sna' rinr vxo (id-3)
Derr Snax Ceh
Derr Snax Jniux: Ham' Kosalan sna' rinr
(Id) Sokvak
1. Siauwlenn sii
Guaw tniax .diyc .ee si anxnex. Hitt jun, Sewjunx dirr Shravasti Sniaa Jeta Ciurnaa ee Anathapindika Hngg kiarkiw.
Hitt jun, Kosala ee Pasenadi Ongg kir Sewjunx hiax vaiwhongw. Vaiwhongw ee sii, ix qapp Sewjunx qaudamm qniaa qingwdiong ee qniwbinrlew liauw dyrr dirr vnix:a jre. Jre dirr vnix:a Kosala ee Pasenadi Ongg hiongr Sewjunx qongw, "Sewjunx! Gotama bad suansi qongxx ixx jingwgno diyc busiong ee qigdingw qakdix bor?"
"Dairongg! Tangx kaksit genn kiw u jingwgno diyc busiong ee qigdingw qakdix :ee diyrr si guaw. Dairongg! Guaw u jingwgno diyc busiong ee qigdingw qakdix."
"Gotama! U jingdoo, u juer qunjiongr ee sensnix, jin u miaa :ee, jin' u miasniax :ee, juer qiuwjer :ee, qapp u sriu jin' je langg zinrding si senrzinn ee sabunn iacc brahmin, cincniu Purana Kassapa, Makkhali Gosala, Nigantha Nataputta, Sanjaya Belathaputta, Pakudha Kaccayana, Ajita Kesakambala brahmin jiaxee dingxdingw. Mng inx bad suansi qongxx u jingwgno diyc busiong ee qigdingw qakdix bor? Inx longxx m bad suansi qongxx u jingwgno diyc busiong ee qigdingw qakdix. Hyhongw junjiaw Gotama, ix iaxx siauwlenn, cutqex ee zidjiw qycc jiacc dew!"
"Dairongg! M tangx knuawkinx siauwlenn :ee. U sir jiongw siauwlenn :ee m tangx qra knuawkinx. Dycc sir jiongw? Dairongg, m tangx knuawkinx siauwlenn :ee, Khattiya siauwlenn, m tangx qra knuawkinx. Dairongg, m tangx knuawkinx siauwlenn :ee, juaa siauwlenn, m tangx qra knuawkinx. Dairongg, m tangx knuawkinx siauwlenn :ee, huew siauwlenn, m tangx qra knuawkinx. Dairongg, m tangx knuawkinx siauwlenn :ee, bikiu siauwlenn, m tangx qra knuawkinx. Dairongg, m tangx knuawkinx siauwlenn :ee. Jitt sir jiongw siauwlenn :ee m tangx qra knuawkinx."
Sewjunx suanqangw jiaxee liauw, Sxen Quewongw qycjaiww suansi qongxx:
"Cutsir liauw hyw qycc u bingu,
U junquir ee miasner.
Kyxviw Khattiya,
Nihuer iauxx siauwlenn.
M tangx qra knuawkinx,
M tangx qra biauxsi.
Khattiya did diyc dewui,
Venr juer ongg ee sii,
Narr kiw qionglet ee hunwno,
E iong onghuad qa'ngg cuxhuat.
Mrjiacc siuxho qaqi sniwmia :ee,
Diyhh virbenw kir jysiu jikhuat.
Dirr hniujngx iacc simlimm,
Dirr hiax qnir diyc juaa ee sii,
M tangx liahjunw ser jiah,
Dyrr qra biauxsi.
Bylun quann iacc qe,
Juaa decc syy,
Bylun gong javox iacc jabow kir jiapqin,
Dyrr didjiab hro qa.
Mrjiacc siuxho qaqi sniwmia :ee,
Diyhh virbenw kir jysiu sionghai.
Tangx tunjiac jin' je,
Iam huew cud ox enx.
Suizenn si biser,
M tangx qra biauxsi.
Jixiaur did diyc caa,
Ix ee huew e dua iam.
Narr gong lamluw kir jiapqin,
Libjig dyrr jysiu huew siyx.
Mrjiacc siuxho qaqi sniwmia :ee,
Diyhh virbenw virr huew laii sionghai.
Huew dirr simlimm siyx,
Huew jin venr ox tnuar.
Zid'ia quer liauxau,
Dirr hiax cauw e huad.
Cisiuw qaiwlut ee bikiu,
Narr iong qaiwlut qra siyx,
Ix langg be snix qniaw,
Byy jaihur lauu hro qniaxsunx.
Byy qniaw byy qewsingg :ee,
Inx hiaxee ee ciurgee virr cetdng,
Viw dylyciu iauxx vutzuu.
Mrjiacc qongxx henlingg u diwhui :ee,
Kyxlu qaqi ee lirig,
Duiww siyw juaa qapp ser huew,
U bingu ee Khattiya,
Ixqip u cisiuw qaiwlut ee bikiu,
Diyhh iong sxen qra inx jingwkag duiwtai."
Jiaxee ue qongw liauw, Kosala Qog ee Pasenadi Ongg hiongr Sewjunx qongw, "Sewjunx si siongrdingxsiong. Sewjunx si siongrdingxsiong. Sewjunx! Piwlun dyw :ee kia .kiw .laii, pag :ee henxhen, belo :ee qra jixsi dyrlo. Kyxviw u bagjiux :ee qnir diyc soxu ee sig, kyxviw dirr oamr diongx giaa qngx ee dinghuew, kyxviw Sewjunx qongw jiongxjiongw ee hxuad. Sewjunx! Guaw quiix vut, quiix hxuad qapp jingdoo. Sewjunx, cniaw jiapsiu guaw an' qimzit kiw, jiongsingx quiix juer upasaka."
2. Langg
Hitt jun, Sewjunx dirr Shravasti Sniaa Jeta Ciurnaa ee Anathapindika Hngg kiarkiw. Hitt sii, Kosala ee Pasenadi Ongg kir Sewjunx hiax vaiwhongw. Vaiwhongw quer, ix lexqingr Sewjunx liauxau dirr vnix:a jre. Jre dirr vnix:a Kosala ee Pasenadi Ongg mng Sewjunx qongxx, "Sewjunx! Dirr langg jursinx lairdew snix kiw sniaw dyrr e venwsingg duiww inx qaqi vutli, koxnauw, qapp vut'anx lehh?"
"Dairiongg! Snax jiongw mic dirr langg jursinx lairdew sanxsingx dyrr e venwsingg duiww inx qaqi vutli, koxnauw, qapp vut'anx. Dycc snax jiongw lehh? Dairongg! Langg lairdew snix kiw tamsimx, dyrr e venwsingg duiww inx qaqi vutli, koxnauw, qapp vut'anx. Dairongg! Langg lairdew snix kiw uanwhun, dyrr e venwsingg duiww inx qaqi vutli, koxnauw, qapp vut'anx. Dairongg! Langg lairdew snix kiw cigaii, dyrr e venwsingg duiww inx qaqi vutli, koxnauw, qapp vut'anx.
Tamsimx, uanwhun, qapp cigaii,
Snix jiaxee og simx ixau,
Laii venr juer sionghai qaqi,
Kyxviw quexjiw dyww siongx dig-aw."
3. Lau qapp Siw
Hitt jun, Sewjunx dirr Shravasti Sniaa Jeta Ciurnaa ee Anathapindika Hngg kiarkiw. Hitt sii, Kosala ee Pasenadi Ongg kir Sewjunx hiax vaiwhongw. Vaiwhongw quer, ix lexqingr Sewjunx liauxau dirr vnix:a jre. Jre dirr vnix:a Kosala ee Pasenadi Ongg mng Sewjunx qongxx, "Sewjunx! Dirr u sniwmia :ee lairdew, qamxx u sniaw tangx be lau be siw?"
"Dairongg! Zimrhyy singbut longxx berdangr be lau be siw. Dairongg! U dua jaihur :ee, u dua huwzu, u jerje iongrpinw, jerje qimginn, jerje jusanw, qapp jerje gnoxqog. In'ui inx u sniwmia, dyrr berdangr be lau be siw.
Dairongg! U dua jaisanw ee brahmin, inx u dua jaihur, u dua huwzu, u jerje iongrpinw, jerje qimginn, jerje jusanw, qapp jerje gnoxqog. In'ui inx u sniwmia, dyrr berdangr be lau be siw.
Dairongg! Hunalyw ixx jin ee siudyrjiaw, inx qniaa dua senrhingg, soxx qaix juer :ee ixx juer, dang dnar ixx siawsag, drat qaur lirig jurqiw, sokvak itjin. Jiauww jniar diwhui laii qaixtuad ee bikiu, inx ee sintew iarr si ixx vywhuai ee hxuad qapp kiwsag ee hxuad.
Ongg ee ciax suiw iarr e pnaiw .kir,
Sintew qniaa hiongr lau.
Jniawhuad ingxuanw be lau.
Senrzinn qongw senrgiw."
4. Tangx Air :ee
Hitt jun, Sewjunx dirr Shravasti Sniaa Jeta Ciurnaa ee Anathapindika Hngg kiarkiw. Hitt sii, Kosala ee Pasenadi Ongg kir Sewjunx hiax vaiwhongw. Vaiwhongw quer, ix lexqingr Sewjunx liauxau dirr vnix:a jre. Jre dirr vnix:a Kosala ee Pasenadi Ongg mng Sewjunx qongxx, "Sewjunx! Guaw dirr jiax dogjy jingrquanx, u snix kiw jitt xee sniurhuad, 'Guaw juer sniaw si langg soxx air, byy juer sniaw si langg soxx air?' Sewjunx, guaw snix cud jitt hy kuanw sniurhuad:
'Zimrhyy langg narr ixx sintew juer og, ixx uergiw juer og, ixx iwliam juer og, jiaxee langg longxx byy air qaqi. Qaxsuw inx hiaxee suizenn qongw, "Guanw jiaxee u air qaqi." Danrsi inx hiaxee kiokk si byy air qaqi. Bylun zuhyy, byy air :ee kir juer langg' byy air :ee, inx iarr e duiww qaqi juer hiaxee, mrjiacc qongxx inx hiaxee byy air qaqi.
Zimrhyy langg narr ixx sintew juer sxen, ixx uergiw juer sxen, ixx iwliam juer sxen, jiaxee langg longxx u air qaqi. Qaxsuw inx hiaxee suizenn qongw, "Guanw jiaxx byy air qaqi." Danrsi inx hiaxee kiokk si air qaqi. Bylun zuhyy, u air :ee kir juer langg' air :ee, inx iarr e duiww qaqi juer hiaxee, mrjiacc qongxx inx hiaxee u air qaqi.'"
"Dairongg, dyrr si anxnex! Dairongg, dyrr si anxnex! Zimrhyy langg ixx sintew, uergiw, iacc iwliam juer og, jiaxee langg byy air qaqi. Zimrhyy langg ixx sintew, uergiw, iacc iwliam juer sxen, jiaxee langg u air qaqi.
Jaix qaqi si tangx air :ee,
M tangx qaqi kir qapp og lenqed.
Iong og duiwtai langg,
Yh did diyc anlok.
Hro sixmoo laii siuqimr,
Laii siawsag sniwmia :ee,
Ix u sniaw?
Ix kir cruw diyc sniaw?
Qongdig qapp og jitt nng hxang,
Si langg jitt sxer soxx juer,
Dirr ix sinsiong jitt hxang.
Si ix soxx juer laii cruw .diyc .ee.
Kyxviw suii srinx ee ngiaw,
Jitt nng hxang duer diauu diauu.
Mrjiacc qongxx diyhh juer sxen,
Juer sxen tangx dirr birlaii jikju,
Qongdig dirr au sxer,
Si langg ee dorjuntauu."
5. Vyxho Qaqi
Jre dirr vnix:a Kosala ee Pasenadi Ongg duiww Sewjunx qongw, "Sewjunx! Guaw dirr jiax dogjy jingrquanx, u snix kiw jitt xee sniurhuad, 'Sniaxmih kuanw langg u vyxho qaqi? Sniaxmih kuanw langg byy vyxho qaqi?' Sewjunx, guaw snix cud jitt hy kuanw sniurhuad:
'Zimrhyy langg narr ixx sintew juer og, ixx uergiw juer og, ixx iwliam juer og, jitt hy langg byy vyxho qaqi. Inx hiaxee langg junw sriu cnxiu ee qundui decc vyxho, bew ee qundui decc vyxho, ciax ee qundui decc vyxho, iacc vorvingx ee qundui decc vyxho, inx jursinx marr byy sriu vyxho. Sniaxmih enqor? Hiaxee siuxho si guarjai ee, m si luerjai ee siuxho. Mrjiacc qongxx inx byy siuxho inx qaqi.
Zimrhyy langg narr ixx sintew juer sxen, ixx uergiw juer sxen, ixx iwliam juer sxen, jitt hy langg u vyxho qaqi. Inx hiaxee langg suizenn byy zimrhyy cnxiu ee qundui decc siuxho, byy bew ee qundui decc siuxho, byy ciax ee qundui decc siuxho, qapp byy vorvingx ee qundui decc siuxho, danrrsi inx u siuxho inx jursinx. Sniaxmih enqor? Inx hiaxee u siuxho inx luerjai, m si guarjai ee siuxho. Mrjiacc qongxx inx u siuxho inx qaqi.'"
"Dairongg, dyrr si anxnex! Dairongg, dyrr si anxnex! Zimrhyy langg ixx sintew, uergiw, iacc iwliam juer og, jiaxee langg byy siuxho qaqi. Zimrhyy langg ixx sintew, uergiw, iacc iwliam juer sxen, jiaxee langg u siuxho qaqi.
Sxen ar! Qaqi sintew u jetjer.
Sxen ar! Qaqi gengiw u jetjer.
Sxen ar! Qaqi iwliam u jetjer.
Sxen ar! Itcer u jetjer.
Qaqi u jetjer jaix qenwsiaur :ee,
Qiyr juer virr siuxho ee langg."
6. Jiyxsor
Hitt jun, Sewjunx dirr Shravasti Sniaa Jeta Ciurnaa ee Anathapindika Hngg kiarkiw. Hitt sii, jre dirr vnix:a Kosala ee Pasenadi Ongg duiww Sewjunx qongw, "Sewjunx! Guaw dirr jiax dogjy jingrquanx, u snix kiw jitt xee sniurhuad, 'Dirr jitt sxer did diyc dua huwquir qycc be dimbee, be hongwdong, be dirr iogbong ee kuaiwlok damqyh, iacc be gro jingwlangg :ee jin' jiyw. Dirr jitt sxer did diyc dua huwquir suacc laii dimbee, hongwdong, dirr iogbong ee kuaiwlok damqyh, iacc gro jingwlangg :ee jin' je.'"
"Dairongg, dyrr si anxnex! Dairongg, dyrr si anxnex! Dirr jitt sxer did diyc dua huwquir qycc be dimbee, be hongwdong, be dirr iogbong ee kuaiwlok damqyh, iacc be gro jingwlangg :ee jin' jiyw. Dirr jitt sxer did diyc dua huwquir suacc laii dimbee, hongwdong, dirr iogbong ee kuaiwlok damqyh, iacc gro jingwlangg :ee jin' je.
Huwquir :ee dirr iogbong ee kuaiwlok dimbee,
Tamx ee iogbong duat simjir.
Byy diwqag ixx qniaa lirkuix dyrlo,
Kyxviw lok ee kax virr sokvak.
Inx hiaxee au .laii sriu koxsiab,
Hiyrqyw dyrr si og."
7. Caiduanr
"Jre dirr vnix:a Kosala ee Pasenadi Ongg duiww Sewjunx qongw, "Sewjunx! Guaw jre dirr caipnuar ee jyrui, qnir diyc dua huwho, u dua-jai.-dua-sanw, jerje jujaii, qapp jerje gnoxqog ee khattiya, brahmi, iacc qajuw dingxdingw, inx jaix iogbong ee kuaiwlok, iogbong ee kuaiwlok kixinx, uirr iogbong ee kuaiwlok enqor laii luanrsuw qongxue. Mrjiacc guaw snix kiw jitt see sniurhuad, 'Guaw ee caiduanr dnaxx qauwgiac ar. Jitmaw qaidongx iong caiduanr laii henxhen singwhenn ee bin.'"
"Dairongg! Dua huwho, u dua-jai.-dua-sanw, jerje qimginn, jerje jujaii, qapp jerje gnoxqog ee khattiya, brahmi, iacc qajuw dingxdingw, inx jaix iogbong ee kuaiwlok, iogbong ee kuaiwlok kixinx, uirr iogbong ee kuaiwlok ee enqor laii luanrsuw qongxue, inx hiaxee ingdongx u quxdngg vutli ee koxnauw."
Huwquir :ee dirr iogbong ee kuaiwlok dimbee,
Tamx ee iogbong duat simjir.
M jaix ixx qniaa lirkuix dyrlo,
Kyxviw hii virr bxang bxang .diyc.
Inx hiaxee au .laii sriu koxsiab,
Hiyrqyw dyrr si og."
8. Mallika
Hitt jun, Sewjunx dirr Shravasti Sniaa Jeta Ciurnaa ee Anathapindika Hngg kiarkiw. Iuqycc hitt sii, Kosala ee Pasenadi Ongg qapp Mallika Ongho longxx dirr ongqiongx ee laubuexdingw.
Hitt sii, Kosala ee Pasenadi Ongg duiww Mallika Ongho qongw, "Mallika! Qamxx u qitax zimrhyy langg viw liw qaqi kacc kyxair?"
"Dairongg! Byy qitax zimrhyy langg viw guaw qaqi kacc kyxair. Dairongg! Qamxx u qitax zimrhyy langg viw liw qaqi kacc kyxair?"
"Mallika! Byy qitax zimrhyy langg viw guaw qaqi kacc kyxair."
Hitt sii, Kosala ee Pasenadi Ongg qniaa lyc ongqiongx kir Sewjunx hiax vaiwhongw. Vaiwhongw quer, ix lexqingr Sewjunx liauxau dirr vnix:a jre. Jre dirr vnix:a Kosala ee Pasenadi Ongg hiongr Sewjunx qongw, "Sewjunx! Guaw qapp Mallika Ongho dirr ongqiongx ee laubuexdingw ee sii, u duiww Mallika Ongho qongw jiaxee ue, qongxx 'Mallika! Qamxx u qitax zimrhyy langg viw liw qaqi kacc kyxair?' Sewjunx! Jiaxee ue qongw liauw, Mallika Ongho duiww guaw qongw jiaxee ue, qongxx 'Dairongg! Byy qitax zimrhyy langg viw guaw qaqi kacc kyxair. Dairongg! Qamxx u qitax zimrhyy langg viw liw qaqi kacc kyxair?' Sewjunx! Jiaxee ue qongw liau, guaw duiww Mallika Ongho qongw jiaxee ue, qongxx 'Mallika! Byy qitax zimrhyy langg viw guaw qaqi kacc kyxair.'"
Hitt sii, Sewjunx u liauxqaiw jitt jann ee ywgi. Hitt sijun, ix cniur jitt siuw jimgensix qongxx:
"Sniu quewongw itcer,
Byy jit xee viw qaqi
Qyckacc kyxair :ee.
Qitax ee jingwlangg,
Iarr si air qaqi.
Mrjiacc qongxx air qaqi :ee,
M tangx sionghai tazinn."
9. Singlew
Hitt jun, Sewjunx dirr Savatthi Sniaa Jeta Ciurnaa ee Anathapindika Hngg kiarkiw. Hitt jun u uirr Kosala ee Pasenadi Ongg virvan dua jewlew, singlew u go-vah jiah guqangw, go-vah jiah gu'axqniaw, go-vah jiah snuangiuu, qapp go-vah jiah ngiuqangw, longxx virr vak dirr tiau. Qycc u ongg ee lole, lovok, qapp lamsingr suxiongrlangg, inx hiaxee qniax siurr hinghuat, qniax qaxx girgi junx, jidbin juer jinvxi qycc naxx lrauu bagsaiw decc kaur.
Hitt sii, jerje bikiu jaixkiw cing snxax tec vxuah zip Savatthi Sniaa decc qiukid. Dirr Savatthi Sniaa qiukid .quer qra vxuah siux .kiw .laii liauxau, inx kir Sewjunx hiax vaiwhongw. Vaiwhongw quer, inx lexqingr Sewjunx liauw dirr vnix:a jre.
Jre dirr vnix:a inx hiaxee jiongww bikiu hiongr Sewjunx qongw, "Sewjunx, u uirr jitt xee Kosala ee Pasenadi Ongg virvan dua jewlew, singlew u go-vah jiah guqangw, go-vah jiah gu'axqniaw, go-vah jiah snuangiuu, qapp go-vah jiah ngiuqangw, longxx virr vak dirr tiau. Qycc ongg ee lole, lovok, qapp lamsingr suxiongrlangg, inx hiaxee qniax siurr hinghuat, qniax qaxx girgi junx, jidbin lrauu bagsaiw decc kaur, jidbin naxx juer junxvi."
Hitt sii, Sewjunx liauxqaiw jitt qnia dairjir, dirr jitt sii cniur jimgensix qongxx:
"Bew juer singlew iacc langg juer singlew,
Danr qongwvang ee vixsair,
Singwlirjiaw limx jiuw,
Qycc byy jysiu jiongwgai.
Jiaxee singlew,
Qyckacc je iarr byy dua qongqyw.
Snuaxngiuu, ngiuqangw, qapp guu,
Qra jiongxjiongw jiaxee sathai.
Jitt hy singlew,
Dua singwzinn be kir juer,
Iarr be qniaa uaw .kir.
Snuaxngiuu, ngiuqangw, qapp guu,
Dirr jiax be virr sathai,
Dirr jiax ee singlew,
Si qniaa jingwdy :ee,
Dua singwzinn iarr anxnex juer.
Henjiaw qniaa jitt hy jewlew,
Jitt hy jewlew u dua qongqyw.
Qniaa jitt hy hing'uii :ee,
U sxen byy og.
Uixdai ee jewpinw,
Jiongww tnisinn soxx janwsiongw."
10. Sokvak
Iuqycc hitt sii, Kosala ee Pasenadi Ongg qra jin' je langg kunxvak. Uree virr iong syh, uree virr iong bxang-aw, uree virr iong sryw ho'ngg vak lehh.
Hitt sii, jerje bikiu jaixkiw cing snxax tec vxuah zip Savatthi Sniaa decc qiukid. Dirr Savatthi Sniaa qiukid .quer qra vxuah siux .kiw .laii liauxau, inx kir Sewjunx hiax vaiwhongx. Vaiwhongw quer, inx lexqingr Sewjunx liauw dirr vnix:a jre.
Jre dirr vnix:a inx hiaxee jiongww bikiu hiongr Sewjunx qongw, "Sewjunx, Kosala ee Pasenadi Ongg qra jin' je langg kunxvak. Uree virr iong syh, uree virr iong bxang-aw, uree virr iong sryw ho'ngg vak lehh."
Hitt sii, Sewjunx liauxqaiw jitt qnia dairjir, dirr jitt sii cniur jimgensix qongxx:
"Tih iacc caa juer ee syh,
Iacc si lodig juer ee bxang,
Henjaiw be knuar juer si sokvak.
Langg ee simx bejuir,
Virr vyxgik qapp jukuann,
Qycc simx hro boxqniaw vak diauu lehh,
Henjiaw knuar juer si u lat ee sokvak.
Langg virr kenjer,
Suisi nngxsuee iarr lann vangr li.
Inx li iok laii siawsag iogbong ee kuaiwlo,
Dngrjuat jiaxee laii cutqex."