1. Qenrjuann ee Jingsinn diamr dirr Qenrjuann ee Singkux

"Qenrjuann ee jingsinn diamr dirr qnerjuann ee singkux." (Mens sana in corpore sano). Jitt qxur si sengiuu ee qikgenn, si benxle langg diyhh gauu hunwlen jiauwqor singkux hro ix iongw, ee cutmiaa ee ue. Sengiulangg qywqyr dy' si qaxnaxx cincniu jiong' jitt qxur ue kig dirr inx ee nauxqinx-lai, inx dagg langg vutlun davox, jabow, duarlangg, ginxaw, longxx si huisiongg gauu hunwlen singkux. Soxiw inx ee langg m na singkux ee qinbah si cincniu tih pah :ee, inx ee jingsinn qywqyr si uac tiauwtiaur.

Lanw ee langg m jaix si uirdiyhh simxmih enqor, qoklangg ee singkux dy' si berhiauw did jiauwqor :ee kacc je, diwqaur texjid huisiongg lramw, jingsinn longxx byy qauwgiac. Poxtongx narr jiac qaur go-jap huer, jiurr giamxzenn u jit xee laurlangkuanw. Sengiulangg dui' go-jap huer kiw, duxjiacc si beh dua dua jyr dairjir; inx hitt diap ee jingsinn cavutdyx si qapp lanw zi-snax-jap huer ee langg dangjidngiu, qui' singkux muaw muaw dy' si jongwlenn ee kiwkair.

U langg qongw dangngiuu qapp sengiuu ee bunbingg qokqog u digsig, byy dikkag sengiuu u kacc ngiaa. Guaw sniu liongxvingg ee bunbinn qokk u digsig, jex kiokk si sidjai; jongw .sir qongw dangngiuu ee bunbingg be kacc sux sengiuu, jex qniax jyr qongw liauw sniu' jurkuax. Qyckacc anwjnuaw sniu, guaw dy' m qnaw qongw dangngiuu ee bunbingg be kacc sux. Langg' qongw, dangngiuu ee bunbingg si jairdirr jingsinn; sengiuu si jairr budjid. Anxnix si urngiaw; jongw .si m tangx dui' anxnix jiurr liahjyr sengiuu ee jingsinn byy bunbingg, iacc si qongw sengiuu ee jingsinn-bunbingg si kacc sux dangngiuu :ee. Narr si jit diamw duw jit jiamw laii ping, dangngiuu ee jingsinn-bunbingg, lairdew viw sengiuu :ee kacc cutsig iarr si u; mrquxx narr dui' dairtew knuar, tangx qongw m na sengiuu ee budjid-bunbingg u kacc ngiaa dangngiuu, jingsinn-bunbingg iarr si viw lanw kacc cutdiyh.

Jongxqongw, sengiuu bunbingg si kacc jikqik, lanw dangngiuu bunbingg si kacc siauqik. Sengiuu :ee si kacc hiongwjenn kacc uahdang; lanw :ee, si kacc siuw, kacc dimjing, kacc tewvi, kacc iuud ee kuanw. Piwlun qongxx: jairr lanw si qongw, "Qadi soxx m air :ee m tangx hro vadd langg, anxnix jiurr si u zin'air." Jairr sengiuu jiurr m si anxnix. Inx qongw, "Diyhh jiong' qadi soxx air :ee, hnuahiw hro langg, jiacc si u zin'air."

Qinrqin dui' jitt qxur ue jiurr e tangx jai'ngiaw sengiuu ee jingsinn kacc jikqik, kacc tetdew. Cniaw zinrjinx sniu knuar, jiong' lanw soxx m air :ee byc did tec hro langg' si kacc kuair, jiong' lanw soxx air :ee tec hro langg, sidjai si kacc yh. Qycjaiww jiong' lanw soxx m air :ee byy tec hro langg'; duiww hitt xee langg qongw si byy uirdiyhh anxnix qetnix simxmichuer, si vingsiongg ee dairjir. Mrquxx narr jiauww lanw soxx air :ee tec hro ix, hitt xee langg uirdiyhh anxnix qetnix lirig si kacc je.

Sengiuu ee jongqaur (Qidokqaur) qar langg' qongxx, langg ee singkux si singwlingg ee vyxden, soxiw dui' singkux-lai soxx huad cud itcer ee qamxqag, narr siurr singwlingg ee jixdy, diyhh longxx hro ix uahdang jiacc hyw. Dangngiuu ee jongqaur(Vudqaur) qar langg' qongxx, sewqanx bxan su si kangx kangx, jiurr si langg singkux qetqiok iarr si byy; narr jiong' byy :ee knuar jyr u, jiurr si jipbee, soxiw dui' singkux soxx huad itcer ee qamxqag, diyhh qra qimwjer hro ix siaubyy .kir. Dui' anxnix sinr Vudqaur ee langg uree byy crua bow, uree qimr byy kunr, byy jiahvng, qongxx iarr u qauw nii quw qanda' diam diam jre knuar viah, iarr uree jre dingx-jingg, giac jngxaw cak singkux, byy vadd kuanw ee liamrtauu be huatsnex, hro ziogtew e tangx kacc qinw byy .kir, tangx sxingg Vut. Led'ui, cniaw sniu knuar, jitt nng kuanw jongqaur, si dangsaix nng vingg jingsinn bunbingg ee dua digsig. Jiauww anxnix vixqaur knuar, dangngiuu Vudqaur soxx qongw qiamxx m si huisiongg siauqik mah?

Qycjaiww sengiulangg dui' tniderqanx bxan hxang mic longxx si byy qniahniaa; inx longxx qniaw uaxqin qra ix genxqiur qaur jinx, qra ix tec laii jyr langg ee loring. Lanw dangngiulangg jiurr m qnaw; dairkair ee mic dy' si m qnaw kir bongx ix. Piwlun qongxx, lanw dangngiulangg giac hniux decc vair ee luiqongx sicnar; sengiulangg inx longxx byy qapp ix sewzi, qra ix cua .laii, jiurr qiyr ix jyr guu tuax ciax, jyr dingx jiyr lo. Inx sengiulangg jairr jitt derbinrjniu by jit dah inx m qnaw qaur; lanw ee langg si qanda' jngxqah lauu dngg dngg, diamr cur-lai qniaa laii qniaa kir, siaur jxngx-aw, tittyy quewzit.

Lun qinaxzit ee dangngiulangg sux sengiulangg ee diamw si jin' je lar. Lanw dangngiulangg ee jiwkir si jin' siaudimm, jin' byy uaddang. Lanw longxx jin' kuair lau, jin' kuair siw. Jex longxx si dui' lanw ee sintew jin' luanxziok, diwqaur jingsinn byy ciongjiog. Soxiw sursu dy' si m qnaw hiongwjingg jyr, longxx si tewvo siuw nardnia. "Qenrqongx ee jingsinn si diamr dirr qenrjuann ee singkux."

Led'ui, cniaw lanw ee bagjiux tiw kuix knuar, lanw ee langg u jniaa jit xee langkuanw :ee, u quiw langg? Kacc je qiamxx m si binrsig qodaa, puebah siausanw, unxqux, cnimee, vaixkax :ee muaw muaw si mah? Dui' jitt kuanw texqeh byy qiongjongr ee jingsinn tangx huathen, sidjai si ingqaix.

2. E tangx hro singkux iongxqnia ee huatdo

Lanw beh genxqiur hro singkux e tangx qiongjongr ee huatdo ee ixjingg, lanw diyhh singx e qir did jit hxang, jiurr si lanw air singkux iongw, m si beh air dngg huewsiu ee iwsur, si beh air lanw jin jywlangg ee vunxhun, jyr hro ix tetdew. Narr m si anxnix sniu, qongw hro singkux iongw, si juanjuanx uirdiyhh beh air dngg huewsiu ee enqor, anxnix jiurr dua dua u cywgo, qycc lyc .kir soxx beh qongw ee girlun jiurr suar be bingvik.

Cniaw sniu knuar, jiax u jit qix dyx. Dyx, m si beh vaii knuawhongw. Dyx, si beh ced mic. Dyx, narr e tangx ced zuxx je kuanw, qycc zuxx je ee mic, si zuxx hyw. Dyx, qanda' sog dirr dysiur, suizenn si kngr u quixnar cingx nii ee quw, qetqiok u simxmih iwgi? Dyx, diyhh ced mic, ced zuxx je zuxx hyw. Soxiw dyx, derr id iauwqinw diyhh u qngr; derr zi, diyh'air lrai. Dyx, beh air u qngr diyh'air ing huew vuu, ing tuii len, ing juiw ganr, acc beh hro ix lrai jiurr diyhh siah, diyhh buaa. Narr si anxnix, hitt qix dyx dniardiyc e kacc kuair liauw; acc qniax kuair liauw, jiong' dyx byy siah byy buaa, qanda' siux kir kngr, qiuwqingr si jniaa simxmic? Jitt xee iwgi narr u bingg, beh hro singkux e iongxjongr ee huatdo jiurr kacc kuair cingcyw.

A. Hiyckunr qapp jywqangx.

Hiyckunr qapp jywqangx, junxjad hro duxhyw, beh hro singkux iongw, jitt hxang si jueww iauwqinw. Lanw vingsiongg ee langg vutjiw kinbenw, longxx si erhiauw sniu jywqangx, berhiauw sniu hiyckunr. Sengiuu u jit qxur siogguw qongw, "Byy hiyckunr longxx jywqangx, kiauw kiauw ginxaw dy' e vnir gong langg." Lanw itvnuax ee langg jiauww knuar kacc je si jywqangx quewtauu, siausanw diddit beh dax .kir .ee si jin' je. Acc jit vingg u derui ee langg, vutjiw m air dinxdang, juanjuanx si hiyckunr. Inx ee hiyckunr tangx qongw si jin' qigduanx ee jywhuad, ix ee kaciuw cavutdyx qui' siwlangg longxx m bad hro ix dinxdang; ix ee mngqngxkangx, druu kir puawvne huatzet iacc si lagguehtnix ixgua, tangx qongw si longxx m bad u lrauu qnua .cud .laii. Soxiw kacc je si qapp vingsionglangg siangrkuanw, iuguann si jit dingg puee nee jit qix qud, nng qix kax jair jit xee singkux dy' suar beh be jai. Lanw ee langg tangx qongw si qigduanx qaur qik, jywqangx :ee diddit jyr qaur siw, acc hiyckunr :ee bi itdit kunr qaur kuiwsix dng. Jex si ix ee qingxgu qiyr ix anxnix iarr si u; jongw .si dua ee lixiuu si berhiauw jywqangx qapp hiyckunr ee iwgi.

Drang kaciuw, beriongrdid qongw si decc jywqangx; diam diam jre, iarr beriongrdid qongw si decc hiyckunr. Jywqangx qapp hiyckunr ee hunved, knuar si uirdiyhh dairjir decc jyr dairjir, iacc si uirdiyhh sim'air decc jyr dairjir. Uirdiyhh dairjir decc jyr dairjir si cud dirr byy da'uaa, si u qamxqag qankow. Uirdiyhh simx'air jyr dairjir, si cud dirr simqnuax qadi beh, soxiw u an'uir. Tec iuven ee langg decc jauxlo, jauw siy' liac ee langg iarr si decc jauxlo; suizenn si vnevnee decc jauxlo, tec iuven :ee si decc jywqangx, jauw siy' liac ee langg si decc hiyckunr. Singlixlangg uirdiyhh singliw pongw cuiwerdauw dirdecc sniu, qapp qniaqii ee langg uirdiyhh qiziw lenw cuiwciux dirdecc sniu, vnevnee dy' si dirdecc sniu; jongw .si jit xee si decc jywqangx, jit xee si decc hiyckunr. Jywqangx si byy da'uaa, si benxqiongw jyr, si uivue simqnuax ee soxx air, soxiw dua dua u sunxhai singkux ee kongqen. Hiyckunr si cud dirr simx soxx air, u an'uir, soxiw duiww singkux ee qenrkongx u lirig. Jywqangx si siurr dairjir soxx vig dirdecc jy, dairjir narr be liauw, qangx jiurr be tangx suah.

Soxiw lydong sniu' quewtauu, diwqaur hai singkux. Hiyckunr si cud jairr simx juxir, air jyr jiurr laii jyr, air hiyh jiurr e tangx hiyh, junxjad e duxhyw; soxiw duiww singkux u lirig. Qycjaiww jywqangx si kacc rair juanjuw dirr jit hxang, sniu dairjir :ee diyhh vutsii juanjuanx dirdecc sniu, cud lat :ee, cud qaur lat jin, dy' diyh'air qycc cud, iong ciuw :ee diyhh vutsii iong ciuw, iong kax :ee vutsii diyhh iong kax, dirr guarbin :ee diyhh hro zidtauu pak qaur beh dax .kir, dirr lairbin :ee diyhh imr qaur beh ngsngx.

Jongxqongw jywqangx si iong singkux ee jit vxo, diwqaur juantew be diauhyy, vniwjniaa jit jxingw puawsniur ee kuanxsid. Hiyckunr e tangx jiauww lanw singkux ee kuatkiamr, diauhyy hro hyxser, soxiw singkux e kongqen, e naxx jingqax.

Lanw dirr jiax qongw hiyckunr, benw qongw m si qanda' dyw decc kunr ee iwsur. Jongxqongw, cud dirr simqnuax ee soxx air laii jyr jiurr si hiyckunr lar! Singkux iawsen, simqnuax sniu air kunr, iarr jiurr dyw lyc kir kunr, anxnix jiurr si hiyckunr; jex si anjing ee hiyckunr. Singkux iawsen, simqnuax sniu air dinxdang, iarr jiurr cud kir guarbin qniajauw, iacc si pacqiuu, vecsnuax, jex si qiyr jyr unrdong ee hiyckunr. Poxtongx, lanw ee langg narr qongw hiyckunr, jiurr si qiw anjing ee iwsur, longxx byy unrdong ee iwsur dirr hitt nirr.

Jitt qxur unrdong ee ue si qinrlaii jiacc kacc u ing, kacc jaw longxx hranw did tniax .qnir. Jex si jingwbingg lanw duiww unrdong byy cuwbi, byy quansimx. Jionglaii knuar unrdong si jyr jit jxingw m jingwqingx ee dairjir, ginxaw jyr ngqogqex bicsiycue, iacc si diycquewhunn, cad'uiqunx, jex dy' longxx si jit jxingw ee unrdong. Itvnuax ee langg knuar jex qongw si ginxaw decc sngw decc jokget, liahjyr m ingqaix ee dairjir; duarlangg juadduir m bad jyr, iarr m kingw hro ginxaw kir jyr.

Qaur jiax, lanw ixqingx e tangx bingvik lanw ee langg sintew luanxziok ee lixiuu. Lanw ee langg tangx qongw si u lydong, byy unrdong. Lydong, jiauww dingxbin soxx qongw u hai singkux si kacc je; beh hro singkux iongw, rair unrdong jiacc e iong .did. Suizenn qongw lanw m si by hiyckunr, lanw si qanda' u anjing ee hiyckunr nardnia. Anjing, kiokk si iauwqinw; jongw .si narr qanda' anjing, si hro langg ee qinbah zuxx byy kuiwlat, hro langg ee jingsinn zuxx siaudimm, zuxx nngxjniaw.

Dairqex jingww hniadi-jixmue! Lanw siurr jin' quw pnaiw sibquanr ee jikver jin' cimx, hro lanw singkux luanxziok, ixqingx qaur qigkamw, lanw ee jingsinn siaudimm ixqingx qaur dirr qigtauu. Jywlangg ingqaix sriu .diyc ee hokkir, lanw sidjai vangwsag jinjniar je, cavutdyx bydangr tangx sngr kiw. Jex longxx si dui' lanw berhiauw jywqangx qapp hiyckunr ee iwgi, berhiauw unrdong ee iauwqinw soxx drir :ee. Lanw diyhh cetced qinw qinw singxgo, qanda' jywqangx byy hiyckunr, qaur buew si e byy qangx jyr. Acc qycjaiww narr si qanda' anjing byy unrdong, qaur buew diyh'air vniwjniaa nngw kax nngw ciuw ee senrlang'aw!

M air unrdong, si dangngiulangg qiongrtongx ee singwjid. Jitt jap gua nii ixlaii, siurr sengiuu ee hongkir dua qamxhuar, unrdong ee cuwbi ixqingx jit nii jit nii diongw. Jairr haghau dagg zit dy' u qar unrdong ee huatdo, muixx nii u sed jiongxjiongw ee unrdongrhue decc qoxbuw. M na dagg qog diamr dirr ix ee qog-lai qadi decc jiongxle, qog duw qog ee diongqanx iarr u sed hue decc qoxcuix.

Jairr lanw dangngiuu, Zidvunw, Diongqog, Huilirvinx jitt snax qog jurr sir~go nii jingg u sed jit xee hue, qiyr jyr "Qigdangx Olinpig." Nng nii jiauwlunn dirr jit qog kuix jit vaiw. Tong' sewqair banrqog iarr u siyqab sed jit xee Sewqair Olinpig ee hue, qnaxx si muixx sir nii kuix jit vaiw. Qinnii (1924) si diamr Huatqog ee dewdox Valiw kuix, jitt vaiw sngr si derr veh vaiw. Dirr dingw guec (Sir-guec zxic-cid zit) dui' lanw qog-lai iarr u qingw zi-jap gua langg pair kir hur hitt xee hue, diyhh jre sir~go-jap zit ee junn jiacc e qauwui. Cincniu anxnix, jitt kuanw ee hue, soxx kaix ee jnii qapp soxx iong ee simsinn, sidjai si m si siyxkuaw. Urdangsii m duxhyw dirr hitt diongqanx u langg diyhsiongx, u langg liauw snewmia :ee iarr si byy hihanw.

Lauxsit, jitt kuanw ee dairjir hro lanw ee langg dikkag si jyr be did tangx qaur; jongw .sirr uirdiyhh anxnix, qoxbuw hro tong' sewqair ee langg, longxjongw jai'ngiaw unrdong ee iauwqinw, longxjongw duiww unrdong u cuwbi; langlangg longxx kir jyr. Dui' anxnix, tong' sewqair ee langg sintew qapp jingsinn jiurr jiamrjiam e kacc iongxjongr.

Sengiulangg duiww jitt kuanw unrdong ee cuwbi, sidjai si huisiongg. Inx dirr cur-lai u cur-lai ee unrdong, dirr guarbin u guarbin ee unrdong; dirr snuax nirr, u snuax nirr :ee; dirr juiw nirr, u juiw nirr :ee; uree jit langg jyr :ee, iarr u jerje langg jywhuew jyr :ee; u cingcingx-vacvah kuanw. Qanda' uirdiyhh jit hxang unrdong, inx dagg nii soxx kaix ee jnii m jaix u zuarr je?

Uirdiyhh qadi beh unrdong benw qongw rair iong jnii, jiurr si beh knuar langg' unrdong iarr m si suiven ersaih .did. Tniax qnir qongxx dirr qurjunnii jairr Bixqog Niuxiog Ci, sewqair jueww cutmiaa ee qundowqax dirr hiax vixenw, jib'uaw laii knuar ee langg u jap-bxan langg, jre itdingw xui ee zibdniuliau jit-vah kox. Dui' hitt xee tauciuw saihu anxnix jit vaiw ee siarlew, qongw si lak-jap-bxan koginn, jex sidjai si hro lanw soxx berhiauw sniu, hro lanw tniax liauw e diyhqniax.

Qycjaiww u knuar diyc jingg dirr lanw Daiuann jyr jongxburdniuxqnuax. Harcuanx Hongg Sensnix ee ceh u siaw, qongxx ix dirr jap nii jingg u craa Ingqoklangg vingqinx jit langg jit nii qanda' uirdiyhh unrdong, diyhh kaix zi-jap koginn; iarr inx juann qog jongxqiog diyhh kaix qauw-ig jit-cingx bxan ginn. Jex si jap niii jingg ee dairjir; henrsii benw qongw, si qyckacc je. Qauw-ig jit-cingx bxan ginn qiamxx m si jin' je mah? Lanw Daiuann Jongxdokhuw henrsii jit nii ee huiwiong si jiongqin jit-ig ginn. Jap nii jingg Ingqog jit nii soxx iong ee unrdongrhuir, hro lanw henrsii Daiuann ee qnuahuw e tangx kaix qauw nii quw lar! Liw knuar, tangx qniax iacc m tangx qniax?

Ar! Sengiulangg viw lanw kacc iongw u vah vxue, viw lanw kacc gauu u cingx vxue; sidjai m si gnoxzenn ee dairjir. Guan lanw duiww unrdong diyhh qycc jit huanx ee iongrsimx.

Sidjai "Byy hiyckunr longxx jywqangx, kiauw kiunw ginxaw dy' diyhh vnir gong langg." Cniaw vutsii jywqangx ee dongvaux diyh'air e qir .did. Qycjaiww Lymaxlangg u qongw, "Qenrkongx dirr mngg-gua." Soxiw guaw hyxdnaw cniaw uirdiyhh vutsii qanda' anjing hiyckunr, diwqaur puawvne decc qankow ee dongrvaux, cniaw linw sinr Lymaxlangg jitt qxur ue, sisii cud kir mngkauw-gua qniaa qniaa jauw jauw knuar, qenrkongx iongxqnia dikkag dirr hiax danxhau linw!

B. Ix-Sit-Ju.

Ijniuu, jiahmic qapp jurqix, jitt snax hxang si langg beh vyxcii snewmia soxx vit'iaur :ee. Jongw .si langg uirdiyhh jitt snax hxang dendyww sunxsid snewmia :ee iarr si u. M na si u nardnia; jiauww sidjai knuar, lanw ee langg uirdiyhh duiww jitt snax hxang "Ix-Sit-Ju," anvaii liauw u m duxhyw, crig dew soxx ingqaix hiongxsiu ee huewsiu si jin' je.

(1) Ijniuu ee loring, derr id si beh diaujed qnuazuac, qaurvyc cing e duxhyw, si huisiongg iauwqinw. Jerje langg qongw snaaxkor cing vyc kacc air qamw diyc hongx, cing qau jiurr kacc be. Byy dikkag duxduxx si anxnix. Kiokk m si qongw qaurvyc longxx byy quanhe; jongw .si jueww u quanhe si jairr texjid ee qiongziok, vutjairr snaaxkor ee hunliong. Langg ee qamxqag e hunwlen .did, e quanwsir. Siongsiongg cing qau ee langg qaur buew suar quanwsir, puehux dui' anxnix jiurr venwjniaa be kamx did lingw, siyxkuaw qnuaa dy' diyhh cing jin' qau.

Mrquxx narr si dui' kixtauu jiurr juxir cing kacc vyc, qaur buew quanwsir, suizenn si jin' qnuaa, iarr si mrbenw cing sniu' qau. Guaw ee cinlangg, ving'iuw ee diongqanx, jyr isingx ee langg vutjiw nng~snax langg, guaw siongsiongg kir inx ee soxjai, knuawqnir jin' je duarlangg py ix ee ginxaw beh hro sensnix knuar. Henrhen si lagguehtnix jin' zuac, iarr qra ix ee ginxaw cing quixnarr niaw snxax qycc tac hiuu, taukag qra ix dir byramx. Sensnix beh qra ix jinxcad, jid'err qra ix trngr snxax knuar, kyxlinn hitt xee ginxaw hro m bad jingliw ee duarlangg, qra ix hib qaur jit singkux juanjuanx qnua, cauwqnuarsngx ee hxenr cavutdyx beh qig dyw langg.

Langg u nng jxingw ee cuanxkuir, jit jxingw si dui' pnirkangx qapp cuir, qycc jit jxingw si dui' mngqngxkangx. Cincniu jiacc zuac ee sii, qra ginxaw vaux qaur hitt kuanw, jex qetqiok si jiong' hiaxee mngqngxkangx longxx qra ix satbat, m hro ix cuanxkuir, ginxaw mrbenw qamw diyc hongx, ixqingx diyh'air puawvne jiacc u hap jingliw. Ijniuu ee loriong, benw qongw jit vo si beh vyxcii duiww langg ee lexsor, iarr jit vo si beh hyw knuar jrngx suiw; jongw .si jueww dua ee loriong si beh vangjan puehux diaujed tnikir ee qnuazuac. Cniaw diyhh qycc e qir did jit hxang: kiwhau lingw ee sii jurzenn diyh'air cing kacc qau; jongw .siw narr dui' vingsii juxir, e tangx cing zuxx vyc si zuxx hyw, hro singkux e zuxx iongw. Ginxaw zuahtnix decc kunr ee sii, qanda' qra ix vaux vakdow, kaciuw hingkamw hro ix liangg si byy iauwqinw.

Ree, tangx qongw iarr si jit jxingw ee snaaxkor. Lanw ee hniadi kax trngr ciah ciah ee langg jinjniar je, jitt hxang si jin' tangx qenwsiaur, jin' tangx huanlyw. Anxnix m na si iaxjong pnaiw knuar, uirdiyhh anxnix kaqud snex liab'aw qankow ee langg si jin' je. Qinrlaii hiongcuanx ee jixmue liukax liauw, jex si dua dua tangx hnuahiw; jongw .si suar yc davolangg tngwciackax, jitt hxang jinjniar rair cniaw dairqex sniu! Dnaxx m jaix beh anxjnuaw laii qaixqiur?

(2) Jiahmic ee dairjir, lanw rair quansimx ee diamw u jin' je. Lanw ee langg vutlun jiac iacc si limx, longxx diyhh quer juw, quer hniaa, quer qunw jiacc kingw jiac, jitt hxang si jin' hyw ee huatdo. In'ui mic nirr siongsiongg u diauu jin' iuwser ee tangg qiyr jyr sewkunw, langg ee puawvne dui' jriab diyc jitt hxang laii :ee si jin' je. Narr jit vaiw qra ix quer juw quer .kir, ix jiurr suisii siw .kir, jiac liauw jiurr byy iauwqinw.

Jongw .si lanw duiww jitt hxang jiac, jueww m hyw ee sibquanr jiurr si air luan luan jiac, longxx byy jiauww sijun. Jiauww isingx ee genxqiur qongxx, langg dui' cuir-lai jiahmic zip vxag, diyhh qingquer zi-jap-snax diamxjingx jiacc e vangr .cud .laii. Jiahmic tunx lyc kir ui ee lairdew (ui, poxtongx qiyr jyr do) diyhh qingquer jit diamxjingx jiacc juanw zip kir siyxdngg, diyhh cid diamxjingx quw hiaxee mic jiacc e tongquer siyxdngg ee soxjai. Tongquer siyxdngg ixau juanw zip kir duardngg-lai; dirr hiax u jap-go diamxjingx quw, zen'au jiacc e sriaux cud laii guarbin.

Dirr dingw jad u qongw, jywqangx qapp hiyckunr diyh'air junxjad e duxhyw; dirr jiax jitt hxang iarr si iauwqinw. Jiahmic zip kir vakdow-lai, vxag-lai ee qiquanx jiurr si ui, siyxdngg, duardngg; ixgua, qnuax, iyjiw, uirdiyh beh hro hiaxee jiahmic e tangx sriaux jyr singkux ee loring, longxx diyh'air jywqangx; narr si byy hiyckunr, qaur jit sii lat cud jin, iarr jiurr dyw .lyc .kir, iarr jiurr huad puawvne. Sengiuu u jit qxur siogguw qongw, "Dngcair e jyr dew snewmia." Lanw iarr u jit qxur qongw, "Dniur dix vuii, dniur qxauw sanw, dniur langg ngsngtanw." Byy mic tangx jiac gy siw ee langg sidjai si jin' je; jongw .si hro mic dniur siw ee langg dagg zit m jaix u zuarr je? Qycjaiww jyr jit vaiw jiac sniu' je dniur siw :ee e tangx qongw si byy, soxu hro mic dniur siw :ee longxx si dui' dirr byy siuw siqanx, cuir vutsii drang, jit cuir jiac quer jit cuir :ee kacc je. Iauquiw jiurr si gyrquiw ee ciokhy, cniaw u tangx jiac ee langg diyhh siyxsimx.

Cuir vutsii drang ee langg, m na e crig dew huewsiu, iauxquxx hro taunauw hunrdun berhiauw sniu dairjir. Dairqex qadi ciwgiam knuar, dairkair vxag kinx, simx jiurr kinx, vakdow narr vaw bagjiux jiurr beh aiwkunr. Soxiw kacc byy codang siongsiongg iong taunauw ee langg, qinrlaii hiamm jit zit jiac snax dxngr sniu' quer je, soxiw jit zit crig jiac nng dxngr :ee u jin' je. U langg crig jaxkixdngr byy jiac, u langg crig erdauwdngr. Jitt kuanw langg guaw jaix :ee vutjiw je.

Guaw qadi jurgo. Lak nii jingg dirr Dangqniax ee sii kiw, jiurr qanda' jiac diongdauwdngr qapp amwdngr, jaxkixdngr si cavutdyx byy jiac, qanda' limx jnia' nguaw amxmuee jiurr suah. Guaw qinggiam liauw qamxqag vutjiw hyw. Soxiw cniaw uirdiyhh sanwhiongx ee enqor jiac nng dxngr ee led'ui mrbenw siongsimx, u tangx jiac ee langg iarr decc yc linw ee hyw bongiu. Jiahmic ursii jit~vnuar vaiw jiac hro ix jin' jiog vaw, hro vakdow-lai kacc laurzet iarr si hyw; jongw .si vingsowsii jiac qaur veh hunx qauw hunx iauxx kacc hyw. Narr si anxnix m hanrdnia vakdow kacc knuawuac, soxx jiac :ee lyc kir liauw ee mic ee hyw bi, iarr beh quw quw dirdecc pangx.

Quanhe jiahmic diyhh qycc sniu jit hxang: jiahmic zip cuir-lai diyhh zinrjinx vro hro iur, lyc kir vakdow jiacc kuair sriaux. Dui' anxnix jiurr tangx jai'ngiaw cuiwkiw si jin' diyhh jiauwqor. Lanw ee langg ee cuiwkiw jin' kuair jiur, kuair lag. Jex longxx si dui' berhiauw jiauwqor soxx drir :ee. Jiauww knuar m bad sew cuir ee langg si jin' je. Cuir, narr byy dagg zit sew, soxx jiac ee mic e diauu dirr kixhnua, cuiwkiw dui' anxnix jiurr kuair lag. M na anxnix; cuir-lai ee bi sidjai si byy hyw, cuir narr tiw kuix iarr si byy gnaxkir.

Qinrlaii dairqex jiamrjiam u bingvik jit hxang, dagg jaxkiw sew bin ee sii suar sew cuir. Sew cuir ee sii dairkair si iong kixbinw qapp kixhunw. Kixbinw si dikkag rair; kixhunw si mrbenw dikkag, qanda' iong kacc iur ee iamm jiurr jiokgiac. Iamm, u kir dogkir ee lat. Qycjaiww dagg dxngr jiac vaw au diyh'air iong juiw sruaw kauw, jiong' diauu dirr cuiwkiw hiaxee mic, sew hro ix li, jiacc hyw. Jitt hxang dikkag diyhh sidhingg, beh hro cuiwkiw iongw, jitt hxang si jin' u qonghau. Beh kunr ee sii narr si u qycc sruaw jit vaiw cuir, si iauxx kacc dingxjinx. Narr si qongw laurlangg u cuiwkiw si e vro siw qniaxsunx, jex si jit jxingw ee besinr, si jin' vutqin zinjingg ee ue.

Lanw ee jiahmic ee juxhuad qapp jairr henrsii juann sewqair vadd langg ping, sidjai si be sux :langg. Jongw .si guaw knuar hyw jiac, si hyw jiac, m jaix e kacc byy uersingx iacc be? Guaw sniu, qniax liauw e kacc yh siauhuar, in'ui lanw iong iuu sniu' quer je, qycjaiww mic siongsiongg juw liauw sniu' quewtauu, diwqaur yh did sriaux. Cincniu loxnng kiokk si jin' hyw jiac; mrquxx si jin' be sriaux. Lanw jionglaii jiahvng, iarr si jin' m driyc huatdo, lanw longxx si jiac hoo :ee, qanda' tec hiaxee bixpyh kiw laii jiac, bixcuew longxx dirr amw-lai, jiong' hiaxee ju'iongw ee amw jiacc tec kir cri dix, jniux snxax; sidjai si jin' m driyc. Acc lanw Daiuann quexjiw cud jin' je, dairqex m jaix si uirdiyhh simxmih indnuax, longxx jin' hranw did jiac; jex iarr si jin' kyxsiyh. Quexjiw m na u hamm jin' je ee ju'iongxhunx dilehh, jiac liauw iarr vutjiw e vangjan vadd hxang mic siauhuar.

Jurqix e tangx qongw iarr si jit jxingw ee snaaxkor, si qui' qajok ee langg qongqex dirdecc cing :ee. Soxiw dirr dingw jam lun ijniuu ee soxjai soxx qongw ee ue, dirr jiax eriongrdid qycc qongw. Ijniuu si beh jyr junxjad qnuazuac ee loring, jurqix iarr si anxnix. Ijniuu si beh jan langg ee bixquanx, hro langg hyw knuar; jurqix iarr si u jitt hxang ee loring. Qycjaiww ijniuu si langg duiww langg ee lexsor laii qongw, dikkag diyh'air ee mic, jurqix marr si dangjidngiu. Ijniuu si qanda' u jitt snax kuanw ee loring; jongw .si jurqix m na si anxnix, iarr beh hongvi cat-aw ee tautec. Lanw ee cur jerje air kiw hiongr saix, jex sidjai si sniu' vikzuac, vutjiw m hyw. Vutqyr iarr diyhh knuar soxjai, kiokk beriongrdid itkair lun.

Cur-lai ee mihqnia narr si e zuxx jiyw zuxx hyw. Lanw ee cur-lai siongsiongg u byy loring ee mic dinr qaur muaw muaw, sidjai si jin' dinwder, jin' byy hyw knuar. Soxhuir qniax liauw sniu' dang jyr be qraur; narr beh m si, cur-lai longxjongw pox dervanw, dagg zit iong juiw ziusew hro ix cingkir, dirr guarbin soxx cing ee hxiax, ree, bagqiac longxx mair did cing kiw laii dingxbin, anxnix cur-lai jiurr e jin' cingkir, duarser dikkag e kacc jiyw vnertniar. Jiong' jitt vo uirdiyhh vnertniar ee iyhjnii, qapp qiamw jywqangx ee sunxsid, pacsngr jiurr ixqingx jiokgiac, e tangx jyr jingxdunr cur-lai ee huiwiong. Qycc jit hxang: cur-dingw ee qag-aw byc did pox kuix kuix, hro tosuax e tangx sreh .lyc .laii, narr longxx ing vangx pox hro bat jiurr jin' hap lixsiongw, cincniu luerderlangg qapp guarqoklangg ee cur qruar hitt kuanw tenvongg; narr si duiww lanw ee cur ee kixhuad qongw, guaw sniu si byy vit'iaur.

Lanw u air diamr cur-lai cri jingsnex ee sibquanr. Henrsii qeci kiokk kacc byy, jairr jngsia si jin' je langg u cri. Lun cri jingsnex si jit hxang dua surgiap, si jin' iauwqinw; jongw .si diyhh m tangx air beh hro jingsnex vuii, diwqaur hro langg sanw jiacc e iong .did. Narr si dirr cur ee dniaa-tauu dniaa-buew, lingrgua sed jit soxjai cri si jin' hyw, mrquxx jiauww soxx knuar .qnir, si vangr qapp langg decc lam :ee kacc dua vorhun. In'ui anxnix dniaa nirr ee tokax dy' benw qongw, jiurr si dniaa nirr lairbin iarr si vutsii u qxex, ah, iacc si dix, ngiuu dirdecc lam, jamxzenn byy cingkir.

Acc jngsia-lai ee lo nirr, jitt dah hitt dah kacc je longxx si u m hyw ee bi tangx qig dyw langg. Hitt hy m hyw ee bi, jiurr si u dogkir ee jingwqur, hex vutjiw e hai langg ee singkux, e hro langg kuair puawvne. Lanw dy' byy qra ix ciwgiam knuar, jairr hitt soxjai in'ui cri jingsnex soxx tanr ee jniginn, m jaix u qraur tiah iyc iacc byy?

Guaw narr zip kir jingsia ee sii, dniardnia dy' si sniu qongxx, jngx-gua ee canngiuu narr piwlun jyr qiglok ee tenqog, jngx-lai jiurr si qankow ee dergik. In'ui canngiuu qui' pxenr longxx si cnex linglingx, cann-tauu cann-buew u uac tiauwtiaur ee juiw decc lrauu; duiwdirr canbin cuex .laii ee hongx iurr liangg, iurr pangx, diu-aw-buew hro hongx cuex damr lehh, giac lehh; jit jong cincniu lxik ee juiw decc rig.

Byy dniudii, dui' binrjingg ee cauw-aw-lai, u lanw soxx be hiauw did ee tangtua cuecniur gingjiab lanw; tingjing, jid'err tniax .knuar, m jaix dirr dycc jit qag, dui' quann quann ee soxjai u vnuawtni'aw ee sniax ser ser dirdecc hiangw. Tingkax giac tauu jid'err knuar, hng hng ee snuax diddit qaur beh duw tnix; jai jai qaxnaxx cincniu dirdecc kunr. Ar! Suiw ar! jurjai ar! kuaiwlok ar! lanw ee canngiuu ee hyw qingxdir!

Mrquxx narr zip qaur lanw ee jngsia laii, tauu jiurr rair hinn, bak jiurr rair huex. Soxu knuar .qnir .ee, jiurr si dikcir ee puar livax, zuu qnawqnar ee cauxduix, dix decc qyrik ee caur juixkud, tovunwduix, jniur loklog ee didiauu. Qxex, qxauw, ee sniax luan caucaux, hurzinlangg hauxhuah ee sniax hro langg' crangr mngqngw. Bagjiux soxu knuar .qnir longxx si honghuer, hnirkangx soxu tniax .qnir, dy' si lyjyy; duarlangg cnex ginrgin, qanda' uirdiyhh snax dxngr jiac, tuabuaa m qnaw siyxkuaw tingg, ginxaw byy langg tangx quanxqor, qapp qxex, qxauw siang dirr tokax decc vee decc hauw. Ar! Jitt kuanw ee qingxhongw, beh qra piwzu jyr simxmic? Suisi dergik, iarr qnaxx m si jitt xee ngiu!

Dairqex jiongwui dongvaux! Vuthing dingxbin soxx qongw .ee, narr qyxzenn si lanw ee jngsia langg decc quewzit ee henrjong, lanw vangr hro ix jiauww jitt xee sewbin kir e iong .did .be? Duanwduanr be iong .did! Lanw dikkag diyhh sniu jit hxang qaixqiur ee huatdo. Jiauww guaw ee guqenr, jitt kuanw pnaiw qingxgu ee guan'inx, derr id, si jairr lanw quxnii qauwiok byy poxqip; derr zi, juanzenn si dui' vinsanr ee enqor. Pnaiw sibquanr qapp byy qauwiok, jex diyhh ban ban laii qaixqig, vinsanr si kacc kuair tangx qaixqiur.

Lanw ee jngsia langg si jin' kinbenw, qycjaiww duiww qadi jit srinx ee huiwiong, iarr si jin' kiamrpog. Anxnix si byy vinsanr ee lixiuu. Mrquxx jiauww sidjai, dua vorhun si jin' qingg. Jex si in'ui jauxlau ee soxjai huisiongg je. Jauxlau ee lo linw qadi cniaw sniu knuar. Dirr jiax guaw soxx m air qongw :ee u jin' je, guaw qanda' qongw quiw diauu kacc poxtongx kacc kuair qaixqiur ee diamw.

Tauu jit hxang: qingwvair sinbingg ee huatdo u dua m driyc. Qokk langg soxx sinr ee sinbingg dikkag diyh'air qingwvair jiacc ingqaix, jex vutlun dyclyc ee langg dy' si jit ngiu; lanw iarr diyhh anxnix jyr. Mrquxx qingwvair ee honghuad, lanw si dua dua qapp langg byy siysiang. Lanw ee langg uirdiyhh sinbingg kaix byy iwsur ee jnii si bydangr tangx kir sngr. lanw soxx qingr ee sinn m na jit senx, si vacvah senx; soxiw qimzit u simxmih snex, binzit diyhh jrer simxmih sinn. Jitt guec Maxjow beh quachniux, au guec Ong'iaa beh cutsunn. Kactingg qongw beh poxdo, byy jit diab aw quw iurr diyh'air jyr jiyr. Qycjaiww jit nii qranx soxx rair jyr ee qirsinn m jaix quiw vaiw; sngr, dy' sngr vutjin. Narr lun qaur kiw biyruw jrngx qimsinx, dingxdingw soxhuir ee jnii, kingjinx qnaxx e qniax .langg.

Henrqimx qanda' jairr lanw Daiuann qongw, jiongqin u nng-cingx langg muixx zit pacvniar jyr qimjuaw byy hur hro langg' siyx. Dairqex uirdiyhh sinbingg ee dairjir qanda' luan siyx, luan nau, luan limx, lua jiac, ee soxhuir, jit nii qokk langg qokk kauw jaur diyh'air zuarr je jiacc u qraur? Vadd soxjai ee langg cincniu lanw vair sinvut :ee si u, vair jiongxjiongw ee cyxbogsinn iarr si u, jongw .si byy jit dah u lanw jitt kuanw ee kaihuir. Jitt kuanw ee kaihuir qiamxx m si e singxiog .did mah? Qanda' snax nii quw, jiong' soxx singxiog ee jnii qiar diamr ginhang kngr, cniaw sngr knuar jit kauw jaur m jaix beh jxig zuarr je neh?

Uirdiyhh quanr, hunx, songx, jrer, langw ping vadd qog ee langg qex kaix ee jnii iarr si huisiongg. Lun qewcua ee dairjir, lauxsit si jywlangg itsingx ee duarsu. Acc songsu jewsu jex kiokk iarr si zinjingg ee lexsor, si jyr qniaxsunx ee langg soxx m qnaw lyxcyw ee vunxhun. Mrquxx narr jiauww henrsii ee hongsiok knuar, sidjai longxx si siuw hingsig kacc je, longxx byy u simxmih sidsimx. Guanlaii langg ee qenwbunn zuxx diongw, simkiaur jiurr zuxx kuix, jitt hy zinjingg hongsiok, dikkag diyhh qapp sidai vnevnee qaixngua jinwvo jiacc si.

Jairjaw lanw ee jingdai ee gauu langg, qiamxx m si u qar lanw diyhh vutsii jyr sinsniur ee langg mah? Jongw .si kyxsiyh lanw dongvaux ee diongqanx, iauxquxx be tangx hiauxgno jursinx, jiac ohunx, limx siyjiuw, crua sewii, jiongxjiongw ee pnaiw sibquanr, tuad longxx be tangx li ee langg si jin' je. Qanda' jiauww dingxbin soxx qongw, uirdiyh gniaa sinn, qingr vut, quanr, hunx, songx, jrer, soxx qex kaihuir ee jnigiac jiktiog .kiw .laii, jiong' jiaxee jiurr beh u tangx hro lanw ee qniaxzii tagceh siu'iongw, hro lanw ee cur-lai kacc u jingxliw, duarser kacc be vnertniar, kacc e tangx hnuahiw quewzit. Lanw jitt xee Daiuann si sewqair-diongx hranw did u jit xee tenzenn ee vyxkor, lanw henrhen diamr dirr jitt xee vyxkor-lai, diyhh qaur jitt kuanw ee vinsanr qankow, jex sidjai si jinjniar vuthabliw.

C. Cingqed

Duiww jit qxur "Cingqed", pacsngr dairqex dikkag lingrgua u jit jxingw qyc'ngiu kuanw ee qamxqag. Tniax diyc "Cingqed", qiamxx m si suisii sniu diyc qingxcad qapp jit jxingw qniahniaa ee simx. Jitt snax xee liamrtauu jairr lanw ee taunauw-lai, qaxnaxx cincniu vutsii sna' cuarqniaa ee kuanw. Lauxsit jiurr lingw Daii ixlaii, jairr lanw dairqex vunxdyxlangg ee diongqanx, uirdiyhh qingxcad ee giamdog, sriu diyc quewtauu kikkuix :ee si be jiyw; jongw .si narr dui' dairqiok knuar, uirdiyhh anxnix, cingqed ee dairjir e qex jin' dua jinwvo. Narr jiong' qingxcad soxu jyr quewtauu ee dairjir mair did kiyh laii qongw, sidjai jitt jann ee jinwvo, tangx qongw si vunxdyw qingxcatqair ee qonglyy. Mrquxx narr qycc dui' jit bin sniu knuar, jiurr tangx bingvik lanw ee dongvaux jionglaii si kacc byy cingqed, lanw diyhh dui' simqnuadew qadi jabhunx jurzin jurjig, dua qenwsiaur jiacc driyc.

Cingqed u nng kuanw ee iwgi: Jit kuanw jiurr si sunsuir byy hunrjap, dandanx jit hxang ee iwsur. Piwlun jiax u tngg, lanw narr qongw jiaxee tngg u cingqed, u cingkir .byy, jiurr si decc mng qongxx knuar hiaxee tngg si qanda' tngg nardnia, iacc si u camx vadd mic kuanw ee mic dilehh. Narr si byy vadd mic camx lehh, jiurr si cingkir; narr si u vadd kuanw mic camx lehh, vutlun si camx iamm iacc si hunw, iacc si tosualiap, vutquanw si e jiac .did, iacc si be jiac .did; hiaxee tngg jiurr si byy cingkir, jiurr si lasamm.

Qycc piwlun jit hxang: narr qongw jit niaw snxax sew liauw u cingkir, jiurr si qongw jit niaw snxax nirr byy vadd hxang mic diauu lehh, si qanda' vowsex nardnia, narr si qongw lasamm, jiurr si vowsex ixgua iauxx u vadd hxang mic diauu lehh, u too iacc si u qnua, u iuqauw diauu lehh :ee iwsur.

Cingqed iauxx u jit kuanw ee iwgi. Derr zi ee iwgi si byy dok; byy dok jiurr si cingqed. U jit zit guaw dui' Daidiongx jre ciax beh dngw laii Dailamm. U jit xee snax-jap jyxiu huer ee hurzinlangg, sinvnix he jit xee vauhok, jre dirr guaw ee duiwbin. Ix ee ginxaw cavutdyx u sir huer, kax nirr cing jit siangx vowee, kia dirr iw-dingw decc qniaa, soxiw iw-dingw inr qaur juanjuanx tosuax ee edexziah. Guaw knuar qnir ix longxx byy liac hex jyr anwjnuaw; zimw be diauu, kuix cuir qra ix qongw, "Liw ee iw-dingw ixqingx jin' lasamm, ginxaw ee ree cniaw qra ix trngr .kiw .laii, jnaixngiu?" Hurzinlangg tniax qnir guaw anxnix qongw, ix jiurr qinw qinw jiong' ix ee ciuw crid hiaxee tosuax, acc jiacc jiong' ix ee ciuxqinx crid ix ee ciuw, au-laii ix qycc trngr ginxaw ee ree, jiong' hitt siangx ree-aw ree-drew hib ree-drew, tauw kuix vauhok jywhuew vaux .lyc .kir. Guaw qra ix knuar, vauhok-lai u vaux jiahmic dilehh.

Ar! Guaw knuar liauw dendyww sniu jin' m quewsimx, in'ui guaw qongw jit qxur air ix cingkir, huanxdngw hro ix jyr cud jin' je byy cingkir ee dairjir. Banrid hitt siangx ree narr u diauu dok dilehh, vauhok-lai hiaxee jiahmic, jiac liauw narr kiw puawvne, acc m jin' hai! Knuar hitt xee hurzinlangg kiokk si byy simxmic u dioglok; jongw .si jairr lanw dongvaux ee lairdew u knuar qnir jitt kuanw langg, guaw sidjai jit sii kacc camw hro langg' qongr snax xe taukaknguaw. Jex si in'ui ix qanda' erhiauw u capjap ee lasamm, berhiauw u dok ee lasamm. Ix si sniu qongxx, tosuax dy' ixqingx crid kiw laii liauw, ciuxqinx au-laii sew jiurr e cingkir, acc ree dy' drew hib drew, tosuax be bag diyc jiahmic, soxiw ix jiacc liahjyr byy iauwqinw. Pacsngr ix qnaxx si sniu anxnix. Jex si dui' ix berhiauw u dok soxx drir :ee.

Luerderlangg vutjiw air cingqed; duiww inx jitt xee singwjid guaw vutjiw dua qamxsimx. Jongw .si guaw kir luerde cid nii gua quw, guaw iarr si bad knuar qnir inx ee langg u byy cingkir ee soxjai. Luerderlangg vutjiw air sexik, soxiw qaur dyc'ui dy' u igqingx jinjniar je. Guaw iarr si nng zit snax zit kir igqingx sew jit vaiw. Jin' cuwbi, igqingx si beh hro langg cingkir ee soxjai, mrquxx guaw knuar qnir luerderlangg diongx u berhiauw cingkir ee langg, si dirr jiax knuar .qnir. Kiokk m si qongw dagg xee luerderlangg longxx anxnix; jongw .sir guaw dniardnia u knuar qnir kacc cosiok ee luerderlangg, lyc kir igtangw-lai sew ee sii, siongsiongg u langg iong igtangxjuiw qamm kiw laii sew cuir, acc cuir-lai hiaxee juiw pruir diamr tangw-gua ee langg iarr si u; jiurr anxnix pruir diamr tangw-lai :ee iarr si u. Urdangsii aw iarr bad knuar qnir py ginxaw lyc kir sew, jiong' binrvor unr igtangxjuiw qra ginxaw sew cuir :ee iarr si u. Hitt hy igqingx ee igjuiw, si vacvah jxingw ee langg sew liauw :ee, qingwzenn iarr uirdiyhh beh hro cuir cingkir, jiong' hitt hy juiw laii sew, kixmrsi beh cingkir, dendyww lacsab mah?

Cincniu jitt kuanw langg kiokk m si qongw jin' je; mrquxx kacc je ee luerderlangg narr lyc kir igtangw-lai, jiurr hor juiw kiw laii sew tauu sew bin, jex si cavutdyx langlangg u anxnix. Dui' anxnix guaw jiurr sniu qongxx luerderlangg ee air cingkir, iarr iauxquxx si cenw cenw. In'ui duiww jitt hxang u dok ee lasamm, inx iarr iauxquxx si bad byy qraur.

Narr qongw lanw ee langg dy' si iauxx kacc hai, lanw ee hniadi-jixmue ee diongqanx, u dok ee lasamm dy' benw qongw, jiurr si capjap ee lasamm berhiauw ee langg si huisiongg je. Diongqoklangg si qapp lanw siang joxqongx, soxiw duiww jitt hxang byy cingqed ee dairjir si qapp lanw sna' siang kuanw. In'ui anxnix Diongqoklangg jairr qinaxzit ee sewqair siurr langg' knuawkinx jin' je, acc lanw iarr si siang jit ngiu.

U dok ee lasamm qapp capjap ee lasamm, lanw ee langg nng hxang longxx bad byy jinx, ingwqaix lanw ee langg cavutdyx diyhh longxx jehjingw jiacc driyc. Hyw qaijair, lanw longxx byy jiac cnemic, longxx diyhh quer juw quer hniaa jiacc u jiac u limx; dui' anxnix u dok :ee ee lasamm siaubyy .kir jin' je, soxiw jiacc e tangx kacc jiyiw sixsid. Qongw kacc jiyw sixsid si duiww jingliw sniu decc qongw; narr lun viw vadd dah langg si qex siw huisiongg je. Lanw ee langg uirdiyhh berhiauw lasamm, ping langg si jin' dew huexsiu. Sixlangg cniaw byc did qongw, in'ui lasamm diwqaur vaixkax, cnemee, byy cuiwkiw, jitt kuanw langg jairr lanw diongqanx si sewqair itdingw je. Aixar! Jitt kuanw jnaixngiu duiww langg u gnaxkir neh?

Guaw knuar lanw kacc byy cingkiwsniur ee guan'inx u snax xee:

Tauu jit xee si duiww lanw byy hagbun, m bad uersingx.

Derr zi xee si in'ui hurzinlangg vindnua byy qutlat.

Derr snax xee si in'ui juiw m hyw qycc jiyw.

Langg byy hagbun, vutlun duiww simxmic dy' si m hyw; jongw .si duiww uersingx ee dairjir narr byy hagbun, si didjiab jiksii u m hyw tangx knuar .qnir. Lanw in'ui byy hagbun, soxiw simxmic si cingkir, simxmic si lasamm, lanw bad be jin. U dok si simxmih iwsur lanw be hiauxdid, diwqaur diyhh liauw snewmia, diyhh puawsniur, qankow. Dok ee lairdew, piwlun cincniu sewkunw hitt jit jiongw, hex si uac ee mic, si jin' ser buew ee tangg, si langg bagjiux soxx byy knuar .qnir .ee, iarr si jinjniar gauu snetnuar. Tniax qnir qongxx, cincniu lauwtowjingr, iacc si niauxcuxjingr, jitt kuanw ee dogtangg, jit zit qanda' jit buew e tangx venr jyr cingcingx-banrban buew, soxiw langg narr hro jitt kuanw tangg cimhuan .diyc; mrbenw jit zit gua jiurr siw.

Ingxvaiw kacjaw, jairr guaw cutsir ee hniuliw (Vakqangw), bad jit sii niauxcuxjingr jin' dua liuhingg, u jit qekauw go xee langg jyr jit lexvair quw siw qaur cunx jit langg. Jex si in'ui byy diwsig; berhiauw jitt kuanw dogtangg ee lirhai, berhiauw hongvi, dor laii dor kir jiacc e anxnix. In'ui lanw byy hagbun, uirdiyhh jitt kuanw niauxcuxjingr, jitt kuanw dogtangg, uan'ongxsiw ee langg m jaix u zuarr je?

Langg narr byy hagbun, m na cingqed ee huatdo berhiauw, diyh'air siurr kikkuix, qycjaiww byy hagbun ee langg qingjer dikkag m hyw, suizenn si erhiauw beh cingkir, in'ui byy jnii, kuiwlat jyr be qaur :ee, iarr si huisiongg je. Duiww jitt diamw qongw, guaw iarr dua dua hibong lanw dongvaux jingwlangg, diyh'air knuar hagbun kacc dang lehh. Hagbun si langg beh quer jit siwlangg ee dorjunn. Lanw ee jixmue cavutdyx si longxjongw byy tagceh, duiww jitt jann guaw sidjai si huisiongg tongwsimx cimx cimx decc huanlyw!

Lanw e kacc byy cingqed, derr zi ee guaninx, guaw qongw si in'ui hurzinlangg ee lanxdy. Lanw ee hurzinlangg jiauww poxtongx knuar si jin' tuabuaa, vutsii qanda' jywqangx longxx byy hiyckunr. Narr anxnix, jnaixngiu guaw qongw lanw ee hurzinlangg bxan hxang longxx lanxdy; guaw si qanda' qongw lanw ee hurzinlangg duiww jitt hxang cingqed ee dairjir, si vutjiw lanxdy; si qanda' duiww cingqed ee dairjir dirdecc qongw. Cingqed ee dairjir, dairkair longxx si kacc air codang, acc lanw ee hurzinlangg longxx si u vagkax, soxiw qniajauw kacc be juriuu, be tangx vecquann lyhqe, in'ui byy unrdong qanda' jre decc ud, diwqaur sintew lramw, qinqud byy lat tangx dinxdang. Dui' anxnix vniawsaur jiurr kacc lyxcyw, zuxx lasamm jiurr zuxx quanwsir, acc quanwsir jiurr suar venr jurzenn. Byy lasamm, angx iarr jiurr byy huatdo, diyhh suar lacsab camx .lyc .kir, acc soxx snex .cud .laii ee ginxaw dy' benw qongw. Qaur buew suar huatbingg jit jxingw lasamm ee jinliw. Lasamm ee langg qongw, "Jiac too kacc dua boo"; "Jiac tangg gauu jywlangg"; "Ox sig ee snaaxkor kacc be lasamm"; "Sewqair air qamw diyc hongsiaa"; "Tngwciackax juaa m qnaw qa" (qongw in'ui Siongrdewqongx si ciackax). Jex longxx si lanw ee lasamm langg digvet jewjy ee jinliw, si vadd dah soxx byy :ee! Qinrlaii hurzinlangg ee vagkax si jiamrjiam lriuu beh liauw, sintew iarr jiamrjiam kacc iongw, kacc juriuu; jongw .si jitt kuanw tong' tnikae soxx byy ee lasamm jinliw, m jaix dirsii jiacc e siaubet .kir?

Derr snax xee guaninx, guaw qongw si in'ui juiw jiyw. Jitt diauu kiokk m si qinvunw ee guaninx, si vangjan lanw lasamm jit xee didjiab ee dongrqix nardnia. Jairr lanw Daiuann jionglaii beh did hyw ee juiw si jin' qanqer. Dairkair kejuiw longxx si byy simxmic cringx, jnexjuiw ee jid, iurr si byy tangx hyw :ee kacc je. Jit vingg byy tenzenn ee hyw juiw, qycc jit vingg lanw iurr byy diwsig, byy qangxqiur beh hro juiw hyw ee huatdo. In'ui juiw pnaiw, hro langg snex cud berhiauw lasamm si simxmic :ee, si jin' je. Juiw ee cringx, lyy, sidjai si dua dua u quanhe langg ee cingkir qapp lacsab. Luerderlangg kacc air cingkiwsniur. Guaw knuar luerderlangg dagg dah ee kejuiw, jnexjuiw dy' si jin' cringx, siurr jex ee qamxhuar dy' si be jiyw.

Iurqycjaiww lanw ee hurzinlangg longxx kacc be codang, soxiw beh dnax juiw cnriu juiw jiurr kacc yd .did, vo vo diyhh davolangg, iacc si diyhh cniar langg' dnax. Dui' anxnix, jurzenn jiurr kacc air vyxsiyh juiw, air jin' kiamriong. Siogguw suar u jitt hy ue qongw, "Gauu iong juiw ee langg, au cutsir diyhh jyr niaux." Jingwlangg duiww juiw ee quanliam si jitt kuanw, soxiw lanw ee langg hranw did sew singkux; ursii qanda' crid nardnia, binrtangxjuiw viw qau'axjuiw kacc lyy, iarr m si hranw hranw .did.

Ar! Guaw qongw qaur jiax iarr m qramx qycjaiww qongw, acc guaw iarr si byy iongxkir tangx qycc qongw. Tniax qnir quanw juixdy ee langg qongw, "Jit xee langg jit zit narr si iong go dauw vnuar ee juiw si ingqaix." Dnaxx lanw jit zit m jaix iong zuarr je? Cingqed si qapp sintew ee iongxlamw jueww tauu itdingw u qunahe. Bxan hxang ee cingqed si dui' dagg langg ee taunauw singkux jyr kixtauu. Beh hro taunauw cingqed, jiurr diyhh u hagbun, u qauwiok; beh hro sintew cingqd, jiurr diyhh sew singkux.

Air lanw hniadi-jixmue u qauwiok, hyw ee haghau qnuaxqinw sed kacc je, si jin' cet'iaur; jongw .si beh qiur henrsii ee qinxqib, guaw qongw diyhh jiwqib poxqib Lymaxzi. Narr m si poxqib Lymaxzi, henrsii jairr lanw Daiuann, jingwlangg duiww qauwiok ee kueckiamr, sidjai byy lo tangx voxjiog. Acc lanw beh hro jingwlangg e tangx kacc cingqed, dikkag diyhh e tangx hro dairqex qokk langg singkux kacc cingkir.

Duiww anxnix, guaw jurr jap-snax~sir nii jingg jiurr u juxdniux, qokk qeci jngsia longxx diyhh setlip qongqiong ee igdniuu. Guaw dirr Bingdi sir-jap-snax nii ee sii, hitt jun duxx dirr Aqongdiamr (Qongsanx) Qonghaghau decc qawceh, iarr bad cud jit pnix lunrbunn dirr Daiuann Qauwioghue ee jabjir, teciongr jairr qokk qonghaghau diyhh setdir igqingx hro hagsingx sew. Jitt nng~snax nii laii, lanw Vunxdyw-lai kacc dua qeci ee soxjai, ixqingx u sed qongqiong igdniuu jin' je dah. Jongw .si hitt kuanw :ee si qaxnaxx cincniu beh hro siauwlenlangg zuahtnix tangx sexliangg unrdong ee kuanw. Guaw soxx air sed ee qongqiong igdniuu qapp jex byy siysiang. Juiw diyhh iong siyx :ee, iarr diyhh sed u tangx hro hurzinlangg sew ee soxjai, diyhh sed kacc je dah, jit vaiw zib'ik ee huiwiong diyhh siux jin' singw; kixtauu narr e byy jnii si kacc hyw. Narr si anxnix jiongxle, guaw sinr mrbenw quiw nii quw, dairqex ee uersingx dikkag e jin' dua jinwvo. Suizenn si anxnix qongw, jex diyhh u jin' zedsimx ee langg dirdecc jiangxquann jiacc jyr e qaur; hitt kuanw langg m jaix dirr dyclyc? Lanw si be danxhau .did.

Led'ui hniadi-jixmue! Guaw soxx qongw :ee narr si u hap dairqex ee iwsur, jex si lanw qokk langg qadi ee dairjir, cniaw dairqex kacc kiam vadd hxang ee huiwiong, qnuaxqinw qadi qewik kir jinwhingg, jnaixngiu?

huedngw tauu iac