DERR 24 JNIUX
LUN HUALIUXVNI
Lun jit jxingw ee vni, dirr jiax be benw did diyhh qongw kiw, jiurr si limvni (痲病, gonorrhoea) qapp muidok (梅毒, syphilis), jongxmiaa qiyr juer hualiuxvni (花柳病, venereal disease). Langg ziamw diyc jitt kuanw vni kacc siongg dui’ qniaa m driyc, m jingwqingx ee su. Kanwho ingqaix diyhh jaix jiaxee vni ee guaninx qapp jingwjong, ixqip dirliauhuad, in’ui u jitt hy vni ee langg sisiongg laii i’ngi, iarr kanwho qapp isingx narr byy jabhunx siyxsimx, decc kanwho jitt kuanw vnirlangg ee sii, e hro ix ziamw .diyc.
Limvni (toxue qiyr juer siabjingx).
Dingrgi: Jitt xee vni si singsidkir (生殖器, generative organs) ee liamoc iamrjingr ee jit hxang.
Guaninx: U jit xee digvet ee sewkunw qiyr juer limkunw (痲菌, gonococcus; derr 185, 189 doo). Jitt xee vni, lxamm, luw longxx e ziamw .diyc. Kacc siongg si qauhap ee sii, hitt xee limkunw dui’ lxamm ziamw .diyc, acc si lxamm dui’ luw ziamw .diyc.
Suibongxx si annisnix, iauxquxx narr langg ing u limvnix ee langg ee citvor, binrqinx, acc si ix ee mic, acc si jre byy cingkir ee venrkir, dui’ anxnix e ziamw .diyc; jongw .si isingx hranw did tniax qnir vnirlangg anxnix ziamw diyc limvni.
Jingwjong: Jiamhogqii si snax zit jiww lak zit. Ziamw .diyc ixau snax zit, acc si lak zit, ziyrdy-kauw, acc sim imbunn, e jniu, dngw angg, huad jingw. Siauxven ee sii, jin’ tniar, decc quah ee kuanw. Dui’ ziyrdy, acc si imdy, cut .laii jiurr si ngg ngg, liamm liamm ee mic cincniu liab’axlangg ee kuanw, qiyr juer limvni vaisetmic (排泄物, discharge). Narr beh hyw ee sii, jitt xee vaisetmic e kacc jiyw, iarr kacc be liamm liamm. Huerimx ee soxjai tniar, qajiac’au tniar, viwqed, singkux byy knuawuac. Jitt xee limvni e hai diyc ziyrdy ee taujingg vorui, ursii aurbin vorui, drir qaur ziyrdy hiabjig (urethral stricture).
Davolangg jit vaiw ziamw diyc limvni, hiaxee limkunw bih dirr ziyrdy liammoc ee jnuaa-lai, soxiw si kacc yhd did dnaxdiap.
Hurzinlangg narr u limvni, kacc siongg dairsingx ziamw diyc ee xui, si ziyrdy qapp imdy. Jingwjong si jiauww dingxbin qongw kiw. U jit hxang iauwqinw diyhh e qir .did, jiaxee limvni ee langg soxx ha .cud .laii hitt hy vaisetmic, dirr hitt lairbin u limkunw vutjiw je. Narr si jitt hy mic, bag diyc bagjiux, diyhh liamvnix diamw lotio protargol (1-10), iarr ing lotio acidi borici sew bagjiux. Limkunw narr zip bagjiux ee qetmoc-lai, kuair kuair vairhuai qui’ luiw bagjiux.
Kanwho ee ciuw, narr bag diyc jitt hy vnirlangg ee puednuax, snakor, ixqip venrkir, dagg vaiw diyhh liamvnix ing satbunjuiw sew ciuw hro cingkir, suar qycc ing lotio hydrarg. perchlor. 1-2,000 laii tua. Iarr ciuw m tangx zuee qaqi ee bagjiux. Soxx ing uaw dirr singsidkir ee mihuex diyhh qauwgiac dua der tangx kipsiu vaisetmic. Beh tec .kiw .laii ee sii, acc si ngua vausiongliau, longxx m tangx bag diyc ciuw, diyhh ing gnec’aw gnec, ing qu ee sinbunjuaw vaux bat, jiacc siyliyx .kir. Jitt hy vnirlangg soxx ing ee mic cincniu deaux, nguaxdi, citvor, binrqinx, satbunn, venrkir, dyrziyrqngw, qesix hiaxee, longxx diyhh lingrgua siuvi, iarr diyhh juer qiwhy, in’ui jiaxee mic m tangx qycjaiww hro vadd langg ing. Ing liauw diyhh quer sac vnuar diamxjingx quw laii siaudok. Puednuax, snakor iauxx bue sew ee dairsingx diyhh jimr dirr lotio acidi carbolici 1-20, acc si lotio hydrarg. perchlor. 1-1,000 zi-sir diamxjingx quw.
Kanwho m tangx be qir did in’ui ix vunxsinx narr byy jabhunx siyxsimx, kuair kuair e tuanziamw diyc vadd langg. Kanwho narr anxnix laii quer diyc vadd langg, ix ee juerquar vutjiw dang.
Jitt xee vni qongw qaur dirr jiax nardnia, si beh hro kanwho tangx jaix, narr kanwho jitt hy vnirlangg diyhh jabhunx siyxsimx. Dui’ ziamw diyc limvni soxx duer ee sioghuatvni (續發病, sequelae) jin’ je; uree jit siwlangg be dngrqinx. Soxiw diyhh jimjiog, qniax liauw e ziamw diyc qaqi acc si tuanziamw diyc vadd langg.
Muidok (梅毒, syphilis) jiurr si hualiuw tuanziamxvne ee jit kuanw.
Muidok ee guaninx jiurr si digvet ee sewkunw (derr 189 doo) dui’ liammoc acc si puawpuee ee soxjai zip singkux-lai.
Muidok hunx juer snax qrii, qiyr juer derr id qrii muidok, derr zi qrii muidok, qapp derr snax qrii muidok.
Jiamhogqii 2 jiww 6 lexvair. Derr id qrii muidok ee qiqanx si dui’ cud muidok harqamx (下疳, chancre) ee sii, qaur derr zi qrii, jiurr si 4 jiww 8 lexvair quw. Jitt xee harqamx si jit liap cavutdyx jit liap cxig ee dua, dairsingx ding, iarr be tniar, aurlaii dirr diong’ngx nua .kir jiacc cud vyc vyc vaisetmic. Jitt xee harqamx dairsingx cud ee soxjai, kacc siongg si dirr imqingx-tauu, acc si vaupuee ee lairbin vingg, acc si ziyrdy-kauw; imdy acc si imkauw ee vnix:a; ursii dirr vadd xui, cincniu cuiwdunn, qongbunn, jngxtau’aw. Bad u kanwho acc si isingx dui’ bongx diyc vnirlangg ee guaninx, jiacc ziamw diyc jitt hy vni. Hitt soxjai ee limvajnuaa e jingw .kiw .laii.
Derr zi qrii muidok si ziamw .diyc liauxau, cavutdyx nng~snax guehzit jiacc kiw. Ix ee qiqanx, si dui’ huatjinw qaur nng nii quw. Ix guarsiongx si dirr puehux nirr, liammoc, limvajnuaa qapp bagjiux. Iokliok laii qongw, singkux u huatjinw, iarr u cud jit liap jit liap, sikdi cincniu dangjnii, be jniu, be tniar. Dirr qongbunn acc si imkauw u cud siplun ee guarsiongx, qiyr juer condylomata. Taumngg e lud, naauu tniar, mii-sii qud sngnngxtniar. Bagjiux ee hongcaiw e huat’iam; kacc siongg nng luiw longxx u. Iauxx u jin’ je kuanw ee jingwjong, jongw .si dirr jiax be tangx qongw.
Derr snax qrii muidok si nng nii ixsiong. Ursii ziamw diyc sir-jap nii ixau, e huad cur muidok ee jingwjong qapp lairguarsiongx. Derr snax qrii ee siongx ursii si kacc cimx ee uiwiongg, acc si jit liap jingxiongg qiyr juer gumma. Gumma ee dingxbin ee puehux narr puar, e vniwjniaa uiwiongg. Jiaxee gumma acc si uiwiongg ee soxjai soxx cud :ee, si cavutdyx qui’ singkux, puehux, qud, simjong, qnuajong, vijong, nauw.
Iauxquxx u qycc jit hxang, jiurr si sentensingr muidok (先天性梅毒, congenital syphilis). Jitt xee vni si laurve acc si laurbuw, narr u muidok, dui’ anxnix e liutuann qaur ix ee qniaxzii. Narr dirr juxqiongx-lai ginxaw u sentenx muidok, kacc siongg e liusanw (流產, abortion, jiurr si qalauhsinx). Narr cutsir uac, kacc siongg m jniaa ginxaw, ix ee binrde naxx laurlangg bin ee kuanw. Qnuajong qapp vijong vuidua. Narr cutsir hyw hyw, kacc siongg nng~snax guehzit ee lairbin, e cud muidok ee jingwjong, jiurr si kax, ciuw, qapp qongbunn-vnix u huatjinw; cuir snix tniar, pnirliammoc huat’iam, drir qaur jadpni, kax tniar, quanjad jingw.
Kanwho diyhh jaix muidok si kuair kuair tuanziamw ee vni. Derr id qrii qapp derr zi qrii ee guanrsiongx-lai longxx u muidok sewkunw jin’ je, soxiw m tangx ing ciuw bongx diyc jiaxee guarsiongx, diyhh ing qesix. Narr diyhh bongx ix, diyhh dairsingx qruar ciurlinglongg. Ursii singx huanhur diyhh ing hydrargyrum iuu buah jitt hy ginxaw ee vakdow; narr anxnix, m tangx ing ciuw buah, diyhh ing jit qix digvet buah iyhqyx ee vyletuii, acc si buah dirr ginxaw iyduar lairbin vingg, jiacc qra ix vak; dui’ iyduar laii kipsiux dirr ginxaw singkux-lai. Langg narr u muidok, ingqaix diyhh jiurqin isingx, iarr jiac iyc siangrr jiyw si nng nii quw, ursii diyhh jiac iyc snax~sir nii quw.
Isingx soxx ing ee iyc si suixginn ee lxui, ursii iyhjuiw, iyhjiyhhunw. Iarr ing potassii iodidum, arsenicum, jiac iyc. Qinrlaii u ing suixginn, qapp arsenicum juwsia dirr bah nirr acc si jingrmec-lai. Suibongxx ing juwsia hxuad, diyhh lingrgua jiac iyc. Jitt xee su, kanwho diyhh jaix, in’ui vnirlangg air uanxkyr juwsiariyc laii dnaxdiap, kanwho diyhh jiauww isingx ee bingrling koxkngr ix diyhh jiapsuar jiac iyc. Derr id derr zi qrii qapp sentensingr muidok diyhh ing suixginn lxui ee iyc. Derr snax qrii diyhh ing suixginn qapp potassii iodidum snaqab jiac.
U muidok ee vnirlangg diyhh lingrgua ing qaqi ee jiahkir, in’ui ix ee cuir-lai narr u muidok ee guarsiongx, e bag diyc nguaw acc si tngsii, narr vadd langg laii ing e ziamw .diyc. Narr isingx ing qesix laii knuar hitt hy vnirlangg ee naauu, diyhh liamvnix quer sac, acc si jimr dirr acidum carbolicum nirr, go hunx quw. Diyhh qycc tak dingxbin derr 324 bin soxx qongw ee urhongg hxuad.
Dui’ qauwiok laii urhongg: Lun hualiuxvni, sewqair-diongx, dagg qog longxjongw u jiaxee vni dilehh. Hitt xee lirhai qongw be liauw. Dirr quixnarr soxjai u sed jit kuanw ee hue, qoxbuw langg qniaa jingwqingx ee lo, iarr suatbingg lxamm-luw diongriaur ee su. Lun jiaxee vni druu ciongqix ixgua hurzinlangg narr u hualiuxvni, kacc je si dui’ ix ee diongrhux ziamw .diyc. Dui’ anxnisnix hurzinlangg jiurr duw diyc jit siwlangg ee qankow. Narr u lo tangx tuali jitt hyw camxsu, jiurr diyhh cud lat koxkngr langg. Langg decbeh qaur diongxsingg, juer sirdua ee langg, verbuw acc si sensnix, ingqaix diyhh qawsi qingxqir, hro langg benw did dui’ m jaix, huan diyc jitt kuanw ee vni.