1. Qywzinn qapp Siarhue

Qywzinn dyrr si dnuasinlangg ee iwsur. Nng xee ixsiong ee dnuasinlangg jywhuew kiarkiw ee sii dyrr sxingg jit xee siarhue. Soxiw tangx jaix siarhue u jiongxjiongw; qadingg, jongjok, hniuliw, qeci, qokqax dy' longxx si jit jxingw ee siarhue. Qycc qongw jit qxur kacc bingg, siarhue dyrr si nng xee ixjniu ee langg, uirdiyhh jit xee bogdig jywhuew qethap ee tuantew. Jitt qxur "Uirdiyhh jit xee bogdig," jitt qxur vutjiw diyh'air zinrjinx; narr byy bogdig, suizenn u nng xee ixjniu ee langg dilehh, iarr vutsingg siarhue. Qycjaiww dyrr si u qongqiong ee bogdig, hitt xee bogdig narr si siyxser iacc si byy binglangw, soxx qetjniaa ee siarhue iarr si mrjniamic, si sesab :ee.

Vixping siarhue cincniu cur, qywzinn dyrr si ngee-aw, qag-aw, jxngx, tiau, hitt jit lui. Cur rair iongw; benw qongw jxngx, jiyc, samtiau rair longxx iongw; jongw .si qanda' anxnix be iong .did; kiw hitt qingx cur ee bogdig rair bingvik iauwqinw. Cur ee bogdig, m na si beh jac hongho, hrongg juixhuew; qycjaiww diyh'air u tanghongx, u uersingx, e kamx did dedang, jiaxee bogdig narr sniu u qauwgiac, qycc u binglangw, jurzenn hiaxee cailiau dauwcing dyrr e hyxser, e dauwdah; kiw liauw cur dyrr dikkag jin' iongw, jin' suwsi. Siarhue qapp qywzinn ee quanhe, sidjai si qapp jex siangrkuanw, rair siarhue bunbingg dyrr diyhh qywzinn longxx u qauwiok, qoklangg qokk sxingg jit jxingw ee zinjaii; iarr qywqyr longxx u bingvik inx ee siarhue qiongrtongx ee bogdig, jitt kuanw ee siarhue kixtauu jiacc u qenqor.

2. Jnaixngiu diyh'air u Siarhue?

Langg jnaixngiu diyhh qapp langg jywhuew quewzit, byy, qiamxx be iong .did? Langg m qapp langg jywhuew quewzit? Langg m diamr siarhue sneuac, kiokk m si juadduir be iong .did. Sewqanx dy' u hitt hy cutqelangg(huesniu); ix longxx byy qapp sewqanx siarhue quanhe, qadi unxqix cimsnuax ciurnaa ee lairdew; sixzit narr qaur jiacc jurr anxnix suah. Narr si qadi qamguan anxnix jyr buanxjiog, kiokk iarr si suiir jyr dyrr hyw.

Jongw .si jitt kuanw qnaxx m si dagg langg qamguan :ee. Qamguan m qamguan, cniaw jit vnix, jiauwsit jex si dyrliw soxx m iong'unw ee dairjir. Liw knuar, setsuw langlangg narr jinjniar yc cutqelangg ee kuanw, jinjniar hro ix siux kir jyr dode, langg byy zuarr quw dikkag longxx diyh'air jehjingw. Niu jit vo qongw, cincniu hitt kuanw ee sneuac u simxmih cuwbi, u simxmih iwgi, u simxmih hyw .cxur tangx giuw langg ee simx neh? Qanxdanx qongw jit qxur, langg qapp langg jywhuew quewzit, rair druar siarhue sneuac, jex si langg ee tensingr, si jingliw soxx ingqaix :ee.

Sengiulangg u qongw, "Langg si siarhue ee dongrbut." Jitt qxur ue dyrr si qongw langg iarr si jit jxingw ee dongrbut, qapp poxtongx ee dongrbut qy'cngiu ee diamw, dyrr si erhiauw jojid siarhue. Soxiw tangx jaix langg narr si vangwsag siarhue, byy knuar siarhue ee su jyr iauwqinw, jex si vuerhuanw jywlangg vunxlaii ee singwjig, jitt kuanw langg be iong did qongw si "siarhue ee dongrbut;" qinrqin si poxtongx ee dongrbut, dyrr si qapp jingsnex siang jingxlui.

Jnaixngiu diyh'air u siarhue? Jiauww dingxbin soxx qongw si dui' langg ee tensingr soxx iauqiuu :ee. Anxnix qiamxcaiw qongw liauw kacc hunrhuar, be tangx qauwgiac cingcyw, ixha rair qiw quiw diamw kacc u hingtew ee su laii voxjiog.

(A) Taiwqow lanw langg iauxx bue bunbingg ee sidai, in'ui jiahcing ee mic byy qauwgiac, soxiw snex cud langg diyh'air siy' jnex siy' cniuw ee dairjir. Dirr siy' cniuw ee diongqanx benw qongw si lat kacc qiongg ee langg kacc ngiaa. Lat rair kacc qiongg, jit langg ee lat si iuxhan, jurzenn diyh'air qapp vadd langg hap jywhuew. Jitt xee dyrr si huatsingx qajok jongjok ee lixiuu. Dui' anxnix did lenqed, did kuacdua, qajok byy qraur, dyrr snix cud hniuliw jngsia, qaur buew dyrr henxcud qokqax ee jojid laii. Jex e tangx qongw si siarhue huathen derr id ee lixiuu.

(B) Qycjaiww langg qapp poxtongx ee dongrbut u jit diamw dua byy siang ee tensingr, dyrr si langg u jit jxingw vutsii air jinwvo hiongwsiong ee simsingr. Langg u jitt xee vunxsingr, soxiw dniardiyc byy dniardnia qowsiuw jit kuanw; narr u kacc driyc :ee, kacc hyw :ee, kacc suiw :ee, ix dyrr cud kuiwlat kir qriuu kir jyr. In'ui anxnix, jurzenn diyh'air qapp jerje langg hap kuiwlat, be iong did lirkuix siarhue.

Kacc iaxbann ee langg berhiauw qapp langg hap kuiwlat, qadi iarr diyhh jingwjyh, iarr diyhh kiw cur, iarr diyhh pangxjid, iong jit langg siyw siyw ee linglik beh jyr jit-vah bxan bxan kuanw ee dairjir; soxiw inx soxx jyr :ee si cenxqin jin' mrjniamic, quw quw dy' longxx be jinwvo. Bunbingg ee langg dyrr m si anxnix, ix qik air qapp langg hap kuiwlat, ix soxx jojid ee siarhue qik jiaujngg; sxu-longg-qangx-sxiongx bxan hxang ee dairjir longxx u hunved, qokk langg hundamx ix soxx qenwdiongg ee su, cud lat kir jyr kir genxqiur. M hanrdnia anxnix, dyrr si damdngx siangrkuanw jitgiap ee langg, inx iarr si qik gauu jywhuew camsiongg vixjiab. Duiww jitt kuanw inx soxx jyr ee dairjir huisiongg kuair jinwvo, langlangg jiacc jiong' inx soxx did .diyc jueww hyw ee qetqyw henr cud dirr siarhue, jyr siarhue jingwlangg ee loriong; langlangg longxx si anxnix jyr, soxiw hitt xee siarhue dagg langg dy' jin' kuair jinwvo, jiacc e jniaa jyr bunbingg ee langg. Soxiw tangx jaix rair jyr bunbingg ee langg, dyrr diyhh gauu hap jingwlangg ee kuiwlat, dyrr si rair u siarhue jiacc e ing .did.

(C) Qycc qiw jit diamw qongw. "Samzurqingx" ee tauu jit qxur qongw, "Langg kixtauu ee singwjingg vunw si hyw." Sidjai, langg si longxx u liongsimx, iwair jyr hyw. In'ui langg air jin ix ee hyw simx, ix diyhh kir cue, kingw sriu ix ee hyw simx ee duiwciuw; narr m si, ix ee hyw simx beh kir jyr diamr dyc'ui lehh? Soxiw diyh'air u siarhue, langg ee liongsimx dui' anxnix jiacc e tangx sriu an'uir, acc langg jiacc e huadpuad, jit siwlangg jiacc u jinjniar ee cuwbi.

Jitt diamw ee dyrliw si jin' cimx, iarr si jueww iauwqinw :ee. Qoxjaw qaur henrqimx ee siarhue dairkair longxx si jiauww (A) qapp (B) hitt nng diamw laii jniaa :ee kacc je. Jex be tangx qongw si bunbingg ee siarhue. Narr si jinjniar bunbingg ee hyw siarhue, dyrr diyhh jiauww dagg langg ee dyrdig iwsig (dyrr si liongsimx) laii jojid jiacc si. Langg uirdiyhh air sidhingg ix ee hyw simx jojid hyw siarhue, hro ix ee liongsimx e buanxjiog, jex si jywlangg ingqaix ee vunxhun, iarr si zinser juewau ee bogdig.

3. Siarhue jojid ee vunxsiongr

Jitsnuar jniaa vor, hap langg dyrr sxingg siarhue. Vor ee huezi u vah vah kuanw, jongw .si siarhue ee hingsiong qnaxx m na c.-cingban-b. ngiu. Siarhue jojid ee kuanxsid sidjai si hogjap jiww qik. In'ui siarhue ee hingsiong hogjap qaur anxnix, u jit vuer nngxjniaw ee langg snex cud jit kuanw iamwser ee qamxliam qongx, "Sewtair busiongg" dyrr si knuar siarhue cincniu juixpyx huisiongg dongriauu byy dniardiyc. Jongw .si jitt kuanw si knuar puee byy knuar qud soxx drir :ee; narr jinr kacc cimx qiamxdiamw laii knuar, dyrr dikkag e tangx knuar diyc siarhue ee vunxsiongr.

Cniaw zinrjinx knuar, vor ee huezi suizenn u jerje kuanw, jongw .si jixu nng jxingw ee snuar jitjniaa :ee; jit jxingw si didsnuar, jit jxingw si hnuaisnuar. Siarhue iarr si anxnix. Siarhue ee hingsiong knuar qnir si cxenx-venw.-bxan-huar; mrquxx narr zinrjinx qra hunved, dyrr jaix vutqyr si "Liw," "Guaw," jitt nng kuanw ee langg soxx jojid ee siarhue qiuwqingr si u quiw kuanw? Acc qokk kuanw siarhue ee quanhe si simxmih kuanxsid? Qycjaiww simxmih kuanxsid :ee si kacc hyw? Cniaw dairqex genxqiur knuar. "Liw," "Guaw," nng kuanw ee langg jongw qongw jiacc u snax kuanw ee quanhe. Jitt snax kuanw ee quanhe e tangx ing snax qxur ue laii viauxvik.

(1) Liw si liw, guaw si guaw. (2) Guaw si guaw, liw iarr si guaw. (3) Liw si liw, guaw iarr si liw.

Derr id kuanw, "Liw si liw, guaw si guaw." Jitt kuanw quanhe ee siarhue si langg siangrr be huatdat ee sidai jiacc u. Henrsii dirr Afirka ee iaxbanlangg acc si lanw Daiuann ee Snualairlangg, dyrr si kia dirr bunbinglangg ee diongqanx; narr si hitt hy siu'iongw iauxx bue qaur ee langg, soxx qed ee siarhue dairkair si jitt kuanw. Jitt kuanw ee siarhue si cincniu jit vnuaa ee suax, dairqex longxx byy quanlenn, vutqyr jit liap jit liap sna' tac jyr jit dxuix; narr si hongx cuex qaur, dyrr jit liap snruar jit lo. Dirr jitt kuanw siarhue e giuw jingwlangg hap jywhuew ee qinguann, dyrr si cud dirr dagg langg ee vunxlingg. (Mrbenw langg qar, qadi erhiauw ee jailingg). Piwlun qongxx, vakdow iaux dyrr qadi erhiauw air did diyc mic, duiwdik iacc si guihiamw ee dairjir qaur dyrr erhiauw qniahniaa sniu beh hongvi, iacc si air sik'iok, air tuann qniaxsunx ee iogbong, jex longxx si vunxlaii dyrr erhiauw .did. Iaxbanlangg ee siarhue longxx si jitt kuanw vunxlingg qiyr inx jywjniaa :ee. Qokk langg ee vunxlingg soxx iauqiuu ee mic narr si did .diyc liauw, acc dyrr "Liw si liw, guaw si guaw;" byy sniu qycc qapp langg' jywhuew, byy knuar siarhue jyr iauwqinw, qokk langg dyrr qniaa qokk langg soxx air qniaa ee lo.

Knuar jitt kuanw ee su jyr ingqaix ee langg dyrr si lirqixjuxgi ee langg. Jurr qoxjaw qaur qinaxzit, dirr sewqair soxu bedbongg ee siarhue qokqax, dy' longxx si jitt kuanw lirqixjuxgi ee langg soxx qetjniaa :ee. Suizenn anxnix dirr jitt kuanw, "Liw si liw, guaw si guaw," ee siarhue iarr u jit hxang hyw. In'ui dagg langg si sniu "Liw si liw, guaw si guaw;" soxiw hiax byy jyr quewtauu ee dairjir, byy qansiap langg, byy sokvak langg, iarr byy uaxkyr langg, qadi jyr qadi drngx, vutjiw u doglip ee hongkir, iarr kacc u vingdingw ee quanliam, siarhue ee jojid iarr si kacc qanxdanx.

Derr zi kuanw, "Guaw si guaw, liw iarr si guaw." Dirr jitt kuanw ee siarhue si guaw jyr diongsimx ee siarhue. Guaw si jit langg, liw si jingwlangg; soxiw tangx jaix jitt kuanw siarhue si jit langg jywtauu, jingwlangg jyr kaciuw; si jit langg quanw jingwlangg; tangx qongw si juanjewjuxgi ee siarhue. Dirr jitt kuanw siarhue, derr id -- jywtauu ee langg air u sidlik jimjiog; derr zi, -- diyhh u jin' giamm ee huatdo tangx hro kaciuw ee langg siuw, jiacc e tangx vyw ving'anx. Narr m si dyrr dikkag e jin' luan.

Diongqog jurr qoxjaw qaur henrsii ee qokqax, dy' longxx si ing jitt kuanw, "Guaw si guaw, liw iarr si guaw," ee susiongw laii jojid :ee kacc je. M na Diongqog, sewqair-diongx ee qog dairkair dy' iarr si sriok jitt kuanw. Dirr jitt kuanw, qokqax dikkag byy vingdingw, iarr byy juriuu; narr si juriuu dyrr si qanda' jit langg, iacc si jit siyw vorhun ee langg nardnia.

Dirr jitt kuanw siarhue si byy qongxliw iarr byy dyrdig; narr si u, dyrr si jiong' jit langg iacc si quiw xee langg ee sukiax jingliw, qiongqiongg auxcic jingwlangg diyh'air sinr, diyhh jiauww anxnix qniaa. Jongw qongw, dirr jitt kuanw siarhue, "qiongquann dyrr si qongliw." U sewlik ee langg soxx qongw :ee dyrr si qongliw, dyrr si dyrdig lar. Bxan su si pinw lat; quntaubuw kacc dua liap ee langg dyrr cxingx "Ongg" cxingx "Der;" ser liap ee langg dniardiyc si quwjai ix vaiviw. In'ui anxnix, langg kuiwlat byy qraur ee sii dyrr lunxkir-tunsniax, sixsimx hogjiongg hauwsun. Mrquxx qaur jit zit sidqoxmngg narr huad qauwgiac, ix dyrr sniu beh vuex quann; m na m hro vadd langg quanw, huanxdngw suar sniu quanw vadd langg. Tangx jaix jitt kuanw ee qokqax siarhue si vutsii byy ving'anx, vutsii dua ziauxluan.

Narr si dikkag beh vyw ving'anx, dogdok u jit vo, dyrr diyhh congr hro dagg langg gong gong, hro ix m bad vnuar hxang su. Cincniu Bing Hujuw soxx qongw, "Langg narr byy qawsi, m bad dairjir, dyrr qapp kimsiur drangg jit ngiu." Narr cincniu kimsiur dyrr m bad dairgi, iarr berhiauw pacsngr kacc cimx kacc hng ee dairjir, drir qaur cincniu duarjuiw lrauu caa, jit langg snruar jit dah. Tangx hro quntaubuw kacc dua liap ee langg kacc hyw vaiviw, kacc kuair herlyc.

Jinsixhongg jiong' tnikae ee tagceclangg longxx liac kir draii, jiong' ceh longxx vnuax kir siyx, dyrr si anxnix ee juxir. Soxiw tangx jaix, jingwlangg narr si byy qauwiok, m bad dyrliw, jitt kuanw "Guaw si guaw, liw iarr si guaw" ee siarhue dyrr e jniaa; acc jitt kuanw siarhue narr jniaa, langg ee snewmia dyrr m dat jit jiah qxauw!

Knuar henrqimx, lanw ee qadingg-lai iarr si iauxquxx jiauww "Guaw si guaw, liw iarr si guaw" ee juxgi decc qniaa. Liw knuar, dirr lanw ee qadingg longxx si juanjewjuxgi; laurve jit langg juxir cur-lai itcer ee su; laurve ixgua ee langg, vutlun laurbuw iacc si qniaxzii simvu, dy' longxx si qanda' pnua dnxuaa duewvair. Piwlun haursnix jaboxqniaw ee huninx, jitt hxang si haursnix jaboxqniaw jit siwlangg ee dua dairjir, dy' iarr diyhh laurve juxir; jyr qniaw ee langg qaxnaxx cincniu qalew ee kuanw, quwjai ix tuadiyh. Angbow dirr habhunx hitt amr kixtauu jiacc siy' bad, dairqex u siy' iwair iacc byy, si dui' hitt diap jiacc siy' dongrbun, tangx qongw si mic jiac liauw jiacc qongw qewjnii ee jywhuad. Lanw jiokgiac jai'ngiaw jitt kuanw vewhai sidjai si jin' dua. Qycjaiww dagg langg dy' longxx si "Guaw si guaw, liw iarr si guaw" ee juxgi, kacc qiongg :ee dyrr jiamr kacc ngiaa; soxiw davolangg dyrr qongw, "Davolangg ee dairjir si davolangg juxir, jaboxlangg ee dairjir iarr si davolangg qra ix juxir." Dui' anxnix, davolangg dyrr qadi juxir, qycc crua jit xee iacc si nng xee, higsi snax xee; longxx si pin ix ee kuiwlat; jaboxlangg longxx be tangx qongw simxmic, qanda' e tangx diam diam jre cing'ingg jiac qaur siw. Duiww jitt kuanw "Guaw si guaw, liw iarr si guaw" ee susniuw laii jniaa ee siarhue, sidjai si tangx qniax. Jex qinrqin si qongw lanw ee dairjir, jongw .si jitt kuanw byy jundiong langg ee simqnuax, qapp duiww jitt kuanw pnaiw susiongw laii jojid ee siarhue, kiokk m si qanda' lanw jiacc u, qiamxcaiw henrsii sewqair kacc je ee siarhue dy' iauxquxx si jitt kuanw.

Derr snax kuanw ee siarhue jojid dyrr si, "Liw si liw, guaw iarr si liw" ee quanhe. Jitt kuanw si jueww hyw jueww jinwvo. "Liw" ee iwsur dyrr si jriw "Guaw" jit langg ixgua ee jingwlangg. Soxiw, "Liw si liw, guaw iarr si liw," jitt qxur ue ee iwsur dyrr si qongxx, "Linw jingwlangg soxx u :ee cniaw linw jingwlangg qadi did, guaw soxx u :ee iarr si beh hro linw jingwlangg did." Qycc ngua jit qxur qongw, "Linw dairqex cniaw jyr linw dairqex ee dairjir, guaw ee dairjir guaw qadi jyr, cniaw linw benw ter guaw; acc linw narr u air guaw qra linw jyr, suizenn si vangwsag guaw qadi, guaw iarr si hnuahiw qra linw jyr." Jex dyrr si jit langg qadi hnuahiw jyr jingwlangg ee loring, m kingw uirdiyhh qadi ee dairjir qapp vadd langg siy' jnex, iarr m kingw uirdiyhh qadi ee hnuahiw, be qir did jingwlangg ee qankow.

Jitt kuanw susiongw si jueww iauwqinw jueww qysiong; jongw .si langg ingxingw dy' air uirdiyhh vadd jxingw ee behik suar be qir .did. Cincniu Diongqog Kongxjuw qar langg diyhh u zin'air, Inwdo Sikkiahut qar langg diyhh u juvix, Iutair ee Iasox Qidog dua sniax qiyr langg diyhh huanxhuew siy' tniar. Jitt snax langg soxx sed ee qawsi, soxx qongw ee ue suizenn si byy siang, jongw .si inx ee jingsinn tangx qongw u qiongrtongx, dyrr si qar langg m tangx knuawdang qadi, diyh'air hnuahiw ter jingwlangg jyr qangx. Jex dyrr si "liw si liw, guaw iarr si liw" ee juxgi, si qiyr langlangg hnuahiw qongwhenr siarhue.

Qiamxcaiw u langg qongw, "Hex qnaxx diyhh singwzinn jiacc jyr e qaur; poxtonglangg qnaxx jyr be laii?" Jex qiamxcaiw urngiaw si jin' jiyw langg jyr e qaur, jongw .si langg narr m qiglik kir jyr jitt kuanw sidjai si jin' tangx vecvag. In'ui langg narr m si hnuahiw anxnix jyr, siarhue si duanwzenn be tangx jniaa, be tangx vryw ving'anx. Lanw narr juxser knuar dyrr jaix, narr u jit qekauw iacc si jit hniuliw, jit xee qokqax decc hing'ong ee sii, jitt kuanw ee simx si dikkag jin' ongrsing, qniaa jitt kuanw dairjir ee langg, dikkag si jin' je. Ar! led'ui, qiamxcaiw lanw ee bagjiux urngiaw iauxx m bad knuar qnir jitt kuanw langg, jongw .si lanw rair jai'ngiaw, lanw ee siarhue si ixqingx dimlunn jin' quw, jin' quw lar!

huedngw tauu iac