DERR 14 JNIUX
VNI EE SII LIMX-JIAC HXUAD
Vnirlangg limx-jiac ee diongqanx, jueww gauu henxcud kanwho u jaidiauu iacc byy. Jiauww quiqiw isingx diyhh qra kanwho qongw, simxmic vni diyhh jiac simxmic mic; mrquxx kanwho iarr diyhh jaix sidbut siauhuar ee lixkir, iarr simxmic jiahmic kacc hap dirr simxmic vni. In’ui vnirlangg reee duxaxx qaur vnirngi, isingx byy ingg tangx dagg hxang jimjiog qaudai, soxiw kanwho dikkag diyhh yc vnirlangg limx-jiac ee hxuad.
Langg narr hyw, jiurr tangx suiven jiac, jex kiokk mrbenw qongw. Jongw .si u vni ee langg ee knuawuac, e kacc hyw iacc be, ursii u quanhe dirr liam-jiac ee su. Ix ee sidbut narr virvan duxhyw, iarr kuair siauhuar, dui’ anxnix langg e jiamrjiam kacc hyw. Narr sidbut byy hap, vnirlangg ee jingwjong e kacc siongdiong. Vni narr siongdiong, iacc si tuanziamxvni, soxx du .diyc ee jingwjong, jiauww qir dirr erdew: langg jiurr air kunr kacc be lyc binn, simlai akjag, naauu e cuiwdax, puhux siyx, texunx kacc qnuaii, mehpog kacc qinw, jic vec vec, siauhuar vutliongg, ui sitlyc siauhuar ee lat, air auxtor, byy air jiac, vakdow tniar, kaciuw sngnngw. Narr si anxnix, singkux-lai ee jojid e pacsngw; jitt xee si dui’ singkux dagg xui ee jojid byy jiauww ix ee jok’iong laii qniajuer.
Narr si anxnix, uirdngg nirr ee jnuatew, soxx hunvir ee siauhuwik, e kacc jiyw, iarr kacc byy lat; vnirlangg jitt diap narr jiac yh siauhuar ee sidbut, ix ee qankow e kacc je. Vnirlangg e kacc sanw, soxiw diyhh virvan kacc kuair siauhuar ee mic hro ix jiac.
Jiauww isingx u vunx, vnirlangg ee limx-jiac u snax kuanw:
1. Vnirlangg dairkair e suiven limx-jiac .did.
2. Qanda’ jiac qenng, amxmuee, gulingx, iacc si guling, quenng, tngg, snax hxang juer ee sidbut. M tangx jiac baclui, iacc si yh siauhuar ee mic.
3. Qanda’ jiacc guling, iacc si amxtng. Jiac juiw jitt jann, mrbenw siongser qongw, in’ui vnirlangg longxx tangx jiac juiw.
Poxtongx ee lixkir: 1. Dirliauu tuanziamxvni, iacc si qipsingr ee vni, diyhh ing liudongrsidbut (流動食物, liquid food), jiurr e kacc kuair siauhuar, iarr kacc qinw kipsiux dirr singkux-lai.
2. M tangx juer jit xe hro ix sniu’ je, diyhh jiong’ damrvyc hro jiac, iarr kacc jiao hro ix.
3. Virvan sidbut ee kuanxsid, diyhh u juriongxliau kacc je :ee, iarr jiac liauw diyhh e kacc kuair siauhuar, benw sniu’ ing diyc siauhuawlat :ee.
4. Sidbut narr byy hap dirr vnirlangg ee kuanxsid, m tangx congr hro ix.
5. Sidbut diyhh hro langg jiac naxx je naxx hyw, air vyxho singkux ee jojid, hro ix kacc be pacsngw; jongw .si m tangx hro ix jiac quewtauu drir qaur sunxhai.
6. Diyhh ing lingw qunxjuiw hro ix jiac qauwgiac je, hro singkux ee jojid ee juiw e ciongsing, jriw cuiwdax; iarr jitt hy juiw narr quer singkux, e jiong’ byy loring ee mic vaicud dirr ziy, qnua, qapp vunr.
Congr sidbuw hro vnirlangg jiac ee quiqiw:
1. Isingx narr bingrling diyhh tranr simxmic huatdo cri vnirlangg, diyhh dagg hxang siuw. U vni cincniu siyxdngzet, vnirlangg soxx jiac ee mic, viw jiac iyc kacc iauwqinw. Narr byy anxnix siuw, e hai diyc vnirlangg.
2. Kanwho diyhh erhiauw virvan mic hro vnirlangg jiac diyhh erhiauw juw, iacc si sac, iacc si simxmic vadd kuanw ee huatdo; in’ui ursii ix vunxsinx diyhh virvan, iacc si qar vadd langg.
3. Narr byy air jiac ee vnirlangg, kanwho diyhh ing dagg kuanw ee hyw huatdo, hro vnirlangg hnuahiw, jiurr e kacc kuix vii. Iarr diyhh jiauww siqanx sunsiok.
4. Vnirlangg soxx jiac .diyc e hac cuir. Narr vaii dyh iacc si vaii snuaa, beh pangg mic hro ix jiac, dirr vnuaa-dingw diyhh cux jit diauu cingkir ee dycqinx; iarr soxx ing ee qesix, tngsii, nguaw, aux-aw, diyhh cingkir, hyw knuar.
5. Ingqaix diyhh jiac siyx :ee, m tangx jiac lingw :ee, narr ingqaix diyhh lingw :ee, m tangx jiong’ lalunsiyx hro ix.
6. M tangx hro jiac sniu’ je. Jiac cunx ee mic diyhh qnuaxqinw tec kuix; m tangx hro vnirlangg knuar diyc tyxiar.
7. Narr be jiong’ jiahmic dairsingx virvan hyw ee sii, m tangx dirr hitt hy byy sniu beh jiac ee vnirlangg binrjingg mng ix air jiac simxmic. In’ui jingg ee sijun, ix longxx byy sniu beh jiac, jitt diap qiamxcaiw ix sniu beh jiac; liw narr byy jiong’ sidbut dairsingx virvan hyw, qiyr vnirlangg tingwhau, danw qaur liw congr hyw, ix iarr byy sniu beh jiac.
8. Narr qra vnirlangg virvan jiahmic, diyhh byc did hro vnirlangg knuar .qnir.
9. Narr byy simxmic iauwqinw, m tangx qiyr vnirlangg cniw laii hro ix jiac. Jongw .si diyhh mng isingx, knuar vnirlangg diyhh kunr zuarr quw, jiacc tangx hro jiac; jiurr diyhh jiauww isingx dd huatdo qiyr ix cniw, hro ix limx, jiac.
10. Vnirlangg narr dyw lehh, be jre, diyhh ing jit qix jiahmihvann (食物瓶, feeder; 128 doo). Cri jitt kuanw ee vnirlangg, kanwho diyhh ing dyr ciuw dirr jimxtauu-xe, jiong’ taukag huu kacc qnuaii damrvyc; ing jniar ciuw tec jiahmihvann, jiong’ cuir he zip dirr vnirlangg cuiwdunn-lai (derr 129 doo). Jiahmihvann diyhh cingkir. Jiac liauw diyhh ing juiw qapp cingxaw, iacc si ing vor dnii dirr dig-aw, sew vancuir; sew liauw diyhh quer sac. Ursii narr ing ciurlingqngw, draur dirr vancuir, e kacc lirven, narr anxnix ing, dagg vaiw narr jiac liauw iuguann diyhh sew.
11. Narr beh jiong’ vnirlangg soxx jiac sidbut ee liongrsor, huehok isingx, diyhh qongw sidjai duxduxx zuarr je, m tangx liongriog qongw cavutdyx. Piwlun ix narr u jiac 200.0 c.c. gulingx, diyhh anxnix qongw.
12. Vnirlangg narr jiac liauw diyhh sew cuir, crid cuiwdunn. Vnirlangg narr be qaqi juer, kanwho diyhh ter ix crid.
Narr si cri ginxaw, kanwho diyhh jiauww ix soxx ingqaix jiac zuarr je, jiurr qra ix virvan hiaxee. Jit vaiw diyhh hro ix jiac qaur liauw; m tangx jimxaw hro ix jiac jidvnuar, aurlaii jiacc hro ix jidvnuar.
Vni narr siongdiong, be ing did jiac ding qycc cox ee mic, diyhh ing liudongrsidbut cincniu gulingx, bactngx, amw, liogsiok nng diamxjingx qycc jit vaiw, hro jiac damrvyc, anxnix tangx vuengiuw sinew. Narr anxnix diyro jiyhh ing tngsii iacc si jiahmihvann, unn unn aw hro jiac. Ix narr m guan tunx .lyc .kir, kanwho diyhh sethuad krngr ix, qra ix qongw, narr jiac, vni jiurr kacc kuair hyw.
Vnirlangg jiac gulingx narr si air auw, diyhh ing huatdo cincniu hro jiac lingw gulingx, iacc si jidvnuar jiyhhejuiw (lime water), jidvnuar gulingx; iacc si jidvnuar gulingx, jidvnuar iwzintngx. Ursii diyhh ing ixqingx siauhuar ee huatdo (pre-digested). Jitt xee decc juer ee hatdo dirr derr 179 bin u siongser qongw.
Dagg zit zir-jap-sir diamxjingx-lai, jit xee be jiac ding mic ee vnirlangg diyhh jiac 1800.0 c.c. gulingx. Diyhh vunx dirr muixx nng diamxjingx jiac 150.0 c.c. gulingx. Mii .sii iuguann diyhh nng diamxjing jit vaiw; jongw .si vnirlangg narr decc kunr, diyhh sir diamxjingx jit vaiw hro ix 300.0 c.c. Ursii vnirlangg be kamx did jiac 300.0 c.c., narr anxnix, diyhh hro ix kacc jiyw damrvyc.
Siaudok gulingx ee huatdo:
1. Gulingx diyhh tinn dirr jit der cingkir nguaw-lai.
2. Nguaw he dirr u juiw ee uex-aw-lai; uex-lai ee juiw m tangx sniu’ je, byc did hro jauw zip nguaw-lai.
3. Ing quar qra kamr uex-aw-cuir.
4. Jiong’ uex-aw he huexloo-dingw, hro uex-aw-lai ee juiw qunw jit diamxjingx quw. Jitt xee juiw e unn unn aw jinghuad, soxiw diyhh vutsii qex cingkir juiw dirr uex-aw-lai.
5. Tinn gulingx dirr cingkir ee vann-lai, ing quar qra kamr, he dirr ciucinr ee soxjai.
6. Liamvnix sew nguaw hro cingkir.
Narr gulingx ixqingx dirr qxanx-lai, mrbenw qycc tinn dirr nguaw nirr; jongw .si diyhh jiong’ gulingqanx he dirr u lingjuiw ee uex-aw-lai, jiauww dingxbin ee huatdo laii siaudok.
Virvan juirigsiauhuar (膵液消化) ee gulingx, jiurr si langg juer siauhuwjiab, laii huar ee gulingx.
1. Ing liquor pancreaticus jiurr si juirigsor 3.5 c.c, lingw qunxjuiw 150.0 c.c, sodii bicarbonas 1.0 grm., longxx la hro jiauu, tinn dirr cingkir nugaw-lai. Jiong’ cnrix gulingx 570.0 c.c., tinn dirr hitt der nguaw-lai, laihro jiauu.
2. Jiong’ nguaw he dirr uex-aw-lai. Uex-aw-lai diyhh u 130∘F (54∘C.) siyx juiw. Diyhh anxnix hro ix siauhuar jap hunx quw.
3. Ixqingx siauhuar qauwgiac, narr byy liamvnix congr hro vnirlangg jiac, diyhh ing siyx, iacc si lingw ee huatdo, hro ix be qycc siauhuar:
(a) Ing gulingx tinn dirr vann-lai hangx hro ix qunw.
(b) Ing nguaw qapp gulingx he dirr vingsniux-lai hro ix lingw.
4. Narr si air hro gulingx jiaujngg siauhuar, diyhh jiauww dingxbin (2) ee huatdo, mrquxx diyhh dirr hitt xee 130∘F siyx ee diongqanx nng diamxjingx quw. Anxnix juer, gulingx e kow bi. Juer jitt hy hxuad ee sii, diyhh ing hanluanxqer he dirr hitt xee gulingx nirr, qra ix qiamw undo. Gulingx ee undo diyhh 130∘F (54∘C.), m tangx siyxkuaw u qnuaiqe. Narr jiong’ uex-aw he huexloo-dingw, iarr si hyw, jongw .si m tangx he hiax, suisii kir; diyhh sisiongg knuar ix ee undo.
Dirr erbin beh qongw kiw virvan mic hro vnirlangg jiac ee huatdo.
Kongr himuee: Ing siongrr hyw ee biw sew hro cingkir, ranr jit hxun biw, qauw hxun juiw, juw diamw vnuar jingx quw, juw qaur nua nua jiacc hro vnirlangg jiac. Jitt xee ursii qiyr juer qiuxliongtngx.
Bixtngx: Ing siongrr hyw ee biw, sew hro cingkir, ranr jit hxun biw, 12 hxun juiw, juw nng diamxjingx quw, jiacc ing siah’aw liyy hiaxee tngx kiw laii hro lingw, aurlaii jiacc hro vnirlangg jiac.
Mirtngx: Ing jit tngsii ee iuu, nng niuw bah, snax tngsii hebiw, damrvyc cangx, qniux, sir niuw mi, nng dua nguaw juiw. Narr byy qauwgiac qiamm, iarr jiacc lyc hro ix duxhyw. Dairsingx jiong’ iuu he hitt dniaw-lai; iuu zet jiacc jiong’ bah, cangx, hebiw, he hitt dniaw-lai, la la lehh. Jiacc ngiuw nng dua nguaw juiw lyc .kir, quar kamr hro hyw, tingwhau juiw qunw, jiacc he mi lyc kir snaqab juw. Narr si dui’ guarbin brew laii cetmi, tingwhau qinw snax~sir vaiw, jiacc tangx kad .kiw .laii. Narr si mrpnir, qunw nng~snax vaiw jiurr tangx kad .kiw .laii. M bue juw ee dairsingx diyhh singx sew, zen’au jiacc he lyc kir juw, qunw jit hunjingx quw jiurr hyw.
Praur gnaurhunw: Ngiuw nng tngsii vnii vnii ee hunw, ing damrvyc lingw qunxjuiw lyc .kir, la hro jiauu; la narr byy jiauww, jiurr e qed vehbak qui’ liap. Decc la ee sii diyhh ing qunxjuiw ciongx lyc kir praur. Cutjai langg ee iwsur camx tngg qapp gulingx.
Iwzintngx: Iwzinbiw nng niuw, ing lingw juiw sew hro cingkir. Ing nng nguaw juiw jimr nng diamxjingx quw, jitt xee juiw diyhh vniar hetqak, qycc ing cingkir juiw 600.0 c.c. ciongx .lyc .kir. Diyhh ing ban ban ee huew qra qunn nng~snax diamxjingx quw; jiacc ing laursiac hroo iwzinliap kiw .laii, jiong’ tngx laii ing. Narr air, tangx camx vehtngg laii jiac.
Qenngrcingx: Jiong’ nng liap qenng cruw hiaxee nngrcingx, nngr zinn m tangx ing. Ing dikciamw laii pah qaur u puec, puer 570.0 c.c. lingw qunxjuiw la hro jiauu, lyc damrvyc iamm, ing di qra la; ing sevor lu hro cingkir. Narr si beh cri ngex-aw, qenng ing jit liap jiurr qauwgiac (juiw iuguann 570.0 c.c.).
Juw qenng: Dairsingx cai juiw, tingwhau qaur dua qunw, jiacc jiong’ qenng kar hro kuix, log he juiw nirr, tingwhau juiw jit xe qunw jiurr hyw, tangx ngiuw .kiw .laii.
Sac qenng: Dairsingx jiong’ juiw hro qunw, qenng jiacc ing tngsii, unn unn aw he .lyc .kir. Narr si dua liap :ee sac snax hunjingx quw, ser liap :ee nng hunjing quw jiurr e ing .did. Jongw .si sac jit hunx quw, kacc kuair siauhuar. Sac naxx quw naxx ding, jiurr kacc yh siauhuar.
Praur qenng: Dairsingx he qenng dirr deqow-lai, iacc si nguaw nirr, jiong 180∘F. (82∘C.) siyx ee juiw tinn lyc kir qaur dni, jiacc kamr quar. Tingwhau 7-10 hunx quw liauxau, jiacc tec kiw laii jiac. Qenng praur anxnix e kacc kuair siauhuar.
Qenng qapp gulingx: Qycc jit xee huatdo, si jiong’ jit liap cnrix ee qenng, kar, he nguaw-lai; jiong’ nng niuw guling, ciongx .lyc .kir; ing dikciamw laii pah, jiacc tinn nng niuw qunxjuiw, iacc si siyx ee gulingx, longxx la hro jiauu. Narr si air tngg, diyhh camx vehtngg iarr hyw.
Qenng pah iur iur: Jit liap qenng, kar dirr dniaw nirr qapp damrvyc gulingx (jit tngsii jiurr qauwgiac). He dirr huexloo nirr, qinw qinw la, m tangx tingg qaur kow, cavutdyx jit hunjingx quw jiurr hyw. Jiacc pangg kiw laii jiac.
Kongr gubactngx: Ing cnrix ee gubah jit vong (450.0 grms.), lingx juiw 1000.0 c.c., iamm 1.0 grm. Jiong’ iuu kiyh hro cingkir, qanda’ ing jniabah, jiacc jam hro cincniu bacsnii-aw. Jiong’ bah, iamm, juiw he knax-aw-lai, jiacc he ban ban huew ee dingxbin, m tangx hro ix dua qunw, unn unn aw juw snax diamxjingx quw. Samvutgorsii diyhh ing tngsii unn aw qra ix la. Vnirlangg iauxx bue jiac ee sii diyhh liyy dingxbin ee iuu; iarr hitt xee iauxx dirr knax-aw-lai diyhh lu; m tangx jiac knax-drew ee bah, jiac tngx jiurr hyw. Narr air tngx kacc qau, tangx ing iwzinn, iacc si vng, dirr tngx nirr snaqab juw.
Gubacjiab: Ing cnrix ee gubah jit vong (450.0 grms.), lingw juiw 600.0 c.c, iamm 1.0 grm. Ing hitt snax hxang he dirr jit der u quar ee nguaw-lai; ing jit der nguaw, he dirr drew lingw juiw ee knax-aw-lai. Jiacc jiong’ knax cai dirr huexloo-dingw, dim u snax diamxjingx quw, jiurr e ing .did. Diyhh liyy dingxbin ee iuu; iarr iauxx bue hro vnirlangg jiac diyc lu.
Cnrix gubacjiab: Ing siongrr hyw, sinx, qycc cnrix ee guu jniabah 60.0 grms. (nng niuw), jam juer qik iur ee bacsnii; jiacc ing 150.0 c.c. (go niuw) lingw qunxjuiw lyc kir diauhyy, he dirr nguaw-lai. Jiong’ jitt der nguaw he dirr siyx ee soxjai nng diamxjingx quw. Jitt xee cnrix bacjiab ee sikdi angg, vnirlangg knuar liauw, kacc m air jiac; soxiw kanwho diyhh sethuad, knuar si ing u quar ee nguaw, laii drew, iacc si ing angsig ee vylevuex drew, anxnix vnirlangg jiurr kacc be knuar qnir hitt xee angsig. Iauxx bue jiac diyhh lu. Ing iubah, qebah, acbah juer bacjiab, longxx jiauww dingxbin ee huatdo.
Hitngx: Diyhh brew haixhii, singx pah lrann, sew hro cingkir, aurlaii jiacc lec do. Diyhh sewzi liac dnaw, m tangx pah puar. Dng’aw mrbenw ing. Jiong’ hii ced jit der jit der. Ngiuw quaw juiw he dirr dniaw iacc si knax-aw-lai, lyc damrvyc iamm. Hii jiacc he .lyc .kir, ban ban huew sac snax hunjingx quw. Hiqud longxx diyhh qingw .kiw .laii, jiacc tinn cnrix gulingx lyc .kir, congr hro vnirlangg jiac. Narr si vnirlangg siongdiong, diyhh dairsingx quer lu, jiacc tinn gulingx lyc .kir.