JUDE EE PUEX
Jesus Krist ee lovok, James ee hniadi, Jude, puex qiar hro siurr driaur :ee, dirr Ve Siongrder did diyc tniar, uirdiyhh Jesus Krist laii vyxsiuw :ee:
2 Guan linbinw, ving'anx, tniawtangr, qetnix jerje hro linw.
3 Soxx tniar ee hniadi ar, guaw jin' diwir beh siaw puex hro linw, girlun lanw snaqab u hxun ee jinxqiur hitt sii, dyrr vutdikvud diyhh siaw puex koxkngr linw, uirdiyhh juer jit xe qaudair dirr singwdoo ee dyrliw, laii cud lat qaujenr.
4 In'ui u quixnarr langg amwjni zip .laii, dyrr si jaw dairsingx dniardiyc beh siurr jitt xee simxpnuar :ee, inx si vutkenn ee langg, jiong' lanw ee Siongrder ee xunx huanxdngw juer hongwciongr ee in'iuu, iarr m zin dog'id ee Juxjnaiw, lanw ee Jruw Jesus Krist.
5 Linw si ixqing’ bad banrsu ee langg, dnaxx guaw rair hro linw e qir .did, dyrr si Jruw ixqing’ qiur vecsnir cud Egipt ee de, au .laii bedbyy hiaxee m sinr :ee.
6 Qycc u tnisair byy siuw inx ee vunxjid, lirkuix qaqi kiarkiw ee soxjai, Jruw ing ingxuanw ee syxlen, qimwsiux inx dirr oamr ee erbin, qaur dirr dua zidqii ee simxpnuar.
7 Cincniu Sodom, Gomorlah, ixqip siwuii ee sniaa, iarr jiauww inx ee kuanw laii qniaa imluan, tranr gigsingr ee sik'iok, dyrr sriu ingxuanw ee huew ee hinghuat, he lehh juer qamwqair.
8 Jiaxee binbang ee langg iarr cincniu anxnix, inx pah lasamm ziogtew, iarr biauxsi vran jingwsu :ee, setdok junquir :ee.
9 Jiww dua ee tnisair, Miqael, uirdiyhh Moses ee sinsix qapp moquiw sna' jnex, venrlun ee sii, siongrcniaw m qnaw ing vongwdok ee ue jikjue ix, jixu qongw, "Guan Jruw jikvi liw."
10 Dogdok jiaxee langg setdok inx soxx m jaix :ee; qycc inx vunxsingr soxx e hiauxdid :ee, cincniu byy lingsingr ee uahmic, dirr jiaxee dairjir qaqi vairhuai.
11 Inx u jaiec ar! In'ui inx u qniaa Kain ee lo, uirdiyhh jaili jauxjongg dirr Balaam ee cywgo, siurr bedbyy dirr Kolah ee uiqec.
12 Inx dirr linw ee hyaiwsik si juer amr ee jiyhdax qapp linw siangg dyh, inx ngiuxci qaqi longxx byy qnia'uir; inx si byy ho ee hunn, hro hongx cuex .quer .kir; si ciutnix byy quexjiw ee ciu, siw liauw qycc siw, qintauu longxx vuic .kiw .laii;
13 Si haiw ee qongg ingw, tror cud qaqi tangx qenwsiaur ee puec; si lirkuix inx ee soxjai ee cnxix, u o.-oamr-a. lauu decc tingwhau inx qaur dirr ingxuanw.
14 Adam derr cid dai ee sunx Enoc camwgiw jiaxee langg, qongw, "Knuar ar! Jruw qapp Ix banrban ee sxingr :ee laii,
15 Laii simxpnuar jiongww langg, laii jikjue itcer byy qingwkenn ee langg, uirdiyhh inx ing byy qingwkenn soxx qniaa itcer byy qingwkenn ee su, qapp qniwnarr byy qingwkenn ee juerzinn soxx qongw hnuai'og qongqig Ix ee ue."
16 Jiaxee langg gnauhgnauc liam, uanwceh, jiauww inx ee su'iok laii qniaa inx ee cuir soxx qongw :ee kuakauw ee ue, uirdiyhh jaili laii tiamxmi langg.
17 Soxx tniar ee hniadi ar, dnaxx linw diyhh qir did lanw ee Jruw Jesus Krist ee suwdoo soxx dairsingx qongw ee ue.
18 Inx u qra linw qongw, lorbuew ee sii beh u hiwhiog ee langg jiauww inx qaqi byy qingwkenn ee su'iok laii qniaa.
19 Inx hiaxee si hunx dongw :ee, tranr hetkir :ee, byy u Sinn.
20 Danrsi soxx tniar ee hniadi ar, diyhh dirr linw jiww sxingr ee sinr qaqi kixjy, dirr Singwsinn laii qidyw,
21 Diyhh dirr Siongrder ee tniar laii qaqi vyxsiuw, ngwbang lanw ee Jruw Jesus Krist ee linbinw qaur ingxuac.
22 U giaugii :ee, linw diyhh linbinw;
23 Uree, linw diyhh cniuw inx cud huew laii qiur inx; uree, linw diyhh qniahniaa laii linbinw inx; lenrr hitt xee hro ziogtew pah lasamm ee ihok, iarr diyhh iamwngor ix.
24 Dnaxx e jiauwqor linw byy diyhdag, iarr hro linw kia dirr Ix ingqngx ee binrjingg, byy hacuu, u kuaiwlok, dyrr si dog'id ee Siongrder, lanw ee Qiuwjuw;
25 Guan ingqngx, uigiamm, quanlingg, kuiwlat, dui' lanw ee Jruw Jesus Krist, longxx qruix Ix, dui' banrqow ixjingg, qapp henrjai, didqaur banrser. Amen.