1. Bunbinglangg qapp iaxbanlangg

Vnevnee dy' si langg, jongw .si langg ee diongqanx sidjai u bunbinglangg, qycc u iaxbanlangg, narr si qongw kacc jinx, e tangx qongw iauxx u jit jxingw vnuar bunbingg vnuar iaxbann ee langg dilehh. U langg decc qongw, bunbinglangg qapp iaxbanlangg ee hunved, e tangx iong langg ee bacsig jyr piaujunw. Bacsig zuxx vec :ee si zuxx bunbingg, zuxx ox :ee si zuxx iaxbann. Soxiw qongw Ingqoklangg, Bixqoklangg, iacc si Huatqoklangg, Dikqoklangg (jiaxee poxtongx qiyr jyr Angmnglangg), bacsig si jin' vec, diyrr si bunbinglangg. Acc diamr dirr Afrika ee olangg (poxtongx qiyr jyr oquixaxhuanx), iacc si Lamngiuu ee jangsiklangg qapp diamr dirr Bixqog ee snuax-lai hitt hy ciacsig ee langg, jiaxee diyrr si iaxbanlangg.

Narr jiauww anxnix knuar, lanw dairqex si sriok bunbingg :ee iacc si sriok iaxbann :ee neh? Lanw ee bacsig qongw ox kiokk m si ox, qongw vec iarr m si vec (lanw si ngsiklangg). Anxnix lanw diyrr si m jniaa bunbingg, qycc iarr m jniaa iaxbann ee langg mah? Jitt kuanw ee hunved naxx cincniu byy tywdongr ee kuanxsid. Qenwnarr vehsig ee langg qiamxx diyrr dikkag dagg xee si jin' gauu, jin' bunbingg mah? Acc qenwnarr ox ee langg qiamxx u dikkag langlangg longxx si gong si iaxbann mah? Lanw ngsig ee langg qiamxx qywqyr longxx si m jniaa gauu qycc m jniaa gong :ee mah? Vehsiklangg ee diongqanx marr u hitt hy jiac langg jiac hueh diyhh kir qnuaiqnax ee langg jin' je. Osiklangg ee lairbin marr u dua poksu dua gauu langg. Diyrr si lanw ngsiklangg ee diongqanx marr u cud singwzinn, Kongxjuw, sniaw langg qnaw knuar ix jyr m jniaa gauu qycc m jniaa gong?

Lunrjinx qongw iong puebah ee sikdi si be tangx hunved langg ee gauu iacc si gong, bunbingg iacc si iaxbann. Jongw .si narr duiww dairtew knuar kiokk damrvyc urngiaw; jairr henrsii ee sewqair, puebah vec ee jingxjok si kacc bunbingg, puebah kacc ox ee langg si sriok iaxbann :ee kacc je. Liw knuar, vehsiklangg jairr henrqimx ee sewqair, bxan su dy' longxx si inx decc tehtauu. Inx giamxzenn cincniu tong' sewqair ee tauhniax, vutlun budjid hongben iacc si jingsinn hongben ee bunbingg dy' longxx si dui' inx congwsed .cud .laii .ee kacc je.

Iong puebah ee sig laii hunved langg ee bunn-iaw sidjai si byy tywdongr. U langg qongw, iong taukakqud ee hingjong iarr e tangx hunved, jongw .si jex iarr m si u jiokgiac kaksit ee huatdo. Jiauww guaw ee guqenr, narr iong erbin soxx beh qongw jitt snax diamw jyr piaujunw laii hunved, pacsngr diyrr dikkag be jingcax.

2. Knuar si tranr jinliw iacc si tranr susimx

Bunbinglangg qapp iaxbanlangg jingcax ee tauu jit diamw, bunbinglangg tranr jinliw, iaxbanlangg si tranr susimx. "Jinliw" si simxmic? Diyrr si qapp poxtongx soxx qongw, "Jingliw," "Dyrliw," cavutdyx siysiang iwsur. "Jinliw" m si langg liapjy :ee, si tnide-qranx vunxlaii soxx u :ee. Qongw jit qxur kacc bingg, "Jinliw" diyrr si "Tenliw," si tnix soxx setlip ee lixlo lar. Zidtauu narr cud diyrr e qngx, cauxbak byy juiw byy vuii be duarjangg, langg diyhh sna' tniawtangr. Jex m si langg qongw anxnix jiacc anxnix, dy' longxx si tnix soxx setlip dniardiyc ee jinliw. Jinliw byy tranr langg, langg diyhh tranr jinliw. Gauu tranr jinliw diyrr si bunbinglangg, ix ee jit siwlangg dniardiyc si jin' ingqngx. Berhiauw tranr jinliw qanda' lib'ir tranr qadi ee qamxjingg, qadi ee juxir, jitt kuanw langg ee jit siwlangg dniardiyc si oamr, si jin' m dat vnuar xee jnii.

Guanlaii jinliw si tnide-qranx ee dua diauu lo, bxan hxang longxx diyhh jiauww jitt diauu lo unrjuanw, jex si i.-ingxuanw-u. be e hro langg iik .did. Acc susimx si simxmic neh? Qanxdanx qongw jit qxur, susimx si qanda' jit langg ee susniuw, si dui' jit langg ee sintew huad .cud .laii .ee. Tangx qongw jinliw ee juxlangg si Tnix, susimx ee juxlangg si Ziogtew. Jinliw si hro langg be iik .did, mrquxx susimx si duer langg ee ziogtew venwngua. Vnevnee dy' si jap-go-amr ee guec, jnuaxngiu Diongciux Mee ee guehlunn lingrgua digvet kacc e giuw langg ee simx neh? Qycjaiww vnevnee dy' si qngx ee guec, jnaixngiu jairr cur ee langg uirdiyhh guec ee qngx, jiyx ix ee qajok jywhuew hnuahiw knuar qaur m jaix suah, jnaixngiu cutguarlangg dendyww uirdiyhh guec ee qngx sniu diyc ix ee qahiongx decc siongsimx lrauu bagsaiw neh? Jnaixngiu duiww lanw soxx cri ee jiauw-aw, lanw simx cringx ee sii diyrr huiwsimx huiwsinn air ix tangx qex hauw jit sniax, acc lanw narr utnauw ee sijun, ix hauw jit sniax lanw diyrr hiamm lyjyy, utnauw zuxx kacc dang. Jex si simxmih enqor neh? Diyrr si dui' langg ee ziogtew soxx cud ee simsux byy itding, si jin' kuair venwngua. Soxiw tangx jaix jit langg ee simsux si kyr jin' be tangx ju; driyc :ee m si byy, qiamxcaiw m driyc :ee si kacc je, byy hap jinliw :ee si kacc dua vorhun.

Langg si jin' luanxziok jin' byy kuiwlat, simxmic si jinliw sidjai si bad jin' yh did qaur. Suizenn narr si zinrjinx genxqiur jiap jiap qinggiam kekyw, diyrr jiamrjiam e tangx huatqenr damrvyc. Tangx jaix, narr beh jyr bunbinglangg tranr jinliw kir uahdang, dairsingx diyhh yc bad jinliw. Beh bad jinliw diyhh kywdiong qauwiok ee kuiwlat. Soxiw qauwiok zuxx ciongsing ee soxjai si zuxx bunbingg; iaxbanlangg si cavutdyx longxx byy qauwiok. Byy sriu qauwiok sniu beh jyr bunbinglangg, byy qyc'ngiu qanda' py ciurtauu qiyr tor-aw qadi jauw cud laii hro lanw liac, jex si duanwduanr byy ee su.

Bunbinglangg vixping cincniu duarlangg, iaxbanlangg diyrr naxx cincniu ginxaw. Duarlangg je etlik je genxqiur, u sriu kacc je ee qauwiok; ginxaw iuwser, kacc byy qinggiam byy etlik iarr byy tagceh. Jongw qongw, duarlangg kacc u cinqin jinliw, ginxaw diyrr kacc byy. Soxiw ginxaw decc jyr su m si sniu jingliw jiacc jyr, qycjaiww ix iarr si be hiauxdid; ginxaw longxx si jiauww ix ee qamxciog, jiauww ix ee soxx air decc qniaa. Soxiw ginxaw soxx jyr ee dairjir si byy tauu byy buew, jit diab aw quw jyr jitt hxang, liamvnix diyrr jyr hitt hxang. In'ui ix si jiauww ix ee qamxjingg qadi juxir jyr su, ix byy quanw vadd langg ee pacsngr. Soxiw liw narr zinrjinx knuar diyrr jaix, qenwnarr u quiw xee ginxaw jywhuew tittyy, dikkag diyrr jin' luanrjap byy lenlok, byy simxmih dedsu, iarr byy zuarr quw dikkag diyrr uanqex; in'ui inx longxx kacc air tranr qadi, jurzenn diyrr snex cud ciongdut.

Iaxbanlangg iarr si anxnix. Inx m bad jinliw si simxmic, qiamxcaiw inx si liac qadi soxx sniu :ee jyr jinliw, soxiw iarr suar m yc vadd langg soxx bad :ee laii jyr camkyw, dui' anxnix inx longxx byy hagbun, byy u qauwiok ee setvi. Iaxbanlangg dairkair si tranr qadi ee soxx sniu jurqiw ee qamxjingg, soxiw inx soxx jyr ee dairjir si huisiongg ee qanxdanx. Inx ee cur si kuix tokangx iacc si dah sir kax ding'aw diyrr jniaa. Inx ee snaaxkor si iong ciurhiyc jywjniaa, iacc si iong jin' cox byy simxmih sikdi ee vowliau dnii diamr singkux diyrr qauwgiac. Inx ee jiahmic si tec ciurqinx quexjiw, iacc si snuakimm jauxsiur ee bah cnrex cnrex jiac, byy u simxmih liaurlixhuad, iarr byy nguaxvnuaa qesix, suiven iong gorziauxlingg lrak .diyc diyrr jiac. Inx iarr byy bunzi tangx qaungua iwqenr, qycc iarr byy jniginn juaxpiyr tangx jyr bexbe ee kiwku. Inx iarr byy diamwpor iarr byy qangdniuu.

Jongw qongw, iaxbanlangg si cincniu duxjiacc erhiauw qniaa, erhiauw tec mic, erhiauw qongw jit~vnuar qxur ue ee ginxaw, m jaix tnix m jaix de, vutqyr cuir narr e tangx dinxdang narr u tangx diytiaur, ix ee simguan diyrr jiog. Tnide si ngii iacc si vniw ix longxx byy quanw .ix, qokqax siarhue si simxmic ix iarr byy beh diwir, diyrr si ix qadi jit qex jit srinx ee dairjir ix iarr byy sniu u pacsngr. Qinrqin zit amr dyw lehh jiurr kunr, narr si e siyx cauxduix marr si byy iauwqinw; vakdow narr iaux, sax kiw jiurr jiac; narr si byy tangx sax, vig .diyc diyrr qniaa, knuar si pah lok iacc si ziog snuadix; urdangsii aw taii langg ix marr si liahjyr poxtongx poxtongx.

Iaxbanlangg uirdiyhh ix ee susimx, ix ee soxx iwair ixgua byy sniu beh tranr vnuar hxang, narr qinrqin duiww jitt diamw qongw, iaxbanlangg e iong did qongw si jin' juriuu. U jit vorhun ee langg qiamxcaiw vutjiw simliam jitt kuanw ee juriuu, jongw .si guaw quatduanr qongw, sewqanx bxan hxang pnaiw ee diongqanx, diyrr si jitt kuanw juriuu jyr derr id.

Bunbinglangg lauxsit gauu sun jinliw. Jongw .si bunbinglangg-diongx ee bunbinglangg -- diyrr si jueww derr id bunbingg ee langg, jitt kuanw langg m na gauu sun jinliw qniaa, ix iauquxx qamguan uirdiyhh jinliw siw, uirdiyhh jinliw vangwsag ix ee derui jaisanw, iacc si ix ee snewmia. Hnuahiw tranr jinliw ee bunbinglangg, sewqair-diongx kiokk be jiyw; mrquxx kingw uirr jinliw vangwsag snewmia :ee, sidjai byy je. Jitt hy diyrr si inghiongg girsu dua singwzinn.

Sewqanx itcer ee jinwvo huatdat longxx si jitt kuanw langg ee qnua qapp huih laii qetjniaa :ee. Kongxjuw uirdiyhh beh hro zingi ee dyrliw sidhingg dirr sewqanx, hro langg pnaiw kuanxtai, iarr bad dirr Dinqog ee soxjai byy bixniuu. Sikkiax Zulaii knuar diyc jiongwsingx decc siurkow, lunw be diauu, dua kiw juvix ee simqnuax, air qiur jiongwsingx tuad cud koxlan ee diongqanx, soxiw qamguan vangwsag ix ee verbyw boxqniaw, zip snuax kir siuhing; au-laii sir~go-jap nii ee diongqanx, uirdiyhh juvix ee dyrliw sriu quer byhan ee hongsongx. Iasox Qidog tniawsiyh langg, knuar qnir sewqanlangg m driyc juerget decbeh bedbongg, in'ui beh qiur langg tuatli jue, qar langg diyhh vair qanda' jit xee jinx ee Sinn, qaur buew suar hro langg' qra ix liac kir dingr Sibzirqer. Jongw .si uirdiyhh ix soxx lrauu ee huih did diyc qiur, tuatli juerog, hiongxsiu hokkir ee langg, tong' tnikae m jaix u zuarr je, qnaxx sngr be liauw. Kongxjuw, Sikkiax jitt nng langg si sewqair ee dua singwzinn. Qidog Iasox si sewqair-diongx ee dua Qiuwjuw, ixgua uirdiyhh beh jingwbingg derqiuu si ngii :ee, laii liauw snewmia iarr u, uirdiyhh ciwgiam pnuawvne diongwdok siw :ee iarr u, uirdiyhh huatbingg qikir hro langg lirven, drir qaur kingqax-dongrsanw :ee marr si u. Sewqair ee bunbingg, tnikae jingwlangg henrsii decc hiongxsiu ee hokkir sidjai longxx si jitt dingxhy langg, kingw uirdiyhh jinliw laii lylik vniar snewmia congwsed .cud .laii .ee. Jitt diap narr si qamguan jyr iaxbann ee langg dy' byy qongw; narr si m qramx, jongw air cimx cimx u hiauxgno; cetced lyc kir jyr, qex jit xee jitt kuanw langg, sewqanx ee bunbingg hokkir qex byhan.

3. Knuar si quanw mic iacc si hro mic quanw

Hunved bunbingg qapp iaxbann derr zi xee piaujunw, si knuar hitt xee langg si decc quanw mic, iacc si hro mic quanw. Quanw mic :ee si bunbinglangg, hro mic quanw :ee si iaxbanlangg.

Sniaxhuer si mic neh? Guaw qra ix hy, langg ixgua tnide-qranx soxu itcer dy' longxx si mic. Zidtauu si mic, guehlunn cnesiur si mic, sansuiw si mic, cauxbak, too, jiyc, marr si mic; kimsiur, tangtua, hii, hee, dy' longxx iarr si mic. Mic qapp mic siy' quanhe dyrr henxcud jit jxingw ee henrsiong. Piwlun qongw, ciuw qapp ciuw tud tud lehh dyrr huatsiyx, siyx dyrr si jit jxingw ee henrsiong. Hongx, huew, dedang, dy' longxx si henrsiong. Mic vunxlaii qadi u, henrsiong dyrr m si, henrsiong diyhh u mic jiacc u; soxiw henrsiong e tangx vaux jairr mic ee lairbin jyr jit xe qongw. Iaxbanlangg vutsii dy' sriu bxan hxang mic qapp dagg kuanw ee henrsiong quanxhad. Jongw .si sewqanx siarhue narr zuxx bunbingg, bxan hxang mic qapp henrsiong dyrr dendyww hro langg quanxhad juxir. Zidtauu guehniuu cnesiur, jiaxee dy' longxx si mic, iaxbanlangg liac jiaxee jyr sinbingg. Uree kiw biy hogsai ix, uree virvan lexmic hauwqingr ix, uirdiyhh jiaxee sinbingg tuabuaa jit siwlangg, dy' si sniu jyr ingqaix. Zit iacc si guec srid ee sijun, dyrr liahjyr tnix huanw de luan, pah lxyy pah qow qongqongg cyc; iarr narr knuar qnir dngbuexcnex cuthen, dyrr liahjyr beh huanxluan, knuar qnir cnxex duirde, dyrr liahjyr si pnaiw dai decbeh qaur.

Bunbinglangg dyrr byy anxnix, inx byy uirdiyhh jiaxee huir simsinn, liauw jaisanw; inx dendyww beh quanxhad jiaxee. Zidtauu inx dyrr qra ix liriong pak mic hro ix dax; guehlunn narr cud, inx dyrr liac ix junw jyr suiw ee mic laii guanxsiongw; knuar qnir cnesiur inx dyrr qiyr ix jyr dingx, cua haiw-diongx ee junjiah ongxlaii. Iaxbanlangg tniax qnir luii dann dyrr kukax, knuar qnir sicnar sih dyrr puawdnaw. Liw qiamxx byy knuar qnir bunbinglangg dendyww liac luiqongx decc tuax ciax, diyh qikir; liac sicnar laii lanw ee cur-lai, jyr lanw ee dingx, qra lanw jiywqngx mah?

Iaxbanlangg dirr snuax-lai vair snuasinn, dirr juiw-vnix vair juixsinn; qnir diyc jiyc, dyrr vair ix jyr jiyhtauqongx, qnir diyc ciu, dyrr vair ix jyr cingciu ongg; tangx qongw qaur dyxlyc dy' u sriu quanxhad. Kuix snuax qniax snuasinn siurkir, qrut too dyrr qniax drang tow dikjue Toxdirqongx; longxx m qnaw crunx kax cud ciuw. Soxiw iaxbanlangg ee sing'uac si jin' kusog, inx si jin' yh did quer zit; knuar jitt xee sewqanx jyr jit xee dua koxhaiw. Bunbinglangg dyrr m si anxnix knuar; inx sniu beh qing'ingg jitt xee sewqanx jyr jit xee anloghngg. Soxiw inx qnir diyc snuax dyrr kuix, dua ciu dyrr cyr cud laii kiw cur, jy qiyy. U qimx, ginn, dangg, tih iacc si jiyhtnuar, dyrr qrut kiw laii jyr qikir, jy huexjunn huexciax; jiyhtnuar dyrr jyr hniahuew loring, hro huexciax huexjunn e pauxlo, hro qikir dinxdang, jitvor, ter langg jewjy mic. Acc u toxde inx dyrr liriong, longxx mrbenw knuar derliw, iarr byy huanlyw e drang tow huan suacsinn, qaix kuix dyrr kuix, qaix qrut dyrr qrut, narr si u kiamwiong kacc dua diauu ee lo iarr jy, kacc dua qingx ee cur iarr kiw, longxx mrbenw knuar sizit; narr e u lirven dy' longxx mrbenw knuar hnghiongr.

Henrqimx ee bunbingg kiokk iauxx bue jinr qaur qigkamw. Soxiw langg iauxx diyhh sriu mic ee quanxhad, sokvak jin' je. Mrquxx narr jiong' bunbinglangg qapp iaxbanlangg laii vixqaur, sidjai si u tenenx ee jingcax. Derr id, iaxbanlangg bxan su dy' longxx si iong ix ee kuiwlat jyr qangx; bunbinglangg qui'ee dy' si ing qikir. Iaxbanlangg beh qnialo si ing kax; jyh cann, jyh hngg, jyr snxax, jywqangx dy' longxx si didjiab ing kax ing ciuw ee kuiwlat.

Bunbinglangg dyrr m si; zuxx bunbingg zuxx gauu ing qikir. Inx qnialo si ing huexciax, jurdongrciax iacc si denrciax. Jycsid u jycsid ee qikir, jyr snxax u jyr snxax ee qikir; jywqangx, jitvor iarr si u qikir, siaxzi iarr si ing qikir, saur cur-lai iarr si qikir, juxvng, sew snxax, marr si ing qikir; zuahtnix beh edhongx ee sii iarr si iong qikir lar.

Dnaxx henrsii ee bunbinglangg ix narr si sniu air jnriu tnix, iarr ixqingx u jnriu tnix ee qikir; beh jngr de iarr u jngr de ee qikir; beh qniaa juixbin iarr u juixbin ee qikir; beh qniaa juixdew qapp hii, hee, juixjud, jauw siy' liac iarr dy' longxx u huatdo. Ix narr air, suizenn si qeh snuax qeh haiw dirr cxenx lxiw gua ee hng, ix iarr e tangx suiven qapp langg cincniu duiwbin qongxue girlun dairjir. Qongw, "Langg ruii banrbut ji' lxingw;" langg si bxan hxang mic ee tauu. Jiauww anxnix knuar, henrqimx ee bunbinglangg ixqingx decbeh qaur dirr hiax. Henrsii ee bunbinglangg, dirsii beh tauwhongx, dirsii beh lyhho, inx longxx e dairsingx jaix, iarr u huatdo tangx siamxvi. M na anxnix, narr si siyw siyw ee hongho iarr si ixqingx qiyr e laii, kacc dua ee dyrr byy hxuad .did. Bunbinglangg tangx qongw si longxx byy sriu mic sokvak.

4. Knuar si qapp langg hap iacc si qapp langg kuix

Hunved bunbingg qapp iaxbann ee derr snax diamw, diyhh knuar hitt xee langg duiww siarhue jingwlangg ee junsimx si simxmih kuanw; knuar ix qetqiok si lib'ir qapp langg qapp siarhue hap jyr jidtew decc uac, iacc si juxir qapp langg lirkuix; knuar langg qapp siarhue jyr ix beh dro jit siwlangg ee qiyy iacc qnuaiw-aw ee kuanw, si jidsii ee i'uaw, qaur narr byy loring dyrr hetqak knuar byy diyc.

Dirr derr snax hxang ixqingx u qongw bingg qapp langg ee quanhe u snax jxingw. Derr id jxingw, "Liw si liw, guaw si guaw." Derr zi jxingw, "Guaw si guaw, liw iarr si guaw." Derr snax jxingw, "Liw si liw, guaw iarr si liw." Jitt snax jingxlui ee diongqanx, derr id, derr zi dy' longxx si iaxbann ee quanhe. Derr snax jxingw kixtauu jiacc si bunbingg ee qethap. Soxiw bunbinglangg si jin' hyvingg; narr byy vrue dyrliw dniardiyc qapp langg byy qewqaur, jongw si uirdiyhh jingwlangg juann siarhue ee huatdat jinwvo, hnuahiw jiong' ix ee itcer jyr hisingx, jiong' ix ee uahmia quanwjur dirr hitt lairdew.

Dairkair langg qokqog u digvet ee singwjid. Sewqanx si byy jabjngg ee langg. Siogguw qongw, "Lamw lamw bew iarr u jit vo tad." Iurqycc qongw, "Pangx huex be angg, angg huex be pangx." Cincniu anxnix, langg qokqog iuxsow diongg, iuxsow dew. Soxiw jywlangg narr qapp langg e hxyy, gauu qapp langg hap kuiwlat, dikkag jerje u sna' voxig, u sna' vangjan ee soxjai. Jitt kuanw langg jywhuew qetjniaa ee siarhue, dikkag e gimxsiong-tiamhuax; hyw qycc tnrix hyw, diddit bunbingg diddit jinwvo.

Qongw jit qxur kacc sidjai ee ue, dyrr lanw dairqex laii qongw. Lanw dairqex ee hagbun jin' byy; idi puawvne ee huatdo, lanw longxx jin' je m jaix; denrdingx denrhuew si jnaixngiu sed, lanw iarr berhiauw; huexciax lanw dy' decc jre, jongw .si m si lanw congwsed :ee, huexcaa lanw dy' decc ing, jongw .si m si lanw huatbingg :ee. Jex dy' longxx si guarqoklangg, Sengiulangg huatbingg :ee, lanw si dui' inx tec laii iong. Jongw .si lanw iauxquxx erhiauw beh dui' inx yc; lanw byy jipquad, lanw kingw jiapqin inx, kingw qapp inx qauvuee, acc inx qingwzenn iarr byy kngwvo, soxiw lanw jiacc e tangx qapp inx vnevnee hiongxsiu jin' dua ee hokkir. Qanda' si qenwsiaur, lanw byy u simxmic hyw :ee tangx hro inx yc tangx lirig inx, vutqyr jiong' lanw damrvyc ee cutsanw, dyrr si dee qapp jniulyw, qapp inx qau'ngua jyr inx ee loriong.

Snualairlangg qapp lanw dyrr byy siang, inx m kingw qapp langg qauvuee, byy qapp guarui jiapciog, soxiw inx kacc quw dy' be jinwvo, vutsii dy' si hitt hy kuanxsid. Inx narr air jinwvo, dnaxx dikkag diyhh qinw qinw kuix inx ee simqnuax, byc did knuar langg jyr siudik, hnuahiw qapp langg habsimx zin jyr hniadi jixmue; narr si uirdiyhh jinliw qapp jingwlangg ee jinwvo, lenrr ix ee snewmia iarr diyhh hnuahiw henr qapp jingwlangg qongqex.

Jongw .si iaxbann ee langg piacpni si jin' qodak, inx vunxlaii ee junsimx si knuar langg jyr duiwdik kuanxtai, setsuw si qiyr ix vuec jit qix taumngg kiw laii tangx lirig langg, ix iarr si m kingw. Ix si cincniu guvix, u zip byy cud ee kasiaur; bxan su dy' longxx duiww qadi ee lirig singx lrak diauu, vutsii dy' si pau hitt jxingw "Zidtauu ciah ngiarngia, sui' langg qor snewmia" ee simdngg. Soxiw iaxbanlangg soxx jojid ee siarhue, narr m si vutsii u siy' pah siy' taii, dyrr si snruar pongxpongw, longxx byy lenlok. Narr si bunbinglangg dyrr si knuar siarhue juantew ee jinwvo jyr qadi ee jinwvo. Inx ee siarhue piwlun jyr singkux, inx qokk langg dyrr cincniu singkux ee qokk vorhun, longxx u cinbit ee quanhe. Jairr bunbingg ee siarhue, jit xee langg narr u hyw ee qinggiam, hyw ee iwqenr, dyrr tuann hro jingwlangg jaix, hro jingwlangg jiauww ix ee kuanw kir jyr. Narr u hyw ee huatbingg, congwsed hyw ee mihqnia dyrr qar jingwlangg, qapp jingwlangg jywhuew iong. Cincniu jitt kuanw, jingg ee langg soxx bad soxx did .diyc .ee, longxx henr hro aurdairlangg qongqex did, soxiw au dai ee langg did diyc jingg dai ee soxx did jyr qicow, e tangx jurjai congwsed sinx ee mic, qycjaiww qetnix kacc quann kacc cimx ee hagbun, hro au dai ee langg kacc jinwvo. Iaxbanlangg dyrr byy jitt kuanw, in'ui ix ee juxir si qapp langg kuix, byy qapp langg hap; qadi qinggiam, qadi bad; qadi qing'ingg congwsed, qadi hiongxsiu; byy tuann hro jingwlangg, byy qapp jingwlangg vunx; soxiw ix narr siw, ix ee dairjir qapp ix vnevnee siaubyy .kir. Qywqyr narr longxx si anxnix, qetqiok aurlaii ee langg qiamxx m si longxx diyhh dingsinx packuix mah? Jitt kuanw siarhue ingxuanw be jinwvo, jitt jxingw langg ingxuanw be ciautuad; vutsii diyhh jyr ginxaw, dniardnia diyhh jyr iaxbann ee sing'uac, jex si jingliw soxx ingqaix :ee, si cenqow vut'ik ee lixlo! Sniu kuix byy sniu hap ee langg laii jywjniaa ee siarhue, dniardiyc byy u simxmih hagbun tangx liutuann, iarr byy simxmih qauwhuar ee qiquanx dilehh.

Liw knuar, henrsii jairr sewqair soxu ee hagbun, soxu ee bunbingg, longxx si jibhap juann sewqair ee gauu langg ee lat laii congwjniaa :ee. Vutlun simxmih vorhun ee dairjir, narr si u hyw :ee, dniardiyc si hap jingwlangg ee lat laii congwjiu, dikkag m si jit langg soxx jyr e qaur. Siogguw qongw, "Id hxyy bxan su sxingg." Langg narr zuxx gauu qapp langg hap, jingwlangg ee simqnuax narr hyhiap e did qaur, sewqanx bxan hxang byy u jyr be tangx laii :ee lar! Hyhiap si jueww iauwqinw, hyhiap si bxan hxang bunbingg, bxan hxang hokkir ee qinguann.

huedngw tauu iac