Bang Jap Xia
(夢十夜)
derr snax xia
( 第三夜)
Lu Juxbingg huan'ik
Jyr jit xee jitt kuanw ee bang.
Kajiacpniax ngai jit xee beh jnia’ lak huer ee ginxaw, ix kaksit si guaw ee qniaw, jixsirr m jaix ix dangsii bagjiux laii cnemee .kir,
taukag dingw marr venr jyr cnepuee ee qngtauu. Guaw qra mng dangsii bagjiux laii cnemee .kir. Ix rinr qongxx, ”Jurr jaw guanvunw itdit dyrr si anxnex, qamxx m si? ” Snia’imx si ginxaw-sniax, iong ee gensuu kiokk si duarlangg ee kuiwkauw, marr naxx cniu qapp qang renn :ee decc qongw ue.
Dnax tauu knuar siwjiux, nng vingg longxx si cuiwcnix ee canngiuu, canhnuarlo jiokk ser diauu, cann diong’ngx sisii u vehlingrsix vuex .quer ee ox ngiaw.
“Uaw diyc dua kux cann ar hioh?” Kajiacpniax :ee qongw.
“Liw nacc e jaix?” Tauu uat hiongr aurviah mng kiw.
“Qamxx m si vehlingrsix dyrr beh tiqiyr lehh?” Anxnex rinr.
Sui’ tniax diyc vehlingrsix tiqiyr nng sniax.
Suibongxx si qaqi ee qniaw, guaw suacc siyxkuaw u qniax :ix. Ngai jit xee jitt kuanw ee ginxaw, qycc laii beh vnir dycc jit cud byy langg jaix. Sniu beh qingw knuar u dycc jit dah tangx qra danr driau, knuawqnir taujingg amwlyy iarsig diongx, u jit pxenr ciurnaa.
Hitt dah laii qra danwdiau be baiw, simlai dng’ anxnex decc juxdniux ee sii, kajiacpniax :ee u sniax, “Hngh hngh.” Lingw ciyr.
“U sniaxmic hyw ciyr?”
Ginxaw byy huedab, qandna’ mng, “Avah, u dang .byy?”
“Byy dang.”
“Jinw kiw dyrr e venr dang lor.” Anxnex qongw.
Guaw diam diam hiongr diyc ciurnaa itdit qniaa .kir, canhnuaaxlo ovec uanx, m si lanw soxx sniu ee dit longlongx. Byy zuarr quw, laii qaur siangcex lortauu, guaw kia dirr vuncediamw, hiyh .jit .kunr .aw.
“Ingwqaix u jit qix jiyhtiau cai dirr hiax?” Qauginxaw qycc qongw.
Jniasit u jit qix vnuar langg quann, veh cunr suwhongx ee jiyhtiau cai dirr hiax. Dingxbin u kig zri, dyr ciuw vingg ongw Higakubo, jniar ciuw vingg ongw Hottahara, suibongxx tnisig amwlyy, mrqycc angg sig ee zri iauxx si jin’ cingcyw, hex angg sig dyrr naxx cincniu sir kax juixjuaa vakdow ee sig.
“Dyr ciuw vingg hyw.” Qauginxaw decc huah bingrling.
Dnax tauu hiongr dyr ciuw vingg taujingg knuar, qui’ dua pnir ox ngiaw cniu beh dar uaw .laii. Simqnuatauu qiongg beh be cuanxkuir, dngdecc dunwdnex qongxx qamxx hyw hiongr jingg qniaa ee sii, “Benw huanlyw lar.” Qauginxaw iurqycc decc huah bingrling, guaw marr byy qitax ee vanrhuad, jixhyw hiongr jingg qniaa.
Simlai sniu qongxx, jitt xee cnemee jniax sniu sniaw qongw sniaw longxx jaix, guaw dyrr byy rair qycc qongw ue, it’ir hiongr jingg qniaa.
Kajiacpniax :ee qycc u sniax, “Jongw qongw bagjiux cnemee si jin’ be juriuu, jin’ baixjaii lar.”
“Guaw m si qra liw ngai qaxx hyxser hyxser lehh? Liw dyrr mair qycc hnaicanx lar.”
“Hro liw ngai si jin’duiwvutju lar, mrqycc ho’ngg dongwjyr adaix si be ing .did lar, iuqii si cinlangg qycc kacc be ing .did lar.”
Jin’ jin’ si tyxiar, dyrr qnuaxqinw laii kir ciurnaa lai cue jitt xee soxjai qra danr driau.
“Qycc siykuaw qniaa .jit .xe dyrr e jaix. Jniawjniar si cniu jitt kuanw ee amwmii.” Kajiacpniax :ee jurgenn-jurgiw marr m jaix decc qongw sniaw.
“Liw decc qongw sniaxmic?” Guaw jin’ qinxdniux qra mng.
“Qycc mng, qaqi simlai qamxx m jaix?” Qauginxaw iong naxx tixciyr ee kuiwkauw hueingr.
Jitt sii guaw naxx jaix iurqycc naxx m jaix, taukag huex huex. Cniu ingamr ee zidjiw qanxnaxx u sniaw kuanw dairjir, sniu byy, langg dyrr itdit qniaa.
Jaix tongvnuaa huanrser jin’ hiauhing, jaw jaw qra danr driau kacc hyw, m jaix hyw liauw liauw. Kavo vutqag qinw .kiw .laii.
Ho kaisiw lyc, lo venr qycc kacc amr, naxx cincniu decc binbang diongx. Qandna’ kajiacpniax ee qauginxaw iauxx qycc giab diauu diauu, ix qra guaw ee quewkir, henrjai, birlaii longxx jaix qaxx jiokk tauwted, cniu kia dirr jit pnir dua qniar taujing, liw ee binrmau qapp hingngiaw cunr cunr hunbingg, byy jit diamw aw e laursid .kir. Pen’ pen’ ix si qaqi ee qniaw, iuqii cnemee qycc naxx jniax lehh, guaw sidjai si anxjnuaw dyrr dongr be diauu lar.
“Dyrr si jiax, dyrr si jiax, jniar jniar si hitt jangg samaxciu-kax.” Suibongxx singkux lramm dua ho, mrqycc hnirkangx vnix ginxaw ee ue iauxx si jiokk cingcyw :ee.
Byy diwqag ji’ diongx, kavo tingg .lyc .laii, dangsi’aw ixqingx qniaa zip ciurnaa lai. Nng~snax kavo jingg, jit jangg dua senx ox ngiaw cai dirr hiax, kaksit si qauginxaw qongw :ee samaxciu.
“Avah, hitt jangg samaxciu-kax lar!”
“Ngngr, dyrr driyc m,” guaw longxx byy sniu dyrr qongw .cud .laii.
“Dairjir ingwqaix si Bunhuar go nii ee liongg nii ee kuanw.”
Guaw naxx sniu kiw kaksit dirr Bunhuar go nii ee liongg nii u siaxmih qowsu. Ginxaw jiapsuar qongw, “Liw dirr jiax qra guaw taii .siw, duxhyw si jit-vah nii.”
Guaw tniax diyc jiaxee uegiw, jiksii taukag longxx cingcniw .kiw .laii, jit-vah nii jingg ee Bunhuar go nii, jniar si liongg nii, qangrkuanw si ingamr, guaw dyrr si dirr jitt jangg samaxciu-kax taii siw jit xee cnemee ee langg. Diwqag diyc qaqi si jit xee satzinn hiongciuw sii, jit bak nih aw, kajiacpniax :ee naxx cniu pnai jit jrunx jiyhvut, dang qaxx qra guaw deh .lyc .kir.
guanjokjiaw: Natsume Soseki 夏目漱石