Daniel

1 Judah Ongg Jehoiakim jerui derr snax nii, Babylon Ongg Nebuqadnezar laii qaur Jelusalem, uii sniaa laii qongqig ix.

2 Jruw ing Judah Ongg Jehoiakim qapp Siongrder cur-lai kiwqu ee jit hxun qaux dirr ix ee ciuw; ix jiong' inx duar qaur Sinar ee de, zip ix ee siongrder ee cur, ing hiaxee kiwqu he dirr ix ee siongrder ee kowvangg lai.

3 Ongg huanhur taiwqamwdniuw Aspenaz diyhh dui' Islael ee ongcinx qapp quiwjok ee diongqanx duar quixnarr langg laii;

4 Dyrr si siauwlenn, byy hacuu, binrmau suiw, u cangmiaa diwsig, tongdat dagg ngiu ee hagbun, bingvik qikdir, qraur gxiac tangx qinsuii dirr ongqiongx :ee, diyhh qawsi inx Qaldealangg ee bunhak qapp gengiw.

5 Ongg dyrr hunpair jiong' ongg soxx jiac ee hyw mic qapp soxx limx ee jiuw, muixx zit hro inx jit hxun, vuengiuw inx snax nii quw; zen'au hro inx qinsuii dirr ongg ee binrjingg.

6 Inx diongqanx u Judah-jok ee langg, Daniel, Hananiah, Misael, Azaliah.

7 Taiwqamwdniuw qra inx hy miaa, cxingx Daniel juer Beltesazar; cxingx Hananiah juer Sadlac; cxingx Misael juer Mesac; cxingx Azaliah juer Abednego.

8 Jongwsirr Daniel libjir byy beh ing ongg ee hyw mic qapp ix soxx limx ee jiuw pah lasamm qaqi, soxiw qriuu taiwqamwdniuw iong'unw ix benw did pah lasamm qaqi.

9 Siongrder hro Daniel dirr taiwqamwdniuw ee binrjingg did diyc unhui linbinw.

10 Taiwqamwdniuw qra Daniel qongw, "Guaw qnia'uir guaw ee jruw, guaw ee ongg; ix ixqing’ hunpair linw ee limjiac; taixtyw tangx hro ix knuar qnir linw ee binrmau kacc sux linw qangg nii ee siauwlenlangg ar? Narr anxnix, dyrr hro guaw ee taukag yh did vyxjuann dirr ongg ee binrjingg."

11 Taiwqamwdniuw u pair jit xee qamho :ee quanxliw Daniel, Hananiah, Misael, Azaliah;

12 Daniel duiww ix qongw, "Qriuu liw cir knuar liw jiaxee lovok jap zit quw, hro guanw jiac cair limx jiuw.

13 Zen'au liw tangx knuar guanw ee binrmau qapp hiaxee jiac ongg hyw mic ee siauwlenlangg ee binrmau; dyrr jiauww liw soxx knuar .qnir .ee, kuanxtai liw jiaxee lovok."

14 Jitt xee su ix u unxjunw inx, cir inx jap zit quw.

15 Jap zit au knuar qnir inx ee binrmau viw hiaxee jiac ongg ee hyw mic ee siauwlenlangg qyckacc suiw, kacc pauh.

16 Dui' anxnix qamho dyrr ted kir soxx hro inx ee hyw mic soxx diyhh limx ee jiuw, hro inx jiac cair.

17 Jitt sir xee siauwlenlangg, Siongrder hro inx dirr dagg ngiu ee bunzi hagbun cangmiaa diwsig; Daniel qycc bingvik dagg ngiu ee ngirsiong qapp bang .qnir ee diaurtauu.

18 Ongg soxx dniardiyc cua inx zip .kir ee zit ixqing’ qaur, taiwqamwdniuw dyrr cua inx zip kir qaur Nebuqadnezar ee binrjingg.

19 Ongg qapp inx qongxue, dirr inx jingwlangg ee diongqanx knuar byy jit xee e viw did Daniel, Hananiah, Misael, Azaliah; soxiw inx did diyc kia dirr ongg ee binrjingg.

20 Ongg qniww u soxx mng inx ee su, dyrr jaix inx ee diwhui cangmiaa viw tong' qog ee poksu qapp sudsu ngiaa quer jap vxue.

21 Daniel qaur Kylus Ongg guannii iauxx dilehh.

2 Nebuqadnezar jerui derr zi nii, Nebuqadnezar bang .qnir; simx vecvag be kunr .did.

2 Ongg bingrling driaur poksu, sudsu, saiqongx, qapp Qaldealangg laii, rair inx ing ongg ee bang qra ix qongw. Inx dyrr laii, kia dirr ongg ee binrjingg.

3 Ongg qra inx qongw, "Guaw u bang qnir jit xee bang, guaw ee simx vecvag, rair beh jaix hitt xee bang si simxmih."

4 Qaldealangg ing Alamaic ee kniukauw duiww ongg qongw, "Guan ongg banrsuer; cniaw jiong' hitt xee bang qra liw jiaxee lovok qongw, guanw dyrr beh quexbingg."

5 Ongg rinr Qaldealangg qongxx, "Hitt xee su guaw ixqing’ be qir .did lar, linw narr byy jiong' guaw soxx bang .qnir qongw hro guaw tniax, suar quexbingg ix, dyrr beh jiong' linw ee bah quah cruir cruir, linw ee cur beh juer vunwsywduix.

6 Linw narr jiong' guaw soxx bang .qnir qra guaw qongw, suar quexbingg ix, linw beh dui' guaw did diyc jingrpinw, vywsniuw, dua ingqngx. Dnaxx linw diyhh jiong' guaw soxx bang .qnir qongw hro guaw tniax, suar quexbingg ix."

7 Inx derr zi vaiw qycc duiww ongg qongw, "Cniaw ongg jiong' soxx bang .qnir .ee qra jiaxee lovok qongw, guanw dyrr beh quexbingg ix."

8 Ongg rinr qongxx, "Guaw junw junw jaix linw si qowir encenn, in'ui linw jaix hitt xee bang guaw ixqing’ be qir .did lar.

9 Linw narr byy jiong' guaw soxx bang .qnir qra guaw qongw, jixu jit hxuad tangx kuanxtai linw; in'ui linw ixqing’ u virvan honggenn luanrgiw duiww guaw qongw, decc tingwhau siser ee qaixvenr; dnaxx linw diyhh jiong' soxx bang .qnir qra guaw qongw, guaw dyrr jaix linw e quexbingg ix."

10 Qaldealangg dirr ongg ee binrjingg rinr qongxx, "Ongg jitt hy su, derjniu byy langg e qongw cud; in'ui m bad u qun'ongg, dairsinn, jiangquann :ee qiyr poksu, iacc si sudsu, iacc si Qaldealang diyhh anxnix juer.

11 Ongg soxx mng :ee si hiqii ee su; druu kir byy qapp sewqanlangg drangg kiarkiw ee sinbingg ixgua, byy jit xee e dirr ongg ee binrjingg qongw cud."

12 Ongg siurkir, siuirkir qaur qik, bingrling jaubet Babylon itcer diwhui ee langg.

13 Dui' anxnix cud bingrling beh taii diwhui ee langg; dyrr cue Daniel qapp ix ee dangpnua beh taii inx.

14 Ongg ee siruerdniuw, Alioc, cud laii beh taii Babylon diwhui ee langg, Daniel ing jingtongx diwhui ee ue rinr ix;

15 Dyrr duiww ongg ee siruerdniuw, Alioc, qongw, "Ongg soxx cud ee bingrling jnaixngiu qaur jiacc qinxqib ar?" Alioc dyrr jiong' jitt xee dairjir qra Daniel qongw.

16 Daniel dyrr zip .kir, qriuu ongg kuan'an, dyrr beh jiong' bang qra ongg quexbingg.

17 Daniel dyr kir ix ee cur, jiong' jitt xee su qra ix ee dangpnua Hananiah, Misael, Azaliah qongw,

18 Rair inx uirdiyhh jitt xee viwbit ee su qiqiuu tnidingw ee Siongrder linbinw, benw did Daniel qapp ix ee dangpnua qapp Babylon qi'uu diwhui ee langg snaqab bedbyy.

19 Jitt xee viwbit ee su dyrr dirr mii .sii ngirsiong diongx duiww Daniel henxbingg. Daniel dyrr ylyw tnidingw ee Siongrder.

20 Daniel qongw, "Siongrder ee miaa ingqaix siurr ylyw qaur ingxuanw; in'ui diwhui quanlingg longxx sriok dirr Ix.

21 Ix venwngua siqii, jecquir; Ix huewbyy ongg, setlip ongg; jiong' diwhui hro diwhui ee langg, jiong' qenwsig hro congbingg ee langg.

22 Ix jixsi cim'yr viwbit ee su; amwdiongx soxu :ee Ix longxx jaix, qngx iarr qapp Ix snaqab druar.

23 Guaw ee ledjow ee Siongrder ar, guaw qamxsia Liw, ylyw Liw, in'ui Liw sniuxsur guaw diwhui jailingg, dnaxx ing guanw duiww liw soxx qriuu :ee ixqing’ jixsi guaw; in'ui Liw u ing ongg ee su jixsi guanw."

24 Dui' hit diap, Daniel zip kir qnir Alioc, dyrr si ongg soxx pair jaubet Babylon hiaxee diwhui ee langg; ix kir qra ix qongw, "Byc did jaubet Babylon hiaxee diwhui ee langg; cua guaw qaur ongg ee binrjingg, guaw beh jiong' bang qra ongg quexbingg."

25 Alioc jiksii cua Daniel qaur ongg ee binrjingg, duiww ix qongw, "Guaw dirr Judah siurr liac ee langg ee diongqanx duw diyc jit langg, ix e jiong' bang qra ongg quexbingg."

26 Ongg duiww cxingx juer Beltesazar ee Daniel qongw, "Liw e jiong' guaw soxx knuar .qnir ee bang qra guaw qongw, suar qra guaw quexbingg mah?"

27 Daniel dirr ongg ee binrjingg rinr qongxx, "Ongg soxx mng ee viwbit, diwhui ee langg, sudsu, poksu, vokquar :ee, longxx be qra ongg jixbingg.

28 Jongwsirr tnidingw u jit xui Siongrder e henxbingg viwbit ee su; dnaxx ing zid'au decbeh u ee su u jixsi Nebuqadnezar Ongg. Liw soxx bang .qnir .ee qapp liw dirr cngg nirr soxx sniu ee ngirsiong si anxnix.

29 Ongg ar, liw dirr cngg nirr sniu qaur jionglaii ee su; hitt xui henxbingg viwbit ee su :ee ing jionglaii soxx beh u ee su jixsi liw.

30 Lun qaur guaw, hitt xee viwbit ee su henxbingg dirr guaw, m si uirdiyhh guaw u diwhui ngiaa quer itcer uac lehh ee langg, si diaudii beh quexbingg hro ongg jaix, qycc hro liw jaix liw ee simx ee liamrtauu.

31 Ongg ar, liw decc knuar, dyrr knuar qnir u jit senx dua sxiong; jitt xee sxiong jin' quann, qigqii canwlan, kia dirr liw ee binrjingg; ix ee hingjong jin' tangx qniax.

32 Jitt xee sxiong, ix ee taukag si hyw qimx :ee, ix ee hinghac qapp ciuxqud si ginn :ee, vokdow qapp duartuiw si dangg :ee;

33 Ix ee kadangg si tih :ee, ix ee kavnuaa jidvnuar tih, jidvnuar too :ee.

34 Liw decc knuar u jit der jiyc, m si ing ciuw pah :ee, qongr diyc hitt senx sxiong tih qapp too ee kavnuaa, laii pah puar inx.

35 Dui' anxnix hitt xee tih, too, dangg, ginn, qimx juer jit xe pah cruir cruir, vnir juer hertnix gorqakdniuu ee cokngx, hro hongx cuex snruar, byy qycc u inx ee uircur; qycc jitt xee qongr diyc sxiong ee jiyc vnir jniaa dua snuax, ciongmuaw juann de.

36 Jex dyrr si hitt xee bang; guanw dnaxx beh dirr ongg ee binrjingg quexbingg ix.

37 Ongg ar, liw si led'ongg ee ongg, tnidingw ee Siongrder ixqing’ jiong' qokdo, quanvingr, linglik, ingqngx sniuxsur liw;

38 Qniwnarr langg kiarkiw ee soxjai, lenrr snua'iaw ee jauxsiur, kongdiongx ee vuejiauw, Ix longxx qauhur liw ee ciuw, hro liw jiangxquanw jiaxee itcer; liw dyrr si hitt xee qimx ee taukag.

39 Liw ixau beh qycc hingx kiw jit qog m dat diyc liw; qycc u derr snax qog, dyrr si dangg :ee, beh jiangxquanw tnie.

40 Derr sir qog beh qending cincniu tih; tih e pah puar banrmic hro ix hanghok; qycc cincniu tih deh cruir itcer, ix iarr beh pah puar ledqog deh cruir inx.

41 Liw iarr knuar qnir ix ee kavnuaa qapp kajngxtauu-aw, jidvnuar si siyx huii ee too, jidvnuar si tih, hitt xee qog iarr beh vunx kuix; jongwsirr liw knuar qnir tih qapp nuartoo sna' camx, jitt xee qog iarr beh u tih ee lat.

42 Hiaxee kajngxtauu-aw qiwzenn jidvnuar si tih jidvnuar si too, anxnix hitt xee qog beh jidvnuar qiongg, jidvnuar ziok.

43 Liw qiwzenn knuar qnir tih qapp nuartoo sna' camx, inx beh qapp langg ee jiongxjok sna' camx. Jongwsirr zirviw be sna' hap, cincniu tih qapp too be sna' camx .did.

44 Dng' hiaxee led'ongg ee zit, tnidingw ee Siongrder beh setlip jit qog, ingxuanw be huewbyy, ix ee quanvingr be e qruix dirr vadd qog; jongwsirr ix beh huixhuai hiaxee qog laii bet ix; qaqi beh ingxuanw kia jai.

45 Liw qiwzenn knuar qnir u jiyc dui' snuax nirr pah .cud .laii, m si ing ciuw pah :ee, laii pah puar hitt xee tih, dangg, too, ginn, qimx; dyrr si jiww dua ee dairjir jixsi ongg; hitt xee bang si jinx, hitt xee quexbingg si kaksit."

46 Dngsii Nebuqadnezar Ongg pag dirr de nirr, vair Daniel; bingrling ing lexmic pangliau henr hro ix.

47 Ongg rinr Daniel, duiww ix qongw, "Liw ixqing’ e henxbingg jitt xee viwbit ee su, linw ee Siongrder jinjniar si jiaxee siongrder ee Siongrder, jiaxee ongg ee Jruw, qycc si henxbingg hiaxee viwbit :ee."

48 Dui' hitt diap ongg qysingx Daniel, sniuxsur ix jerje siongrpinw ee lexmic, pair ix quanxliw Babylon juann singw; qycc juer jongxliw laii jiangxquanw Babylon itcer diwhui ee langg.

49 Daniel qriuu ongg, ongg dyrr pair Sadlac, Mesac, Abednego quanxliw Babylon Singw ee surbu; dogdok Daniel qinsuii dirr ongqiongx.

3 Nebuqadnezar Ongg jy qimsiong, quann lak-jap dxng, kuah lak dxng; cai dirr Babylon Singw, Dorlac ee vni'ngiuu.

2 Nebuqadnezar Ongg diauwjip jiaxee jongxdog, kimcex, sunbuw, anwcatsix, vowjingwsix, bosu, huatqnuax, qapp qokk singw ee qnua'uann laii hur Nebuqadnezar Ongg soxx lip ee sxiong, qniaa diamxganw ee lew.

3 Dui' anxnix, hiaxee jongxdog, kimcex, sunbuw, anwcatsix, vowjingwsix, bosu, huatqnuax, qapp qokk singw ee qnua'uann longxx jurjip, uirdiyhh Nebuqadnezar soxx lip ee sxiong, qniaa diamxganw ee lew, dyrr kia dirr Nebuqadnezar soxx lip ee sxiong ee taujingg.

4 Hitt sii tuann bingrling :ee dua sniax qiyr qongxx, "Linw jiaxee vecsnir, jiaxee qog, jiaxee kniukauw ee langg ar, u bingrling tuann hro linw.

5 Linw jid'err tniax qnir sauwqag, dat'aw, vivee, kimm, srig, singx, qapp dagg ngiu gagkir ee sniax, dyrr diyhh pag lyc qingwvair Nebuqadnezar Ongg soxx lip ee qimsiong;

6 Qniwnarr byy pag lyc qingwvair :ee beh jiksii hed lyc dirr iamrzet ee huexloo."

7 In'ui anxnix jiongww vecsnir jid'err tniax qnir sauwqag, dat'aw, vivee, kimm, srig, qapp dagg ngiu gagkir ee sniax, dyrr jiaxee vecsnir, jiaxee qog, jiaxee kniukauw ee langg longxx pag lyc qingwvair Nebuqadnezar Ongg soxx lip ee qimsiong.

8 Hitt sii u quixnarr xee Qaldealangg jinwjingg laii qryr Judahlangg.

9 Inx duiww Nebuqadnezar Ongg qongw, "Guan ongg banrsuer.

10 Ongg ar, liw bad cud lring qongxx qniwnarr langg tniax qnir sauwqag, dat'aw, vivee, kimm, srig, singx, qapp dagg ngiu gagkir ee sniax, longxx diyhh pag lyc qingwvair qimsiong;

11 Qniwnarr byy pag lyc qingwvair :ee beh hed lyc dirr iamrzet ee huexloo.

12 Dnaxx u quixnarr xee Judahlangg, dyrr si liw soxx pair quanxliw Babylon Singw ee surbu :ee, Sadlac, Mesac, Abednego. Ongg ar, jiaxee langg byy iauwqinw liw ee ue, m hogsai liw jiaxee siongrder, iarr m qingwvair liw soxx lip ee qimsiong."

13 Hitt sii Nebuqadnezar dua siurkir qaur qik, bingrling jiong' Sadlac, Mesac, Abednego duar .laii. Inx dyrr jiong' jiaxee langg duar qaur ongg ee bingrjingg.

14 Nebuqadnezar mng inx qongxx, "Sadlac, Mesac, Abednego, linw byy hogsai guaw jiaxee siongrder, iarr byy qingwvair guaw soxx lip ee qimsiong si diauqowir mah?

15 Dnaxx linw qycc tniax qnir sauwqag, dat'aw, vivee, kimm, srig, singx, qapp dagg ngiu gagkir ee sniax, narr ven ven pag lyc qingwvair guaw soxx jy ee sxiong dyrr hyw; jongwsirr linw narr m qingwvair, beh jiksii hed linw lyc iamrzet ee huexloo; u simxmih siongrder beh qiur linw tuatli guaw ee ciuw ar?"

16 Sadlac, Mesac, Abednego rinr qongxx, "Nebuqadnezar ar, jitt xee su guanw mrbenw rinr liw.

17 Qyxzenn anxnix, guanw soxx hogsai ee Siongrder e qiur guanw cud iamrzet ee huexloo; ongg ar, Ix iarr beh qiur guanw tuatli liw ee ciuw.

18 Narr byy anxnix, ongg ar, liw diyh jaix guanw quatduanr byy beh hogsai liw jiaxee siongrder, iarr byy beh qingwvair liw soxx lip ee qimsiong.

19 Hitt sii Nebuqadnezar muaxsimx siurkir, duiww Sadlac, Mesac, Abednego vniwbin, bingrling langg kiw huexloo viw vingsiongg cid vxue kacc zet.

20 Iarr bingrling qundui diongx iongxbingw :ee quixnarr langg vak Sadlac, Mesac, Abednego, hed dirr iamrzet ee huexloo.

21 Inx hiaxee langg siurr vak, iuguann cing kor, pxaur, qapp lairsnax, qapp qi'uu e snxax, hed dirr iamrzet ee huexloo.

22 In'ui ongg ee bingrling jin' qinxqib, huexloo qycc jin' zet, hiaxee liac Sadlac, Mesac, Abednego, hitt snax xee langg longxx hro huexjic siyx siw.

23 Sadlac, Mesac, Abednego, hitt snax xee langg longxx siurr vak, duirlyc dirr iamrzet ee huexloo.

24 Hitt sii Nebuqadnezar Ongg gonggniac, qinw qinw kiw .laii, duiww ix ee bosu qongw, "Lanw qamxx m si vak snax langg, hed dirr huew nirr mah?" Inx rinr ongg qongxx, "Ongg ar, si ar."

25 Ongg qongw, "Knuar ar, guaw knuar qnir u sir xee langg, vingrr byy siurr vak, qniaa dirr huew-diongx, iarr byy siursiongx; hitt xee derr sir xee iongmau si cincniu siongrder ee qniaw."

26 Dui' hitt diap Nebuqadnezar qniaa qin iamrzet ee huexloo kauw; qiyr qongxx, "Jiww quann ee Siongrder ee lovok, Sadlac, Mesac, Abednego, cud .laii, laii qaur jiax." Sadlac, Mesac, Abednego dyrr dui' huew-diongx cud .laii.

27 Hiaxee jongxdog, kimcex, sunbuw, qapp ongg ee bosu snaqab jurjip, knuar qnir hitt snax langg, huew byy lat tangx hai inx ee sinkux, inx ee taumngg iarr byy siyx .diyc, snakor byy venwngua, inx iarr longxx byy cauxhuexbi.

28 Nebuqadnezar qongw, "Sadlac, Mesac, Abednego ee Siongrder si ingqaix ylyw :ee, in'ui Ix crex Ix ee suwjiaw jinxqiur hiaxee uaxkyr Ix ee lovok, inx huanxduir ongg ee bingrling, vangwsag qaqi ee sinkux, dirr inx qaqi ee Siongrder ixgua m kingw hogsai, qingwvair vadd xee siongrder.

29 Soxiw guaw cud lring, jiaxee vecsnir, jiaxee qog, jiaxee kniukauw ee langg, qniwnarr setdok Sadlac, Mesac, Abednego ee Siongrder, beh jiong' inx ee cur juer vunwsywduix; in'ui byy vadd xee siongrder e qiur langg cincniu anxnix."

30 Hitt sii ongg dirr Babylon Singw qysingx Sadlac, Mesac, Abednego.

4 Nebuqadnezar Ongg vanjiaur hro tnie jiaxee vecsnir, jiaxee qog, jiaxee kniukauw ee langg, qongw, "Guan linw dau hiongxsiu ving'anx.

2 Jiww quann ee Siongrder soxx qniaa dirr guaw ee sinziah qrii su, guaw hnuahiw suanvor.

3 Dua ar, Ix ee sinziah! Hongsing ar, Ix ee qrii su! Ix ee qog si ingxuanw ee qog, Ix ee quanvingr qaur dairdai.

4 Guaw Nebuqadnezar dirr guaw ee cur, anzenn kiarkiw dirr guaw ee ongqiongx enwlok.

5 Guaw bang qnir jit xee bang hro guaw qniahniaa; guaw dirr bincngg nirr ee susiongw qapp simlai ee ngirsiong hro guaw vecvag.

6 Soxiw guaw cud lring driaur Babylon itcer diwhui ee langg qaur guaw ee binrjingg, qiyr inx quexbingg hitt xee bang hro guaw jaix.

7 Dui' anxnix hiaxee poksu, sudsu, Qaldealangg, jiamvog :ee longxx zip .laii; guaw jiong' hitt xee bang dngbin qra inx qongw; jongwsirr inx byy quexbingg hro guaw jaix.

8 Lorbuew u Daniel, jiauww guaw ee siongrder ee miaa cxingx juer Beltesazar :ee, qaur guaw ee binrjingg, ix ee simlai u jiaxee sxingr ee siongrder ee sinn;

9 Guaw ing bang qra ix qongw, 'Poksurdniuw, Beltesazar ar, in'ui guaw jaix liw ee simlai u jiaxee sxingr ee siongrder ee sinn, byy jit hxang viwbit ee su hro liw uilann. Dnaxx diyhh jiong' guaw bang-diongx soxx knuar .qnir ee ngirsiong qapp ix ee quexbingg laii qra guaw qongw.'

10 Guaw dirr cngg nirr simlai ee ngirsiong si jiaxee; guaw decc knuar, knuar qnir de ee diongqanx u jit jangg ciu, qigqii quann.

11 Hitt jangg ciu jiamrjiam dua qycc qenqor, quann qaur duw tnix, de ee qigtauu iarr e knuar .qnir.

12 Ix ee hiyc borsing, quexjiw jin' je, hitt lairbin u jiongwsingx ee jiahmic; can'iaw ee jauxsiur druar dirr ix ee imwngw, kongdiongx ee vuejiauw hiyh dirr ix ee qix, qniww u hetkir :ee dui' ix did diyc jiac.

13 Guaw dirr bincngg, dirr guaw simlai ee ngirsiong, knuar qnir u jit xee siuxbang, qycc si sxingr :ee, dui' tnix .lyc .laii.

14 Dua sniax qiyr qongxx, 'Cyr hitt jangg ciu, kamr ix ee qix, iyy lag ix ee hiyh, pacsnuar ix ee quexjiw, hro jauxsiur lirkuix ix ee erbin, hro vuejiauw lirkuix ix ee qix.

15 Jongwsirr diyhh lauu ix ee qintauu dirr de nirr, ing tih qapp dangg ee kuann vak ix, dirr cann nirr sinx huad ee cauw-diongx; ing tnix ee lorjuiw sipdamm ix, iarr hro ix qapp jauxsiur u hxun dirr derjniu ee cauxdniuu;

16 Hro ix ee simx venr juer m si langg ee simx, iarr ing sriur ee simx hro ix, hro ix ligquer cid xee siqii.

17 Jex si jiaxee siuxbang :ee soxx dniardiyc ee bing, jiaxee sxingr :ee soxx cud ee lring; hro jiongwsingx jaix, Jiww quann :ee jiangxquanw langg ee qog, iarr jiauww qaqi ee iwsur ing qog sniuxsur langg, iarr ing jiww biser ee langg setlip juer jruw.'

18 Jex si guaw Nebuqadnezar ongg soxx knuar .qnir ee bang; Beltesazar ar, liw diyhh quexbingg ix, in'ui guaw qog-lai itcer diwhui ee langg longxx be e quexbingg hro guaw jaix; jixu liw e, in'ui linw simlai u hiaxee sxingr ee siongrder ee sinn."

19 Hitt sii cxingx juer Beltesazar ee Daniel gonggniac u hiacc quw, simlai vecvag. Ongg duiww ix qongw, "Beltesazar ar, mrbenw uirdiyhh hitt xee bang qapp ix ee quexbingg laii vecvag. Beltesazar dyrr rinr qongxx, "Guan hitt xee bang qruix dirr unawhun liw :ee, hitt xee qeuxbingg qruix dirr liw ee duiwdik.

20 Liw soxx knuar .qnir ee ciu, jiamrjiam dua qycc qenqor, quann qaur duw tnix, de ee qiktauu iarr e knuar .qnir;

21 Ix ee hiyc borsing, ix ee quexjiw jin' je, hitt lairbin u jiongwsingx ee jiahmic, can'iaw ee jauxsiur druar dirr ix ee erbin, kongdiongx ee vuejiauw hiyh dirr ix ee qix.

22 Ongg ar, jitt jangg ciu dyrr si liw, liw jiamrjiam dua qycc qenqor; liw ee qiongdua jiamrjiam jinwvo qaur duw tnix, liw ee quanvingr qaur dirr derqik.

23 Ongg qiwzenn knuar qnir u jit xee siuxbang qycc si sxingr :ee, dui' tnix lyc .laii, qongw, 'Diyhh cyr hitt jangg ciu laii huixhuai ix; jongwsirr diyhh lauu ix ee qintauu dirr de nirr, ing tih qapp dangg ee kuann vak ix dirr cann nirr sinx huad ee cauw-diongx; ing tnix ee lorjuiw sipdamm ix, iarr hro ix qapp jauxsiur u hxun, ligquer cid xee siqii.'

24 Ongg ar, hitt xee quexbingg si anxnix, qycc Jiww quann :ee ee bingrling beh qaur guaw ee ongg, guaw ee jruw, iarr si anxnix;

25 Liw beh siurr qnuaw cud lirkuix langg, qapp can'iaw ee jauxsiur snaqab kiarkiw, iarr beh hro liw jiac cauw cincniu guu, hro tnix ee lorjuiw sipdamm, iarr beh ligquer cid xee siqii, qaur liw jaix Jiww quann :ee jiangxquanw langg ee qog, iarr jiauww qaqi ee iwsur ing qog sniuxsur langg.

26 Inx qiwzenn huanhur ciu ee qintauu diyhh lauu lehh; qaur liw jaix jiaxee tnix decc jiangxquann ee sii, dyrr liw ee qog vitdnia qycc qruix dirr liw.

27 Ongg ar, dnaxx qriuu liw hnuahiw jiaplap guaw ee koxkngr, ing qniaa qonggi laii duanrjuat liw ee juerquar, ing linbinw songwhionglangg laii druu kir liw ee quewsid; qiamxcaiw liw ee ving'anx e quxdngg."

28 Jiaxee su longxx ingwgiam dirr Nebuqadnezar Ongg.

29 Qaur jap-zi guec muaw, ix qnia'iuu dirr Babylon ee ongqiongx.

30 Ongg qongw, "Jex qamxx m si dua ee Babylon, guaw ing guaw dua lat ee qxuann, iarr uirdiyhh guaw ee uigiamm ee ingqngx laii kiw :ee, juer vunxqog ee qiongden mah?"

31 Jitt xee ue iauxquxx dirr ongg ee cuir ee sii, u sniax dui' tnix lyc .laii, qongw, "Nebuqadnezar Ongg ar, u ue qra liw qongw, qok'ui ixqing’ lirkuix liw lar.

32 Liw beh siurr qnuaw cud lirkuix langg, qapp can'iaw ee jauxsiur snaqab kiarkiw, iarr jiauww qaqi ee iwsur ing qog sniuxsur langg."

33 Dyrr hitt sii dairjir ingwgiam dirr Nebuqadnezar; ix siurr qnuaw cud liwkuix langg, jiac cauw cincniu guu, sinkux hro tnix ee lorjuiw sipdamm, qaur ix ee xmngg huad cincniu ingjiauw ee xmngg, ix ee jngxqah dngg cincniu jiauw ee ziauw.

34 Hiaxee sizit ixqing’ muaw, guaw Nebuqadnezar giahbak ngr tnix, guaw ee lingsingr dyrr qycc hogdyr, guaw dyrr jioksia Jiww quann :ee, ylyw jun'ingg Ingxuac :ee; in'ui Ix ee qxuann si ingxuanw ee qxuann, Ix ee qog qaur dairdai.

35 Derjniu kiarkiw ee vecsnir Ix knuar juer byy; dirr tnix nirr ee qundui qapp derjniu kiarkiw ee vecsnir diongx, Ix longxx jiauww qaqi ee iwsur qniaa dairjir; byy langg e joxdongr Ix ee ciuw, iacc si mng Ix qongxx, liw juer simxmih ar?

36 Hitt sii guaw ee lingsingr qycc hogdyr, guaw ee uigiamm ing'iau qycc qruix dirr guaw, juer guaw ee qog ee ingqngx; guaw ee bosu qapp dairsinn iarr laii diauqnir guaw; guaw ee qok'ui qycc qenqor, dua quanvingr qycc qetnix dirr guaw.

37 Dnaxx guaw Nebuqadnezar ylyw junqingr, cinghox tnidingw ee Ongg; in'ui Ix soxx juer :ee longxx jinsit, Ix soxx qniaa :ee longxx qongvingg; hiaxee qniaa dirr qiaugno :ee, Ix e qra inx qangwqe.

5 Belsazar Ongg sed dua ensiac, cniaw ix ee dairsinn jit-cingx langg; dirr hitt jit-cingx langg ee binrjingg limx jiuw.

2 Belsazar kixtauu limx jiuw ee sii, huanhur langg jiong' ix ee laurve Nebuqadnezar dui' Jelusalem ee dxen-lai soxx cniuw qimginn ee kiwqu tec .laii, hro ongg qapp ix ee dairsinn ixqip ix ee horhuix tangx ing jiaxee limx jiuw.

3 Inx dyrr jiong' soxx cniuw Jelusalem Siongrder ee cur dxen-lai qimx ee kiwqu tec .laii; ongg qapp dairsinn qapp horhuix ing ix laii limx.

4 Inx limx jiuw, ylyw inx qimx, ginn, dangg, tih, caa, jiyc ee siongrder.

5 Dng' hitt sii u langg ee ciuxjngxtauu-aw cuthen, siaxzi dirr ongqiongx ee hunxviah, dingdaii sna' duir ee soxjai; ongg knuar qnir siaxzi ee ciuw.

6 Ongg ee bin dyrr sitsig, simlai vecvag, iyqud ludlunn, katau'ux sna' kap.

7 Ongg dua sniax bingrling driaur hiaxee sudsu, Qaldealangg, jiamvog :ee longxx zip .laii. Ongg duiww Babylon diwhui ee langg qongw, "Knuar simxmih langg e tak jitt xee bunzi, quexbingg hro guaw jaix, guaw beh hro ix cing jxiw sig ee pxaur, amrqunw qruar qimlen, dirr qog-lai jitt xui qux derr snax."

8 Dui' hitt sii ongg itcer diwhuirlangg longxx zip .laii; jongwsirr be e tak hitt xee bunzi, iarr be e quexbingg hro ongg jaix.

9 Belsazar Ongg jin' vecvag, bin sitsig, ix ee dairsinn iarr longxx gonggniac.

10 Ongho in'ui ongg qapp ix ee dairsinn soxx qongw ee ue dyrr zip vran ensiac ee cur; ongho qra ix qongw, "Guan ongg banrsuer; liw ee simx byc did vecvag, bin byc did sitsig.

11 Dirr liw ee qog-lai u jit langg, ix ee simlai u hiaxee sxingr ee siongrder ee sinn; liw ee laurve jairsnix ee zit knuar cud ix ee simlai u qngbingg, cangmiaa, diwhui, cincciu jiaxee siongrder ee diwhui; liw ee laurve Nebuqadnezar Ongg, dyrr si ongg liw ee laurve, setlip ix juer poksu, sudsu, Qaldealangg qapp jiampog :ee ee taulangg;

12 Ix u hyw singwjingg, u diwsig cangmiaa, e uanbang, e kuitiah ywbiau, qaixsig giaugii ee su; jitt langg miaa qiyr Daniel, ongg qycc cxingx ix juer Beltesazar. Dnaxx tangx qiyr Daniel laii, ix beh qra liw quexbingg."

13 Dyrr cua Daniel qaur ongg ee binrjingg. Ongg mng Daniel qongxx, "Liw si siurr liac ee Judahlangg diongqanx ee Daniel, dyrr si guaw ee laurve juer ongg ee sii dui' Judah liac .laii .ee mah?

14 Guaw tniax qnir qongxx liw ee simlai u hiaxee siongrder ee sinn, qycc liw u qngbingg, cangmiaa qapp hyw ee diwhui.

15 Dnaxx hiaxee diwhui ee langg qapp sudsu ixqing’ duar laii guaw ee binrjingg, beh hro inx tak hiaxee bunzi laii quexbingg hro guaw jaix; jongwsirr inx be e quexbingg jitt xee su.

16 Guaw bad tniax qnir liw ee su, liw gauu quexbingg, e qaixsig giaugii ee su; dnaxx liw narr e tak jitt xee bunzi, quexbingg hro guaw jaix, dyrr beh hro liw cing jxiw sig ee pxaur, amrqunw qruar qimlen, dirr qog-lai jitt xui qux derr snax."

17 Daniel dirr ongg ee binrjingg rinr qongxx, "Liw ee jingrpinw tangx qruix dirr liw vunxsinx, liw ee vywsniuw tangx qruix hro vadd langg; jongwsirr guaw beh qra ongg tak jitt xee bunzi, quexbingg hro ongg jaix.

18 Ongg ar, jiww quann ee Siongrder bad jiong' qok'ui, dua qxuann, ing'iau, uihongx sniuxsur liw ee laurve Nebuqadnezar.

19 In'ui Siongrder soxx sniuxsur ix ee dua qxuann, jiaxee vecsnir, jiaxee qog, jiaxee kniukauw ee langg longxx qniahniaa gniauhgniauc cuah dirr ix ee binrjingg; ix dyrr hro langg siw, suiir hro langg uac; suiir qra langg qysingx, suiir qra langg qangwqe.

20 Jongwsirr ix ee simx jurqyx, ix ee singr qonggni, drir qau qniaa qiaugno, dyrr lud ix ee ong'ui, cniuxduat ix ee ingqngx;

21 Ix siurr qnuaw cud lirkuix langg, ix ee simx vniwjniaa cincniu jauxsiur ee simx, qapp iaxluu snaqab kiarkiw; hro ix jiac cauw cincniu guu, sinkux hro tnix ee lorjuiw sipdamm; qaur ix jaix jiww quann ee Siongrder jiangxquanw langg ee qog, jiauww Ix ee iwsur setlip langg dirliw ix.

22 Belsazar ar, liw si ix ee qniaw, liw suizenn jaix jex itcer, liw ee simx byy qaqi kiamvix;

23 Qingwzenn jurqyx, qongqig tnidingw ee Jruw; inx u duar Ix dxen-lai ee kiwqu qaur liw ee binrjingg, iarr liw qapp liw jiaxee dairsinn ixqip liw ee horhuix longxx ing ix laii limx jiuw; liw qycc ylyw hiaxee ginn, qimx, dangg, tih, caa, jiyc soxx juer ee siongrder, dyrr si be knuar, be tniax, be jaix :ee; danrrsi quanw liw ee cuanxkuir, dniardiyc liw jygu ee Siongrder, liw byy ingqngx Ix.

24 Dui' anxnix, dui' Ix ee binrjingg crex cud hitt qix ciuw siaw jitt xee bunzi.

25 Soxx siaw ee bunzi dyrr si jitt xee:

MENE, MENE, TEKEL, PARSIN.

26 Quexbingg dyrr si anxnix: MENE, dyrr si Siongrder ixqing’ sngr liw ee qok'un, hro ix suah.

27 TEKEL, dyrr si liw siurr cinr dirr tenvingg, henxbingg liw ee byy qraur gxiac.

28 PARSIN, dyrr si liw ee qog vunlic, qruix hro Medialangg qapp Persialangg."

29 Dui' anxnix Belsazar cud lring, langg dyrr jiong' jxiw sig pxaur hro Daniel cing, ing qimlen qruar dirr ix ee amrqunw, qycc tuann lring hro ix dirr qog-lai jitt xui qux derr snax.

30 Dirr hitt mii Qaldea Ongg Belsazar hro langg taii.

31 Medialangg Dalius did diyc qok'ui, hitt sii lak-jap-zi huer.

6 Dalius jiauww ix ee iwsur setlip jit-vah-zi-jap xee jongxdog, hro inx hunquanw juann qog,

2 Qycc dirr inx ee dingxbin setlip jongxdniuw snax langg, qidiongx Daniel si jit xee; hro hiaxee jongxdog jiong' jiongww su duiww inx vinxbingg, benw did ongg kuisunw.

3 In'ui jitt xee Daniel u hyw singwjingg, soxiw ngiaa quer qi'uu ee jongxdniuw qapp jongxdog; ongg dyrr sniu beh setlip ix dirliw tong' qog.

4 Dui' anxnix jongxdniuw qapp jongxdog dirr qokjingg diongx cue pang beh qryr Daniel; jongwsirr cue byy ix ee kangpang qapp qeuwsid; in'ui ix jinrdiongx, longxx cue byy ix ee cywgno quewsid.

5 Hiaxee langg dyrr snaqab qongw, "Jitt xee Daniel, druu kir ix tranr ix ee Siongrder ee ludhuad ixgua, lanw byy tangx cue ix ee kangkiah laii qryr ix."

6 Dui' hitt diap hiaxee jongxdniuw qapp jongxdog hunhunx jurjip laii qnir ongg, qongw, "Guan Dalius Ongg banrsuer.

7 Qog-lai jongxdniuw, kimcex, jongxdog, bosu, qapp sunbuw longxx snaqab girlun rair beh sed jit diauu ongg ee le, laii lip jit diauu giamm ee qimwling, dirr snax-jap zit laii, druu kir qriuu ongg ixgua, qniwnarr duiww vutlun simxmih siongrder iacc si duiww langg laii qriuu :ee, diyhh hed ix lyc saihet.

8 Ongg ar, dnaxx qriuu liw setlip hitt xee qimwling, ciamx zri dirr hitt xee jiauwling, hro ix be qexngua .did, jiauww Media qapp Persia ee le, be tangx qaiw .did."

9 Dui' anxnix Dalius ongg ciamx zri dirr hitt xee jiauwling qapp qimwling.

10 Daniel jaix jitt xee jiauwling ixqing’ ciamx zri, dyrr qaur ix ee cur; (ix vangg-lai ee txangx kuix ngr Jelusalem); jit zit snax vaiw qui dirr ix ee Siongrder ee binrjingg qidyw qamxsia, qapp vingzit byy qycngiu.

11 Jiaxee langg dyrr hunhunx jurjip, knuar qnir Daniel dirr ix ee Siongrder ee binrjingg qidyw kunxqiuu.

12 Inx dyrr qaur ongg ee binrjingg, tee kiw ongg ee qimwling, qongw, "Ongg ar, dirr snax-jap zit-lai druu kir qriuu ongg ixgua, qniwnarr duiww vutlun simxmih siongrder iacc si duiww langg laii qriuu :ee, diyhh hed ix lyc saihet, liw qamxx m si ciamx zri dirr jitt xee jiauwling mah?" Ongg rinr qongxx, "Jitt xee su sidjai u, jiauww Media qapp Persia ee le, be tangx qaiw .did."

13 Inx dirr ongg ee binrjingg rinr qongxx, "Ongg ar, dirr Judah-jok siurr liac :ee ee diongqanx hitt xee Daniel byy liac liw qapp liw soxx ciamx zri ee qimwling juer iauwqinw; ix qingwzenn jit zit snax vaiw qidyw."

14 Ongg tniax qnir jiaxee ue, jinrjai huanlyw, liusimx beh qiur Daniel, diddit sniu qiur ix ee huatdo qaur zit lyc.

15 Jiaxee langg dyrr hunhunx jurjip laii qnir ongg, qra ongg qongw, "Ongg ar, diyhh jaix Medialangg qapp Persialangg u le, qniwnarr ongg soxx lip ee qimwling qapp ludle longxx be qexngua .did."

16 Ongg dyrr cud lring, langg dyrr duar Daniel laii, hed ix dirr saihet. Ongg duiww Daniel qongw, "Liw ee Siongrder, liw soxx siongsiongg hogsai :ee, Ix beh qiur liw."

17 Langg vnuax jiyhtauu laii he dirr het-kauw; ongg ing qaqi ee inr qapp dairsinn ee inr hongbat ix, hro Daniel ee dairjir longxx be qexngua .did.

18 Ongg dyr kir qiongx-lai, tong' mii qimwjiac; byy langg jokgak dirr ix ee binrjingg, ix iarr be kunr .did.

19 Qeh jaxkiw ongg jaw jaw kiw .laii, qinw qinw kir qaur saihet.

20 Jiongqin het-vnix, cud aisiongx ee sniax qiyr Daniel; ongg duiww Daniel qongw, "Ingxuac Siongrder ee lovok, Daniel ar, liw ee Siongrder, liw soxx siongsiongg hogsai :ee, e qiur liw tuatli hiaxee sraix mah?"

21 Daniel duiww ongg qongw, "Guan ongg banrsuer.

22 Guaw ee Siongrder crex Ix ee suwjiaw, nic jiaxee sraix ee cuir, hro inx byy sionghai guaw; in'ui guaw dirr Ix ee binrjingg byy jue; ongg ar, guaw dirr liw ee binrjingg iarr byy qniaa kikkuix liw ee su."

23 Ongg uirdiyhh anxnix hnuahiw qaur qik, bingrling langg cruw Daniel cud het. Dui' anxnix cruw Daniel cud het; ix ee sinkux longxx byy siursiongx, in'ui ix uaxkyr ix ee Siongrder.

24 Ongg dyrr cud lring, langg dyrr jiong' hiaxee qryr Daniel ee langg, lenrr inx ee boxqniaw, longxx duar .laii, het lyc saihet; inx iauxx bue qaur het-drew; sriax dyrr sap inx, qa cruir inx ee quttauu.

25 Hitt sii Dalius Ongg vanx jiauwling hro juann de hiaxee vecsnir hiaxee qog, hiaxee kniukauw ee langg, qongw, "Guan linw dua dua hiongxsiu ving'anx.

26 Dnaxx guaw cud lring, huanhur guaw soxx quanxhad tong' qog vecsnir diyhh dirr Daniel ee Siongrder ee binrjingg qniahniaa gniauhgniauc cuah, in'ui Ix si uac ee Siongrder, dngdngg dilehh, Ix ee qog ingxuanw byy bet, Ix ee quanvingr buqiongg bujin;

27 Ix qniaa jinxqiur, dirr tnix nirr dirr de nirr qniaa sinziah qrii su; Ix u qiur Daniel tuatli sraix ee cuir."

28 Anxnix jitt xee Daniel dirr Dalius jerui ee sii qapp Persialangg Kylus jerui ee sii, longxx did diyc hingtongx.

7 Dng' Babylon Ongg Belsazar guannii, Daniel dirr cngg nirr u bang .qnir, simlai knuar qnir ngirsiong; ix dyrr siaw hitt xee bang, qongw kiw qidiongx ee dairir.

2 Daniel qongw: Guaw mii .sii knuar qnir ngirsiong; knuar ar, tnix nirr siwbin ee hongx hutzenn kiw, cuex dirr duarhaiw ee dingxbin.

3 U sir jiah sriur, jin' dua jiah, dui' haiw nirr kiw .laii, kuanxsid qokk byy snadangg.

4 Tauu jit jiah cincniu sraix, u ingjiauw ee sxit; guaw knuar qnir qaur ix ee sxit siurr vuic .kiw .laii cincniu langg jidngiu, iarr hro ix u langg ee simx.

5 Knuar ar, qycc jit jiah sriur si derr zi jiah, cincniu himm, tingxkiw ix sintew ee jit vingg, ix ee cuir-lai u snax qix hiabqud, qamm dirr cuiwkiw diongx; inx qra ix qongw, "Kiw .laii, tunjiac jerje bah."

6 Au .laii guaw qycc knuar knuar lehh, qycc u jit jiah sriur, kuanxsid cincniu var, qajiah u sir xee sxit, cincniu jiauw; jitt jiah sriur u sir xee taukag, qycc u quanvingr hro ix.

7 Au .laii guaw dirr mii .sii ee ngirsiong diongx decc knuar, knuar ar, u derr sir jiah ee sriur, tangx qniax tangx lunw, iarr si vutjiw qiongg; u dua qix ee tickiw, ix tunqa tiah cruir, soxx cunx :ee ing kax dac ix; qapp ixjingg hiaxee sriur qycngiu; qycc huad jap qix qag.

8 Guaw decc knuar hiaxee qag, knuar ar, hitt diongqanx u lingrgua huad jit qix ser qix qag; jiongjenn hiaxee qag ee diongqanx u snax qix qag hamm qinx vuic .kiw .laii dirr ser qix qag ee taujingg; knuar ar, jitt qix qag u bagjiux cincniu langg ee bagjiux, qycc u cuir decc qongw duarue.

9 Guaw qycc knuar qaur hiaxee jyrui vailet, u jit xee dui' qoxjaw dyrr u :ee jre lehh; ix ee ihok vec cincniu seh, ix ee taumngg cincniu jin' cingkir ee ngiumngg; ix ee vyxjy dyrr si huexiam, ix ee lunn cincniu huew decc dyc.

10 U huew cincniu kex huad cud lrauu dirr ix ee binrjingg; hogsai ix :ee u cingcingx, qinsuii dirr ix ee binrjingg u banrban; simxpnuar ee su longxx ven, ceh longg henx kuix.

11 Hitt sii guaw in'ui hitt qix qag soxx qongw duarue ee sniax dyrr knuar ix; knuar qaur hitt jiah sriur siurr taii, ix ee sintew siurr huixhuai, hed dirr huew nirr siyx.

12 Lun qaur qi'uu jiaxee sriur, ix ee qxuann longxx sitlyc, jongwsirr inx ee sniwmia iauxx lauu lecc qaur dirr dniardiyc ee sii, dniardiyc ee zidqii.

13 Guaw dirr mii .sii ee ngirsiong diongx decc knuar, knuar ar, u jit xee cincniu langg ee kuanw jre tnidingw ee hunn laii qaur dirr hitt xee dui' qoxjaw dyrr u :ee, inx dyrr cua ix qaur ix ee binrjingg.

14 Dyrr sniuxsur ix u quanvingr, ingqngx, qok'ui, hro banrvecsnir, banrqog, banrkniukauw ee langg longxx hogsai ix; ix ee quanvingr si ingxuanw ee quanvingr, be e byy .kir, ix ee qok'ui dikkag byy huewbyy.

15 Guaw Daniel simsinn dirr guaw ee liarbin iubun, simlai ee ngirsiong hro guaw vecvag.

16 Guaw dyrr kir cue hiaxee kia dirr vnix:a jit xee, mng ix jiaxee su ee sidjai. Ix dyrr duiww guaw qongw, iarr quexbingg hiaxee su hro guaw jaix.

17 Hitt sir jiah dua sriur si sir xee ongg, beh dui' derjniu hingx kiw.

18 Jongwsirr Jiww quann :ee sxingr ee vecsnir beh did diyc qok'ui, dngdngg jiangxliw qokquann, ingxuanw byy suah.

19 Hitt sii guaw rair jaix derr sir jiah sriur ee sidjai, ix qapp inx hiaxee sriur qycngiu, vutjiw tangx qniax, ix ee cuiwkiw si tih :ee, ix ee ziauw si dangg :ee; ix tunqa tiah cruir, soxx cunx :ee ing kax dac ix;

20 Qycc rair jaix ix taukag soxx huad jap qix qag ee sidjai, qapp hitt qix lingrgua huad ee qag, hro snax qix qag lag lyc dirr ix ee taujingg, dyrr si u bagjiux, u cuir qongw duarue ee qag, ix ee kuanxsid kacc qiongbingw ix ee danglui.

21 Guaw knuar qnir jitt qix qag qapp sxingr ee vecsnir qaujenr, laii kacc ngiaa inx;

22 Didqaur hitt xee dui' qoxjaw dyrr u :ee laii; qra Jiww quann :ee sxingr ee vecsnir pnuawduanr, qaur singwdoo did diyc qok'ui ee zidqii qaur.

23 Ix anxnix qongw: Derr sir jiah sriur beh juer derjniu ee derr sir qog, ix qapp longxjongw ee qog byy qangg; qycc beh tunqa juann de, beh tunxdac ix, tiah cruir ix.

24 Lun qaur hitt jap qix qag, dyrr si dui' hitt xee qog-lai beh hingx kiw jap xee ongg; au .laii lingrgua u jit xee ongg hingx kiw, qapp jingg hiaxee byy qangg, ix beh hro snax xee ongg hanghok ix.

25 Ix beh qongxue gnoxgik Jiww quann :ee, iarr beh koxcow Jiww quann :ee sxingr ee vecsnir; iarr sniu beh qexngua jecqii, ludhuad; inx beh qaudair ix ee ciuw, ligquer jit sii, qycc nng sii, qycc vnuar sii.

26 Simxpnuawsix beh jerui, inx beh cniuxduat ongg ee qxuann, huixhuai ix, bedbyy ix qaur tetdew.

27 Poxtnie ee qok'ui, quanvingr, qapp ledqog ee uiquann longxx qaux hro Jiww quann :ee sxingr ee vecsnir; Ix ee qog si ingxuanw ee qog, qniwnarr u quann :ee longxx beh hogsai sunrtanr Ix.

28 Jitt xee dairjir qaur jiax qetqiok; guaw Daniel simlai sniu, dyrr vecvag, bin iarr venr sig; jongwsirr guaw ing jitt xee su kngr dirr simlai.

8 Belsazar Ongg jerui derr snax nii, qycc u ngirsiong cuthen hro guaw Daniel knuar .qnir, dyrr si dirr guaw tauu jit vaiw knuar .qnir ee ngirsiong ee liauxau.

2 Guaw knuar qnir ngirsiong, knuar .qnir ee sii si dirr Elam Singw Susa ee qiongden. Guaw knuar qnir ngirsiong si dirr Ulai ee hyy-vnix.

3 Guaw giahbak decc knuar, knuar ar, u qangx ee mingiuu kia dirr hyy ee taujingg, ix u nng qix qag; nng qix qag longxx quann; jitt qix kacc quann hitt qix; kacc quann :ee duewbuew huad.

4 Guaw knuar qnir hitt jiah qangx ee mingiuu ngr saix ngr vag ngr lamm laii dag; byy jit jiah sriur e kia jai dirr ix ee binrjingg, iarr byy jit xee e qiur cud ix ee ciuw; ix cutjai iwsur qniaa qaqi juer dua.

5 Guaw decc sniu ee sii, knuar ar, u jit jiah qangx ee snuangiuu dui' saisir laii, venww qniaa juann de, kax byy dac diyc de; jitt jiah snuangiuu dirr ix nng luiw bagjiux ee diongngx u jit qix jin' hniaxbak ee qag.

6 Ix kir qaur u nng qix qag qangx ee mingiuu hiax, dyrr si guaw soxx knuar qnir kia dirr hyy ee taujingg :ee, huad dua siurkir, jauw kir cue ix.

7 Guaw knuar qnir ix uaw qin qangx ee mingiuu, ngr ix huad dua siurkir, dag hitt jiah mingiuu, pacjic ix nng qix qag, mingiuu byy lat tangx kia dirr ix ee binrjingg; ix dyrr hro ix dyw dirr de nirr, tunxdac ix; byy jit xee e qiur mingiuu cud ix ee ciuw.

8 Hitt jiah snuangiuu qaqi juer jin' dua; dng' ix qiongbingw ee sii, hitt qix dau qix qag duw diyc pacjic, u huad sir qix hniaxbak ee qag ter ix, ngr tnix siwbin ee honghiongr.

9 Inx diongqanx jit qix qycc huad cud jit qix ser qix qag, jniaa juer jin' dua, ngr lamm, ngr dangx, ngr ing'iau ee de.

10 Ix jniaa juer quandua qaur tnix ee qundui; jiong' qundui qapp cnisinn quixnarr xee hed lyc de nirr, tunxdac ix.

11 Qycc ix qaqi juer quandua qaur dirr qundui ee juxjnaiw, druu kir dagg zit soxx henr hro ix ee siyjer, huixhuai ix ee sxingr sow.

12 Uirdiyhh juerquar ee enqor u qundui qapp zidzit soxx henr ee siyjer qauhur ix; ix jiong' jinliw hed dirr de nirr, cutjai iwsur laii qniaa, byy m hingtongx.

13 Guaw tniax qnir u jit xui sxingr :ee decc qongxue, qycc u jit xui sxingr :ee duiww hitt xui decc qongxue :ee qongw, "Jitt xee ngirsiong, dyrr si lun qaur zidzit soxx henr ee siyjer qapp drir qaur honghuer ee juerog, hro sxingr sow qapp qundui siurr tunxdac, beh qaur simxmih sii ar?"

14 Ix qra guaw qongw, "Qaur nng-cingx snax-vah mizit, sxingr sow dyrr beh did diyc cingkir."

15 Guaw Daniel, guaw u knuar qnir jitt xee ngirsiong, rair beh bingvik hitt xee iwsur, hitt sii hutzenn u jit xui cincniu langg ee kuanxsid kia dirr guaw ee binrjingg.

16 Guaw qycc tniax qnir Ulai Hyy siangvingg hnua ee diongqanx u langg ee sniax qiyr qongxx, "Gabliel ar, diyhh hro jitt langg bingvik jitt xee ngirsiong."

17 Ix dyrr laii qaur guaw kia lehh ee soxjai; ix jid'err laii, guaw dyrr qniahnia; pag dirr de nirr; ix qra guaw qongw, "Zinjuw ar, liw diyhh bingvik; in'ui jitt xee ngirsiong si quanhe dirr buadqii."

18 Ix qapp guaw qongxue ee sii, guaw ee bin pag dirr de nirr, kunr dang binn; ix dyrr bongx guaw, huu guaw kiw laii kia.

19 Ix qongw, "Knuar ar, guaw beh hro liw jaix siurkir ee buadqii soxx beh u ee su; in'ui jitt xee si quanhe dirr lorbuew soxx dniardiyc ee sii.

20 Liw soxx knuar qnir qangx ee mingiuu, u nng qix qag :ee, dyrr si Media qapp Persia nng xee ongg.

21 Hitt jiah dngg xmngg qangx ee snuangiuu dyrr si Gleek Ongg; ix nng luiw bagjiux diongx ee dua qix qag dyrr si tauu jit xee ongg.

22 Lun qaur hitt qix pacjic ee qag, dui' ix ee drew qycc huad cud sir qix qag; anxnix u sir qog beh dui' ix ee qog hingx kiw, jongwsirr quanlik be viw did ix.

23 Hiaxee qog ee buadqii, langg ee juerog quanwmuaw, beh u jit xee ongg hingx kiw, binrmau hiong'og, gauu ing kuixket ee ue.

24 Ix ee quanvingr jniaa juer dua, jongwsirr m si dui' qaqi ee quanvingr; ix beh qniaa huisiongg ee huixbet, iarr si hingtongx, qycc jiauww qaqi ee iwsur laii qniaa; qycc beh huixbet u quanlik :ee ixqip sxingr ee vecsnir.

25 Ix ing qewboo hro ix kuixket ee cniuxdnua hingtongx; simlai qaqi juer dua; huixbet jerje langg dirr inx byy dihongg ee sii; qycc beh kiw laii qongqig banrongg ee Ongg; jongwsirr ix beh siurr huixhuai, m si ing langg ee ciuw.

26 Jingg soxx qongw ehngx jaxkiw ee ngirsiong si jinx :ee; jongwsirr liw diyhh hongbat hitt xee ngirsiong; in'ui si quanhe jerje zid'au ee su."

27 Dui' anxnix guaw Daniel hunbee, puawvni quixnarr zit; zen'au kiw laii vanrliw ongg ee surbu; guaw in'ui jitt xee ngirsiong gonggniac, byy langg e hiauxdid.

9 Media-jok Asuelo ee qniaw Dalius lip juer Qaldeaqog ee ongg guannii;

2 Dyrr si ix jerui ee guannii, guaw Daniel dui' ceh nirr did diyc jaix hiaxee nii ee siauwgiac, dyrr si Jehovah ee ue limqaur sendix Jelemiah qongw kiw Jelusalem duw diyc honghuer diyhh muaw cid-jap nii.

3 Guaw quat'ir ngr Jruw Siongrder, rair ing qidyw kunxqiuu, qimwjiac, cing muasnax, samw huexhux, laii cue Ix.

4 Guaw qidyw Jehovah, guaw ee Siongrder, laii zin jue, qongw, "Jruw, jiww dua tangx qnia'uir ee Siongrder ar, dyrr si siuw iog six xunx hro qniwnarr tniar Ix, qinxsiuw Ix qaiwbing ee langg :ee;

5 Guanw u huanrjue, jokget, qniaa pnaiw, vuervuan, lirkix Liw ee qaiwbing huatdo;

6 Byy tniax Liw ee lovok jiaxee sendix, dyrr si hrong Liw ee miaa duiww guanw ee qun'ongg, quiwjok, ledjow, qapp qog-lai itcer ee vecsnir qongxue :ee.

7 Jruw ar, qonggi qruix dirr Liw, qenwsiaur qruix dirr guanw, cincniu qinaxzit; dyrr si qruix dirr Judahlangg, qapp Jelusalem ee vecsnir, ixqip Islael jingwlangg, higsi qin :ee, higsi hng :ee, dirr Liw, uirdiyhh inx dikjue Liw, laii qnuaw inx qaur ee dagg qog.

8 Jruw ar, qenwsiaur qruix dirr guanw, qruix dirr guanw ee qun'ongg, quiwjok, ledjow, in'ui guanw dikjue Liw.

9 Guanw suizenn vuergik Jruw, guanw ee Siongrder, jongwsirr linbinw siawjue si jairdirr Ix;

10 Iarr byy tniax Jehovah, guanw ee Siongrder ee ue, laii qniaa Ix tokdiong Ix ee lovok jiaxee sendix soxx vailet dirr guanw ee binrjingg ee ludhuad.

11 Islael juann jok longxx u huan diyc Liw ee ludhuad, qniaa penlo byy tniatanr Liw ee ue; in'ui anxnix, jitt xee jiuwjow, ixqip Siongrder ee lovok Moses ludhuad diongx soxx qir ee jiuwjua, longxx vniar dirr guanw ee sinjniu, in'ui guanw u dikjue Liw.

12 Ix bad qangr dua jaieh hro guanw, laii ingwgiam Ix jingg qingxqair guanw iarr qingxqair simxpnaur guanw sursux ee ue; in'ui dirr poxtnie m bad qniaa cincniu soxx qniaa dirr Jelusalem :ee.

13 Jex itcer ee jaieh limqaur guanw, si jiauww Moses ludhuad diongx soxx qiwjair :ee; jongwsirr guanw iauxx byy qriuu Jehovah, guanw ee Siongrder six xunx, hro guanw uat tauu lirkuix guanw ee juerquar, bingvik Liw ee jinliw.

14 Soxiw Jehovah juwir hro jitt xee jaieh limqaur guanw; in'ui Jehovah guanw ee Siongrder dirr Ix soxx qniaa ee su longxx si qonggi; guanw vingrr byy tniatanr Ix ee ue.

15 Jruw, guanw ee Siongrder ar, Liw bad ing dua quanlingg ee ciuw duar Liw ee vecsnir cud Egipt-de, hro liw u miasniax, cincniu qinaxzit; guanw u huanrjue, guanw u qniaa pnaiw.

16 Jruw ar, qriuu Liw jiauww Liw ee qonggi hro Liw ee siurkir qapp Liw ee dua siurkir uat dngw lirkuix Liw ee sniaa Jelusalem, dyrr si Liw ee sxingr snuax; in'ui dui' guanw ee juerog, qapp guanw ledjow ee juerquar, Jelusalem qapp Liw ee vecsnir hro siwuii ee langg soxx lingziok.

17 Soxiw guanw ee Siongrder ar, dnaxx qriuu Liw tniax Liw ee lovok ee qidyw kunxqiuu; qycc in'ui Jruw ee enqor, hro Liw ee bin ee qngx jiyr Liw pahngx ee sxingr sow.

18 Guaw ee Siongrder ar, qriuu Liw ngr hnirkangx laii tniax, kuix Liw ee bagjiux laii knuar guanw pahngx ee de, qapp ing Liw ee miaa laii cxingx ee sniaa; in'ui guanw henr guanw ee qidyw dirr Liw ee binrjingg, m si in'ui qaqi ee gi, si in'ui Liw ee dua linbinw.

19 Jruw ar, tniax, Jruw ar, siawbenw, Jruw ar, tniax laii qniaa; guaw ee Siongrder, uirr Liw ee enqor byc did encenn, in'ui Liw ee sniaa, Liw ee vecsnir, longxx si ing Liw ee miaa laii cxingx :ee."

20 Guaw decc qongw decc qidyw ee sii, zin guaw ee jue qapp guaw ee vecsnir Islael ee jue, uirdiyhh guaw ee Siongrder ee sxingt snuax henr guaw ee kunxqiuu dirr guaw ee Siongrder Jehovah ee binrjingg;

21 Guaw qidyw ee ue qongw be uann, guaw kixtauu dirr ngirsiong diongx soxx knuar .qnir ee langg, Gabliel, hrong bingrling qinw qinw vuex .laii, iokliok dirr henr ehngjer ee sii, laii bongx guaw.

22 Ix qawsi guaw, qra guaw qongw, "Daniel ar, guaw laii si beh hro liw u diwhui cangmiaa.

23 Liw kixtauu qidyw ee sii, dyrr u bingrling huad cud, dnaxx guaw laii qra liw qongw; in'ui liw dua dua did diyc tiongxair; soxiw liw diyhh sniu jitt xee su, laii bingvik jitt xee ngirsiong.

24 Lun qaur liw ee vecsnir qapp liw ee sxingr sniaa ixqing’ hanrdnia cid-jap xee citzidqii, beh atjiw quewsid, druu jin juerog, qiuwsiok juerquar, inxjinr ingxguanw ee gi, hongbat ngirsiong qapp camwgiw, qycc ing iuu buah jiww sxingr :ee.

25 Soxiw liw diyhh jaix diyhh bingg, dui' cud bing dingsinx kixjy Jelusalem didqaur siurr buah iuu ee zinqunx ee sii, beh u cid xee citzidqii; qycc lak-jap-zi xee citzidqii; dng' dirr qanlann ee sii, ix qapp quelo qapp hyqaux longxx beh qycc kixjy.

26 Quer lak-jap-zi xee citzidqii ee liauxau, siurr buah iuu :ee beh duw diyc jenxduu, iarr longxx byy soxx u; beh u jit xee zinqunx ee vecsnir qaur laii huixbet sniaa qapp sxingr sow, ix ee qetqiok beh cincniu ing duarjuiw, qaur lorbuew, beh u qaujenr; pahngx ee su ixqing’ dniardiyc.

27 Jit xee citzidqii ee lairbin, ix beh qapp jerje langg lip qenqor ee iog; citzidqii ee jidvnuar, ix beh hro jewsu qapp lexmic longxx suah; janhai :ee jiyh kyxngor :ee ee sxit laii; qycc u dua siurkir vniar dirr hitt xee qniaa huixbet :ee ee sinjniu, qaur dirr soxx dniardiyc ee buadqii."

10 Persia Ongg Kylus derr snax nii, u dairjir henxbingg hro cxingx juer Beltesazar ee Daniel; jitt xee su si jinsit, quanhe dua qaujenr, Daniel tongdat jitt xee su, bingvik jitt xee ngirsiong.

2 Hitt sii guaw Daniel iubun snax xee citzidqii.

3 Hyw ee mic guaw byy jiac, bah qapp jiuw byy zip guaw ee cuir, iarr byy ing iuu buah guaw ee sinkux, didqaur muaw snax xee citzidqii.

4 Jniax-guec zi-sir, guaw dirr Tiglis dua hyy-vnix,

5 Giahbak decc knuar, knuar ar, u jit langg, sinkux cing iuwduervor ee snxax, iyx haa ofir ee hyw qimx;

6 Ix ee sinkux cincniu ngg gik, binrmau cincniu sicnar ee kuanw, ix ee bagjiux cincniu huexvew, ix ee ciuw qapp kax sikdir cincniu buaa qngx ee dangg, ix qongxue ee sniax cincniu qui' din langg ee sniax.

7 Jitt xee ngirsiong jixu guaw Daniel jit langg knuar .qnir; in'ui qapp guaw dilehh ee langg byy knuar qnir hitt xee ngirsiong, qandna' gniauhgniauc cuah, jauw kir bih.

8 Cunx guaw qaqi dilehh; guaw knuar qnir jitt xee dua ngirsiong; sintew longxx byy lat; qycc guaw ee suixsig vnir pnaiw, qaur longxx byy lat.

9 Jongwsirr guaw tniax qnir ix qongxue ee sniax; tniax qnir ix qongxue ee sii, guaw pag lyc de, bin ngar de, dyrr kunr dang binn.

10 Knuar ar, u jit qix ciuw bongx guaw, hro guaw ing katauux qapp ciuxjniuw dar dirr de nirr decc cuah.

11 Ix dyrr duiww guaw qongw, "Dua dua did diyc tiongxair ee langg, Daniel ar, liw diyhh bingg guaw qapp liw soxx qongw jiaxee ue; kiw laii kia, in'ui guaw dnaxx hrong crex qaur liw jiax." Ix duiww guaw qongw jitt xee ue, guaw dyrr kia lehh girgi cuah.

12 Ix qycc duiww guaw qongw, "Daniel ar, mrbenw qniax; in'ui dui' liw tauu jit zit juansimx rair bingvik, qycc qaqi kiamvix dirr liw ee Siongrder ee binrjingg ee sii, liw ee ue ixqing’ did diyc tniax .qnir, qycc guaw in'ui liw ee ue jiacc laii.

13 Danrsi Persia ee zinqunx joxdongr guaw zi-jap-id zit; knuar ar, u dua zinqunx ee jit xee, Miqael, laii vangjan guaw, guaw dyrr tingg dirr hiax, qapp Persia hiaxee ongg juewdin.

14 Dnaxx guaw laii si beh hro liw bingg liw ee vecsnir zid'au soxx beh duw .diyc ee su; in'ui jitt xee ngirsiong iauxquxx quanhe jerje zit."

15 Ix ing jiaxee ue qra guaw qongw, guaw dyrr bin ngr de, jing jing byy qongxue.

16 Knuar ar, u jit xui cincniu langg ee kuanw bongx guaw ee cuiwdunn; guaw dyrr kuix cuir, duiww hitt xui kia dirr guaw ee binrjingg :ee qongw,"Guaw ee jruw ar, in'ui jitt xee ngirsiong guaw jin' iubun, drir qaur guaw longxx byy lat.

17 Guaw ee jruw ee lovok jnaixngiu e qapp guaw ee jruw qongxue ar? In'ui jitt sii guaw ee sinkux longxx byy lat, iarr longxx byy cuanxkuir."

18 Qycc jit xui cincniu langg ee kuanw :ee laii bongx guaw, hro guaw u lat.

19 Ix qongw, "Dua did diyc tiongxair ee langg, mrbenw qniax; guan liw ving'anx; liw diyhh iongxjongr, diyhh iongxjongr." Ix jid'err duiww guaw qongxue, guaw dyrr did diyc u lat, qongw, "Guaw ee jruw ar, cniaw liw qongw, in'ui liw ixqing’ hro guaw u lat."

20 Ix dyrr qongw, "Liw jaix guaw uirhyy laii liw jiax mah? Dnaxx guaw beh dyr kir qapp Persia ee zinqunx qaujenr; guaw beh laii kir, knuar ar, Gleek ee zinqunx beh laii.

21 Jongwsirr guaw beh jiong' qiwjair dirr jinsit ee ceh :ee jixsi liw; druu liw ee dua zinqunx Miqael ixgua, byy jit xee qapp guaw draur cud lat laii dixdngx inx."

11 Dng' Media Ongg Dalius guannii, guaw kia .kiw .laii, hro ix qenqor iongxjongr.

2 Dnaxx guaw jiong' jinsit ee su jixsi liw. Knuar ar, Persia beh qycc u snax xee ongg hingx kiw; derr sir xee beh jin' hyxgiac, ngiaa quer inx hiaxee; ix dui' ix ee hyxgiac jniaa juer qiongbingw ee sii, dyrr beh qikdong jingwlangg qongqig Gleekqog.

3 Beh u jit xee iongxbingw ee ongg kiw .laii, ing dua qxuann laii dirliw, jiauww iwsur laii qniaa.

4 Ix hingx kiw ee sii, ix ee qog beh hunlic, ngr tnix ee siwbin ee hongx vunx kuix; jongwsirr byy qruix ix ee horer, iarr be viw did ix jingg soxx jiangw ee qxuann; in'ui ix ee qog beh duw diyc vuic .kiw .laii, qruix dirr jiaxee ixgua ee vadd langg.

5 Lamhngx ee ongg beh qiongbingw; jongwsirr ix ee dairsinn ee diongqanx beh u jit xee viw ix kacc qiongbingw, did diyc qxuann; ix ee qxuann beh juer jin' dua ee qxuann.

6 Quer quixnarr nii au, inx beh sna' lenhap; lamhngx ee qog ee jaboxqniaw beh jiurqin vakhngx ee ongg, rair lip bing'iog; jongwsirr jitt xee jaboxqniaw vangjan ee lat be e quxdngg; jitt xee ongg qapp ix vangjan ee lat be e junjai; qycc jitt xee jaboxqniaw qapp duar ix laii :ee, qapp snix ix :ee, ixqip dngsii hujo ix :ee, longxx beh siurr qauhur.

7 Jitt xee jaboxqniaw ee vunxqex beh qycc cud jit xee, suawjiab ong'ui, ix beh duar qundui laii, jinwlip vakhngx ee ongg ee hiamxiaur, qongqig laii kacc ngiaa inx.

8 Iarr jiong' inx ee siongrder, qapp soxx jur ee gnoxsiong, ixqip ginn, qimx ee vyxkir cniuxliac qaur Egipt; quixnarr nii quw byy cab vakhngx ee ongg.

9 Ix beh zip lamhngx ee ongg ee qog, jongwsirr beh iuguann dyr kir vunxsoxjai.

10 Ix hiaxee qniaw beh kiw qaujenr, jiyjib jerje qundui, ix beh jinwjingg cincniu juiw huanwlam dui' hiax qingquer, dyrr beh dyr .kir, qycc kiw qaujenr didqaur ix ee hiamxiaur.

11 Lamhngx ee ongg beh dua siurkir, cud laii qapp vakhngx ee ongg qaujenr; ix beh vailet dua qundui, dua qundui beh qauhur dirr ix ee ciuw.

12 Ixqing’ druu kir dua qundui, ix ee simx jurqyx; ix suizenn hro quixnarr bxan langg dyw .lyc .kir, qiuwqingr byy did diyc kacc ngiaa.

13 Vakhngx ee ongg beh dyr .laii, qycc vailet dua qundui, viw jingg :ee qyckacc je; quer quixnarr nii au, ix beh duar dua qundui qapp jerje qunjongx laii.

14 Hitt sii beh u jerje langg kiw laii qongqig lamhngx ee ongg, qycc liw ee vecsnir diongx qiongvy ee langg iarr beh kiw .laii, rair hro ngirsiong did diyc ingwgiam; jongwsirr inx beh vairbyy.

15 Vakhngx ee ongg beh laii, iarr beh kiw toduix, qongcuw qenqor ee sniaa; lamhngx ee qundui beh kia be diauu, ix soxx qingw ee vecsnir iarr byy lat tangx kia diauu.

16 Dogdok laii qonqqig ix :ee, beh cutjai iwsur laii qniaa, byy langg dirr ix ee binrjingg kia e diauu; ix beh kia dirr ing'iau ee de, ix ee ciuw qniaa jaubet.

17 Ix quat'ir ing juann qog ee lat laii, iarr u jingwdit ee langg qapp ix laii, ix beh jiauww iwsur qniaa; qycc beh ing hurzinlangg ee jaboxqniaw hro ix, beh vairhuai ix; jongwsirr ix be singlip, iarr byy juer ix ee lirig.

18 Hitt diap liauxau ix beh uat dngw bin ngr hiaxee haixsu, jerje cruw ix; beh u jit xee dairsinn druu kir ix soxx six ee lingziok; qycc hro hitt xee lingziok qruix ix vunxsinx.

19 Au .laii ix beh uat dngw bin ngr qaqi qingxlai ee hiamxiaur; jongwsirr ix beh diyhdag laii vuahdyw; qaur buew byy qycc knuar .qnir.

20 Hitt sii beh u jit langg kiw .laii, suawjiab ix ee xui, hro jit xee ligsig :ee venww qniaa qog-lai ing'iau ee de; jongwsirr byy quiw zit lai ix beh siurr bedbyy, m si dui' siurkir, iarr m si dui' qaujenr.

21 Beh u jit xee vijen ee langg kiw .laii, suawjiab ix ee xui, langg m bad ing qog ee ingqngx hro ix; si tanr langg byy dihongg ee sii, ing tiamxmi laii did diyc qog.

22 Dua dui ee vinglat beh siurr huixbet dirr ix ee binrjingg, cincniu hro duarjuiw lrauu .kir, drangg huerbingg ee zinqunx iarr beh anxnix.

23 Lip iog liauxau ix beh qniaa kuixjar; in'ui ix beh jnriu .laii, ing jiyw jiyw ee vecsnir jniaa juer qiongbingw.

24 Tanr langg byy dihongg ee sii, ix beh laii qaur singw-lai ee vuii de, iarr beh qniaa ix ee ledjow, qapp inx ee ledjow soxx m bad qniaa :ee; beh ing soxx cniuw :ee, soxx qiab :ee, qapp huewjaii hunsnuar hro langg; qycc beh sed qewboo qongqig jiaxee hiamxiaur ee soxjai, qaur ix ee siqii.

25 Ix beh cud dua lat hunwjir, ing dua ee qundui qongqig lamhngx ee ongg; lamhngx ee ongg iarr beh ing qik dua qik qiongg ee qunvingx qapp ix qaujenr; jongwsirr kia be diauu, in'ui langg sed qewboo beh hai ix;

26 Jiac ix ee hongrlok :ee beh bet ix, ix ee qunvingx beh siwsnuar; qycc siurr taii :ee jin' je.

27 Jitt nng xee ongg, simx jrunn pnaiw ir, drangg dyh ee sii qongw vehcat; jongwsirr ix ee qewboo be jniaa; in'ui qaur dniardiyc ee qrii inx ee qetqiok e qaur.

28 Ix beh duar jerje huewjaii dyr kir vunxqog; ix ee simx huanxduir sxingr iog; jiauww ix ee iwsur qniaa, dyr kir vunxqog.

29 Qaur dniardiyc ee qrii, ix beh dywdngw, laii qaur lamhngx; jongwsirr jitt lorbuew vaiw byy cincniu jingg vaiw.

30 In'ui Kelet ee junn beh qaur qongqig ix, drir qaur ix iubun dyrr dyr .kir, tongwhun sxingr iog, jiauww ix ee iwsur laii qniaa; ix beh dyr .laii, qapp kiwsag sxingr iog ee langg snaqab qewboo.

31 Ix beh kiw vxingx, inx beh pah lasamm sxingr sow, dyrr si uersow, druu kir zidzit soxx henr ee jewsu, kia hit xee janhai kyxngor ee mic.

32 Qniaa pnaiw vue iog :ee, ix beh ing tiamxmi ee ue inxiuw inx; dogdok bad inx ee Siongrder ee vecsnir beh iongxqamw qniaa dairjir.

33 Vecsnir diongx diwhui ee langg beh qawsi jerje langg; jongwsirr inx jerje zit beh dui' dyqiamr, huew siyx, hro langg liac, hro langg cniuw, laii sitvai.

34 Inx sitvai ee sii beh liyc liyc aw did diyc hujo, iarr u jerje langg beh ing tiamxmi qapp inx lenlok.

35 Diwhui ee langg ee diongqanx uree beh sitvai, laii tuanwlen inx, hro inx cingkir, hro inx vec vec, didqaur lorbuew ee zit; in'ui qaur dniardiyc ee qrii, qetqiok dyrr qaur.

36 Hitt xee ongg beh cutjai iwsur laii qniaa, beh jurqyx jurdua vnuaa quer itcer ee siongrder, qycc ing qi'ngi ee ue qongqig jiaxee siongrder ee Siongrder; ix beh hingtongx qaur dua siurkir bingvik; in'ui soxx dniardiyc ee su dikkag jniaa.

37 Ix byy beh iauwqinw ix ee ledjow ee siongrder, ixqip hurluw soxx himbo :ee, bylun simxmih siongrder ix byy iauwqinw; in'ui ix beh jurdua vnuaa quer itcer.

38 Ix beh dirr ix ee xui qingwvair uersow ee siongrder; qycc ix ee ledjow soxx m bad ee siongrder, ix beh ing qimx, ginn, gigjiyc, vyxmic laii qingr ix.

39 Ix beh uaxkyr vadd hy ee siongrder laii sethuad qenqor ee uersow; huanrnarr singzin ix :ee, beh jiong' ingqngx hro inx, iarr beh hro inx quanxhad jerje langg, qycc beh vunx toxde vywsniuw inx.

40 Qaur lorbuew ee sii, lamhngx ee ongg beh ciokhuan ix; vakhngx ee ongg beh qongqig ix cincniu qngxlehongx, ing ciax, ing bexvingx, ing jerje junjiah; iarr beh jinwzip hiaxee qog, cincniu huanwlam ee juiw qingquer.

41 Qycc beh jinwzip ing'iau ee de, jerje qog hro ix ciax dyw; dogdok Edom, Moab, qapp Ammon qniaxsunx junquir ee langg e tuatli ix ee ciuw.

42 Ix beh crunx ciuw qongqig ledqog; Egipt-de iarr byy did diyc tuatli.

43 Ix beh jiangxquanw Egipt qimginn ee jaivyw ixqip itcer ee vyxmic; Libia qapp Kuslangg longxx beh qinduer ix.

44 Dui' dangx dui' vag beh u siausid qaur laii ziauxluan ix; ix beh dua siurkir cud .kir, itjin dubet jerje langg.

45 Ix beh dirr haiw qapp ing'iau ee sxingr snuax ee diongqanx dah ix qiongden ee vowvnii; jongwsirr ix beh qaur ix ee qetqiok, iarr byy vangjan ix :ee.

12 Hitt sii vyxho liw ee vecsnir ee dua zinqunx, Meqael, beh kia .kiw .laii; beh u dua kunwkow ee sii, dui' kaiqog ixlaii qaur hitt sii m bad u anxnix; hitt sii liw ee vecsnir beh did diyc jinxqiur, dyrr si qniwnarr qir dirr ceh nirr :ee.

2 Kunr dirr tohunw diongx :ee, beh u jerje langg qycc cnew, uree did diyc ingxuac, uree siurr qenwsiaur iamwngor qaur ingxuanw.

3 Diwhui ee langg beh huad cud qngx cincniu tnix ee qngx; hiaxee hro jerje langg qruix dirr gi :ee, beh cincniu qngx cnxix didqaur ingxuanw.

4 Daniel ar, liw diyhh unxkngr jiaxee ue, hongbat jitt vunw ceh qaur lorbuew ee sii, beh u jerje langg jauw laii jauw kir, qycc qenwsig beh qetnix."

5 Guaw Daniel decc knuar, knuar ar, lingrgua u nng xee kia lehh, jit xee dirr hyy jitt vingg hnua, iarr jit xee dirr hyy hitt vingg hnua.

6 U jit xee qra hitt xee kia dirr hyjuiw ee dingxbin, cing iuwduersnax ee langg qongw, "Jiaxee qrii su ee qetqiok beh qaur zuarr quw ar?"

7 Guaw tniax qnir hitt xee kia dirr hyjuiw ee dingxbin, cing iuwduersnax ee langg, giac kiw ix ee jniar ciuw, dyr ciuw ngr tnix, qiw ingxuac ee Jruw laii jiuwjua, qongw, "Beh qaur jit xee siqii, nng xee siqii, qycc vnuar siqii; pywhuai sxingr ee vecsnir ee quanlik ee sii, jiaxee itcer ee su longxx beh juer uann."

8 Guaw tniax .qnir iarr byy bingvik, dyrr qongw, "Guaw ee jruw ar, jiaxee su ee qetqiok si jnaixngiu?"

9 Ix qongw, "Daniel ar, liw jueww liw kir; in'ui jiaxee ue ixqing’ unxkngr hongbat, qaur dirr lorbuew ee sii.

10 Beh u jerje langg qaqi cingkir qaur vec vec, qycc siurr tuanwlen; jongwsirr pnaiw langg iuguann beh qniaa pnaiw; itcer pnaiw langg be bingvik, dogdok diwhui ee langg e bingvik.

11 Dui' druu kir zidzit soxx henr ee jewsu, iarr kia hitt xee janhai kyxngor ee mic ee sii, beh u jit-cingx nng-vah qauw-jap zit.

12 Qniwnarr tingwhau qycc qaur jit-cingx snax-vah snax-jap-go zit :ee, hitt xee langg u hokkir.

13 Jongwsirr liw diyhh kir qaur lorbuew ee sii; in'ui liw beh anhiyh, qaur lorbuew ee sii liw beh kia dirr liw ee derui."

huedngw tauu iac