Daigiw Siuiongw Qongxue

(Lak-jap-id) Six unhui ee viwquad

Lanw beh six unhui hro vadd langg, kixtauu hro ix kacc jiyw, aurlaii hro ix kacc je si kacc hyw. Setsuw acc narr si dairsingx kacc je hro .ix, aurlaii narr kacc jiyw hro .ix, ix hitt xee langg diyrr suar be qir did sriu langg’ ee unhui, dendyww qongw lanw duiww ix jiamrjiam lingxdam .kir, suar e hro ix uanwhun. Iaxx narr jiurr jitt xee uigiamm laii qongw, lanw duiwtai vadd langg, kixtauu jongw diyh’air kacc giamm, zuxx kir zuxx cinbit, jiamrjiam kacc kuah jiacc hyw. Narr si dngcox kacc kuah, aurlaii kacc giamm, diyrr dniardiyc e hro ix uanwhun, qongw lanw kokhingg, qyckacc anwjnuaw dy’ m kingw hok .lanw.

(Lak-jap-zi) Kuangiamm zimxnai dongjingg ee hunved

Lanw knuar diyc vadd langg u quewsid, lanw diyhh kuaniongg jiacc hyw. Narr si siyxkuaw quewsid, lanw dnir byy knuar qnir, dnir m jaix, mair qra ix jikvi. Jongw si lanw qaqi narr u quewsid, dikkag m tangx kuaniongg, suisi siyxkuaw iarr diyhh jikvi. Lanw qaqi kacc giamm, m tangx hro ix zuxx qycjaiww m driyc .kir jiacc ersaiw .did. Iaxx arr lanw qaqi ee qankow, diyhh jabhunx tunlunw, katkow kir juer, dikkag m tangx luexjir. Jongw si knuar vadd langg ee qankow, diyh’air jabhunx dongjingg .ix, qiuwjo .ix, dikkag m tangx qew m jaix, byy beh quanw .ix. Juewlangg u jitt kuanw pacsngr jiacc hyw.

(Lak-jap-snax) M tangx jnriu langg’ ee dangr jiacc hyw

Lanw langg ixqingx dikjir jiamr dua derui ee sii, diyh’air siuw jingwgi, qniaa jingwlo, giamjingr qongbingg. Iaxx arr simqnuax diyhh unhyy vingjing, qycc diong sinwsit, hro jingwlangg hnuahiw, rair jiapqin .ix., hro ix simx hok jiacc ersaiw .did. Jongw si lanw narr srid giamjingr, juewsu hongwciongr, hitt hy tamjaii ee siauxzinn diyrr e uaw laii lanw ee sinvnix, sniu beh liriong lanw, lanw iarr m tangx hro ix uaw, hro ix liriong .kir. Iaxx arr hitt xee siauxzinn cincniu hoxtaupangx hiacnirr lirhai, jongw si duiwtai ix iarr m tangx sniu’ quer qiglet. Narr sniu’ quer qiglet, ix diyrr dendyww huanxkongr. Soxiw lanw m tangx qiglet, jiamrjiam qapp ix lirkuix, m tangx jnriu ix ee dangr jiacc hyw. Jex diyrr si jiamr dua derui ee langg ingwqaix vutsii rair juwir ee dairjir.

(Lak-jap-sir) Huatdenw ee qunvunw diyrr si juvix ee simqnuax

Uirr cuw siongg lauu vng, linn gnoo m diamw dingx, jitt nng qxur si qoxjaxlangg ee siqur, iwsur si qongw lanw ter niauxcuw huanlyw ix vakdow iaux, diauqangx lauu quaw vngrliap hro ix jiac. Iaxx arr lanw knuar hitt xee gnoo ee tangg, gong gong vuex zip kir huew diongngx, sinkux suar hro siyx .siw. Lanw ter ix jin’ kyxlinn, jiacc diauqangx m air diamw dingx. Qoxjaxlangg jitt kuanw ee liamrtauu, sngr si cud jurr juvix ee simqnuax. Jitt xee juvix ee simqnuax ee jok’iong dy’ si lanw zinlui congr dairjir erdangr tangx huatdenw hitt xee qunvunw ee jok’iong. Lanw langg setsuw narr byy jitt xee qunvunw ee jok’iong, qapp hitt xee iong too juer iong caa kig ee ang’aw siangg kuanw, diyrr si byy sinqingx, qanda’ jit xee hinghaii narnia.

(Lak-jap-go) Simqnuax ee vunxtew naxx cincniu siyw tnide

Lanw langg jitt xee simqnuax ee vunxtew,naxx cincniu jit xee siyw siyw ee tnide. Hnuahiw ee liamrtauu ee jok’iong, naxx cincniu qingxsingx-kingwhunn. Siurkir ee liamrtauu ee jok’iong, cincniu luiqongx sicnar. Juvix ee liamrtauu, cincniu cunhongx qamlo. Iaxx arr giamjingr ee liamrtauu, cincniu harzit ciusongx. Duxaw soxx qongw hixlo-jugiamm jitt sir hxang longxx si vit’iaur :ee, kiamr jit hxang bersaiw .did. Jitt xee jurzenqair ee jok’iong, suisii kiw, suisii suah, longxx byy joxgai. Lanw langg simqnuax ee jok’iong, iarr si ingwqaix hnuahiw diyrr hnuahiw, ingwqaix siurkir diyrr siurkir, longxx byy cacyr. Narr erdangr anxnix, lanw ee simqnuax diyrr qapp tnide siang jit tew, e qapp im’iongg ee jinliw siangg jit kuanw.

(Lak-jap-lak) Lanw langg diyhh junqingr hitt xee langg ee zindqeh

Guaw knuar sewqanx ee langg, junqingr vadd langg dairkair m si junqingr ix ee zinqeh, si junqingr ix ee sincing. Cincniu lanw juer dua qnruax, vadd langg junqingr lanw, hex byy dikkag si qingr lanw ee zinqeh, si qingr lanw sinkux soxx cing ee qnuahok. Iaxx lanw druar vijen ee derui, vadd langg knuawkinx lanw, hex byy dikkag si biauxsi lanw ee zinqeh, dairkair si knuar lanw sinkux soxx cing ee vowsnax, kax soxx cing ee cauxee jiacc hro ix knuar m kiw :ee. Narr si anxnix, inx junqingr lanw hex m si jinsit ee junqingr, kyxiw mrbenw hnuahiw. Iaxx arr inx knuawkinx lanw, hex iarr m si jingwqingx sidjai decc knuawkinx lanw :ee, kyxiw mrbenw siurkir. Jongw qongw diyrr si sewqanlangg knuar langg’ ee sincing decc qingr .langg, decc piw .langg. Narr hro ix qingr diyrr hnuahiw, hro ix piw diyrr siurkir, hitt kuanw ee langg jinjniar si gong.

(Lak-jap-cid) Lanw ee simqnuax diyhh e hap tnide ee iwsur jiacc hyw

Lanw beh ceing vadd langg, m tangx sniu’ kokhingg, hro ix qankow, diyh’air texliong .ix, ing qaxx duxhyw jiacc hyw. Iaxx arr sraiw guu bew iarr m tangx sniu’ gigtai, rair damrvyc aw dongjingg .ix jiacc hyw. Iaxx lingrgua cincniu jniginn mihqnia, suisi u kacc je iarr diyhh junxjad, dikkag m tangx lamrsamw kaix, lamrsamw ing. Lanw langg narr erdangr anxnix juer, jitt xee simqnuax diyrr qapp tnide ee iwsur e hap, lanw ee qniaxsunx dniardiyc u tangx did hingrhog. Qog-lai ee langg dagg xee erdangr jiauww anixnix qniaa, qog-lai ee vecsnir dniardiyc u tangx an’unw. Byy dairjir, qokqax diyrr e huwqiongg.

(Lak-jap-veh) Huwquir langg cam’ congbingg langg diyh’air huanxsingw

Sinhun kacc quann, dua vur dua liap ee langg, miasniax jin’ hyw, duiww langg ingwqaix hyw dorliong, hyw simqnuax, gauu texsud .langg, gauu qiuwsud .langg jiacc driyc. Mrquxx sursit duiwhuanw. Inx dairkair kikvok pixlii, longxx byy jit diamw jusen ee simqnuax. Hex si inx suizenn si huwquir, mrquxx inx zidsiongg soxx qniadac, qapp vinjen ee langg byy cax. Narr si jitt kuanw, beh nacc erdid tangx hiongxsiu jinjniar ee hoklok? Anxnix nacc erdid tangx dro quer tiongwlok ee sizit? Qycc cincniu u congbingg ee langg, ix qaqi ee jaijingg ingwqaix cimx cimx kngr dirr ix ee vxag-lai, m qnaw suiven hen cud hro langg’ knuar jiacc habsig. Mrquxx sewqanlangg soxx qongw u congbingg ee langg, vutsii gauu sniu gauu qikdenw ix ee vunxsu decc hro langg’ knuar. Jex suizenn si qongxx congbingg, mrquxx hitt xee mauving qapp vutdongw ee langg jingcax byy zuarr je. Huanrr sewsiong huwquir ee langg, cam’ hro langg’ qongw congbingg ee langg, diyh’air huanxsingw jiacc hyw.

(lak-jap-qauw) Diyh’air qingxqair diyh’air junxvi

Huanrr sewqanx ee dairjir, qinaxzit decc ciyr qongxx vadd langg ee dairjir qapp lanw byy quanhe, binaxjair suacc venr juer lanw ee dairjir, haunlyw qaxx beh siw. Jex si ingxingw u :ee. Soxiw lanw dirr huwquir ee deruie ee si, ingwqaix diyhh erhiauw sniu sanwhiongx ee qankow, vutsii qingxqair jiacc ersaiw .did. Iaxx arr dirr siauwjongr ee sii, diyhh erhiauw sniu vadd zit aw qaur lau ee qankow, ingwqaix rair virvan jiacc hyw. Setsuw lanw langg longxx byy sniu qaur hiax kir, berhiauw tangx qingxqair, berhiauw tangx virvan, dniardiyc berdid tangx hyw qaur buew, qaur lau diyrr camw.

(Cid-jap) Qnualangg diyhh qongvnii cingliamm, juxlangg diyhh texsud jetkiam

Juer qnruax ee langg narr si qongvnii busux, diyrr dniardiyc e catliw, vanrsu e bingvik, byy langg uanwhun. Narr si cingliamm ketvik, diyrr jurzenn u uigiamm, hro langg’ e simx hok. Iaxx arr dirqax ee juxlangg, narr e texsud cur-lai ee langg, qui’ qex ee langg longxx e vinghyy, byy langg qnaw qongw vutvingg ee ue. Iaxx erhiauw jetkiam, m qnaw lamrsamw kaix, diyrr benw qniax byy jnii, vutsii u qraur ing. Qongvnii cingliamm jitt nng qxur ue si qoxjaxlangg qingxqair juer qnruax ee langg ee ue. Texsud jetkiam iarr si qoxjaxlangg qauwhunr dirqax ee langg ee ue.

(Cid-jap-id) Jongw diyh’air zimxnai jiacc hyw

Qoxjaxlangg u qongw jit qxur “dingsanx nai ciklo, dabsuad nai guiqiauu”, iwsur si qongxx beh vreh jnriu snuadingw, suisi hitt xee lo qia qia qycc k.-kamket-k., iarr diyhh zimxnai qankow, jiacc qniaa erdid qaur dingxbin. Lyc dua seh, jxig jin’ qau, beh quer qiyy jin’ guihiamw, jin’ qankow, iarr diyhh zimxnai jiacc qniaa erdid quer. Jitt xee nai .zri u ywbiau ee iwsur dilehh. Jex m hanrdnia qongxx vreh snuax quer qiyy, lanw jicjiab jin’ imtimx ee sewqanlangg, dro quer kamket ee sewqanx, iarr diyhh jabhunx zimxnai, jabhunx qinxsin jiacc ersaiw .did. Setsuw narr be zimxnai, srid qinxsin, diyrr e vuac lyc u caua-w cixper ee knix-aw-lai, vreh berdid kiw .laii, suar e siw druar hiax iarr byy dikkag. Jongw diyh’air zimxnai jiacc hyw.

(Cid-jap-zi) Ter langg’ vran diyhh kikquanx, duiww qaqi diyhh juxquanx

Lanw sriu langg’ vaiwtog qapp langg’ camsiongg ee sii, qapp lanw qaqi beh juer dairjir ee sii, lanw ee suniuu jurzenn byy qangg. Qapp vadd langg camsiongg ee sii, ingwqaix diyhh jiong’ lanw ee sinkux he dirr hitt diauu dairjir ixgau. Diyrr si ing kikquanx ee taiwdo, l.-lingxjing-j. qra ix knuar, qra ix sniu, tangx bingvik hitt xee lxi qapp hai jiacc ersaiw .did. Iaxx narr si beh pacsngr qaqi ee dairjir, beh vran qaqi ee daijir, diyhh jiong’ lanw qaqi ee sinkux he dirr hitt jann dairjir ee lairdew. Diyrr si ing juxquanx ee taiwdo, zet putpud, itbi jiauww qaqi ee sinwliam kir sidhingg, qaqi ee simqualai, m tangx u lirhai diksid ee liamrtauu jiacc hyw.

(Cid-jap-snax) Diyhh jiauww poxtongx ee dikhing

M hro langg’ jai’ngiaw ee viwbit ee cikliok, diyrr si imboo. Qapp langg’ byy qangg kuanw qiquair ee hongsiok sibquanr, hy juer quaiwsip. Qapp langg’ byy siysiangg ee hing’uii, hy juer ngirhingg. Vadd langg yc lanw be diyc ee vunxsun, hy juer qilingg. Lanw langg narr ing imboo quanwsip ngirhingg qilingg, jitt sir hxang laii dro quer jitt sewqanx, jaihy vitding e qaur lanw ee sinvnix. Lanw langg narr ing iongdig ionghingg, diyrr si jiauww poxtongx ee dikhing laii qniaa jingwqingx ee lo, diyrr longxx byy dairjir, erdid tangx anjuann dro quer siarhue. Jongw qongw diyrr si m tangx kyr qaqi ee jaijingg qapp diwsig, ing sniu’ quewtauu. Narr ing sniu’ quewtauu, diyrr byy jiauww vunxsingr, juer liauw m driyc, e hai liauw itsinx. Iauwqinw dy’ si jiauww poxtongx ee dikhing, derr id anjuann.

(Cid-jap-sir) Diyhh ing singsit unhyy jingwgi laii qamxhuar langg jiacc hyw

Cincniu lauxpenwsed hitt kuanw jawkix ee kuesenx, iarr m tangx jit xe diyrr vaitig .ix. Lanw narr knuar diyc hitt kuanw ee langg, diyhh qex jit vxue singsit ee simqnuax kuanxtai .ix, hro ix qamxdong jiacc hyw. Iurr cincniu how lxongg var viux hitt kuanw longxx byy jiauww dyrliw ee langg, iarr m tangx ing qionggni ee ciuxdnua apjer .ix. Narr ing unhyy ee taiwdo qapp ix jiaphiap, ix covy ee simqnuax diyrr jurzenn e hysun. Iaxx arr duiww hitt xee pensiaa sukiog ee langg, qanda’ qor qaqi lirig ee langg, lanw ingwqaix diyhh qongw bing’u jingwgi kiwjed ee jinx iwgi hro ix tniax, qra ix benxle, qra ix koxkngr jiacc hyw. Narr si erdangr anxnix, ersaiw did jiong’ tnikae quiw cingx bxan ig ee langg, juer jidjee siux he dirr lanw ee dua huexloo-lai, qra ix rngiuu juer jit der laii qauwhunr .ix, hro ix vnir juer hyw langg

(Cid-jap-go) Simhuew m tangx hro ix qikhuad

Lanw langg simhuew narr qig .kiw .laii, bagjiux diyrr e angg, beh knuar iarr suar byy knuar qnir. Soxiw ingwqaix diyhh ab simhuew hro ix lingw .kir, bagjiux hro ix qongcaiw, knuar dairjir jiacc e bingvik. Iaxx arr simhuew dua qig .kiw .laii, hnirkangx iarr e zet, suisi beh tniax iarr suar byy tniax qnir. Soxiw vingsiongsii iarr diyhh ab simhuew, hnirkangx hro ix lingxjing, tniax dairjir jiacc e cingcyw. Iaxx arr simhuew narr qig .kiw .laii, lanw ee simjingg iarr siangg sii huad .kiw .laii, soxx qamxqag ee dairjir, beh congr longxx e srid liauw qongvnii jingwdy. Soxiw ingwqaix diyhh ing l.-lingxjing-j. ee simjingg kir duiwtai surbut jiacc ersaiw .did. Iaxx arr simhuew narr jit xe huad .kiw .laii, lanw langg ee jinx simx diyrr e oamr .kir, suar berdid tangx hunved jingwsiaa senrog. Soxiw ingwqaix diyhh ing l.-lingxjing-j. ee simqnuax laii sniu dyrliw jiacc ersaiw .did.