1. Jywlangg ee Huanlyw

Langg uac dirr jitt sewqanx, m jaix quiw langg e tangx byy huanlyw? Druu kir singwzinn qapp vehcix ixgua, pacsngr byy langg e tangx byy huanlyw. Singwzinn ee dikhing qapp tnix vnee quann, ix ee kuiwlat qapp Sinn siongtongx. Soxiw ix ee soxx jyr jurjai, ix ee simlai hylok. Acc vehcix ee langg tangx qongw juanzenn byy qamxqag, ix byy u simxmih hibong; vutqyr tnix qngx jiurr kiw .laii, zit amr jiurr dyw lyc kir kunr; vakdow iaux, byy hyw-pnaiw, tec .diyc jiurr jiac; cuiwdax, byy siyx-lingw, qnir .diyc jiurr limx. Jit jong cincniu haixgua ee sanwsenx. Jongw .si jitt nng jxingw ixgua ee langg, m jaix iauxx u byy huanlyw ee langg, byy?

Langg druu kir vehcix, suisi kacc gong, tnide ee kuacdua, lauxsit m dat diyc tnitangx ee zidngiaw-lai decc vuex jit liap ee tosuax liab'axqniaw! Qycjaiww langg ee huewsiu kacc dngg iarr si yc did tangx quer jit-vah. Dirsii jit xee cingcunx siauwsen ee dua hyw hanr, byy jit diap aw quw ee diongqanx, diyhh vniwjniaa jit xee unxqux giac qnuaiw-aw ee laurlangg. Jit vingg, langg ee simx cox cincniu haiw, dnaw dua qaxx beh vaux tnix; ix soxx hibong :ee, sidjai si cimx; soxx beh jyr :ee, sidjai si je. Aiar! Lordoo ciax kiw beh duw tnix, zidtauu jnaixngiu qiongqiongg lyc duiww snuax-au .kir! Langg mrbenw qongw si u jyr pnaiw dai, qinrqin duiww langg qadi ee luanxziok, kuiwlat m jiongg ix ee simguan, dagg langg dikkag dy' diyhh iyy tauu trow duarkuir.

Guaw u jit xee ving'iuw, ix si tagceclangg, ix si vutjiw u jiwkir. Ix knuar qnir lanw ee siarhue jit zit jit zit hai; ix siongsiongg toxkuir qongw, "Diyh'air qaixqiur." Mrquxx ix qamxqag sidjai iuxsimx kywerju ee langg si jin' jiyw; qycjaiww ix iurr jai'ngiaw huanrsu qanda' u langg jyr be laii, u langg ixgua diyhh qycc rair jnii. Qaur buew ix jiurr dua quatsimx: jit ciuw lamw ginn, jit ciuw kanx qniaw, lirkuix qequanr qutziok kir dirr hng hng ee soxjai jyr singliw. Hiaxee ginn si ix ee jaisanw ee dua vorhun, hitt xee qniaw si ix dogdok jit xee ee ser qniaw. Ix iong hiaxee ginn jyr singliw, si beh jewjy au-laii uahdang ee juqimx; iarr ix cua hitt xee qniaw dirr ix ee sinvnix qadi qar, si sniu beh iongxsingg sidjai diongwiong ee zinjaii. Liw knuar ix ee qewik, kixmrsi qinjad mah?

Kyxlinn! ix qanda' u jit hxang junxvi be tangx qaur, jiurr si kyxsiyh ix ee snewmia u kacc dew. Ix jyr byy nng~snax nii ee singliw; suizenn si vutjiw u lirig, jongw .si qaur ix beh quewsinx ee sijun, ix ee ginxaw iuguann si ser hanr, ix ee simjir jairr ix ee simlai kangx kangx dirdecc qaw! Liw sniu, ix ee simqnuax hydingw ee qankow?

U jin' je ee gauu langg anxnix qongw, "Langg itsingx soxx qniaa soxx jyr, qanda' si dui' jit kuanw ee su'iok laii." Jitt xee su'iok si simxmic? Jiurr si rair vryw qadi ee ving'anx. Langg uirdiyhh beh vryw qadi ee ving'anx, jiurr qycc snex cud nng jxingw ee liamrtauu: tauu jit xee si air did diyc mic, derr zi xee si air did diyc qniaw. Did mic, si beh hro ix ee singkux iongxqnia; vakdow narr iaux u tangx jiac, singkux narr qnuaa u tangx cing, ho laii, zit pak ee sii u tangx druar. Did qniaw, si air beh u horsuu, in'ui qniaw si dui' ix ee singkux snex .cud .laii .ee, soxiw liahjyr si ix qadi; qniaw decc uac jiurr si ix ee uac, qniaxsunx narr iongxqnia, ix knuar jyr jiurr si ix ee ving'anx lar.

Beh did mic, mrquxx mic u han, iurqycc beriongrdid kinx kinx did e diyc. Duiww jiax, langg qapp langg diyh'air qingwjingx; m na si pinw kuiwlat, iarr suar diyhh pinw diwsig. Kacc iongw ee langg cniuw kacc ngiaa, kacc kiauw ee langg did kacc je. Acc jit vingg rair ser qniaw, soxiw diyhh cuarbow. Bow, diyhh iongxqnia qycjaiww suiw qycc gauu; mrquxx sewqanx jitt hy jaboxginxaw si kacc jiyw, soxiw diwqaur rair sna' jnex. Lauxsit, qoxjaw cuarbow si kiw langg cniuw .laii .ee; henrsii jairr iaxbanlangg ee diongqanx, iarr si iauxx u jitt kuanw ee hongsiok.

Mrbenw qongw si iaxbanlangg, jairr bunbinglangg ee diongqanx, uirdiyhh beh crua diyc hyw ee bow, m jaix diyhh huir liauw zuarr je ee koxsimx; jex si langlangg didjiab soxx u qinggiam ee dairjir. Jiauww jit kuanw ee hagjiaw ee soxx qongw, langg vutlun qaur simxmih sidai, dy' longxx diyh'air siy' taii siy' cniuxduat, jiurr si qongw langg vunxlaii si ingqaix diyhh jingvniar; langg diyhh u jingvniar, jiacc si u jinwvo.

Lanw narr henx quewkir ee ligsuw knuar, jiurr jai'ngiaw dingxbin ee soxx qongw m si juanzenn byy ngiaxjiah; tangx qongw sursit kacc je si anxnix. Tangx jaix quewkir ee langg, uirdiyhh beh vryw uahmia ee enqor, m jaix huir jin zuarr je ee simsinn, sriu liauw zuarr je ee huanlyw.

Jongw .si dingxbin hitt jad ee iwqenr u jin' dua cywgo. Ix qongw quewkir ee langg kacc je longxx si sna' jingvniar, jitt diamw si sursit; qongw langg vunxlaii diyh'air u jingvniar, u jingvniar si ingqaix, jitt diamw jiurr si dua dua ee cywgo. Narr si anxnix, langg qiamxx m si ingxuanw lykow utbun mah? Qiuwqingr jywlangg si byy simsig, did mic iarr si byy loring; snex qniaw iauxquxx si kacc huiwkir. Tangx qongw Inwdorlangg cutqex sriux koxhing, m hanrdnia m jiac mic, vangr decc hro ix gy; iauxquxx dendyww si jre dingcngg, jimr kejuiw, tiaur huexduix, tangx hro ix kuiwsix kacc qinw dng; anxnix iauxquxx si kacc driyc, kacc tetdew. Qaijair zinsingx m si ingqaix rair sna' jingvniar; jitt diauu pnaiw lo si langg gugong ee sii jiacc u qniaa. Langg narr zuxx gauu, zuxx jinwvo, ix jurzenn qadi erhiauw uat tauu qniaa duiww kacc quann kacc vnetnaw ee soxjai kir. Hitt diauu si simxmic lo? Lorbuew si qaur dyxlyc?

2 Zinsingx ee jniawlo jiurr si Air

Langg uac jit siwlangg dirr sewqanx, si beh jyr simxmic? Lanw dirr dingw hxang ixqingx u qongw si beh qniaa Sinn ee jixir, jyr Sinn ee surgiap. Narr si anxnix, Sinn ee jixir si simxmic? Sinn ee surgiap si sniaxhuer? Lanw jairjingg iarr ixqingx u qongw liauw; Sinn ee jixir, jiurr si Jinx-Sxen-Biw. Sinn ee surgiap u jin' je, jin' dua, sngr be liauw; itcer tnidingw dere ee bxan hxang, dy' longxx si Ix soxx qing'ingg :ee, jiurr si lanw langg ee sixuac huatdenw, iarr dy' longxx sriok dirr Ix ee qing'ingg. Acc Ix jiong' jitt xee derbinrjniu soxu ee bxan mic qaudair hro langg jiangxquann. Tangx jaix langg narr e tangx vangjan vadd langg ee huatdenw; iacc si hro derbin bxan hxang kacc diauhyy, e tangx viauxhen qokk hxang ee iwgi, jex longxx dy' si jyr Sinn ee surgiap.

Jiauww anxnix knuar, Sinn ee jixir suizenn si qongw e tangx hunx jyr Jinx-Sxen-Biw, snax hongben; mrquxx snaxhuer si Jinx, snaxhuer si Sxen, snaxhuer si Biw; jex sidjai si yh did tangx hunved, lanw lauxsit si yh did tangx bad jiauu qraur.

Iurqycjaiww dirr jitt derbinrjniu, lanw soxx rair jyr ee dairjir si u cingcingx-banrban hxang, lanw diyhh duiww dycc jit hxang singx jyr kiw, lanw sidjai jinjniar yh did tangx quatding. Dui' anxnix, lanw langg qiamxx m si iuguann si jin' diyhh huanlyw mah? Aiar! Lanw cniaw benw huanlyw, benw gonggniac. Jurr qoxjaw ixlaii, soxu cuttauu ee dua gauu langg dua singwzinn, dy' ixqingx u ter lanw sniu ven ven. Iauxquxx tangx qongw si Sinn ixqingx u jixbingg hro lanw liauw. Langg soxx diyhh qniaa ee jniawlo, vutlun qaur dyc'ui, iacc si qaur simxmih sidai, dy' longxx si qanda' u jit diauu. Jitt diauu si simxmih lo? Jiurr si Air ee duarlo lar! U langg qongw, "Bxan hxang mic si duiww jit xee qinvunw snex .cud .laii." Iurr u qongw, "Bxan hxang qokk ngiu ee surbut, quibuew si dngw kir jit soxjai." Sidjai si jiauww jitt nng qxur ue ee iwsur. Langg ee itsingx suizenn u jinjniar je ee dairjir tangx hyw vran, qiuwqingr si qanda' beh jinrsimx tniawtangr langg nardnia.

Qiwzenn si anxnix, "Air" si simxmic? Jnaixngiu jiacc e tangx qongw jyr si tniawtangr? Jitt xee bunrdee si bxan hxang bunrdee ee jueww derr id dua :ee. Guaw suisi qnuaxbunn-cenxqenr, guan jiong' guaw soxx tniax qnir jingg ee gauu langg soxx qongw :ee, qapp guaw qadi soxu siongser sniu liauw ee qetqyw, huntiah dirr led'ui ee binrjingg, narr e tangx jyr dairqex siasiauw ee camkyw, jiurr si guaw ee dua hokkir.

3 Jnaixngiu jiacc si Air?

Air ee jok'iong si huisiongg dua, Kongxjuw qar langg diyhh u zindig, Sikkiax qar langg diyhh u juvix, zindig qapp juvix ee jok'iong tangx qongw si qapp Air ee jok'iong cavutdyx siangrkuanw. Jongw .si Air ee jok'iong si jueww cimx jueww tetdew. Narr si anxnix, jnaixngiu jiacc si Air? Ixha cniaw hunx jyr go jam laii huntiah. In'ui Air u snax hxang ee iauwsor qapp u nng hxang ee diauqnia.

A. Air ee derr id iauwsor si Si'uw (施與), jiurr si jiong' lanw sox u :ee tec hro vadd langg, jyr hitt xee langg ee loring. Qycc qongw jit qxur kacc ced, jiurr si qongw, duiww sriok dirr lanw qadi ee mihqnia qapp lanw ee linglik, lanw m qnaw qadi sukiax u, jiong' itcer henr dirr lanw soxx air tniar ix ee langg ee binrjingg, jyr ix ee loring. Acc narr jyr qaur lenrr ix ee singkux snewmia iarr kingw henr hro langg ee sii, hitt jun ee Air si jueww derr itdingw dua.

Lanw jaix verbyw air qniaw ee air si qik cimx. Jnaixngiu anxnix qongw? Derr id, verbyw duiww ix ee qniaxzii byy siyh ix ee mihqnia jaisanw. Verbyw itsingx soxx jiktiog :ee byy jit hxang m si beh vangr hro ix ee qniaxzii. Verbyw m si qanda' jiong' mic hro qniaxzii: qniaxzii narr puawvne, ix jiurr be qor did jiac qapp kunr, juansimx ngwbang qniaxzii ee ving'anx. Qycjaiww uirdiyhh qniaxzii ee qauwiok, air ix qapp langg' vnejerkia, jiurr ter ix cue sensnex, qingw haghau. Ursii qniaxzii kir dirr hng hng ee soxjai, duw diyc tauwhongx jyr duarjuiw, iacc si u simxmih tenjaix ee sijun, jairr cur ee verbyw jiurr simsimx-liamrliam; uirdiyhh qniaxzii, jre, dyw, longxx be jai. Cincniu qurnii Qauw-guec ceid, Dangqniax dua dedang ee sii, uirdiyhh kir Dangqniax tagceh ee juxde, jairr lanw Daiuann jin' je ee verbyw, huanlyw qaur simqnuax beh hunxcuir. Guaw u knuar qnir u langg huanlyw qaur naxx cincniu beh kixsiauw; uree iauxx bue jriab diyc siausid ee diongqanx, zidzit hauw be suah. Tangx jaix verbyw m na jiong' itcer ee jaisanw vangr hro qniaw, jiurr si inx ee simsinn iarr si uirdiyhh qniaw decc ing. Verbyw ee air qniaw m jixsirr anxnix; verbyw jiong' ix ee sintew snewmia uirdiiyhh qniaw vangwsag :ee si be jiyw. Jex si langlangg soxx jai'ngiaw, mrbenw qycc jingwbingg. Tangx jaix verbyw si jiong' ix soxx u :ee byy jit hxang byy hro ix ee qniaw.

Lanw langg dirr sewqanx, narr si qauda' qongw in'ui si lanw ee qniaxzii, iacc si jiwcinx ee qutziok, soxiw jiacc kingw jiong' lanw ee mic laii hro ix, vadd langg jiurr si be cud .did; jitt kuanw m si jinx ee air, si jin' ehdec ee pen'air. Langg beh qniaa zin'air duiww kacc cinx:ee dairsingx, au-laii jiacc qip qaur kacc sxex :ee, jex kiokk si jurzenn ee sunrsu. Mrquxx narr si qongw duiww cinx ee langg jiacc kingw, vadd langg jiurr si be cud .did. Jitt kuanw langg, suisi u mic hro ix ee qniaxzii qapp cinlangg, tangx qongw hex m si dui' zin'air ee simx laii hro ix, si dui' vadd hxang ee simliw; jitt kuanw langg si iauxx be erhiauw zin'air si simxmic. Air ee derr id iauwsor si Si'uw, si jiong' itcer kingw hro langg; qycjaiww m tangx hanrdnia dirr jit vorhun, diyhh duiww longxjongw ee langg siangrkuanw simx. Jex jiacc si jinjniar ee zin'air.

B. Air ee derr zi iauwsor si diyhh u qingwdiong ee simqnuax. Narr byy qingwdiong ee simqnuax, suizenn si tec simxmic kacc hyw ee mic hro langg', dy' beriongrdid qongw si Air. Liw knuar, langg siongsiongg u cri jiauw-aw dirr cur-lai. U congr jin' suiw ee lamx-aw hro ix diamr. U siongsiongg ngiuw juiw hro ix sew. Iarr u dniardnia tec mic hro ix jiac. Tangx qongw hitt jiah jiauw-aw dui' langg soxx did :ee si jin' je; qiamxcaiw ping ix dirr kongwiaw soxx e tangx did .diyc .ee si qex kacc hyw byy tanagx sngr. Mrquxx cniaw sniu knuar, hitt kuanw si air iacc m si? Duanwduanr m si lar. Jitt kuanw m si air; air diyhh u qingwdiong ee simqnuax. Langg duiww ix soxx cri ee jiauw-aw, tacc u simxmih qingwdiong lehh? Jiauw-aw vunxlaii si jiauw-aw, ix ee liongxvingg u huad sxit, ix ee tensingr snesingg si air vuex dirr tnix quann de kuah ee soxjai. Jongw .si langg uirdiyhh ix qadi ee simsig, u sxit m hro ix vuex, u soxjai m inxjunw ix kir, zidzit qra ix qnuaix dirr lamx-aw-lai. Langg narr ngua jyr jiauw-aw, m jaix beh jnaixngiu qiyr qankow; dikkag e qongw, "Liw jin' byy jundiong guaw, liw si beh siusip guaw ee snewmia lar!" Cincniu jitt kuanw langg tec mic hro ix soxx cri ee jiauw-aw, beriongrdid qongw si air.

Air, diyhh cincniu verbyw decc hro qniaw, iacc si qniaxzii decc kuanxtai sirduarlangg, jiacc si. Qniaxzii tec mic hro sirduarlangg, m si qanda' hiaxee mic nardnia; mic ixgua iauxx u viw hiaxee mic kacc quiwkir ee qingwdiong ee simx dilehh. Jiurr si verbyw decc qauwiongw qniaxzii iarr si anxnix. Verbyw decc duiwtai qniaxzii si knuar jyr ix qadi, qiamxcaiw knuar jyr viw ix kacc duiwdiong. Diyhh cincniu u jitt hy ee simx tec mic hro langg jiacc si air.

Piwlun u kitjiac kir nng xee langg ee cur vunjnii. Dairsingx hitt xee kacc hyxgiac :ee, knuar qnir kitjiac laii, jit srinx juanjuanx liab'aw, jin' lasamm; jiurr vutjiw byy hnuahiw, qniax liauw uwuer diyic ix ee mngkakauw. Kitjiac iauxx bue qaur mngg ee ixjingg, jiurr qiyr sinlyy qnuaxqinw danr jit qag ginn hro ix, qiyr ix diyhh qinw qinw lirkuix .kir, m tangx diamr hiax pah uwuer. Jitt xee kitjiac jiurr qinw qinw lirkuix hiax, qycjaiww kir jit langg ee cuwmngkauw vunx. Hitt qingx cur ee juxlangg, singkux duxhyw byy lansanjnii, qinrqin jiacc u jit jiamx, simqnuax sniu liauw vutjiw m quewsimx, duiww hitt xee kitjiac qongw, "Ving'iuw ar! guaw jitt jun duxx byy ven; jit jiamx jnii si jin' siyxkuaw; liw cniaw siux .kir, aurzit cniaw qycc laii, guaw jiacc qex sangr liw damrvyc, hro liw tangx ivne; acc kacc kir u jit jiah qxauw e qa langg, liw cniaw kacc siyxsimx."

Dairqex, lanw sniu jitt nng langg, dycc jit xee si kacc u zin'air? Benw qongw si dywbuexau ee langg kacc u. Jitt xee langg viw dairsingx hitt xee langg suizenn si qiamw tec jin' je hro kitjiac, sidjai ix ee simqnuax m si qanda' air hiaxee hro ix nardnia; in'ui si hitt jun byy duar jnii, soxiw be tangx jiauww ix ee simx; qycjaiww ix byy knuar hitt xee qra ix vunjnii ee langg jyr kitjiac, byy knuawkinx ix, dui' simqnuadew huisiongg kyxlinn hitt xee vunjnii ee langg ee qankow. Dui' anxnix knuar, jitt xee langg suizenn si qanda' tec jit jiamx jnii cud .kir; jongw .si jit jiamx jnii viw hitt qag ginn si qex dang quixnarr jap vxue lar. Dairsingx hitt xee langg suisi dimr jit qag cud .laii, ix si iong danr :ee, ix si in'ui ix ee jnii u liongrsing. Hitt qag ginn si naxjunw cincniu jit qag jxngx-aw hed .kir, jiurr e tangx qinw qinw qnuaw hitt xee lasamm kitjiac jauw. Jitt kuanw m na qongw si jit qag ginn, setsuw si danr jit-vah ginn cud .laii, iarr si qapp danr jit der jiyhtauu byy qyc'ngiu. Jex dikkag beringrdid qongw si Air. Air, diyhh u hamm qingwdiong ee simqnuax.

C. Air ee derr snax iauwsor si byy sniu vywdab. Lanw soxx u :ee kingw hro vadd langg, qycjaiww m si cincniu hed bacqud hro qxauw jiac ee kuanw decc hro langg; lanw si duiwdirr simqnuadew u jrunn qingwdiong ee simqnuax. E tangx jyr qaur anxnix, kiokk si jin' hyw; jongw .si qanda' anxnix, iauxx m si jiaujngg ee air. Lanw qycc cir qiw jit xee le laii sniu knuar.

Jairr lanw ee diongqanx siongsiongg u jit qxur ue qongw, "Iongxzii tairlyw." Jitt qxur ue jiurr si qongw, langg jinrsimx jinrlat ngiuxci qniaxzii, si uirdiyhh nilau qadi be dinxdang ee sii, tangx hro ix hongrsingg. Narr m si u iongxsingg qniaxzii hro ix ven, au-laii nilau byy langg tangx uaxkyr, jiurr diyhh rair qankow. Jiurr si qongw qniaxzii duarhanr narr byy hongrsingg verbyw, verbyw iongxsingg qniaxzii si byy loring.

Dairqex cniaw sniu knuar. U langg qongw verbyw ee tniar qniaw si tnix snejniaa, si jurzenn ee singwjid. Mrquxx narr jiauww jitt qxur, "Iongxzii tairlyw" ee iwsur laii sniu, quw jiurr be iong did qongw si tnix snex jurzenn :ee.

Jiauww jitt qxur ue soxx vauhamm ee iwsur jiurr si qongw, langg m si vunxlaii diyhh ngiuxci qniaxzii; vutqyr narr si u ngwbang air au-laii kacc knuawuac, jiurr diyh'air ngiuxci; narr byy, jiurr kyxiw mrbenw. Guaw knuar jitt qxur ue narr si jinx, verbyw knuar qniaw ee jing'air jiurr m si tnix snex jurzenn :ee. Tangx qongw verqniaw ee diongqanx si byy aiwjingg, verbyw m si in'ui tniawtangr decc cri qniaw; si in'ui beh did qadi ee anlok, soxiw decc cri qniaw. Jex si qapp jyr jit jxingw ee singliw byy qycngiu.

Kixtauu cri qniaw, si cincniu decc he vunxjnii. He jiaxee vunxjnii, jiurr si ngwbang au-laii did diyc dua lirig, jiurr si e tangx did qniaxzii ee hongrsingg, an'unw cing'ingg jiac qaur siw. Jitt kuanw ee simx, si qapp duiww tec mic hro langg ee sii, ixqingx jiurr u sniu vywdab :ee siysiang. Jex beriongrdid qongw si jinx ee air. Jinx ee air si byy sniu vywdab. Qongw cri qniaw si beh hongrsingg lau, jex si qapp ing jithii beh diyr duardai siang simqnuax. Jitt kuanw m si air. Air si qanda' u sniu cud, byy sniu zip.

Iasox qongw, "Liw jniar ciuw tec mic hro langg, diyhh m tangx hro dyr ciuw jaix." Air, si jueww tauu itdingw ee dikhing, diyhh jin' cingkir jin' sunjuann ee simqnuax jiacc e snex cud jitt jxingw air. Qisit jitt hy air m si duiww langg ee simqnualai e tangx snex .cud .laii; si dui' tnidingw tuann .laii ee sniax, pah diyc langg ee simhenn, hiangxliang cud laii ee sengak lar.

Air si jueww dua jueww quann ee linglik, soxiw uree qongw, "Air, jiurr sii Sinn." Tangx jaix e qniaa air ee langg m si sriok dirr siyw siyw.

Iong cuir qongw air si kacc kuair, sidjai qniaa air si jin' yh; duiww langg ee ziogtew knuar, jinx ee air m si langg soxx jyr e qaur. Jnaixngiu qongw? Narr tak diyc singlixhak ee langg jiurr jai'ngiaw, lanw langg ee sintew si vutsii u venwngua, sintew-lai soxu qu ee mic, vutsii diyhh iong sinx :ee tuir, jex qiyr jyr "Sindinn dairsia" (新陳代謝) ee jok'iong. Sintew-lai hiaxee qu :ee vutsii diyhh vnir jyr dairven, siauxsuiw, qnua, iacc si iuqaur, qauxqecsenx; hitt jiongxlui ee mic vaised cud laii guarbin.

Dui' anxnix jiurr snex cud cuiwdax, iawsen jiongxjiongw ee qamxqag. Jex jiurr si sintew-lai u kiamwkueh ee qiwzin, lanw jiurr diyhh jiac jin' je hxang ee mic, iacc si limx juiw, cuanxkuir, suh hongx lyc kir vow. Qycjaiww langg ee puebah, snejniaa zuac laii, diyhh u uwliangg; qnuaa qaur, diyhh cing siyx. In'ui anxnix, jiac, cing, druar, jitt snax hxang si langg soxx beriongrdid kiamwkueh ee mihqnia. Jitt snax hxang jairr jitt derbinrjniu, mrquxx byy tangx dagg dah u ciongjiog. Dui' anxnix, langg narr si qanda' tranr sintew ee kiamwkueh, langg jiurr diyhh diwqaur sna' cniuxqiab, sna' hamrhai.

Hyhongr sintew ee lairbin iauxx u jin' je jiongxlui ee iogliam, hnowsig, air miasniax, air viw langg' kacc quann, air cing'ingg, m air jywqangx. Dui' anxnix, langg qapp langg sidjai yh did tangx jywhuew, dairqex siauwsniu beh quanw langg, beh pnekamr langg; u sniu zip, si dikkag byy sniu cud; diwqaur sisii u uanqex, sna' pah, dua sna' taii. Led'ui, lanw qauwgiac jai'ngiaw, langg narr juanjuanx tranr ziogtew, byy qycc sniu vadd hxang, jitt xee sewqanx jiurr diyhh qauxjar, cosimx, iongxbingw, u lat ee dua pnaiw langg, jiacc e tangx ving'anx kiarkiw quer jit siwlangg. Jitt kuanw tranr ziogtew ee siarhue jiurr si qiyr jyr dergik ee sewqair. Jairr jitt xee sewqair ee langg, jiurr si qxuiw, okmoo, beriongrdid qongw si langg. In'ui qxuiw ee simlai byy zin'air, soxx jyr si cniuxduat hamrhai.

Langg si qinbah laii jniaa :ee. Jiauww qinbah ee vunxsingr, si iauqiuu tec zip byy tec cud. Soxiw dingxbin soxx qongw, cri qniaw si ngwbang hongrsingg lau, jitt kuanw ee susiongw, duiww qinbah ee vunxsingr laii qongw si ingqaix ee dairjir. Mrquxx, langg m si qanda' bah laii snesingg :ee; bacsingr (iacc si qongw hetsingr) ixgua iauxx u vadd jxingw kacc quann ee singwjid, jiurr si lingsingr.

Dirr dingw hxang lun "Langg ee Uahmia" hitt soxjai u qongw, langg viw vadd hxang uahmic u qex jit jxingw ee simsingr. Jiurr si langg lingrgua u simkiaur, langg in'ui u jitt xee simkiaur, soxiw jiacc erhiauw did hunved jinx-qew, hyw-pnaiw qapp suiw-baiw. Duiww anxnix langg qnir diyc jinx :ee, hyw :ee, suiw :ee jiurr lingrgua u jit jxingw hixair ee qamxqag, diddit air hiongr duiww hitt jiongw ee soxjai kir. Acc narr qnir diyc qew :ee, pnaiw :ee, iacc si kiapsir:ee, jiurr jurzenn u iamwngor ee simx snex .cud .laii, jiurr air qinw qinw lirkuix hex. Jitt xee simkiaur jiurr si langg ee lingsingg ee jit vorhun.

Langg ee lingsingr ee jueww cimx ee soxjai, jiurr si hibong air sriok dirr ingxuanw uahmia ee lairdew. Jitt xee lingsingr si qapp bacsingr (jiurr si hetsingr) snaduiwvingw. Langg u jitt nng jxingw ee vunxsingr; bacsingr si qin dongrbut, qin okquiw, lingsingr si qin Sinn. Bacsingr kacc qiongg ee langg soxx jyr qapp dongrbut (jiurr si dix, qxauw, guu, bew, hitt jit lui) byy qyc'ngiu, bxan hxang dy' si sniu zip, byy sniu cud. Lingsingr kacc qiongg ee langg soxx jyr si kacc qin Sinn, juansimx qniaa zin'air; setsuw diyhh sunxhai qadi ee singkux, ix dy' hnuahiw sxingg langg ee hyw su.

Lanw langg e tangx qniaa jinjniar ee zin'air, jiurr si lanw kingw henr lanw soxu ee bxan hxang hro vadd langg; qycjaiww si cud dirr qingwdiong ee simx laii hro langg, iarr m si u sniu air simxmih vywdab jiacc anxnix jyr. Jitt kuanw ee zin'air si duiww lingsingr jiacc jyr e qaur. Bacsingr si dui' langg ee sintew huad cud; lingsingr jiurr m si, lingsingr si dui' jinx ee sinwsimx laii. Soxiw air ee bunrdee qapp jongqaur u juewduar ee quanhe, qycjaiww si duiww Qidokqaur, air ee iwgi jiacc e did tetdew, qniaa air liauw jiacc e qauwqag.

D. Air ee vunxjid, narr u dingxbin soxx qongw snax hxang ee iauwsor, tangx qongw ixqingx u jevi. Iauwsor suizenn u jevi, narr m si qycc u nng hxang ee diauqnia laii diaujed, be tangx qongw si jabjngg ee air. Piwlun qongw, dingxbin soxx qongw hitt snax hxang ee iauwsor si qaxnaxx cincniu kiw cur ee cailiau; u hiaxee cailiau, jitt qingx Air ee cur jiurr kiw e jniaa. Mrquxx hitt qingx cur narr beh jniaa jyr jit qingx guanjuann ee hyw cur, jiurr diyhh qapp vadd hxang ee diauqnia. Derr id, derqix diyhh u jai, derr zi, hnghiongr sunrsu diyh'air hyw. Jitt nng xee diauqnia narr si byy jevi, suisi u kacc hyw ee cailiau, iarr si bycaiw qangx. Dirr jiax singx laii qongw bingg derr id ee diauqnia.

Langg beh qniaa air, diyhh u hap itding vutvenr ee lixsiongw. Jitt hxang si beh qniaa zin'air ee derqix. Lixsiongw si simxmic? Lixsiongw jiurr si langg ing simkiaur sniu, juewau e tangx qniaa qaur ee soxjai. Qongw jit qxur kacc bingg, Sinn jiurr si juewau ee lixsiongw. Qongw diyhh hap itding vutvenr ee lixsiongw, jiurr si qongw diyhh hap Sinn ee simx. Sinn ee simx soxx air :ee, jiurr si Jinx-Sxen-Biw. Qetqiok si qongw langg beh qniaa zin'air, diyh'air tanwjiongg Jinx-Sxen-Biw, jiacc tangx jyr. Narr m si anxnix, soxx qniaa ee zin'air e vniwjniaa dua quewsid.

Piwlun qongw, verbyw knuar qniaw si cincniu qadi, knuar qniaw si jin' dang. Inx jiong' soxx u :ee byy jit hxang m qramx hro inx ee qniaw, qycjaiww inx iarr m si qongw, si in'ui beh ngwbang qniaw tangx hongrsingg inx ee nilau, longxx si zim qniaw qadi kir juxir; vutqyr verbyw si sniu qongxx qniaw qiwzenn si qadi snex :ee, qadi u iongxsingg ix jnialangg ee jikzim nardnia.

Verbyw iong jitt kuanw simx duiww qniaw, tangx qongw si u air, u tniawtangr. Qniaw au-laii dikkag e jin qamxqig, dikkag ithuad quatsimx diyhh jin jyr qniaw ee girbu, hongsingg verbyw qaur vacnii. Led'ui, anxnix driyc. Jongw .si diyhh qycc cimx sniu, qanda' anxnix si iauxquxx byy qauwgiac. Cniaw sniu, verbyw knuawdang qniaw si driyc; mrquxx narr bxan su longxx jiauww qniaw ee soxx air jnaixngiu? Piwlun qniaw iauxx ser hanr, qadi be junxjad, vutsii rair jiac mic. Jyr verbyw ee langg in'ui jundiong qniaw quewtauu, jiurr longxx jiauww ix ee soxx qriuu tec hro ix, diwqaur qniaw puawvne ngsngx be singkir. Jex si jin' cenxqin ee le; mrquxx jairr lanw ee diongqanx si siongsiongg u knuar .qnir. Anxnix qiamxx m si air qniaw, dendyww sunxhai qniaw?

Soxiw tangx jaix u mic hro langg', qycc u qingwdiong langg', iarr byy sriu langg' ee vywdab, anxnix kiokk eriongrdid qongw si u zin'air; jongw .si duanwzenn m si jabjiog ee zin'air. Jabjiog ee zin'air diyhh qycc u jit xee diauqnia jiacc e iong did. Jitt xee diauqnia jiurr si qongw diyh'air u hap itding vutvenr ee lixsiongw. Jiauww cri qniaw ee su laii qongw, langg cri qniaw ee lixsiongw si simxmic? Jiurr si diyhh iongxsingg qniaw jyr jit xee jiaujngg ee langg, qenwnarr u qniaw ee langg, dy' longxx diyhh u jitt xee lixsiongw; narr m si, verbyw duiww qniaw soxx qniaa ee zin'air, dikkag e venwjniaa dua jaihy.

Siogquw qongw, "Itliw tongx, vikliw dongg." Duiww qniaw ee zin'air qiwzenn diyhh u hap itding ee lixsiongw; duiww jingwlangg soxx beh qniaa ee air, iarr si diyhh anxnix. In'ui jitt sewqanx u hyw, iarr u pnaiw; u jinx, iarr u qew; u suiw, iarr u baiw. Lanw langg dniardiyc rair jiongg hyw kir pnaiw, qriuu jinx siar kir qew, cruw suiw vangwsag baiw :ee. Jex si jywlangg ee lixsiongw, langg ingqaix diyhh anxnix. Soxiw langg narr be qir did ix guanlaii ee lixsiongw, duiww pnaiw ee dairjir qapp pnaiw langg iarr longxx byy hunved, longxx u qingwdiong ix, jiong' itcer soxu ee mihqnia jingsinn iarr longxx sangr ix ing; liw sniu, qaur buew e jnaixngiu?

Pnaiw langg qiamxx m si duiww anxnix siurr jiongxle venr zuxx pnaiw, qauxquair luanrlaii ee dairjir suar muaw muaw dirr venww tnikae. M na pnaiw :ee venr zuxx pnaiw, lenrr hitt hy qniaa zin'air hro pnaiw ee langg, marr suar jniaa jyr pnaiw; in'ui air pnaiw ee langg jiurr si pnaiw langg! Soxiw diyh'air e qir .did, qniaa zin'air ee langg diyhh vutsii u siuw itding ee lixsiongw. Narr m si, soxx qniaa ee zin'air si beh venr jyr jit qix dyx iacc si qiamr, dairsingx taii vadd langg, zen'au beh taii qadi!

E. Ixsiong soxx qongw snax xee iauwsor, jitt xee diauqnia narr u jevi, tangx qongw jiurr si guanjuann ee air. Jex m si guaw anxnix qongw, si tniax bagjiaw ee ue, qapp duiww soxx tak ee ceh, jiauww langg soxx genxqiur liauw ee qetqyw, iong guaw ee vid siaw vyr led'ui jaix. Jongw .si guaw qadi iarr u sniu knuar. Guaw sniu dingxbin soxx qongw snax hxang iauwsor qapp jit hxang ee diauqnia, narr u longxx jevi, kiokk si eriongrdid qongw si jiaujngg ee air. Mrquxx guaw sniu jitt kuanw ee air, si qinrqin eriongrdid qongw cavutdyx si jiaujngg. Guaw qadi sidjai si byy sniu qongxx anxnix ixqingx si jin' jabjiog. Jiauww guaw sniu, qiamxx m si diyhh qycc u jit xee diauqnia, jiacc e tangx sidjai qongw si qauwgiac jiaujngg ee air. Vadd langg m jaix u anxnix sniu iacc byy, guaw m jaix; qiamxcaiw guaw beh qongw jitt diauu si qex :ee, si "Ua siaa tiamx jiog", iarr byy dikkag; jongw .si guaw qongw hro led'ui jimjiog knuar.

Guaw qongw diyhh qycc jit xee diauqnia, jiurr si qniaa air ee langg, ix diyhh m tangx sniu qongxx ix si decc qniaa air. Qongw jit qxur kacc bingg, lanw simx kiokk si beh qniaa air; danrsi lanw soxx qniaa :ee, si air iacc m si air, jitt xee lanw m tangx sniu, m tangx qadi duanr; lanw diyhh hisimx vangr hro jingwlangg kir pnuawduanr. Vutqyr lanw si qanda' vutsii diyhh sniu knuar lanw u simxmic hro langg .byy? Lanw si qanda' hnuahiw hro langg', byy sniu langg' ee vywdab .byy? Qycjaiww lanw ee soxx jyr u hap itding ee lixsiongw .byy? Lanw qanda' anxnix sniu jiurr hyw, lauxsit u jiauww anxnix qniaa, lanw jurzenn qadi e ansimx. Acc vadd langg duiww lanw ee soxx qniaa soxx jyr beh jnaixngiu pnuawduanr, lanw diyhh itzim langg kir qongw. Air, narr e did qniaa qaur dirr jitt xee dervo, jiurr tangx qongw si qaur dirr qigdiamw guanjuann ee soxjai.

Dirr jiax sniu diyc jit qxur vutjiw u cuxbi ee ue. Dirr jit vunw ceh qiyr jyr "Liaujaix Jiwngi" ee lairbin u qongw, u jit xee langg bang qnir ix kir imqanx kyw Singhongg. Juxkyw jiurr mng ix qongxx, "Singhongg narr si hro liw jyr, sniuxhuat ee dairjir beh jnaixngiu vran?" Hitt xee langg jiurr rinr qongxx, "Iuxsimx uisen, suisen vutsiongw; busimx ui'og, suix og vuthuat." Jitt qxur ue vutjiw cuwbi. Jiurr si qongxx, narr si u jrunn vadd hxang ee simqnuax decc jyr hyw, ix ee soxx jyr suisi hyw, iarr m sniuw ix; acc narr si byy jrunn pnaiw ir jyr m hyw, ix ee soxx jyr suisi pnaiw iarr dikkag byy huat ix. Jitt qxur ue qapp lanw soxx lun ee iwsur u amwhap. Langg jyr hyw si ingwqaix, qadi dikkag beriongrdid in'ui u siyxkuaw hyw, jiurr snex kiw jurhu qadi ylyw ee simx; narr si u pau jurhu ee simqnuax soxx jyr ee hyw, jiurr si byy cingkir.

Langg decc qniaa zin'air, narr si qadi byy hixsimx, jurhu si decc qniaa zin'air hro langg', hitt jxingw ee air si byy sunqed, sriu ee langg dikkag byy qamxsia. Soxx qniaa ee air, narr si u sunqed guanjuann, kixtauu langg qiamxcaiw e m jaix; jongw .si dikkag be bedbyy .kir. Sii narr qaur, dikkag e cincniu zidtauu ee kuanw, qngx sicsih jiyr dirr langg ee bagjiux-lai.

4. Air ee jok'iong

Air ee jok'iong si huisiongg kuah; air, si bxan hxang itcer ee qinguann. Soxiw u langg qongw, "Sinn jiurr si Air." Dairkair air soxu junjai ee soxjai, hiax jiurr u sing'iok jinwvo huatdenw hylok cinsen.

Verbyw qapp qniaxzii ee diongqanx narr si u air, duiww verbyw qongw, hitt xee verbyw si u jusimx; duiww qniaxzii qongw, hitt xee qniaxzii jiurr si u hauwsun. Angbow ee diongqanx narr si u air, hitt xee angbow jiurr si u hyhiap. Hniadi ee diongqanx narr u air, hitt xee hniadi u duarser u hyhyw. Ving'iuw ee diongqanx narr u air, hitt xee ving'iuw jiurr u sinwsit. Acc jit xee langg duiww jingwlangg narr si u air, hitt xee langg jiurr si girkir. Jitt xee langg duiww siarhue, duiww qokqax narr si u air, hitt xee langg jiurr si u jinrdiongx ee simqnuax. Qycjaiww langg duiww bxan hxang uahmic, jiurr si jingsnex cauxbak, narr u pau zin'air ee simx, dikkag byy luan luan jectuah huixhuai; dendyww iongrsimx vyxho jiauwqor, hro ix e tangx anjuann sing'iok. Jitt hy langg jiurr si u juvix.

Tangx jaix air si vah hxang dikhing ee qinvunw. U air ee soxjai dikkag si u sing'iok, u huatdat, u hyhyw, u kuaiwlok. Air, si itcer ee kixguann, air ee jok'iong, lauxsit si kuacdua qaur dirr byy hanrliong. Soxiw Qidokqaur ee Singwceh u qongw, "Sinn si Air." Langg narr qniaa zin'air zuxx jiaujngg, ix ee kuiwlat dikhing si zuxx dua, si zuxx jiapqin Sinn. Jitt jxingw langg e kamx did qongw si ter tnix decc jywsu, e tangx jywjniaa jin' dua ee surgiap, hro jingwlangg hiongxsiu byy hanrliong ee hokkir. Sikkiax jairr Inwdo soxx qniaa ee juvix, Kongxjuw jairr Diongqog soxx ciongr ee zingi, qapp Qidog jairr Iutair soxx lrauu pok'air ee zedhueh, uirdiyhh inx soxx qniaa ee zin'air huisiongg dua, juann sewqair ee langg, qiamxx m si jurr nng~snax-cingx nii ixjingg qaur qinaxzit iauxquxx si decc sriu inx ee in'imr!

Sewqanx bxan hxang si byy dniardiyc, vutsii u venwngua, soxiw qiyr jyr busiongg ee sewqair. Jongw .si dogdok u jit hxang be venr :ee dilehh; jitt hxang jiurr si Air. Sinn si simxmih kuanw, bad Sinn qaur tauwted ee langg, sidjai si iauxx bue u; suizenn si anxnix, lanw si bingbingg sinr u Sinn. Jex si duiww simxmic hro lanw sinr? Jiurr si duiww Sinn ee Air! Tnide ee diongqanx, bingbingg u air ee surjig tangx hro langg knuar .qnir. Bxan hxang longxx diyhh venwngua, diyhh siaubet; dogdok air, jitt hxang qaur dirr dyc'ui dy' si kia diauu diauu. U air ee soxjai, dniardiyc u uahmia, dniardiyc u hylok. Jitt hxang suisi qaur tnix vrangx de lic ee sijun, dniardiyc dy' si jitt xee kuanw.

Langg ee itsingx suisi qongw u cid-jap veh-jap ee huewsiu; jongw .si narr ping tnide ee quxdngg si m dat bak jit nih ee quw. Dairqex diyhh bingvik, langg ee itsingx si byy simxmic; narr u, jiurr si tniar langg' qapp hro langg' tniar nardnia. Druu kir jitt hxang air ixgua dy' longxx si kangx kangx lar! Qongw jit qxur kacc bingg, byy air ee langg si byy snewmia, byy air ee soxjai diyhh dimlunn. Dogdok air si ingxuanw qapp Sinn vnee dilehh, m na qadi be qiamxjiyw, sidjai si quw quw e tangx hro jingwhang uahmia e kacc uac, qycjaiww kacc qetnix.

Led'ui, jiax u jit xee langg; jitt xee langg ee soxx jyr si sniaw kuanw, qetqiok si jnaixngiu, cniaw dairqex jing jing sniu jit xe knuar. Lamngiuu u jit xee soxjai qiyr jyr Vowuax. Vowuax ee quanxlai u jit xee dyxsu qiyr jyr Moloqaix. Vowuax ee zinkauw jongxqiong u zi-jap-go-bxan langg, jiongdiongx diyc taixqyvne ee langg vutjiw je. In'ui qniax liauw tuanziamw zuxx kuah, soxiw jiong' hiaxee diyc taixqyvne ee langg, longxx cua kir Moloqaix Dxyw-lai. Dairqex jaix jitt hy jingwtauu si dagg langg soxx m air uaxqin :ee, soxiw dirr Moloqaix Dxyw-lai hiaxee vnerlangg si jinjniar jabhunx ee qankow. U jit xee Vignixgilangg qiyr jyr Damiingx (Damien). Jitt xee sensnix si dui' inx ee qog hng hng laii Vowuax beh tuann dyrliw. Tniax qnir qongw hiaxee taixqylangg decc qankow, ix zimxsimx be diauu, jiurr quatsimx qapp ix ee cinlangg lirvet. Qadi jit xee hyw hyw langg, tiaur zip kir taixqylangg ee lairbin, qapp hiaxee langg drangg jiac drangg kunr qaur jap-lak nii ee quw, lorbuew qadi iarr suar diyhvne siw. Damiingx Sensnix siw hitt nii, narr dui' qinnii sngr kiw, duxx si snax-jap-lak nii jingg. Henrsii di Moloqaix dxyw-lai decc jiauwqor taixqylangg ee setvi, kiokk si vutjiw jiauvi; mrquxx Damiingx Sensnix cocox kir ee sii, si longxx byy simxmic, kixtauu longxx si diamr dirr dua ciu-kax kunr. Acc Damiing Sensnix soxx jyr ee qangx, qra hiaxee vnerlangg ziuu, sew, qoo iyc dy' benw qongw, iarr diyhh qapp inx draur kiw cur, jingwjyh, iarr qongw dyrliw hro inx tniax. Narr u langg siw, m na diyhh qra inx draii, iarr diyhh qra ix jyr qnuacaa. Qanda' Damiingx Sensnix jap-lak nii quw soxx jyr ee qnuacaa qongw u 1500 ku. Damiingx Sensnix siw liauxau, iarr u jin' je langg hnuahiw kir jriab ix ee kueh. Henrsii u jit xui qiyr jyr Daddongx Sensnix laii Moloqaix Dxyw ixqingx u snax-jap nii; pacsngr jitt xui marr si diyhh jyr qaur siw jiacc knuar u suah, byy! Jairr Moloqaix Dxyw ee taixqylangg, vutsii qongw u 1000 langg ixsiong.

Aiar! Sewqanx iauxx u viw jitt kuanw tniawtangr kacc dua :ee iacc byy? Langlangg narr si e tangx cincniu jitt kuanw laii tniar langg, liw sniu jitt xee sewqanx qiamxx iauxx u simxmic tangx huanlyw? Aiar! Jinjniar dua, Air ee lat! U Air, kixtauu jiacc u snewmia, u air, kixtauu jiacc u ansimx, kixtauu jiacc u hyvingg!

huedngw tauu iac