derr jap-snax jniux

DERR 13 JNIUX

BINCNGG, IHOK, TONGX KONGKIR EE HUATDO

Cux bincngg ee huatdo, iauwqinw diyhh siyxsimx, in’ui vnirlangg e kacc knuawuac, iacc si be kacc kunawuac, longxx quanhe bincngg erhiauw cux, iacc si berhiauw cux.

Ziok’aw ursii diyhh dui’tauu henx, ursii diyhh dui’ vnix:a henx, jiauww kacc lirven laii henx. Dairsingx cux ziok’iaw, jiacc qycc cux tanxaw, tanxaw ee dingxbin qycc cux jit niaw dua niaw puerdnuax (vor juer :ee junw ciyc ing); qycc ing jit niaw kacc siongg ing ser niaw ee puednuax tanxhnuaii cux dirr dua niaw puerdnuax ee dingxbin, tangx singw dua niaw puednuax.

Narr e mrbenw ing iuvor, jiurr benw ing, in’ui iuvor be tongkir, juer zet ee mic. Iuvor iarr be nngxzun, e hro vnirlangg snix ziogsiongx (jiurr si dyw lehh lur .diyc ee siongx). Setsuw qovutjiongx diyhh ing iuvor ee vni, dikkag diyhh ing iuvor cux dirr ser niaw tanxhnuaii puerdnuax ee erbin; iauwqinw diyhh jiong’ iuvor pox hro vnii.

Dirr vnirlangg bincngg-dingw itkair soxx ing ee puednuax, tanxaw, longxx diyhh kacc dua niaw, siwvnix u tangx auw quer laii sreh lehh, jit hxang si kacc hyw knuar, jit hxang si vnirlangg kacc knuawuac; bincngg ee dingxbin-vnix, iarr diyhh cux hro vnijniar, bylun zuarr je dniux, longxx diyhh anxnix.

Cig vnii vnirlangg ee jimxtauu, m tangx diamr bincngg nirr congr; diyhh tec kir vangg-gua jingxdunr hyxser, jiacqycc tec laii hro vnirlangg tex. Jimxtauu-vnix jixu tangx he jit diauu ser diauu ciuxqinx, qi’uu ee mic, longxx m tangx he hiax.

Vnirlangg narr lirkuix bicngg diab aw quw, kanwho diyhh henx ix ee ziok’aw. Jiong’ bincngg cux hyw, iarr diyhh siyxsimx jiauwqor vnirlangg, m tangx hro ix cuex diyc hongx qycc qamw .diyc.

Vni dang ee langg be did lyc bincngg, kanwho diyhh jiauww i’ngi ee quiqiw, dagg lexvair qra vnirlangg ngua nng vaiw bincngg. Hitt xee huatdo diyhh lingrgua jiong’ jit dniux bincngg cux hyxser, ing sir xee langg, jiong’ vnirlangg kinx kinx suaw quer sinx congr ee bincngg; narr si vnirlangg siongdiong dikkag diyhh jabhunx siyxsimx.

Narr vni taiww siongdiong, be qrngx quer vadd dniu bincngg .did, diyhh ing ngua puerdnuax ee hxuad. Dairsingx virvan jit niaw cingkir ee puednuax, qngw jidvnuar kiw laii jiacc qra vnirlangg huanx tanxkix srinx dui’ bincngg-vnix quer .kir (derr 115 doo). Diyhh qnuaxqinw jiong’ qu ee puednuax dui’ vnix:a qngw .quer .kir qaur vnirlangg ee singkux hitt erdew; iarr jiacc qnuaxqinw jiong’ virvan ven, hitt niaw cingkir puerdnuax jiong’ qngw :ee hitt jit vnuar, he dirr vnirlangg ee singkux-xe, zen’au qra vnirlangg jiauww qu huansinx quer .laii; qycc jiong’ qu ee puednuax diyh .lyc .laii; jiong’ hitt jit vnuar cingkir :ee tiw kuix cux hro hyw, iarr siwvnix ee puednuax jiacc kiyh laii sreh ann dirr ziok’aw-xe.

Setsuw vnirlangg be huansinx, iuguann diyhh jiong’ puednuax qngw hyw, qiyr langg vangjan liw, jiong’ vnirlangg siyxkuaw poo kiw laii, jiauww dingxbin ee huatdo qnuaxqinw cux hro hyw.

Qycc narr cincniu vnirlangg dingxquar longxx hyw hyw, qanda’ erquar puawvni, be e huansinx, kanwho iuguann diyhh jiong’ puerdnuax qngw hyw; dairsingx virvan ven ven, qiyr vnirlangg kiw laii jre, jiauww jingg ee huatdo anxnix laii ngua.

Henx ziok’aw ee huatdo:

1. Mipue qapp tanxaw tec kiw laii he jit der iw-dingw. Ing puednuax cux dirr vnirlangg, liongw vingg kiyh laii sreh dirr ix singkux-xe. Jimxtauu diyhh tec kiw laii he vnix:a.

2. Jiong’ vnirlangg qrngx dirr ziok’aw ee vnix:a.

3. Kanwho diyhh jiong’ ziok’aw tuax qaur bincngg-vnix: hitt diap tih juer ee ziok’aw ixqingx enx. (Jitt xee si decc qongw guarqog kuanw ee bincngg).

4. Ing snax xee jimxtauu he dirr tih juer ee ziok’aw-dingw; qrngx vnirlangg qaur hiax.

5. Ziok’aw diyhh dui’ tauu henx. Ing cingkir ee puerdnuax cux, qapp cingkir ser niaw puerdnuax iarr hyw. Qrngx vnirlang dirr ziok’aw-dingw, jiacc unn unn aw tuax qaur guan’ui (derr 116 doo).

Narr dirr vnix:a u lingrgua qycc jit dniux bincngg laii ing qrngx vnirlangg dirr hiax dyw, anxnix henx ziok’aw kiokk si kacc kuair.

Vnirlangg ee qutjic, hitt xee cauw juer ee ziok’aw-xe, diyhh qruew nng der cavangx; cenban m tangx hro bincngg e iydang, in’ui jitt kuanw ee vni qaiww kirkig bincngg decc iydang.

U jit kuanw ing ciurlingx drew juiw ee ziok’aw, kacc e si in’ui juiqud u vni ee langg, venwsui, iacc si vuanwsui hitt hy vnirlangg decc ing :ee. Jitt kuanw ciurlingx ziok’aiw he dirr cauw ziok’aiw dingxbin; ziok’aw-xe, iuguann diyhh cux vangx. Jitt kuanw ee ziok’aiw qewjnii jin’ quir, kanwho ee langg diyhh qinxsin laii ing; m tangx bag diyc iuu, iarr m tangx jiong’ hitt hy u miqag :ee laii he dirr ziok’aiw dingxbin, qniax liauw m duxhyw cak puar, iacc si duc pnaiw; narr ing liauw diyhh sew hro cingkir, qycc pak dax, jiacc siux .kiw .laii.

U hitt hy m si qui’ singkux u vni :ee, tangx ing jidvnuar ee ciurlingx ziok’aw, iacc si ing jit xee ciurlingx jimxtauu jiurr qauwgiac; mrbenw ing qaur sniu’ dua :ee.

Dua niaw ee ziok’aw itding diyhh dirr bincngg-dingw dyw juiw; ser niaw ee ziok’aw, iacc si jimxtauu, dirr cingkir dyh-dingw, drew juiw iarr tangx. Dirr dyh-dingw drew juiw ee sii, narr ing nng ciuw laii cic, e bongx diyc dyh-dingw, jiurr tangx jaix juiw iauxx bue qauwgiac; narr si ing jit ciuw cud lat jiacc e bongx diyc dyh, anxnix juiw jiurr si duxhyw.

Drew juiw liauxau, iauwqinw diyhh siyxsimx cud laii jiong’ losix juan hro ann, byc did hro guarbin pah damm. Jitt kuanw ee ziok’aw narr quer nng~snax lexvair, diyhh tni jit vaiw juiw, in’ui ziok’aw-lai ee juiw quer kacc je zit e jinghuad, jiurr kacc qiamxjiyw.

Vnirlangg ee iho, jiauww kanwho ee quijig, diyhh siongsiongg ngua hro cingkir, jiauww vnirlangg ee iwsur jit lexvair beh ngua jit vaiw, jiauww kanwho ee iwsur, jit zit diyhh ngua nng vaiw; ingi-lai be did tangx virvan hiacnirr je, jixu muixx zit hro vnirlangg sexik :ee, jiong’ ix ee ihok diaur kiw laii cuex hongx iarr hyw. Vnirlangg narr byy decc lrauu qnua, jit lexvair nng vaiw diyhh ngua cingkir ee snxax. Narr si siongsiongg lrauu qnua ee langg, iacc si hiwvni ee langg, inx ee ihok diyhh ing nee :ee, iarr diyhh siongsiongg ngua dax :ee, m tangx qanda’ jiauww jingg huatdo qongxx cuehongx jiurr e ing .did.

Vnirlangg dnajiacc hyw, tauu jit vaiw lyc bincngg sii, kanwho derr id iauwqinw diyhh knuar ix soxx cing ee ihok u hac u duxhyw bor, iarr m tangx hro ix cing sniu’ dang, sniu’ luirtui, in’ui dnajiacc hyw ee langg, ix ee vni beh qycc huad si jin’ kuair; iarr langg iauxx bue zuarr dua iongw.

Jiauwqor vnirlangg tex, dyw ee hxuad: Vnirlangg dyw ciyr ciyr be dinxdang, kanwho diyhh vangjan ix hro tanxkisinx, e sisiongg uahdang. Jiauww lixkir diyhh hro vnirlangg e hiwjong juann tew longxx e qniaa ix ee jok’iong, jiacc benw hro huih duirlyc laii vniwjniaa hiwiam; iarr diyhh hro ix ee singkux sisiongg e uahdang, jiacc mrbenw drir qaur snix ziogsiong.

Vnirlangg narr u sidhudiklia (veh’aujingr) iacc si qipsingr rheumatism ee vni, diyhh hro siongsiongg dyw ciyr ciyr; in’ui ix narr vreh .kiw .laii, qniax liauw simjong hutzenn sitvai, jiurr tingjiw. Qycc siyxdngzet vni (小腸熱病, enteric fever) qapp vakdow ee vni, ixqip lrauu huih hitt hy jxingr, iarr ingqaix diyhh dyw vnii vnii. Iarr dirr jingrmehqngw-lai ee huih qed qui’ der ee vni, jiurr si huiccuanvni (血栓病, thrombosis), qyckacc iauwqinw diyhh dyw decc hro vnii vnii. Simjong u vni ee langg, iacc si kunr ee sii simqnuax e qniax :ee, jitt kuanw ee vnirlangg ursii jre, ursii dyw, is be ing did dniardiyc ee huatdo. Kanwho diyhh m tangx hiamm huiwkir, knuar vnirlangg anxjnaixngiu kacc hyxser, jiurr hro ix anxnix. Cincniu vnirlangg jre ee sii, qajiah-au diyhh ing jimxtauu iacc si pueziok hitt hy mic laii qruew, iacc si ing jit der iw-aw he dirr ix binrjingg hro ix tangx pag lehh. Simjong u vni :ee narr be did diamr bincngg nirr kunr, diyhh ing jit der dua der ee teiw, hro ix hitt dingxbin, iarr diyhh qra ix qah hro siyx, m tangx hro lingw .diyc. Binrtaujingg he jit der qixdyh, tangx hro ix kywciuw, ursii iarr tangx pag decc hiyckunr (derr 117 doo). Ing vingsiongg teiw ee huatdo, knuar derr 118 doo.

Lun ziogsiongx (褥瘡, Bed-sore):

Narr vnirlangg qongw, ix singkux u soxjai e tniar, jiurr diyhh craa knuar si simxmic enqor, ursii iarr e jriw tniar, in’ui ursii si beh kiw ziogsiongx ee enqor.

Kanwho diyhh jaix ziogsiongx mrdanrna uaw ding qud ee soxjai e snix nardnia. Qajiah ee jikjuiqud, qingqacqud, diuxquanjad-au, duartuixqud, kaaurdniqud, ginxaw ee aurkog, jiaxee soxjai longxx e snix ziogsiong. Iarr kavnuaa qapp kajngxtau’aw, e hro hitt hy qxah ee puee deh .diyc, qaur tniar.

Jueww dang ee ziogsiong, jiurr si sinx zip ngi ee vnirlangg, in’ui ix dirr cur nirr ee sii, byy langg hucii ix ee enqor. Qniwnarr dirr i’ngi ee vnirlangg, jiurr mrbenw drir jitt hy jxingr, in’ui kanwho decc jiauwqor, qaur longxx hyxser. Narr rix vni ee huatdo, congr liauw u jiauvi tywdongr, vnirlangg jiurr be u ziogsiongx.

Urhongg ziogsiongx ee hxuad: 1. Vnirlangg narr ciangjai dyw dirr bincngg, beh dihongg ziogsiongx, kanwho diyhh vutjiw siyxsimx. Vnirlangg singkux-xe ee ziok’aw qapp puednuax, diyhh sisiongg cux vnii, m tangx kiycqingw. Jiac mic, m tangx pacqalauc dirr bincngg nirr.

2. Derr id iauwqinw :ee si diyhh cingkir. Vnirlangg dyw bincngg, kanwho ingqaix diyhh dagg zit nng vaiw, sew ix ee qajiac’au, iarr ursii qui’ singkux diyhh dagg zit sew, jiacc unn unn aw crid hro dax. Narr dairven iacc si siauxven srid qimr, dagg vaiw ngua cingkir ee snxax, bag diyc singkux ee soxjai diyhh quer sew.

3. Narr jiong’ vnirlangg ee puehux kacc kuair luer diyc soxjai, hro ix e qenqor, jiurr kacc be snix ziogsiongx. Cincniu qra vnirlangg sexik, crid hro dax, siongsiongg hro ix ee sintew e uahdang. Alcohol (huexjiuw) qaiww e hro langg puebah qenqor. Narr qanda’ ing jiuw, hitt xee lat byy qaxx zuarr dua, diyhh jiong’ huicqngw lur hro ix e uac, jiacc u qonghau. Narr qanda’ ing jiuw qra buah hitt puee nirr, si longxx byy loring, vehvec liauw jiuw nardnia. Ing pudyjiuw laii lur, iarr yw. Narr ing hyw ee satbun unr damm buah dirr puehux nirr, ing ciuw dua lat qra ix tud, iarr si e dihongg ziogsiongx ee huatdo.

4. Ing iyhhunw laii syx. Iyhhunx u quixnarr kuannw :ee, jongw .si jitt hy :ee si hyw ing:

5. Diyhh sisiongg srunn vnirlangg kuair sriu diyc ziogsiongx ee soxjai ee puehux, u venr anghnuaw iacc si osig; narr anxnix diyhh dihongg. Diyhh hro vnirlangg dyw dirr byy dngw angg ee soxjai, iacc si ing nngw ee jimxtauu, cincniu Seqog :ee, mipue, quanr kongkir ee ciurlinglongg, laii qruew qnuaii, hro singkux be deh diyc anghnuaw ee soxjai. Narr e hro vnirlangg ursii dyw tanxkisinx, ursii dyw ciyr ciyr iarr si hyw huatdo. Narr beh dihongg kaaurdnix snix ziogsiongx, ing jit der mihuex laii kuer kaaurdnix dingxbin hitt diauu dua diauu qinx (Tendo Achilis). Iacc si ing xmii, pingduar, juer jit xee ngikuann laii kuer dirr kaaurdnix (derr 119 doo).

6. Qaiwvnix, ersinx, qyc’erkangx, lingvongg-xe (乳房, breasts), hiaxee soxjai e kacc kuair damsib, diyhh sisiongg crid hro ix dax, suar syx iyhhunw.

7. Vnirlangg narr dairven iacc si siauxven sitqimr, diyhh sisiongg ing siurziyrkir. Diyhh ing xmii qapp pingduar laii kuer lehh, m tangx hro vnirlangg ee puehux kuer diyc siuziyrkir, in’ui kuair kuair snix ziogsiongx. Diyhh vutsii sew cingkir, crid dax, suar syx iyhhunw. Narr vnirlangg siongsiongg qauhqauc gniauc, siurziyrkir kacc be tangx dniardnia he dirr hiax. Diyhh ing vadd kuanw ee huatdo. Cincniu ing cox xmii, iacc si ing pingduar laii vaux quwsuthux, jiacc srinn dirr dairsiauxven ee soxjai. Jitt xee narr qnialangg diyhh suisii ngua cingkir :ee. Narr si tuanziamxvni, quwsuthux diyhh suar siyliyx .kir. Hitt sii, vnirlangg bag diyc qnialangg ee soxjai, diyhh suar sew, crid dax, ing huexjiuw lru, syx iyhhunw, jiacc e ing .did. Qycc ing iuvor iacc si iujuaw ju dirr erdew, ziok’aw kacc be quer damm. Ursii ing zinci oxidum buah hiaxee damsib ee soxjai; jongw .si iuguann diyhh cingkir. Buah iuu ee soxjai m tangx syx iyhhunw in’ui e liamm, suar qenn qui’ vax, drir qaur kiw ziogsiongx.

Jueww yh did jiurr si qajiah jikjuiqud, qapp simjongrvni; in’ui jitt nng kuanw ee vni be cutjai inx ee iwsur huansinx dinxdang. Narr duw diyc jitt hyw jxingr jiurr diyhh qra vnirlangg ing juiw ee qiok’aw. Mrquxx jitt hy vni suizenn ing juiw ee ziok’aw, ursii dihongg kiw ziogsiongx kacc yh. Jongw .si kacc gauu ee kanwho, narr vnirlangg u ziogsiongx, ix qaqi pacsngr si ix ee qenwsiaur.

Ziogsiongx dirliauhuad si isingx ee quanhe, jongw .si ursii isingx qah kanwho sethuad.

1. Puehux narr ixqingx puar, hitt xee huexhux m tangx lur uaw puar kangx ee soxjai. Diyhh jit zit nng vaiw ing sapbunn qapp juiw sew cingkir, qycc crid dax. Ing zinci oxidum iuu buah siongcuir, qapp dirr vnix:a ee puehux. Kacc byy uaw siongcuir ee puehux, iuguann ing huexjiuw qra lur.

2. Jiauww dingxbin ee huatdo, sethuad hro singkux byy deh diyc siongcuir.

3. Narr ziogsiongx kacc nua, diyhh ing acidum boricum unsiyvor. Soxx ing ee juixnivor diyhh hap dirr siongcuir ee hingjong, m tangx sniu’ dua, iarr m tangx quer siongcuir ee qnii, qniax liauw siongcuir ee qnii e nua .kir. Ursii ing liquor hydrogenii peroxidi sew siongcuir iarr hyw.

4. Narr kacc cingkir, ing zinci oxidum iuu qapp vaux siongliau, laii kamr. Narr anxnix, diyhh ing juixnivor qapp siongcuir vnii dua, m tangx kacc dua.

Narr Kanwho knuar puehux dngw angg, cincniu beh kiw ziogsiongx, diyhh liamvnix tongdix isingx, m tangx encenn.

Hucah vnirlangg ee huatdo:

1. Vnirlangg dirr bincngg nirr, kanwho beh hucah sii, diyhh ing jit qix ciuw cngx zip qingqah-xe, qycc jit qix cngx zip dirr duartuiw-xe, cngx quer qaur vnirlangg hitt vingg bin.

2. Vnirlangg narr u lat diyhh ing ix ee ciuw laii py dirr kanwho ee amqunw.

3. Qah vnirlangg diam diam dyw lehh, jiacc unn unn aw qra huu kiw laii. Vnirlangg narr be sniu’ dang e juer .did.

4. Vnirlangg narr kacc dang, iacc si siongdiong, iacc si pni quer bajuiwiyc, jiurr diyhh ing nng~snax xee langg laii hucah. Jit langg dirr taukag, jit langg dirr singkux, qycc jit xee dirr kax. Dairqex diyhh kia siangx vingg, diyh lringg vnirlangg hro ix vnii vnii. Iarr diyhh ing qui’ qix ciuw, m tangx qanda’ ing jngxtau’aw nardnia, in’ui anxnix byy qauwgiac lat. Qycc jit xee huatdo si jiauww derr 120, 121 doo.

Ing venrkir ee huatdo (derr 122 doo): 1. Iauxx bue hro vnirlangg ing ee dairsingx, diyhh vniar damrvyc siyjuiw dirr lairbin, hro venrkir siyxkuaw siyx, jiacc vniar cud hetqak, anxnix kacc knuawuac.

2. Narr vnirlangg kacc dang, venrkir ee dingxbin diyhh buah damrvyc iuu, hro ix ee puehux be laimm diyc venrkir laii dihongg kiw ziogsiongx.

3. Venrkir-lai m tangx he siaudog’iyhjuiw, qniax liauw iyc bag diyc vnirlangg.

4. Kanwho ing dywciuw huu vnirlangg ee qutvnuaa, hro ix siyxkuaw lirpuu, jiacc dui’ vnix:a jiong’ venrkir cngx zip. Decc cngx zip ee sii diyhh sewzi m tangx ler diyc vnirlangg ee puee; iarr jitt diap qycc qah ix ee kax diyhh qiux .kiw .laii. Jiacc ing binrqinx ud laii kuer dirr venrkir ee dingxbin hro ix kacc be diamx.

5. Ing liauw diyhh tec kiw laii, iuguann diyhh sewzi m tangx ler diyc vnirlangg ee puehux. Vnirlangg narr byy lat tangx qaqi crid, kanwho diyhh ter ix. Venrkir diyhh ing vor kamr lehh, pangg kir dirr qiamxgiam dairsiauxven sxig-lai. Narr isingx u huanhur diyhh lauu lecc hro ix qiamw(?).

6. Qiamw(?) liauw, vunr diyhh vniar hetqak. Venrkir diyhh sew hro cingkir. Dairsingx ing juiw sew, aurlaii ing jit qix dig-aw, buexliux vak vor, laii sew cingkir. Sew liauw jitt qix diyhh ciangjai jimr dirr cox carbolic iyhjuiw. Qycc ing siyx juiw sextua, jiacc siux dirr guanui. Sew ee sii, quar iarr diyhh sew. Venrkir-lai narr u snix iamlui ee jid, ing iamsngx qra ix jimgr e qaixngiuu, suar ing juiw sew.

7. Siyxdngzet, iacc si vadd kuanw tuanziamxvni, hitt xee kanwho ee huatdo, u qir dirr derr 37 jniux.

Sew cuir ee hxuad: 1. Vnirlangg narr qauwgiac iongw, diyhh jit zit snax vaiw ing kixbinw qapp kixhunw laii binw cuiwkiw.

2. Sew cuir ee sii diyhh urvi, isingx soxx huanhur ee suawkauwiyc, mhuex, iacc si quixnarr diauu misex, iacc si qu qycc cingkir ee ciuxqinx, jit qix dongrmehknii, iacc si quixnarr qix 5 cunr dngg ee dik’uec’aw/ Jitt hy dik’uec’aw kacc lirven in’ui si siok siok, setsuw narr tuanziamxvni, tangx sinrsuar siyx. Jongw .si ing kacc ding ee mic crid cuir diyhh sewzi, m tangx ler diyc vnirlangg cuir-lai ee liammoc (derr 125 doo).

3. Jiong’ damrvyc xmii dnii dirr jngxtau’aw-buew, iacc si dik’uec’aw ee buew, unr suawkauwxiyc, jiacc qra ix crid cuir. Decc crid ee sii diyhh jimjiog crid jic, cuiwkixhnua qapp cuiwpuee liammoc diongqanx ee soxjai. Mihuex diyhh siongsiongg ngua cingkir :ee.

4. Crid jic ee sii, m tangx crid sniu’ aurbin, qniax liauw hro ix air tror.

5. Setsuw narr vnirlangg m jaix langg, byy air langg qra ix crid cuir, diyhh qiyr vadd xee kanwho qra ix draur kaciuw. Narr diyhh ing kuicuiwkir, diyhh ing ciurlingx ee tat’aw, iacc si qimx qimx byy sniu’ ding ee caa. Hitt xee buexliux diyhh jngr kangx vak snuar, snax ciyh dngg; dihongg qniax liauw ix tunx .lyc .kir.

Jiauwor hurzinlangg taumngg ee huatdo (derr 126 doo). Taumngg diyhh dagg zit qra ix srex, iarr diyhh vunx juer nng vingg laii srex, vnrix juer nng qix ee mngbuew. Ursii jitt vingg dnii quer laii, hitt vingg dnii quew kir; dirr dingxbin ing vinxjiamx laii qid. Iwsur si kacc be hro taujangx dirr aurkog diamx .diyc; anxnix kacc knuawuac, iarr lingrzit kacc kuair srex. Decbeh srex ee sii, diyhh dui’ buew:a jiarmjiam srex qaur taumngg-tauu, jiacc kacc be pacqatqiuu, hro vnirlangg kacc be tniar.

Qycc dagg lexvair diyhh jit vaiw qra ix vinwtauu.

Taumngg narr u snix satbuw ee langg, diyhh virvan iyhjuiw hydrargyri perchloridum 1-500, iacc si acidum carbolicum 1-40 dirr nguaw-lai, mihuex, binrqinx, satvinr, qu ee vor. Narr vnirlangg dyw dirr bincngg, diyhh cux binrqinx dirr taukag-xe; narr e kiw laii jre :ee, ing binrqinx muax dui’ qajiah qaur qingqah.

Satvinr diyhh jimr dirr iyhjuiw, unn unn aw qra ix vinr, ing xmii laii crid qnialangg, diyhh he dirr iyhjuiw nirr, iacc si ing satvinwtog. Qycc ing vor jimr dirr iyhjuiw, laii vaux taumngg, ing pingduar qra ix vak; anxnix dagg zit ngua jit vaiw, qaur byy satbuw, jiacc suah.

Sew taumngg: Langg narr dyw dirr bincngg, iuguann diyhh sew taumngg. Beh sew ee sii, diyhh dyw dirr bincngg-vnix, ing jit diauu dua diauu ee ciurlingvor, jit tauu cux dirr vnirlangg ee amrqunw-xe, jit tauu dui’ bincngg-vnix suii lyc dirr juixtangw—lai.

Dairsingx ing satbunn unr siyx juiw kiw laii, lur taukag hro ix jiauu diyc, aurlaii ing siyx juiw sew, qycc tua, qaur longxjongw cingkir. Ing dax ee qin’aw qapp taumngbuew snaqab jun, taumngtauu diyhh ing qin’aw lur, qaur jiauu, qycc ing quewsnir et hro ix dax, aurlaii tingwhau dax liauw, jiacqycc srex hro ix hyxser (derr 126 doo).

Tongx kongkir ee huatdo, m na uirdiyhh vnirlangg ee lirig, kanwho iarr si u lirig, jongw .si go-jap xee vnirlangg ee diongqanx, dairkair byy jit xee hnuahiw beh kuix txangx-aw, dikkag diyhh ing hyw ee ue laii koxkngr inx; diyhh jaix cur-lai dikkag diyhh u sinx ee kongkir, laii nguarkir jiaxee uwuer ee krir. Jitt diauu lriw bylun puawvnirlangg anxjnaiw qongw, kanwho diyhh itkair m tangx tniax. Zit .sii kuix txangx-aw ee sijun, dangtnix hertnix si siang jit ngiu, narr si tnikir kacc siyzuac, mii .sii iarr tangx jiauww jurqiw ee iwsur laii kuix txangx-aw. Jongw .si iauwqinw diyhh siyxsimx. Vnirlangg ee bincngg, narr qyxzenn e ciongx diyc hongx, kanwho diyhh ing uivinn laii jac jiacc hyw. Dairkair laii qongw, kanwho diyhh e bingvik tnikir ee qnuazuac, jiauww hitt xee kamxjam laii kuix laii qnuaix ee lixkir, jex si dirr linw ee hagbun, qenwsig knuar jnaixngiu lar; cincniu tnikir narr taiww lingw, iarr si diyhh kuix txangx-aw hro tongkir, vutqyr diyhh qex qra vnirlangg cing snxax, qapp qah pue, jiurr byy iauwqinw, tingwhau kongkir ngua liauw jiurr liamvnix tangx qycc qnuaix. Qycc jit hxang m tangx uirdiyhh jit xee langg ee enqor laii qra inx kuix-qnuaix, jex jiurr si qydingw kanwho ee dairjir. Vnirsig ee hanluanxqer (jiurr si qiamxjax undo ee kiwqu) diyhh kacc siongg dirr 60 dxo F. jiww 65 dxo F. (15.6∘C.—18.0 ∘C). undo narr byy qaur 60 dxo F. (15.6∘C.), jiurr diyhh ing huexloo; narr dirr 65 dxo ixjniu jiurr diyhh kuix txangx-aw. Jitt xee si kacc hap dirr qnuatnix ee soxjai; narr si zeddair ee xui, vnirsig ee undo diyhh 65∘—70 ∘F. (18.0∘C.—21.0 ∘C)

Vnirsig ee dingxbin diyhh u txangx-aw, tangx tauw jiaxee qnialangg ee krir, in’ui m hyw ee krir kacc je dirr dingxbin, narr be e dirr vangg-dingw kuix txangx-aw, dikkag diyhhh kuix mnglii iacc si kuix txangx-aw.

Dairkair laii qongw, tong’ kongkir ee huatdo, diyhh siongsiongg hro ix duxhyw, mii qapp zit siang jit ngiu; narr zit .sii u decc ngua kongkir, mii .sii jiurr qinw qnuaix, anxnix kixtauu si hyw, mrquxx aurlaii iuguann si byy loring. Dirr derr 127 doo jitt xee txangx-aw tongx kongkir ee hxuad, jiurr si u siangx dow ee txangx, jiong’ erbin dow tuh jnriu qnuaii, damrvyc, erbin jiacc tyr jit pnir vangx, jiurr siangx dow ee txangx-aw e langr pang, jiurr kongkir e zip, be diddit cuex diyc vnirlangg.

Mii .sii derr id lingx, jiurr si snax~sir diamxjingx ee sii, hitt diap m tangx hro huexloo ee huew huax .kir; dirr zit .sii narr kacc hyw tnikir, jiurr mrbenw tnrix sniu’ je totnuar.

Taiwiongg ee qngx e bedbyy bisingbut, soxiw cur-lai iauwqinw diyhh u zit ee qngx; narr si tnikir sniu’ zuac ee sii, kanwho diyhh jiong’ mnglii vangr lyc laii.

Mii .sii juer dairjir diyhh kacc diamrjing, in’ui vnirlangg narr tniax qnir kihkiauc ee sniax, air be kunr .did, jiurr inx ee simx vut’anx. Tnrix huexloo ee huextniar, iacc si totnuar mrbenw ing tih ee mic si kacc hyw; iarr huexloo ing caqunxaw jiacc be u sniax; iarr beh tec huextnuar diyhh ing ciuw, ciuw jiacc qruar ciuxlog.

huedngw tauu iac