siauxinw
Tong’ qelo ee denrdingx u kuix, mrqycc hnuaw hnuaw, hang-tauu hang-buew ohniaw ohniaw knuar be hen. Guehtauu u bauc diyc jit jruw sittauu vutjiw aw duarjongx, xe vnuar guec cavutdyx muixx zit longxx decc qnuaw qangx, jyh qaur bongx mii iarr jin’ suwsiongg, ehng'amwsii iurqycc snax ox sir amr jiacc lirkuix qongsix.
Ho lyc qaxx sirsa qiyr. Jniar ciuw giaa horsnuar-aw, qongsurvaux dang ngicngih pnai vnuar qah dirr dywvingg. Li minaxjaxkiw siongrvanx cunx byy quiw diamxjingx, kauwduu sexik qapp ngongix kunr, qongsurvaux lairdew ee jit drunx sxid, byy siqanx ho’ngg diauliw kacc duarmngg. Danrgai byy qra inx jah .dngw .laii, qan’ qan’ aw dy’ vangr be lyc simx.
Dirr aparto laukax ee gimkamw-aw siux horsnuar, sibquanwsingr qra cik .nng .xe. Vangdongx qiamsiab, kenwsniur, air beh singw den, lautuix-tauu ciangjai amr jiucjiuh, vreh tuix diyhh en’ lo kuix denrhuew kacc be vuahdyw higjiaw kir tad diyc siauhuexkir. Qnaxx si u tniax diyc kavo-sniax, byy dyrr huathen cuwtec guarvingg u qngsnuar, druar dirr zi lxauu :ee mngg kuix jit pang, howdauw dairsingx cud laii qnir langg, quw byy sew ee tauu u caur iu'aix-bi, dirr mngg-gua :ee pnri e diyc.
“Hyy Siyxjiaw, liw dngw .laii ar,” mngg kuix kacc dua pang, kia dirr mngsnir-au ee cuwjuw qongw, cuiwpuew jit liap u huad qiwciux ee ox qir jiokk cnixbak.
“Hner a,” cimxx hueqax :ee rinr, dimr jit xe tauu qewsiok ngr dingw:a qniaa, simlai kiokk u giquair. Langg’ qaiww singg juanqangx decc danw :ix. Jurr qra suewcuwkia qaur dnaxx, dirr jitt hy sisinn jiacc nguar knuar diyc cuwjuw, bue bad jingrr bue, qimmii sngr co’ huee.
Qniaa laii qaur snax lxauu, giaa syxsii beh kuix mngg. Nng xee langg ee siyw tnide si qa’ngg suer :ee laii qongw, iarr sngr jit xee siu. Qruix siu, guarhngx ee jingjenr tangx jiamrsii varvingx.
Mngg kuix .kuix, dinghuew diyhh suar ced hro dyc. Vnuar kig quw, obangg venr qngliang. M jaix qamxx si cnibak cuxcuw, cuwlairtauu ee qesix-jabmic qaxnaxx uree byy .kir iacc si ho’ngg suaw xui. Qnia’uir u caddoo laii .quer, cimw kax qniaa jit siwqer srunn, ngiaw diyc siaxzirdyh-dingw ee cecdeh u deh jit dniux zirjuaw, jiksii uaw .kir byy hauu.
Gnaxsunn, guanw qongsix ee Diongqog jivo kiamr jit xee juxtauu, guaw hongrcex kir hiax jiangxquanw giabbu. Liw u liw qaqi ee surgiap decc qing’ingg, guaw iarr diyhh kacc vniawser lehh. Jitt qingx cur ee joqii qycc snax guehzit buanxan. Sii qaur, liw narr byy beh qycc qapp inx pac’iog, lanw u nng qywguec ee josuer rah dirr cuwjuw hiax, rair e qir did qra tec.
Sigsai ee ciuxvid, snihun ee uerdiau. Zirir cenxhen byy piacjauw ee kongqanx, jniaw punpunx ee zirganw suxx langg’ koxkir. Kax liaux ciuw liaux qiongbeh pih .lyc, vnix:a ee dik’iw qinw jre .lyc, ciuxtauu ee juaxzi an’ tauu jiww buew qycc tak jit vxenr.
“Guaw au lexvair iurqycc rair kir Diongqog cutdniux.”
“Diyhh kir zuarr quw?”
“Kuair kuair a, snax tauu nng qangx dyrr e dngw .laii.”
Dingw lexvair ee duiwdab, dangsi’aw tanx byngiaw, aiwzinn-aw sna’ krix, bingg rmuaa amr penr.
Vangqingx-lai ee kiarduu kuix hna hna, qnaxx si siongrr suacbuew kir kuix :ee hiangwsii cionghongg qaxx byy kuar qnuiax mngg. An’ iw nirr vreh kiw qniaa zip kunwvangg, duu-aw-lai sriok duiwtauu :ee vnuax qaxx dngrr vnuar sesnuar, dandanx cunx jit niaw dirr jingzinn jed virr junw jyr lexbut ee moo jxid ee qac’aw byy ho’ngg jah jauw byy-lamr.-byy-siyc.
Bincngg hrngx hrngx vnir vnir, mipue byy jih, jimxtauu byy qui’ui, cngziok huesihetqaiw.
“Liw qinaxzit qamxx mrbenw kir qongsix?”
“M a. Snax diamw ee huelingqix, hingliw iauxx bue kuanw lehh.”
Qimjaw beh cutmngg jinwjingg mng iauxx dirr bincngg-dingw :ee. Knuar m puar, ciuxqix-aw giaa .laii, siongrqaiww siong’ing hitt jxox denruerhuanx qra cic .lyc.
“Jin’ sitlew, bogjingg duiwhongx byy huatdo jriab liw ee denrue.”
Jewsig ee huehog, dirr jitt xee qnualingw ee hormii, siyxjiaxlangg ee qongxue-sniax jiokk jyy hni. Denrue cetdng, txangx-gua ee ho dng’ cox, lyc qaxx sewser qiyr. Jit sii aw quer, jaboxlangg aikaur ee sniax pacpuar cur-lai ee diamrjing.
1.
“A’qox, guaw beh laii .kir ar.”
“Ngeex, horsnuar rair jah a! Guarkauw bongburho oox.”
Gnaxsunn dirr jiahvngrtniax decc jiac jaxvng, tecniw tak qokdiongx ee javox sun’aw. Beh kir tagjux :ee u tniax cuir.
“A’qox, baibai,” horix cing hyxser, tak qokhau-aw ee jabow sun’aw dirr iongdaii qapp cur-lai :ee et ciuw.
“Siyw danw lehh, liw ee vngrac-aw,” Gnaxsunn qongw, qra kngr dirr dyh-dingw :ee tec hro qnuaw beh kir tagceh :ee, jniar ciuw diyhh qnuaiw-aw qruew lehh.
Hniamue-aw kax jrih kax siysuar kir haghau siurgiap. Jiac langg’ byy jnii biw, Gnaxsunn jaw jaw kixcngg draur knuar tauu knuar buew. Qnuaiw-aw guanjai qnialo gaii, unn aw dngw laii jiahvngrdyh, daurlingx cunx vnuar vxuex iarr diyhh tranr siyx.
“Guaw jarhngx u brew jit ap orquew kngr vingsniux. Liw diongdaur liu siyx dyrr erdangr jiac,” derhu-aw qongw.
“Hyw, caiwvaux qapp sor ee juixqiauw marr iauxx u lehh,” Gnaxsunn qongw, bin ciyr ciyr.
“Liw jitt lexvair rair dngw kir vnirngi qiamxjax, si m si?” siyxdi mng, naxx decc tac pueaxhiuu.
“Hner a,” Gnaxsunn rinr. “Guaw nng qix ciuxqud longxx erdangr juriuu dinxdang ar. Jitt jua kiw, guaw tangx qaqi jre qongciax kir, benw langg’ vruee.”
“Liw dyr kax jiyhqyx iauxx kong diauu lehh, banrid narr cux .dyw e dyww jiahlat. Iauxx si guaw qapp liw kir kacc unxdangr,” siyxdi qongw.
“Kacc sewzi aw si, tywdongr lar. Guaw u decc sniu qongxx, tingwhau kax kacc e qniaa, dyrr beh laii cue cur.”
“Liw byy decc jiac taulo, m hyw qex kaisiaux jnii. Danw liw u siuzip u lirlo jiacc laii pacsngr.”
Gnaxsunn byy inwue. Siyxdi qapp derhu-aw dangjee cutmngg jit daii autobaik. Siongrvanx :ee siongvanx, siongrkyr :ee siongrkyr, qui’ qingx jing jaucjauh. Kectniax ee ngiudyh vuah jit xui soxjai. Uerliau qui’ jxox jongw qra cniaw .cud .laii. Nng~snax jua zri puer jit dniux doo, ciuw-lai jitt dniux, jarhngx ing qorr envid pacqyw, qinaxzit beh lyc sig.
qiwdii huansinx
vanrpuex danwqak .kir :ee
ing’iax cniurpuw ziiw
Jniar ciuw giaa nngxvid, dyr ciuw qra sikliaurdic tnaw lehh, sikjuixiuu angg :ee cnix :ee qaccamx, ngg :ee jxiw :ee siy’ hxun, byy siaw :ee, jiar caixue viauxbingg.
Lamluw-quanhe, jing’au nng xee longxx byy hyw buew, byy quidiok, virr langg’ kuisimx vuervuan naxjunxx venr jyr siongtair, jit dxangx lai hro qang jit xee siongx nng vaiw tangr simx tniar, qyckacc si liauxzenn.
Qra uerqyw tec kiw laii knuar, qamxqag snuabin qruer liauw byy qacsig, uerhuevid qyy quaw huehiyhlik :ee qycjaiww ciaux.
Qapp Vngx Sewsiux ee luanjingg dng’ zet hitt jun, dnibit-b., snax dxangx jingg ee koxjingg venr qaxx mohmoc, siongsimx-koxtangr snix jyr sniaw kuanw dy’ suacc be qir .did. Au .laii, sinx ee jingzinn huanx qu cajaux, cocox hitt vxenr, a’buw iauxx dilehh. U laurbuw ee dairjir rair ciauhuann, jingdniuu sit’ir jitt jann kacc be hiacc jiap sniu kiw, marr kacc be hiacc koxbun, hiacc tongwsimx. Jitt vaiw sitluann, sinkuvnix byy soxx kyr, pnaiw zirun suacc qycc duw diyc surqor diyhsiongx, uanxzenn cincniu dirr hukongx byy knikip, hibii iurr bongg bongg. Hro langg’ be gigliau :ee si, jitt quer bagsaiw qex jiokk u jamrjad, be cincniu ingxvaiw bersux juixdyrjuiw lrauu m jaix suah, vaixgiac vutdan byy qex, qycc qiamxjiyw vutsiauw, be jid’err sniu kiw dyrr angg bagkox.
Juansimx-diwjir jyr kangkuer m jaix iaux, uat tauu jimjiog sijingx, jiacc diwqag qinaxzit iurqycc taur daur byy hiyh. Lanxdnua jenx quew, liu vau’aw junw dxngr siongrr singw su.
Jiamrcniaw vangr vid cuann jiac daur, jiac qnuaiw-aw ee lat an' iw nirr kia .kiw .laii. Zi-jap tongw pingg ee cur, snax qingx vangg, nng xee tnxiax qapp jit qingx huloqingx longxx jiauu ser aw qingx, duvangg qyckacc si ec ducduh, narr u langg kia dirr gasloo taujingg decc juxjiac dyrr byy huatdo kuix vingsniumngg. Qex jit qix qnuaiw-aw bersux qex jit qix kaqud, vo vo qyckacc diyhh qingsimx, kacc be kir ciax dyw biw iacc longr puar nguaxvnuaa.
An’ lingxdongwkor qra caiwvaux tec .cud .laii sui’ kngr zip kir Dairdongg Denrqyx. Jap gua hunjingx aw quer, kaiquanx tiaur .kiw .laii, quar qra henx .kuix, cringr juixenx, vau’aw siyx hudhut. Diyhh siyw hrau lehh kngr hro kacc lingw, cuiwjic jiacc be kir tngr .diyc.
“Dyrr si in’ui jinx simx decc tniar .liw m qramx qra liw kimuaa, guaw mrjiacc hongwdnaw puawkuix simdngg duiww liw quwsit qongw.”
Jitt qxur diksit u pah diyc Gnaxsunn ee simqnuangiw. Cuir nirr naxx decc vro, Vngx Sewsiux ee gengiw dirr nauxhaiw sec linlongx. Hitt jun iwjir hiacc dua, u qra sag .kuix byy qycc lyhnngw, marr diyhh pah pok-aw siyw qra qaqi ylyw .jit .xe.
Siongrr buew jit cuir ee vau’aw tunx lyc auu. Jiac daur vaw, byy tingkig, uervid qycjaiww giaa kiw. Byy tauqex decc dokciog, qaqi marr byy vaii jinwdo. Jid’err ingg ciuw byy dairjir jyr, ongxsu laii jngjag uat linr dngw.
Langg narr lamw srinx, dixkongwlat vai, vnerdok dyrr kacc e jniursinx, lenrr qu jingwtauu iarr e singqix qycc dngw laii ngidnii. Virr langg’ vue .kir ee koxqingw, jitt xe aw dirr taukag-lai ding’enw samvutzirsii. Qapp Vngx Sewsiux dnaxx jiacc liauxqiok, qiwdii sinenx, survutdix, snax dxangx jingg :ee iarr laii decc pnuardnuaa camx .jit .kax. Beh quexdok qraiw iubun, qamxx diyh’air ngr au jit xee dauwpnua jiacc u iyc rix? Narr jniawjniar zucuw, m qaxnaxx decc jiac dok iacc ciamx mohuix lehh, hex iarr suacc tangx? Sniu laii kixdyr, vnuaciax sinx ceh-aw qu lahzit, qiuwjinx, si qaqi m vangr suah laii soxx drir. Beh tualii koxjingg, huanser si tangx jurkyr :ee, benw cue qaixiyc iacc qriuu bing’ix.
Zidqanx decc quer jiokk jnia’ qinw, byy-niux.-byy-sniuw byy qraur ing, bak jit sud, iurqycc beh amr ar. Beh siuqangx jinwjingg, snuax ee sikjuiw qra huar kacc cenw, vnuar damdax ee uerjuaw tec zip kir vangqingx kngr. Kig lenxbu, sew cingcir liauwxau kngr vingsniux vingx; duaa nng kog biw, sew hyw siyw dngr lehh, kactingg .jit .xe jiacc juw; siux snxax jih snxax liauw qinw kir sew singkux, amwsii langg je diyhh danxvan.
Vaiwid qaur vaiwgo, derhu-aw harvanx e singx uat kir ancinvanx jriab tak qoksiyw :ee. Ehngx buxaxqniaw zip mngg ee sii, lak diamw vnuar kacc qex.
“Guaw ciuw hyw guanjuann ar. Si m si an’ binhngx kiw, ngua guaw laii juw, liw jiacc benw qnuaw huwhur,” Gnaxsunn hiongr derhu-aw tegi.
“Mrbenw lar, liw diamr cur jingriongw dyrr hyw, guaw decc juw qinw qinw :aw.” derhu-aw ciyr ciyr aw rinr.
Juxjiac ee qanghux byy qaiww qiciuw, langg’ jiac diyc byy hahvii be qaccuir vycqnaxx e pnaixser qongw. Simtauu u kuawlu, Gnaxsunn ter jit vo, “Acc byy, guaw laii qingw cair.”
“Guaw longxx e tranr langwdaur kir sec caiwci, u knuar .diyc jiacc jai’ngiaw ehng’amr beh juw sniaw.”
Duarniuqox qapp derhu ee dam’ua qaur jiax suah. Cimxx zip mng :ee uisinqunn haa lehh iapciuw pah liuwkosi'aw, uat lehh kir jauwkax byy ingg ix ee.
Tak qokdiongx :ee ing’amr rair voxsip, jiac guarkauw, siyxdi qongxx e kacc nguar dngw .laii. Cur nirr si snax dxngr byy decc danxjee, mngxdngr snax xee jabow :ee dairsingx jiac jin’ suwsiongg.
“A’qox, guaw beh laii kunr ar.”
“Hngr, u sew cuir bor?”
“U.”
Jiac amr vaw, knuar jit xe aw kartoon, sinkux sew hyw, jabow sun’aw jnriu cngg benw langg’ huah. Hyw did inx nng xee jiauu sanw sanw :aw, a’qox qapp sun’aw keh jit dingw bincngg, auxbann aw iauxx e lyc. Gnaxsunn qra denrhuew qimr ser pax. Ginxaxlangg qenrdiux, be qau simsux kuair lyc binn. Duarlangg dyrr byy hiacc hyw kangx. Beh jnia’ lexvair byy cutmngg ar. Siangx kax dac dervanw, Gnaxsunn bagjiux vangr kreh dirr bincngg-qnii jre, siongxsiong qaqi dirr jit jangg poteciu-kax jyrsenn.
2.
Vaiwgo jaxkiw qauw diamw tongw, siyxdi inx qui’ qekauw-aw qeww cutmngg .kir ar. Qra jit niaw osig ee sokkor an’ snaaxsniux-lai hiaux .cud .laii, jiacc jiacc beh cue tangx puewdah dingw srinx :ee, cur nirr ee denrue giangx.
“Gnaxsunn ar, ervox u ingg bor? Laii guanw jiax qauwjniar qexceh,” cutvanxsia ee venjib dirr lingrgua hitt vingg vnix qongw.
“Jnia’ byy duxhyw, qinaxzit u dairjir, siqanx sna’ gai. Lanw ik kir vaiwid, hyw bor?”
Go-jap-sir dniux doo habsingg jit xee qowsu, jitt qingx cutvanxsia u iwhiongr beh kanhingg, dingw vnuar guec, Gnaxsunn cavutdyx dagg qangx longxx qapp jitt xee venjib denrue sna’ taur.
Co’ crur habjog, qycc iarr m si duarsig jokqax, langg’ qinrqin beh qauhur covanw duiwvnuar ee vanxsuer, danw narr u sriaux iacc jaiwvanw, nii-buew jiacc laii huersiaur. Jit vunw qongxx anwqer sir-vah, jokjiaw kixsingx e tangx tec .diyc ee gingiac byy je laii qongw, cringx siauwdnuax jin’ u ing, cunx :ee, limw limw aw ersaiw suer cur qaudnia marquxqnaw.
Gasloo siangx vingg dyc, dyr ciuw :ee, juiw qunw sa jit lriuw mirsnuar, jniar ciuw :ee, mua’iuu craw qniubuw qongwqongr pangx. Diongdauwdngr an’ cuann liau, jiac vaw, qaur nguaxvnuaa sew cingkir vingxkab dicdax, vnuar diamxjingx ixlai liauxqed.
Nng qix kax jinw longxx e qniaa ar. Jit quaw rair qanwvan jan’e dunxjig :ee, jyczit jauw ginhangg, jarhngx kir pueqiok, qaxnaxx byy jit qangx ingg srinx. Binaxzit vaiwlak u qiongrsiux, nng lexvair jit vaiw, jingg jit qangx diyh’air u langg singx kir dnaxjingw sikdniuu qapp andir potuann. Gnaxsunn hixsimx juer byy jnii qangx, dingw dxauw qycc u jiyx diyc jit xee dongjir snaqab kir.
“Dua suhniax, liw nacc u huatdo siangx kax tiappuann jre hiacc quw? Sidjai hro langg’ himbo qycc qingwhok.” Damrjongx, cing ee binrdingw snxax si acnngrcnix ee iuwhuex, siyw sumue ciywiongg jiokk dnix, jiokk siauwlenn kuanw.
“Hex jit diamw aw dy’ byy kunwlann,” dua suhniax dab, snia’imx jiokk unziuu. “Sencid u ingg rair kacc jiap camqax. Guaw au qywguec cex beh qycc kir jyr jorciuw. Liw qinw kir vywmiaa. M jaix inx kiyh buanxuann ar .bue dyrr urngiaw.”
“Guaw dyrr pnaiw kunwpiah decc kyxnauw lar,” siyw sumue qongw, kiaur cuiwdunn. “Dingw vrangx kir, qang cimxsig :ee, vnix:a :ee m kunr qaxx hnoo hnoo qiyr, duiwbin pox :ee u langg diddit decc kamsaur qycc e kiw laii pruir tamnua, hai guaw qui’ amr longxx byy lyc binn, zit .sii jiacc dirr senvongg decc dokqux.”
“Be sriu guarqingw qiauxla marr si siudy ee kywtingg,” dua suhniax qongw, ciywsinn guanjai. “Au jua, guaw e jah jit quaw qingceh laii vunx liw knuar. ‘Langlangg longxx u vudsingr, langlangg longxx erdangr sxingg vut’, Sewjunx ee qimgenn diyhh sisii qir jairr simx.”
Gnaxsunn qauwui ee sii, dirr lautuijanr dyrr tniax diyc jit duir javox jabow ee qongxue-sniax. Zinuann jeqaur, sittauu jiauww puewdongx, dua suhniax si quanxsu, nng diamxjingx au, vowdah jiauvi, dua kectniax venr senrvongg. Qeczit ervox, sensux cua jingwlangg jingrje. Muaw tnxiax jiauu hak .quer .ee, mrsaiw qycc qar. Potuann-dingw jre .lyc, siulen beh u jinwiah juann kyr jurqiw.
Zit lyc srinx, qimdnuawzit ee qangkyr beh qaur jinrbuew. Sensux dirr jingtauu tiabje, kuix kauw qangxqaur.
“Soxx qriuu vutdig e kow, soxx air vedlii iarr e kow, ham zip aiwluann ee cimenx, tnizit vutqenr… Bersux jre dirr kongrkakiaur ee nng vingg, diwhui qapp iogqiuu iacc si qongxx jurgnow diauduir, liw sringx, guaw qangr, liw qe, guaw quann… Siurmia iuxsor, huanrnarr langg longxx e sixbongg. Lunhuee jaiwser, aikow gigqingw dingg liauw dingg. M tangx qycc tuaenn, siusimx siusen diyhh tranr siauwlenn.”
Vutjenrcuir, sensux ee hunwsi qnaa jusimx. Tauwvox ee qiongrsiux qaur jiax jit xee kamxjam, dnaxsaur dirr sui’au. Sauwsex, vunwqix, dycvor, qnuartangw, vniawdng ee qesix jiauu cutdong. Nng xee ho’ngg hunpair kir vniar venrsow, cunx :ee cringx senrvongg. Langg je kaciuw je, tokax jiacc saur hyw, sui’ u langg giaa vowtuax-aw laii decc lux. Jit xe aw quw, tniabin dairsingx vniar cringx, dua suhniax dirr hiax hiongr sensux vinxvyr jingwsu. Qnuaw siqanx :ee beh tejaw jauw byy quansiap, kangkuer siubuew jiuajiyw aw langg dyrr ersaiw, jinw longxx jxig jxig dirr janwvangg.
“Liw jiacc siauwlenn iarr qapp langg’ laii decc jersenn,” obasang mng siyw sumue, dirr juixjyy-aw decc zriuu dycvor.
“Guaw snax-jap tongw ar neh, byy siauwlenn,” siyw sumue dab, naxx decc qra ixju danr zip kir sexsnaqix beh sew.
“Urngiaw or! Liw qewangx ar bue?”
“Guaw be snix, byy langg beh crua,” siyw sumue didgenn.
“Be lar, liw ang’axbin jiacc suiw .diyc,” vnix:a jit xee ozisang sueh qinw qinw.
“Guaw bad qapp langg’ dingrcinx, qycc si u decdnia uanpingr :ee. Langg’ jid’err jai’ngiaw guaw jiyhluw, dyrr tewhunx kir qaux hitt hy e quii e snitnuar :ee.”
Tniax siyw sumue qongw liauw, limdniuu :ee longxx decc hnair tauu. Kiwhunx u venr kacc giamsiok. U langg qnuaxqinw dngw uerquanx, qongxx Gnaxsunn byy angx iarr byy qniaw, simx hongr qycc jurjai.
“Guaw hurjer qui’ sinkux, hyvitkow snex jit xee buqox :ee duer lanw decc buatuax?” Gnaxsunn sueh in’iuu, naxx decc cringx vunwsyr.
“Cue jit xee hyw qedangr :ee qer suacc berhiangw?” ozisang qenwgenn, soxx dongzenn ee kuanw.
“Hex diyhh samwsux or!” obasang duiwcuir dyrr rinr. “Javolangg u quaw jikqimx iacc cunginn dyrr e la’uaix vnir vaxhir.”
Ue jiacc suah, jabow :ee longxx decc dimr tauu.
“Qongw jit qxur byy su’ngiaa :ee, zinsingx narr erdangr dingg qycjaiww jit vaiw, guaw byy beh snix marr byy beh qer,” jit xee dionglenn jaboxqnuax suec’ue.
“Iarr be quair did liw e anxnix sniu. Qex jit xee siawsag be li ee qequanr, hxing qex kacc yh sriux,” laurbingsu janrcuir.
“Linw nng xui jenvuer, qongxue ee kauxkir qapp dua suhniax jiokk singg,” siyw sumue kiw air ciyr, hniar srinx hiongr guarbin giyw .jit .xe.
“Si dyrr driyc m. Linw u kir jiac diyc ix ee cuiwnua, si bor?” ozisang vnuar qongxgiak.
“Qongw diyc lanw jitt xee suhniax, ix qamxx byy qadingg rair qor rair jiaur? Knuar ix qaxnaxx ingg sensenx,” laurbingsu jin’ hnowsusiong.
“Ix lirenn :ee lar. Qongxx qethunx m jnriu nng nii, bow dyrr duer langg’ jauw,” obasang lyxjenxvuer jaix siongrr je.
“U ginxaw bor?” siyw sumue mng.
“Byy.”
“Ix hitt jun qaidongx iauxx jiokk siauwlenn, tacc e byy qycc crua?” siyw sumue qamxqag giquair.
“Liongrvid si duw quer jit vaiw aur cenw vxuah, cauxsyh ingxingw knuar jyr juaa, quikir jyr lyhanwkax,” ozisang cniuw lecc huedab.
“Dnaxx ix jit xee luiqongbin qycc byy cuir suiw, siyxjiaxlangg knuar diyc marr qnaxx be qacbak,” qongw :ee decc nee ciuxlongg, venrsow vniar hyw duxjiacc zip .laii.
Kangkuer liauxqiok, qui’ cuwqingx qngx liuliux. Dirr jingg tnxiax :ee dairjir iarr duxhyw qongw uann. Jingwlangg duiww sensux viauxsi qamxpuer, it’id qapp ix vaiwvet.
“Dua suhniax, au huee si m si diyc guaw ee unn jyr jorciuw?” langg jauw li jinwjingg, Gnaxsunn qnuaxqinw beh kakding.
“Hner,” dua suhniax rinr diyc danqanw.
“Rair guaw draur lenlok bor?”
“Hnaa?”
“Si m si diyh’air…”
Tingg cuir, Gnaxsunn huathen dua suhniax bagjiux knuar duiww kia dirr mngkauw ee siyw sumue hiax byy decc jimjiog tniax ix qongw. Beh mng ee bunrdee tunx .lyc, Gnaxsunn iyy tauu tanwsig.
3.
Pnri e diyc jrux ee pangbi, tec dirr ciuw nirr qycc qaxnaxx u siykir. Sinx ceh jit tong snax kunw duxduxx jiacc siux .diyc. Ixjaw ee dongliauu qapp qowqaux, sui’ langg diyhh qiar jit vunw kir. M si beh air jurdenw, suncuir qniax juer inx dirr banglo iacc cecdiamr qaqi knuar .diyc laii decc sunmng, dng’ hitt sii dyrr srid langg’ lew lor.
Sui’ vunw aw quer srunn byy lauwiac, Gnaxsunn ciuxsimx tenw kuix jit kunr sax snax vunw beh vauhongx, vuahciuw, ceh qalauc. Qajair juaxdew zun, cecpuee qau, byy kir auw .diyc, qycc marr byy pachiongx.
“Liw jniar ciuw be jiclat, u dangrtauu :ee beh tec kacc mair iong jitt qix, narr qycc siongx .diyc qniax liauw e pnaiw idi,” beh tewngi jinwjingg, juxdirix jap dinglingg veh huanhur.
Dyr ciuw be jniurjua, quanwciuw ee dongrjog yh qaixik, muixmuiw si qamxqag diyc batniar ar, hionghiongg jiacc diwqag qaqi iurqycc ing m driyc qix ciuxqud.
U denrue laii, ciuxtauu ee sxid jiamrtingg, beh jriab diyhh li xui qniaa duiww denrsirqix hitt vingg.
“M si qongxx mrbenw jokjiaw draur huawqingw? Qamxx itding diyh’air kir? Hab’iog-dingw marr byy let jitt hxang a,” Gnaxsunn qongw, jit ciuw giaa denruerdangg.
“Cutvanw-giap qinrlaii singliw jin' siyc. Langg’ bexkeh jit kunr beh moh jit-cingx vunw dngw .kir. Inx ee iauwqiuu, lanw jinrlik ingwhur inx qaxx qaur, jex qamxx m si soxx dongzenn ee dairjir?” cutvanxsiongx dirr denrue hitt tauu vnuaa jingliw.
“Jit-cingx vunw!”
“Si a, liw m jaix?”
“Qamxx jai’ngiaw duiwhongx si sniaw vuerqingw?” Gnaxsunn mng, taukag-lai puu cud jit xee hingngiaw.
“Lanw jitt xee dinkeh si duarkecsiongx, marr si haghau qedniuxhue ee huerdniuw. Ix beh brew liw ee uerceh sangr tong’ hrau ee sensnix qapp hagsingx knuar, qycc beh pingwcniaw liw kir qangxenw, decc mng liw ee iwhiongr sniaw kuanw.”
“Si sniaxmih kuanw haghau? Qokdiongx? Qydiongx? Iacc qokhau-aw?”
“Qydiongx, sulip qydiongx.”
“Sulip qydiongx! Ix sner sniaw?”
“Ngg.”
“Ngg?”
“Anwjnuaw? Liw u sigsai?”
“By… byy.”
Denrue qongw suah, Gnaxsunn kia lehh sniu qaxx sim sim. Dongcox surqor, qud jric bah lic dyw dirr bincngg ee sii, qiyr siyxdi qa’ngg qongw qaqi ixx sinbongg qaiww sxingg u he jindniux qycc jiokk piauped. Langg’ jinjniar siongsinr byy qycc duix, qaur jinw duiww ix iauxx vangr be lyc, kyxviw jitt diap simqnuax bun bun be cingcaiw, m si vadd jann laii soxx drir, juann uirdiyhh kecsiongx sner Ngg m si sner Vngx. Sniu qaur jiax, Gnaxsunn dner cinwciyr, iukow jairr simdiongx.
Cuann qangxqyw, suar .lyc .laii ee zidjiw, qex jit hxang hro qaqi taukag byy ingg :ee qamxqag marr be baiw. Iokqii dirr vaiwsir, jit vrangx qongciax qaur der, Ngg Huerdniuw vingww dirr duarmngg danw beh jrih langkeh.
“Hyy Siyxjiaw, jin’ dysia liw vuacqar lailimm,” huerdniuxlangg hyw tauu hyw bin ciyr bibix.
“Si guaw rair qamxsia .liw jiacc driyc,” Gnaxsunn iarr sueh qingwsuu.
Huerdniuw jyr kanlangg, siaurqair Gnaxsunn qapp haghau ee huaddong-jodniuw siy’ bad. Jap hunjingx au, inx snax langg dangjee laii qaur dua huerdngg, hagsingx buanxdongg.
“Jit dniux doo tuansangr jit xee qamxciog, go-jap gua xee qamxciok zuhyy habsingg jit xee simsig qycc u ham’ir ee qxow? Lanw qinaxzit iuxhing cniaw diyc jokqax vunxsinxlangg laii uirr lanw qangxsuad. Hyy Siyxjiaw, cniaw.”
Huaddong-jodniuw sueh inxqur juxcii kaidniusig. Gnaxsunn jniurdaii, qapp daii-kax jap-lak~cid huer ee langsunw dngtauu-duiwbin.
“… bylun si siaw bunzi iacc rue ang’aw, giaa envid iacc giaa sikvid, jursinx ee simjingg qapp qamxsiongw, liriong qaqi siongrr duiwlo ee qesix qiwlok vyxquir ee lensiauw-cunciux… Knuar hro siongser, tniax hro juxser, dagg sii vyxcii kaihongr ee simqnuax, jit luiw huex iacc jit qix cauw iarr tangx hro lanw huatqenr diyc lingrr jit kuanw sewqair, tig saisaix.”
Iokk vnuar diamxjingx ee enxqangw suah, muaxdniuu pah ciuxjniuw hatcaiw, beh air jokqax dirr inx ee ceh ciamx miaa :ee jin tranr jitt jun.
Snuawdniuu, Gnaxsunn qapp langg’ vaiwvet ee sii qycjaiww suecsia. Beh lirkuix qniaa laii qaur cuandngg, jit xee cing amwlamm sejongx ee javolangg dirr hiax kiarqauu. Gnaxsunn jiac jit qniax, simqnuax dua lat ciak .jit .xe.
“Guanw haursnix marr tak jitt qingx,” crig uaw qinrjingg, Sewsiux qaqi diamxpuar benw danw langg’ mng.
“Jiacc duxhyw?” Gnaxsunn qongw, ciuw moh ceh, mehqow pogpok cingw.
“Rmuaa jiarr rmuaa vutsig. Guaw jiauzin, jitt diauu kaksit si guaw cud :ee. In’ui qniax liw narr jaix e qirjuat, mrjiacc kir tog qedniuxhue-huerdniuw cud tauu cud kax,” soxx iulaii, Sewsiux unn aw sueh kiw, u junxvi jairsenx ee kuanw.
“Liw nacc jai’ngiaw guaw cud ceh?” Gnaxsunn u gibun.
“Guaw mng linw dongcongx :ee liw ee qinrhongw. Ix qongw liw venwjniaa jokqax ar, sinx ceh beh cniaw ix siaw tausu. Guaw dyrr kir Google cue cecmiaa.”
“Dukiw jex, ix qamxx iauxx u qra liw qongw snaw?
“Byy. Ix qongw linw nng xee jiokk quw byy qniwbin ar.”
Hongzinn-venrmaw ee soxjai, diddit u hagsingx qapp sensnix qniaa qingquer. Sewsiux tegi cue jit xui kacc piacjing :ee kacc hyw qongxue. Tnihau u decc huanxvenr, diongdaur ee sii iauxx hyw tnix qaxx, jinw vnuar ximx vnuar jnee m jniaa tnix. Haurhngg-lai kacc uaw bixsut-qauwsig hiax u jit jxy liangdingg-aw. Langg dirr lairdew, ho laii iarr m qniax e lramm .diyc.
“Liw dangsii jaiqiyr guaw byy siw?” dirr liangdingg-lai ee iw nirr jre, Gnaxsunn mng Sewsiux.
“Soxdiw qongxx linw siyxdi penr guaw qongxx liw sitsu si liw qar ix qongw :ee?”
Tauu lee lee, Gnaxsunn hmc hmc m juer sniax. Danw byy diyc inwsniax, Sewsiux trow jit kauw kuir qycjaiww sueh kiw.
“Kar denrue kir setqer-qongsix beh cue :liw, langg’ qra guaw qongw liw tewjid ar. Ngua kar liw ee ciuxqix, vorvinn hro jit xee snihunrlangg vywsueh qongxx liw cud dairjir, simqnuax mimix suar gong .kir, iarr byy jabingg, jit sniax dyrr sinr, qycc qankow quixnarr zit,” Sewsiux dnir kenciyr.
“Au .laii lehh?” Gnaxsunn mng, qnuaxqinw beh jaix taubuew.
“Au .laii u huehunn a,” Sewsiux duiwcuir rinr, dyh-dingw jit pnir lauwhiyc qra vuew duiww tokax .kir. “Duiwjiab cue langg sunmng byy-lex.-byy-sor, guaw dyrr kir amwjax, kakding liw iauxx uac lehh, simlai jit hiw qah jit iux. Liw duiww guaw jinjniar jiacc cinwsimx, diyhh iong jitt jiongw qighuad laii qapp guaw juaddng?”
Buew aw qxur si mng iacc lun tniax be hunbingg, Gnaxsunn byy inwcuir. Ho sab sab aw lyc, dirr liangdingg-lai byy honggai, duiwdamm be siakpah qamxcaiw kacc suxx langg’ jiaujyx.
“Liw brew guaw ee ceh si sniaw cun’ir?” Gnaxsunn mng, uertauu kanx dywdngw.
“U sniaw m tywdongr iacc m habsig mah? Daiuann si juriuu ee qokqax,” Sewsiux dab diyc kingsinx.
“Hing’uii vunxsinx byy juadduir ee hyw iacc baiw, driyc iacc m driyc. Cuthuatdiamw si uirr tazinn iacc tranr suiok jiacc si snesixmngg, iarr dyrr si hudqax decc qongw :ee kixsimx-dongrliam,” Gnaxsunn qongw dyrliw unn unn aw si.
“Guaw dansunn duiwdiong liw ee jaijingg, beh air kacc je langg u qihue knuar diyc liw ee ceh. Jitt xee dongrqix, e quewquanx bor?” Sewsiux mng, kauxkir iuguann kinvyc.
“Jurjog-jurdongx, mrbenw quer guaw qamr. Jriw qniax liw byy diog’ir, cuir byy tranr simqnuax ingxingw si e qyckacc hai.”
“Driyc lar, guaw si Liongg Buxder, simx vutjingr, qongdig longxx jyr dirr bong’axvox,” voksux .langg, Sewsiux saixser. “Beh cingxqaur liw jitt xee Bodhidharma juanxser :ee. Liw qapp guaw kaux cauw, qiyr langg’ qongw vehcat penr .guaw, jitt jann diyhh jnuaxngiu lunrsuad?”
“Hex sriok vit’iaur ji’ og,” lingw bin, Gnaxsunn dab diyc dit-lix.-dit-lo ee kuanw.
Liab pni, erdauxciux syx .jit .xe, Sewsiux cimx srux jit kunr, sueh qongxx, “Guanw bow dirr vnerngi limjiongx jinwjingg u mng guaw guarbin qamxx u jabow.”
“Liw anwjnuaw qra huee?”
“Guaw qra iyy tauu.”
Bin siyc siyc, diyc qaur Gnaxsunn decc qikliw cimx sniu.
“Liw si byy air ix siongsimx jiacc anxnex viauxsi, higjiaw sunzenn decc vyxho qaqi, qniax hro ix qenwgii liw hai ix puawvni?” Gnaxsunn mng, bersux jit xee luxix decc liac vnirqinx.
“Iarr qnaxx jitt nng hxang liongxqiamx?” huanrjiaw Sewsiux iarr u juxqenr.
“Jex marr u kyxlingg,” Gnaxsunn dimr tauu. “Si hnuaii si dit, jongw diyhh liw zibsit jursingw.”
“Liamrtauu u jniar iacc byy jniar, beh jnaixngiu duanwdnia?” Sewsiux mng.
“Juann kyr diwhui lor,” Gnaxsunn dab.
“Diwhui beh anwjnuaw jiacc e qediongg?” Sewsiux qycjaiww mng.
Sulu .jit .xe, Gnaxsunn qongw, “Iogbong zuxx jiyw, diwhui ingxingw dyrr e jingtiamx.”
U daiwgii, Sewsiux tauu kix kix mng qongxx, “Jiawiong diwhui soxx jyr ee quatding qamxx erdangr vyxniaw u hyw ee qetqyw?”
“Hyw-baiw jairr langg knuar, qycc qanda' knuar bagjingg byy knuar kacc hng marr be junw,” Gnaxsunn qaixgii. “Jiac tenliongg, byy kuisimx, dyrr sngr buexqiok byy hac langg ir marr buhongg, narr byy hongwkir, suisii dy’ tangx dingg pah kiw.”
“Kiarr liw jimxmaw longxx be auwnauw iacc hiyrhuew dyrr driyc?” Sewsiux mng, u decc sna’ qig ee kuanxsig.
“Cair kuair jiac, hxing yh sriux. Iong qongw :ee kacc kuair,” Gnaxsunn liac ue sna’ rinr.
Ho u venr kacc cox. Sewsiux suaw kacc lairdew, qiyr Gnaxsunn jre kacc zip .laii kacc be kir punr .diyc. Gnaxsunn jiauww jyr. Sewsiux tranr srer uaw srinx, nng langg qin bicbih.
“Vangqiyy ee cur byy suer ar?” Sewsiux qycc kanx jit xee uertauu .cud .laii, dairkair si qniax qnir dniubin lingw .kir langg’ e jre be diauu.
“Hngr.”
“Liw ixjaw hitt qix ciuxqix-aw qamxx iauxx e tongx?”
Gnaxsunn hnair tauu.
“Sinx ee hyrbew erdangr hro :guaw bor?” Sewsiux sewzi aw mng.
“Lamluw-jing'iok lanw ixqingx vaw qah juir ar. U anwsngr beh tewunw, sing’uac beh jinrliong dansunn,” Gnaxsunn nngw nngw aw tekuix.
“Lanw ciauquer vnuar dxangx byy sna’ lenlok, qinaxzit sionghongg, liw dyrr qra guaw hangw qongxx beh kir juer niqox!”
“Vngx jitt jit-cingx vunw ee vanxsuer, ginhangg ee junknuaw tnrix qeqiamw, qinrzit-lai habdongx dyrr tangx huanjer, uancingx qewginn.”
“Liw cud jitt vo, si tiauqangx beh qra guaw linglig iacc si qiyr guaw sixsimx?” Sewsiux mng, bin iux iux.
Tauu ngar ngar, Gnaxsunn diam cuir diam jic.
“Guaw jiokk simx liam liw, guaw beh qapp liw dngqah,” Sewsiux qongw, siangx ciuw crunx .cud .kir qra Gnaxsunn ee lrak dirr qaqi ee ciuw-lai. Gnaxsunn qunwqiong, ciuxqud tiux dywdngw.
Tnidingw ee ho iurqycc venr mngx mngx. Sir diamw jniar, haghau jxingx-aw-sniax hiangw, byy druar sioksiar :ee beh vangwyc. Gnaxsunn qra kngr dirr dyh-dingw ee juceh moh lehh vreh kiw srinx.
“Guaw u sraiw ciax laii, guaw jair liw laii dngw,” Sewsiux qongw.
“Benw, ciavaii-aw dirr haghau qinrvnix dyrr u,” Gnaxsunn qra siarjuat.
“Liw qamxx u jah hornsuar?” Sewsiux mng.
Gnaxsunn hnair tauu, qongw, “Hoaxciux nia, byy dirduardai.”
“Guaw vruee liw qniaa kir qongciajam.”
Javolangg ee bixir, Gaxsunn qycjaiww qra srii. Byy qex qongxue, Sewsiux duer lecc qniaa birsi. Qauwui, Sewsiux iog Gnaxsunn vaiwlak jiahvng. Gnaxsunn trex qongxx hitt qangx u anvaii ar.
“Iurqycc beh kir qiongrsiux?” Sewsiux mng.
“Hngr,” Gnaxsunn dimr tauu.
“Lanw camsiongg .jit .xe, hyw bor? Liw hro guaw jit xee jiongqongx-voxjue ee qihue, jit dxangx lai mair kir sniu cutqex ee dairjir,” Sewsiux qra hyw cuir.
“Liw decc siacsag guaw hiongr sxen ee iwjir, qyxhe si moqongx byy m driyc.”
Qongciax laii, Gnaxsunn jnriu ciax. Ciax sraiw kixtingg, Sewsiux jiacc qniaa lirkuix.
4.
Dirr bangrlo-dingw cue cur, diauqnia u hah’ir, siaxjinx iarr suiw gianggiangx, kir sidde quanx sidqingw jiacc jaix cyr dua bxew, byy hahkuanw. Quewkir nng lexvair knuar sir~go qingx .kir ar, Gnaxsunn qimjaw jitt jua iurqycc si kiamr kajer, tyw kax qniaa.
Jingwgnow sikig, dirr qinrdaux cue jurjorsig ee caiwdngg jiac daur. Ervox u qiongrsiux, juer jorciuw :ee rair kacc jaw qauwui, beh kir diyhh dah qongciax jiacqycc vnuaa denrciax, lorjua diamr cur nirr u singx Google Map craa .quer ar.
Hur sii hur kxig qaur der, siangx dingg mngg longxx byy qnuix, kuix hiahiax. Mngag jit dow tniakauxvinn si jarhngx ervox laii vror derdniuu ee sii jiacc cai :ee. Tokax u potuann jitt vingg diyhh qimwkauw, vindow lingrr hitt vingg dirr au qingx erdangr qongxue, mrqycc diyhh jinrliong kinx sniax ser sueh. Jiamrsii ho’ngg juer senvongg ee tniabin, byy kia vinhongx iacc rue qaiwpiaux, jit jua vordy, lamluw hunqair.
Siqanx beh uaw, hagguann liogsiok jurjip laii qaur. Vut’iwqanx ngiaw diyc lamjiongr hiax jit xee taumngg vnuar ovec :ee, Gnaxsunn mec .jit .xe gonggniac.
Miapo dirr dua suhniax ciuxtauu, jingrr jaw qaur dnaxx longxx ix decc huad tongdix qapp langg’ jiap’ingr. Juanzenn byy pxex langg’ e laii jiax, jiangwsii ee simjingg, hnuahiw ham’ huanlyw qaccamx, vixle sniaw kuanw, pasor qokk dinr zuarr je, Gnaxsunn simtauu luan qrar qrar, byy jaidiau hnuarsngr.
Dyrdniuu berdangr suec’ue, Gnaxsunn giangx jxingx-aw, qokk langg dirr qaqi ee xui jre jniar jniar. Simsinn be dinwding, tiabje ee kaqud kixsingx e baa e vir, kacc kir dngxvnir jyr sngx, quibew iarr vniwsniur, uadnaxx jre uadnaxx simx hxongx, sinkux gniauc gniauc drang juann uirr beh jriw tangwtniar.
“Iogliam byy dixjiw, buanxjiog quewir jin jidsii, narr vutliauxzenn, byy liauxgo, zuxx vuac zuxx cimx qaizenn, hongwcniaw hro lanw hixlok :ee ingxingw iarr e hro lanw siongvix… Soxx air :ee u hunliuu. Hingr jiuw, hingr qxiauw, hingr hunxbi, jiaxee sriok kacc qe jancur, jiac-vruac-tid byy liauw sii. Ciuxdnua jingwdongx, qriuu jaii-jxuw-sxiu m si hairog, qiuwqizenn si uirr suli. S.-surhang-h. narr ixx iklangg juer diongsimx dyrr be lirqingx, jyrhog tazinn iarr si decc lirig jursinx, qongdig sngr vutjin.”
Sensux uirr vut ee jiongww derjuw kaiqaiw liauw, qimwkauw-lring quexduu, suisii diyhh vniawdng. Co’ crur laii jitt dah, Sewsiux tranr lauxjiauw ee ngiu, lrik ciuw vrih kowkax decc danw langg’ pair kangkuer hro jyr.
“Linw qongsix ee jitqangx iacc cur nirr ee obasang narr knuar diyc liw jitt xee hxingg, m jaix e sniu jnuaxngiu?” qimzit sna’ duxtauu ee tauu jit qxur, Gnaxsunn naxx qongw naxx air ciyr.
“Inx diyhh yc guaw laii jiax siuhing jersenn jiacc knuar e diyc,” Sewsiux rinr diyc vnuar simsig.
Kir janwvangg giaa jit qix jangsaur laii, Gnaxsunn hunpair Sewsiux vniar jauxbexlauu beh singx cuarcaux.
“Guaw erhiangw lar, guaw si u zip ngiaa jyr vxingx .quer .ee.”
Sewsiux an’ Gnaxsunn ee ciuw nirr qra qesix sax .kir dyrr kixciuw. U jit xee sujew uaw laii beh mng dairjir, Gnaxsunn jurr anxnix vangr ix kir.
Jitt dxauw laii .ee, sigciuw :ee kacc je, cnikax :ee byy quiw xee. S.-sirsua-s., vnuar diamxjingx dyrr siuqangx, langg suawsuar lirkuix. Gnaxsunn jyr jorciuw diyhh siubuew. Dua suhniax iauxx decc hiongr sensux cingxmng dyrliw, dyr ciuw qruar jit sog liamrjux, vowsnax qui’ sux lauxdesig tunn tunn. U .jit .quw .aw, dua suhniax duiww sensux kauwdab. Inx nng xee siongrr buew aw jauw, lyc laii laukax, knuar diyc Sewsiux qapp siyw sumue dirr lorvongg u qongw u ciyr.
“Inx jaboxqniaw qapp guaw tak qang qingx dairhak neh, kiarr guaw ee hagmue,” knuar diyc langg laii, siyw sumue qongw, ciyr bunxbunw. “Guaw qra qongw Gnaxsunn Jew si guaw ingxquer ee tauqex, jiacc jaix Hyy Suhniax qapp Gnaxsunn Jew u sna’ bad.”
Liongw lxamm liongw luw, Gnaxsunn inx dag’ee longxx u sigsai, uirr dua suhniax qapp Sewsiux jyr qaiwsiau hab’ingqaix. Sewsiux jiyx dag’ee dauwdin jiac amr. Dua suhniax byy air jyr vuevinx tesuqor, qongw ix jiac cair byy jiac cyx.
“Gnaxsunn Sujew marr qniax iucyx. Lanw jitt xui siauxluw ee hagjew, liw u jiahsor bor?” Sewsiux mng, bagjiux knuar duiww siyw sumue.
“Byy lehh,” siyw sumue iyy tauu.
“Jriw qanda’ liw qapp guaw byy jiauww kixqangx, lanw nng xee byy quaix,” Sewsiux qongw, iong qixjnaiw qiw ix qaqi qapp siyw sumue.
Siyw sumue jniar ciuw ngx cuir ciyr qaxx jiokk qoxjuix kuanw. Dua suhniax hngc jit sniax, bak huew bak dag vnir cnix bin. Sewsiux m ciuwcaiw ix, ciongwgi linqin cue sowcaiwquanw.
“Diyhh cue zuarr quw iacc qniaa zuarr hng jiacc u?” Gnaxsunn u digii.
“Guaw u ciax, benw qniax,” Sewsiux diddab.
“Lexvair sii aw, guaw quer daur byy jiac,” dua suhniax qongw diyc siokzenn, jin’ u uigiamm.
“Lanw jitt xui suhniax u sxingg cutqelangg dyrr driyc, jingcax taukag u taujangx,” Sewsiux qongw, uerir si decc qra saksaux ee kuanw.
“Jairqax ee qusu marr erdangr u dua singjiu, byy itding rair cutqex, kyxviw Vimalakirti dyrr si,” dua suhniax qapp Sewsiux decc vnuaa cuiwgimw. “Huesniuqax rair junsiuw ee qaiwlut jin’ je, beh tuaniongg dairhuad ursii e iuxsow quawgai.”
“Anxnex qongw qaxnaxx marr urngiaw,” Sewsiux duiwcuir dab. “Vutjurliong qycc sulu cenxvyc, tauu tir ar, sniu tewhuew jiacc laii huansiok e dyww lixlaiw dyrr driyc.”
Jit qxur laii, jit qxur kir, nng xee javolangg sna’ vyccuir. Qapp dua suhniax vnivnuangiu, Gnaxsunn iarr jiokk byy air kir jiac jitt dxngr, kacc sux u langg qaxnaxx hingr ciccih. Ix narr byy kir pnuarjiac, jitt dxngr qnaxx dyrr junw suah, hitt xee langg e sitbang. Acc narr qra dua suhniax vangr lehh iurqycc jin’ sitlew.
Jit vingg qxaux jit vingg jxunr, simqnuax hunrjap jin’ lan’uii, Gnaxsunn sniu jinr sniu trer. Dua suhniax byy-di.-byy-dangx jit sniax “jiycquer”, qongw beh kir kanx kadahciax.
“Liw an’ linw daux kiaa ticbew laii jiax or? Hex vutjiw aw u jit jad neh!” siyw sumue qongw.
“Ticbew be vangr ox enx, be hai langg’ diyc hiwvne.”
Ue qongw liauw, dua suhniax uad lehh dua huac qniaa, aur durdu byy qycc huetauu. Qor langg’ uanr :ee jid’err jauw, simtauu sangx, Sewsiux suisii kiw qauhingr, jin' lex ee kuanw.
“Guaw duxaw jiacc sniu .diyc. Jairqin u jit qingx Inwdo liaurlixdiamr, juanx juw sor :ee, hongtuann qongxx jin’ janw, jamxzenn aw hyw bi,” Sewsiux dua dua quxjenr.
“Suhniax, jitt kouii-aw liw u sik?” siyw sumue mng.
“Sowsit u decc kuix hongkir,” Sewsiux qongw. “U decc vran caiwdyh ee cantanix qex jaiqiyh .jit .quaw, rair ingwsiuu langkeh ee sijun, kacc be limsii-lim’iau cue byy soxjai.”
Dnaxx qatdnia dyrr beh kir jitt qingx. Gnaxsunn mng qongxx dairiog aw dirr dyc’ui.
“Guaw narr byy qir dna, cud hang-aw dirr dua cialo duiwbin,” Sewsiux qongw.
“Narr qin qin :aw byy qaiw hng, si m si vorqniaa mair jre ciax?” Gnaxsunn qenwgi.
“Lanw suaw kax kir hiax, ving linw dirr jiax danw guaw laii jair .linw diksit e kacc qinw.”
Sewsiux kaiqaiw liauw, quww nng xui luxsu cuxquad. Siyw sumue byy ngirgi. Kiyckixkax, javolangg cuartauu qniaa.
Anghee muaw tnix, cinghongx bibii. Hang-aw ser diauu, snax xee duarlangg vaii jit hangg iauxx u qraur kuah. Gnaxsunn uaw cniuuii qniaa, siyw sumue giab dirr diongngx, Sewsiux dirr dywciuxvingg. Laii qaur hang-aw-tauu, Sewsiux ciuw qiw iurvingg. Ding’axkax u tingg qiciax, qycc vutsii rair qapp duiwhiongr :ee siy’ siamw srinx, Sewsiux niu nng xui luxsu singx qniaa. Inx snax xee jurr anxnex venr jyr jit let. Quer cialo .quer qniaa jyxvingg u jxaix qadangciu, snax~go vo dyrr jit jangg. Nng xee qimzit co’ sigsai :ee jidlo jiokk u ue qongw. Qniax inx duiwqangw in’ui ciu-aw laii jeddng be sakpah, Gnaxsunn ac’au bersux qindingx, hro inx tangx qrangw jit xee kacc u lehh.
Sewsiux ee qiwdii byy dingdnaa, marr qyxzenn byy hng, lortingg dirr jap hunjingx lai.
“Dangsi’aw si jitt qingx or,” siyw sumue huah cud sniax. “Jitt qingx ee liaurliw guaw bad jiac .quer, mraxqycc si dirr vadd xui ee hundiamr.”
“Qacc si anxnex, kacc danw qiyr cair ee kangkuer dy’ qaux hro liw oox,” Sewsiux duiww siyw sumue qongw, gix gix aw ciyr.
Laukax byy xui ar, qipsu cua inx kir lau’axdingw, jit der guehdyh jre snakaduw, menu sui’ langg jit hxun hyxlew aw kngr dirr inx binrtaujingg ee dyh-dingw.
“Gnaxsunn Jew jiacquw aw ngua jiac juann sor, jex guaw jaix. Acc Hyy Suhniax liw lehh? U sniaw byy jiac :ee bor?” siyw sumue mng Sewsiux.
“Guaw jin’ hyw cuiwdauw, sniaxmic dy’ jiac, jiokk hyw cri.”
Sewsiux qongw liongxpak-kuiciyr :ee, siyw sumue ciyr cud sniax. Cair juwbunn liauw, jit xe aw quw, salad dairsingx jnriu dyh. Cnix qnanaw, ox qnanaw, tomato, ngiucair, ngg qamjiyx qapp ciwqueaxnii lam lam jywhuew, gorhuex-jabsig.
“Inx jex jniur jiokk cnixcuir,” Gnaxsunn ylyw.
“Si ar,” siyw sumue janrsniax. “Guaw tauu vaiw jiac .diyc dyrr qamxqag jiokk cutvan, qapp vadd langg ee jiokk byy qangrkuanw.”
Jidbin decc hiangxsiu hyw bi, Sewsiux la uertauu, mng siyw sumue qongxx Gnaxsunn si m si u tauqex-van.
“Gnaxsunn Jew jiokk qinggiap marr jiokk u damxdir, duiww guanw jitt quaw erciuw qycc diong jxingg diong gi,” siyw sumue unn aw sueh kiw.
“Anwjnuaw qongw?” Sewsiux mng, u hingwbi beh jaix siongser.
“Guanw qongsix hitt jun si caixiong jikzimrjer, kiarr byy qavanhuir. Qenwnarr duw diyc duarguec, guanw longxx hnuahiw-qamguan lauu dirr vanrqongsig beh qra kangkuer jyr hro liauw. Ursii cenn jit xe sniu’ nguar, Gnaxsunn Jew qniax guanw jre qui’ qangx e tiamw, sintew e srngw, veh diamw quer dyrr qra guanw qnuaw qnuaw .dngw .kir, ix qaqi jiacc laii lamxbuew,” siyw sumue qongw.
“Linw si qongsix ee dexjiyh, dniardiyc rair vyxsiyh,” Gnaxsunn dauwue.
“Guaw iauxx e qir did Gnaxsunn Jew hitt dangjun u jit xee javox ving’iuw, endauu qycc textiab, vutsii e laii qongsix beh jriab ix harvanx, hro guanw jiokk himsen.”
Jauxdyh :ee qra snax nguaw sikdir ngirngiu ee qaliw juer jit xe sangr .laii, jit nguaw u caiwdau :ee, jit nguaw u lenjiw :ee, lingrgua jit xee si maxlingjuu qapp Bixqog-huecair, lramm vng iacc iong vyc vniaw vaux lecc jiac longxx u hac.
“Inx ee qalixqiauw marr jin’ u miaa. Mrqycc lanw jitt dxngr u vng iarr u vniaw ar,” siyw sumue qaixsueh.
“Aurzit aw iauxx u qihue a,” Sewsiux sueh qinw qinw. “Xe jit huee vaiwlak qiongrsiux, lanw tangx qycc laii.”
Inwdorlangg jiac vng qorr ciuw liap, Sewsiux qapp siyw sumue, jit xee kad u caiwdau :ee, jit xee ngiuw u lenjiw :ee, beh jiac iarr diyhh ing tngsii kacc quanwsir. Gnaxsunn tec jit der vyc vniaw, vaux qaxx lilixlaklag, vutdapvutcid. Siyw sumue knuar be juer tihh, tngsii vangwhe dauwjan, suawciuw vaux jit xee hro Sewsiux.
“Liw ee ciuw jiokk u pa,” Sewsiux suecsia qiamx janwbiw.
“Guaw lauxciuw, liw be qir .did ar?” siyw sumue qapp Sewsiux pah ciywkuex.
“Ix u huer ar, decc lyxsuex,” Gnaxsunn qra Sewsiux kuesew.
Sewsiux ciyr qaxx kenwtenx, cuir-aw hix hix hix, suar mng jairjy nng xui luxsu, yc senn jitt jann, si’angw si hyw cuartauu.
“Guaw sitluann, cue Gnaxsunn Jew kauwkow. Gnaxsunn Jew vyr guaw kir snuadingw jingrsimx,” siyw sumue cniuw lecc rinr.
“Haurqyw sniaw kuanw?” Sewsiux mng.
“Siuhing jairr qywzinn. Si guaw qaqi kacc byy huirqinx.”
“Iarr suacc urngiaw! Liw ixqingx juanxvenr jiokk je ar,” Gnaxsunn qra benxle.
“Duxjiah hitt xee suhniax, ix itdit longxx byy bow qaax?” Sewsiux dam dam aw mng kiw.
“Tniax qongxx jiokk jaw ixjingg u jit xee, mrqycc lirhunx ar,” siyw sumue suec’ue.
“Qamxx jai’ngiaw ix decc jyr sniaw qingqiw?” Sewsiux qycjaiww mng.
Lig bagbaii, siyw sumue knuar hiongr Gnaxsunn.
“Ix jitgiap qunzinn tewgnow :ee, jitt quiw dxangx qui’ simx decc siuhing, decc jorjan dairhuad liutuann,” Gnaxsunn suatbingg.
“Guanlaii si benw tanr benw juanxjiac :ee, ix jiacc e jiacc liangg, u siqanx tangx bruw jiaxee,” Sewsiux qongw, pixvok ee uerkuanw.
Vngrcair kaw bi u kuivii, vng qapp vniaw sud qngx qngx, snax nguaw qaliw longxx iauxx u, byy jiac pacsngw. Inx qycc qiyr jit der CHAPATI, snax langg qongqex draur kingg caiwbuew. Liammisii sangr .laii, Sewsiux ciuw decc lir vniaw, naxx decc janwtanr sensux un’iongg u senqud.
“Ix m na u senrsimx, qycc jiokk u diwhui,” Gnaxsunn tnrix ue. “Jinwjingg vakvo itdit cue byy soxjai tangx qiongrsiux. Ix qra cur dingg cniaqig, vangqingx paclongxpongg, jiyx dag’ee vaiwlak kir ix hiax hagsenn.”
Jaiqiyh jitt jann, Sewsiux qingww qamxvue.
“Qongxx si tewhiux ee laursux, jit siwlangg byy qewangx,” siyw sumue iarr jit qxur siy’ tnrix.
“Byy qewcua :ee longxx kacc u diwhui, kyxviw guaw binrjingg nng xui dyrr si. Dy’ guanw jitt hy gong langg jiacc e kir qethunx, snix qniaw,” Sewsiux siaukenw qaqi.
Tniax jit xee kiw air ciyr, siyw sumue qongw, “Angbow sna’ hucii, siuhing ee lo u langg juewpnua, byy dniardiyc e kacc sunrlauu oox!”
Siyw sumue qongw liauw, Sewsiux mng Gnaxsunn u sniaw qyqenr bor.
“Hunpuer si tauxtuah vo. Lingkyw qewcua kacc ngiaa, ioghuew decc dyc dyww jiahlat,” Gnaxsunn ingwdab.
“PAUL qongw :ee?” Sewsiux mng.
“PAUL? Dycc jit xee PAUL?”
Siyw sumue mng, bagjiux knuar Gnaxsunn. Gnaxsunn byy rinr, tauu ngar ngar, bibii aw ciyr. Siyw sumue uad hiongr Sewsiux. Sewsiux qingqah tec .jit .xe biccuir decc ciyr.
Mng byy herlyc, m jaix soxixzenn, jnuai linwdngw, siyw sumue mng Gnaxsunn qamxx iauxx u decc jyr hogqenr.
“Hogqenr!” Sewsiux qniagii.
“Hner a,” siyw sumue suar lyc qongw. “Gnaxsunn Jew dingw vaiw beh kir Lamdauu sensiux ee sii cud ciahy, jit kax jit ciuw qoo jiyhqyx, taulo iarr suacc srii driau. Ciuw kacc kinx siongx, jniar kax diyc dang siongx kacc yh hyw, vaiwsnax jaxqanx dingrqii rair kir vnerngi vywdyr.”
Bin dngw sig, Gnaxsunn damr tauu byy uersueh.
“Hyw did qajair ciuxqud u hrok .dngw .laii, jit jam aw ciuw gaii, jin’ qinw dyrr guanjuann. Narr byy jiarr, lenrr beh diamr cur nirr uerdoo doruac dy’ qanlann,” sumue qycc vow jit qxur.
Jiac vng vaw, vngrdiamwvyy qra nguaxvnuaa siux .kir. Kax jriab kax, qipsu qra sotngg diamxsimx sangr jnriu dyh beh hro langkeh suawcuiwbuew.
Jiac dnix dnix, siyw sumue tegi lexvaiwzit jidjee kir Dik’axoo sniuw huex. “Qongxx siuwqiuhuex kuix qaxx jiokk suiw!”
“Beh kir, linw nng xee dyrr hyw. Guaw pnaiw kax, qniaa be hng,” Gnaxsunn tetog.
“Hiax ciax e qaur, benw sniaw vreh,” siyw sumue voxtnix.
Ciyr ciyr, Gnaxsunn iuguann iyy tauu.
“Linw u cuwbi beh knuar batllet bor? Guaw u piyr, jit xee berkeh sangr :ee,” Sewsiux mng, hionghiongg sniu .diyc ee kuanw.
“Ballet! Dycc jit cud?” siyw sumue mng qinw qinw, henxzenn jin’ u hingwdauw.
“Tengyy Oo, Moskow laii ee buxtuann,” Sewsiux dab.
“Jitt txuann guaw jaix, dirr banglo-dingw u knuar .diyc,” siyw sumue qongw. “Tniax qongxx piywqer dring jiokk quann, kiokk jit dxuix langg cniuw beh knuar.”
“Urngiaw or! Guaw junxnaxx lairsnuax songg, m bad vyw, hiamw jit diamw aw dyrr qra piyr juanxsangr .cud .kir,” Sewsiux qingtanr, ciyr tauu ciyr bin.
“Pnaixser, cittyy golok :ee, guaw jinw kacc byy cuwbi,” Gnaxsunn qongw, binriongg bun bun.
“Zidjiw itlut vutvenr decc quer, sewsu iarr byy qeqiamw kir liauxqaiw kir qinggiam, congwjog ee dejaii beh dyc’ui snex?” Sewsiux jitbun.
“Hongsyx jairr langg. Cud ceh si in’ui u jit quaw qamxsiongw itdit janr lehh, byy qinw siautauw be jurjai. Narr dywtauu lang, uirr beh siaw ceh kir iuhongx, kir siongxguanw-huaguat, hex dyrr tiamw ar,” Gnaxsunn huanxvok. “Acc narr qongw diyc zidjiw e guanqu byy venwhuar, hex qyckacc byy vyh. Lanw iong huatlut, dyrdig, iacc jongqaur laii jewan, iong jiongxjiongw sniu e diyc ee vanrhuad qiyr langg’ jit angx puer jit bow quaix quaix aw zinrhun, sutongx qanjingg jurqow qaur dnaxx m bad dng .quer.”
“Jitt jiongw qongxhuad qaiww viquanx. Ang’axbow qui’ siwlangg dauwdin muaxsiwsnuax. Vadd langg guaw m jaix, guanw verbuw inx nng xee lau :ee dyrr u tauwlauu, jit siwlangg sna’ un’air,” Sewsiux vyc’ue.
“Guanw lairqongx lairmaw qapp guarqongx guarmaw marr si neh,” siyw sumue janrcuir.
“Byy jiac langg' ee qex-lai cair, m jaix langg' ee qex-lai dai. Lanw m si qiogdiongzinn, knuar e diyc :ee dauhdauc si guarbin narnia. Hun'inx-sing'uac u zuarr je tunlunw qapp jik'uanr, guarlangg si yh did jai'ngiaw. Islam junw langg’ crua sir xee u ix ee iwsur dilehh,” Gnaxsunn kauxset lirven, jit xee duiww nng xee.
“Gnaxsunn Jew, liw decc qoxbuw javolangg crua sewii or?” siyw sumue sraiw kia bak, vutsugi ee kuanxsid.
“M si,” Gnaxsunn duiwcuir rinr, knuar hiongr siyw sumue. “Beh qongw :ee si, javolangg tamsig ee bunrdee, Hueqaur u inx jewgii ee vorsor. U sir xee bow narr qycc be buanxjiog, hex dyrr si tamx, si hyqanx. Qanhux qapp qanhu e virr cuxjue, diyhh qiawqnax. Narr dirr Diongdangx, inx simrjiww e ho’ngg griw sixjue, quer dyx, byy dyrr iong jiyhtauu qred .siw.”
Siyw sumue qig tehqingx, tniax jit xe likdnaw qniax gauhgauc. Sewsiux cuir bih bih, cnitauu-cinwbin.
Siauwdnuax laii, Sewsiux jersiaur vniar derr id, nng xui luxsu byy qapp ix siy’ jnex. Cud cantniax, tnikir vutsun, vingde u kiw hongx, pu pu hniuw hniuw. Sewsiux qongw beh kir sraiw ciax laii, cniaw inx dirr ding’axkax danxhau.
“Jiax jairqin u denrciajam,” Gnaxsunn uixuanw tesii.
“Tingciadniuu dirr aurviah hang-aw narnia,” Sewsiux gnircuir.
“Iacc si lanw snax xee jywhuew kir tingciadniuu?” juanxuanx, siyw sumue tegi. “Jiac vaw vaw, siyw qniaa .jit .xe junw sanwvo.”
Sewsiux dimr tauu suisii rinr hyw. Gnaxsunn pah babax, byy irqenr.
Qyxvitzenn byy quiw vo lo, viw did jinwjingg vorqniaa kir cantniax qex qinw lecc je. Cic rimokong, Swsiux kuix ciamngg, mng inx dycc jit xee beh jre taujingg jxy. Siyw sumue byy cuiwjic, bagjiux knuar hiongr Gnaxsunn.
“Guaw singx qauwui, guaw jre aurviah,” Gnaxsunn qongw.
Ciax sraiw kixqniaa, jnriu qyqer liauw, amr ho decc puah. Lyc qyqer, hunho u kacc ser. Gnaxsunn cniaw Sewsiux dirr tauqaur ee hang-aw-kauw tingg ciax. Sewsiux qongw ho laii liamlii, dahgni beh sangr ix qaur cur mngg-jingg.
“Gnaxsunn Jew, liw dirr jiax lyc ciax, liammix dyrr qui’ sinkux damm tictih. Quer cni’angdingx jniar uad,” siyw sumue inxlo duarjuxir.
“Siyw sujew bad laii .quer?” Sewsiux mng, ciuw pangw handolu ced jniar vingg, zip laii hang-aw jiacqycc liac dit pah hro jniar.
“Gnaxsunn Jew kax be qniaa hitt jun, guaw u laii qra knuar,” siyw sumue huedab. “Dyrr si hitt zit ix qiyr guaw diyhh kir snuadingw hagsenn, qycc qongw yc narr u, vaiwlak rair camqax qiongrsiux, dyrsimx jiacc be sueter.”
Qauwui, aurviah jxy :ee lyc ciax. Byy uat tauu knuar, ciax-dingw u jit duir bajiux diddit decc qra siongr, Gnaxsunn simlai iuxsor.
5.
Juixjyy-aw ee lacsab nguaxvnuaa sew cingkir ar, siyxdi inx qui’ kauw jaur, jaxvng jiac liauw jiacc cutmngg. Juan juirdyrtauu srinn jit tangw juiw, qra baixvor lakjuiw durdamm .jit .xe jun hro dax, kacc e ing’iax ee soxjai, Gnaxsunn dagg xui dy’ qra crid .quer. Cur nirr byy ser hanr ginxaw decc uewsuer, tokax benw diogzit saur. Qimjaw lauwtniqeh, jitt jun sew puerdnuax, quer daur narr cud zit, mngxvox ingqaix e dax. Dirr siyxdi inx daux puqux marr u qraur quw ar, juw-sew-bongx-buaa sik lauxlauw qycc jaix meqag. Vnivnii hiaxee sittauu, ingxsii rair kaix qui’ diamxjingx. Narr vniar kacc qinw ciuw, jimxmaw vnuar diamxjingx-lai dyrr tangx jongw kuanw .kiw .laii.
Kangkuer byy ingg suah, kacc kuanx ee sor hok ngua jit sxux, ejaiw rair kir hogqenr. Qenrvyxkah dirr ginvaux-lai u jah, qycc srunn .jit .vxenr kacc unxsimx byy baiw. Lyc laii laukax knuar diyc Sewsiux hitt diap, viw did jingg xe dirr haghau iacc dingw lexvaiwlak siy’ duw, Gnaxsunn jitt huee byy dachniah, marr byy hiacc cniqniax. Siy’ bad m si jit qangx nng qangx, vixgnow jerjiyw u disingr, duiwhongx juanqangx beh laii jair ix kir vnerngi be dingdnaa.
“Liw dirr jiax danw zuarr quw ar?” Gnaxsunn mng.
“M jaix liw quiw diamw e lyc .laii, lingkyw kacc jaw laii danw,” Sewsiux hichih ciyr, danw u diyc jin’ liongwvanw ee kuanw.
“Sidjai jin’ byy liw hxuad,” Gnaxsunn hnair tauu, cuiwqag u ciywsinn.
Sewsiux kuix ciamngg cniaw Gnaxsunn jnriu ciax. Jre zip laii ciax-lai, isingquanw dycc jit qingx mng .diyc, Sewsiux beh qiyr uercnix cuarlo diyhh singx kiin derjiw.
“Vingsii suqix decc sraiw, byy decc zinrlo, hitt vingg guaw duxhyw kacc byy sik,” Sewsiux qongw diyc pnaixser pnaixser.
“Cniaw dyr uad… Taujingg ee cni’angdingx, jniar uad, qniaa lairvingg ciady… Qycc sir-vah qongciyh, cniaw jnriu qyqer…”
Cuarlo :ee u jinrjid, en’ lo vyr byy tingg, itdit qaur dirr qyqer dingxquann jiacc kacc diam .kir.
“Linw siyxdi inx daux u qraur druar?” Sewsiux cud sniax mng.
“Guaw diyhh qapp jabow sun’aw kreh,” Gnaxsunn dab.
“Qamxx u anwsngr beh vnuax? Iacc si tangx dirr hiax itdit druar?”
“U decc cue cur,” Gnaxsunn qongw. “Qapp a’qox qamxjingg qyckacc hyw, ginxaw dua hanr iarr diyhh qaqi jit qingx vangg kacc habgii.”
“Liw cur narr cue .diyc jiacc qra guaw qongw. Guaw kir draur vnuax.”
Gnaxsunn qig diam diam, byy qongw .anwjnuaw.
“Liw ixjaw hitt xee endauu qycc textiab ee javox ving’iuw, ix qamxx u crua?” Sewsiux iurqycc u bunrdee beh mng.
“M jaix, byy lenlok ar,” Gnaxsunn rinr.
“Linw nng xee nacc e cew?”
“Quer liauw srinx, suah liauw dai. Qongw qongw hiaxee, bycaiw langg.”
“Liw iauxx byy hongwha, mrjiacc m qnaw damgenn quanhe ix ee dairjir,” Sewsiux huntiah.
“Liw jitt xui simliw-isingx si dirr dycc jit qingx jinxsow iacc vnerngi decc knuawjingr?” Gnaxsunn qra kesew.
Sewsiux ciyr ciyr. “Quewkir :ee byy air qongw. Acc henrvo :ee lehh?”
“Hnaa?” Gnaxsunn byy der tangx liac jangw.
“Liw decc iwair dua suhniax.”
“Byy,” Gnaxsunn qensit m zin.
“Ix u decc qac’ir liw bor?” Sewsiux qycc duix.
“Ix decc qac’ir bixle cingcunx :ee,” Gnaxsunn lingxciyr. “Liw m si jingx vawvar? Jongw byy lenrr jex iarr knuar m cud?”
“Ix qamxx m bad duiww liw viauxsi .quer?”
Sim .jit .xe, Gnaxsunn rinr “U.”
“U iacc byy, iarr diyhh qycc quer sniu or?” Sewsiux mng, u giliam.
Gnaxsunn kaiwtanr. “Ix bad cutjiyx .lanw. Jit vaiw nng vaiw lanw byy zimrkyw, ix dyrr byy qycc tee kiw. Au .laii ix iwhiongr sinjinr, jex marr j.-jingwdongx-d., byy sniaw tangx hyw puepingg.”
“Ix kaciuw qycc jnia’ mew, cuiwdauw marr be baiw,” uerir si dowki, Sewsiux cowsinn jin’ dang.
“Ix cuiwdauw qyckacc hyw, marr srair liw be quer,” Gnaxsunn qongw, jin’ vutbok.
“Guaw qamxqag ix dimx dimx, qodak-siongr pnaiw dauwdin. Qamxx m si qongxx si lirenn cutcex :ee?” Sewsiux iauxx m sixcuir.
“Ix u jiauww vo laii, jiauww huatlut qniaa. Qacc si qosinx, beh duiqiuu si’angw longxx ix ee juriuu,” Gnaxsunn inwdab-zuliuu. “Sunrcuir qra liw qongw .jit qxur. Liw jinw marr dnuasinhanr, beh kir mibag si’angw, byy langg e laii capsu iacc capcuiwcingw. Kacc qniax si qauu qa qauu, nng xee byy bow :ee qra jingrsiux ee singwdngg uer qaxx huicjuiw siwqer lrauu.”
“Guaw decc siauwsniu liw ee sinlyy! Liw jnuaxngiuw u jitt jiongw sniurhuad?” sniasueh venr ann, Sewsiux bagjiux guanaxx knuar lo.
Gnaxsunn cuir bih bih, dnir hmc hmc.
“Guaw duiww ix viauw senrir, lingrr ganw kuanxtai, uanjuann si sna’ duar diyc liw ee binrjniu. Sidjai u qraur uan’ongw!” huac’uanx, Sewsiux naxx decc hnair tauu.
“Liw u jaboxlangg-enn. Huanrser liw qaqi byy diwqag, liw ee hingdong-qixjiw jiokk kinpiyr, e hro langg’ liaurqiyr liw duiww inx u iwsur decc sna’ giyc,” Gnaxsunn puar ix ee vutsi uan uan qangxbingg.
Siangx ciuw hnua handolu, Sewsiux cimx sniu .jit .xe. “Dingw lexvaiwlak, liw ee qu qowuann dirr ciax-dingx u decc tyw guaw ee lenlok denrue, qycc qapp guaw qau’ngua LINE, vaiwzi ervox dyrr decc iog guaw kir limx qavix.”
Sewsiux tywdit qongw. Gnaxsunn uat tauu qra knuar, ganxsinn si vutsugi.
“Guaw qra qongw qongjingr-qong'iau jit dxuix rair lixlyc berdid lirsinx. Guaw byy liw sniu :ee hiacc cinwcaiw, qaxnaxx luanrjiap dah, qniww langg hyw,” Sewsiux uirr jurqiw venrbingg qycc tnia .jit .qxur, jiokk koxkir ee kuanw.
Cuarlo :ee qycjaiww cud sniax, qiyr sraiw ciax :ee junxvi lyc qyqer. Jiauww jixsi qniaa, inx sunrli laii qaur isingquanw.
Sewsiux beh danw Gnaxsunn jyr hogqenr. Gnaxsunn beh qra qnuaw dngw kir qongwsix. “Liw kir byy ingg liw ee, m tangx hongqongx-huewsu.”
“Henrdai-kyqix jiacc huatdat, iong ciuxqix-aw dyrr e tangx vanrqongx,” Sewsiux jip’ir m jauw beh lauu druar lehh.
Decc danw qiyr hy ee sii, Sewsiux kir brew nng vxuex qavix laii, jit vxuex qaqi limx, jit vxuex hro Gnaxsunn. Iw nirr jre, dua tauqex ee denrue suawsuar laii. Diyc qaur Gnaxsunn beh knuar, Sewsiux jit tongx denrue dngdecc qongw. U .jit .quw .aw, Gnaxsunn hogqenr jyr suah cud .laii, Sewsiux qra ciuw nirr derr zi vxuex qavix limx uann, kangx juaxaux qra danr zip kir vunwsywlangw, nng langg ngr cutkauw ee hnghniur qniaa.
“Qinaxzit jinghingg sniaw kuanw?” Sewsiux mng.
“Cavutdyx cavutdyx,” Gnaxsunn dab, qingqactauu tec .jit .xe.
“Guaw u sigsai jit xee diabdnaw-isingx, si bing’ix. Beh laii hro knuar mai bor?”
Gnaxsunn iyy tauu. “Liw ee gnaxir guaw lingxjingg. Iauxqycc u, liw m hyw qycc laii jriab .guaw, au vaiw guaw m air qycc hro liw jair,” Gnaxsunn he tongdiap.
Liamdongsii tingg vo, Sewsiux kir giuw Gnaxsunn ee ciuw. “Guaw sniu beh jiauwqor .liw.”
“Guaw sriu liw jiauwqor, dairqer si sniaw?” Gnaxsunn mng, qapp Sewsiux sna’ duir.
“Liw sniu qongxx guaw si uirr beh qapp liw kunr kixqenr jiacc duiww liw hyw?”
Sewsiux ee gensuu u kacc cosiab, Gnaxsunn taujingg aurviah qinw ganw .jit .xe, knuar jiuuii u langg bor.
“Kacc hnowqii :ee si, guaw narr byy qapp liw huatdenw lamluw-quanhe, liw qamxx iauxx e laii cue .guaw?” Gnaxsunn mng, ser aw sniax.
“Jex u sniaw tangx hyw girlun :ee? Guaw jit ee jingwsiongg ee javolangg suacc be sniu beh qapp liw jywhuew, hex jiacc si u bunrdee, byy jurzenn!” Sewsiux iauxx qniurcuir.
“Huesniu marr si u langg jyr.”
“Inx m si vingsiongg langg, byy junxsngr.”
Cud iquanw, guartauu zidqngx jiokk mew, didtaur qaur tingciadniuu ee lo qui’ jua diyhh siurr zit pak, inx cruw kacc u ngw ee siyw hang, uanx laii uad kir.
“Guaw qraiw jiuw ar,” Sewsiux sueh kiw.
“U gauu,” Gnaxsunn qra cingjanr.
“Duhuix ingwsiuu, guaw byy decc jiac cyx ar,” Sewsiux qycjaiww viauxvik.
“Jin’ hyw a,” Gnaxsunn dimr tauu.
“Liw beh qra guaw hongwsingx, guaw byy liw ee enn ar, si m?” Sewsiux mng, bagjiux knuar Gnaxsunn, beh air jit xee bingdab.
“Guaw marr m jaix,” Gnaxsunn rinr, tauu lee lee, byy sniabuew.
Huetauu-ciax benw langg’ cuarlo, ciax-dingw diam cnicnix. Gnaxsunn bagjiux knuar ciatangx-gua, simsu muaw vxag ee kuanxsid.
“Liw iurqycc decc sniu sniaw? Nacc qaxnaxx bun jyx jyx?” Sewsiux qra quansimx.
Gnaxsunn iyy tauu.
“Bingbingg dyrr u, mair qycc jner byy,” Sewsiux qongw gnirue.
Sigsai ixlaii, Sewsiux kiw singwde, qinaxzit sngr qxex tauu tii, Gnaxsunn sraiw bagqag qra knuar, sun duiwhongx ee ir, qongxx u jit xee sujew hingr beh jyr sensux ee jorliw rair ix jenwvuat.
“Liw dyrr hro ix quer genr trngr ix jyr knuar mai maar. Jit vaiw quer, ix jaix m si hyw kangtauu, au huee ix dyrr qiyr m qnaw,” Sewsiux jixdiamw.
“Ix iauxx cneciuw. Kiongxqniax ix jit xee sitcyr dairjir dongdut .kir, siurkuix :ee si jiongww dyriuw,” Gnaxsunn bin iux decdeh.
“Guaw dyrr qongw liw cuanww sniu dy’ baiw :ee, liw qycc m sinr,” duw diyc siqix, Sewsiux jitt dxauw beh jiamr hongtauu. “Iarr m si qiyr liw qui’ee vangr ciuw. Liw tingww dirr vnix:a acsog a. Liw m hro jyr, ix byy sunrhok e giaa gne qxyx. Liuxlag ix byy hxuad .did, dairjir qangrkuanw cuxliw be hyw. ‘Guiqix dendyww si juanxqix’, jitt qxur liw qamxx m bad tniax .quer? Liw diyhh hro ix cinsinx lyc kir cir, ix jiacc e simhok.”
Sewsiux sueh kiw u diaudnua. Gnaxsunn qikliw, huanlyw sensux hiax duir be quer.
“Liw dyrr qra qongw kax tniar, rair cue tewciuw suacc berhiangw,” Sewsiux maxsiong sniu diyc vo. “Liw benw huanlyw pywqair jitt jann. Liw hen iauxx decc jyr hogqenr, byy sngr qongw vehcat.”
Sulu jiujir, Sewsiux qokk hongbin qor qaxx jiauu diyc. Simqnuax gniau gniau, Gnaxsunn cimsux.
“Zinsu, guaw vaiviw zi-snax-jap dxangx ar,” Sewsiux voxciongx. “Iongrboo-jyrqer, vnex ciuxbuew, jingwdi siy’ enw ee cuttauu m na dirr girhue decc vnuax, dagg soxjai longxx knuar e diyc.”
“Dangwjinx si anxnix urngiaw,” Gnaxsunn dimr tauu. “Langg ee iogbong vaccah ngiu. Uirr beh muaxjiog ingxingw diyhh siy’ jnex. Uirr jing’iok, uirr jnijaii, uirr miasniax, uirr derui, dagg qangx longxx decc jingjenr, jit siwqer juann si jenwdniuu.”
“Si a. Vudhuad dirr sewqanx, beh air qakgo diyhh diamr dirr puser. Lirkuix sewsiong ee h-.huecyw-c qriuu potee, bersux decc jaursimm toxaxqag,” Sewsiux qongw diyc jiokk sunrlauu.
“Liw dangsii vudceh tak hiacc je, guaw longxx m jaix?” Gnaxsunn qongw, kiw air ciyr.
“Liw tangx qyckacc liauxqaiw .guaw, narr junw liw kingw hro guaw qihue.”
Jaix lo, qycc hranw did duw diyc angg dingx, dngw .laii viw did beh kir qex kacc qinw. Tnix cingliang, byy dar hunn, qinaxzit lyhho ee kyxlingsingr qongxx si lingg.
6.
Bangrlo-sidai, bylun hyw su pnaiw su, beh dirr dew sikig-lai tuann cxenx lxiw longxx byy kunwlann. Qu qongsix jaix Gnaxsunn m na vni guanjuann qycc cud ceh, dua tauqex cinsinx kar denrue laii cniaw ix hogjid, cuir qongw si kiamr kaciuw, liac Gnaxsunn jyr uac kanwvanw jiyx .diyc ee singliw longxx kiyh :ee.
Qu kiamr dnaxx cinghuann ar, langw siaur, jyr PART TIME :ee dro e quer, Gnaxsunn quatding byy beh dagg qangx kir qongsix venr siongrvanjok. Langsinx yh did .diyc, sniwmia vyxquir, siqanx liauw dirr tanwjnii jin’ bycaiw, siuhing qycc si jit sxenw dy’ benw kaix.
Dnaxx dagg guehzit laijnii u dingrgiac, jniquanx ling ling, cue cur ee diauqnia tangx vangr kacc sangx. Bincngg, ixdyh qapp snaaxduu ven ven, byy vingsniux, byy denrsi, mrqycc u kanx bangrlorsnuar. Gnaxsunn knuar qac’ir jitt qingx u kacc qursniur, soxjai piacsiah marr buhongg, cuwsuer habliw qycc cingjing, siongrqaiww hniaxbak :ee si u lordaii tangx jxaix huex, ser ser xee aw iarr kacc qniu byy. Ackuanw nng guehzit quaww tauu quer ee vangjox, qapp cuwjuw iog beh lip kewzi, Gnaxsunn u singx kir ginhangg niaw jnii.
Sinx sing’uac dyrr beh kixpangg. Qinrzit aw huatsingx ee surjingg iauxx huex huex hnir hnir be bingliang. Gnaxsunn lapvo, simqnuax y.-yjyx-j.
Siuhingrlangg iwair jit xee siyxjiaxlangg, mrqycc langg’ henxzenn kacc qac’ir piauped ee tauqelangg. Tauqelangg qongw u qra siyxjiaxlangg trex kuix. Ix ee ue qamxx e sinr .did? Siangx kax dac siangx junn, jitt xee dionglenn javolangg jin’ lauxdaur.
Vnivnii u decc hagsenn, ingwdongx u suwpuer jiacc driyc. Narr capciuw, amwjo suhniax ziog sumue, hex marr diyhh siyxjiaw u hitt hy iwsur jiacc tangx. Acc narr qra qaqi ee qu vore qapp tamx huex ee qu jingzinn sag jywhuew lehh? Snax langg go bak dyrr sngr u tiacvec qongw tauwqix, ix jitt xee muelangg qamxx tangx juer?
Sniu laii kir dryr be huanciax, diyhh vinxqiuu u diwhui qycc zinjuu :ee diamxhuar, Gnaxsunn sniu dnia beh cingxed sensux.
“Liw si anwjnuaw sniu beh qan’uw? Inx u langg iongx .liw qaax?” jre dirr sen’iw, sensux puawdee.
“Si byy lar. Qaqi duiww hunpuer byy crunn liamrtauu, iuguann hibang tnikae horsiongx iwair :ee longxx tangx siusingg jingwqyw,” Gnaxsunn sueh qin’iuu.
“Simqnuax lyy lyy, qenr su id dingg moc. Simqnuax cringx cringx, knuar dairjir jiwjingx-jiwbii, soxx jyr :ee duiww langg’ jiacc u vangjo.”
Sensux cud qauwzu. Byy-tau.-byy-su tniax be bingvik, Gnaxsunn cniaw sensux kuitiah.
“Suhniax kir duiqiuu vadd langg, liw ee simlai sniu sniaw kuanw?” sensux mng.
“M qnaw kimuaa, derjuw dangwjinx u sitlyhqamw. Iauxtiauw siokluw, qunjuw hnor qriuu. Dirr jitt xee siogser-huanrqanx, byy langg si vutkyw virr luir .kir .ee.”
Sensux dimr tauu, mng Gnaxsunn duiww lensiaur siokluw e jigdor .be.
“Si byy qaxx jigdor, mrqycc jurjunsimx u damrvyc aw siursiongx,” Gnaxsunn qongw sid’ue.
“Jurjunx ee jiyhqix si jurdua, singx u jiamwiuw jiacc e srid .kir,” sensux kaipuar, suar .laii, mng kiw ixjaw ee javox-ving’iuw. “Duiww ix iauxx u ngwbang bor?”
“Binbang e bang .diyc, ursii qycc e kir bangrlo ciaucue ix ee siausid, qamxqag qaqi jiokk jen, jiokk byy hau,” Gnaxsunn toxkuir.
“M hyw jikjue jurqiw quewdo,” sensux kuanwuir. “Barjiac qapp iogliam si langg ee guansingr, Kongxjuxqongx u anxnix hunwsi.”
Gnaxsunn siurqaur, cingxmng sensux qaidongx zuhyy qniaa cud behundin.
“Su jai lriw jai. Diyhh singx cingqed jursinx,” sensux suec’ue. “Susimx zuxx jiyw, jurgnow zuxx ser, knuar .diyc .ee dyrr zuxx bingg, soxx jyr ee suanxdik iacc juxir jiacc erdangr lirig qyckacc je langg, jurqiw ingxingw iarr hamm jairlai.”
Vaiwsia sensux, buadhak kabtauu lingxqaur. Beh dngw .kir ee lo nirr, Gnaxsunn qra nng xee javolangg pah diamxsor vixping knuar. Jit xee diamrjaii, lingrr jit xee kuehaii. Jitt xee kiukiam jin' singw, hitt xee hangr puee jnii qramx kaix. Suiw-baiw byy viw jriw, lun jinx, tauqelangg u kacc saxtuad, mrqycc lenqiw u kacc je.
“Dnaxx guaw si decc congr sniaw? Qaqi qamxx m si qiogguarjiaw? Nacc e sniu qaxx u jit xee vad .kir!”
Gnaxsunn hionghiongg diwqag diyc m driyc, qnuaxqinw tingkax byy qycjaiww sniu.
“Beh qra jurgnow juanvo lak jit vnix sidjai diongrlann. Iarr bogquair u simx beh siudy :ee diyhh cutqex iacc si kir diamr cimx snuax sriux koxhing, kiwkiyh hongdinn itcer,” dirr keh bat bat ee denrciax-dingw, Gnaxsunn jursingw.
Dngw laii qaur der, lxauu-xe ee puetangw u puex. Jit dniux ginhangg qiar hro derhu-aw :ee, qnaxx si sinwiongrkah ee siauwdnuax. Jit dniux vyxsiu-qongsix qiar hro siyxdi :ee, dairkair marr si beh tyw jnii. Decdew jit dniux poxtongpuex, sigsai ee vitjig, itsiqanx sniu be kiw si si’angw. Hnowqii e taii siw niaux, Gnaxsunn hen tiah hen tak.
Gnaxsunn, itcer hyw bor? Jitmaw sniaw kuanw? Bad kar denrue cue :liw, be tongx, liaursngr liw qnaxx si ngua mnghy. Siaw E-MAIL lenlok, puex ho’ngg trer dywdngw .laii, au .laii jiacc jaix liw qongsix siux .kiw .laii ar.
E qir did liw ee horkauw qiar dirr lingrde hiax, marr qajair guaw u caux derhuanx. Guaw langg jinw dngw laii dirr Daiuann. Lanw si m si iog jit xe aw zidjiw siy’ qnir? Sniu beh dngbin qra sinx jokqax hyrhiw.
Gnaxsunn qra puex duiwauw longx zip kir puede. Qang jit qix lautuijanr, jitt jua qaxnaxx qex jiokk pnaiw vreh. Dngw laii cur nirr, tinn jit vxuex dee iw nirr jre, puesinr qra tec cud laii qycc tak jit vxenr.
Dairjir limsinx, simqnuax be ciaucik. Dnix byy dnix, kow marr m jniaa kow, byy-su-vaii jit qangx dy’ m hro ix qruar. Qamxx si iauxx u huejer siy’ kiamr? Narr u, jitt sxer diyhh jyr jit vaiw liauxqed kacc si.
Vaiwsir cid diamw vnuar dirr qu soxjai siy’ danw.
Jiauww puex-diongx soxx lauu ee huanhy, Gnaxsunn huad TEXT.
7.
Qehuew byy je, siusip dngrsiawli, uat linr dngw qycc qiamw nng sniux .kir. Tanxhnuaii tanxdit, Gnaxsunn qra syh-aw pah sibzirhor. Cniar langg’ draur cenqux, lo-diongx narr snuawdauw, prangw .qnir pnaiw .kir junw duxhyw, hai langg’ qex qangx decc kiyh dyrr pnaiw sinkir lor.
“Tniax qongxx liw cur cue .diyc ar. Liw jurjiw hro guaw, guaw laii lenlok vnuax cur :ee. Liw anwsngr dycc jit qangx beh vnuax quer xui?”
Tamr diyc denrue byy hihanw, Sewsiux jaiqiyh ix ee qinrhongw jiacc si hiqii. Gnaxsunn byy air ix siwqer kir tamwjax, qra qongw kacc diaudit.
Qadangr qaux huewciax unrjair, Sewsiux sraiw jurqaiong :ee sangr Gnaxsunn kir sinx suer ee cuwkia. Tauqelangg gauu huadlyc, jyc .zit amr jiacc did diyc siausid, qimzit vnuasuaw ee duarser hxang dairjir, ix liaurliw qaxx hyxser dindangx.
Nng daii ciax qang sijun kixtingg, sir lenw qiauciax dairsingx qaur. Lyc ciax, Gnaxsunn qniaa juer jingg, Sewsiux ciuw qnrua jit qnia Gnaxsunn ee hingliw duer dirr aurvbin. Jit diab quw aw quer, huewciax iarr qauwui. Koxlik angwjangr, kajiacpniax jit kunr pnai nng sniux, snax jua dyrr jongw kuanw .kiw .laii. Sewsiux sueh loxlat, qangjnii sui’ sngr hro langg’.
“Jitt kouii aw qycc vutjiw aw cing’iux,” Sewsiux qongw, naxx decc draur tiachongx.
“Jiax pende, qautongx byy lirven. Mrbenw dagg qangx qnuaw siongrvanx kacc byy iauwqinw,” Gnaxsunn qongw, qra denrjuxloo qapp deqow tec .cud .laii beh hniaa qunxjuiw.
“Tniax qongxx liw jingg javox-ving’iuw u dngw .laii?” Sewsiux mng, cnevong-vehvong.
“Liw nacc e jaix?” Gnaxsunn dywtauu mng.
“Liw ee qu vorsiok kar denrue mng guaw vaiwlak jnuaxngiu byy qycc kir, qycc qongw liw jaxjingg hitt xee u qiar mihqnia beh sangr :ix dirr liw jiax,” Sewsiux qangxbingg.
Gnaxsunn dimr tauu. “Ix jah jit jxox inx qongsix cud ee vyxiongxpinw beh hro :guaw. Guaw qongw guaw bin longxx byy decc buah ar dyrr byy qra siux. Ix u mng kiw guaw ixjaw ee jit’uann, dyrr qra hitt ap pnuarciuw juanxsangr hro siauwlenn jaboxqnuax.”
“Liw qra guaw qongw beh siuhing, qetqyw jauw kir qapp langg’ iokhue!” Honghuexbak, Gnaxsunn soxx qongw :ee henxzenn m si Sewsiux quawliam ee diamw.
“Liw mair jiacc qigdong, ersaiw .be?” Gnaxsunn vingw vehbak. “Guaw u acqimx rair tec hingg :ix, mrjiacc e kir qniaa jitt jua,” Gnaxsunn qexsueh.
Sewsiux giga qig buibak. Tanwsig, Gnaxsunn qra ongxsu qongw jit xee dairtyr.
“Ix byy dngbin qapp guaw cew, jocur ee acqimx ix cud :ee iarr qamguan liauw, snuawqaux dna’ lauu jit dniux puex.”
Tniax jit xe, Sewsiux dner bak, bagjiux cnix qinwqinr. “Jitt hy sud’aw kasaux, liw qycc qapp ix qniwbin or?”
“Moqongx u jerje ngiursniur, m si langsig, byy singg langkuanw ee javolangg muaw muaw si, ursii henr qew qunjunw, ursii henr jinx siauxzinn,” Gnaxsunn qra langrgin.
Sewsiux bin vnir vnir, mng Gnaxsunn duiwhongx juanqangx iog ix cud .kir decc doboo sniaw.
“Liamrnih, lax ix zuarr u pinxkir, sunrsuar giamrknuar guaw si m si iauxx uirr ix decc jiaujui,” Gnaxsunn cinwciyr, qra jusniux lairdew ee jrux moh .cud .laii.
“Liw si qongw jinx :ee iacc qunxsngxciyr?” Sewsiux u qenwgii.
Gnaxsunn giaa tauu qra ganw .jit .xe, byy ir byy ir. “Ix qiyr guaw qapp ix dauwdin kir Diongqog huatdenw, qongw beh dingg pah kiw, qriuu guaw qapp ix qycc qniaa jit vaiw.”
“Liw anwjnuaw qra qongw?”
“Guaw qongw guaw rair sniu .jit .xe.”
“Jex iarr suacc diyhh qycc sniu? Dongzenn m tangx a!” Sewsiux viw ciuw, kauxkir bersux ginxaw, dongrjog cincniu bongxhux, vingsor hitt kuanw iugnaw ee hongcaiw jiauu knuar m qnir.
“Jit sniax dyrr qa’ngg qongw m, jin’ sitlew.”
“Liw qra guaw qirjuat longxx jin’ cangcer, byy decc qor lexsor,” Sewsiux qongw diyc krir suacsuah.
“Guaw u hro liw derr zi vaiw qihue oox! Si liw qaqi pnaixkuanxjer, samxpunw ing .kir,” Gnaxsunn qra diamxcniw.
Jit qxur duiwox u diyc iauwhai, Sewsiux dnaxx vnixcuir. Kaciuw liabjiap byy tingg sii, byy-din.-byy-dang, Sewsiux mng kiw javolangg ee qongsix dirr Diongqog dycc jit singw.
“Liw mair qycc liac ngiaw sniu sniu hiaxee, iong ue beh snrah .guaw, beh laur guaw qongw. Guaw be kir lar,” Gnaxsunn suec’ue. “Guaw jinw cutmngg dy’ sniurdnua. Jre huiqix vuex kir qaur ngirqog juanxjnii, hex iarr jnia’ u qxingw!”
Cuiwqag u ciywsinn, Sewsiux dimr tauu, u kacc kuansimx ee kuanw. Qiycsig duiwhuanw, diyc qaur Gnaxsunn beh mngranr. Sewsiux vaiwlak byy qycc kir jersenn, qoniuu-aw beh air jaix en’iuu, Gnaxsunn qaqi iarr u damrvyc aw hnowhenn.
“Liw kacc air jinvaux tniax jinsiongr, iacc qexvauu povaii ee ue?” Sewsiux mng.
“Liw jex qex mng :ee! Si’angw beh air tniax hongdongg byy ngiaxjiah :ee?” Gnaxsunn sraiw kiarbak.
“Hitt dah hiacc cingkiwsniur, guaw jitt hy u cauwcysinn :ee nacc tangx qycc kir qa’ngg uwuer?”
Sewsiux qongw tentyc jit xee cauxtiuxaxsinn, Gnaxsunn m quewbak, qiyr ix kacc jingwqingx qongw kacc bingg lehh.
“Dandanx qnir quer jit vaiw bin, denrue dyrr kar be tingg. Narr qycjaiww kir, ix qnaxx e ziog qaur gunw qongsix.”
Qunxjuiw qunw ar. Gnaxsunn kir ciaux nng der vylevuex .cud .laii. Sewsiux u denrue laii, qongw suah, dee iauxx siyx huthud, berdangr sui’ limx. Jycsid lrauu qnua kacc e cuiwdax, jiax knuar hiax siongr cue byy vingsniux, Sewsiux qenwgi rair hag.
“Qiawqimx limsii qiamw quixnarr bxan .kir, jnijuiw kacc ansyr. Au guehzit quer narr kacc lingrlauu jiacc laii pacsngr.”
Gnaxsunn qongw liauw, Sewsiux byy ue byy qxur dnia dnia sim.
“Liw narr qiyr langg’ sangr .laii, guaw be siux oox, guaw singx qra liw qongw,” Gnaxsunn vangr sniax.
“Byy vingsniux, byy denrsi, cingsimx iurr bingbak, be cincniu guanw jitt hy siogzinn, lyy qiakqiag,” Sewsiux qongxgiac vnuawtinrtong.
“Si cringx si lyy m si juadduir, si vixduir :ee. Beh cringx beh lyy, jairr langg’ juxir,” Gnaxsunn vrag uerqud.
“U langg bagjiux cuh cuh, lyy :ee liahjuer cringx :ee bor?” Sewsiux mng.
“U or, je mixmuaw!”
“Guaw ganxlik baiw. Liw si guaw ee ganxkex-isingx,” Sewsiux qongw, kauxkir jiokk sunn.
“Liw bagsig qyxzenn byy hyw. Guaw onglok aw byy vaii :ee, liw dua tauqex knuar longxx m jaix?” Gnaxsunn sna’ giyc.
“Jitt vxuex vehqunxjuiw knuar diyc bingg ~ ~, sunzenn byy camx vadd hxang jiacc driyc,” Sewsiux qongw liauw, vnuar siylingw ee juiw jit cuir qok .lyc.
8.
A’buw jyr duiwnii, duxdng dirr zid’iaurzit. Dua-syw kar denrue, qiyr dag’ee diyhh kir inx daux jewsu. A’buw jairsnix ee sii, dua-hniax inx hitt kauw jxaur narr diyc huexkaux, laurbuw jriab .kir iacc sangr .dngw .laii qeww inx ang’axbow vauvan. Dua-hniax inx daux, Gnaxsunn dna’ zip cur ee sii laii quer jit vaiw, qycc si jiokk quw ixjingg. Bag’e ee qelo qaiww singg u kokdiongx, qniaa jit xe m jaix lo, hang-aw hit m driyc jua, ciuxqix-aw iurqycc be qir did jah byy tangx mng, uanongw lo kaux jit linr jiacc cue .diyc.
“Ree-aw trngr guarkauw, lairdew u cenxtuax,” dua-hniax qongw, kia dirr mngag.
Zip mngg, Gnaxsunn knuar diyc tokax si dairlixjiyc, simlai u daiwgii. Inx daux ee dervanw si dirsii huansinx? Guanjaw dyrr caa :ee a. Bogquair a’buw druar inx jiax ee sii siongsiongg vuahdyw.
U langg decc cic denrlingg, siyxdi inx daux sir xee juann qaur. Singlew cuann hyw, dag’ee junxvi beh vair, dogdok vutqenr dua-hniax ee haursnix.
“Linw a’dxi aw lehh? Qamxx si dirr ix vangqingx?” Gnaxsunn mng hniaqyx.
“Qongxx au lexvair haghau u kyxcir, diyhh kir dosuquanw tagjux kacc tak e lyc,” dua-hniax qaixsueh.
Duarlangg giaa hniux hiongr sinjuxvaii, ginxaw kia dirr aurviah duer vair. Vaiwjer liauw, derhu-aw qra kngr dirr qongvykamx ee qimjuaw tec kir siyx, qra denrjiuw tec kir ganr juaxjnii. Ddua-syw kir jauwkax qra tngx tng hro siyx. Gnaxsunn cuann nguaxdi. Jiac jow diyhh jre qui’ dyh.
“Dangsii beh qaploo?” siyxdi mng, jit siangx di dirr ciuw nirr.
“Diyhh cue zidsux qingw hyw zidsinn,” dua-hniax dab, cuir naxx decc vro.
“Marr rair cniar saiqongx laii liamrsor,” dua-syw capcuir.
“Zidjiw narr qatdnia, erdangr jinrliong kacc jaw tongdix bor?” derhu-aw mng. “Guanw qra qongsix qywqer, siongrr byy rair tejaw nng qangx jiacc cringw e diyc.”
Jiac vaw, siyxdi inx daux sui’ beh dngw .kir, dua hanr :ee au lexvair iarr diyhh kyxcir. Gnaxsunn qapp inx jyr jidhuew jauw, dirr hang-aw-kauw, nng xee ginxaw qra a’qox iyy ciuw qongw baibai.
Suewcuwkia ee soxjai penpiah, cud denrciajam vnuaa qongciax, lyc ciax liauxau qycc diyhh vecqia. Lirkuix dua-hniax inx daux qaur jiangwsii liamxlat qniaa dngw laii cur nirr kaix beh nng diamxjingx, vut’ir knuar diyc Sewsiux dirr mngkakauw kiaruervingx.
“Liw si anwjnuaw ciuxqix-aw longxx m jriab?” cneqinx-dniuwam, Sewsiux dairhox-siauxqiaur.
Qniaqnir caxla diyc vixlinn, Gnaxsunn qnuaxqinw giaa syxsii kuix mngg. Zip laii cur-lai, Gnaxsunn singx kir cue ciuxqix.
“Liw knuar, dirr jiax, byy?” Gnaxsunn qongw, ciuxqix dirr ciuw nirr lang.
“Liw si jauw kir dyhh?” Sewsiux mng. “Guaw beh iog liw jiac daur, an’ jap-id diamw dyrr kaisiw cue, qycc u vniar kir linw siyxdi inx daux, denrlingg cic jit vox longxx byy langg dilehh.”
Gnaxsunn paccniqniax, qinw qra qongw qimdnuawzit si laurbuw ee qirsinn, dag’ee kir dua-hniax inx daux. “Acc byy, liw liahqiyh guaw kir dyhh?”
Sewsiux hmc hmc byy inwue, binrsig jiokk pnaiw knuar.
“Liw dowsimx jiacc dang, liahhongx-ziok’ingw, kap be diyc dyrr pudput tiaur jiokk cenxsingr, siuhing sriux qaur kajiacpniax .kir,” Gnaxsunn qra qawsi.
“Guaw dyrr si sniu’ air liw, simqnuax hxongx, mrjiacc e diyhqongg!” Sewsiux lixhue dua sniax ziongw.
Gnaxsunn bagtauu likqingw. “‘air’ jitt zri bersux lingdanx siniyc, jerje longxx jin’ air ing.”
“Liw liahjunw guaw iong cuiwdunpuee kuanxtai byy jinsimx?”
“Liw soxx qongw ee ‘air’ u zuarr je duwtauu?” Gnaxsuu jitbun. “Langg’ iauxx e qniaa e jauw ee sii, linw dyrr e hiauhuanw. Jaboxlangg narr puawvni qycc venr baiw jijix, javolangg beh tuatsinjauw qnaxx kow byy erdangr iong vuex :ee.”
“Liw beh air guaw cud vyxjingr?” Sewsiux mng.
“M si,” Gnaxsunn iyy tauu. “Beh air liw jaix :ee si, narr iogbong guanjai hiacc dang, knuar diyc jabow dyrr sniu beh bongsydni, duiww langg’ ee air junw si jinx :ee, quibuew iarr ongxdozenn.”
“Guaw u vaxag, juadduir be qycc jyr duiwvutkiw liw ee dairjir,” Sewsiux qongw, quntaubuw dnec ann ann.
“Guaw dagg qangx jerjing, jursingw jaix kiamwkueh. Liw jing’iok hiacc dang iarr qnaw cinwcaiw rinw.” Gnaxsunn qra cak qutpang.
“Soxiw qongxx, guaw ee ue, liw longxx m sinr?” Sewsiux mng, jin’ vuthok ee kuanw.
“Lanw longxx dair sibkir laii cutsir,” Gnaxsunnn qongw. “Singjunn-qingrjingx uirdiyhh jit der bah, lenrr dongrbut dy’ e iong pacpenwvo laii did diyc lirig. Lanw jurr sewhanr dyrr ho’ngg qar qongxx kipenr si pnaiw pinxhing. Lanw ee tensingr u siurr diaudog .quer.”
“Liw ee iwsur si, guaw byy lauxsit, cuanww qongw vehcat decc penr .liw?”
“Liw iuguann byy liac diyc iauwdiauw,” Gnaxsunn toxkuir. “Langg e venr, iwair iacc hiabhiamm iarr e duer lecc ngirdong, qaixig, inxiu qycc si duarbuxsiwqongqer, diyhh nai sniaw sinwliam jiacc be isimx ho’ngg snriaa .kir? ”
“Liw narr dirr guaw ee sinvnix dokjig, sisii duiww guaw liamrquad liamrjiur, guaw dyrr erdangr tongquer ciwgiam,” Sewsiux qongw, duiww Gnaxsunn liahbak.
“Liw Qauu Jetenx, kyxsiyh guaw m si Zulaii Vut,” Gnaxsunn cinwciyr. “Zedluann ee sii air simx simx, kow byy muixx jit kig longxx dauwdin. Danw qaur jxingg venr lingw, huanxbok bersux uansiuzinn. Jitt jiongw hiwcud m si dandanx denrsi denrngiaw decc vnuax, lanw sinkuvnix :ee dniardnia u langg decc vnuax hro lanw knuar.”
Byy inwue, Sewsiux buix bak, jit vo dac hiongr jingg. “Sitelw, guaw itding rair.”
Gnaxsunn sax byy jangw buerjingrr mng, vyrqizenn, Sewsiux qra ix pyrlamw suar qra jimx cuir. Liklat, Gnaxsunn qunwjauw be li, quikir quwjai ix. Javolangg lauxciuw, jinwvingx qaiw iong ziuhuad. Gnaxsunn jidsii beluan sniu beh crunx ciuw qra lamw. Qnaxx si vingsor u siulen soxx drir, iwjiwlat u qauwgiac, Gnaxsunn jitt quer byy kuthok.
Byy qamxsiu diyc zedjingg, Sewsiux qra Gnaxsunn vangr .kuix.
“Liw decc qitai singwzinn,” Sewsiux qongw.
“Guaw qaqi juer be qaur :ee, be kir iauqiuu vadd langg,” Gnaxsunn qra huee.
Cuir bih bih, binriongg amwdam, Sewsiux kuix mngg lirkuix byy qongw jaiwhue.
9.
Qapp langg’ prinw qongxx jyr qiamx :ee, Gnaxsunn beh qycc kir sencid iarr diyhh tranr jeczit u lensuar hiyh kacc be sna’ damgo. Qacc u pacdad dniardiyc, vywmiaa diyhh tanwqinw, kaciuw banrdun qnaxx e vaii byy hxun, vadd langg marr si air qingw hiyckunwzit. Kes juewjniaa qaux qnia, dingxsix qipqar be lysyx, jit sniax dyrr jrunw.
Byy-siau.-byy-sid, bujongx-bujig, Sewsiux nng qywguarguec byy siy’ cue ar. Huix dyx ahdng jingsix, qang jit xee javolangg, Gnaxsunn taujingg qinglik nng vaiw quer ar, jitt huee simlai byy hiacc tniar laii qongw, sitlyc ee simjingg iguann be benw .did.
“Jitt vunw ceh vaiwtog liw juanxqaux liw hitt xee jixmueaxpnua. Ix qra guaw qongw beh air knuar, mrqycc jitt quiw vaiw longxx byy laii.”
“Guaw marr si laii jiax jiacc u qapp ix siy’ duw, vingsii hranw did lenlok.”
Gnaxsunn qapp dua suhniax ee duiwua, siqanx dirr dingw lexvaiwlak. Bad kar denrue .kir, jit vaiw byy jriab, nng vaiw byy jriab, Gnaxsunn vutven qycc cir, iyh qongxx siyxjiaxlagg iurqycc cutqog cittyy ar iarquxqnaw.
Diamr cur nirr jycsid benw packaw, muixx qangx iarr diyhh jiauww jiac jiauww jyr, jurgnow ioksog. Yc lanxdy si jin’ kuair, kyxviw juiw vxangx snuax. Jerjing jit qix hniux ee siqanx quer, suar .lyc diyhh vaii diamw vnuar jxingx jyr kangkuer. An’ cingjaw kunr cnew qaur miqanx jnriu cngg, diaubak let .cud .laii anwsii-anwkig. U cincniu dirr haghau, Gnaxsunn si haurdniuw iarr si hagsingx.
Juwsinn decc jycsid, denrlingg-sniax hiangw kiw, Gnaxsunn cuah jit xe. Vangr vid, an’ iw nirr vreh kiw. Mngg kuix .kuix, Gnaxsunn qycjaiww diyc jit qniax. Kia dirr mngkauw :ee qimqongtauu si sigsairlangg.
“Langg’ decc vyr qongxx tangx kir Taiwqog cutqex snax guehzit. Sniu qongxx diyhh singx lux qngtauu hro liw quer bak jiacc kir,” Sewsiux ciyr ciyr aw qongw.
Mngg kuix kacc kuix, Sewsiux zip .laii. Gnaxsunn beh kir tinn dee. Langkeh iyy ciuw qongw byy anwsngr jre quw.
“Hiamw hiamw qra liw ee sinlyy jair kir vinquanw kuix vangqingx,” Sewsiux qongw, damr tauu.
Simqnuax liaux .laii, Gnaxsunn cuir kuix hna hna.
“Tnide soxx sed iarr hyw, derjuw jokget iarvar, qajair jitt vaiw u dac dongxaw, marr sngr u jingjinr,” Sewsiux dnir kenciyr. “Liw qongw :ee urngiaw, guaw si longrdongrhanr, iogbong qapp sibkir longxx jiokk dang.”
Tauqelangg jitt jua laii ee guanir, Gnaxsunn ixx jaix jit xee poxmec, suar mng ix beh quer xngiuu juer huesniu ee indnuax-kixliw.
“Guaw kinxkiwvyc, diyhh he dang iyc jiacc u huatdo liaudi,” Sewsiux qongw, qycjaiww koxciyr.
“Nng xee ginxaw lehh? Qra inx vangr lehh, qamxx tywdongr?” Gnaxsunn jin’ quawir jitt qnia.
“Ser hanr :ee qinnii tak dairhak, duar hanr :ee muanii vidgiap,” Sewsiux damgenn. “U jioktog guanw siyxmue u ingg draur qadniux. Byy sniaw dua bunrdee jiacc driyc.”
Qongsix ee dairjir jnuaxngiu anvaii, Gnaxsunn iarr sniu beh jaix.
“U jit xee qoxhunrjuw tangx tokdiong, vutjiw aw e sinwkyr tihh. Jiongvutzenn, siux .kiw .laii suah.”
“Liw qamxx e bikiu jyr lyhsunw, qasex jurr anxnix lamx diauu lehh byy beh trngr?”
“Huanrser oox! Liw u air guaw huansiok bor?” Sewsiux dyww mng Gnaxsunn.
“Guaw hibang liw sunrli, itcer jiauww simx soxx guan,” Gnaxsunn inwdab, kauxkir jonggiamm byy qunxciyr.
“Qinaxzit si lanw jitt siwlangg juewau jit vaiw qniwbin iarr byy dniardiyc. Beh qycc siy’ duw tauu, kiongxqniax diyhh danw qaur au cutsir,” Sewsiux kaiwtanr.
“Au sxer marr byy itding gu e diyc,” Gnaxsunn qongw, kauxkir v.-vinghyy-h.
“Vitdnia e,” Sewsiux qongw diyc habqaizenn. “Lanw jitt sxer qed ee enn jiacc cimx, juadduir e qycc dauwdin.”
Dirr mngcuiwkauw sangwvet liauw, Gnaxsunn kir kia diamr lordaii hiongr xe knuar. Zuxx qniaa zuxx hng .kir ee javolangg jit liap liulitauu jin’ ngiaxbak. Tngwciackax, ciuw pangg vxuah, srinx cing huesniursnax, h.-huhuanr-h., jit xee jingdoo ee hingngiaw dirr Gnaxsunn ee bak-jingg unxhen.