1.
Dingxvox ee jibgi dirr siyxdaur ee sii tethue. Huergirsig iauxx qinrqongrqunw, tauqelangg sudsenx cud .laii sui’ beh cue viwsux vangvan, sutbak ngiaw qnir diyc jit xee siyxjiaxlangg cing qaxx hongw ciaucciauh, kiaux kax kuer ciuw dirr kongwsow ee pongwiw jre, crunx lehh qiux lehh diuduu qamxx beh hiongwjenn siy’ jiycmng. Uaddngxsinx, duiwhongx huatqenr diyc ix, lang ciuxhuex aisaju, cuir ciyr bak ciyr. Tauqelangg vran ciywbin tingxsinx crig uaw qinrjingg, simjong pigpok cingw.
“Vngx Dangxsurdniuw, qiuxqenr,” siyxjiaxlangg an’ iw nirr vreh kiw, ciuw crunw .cud .laii beh sna’ gim.
“Urngiaw qiuxqenr dyrr driyc. Liw jiokk hanxqniaa,” tauqelangg bunxciyr, qapp langkeh dimwciuw.
“Linw qongsix qycc beh cud sinx sanxpinw. Guaw laii tec iyhqongw-aw dngw kir vixvan, tangx laii setqer vaujngx ee ngiursig,” tauu-iy.-buew-vaiw, siyxjiaxlangg qongw diyc iangkir.
“Inx jnuaw e byy qiyr kuaiwdiw tokqiar, suacc hro liw lyqar, cinsinx jauw jitt jua?” tauqelangg lig pni lig bak, henxzenn huew decc drong.
“Si guaw qaqi qongw beh laii tec. Liw m hyw kir quair liw ee harsiok,” siyxjiaxlangg tamxmew qexsueh.
Qongw langg, langg qaur. Taumngg crangr crangr, cing jniuwsig siaju ee siauwlenqex ciuw tec jit vaux siyxvaux hiongr inx jitt vingg laii dua vo qringx.
“Sitlew, sitlew, hro liw decc danw .guaw. Guanw duxjiah decc kuihue,” siauwlenqex bin hiongr siyxjiaxlangg, dngxbak qra tauqex siamx .jit .xe.
“Byy lar, guaw sniu’ jaw laii,” siyxjiaxlangg ciyr ciyr aw rinr, qig jit xee qenwsiaur kuanw.
Siauwlenqex qra ciuw nirr ee huewvaux qaux hro langkeh. Juanqangx vniar laii tec :ee tec .diyc, duewciuw, siyxjiaxlangg qra sreh zip kir puevaux-aw-lai.
Jit ciuw qaux quer jit ciuw, siauwlenqex ee zimrbu suah. “Acc byy, lanw jiacqycc lenlok. Guaw singx sitvuee,” siauwlenqex qongw, qra tauqex ductauu dyrr tewdniuu kir byy ingg ix ee.
Tauqelangg cniaw langkeh kir langkecqingx jre. Kacc dah quw aw, jabcex laii jinr dee.
“Guaw ee qiwdii narr byy dnargo, lanw siongrr buew vaiw qniwbin qaxnaxx si kir jiac Taiwqog liaurliw,” tauqelangg qongw, jre dirr langkeh jniaxciuxvingg vnix.
“Hner a. Jurr hitt qangx liauxau, guanw dy’ longxx byy liw siausid.” Siyxjiaxlangg cuiwdunn hiaux hiaux qig jit xee siurkir dniuduah ee kuanw, ganxsinn si aiwqiaux.
Tauqelangg hue m driyc, qongxx beh qycc cniaw jiahvng qra vuelew. “Lanw tangx qycc jiyx linw dongcongx dauwdin cud .laii,” suacbuew :a jaiww vow jit qxur.
“Ix jimxmaw jiac langg’ ee taulo, dniardnia rair qavanx qnuaxqangx, siqanx kacc be anwsngr," siyxjixlangg cuir qut.
“Ix decc siongrvanx?” tauqelangg ee sniabuew tuax jiokk dngg.
“Ix qapp guaw qangrkuanw, dirr setqer qongsix ho’ngg cniar,” siyxjiaxlangg qongw, qra kngr dirr deaux-ju dingxbin u hxur dedic ee dejnuaw pangg uaw .laii, hip'auquar henx .kuix dirr cuir-vnix jrip .jit .xe siyw zun auu.
“Inx laurbuw lehh? Si’angw decc qor?” tauqelangg mng, bagtauu qad .laii.
“Ongxsingx ar.”
Siyxjiaxlangg rinr diyc byy-diw.-byy-ir. Tauqelangg hnirangr-aw vniar kangx kangx decc tniax.
“Dangxsurdniuw, jaibu vxo :ee jiauu qaur ar,” viwsux laii decc vinxvyr, kinx sniax ser giw, ju’angg ee enjix qapp jingxqac’iuu, sikjuiw beh qangg aw beh qangg.
“Qiyr inx qra duiwdnuax cuann hro jiaujngg, jongxpo qycc srunn .jit .vxenr. Guaw liammix dyrr quer .kir,” tauqelangg tuanling, jiokk u hing’uix.
“Qniazit ginhangg ee langg e laii,” viwsux tnrix ue vyr bingg.
“Guaw jai'ngiaw,” tauqelangg bin crinr crinr, gensuu dew qiucqiuh.
Hiauxliw jaix tauu dang, viwsux jrngx jit xee ciywbin tewkuix.
“Qyckacc byy ingg, vng snesingg rair jiac,” tauqelangg jiapcah, bin uat duiww langkeh. “Lanw qingw jit xee vaiwlak sii aw laii cue ix jre, yc jingg vaiw qangrkuanw, singx mair qra qongw.”
“Dnaxx ix jinw druar dyhh guaw dy’ m jaix, lanw beh anwjnuaw kir cue ix?” siyxjiaxlangg qongw diyc kiw air ciyr.
“Ix vnuax cur ar!”
“Vnuax beh vnuar dxangx ar,” siyxjiaxlangg qongw, dee qycjaiww limx .jit .cuir.
“Qamxx jai’ngiaw uaw dyhh?” tauqelangg dnaxtamr knuar.
“Ix dirr Vangqiyy suer jit qingx tywvangg jit xee langg druar, tiauqangx cue :ee.”
“Anwjnuaw qongw?” tauqelangg qycjaiww mng, singkux bibii aw hiongr jingg.
“Qongxx hiax u nraa snuar denrciax tangx didtaur qaur inx qongsix,” siyxjiaxlangg diddab longxx byy quer sniu. “Inx hex tauqex marr jnia’ be siqniaa. Sniaxmih sidai ar, qycc rair jyr setqer ee qowuann packaw.”
Ue qaur jit xee jamrjad, lalunn siyx dee, siyxjiaxlangg sraiw did'auu jyr jit cuir qok .lyc.
Tauqelangg vruee kxeh, jidlo sangr qaur liulongg ee mngkauw. “Sunrqniaa,” kia dirr mngg-gua :ee qapp lairdew :ee duiwvair dirr nng snxir mngg beh hap uaw .laii jinwjingg.
“Dangxsurdniuw, Li Dangw :ee duxjiah u kar laii beh cue :liw. Kux Dangw :ee marr u kar, qongxx beh iog liw jiac daur,” knuar diyc tauqex laii, viwsux vyr qinw qinw.
“Hyw, guaw jaix,” tauqelangg qanxjed qongw. “Kir snuar-dingw ee qangsiongx-miapo cue qongxqyr-setqer qongsix. Qniwnarr nraa snuar denrciax e qaur :ee, inx ee denruerhuanx qapp derjiw, liw jongw qra let .cud .laii.”
Jit qiyr jit rinr. Tauqelangg qaudair kangkuer. Viwsulangg dimr tauu rinr sniax si, kax jriab kax qanwvan.
Sionggi jinwhingg kacc byy vnuar diamxjingx dyrr suah. Ginhanguann snax-jap dxo qiokqiongx qapp dangxsurdniuw dimwciuw qywsii. Jit xee hiongwlaii cam’ ginhangg decc jicjiab ee vorha vuesangr langkeh kir dah liulongg.
Langkeh jingg kax jiacc jauw, lenrdat ee viwsux qra jit dniux A4 ee juaw qaux hro tauqex. “Dangxsurdniuw, longxjongw ee miadnuax dirr jiax. Guaw u jyr jit xee viyw inr .cud .laii.”
Zirjuaw jrih .diyc, Sewsiux zip laii dangxsurdniuxsig, ciuw duer ciuw qra mngg qnuaix uaw .laii. Dirr pueqau’iw nirr jre dnia, vangrqongdyh-dingw ee denruerdangg giaa .kiw .laii. Dngg lywsyr ee miadnuax, inx ee denruerhuanx beh vin’ tauu kar.
“Uee, jiycmng, lanw qamxx u jit xee setqewsux qiyr jyr Hyy Gnaxsunn?”
2.
Jimwjur-ho qui’ lexvair cabcap lyc. Qimdnuar iurqycc ho bangbangx vutqenr zit, henxzenn m si hyw caixci. Tnix jnee lo dax yh danw. Qniax qnir srid qigu, zid’au e duihingx-dacliuw pauruanr, ho lramm tauu siyxkuaw dai.
“Guanw dangw :ee dirr linw hitt dongr ee laue, jinw dyrr beh kiw .kir, qiyr guaw singx qra linw tongx siausid.”
Denrue qongw suah, kacdingg beh jiap’ingr qowkeh :ee qra rair cuann :ee kiyh kiyh jyr jit tac uadnaxx tiap uadnaxx quann. Qinw bangbangg, qongg pniapniax, uat jir xee srinx, ciax dyw dee, qui’ dyh-dingw huex loklog, damm dicdih, lenrr gxamm-sig ee niaxduar iarr liyc aw kir uwdamm.
“Qanr,” jyr giabbu :ee saixcyh.
Jre quirdaii :ee iong lairsnuar-denrue tongvyr qongxx u langkeh qauwui. Qui’ tong quanwjongx dnuax ciuw lamw, jyr giabbu :ee kiyckixkax beh kir jinwjiab langkeh, lingrgua jit ciuw naxx decc jun iauxx sipdamm ee nektai, qycc qnuaxqinw sax jit dniux binrjuaw qra dyh-dingw ee juiw syr .kiw .laii.
“Sitgingg, sitgingg,” giabburuann hiongr co’ qniwbin ee langkeh vuelew.
“Si guaw kacc byy lew, cnex-vrong-veh-vrong jauw .laii,” cing amwlamm sejongx ee dangxsurdniuxlangg hueqingr, hyw tauu hyw bin.
“Nacc tangx anxnex qongw? Quiwkeh qawlimm, guanw huangingg dy’ be hur.”
Giabburuann hyw kauxjic qycc hyw taucuir, iongtog dongliauu ciongx qavidee, qra langkeh cniaw kir surbursig sionggi.
“Dingw zit aw iong E-MAIL qiar .kir ee jit quaw qenwvunw, m jaix dangxsurdniuw liw qamxx u knuar .quer?” nng langg iw nirr jre .lyc, giabburuann hyxlew aw mng.
“U. Liw qiar :ee, inx longxx u juanw hro :guaw,” dangxsurdniuxlangg dab. “Linw ee setqewsux jin’ u jaijingg, jokpinw siongdongx cutsig. Lanw m bad habjog .quer. Guanw ee suqiuu qapp linw ee lixqaiw, huerben duiwqangw qaidongx e kacc cingcyw, mrjiacc guaw qinaxzit laii vaiwhau. Narr u dingrir beh diong linw jyr, sewjed ee jiaphiap jiacqycc jinr jit vo.”
“Dangxsurdniuw setsiongw qaxx jin’ jiujir, kacc qongw iarr si dua tauqex kacc u qinjad,” giabburuann dimr tauu.
“Quiwqongsix ee setqewsux qongxx m na jit xee, si bor?” dangxsurdniuxlangg sunmng.
“Guanw bag’e u snax xee juandoo decc jyr setqer :ee, sui’ langg u inx ee soxx diongg soxx qenwqii. Kyxviw qongxx jitt xee,” giabburuann jedjaii, kamxmew qra jit qngw qyxanr henx .kuix. “Ix jriab .quer ee kes vah kuanw cxenx ngiu, jiac :ee cing :ee ing :ee, ix jongw erdangr crunx kax cud ciuw, zim kyw vutdyw. Ham’ ix habjog .quer .ee ingxingw venr juxqowkeh, be jauw .kir. Snax xee setqewsux, ix druar siongrr quw.”
Qongw :ee cuiwqag juann pyx. Dangxsurdniuxlangg ganw .quer nia, qig sim sim, byy qongw .anwjnuaw.
“Acc narr kacc sinx ngiu sinx sxig :ee, m jaix dangxsurdniuw e qacbak .be?” giabburuann naxx mng, ciuw naxx decc vingw, qinw daucdauh.
“Quansniuw knuar mai lehh buhongg,” dangxsurdniuw hniah ciuw, siangx vingg qringx tec .jit .xe.
“M si guanw qaqi decc vyx. Guanw jitt xee siauwlenn :ee, taunauw jiokk sinx, siongsiongg u sinqii ee jokpinw. Qu jrunn .nii jiacc jutgiap laii qongw, si jniawqangw ee jenwqiyh, jiokk nai caux. Jerje sionghangg diah ix ee miaa dandanx beh cue :ix. Jex sit su, byy decc qongw tanghongg.”
Dua dua jenwquw, giabburuann qra surburdyh-dingw ee bunanwqiab dux uaw .kir vyr langkeh knuar.
Dangxsurdniuxlangg naxx henx naxx siongr, qaur qaxx uaw jinrbuew jit dniux junqyw, bagjiux niar qimx knuar. “Jitt qnia ee hongtew qaxnaxx kacc byy qangg,” mng :ee liyc aw ngar iyx knuar juxser.
“Dangxsurdniuw hyw ganxsig. Jitt jruw byy qang langg setqer :ee dyrr driyc,” tauu jinx bak qiac, giabburuann cuir uac, tanwqinw sueh kiw. “Jitt xee setqewsux jiokk diamdew, cinggnaw tuatsiok, qycc hyw bunbik u judew, kiarr bunzi qapp uerqyw, ix tangx qui’ ciuw vauvan.”
“Ix laii zuarr quw ar?” dangxsurdniuxlangg mng.
“Laii guanw qongsix zuarr quw or? Vnuar dxangx qnaxx u ar oox.”
“Vnuar dxangx…” uerbuew tuax dngg, dangxsurdniuxlangg bagsinn hongxhud.
“Ix si lauxjiongr, jiokk lauxvunw, m si cnikax sin’yhsnuax. Dangxsurdniuw narr decc quawir jitt diamw, jueww liw hongwsimx, guaw qnaw damvyw,” giabburuann cuir rinw ciuw pachingx.
“Guaw sniu beh qapp jitt xui setqewsux benrdamm .jit .xe, m jaix qamxx hyxser?”
Langkecqnuax cud iauwqiuu. Giabburuann rinr hyw jiokk kinkuair, denrue jiksii giaa kiw laii kar.
“Halo, liw jitquw u ingg bor? Guaw jiax u kecho beh qapp liw dngbin siongdamm.”
Vnivnii dirr qongsix duarlauu, giabburuann iong lairsnuar sna’ taur. Byy-en.-byy-cenn, bak jit xe nih, setqewsux cuthen, jniar ciuw moh laptop, dyr ciuw giab ciuxqngr.
“A, ix laii ar,” jid’err knuar diyc langg, giabburuann sui’ vniar kir sna’ vrangx draur tec.
Dangxsurdniuxlangg an’ iw nirr vreh kiw, huandngxsinx liauu liauu aw si, kia dirr ix qajiah-au ham’ ix sir bak siy’ duir. Cimxx qauwui :ee bagjiux jidsii be dngxlunn.
“Dangxsurdniuw, jitt xui si Hyy Siyxjiaw, guanw ee cniladqunx,” giabburuann siaurqair.
Qansinn aw ciyr, dangxsurdniuxlangg crunx ciuw beh ad. Setqewsux enuan .jit .xe ciuw jiacc crunx .cud .kir, bagjiuzinn ngr qe byy knuar duiwhongx.
“Dangxsurdniuw inx qongsix decc genxhuad ju'iongxpinw, sriok singbut-kyqix, lyc au .guec beh kir Aujiux denxlamw, rair u sinx ee DM jah kir vunx,” snax langg iw nirr jre, giabburuann tehtauu sueh kiw.
“Si lar. Jit quaw katalogu marr quw byy nguarsinx, rair dingg qaixvanw,” dangxsurdniuxlangg voxtnix, uerdiau unsunn.
“Siqanx u kacc duanxciog. Jyr e cud .laii bor, guaw m qnaw pyrdngx,” setqewsux dam dam aw qongw, bagjiux knuar dyh-dingw.
“Buerjingrbue, liw huanlyw qaur hiax kir?” giabburuann huacsniax, bin huanxsig. “Liw ciuxtauu jit quaw kacc byy qipqer :ee singx anwha. Jingwqingx qnuaw be hur, e cue langg hunvan qra liw vangciuw.” Dongliauu ee inwdab liau byy driyc, giabburuann soksog jingxhue jau siauwbuew.
“Beh jah cutqog hitt hxun singx cud .laii, igua :ee knuax knuax aw si,” dangxsurdniuxlangg draur qongw.
Trow jit xee kuir, setqewsux qra laptop kuix .kuix. “Texsig cxenx ngiu bxan ngiu, m jaix dangxsurdniuw qacsimx dycc jit kuanw?” crinr tauu crinr bin, mng diyc byy ir byy ir.
“Liw ee denrnauw lairdew qamxx u jun'anr ven :ee tangx hro guaw camjiaur knuar?” dangxsurdniuxlangg hyw sniax hyw sueh.
Setqewsux byy qra rinr, tauu dimr .jit .xe junw .quer. Dongwanr ho’ngg qiyr .cud .laii, laptop jiacc beh dux .kir, dangxsurdniuxlangg qra iw-aw ciauu uaw qinrvnix. Sinkux banxmix cuah jit xe, setqewsux diamrdi diamrdi byy qongw .anwjnuaw.
“Jitt dniux ee puewqingw uac diyy diyy, guaw u qac’ir… Jitt dniux ee vanxbin puewdir kiw jin’ siwtin… Jitt dniux ee sikjuiw jamxzenn aw ziuu, qamxqag jiokk gnaxdir…” Knuar quer bak :ee, dangxsurdniuxlangg it’id sueh cud qamxsiongw.
Jongxquad langkeh u huathingr :ee lyc kir puewviw, covo ee cyxanr, setqewsux hen tee, qongw kiw jin' diongwguw. Giabburuann guanjai dirr qnixax knuar tauu knuar buew, byy tniax diyc irgi, bagtauu jiamrjiamr u kacc kuix.
“Acc byy, lanw dyrr anxnex duanr .lyc. Vywdnuax jiacc cniaw linw hnuarknuar tuann hro :guanw,” dangxsurdniuxlangg duiww giabburuann qongw.
“Byy bunrdee, danw .jit .xe sui’ cuxliw,” byy derr zi qxur, giabburuann rinr mew mew, ciyr tauu ciyr bin.
Dangxsurdniuxlangg an’ sejongsnax ee cacde qra penwdnuade tec .cud .laii. Giabburuann cuir-aw ciyr qaxx lic haihaix, qinxmew an’ siajuh hxingx-jingg ee lakde tiux jit dniux bingcir beh qau’ngua.
“Qamxx erdangr qra Hyy Siyxjiaw cingxqaur jit dniux mesih?” dangxsurdniuw mng byy-dongr.-byy-jing ee setqewsux.
“Sitlew, mesih he dirr tiap’ac, siux dirr tuah-lai,” Gnaxsunn qongw, bin crinr tictih.
“Liw jinw kir tec a,” giabburuann qra vikqinw-q.
Liyc aw junwsunn, setqewsux ingr langg' ee iauqiuu uad lehh kir tec, byy-liau.-byy-siaur.
Tranr jitt xee langwpang, giabburuann qra jit quaw sewjig qapp iauwdiamw hiongr langkeh qongw jit xe kacc jingser. U .jit .quw .aw, kir tec penwhongg :ee dngw .laii. Dangxsuxdniuxlangg ciyr girgi, miatiab siangx ciuw hongrsiong.
“Vewsingr Vngx, aurzit aw diyhh tokdiong liw uirr guanw sethuad.”
Jit ciuw zip jit ciuw cud, jniar ciuw siujih .quer .laii giyw .jit .xe dy’ byy, setqewsux qra qaqi ee qaux .cud .kir iong qorr dyr ciuw.
Hyy Gnaxsunn
vnibin setqewsux
Cenxliuxngg juaxdew ee penwhongg, dangxsurdniuxlangg siangx ciuw lingxsiux jinn liauw jinn.
“Binrdingw u jongxqix, u hunqix, vingzit beh lenlok tangx kar laii qongsix,” giabburuann hiongr langkeh qangxqaiw qycc quaww qiw ciuw. “Narr hiyckunwzit u sniaw dairjiwqib :ee, guanw ee ciuxqix-huanhy marr u inr dirr dingxtauu, longxx benw qniax cue be diyc langg.”
Giabburuann hyw kecjingg. Dangxsurdniuxlangg ciyr bunbunx, qra tec .diyc .ee dre zip cacde, cingwsimx-suirir ee kuanxsid.
“Jitt jann diyhh hro liw huansinn.” Beh jauw jinwjingg, dangxsurdniuxlangg qycjaiww qapp setqewsux ad ciuw. Setqewsux tauu kiaux lelee, byy-cuir-byy-jic.
Jyr giabbu :ee beh sangr langkeh kir dah liulongg. Setqewsux kia jai byy duer lecc kir, bersux decc sairdingwhing.
“Guanw jiax qik pnaiw tingg ciax. Dangxsurdniuw ciax tingg dirr dyhh?” giabburuann mng.
“U suqix jair guaw laii,” dangxsurdniuxlangg dab. “Guaw kacc danw kar denrue, ix sui'au dyrr e qra ciax sraiw .laii.”
Nng langg qniaa laii qaur zibkauw, giabburuann jingsenx kir kuix mngg. Hiongr lairdew ngiaw .jit .xe, juer langkeh :ee huac cud mnglo.
Liulongg ee mngg qnuiax uaw .laii, dirr lairdew :ee qra ciuxqix-aw jun u sniax. Qiong snax tongx byy jriab .diyc, suqix iarr diyhh lenlok dairsingx, siogho, j.-jiong’iongg-i. huee denrue jiauww qinxvaiw.
“Uee, guaw Vngx Sewsiux. Pnaixser, duxjiah decc qapp langg’ qongw dairjir…”
Dac cud liulongg, denrue iauxx decc qongw, Sewsiux qniaa duiww duarlauu taujingg cimxcimxx qauwui ee otau’axciax.
3.
“Uee, lyhuann liw juanw Hyy Setqewsux, guaw ix ee kecho.”
“Byy bunrdee, cniaw liw jiamrr danw.”
Langsniax juanxngua jyr imgak-sniax.
“Liw hyw. Guaw Hyy Gnaxsunn.”
“Si guaw lar, Vngx Sewsiux.”
“… sniaxmih quiwsu?”
“Ehngx u ingg bor? Sniu beh cniaw liw jiac amr.”
“Sittauu jyr be uann, rair vniar miqangx.”
“Acc narr binaxaurzit lehh? Lexvair sii aw linw u hiyh bor?”
“Vaiwlak qapp lexvair longxx u dairjir.”
Duiwua ee jingjad u dirr cuixliau diongx. Denrue qongw suah, sitbong ee simjingg iauxx si vutlingg benw. Jingdniuu uanxzenn cincniu siongdniuu. Jitt diauu lo vongrviah, lingrzit jiacqycc cue vadd diauu cir bai. Jitt vaiw diyhdag, Sewsiux quatding beh vangr logquanx knuawtai vangr kacc tenhuaii. Jiwjiyw qinnaxzit u tniax diyc sniax, u cam’ ix qongw diyc ue. Qyxnarr cic hunqix duiwjiab cue ix, denrue jit sniax dyrr ho’ngg cetdng qiamx paccingr qnaxx dy’ e.
Amwtauu aw lak diamw gua, saivingg dna’ cunx jit cunr aw zidngiaw, muaw tnix u hunhee dimdimx. Ciuxqix-aw qapp ciax-syxsii u tec, Sewsiux qra sejongsnax qruar dirr ciuxkiaux. Jit qangx ee juanxjiac-nguaw pangg quer liauw, qimbuanw mrsaiw qapp langg’ ingwser, tauqelangg erdid jaw hueqax.
“Dangxsurdniuw, liw qamxx iarr beh qapp inx snax xee guarbu qangrkuanw, tejaw jit qangx qaur Dikqog?” Sewsiux beh lirkuix qongsix ixjingg, viwsux tanwpang qra mng.
“Huihingqivangx qauwui quiw diamw?”
“Frankfurt jaixkiw cid diamw,” viwsulangg duiwcuir huehog.
“Anxnex mrbenw,” Sewsiux suisii u qatdnia. “Cud huiqidniuu, guaw singx kir vngrdiamr ciek in, hingliw vangr lehh dyrr e kir denxlamxdniuu.”
Siongbu qaudair liauxqed, Sewsiux dah liulongg kir derkangr kanx ciax.
Osig ee BMW lak diamw quer benw cutkunn. Vnix .tauu ginhuesig ee LEXUS, Sigjiw qapp Lairoo jaxamr ongxhuee jit jua, Sewsiux jin ngr jitt daii. An’ dere sraiw kiw laii derbin, cutzibkauw ee siuxue giac ciuw qra ciax-lai :ee sangwhingg. Vnuar diamxjingx quw quer, jurdongrciax beh tingg dirr ngiulauu ee ciakor diyhh dywtewlux. Vyxjiyhlamm ee FORD FIESTA byy dilehh, qikliw, jaboxqniaw iauxx bue dngw .laii. Ejaiw veh diamw tongw beh cutmngg ee sijun, jaboxqniaw ee ciax u dirr ciakor.
Sewsiux zip laii qaur cur-lai, cniawqangx obasang jiacjiacc qra uisinqunn trngr .lyc .laii.
“Tauqex, vng juw sik ar,” obasang qongw, naxx decc jih uisinqunn.
“Hyw. Qniazit vaiwgo, didix qamxx u dngw .laii?” Sewsiux mng, siwqer sinwsog srunn .jit .vxenr.
“Dngw .laii ar, dirr ix vangqingx,” obasang rinr. “Siyxjiaw beh amr aw u kar denrue, qongxx ehng’amr be dngw laii jiac.”
“Ix iarr m qra guaw qongw, dagg vaiw dy’ dandanx kar hro :liw,” Sewsiux qongw, tauu naxx iyy.
“Dairkair si sniu qongxx liw decc byy ingg surgiap, byy air qra liw qiauxcaw,” obasang qra ue uann kacc hyw tniax.
“Ix byy air guaw qra zuliam lar,” Sewsiux dnir cinwciyr, saux qaqi ee texben.
Obasang bibii ciyr. “Tauqex, guanw cur nirr u dairjir, vaiwid ervox qamxcaiw e kacc nguar laii.”
“Byy qangai a,” Sewsiux ziuu ziuu aw qongw. “Guaw u vng tangx jiac, u cingkir snxax tangx cing dyrr dijiog ar.”
Vunwsyr qnrua lehh, obasang siuqangx qniaa tong’iongrbunn. Sewsiux vreh kir laudingw longr haursnix ee vangmngg qiyr jiac amr. Lyc laii qaur jiahvngrtniax, Sewsiux qra dycdaur siux vnix:a kir. Jit diamw aw quw, qniaw iarr laii ar.
“Hiyczuac qamxx u vixsair?” vng naxx jiac, ve mng qniaw.
“Byy,” qniaw rinr, jiyw cuiwjic.
“U sniu beh kir Bixqog iuhak HOMESTAY bor?”
“Guaw u qapp langg’ siy’ iog, Cid-guec diongx beh kir Hualenx qra laurduarlangg kiw cur,” qniaw qongw, naxx decc vex vng.
“Quer guarhaiw kaix ganxqair, diyhh tranr juer hagsingx u vangwzuac,” ve qra qniaw kuanwqaiw.
“Bixqog dirr hiax iarr be jauw .kir. Cuwqingx byy qinw kiw, laurlangqex diyhh jiahhongx, dangwlo qiamx piywho,” qniaw vyc’ue.
“Jailik singx vuengiuw hro vaxqyx, beh jorjan .langg’ kacc be kadkax, siurhui :ee marr e kacc je,” laurve kuipuar hro haursnix tniax.
“Birlaii ee dairjir yh liau. Huanrser aurquer guaw e venr jyr jit xee jniquiw, u lirlo :ee jiacc kingw jyr.”
Veaxqniaw nng langg jiac vng puer ue, jitt dxngr, nguaxdew cunx u kacc je. Qra nguaxjnuaa vniar zip kir puntangw, lacsab nguaxvnuaa kngr zip kir sexnguaxqix, qniaw uad lehh dngw kir laudingw qaqi ee cimxsig. Hiyckunwzit byy drang dniaxjaur. Laurve qra caiwbuew vaux glasmoc liauxau kngr vingsniux, obasang vaiwid laii e cuxdir.
Sewsiux qra langkectniax ee denrsi kuix .kuix, sinbunn iong hni-aw tniax, samvutsii aw dnax tauu ngiaw .jit .xe, ciuw naxx decc huee ciuxqix. Qixdyh-dingw ee denrue giangx, LCD u henxsi jit qnrua sowzi. Ciuxqix-aw singx hongha, Sewsiux qra denrsi driauu kacc ser sniax.
“Mue-aw, mih su?” Sewsiux kuitauu dyrr mng.
“a’hniax, liw jitt lexvair u ingg bor?” siyxmue iarr jit xe ciuw dyrr puawdee.
“Beh congr sniaw?”
“Beh anvaii liw qapp langg’ duiwknuar.”
“Or, iurqycc laii ar.”
“Hner a. Jitt vaiw jitt xee qapp liw ingqaix e hardaii. Snax-jap tongw huer, langg jiokk jingwjongx, dirr iyhpinw qongsix jyr genxqiuwuann, kiarr qapp liw vnuar qang dxoo.”
“Liw sidjai u qraur qutlat.”
“Qaur dnaxx liw jiacc jaix! Liw jitt vaux muelanglew byy tanr qaxx driyc, guaw m qamguan.”
“Liw be sen, guaw qapp byy siongsik :ee bin duiww bin jre qui’ diamxjingx si jin’ tiamw.”
“Penr siauw :ee! Jiac jit dxngr vng si e zuarr tiamw?”
“Acc byy, jnii guaw cud, liw kir qapp inx jiac jit dxngr aw knuar mai jiacqycc qongw.”
“U surgiap :ee, liw hiamm langg’ sniu’ kiangwdauw. Byy decc jiac taulo :ee, liw qycc hiamm langg’ byy qenwsig. Liw jiokk gauu liac sxad, sniu’ gauu qingw lar!”
“Liw dyrr singx mair kir cue maar.”
“U duw diyc diauqnia janw :ee, byy siaurqair hro cinhniaqyx qongw berdid quer.”
“Liw qaqi beh vangr hongsniax .cud .kir, kacc qex langg’ marr itdit laii decc vyr. Guaw iarr byy decc qib a.”
“Liw qra qo’ qniaw sangr kir tak susiok, ingsii-vehhe druar hagliauu. Jaboxqniaw dua hanr ar u qaqi ee sing’uac, kacc be diauu cur. Guaw qniax liw jitt xee qodnuax dionglenlangg byy pnua .qaur .der, sniu be kuix, suacc jauw kir snuaknix-qak'axpang cutqex.”
“Guaw kir juer huatjingx, huesniu, qongdig jongw sngwdair liw,” hniaqyx qapp siyxmue paclax.
“Benw benw! Liw byy qinw cue jit xee dauwpnua :ee, linw siyxmue-aw uirr liw damhuann, jyr sniaw longxx be lyhsimx.”
Sewsiux trow dua kuir. “Guaw cutguec rair kir Aujiux, qinrzit aw longxx jiokk byy ingg.”
“Liw u iwdiongx :ee ar, si m?” siyxmue dnaxtamr.
Qrangw qaur jiax, kauxbin u syxsii decc kuix mngg ee sniax.
“Guanw dua hanr :ee dngw .laii ar,” Sewsiux qongw.
“Jitt xee liw si u beh knuar bor?” siyxmue be sixsimx, dingg jaiww mng jit vaiw.
“Vadd zit aw jiacqycc qongw lar.”
Denrue duiwqongw srog srog siusuah, Sewsiux bagjiux hiongr duiww tehmngg hitt vingg vnix.
“Liw si kir dyhh? Nacc jiacc nguar jiacc dngw .laii?” laurve mng duxx qaur cur :ee.
“Guaw sniu beh vnuax cud kir druar,” byy huedab, jaboxqniaw dyww kenx jit liap jawdann .cud .laii.
“Beh vnuax kir dyhh?”
“Guaw sniu beh dirr haghau jiuqin suewcuwkia.”
“Byy-sur.-byy-qor, liw vnuax cud kir druar beh congr sniaw?”
“Lanw daux li haghau sniu’ hng, qaiww byy lirven.”
“Acc ciax dyrr brew hro :liw ar! Druar cur nirr jiac ven cing siyx, dagg hxang u langg cuann ven ven congr hyw hyw byy kacc suwsi?”
“Liw dniardnia decc ciyr guaw ciuw vutdong samvyw, jit cuir vng, jit buew hii qaur. Guaw jingwqingx beh cud kir yc jurjuw, liw kiokk m junw.”
“Liw si m si beh cud kir qapp langg’ dongqix druar dauwdin?”
“Narr si qycc anwjnuaw? Guaw zi-jap huer jiog ar!”
“Qex ue benw qycc qongw. Vutjunw dyrr si vutjunw,” huanxqongw, Sewsiux jit qxur snax qxinx lak dang jiokk u sewtauu.
Kiaur cuiwdunn, sraiw bagqag, jaboxqniaw byy inwcuir, vniax vniax sag sag, vreh tuix jamr qaxx duarbuw sniax. Kacc kir, laudingw ee vangqingmngg piang jit sniax, laukax ee juixjnidingx duer lecc kinkinkiangkiangx.
Denrsi sinbunn decc vyr Diongdangx ee jingjenr. Dirr hibii ee dua kectniax, Sewsiux suacc junxnaxx u pnri diyc cingwiyc ee bi.
4.
Kecqnuax anrsii-anrhau, siurr huwtog :ee m qnaw tuaqangx, siangvingg qinrzidqanx diudiux decc jiaphiap habqaizenn. An’ kixqyw, pacdoo, qingquer kanvanxzi qauwdingr, dobin jiauwhap, cid camsiongg veh tywgi, itdit qaur qimdnuar qamwvunw cud .laii. Langkeh narr cing’ir byy beh qycc qexjniaa iacc siusiah, setqer ee kangkuer juer muaw dyrr tangx sangr kir inwvanw.
“Ervox guanw e qiyr kuaiwdiw sangr .kir. Jiacc cniaw linw siongser knuar u habtew bor,” setqewsux kar denrue dihue duiwhongx ee dokqangx.
“Qapp jingquer siysiangg, iarr diyhh tingwhau guanw dangxsurdniuw knuar quer liauw, puejunw.”
“Dongzenn, dongzenn!” setqewsux inwue hyw birsi.
Zit duiwdiongx, dingxvox ee qangsid rair qycc jap-go hunjingx jiacc tangx tingg. Qowkeh narr qingw jitvo laii iarr diyhh jiaptai.
“Vngx Dangxsurdniuw, hanxqniaa, hanxqniaa!” giabbu-juxzim sangr siyxsimx.
“Qaxnaxx qongxx u qamwvunw tangx knuar?” Sewsiux mng.
“Si a, duxx kixloo, jiacc junxvi beh pacvaux sangr kir hro :linw.”
“Qiar laii qiar kir dongrqangx. Ejaiw kir cue iyhqaux qongw singliw, beh dngw qongwsix, suqix sraiw ciax duxhyw an’ jiax quer dyrr sniu qongxx singrsuar,” Sewsiux quexbingg guan’iuu.
Dua tauqex cinlimm, jit kxig cenenn dy’ m tangx, giabbu-juxzim mexkuair kar lairsnuar.
“Gnaxsunn, kuaiwdiw benw qiyr ar. Vngx Dangxsurdniuw jinw laii dirr jiax. Liw qinw tec laii hro giamrknuar.”
Huanhur suah, jyr juxlangg :ee cniaw quiwkeh iw nirr jre. Jit dah quw aw quer, setqewsux qaur xui, soksog qra langkeh giyw .jit .xe.
“Hyy Siyxjiaw, hro liw jin’ loxlat,” Sewsiux ciyr qaxx naxx jit xee siauxcitqyx :a, bagjiux liac Gnaxsunn jujux siongr.
Qoxqanw bunw .jit .xe, Gnaxsunn ee ganxsinn byy zed’ir, jah .laii .ee qra kngr dirr dyh-dingw. Juaxpuex jimjiog knuar quer bak, Sewsiux dimr tauu, dingrdiok dyrr jiurr jitt vanw lyc kir inwsuad.
“Beh daur ar, jywhuew laii jiahvng, hyw bor? Guaw jyr dongx,” Sewsiux sna’ jiy’iyx.
“Jnuaw tangx pah Vngx Dangxsurdniuw liw ee dionggnow? Beh marr si guanw cniaw jiacc driyc,” giabbu-juxzim qongw, beh kir iacc m byy viauxsi.
“Linw qaxnaxx iarr u decc ter langg’ setqer bangriac?” Sewsiux mng.
“U a,” giabbu-juxzim duiwcuir rinr, bagjiux tenw dua luiw.
“Si m si lanw naxx jiac naxx dramm? Guanw qongsix ee bangrjam jiokk quw byy venwngua. Byy dniardiyc beh qycc uiw linw jyr qaixvanw tangx ingr siser,” Sewsiux qycjaiww jiy’inw.
“Jin’ duiwvutju, bangrlo guaw mngguerhanr, byy lairhangg,” Gnaxsunn uixuanw tekuix.
“Hyy Siyxjiaw setqer ee hongqeh ham’ guanw qongsix ee sanxpinw u duiwlo. Bangrlo-dingw ee vanxbin puewdah, qnaxx iarr diyhh jiawiong liw ee soxx diongg,” Sewsiux hyw-sniax-hyw-sueh, qongw diyc lixlo dit.
Gnaxsunn qingtauu banw banw. “Guaw jiahsor.”
“Lanw laii kir sowcaiwquanw,” ue trua ue qongw .cud .laii, Sewsiux longxx benw quer sniu.
“Jitt xe aw longxx liw decc qapp langg’ jicjiab. Bangrlo ee sittauu byy sriok liw laii qongw, kyxlingg rair liw jingxhue.”
Juxzim saixqenwsig draur sy. Jionganxnix, Gnaxsunn byy qycc tetog. Snax xee langg juer jidhuew laii qaur cantniax dirr jap-go hunjingx au.
“Guanw jiax dirsii u kuix jitt qingx, guaw longxx m jaix!” juxzim qongw, naxx decc knuar caiwdnuax.
Qipsu laii beh surhau inx qiyr cair. Juxzim ee ciuxqix qingw jitt sijun laii caxvanx, kar .laii .ee qongxx u qinxqib su rair juxzim huedngw qongsix cuxdir.
“Vngx Dangxsurdniuw, jin’ sitlew. Gnaxsunn, jitt dxngr lanw cniaw. Huatpiyr rair e qir did pah qongsix ee venhy,” beh lirkuix jinwjingg, juxzim qra dongliauu qaudair ue.
Vngrcair juwbunn hyxser, qipsu qra menu siux .kir. Sewsiux liac jre sna’ duir :ee itdit jinn. Gnaxsunn jingrje tauu cih cih, byy air knuar langg’ ee ang’axzinn
“Jundongg ee dairjir jin’ uiham,” Sewsiux dairsingx pacpuar tiamjing.
“Liw dui’ dyhh jaix :ee?” Gnaxsunn mng, giga muaw bin.
“Linw dongcongx laii guanw qongsix tec vanrtauu ee sii, cuir drang cuir qongw :ee.”
“Marr ix qra liw qongw guaw dirr jitt qingx m?”
“Byy,” Sewsiux iyy tauu. “Ix dandanx qongw liw dirr jit qingx nraa snuar denrciax e qaur ee setqer qongsix jiac taulo.”
Gnaxsunn bagjiux niar quann. “Qanda’ anxnix beh anwjnuaw cue kiw?”
“Guaw qiyr langg kir GOOGLE, zen’au, guaw qaqi jiacc sui’ qingx aw kar denrue kir mng. Marr sngr be pnaiw un, kar kacc byy jap tongx dyrr hro guaw cue .diyc.”
Jauxlauu :ee qra cair pangg .laii. Gnoxqokvng qapp qunduawcair-tngx sui’ langg jit nguaw. Caiwsex gnoxsig u entauu, Gnaxsunn diamw :ee. Mua’iuu bacqox pangx cingwcingr, Sewsiux ee qacsindur.
“Liw vnuax kir Vangqiyy druar?” naxx decc ing vng, Sewsiux mng.
“Hngr,” Gnaxsunn iong pnirimx rinr.
“Lanw ee dairjir, liw longxx byy qa’ngg qongw?” Sewsiux mng diyc damw damw.
“Iarr byy decc qong’ingg, qex qongw qex lakbin,” Gnaxsunn qongw, uerkuanw henxzenn jin' byy iwsinn.
“Guaw bad kir linw qu cur hiax quixnarr vaiw, mrqycc longxx pah byy mngg. Au .laii, duarmngg qycc suacc qruar venrog-cutjox ee jiyvaii,” Sewsiux dam dam aw sueh kiw.
Gnaxsunn byy inwue, bagsinn caa caa, vngrcair unn aw si vro, naxx cincniu decc iausiongw.
“Liw ciuxqix-aw ngua hyrbew, E-MAIL iarr byy beh huee,” Sewsiux kinx sniax ser sueh. “Liw u hyw bor?”
Gnaxsunn hngh .jit .sniax. “Mng jex qamxx u iwgi? Hyw iacc m hyw, qapp liw dirdiaudai?”
Sewsiux qra nguaxdi vangwhe. “Guaw beh qycc qapp liw jywhuew.”
Gnaxsunn sraiw ciaa bak. “Liw hitt xee qu sionghyw :ee lehh?”
“Cew ar.”
“Sniaw dingxinx?”
Sewsiux trow jit xee kuir. “Qapp langg’ dauwdin, taukag-lai suacc decc sniu vadd xee, jin’ sitdig.”
“Jex urngiaw. Jiac nguaw-lai knuar nguaw-gua m si hyw soxx qniaa,” Gnaxsunn qra sauciyr.
“M si liw qongw :ee anxnix! Guaw m si e cngw jabow ee langg.” Sewsiux liyc aw huatsingr.
“M si qaax? Acc narr ‘siw qniax quaix, jauw hii dua’, jitt qxur u kacc duxhac bor?” genw genw, Gnaxsunn lingxciyr.
“Liw duiww guaw u hunrsimx, uanwkir iauxx jiokk dang,” Sewsiux qongw, bin iux bin ciuu.
Caa-di vangwqak ngua tngsii, Gnaxsunn qra caiwtngx ciauu laii diong’ngx. “Jerje sioggiw si qoxjaxlangg ee diwhui-qetjnix, qidiongx u vutsiauw qra zinsingr huntiah qaxx jin’ cimx,” Gnaxsunn unn unn aw si qongw.
“Kiarr liw jin’ jaix guaw ee singr, iarr jin’ bingtongx guaw ee dexdiyh iacc sowhingg dyrr driyc?” Sewsiux gi aw gi.
“U tongx byy tongx, diyhh vunxsinlangg jiacc jaix,” Gnaxsunn qongw, giaa tngsii kad jit cuir tngx limx.
“Liw ee simx cringx, knuar .qnir .ee ingxingw viw langg’ kacc bingg,” Sewsiux qongw, sniabuew kanx jin’ dngg.
“Liw si sunzenn decc qongw hyw tniax ue, higjiaw si decc jiahzin?” Gnaxsunn mng, kauxkir lingxdam.
“Jiahzin? Zin sniaw?” Sewsiux vutqaiw, bagbaitauu pacqad.
“Zin qongxx lunjauw .kir ee hii-aw, liw longxx e qamxqag kacc dua buew,” Gnaxsunn minua qra diamw puar.
“Vnuawlo laksag hro langg’ diongwsimx, hro langg’ simx simx liam liam :ee, jingrr qaur dnaxx dyrr dogg jit jiah byy vadd buew,” Sewsiux ee sniasaur unziuu jiww qig. “Cniaw liw hro guaw derr zi vaiw ee qihue. Guaw quatding be qycc qohu :liw.”
Ue qaur jiax qongw tauwqix, sna' duiwje nng langg sir bak siy’ duir.
Quexjiw dirr jiangwsii ho’ngg sangr .laii, jauxdyh :ee qra jiac uann :ee sinrsuar siux siux .kir. Dyh-dingw byy nguaxvnuaa dinr qaxx qui’ xee qex jiokk tanglangx.
Jiw ow driau, naaxvuat ho’ngg ced jyr veh jiux sangr jnriu dyh, Gnaxsunn dairsingx giaa ciamw-aw kir ciamw laii jiac. Sewsiux qra jit liap mini qamaxbit danr zip cuiwkangx. Dngtauu duiwbin byy ue byy giw, hyw did inx qokk langg cuir-lai longxx u sidbut decc vro kacc be gairgiyc.
Siauwdnuax laii, Gnaxsunn qapp Sewsiux qangg sii crunx ciuw beh sax. Lamluw sianglangg ciuxqud sna’ kap hitt diap, Gnaxsunn lig ciuw, sokdo qinw qaxx bersux huanxsia-dongrjog.
Byy qiux ciuw :ee siauwdnuax tec .diyc. “Guaw cniaw. Hibang iauxx u au huee,” Sewsiux bibii ciyr.
Sinwiongrkah tec kir lur diyh’air danw. Gnaxsunn siyh hog byy air pacsngw mic, quexjixvnuaa-dingw :ee qeqiamw qycc jiac.
“Diongdaur tangx hiyh zuarr quw?” Sewsiux mng.
“Diamw vnuar jxingx,” Gnaxsunn rinr, cuir naxx decc vro.
“Ervox quiw diamw harvanx?”
“Lak diamw.”
“Guaw nacc decc mng jex, liw longxx byy gisimx?”
“Byy hiacc dua simsux lar," Gnaxsunn huanwqongw. "Qowkeh mng sniaw, beh jai’ngiaw sniaw, guanw cue u ue tangx dab dyrr tenhing ar.”
Sewsiux kiw air ciyr, gi suacsuah, “Liw sngr u juangiap, hogbu marr jin’ qauwqag,” Sewsiux vnuar suecciyr.
“Guanw ee hogbu u hanrdo, m si tangr haiw :ee. Pnaixser, hiycdaur cunx kacc byy vnuar diamxjingx, guaw beh qinw dngw laii qongsix binn .jit .xe.” Suisinx-havaux tec lehh, Gnaxsunn vangr Sewsiux qo’ jit xee dirr cantniax.
Sewsiux bagjiux siongr duiww dywvingg ee vyletangx-gua bairbangw, itdit qaur hingngiaw knuar be diyc ar jiacc qamguan uaddngxtauu.
5.
Vaiwzi ee amwsii lak diamw vnuar, qeaxlo ciax ciax dngw, harvanx tewkinn :ee qaxnaxx pacpangx. Neon siamxsih jin denw jitt sii, diamwpor qa’iac, kanwvanw ee qonggiap m hyw knuawkinx.
“Liw hyw, guaw Gnaxsunn.”
Kakding langg dirr qongsix, jit cuir qamm jit jic, Sewsiux qra denrue ced driau, sui’ lenlok caiwquanw qinw vaux jit xee hongho ee sowcair-vngrvaux kir. Miasner, derjiw, denrue qapp qongsix-miaa, penwdnuax-dingw u :ee jairsenx dyrr u vyr hro langg’ ar.
“Dangxsurdniuw, beh kir Dikqog ee huelingqipiyr sangr .laii ar, qui’ jua ee hingtingg marr u E-MAIL hro :liw ar.” Qipiyr qra kngr dirr tauqelangg ee vanrqongdyh-dingw, viwsux laii dirr dangxsurdniuxsig vywsinr, siongg hro tauqex jaix.
“Hyw, dysia :liw,” Sewsiux qongw, qra qipiyr tec laii ganw .jit .xe.
“Suqix cid diamw vnuar e laii jair liw kir SHEROTON.”
“Hyw, guaw jaix.”
“M jaix dangxsurdniuw qamxx iauxx u sniaw huanhur?”
“Byy.”
“Anxnex, guaw laii dngw ar.”
“Hngr,” Sewsiux dimr tauu.
Viwsux trer .kir, Sewsiux qra ciuxqix tec laii cic.
Liw qim’amr iurqycc qavanx ar hnoh? Sintew rair qor, m hyw sniu’ nguar dngw .kir. Hibang jitt qingx ee sowcair liw jiac u hahcuir.
TEXT huad .cud .kir, Sewsiux mnghqnia kuanw kuanw lehh beh hur kacc danw veh diamw ee dniuu. Qycc zip laii qaqi ee vangrqongsig ixqingx si huandngw zidvnuawvox snax diamw ee dairjir.
Qimjaw kir iyc-cnxiuw, huetauu ee lordiongx dyrr u decc sniu qxer. Jit~vnuar qnia aw qinw su singx liaurliw, siogzirho, denrnauw qra qiyr jingsinn. “amr dxngr qapp diamxsimx”, E-MAIL ee piaudee singx lyc.
Siyxdiamw u hyw jiac bor? Ejaiw kir Sindig, beh dngw .laii ee lo nirr cniaw suqix uad kir diamxsimx-dxiamr. Jitt qingx ee vniaxlo hongpingg be baiw, daurseqyx iacc vingsenga-vniaw longxx vutjiw aw cutmiaa, beh brew qycc rair vailet!
Qinaxzit qamxx iarr diyh’air qavanx? Narr mrbenw, lak diamw guaw kir jriab liw harvanx, hyw bor? Lanw tangx jywhuew laii kir jiac amr.
Samquanx-gnoxhok, beh qongw :ee longxx u siaw .diyc byy lauwqur. Puex qiar cud kir liauw, simqnuatauu iauxx pihpihpogpok.
Puetangw jit quaw iauxx bue tak :ee, qaix juanw :ee juanw, qaix huee :ee huee. Cuxvo u jit dniux huebunn dngdecc siaw, E-MAIL cud tongdix qongxx u puex zip .laii. Jid’err knuar, jniar jniar si s.-suliam-l. hitt xee. Ciuxtauu :ee libkig hnih vnix:a .kir, jitt dniux laisinr rair knuar dairsingx.
Vniaw qapp venrdongx jiauu hyw jiac. Mrqycc vniaw brew sniu’ je xee, jiac be kir. Qniax kngr quw e jred bi, qinw vunx dongsu draur jiac.
Ing’amr rair qavanx. M hyw qycc sangr jiahmngc laii. Guaw qaqi u brew pxangw dilehh.
Dew dew quiw jua zri, Sewsiux tak qycjaiww tak. Bunqur jamxzenn aw jniaxsinx, siaw puex ee langg si sniaw simjniaa iacc sniaw jing’ir, siux puex ee langg ingrsimx kekyw, ingrqangx kingqiur.
Sewsiux cic dyh-dingw ee denrue qiyr viwsux. Ban .jit .kxig, hongwsangwtauu tuann laii viwsux ee sniax. "Dangxsurdniuw, u sniaw huanhur?”
“Qra obasang qongw, qongxx amr dxngr benw cuann guaw ee gxiac,” Sewsiux sraiw cuiwcog.
“Hyw, byy bunrdee. Rair qiyr suqix qavanx bor?”
“Mrbenw.”
“Liauxqaiw.”
Dangxsurdniuw qapp viwsux ee dam’ua snax~nng qxur suah. Jit vo qxii, jit vo diyh. Suar .lyc beh anwjnuaw qniaa, Sewsiux ixx u sniu dnia. M qnaw iausniu ehngx jitt qiok erdangr qrongx sniaa, narr byy ho’ngg qunx dyrr iauxx u tangx i.
Vaiwsnax ee amwsii cid diamw, langg qapp ciax jiauwguann ciangciangg qunw. Hniwvnii-kax kia quw dyrr u qihue. Jit daii huelamsig ee MAZDA jiacc jiacc aw sraiw jauw, ginhuesig LEXUS qinxmiw cah .zip .kir. Dirr ciax-dingw siongr duiww vanrqongx-duarlauu ee cutzibkauw, dniwbak knuar dy’ cenban m tangx lakqaux. Beh uaw veh diamw, subo ee hingngiaw jongw iarr cuthen. Siqix diyhh vaxcii, Sewsiux lyc ciax qnuaxqinw-q.
“HI, harvanx ar?”
“Liw… liw nacc dirr jiax? Liw laii zuarr quw ar?” Gnaxsunn diyh jihbuew, hingkamw qorr dyr ciuw dah quixlyrr xee, henxzenn u jiac jit qniax.
“Guaw cid diamw tongw dyrr laii ar,” Sewsiux dab. “Linw jitt dongr duarlauu, veh diamw cutzip rair lur kacpnir. Guaw iyh qongxx liw e qnuaw dirr hex jinwjingg lyc .laii kacc duarmngg.”
Gnaxsunn sraiw kiarbak, binrcniux si vutsugi ee kuanxtew.
“Guaw jair liw laii dngw?” Sewsiux iarr mng iarr cingxqiuu.
“Mrbenw, guaw jre denrciax kuair kuair ar,” Gnaxsunn qra cniaw qah srii.
“Jre guaw ee ciax, liw kacc benw qapp langg kreh,” Sewsiux m vangwhiux.
Gnaxsunn cuir ham ham.
“Guaw duxjiah dirr ciax-lai danw beh qui’ diamxjingx ar,” Sewsiux ngua jit xee ngiursniur, bersux kiamr jit qui narnia.
Ho’ngg cid long veh long, Gnaxsunn lig bagbaii. “Liw ciax tingg dirr dyhh?”
“Dyrr dirr jiax duarlo qnix:a nia,” Sewsiux qorr ciuw viw, hnuahiw qaxx be qor tihh.
Javolangg cuarlo, sianglangg qniaa laii qaur tingg dirr lorvongg ee LEXUS. Sewsiux singx ter luxsu kuix ciamngg, qaqi jiacc kaux duiww ciax taujingg jre zip laii qawsuxjy.
“Vangqiyy uaw dyc’ui?” naxx decc huatdong enzin, Sewsiux mng kiw.
“Qangxaxcuir,” cuir-jingg ue, Gnaxsunn rinr diyc sigcuir.
Cirqex ee cni’angdingx je, duw diyc angg dingx, haurdanw nng~snax hunjingx quw jin’ suwsiongg, jauw qyqer lortingg u kacc hng .quaw marr iauxx kacc dat.
“Liw jimxaw druar ee soxjai zuarr kuah?” dirr sibzirlo-tauu danw cnix dingx ee sii, Sewsiux mng.
“Dyrr si itvnuax ee tywvangg-gxiac a. Jit dingw bincngg, jit jxox ixdyh, qycc qah jit qingx igqingx,” Gnaxsunn qongw, jniar ciuw tniwam.
“Denrciax u lirven, marr si jit jua lo. U sniu beh vnuax kir li linw qongsix qyckacc qin ee soxjai bor?”
“Kacc qin :ee cuwsuer longxx quir qaxx be bongx tihh. Jinw druar :ee hitt dah, jairqin u sniaw diamwbin marr sik lo ar, jiamrsii byy sniu beh vnuasuaw kir vadd xui.”
“Qangxaxcuir liw narr druar lyhsiyc, ersaiw dirr hiax ngua jit qingx u jauwkax u kectniax ee. Cuwjox guaw laii lap.”
Gnaxsunn sraiw ciaa bak. “Guaw ee dairjir si anwjnuaw si liw decc juxir?”
Sewsiux uat tauu knuar jre ix vnix:a :ee. “In’ui guaw byy air liw jiahkow, guaw beh air liw kuaiwlok, hingrhog.”
Cnex-dnia-vec-dnia, Sewsiux kir kanx Gnaxsunn ee ciuw, go qix jingxtauu-aw qra duiwhongx ee dauh lehh. Gnaxsunn beh qiux jauw, Sewsiux m vangr, qycc qra giuw laii cuir-vnix jimx.
Sinwhyrdingx vaixter angg ngua cnix. Vutdik’iw, Sewsiux qra ciuw vangr .kuix. Ciax qycjaiww kixqniaa, Sewsiux pah honghiongwdingx jniar uad jnriu qyqer. Veh diamw gua ar, cialiongw iauxx vutjiw aw je. Ciasog qnuaw be qinw, byy jikciax dyrr iauxx jin’ qajair.
“Liw mair qamxqag duiww guaw u kuikiamr. Guaw ee gendamm-diongx narr u qnaa uanwkir, hex si guaw qaqi dyrhing cenw, byy vakdngg,” Gnaxsunn dam dam aw genn kiw.
“Guaw ee dyrhing beh narr u liw ee jidvnuar, qamxcaiw dyrr be jiacc tongwkow, jiacc siurbuaa,” Sewsiux kenciyr.
“Jinghun laii, jinghun kir, ng-ngidnii-d. byy liauw sii,” kinx aw sueh, Gnaxsunn bersux decc qongw hro qaqi tniax.
“Guaw byy tangx cincniu liw hiacc piauped. Bak beh knuar, ciuw beh bongx, simqnuax e sniu, liw si guaw soxu iogbong ee lautauu,” Sewsiux qongw qaxx duarsimkuir.
“Sig dyrr si kangx, kangx dyrr si sig. Rair guaw vuerliam Simx Qingx hro liw tniax bor?” Gnaxsunn qra siaukenw.
“Qui’ vnuar siwlangg dirr gnow lyy okser linr linr qy, qui’ srinx amjamx uewsuer guaw qaqi jaix jaix. Guaw u simx beh hiongr sxen, mrqycc narr byy liw jan au ciuw e qniaa uaiciaa. Liw qnaw zimxsimx bagjiux qimx qimx knuar guaw duirlyc, vangr guaw dirr iogjingg-sewqair zuxx qyy zuxx lasamm?” qiongrbeh huew huad ee kuanw, Sewsiux sraiw auu-sniax.
Dimgimm dngrr sniasueh, Gnaxsunn knuar duiww ciatangx-gua.
“Henrvo u jit xee javolangg juann brang liw qaixqiur. Posad qamxx m si tniax diyc aikow sniax, qiuwlan qnuaw qinw qinw? Jnuaxngiu liw qig gua gua junw byy knuar .qnir? Lenrr jit xee siok jue ee qihue dy' m hro .guaw?” Sewsiux tnrix ue, jinwcuw vangr jinrvong.
Gnaxsunn cinwciyr. “Jriw qniax guaw jursinx lann vryw. Posad jyr be singg junw duxhyw, hai liw guaw qycjaiww lyc koxhaiw dyrr jin’ hiauhing,” trow jit xee kuir, Gnaxsunn iong bagbuew qra qaxsuxjy :ee liyw .jit .xe
“Narr erdangr qycc qapp liw jywhuew, lyc dergak guaw marr qamguan,” u ue jin vxag vniar, Sewsiux kauxkir qending.
Jniawvingg ee honghiongwdingx decc sih, LEXUS lyc qyqer laii qaur Vangqiyy. Dirr ci-lai duw diyc jit xee angg dingx jiamrsii dongwdiam ee sii, Sewsiux kanx Gnaxsunn ee ciuw kir dah dirr qaqi ee simjyy binrdingw. Jitt dxauw, luxsu byy kongwqu, vangr qiwjai ix.
“Guaw druar dirr tauqaur hitt dongr duarlauu aurviah ee hang-aw. Liw narr u beh kiw laii jre, dyrr cue xui tingg ciax. Narr byy, dyrr cinwcaiw soxjai vangr guaw lyc .laii dyrr ersaiw,” Gnaxsunn qongw, kauxkir unhyy.
Qui’ee bin bersux e huad qngx, Sewsiux sincaiw henxiongg. Ciax sraiw dinxdang, siongr diyc cia’ui, jit vaiw dyrr tingg hyxser, longxx benw qycc ced. Sianglangg lyc ciax, Sewsiux uaw kir kanx Gnaxsunn ee ciuw qniaa dangjee. Cue syxsii kuix mngg, Gnaxsunn vangr qu jingzinn zip quivangg.
6.
Siacjuh ee erkaqux qra sreh zip kir kowtauu, kiyh niaw, niaxduar qra jnrix zip kir sejongsnax ee cacde byy qad. Iwdiongx :ee dirr sexbinrqingx decc sexdng. Sewsiux jre dirr bincngg-qnii caknuar ciuxqix-lai ee sinwsid qapp qinaxzit ee hingtingg. Ejaiw byy huergi, byy iauwsu, ix tangx singx dngw cur nirr ngua jit sux cingkir snakor jiacc zip kir qongsix. Iarr diyhh siaw E-MAIL qra viwsux qongw .jit .sniax, kacc benw ix decc bangrguec-jiamcnix nicnih danw.
“Mihqnia tec u jiauu diyc bor? Ciuxqix-aw? Syxsii?” itcer cuann hyw beh cutmngg jinwjingg, Gnaxsunn mng Sewsiux.
“U, longxx u tec ar. Dysia liw diamxdnaw,” Sewsiux ciyr ciyr aw qongw, qra Gnaxsunn lamw uaw laii jimx cuir.
Ciuw kanx ciuw, nng langg qniaa kir qaur jarhngx erhngx ciax tingg ee soxjai, Sewsiux jiauwguann qra Gnaxsunn kuix ciamngg.
“Liw jaixkixdngr longxx byy decc jiac?” qra ciax ee syxsii cah .zip .kir, Sewsiux mng, hionghiongg sniu .diyc ee kuanw.
“Guanw qongsix hiax u jit dnar decc vaux sor vngruann,” Gnaxsunn inwcuir. “Guaw m si linw jaboxqniaw. Liw benw qra guaw huanlyw.”
Sewsiux ciyr ciyr byy qycc qongw sniaw.
“Ehngx amr guaw u ingwsiuu, m jaix e qaur zuarr nguar. Minaw vaiwgo, guanw haursnix e dngw .laii. Liw beh laii guanw daux jiac amr bor? Guaw qiyr guanw jaboxqniaw harkyr liauw marr rair dngw .laii, linw snax xee tangx sigsai,” Sewsiux qongw, ciax sraiw jnriu duarbexlo.
“Lingrr zit lar, mair jiacc qinw,” Gnaxsunn hnair tauu.
“Byy, vaiwlak jaiw guaw laii cue :liw? Lanw tangx sraiw ciax laii kir Gilann Dakex sew hongjuiw.”
“Vaiwlak zit .sii longxx bersaiw. Guaw diyhh kir qiongrsiux, jerjy.”
Tenvingg likqingw, Sewsiux uat tauu qra ganw .jit .xe. “Acc narr vaiwlak amr lehh?”
“Vaiwid qaur vaiwgo rair siongrvanx. Sew snxax, vniar cur-lai, kuanw dangx kuanw saix, jin’ tranr hiyckunwzit. Liw mair laii kacc hyw.”
“Guaw cniar langg’ laii qra liw draur vniar,” Sewsiux sniu vo.
Gnaxsunn sraiw huexbak. “Liw mair qapp guaw qongw hex byy kangx byy sunw :ee.”
Sewsiux ciyr hihix. “Anxnex dyrr dna’ cunx lexvaiwzit ar. Dauwdin jiac diongdauwdngr lehh? Liw qycc u sniaw jiawsuu tangx qongw?”
“Cur nirr sittauu dunxjig qui’ lexvair, jit vox kuanw be uann. U si jiac amr. Liw marr diyhh vuah quaw siqanx vruee ginxaw,” Gnaxsunn qra diamxcniw.
Jnriu qyqer, zit tnibak, Sewsiux qra ozinn bagqniar tec cud laii qruar.
“Quikir liw vnuax laii qapp guanw druar kacc diaudit,” Sewsiux tegi.
“Huicinx-huicig, duiww liw nng xee ginxaw byy jundiong,” Gnaxsunn kauxkir siokzenn.
“Acc byy, lanw singx vran qethunx,” Sewsiux beh qra dairjir tit hro dit.
“Qethunx m si banrlingdanx. Kinsinx qethunx jiacc laii lirhunx, huiwkir-huiwdag qex giaa qee.”
“Mair lirhunx m dyrr be huiwkir.”
“Hngc! Narr jingwqingx qaur qaxx qed sixuanx ar, m lii, si beh vangr lecc lenhuee niih?” Gnaxsunn qra sngx.
Sewsiux trow dua kuir. “Byy air qethunx qycc hingr jersenn, liw si u anwsngr beh jyr niqox, si bor?” Sewsiux qongw sngxciyr.
“Iauxx berdangr, u jiycjer dilehh, qapp langg' u dngdew, diyhh singx cinghuann jiacc tangx kir,” Gnaxsunn sidsueh byy gauu qunw.
“Jiycjer?”
“Jingg:a qapp langg’ lenjaii kuix setqer-qongsix u qra ginhangg jiyckuanw,” Gnaxsunn suecbingg.
“Jinw qongsix lehh?”
“Siux .kiw .laii ar,” Gnaxsunn dab. “M si singlixkax, jyr kacc byy nng dxangx dyrr dyxvnuaa, qehuew tam .lyc hud liauw liauw, nitnuax jiauwsiongg diyhh lap.”
“Longxjongw iauxx qycc kiamr langg’ zuarr je? Guaw laii pewbuew,” Sewsiux jin’ sangxser.
“Liw ter guaw hingg siaur, si beh jo guaw tangx kacc jaw kir cutqex?”
Driau .jit .xe, uadlinwdngw, Sewsiux vangr sniax dua ciyr. “Jex qamxx sngr jyr si huawenn?”
“Vutquanw si m si, sijuw qongdig buliong,” Gnaxsunn qongw qaxx u kax u ciuw.
“Guaw qacc jiacc gongrtuc? Dyrr decc ziog liw be did diyc a, qycc cniaa liw cutqex, qra liw sag duiww niqongi kir! Iarr m si decc byy jingwtauu qyc!”
Byy qycc inwue, Gnaxsunn bih cuir taux ciyr. Qimjaw jitt dniuu dapcuiwqow qaur jiax siusuah.
Lyc qyqer quer jit xee cni’angdingx, li Gnaxsunn ee qongsix iauxx u .jit .der .aw, ciax-dingw ee luxsu huah beh lyc ciax.
“Narr hro dongsu knuar .diyc, ing’axue qnaxx iurqycc jit dua tuax,” Gnaxsunn tiacbingg.
Juntanr bingrling m qnaw uigik, Sewsiux qra ciax tingg lorvnix vangr Gnaxsunn lyc .kir.
Qycjaiww jnriu qyqer, vnuar diamxjingx au dngw qaur cur, jaboxqniaw ee ciax byy dirr ciakor.
“Dnaxx si cutmngg kir ar iacc si jarhngmii byy dngw laii kunr?” Sewsiux jiokk cnigii.
Ciang’ik, ngua cingkir snxax, beh uaw jap-id diamw jiacc dac zip qaqi ee qongsix. Dairjir duisnuax-duihaiw rair ix cinliw danw ix dingrduat, m si qipbu dyrr urngiaw.
Liaurliiw qaur jit xee kamxjam, Sewsiux jimjiog dyh-dingw ee jyrjingx, qycc jap hunx beh quer gorsii.
Diongdaur jiac bue? Simliam liw.
Aiwzinn-aw byy air langg’ jaix inx ee luanjingg, ciuxqix-aw huad TEXT pyrunw.
Ervox ee huergi jriab siy’ suar, siqanx siuh .jit .xe, zidtauu iurqycc beh qapp dag’ee qongw jaiwhue.
“Bangrlo-dingw u hitt hy beh jiyx langg’ suer cur ee qongxqyr. Danw liw kacc ingg kacc lingxtingw jiacc bongxx kir srunn knuar mai. Vangqiyy Qang’axcuir uaw denrciajam, qenwnarr knuar diyc diauqnia u hahdaii :ee, liw dyrr E-MAIL hro :guaw,” beh harvanx jinwjingg, Sewsiux qaudair viwsux kangkuer.
“Beh air quiw qingx vangg?” viwsux mng.
“Jit qingx nng qingx longxx buhongg,” Sewsiux qingqactauu giaa .jit .xe.
“Kacc air duarlauu-cur iacc qong’uw-cur, higjiaw longxx kyxiw?”
“Duarlauu-cur hyw lar, u quanxlixuann :ee kacc anjuann.”
“Cuwsuer siongrr quann beh dring zuarr je?
“Zuarr je or? Singx setding nng-bxan-go cue knuar u bor. Narr cue byy, tangx vangr quann qaur snax-bxan kox.”
“Liauxqaiw,” viwsux ciyr bibix, mng hro siongser kacc hyw jyr dairjir.
Ehng’amr u jit xee jiuxhue rair kir, limx jiuw liauw sraiw ciax dua dua m tangx. M jaix quiw diamw jiacc e suacdniuu, suqix jair ix qaur xui, Sewsiux dyrr hro ix harvanx, anwsngr kacc nguar qaqi jiacc jre qewdingg :ee dngw .kir.
Surgiap kixqix qaur dnaxx duxx zi-jap jiunii, dui' qowhiongx Vnuawsnuar huatjow, iyhjingxdiamr diamwgiac jinw tong’ Daiuann kaised ciauquer jit-vah qingx, dairsiongx duardimm kingwjiog, jin' hniaxdniuu. Sinsiongx sna’ jinwjiuw qau’ngua penwhongg, singlixlangg gauu tranr siqix, tongsiongx byy decc qingw sii qingw derjiw.
“Dangxsurdniuw ar, qinrlaii decc byy ingg snaw?”
Sigsai ee snia’imx, sigsai ee pangjuixbi, buerjingg qnir diyc langg, Sewsiux ixx jai’ngiaw laii jiarr si dxii.
“Gui Qingliw, jiokk quw byy knuar .qnir,” Sewsiux qongw, lexmau qiongqiongx.
“Si dyrr driyc. U bad siauwliam guaw bor?” ang’iam ee cuiwdunn, jabow qingliw vehteh hyw qutqeh, qui' sinkux juanx diunngw, jrngx qaxx huex huex hiyc hiyc.
“Iarr u jit xee byy?” Sewsiux ciyr ciyr aw rinr. “Qra linw qauquanx hiacc quw ar, vutsii marr decc sniu qongxx linw iyhliau dangsii beh lutqer bre :guaw?”
Itlaii-it'ongw qig go kangx. Sewsiux bagjiux lyy lyy, Gui Qingliw bin anggee anggee.
“Jitt huee Frankfurt ee denxlamw, linw qamxx u beh kir?” Gui Qingliw mng, genw decdeh.
“U. Linw lehh?” Sewsiux rinr liauw dyww mng ix.
“Marr u.”
“Qangrkuanw beh tiaupair liw kir m?”
“Guanw angx rair kir Los Angeles kuihue, ginxaw cue byy soxjai qiawcauw. Jitt vaiw guaw berdangr kir.”
“Jin’ bycaiw.”
“Si a, urngiaw bycaiw dyrr driyc,” qongxue vauhamm, Gui Qingliw jyxiu jing’au ngiaw .jit .xe. “Liw beh laii jauw bor? Lanw erdangr an’ aurbin mngg cud .kir,” jabow qingliw sraiw bagbuextuax, qapp Sewsiux decc juiwganw.
Sewsiux ciywsinn byy .kir. “Kyxlingg byy hongven.”
Gui Qingliw gonggniac .jit .xe. “Haixlingg Ongg srii juiw! Liw tunx dogsuiruann qaiw jiac cair ar?” Gui Qingliw qra saupii.
Sewsiux gix aw gix, byy qongw sniaw.
“Liw u langg ar?” Gui Qingliw decc qra cimxknuar.
Sewsiux cuir bih bih, hamjux-vuttor dnir hmc hmc.
“Qamxx u cax? Linw bow iauxx dilehh ee sii, liw dy’ byy air pngcsngh laksag :ix, byhsuecqongxx iauxx m si bow.”
Iauqiaux luw cuir qin bak qin, Sewsiux bagtauu kiycqingw dngrr uerqur.
Jiy’inw be dyw, Gui Qingliw bin vnir vnir. “Guaw diyhh kir qapp langg’ aisaju. U kueckiamr snaw rair guanw qongsix hogbu, liw u guaw ee denrue.”
Dac quann dah :ee gniuw lehh kir vadd xui, qikpni ee pangjuixbi jiamrjiam aw snruar .kir.
Jiuxhue suah, jiangwsii beh uaw jap diamw. U quaw juiwir ee Sewsiux simqnuadew u dnaxsngr.
“Liw qamxx qaur cur ar? Guaw jinw quer kir liw hiax.”
Denrue qongw suah, Sewsiux dirr vngrdiamr mngkakauw jnriu qewdingciax.
“Vangqiyy Qangxaxcuir, vaiwtog,” Sewsiux hiongr unwjiangr dua :ee qongw.
7.
Vaiwlak jaixsii, jaboxqniaw qapp haursnix ping nguar jingsinn, nng xee longxx siyw daur jiacc kixcngg. Sewsiux sraiw ciax jair inx kir cantniax jiac daur. Jiac vng vaw, jyr laurve :ee beh jiyx nng xee ginxaw kir denrngiaw sniaa knuar ngiaxhir. Inx qokk langg suacc longxx u dairjir, duiww laurve ee jiy’iyx byy hingwdauw.
“Guaw kacc danw beh kir hiwquanw knuar viauxenw, hiwdnuax jiokk jaw ixjingg dyrr tiah ar,” jaboxqniaw qongw.
“Guaw rair kir dosuquanw cue juliau, qycc dong’yc u jiyx guaw beh amr aw kir pah naqiuu,” haursnix qongw.
Veaxqniaw snax xee ervox qokk langg qniaa qokk lo, Sewsiux jyr suqix qra inx sui’ langg sangr qauwui. Vnuawlyxzinn, byy der kir, cuwqingx byy langg kacc ngiaa siwqer liulenn.
Jersenn qniax cauxlau, Gnaxsunn ee ciuxqix an’ jaxkixvox dyrr qnuaiqix erdangr lixhue. M jaix qamxx si be qir did kuiqix, jiangwsii jap diamw gua ar, iuguann jriab be tongx. Jarhngx jaixkiw dauwdin jre qewdingg :ee sangr ix kir siongrvanx dyrr byy qycc qnir diyc bin, sniusix qaur jinrmngg, u sniu beh vniar .kir, qycc qniax ix ixqingx jnriu cngg decc kunr ar.
Qinaxzit jersenn ee jongrhongw sniaw kuanw? Binaxjair beh qapp langg’ kir Tyhngg pah golf, dngw laii Daivag e qapp liw lenlok.
Tekst huad .cud .kir, vnuar diamxjingx au byy siausid, Sewsiux sixsimx kir kunr. Qecdngw qangx ee jaxvox qauw diamw cutmngg, jap-veh dong pah suah, dag’ee siy’ jiyx kir jiac daur, lriauu tenx lriauu de. Nngxvox sir diamw gua dngw qaur cur, haursnix ixx dngw kir hagliauu, jaboxqniaw guanjai byy dilehh.
“Halo, byy ingg suah ar?” Denrue jriab tongx, Sewsiux kuitauu dyrr mng.
“Cavutdyx ar,” Gnaxsunn rinr, jingsinn kunwquan.
“Guaw laii jriab liw kir jiac amr.”
“Tiamw qaxx, byy sniu beh cud .kir.”
“Si or? Acc byy, guaw brew amwdngr kir liw hiax pnua liw jiac. Liw beh air jiac sniaw?”
“Guaw byy decc qingw jiac, sowsit :ee longxx hyw.”
S.-sirsua-s., lak diamw tongw, Sewsiux dua qnrua ser qnrua laii decc qiywmngg. U mi, u vng, u muee, qycc u jenvniaw, tongtongx sor :ee, lisix aw iucyx dy’ byy.
“Pnaixser or, liw diyhh jiu .guaw, ehngdngr suacc byy cnecaux tangx jiac,” Gnaxsunn qongw, naxx iong tiauqingx decc la siyx muee.
“Jiac cair byy jiac cyx, huec’iuu kacc be lyy. Liw si guaw ee quiwzinn hyw qiuwcnix. Cniaw sriu siyxsingx id vair,” Sewsiux qongw, cniuwzia qiamx aptauu.
“Mair diamr hiax dnir denx dnir siauw vnuar tinrtong,” Gnaxsunn qexir qra grinn. “Liw narr jinjniar u cnixgno, cijaix diyhh jiauww snax dxngr.”
“Lingxbing, au guehzit ceid jap-go kaisiw jiac tniqongjaix,” cauxdiuxaxsinn, Sewsiux qongw diyc byy jingwqingx.
Gnaxsunn iyy tauu dnir kenciyr, kad jit cuir qiamm muee cir jubi.
“Guaw u dirr bangrlo knuar diyc quiw qingx aw u hac liw suewcuwkia :ee. Longxx dirr jiuqin byy quiw vo lo. Liw dangsii beh kir knuar? Iacc si guaw singx E-MAIL hro :liw?” Sewsiux qongw, naxx decc jiac caxvng.
“Guaw qamxx u dac’ingr qongxx beh vnuax?” Gnaxsunn bak buix buix.
“Liw jitt qingx tywvangg, byy qecqingx junw duxhyw, lenrr jauwkax dy’ byy, sidjai jiokk liausiauw, jiokk vutven.”
“Suacc m jaix tywvangg ee vangsuer kacc siok?”
“Aurvaiw cuwsuewjnii longxx guaw lap.”
“Qamxqag jiokk vutduir,” Gnaxsunn qongw, lig pni, kiaur cuir.
“Liw ee sulu qamxx be sniu je?” Sewsiux ee kauxkir venr giamgaii. “Vuddyy marr u decc huawjaix, sriu langg’ kuanxtai a!”
“Qeqyx decc viw daurjniur!” Gnaxsunn qra qangr. “Langg’ inx hiaxee sijuw si sriu Vuddyy qamxhuar, beh air tniax Sewjunx qangxdy. Liw logtiongr kasiauw, sunzenn beh air pna.”
Sewsiux sniu beh ciyr, qa cuiwkiwqinx qiongg lunw lehh. “Knuar liw si beh qethunx iacc vnuax cur, nng hxang hro ix qingw jit hxang.”
Cimsniu jit kunr, Gnaxsunn nngxcuir trow dua kuir. “Danw liw an’ Dikqog dngw .laii, lanw jiacc laii knuar cur.”
Sewsiux dimr tauu jin’ cing’ir. “Liw u beh qapp guaw kir bor?” Sewsiux mng, byy-tau.-byy-su.
“Kir dyhh?” Gnaxsunn bongx byy mngg.
“Dikqog a.”
“Guaw rair siongrvanx!” Gnaxsunn qongw qaxx cnijinx .kiw .laii.
“Linw qongsix qamxx byy qipqar?”
“Guaw druar iauxx byy jit dxangx.”
“Liw qra qywqer a,” Sewsiux qongw. “Jitt jun Aujiux be qnuaa be zuac, dng’ hyw cittyy.”
“Guaw au qywguec beh kir hagsenn, tauqex benxqiongw junw guaw snax qangx ee qxaw. Guaw beh taixtyw qycc qa’ngg cringw? Ho’ngg qaixqor kacc kuair.”
Gnaxsunn qongw diyc iuxdiauu-iuxduan, Sewsiux duiww jitt jann siawsimx byy qycc iusuer.
Jiac amr vaw, cid diamw gua, jit daii qu denrsi byy derr sir daii marr bongxx kuix kiw laii knuar. ‘Hiongr qi’uiw ee budlixhagqax cunqingr’, busnuar denrsirdaii juer juandee jetbok, an’ NEWTON, EINSTEIN, qaur HAWKING, zinlui huathen inxlat, ox dong, qapp tangg-dong dringw jiongxjiongw uxdiu-henrsiong, quibuew beh tamwjax siqanx luxhingg ee kyxlingsingr.
“Narr jinjniar e tangx dngw kir qaur quewkir, liw sniu beh kir dyhh?” Sewsiux mng Gnaxsunn.
“Cinbak knuar cinhni tniax Vuddyy qangxqaur si zinqanx dua hokkir. Guaw hibang erdangr dngw kir qaur nng-cingx go-vah gua nii jingg,” Gnaxsunn unn unn aw qongw. “Acc liw lehh? Liw beh kir dycc jit xee nidai?” Gnaxsunn dyww mng ix.
Sewsiux tauu damwqe, pnaixser pnaixser. “Liw ee jiwliong dua. Guaw ee guanbong piw piw aw, narr qongw .cud .laii, unxdangr e hro liw kiycciyr.”
“Guaw quatding be qra liw ciyr,” Gnaxsunn qongw, jniar ciuw suar giaa kiw laii jxiur.
Jitt vaiw byy beh qig qandenn, Sewsiux ee viauxjingg giamqinw. “Quewkir narr erdangr dingg qniaa jit vaiw, guaw e jyr byy qangg ee suanxdik, juadbyy hro liw siongsimx sitbong.”
Tniax jit xe auu dni, Gnaxsunn bagkox angg angg. “Langg’ si hro liw kir tniax, kir knuar, kir qinglik, m si qiyr liw kir qaixvenr ligsuw. Liw jiahjunw qaqi si SUPERMAN?” Gnaxsunn qig jit xee kinsangx ee uerkuanw, beh venwngua kiwhunx ee kiwdoo jin’ binghen.
“Liw u huirqinx, gnorsingr quann, tniax Vuddyy dua junjiaw suathuad liauxau, beh tacc u kyxlingg qycc qapp guaw jitt hy ionghux-siogjuw jywhuew?” Sewsiux bin iux iux.
“Liw jex ingg huanlyw, qex sniu :ee,” Gnaxsunn qra ciyr. “U giab’enn decc ken’inw, byy qapp guaw, liw jurzenrdig e duw diyc vadd xee.”
“Liw si iid jit xee guaw sniu beh dauwdin quer sing’uac :ee,” Sewsiux qongw, bagsinn uac.
“Liw ee jipsimx sniu’ dang, jitt jiongw taiwdo vutkyw cruw,” Gnaxsunn qra suecqaur. “Qycjaiww qongw, sewsu je venwhuar, langg ee simx ingxingw marr e duer lecc venwngua.”
“Guaw duanwzenn be venr,” Sewsiux duiwcuir qongw.
“Cingx nii cande veh-vah jruw. Liw ue qongw sniu’ muaw.”
“Guaw bad crua .quer, marr bad qaux .quer, guaw jin’ jaix qaqi qac’ir sniaw, beh air dnic sniaw,” Sewsiux vyc’ue.
“Enn cimx enn cenw u juwdnia, langg diyhh yc tuathuar jiacc e kniuwuac,” ser aw sniax, Gnaxsunn naxx cincniu decc jurgenn-jurgiw.
“Liw iauxx si u sniu beh cutqex?” Sewsiux decc qra cir simsu.
“Liw qra guaw dnii diauu lehh, guaw beh anwjnuaw cutqex?”
Byy sui’ inwue, Sewsiux dnia dnia sniu .jit .xe. “Langg jngzenn byy iogbong, jex qamxx u kyxlingg?” Sewsiux tyxjenr.
“U kyxlingg bor, jongw rair cir knuar mai jiacc e jaix. Byy qaur qaxx jit xee siongdongx ee qingxqair, qenr su ingxingw e qeh jit dingg moc.”
“Liw siulen ee pinxqib qaur siongrliuu ar?”
Gnaxsunnn hnair tauu trow kuir. “Guaw si beh qongxx, diyh’air u sinr jiacc u dongrlik, marr jiacc qniaa e qaur.”
Giamjingr ee jetbok suah, ngua vnuax cniuwquax :ee. Gnaxsunn tec rimokong jun vadd daii.
“Liw duiww guaw e ham'uanr .be?” Sewsiux hut .jit .xe qycc mng.
“Ham'uanr?”
“Uanr guaw decc joxgai liw qniaa cingjing ee lo.”
Gnaxsunn iyy tauu. “Liw byy giaa cingr vig :guaw.”
“Liw ee ‘juriuu-iwjir’ lixlun,” Sewsiux qongw quaww siangx ciuw viw.
“Liw iauxx qycc e qir tihh!” Gnaxsunn qongw, iwsiongw-vutqib.
“Liw qongw ee muixx jit qxur, guaw jongw diauu-simx-diauu-qnuax,” cuir dnix jic qut, Sewsiux qongw diyc jiokk sunrjingg.
Gnaxsunn tauu cih cih, bagjiux iurqycc cilunr, Sewsiux ee ue pacsngr u pah diyc ix ee simqnuadir.
“U sniaw simguan bor?” Sewsiux qycjaiww tamr.
Gnaxsunn tauu kix kix sniu .jit .xe. “Hibang lanw ee hokvyr jxig u qauwgiac, au sxer e tangx qycc tniax diyc vudhuad, qex qed quaw senrenn.”
“Acc narr guaw jitt kuanw moqongx iacc hiongsinn-oksuah dyrr cenban m tangx qycc hro liw duw .diyc,” Sewsiux voxtnix qongw ueaxzinn.
Dongr vutju, Gnaxsunn tniax jit xe ciyr cud sniax.
Jap diamw quer, Sewsiux qongw beh lauu lyc laii quer mee. Gnaxsunn byy dong'ir.
“Amr lo qniaa quw e duw diyc qxuiw, hro dongsu huathen qinxjuarban. Liw amwsii diabcur byy dngw kir kunr marr m hyw, pnaiw qxuiw cuartauu.”
Gnaxsunn cuiqnuaw ix dngw .kir. Sewsiux jiongjiu tingwjiongg, qra Gnaxsunn lamw lehh vutlirsii, jiokk quw jiokk quw jiacc vangr ciuw.
8.
Qimx mox, angg xmngg, ox taujangx, gnoxlo gnoxsiklangg an’ gnoxdairjiux laii :ee, dirr denxlamxdniuu-lai jiauu duw e diyc. Kecmngg beh ong, sanxpinw jingliongg snesingg diyh'air, bervatzinn iarr diyhh hyw kecjingg jiacc e hyw ci. Jit dniux DM sangr hro langkeh, puewhap 3C ngiaxsiong, giabbu jinrjingg juer suecbingg. Bexkeh qangxqer, harliauu be jxuw did ir, diyhh dangxsurdniuw cutbin ciauu. Qewqeh zirviw u qatdnia, sngr sii sngr zit u juanlangg singvan huathuer. CLOSE, jit dniux dniardnuax qaur jiax uanmuaw.
Frankfurt gnoxau snax diamw, qa’iac lirci iarr diyhh vuah qangx cue jit xui kacc piacjing ee soxjai qapp dacsimx :ee qongw jit xe aw ue. Gnaxsunn zit .sii dirr qongsix rair iamw langbak, kacc byy hongven. Sewsiux beh siy’ cue diyhh danw qaur ix harvanx dngw qaur cur, Aujiux jitt vingg si erdauwvox.
“Iauxx qnuaa qaxx, ho qycc dagg qangx lyc, qui’ zit qnuaix dirr denxlamxdniuu,” Sewsiux qongw, bin aur aur.
“Narr u cud .kir, diyhh cing kacc siyx lehh, m tangx kir qnuaa .diyc,” Gnaxsunn qra jixsingw.
“Junbing,” Sewsiux ciyr hihix.
“Binaxjair vaiwlak, guaw rair kir hagsenn, zit .sii ciuxqix-aw e qnuaiqix.”
“Liw vaiwlak dniardnia longxx byy ingg, lanw hiyckunwzit longxx berdangr dauwdin,” Sewsiux duii odau.
“Hyw lar, aurzit aw guaw be hiacc jiap kir.”
Qapp Gnaxsunn video suah, Sewsiux cunhongx muaw bin dngw laii huerdniuu, en’ lo knuar diyc sigsai :ee, qapp langg’ siy’ jiycmng marr si ciyr bibix.
“Simjingg be baiw oox!”
“Ngngx, liw nacc jauw .laii?” Gui Qingliw vut’iwqanx cuthen, Sewsiux diyc jit qniax.
“Guanw angx ee huergi cuxsiaux, byy kir Bixqog,” Gui Qingliw qanxdanx rinr.
Sewsiux dimr tauu byy qongw sniaw.
“Linw dauhiyh dirr dyhh?” Gui Qingliw mng.
Sewsiux diamrjni byy gensuu.
“Liw qniax guaw jauw kir cue :liw?” Gui Qingliw mng, cog langg’ ee simsu.
Sewsiux qig kenciyr.
“Liw duiww qaqi jiacc byy jursinr or? Iacc si qongxx linw hitt xee hro liw ee sinwsimx byy qraur qensit?” Gui Qingliw jin’ qra saux.
Quer sniu .jit .xe, Sewsiux qra qongw.
“Druar jiacc hyw!” Gui Qingliw huah. “Liw jitt xee tauqex jiokk kongw, jiokk tniar vorsiok. Byy cincniu guanw ee, qig liabkiap.”
Byy inwue, Sewsiux ciyr ciyr junw quer.
“Beh jywhuew jiac amr bor?” Gui Qingliw cutjiyx.
“Pnaixser, qapp langg’ iog ar,” Sewsiux tesuqor.
“Acc minaxamr lehh?”
“Qniax juer limsii u dairjir, m qnaw rinw .liw.”
Gui Qingliw bin vnir suatsuad, vangwhiux, uad lehh qniaa lirkuix. Jaboxlangg ee langngiaw uadzuxx li hng .kir, Sewsiux ee simqnuax uadzuxx vingjing.
Denxlamw beh jinrsuacbuew ar, qinnii ee dniardnuax qaur jitquw iauxx byy dingw nii ee jidvnuar.
“Rair qapp guanw huersia ee langg gimxgi .jit .xe,” Zidvunw laii ee bexvan qongw, beh qycc simr knuar.
“Qewjnii qaxnaxx u kacc quewvnuaa,” Jordan laii ee tauqelangg qongw, beh qycc qacqer.
ORDER ciamx be lyc .laii jiokk auwnaw, u-byy jin knuar bindnuar. Sywsimx-sywqnuax, lut ciuxqix, jun denrsi, knuar be zip simx, tniax be zip ir. Vangqingx-lai u jit daii mini bar. Byy sreh cyxtad ee minibrandi, Sewsiux qanaxquar jun .kuix dua cuir jriax. Qinaxzit vaiwlak, Gnaxsunn zit .sii kir jersenn. Jiangwsii Daiuann vnuawmii snax qnxix, denrue kar .kir e qra caw jingsinn.
Huexjiuw decc huatjog, taukag u decc gongg. U langg laii decc longr mngg. Vunxjniaa trngr qaxx cunx qiapsnax qapp lairkor, Sewsiux cimxix qinw cing.
“SURPRISE!” Gui Qingliw kia dirr vangmngg-gua, ciuw qnrua jit quanr ciampagne.
“Liw qanxe jai’ngiaw guaw druar jitt qingx vangg?” Sewsiux diyc cniqniax, bin venr sig.
“Lenrr jex dy’ dnaxtingr be cud .laii, guaw qingliw m qapp langg’ jyr qew :ee?”
Siw dingdingx kia lehh, Sewsiux srid penkiaur, jidsii berhiangw venwtongx.
“Lanw beh itdit kia dirr jiax or? Liw byy beh cniaw guaw zip kir jre?” Gui Qingliw qongw, jiuxqanx qnrua lecc lo.
Diwqag diyc qaqi cingrcah byy vicjah, hro langg’ knuar diyc dendyww baiw, Sewsiux qra mngg kuix kacc kuix.
Jid’err zip .laii, Gui Qingliw qra siyjiuw he diamr qniawdyh, uat dngw srinx, siangx ciuw kir puah dirr Sewsiux ee qingqah, tauu kenr kenr beh qra jimx.
Sewsiux kinx lat qra sag .kuix. “Mair lar.”
“Liw ee sinkux gni viakviag, aplik dikkag jiokk dua. Guaw marr qangrkuanw. Lanw nng xee longxx rair tauw .jit .xe.”
Sewsiux damwgam, u decc dongrsimx, bagtauu qad qyckacc uaw.
“Lanw longxx mair qongw mair ho’ngg jaix, dyrr be kir sionggai .diyc .langg,” Gui Qingliw dniudauh langg' ee sim'ir, qycjaiww gnirqongx.
Sniu jinr sniu trer jidsii simx bangg, crann crann, Sewsiux qra binrtaujingg :ee sag duiww bincngg-dingw. Ngirde tahiongx byy lriauu ee xia, quanwsiok ee jit gnauh sinkux, dax caa iam huew.
Dikqog ee lexvaiwzit, cantniax u kuix, itvnuax ee diamwtauu iacc hangho byy juer singliw. Buew qangx cutsiux, duarjongx bexbe jit jaixkiw juewjniaa beh qui’ jap vid. Qui' vrangx laii ee giabbu dag’ee hnuatnix-hixde, dogdok tauqelangg bun bun vutlok, byy-sin.-byy-caiw.
“Qapp guaw kunr qang qingx :ee pnaiw cuir pnaiw pni jiokk gauu snisenn. Guaw ehng’amr narr byy dngw kir kunr, ix unw e congr genn jy giw siwqer kir iauu, e ciauu qaxx jiokk pnaiw tniax.”
Jarmii, Sewsiux dngrr jit kreh binn. Gui Qingliw jauw liauxau, kanghix ee simjingg juer jit xe rig .laii. Iwdiongzinn soxx setqer ee DM jit jiw kngr dirr dyh-dingw, Sewsiux knuar qaxx sinn sinn, simqnuakud-aw iux iux aw tniar.
Denxlamxhue qamxx si qinaxzit qetsog, liw binaxjair dyrr e dngw .laii? Taukag zuxx laii zuxx baiw. Byy giaa vid siaw .lyc .laii sui’ be qir tihh.
Gnaxsunn u TEXT laii. Sewsiux jurr vaiwgo qaur jinw iauxx byy juxdong qapp ix tongx siausid. Simqnuax be andnia, Sewsiux ee taukag-lai u jiokk je jiongw sniax.
“Qra junw jyr byy huatsingx, jarhngmii itcer si jit dniuu bang.”
“Dairjir narr cutvauh, vucpang, sionghai e qyckacc dua.”
“Byy qongw, liongsimx vut’anx. Qra qongw, ix qnaxx e lirkuix lanw.”
“Ix narr u jywhuew laii Dikqog, lanw dyrr byy qihue kir huanx qu cajaux.”
“Jiuw sidsit diyhh druan m hyw qycc limx a. Jiuw denx jiuw siauw duiwtauu gro, tnix puar yh vow.”
Txangx-gua amr bongbongx. Dirr jit-bxan qongciyh quann ee tnidingw, Sewsiux dyr sniu jniar sniu sniu qaxx kunr .kir. Jingsinn ee sii, tnix qngx ngia’ngiax. Huelingqix dauc dauc aw decc harqangr, Daiuann Tyhngg Qokjer Qidniuu, vuex qauwui landing. Kax dac lyc sit de, Sewsiux ee simsu iguann zuu ciangxciangw, simjingg viw ciuw nirr ee hingliw iauxx kacc dimdang.
9.
Siangx ciuw kuar dirr handolu, Sewsiux simx hrngx hrngx akjag qaxx. Dingw jua laii, kixdyr ee qautongx dy’ jiokk sunrlauu, jitt vaiw suacc trad qaxx jiokk m si kuanw. Sewsiux jiap jiap knuar ciuxviyw, vnuar diamxjingx qniaa byy nng qongliw!
“Siqanx quer, m jaix e hro lanw zip .kir bor?” Sewsiux amr sniu.
Aurtauu u qiuwhorciax, tunx lo singx hro quer qaizenn. Kacc kir, qiuwhorciax jair diyc huanrjiaw an’ duiwbin sraiw .laii dirr tunlo qapp ix siy’ siamw ciax. Taujingg ee surqor lixcur suah, ciasog venr kacc qinw byy qycc duwdauw, u hur diyc vywdyr byy ban qaur jin’ qaijair.
Vutlun duarser hanr, byy hunx hyxgiahsanr, dua tauqex laii qaur jitt der iarr diyhh qaqi pacpox, byy suxiongrlangg tangx cesaiw. Amwsii jiurcimw, javox jabow ee kunwvangg sna’ qecqair sirersiaur, i.-ingwqaix-q., ingrvng nng dxngr iarr vunkuix byy jywhuew jiac, qanda' dirr dua senvongg jiacc u dauwdin qiongrsiux, marr si hunx jyr lamluw nng vingg byy sna’ lam.
Jyrui jiauww jixding, dag’ee dirr potuann tiabkuann jre, dogdok Sewsiux tauu uat laii uat kir nicnih knuar, knuar diyc jit~vnuar xee aw u singg :ee qycc e dedvet jimjiog. Langg jiauu qaur, dua pax denrhuew qimr huax. Sewsiux qaur jiax siaxsimx, bagjiux vangr kreh.
“Qamxx e guaw zidjiw qir m driyc? Iacc si ix jauxsaux byy laii?”
Bagjiux kreh kreh kax puanpuac, sinkux byy dinxdang kyxviw jit senx jiyhvut, Sewsiux ee taukag kiw huanxhua.
“Guaw hitt jun taunauw byy cingcyw, jidsii amgong. Liw narr u qapp guaw kir, guaw dyrr be kir limx jiuw qraiw utbun.”
“Dua juiw be lrauu did jiyhjingku. Zinsewqanx ee iuxhik si muaw siwqer. Hiongr gua duiqiuu narr si simx ee kiwsib, iwjiwlat qycc byy qraur, cinwcaiw inxiuw laii dyrr ho’ngg kanx lecc jauw m si huanxsiongg.”
“Si guaw qaqi jurgo. Dnaxx guaw u huexgo, guaw e qaiw qxyr. Jurqimx-ixau guaw e siux kax, juadduir be qycc u au jit vaiw.”
“Quann snuax tangx rii, vunxsingr yh qaiw, suiw huex ingxingw dirr vadd jangg. Jinjniar u tniawsimx :ee si sniu beh si’uw, m si sniu beh duadcuw.”
Jit qix hniux ee siqanx quer, bagjiux tiw qimx knuar hiongr jabow hag’uann hitt vingg qycc srunn jit vxenr.
Laii decc hagsenn kyxviw cutqelangg, quewgnow byy jiac si qaiwlut. Jap-id diamw dyrr juw sik qiongjaix. Jiac m jaix qiamm-jniaw, Sewsiux cinwcaiw vex vex lehh, nguaxdi diyhh qaqi sew.
Ziddauwau rair jerjing snax qix hniux jinjniaa gnirdauw. Hipzuac, taukag hingong, zusuwbang jit xee jriab jit xee. Bincngg-dingw ee jaboxlangg, u sanxsyh :ee, u pongwpuee :ee, u viwsur siusiab :ee, iarr u duarpair dair tyhuex :ee. Simhuew qig .kiw .laii, qnua lrauu jiab dih muaw srinx damm qaucqauh, bersux decc sew vut.
“Cniaw unxjunw guaw tewcud. Zuxx jre, imsimx zuxx dang; sensu qangxqingx, sen’ tniax dy’ be zibsinn,” Sewsiux hiongr lyxsux cingxqiuu.
“Jex qui’ee quewdingg si decc sexjing, iacc si qongxx idi. Liw henrbo jauxli, vu lxangg byy lrik, zid’au narr hunwdong, qniax liauw e dyww jiahlat,” lyxsux uanxkuanr, kinx genn ser giw dair giamgaii.
Hagliauu jit qingx kunr sir xee langg, qecviah ee hag’iuw e hnoo, duiwbin pox :ee qui’ amr hambinn-hamdag. Dirr cngpox huanx laii huanx kir jamxzenn aw u .jit .kunr .aw, qaxnaxx jiacc bii .kir narnia, jxingx-sniax hiangw, jaxkyr kuicaux tnix iauxx bue qngx.
Kunr byy jiog binn diddit hachir. Jit jun cingjaw ee qnuakir cuex .laii, aiwkunwsinn juer jit xe jauw jauw .kir.
“Guaw m si diaudii beh qra liw sionghai.”
“Virr sionghai, qaqi iyc-aw qoo qoo lehh, sii qaur e dir piw, qinxjuahban e juanxhuee, e guanjuann. Jex guaw u qinggiam .quer, liw mrbenw uirr jitt jann quawsimx.”
“Guaw m jaix siyh hog, berhiauw qra liw linsiyh. Liw diyhh henwjingg kuan’iu :guaw, m tangx hro guaw au vnuar siwlangg muixx jit qangx longxx decc horhuew.”
“Suanxdik vangr ciuw si qojiongbunai, m si beh qra liw jikhuat. Simdiongx narr junw u uanwngor, hex diyhh quair qaqi sibkir dang, dyrhing cenw, quewqib vadd langg vutjingwdongx.”
Guartauu tnisig jiamrjiam qngx, dua senvongg lairdew obangg. Lak diamw vnuar ing jaxjaix. Jiac vaw, jerje dngw kir vow binn. Sewsiux ciuw iab au, dirr uandingg qinghingg cankamati.
“Guaw si Mara dua caur langg, e hai liw qniaa duiww penx lo .kir?”
“Penx lo iacc jniar dy qeww qaqi qingw :ee. Guaw e qra liw knuar juer si gighingg posad, tauwdew beh laii jo lanw singxgo, liauxted. Jongw .si, enhun qaur iarr diyhh tiaclii, jex si liw hro guaw ee lingrgua jit xee qamxgo.”
“Guaw m si sniaxmih posad, guaw si juergiap quanwbuanw ee cohux-siogjuw, byy liw pnuarlam, jingg lo oamr.”
“Kiongxqniax guaw m si lixsiongw ee pnua. Liw diyhh kir cue jit xee hro liw ee simx e dniardiyc :ee. Lanw qycc dauwdin e liongxgo, dendyww e hai liw jyrgiap. Mair qycc kar denrue hro guaw, E-MAIL iacc TEXT marr longxx m hyw qycc siaw .laii. Lanw jitt sxer ee siok’enn qaur jiax qetqur.”
Snuax-lai horjuiw kacc qau. Ervox-sii quewhunho lyc jit tingg, dua senvongg qex jiokk liangkir, byy cincniu jarborzit langkir hah hiacc utzuac. Puantuiw jersenn :ee u liongwtinr, siqanx decc quer qex kacc qinw.
Byy mngxdngr tangx jiac, sinkux sew hyw, lemonjiab jit vxuex junw dxngr. Amwtauu aw rair tniax sensux kaisi. Surburdniuw kar jxingx, hag’uann qniaa zip dua senvongg liauu liauu aw si.
“Singqongx dik’ir ingxingw e jurgnow pongwdua, vangvai vuac lyc bew jiacc jaix qingxsingw. Quexsimx-nguarhing, huexqyr si tauu jit vo. Dagg sii diyhh qingsimx, vingxsimx-bukuir, m tangx qniaa cacyr.”
Tniax qaur jiax, Sewsiux dimr tauu hariwsikdig.
“…, knuar .diyc dyrr beh air, u air dyrr beh ziog, ziog .diyc quw .laii e iawsen, byy air sniu sen dyrr danr hetqak. Snix, druar, juac, bet, langg ee iogbong vah kuanw cxenx ngiu, qewqer jiauww jitt xee cuwsi decc lunhuee, sunkuann. Tambee iacc hiabhiamm longxx si byy tongkiaur soxx drir. Langsinx yh did .diyc, siuhing diyhh tanwqinw.”
Dyrliw cimcenw jairr langg’ texhue iarqyxqnaw, Sewsiux jitt diap u dunwgo, sensux u dua qonglyy. Simtauu kuix, ehngmii ee bincngpox be qycc ding kokkog. Diamrhongx-jingrnng juxsimdnia, Sewsiux u dingrqenr, bingjaw ee zidtauu dikkag e cuarlo.
10.
Hagsenn kywtingg duxduxx uanqed. Liw nacc byy laii? Jitt jua ee qamxciog jiokk cimx, sniu beh kacc qinw qongw hro liw tniax.
Nng qix ciuxqix-aw ho’ngg siux kir jiauwquanw, quixarr qangx byy kuiqix. Jid’err niaw .diyc, LINE, E-MAIL qapp TEXT, qinxiaur :ee huee, cunx :ee singx ngiaw .quer, danw u ingg jiacc laii tak kacc siongser. Camsenn beh u jingjinr, simx rair jinrliong cingjing. Qapp guarqair jiamrcniaw duanrjuat lenlok si quiiog, berdangr junsiuw :ee dyrr m tangx laii.
Diangx jit sniax, ciuxqix-aw tongdix qongxx TEXT huad be cud .kir.
“Qamxx si ix iurqycc ngua mnghy?”
Sewsiux amr sniu, qycjaiww cir jit vaiw, qangrkuanw trer dywdngw .laii. Jitt jann jiamrsii diuhe, iong sinwiongrkah vowsix jit-bxan, siudnuax tec .diyc, Sewsiux qra ybut qnrua kiw.
“Qycc u hingliw beh kngr aurdauw :ee bor?” Sewsiux mng.
“Byy,” nng~snax ee hag’uann dangjee dab.
Qapp dingw jua jidvnuangiu, iurqycc u sir xee an’ Daivag laii :ee beh uaw Sewsiux ee venrciax, jingcax qongxx jitt dxauw cing’itsig si luxsu, byy javox :ee. Hagsenn ee qiqanx diyhh qimwkauw. LEXUS huatdong, ciax-dingw ee jaboxlangg bersux jiauw-aw vangr cud lamx, liw jit cuir guaw jit jic didix dann.
“Inx hyqyr itding rair langg’ jiac cair? U langg qui’ qangx byy jiac bah dyrr si bersaih a,” jre taujingg :ee u uanwgenn.
“Langg’ jex si inx ee qaiwdiauu. Byy jiac iucyx dongr be diauu :ee dyrr mair laii camqax suacc berhiauw?” jre qawsuw aurviah :ee vyh laii vyh kir.
“Cuann sniu’ cnecaux, qniax qnir qui’ zit longxx decc sniu au dxngr beh jiac sniaw,” jre diongx:a :ee janrcuir.
“Vakdow iaux .qaur .der, iaxcair iacc cnicyx longxx marr hyw,” jre uaw jniar vingg mngg :ee iarr u ue qongw.
“Suhniax, jiax ee sowjaix, liw jiac e hahcuir .be?” jre diongx:a :ee mng.
“E lar, guaw m si tauu jit vaiw laii,” Sewsiux rinr diyc sunrjingg, bagjiux knuar jingtauu.
“Suhniax hyw hanwenn, dyrhing unxdangr iarr jiokk qycimx,” jre qecviah :ee qongw hyw tniax ee ue.
“Jitt xui sujew qaiww singg si decc qra guaw tixciyr, m si decc qra guaw vyx,” Sewsiux ciyr ciyr aw qongw, dag’ee iarr duer lecc ciyr, h.-hnuahiw-h. byy pnaiw iwsinn.
Jnriu qysog, ciax byy je, sokdo tangx vniar qaxx jit-vah. Hnua handolu :ee juansimx-diwjir, zinbing-quantenx, ciax-dingw jair jiacc je xee.
“Yc vut jersenn qaxnaxx u decc kuix hongkir. Guaw danw jiokk quw jiacc danw diyc tiapqiyh,” qawsuw aurviah :ee qongw.
“Guaw marr si,” uaw jniar vingg mngg :ee duiwcuir qongw. “STAND BY beh jnia’ qywguec, kywtingg beh kaisiw jingg jit qangx jiacc tongdix qongxx e tangx dixmiaa.”
“Ngeex! Guaw si jinwjingg jit lexvair jiacc quatding beh laii :ee, jid’err vywmiaa dyrr jniurcuw,” Sewsiux qamxqag quaiwgii.
“Hmr, suhniax ee vud’enn dikkag jiokk cimx,” qawsuw aurviah :ee cuilun.
“Hner a,” qawsuw qecviah :ee iarr janwsingg. “Narr u kacc je javolangg cincniu suhniax hiacc subunn, hiacc u jusimx, voglik huanrjue dyrr e qiamxjiyw, sewqanx marr be hiacc je jenwluan.”
“Jitt xui sujew jin’ gauu qra langg’ ylyw,” Sewsiux qongw diyc pnaixser ~.
“Qongxx vywmiaa :ee cutgiac, guaw qecviah cngg tauu jiww buew kangx kangx byy langg kunr,” au jxy uaw jniar vingg mngg :ee hamgii.
“Limsii u dairjir iarr qnaxx si,” jre diongx:a :ee cuicig.
Quer Tyhngg, Sewsiux mng ciax-dingw :ee beh dirr dyhh lyc ciax. Inx jit xee druar Jiyhvaii Aw, jit xee cur suer dirr Dairanx Qonghngg vnix:a, jit xee beh dirr Dua Vnenaa vnuaa qongciax, dirr Ngisnuax Aw jre denrciax duiww inx longxx jin’ venrli. Qawsuw qecviah :ee druar Sinjngx, qongxx Snadingvox Jam li inx daux kacc qin.
“Liw qapp guanw jywhuew kir Ngisnuax Aw jre denrciax jiacqycc vnuaa lar, mair hro suhniax qex huiwkir,” qawsuw aurviah :ee vnuar tegi vnuar qawsi.
“Be lar, be huiwkir, jairr linw hongven dyrr hyw,” Sewsiux sueh qinw qinw.
“Denrciax benw danw cniangdingx, byy cax qaxx hex quiw jam. Dag’ee juewdin kacc u pnua,” qawsuw qecviah :ee qaqi cue diyc lautuix.
Jit din jaboxlangg lyc ciax, jidjee qniaa hiongr denrciajam, jidlo qangrkuanw cauhcauc qongw byy tingg.
Ciax-dingw dngrr sniasueh, angx dingx rair qycc danw lecc veh~qauw-jap biyw, Sewsiux hongwdnaw kar Gnaxsunn ee ciuxqix. Liangx quixnarr sniax liauw byy jriab, byy diduu, Sewsiux ngua kar kir inx qongsix.
"Lanw dyc’ui beh cue :ix?”
“Guaw ix ee kecho.”
"Quiwsner?"
"Hmr... Vngx."
"Qamxx si Vngx Dangxsurdniuw?"
"Ngngr... driyc."
"Ix byy druar ar.”
“Nacc e? Dangsii ee dairjir?”
“Ix duxjiacc tewjid, kacc byy jit lexvair. M jaix Vngx Dangxsurdniuw u sniaw quiwsu? Si m si rair qra denrue juanw hro siongquanx :ee?”
"Mrbenw, dysia :liw."
Denrue cetdng, m sixsimx, qycjaiww kar Gnaxsunn ee ciuxqix, vutliau, suacc si javolangg ee sniax.
"Pnaixser, jex qamxx si Hyy Gnaxsunn Siyxjiaw ee denrue?"
"Guanw jew :a siw ar."
"Sniaw?"
"Ix sitsu quewsinx ar."
Gna gna, Sewsiux sitsinn.
“Uee, uee...”
Uanxzenn sitsniax, dua cuir kuix kuix, Sewsiux kiokk byy qra rinr. Ciuxqix-aw lag .kir byy diwqag, sinwhyrdingx angg dngw cnix iarr srid jimjiog, aurviah :ee decc qra vnax, Sewsiux jiacc huehunn.
“Tnix ar!”
Kax dac iumngg, hnua honghiongwvnuaa ee ciuw nngw amxamw. Hxunn driau driau, bersux hro qxuiw sriap .kir, dangx lamm saix vag c.-congbongg-b., itsiqanx, Sewsiux m jaix beh sraiw ngr dyhh.