Hebla
HEBLALANGG EE PUEX
1 Siongrder dirr jairjaw ixqing’ tog hiaxee sendix, ing jerje honghuad qra ledjow qongw;
2 Dnaxx dirr hiaxee zit ee lorbuew, Ix tog Ix ee Qniaw qra lanw qongw; dyrr si Ix soxx setlip juer singjiab banrmic ee horsuu :ee, iarr bad dui' Ix laii congwjy jiaxee sewqair.
3 Ix si Siongrder ee ing'iau soxx huad cud ee qngx, si Siongrder vunxjid ee jinx sxiong, ing Ix quanlingg ee ue decc hucii banrmic; Ix ixqing’ jniaa cingqed jue ee su, dyrr jre dirr qik quann ee tnidingw, dua uigiamm :ee ee duarvingg,
4 Jniaa juer viw jiaxee tnisair kacc dua, hap dirr Ix soxx singjiab ee miaa, viw inx kacc junquir.
5 In'ui Siongrder qamxx bad duiww simxmih tnisair qongw, "Liw dyrr si Guaw ee Qniaw, Guaw qinaxzit snix liw?" Qycc qongw, "Guaw beh juer Ix ee Ve, Ix beh juer Guaw ee Qniaw."
6 Qaur Ix qycc cua dua-Qniaw zip sewqanx ee sii, dyrr qongw, "Siongrder jiaxee tnisair longxx diyhh vair Ix."
7 Lun qaur tnisair dyrr qongw, "Hro Ix ee tnisair juer hongx, Ix ee ce'ing juer huexiam."
8 Narr si lun qaur Qniaw, dyrr qongw, "Siongrder ar, Liw ee jyrui dairdai dilehh, Liw ee qog ee quanvingr si jingwdit ee quanvingr.
9 Liw air qonggi, uanwhun vuthuad; soxiw Siongrder, dyrr si Liw ee Siongrder, ing hnuahiw ee iuu buah Liw, ngiaa quer Liw jiaxee dangpnua."
10 Qycc qongw, "Jruw ar, kixtauu ee sii, Liw he derqix, jiaxee tnix iarr si Liw ee ciuw soxx jy :ee.
11 Inx beh bedbyy; dogdok Liw quxdngg dilehh; inx longxx beh cincniu ihok jiamrjiam qu;
12 Liw beh jiong' inx qngw .kiw .laii, cincniu guarsnax, cincniu ihok, inx beh venwngua; dogdok Liw guanjai si anxnix, Liw ee huewsiu byy qiongjin."
13 Siongrder bad duiww daxlyc jit xee tnisair qongw, "Jre Guaw ee duarvingg, tingwhau Guaw he Liw ee duiwdik juer Liw ee kadah'iw"?
14 Inx qamxx m si longxx juer ce'ing ee sinn, hrong crex laii hogsai decbeh did qiur ee langg mah?
2 Soxiw lanw diyhh ithuad diwir soxx tniax .qnir .ee, qniax lanw e drir qaur hro lrauu .kir.
2 In'ui dui' tnisair soxx tuann ee dyrliw, siongrcniaw si qenqor, qniwnarr qanhuan uiqec ee dairjir longxx duw diyc ingqaix sriu ee vywingr;
3 Lanw narr hutliok jiacnirr dua ee jinxqiur, qamxx e dysiamw mah? Jitt xee jinxqiur si Jruw kixtauu qongw :ee, tniax .qnir ee langg qanjingr qaur sit sit hro lanw;
4 Qycc Siongrder ing jiaxee sinziah, qrii su, dagg hxang ee quanlingg, qapp Singwsinn ee sniuxsur, longxx jiauww Ix qaqi ee jixir, qapp inx snaqab qanjingr.
5 In'ui lanw soxx qongw decc laii ee sewqair, Siongrder m bad hro ix hanghok dirr tnisair.
6 Dogdok u qanjingr dirr bxow soxjai :ee, qongw, "Langg si simxmih, hro Liw suacc siauwliam ix? Langg ee qniaw si simxmih, hro Liw suacc knuawqor ix?
7 Liw hro ix liyc aw kacc sux tnisair, qycc ing ingqngx junquir, hro ix juer benxliuu, qycc setlip ix dirr Liw ee ciuw soxx jy :ee ee dingxbin,
8 Hro banrmic longxx hanghok dirr Ix ee kax-xe." Ixqing’ hro banrmic longxx hanghok Ix, dyrr byy cunx jit hxang mic byy hanghok Ix. Danrsi qaur dnaxx lanw iauxx bue knuar qnir banrmic longxx hanghok Ix.
9 Dogdok knuar qnir hitt xee liyc aw kacc sux tnisair ee Jesus, uirdiyhh sriu siw ee qankow, dyrr did diyc ingqngx junquir juer benxliuu, tangx dui' Siongrder ee xunx, uirdiyhh jiongww langg sriu siw.
10 In'ui hitt xee banrmic soxx sriok :ee, banrmic soxx dui' Ix :ee, decc cua jerje qniaw qaur dirr ingqngx, dyrr hro qiur inx ee siuxlingw dui' koxlan laii jniaa uanjuann, jex vunw si habgii.
11 In'ui hitt xee hro langg jniaa sxingr :ee, qapp hiaxee did diyc jniaa sxingr :ee, longxx dui' jit xee cud; soxiw Ix cxingx inx juer hniadi byy liac juer qenwsiaur;
12 Qongw, "Guaw beh duiww Guaw ee hniadi vywiongg Liw ee miaa, dirr hue-diongx ylyw Liw."
13 Qycc qongw, "Guaw beh uaxkyr Ix." Qycc qongw, "Knuar ar! Guaw ixqip Siongrder soxx hro Guaw ee qniaxzii."
14 Dnaxx jiaxee qniaxzii qiwzenn snadangg u huicbah ee tew, Ix vunxsinx iarr qangrkuanw u, dyrr beh ing siw laii huewbyy u siw ee quanser :ee, dyrr si moquiw;
15 Iarr beh hro itsingx qnia'uir siw qaur cincniu juer lojaii :ee longxx did diyc tauxvangr.
16 Ix byy kanqiur tnisair, si kanqiur Ablaham ee horer.
17 Soxiw huanrsu Ix diyhh qapp hniadi snadangg, tangx dirr Siongrder ee su juer linbinw diongsinr ee Jewsitauu, uirdiyhh vecsnir ee jue henr banxhuee ee jrer.
18 Ix ixqing’ siurkow laii duw diyc cir, dyrr e vangjan jiaxee siurr cir ee langg.
3 Soxiw linw jiaxee sxingr ee hniadi, dangjee did diyc tnix driaur :ee, diyhh cimx sniu lanw soxx singzin juer Suwjiaw, juer Jewsitauu ee Jesus;
2 Ix jinrdiongx dirr setlip Ix :ee, cincniu Moses jinrdiongx dirr Siongrder ee juann qrex jidngiu.
3 In'ui Ix sngr si e kamx did sriu ingqngx ngiaa quer Moses, dyrr cincniu qenwlip qrex :ee, viw qrex kacc junquir.
4 In'ui qrex longxx u langg qenwlip, dogdok qenwlip banrmic :ee dyrr si Siongrder.
5 Qycc Moses juer lovok, qyxzenn jinrdiongx dirr Siongrder ee juann qrex, laii qanjingr jionglaii beh tuann ee su;
6 Dogdok Krist juer Qniaw, dirliw Ix ee qrex; lanw narr jipsiuw dui' ngwbang ee hyxdnaw qapp kuakauw, qenqor qaur buew, dyrr juer Ix ee qrex.
7 Soxiw, cincniu Singwsinn qongw, "Qinaxzit linw narr tniax qnir Ix ee sniax,
8 Dyrr m tangx qonggni linw ee simx, cincniu dirr qig Ix siurkir ee sii, dirr kongwiaw ciwtamr Ix ee zit.
9 Dirr hiax, linw ee ledjow laii giam Guaw, cir Guaw, qycc ligquer sir-jap nii knuar qnir Guaw ee soxx qniaa.
10 Soxiw Guaw byy hnuahiw hitt dai ee langg, qongw, 'Inx ee simx siongsiongg sitbee, m bad Guaw jiaxee lo.'
11 Guaw dyrr dirr siurkir diongx jiuwjua qongxx, 'Inx duanrduan berdid tangx zip Guaw ee anhiyh.'"
12 Hniadi ar, linw diyhh qinxsin, qniax linw diongqanx qiamxcaiw u langg kngr m sinr ee pnaiw simx, lirkuix jin'uac ee Siongrder;
13 Soxiw linw diyhh tanr iauxx u tangx qiyr juer "qinaxzit" :ee, zidzit sna' kuanwbenw; qniax linw diongqanx uree hro jue bee .kir, laii gnirsimx.
14 Lanw narr cisiuw kixtauu ee cimx sinr, qenqor qaur lorbuew, dyrr u hxun dirr Krist.
15 Singwqingx qongw, "Qinaxzit linw narr tniax qnir Ix ee sniax, dyrr m tangx qonggni linw ee simx, cincniu dirr qig Ix siurkir ee sii."
16 In'ui tniax, suacc laii qig Ix siurkir :ee si jirjui ar? Qamxx m si duer Moses cud Egipt ee jiongww langg mah?
17 Siongrder sir-jap nii quw soxx byy hnuahiw :ee si jirjui ar? Qamxx m si huanrjue, sinsix dyw dirr kongwiaw ee langg mah?
18 Siongrder jiuwjua m jrunw zip Ix ee anhiyh :ee, narr m si m sinwtanr ee langg, si jirjui ar?
19 Dui' anxnix knuar, inx be e zip, dyrr si in'ui m sinr.
4 Soxiw zip Ix ee anhiyh ee ingwunw u lauu lecc hro lanw, dyrr diyhh qniahniaa, qniax linw diongqanx qiamxcaiw u langg cincniu e did be diyc.
2 In'ui hok'imx u tuann hro lanw, marr u tuann hro inx, danrsi inx soxx tniax ee ue byy lirig inx, in'ui tniax ee langg byy ing sinr qapp dyrliw snahap.
3 Lanw ixqing’ sinr :ee, si zip jitt xee anhiyh; jiauww Ix soxx qongw, "Guaw dyrr dirr siurkir diongx jiuwjua qongxx, 'Inx duanrduan berdid tangx zip Guaw ee anhiyh'"; qisit jiaxee qangx dui' congr sewqanx ixlaii, ixqing’ jniaa lar.
4 In'ui lun qaur derr cid zit, dirr bxow soxjai u anxnix qongw, "Siongrder dirr derr cid zit bingvik Ix longxjongw ee qangx laii anhiyh";
5 Iarr dirr jitt soxjai qycc qongw, "Inx duanrduan berdid tangx zip Guaw ee anhiyh."
6 Soxiw jitt xee anhiyh iauxx decc tingwhau u langg zip, danrsi hiaxee dairsingx did diyc hok'imx :ee, in'ui m sinwtanr, jiacc byy zip.
7 Ligquer jerje nii, dirr David ee ceh-lai, Ix qycc dring jit zit, cincniu dingxbin soxx qongw, "Qinaxzit linw narr tniax qnir Ix ee sniax, dyrr m tangx qonggni linw ee simx."
8 In'ui Joshua narr bad ing anhiyh sniuxsur vecsnir, dyrr au .laii dikkag byy qongw kiw vadd zit.
9 Dui' anxnix knuar, iauxx u anhiyh uirr Siongrder ee vecsnir lauu lehh.
10 In'ui zip ix ee anhiyh :ee si bingvik ix longxjongw ee qangx laii anhiyh, cincniu Siongrder bingvik Ix ee qangx laii anhiyh.
11 Soxiw lanw diyhh jin lat laii zip jitt xee anhiyh, benw did u langg vuac dyw dirr siang hitt ngiu ee m sinr.
12 In'ui Siongrder ee dy si uac :ee, si u qonghau :ee, viw itcer siangbin ee qiamr kacc lrai, huanrnarr hxunn qapp sinn, qutjad qap qutcew, byy m cxir zip puar kuix, lenrr simlai jiaxee liamrtauu qapp juxir iarr byy m qamwcad.
13 Qycc soxx congwjy :ee, dirr Ix ee binrjingg byy jit hxang kamr bat; dyrr si banrmic henx kuix lorcud dirr simxpnuar lanw :ee ee bak-jingg.
14 Soxiw lanw ixqing’ u dua ee Jewsitauu, Siongrder ee Qniaw, Jesus. Ix qingquer hiaxee tnix, dyrr diyhh jipsiuw soxx singzin :ee.
15 In'ui lanw ee Jewsitauu m si be e textiab lanw longxjongw ee luanxziok, si huanrsu vnivnii u siurr cir, jixsirr Ix byy jue.
16 Soxiw lanw diyhh hyxdnaw jiurqin undenw ee jyrui, tangx siurr linbinw, iarr did diyc undenw, juer jiksii ee vangjan.
5 In'ui dui' langg ee diongqanx soxx qingw ee jewsitauu longxx si uirdiyhh langg, dirr quanhe Siongrder ee su laii setlip, tangx uirdiyhh juerquar henr lexmic qapp jewsu.
2 Ix qiwzenn hro nngxjniaw soxx uikunr, jiacc e texliong m jai'ngiaw qapp sitbee ee langg.
3 Soxiw ix ingqaix uirr vunxsinx, iarr uirr vecsnir, uirdiyhh jue laii henr jrer.
4 Qycc jitt xee junquir, m si langg qaqi cruw :ee, jixu hro Siongrder driaur :ee, cincniu Aalon jidngiu.
5 Cincniu anxnix, Krist iarr m si qaqi jrunx juer Jewsitauu, si hitt xee duiww Ix qongw, "Liw dyrr si Guaw ee Qniaw, Guaw qinaxzit snix Liw."
6 Dirr vadd xui iarr qongw, "Liw ingxuanw juer jewsix, jiauww Melqizedek ee vanlet."
7 Krist dirr Ix diamr ziogtew ee zit, ing cud lat auqiyr, qycc lrauu bagsaiw, henr qidyw kunxqiuu hro hitt xee e qiur Ix cud siw :ee, qycc in'ui Ix ee qingwkenn did diyc tniax .qnir,
8 Suizenn juer Qniaw, iarr dui' soxx sriu jiaxee koxlan laii yc sunrhok.
9 Ixqing’ jniaa juer uanjuann, dyrr juer huanrnarr sunrhok Ix ee langg ingxuanw jinxqiur ee qinguann;
10 Hro Siongrder cxingx Ix juer Jewsitauu, jiauww Melqizedek ee vanlet.
11 Lun qaur jitt xee, guanw u jerje ue rair qongw, mrquxx yh did quewbingg, in'ui linw hnirkangx dun ee enqor.
12 In'ui lun qaur sii ee quw, linw guanvunw diyhh juer sensnix :ar, suacc iauxx kiamwing langg' jiong' Siongrder ee ue, jiaxee siauxhak ee kixtauu qar linw; linw dyrr qycc jniaa juer kiamwing linx, byy kiamwing gnoxqog :ee.
13 Huanrnarr jiac linx :ee, byy lauxlen gi ee dyrliw; in'ui ix si ngex-aw.
14 Dogdok diongxsingg ee langg jiac gnoxqog, inx ee simkiaur dui' lenrsip laii lenrdat, qaur e hunvet hyxpnaiw.
6 Soxiw Krist dyrliw ee cohak, lanw cniaw vangwhe lehh, laii diwir jinwvo qaur uanjuann; benw qycc he derqix, dyrr si huanxhuew laii tuatli jiaxee siw siw ee soxx qniaa, qapp sinr Siongrder,
2 Jiaxee sew ee lexsor, ixqip hnua ciuw, sixlangg qycc uac, qapp ingxuanw ee simxpnuar, jiaxee qauwhunr.
3 Siongrder narr jrunw, guanw dyrr beh anxnix qniaa.
4 In'ui langg ixqing’ bad did diyc qngx jiyr, sriu diyc tnix nirr ee unsur, u hxun dirr Singwsinn,
5 Qycc sriu diyc Siongrder ee hyw ue, qapp decc laii ee sewqair jiaxee quanlingg,
6 Au .laii vuervuan, dyrr be e hro inx qycc nguarsinx laii huanxhuew; in'ui inx qaqi qycc dingr Siongrder ee Qaniw dirr sibzirqer, laii henxbingg lingziok Ix.
7 Toxde jiac diyc dniardnia lyc ee horjuiw, laii snix caiwsex, hap jycsitlangg ee loring, dyrr did diyc Siongrder ee suwhog;
8 Narr snix cauxcir qapp jidlee, dyrr siurr kiwsag, qin siurr jiuwjow ee dervo, ix ee qetqiok dyrr si siyliyx .kir.
9 Soxx tniar ee hniadi ar! Guanw suibongw anxnix qongw, danrsi cimx sinr linw dagg hxang kacc ngiaa jex, qycc sriok dirr did qiur.
10 In'ui Siongrder m si byy qongdy, laii be qir did linw ee qangx, qapp linw uirdiyhh Ix ee miaa soxx henxbingg ee zin'air; linw vingsor hogsai jiaxee singwdoo, qaur dnaxx iauxx hogsai inx.
11 Guaw rair linw dagg langg iuguann henxcud jitt hy ee unkunn, hro linw ee ngwbang muaxjiog qaur lorbuew;
12 Hro linw byy drir qaur vindnua, dyrr si yc hiaxee dui' sinr qapp tunlunw laii singjiab jiaxee ingwunw ee langg.
13 Dnaxx Siongrder ingwunw Ablaham ee sii, in'ui byy kacc dua :ee tangx qiw laii jiuwjua, dyrr qiw vunxsinx laii jiuwjua qongxx,
14 "Guaw beh suwhog liw, qetnix liw ee horer."
15 Cincniu anxnix, Ablaham gauu tunlunw, dyrr did diyc soxx ingwunw :ee.
16 In'ui langg si qiw kacc dua :ee laii jiuwjua, iarr ing jiuwjua juer sna' jnex ee qetbuew, laii quatdnia ix.
17 Anxnix, Siongrder rair beh qikgua henxbingg Ix ee jixir be iik, hro hiaxee singjiab ingwunw ee langg jaix, jiacc ing jiuwjua laii juer jingwqnir;
18 Beh dui' nng hxang be iik ee su, Siongrder soxx be e vehcat :ee, hro lanw u dua dua ee an'uir, dyrr si lanw ixqing’ siamw .kuix, laii knii diauu soxx he dirr taujingg ee ngwbang.
19 Cincniu linghunn ee dniar, prax dirr dniuwlii lai, qenqor byy isuaw.
20 Jesus juer senhongx, ixqing’ uirdiyhh lanw zip kir hiax, jniaa juer ingxuanw ee Jewsidniuw, jiauww Melqizedek ee vanlet.
7 Jitt xee Melqizedek dyrr si Salem ee ongg, iarr si Jiww Quann Siongrder ee jewsix, jaw duw diyc Ablaham taii ngiaa jiaxee ongg dyr .laii ee sii, qra ix jiokhog :ee;
2 Ablaham iarr jiong' itcer soxx did .diyc .ee, tiux jap hxun jit hro ix (ix ee miaa huan'ik dyrr si gi ee ongg, qycc si Salem ee ongg, dyrr si ving'anx ongg.)
3 Ix byy ve byy buw, byy sewhe, by sizit ee kixtauu, byy uahmia ee lorbuew, si cincniu Siongrder ee Qniaw, quxdngg decc juer jewsix.
4 Cir sniu senjow Ablaham jiong' soxx did diyc siongrdingw ee mic, tiux jap hxun jit hro ix, hitt langg junquir si qaur jnaixngiu.
5 Dnaxx Levi ee qniaxsunx, damdngx jewsix ee jitt xee, suizenn qapp vecsnir longxx si Ablaham ee horer, vnivnii si hniadi, iauxquxx hrong bingrling, jiauww ludhuad duiww vecsnir tec jap hxun jit;
6 Danrsi hitt xee byy sriok Levi ee sewhe :ee, bad dui' Ablaham tec jap hxun jit, qycc qra did diyc jiaxee ingwunw :ee jiokhog.
7 Sirser hro sirdua jiokhog, jex si byy tangx venrvog.
8 Dnaxx dirr jiax tec jap hxun jit :ee, longxx si e siw ee langg; narr dirr hiax, si hitt xee u siurr qanjingr, qongxx ix si uac :ee.
9 Qycc iarr e qongw did qongxx, lenrr tec jap hxun jit ee Levi iarr bad jairdirr Ablaham laii lap jap hxun jit;
10 In'ui Melqizedek duw diyc Ablaham ee sii, Levi iauxquxx dirr inx jow ee sinkux.
11 Jaw vecsnir sriu ludhuad, si dirr Levi-jok jewsix ee jitzim xe; narr dui' ix e did diyc uanjuann, dyrr micsaiw lingrgua qycc hingx kiw jit xee jewsix, jiauww Melqizedek ee vanlet, byy qongw jiauww Aalon ee vanlet ar?
12 Jewsix ee jithun ixqing’ quexngua, dyrr ludhuad iarr dikkag diyhh quexngua.
13 In'ui jiaxee ue soxx qiw :ee, si sriok dirr vadd xee jipair, inx diongqanx m bad u langg qunsuii dirr jewdnuaa.
14 Lanw ee Jruw bingg bingg dui' Judea cud; lun jitt xee jipair, Moses m bad tee kiw jewsix ee jitbu.
15 Qycc narr jiauww Melqizedek ee kuanxsid, u hingx kiw vadd xee jewsix, anxnix dyrr dingxbin soxx qongw :ee jamxzenn kacc bingg,
16 Dyrr si ix m si jiauww ziogtew qaiwbing ee hxuad laii setlip, si jiauww be huixhuai ee uahmia ee quanlingg,
17 In'ui u qanjingr Ix qongxx, "Liw ingxingw juer jewsix, jiauww Melqizedek ee vanlet."
18 In'ui jingg ee qaiwbing huewbyy, si uirdiyhh ix ee luanxziok qapp byy lirig,
19 (In'ui ludhuad byy juer jit hxang qaur uanjuann,) jiacc setlip qyckacc hyw ee ngwbang, dyrr si lanw soxx dui' ix laii cinqin Siongrder :ee.
20 Qycc in'ui Ix m si byy dui' jiuwjua laii setlip;
21 Inx hiaxee lip juer jewsix byy dui' jiuwjua, dogdok jitt xee dyrr dui' jiuwjua, in'ui setlip Ix :ee u qra Ix qongw, "Jruw jiuwjua, byy tewhuew, liw ingxingw juer jewsix."
22 Cincniu anxnix, Jesus juer qyckacc hyw ee iog ee vyxzinn.
23 Hiaxee juer jewsix :ee, in'ui hro siw joxqeh, be e quxdngg, soxiw u jin' je langg.
24 Dogdok jitt xee, in'ui ingxingw dilehh, u be quexngua ee jewsijid.
25 Soxiw huanrnarr dui' Ix jiurqin Siongrder ee langg, Ix ee qiur inx qaur uanjuann, in'ui Ix dngdngg uac, laii ter inx qiqiuu.
26 In'ui jitt hy ee jewsitauu hap lanw ee kiamwing; Ix si sxingr, byy pnaiw, byy lasamm, lirkuix juerzinn, jniaa juer kacc quann jiaxee tnix;
27 Ix mrbenw cincniu hiaxee jewsitauu, diyhh zidzit dairsingx uirdiyhh qaqi ee jue, au .laii uirdiyhh vecsnir ee jue, laii henr jrer; in'ui Ix henr vunxsinx, dyrr juer jit xe jniaa jitt xee su.
28 In'ui ludhuad setlip nngxjniaw ee langg juer jewsitauu; dogdok dirr ludhuad au jiuwjua :ee e setlip Qniaw, ingxuanw juer uanjuann ee Jewsitauu.
8 Dnaxx guanw soxx qongw qidiongx derr id iauwqinw :ee, dyrr si lanw u cincniu jitt hy ee Jewsitauu, ixqing’ jre dirr tnidingw dua uigiamm ee vyxjy ee duarvingg,
2 Ix juer singwsow qapp jinx ee huerbo ee Ce'ing, jitt xee huerbo si Jruw soxx sed :ee, m si langg soxx sed :ee.
3 Huanrnarr jewsitauu longxx uirdiyhh henr lexmic qapp jewsu laii setlip, soxiw jitt xee Jewsitauu iarr dikkag diyhh u soxx henr.
4 Setsuw Ix dirr de nirr, dyrr byy juer jewsix, in'ui ixqing’ u jiauww ludhuad decc henr lexmic :ee.
5 Inx soxx ing laii hogsai :ee, dyrr si tnix nirr ee mic ee sxiong qapp ngiaw; cincniu Moses beh jy huerbo ee sii, sriu diyc bingrling qongxx, "Liw diyhh qinxsin, jiauww dirr snuax-dingw soxx jixsi liw ee kuanxsid, laii jy dagg hxang mic."
6 Dnaxx Jesus ixqing’ did diyc kacc junquir ee jitbu, dyrr naxx Ix juer qyckacc hyw ee iog ee diongvyw, dyrr si ing qyckacc hyw ee ingwunw laii setlip :ee.
7 In'ui tauu jit xee iog narr byy tangx hiamm, dyrr byy sniu beh lip derr zi ee iog.
8 In'ui u hiamm inx, Ix dyrr qongw, "Liw knuar, sizit beh qaur, Guaw beh qapp Islael ee qrex, ixqip Judea ee qrex, singlip sinx ee iog;
9 M si jiauww Guaw qapp inx ledjow soxx lip ee iog, si dirr kanx inx ee ciuw, cua inx cud Egipt-de ee sii soxx lip :ee; in'ui inx byy siongsiongg siuw Guaw ee iog, Guaw iarr byy knuawqor inx."
10 Jruw qycc qongw, "Jiaxee zit liauxau, Guaw qapp Islael ee qrex soxx beh lip ee iog si jitt xee, dyrr si Guaw beh jiong' Guaw ee ludhuad he dirr inx ee taunauw, kig dirr inx ee simx. Guaw beh juer inx ee Siongrder, inx beh juer Guaw ee vecsnir.
11 Inx dagg langg jionglaii byy qawsi inx vunxsniaa ee vecsnir qapp inx dagg langg ee hniadi, qongw, 'Liw diyhh bad Jruw'; in'ui dui' ser qaur dua, inx longxx beh bad Guaw.
12 Guaw beh linbinw inx ee vutgi, byy qycc qiwliam inx ee juerog."
13 Qiwzenn u qongw sinx ee, dyrr si hro jingg ee iog juer qu. Huanrnarr qu laii sueter :ee dyrr si jiongqin byy .kir.
9 Dnaxx hitt xee jingg ee iog iarr u hogsai ee lexgii, qapp sriok sewqanx ee singwden.
2 In'ui u virvan huerbo, taujingg qingx qiyr juer Singwsow; hitt lairbin u dingdaii, dyh, qapp vailet ee vniaw.
3 Derr zi xee dniuwlii au qycc u huerbo, qiyr juer Jiwsingwsow;
4 Hiax u qimhniudnuaa, qapp qa'nng ee vauqimx ee iokqui, lairbin u kngr manna ee qim'oo, Aalon vuh gee ee qnuaiw-aw, qapp iog ee jiyhvix nng der;
5 Qxui-dingw u ingqngx ee qilorvingx ziakamr si'unsow. Jitt quiw hxang dnaxx cniaw benw siongser qongw.
6 Jiaxee mic ixqing’ jiauvi, jewsix siongsiongg zip taujingg qingx ee huerbo, jin jiaxee hogsai ee su.
7 Narr derr zi qingx, jixu jewsitauu dagg nii jit vaiw qaqi zip .kir, byy jit vaiw byy duar huih, uirdiyhh vunxsinx qapp vecsnir ee cywgo laii henr.
8 Singwsinn anxnix jixbingg, jingg ee huerbo iauxx dilehh ee sii, zip jiaxee singwsow ee lo dyrr be henxbingg.
9 Jex si beh juer henrjai ee piwzu, dyrr si jiauww anxnix henr lexmic ee jewsu, be e hro hogsai ee langg jiauww liongsimx laii did diyc uanjuann.
10 In'ui hiaxee, qapp limjiac, ixqip dagg dringw hy ee sew vutqyr si juer ziogtew ee lexgii, setlip laii tingwhau qaixjingr ee sii.
11 Dnaxx Krist ixqing’ qaur, juer jionglaii jiaxee hyw su ee Jewsitauu, qingquer kacc dua kacc jiaujngg ee huerbo, m si langg ee ciuw soxx kixjy, dyrr si qongxx byy sriok dirr jitt sewqanx :ee.
12 Ix iarr m si ing ngiuu qapp guu-aw ee huih, si ing qaqi ee huih, zip singwsow jit vaiw dyrr qauwgiac, did diyc ingxuanw ee sioghuee.
13 In'ui guu, ngiuu ee huih, qapp gujingw-aw ee hux, hiur dirr byy cingkir ee langg, siongrcniaw e hro inx jniaa sxingr qaur dirr ziogtew cingkir;
14 Hyhongw Krist dui' ingxuanw ee Sinn, henr qaqi byy hacuu hro Siongrder, Ix ee huih qamxx byy qyckacc e cingkir linw ee liongsimx, tuatli jiaxee e drir siw ee soxx qniaa, laii hogsai jin'uac ee Siongrder ar?
15 In'ui anxnix, Ix juer sinx iog ee diongvyw, ing siw laii siok jingg iog ee sii soxx huan ee juerquar, si beh hro siurr driaur ee langg did diyc ingxuanw ee giap ee ingwunw.
16 Huanrnarr u lauu uibing, dikkag diyhh u lauu uibing ee langg ix siw ee vinqir.
17 In'ui langg siw, uibing dyrr qenqor; lauu uibing ee langg iauxx uac dilehh, uibing beh tacc u lat?
18 Soxiw jingg ee iog, iarr m si byy ing huih laii setlip.
19 In'ui Moses ixqing’ jiauww ludhuad jiong' longxjongw ee qaiwbing tuann hro jiongww vecsnir, dyrr pangg guu-aw qapp ngiuu ee huih, ixqip juiw qapp ju'angsig ee xmii qapp gucikcauw, laii hiur hitt vunw ceh qapp jiongww vecsnir, qongw,
20 "Jitt xee dyrr si Siongrder soxx huanhur linw ee iog ee huih."
21 Qycc iarr jiauww anxnix, ing huih hiur huerbo qapp soxx ing laii hogsai ee kiwqu.
22 Qycc jiauww ludhuad, dagg hxang mic cavutdyx longxx si ing huih hro ix cingkir, narr byy lrauu huih, dyrr byy siawbenw.
23 Jiauww tnidingw ee ngiu soxx juer jiaxee mic, dikkag diyhh ing jiaxee kir hro cingkir; dirr tnidingw ee guanmic, diyhh ing viw jex kacc hyw ee jrer hro ix cingkir.
24 In'ui Krist m si zip langg ee ciuw soxx jy ee singwsow, laii juer jinx singwsow ee ngiaxsiong :ee, si zip dirr jinx ee tnix, dnaxx uirdiyhh lanw jiaxee, henxhen dirr Siongrder ee binrjingg;
25 Ix iarr benw dniardnia henr qaqi, cincniu hiaxee jewsitauu, dagg nii ing guu, ngiuu ee huih, zip jiaxee singwsow;
26 Narr anxnix, dyrr Krist dui' congwjy sewqanx ixlaii, diyhh dniardnia siurkow; dogdok dnaxx dirr jiaxee sewdai ee lorbuew, Ix jit vaiw cuthen, henr vunxsinx juer jrer, laii druu kir jue.
27 Qycc jiauww soxx juwdnia :ee, langg u jit vaiw siw, ixau u simxpnuar.
28 Anxnix, Krist ixqing’ jit vaiw duw diyc henr, laii damdngx jerje langg ee juerquar, beh derr zi vaiw, duiww ngwbang Ix ee langg cuthen, laii qiur inx; hitt sii cuthen, dyrr qapp jue byy qansiap.
10 In'ui ludhuad qiwzenn qandna' u jionglaii hyw su ee ngiaw, byy hiaxee mic ee jinx hxingg, ingxingw berdangr ing dagg nii siongsiongg decc henr snadangg ee jrer, hro cinqin ee langg did diyc uanjuann.
2 Narr si e, dyrr henr jrer ee su qamxx byy jaw dyrr tingsuah mah? In'ui hogsai ee langg jid'err cingkir, dyrr liongsimx byy qycjaiww u jue.
3 Danrsi dui' jiaxee jewmic si hro langg dagg nii qir did jue.
4 In'ui guu, ngiuu ee huih be e druu kir jue.
5 Soxiw Ix laii zip sewqanx, dyrr qongw, "Jewsu qapp lexmic Liw m air, Liw bad qra Guaw virvan sinkux;
6 Siyjer qapp sioghuejer, Liw byy hnuahiw.
7 Hitt sii Guaw qongw, 'Liw knuar, Guaw laii lar, Guaw ee su qiwjair dirr ceh nirr, Siongrder, Guaw laii si beh qniaa Liw ee jixir.'"
8 Dingxbin ixqing’ qongw, "Jewsu qapp lexmic, siyjer qapp sioghuejer, Liw m air, iarr byy hnuahiw (jiaxee si jiauww ludhuad laii henr :ee)."
9 Au .laii qongw, "Liw knuar, Guaw laii si beh qniaa Liw ee jixir." Ix si druu kir dairsingx :ee, beh setlip duewau :ee.
10 Dirr jitt xee jixir, dui' Jesus Krist jit vaiw henr sinkux, lanw did diyc jniaa sxingr.
11 Qycc qniwnarr jewsix dagg zit kia lehh laii hogsai, dniardnia henr hiaxee snadangg ee jrer, dyrr ingxingw be e druu kir jue.
12 Dogdok Krist, qiwzenn henr jit xee jrer qaur dirr ingxuanw, dyrr jre dirr Siongrder ee duarvingg;
13 Ixau tingwhau Ix jiaxee duiwdik he juer Ix ee kadah'iw.
14 In'ui Ix ing jit vaiw henr jrer, hro jiaxee jniaa sxingr ee langg ingxuanw juer uanjuann.
15 Singwsinn qra lanw juer qanjingr, in'ui Ix ixqing’ u qongw,
16 "Jruw qongw: Jiaxee zit liauxau, Guaw qapp inx soxx beh lip ee iog si jitt xee, Guaw beh jiong' Guaw ee ludhuad he dirr inx ee simx, kig dirr inx ee taunauw";
17 Au .laii dyrr qongw, "Inx ee juerog, inx ee vuthuad, quatduan byy qycc qir .did."
18 Jiaxee qiwzenn siawbenw, dyrr byy qycc uirdiyhh jue henr jrer.
19 Soxiw hniadi ar, lanw dirr Jesus ee huih qiwzenn did diyc hyxdnaw zip singwsow,
20 Dui' Ix soxx qra lanw kuix sinx qapp uac ee lo, anww dniuwlii qingquer :ee, jitt xee dniuwlii dyrr si Ix ee sintew;
21 Qycc qiwzenn u dua Jewsix dirliw Siongrder ee qrex,
22 Simx ixqing’ siurr hiur benw hro liongsimx jikvi, sinkux iarr ixqing’ siurr cingjuiw sew, lanw diyhh ing jinsit ee simx, ciongmuaw ee sinr, laii cinqin Siongrder.
23 Lanw ixqing’ u singzin soxx ngwbang :ee, dnaxx diyhh qenqor jitt xee singzin byy iydang, in'ui hitt xee ingwunw lanw :ee si sinwsit.
24 Qycc diyhh dairqex sna' quanwqor, laii qig kiw zin'air qapp qniaa hyw.
25 M tangx vangwsuah linw ee jurhue, cincniu hitt quaw quanwsir anxnix :ee, dyrr si diyhh sna' kuanwbenw; qiwzenn knuar qnir hitt zit qin :ar, qyckacc diyhh anxnix.
26 In'ui lanw ixqing’ did diyc jinx jaix jinliw, au .laii narr qamsimx decc huanrjue, dyrr byy qycc u siogjue ee jrer,
27 Dogdok qniahniaa laii tingwhau simxpnuar, qapp beh tunbet duiwdik ee zedhuew.
28 Kiwjuat Moses ee ludhuad :ee, u nng~snax langg juer qanjingr, dyrr hro ix siw byy linbinw;
29 Hyhongw tunxdac Siongrder ee Qniaw, jiong' hro vunxsinx jniaa sxingr ee iog ee huih juer siok mic, qycc buxban si'unx ee Singwsinn, linw sniu hitt hy langg ingqaix sriu ee hinghuat diyhh qex zuarr dang ar?
30 In'ui lanw jaix jirjui u qongw, "Sin'uanx jairr Guaw, Guaw beh vywingr." Qycc qongw, "Jruw beh simxpnuar Ix ee vecsnir."
31 Ham lyc dirr jin'uac Siongrder ee ciuw, jin' tangx qniax ar!
32 Linw diyhh qir did jingg did diyc qngx jiyr liauxau, zimxsiu huanrlan ee dua qaujenr hiaxee zit;
33 Iacc si siurr luexme qankow, hro langg vniwlang juer hiwcud; iacc si langg' siurr jitt hy ee qankow, linw iarr qapp ix u hxun.
34 In'ui langg' dirr syxlen ee diongqanx, linw bad textiab ix; langg' cniuw linw ee giap, linw hnuahiw zimxsiu, jaix qaqi u qyckacc hyw, qyckacc quxdngg dilehh ee giap.
35 Soxiw byc did kiwsag linw hyxdnaw ee simx, in'ui jex u dua vywsniuw.
36 Linw diyhh tunlunw, hro linw qniaa Siongrder ee jixir ixau, tangx sriu soxx ingwunw :ee.
37 "In'ui qycc diap aw quw nardnia, hitt xee decc laii :ee beh qaur, Ix byy beh encenn.
38 Danrsi guaw ee girlangg beh dui' sinr laii uac; setsuw ix qiuquec, guaw ee simx byy hnuahiw."
39 Jongwsirr lanw m si qiuquec drir qaur dimlunn :ee; si u sinr, drir qaur linghunn did qiur :ee.
11 Sinr dyrr si soxx ngwbang :ee ee sidjai, qapp be knuar .qnir ee su ee vinjunw.
2 In'ui dirr jitt xee, qoxjaxlangg u did diyc qanjingr.
3 Dui' sinr, lanw jaix jiaxee sewqair si dui' Siongrder ee ue laii jyrjniaa; anxnix soxx knuar .qnir .ee m si dui' e knuar .qnir .ee laii jniaa.
4 Dui' sinr, Abel henr jrer hro Siongrder, viw Kain kacc hyw; dui' anxnix did diyc qanjingr ix si gi, dyrr si Siongrder knuar ix ee lexmic laii juer qanjingr; qycc dui' jitt xee sinr, ix siw liauw, iauxdecc qongxue.
5 Dui' sinr, Enoc siurr censuaw, drir qaur byy qnir diyc siw, langg cue ix be diyc, in'ui Siongrder censuaw ix; mrquxx dirr be censuaw ee dairsingx, ix ixqing’ u did diyc hro Siongrder hnuahiw ee qanjingr.
6 Setsuw byy sinr, dyrr be e hro Siongrder hnuahiw; in'ui cinqin Siongrder :ee, dikkag diyhh sinr Ix u, iarr sinr Ix vywsniuw hiaxee qriuu Ix ee langg.
7 Dui' sinr, Noah dirr be knuar .qnir ee su, ixqing’ did diyc bigsi, dyrr qingwuir, laii virvan dua junn, qiur ix ee qequanr; dui' anxnix laii dring sewqanx ee jue, qycc did diyc singjiab jiauww sinr ee gi.
8 Dui' sinr, Ablaham siurr driaur ee sii, dyrr sun bingrling cud .kir, qaur jionglaii beh did diyc juer giap ee de; ix cud .kir, m jaix beh kir daxlyc.
9 Dui' sinr, ix dyrr cutgua dirr soxx ingwunw ee de, cincniu dirr m si qaqi ee de, qapp Isaac, Jakob, dyrr si snaqab singjiab qangg jit ngiu ee ingwunw :ee, kiarkiw dirr vowvnii;
10 In'ui ix ngwbang u derqix ee sniaa, dyrr si Siongrder soxx qing'ingg kixjy :ee.
11 Dui' sinr, Salah suibongw quer singsanw ee nihuer, iauxx did diyc e huai'in, in'ui ix liac ingwunw ix :ee juer sinwsit.
12 Soxiw dui' jit langg, qycc si cincniu ixqing’ siw :ee, snitnuar cincniu tnicnix ee je, cincniu haixsuax ee be sngr .did.
13 Jiaxee longxx si jiauww sinr laii siw, m bad did diyc soxx ingwunw :ee, dogdok hng hng knuar, hnuahiw laii danxjih, qycc zin qaqi si dirr derjniu juer langkeh, juer cutgua :ee.
14 In'ui anxnix qongw :ee, si viauxbingg inx decc cue jit xee joxqex.
15 Inx narr siauwliam soxx dui' hiax cud .laii ee de, dyrr u tangx dyr .kir ee qihue.
16 Jongwsirr, dnaxx inx himbo qyckacc hyw :ee, dyrr si dirr tnix nirr :ee; soxiw Siongrder virr cxingx juer inx ee Siongrder, byy liac juer qenwsiaur; in'ui Ix ixqing’ ter inx virvan jit xee sniaa.
17 Dui' sinr, Ablaham siurr cir ee sii, henr Isaac; dyrr si hitt xee singsiu jiaxee ingwunw :ee henr ix dogsnix ee qniaw.
18 Bad u qra ix qongw, "Dui' Isaac snix :ee beh cxingx juer liw ee horer."
19 Ix liac juer Siongrder e hro ix dui' sixlangg diongx qycc uac, soxiw dyrr piwzu qongxx did diyc ix dui' siw dywdngw .laii.
20 Dui' sinr, Isaac lun jionglaii ee su, jiokhog Jakob qapp Esau.
21 Dui' sinr, Jakob limjiongx ee sii, qra Josef nng xee qniaw jiokhog; uaw qnuaiw-aw laii qingwvair.
22 Dui' sinr, Josef limjiongx ee sii, liam diyc Islael ee horer beh cud Egipt; qycc uirdiyhh ix ee quthaii laii huanhur.
23 Dui' sinr, Moses cutsir ee sii, ix ee verbuw in'ui knuar qnir qniaw cingsiur, dyrr qra ix kngr bat snax guehzit, iarr m qniax ongg ee bingrling.
24 Dui' sinr, Moses ixqing’ diongxsingg, m singzin juer Falaoh ee jaboxqniaw ee qniaw,
25 Kacc air qapp Siongrder ee vecsnir snaqab siurr koxlan, m air jiamrsii hiongxsiu juerog ee kuaiwlok;
26 Ix liac u hxun dirr Krist ee lingziok, viw Egipt ee jaivyw kacc quiwkir; jex si ix ngwbang vywsniuw ee enqor.
27 Dui' sinr, ix lirkuix Egipt, byy qniax ongg ee siurkir; qensimx zimxnai, cincniu knuar qnir soxx be knuar .qnir ee Jruw.
28 Dui' sinr, laii sed Vnuaquewjeh, qapp buah huih ee lew, benw did jaubet dua-qniaw kap diyc inx.
29 Dui' sinr, inx quer Angg Haiw, cincniu qniaa dax de; Egiptlangg cir qniaa, dyrr dimm .lyc .kir.
30 Dui' sinr, sec Jeliqo Sniaa ligquer jit zit, sniaa dyrr dyxhuai.
31 Dui' sinr, ciongqix Rlahap ing hyvingg jiaplap sewjyh, soxiw byy qapp m sunrtanr ee langg snaqab bedbyy.
32 Guaw beh qycc qongw simxmih ar? Beh qongw Gideon, Balak, Samson, Jeftah; qapp David, Samuel, ixqip jiaxee sendix, dyrr sii e byy qauwgiac.
33 Hiaxee langg, dui' sinr, taii ngiaa jiaxee qog, qniaa qonggi, did diyc ingwunw, nic sraix ee cuir,
34 Pachuax huexiam, siamxvi lrai dyx, ziok jniaa juer qiongg, qaujenr iongxbingw, qongr puar guarvangx ee jenwdin.
35 U hurzinlangg did diyc inx ee cinlangg dui' siw qycc uac; iarr u langg siurr kokdok ee hinghuat, m guan siurr sioghuee, si air did diyc kacc hyw ee qycc uac.
36 Qycc u langg siurr hiwlang, vnipah, ixqip syxlen, qnuaiqnax jiaxee cir.
37 Qycc u langg siurr jiyhtauu dimr, quxaw qur, siurr iuxhik ee cir, hro dyx taii siw, cing mingiuu, snua'ngiuu ee puee, punpyx dagg soxjai, duw diyc songwhiongx, huanrlan, vyrgiok;
38 Uree dirr kongwiaw, dirr snuaniaw, dirr jiyhdong, dirr derhet, siwquer piauliuu. Jiaxee langg si sewqanx be kamx did u :ee.
39 Inx longxx ixqing’ dui' sinr did diyc qanjingr, danrsi m bad did diyc soxx ingwunw :ee;
40 In'ui Siongrder qra lanw dairsingx virvan qyckacc hyw ee su, si beh hro inx narr byy lanw, dyrr be did diyc uanjuann.
12 Ixqing’ u hiacc je juer qanjingr :ee, cincniu hunn uii lanw, dyrr diyhh vangwhe dagg hy ee dang dnar, qapp kuair kuair dnivnuar lanw ee jue, ing tunlunw laii jauw soxx anvaii dirr lanw taujingg ee lorjam,
2 Diyhh juwsinn knuar Jesus, dyrr si juer sinr ee guantauu qapp jniaa buew :ee. Ix uirdiyhh soxx anvaii dirr Ix taujingg ee kuaiwlok, dyrr byy iauwqinw lingziok, zimxsiu sibzirqer, dnaxx jre dirr Siongrder vyxjy ee duarvingg.
3 Ix tunlunw pnaiw langg anxnix hinggik Ix, linw diyhh sniu, benw did linw ee simx sitjir laii iawsen.
4 Linw qapp juerog sna' duiwdik, iauxx m bad dixdngx qaur lrauu huih.
5 Qycc linw be qir did hitt xee ing lixkir krngr linw cincniu krngr qniaw ee ue, qongw, "Guaw ee qniaw ar, Jruw ee qingxqair byc did knuawkinx; hro Ix jikvi, byc did sitjir.
6 In'ui Jruw soxx tniar :ee, Ix dyrr e qra qingxqair; qycc huanrr soxx jiaplap ee qniaw, Ix dyrr e ing vnxix qra pah."
7 Linw decc tunlunw, si juer qingxqair ee loring; Siongrder kuanxtai linw cincniu qniaw; taixtyw u qniaw byy hro laurve qingxqair ar?
8 Jiongww qniaw soxx u hxun ee qingxqair linw narr byy sriu, dyrr si taux snix :ee, m si qniaw.
9 Qycc lanw bad u ziogtew ee ve qingxqair lanw, lanw siongrcniaw qingwuir ix, hyhongw lanw ee sinn ee Ve, qamxx m qyckacc diyhh hanghok Ix, laii did diyc uac mah?
10 In'ui hiaxee si jiamrsii cutjai qaqi ee iwsur laii qingxqair lanw; dogdok jitt xee si uirdiyhh lanw ee lirig, hro lanw u hxun dirr Ix ee singwqed.
11 Qniwnarr qingxqair ee su, dirr dngsii jiauww knuar m si hnuahiw, si iubun; danrsi au .laii, dyrr dirr hiaxee dui' qingxqair laii lenrdat ee langg, qed ving'anx ee quexjiw, dyrr si gi ee quexjiw.
12 Soxiw kax sngx ciuw nngw :ee, linw diyhh hro ix iongxqnia;
13 Uirdiyhh linw ee kax virvan dit dit ee lo, benw did vaixkax ee langg uaicuac, huanxdngw diyhh hro ix did diyc rix hyw.
14 Diyhh diwir qapp jiongww langg hyhok, ixqip jniaa sxingr, in'ui narr m si sxingr, byy langg e qnir diyc Jruw.
15 Iarr diyhh qinxsin, qniax u langg sitlyc Siongrder ee xunx; qniax u kow ee qinx huatsnix laii qiauxziauw linw, drir qaur jerje langg bag lasamm;
16 Qniax u imluan :ee, iacc si dimlik sewjingg :ee, cincniu Esau, ix in'ui jit dxngr jiac, bre dua-qniaw ee giap.
17 Linw jaix, ix au .laii rair beh singjiab jiokhog ee sii, u duw diyc kiwsag, in'ui ix cue byy huanxhuew ee lo, suizenn lrauu bagsaiw vikced qriuu, iarr be did .diyc.
18 Dnaxx linw soxx qaur :ee m si e bongx did ee snuax, jex snuax u huexiam ee snuax, qapp u bat hunn, oamr, dua hongx,
19 Hyrtauu ee imx, ixqip gengiw ee sniax; tniax .qnir ee langg longxx qriuu qongxx byc did qycc qapp inx qongw.
20 In'ui soxx bingrling :ee, inx drngx be diauu, qongw, "Dyrr narr jauxsiur uaw diyc snuax, iarr diyhh ing jiyhtauu qra dimr siw."
21 Qycc soxx knuar .qnir qigqii tangx qniax, drir qaur Moses qongw, "Guaw qniax qaur gniauggniauc cuah."
22 Dogdok linw soxx qaur :ee dyrr si Zion Snuax, jin'uac Siongrder ee sniaa, tnidingw ee Jelusalem, hiax u banrban ee tnisair,
23 U hiaxee miaa qir dirr tnix nirr ee dua-qniaw ee jurhue qapp qonghue, u simxpnuar jiongww langg ee Siongrder, u did diyc jiaujngg ee girlangg ee linghunn,
24 U Sinx Iog ee diongvyw Jesus, qapp soxx hiur ee huih, jitt xee huih soxx qongw :ee viw Abel soxx qongw :ee kacc hyw.
25 Diyhh qinxsin, byc did qirjuat duiww linw qongw :ee; in'ui dirr de nirr laii tuann bingrling :ee, narr qirjuat ix, siongrcniaw be e dysiamw, hyhongw lanw uivue dui' tnix tuann bingrling :ee ar?
26 Dongsii Ix ee sniax hro de dinxdang; danrsi dnaxx Ix u ingwunw qongxx, "Iauxx u jit vaiw Guaw m na hro de iycuah, iarr beh hro tnix iycuah."
27 Soxx qongw, "iauxx u jit vaiw", si jixbingg siurr dinxdang ee mic, dyrr si siurr jy ee mic, beh duw diyc censuaw, hro hiaxee byy siurr dinxdang :ee dngdngg dilehh.
28 Soxiw lanw did diyc be e dinxdang ee qog, diyhh u unhui, tangx ing kensingg qingwuir laii hogsai hro Siongrder hnuahiw;
29 In'ui lanw ee Siongrder dyrr si iam iam ee huew.
13 Hniadi ee sna' tniar diyhh quxdngg.
2 Byc did be qir did jiaptai langkeh; in'ui bad dui' jiaptai langkeh, suacc jiaptai diyc tnisair iarr m jaix :ee.
3 Diyhh siauwliam jiaxee siurr qnuaix :ee, cincniu qapp inx snadangg qnuaix; siauwliam siurr vyrgiok :ee, sniu diyc qongxx linw iarr u sinkux.
4 Hun'inx langlangg diyhh jundiong, cngg byy lasamm; in'ui sutongx qnia'imm ee langg, Siongrder beh simxpnuar ix.
5 Simrjiww m tangx tamjaii, liac soxx u :ee juer qauwgiac; in'ui Siongrder u qongw, "Guaw quatduan byy vangwsag liw, quatduan byy lirkuix liw."
6 Soxiw lanw tang hyxdnaw qongw, "Jruw dyrr si vangjan guaw :ee, guaw byy beh qniahniaa. Langg beh sniaw hxuad hro guaw da'uaa?"
7 Jingg inxcua linw, ing Siongrder ee dyrliw tuann hro linw ee langg, linw diyhh siauwliam inx; knuar inx qniajuer ee qetqiok, laii yc inx ee sinr.
8 Jesus Krist jazit, qinaxzit qangg jit ngiu, itdit qaur dairdai.
9 Linw byc did hro capjap qyc'ngiu :ee soxx censuaw, in'ui simx dui' undenw laii qenqor jiacc si hyw, m si dui' hiaxee jiahmic; in'ui ing qangx dirr hiaxee mic :ee, byy lirig.
10 Lanw u jewdnuaa, hogsai dirr huerbo :ee byy qxuann tangx jiac ix.
11 In'ui jingsnix ee huih hro jewsitauu duar zip singwsow laii siogjue, hiaxee jingsnix ee sintew dyrr siyx dirr ngiaa-gua.
12 Soxiw Jesus in'ui beh ing qaqi ee huih hro vecsnir jniaa sxingr, iarr siurkow dirr sniamngg gua.
13 Anxnix lanw iarr diyhh cud ngiaa-gua laii jiurqin Ix, sriu Ix soxx sriu ee lingziok.
14 In'ui dirr jiax lanw byy quxdngg dilehh ee sniaa, si beh cue hitt xee jionglaii :ee.
15 Soxiw diyhh dui' Jesus siongsiongg ing ylyw juer jrer, henr hro Siongrder; jex dyrr si singzin Jruw ee miaa ee cuiwdunn soxx qed ee quexjiw.
16 Dogdok qniaa hyw, qapp sna' qiongqib, linw m tangx be qir .did, in'ui jitt hy ee jrer si Siongrder soxx hnuahiw :ee.
17 Inxcua linw :ee, linw diyhh tniatanr sunrhok inx, in'ui inx uirdiyhh linw ee linghunn qingxsingw, in'ui inx jionglaii diyhh qaux siaur; linw diyhh hro inx ing hnuahiw laii juer, byy ing trow kuir; in'ui jitt xee byy lirig linw.
18 Linw diyhh ter guanw qidyw; in'ui guanw sinr qaqi u jiauww liongsimx, huanrsu air jiauww jingwdit laii qniaa.
19 Guaw ithuad krngr linw qniaa anxnix, hro guaw tangx kacc qinw qycc jiurqin linw.
20 Dnaxx guan ving'anx ee Siongrder, dyrr si bad dirr ingxuanw ee iog ee huih, dui' sixlangg diongx cua ngiuu-qrunn ee dua Bogjiaw, lanw ee Jruw Jesus, qycc kiw .laii,
21 Hro linw dirr dagg hxang hyw su uanjuann, laii qniaa Ix ee jixir; qycc dui' Jesus Krist dirr lanw ee simlai, qniaa Ix soxx hnuahiw ee dairjir; guan ingqngx qruix dirr Ix, dairdai byy suah. Amen.
22 Hniadi ar, guaw siaw dew dew ee puex hro linw, krngr linw jiaplap guaw kuanwbenw ee ue.
23 Linw diyhh jaix lanw ee hniadi Timoti ixqing’ did diyc tauxvangr; ix narr qinw qinw laii, guaw beh qapp ix kir qnir linw.
24 Cniaw linw cingxanx jiaxee iuxcua linw ee langg qapp jiongww singwdoo. An' Itali laii ee langg cingxanx linw.
25 Guan undenw qapp linw jiongww langg dilehh. Amen.