw jiacc cutsig ee viauwhen." guaw qongw.
"Guaw sniu liw ingwqaix e buanxir."
"Liw uirsniaw hionghiongg qaixvenr jokhongx, guanrir juriuu jurjai qongw jiacc je, ixjingg ee caxnau/ kongwjingx neh?"
"Guaw jixsi beh qra liw jingwbingg guaw jyr e qaur. Jingwbingg guaw ersaih juriuu lensiongw/ erdangr drat qaur liw beh guaw junsiuw ee quijig."
"Hngr! Liw ixqingx jyr qaur ar! Zircniaw viauxhen qaxx jin' bixbiau, guaw hibang liw erdangr qewsiok."
"M si, byy ixau ar!"
"byy sniaw?" guaw ser sniax mng.
"Guaw be qycc anne jyr ar! Jit vaiw si lanw juewau ee huerjinw, guaw ixqingx quatding byy qycc jaiww jiapsiu dirliauu, liw m si sikhap guaw ee isux."
Cunx snax-jap biyxjingx. Guaw anwsngr tec cud irgi/ huanxvog, ix qenquad byy guanrir qycc jaiww laii. Xe jit xui vnerlangg dirr mng-guaw danxtai, guaw jixhyw hro danw jap-go hunjingx. Charlyne jit diamw aw dyrr byy be niu. Ix quatir beh cue jit xee ix kacc su'iaur "byy jipquat" ee dirliauu isux. Guaw bad siaw quer quiw dniux puex hro Charlyne, longxx berdangr ham' ix qycc qniwbin. Jitt xee qywanr hro guaw jin' digvet ee jinxliauu qinggiam.
KUANLIK EE SIAA
Charlyne sniu beh jiangxquanw gunw ji' qranx ee quanhe/ jinghok gauw/ sngxlang guaw ee iogbang, uanjuann si jit jiongw ixx qywzinn qakdo cuthuad ee kuanlik. Ix duiww qaixsen siarhue/ quan'air qadingg/ kanqar jurqiw hro jniajyr u haurlut ee langg/ qikhuad congwjy ee kuanlik, byy cuwbi, ix soxx qiawbang iongxiuw ee kuanlik m si sriok qycc quann jancur ee ligliong.
Charlyne ee sing'uac juann si gugong/ budix/ siauxpixlenw ee japcuiwdai, kyxlingg be singjiu dua zinbut. Zinsingx naxx hiwcud, ix soxx vnuaenw ee qaksig ongxongw si vutduan jit qingx ngua quer jit qingx, qanziauw hro ix qex kiwlow hiaxee juxquanw. Narr qongxx Charlyne si tauqex/ qaxsed ix qewsingg jit vid be jiyw ee sinwtog qiqimx/ jit qingx dua qongsix, ix e iong uaikig, u huixbedsingr ee hongsid quanxliw guanqangx; narr si jyr maxmah, ix hex naxx naurdniuu/ qongxue hing'uii byy habliw/ hiqew ee zinsingx, hionghiongg dyrr e juanxhuar jyr be hur siusuah ee viqiok.
Guaw bad jiong' "siaog" dingrgi jyr : unriong itcer ingxhiongxlat --- liriong qongkaix/ taux taux aw qiongvig hing'uii, kokciongx jurqiw ee iwjiwlik, liriong/ kipenr tnazinn, dypiah simlingg singdiongw. Charlyne ee sing'uac byy jyrsingg kiongxvor ee viqiok, kacc singg naurdniuu :ee, jixvutqyr si ix qinvunw byy kuriuw ingxhiongxlat hro huathuix. Narr qongxx ix qethunx, jniajyr langg ee bow, anne ix kyxlingg si lingrgua jit xee Sala; zuqyw ix u qniaw, kyxlingg singg Roger ee maxmah: qaxsed ix jiangxquanw jit xee qokqax, anne ix kyxlingg e cniurr Nezi Hitler/ Uganda Amin.
Oklangg jongxsi digvet tingxsing/ acvar/ qik air kuanlik, guaw iyh inx ongxongw viw itvnuax langg qyckacc jurgnow pongwdua jursinx ee ingxhiongxlik. Gauw iauxx byy hxuad kingxding Charlyne ee ingxhiongxlat vutjiog si m si byy qraur siaa, iauxx si xmoo qex ix jit dxng quann? Soxu jingwqir henxsi, Charlyne suibongw siaa, iauxx bue qniaa zip xmoo. Dirr byy did diyc jingwsit jingg, guaw qamguan qaxsed ix vunxsingr senrliongg.
M quanw zuhyy, Charlyne si sitvai ee langg. Ix m si dua qanx/ dua og, jongxsi jit xee byy congwjyrlik ee langg; si m si "gong langg u gong hog", ix byy loriong si sursit, oax be venwjyr hongrhongg. Linglik baiw juadduir m si qenwsiauwdai, guaw bad iong "ciauwqiok" laii hing'iongg Charlyne ee byy loriong, guaw sniu Charlyne duiww jurqiw byy loriong, itding byy qamxqag hyxciyr, guaw marr byy zinruii byy jinrlik liriong lanw langg ee amwcangwlat si hyxciyr ee dairjir. Charlyne suibongw kiauw/ u diwhui, ngiaa langg' jerje, kiokk byy liriong qraur qiktaur. Hnuahiw naurdniuu au lauu lyc laii hro langg' siux/ duiww jurqiw byy iong dirr dua dairjir erdangr byy quawir, kiokk si guaw soxx qnir quer siongrr kyxlenn ee zinbut.
Berdangr qra Charlyne janwlat, gauw qamxqag viaix. M quanw Charlyne laii cue guaw si m si hix-jxingg-qew-ir, jongxsi laii cue quer guaw. Ix dongsii soxx su'iaur ee --- marr is ix qaix did diyc ee --- ciauquer guaw erdangr hro ix ee. Ix bulik/ sitvai ee qamxqag, quaw qamxx m si anne!
QYCC LAII JIT VAIW
Huxdy Charlyne hitt dnxua siqanx, guaw duiww zinsingr qinvunw ee og, itbuu-soxdix. Byy siongsinr sewqanx jinjniar u moquiw/ huanr sxuah ee henrsiong, m bad camqax quer kux rmoo ee gisid, marr m bad tniax quer "qiur cud, tauxvangr (Deliverance)". Dirr guaw ee juangiap diwsig lingxhik-lai, byy "siaog" anne ee suu, marr byy jiapsiu quer "siaog" juxdee ee hunwlen. Duiww jingsinn isux/ zimrhyy yc kyhak ee langg, siaog m si qongzin tamwtyw ee lingxhik. Guaw itdit virr quanwzip ee quanliam si, jingsinn vnerliw jriw ersaih iong ixqingx jaix ee vne/ jingsinn lighak laii qaixsueh, zircniaw viaujunxvanw ee "simliw irsiongg jinxduan tongxqer ciuxceh (Diagnostic And Statistical Manual)" longxx u qra jingsinn vnerliw sikdongx hyrmiaa, siulok dirr ceh nirr. Guaw qingwzenn byy jiong' Bixqog jingsinn ihagqair juanzenn lauwqaux zinlui iwjiwlat, jitt xee jiacc qivunw ee vunxjid, knuawjyr vutkyxsugi ee dairjir. Byy langg bad qra guaw qongw .quer luirsu Charlyne ji' lui ee qywanr, hro guaw duiww zuhyy huxdy Charlyne, m jaix beh ui' dyhh lyc ciuw, cniurr ingzii hiacc bujo/ jit diamw aw dyrr m jaix anxjnuaw cuxliw.
Charlyne ee qywanr, hro guaw ganxqair kacc kuikuah . Benw huaigii, siaw jitt vunw ceh si ix laii diamw huew ee.
Siangduir vikced su'iaur tamwsyh "zinsingr ee og", jit quiw nii laii guaw duiww Charlyne soxx did .diyc :ee, dyrr kacc byy hiacc diongriaur ar! Zuqyw u qihue hro guaw qycc laii jit vaiw, guaw e iong uanjuann byy qang ee hongsid cuxliw, siongsinr qetqyw e ho'ngg buanxir.
Dairsingx, guaw e iong kacc binxjet ee sokdo/ jursinr jairunw taiwdo, tamwqiur Charlyne qywanr soxx vaucangr ee siaog. Guaw be sriu qiongvig jingsinn qnualingg vnerdingx ee gordy/ byy sriu Charlyne jurvir gordy/ huaigii jurqiw si m si huathen jingsinn hunlec ee quaiwqii venwtew; guaw be hamrzip qauw qywguec ee diuduu gignaiw/ be dauzip nii-gua ee siqanx tamwcue luancinx jingqed ee honghiongr, jyr byy loriong ee qaixsueh. Itdit qaur juewau, dng' guaw jiong' Charlyne qinvunw ee bunrdee quisiok dirr siaog sii, guaw qandna' erdangr ixx ciwgiam ee singwjid jinwhingg, jit diamw aw dyrr byy kuan'uix. Guaw byy zinruii qaix iong canngex diamw juiw ee hongsid laii jinxduan siaog. Hitt sii guaw quilap cud duar u sidgiam singwjid ee qetlun, aurlaii jit diamw jit diamw longxx did diyc kingxding. Zuqyw diyh'air diongsinx huxdy Charlyne, benw snax dxangx, kyxlingg snax qywguec, guaw dyrr erdangr huathen Charlyne bunrdee ee qattauu, marr u sinwsimx qra dirlauu hyw .kir.
Guaw e ui' gignaiw kaisiw duix kiw, jitmaw, ixqingx liauxqaiw, qig langg' gignaiw/ kunwziauw si siaog ee digdingx ji' id. Kaisiw huxdy Charlyne ee jit qywguec, dyrr ixqingx qakcaa jurqiw ciongbuanw gignaiw, kiokk iycsniu si jurqiw byy qraur kiauw, jiacc e u gibun. Dirr liaudingg jinwhingg ee derr id dxangx, guaw jit diamw aw dyrr byy sniu diyc gignaiw jiacc je, si in'ui Charlyne diauqangx beh hro guaw kunwziauw, narr si jitmaw, guaw e duardnaw jyr jitt jiongw qaxsed, zenau dirr dew siqanx lai cajingr. Narr si anne, jin' qinw dyrr erdangr denxkuix jinxduan, iong anne lingxjing laii cuxliw Charlyne ee qywanr, si m si e vig ix tewcud dirliauu? Henxzenn u kyxlingg.
Dairsingx, guaw beh mng Charlyne uirhyy laii dirliauu? Ui' ix jurqiw qongw cud sunqiuu hiabjo ee guan'inx, si byy kyxlingg ar, ix soxx henxcud, sniu beh sngxlang guaw/ snriaa guaw ee iwdoo, huisiongg binghenw. Qycc laii, guaw diyh'air mng ix uirhyy jinrlik jiapsiu dngqii dirliauu? dap'anr naxjunxx dirr guaw hro ix sanxsingx qycc qewsiok sngxlang ee cuwbi, marr hro ix qewsiok py diyc jongw u jit qangx erdangr snriaa dinxdang guaw/ iongxiuw guaw/ jinghok guaw ee hibang. Juewau, guaw iauxx beh mng, Charlyne uirhyy byy guanrir qycc jaiww jiapsiu dirliauu? Siongrr binghenw ee guan'inx qaix si, dng' guaw jiamrr henkuix Charlyne ee vaidew, zuxx laii zuxx qakcaa byy hxuad lang diyc guaw, beh sngw guaw ee kongqanx zuxx laii zuxx iuxhan.
Zuqyw guaw dirr liaudingg coqii dyrr bingliauu jinsiongr, m na craa cud Charlyne ee siaog, marr kurvi ham' siaog duiwkongr ee ligliong, anne Charlyne jin' u kyxlingg jaw dyrr et vec qii, hongwkir jitt dniuu byy kyxlingg ngiaa ee "huerjenr". Ue suibongw anne qongw, Charlyne qewsiok jiapsiu dirliauu ee qihue iuguann junjai.
Guaw zinruii Charlyne m si siaog qaxx byy iyc qiur, lanw diyh'air e qir .did, oklangg cavutdyx byy kyxlingg e uixkud jurqiw jiapsiu jingsinn dirliauu ee sexlew, hro jurqiw guanhingg/ kyxlingg siongrr be qinr langg ee vorhun henwcud. Charlyne guanrir dnax jitt jiongw honghiamw, kyxlingg ix itsimx sniu beh pacdyw guaw ixgua ; kyxlingg ix luersimx mow jit vorhun qitai tauxvangr; kyxlingg ix m si sriok babin luirhingg :ee. Sursit-siong, jiaxee longxx u kyxlingg dongsii junjai. Langg ciangjai u ittew nng bin --- jiwjiyw mow quaw oklangg ongxongw si maudunw ciongdut ee simtair. Guaw qaxsed Charlyne sniu beh jiapsiu dirliauu, si sniu beh jenr ngiaa guaw, qycc sniu beh langg qiur.
Vutqyr, Charlyne ee jinghogsimx dair kacc dang .quaw. Narr qongxx guaw erdangr qyckacc u diwhui binrduir ix, si m si ix erdangr jairr guaw ngiaa --- si uirr ngiaa diyc ix jurqiw ee linghunn dauhangg guaw? Jex kansiap diyc kuanuix bunrdee, quewkir quiw nii lai, guaw huathen oklangg singwqeh digvet hogjiongg uikuann, guaw m jaix si sniaw guan'inx, qandna' jaix jitt xee henrsiong junjai.
Guaw diyhh qiongdiau, quann quer og sewlik ee uikuanlat, m si poxtong lat. Duliauw diyh'air ixx diwsig jyr kywsnuax, iauxx diyh'air cud qiongdua ee lat jiacc erdangr did .diyc, jitt qrow lat qandna' erdangr vin' air laii. Huxdy Charlyne sii, guaw kaksit u jit qrow air ee lat, jixsi diwsig byy qraur suacc srid hau. Dnaxx guaw ixqingx jiongxag diwsig, zuqyw u qihue, guaw hnuahiw huxdy Charlyne, jixsi guaw duiww vit'iaur daujur hiacc qiongdua jok'iongrlat (aiwsimx) jiacc e singqongx, zimxvutju kiw uiwqnuaa.
Jinx air ee vunxjid si hisingx/ hongrhenr, ixjaw guaw m bad kurvi ham' Charlyne ee siaa jniawbin qaujenr ee sinwsimx, dnaxx guaw liauxqaiw narr beh jinjniar ham' siaa jokjenr, diyhh u binrlimm simx/ lat jenr qaxx tiamw ~ ~ ee simliw junxvi, kyxlingg siongkauw simrjiww ingxuanw byy hxuad juann hyw. Jitmaw guaw e jin' qinw liac diyc ix ee og uikuann, singx qra ap lyc laii, jiacc qycc laii ingwhur. Jitt diamw ee sinx huathen, guaw e cir didjiap qongw cud Charlyne luersimx ee qniahniaa.
Jingg qongw .quer, ingwqaix dongjingg oklangg, mair hin inx, si inx juanzenn quer diyc diyhqniax imngiaw-ha ee sing'uac. Viauxbin knuar laii, Charlyne naxjunxx sniaw longxx byy decc qniax, vixzuu, kiwiuu iong uann/ dirr qonglo qaix uad byy uad, itdit ngua taulo ..., itvnuax langg jin' jiaujyx vut'anx ee dairjir. Jitmaw guaw liauxqaiw, ix viauxbin dner gongrdaix/ dinwjing ee vuerau, amcangr byy langg jaix ee qniahniaa --- ix qniax kongwjer be diauu jitt jiongw quanhe. Ix beh guaw kingxding ix, si qniax jurqiw byy daddid kingxding; beh guaw air ix, si qniax guaw kyxlingg byy hxuad jin juansimx air ix.
Guaw beh didjiap jriw cud ix ee qniahniaa, si beh ix zinrcingx jurqiw ee qniax, guaw si py diyc dongjingg/ kyxlenn/ viaix/ tniawsiyh ee simjingg. Guaw beh duiww ix qongw " Charlyne! Guaw jaix liw qniax cuah cuah, dirr jiacc cneqniax nirr, liw zuhyy singjunn lyc .kir? Guaw itding byy air ham' liw qangrkuanw ee jygu, zircniaw jit diamw aw byy himsen liw itdit decc qniasimx quer zidjiw." quewkir, guaw byy hxuad buanxjiog Charlyne vutduan iauqiuu ee dongjingsimx, dnaxx guaw erdangr. Dongzenn, ix kyxlingg uanjuann qirjuat guaw hro ix ee dongjingg. Lingrgua jit bin, guaw kyxlingg erdangr qikhuad cud ix jinsimx ee linbinw, Charlyne kyxlingg erdangr jiyh jex laii liauxqaiw jurqiw kaksit vikced su'iaur dirliauu.
Siongrbuew, gauw jiong' e qra dirliauu hyw. Guaw jaxjingg huxdy Charlyne sii, ix ee vnertair cavutdyx hro guaw janr be diauu, guaw byy vaxag si m si kuriuw dri ix ee lat. Sursit-siong, guaw gno cud, qandna' kyr guaw jit xee langg ee lat, quewkir/ jitmaw/ birlaii longxx byy kyxlingg dadsingg. Jitmaw guaw marr bingvik ixjingg soxx unriong ee jingsinn hunsig byy uanjuann sik'iong ix. Hitt sii, guaw qandna' jaix jingsinn hunsig dirliauu; jitmaw byy qang, guaw jaix iauxx u kacc sikdongx/ iuxhau ee honghuad. Zuqyw guaw erdangr qakcaa cud, ix hibang virr jinxqiur mow vorhun qenrkongx ee hunziah, guaw beh unriong suechoglat/ kuan'uix, teqiong Charlyne itcer kyxlingg ee hongsid, hro ix vaixtuad xmoo ee jongwgai, did diyc qiuwsiok.