IV. Setqaur cid-jap nii, hibong jurlip (1935-1944)
Dui' 1935-1944 nii jitt jam suisi dew dew, mrquxx sidjai u dua su. Qanxliok vaii dirr erbin:
1. Junxvi kingwjiog setqaur cid-jap nii
1935 nii si huisiongg diongriaur, jinjniar si ligsuxdig ee nii. Lamvo setqaur cid-jap jiunii, Vax Kiklew Poksu laii Daiuann tuandy lak-jap nii, Dniuxlyxqaur Diongyc congwsed go-jap nii, Zidvunw tongxdi Daiuann sir-jap nii. Lamvo Dairhue dirr 1931 nii dyrr pair langg junxvi beh dua kingwjiog. Byxhue soxx pair ee Dangxsu Rev. Brander dringw, lamluw sir miaa laii sunsi qauwhue; dyrr kuix sir Dionghue lenhap Siongsed Vxo, girdnia beh dui' Dangxsu vinxcingw quixnarr hxang:
(1) Cniaw Byxhue pair dairviauw laii hur 1935 nii Lamvo setqaur cid-jap jiunii Jiokhyrhue.
(2) Jyr cid-jap jiunii qiwliam surgiap: Rair cniaw Qauwsurhue jiong' tuanqaur qiquanx qiwsingg surgiap (cecvangg, haghau, iquanw) ee juxquann qaux hro vunxde qauwhue cir vran. Danrsi cir vran ee qiqanx itzim Qauwsurhue.
(3) Sinhaghau diyhh qaixsen; qycc cud jnii hro hagsingx kir Ingqog liuhak. Qitnax quixnarr hxang dirr jiax singxliok.
Dangxsu sir miaa qyxzenn u laii. 1932 nii Jnxaix-guec Dairhue u kuihue huangingg, suar tee cud vinxcingw. Inx iarr qaur qokk Dionghue sunsi.
Kingwjiog setqaur cid-jap jiunii ee su hunx jyr quixnarr vo decc jingwhingg. Jiokhyrhue ee qizit quatding dirr 1935 nii Jap-guec jap-go qaur jap-cid.
2. Vax Kiklew Poksu ee buanxlenn qapp vedser
Qaiw ik ee Qu log cutvanw liauxau, Vax Kiklew Poksu dui' 1934 nii kiw, ingqaix tangx hiyckunr laii anlok. Danrsi ix iuguann decc jyr qangx srunn qauwhue. Qaur 1935 ee nitauu iauxx jyr Taiwvingqingw ee jioktog girdniuw, qra jin' je langg mng dyrliw. Dirr Zi-guec beh jiaplap jap-veh miaa jiurqin singwcanx ee jinwjingg zit, hutzenn duw diyc nauxikhed! Suisi anxnix, iauxquxx u jing'ingx qaur lorbuew. Vax Poksu laii Daiuann qiwliamrzit si Lak-guec cego; hitt zit Taiwvingqingw Qauwhue u cua jit din kir qra ix viauxsi qingwir, suar gimm six kingwjiog. Ix m na hnuahiw jriog laii Daiuann lak-jap nii, qyckacc air hur Jap-guec beh kuix ee setqaur cid-jap jiunii jiokhyrhue. Danrsi ix soxx ngwbang :ee byy jniaa. Dirr hitt xee jiokhyrhue ee jap zit jingg, dyrr si Jap-guec cego, Siongrder driaur ix dyr kir hiongxsiu qik dua ee vywsniuw.
Vax Kiklew Poksu druar sewqanx veh-jap-cid nii quw, diamr Daiuann tuandy lak-jap nii. Jex dirr sewqair ee tuandy sxuw siong sidjai si hanxiuw. Jap-guec ceveh Lamvo Dairhue dirr Taiwvingqingw quxhingg Vax Kiklew Poksu ee jongwsig. Huerjongwjiaw iokk jit-cingx langg; Daiuann Jongxdog, disu, cirunw u sangr huekuann laii diauwuir. Jerje langg Irauu visiongx ee bagsaiw sangr ix ee uihaii qaur bongrde.
3. Setqaur cid-jap jiunii jiokhyrhue
Jiauww soxx urding ee Jap-guec jap-go dirr Taiwvingqingw Qauwhue quxhingg. In'ui Vax Kiklew Poksu ixqingx quewsinx, dairqex qamxqag kacc byy Iriauu, mrquxx iarr si jin' dua hnuahiw. U jiokhue ee lexvaiwsig jin' giamsiog, u lairgua jerje ee jioksuu, jiokden. Byxhue suizenn byy pair langg laii hur, mrquxx iarr viauxbingg jin' dua hnuahiw. Dirr jiokhyrhue ee qiqanx diongx u suxjig ee denxlamw, u qiwliam ee qangxenxhue. Qycc u digjer ee Singwqingx inr "設教七十週年念紀" ee zirqur, jerje langg brew dyr kir tak. Iarr u qiwliam ee siaxjintiab qapp bingsinwpenr dingxdingw. Jongw qongw, jitt xee jiokhyrhue jin' singrdai, hro langg' qamxsia Siongrder quewkir ee indenw, qycc quat'ir hiongr jingg laii pauxjauw, ngwbang qauwhue e qyckacc jinwvo tangx ing'iau Jruw ee miaa.
4. 1935 nii diongx qitnax ee iauwsu
Dingxbin ixqingx qongw 1935 si jin' iauwqinw ee nii, iarr u siaw quixnarr hxang lar. Jitt si beh qycc siaw quiw hxnag dirr erbin:
1) Dniuxlyxqaur Diongyc dirr Zi-guec ngua Qadinn Diongtaiwlongg Sensnix laii jyr haurdniuw.
2) Dirr Sir-guec harsunn Daiuann diongvo duw diyc dua dedang. Cingjuiw, Duardo, Duarsia, Hongguann jitt quiw xui ee qauwhue jin' cicamw. Dairhue sethuad nng-cingx kox jyr jinwjaix ee qiuwjer, suar tog girdniuw suqir kir uiwbun.
3) Pair qokk Dionghue lak langg qiong zi-jap-sir miaa, Jap-guec, Jab'id-guec kir Daivag dirr Poklamxhue ee qiqanx diongx camqax vowdy.
4) Sethuad jiyh sir-bxan kox brew Sinlauu Iquanw, dui' 1936 nii Id-guec kaisiw qing'ingg.
5) Diongvo qauwhue dirr Jabzi-guec jap-veh diamr Jionghuar kuix Lann Poksu jairr Daiuann hing'ix tuandy sir-jap nii jiokhyrhue.
5. Songr Poksu ee Hunwhinghue
Lamvo Dairhue quatding rair cniaw Songr Siongrjed Poksu quer laii hunwhingx, Vakvo iarr camqax. Songr Poksu 1936 nii Sir-guec diongsunn dui' Ermngg laii. Dirr Daivag, Daidiongx qapp Dailamm snax soxjai kuix dua hunwhinghue. Dagg xui jit lexvair quw, qokk soxjai longxx u quixnarr cingx langg hur hue. Dui' jitt vaiw ee hunwhingx, u jerje langg Irauu bagsaiw huanxhuew zinrjue, iarr u jojid jin' je ee vowdy-dui. Juann dxyw ee qauwhue jidsii dua dinxdang. Qvcc byy zuarr quw dirr Ermnggu Songr Poksu ee Jaqinghue, hitt diap Daiuann iarr qangxx vah langg kir hur. Jitt vaiw ee hunwhingx, suizenn u langg si jidsii ee hinghunr, iauxquxx u lirig; cincniu jiaxee vowdy-dui uree qewsiok jin' quw.
(1) Inxsiu Iquanw laii qing'ingg. (2) Vax Kiklew Poksu ee Dairhuerjongr. (3) Jriog setqaur 70 jiunii. (4) Songr Poksu ee hunwhinghue. Ixsiong jitt quiw hxang su longxx si Dne Kepuanr Bogsux jyr Dairhue girdniuw ee sijun soxx sethuad ee dairjir.
6. Lamvag hab'id ee Daiuann Dairhue
Lamvo si Ingqog Dniuxlyw Qauwhue laii setqaur, vakvo si Kanada Dniuxlyw laii qenwsed. Dingxbin ixqingx u qongw Maxqaix Bogsux qaur Dnaxqauw, au .laii Liw Hiux Bogsux u qapp ix jnriu vag, suar dairqex hunx kuhig. Dyrr si quatding ing Dairqah Kex jyr qaiwhan: Dairqah Kex ixvag jyr vakvo ee suanqaur kux, Dairqah Kex ixlamm jyr lamvo ee suanqaur kux. Lamvo dirr 1896 nii sed Dionghue. Vakvo dirr 1904 nii Jap-guec cesir dirr Damrsuiw Sinhaghau sed Dionghue. (Qaur 1917 nii jiacc qaiw miaa jyr Vakvo Daiuann Qidog Dniuxlyw Qauwhue Dionghue.) Lamvag vnevnee si Dniuxlyxhue, soxiw jurzenn u rair lenhap ee simx.
Qaur 1890 nii, lamvo u pair suanqauwsux Qamx Uilimm, qapp vakvo Maxqaix Bogsux camsiongg lamvag hab'id ee su. In'ui lordoo kacc hng qycc iauxx bue u sed Dionghue, soxiw be tangx sidhen. Lamvag sed Dionghue liauxau, dyrr pair huersuw sna' qauvuee. Ticlo kaitongx, lamvag ee Dionghue dyrr qycc tee kiw lenhap ee su. 1912 nii Jap-guec zi-jap-sir, lamvag nng xee Dionghue soxx pair ee dairviauw jurjip dirr Jionghuar lexvaiwdngg. Dairsingx jyr Hyhue, qongquw Dann Cinggi Bogsux jyr juxliw, cua jingwlangg lexvair qidyw kuihue; dyrr cniaw lamvag Dionghue nng xee suqir diamw hur hue ee langgiac.
Lamvo ee langgiac zi-jap miaa:
(1) Bogsux: Qamx Uilimm, Vax Kiklew, Songr Diongqenx, Hyy Hizinn, Buanw Hiongjaii, Lauu Junwsinn, Limm Hagqiongx, Qyx Qimsingx, Janx Cihingg (qauw miaa).
(2) Dniuxlyw: Maw Gnaxqog, Lann Dairvit, Pnuax Ingxanx, Pnuax Qaidanx, Limm Ohuanx, Jiux laurcaiw, Lyy Bundig, Pnee Surjongg. Angg Laurgi, Limm Enwsinn, Liw Acid (jap-id miaa).
Vakvo ee hueruann jap-sir miaa:
(1) Bogsux: Goo Uiliamm, Songr Gnaxqog, Lauu Diongqenx, Dann Cinggi, Siaux Anqix, Queh Hisinr, Liw Zimrsuiw (cid miaa).
(2) Dniuxlyw: Qaix Zuerliamm, Dann Siah, Liw Hamx, Dniux Naixhongg, Dann Himm, Quax Isux, Dann Qisiongg (cid miaa).
Juxliw mng lamvag ee hueruann knuar hnuahiw lenhap laii kuix Dairhue iacc byy? Dairqex longxx hnuahiw dong'ir. Juxliw dyrr cniaw lamvag nng xee Dionghue ee huerjingr (會正, dyrr si girdniuw) cua jingwlangg qidyw qamxsia Siongrder. Dairqex qniaa kanciuw ee lew, dangsimx gimm six ylyw Tnive.
Juxliw dyrr cniaw hueruann suanxqiw Dairhue ee huerjingr qapp qiwsu. Dairqex qongsuanw Qamx Uilimm jyr huerjingr; Siaux Anqix, Lauu Junwsinn jyr jniar, hxur qiwsu. Juxliw dyrr tewui, cniaw huerjingr cua jingwlangg lexvair, zen'au dangsimx siuw Singwcanx laii qiwliam Jruw. Huerjingg u dairliok qongw bingg lamvag nng xee qauwhue ee guan'iuu hro Dairhue tniax.
Ingqog Suandyrhue u pair qiwsu Vig Uilimm Bogsux laii hur hue; qycc Banlamm Jongxhue iarr pair Uanw Lexbunn qapp Ngiuu Huaidig nng xui bogsux jyr huersur laii cingxanx Dairhue, qionghiw lamvag qauwhue ee lenhap.
Au .laii girlun quixnarr hxang su, dyrr cniaw Vig Uilimm Bogsux jiokdyw viwhue. Zen'au snaqab hipsiong jyr qiwliam.
Dingxbin soxx qir si derr id huee Daiuann Dairhue ee jongrhongw, ixau jitt xee Dairhue u qewsiok kuix zi-jap huee. Dui' derr id qaur jap-id huee muixx nii kuix jit vaiw. Dui' derr jap-zi huee qaur jap-cid huee, muixx nng nii kuix jit vaiw. Derr jap-veh huee, in'ui rair quxhingg congwlip zi-jap-go jiunii, soxiw qex endiongg jit nii jiacc kuihue. Dui' congwlip qaur kuix derr zi-jap huee uijiw, u snax-jap nii quw.
Dui' derr id qaur zi-jap huee ee girdniuw suqir vaii dirr erbin:
Huesor Girdniuw / Suqir
Derr 1 huee (A.D. 1912) Qamx Uiliamm / Siaux Anqix, Lauu Junwsinn
Derr 2 huee (A.D. 1913) Lauu Junwsinn / Siaux Anqix, Qyx Qimsingx
Derr 3 huee (A.D. 1914) Goo Uilimm Siaux / Anqix, Queh Hisinr
Derr 4 huee (A.D. 1915) Vax Kiklew / Dann Cinggi, Limm Enwsinn
Derr 5 huee (A.D. 1916) Queh Hisinr / Dann Cinggi, Limm Enwsinn
Derr 6 huee (A.D. 1917) Songr Diongqenx / Dann Cinggi, Lauu Junwsinn
Derr 7 huee (A.D. 1918) Dann Cinggi / Lauu Junwsinn, Queh Juixlingg
Derr 8 huee (A.D. 1919) Goo Hiingg / Lauu Junwsinn, Queh Juixlingg
Derr 9 huee (A.D. 1920) Lauu Diongqenx / Qyx Qimsingx, Queh Juixlingg
Derr 10 huee (A.D. 1921) Qyx Qimsingx / Queh Juixlingg, Limm Enwsinn
Derr 11 huee (A.D. 1922) Queh Juixlingg / Limm Enwsinn, lap Qimbok
Derr 12 huee (A.D. 1924) Limm Enwsinn / Queh Juixlingg, Qyx Dokhingg
Derr 13 huee (A.D. 1926) Siaux Anqix / Queh Juixlingg, Qyx Dokhingg
Derr 14 huee (A.D. 1928) Buanw Hiongjaii / Pnuax Dyringg, Queh Juixlingg
Derr 15 huee (A.D. 1930) Bingg luxdig / Pnuax Dyringg, Queh Juixlingg
Derr 16 huee (A.D. 1932) Qyx Dokhingg / Pnuax Dyringg, Queh Juixlingg
Derr 17 huee (A.D. 1934) lap Qimbok / Pnuax Dyringg, Dniux Qimpyx
Derr 18 huee (A.D. 1937) Dniux Qimpyx / Pnuax Dyringg, Limm Vixdig
Derr 19 huee (A.D. 1940) Ngiuu Suriongw / Qyx Duanjongx, Dann Qimzenn
Derr 20 huee (A.D. 1942) Dann Kuejunr / Lyy Bunhog, Cuar Dionggi
Dirr snax-jap nii quw ee diongqanx, Daiuann Dairhue u hro lamvag ee qauwhue sna' lenlok, sna' vangjan, sna' qauvuee. Daiuann Dairhue m na hro lamvag ee qauwhue sna' lenlok, u quatding quixnarr hxang iauwqinw ee su:
(1) Quatding qauwhue ee bingcingx: Derr zi huee Daiuann Dairhue (A.D. 1913) quatding qauwhue ee bingcingx qiyr jyr "Daiuann Qidog Dniuxlyw Qauwhue".
(2) Quatgi lamvag ee huervyr diyhh lenhap: Vakvo ee "Quawcaiwjiw" qapp lamvo ee "Qauwhue Vyr" lenhap, huathingg "Daiuann Qauwhue Qongvyr".
(3) Setding muixx nii Jabzi-guec derr id xee lexvaiwzit quxhingg Singwqingx qiwliam lexvair, suar henwqimx jyr Singwceh Qonghue ee loring. Iarr dring Jap-guec derr snax lexvaiwzit quxhingg Juxzid'yc qiwliam lexvair. Suar henwqimx jyr juann Daiuann Juxzid'yc ee loring.
(4) Qokk donghue ee 'Dniuxlyw Dokhue' qaiw cxingx jyr 'Siyxhue'.
(5) Siujingr 'Qauwhue Denxlew', vanhingg 'Qauwhue ee Henwhuad', qycc cutvanw Singwsix jyr Daiuann Qauwhue ee loring.
(6) Setdir Ciwgiam Vxo laii ciwgiam tuandyrsux hro inx jyr qauwsux.
(7) Derr zi huee Dairhue dyrr ixqingx pair langg sethuad rair hro lamvag Singwdy Su'ngi (Sinhaghau) hab'id. Danrsi jin' uilann.
Knuar dingxbin soxx siaw, dyrr jaix lamvag ee qauwhue u bidced ee quanhe. Derr go-jap-lak huee Lamvo Dionghue dirr 1926 nii, u jiong' Dangvo (aursnuax) ee Duarjngx ixgua longxjongw lak qingx qauwhue sangr hro vakvo qauwhue quanxliw jiauwqor; lixiuu si in'ui lamm ee qauwhue-sxor je, qycc qautongx vutven; vag ee qauwhue-sxor jiyw. Hitt sii u tuanqauwjiaw qapp jit vorhun ee sinwdoo, byy air sriok vakvo, air qaqi jurlip; lamvag ee qauwhue uirdiyhh jitt xee bunrdee vutjiw koxsimx. Suizenn u diwir beh cringw qycc quisiok lamvo, danrsi vutlun zuhyy, lanw in'ui sinwgi-siong m qnaw qycc siux dywdngw.
Lamvag ee qauwhue suizenn u sna' quanlenn, mrquxx si cincniu iuxgidig ee qauvuee qiquanx. Soxiw quixnarr vaiw girlun diyhh ciokjinr lamvag sidjid ee hab'id. 1938 nii Zi-guec, derr sir-jap-snax huee Vakvo Dionghue girquad hunx jyr snax Dionghue --- Daivag Dionghue, Sindig Dionghue qapp Dangvo Dionghue. Siang hitt sii iarr girquad qenwgi cniaw jiong' Lamvo Dairhue huewjiw, tangx hro lamvag qauwhue qandna' jit xee Daiuann Dairhue laii did diyc jinsit ee hab'id. Danrsi in'ui u jiongxjiongw ee kunwlann, be tangx suisii sidhen. 1940 nii Go-guec, vakvo snax xee Dionghue dyrr jojid singlip Vakvo Dairhue. Anxnix lamvo sir Dionghue, vakvo snax Dionghue. Qycc Lamm, Vag liongw Dairhue ee dingxbin u Daiuann Dairhue tangx sna' lenlok.
7. Qokqajuxgi ee ingxhiongw
Dirr 1935 nii kingwjiog setqaur cid-jap jiunii, quewkir u jerje tangx qamxsia, danrsi ixau dyrr lordoo kikux. Zidvunw dirr 1934 nii dui' Qokjer Lenbingg tuatter liauxau, dirr qokjer-qranx dyrr ohunn muaw muaw, duiww Qidokqaur iarr huanxqamw. Songr Poksu laii Daiuann hunwhingx, Zidvunw ee qnua'uann sidjai byy songxkuair. 1937 nii duiww Diongqog jenwsu voghuad ixau, Zidvunw dyrr diddit qoxbuw qokbinn jingsinn, digvet vaitig Ingqog qapp Bixqog; qauwhue dua siurr ingxhiongw. Inx benxqiongw langg kir sinsia camvair, viw ixjingg qex jin' giamm; qingxcad iarr qiongvig dagg qadingg diyhh cai sinkamx, kuihue qapp lexvair ee ixjingg diyhh quxhingg qokbinn gilew. Qydingw digbu qapp henwvingx diwir cuxtee guihiamw susniuw. Tamwjingx kir jerje qauwhue ee jurhue laii tniax; digvet si Dionghue, Tuanqauwsuhue iacc si ixgua ee vorhue inx beh laii limqamr. In'ui rair qoxcuix vecsner siong'iong Zidvunxue, soxiw knuar qauwhue decc ing Romazi jyr tatgai. Iaxgua ee vowdy narr byy siurr huxkyw iar bering .did. Daiuann qauwhue in'ui siurr guarqog suandyrhue ee voxjo, soxiw Zidvunw dongqiok digvet juwbak, ing giaugii ee bagjiux decc knuar. Qajair qauwhue jerje nii jingg dyrr congwsed Jaituann Huatzinn; qauwhue qapp Qauwsurhue ee jaisanw ixqip qenwdiokbut longxx dingqir dirr hiax. Soxiw dyrr kacc byy kuawlu.
8. Hurluw hongbin ee qangjog
Huryc dui' 1895 nii congwsed liauxau, kacc je si Ban Qoniuu decc liaurliw. Zimxnai qapp tniawsimx, jex si ix quanxliw Huryc ee honghuad. Ban Qoniuu vingsingx jin' gauu siwqer hongxbun, 1926 nii sijid druar dirr qaqi ee cur, liauxau siongsiongg u jin' je langg kir cue ix. Druar Daiuann jyr qangx sir-jap-go nii quw, 1933 nii quewsinx.
Luxsinhak si Loo Qoniuu dirr 1928 nii kaised, hagsingx go-jap miaa. Luxsuandyrhue dirr 1929 nii congwlip, Qyx Qimsingx Bogsuniuu qapp jiax ee jixmue gauu sethuad. Dirr go nii quw ee diongqanx u jojid cid-jap-go xui ee jivo, laii icii snax xee luxtuandy ee soxhuir. Loo Qoniuu 1933 nii vedser, ix druar Daiuann snax-jap nii quw, dirr Luxyc qapp Luxsinhak soxx jyr ee qangx jin' je, duiww hurluw ee qamxhuar jin' kuah. Diongvo jiax ee qoniuu u qenwsed hyw ee derqix, Lann Isingniuu dirr Jionghuar Iquanw, qauwhue qapp Juxzid'yc iarr u jin' dua qongwhenr. Bunaw Bogsuniuu qapp Maw Dairvit Bogsuniuu siongsiongg jurjip jiax ee jixmue genxqiur Singwqingx. Jit sijun Giudinx Tuanker unrdong iarr vutjiw hing'ong. Goo Uiliamm Bogsuniuu jixdy singwquax-dui ee su, ixjingg u qongw .quer, danrsi naxx quw naxx je cinglenn sriu ix ee jixdy did diyc dua lirig.
9. Liongw I'ngi qruix Dairhue qing'ingg
Dailamm Jiux qiyr Sinlauu Iquanw diyhh jiauww vnerngi quijig qaixqig quixnarr hxang. Qauwsurhue ee iquanw jiong' Sinlauu Iquanw cuxhunx, iarr lenhap dirr Jionghuar kiw jit qingx kacc lixsiongw ee vnerngi. Siarhue zinsu cud jerje jnii beh duiww Qauwsurhue brew, jongw .si inx qongx narr Lamvo Dairhue air brew, qandna' sir-bxan kox dyrr hyw. Uirdiyhh jitt jann u kuix limsii Dairhue qapp lenhap Siongsed Vxo laii sethuad. Qetqiok, sir xee Dionghue hurjig hiongr hueriuw jiyh sir-bxan kox hro Dairhue, (Dairhue jyr jiycjuw, Dionghue Siongsetvoruann jyr lendair), dirr 1935 nii Jabzi-guec buew qapp qauwsurhue inxqer cingcyw. Dui' 1936 nii Id-guec kiw dyrr kuix Lamvo Dairhue qing'ingg; cniaw Ngiuu Hunliongg Sensnix jyr bing'u ngirdniuw, ixgua u i'uann quixnarr miaa. Qaur 1937 nii Snax-guec, Qauwsurhue jiong' hitt diauu brew Sinlauu Iquanw ee sir-bxan kox qycc sangr huee Dairhue qaudair qokk Dionghue hingg jiaxee jewjuw; vutqyr sriok dirr tuantew :ee kacc ban hingg.
Qauwsurhue in'ui qamxqag beh sindiog qing'ingg Jionghuar vnerngi u kunwlann. Soxiw ing Jionghuar Iquanw byy diauqnia sangr hro Daiuann Qauwhue. Lamvo Dairhue dirr Snax-guec cniaw Dann Jonghui Sensnix jyr ngirdniuw laii qewsiok qing'ingg.
Dairhue inxsiu jitt nng qingx iquanw u dua lirig langg, danrsi uirdiyhh qingjer kunwlann qapp zinsu bunrdee, sidjai u duw diyc jerje ee qankoxsu.
Quanhe Dailamm Iquanw qapp Jionghuar Vnerngi ee su, beh lingrgua siaw dirr vadd xui. Soxiw ixau ee dairjir dirr jiax singxliok.
10. Qapp Zidvunw Qidog Qauwhue ee quanhe
Dirr Zidvunw jiax ee qauwpair ee diongqanx, Zidqix (Zidvunw Qidog Qauwhue) in'ui vnevnee si Dniuxlyxhue, soxiw qapp lanw vutjiw u quanhe. Ixjingg dyrr bad uixtog jairr Daiuann ee Zidvunw bogsux laii qra lanw Dairhue cingxanx, henxbingg cinsen ee iwsur. Dniuxlyxqaur Diongyc ngua Qadinn Sensnix laii jyr haurdniuw, ix si Zidqix, zedsimx ee sinwdoo. Zidqix Dairhue pair inx jingg zim ee girdniuw Jywpyx Huann Bogsux (佐波洹牧師) dirr 1936 nii jyr bunransair laii qra lanw cingxanx, suacc dendyww vran cnecaux cniaw Dionghue giruann. Sidcuanx Kuann luxsuw (植村環女史) qapp Huanciong Tichiongg Sri (番匠鐵雄氏 ) sna' jiapsuar laii jyr luxyc ee haurdniuw, jitt nng xui iarr longxx si Zidqix ee bogsux. lurqycc lanw Sinhaghau soxx cniaw ee sensnix iarr longxx si Zidqix ee langg. Zidqix Dairhue u pair langg qapp lanw Dionghue soxx pair ee quixnarr langg jyr Hiablik Uixuann decc snaqab lenlok hiablik. Jitt xee hue kiokk hranw did jurjip. Vutqyr uirdiyhh inx u pair langg laii cingxanx, lanw Lamvo Dairhue dirr 1939 nii u pair Six Kunpingg qapp Lyy Bunhog, iarr dirr 1940 nii u pair Ngiuu Suriongw jitt snax xee bogsux kir qra Zidqix Dairhue cingxanx. 1940 nii Daiuann Dairhue qazip Zidvunw Qidokqaur Lenbingg. Jitt jann su, jiauww knuar, Zidqix u langg byy sniaw hnuahiw. Anxnix lanw qapp Zidqix u jin' dua quanhe; soxiw m na haghau ee su, dyrr qauwhue ee su iarr siongsiongg qapp inx decc lenlok. Digvet diamr Daivag jin' quw ee Siong Bogsux (上與二郎牧師), ix si lanw Daiuann Qauwhue byy be qir .did ee ving'iuw.
11. Dailamm Sinhaghau viwsyw
Buanw Bogsux 1938 nii dyr kir Ingqog hiyckunr, Hix Lexdir Bogsux dairliw jyr Sinhak hauwdniuw. Daivag Sinhaghau vunw si Sunx Gnaxqog Bogsux jyr haurdniuw, au .laii cniaw inx lairbin ee Zidvunw sensnix Daircuanx Jingr (大川正) kiw laii jyr haurdniuw. Jitt xee venwngua byy jit lexvair au, Dailamm Jiux ee qauwiok dongqiok liamvnix qra Hix Bogsux qongw, Dailamm Sinhaghau iarr diyhh cincniu anxnix ngua Zidvunw Sensnix Qionglue Jiongx (宮內彰) jyr haurdniuw. Hix Bogsux dairsingx tog langg mng jiax ee qauwhue ee iauwzinn ee iwqenr, zen'au vyr Lamdai Siong'uiw jaix. Qauwsurhue dohap-siong quatding rair huewjiw Dailamm Sinhaghau, laii qapp Daivag Sinhak habvingr. Siongdir Uixuanhue tniax liauw suar pair jap langg jyr Tuanqauwsux longxsingg Vorhue, kir kyxqiur senrhorcig. Jitt xee vorhue jurjip ee sii, Daivag Siong Uxzirlongg Bogsux diauqangx laii, qiglik qoxbuw diyhh qewsiok qing'ingg. Zen'au girquad Lamvo Dairhue diyhh doglip qing'ingg Sinhaghau. Qinghuir ursuanr muixx nii jit-bxan kox; qokk Dionghue diyhh hurdamx 2,500 kox. Au .laii in'ui Dionghue hurdamx be kiw, Dairhue dyrr be tangx qewsiok qing'ingg Sinhaghau. Soxiw dirr 1940 nii Qauw-guec celak, Ban Bogsux juxliw quxhingg Dailamm Sinhaghau huewhau ee lexvaiwsig. Sidjai si jin' vijongr ee jurhue. Zen'au jiong' jiax ee hagsingx sangr kir Daivag tak, ngwbang dui' anxnix Habdongg Sinhaghau e tangx sidhen.
12. Suanqauwsux longxx dyr .kir
1939 nii Veh-guec, vaited Ingqog unrdong huisiongg qiklet, qokjer qranx ee kongkir jinjniar hiamxog. Qauwsurhue camsiongg diyhh hro jiaxee suanqauwsux ee hurzinlangg qapp ginxaw singx lirkuix Daiuann. Qycc Zidvunw ee qnuahuw duiww Ingqog ee suanqauwsux u pau giaugii muaw muaw; soxiw inx sniu narr suanqauwsux qycc druar jiax, e hro Daiuann ee qauwhue duw diyc qankow. Qnuatniax ee iwsur bingbingg air qauwhue diyhh qapp Suanqauwsuhue quah dng quanhe, laii qapp Zidvunw Dniuxlyw Qauwhue habjog. Daiuann ee jixdyrjiaw jai'ngiaw narr byy Zidvunxlangg draur vangjan bering .did, danrsi iarr jin' qniax e hro Zidvunw Dniuxlyw Qauwhue tunx .kir. Qetqiok diyhh qnuaxqinw jurlip, ixgua byy vadd mic lo.
Senjinr ee Qyhiongg Dionghue singbingg dui' 1939 nii inx beh uanjuann doglip, qi'uu ee Dionghue iarr druer inx decc qniaa. Lauu Diongqenx Bogsux ixjingg siwqer vowdy, qaur jitt jun jin' siurr sokvak. Ix qongw, "Dnaxx guanw cincniu taixqyx :ee, qniaa qaur dagg xui, langlangg qniax." 1939 nii Veh-guec, ix qovutjiongx diyhh dyr kir Kanada. Simw .Sensnix qycc quiw guehzit au iarr lirkuix Daiuann kir Sinqapyx. Muii Qambu Poksu (Dr. Campbell Moody) 1940 nii Zi-guec zxic-veh quewsinx dirr Ingqog. Ix ee siw hro jerje langg jin' m qramx, jin' siauwliam, in'ui ix diamr Daiuann zedsimx jyr vywdy ee qangx; kyxsiyh uirdiyhh sinkux byy iongw, 1924 nii qovutjiongx dyr kir Ingqog. Ixau ix u drur quixnarr vunw ceh; dui' soxx drur ee ceh henxbingg ix jin' siauwliam Daiuann.
Sursit-siong ix vutsii decc quansimx, qyce mezit ter Daiuann ee qauwhue qidyw. Dnaxx ix anzenn dyr kir Tnive daux lar! In'ui Sinhak ee hagsingx longxx suaw kir Daivag, Hix Bogsux 1940 nii iarr lirkuix jiax kir Dangqniax. Soxx cunx ee suanqauwsux qandna' go xee --- Limm Qoniuu, Do Qoniuu, Lenn Qoniuu, Let Qoniuu qapp Ban Bogsux. 1940 nii ciutnix, vaited Ingqog ee qamxjingg naxx siongdiong, qokqajuxgi qapp juantexjuxgi ee kinghiongr naxx qiongg. Zidvunw jingwhuw air jiaxee qauwhue tuantew diyhh qapp guarqog ced dng quanhe, lail jojid jit xee habdongg Zidvunw Qidog Qauwtuann. Daiuann jurzenn iarr sriu diyc dua ingxhiongw; in'ul jingwhuw quat'ir rair dui' vunxdyw druu kir jiaxee guarqog ee sewlik, soxiw bylun si haghau, iacc si simxmih qiquanx, longxx diyhh ngua Zidvunxlangg jyr tauu laii quanxliw. 1937 nii, jitt nng qingx Iquanw ixqingx qaux quer Daiuann qauwhue ee ciuw. Diongyc qapp Luxyc ee lixsu duardysor si Zidvunxlangg. Qycc Sinhaghau dirr 1940 nii iarr viwsyw. Anxnix suanqauwsux dirr haghau, druu kir qar Inggiw ixgua, iarr be tangx qar dyrliw. Sinwdoo narr qapp Suanqauwsux lai'ongw iarr siurr giaugii. Qetqiok jiauww inx knuar, diyhh lirkuix Daiuann kacc u lirig qauwhue, hro Daiuann qauwhue e tangx dadsingg juriongw, jurdi, jurtuann ee bogdig.
Suanqauwsux ixqingx quatding beh dyr .kir, hxur girdniuw Dne Kepuanr sethuad dirr 1940 nii Jab'id-guec zi-jap diauwjip Lamvo Dairhue Siong'uiw laii kuix duiww suanqauwsux ee qamxsia songwvedhue. Ban Inghuaa Bogsux dairviauw Qauwsurhue qongw quatvedsuu, suar qongw Qauwsurhue u quatding quixnarr hxang:
1) Quanhe Sinhaghau habdongg ee su, inx longxx janwsingg. In'ui Dailamm Sinhaghau viwsyw, sangr jap-go xee hagsingx uixtog Daivag Sinhaghau qar, dui' qinnii Qauw-guec qaur menii Veh-guec, ixqingx u tiab Daivag Sinhaghau snax-cingx kox.
2) Qauwsurhue vangjan tuanqauwsux ee juxluw tagceh ee su, ixqingx u sethuad voxjorqimx qaur menii Snax-guec cingcyw liauw.
3) In'ui ixau beh tangx dirr Diongyc qapp Luxyc ee lairbin sihingg jongqaur qauwiok, soxiw dnaxx diyhh setvi hagsingx ee qiwsioksiar, tangx dirr hiax laii vue'ngiuw hagsingx ee sinwsimx. Qauwsurhue tee cud Dong'ingg Vorhue (同榮部會 dyrr si hagsingx qiwsioksiar ee vorhue) qui'iog ee cyxanr hro Siong'uiw camkyw, hibong Siong'uiw pair langg camqax Dong'ingg Vorhue.
4) Qauwsurhue iarr tee cud jaisanw cuxhunx ee quiding qapp honghuad.
Qauwsurhue ee dairviauw qongw liauw, hxur girdniuw Dne Kepuanr ter Lamvo Dairhue qra Qauwsurhue qapp jiongww suanqauwsux suecsia. Jitt sii dairqex jurzenn henxcud jin' m qramx sna' lirvet ee jxingg.
Suanqauwsux dui' jaxsii qaur dnaxx, qnixnarr lexvair mehngx longxx u Inggiw ee lexvair. Dailamm siongrr lorbuew ee lexvaiwmee, inx go langg iuguann jiauwsiongg jurjip lexvair; snaqab siuw Singwcanx, gimm "Siauwliam Singwdoo ligdai uirr Jruw qanjingr" hitt siuw, laii siauwliam jaxjingg dirr Daiuann uirr Jruw diyhbuaa ee dangqangx. Dirr "Zidzit ee Qngx" (Daily Light) hitt vunw ceh Jab'id-guec zxic-zi ee Singwqingx jad, dyrr si Job Qir 14:7 qiwjair qongxx, "Ciu narr cyr .kiw .laii, iauxquxx u ngwbang qycc vuh ngiw, nngw ee qix huad byy suah."
Jitt jad Singwqingx u jin' dua ee an'uir; sidjai jin' duxhyw. Qniwnarr jinsit tniar Daiuann ee langg, dirr jitt hy siqiok tak diyc jitt jad, dikkag beh dangsimx cud sniax qongw, "Simx soxx guan."
Anxnix lamvo suanqauwsux ee qangjog qaur 1940 nii Jab'id-guec zxic-zi dyrr qetsog. Iauxx lauu dirr lamvo qaur juewho jitt go xee suanqauwsux, Jab'id-guec zxic-snax longxx dui' Qelangg jre junn lirkuix Daiuann dyr .kir lar! Vakvo ee suanqauwsux qycc byy zuarr quw iarr longxjongw kuanw hingliw quiqog.
13. Dang'ax Tuandyrhue
A.D. 1933 nii, Zidqix Dairhue iuxjiwjiaw u jojid jit xee "Guarqog Suandyrhue", crex langg kir Buanxjiux(-qog) jyr qangx. Qaur Diongqog Zidvunw Survenr ee sii dyrr ngua miaa jyr Dang'ax Tuandyrhue (東亞傳道會). Johap Qauwhue, Bixixbixhue, Singwqonghue qapp qitnax quixnarr xee qauwpair longxx u draur hiablik. Dairsingx suizenn qandna' dirr Buanxjiux, au .laii dirr Huavag, Hualamm iarr longxx u crex langg kir jyr qangx. 1939 nii Sir-guec qranx, u jojid Dang'ax Tuandyrhue Daiuann Derhngx Vxo laii qapp dirr Dangqniax ee vunxvo lenlok. Vunxvo ee huerdniuw si Zidqix ee Dniuxlyw Zidpid Sinwliong (日匹信亮少將 ). Lamvo Dairhue iarr u jioktog jap-lak miaa jyr derhngx uixuann, tangx qapp Dang'ax Tuandyrhue Daiuann Derhngx Vxo lenlok. Au .laii duiww vunxdyw iarr u quixnarr xee bogsux jiwguan siurr Dang'ax Tuandyrhue pair kir duiwhnua jyr qangx. Vakvo ee Jngx Dingciongx Bogsux kir Ermngg, Unx Ingcunx Bogsux kir Qngxdangx, Cuar Siurunx Bogsux kir Haixlamdyw. Inx soxx jyr ee qangx si qapp hitt vingg ee qauwhue hiablik; qenwsed qauwhue, jiyhox hiaxee byy kir lexvair ee Daiuann jigbinn laii jurhue. Iurqyce hiaxee dirr jenwjingx-diongx hro Zidvunxvingx jiamr .kir ee vaiwdngg, inx kir qausiap beh tyw dywdngw, tangx jurjip lexvair; draur sethuad qauwhue ee surgiap qycjaiww kuix, cincniu yhdngg qapp iuwdirhngg. Kiokk ursii, inx iarr diyhh ter Zidvunxqunx suatbingg inx ee jin'ir hro vecsner lixqaiw sinwzim.
14. Diongyc qapp Luxyc did diyc singqeh zinrding
Qauwhue soxx sed jit~nng qingx haghau in'ui byy did diyc jingwhuw ee zinrding, soxiw jin' je hagsingx tak bue vitgiap dyrr juanw kir Zidvunw, tak u did diyc zinrding ee haghau, ngwbang tangx zip Qydingw haghau iace si Dairhak. Haghau diongqiok jinrlat punjauw, air did diyc zinrding, danrsi jin' uilann. Qaur 1939 nii Lak-guec zxic-id, Sulip Dailamm Diongxlyxqaur Diongyc qapp Diongxlyxqaur Luxhaghau longxx did diyc Daiuann Jongxdokhuw ee zinrding; qycc haurmiaa u venwqingx jyr Sulip Diongxingg Dionghaghau (私立長榮中學校) qapp Sulip Diongxingg Qydingw Luxhaghau (私立長榮高等女學校 ).
15. Jitt quiw nii ee qauwser
Jitt jam ee ligsuw dui' 1935 qaur 1944 nii, hitt xee jongrhongw lanw beh diah quixnarr nii laii qir dirr erbin:
1935 nii--- Singzinn hueruann 8,684, siauxzii hueruann 7,847; bue siurr sexlew ee hueriuw 18,046. Bogsux 36, tuandyrsux 64 miaa. Juxzid'yc: qauwuann 939, hagsingx 6,981 miaa.
1938 nii--- Singzinn hueruann 9,843 miaa, siauxzii hueruann 8,951 miaa; bue siurr sexlew ee hueriuw 19,890 miaa; sinwdoo jongxsor 38,684 miaa. Dniuxlyw 340 miaa, jipsu 485 miaa. Juxzid'yc: Haursor 118, qauwuann 1,115 miaa, hagsingx 9,514 miaa.
1939 nii--- Qauwhue-sxor 120, singzinn hueruann 10,146 miaa, siauxzii hueruann 8,284 miaa, sinwdoo jongxsor 38,260. Bogsux 51 miaa, tuandyrsux 50 miaa. Juxzid'yc: qauwuann 907 miaa, hagsingx 7,763 miaa. Henwqimx jongxgiac 118,592 kox.
1940 nii--- Sinwdoo jongxsor 38,474 miaa (Pneoo Suandyrhue byy tongxqer jairlai). Henwqimx jongxgiac 128,373 kox. Anxnix viw 1939 nii ee zinsor u kacc qetnix.
Qauwhue ee jinwvo
Lamvo qauwhue dui' qenwsed ixlaii, ninii u naxx jinwvo. Cniaw laii knuar sinwdoo ee jongxsor viyw:
A.D. 1866 nii sinwdoo jongxsor 30 miaa
A.D. 1900 nii sinwdoo jongxsor 11,675 miaa
A.D. 1910 nii sinwdoo jongxsor 16,941 miaa
A.D. 1923 nii sinwdoo jongxsor 24,294 miaa
A.D. 1930 nii sinwdoo jongxsor 31,353 miaa
A.D. 1934 nii sinwdoo jongxsor 35,905 miaa
A.D. 1937 nii sinwdoo jongxsor 37,527 miaa
A.D. 1940 nii sinwdoo jongxsor 38,474 miaa
Anxnix cid-jap-go nii quw u did diyc uaw sir-bxan miaa ee sinwdoo.
16. Lamvo Dairhue jit jam ee qetsog
Derr lak huee Lamvo Dairhue jurjip dirr Vindongx. Qiqanx si A.D. 1941 nii Snax-guec jap-id qaur jap-go, taubuew go zit quw. Dui' u Dairhue qaur dnaxx, iauxx m bad jurjip jiacc je zit. Siong'uiw setlip Jionghuar Iquanw ee ngirdniuw, ixqip Qaliw ee bunrdee sidjai u huir jin' je siqanx. Vutqyr qaur buew u did diyc qaixquad.
A.D. 1941 nii Jabzi-guec ceveh, Zidvunw hutzenn pah Jinjux Uanx, Bixqog qapp Zidvunw dyrr kaijenr. Dui' jitt diap ixau, qauwhue qyckacc siurr giaugii; Zidvunxlangg ee qauwhue duiww lanw iarr diddit crunx ciuw uaw .laii. Zidqix Daiuann Dionghue ee girdniuw Siong Uxzirlongg Bogsux qiar puex hro qokk qauwhue ee bogsux qapp siongdir uixuann, cincniu jin' hyxir qoxbuw lamvag ee qauwhue diyhh qinw sidjai hab'id. Qycc qongw m tangx dniardnia beh jiauww qu kuanw (舊態依然), lexvair ee sii diyhh ing Zidvunxue ee Singwqingx qapp Janwbixquax. Jitt xee su ixqingx vig qin dirr bagjingg. 1941 nii Zi-guec zxic-snax ervox dirr Jionghuar kuix derr cid huee Lamvo Dairhue. Dairqex knuar jitt huee jyr Lamvo Dairhue ee jongwsig; hitt sii siongsiongg ing jit qxur ue qongw, "Huatdenxdig qaiwsiau." Lamvo Dairhue qaur dnaxx u kuix cid huee. Narr jiauww Iutaiwlangg ee kuanw laii sngr, cid si uanjuanw ee sowbok. Mrquxx lanw hitt diap si qamxqag "Lamvo Dairhue qaur jiax suah lar ar! Jitt huee si Lamvo Dairhue jongwsig!" Hitt amr u uirdiyhh Lamvo Dairhue laii kuix qamxsia qidyxhue. U jerje langg Irauu visiongx ee bagsaiw, qamxsia Siongrder quewkir ee indenw, suar qiqiuu Tnive inxcua, hro lanw jendoo u qngbingg. Jitt xee jingqingw qamxqag uanxzenn 1940 nii Dailamm Sinhaghau beh viwsyw (qisit si huewhau) hitt sii ee kuanxsid. In'ui Sinhaghau beh qnuaix .kiw .laii hitt diap u kuix qamxsia qidyxhue. Qajair Lamvo Dairhue qaur jiax si qandna' jit jam ee qetsog; jiamrsii ee tingkunr, m si ingxuanw ee anhiyh.
17. Lamvag hab'id --- Qauwtuann Jongxhue
Lamvag ee jinx hab'id, si lanw qauwhue jerje nii laii decc girlun, decc ngwbang ee su. Dnaxx in'ui Siong Uxzirlongg Bogsux naxjunw hyxir ee qoxbuw (慫恿), qingquer quixnarr guehzit ee junxvi, 1943 nii Zi-guec zxic-go, Lamm Vag hab'id derr id huee Daiuann Qidog Qauwtuann Jongxhue dirr Jionghuar kuihue. Jitt xee Jongxhue ee jojid si jiong' Daiuann hunx jyr go xee qauwkux: Qyhiongg qapp Daidangx ee jit vorhun jniaa jyr Qyhiongg qauwkux; Lamvo Dionghue qapp Qagi Dionghue hap jyr Dailamm qauwkux; Diongvo Dionghue qapp Sindig Dionghue qed jniaa Daidiongx qauwkux; qycc u Daivag qauwkux qapp Dangvo qauwkux. Jex si air pah puar lamvag ee qaiwhan, iarr hro Dionghue byy qnuaix mngg qor qaqi.
Jitt vaiw ee kuihue u Siong Uxzirlongg qapp lak xee qnua'uann qewqiong cid xee langg laii limsik qamwsi. Zidzinn ee iwsur si lamvag hab'id inx dyrr kacc hyw tunx. Siong Uxzirlongg hitt zit ee jioksuu diongqanx u jit qxur qongw, "Qinaxzit ee hab'id vutqyr si zid'au Daiuann Qauwtuann ee junxvi nardnia". Dui' anxnix tangx jaix ix ee jinx ir.
18. Zidvunw qauwhue ee cimziok
Dingxbin soxx qongw ee Daiuann Qauwtuann Jongxhue kuihue quer byy zuarr quw, jongqaur diaujaqnuax dyrr qongw, "Linw 'Daiuann Qauwtuann Jongxhue' jitt xee bingcingx sniu' quewtauu dua, diyhh qexngua." Au laii lanw dyrr qycc ngua dywdngw jyr 'Daiuann Qidog Dniuxlyw Qauwhue Jongxhue'. Iarr qycc byy zuarr quw, Siong Uxzirlongg dyrr qongw, diyh'air qnuaxqinw congwsed juann Daiuann Zidvunxlangg qapp Daiuanlangg Qidokqaur qokk pair ee habdongg qauwtuann. Hitt sii lanw ee jikzimrjiaw qongw, "Guanw tranr liw ee iwqenr laii kuix lamvag sidjitdig hab'id ee Jongxhue, hitt xee junxvi qingquer quixnarr guehzit, huir liauw jin' je jingsinn, qycc kaix jin' je jnii. Jiaxee siongser liw longxx jaix. Dnaxx Jongxhue duxjiacc kuix quer byy nng guehzit, liw narr kacc jaw qra guanw qongw, guanw dyrr mrbenrw liauw hiacc je jingsinn qapp qimjnii." Siong Uxzirlongg byy rinr simxmic. 1944 nii Sir-guec jap-cid (Lamvag hab'id ee Jongxhue kuihue au go-jap zit), Siong Uxzirlongg dyrr diauwjip qauwtuann setlip uixuanhue dirr Daivag. Ixau lensuar driaur quixnarr huee. Daiuann Dniuxlyw Qauwhue ee jikzimrjiaw iauqiuu inx narr beh qapp lanw hap, diyhh qapp Zidvunw Qidog Qauwtuann quah dng quanhe. Narr byy, inx narr sriok Zidvunw Qauwtuann qycc iarr sriok Daiuann Qauwtuann, nng dingg jik (二重籍) si jin' byy habliw. Danrsi inx longxx byy beh tniax. Daiuann Dniuxlyw Qauwhue ee langg suizenn okjenr koxdor, jongw .si bycaiw qangx.
Lamvo Dairhue ee dongqiogjiaw qiwzenn jai'ngiaw Siong Uxzirlongg dringw beh cimcuw lanw ee qauwhue, jitt xee dairser ixqingx quatding, hro lanw be tangx siamxvi .did; dyrr kuix Siong'uiw qapp Jaituann Huatzinn ee huergi, laii cuxhunx quixnarr xui ee toxde qapp qaog. Hitt xee lixiuu si in'ui:
(1) M guan jiong' jiaxee jaisanw longxx hro Zidzinn tec .kir.
(2) Beh hingg Sinlauu Iquanw qra Taiwvingqingw jiyh ee jewbu.
(3) Voxjo Giogjnew, Snuavar qapp Voliw snax xui kiw vaiwdngg.
(4) Qauwioghuir ee voxjo (sinhagsingx qapp tuanqauwsux ee juxluw).
(5) Quixnarr xui tuanqauwsux puawvne ee liau'iongxhuir.
(6) Tuanqauwsux tewjid qapp sixbongg ee qip'uxqimx.
(7) Tuanqauwsux limsii ciuxdongx qapp itsii qip'uxqimx.
(8) Qokhongg henwqimx (in'ui henwvingx ixjingg bad duiww lanw iauqiuu qongxx Dairhue diyhh u qokhongg henwqimx).
Decc sethuad jiaxee dairjir ee diongqanx, Siong Uxzirlongg qaur Dailamm qiyr lanw ee Dairhue Girdniuw qapp Jaituann Lixsurdniuw kir Luxyc Huanciong ee soxjai, pnaiw sniasaur qongw, "Linw jarhngx iarr huergi, qinaxzit iarr huergi; hue qaur byy mee byy zit si anwjnuaw?" Ix rinr qongxx, "Decc jingxliw janbu, in'ui Zidqix Qauwtuann singlip liauw, marr u jit nii quw hro qokk vxo qaqi jingxliw janbu." Dyrr suar duiww Jaituann Lixsurdniuw qongw, "Binaxjaxkiw guaw beh jre qauw diamw ee qibhingg jnriu vag, qauwhue hiaxee jaisanw dingqir sului longxx diyhh tec laii ciatauu hro guaw." Jitt xee snia'imx qapp taiwdo hro langg' qamxqag ix m si jyr bogsux, si naxjunw qingxcad ee kuanw!
Qetqiok hro inx vingwtunx .kir. 1949 nii Sir-guec zxic-qauw dirr Daivag Siong Uxzirlongg ee qauwhue kuix Zidvunw Qidokqaur Daiuann Qauwtuann derr id huee Jongxhue. Benw qongw, si Siong Uxzirlongg siurr qingw jyr Qauwtuann Tongxlixjiaw. Jitt xee qauwtuann si ing Zidqix Qauwtuann Daiuann Qauwkux (vauquah Zidqix, Bixixbiw, Johap, Qiuwsewqunx dringw. Siong Uxzirlongg si jyr hitt xee Qauwkudniuw), Singwqonghue ixqip Daiuann Dniuxlyw Qauwhue lai jojid. Dnaxx Daiuann Dniuxlyw Qauwhue hro Zidvunxlangg tec .kir lar.
19. Qauwhue qruix Zidzinn ixau ee jinghingg
Siong Uxzirlongg jyr Qauwtuann Tongxlixjiaw (教團統理者) liauxau, u quixnarr hxang ee qankow su:
(1) Dirr 1944 nii Cid-guec qranx, juann Daiuann qauwhue ee tuanquawsux siurr driaur kir Daivag Daidit Qokbinn Jingsinn Genxsiux Sow (大直國民精神研修所) lenrsingg. (Kiokk u quixnarr langg hiauhing duw diyc puawvne jiacc benw kir).
(2) 1945 nii Zi-guec diongx, Siong Uxzirlongg driaur Juann Daiuann ee tuanqauwsux muixx qauwkux snax miaa kir Daivag hunwlen jyr jenwsii tingxsinx dui duiruann.
(3) Qauwhue qruix dirr Zidzinn ee ciuw ixau, qingquer quixnarr jam. Huanciong (番將鐵雄) u laii quanxliw Sinlauu Iquanw. Ix m na jyr Luxyc ee haurdniuw, iarr jyr Dangmngg Kux ee kudniuw; duiww dangg-tih huesiux unrdong ee su digvet cud lat. Dangmngg ee vaiwdngg ixjingg m bad jiyh siarhue jyr vingsiongg ee loring. Dnaxx ix qiongg jiyh kir kuix dangg-tih huesiux ee qangxenxhue. Iquanw qapp Dangmngg Qauwhue ee tih-livax, Sinhaghau ee duarjingx qapp Vax Poksu ee dangsiong iarr longxjongw kir. Jiaxee su sidjai jin' kyxsiongx, u ue berdangr qongw.
20. Naxx quw naxx cicamw
In'ui Zidvunw dirr Lamngiuu vairjenr, duiww lanw ee qauwhue dyrr naxx giaugii, qetnix apvig. Henwvingx qapp qydingw qingxcad dua uahdang, qiyr qauwhue diyhh tec cud sinwdoo ee miadnuax, jurzenn si u dnaxsngr. Tuanqauwsux longxx si ho'ngg juwir ee zinbut; u damdngx dang jikzim ee langg qyckacc digvet siurr juwir. In'ui Bixqunx ee dua vogqig, doci ee langg jerje diyhh sokaix kir snuax-lai iacc si penpiah ee soxjai. Jenwjingx diongx sriu diyc jawdann pah pnaiw ee vaiwdngg u quixnarr xui --- Hingcunx, Qi'au, Vak'iaxdingx; Qiamjuiw iarr siyxkuaw. Sinhaghau ee cuwdingw qapp Dangmngg ee Juxzid'yc qauwsig iarr u sunxhai. Qi'uu qaijair cavutdyx longxx byy anwjnuaw. Suisi anxnix, mrquxx jitt diongqanx ee cicamw sidjai jin' dua. Diamr qeci, si mezit u qniahniaa qapp guihiamw; sosanr kir snuax-lai si jerjer langg diyc qnuazet, uree sangr snewmia. Qauwhue dirr jitt sijun dua siurr ingxhiongw. Jerje soxjai be tangx jauwsiongg jurhue, zinsor qiamxjiyw. Qauwser vutjinw, iarr be e tangx tongxqer.