Anxjnuaw qongw hanrjer joqimx berdangr qaixquad bunrdee?
Juann sewqair qokk dua sniaci ee cuwsuer longxx decc kiw. Uirdiyc beh vangjo itvnuax vingbinn, jin’ je jingwkeh dirr jiokk je soxjai hanrjer joqimx. Acc mrqycc, qra siongser knuar, jin’ binghenw, qandna’ kyr hanrjer siongrr quann ee joqimx si byy huatdo qaixquad bundee :ee.
Dirr jin’ je dua doci, suwsi qycc lap e kiw cuwsuer ee cuwqingx si jin’ jiyw :ee. Cue cur beh jox ee langg, dyrr qongxx cue .diyc .ar, marr si ser qingx qycc jiokk quir :ee. Jex dyrr diwsuw Berlin Ci Jingwhuw dirr 2019 nii jewding siogrr quann joqimx ee diaule, vingrcniaw go nii lai berdangr kiw. Sewqair qitax jin’ je sniaci marr u ngiu knuar ngiu, jyr qangrkuanw ee quiding. Iaxx mrqycc, dua vorhun ee qingjewhak juanqax longxx duiww jitt diamw giaugii, qamxx u hau?
Quxdngg laii knuar, hanrjer joqimx soxx jyrsingg ee bunrdee viw qaixquad .ee kacc je.
Tauu jit jann, vacbin byy langg beh daujux kixjy sinx qonggu, iacc guanlaii u cur ee cuwjuw marr m kingw kaix jnii jngtna sinx ee setvi, jongw qongw .jit .qxur, be tanr jnii ee dairjir byy langg jyr, byy pnix si’angw beh jyr siauxcid?
Qycc u jit diamw, vingrr m si soxu ee qonggu longxx vaux dirr joqimx hanrjer lairdew, byy qang sniaci sui’ langg u sui’ langg ee huatlut quiding.
Suii diyc byy joqimx hanrjer ee jinghongw huatdenw .lyc .kir, beh dirr dua doci kiarkiw si zuxx laii zuxx uilann, jin’ je langg cue byy suer e kiw ee cur. Jex duiww siuzip qe ee qadingg cam’ guarui beh vnuax laii doci ee langg digvet giamdiong. Dyrr qandna’ beh u jit xee ziax hongho ee soxjai, inx dniardnia rair ciamsiaw byy habhuad ee vunx jox dong’iwsux.
Duiww jex jiongxjiongw, qingjer juanqax Makusur Silyvexkur, ix si jit qingx vangdersanw qongsix ee qowbun, qongw, “Hanrjer joqimx suizenn vyxjingr joqimx be qycc kiw, mrqycc bunrdee guantauu iaxx si byy qaixquad, uirdiyc beh vangjo byy cur ee binjiongr, dyrr rair qycc kiw sinx ee qonggu, dirr jex jinwjingg, dyrr naxx cniu lanw soxx qongw :ee, singx vnuasuaw, singx sux.”
20210404