Luka Hok'imx

1 In'ui u jerje langg jiong' lanw diongqanx ixqing’ jniaa ee su, u jerje langg bad giac vid laii vailet juer duan;

2 Dyrr si jiauww hiaxee tuann dyrliw :ee, dui' kixtauu cinbak knuar .qnir, laii tuann hro lanw :ee.

3 Guaw ixqing’ dui' kixtauu siongser cakyw longxjongw ee su, dyrr sniu diyc jiauww cuwsu laii siaw, jiacc qiar hro Teofilus Dairzinn,

4 Hro liw jaix qongxx soxx hagsip :ee si kaksit.

5 Dng' Helod, Judea ee ongg, ee sii, u sriok Abijah ee vanx ee jewsix, miaa Zaqalias. Ix ee bow si Aalon ee horer, miaa qiyr Elizabet.

6 Inx nng langg dirr Siongrder ee binrjingg si gi ee langg, jiauww Jruw itcer ee qaiwbing, lexgi laii qniaa, byy tangx hiamm.

7 Danrsi inx byy qniaw, in'ui Elizabet be huai'in, nng langg nihuer iuqycc lau :ar.

8 Hitt sii, Zaqalias jiauww vanlet dirr Siongrder ee binrjingg qniaa jewsix ee jitbu,

9 Jiauww jewsix jithun ee le, tiux ciamx, did diyc zip Jruw ee dxen siyx hniux.

10 Dng' siyx hniux ee sii, vecsnir qui' din dirr guarbin qidyw.

11 Jruw ee tnisair cuthen hro ix knuar, kia dirr hniudnuaa ee jniawvingg.

12 Zaqalias knuar .qnir, dyrr gonggniac, qniahniaa.

13 Tnisair duiww ix qongw, "Zaqalias ar, byc did qniax, in'ui liw ee qidyw ixqing’ virr tniax .qnir lar. Liw ee bow Elizabet beh snix qniaw. Liw diyhh qra ix hy miaa qiyr Johan.

14 Liw beh hnuahiw qycc kuaiwlok; jerje langg iarr beh uirdiyhh ix ee cutsir laii hnuahiw.

15 In'ui ix dirr Jruw ee binrjingg beh juer dua, pudyjiuw qapp itcer ee jiuw longxx byy limx. Ix dui' laurbuw ee txex dyrr hro Singwsinn ciongmuaw.

16 Ix beh hro Islael ee horer diongx ee jerje langg uat dngw laii qruix Jruw, dyrr si inx ee Siongrder.

17 Ix beh ing Elijah ee simsinn qapp jailingg qniaa juer tauu dirr Jruw ee binrjingg, hro juer ve :ee uat dngw srinx ngr dirr qniaw, hro vuergik ee langg tranr girlangg ee diwhui, uirdiyhh Jruw virvan hab'ing ee vecsnir."

18 Zaqalias duiww tnisair qongw, "Guaw dui' jnaixngiu e jaix jitt xee su ar? Guaw ixqing’ lau, guaw ee bow nihuer iarr lau lar."

19 Tnisair rinr ix qongxx, "Guaw si kia dirr Siongrder ee binrjingg ee Gabliel, hrong crex qapp liw qongxue, vyr liw jiaxee hyw siausid.

20 Dnaxx liw beh jing jing be qongxue, itdit qaur jiaxee su did diyc jniaa ee zit, in'ui liw m sinr guaw ee ue, dyrr si hiaxee qaur qrii beh ingwgiam ee ue."

21 Vecsnir tingwhau Zaqalias, qiquair ix nacc quw quw dirr dxen-lai.

22 Qaur ix cud .laii, ix suacc be qapp inx qongxue, dyrr jaix ix dirr dxen nirr u knuar qnir ngirsiong. Ix dyrr duiww inx viw iwsur. Ix qingwzenn venr exqauw.

23 Qaur ix jiauww jithun hogsai ee zit muaw, dyrr dyr kir inx daux.

24 Jiaxee zit liauxau, ix ee bow Elizabet u srinx, unxbat go guehzit, qongw,

25 "Jruw dirr knuawqor guaw ee zit kuanxtai guaw cincniu anxnix, laii sew guaw dirr zinqanx ee qenwsiaur."

26 Qaur lak guehzit, tnisair Gabliel hrong Siongrder soxx crex qaur Galilee jit xee sniaa, miaa qiyr Nazalet,

27 Jiurqin jit xee jairsikluw. Jitt xee jairsikluw miaa qiyr Malia, ixqing’ puer dniardiyc hro David ee qrex ee jit xee miaa qiyr Josef ee langg.

28 Tnisair zip kir duiww ix qongw, "Did diyc dua xunx ee langg ar, ving'anx. Jruw qapp liw dilehh."

29 Malia duiww ix ee ue qamxqag vutjiw aw gonggniac, itdit decc sniu jitt xee cingxanx si simxmih iwsur.

30 Tnisair qra ix qongw, "Malia ar, byc did qniax, in'ui liw did diyc Siongrder ee undenw.

31 Dnaxx liw beh huai'in snix Qniaw, diyhh qra Ix hy miaa qiyr Jesus.

32 Ix beh juer dua, cxingx juer Jiww Quann :ee ee Qniaw. Jruw Siongrder beh ing Ix ee jow David ee xui hro Ix.

33 Ix beh juer ongg dirr Jakob ee qrex qaur dairdai, Ix ee qog iarr byy qiongjin."

34 Malia duiww tnisair qongw, "Guaw iauxx bue qer .langg, jnaixngiu e u jitt xee su?"

35 Tnisair rinr ix qongxx, "Singwsinn beh limqaur liw, Jiww Quann :ee ee quanlingg beh diwimr liw; soxiw dui' liw snix :ee beh cxingx juer Sxingr, juer Siongrder ee Qniaw.

36 Qycc liw ee cincig Elizabet ixqing’ lau, iarr huai'in. Vingsor cxingx juer byy huai'in :ee, dnaxx u srinx lak guehzit lar;

37 In'ui Siongrder soxx qongw ee ue, byy jit qxur byy lat."

38 Malia qongw, "Guaw si Jruw ee luxvi; guan jiauww liw ee ue ingwgiam dirr guaw." Tnisair dyrr lirkuix ix kir.

39 Dirr hitt dangjun, Malia kixsinx, qnuaxqinw kir snuade, qaur Judea ee jit xee sniaa,

40 Zip Zaqalias ee cur, qra Elizabet cingxanx.

41 Elizabet jid'err tniax qnir Malia cingxanx, tai'in dirr vakdow lai diytiaur. Elizabet hro Singwsinn ciongmuaw,

42 Dyrr dua sniax qongw, "Jiongww hurzinlangg ee diongqanx, liw did diyc hokkir; liw soxx huai'in :ee iarr did diyc hokkir.

43 Guaw ee Jruw ee laurbuw laii jiurqin guaw, guaw dui' daxlyc e did diyc anxnix ar?

44 Liw cingxanx ee sniax jid'err zip guaw ee hnirkangx, dirr guaw vakdow lai ee txex dyrr hnuahiw laii diytiaur.

45 Sinr ee hurzinlangg u hokkir :ar, in'ui Jruw soxx qra ix qongw ee ue beh ingwgiam."

46 Malia qongw, "Guaw ee simx junqingr Jruw juer dua,

47 Guaw ee sinn in'ui qiur guaw ee Siongrder laii hnuahiw.

48 In'ui Ix knuawqor luxvi ee vibii, dui' dnaxx ixau banrsewdai beh qongw guaw u hokkir.

49 In'ui hitt xee u quanlingg :ee uirdiyhh guaw juer dua ee dairjir, Ix ee miaa si sxingr.

50 Qingwuir Ix ee langg, Ix linbinw inx qaur dairdai.

51 Ix bad ing Ix ee ciuw cud kuiwlat; simjir qiau'gno ee langg, Ix u qnuaxsnuar inx.

52 U quanlingg ee langg, Ix lud inx ee xui; vibii ee langg, Ix sringx inx juer quann;

53 Iaux ee langg, Ix ing hyw mic hro inx jiac qaur vaw; vur ee langg, Ix hro inx kangx kangx dyr .kir.

54 Ix hujo Ix ee lovok Islael,

55 Laii qiwliam Ix ee linbinw (jiauww Ix duiww lanw ee jow soxx qongw ee ue), laii hro Ablaham qapp ix ee horer qaur ingxsewdai."

56 Malia qapp ix snaqab druar iokliok u snax guehzit jiacc dyr kir inx daux.

57 Elizabet singsanw ee qrii ixqing’ qaur, dyrr snix qniaw.

58 Cuwvnix cincig tniax qnir Jruw dua linbinw ix, dyrr qapp ix snaqab hnuahiw.

59 Qaur derr veh zit inx laii beh qra ngex-aw qniaa qatlew, beh jiauww ix ee laurve ee miaa qra ix hy juer Zaqalias.

60 Ix ee laurbuw rinr qongxx, "Byy lar, diyhh qra ix ee miaa hy juer Johan."

61 Inx dyrr duiww ix qongw, "Liw ee cincig diongx byy langg hy jitt xee miaa."

62 Inx dyrr viw iwsur mng ix ee laurve, rair qra ix hy simxmih miaa.

63 Ix ee laurve tyw siaw zri ee vxanw, siaw qongxx, "Ix ee miaa si Johan." Dairqex qamxqag qiquair.

64 Zaqalias ee cuir liamvnix kuix .kuix, jic iarr tauw, dyrr qongxue laii ylyw Siongrder.

65 Siwuii kiarkiw ee langg longxx qniax. Jiaxee itcer ee ue venwvenr vywiongg dirr Judea ee snuade.

66 Tniax .qnir ee langg longxx jiong' jiaxee su kngr dirr simx nirr, qongw, "Anxnix, jitt xee ngex-aw jionglaii beh jnaixngiu?" In'ui Jruw ee ciuw qapp ix dilehh.

67 Ix ee laurve Zaqalias hro Singwsinn ciongmuaw, dyrr juer sendix laii qongw,

68 "Diyhh ylyw Jruw, Islael ee Siongrder, in'ui Ix u knuawqor Ix ee vecsnir laii sioghuee ix;

69 Ter lanw hingx kiw jinxqiur ee qag, dirr Ix ee lovok David ee qrex.

70 Jiauww Ix dui' u sewqanx ixlaii ing Ix sxingr ee sendix ee cuir soxx qongw :ee,

71 Dyrr si qiur lanw tuatli duiwdik qapp qniwnarr uanwhun lanw ee langg ee ciuw,

72 Laii qniaa linbinw dirr lanw ee ledjow, laii qiwliam Ix sxingr ee iog;

73 Dyrr si qapp lanw ee jow Ablaham soxx jxiur ee jxua,

74 Hro lanw ixqing’ tuatli jiaxee duiwdik ee ciuw,

75 Jit siwlangg dirr Ix ee binrjingg ing sxingr qapp gi, byy qniax laii hogsai Ix.

76 Ngex-aw ar, liw iarr beh cxingx juer Jiww Quann :ee ee sendix, in'ui liw beh qniaa dirr Jruw ee binrjingg laii virvan Ix ee lo,

77 Hro Ix ee vecsnir dui' did diyc siar jue, dyrr jaix jinxqiur ee xunx.

78 Uirdiyhh lanw ee Siongrder linbinw ee simx, dui' anxnix hro jaixkiw-sii ee zit dui' dingxbin laii qaur dirr lanw,

79 Laii jiyr hiaxee jre dirr oamr qapp siximr diongx ee langg, cua lanw ee kax zip ving'anx ee lo."

80 Gnex-aw jiamrjiam dua, simsinn zidzit iongxjongr, diamr dirr kongwiaw itdit qaur dirr Islael binrjingg henxbingg ee zit.

2 Dng' hitt sii, Kaesar Augustus u cud jiauwsux, bingrling tnie longxx jy qeqah.

2 Tauu jit vaiw ee qeqah si Quilinius juer Sylia jongxdog ee sii laii juer :ee.

3 Jiongww langg kir jy qeqah, dagg langg dyr kir vunxsniaa.

4 Josef ee sewhe sriok dirr David ee qrex, soxiw dui' Galilee ee Nazalet Sniaa jnriu kir Judea, qaur David ee sniaa, miaa qiyr Betlehem :ee,

5 Beh qapp ix soxx pingwdnia ee Malia snaqab jy qeqah. Hitt sii Malia ixqing’ u sin'in.

6 Inx dirr hiax ee sii, Malia singsanw ee qrii qaur.

7 Ix dyrr snix taujniu qniaw, ing vor qra vaux, hro Ix kunr dirr jyy nirr, in'ui kecquanw byy soxjai tangx iong'unw inx.

8 Hitt derhngx u qor ngiuu :ee druar dirr snuax nirr, mii .sii jiuxqnix, qor inx ee ngiuu-qrunn.

9 Jruw ee tnisair kia dirr inx ee sinvnix, Jruw ee ingqngx uiluii jiyr inx.

10 Qor ngiuu :ee dua qniax. Tnisair qra inx qongw, "Byc did qniax. Guaw vyr linw dua hnuahiw ee hyw siausid, hro vecsnir longxx u hxun.

11 Qinaxzit dirr David ee sniaa ixqing’ uirdiyhh linw snix jit xee Jinxqiur :ee, dyrr si Jruw Krist.

12 Linw beh knuar qnir jit xee Ngex-aw ing vor vaux, kunr dirr jyy nirr :ee, jitt xee dyrr si hro linw juer qiwhy."

13 Hutzenqanx u jerje tenvingx qapp hitt xee tnisair snaqab dilehh, ylyw Siongrder, qongw,

14 "Dirr qik quann ee xui ingqngx qruix dirr Siongrder, derjniu hyvingg dirr Ix soxx hnuahiw ee langg ee diongqanx."

15 Jiaxee tnisair lirkuix inx jnriu tnix ee sii, qor ngiuu :ee snaqab qongw, "Dnaxx lanw laii kir Betlehem, knuar soxx jniaa ee su, dyrr si Jruw soxx vyr lanw jaix :ee."

16 Inx dyrr qinw qinw kir, cue diyc Malia qapp Josef, qycc knuar qnir Ngex-aw kunr dirr jyy nirr.

17 Knuar liauw, dyrr jiong' tnisair soxx duiww inx qongw jitt xee Ngex-aw ee su vyr langg jaix.

18 Tniax .qnir ee langg longxx qiquair qor ngiuu :ee soxx duiww inx qongw ee su.

19 Dogdok Malia jiong' jiaxee ue qir diauu diauu, simlai siongsiongg decc sniu.

20 Qor ngiuu :ee dyr kir, uirdiyhh soxx tniax .qnir .ee, soxx knuar .qnir .ee, dyrr si tnisair soxx duiww inx qongw :ee, laii qruix ingqngx ylyw Siongrder.

21 Qaur derr veh zit, qra Ngex-aw qniaa qatlew ee qrii, dy hy Ix ee miaa qiyr Jesus, dyrr si Ix bue dautaix ee sii tnisair soxx hy :ee.

22 Jiauww Moses ee ludle, inx cingkir ee zit ixqing’ muaw, dyrr py Ngex-aw jnriu Jelusalem, beh henr hro Jruw.

23 (Jiauww Jruw ee ludle soxx qiwjair qongxx, "Qniwnarr taujniu ee davoqniaw beh cxingx juer sxingr, qruix dirr Jruw.")

24 Iarr beh henr jrer, jiauww Jruw ee ludle soxx qongw, "Ing jit duir ee qajuix, iacc si nng jiah jnixaxqniaw."

25 Duxdng dirr Jelusalem u jit langg, miaa qiyr Simeon. Jitt langg gi qycc qingwkenn, vingsii himbo hitt xee an'uir Islael :ee, qycc Singwsinn u diamr dirr ix.

26 Ix bad did diyc Singwsinn jixsi, jaix ix iauxx bue siw beh dairsingx knuar qnir Jruw ee Krist.

27 Ix hro singwsinn qamxdong, dyrr zip dxen; duxaxx Jesus ee verbuw py Ngex-aw zip .laii, beh qra Ix jiauww ludhuad ee le laii qniaa.

28 Hitt sii Simeon ing ciuw jrih Ngex-aw, ylyw Siongrder qongxx:

29 "Jruw ar, dnaxx jiauww Liw ee ue decc tauxvangr Liw ee lovok anzenn quewsir;

30 In'ui guaw ee bagjiux ixqing’ knuar qnir Liw ee jinxqiur,

31 Dyrr si Liw soxx virvan dirr banrvecsnir ee binrjingg ee,

32 Juer qngx laii jiyr guarvangx, qycc juer Liw Islael vecsnir ee ingqngx."

33 Ix ee ve qapp Ix ee buw decc qiquair ix soxx lun Ngex-aw ee ue.

34, 35 Simeon qra inx jiokhog, qycc duiww Ix ee laurbuw Malia qongw, "Jitt xee Ngex-aw siurr setlip beh hro Islael diongx jerje langg vuac dyw, jerje langg kiw .laii, iarr juer venrvok ee qiwhy; (qycc liw qaqi ee simx iarr beh u qiamr cak taur .quer;) hro jerje langg simlai ee liamrtauu e lorcud."

36 Qycc u Aser ee jipair, Fanuel ee jaboxqniaw, Anna, ix si juer sendix, (nihuer ixqing’ lau, dui' jairsikluw ee sii qer hro diongrhux cid nii quw,

37 Dyrr jiuxqnuaw veh-jap-sir nii,) longxx byy lirkuix dxen, qimwjiac qidyw, mizit hogsai Siongrder.

38 Duxduxx hitt sii ix jinwjingg, cingsia Siongrder, duiww qniwnarr himbo Jelusalem, did diyc sioghuee ee langg qongw kiw jitt xee Ngex-aw ee su.

39 Inx jiauww Jruw ee ludhuad qniaa dagg hxang dairjir bingvik, dyr kir Galilee, qaur vunxsniaa Nazalet.

40 Ngex-aw jiamrjiam dua, zidzit iongxjongr, diwhui ciongmuaw. Siongrder ee undenw qapp Ix dilehh.

41 Dagg nii Vnuaquewjeh ee sii, Ix ee verbuw kir Jelusalem.

42 Qaur Ix jap-zi huer ee sii, jiauww jecqii ee le longxx jnriu Jelusalem.

43 Jecqii ixqing’ bingvik, inx dyr .kir ee sii, Ginxaw Jesus iauxx druar dirr Jelusalem. Ix ee verbuw m jaix,

44 Pacsngr Ix dirr dangqniaa ee langg ee diongqanx. Qniaa jit zit ee lorjam, jiacc dirr cincig qapp sna' bad ee langg ee diongqanx cue Ix.

45 Cue byy diyc, dyrr dywdngw kir Jelusalem cue Ix.

46 Snax zit au dirr dxen nirr cue diyc Ix. Ix jre dirr hiaxee sensnix ee diongqanx, iarr decc tniax, iarr decc mng.

47 Tniax Ix ee langg longxx qiquair Ix ee cangmiaa qapp Ix ee inwdab.

48 Verbuw knuar qnir Ix dyrr gonggniac. Ix ee laurbuw duiww Ix qongw, "Qniaw ar, Liw sniaw su anxnix kuanxtai guanw? Liw knuar, Liw ee ve qapp guaw siongsimx decc cue Liw."

49 Ix qra inx qongw, "Sniaw su cue Guaw? Qamxx m jaix Guaw ingqaix dirr Guaw ee Ve ee cur mah?"

50 Inx be hiauxdid Ix soxx qra inx qongw ee ue.

51 Jesus dyrr qapp inx lyc kir qaur Nazalet, laii singsun inx. Ix ee laurbuw jiong' jiaxee ue longxx qir dirr simx nirr.

52 Jesus ee diwhui qapp nihuer naxx qetnix. Siongrder qapp langg naxx tniar Ix.

3 Tibelius Kaesar jerui ee jap-go nii, Pontius Pilate juer Judea ee jongxdog, Helod juer Galilee hunhongx ee zinqunx, ix ee hniadi Filip juer Itulea qapp Tlaqonitis derhngx hunhongx ee zinqunx, Lysanias juer Abilene hunhongx ee zinqunx,

2 Annas qapp Kaiafas juer jewsitauu ee sii, Zaqalias ee qniaw Johan dirr kongwiaw, Siongrder ee ue qaur dirr ix.

3 Ix dyrr qaur Jordan Hyy ee siwhngx, tuann huanxhuew ee sexlew, hro langg did diyc siar jue.

4 Cincniu sendix Isaiah ee ceh nirr soxx qir ee ue, qongw, "U langg dirr kongwiaw decc qiyr, ix ee sniax qongw, 'Virvan Jruw ee dua lo, siux dit Ix ee siyw lo.

5 Jiaxee snuaqog longxx beh tun dni. Jiaxee dua, siyw ee snuatauu longxx beh hro ix qe; uankiaux :ee, beh hro ix dit; kamxket :ee, beh hro ix vnii.

6 Huanrr u ziogtew :ee beh knuar qnir Siongrder ee jinxqiur.'"

7 Jerje langg cud laii beh siurr Johan ee sexlew, ix dyrr duiww inx qongw, "Dogjuaa ee lui ar, jirjui jixsi linw siamxvi jionglaii ee siurkir ar?

8 Soxiw linw diyhh qed hitt hy huanxhuew ee quexjiw. Byc did qaqi pacsngr qongxx, 'U Ablaham juer guanw ee ve.' Guaw qra linw qongw, Siongrder e dui' jiaxee jiyhtauu cud qniaxsunx hro Ablaham.

9 Dnaxx voxtauu ixqing’ he dirr ciurtauu. Qniwnarr ciu byy qed hyw quexjiw :ee, dyrr cyr ix, qycc qra hed lyc huew."

10 Jiongww langg mng ix qongxx, "Anxnix, guanw diyhh jnai'ngiu juer?"

11 Ix rinr qongxx, "U nng niaw snxax :ee diyhh vunx hro byy :ee; u mic tangx jiac :ee, iarr diyhh anxnix."

12 Tiux hxiongr :ee iarr laii beh siurr sexlew, duiww ix qongw, "Sensnix ar, guanw diyhh jnaixngiu juer?"

13 Ix duiww inx qongw, "Dniardiyc ee hxiongr ixgua, byc did qex tec."

14 Vingdingx iarr mng ix qongxx, "Acc guanw diyhh jnaixngiu juer?" Ix duiww inx qongw, "Byc did ligsig langg, byc did uaix langg; diyhh liac linw soxx did diyc ee nriuu juer qauwgiac."

15 Vecsnir decc ngwbang ee sii, jiongww langg simlai decc girlun Johan qiamxcaiw si Krist.

16 Johan rinr jiongww langg qongxx, "Guaw ing juiw qra linw qniaa sexlew. Dogdok u jit xee viw guaw kacc u quanlingg :ee beh laii. Guaw lenrr tauw Ix ee eduar iarr byy qraur qeh. Ix beh ing Singwsinn qapp huew qra linw sew.

17 Ix ee ciuw tec vuawqix, beh jiong' Ix hitt dniuu itjin vuar, siux bec zip Ix ee cngkor; narr si behhniu dyrr ing be huax ee huew siyx ix."

18 Johan lingrgua ing jerje hxang koxkngr laii tuann hok'imx hro vecsnir.

19 Dogdok hunhongx ee zinqunx Helod, in'ui ix ee hniadi ee bow Helodias ee enqor, qycc in'ui soxx qniaa longxjongw ee pnaiw dai, hro Johan jikvi.

20 Dnaxx qycc qex jit hxang, dyrr si ix jiong' Johan qnuaix dirr qnax nirr.

21 Jiongww vecsnir ixqing’ siurr sexlew, Jesus iarr ixqing’ siurr sexlew. Ix qidyw ee sii, tnix kuix,

22 Singwsinn qangwlimm dirr Ix ee dingxbin, hingjong cincniu jnixaw; qycc dui' tnix u sniax qongw, "Liw si Guaw tniar ee Qniaw, Guaw hnuahiw."

23 Jesus cuttauu ee sii iokliok snax-jap huer; Ix (jiauww langg knuar) si Josef ee qniaw, Josef si Heli ee qniaw,

24 Heli si Mattat ee qniaw, Mattat si Levi ee qniaw, Levi si Melqi ee qniaw, Melqi si Janna ee qniaw, Janna si Josef ee qniaw,

25 Josef si Mattatiah ee qniaw, Mattatiah si Amos ee qniaw, Amos si Nahum ee qniaw, Nahum si Esli ee qniaw, Esli si Naggai ee qniaw,

26 Naggai si Maat ee qniaw, Maat si Mattatiah ee qniaw, Mattatiah si Semei ee qniaw, Semei si Josef ee qniaw, Josef si Judah ee qniaw, Judah si Johannas ee qniaw,

27 Johannas si Rhesa ee qniaw, Rhesa si Zelubbabel ee qniaw, Zelubbabel si Sealtiel ee qniaw, Sealtiel si Neli ee qniaw, Neli si Melqi ee qniaw,

28 Melqi si Addi ee qniaw, Addi si Kosam ee qniaw, Kosam si Elmodam ee qniaw, Elmodam si Er ee qnianw, Er si Jose ee qniaw,

29 Jose si Eliezer ee qniaw, Eliezer si Jolim ee qniaw, Jolim si Mattat ee qniaw, Mattat si Levi ee qniaw,

30 Levi si Simeon ee qniaw, Simeon si Judah ee qniaw, Judah si Josef ee qniaw, Josef si Jonan ee qniaw, Jonan si Eliakim ee qniaw,

31 Eliakim si Melea ee qniaw, Melea si Menan ee qniaw, Menan si Mattatah ee qniaw, Mattatah si Natan ee qnaiw, Natan si David ee qniaw,

32 David si Jesse ee qniaw, Jesse si Obed ee qniaw, Obed si Boaz ee qniaw, Boaz si Salmon ee qniaw, Salmon si Nahson ee qniaw,

33 Nahson si Amminadab ee qniaw, Amminadab si Rlam ee qniaw, Rlam si Hezlon ee qniaw, Hezlon si Pelez ee qniaw, Pelez si Judah ee qniaw,

34 Judah si Jakob ee qniaw, Jakob si Isaac ee qniaw, Isaac si Ablaham ee qniaw, Ablaham si Telah ee qniaw, Telah si Nahor ee qniaw,

35 Nahor si Selug ee qniaw, Selug si Rleu ee qniaw, Rleu si Peleg ee qniaw, Peleg si Eber ee qniaw, Eber si Selah ee qniaw,

36 Selah si Kainan ee qniaw, Kainan si Arfasad ee qniaw, Arfasad si Sem ee qniaw, Sem si Noah ee qniaw, Noah si Lamec ee qniaw,

37 Lamec si Metuselah ee qniaw, Metuselah si Enoc ee qniaw, Enoc si Jaled ee qniaw, Jaled si Mahalalel ee qniaw, Mahalalel si Kainan ee qniaw, Kainan si Enos ee qniaw,

38 Enos si Set ee qniaw, Set si Adam ee qniaw, Adam si Siongrder ee qniaw.

4 Jesus siurr Singwsinn ciongmuaw, dui' Jordan Hyy dyr .laii, hro Singwsinn cua Ix kir dirr kongwiaw,

2 Sir-jap zit quw, hro moquiw qra cir. Jiaxee zit ee diongqanx byy jiac simxmih mic, au .laii iaux.

3 Moquiw qra Ix qongw, "Liw narr si Siongrder ee Qniaw, diyhh qra jitt xee jiyc vnir juer vniaw."

4 Jesus rinr ix qongxx, "U qiwjair qongxx, 'Langg e uac m na uaxkyr vniaw.'"

5 Moquiw qycc cua Ix vreh jnriu quann snuax, jit bak nih quw, ing tnie banrqog hro Ix knuar,

6 Dyrr qra Ix qongw, "Jitt xee itcer ee qxuann, qapp inx ee ingqngx, guaw beh hro Liw; in'ui jitt xee ixqing’ qaux hro guaw, cutjai guaw beh hro simxmih langg dyrr hro ix.

7 Soxiw Liw narr vair dirr guaw ee binrjingg, jiaxee dyrr longxjongw si Liw :ee."

8 Jesus rinr ix qongxx, "U qiwjair qongxx, 'Diyhh vair Jruw, liw ee Siongrder, dogdok hogsai Ix nardnia.'"

9 Moquiw qycc cua Ix qaur Jelusalem, hro Ix kia dirr dxen ee buexliux, qra Ix qongw, "Liw narr si Siongrder ee Qniaw, diyhh qaqi tiaur .lyc .kir;

10 In'ui u qiwjair qongxx, 'Ix beh uirdiyhh liw, bingrling Ix ee tnisair vyxho liw;

11 Inx beh ing ciuw huu liw, benw did liw ee kax dag diyc jiyc.'"

12 Jesus rinr ix qongxx, "U qongw, 'Byc did cir Jruw, liw ee Siongrder.'"

13 Moquiw ixqing’ jin dagg hxang ee cir, dyrr jiamrsii lirkuix Ix.

14 Jesus dirr u Singwsinn ee quanlingg diongx dywdngw kir Galilee. Ix ee miasniax venww tuann dirr siwuii ee derhngx.

15 Ix dirr inx ee huerdngg qawsi, hro jiongww langg ylyw Ix.

16 Jesus qaur Nazalet, dyrr si Ix diongxsingg ee soxjai. Dirr Anhiyczit jiauww Ix vingsor ee le zip huerdngg, dyrr kia decc tak.

17 U langg jiong' sendix Isaiah ee ceh hro Ix. Ix dyrr henx .kuix, cue diyc hitt soxjai, qir qongxx,

18 "Jruw ee Sinn limqaur Guaw, in'ui Ix ing iuu buah Guaw, hro Guaw tuann hok'imx hro songwhionglangg; Ix u crex Guaw qra siurr liac ee langg qongw, inx e did diyc tauxvangr; qra cnimii :ee qongw, inx e did diyc qycc qngx, laii tauxvangr siurr apjer ee langg,

19 Suantuann Jruw hnuahiw ee nii."

20 Jesus qra ceh hap .kiw .laii, hingg jipsu, dyrr jre lehh. Dirr huerdngg lairdew ee jiongww langg longxx juwbak knuar Ix.

21 Ix dyrr kuix cuir duiww inx qongw, "Jitt xee Singwqingx ee ingwgiam, linw qinaxzit u tniax .qnir lar."

22 Jiongww langg longxx qra qanjingr, qiquair Ix ee cuir soxx cud :ee ee undenw ee ue, qycc qongw, "Jitt xee qamxx m si Josef ee qniaw mah?"

23 Ix dyrr duiww inx qongw, "Linw dikkag inw jitt xee sioggiw, duiww Guaw qongw, 'Isingx ar, Liw diyhh rix qaqi; qniwnarr guanw tniax qnir Liw dirr Kapernaum qniaa :ee, iarr diyhh qniaa dirr jiax, dyrr si Liw ee vunxsoxjai.'"

24 Qycc qongw, "Guaw sidjai qra linw qongw, be u sendix dirr vunxsoxjai hro langg jiaplap :ee.

25 Guaw jinsit qra linw qongw, dng' Elijah ee sii, tnix kongwhan snax nii vnuar, venww de dua qihngx. Hitt sii Islael diongx u jerje jiuxqnuaxlangg, duliauw Sidon ee Zalepat,

26 Elijah m bad hrong crex kir cue inx jit langg; jixu kir Sidon ee Zalefat, cue jit xee jiuxqnuaxlangg.

27 Qycc sendix Elisha ee sii, Islael diongx u jerje taixqyx :ee, duliauw Sylialangg Naaman ixgua, qidiongx byy jit langg did diyc cingkir."

28 Dirr huerdngg ee langg tniax qnir jiaxee ue, longxx muaxsimx siurkir;

29 Dyrr kiw laii qnuaw Ix cud sniaa-gua. Inx ee sniaa kiw dirr snuax-dingw. Jiongww langg duar Ix qaur snuakamr, beh qra Ix ciax .lyc .kir.

30 Danrsi Jesus dui' inx diongqanx qniaa .quer, jueww Ix kir.

31 Ix lyc kir qaur Kapernaum, dyrr si Galilee ee jit xee sniaa, dirr Anhiyczit qawsi langg.

32 Langg qiquair Ix ee qawsi, in'ui Ix ee ue u qxuann.

33 Huerdngg lai u jit xee huan diyc qxuiw ee langg, dua sniax qiyr qongxx,

34 "Hnaira, Nazalet ee Jesus, guanw qapp Liw simxmih qansiap, Liw laii beh bet guanw mah? Guaw jaix Liw si jirjui, dyrr si Siongrder ee Sxingr :ee."

35 Jesus jikvi ix qongxx, "Liw diyhh jing jing, dui' ix cud .kir." Qxuiw dyrr ciax dyw hitt langg dirr jiongww langg ee diongqanx, jiacc cud .kir, longxx byy siongx diyc ix.

36 Jiongww langg gonggniac, snaqab girlun qongxx, "Jex si simxmih ue ar? Ix ing quanvingr qapp linglik bingrling jiaxee siasinn, inx dyrr cud .kir."

37 Ix ee miasniax dyrr venww tuann dirr siwuii ee derhngx.

38 Jesus dui' huerdngg cud .laii, zip Simon ee qrex. Simon ee dniurmw huan diyc dang ee zedvni. Langg ter ix qriuu Jesus.

39 Jesus kia uaw, ngar lyc kir jikvi ix ee zedvni, zet dyrr trer; hurzinlangg suisii kiw .laii, suar suhau inx.

40 Zit lyc ee sii, qniwnarr u vni :ee, vutlun huan diyc simxmih vni, langg longxx duar inx laii jiurqin Jesus. Jesus qra ciuw hnua dirr inx dagg langg ee sinjniu, laii rix hyw inx.

41 Qycc u qxuiw dui' jerje langg cud .kir, qiyr qongxx, "Liw dyrr si Siongrder ee Qniaw." Jesus in'ui qxuiw bad Ix si Krist, dyrr jikvi inx, m jrunw inx qongw.

42 Tnixqngx ee sii, Jesus kir kongwiaw ee soxjai. Qui' din langg cue Ix, jiurqin Ix, rair lauu Ix, hro Ix byc did lirkuix inx kir.

43 Dansi Ix duiww inx qongw, "Guaw iarr diyhh dirr vadd xee sniaa tuann Siongrdewqog ee hok'imx, in'ui Guaw hrong crex dyrr si uirdiyhh jex."

44 Ix dyrr dirr Galilee jiaxee ee huerdngg laii suantuann.

5 Jesus kia dirr Gennesalet Oo-vnix. Jiongww langg ekeh Ix, decc tniax Siongrder ee dyrliw.

2 Ix knuar qnir nng jiah junn dirr oo-vnix, tyxhilangg lirkuix junn decc sew bxang.

3 Qidiongx jit jiah si Simon :ee. Jesus jnriu .kir, cniaw ix jiong' junn vangr kacc kuix. Ix dyrr jre dirr junn nirr qawsi jiongww langg.

4 Qongw suah, dyrr duiww Simon qongw, "Qra junn vangr qaur cimx ee soxjai, prax bxang tyxhii."

5 Simon rinr qongxx, "Sensnix, guanw tong' mii diyhbuaa, tyw longxx byy; danrsi in'ui Liw ee ue, guaw dyrr beh prax bxang."

6 Inx prax .lyc .kir, dyrr uii diyc jin' je hii; bxang hiamw hiamw beh lic.

7 Inx dyrr et vadd jiah junn ee dangpnua laii dauwsnaqang. Laii liauxau, kiyh hii muaw nng jiah junn qaur beh dimm .lyc .kir.

8 Simon Peter knuar qnir anxnix, dyrr pag dirr Jesus ee kax-xe qongw, "Jruw ar, lirkuix guaw, guaw si u jue ee langg."

9 Simon qapp qangg dilehh ee langg, inx jid'err prax .lyc .kir, knuar diyc soxx liac .diyc ee hii, byy byy gonggniac :ee.

10 Simon ee dangpnua, Zebedee ee qniaw James qapp Johan, iarr si anxnix. Jesus duiww Simon qongw, "Byc did qniax, dui' jitt diap liauxau, liw beh did diyc langg."

11 Inx ixqing’ tuax junn uaw hnua, dyrr vangwsag itcer duer Ix.

12 Jesus dirr jitt xee sniaa, duxdng u jit langg venww srinx taixqyx. Taixqyx :ee knuar qnir Ix, dyrr qra bin pag dirr de nirr, qriuu qongxx, "Jruw ar, Liw narr kingw, dyrr e hro guaw cingkir."

13 Ix crunx ciuw bongx ix qongw, "Guaw kingw, liw tangx cingkir." Taixqyx jiksii druu .kir.

14 Jesus huanhur ix byc did qra langg qongw, "Dogdok diyhh kir, jiong' vunxsinx hro jewsix giam, iarr in'ui liw did diyc cingkir, henr Moses soxx huanhur :ee, duiww jiongww langg laii juer jingwqir."

15 Danrsi Ix ee miasniax ithuad vywiongg, qui' dua din ee langg jurjip beh tniax, iarr beh did diyc rix hyw inx ee vni.

16 Danrsi Jesus trer .kir, diamr dirr kongwiaw qidyw.

17 U jit zit, Jesus decc qawsi langg, u Faliselangg qapp qar ludhuad ee sensnix dirr hiax decc jre, inx si dui' Galilee dagg hniusia qapp Judea qapp Jelusalem laii :ee. Jruw ee quanlingg qapp Jesus dilehh, hro Ix rix hyw langg.

18 Duxdng u langg ing pox-aw qrngx venwsui :ee laii, rair beh qrngx zip kir he dirr Ix ee binrjingg.

19 In'ui langg je, cue byy pang tangx qrngx .zip .kir; inx dyrr jnriu cur-dingw, dui' cuwquar diongx jiong' langg lenrr pox-aw dui .lyc .kir, he dirr diong'ngx, dirr Jesus ee binrjingg.

20 Jesus knuar qnir inx ee sinr, dyrr qongw, "Boxlangg ar, liw ee jue siar lar."

21 Qinghagsu qapp Faliselangg dyrr girlun qongxx, "Jitt xee langg qongw ciamwquann lamrsamw ee ue :ee si jirjui ar? Siongrder ixgua, jirjui e siar jue ar?"

22 Jesus jaix inx ee girlun, dyrr rinr qongxx, "Linw simlai decc girlun simxmih ar?

23 Qongw, 'Liw ee jue siar', iacc si qongw, 'Liw kiw laii qniaa', dycc jit hxang kacc kuair?

24 Danrsi beh hro linw jaix Zinjuw dirr de nirr u qxuann tangx siawbenw jue. (Ix dyrr qra venwsui :ee qongw) Guaw qra liw qongw, kiw laii, giaa liw ee pox-aw dyr kir liw ee cur."

25 Hitt langg dirr jiongww langg ee binrjingg jiksii kiw .laii, giaa ix soxx kunr :ee, dyr kir ix ee cur, qruix ingqngx Siongrder.

26 Jiongww langg longxx gonggniac, iarr qruix ingqngx Siongrder; qycc muaxsimx qniahniaa, qongw, "Lanw qinaxzit knuar qnir iwgua ee su."

27 Jiaxee dairjir liauxau, Jesus cud .kir, knuar qnir jit xee tiux hxiongr :ee, miaa qiyr Levi, jre dirr hiongwquanx. Jesus dyrr qra ix qongw, "Duer Guaw."

28 Ix dyrr vangwsag itcer, kiw laii duer Ix.

29 Levi uirdiyhh Ix vran dua enwsiac dirr inx daux. U tiux hxiongr :ee ixqip vadd langg jerje qapp inx dauwdin jerdyh.

30 Faliselangg qapp inx ee qinghagsu duiww Ix ee hagsingx gnauhgnauc liam, qongw, "Linw sniaw su qapp tiux hxiongr :ee ixqip pnaiw langg limjiac ar?"

31 Jesus rinr qongxx, "Iongxjongr ee langg byy kiamwing isingx, danrsi puawvni ee langg dyrr u.

32 Guaw laii m si beh jiyx girlangg, si beh jiyx pnaiw langg laii huanxhuew."

33 Inx duiww Ix qongw, "Johan ee hagsingx dniardnia qimwjiac qidyw; Falise ee hagsingx iarr si anxnix; danrsi Liw ee hagsingx iarr limx iarr jiac."

34 Jesus duiww inx qongw, "Sinqniaxsair qapp hyrcua ee langg snaqab dilehh, qamxx e hro hyrcua ee langg qimwjiac mah?

35 Danrsi zidjiw beh qaur, sinqniaxsair beh dui' inx diongqanx byy .kir. Dirr hiaxee zit, inx dyrr beh qimwjiac."

36 Ix qycc ing piwzu duiww inx qongw, "Byy langg tiah sinx snxax laii vow qu snxax, qycc soxx vow hitt der sinx :ee e byy hac dirr qu :ee.

37 Iarr byy langg ing sinx jiuw drew dirr qu puelongg; narr anxnix, dyrr sinx jiuw beh viag lic puelongg, jiuw lrau, lrongg iarr pacpnaiw.

38 Dogdok sinx jiuw diyhh zip dirr sinx ee puelongg.

39 Qycc byy langg limx qu jiuw qycc beh rair hitt xee sinx :ee; ix jongw e qongw, qu :ee si hyw."

6 U jit xee Anhiyczit, Jesus dui' behhngg qingquer, Ix ee hagsingx diah behsui, ing ciuw qra zuee laii jiac.

2 U Falise quixnarr langg qongw, "Anhiyczit soxx m ingqaix qniaa :ee, linw sniaw su qniaa ix?"

3 Jesus rinr qongxx, "David qapp qinduer ee langg iaux ee sii soxx qniaa :ee, linw byy tak .diyc mah?

4 Ix zip Siongrder ee cur, tec vailet ee vniaw laii jiac, qycc hro ix qinduer ee langg; jitt hy vniaw, narr m si jewsix, dyrr longxx byy ingqaix jiac."

5 Qycc qra inx qongw, "Zinjuw iarr si Anhiyczit ee Jruw."

6 Qycc jit xee Anhiyczit, Jesus zip huerdngg qawsi. Dirr hiax u jit langg, ix ee jniawciuw qodaa.

7 Qinghagsu qapp Faliselangg dngdecc knuar Ix dirr Anhiyczit beh ivni iacc byy; iwsur si rair cue pang tangx qryr Ix.

8 Jesus jaix inx ee iwsur, dyrr qra hitt xee ciuw qodaa ee langg qongw, "Kiw laii kia dirr diong'ngx." Ix dyrr kiw laii kia lehh.

9 Jesus dyrr duiww inx qongw, "Guaw mng linw. Dirr Anhiyczit qniaa hyw su qniaa pnaiw su, qriuu sniwmia hai sniwmia, dycc jit hxang kacc habgii ar?"

10 Ix dyrr siwquer knuar jiongww langg, qra hitt langg qongw, "Crunx liw ee ciuw." Ix crunx .cud .kir; ciuw dyrr hyw hyw.

11 Hiaxee langg muaxsimx siurkir, snaqab girlun diyhh jnaixngiu laii vran Jesus.

12 Dng' hitt sii, Jesus cud kir snuax nirr qidyw, tong' mii qiqiuu Siongrder.

13 Qaur tnixqngx dyrr qiyr Ix ee hagsingx laii, dui' inx diongqanx qingw jap-zi xee langg, cxingx inx juer suwdoo:

14 U Simon, Jesus qycc hy ix ee miaa juer Peter, qapp ix ee hniadi Andlew, qycc u James qapp Johan, Filip qapp Bartolomew;

15 Mateo qapp Tomas, Alfaeus ee qniaw James, qapp cxingx juer Zealot ee Simon,

16 James ee qniaw Judas, qapp bre sensnix ee Iskaliotlangg Judas.

17 Jesus qapp inx lyc laii kia dirr vnii ee soxjai, u Ix jerje ee hagsingx qapp qui' dua din ee vecsnir, dui' Judea juann de qapp Jelusalem ixqip Tyle Sidon en' haiw-qnii ee de laii beh tniax Ix, iarr beh did diyc rix hyw inx ee vni.

18 Qycc u hro siasinn soxx tiaulann :ee iarr did diyc rix hyw.

19 Jiongww langg longxx rair bongx Ix, in'ui u quanlingg dui' Ix cud, laii rix hyw dairqex.

20 Jesus giahbak knuar Ix ee hagsingx, qongw, "Linw songwhiongx ee langg u hokkir ar, in'ui Siongrder ee qog si linw :ee.

21 Linw henrjai decc iaux ee langg u hokkir ar, in'ui linw beh did diyc vaw. Linw henrjai tikaur ee langg u hokkir ar, in'ui linw decbeh ciyr.

22 Langg uirdiyhh Zinjuw laii uanwhun linw, qirjuat linw, luexme linw, liac linw ee miaa juer pnaiw laii kiwsag ix, linw dyrr u hokkir ar.

23 Dng' hitt zit, linw diyhh hnuahiw diytiaur, in'ui dirr tnix nirr linw ee vywsniuw si dua; inx ee jow kuanxtai sendix iarr si anxnix.

24 Danrsi linw hyxgiahlangg u jaiec ar! In'ui linw ixqing’ sriu diyc linw ee an'uir.

25 Linw henrjai vaw ee langg u jaiec ar! In'ui linw decbeh iaux. Linw henrjai ciyr ee langg u jaiec ar! In'ui linw beh aisiongx tikaur.

26 Linw hro jiongww langg ylyw :ee u jaiec ar! In'ui inx ee jow kuanxtai qew ee sendix iarr si anxnix.

27 Mrquxx Guaw qra linw decc tniax ee langg qongw, duiwdik linw :ee, diyhh tniar inx; uanwhun linw :ee, diyhh hyw kuanxtai inx;

28 Luexme linw :ee, diyhh qra inx jiokhog; lingziok linw :ee, diyhh ter inx qidyw.

29 Langg' senr liw jitt vingg ee cuiwpuew, dyrr diyhh uat hitt vingg ngr ix. Langg' tec linw ee guarsnax, lenrr lairsnax iarr byc did dongr ix.

30 Huanrnarr qriuu liw :ee, diyhh hro ix; beh tec liw ee mic :ee; byc did qycc qra ix tyw.

31 Linw rair langg' jnaixngiu kuanxtai linw, iarr diyhh anxnix kuanxtai langg'.

32 Linw narr tniar hiaxee tniar linw :ee, u simxmih unhui? Pnaiw langg iarr si tniar hiaxee tniar inx ee langg.

33 Linw narr hyw kuanxtai hiaxee hyw kuanxtai linw :ee, u simxmih unhui? Pnaiw langg iarr si anxnix qniaa.

34 Linw narr jiyh hiaxee u tangx ngwbang ix hingg :ee, u simxmih unhui? Pnaiw langg iarr jiyh pnaiw langg, rair inx jiauww siauwgiac laii hingg.

35 Danrsi linw diyhh tniar linw ee duiwdik, hyw kuanxtai inx, jiyh .langg' iarr byy juadbang, linw ee vywsniuw dyrr dua, qycc linw beh juer Jiww Quann :ee ee qniaxzii, in'ui Ix hyw kuanxtai bong'unx qapp pnaiw ee langg.

36 Soxiw linw diyhh u linbinw, cincniu linw ee Ve ee linbinw jidngiu.

37 Byc did puepingg langg', dyrr byy duw diyc puepingg; byc did jikjue langg', dyrr byy duw diyc jikjue; linw vangr langg' suah, dyrr beh vangr linw suah;

38 Hro langg', dyrr beh hro linw; beh u jiokgiac ee dauw, cic, iyy, hro ix jat qaur lrauu .cud .laii, vniar dirr linw ee sna'axper. In'ui linw ing simxmih nriuu laii nriuu, iarr beh anxnix nriuu hro linw."

39 Ix qycc ing piwzu qra inx qongw, "Cnimii :ee e qra cnimii :ee cuarlo mah? Nng xee qamxx be longxx vuac lyc hamrknix mah?

40 Hagsingx be e vnuaa quer sensnix. Danrsi qniwnarr jniaa juer jiauvi :ee beh cincniu ix ee sensnix.

41 Qycc liw jnaixngiu knuar qnir hniadi bagjiux lai ee cauxaxiur, iarr byy sniu liw bagjiux lai ee ngi'axcaa ar?

42 Acc tacc e qra liw ee hniadi qongw, 'Hniadi ar, liw bagjiux lai ee cauxaxiur hro guaw qra liw tec .kir,' acc vunxsinx byy knuar qnir liw bagjiux lai ee ngi'axcaa ar? Qew hyw ee langg ar, dairsingx tec kir liw bagjiux lai ee ngi'axcaa, jiacc e bingg bingg knuar .qnir, tangx tec kir hniadi bagjiux lai ee cauxaxiur.

43 In'ui byy u hyw ciu qed pnaiw quexjiw; iarr byy u pnaiw ciu qed hyw quexjiw.

44 In'ui erdangr dui' dagg jangg ciu ix qaqi ee quexjiw laii bad ix. Ciwper lai byy langg banw buhuaqyw, cauxcir lai byy langg diah pudyy.

45 Hyw langg dui' ix ee simx soxx jikju ee hyw laii huad cud hyw; pnaiw langg dui' ix soxx jikju ee pnaiw laii huad cud pnaiw; in'ui dui' simx soxx ciongmuaw :ee, cuir dyrr qongw cud.

46 Linw sniaw su cinghox Guaw, 'Jruw ar, Jruw ar', suacc byy qniaa Guaw soxx qongw :ee ar?

47 Qniwnarr jiurqin Guaw, tniax Guaw jiaxee ue laii qniaa ee langg, Guaw beh vyr linw jaix hitt xee langg cincniu simxmih.

48 Ix si cincniu langg kiw cur, qrut hro ix cimx, he derqix dirr jiyhvnuaa dingw. Duarjuiw jid'err qaur, kelauu ciongx diyc cur, be e iydang ix, in'ui ix kiw did hyw.

49 Danrsi tniax liauw byy qniaa ee langg, si cincniu langg kiw cur dirr too-dingw, byy he derqix. Kelauu ciongx diyc ix, dyrr dyw; hitt qingx cur ee dyxhuai si jin' siongdiong."

7 Jesus qongw hro vecsnir tniax ee ue longxx bingvik, dyrr zip Kapernaum.

2 U jit xee vexjongw soxx duiwdiong ee lovok huan diyc vni, decbeh siw.

3 Vexjongw tniax qnir Jesus ee su, dyrr crex Judea ee dniuxlyw quixnarr langg, qriuu Ix laii qiur ix ee lovok.

4 Inx jiurqin Jesus, cetced qriuu Ix qongxx, "Jitt langg e kamx did Liw qra ix qniaa jitt xee dairjir;

5 In'ui ix tniar lanw ee vecsnir, qycc ter lanw kiw huerdngg."

6 Jesus qapp inx kir. Li cur byy zuarr hng, vexjongw crex quixnarr xee ving'iuw jiurqin Ix, qra Ix qongw, "Jruw ar, m tangx lyhuann. Liw qaur guaw ee cur, guaw drngx be kiw;

7 Guaw iarr liac juer qaqi be kamx did jiurqin Liw. Liw narr qongw jit qxur ue, guaw ee lovok dyrr e hyw.

8 In'ui guaw iarr si hro langg' quanw ee langg, iarr u vingx hro guaw quanw; qra jitt xee qongw, 'Kir', ix dyrr kir; qra hitt xee qongw, 'Laii', ix dyrr laii; qra guaw ee lovok qongw, 'Qniaa anxnix', ix dyrr qniaa anxnix."

9 Jesus tniax qnir jiaxee ue dyrr qiquair, uat dngw srinx qra duer Ix ee jiongww langg qongw, "Guaw qra linw qongw, cincniu jitt hy ee sinr, lenrr dirr Islael diongx Guaw iauxx m bad duw .diyc."

10 Soxx crex ee langg dyr kir qaur cur, dyrr knuar qnir lovok ixqing’ hyw hyw.

11 Qycc byy zuarr quw, Jesus kir jit xee sniaa miaa qiyr Nain. Ix ee hagsingx qapp qui' din langg qapp Ix dangqniaa.

12 Beh qin sniamngg ee sii, duxdng u langg qrngx jit xee sixlangg cud .laii. Ix ee laurbuw qoqox snix ix jitt xee qniaw, qycc si jiuxqnuaxlangg. Sniaa-lai u jerje langg decc sangr ix.

13 Jruw knuar .qnir dyrr linbinw ix, qra ix qongw, "Byc did hauw."

14 Ix dyrr uaw .kir, bongx hitt xee kuar sinsix ee qxer. Qrngx ee langg tingkax. Ix dyrr qongw, "Siauwlenlangg ar, Guaw qra liw qongw, 'Kiw .laii.'"

15 Siw ee langg dyrr kiw laii jre, suar qongxue. Jesus dyrr jiong' ix hro ix ee laurbuw.

16 Jiongww langg longxx qniahniaa, qruix ingqngx hro Siongrder, qongw, "U dua sendix hingx kiw dirr lanw diongqanx"; qycc qongw, "Siongrder u knuawqor Ix ee vecsnir."

17 Dui' anxnix, Jesus jitt xee miasniax venww tuann dirr Judea qapp jiu'uii ee derhngx.

18 Johan ee hagsingx jiong' jiaxee su longxjongw vyr inx ee sensnix jaix.

19 Ix dyrr qiyr ix nng xee hagsingx laii, crex inx jiurqin Jruw, qongw, "Soxx beh laii :ee si Liw mah? Iacc si guanw diyhh ngwbang vadd langg ar?"

20 Hitt nng langg ixqing’ qaur, dyrr qongw, "Qniaa sexlew Johan crex guanw jiurqin Liw, qongw, 'Beh laii :ee si Liw mah? Iacc si guanw diyhh ngwbang vadd xee langg ar?'"

21 Hitt sii Jesus rix hyw jerje puawvni :ee, tangwtniar :ee, huan diyc qxuiw :ee, qycc hro jerje cnimii :ee did diyc knuar .qnir,

22 Dyrr rinr qongxx, "Linw diyhh kir, jiong' linw soxx knuar .qnir, soxx tniax .qnir .ee vyr Johan jaix; dyrr si cnimii :ee knuar .qnir, siw ee langg qycc uac, songwhionglangg did diyc tniax hok'imx;

23 Qniwnarr byy in'ui Guaw laii diyhdag :ee, u hokkir."

24 Johan soxx crex ee langg kir liauw, Jesus jiacc tee kiw Johan, duiww jiongww langg qongw, "Linw jingg cud kir kongwiaw, beh knuar simxmih? Knuar lodig hro hongx cuex dinxdang mah?

25 Linw cud kir beh knuar simxmih? Knuar langg cing iuwnngw ee ijniuu mah? Cing snxax hanggnow, hiongxsiu enwlok :ee si dirr ongqiongx.

26 Anxnix, linw cud kir beh knuar simxmih? Sendilangg mah? Si lar. Guaw qra linw qongw, ix si kacc ngiaa quer sendix :ee.

27 Jitt langg dyrr si qingx nirr soxx qiw :ee, qongw, 'Knuar ar, Guaw crex Guaw ee suwjiaw dirr Liw ee binrjingg, ix beh dirr Liw ee taujingg virvan Liw ee lo.'

28 Guaw qra linw qongw, hurzinlangg soxx snix :ee, be u kacc dua quer Johan :ee; danrsi dirr Siongrdewqog ee biser :ee iauxx kacc dua ix."

29 Jiongww vecsnir qapp tiux hxiongr ee langg ixqing’ siurr Johan ee sexlew, jid'err tniax qnir jex, dyrr cinghox Siongrder juer gi.

30 Danrsi Faliselangg qapp qar ludhuad ee sensnix byy siurr ix ee sexlew, qaqi pacbyy Siongrder ee jixir.

31 Jruw qongw, "Jitt sewdai ee langg, Guaw beh ing simxmih laii vixping inx?

32 Inx si cincniu ginxaw jre dirr queci nirr, sna' qiyr qongxx, 'Guanw duiww linw vunn dad'aw, linw byy tiauwbuw; guanw bad vi'aix, linw byy tikaur.'

33 In'ui qniaa sexlew ee Johan laii, byy jiac vniaw, byy limx jiuw, linw dyrr qongw Ix huan diyc qxuiw.

34 Zinjuw laii, iarr jiac iarr limx, linw dyrr qongw, Ix si tamx jiac hnor jiuw ee langg, tiux hxiongr :ee qapp pniaw langg ee ving'iuw.

35 Danrsi diwhui dui' ix ee jiongww qniaw laii henxbingg ix si driyc."

36 U jit xee Faliselangg cniaw Jesus snaqab jiac. Ix dyrr zip Faliselangg ee cur nirr jerdyh.

37 Duxdng sniaa-lai u jit xee u jue ee hurzinlangg, jaix Ix jerdyh dirr Faliselangg ee cur, dyrr duar drew hniu'iuu ee gigquanr laii,

38 Kia dirr Jesus ee aurbin, uaw Ix ee kax decc tikaur; u bagsaiw dih damm Ix ee kax, ix dyrr ing ix ee taumngg qra crid. Ix qycc jiap jiap jimx Ix ee kax, ing hniu'iuu buah Ix.

39 Cniaw Jesus ee Faliselangg knuar qnir anxnix, simlai sniu qongxx, "Jitt langg narr si sendix, dikkag e jaix bongx Ix ee langg si jirjui, qycc si simxmih hy ee hurzinlangg, dyrr si u jue ee langg."

40 Jesus rinr ix qongxx, "Simon, Guaw u ue beh qra liw qongw." Simon qongw, "Sensnix, cniaw Liw qongw."

41 Ix dyrr qongw, "Bxow xee jewjuw u nng langg kiamr ix ee jer, jit xee kiamr ix go-vah xee ginn-aw, jit xee kiamr ix go-jap.

42 Inx qiwzenn byy tangx hingg, jewjuw dyrr siawbenw inx nng langg. Anxnix, dyrr dycc jit xee kacc tniar jewjuw ar?"

43 Simon rinr qongxx, "Guaw pacsngr si hitt xee hro ix siawbenw kacc je :ee." Jesus qra ix qongw, "Liw soxx duanr :ee si driyc."

44 Dyrr uat tauu ngr hurzinlangg, qra Simon qongw, "Liw knuar qnir jitt xee hurzinlangg bor? Guaw zip liw ee cur, liw byy ing juiw qra Guaw sew kax; danrsi ix ing bagsaiw dih damm Guaw ee kax, ing taumngg qra crid.

45 Liw byy qra Guaw jimx; dogdok ix dui' Guaw zip .laii ee sii dyrr jimx Guaw ee kax byy suah.

46 Liw byy ing iuu buah Guaw ee taukag; danrsi ix ing hniu'iuu buah Guaw ee kax.

47 Soxiw Guaw qra liw qongw, ix jerje ee juerquar ixqing’ siawbenw, in'ui ix ee tniar si je; narr did diyc siawbenw jiyw :ee, ix ee tniar iarr si jiyw."

48 Ix dyrr qra hurzinlangg qongw, "Liw ee jue siar lar."

49 Qangg dyh ee langg simlai qongw, "Jitt xee decc siar jue :ee si simxmih langg?"

50 Jesus duiww hurzinlangg qongw, "Liw ee sinr u qiur liw; jueww liw ansimx dyr .kir."

8 Quer byy quiw zit, Jesus siwquer qniaa dagg xee sniaa, dagg xee hniusia, suantuann laii vywiongg Siongrdewqog ee hok'imx. Jap-zi xee hagsingx iarr qapp Ix kir.

2 Iarr u quixnarr xee hurzinlangg, uree bad huan diyc qxuiw, uree u puawvni, dnaxx ixqing’ did diyc rix hyw. Qidiongx u Magdalene ee Malia, bad u cid xee qxuiw dui' ix cud .kir;

3 Qycc u Helod ee quanxqex Kuza ee bow Johanna; qycc u Susanna; ixgua iauxx u jerje hurzinlangg, longxx ing soxx u :ee laii hogsai inx.

4 U jerje langg jurjip, qycc u langg dui' dagg xee sniaa laii jiurqin Ix. Hitt sii, Jesus sed piwzu qra inx qongw,

5 "U ia jxingw :ee cud kir ia jxingw. Decc ia ee sii, uree qalauc dirr lo-vnix, hro langg dac, tnidiongx ee vuejiauw itjin jiac ix.

6 Uree qalauc dirr jiyhvnuaa dingw, huad .kiw .laii dyrr dax .kir, in'ui byy zunrdik.

7 Uree qalauc dirr cixaw diongx, cixaw vnivnii huad .kiw .laii, dyrr qra ziaver.

8 Uree qalauc dirr hyw ee toxde, huad .kiw .laii, qetsit qaur jit-vah vxue." Jiaxee ue qongw liauw, dyrr qiyr qongxx, "U hnirkangx tangx tniax :ee, diyhh tniax."

9 Ix ee hagsingx mng Ix jitt xee piwzu jnaixngiu.

10 Jesus qongw, "Siongrdewqog ee ywbiau hro linw jaix; narr si duiww vadd langg dyrr ing piwzu, beh hro inx knuar, inx knuar be qnir, tniax iarr be hiauxgno.

11 Jitt xee piwzu dyrr si anxnix: Jingxjiw dyrr si Siongrder ee dyrliw.

12 Dirr lo-vnix :ee, dyrr si langg tniax qnir dyrliw; moquiw dyrr laii, dui' inx ee simlai jiong' dyrliw cniuw .kir, benw did inx sinr laii did diyc qiur.

13 Dirr jiyhvnuaa dingw :ee, dyrr si langg tniax liauw, hnuahiw singsiu dyrliw; danrsi inx byy qinx, si jiamrsii sinr nardnia, duw diyc ciwlen ee sii dyrr vuerbiu.

14 Lyc dirr cixaw lai :ee, jiaxee dyrr si langg tniax liauw dyrr kir, hro jairsnix ee kuawlu, huewjaii, qapp enwlok soxx ziaver, dyrr qed m jniaa liap.

15 Lyc dirr hyw toxde :ee, jiaxee dyrr si langg ing hyw qycc senrliongg ee simx tniax dyrliw laii jipsiuw ix, qycc tunlunw laii qetsit.

16 Byy langg diamw dingx, suacc ing kiwqu laii kamr ix, iacc si he dirr bincngg xe; ingqaix he dirr dingdaii dingw, hro zip .laii ee langg knuar qnir hitt xee qngx.

17 In'ui byy u unxbat :ee jionglaii byy lorhen; byy u viwbat :ee, jionglaii byy hro langg jaix qycc lorhen :ee.

18 Soxiw linw diyhh qinxsin laii tniax; in'ui qniwnarr u :ee, beh hro ix, byy :ee, lenrr ix qaqi liac juer u :ee, iarr beh qra ix cniuw .kir."

19 Jesus ee laurbuw qapp hniadi laii jiurqin Ix. In'ui langg je, inx berdid qinruaw.

20 U langg qra Ix qongw, "Liw ee laurbuw qapp Liw ee hniadi kia dirr guarbin, rair beh knuar Liw."

21 Ix rinr qongxx, "Guaw ee laurbuw qapp Guaw ee hniadi dyrr si jiaxee tniax Siongrder ee dyrliw laii qniaa ee langg."

22 U jit zit, Jesus qapp Ix ee hagsingx jnriu junn. Ix qra inx qongw, "Lanw laii kir oo ee hitt vingg hnua." Dyrr kuix junn.

23 Qniaa ee sii, Jesus kunr .kir. U vywtauhongx pah lyc laii oo nirr, junn-lai ee juiw cavutdyx muaw, jinrjai guihiamw.

24 Hagsingx qinruaw, qiyr Ix cnew, qongw, "Sensnix ar, Sensnix ar, beh byy mia lar." Ix dyrr cnew, jikvi hongx qapp haixingw. Hong'ingw dyrr suah, iarr vnidnia.

25 Ix dyrr qra hagsingx qongw, "Linw ee sinr dirr daxlyc?" Inx dyrr qniahniaa qiquair, snaqab qongw, "Jex si simxmih langg, bingrling hongx qapp juiw, qycc inx iarr sun Ix?"

26 Junn qaur Gadalenelangg ee derhngx, dyrr si Galilee ee duiwbin.

27 Jesus lirkuix junn, jnriu hnua. U jit langg dui' sniaa nirr cud laii duw diyc Ix, si huan diyc qxuiw :ee, quw quw byy cing snxax byy diamr cur-lai, dogdok diamr dirr hunbong diongx.

28 Ix knuar qnir Jesus dyrr auqiyr, pag dirr Ix ee binrjingg, dua sniax qongw, "Jiww Quann Siongrder ee Qniaw Jesus, guaw qapp Liw u simxmih qansiap? Qriuu Liw byc did koxcow guaw."

29 Jex si in'ui Jesus bad bingrling siasinn dui' hitt xee langg cud .laii. Siasinn siongsiongg liac ix. Langg ing ticlen len ix, ing kakaur kraur ix, laii qowsiuw ix; ix dyrr cuah dng soxx vak ix ee kiwqu, hro qxuiw qnuaw qaur kongwiaw.

30 Jesus mng ix qongxx, "Liw qiyr simxmih miaa?" Ix qongw, "Ngiaa". Jex si in'ui u jerje qxuiw zip ix.

31 Qxuiw qiyr Jesus byc did huanhur inx zip cim'enx.

32 Dirr hiax u qui' din dix, dirr snuax nirr decc tyxjiac. Qxuiw qriuu Ix jrunw inx zip hiaxee dix. Ix dyrr jrunw inx.

33 Qxuiw dyrr dui' hitt langg cud kir zip hiaxee dix. Qui' din dix dyrr jauw lyc snuapniaa, jongg lyc oo, qiksiw.

34 Qor dix :ee knuar qnir jitt xee dairjir dyrr jauw .kir, vyr sniaa-lai qapp hniusia ee langg jaix.

35 Inx dyrr cud .laii, rair knuar jitt xee dairjir, dyrr jiurqin Jesus, duw diyc qxuiw soxx dui' ix cud .laii hitt langg cing snxax, hairjai, jre dirr Jesus kax-xe. Inx dyrr qniax.

36 Knuar .qnir ee langg jiong' huan diyc qxuiw ee langg jnaixngiu did diyc qiur vyr inx jaix.

37 Gadalene siwhngx ee langg dua qniax, longxx qriuu Jesus lirkuix inx. Ix dyrr jnriu junn dywdngw .kir.

38 Qxuiw soxx dui' ix cud .kir ee langg qriuu beh qapp Ix kir. Danrsi Jesus crex ix kir, qongw,

39 "Jiong' Siongrder uirdiyhh liw qniaa hiacc dua ee su vailet hro langg jaix." Ix dyrr kir, venww sniaa suantuann Jesus uirdiyhh ix soxx qniaa hiacc dua ee su.

40 Jesus dywdngw .laii ee sii, jiongww langg jiaplap Ix, in'ui inx longxx decc tingwhau Ix.

41 U jit langg, miaa Jailus, dyrr si quanw huerdngg :ee, laii pag dirr Jesus ee kax-xe, qriuu Ix qaur ix ee qrex,

42 In'ui ix qosnix ee jaboxqniaw iokliok jap-sir huer, decbeh siw. Jesus kir ee sii, jiongww langg ekeh Ix.

43 U jit xee hurzinlangg hetlau jap-zi nii, in'ui cniaw isingx, qehuew puar qaur liauw, byy jit langg e rix hyw ix.

44 Ix laii qaur Jesus ee kajiah au, bongx Ix snaaxqix ee ciux; hetlau jiksii jriw.

45 Jesus qongw, "Bongx Guaw :ee si jirjui?" Dairqex qongw byy. Peter qapp dangqniaa ee langg qongw, "Sensnix, jiongww langg vik'uaw, keh diyc Liw."

46 Jesus qongw, "U langg bongx Guaw, in'ui Guaw jaix u quanlingg dui' Guaw cud."

47 Hurzinlangg knuar dairjir kamr be bat, gniauhgniauc cuah laii pag dirr Ix ee kax-xe, dng' jiongww langg ee binrjingg qongw bingg bongx Ix ee enqor, qapp ix jnaixngiu liamvnix hyw.

48 Jesus qra ix qongw, "Hurzinlangg ar, liw ee sinr u qiur liw, jueww liw ansimx dyr .kir."

49 Ix iauxdecc qongw ee sii, u langg dui' quanw huerdngg :ee ee qrex laii, qongw, "Liw ee jaboxqniaw ixqing’ siw, benw lydong Sensnix."

50 Jesus tniax .qnir, dyrr rinr ix qongxx, "Mrbenw qniax, jixu diyhh sinr, ix dyrr did diyc qiur."

51 Ix ixqing’ qaur ix ee qrex. Duliauw Peter, Johan, James, qapp jaboxginxaw ee verbuw ixgua, Ix m jrunw vadd langg qapp Ix zip .kir.

52 Jiongww langg decc tikaur, uirdiyhh ix laii duii hxingx. Jesus qongw, "Byc did tikaur, in'ui ix m si siw, si decc kunr nardnia."

53 Inx dyrr tixciyr Ix, in'ui jaix ix ixqing’ siw lar.

54 Jesus kanx jaboxginxaw ee ciuw qiyr qongxx, "Jaboxginxaw, kiw .laii."

55 Ix ee sinn hogdyr, jiksii kiw .laii. Jesus huanhur hro ix jiac.

56 Ix ee verbuw gonggniac. Jesus bingrling inx byc did jiong' soxx qniaa :ee qra langg qongw.

9 Jesus qiyr jap-zi xee hagsingx longxx laii, hro inx u linglik quanvingr, e jewab longxjongw ee qxuiw, rix hyw vnirjingr.

2 Ix dyrr crex inx kir tuann Siongrder ee qog, rix hyw puawvnirlangg.

3 Ix qycc duiww inx qongw, "Byc did duar lorhuir, qnuaiw-aw, byc did u daclenn, byc did duar qanniuu, ginn, iarr byc did u nng niaw snxax.

4 Qniww soxx zip ee cur, diyhh druar dirr hiax, iarr diyhh dui' hiax kixsinx.

5 Huanrnarr m jiaplap linw :ee, cud inx ee sniaa ee sii, diyhh vnua kir linw kax nirr ee tohunw, laii qanjingr inx."

6 Hagsingx dyrr cud .kir, venww qniaa hiaxee hniusia tuann hok'imx, dagg soxjai rix vni.

7 Hunhongx ee zinqunx Helod tniax qnir itcer ee su, dyrr vutjiw diuduu, in'ui u langg qongw, Johan dui' sixlangg diongx qycc uac;

8 Uree qongw, Elijah cuthen; iarr uree qongw, qoxjaw ee sendix ee jit langg qycc uac.

9 Danrsi Helod qongw, "Johan guaw ixqing’ qra ix taii tauu. Dnaxx guaw tniax qnir jitt hy su. Jex si simxmih langg?" Dyrr cue qihue rair knuar qnir Ix.

10 Suwdoo dyr .laii, jiong' inx soxx qniaa :ee vailet hro Jesus tniax. Jesus dyrr cua inx trer kuix qaur jit xee sniaa, miaa Betsaida.

11 Jiongww langg jaix dyrr duer Ix; Ix jiaplap inx, duiww inx qangxlun Siongrder ee qog, huanrnarr kiamwing rix vni, dyrr qra ix rix.

12 Zit beh lyc, jap-zi xee hagsingx laii qra Ix qongw, "Cniaw siwsnuar jiongww langg, hro inx kir siwuii ee hniusia qapp snuadniuu sethuad jiac; in'ui lanw jiax si kongwiaw ee soxjai."

13 Jesus duiww inx qongw, "Linw hro inx jiac." Inx qongw, "Guanw narr byy kir ter jiaxee jiongww langg brew jiac, dyrr vutqyr u go xee vniaw, nng buew hii nardnia."

14 Hiaxee langg iokliok u go-cingx. Jesus duiww hagsingx qongw, "Hro jiongww langg jre qui' let, muixx let go-jap langg."

15 Hagsingx jiauww anxnix qniaa, hro jiongww langg longxx jre .lyc .laii.

16 Jesus tec go xee vniaw nng buew hii, ngr tnix jioksia liauw dyrr qra vreh .kuix, hro hagsingx vaii dirr jiongww langg ee binrjingg.

17 Inx longxx jiac qaur vaw; kiyh soxx cunx ee sud aw u jap-zi kingx.

18 Jesus qaqi decc qidyw. Hagsingx qapp Ix dirr hiax. Ix dyrr mng inx qongxx, "Jiongww langg qongw Guaw si jirjui?"

19 Inx rinr qongxx, "Uree qongw si qniaa sexlew ee Johan; iarr u langg qongw si Elijah; qycc u langg qongw si qoxjaw ee sendix ee jitt langg qycc uac."

20 Ix qra inx qongw, "Danrsi linw qongw Guaw si jirjui?" Peter rinr qongxx, "Si Siongrder ee Krist."

21 Ix dyrr qimwqair inx byc did jiong' jex qra langg qongw,

22 Suar qongw, "Zinjuw dikkag diyhh siurr jerje qankow, hro jiaxee dniuxlyw, jewsitauu, qinghagsu soxx kiwsag, qycc siurr hai siw, derr snax zit qycc uac."

23 Ix qycc duiww jiongww langg qongw, "Narr u langg rair duer Guaw, dyrr diyhh zidzit giaa ix ee sibzirqer laii duer Guaw.

24 In'ui qniwnarr rair qiur ix ee sniwmia :ee, decbeh sitlyc ix; danrsi qniwnarr uirdiyhh Guaw laii sitlyc ix ee sniwmia :ee, decbeh qiur ix.

25 In'ui langg narr did diyc juann sewqair laii sitlyc qaqi, sunxhuai qaqi, u simxmih lirig ar?

26 Qniwnarr liac Guaw qapp Guaw ee ue juer qenwsiaur :ee, Zinjuw ing qaqi ee ingqngx, qapp Ve ixqip sxingr ee tnisair laii ee sii, iarr beh liac hitt langg juer qenwsiaur.

27 Guaw jinsit qra linw qongw, kia dirr jiax :ee, u langg iauxx bue siw, beh knuar qnir Siongrder ee qog."

28 Qongw jiaxee ue liauxau cavutdyx veh zit, Jesus duar Peter, Johan, qapp James snaqab jnriu snuax qidyw.

29 Qidyw ee sii, Ix ee binrmau u qyc'ngiu, Ix ee snxax vec, qycc qngx nawnar.

30 Hutzenqanx u nng langg qapp Ix qongxue, dyrr si Moses qapp Elijah.

31 Inx dirr ingqngx cuthen, damlun Ix ee quewsir, dyrr is Ix dirr Jelusalem soxx beh ligquer :ee.

32 Peter qapp qangg dilehh ee langg iawsen, dyrr binn .kir; qaur inx jingsinn, dyrr knuar qnir Jesus ee ingqngx, ixqip qapp Ix kia lehh hitt nng langg.

33 Dng' hitt nng langg lirvet Ix ee sii, Peter duiww Jesus qongw, "Sensnix, lanw dirr jiax jin' hyw. Guanw laii dah snax qingx liauu-aw, jit qingx hro Liw, jit qingx hro Moses, jit qingx hro Elijah"; ix m jaix ix soxx qongw :ee.

34 Qongw jiaxee ue ee sii, u hunn dar inx; inx zip dirr hunn-lai dyrr qniax.

35 U sniax dui' hunn nirr qongw, "Jitt xee si Guaw ee Qniaw, Guaw soxx qingw :ee; linw diyhh tniax Ix."

36 Hitt xee sniax ixqing’ suah, dyrr knuar qnir Jesus qaqi dilehh. Hagsingx jing jing; hitt sii, byy jiong' soxx knuar .qnir .ee qra langg qongw.

37 Qeh zit lyc snuax ee sii, u qui' din' langg jrih Ix.

38 Jiongdiongx u jit langg dua sniax qiyr qongxx, "Sensnix ar, qriuu Liw knuar guaw ee qniaw, ix si guaw qosnix :ee.

39 U qxuiw liac ix, ix dyrr liamvnix auqiyr, hro ix tiucuah qaur lrauu nxua, qycc dang dang siongx ix; beh hro lirkuix ix jin' yh.

40 Guaw bad qriuu Liw ee hagsingx knuar ix, inx iarr be e."

41 Jesus rinr qongxx, "Hnairar, m sinr qycc vuergik ee sewdai ar, Guaw diyhh qapp linw druar, tunlunw linw, beh qaur zuarr quw ar? Diyhh cua liw ee qniaw laii jiax."

42 Ginxaw laii ee sii, qxuiw qra siag hro dyw, hro ix dua tiucuah. Jesus jikvi siasinn, rix hyw hitt xee ginxaw, qaux hro ix ee laurve. Jiongww langg longxx gonggniac Siongrder ee dua uigiamm.

43 Jiongww langg qiquair Ix soxx juer longxjongw ee su. Hitt sii, Jesus duiww Ix ee hagsingx qongw,

44 "Jiaxee ue linw diyhh tniax lyc hni; in'ui Zinjuw beh duw diyc qewsangr dirr langg ee ciuw."

45 Hagsingx be hiauxgno jitt xee ue. Hex si duiww inx unxbat, hro inx be bingvik; inx iarr m qnaw mngg Ix jitt xee ue.

46 Hagsingx diongx snix kiw venrlun, knuar jirjui beh juer dua.

47 Jesus knuar cud inx simlai soxx venrlun :ee, dyrr kanx jit xee ginxaw hro ix kia dirr sinvnix,

48 Qra inx qongw, "Qniwnarr uirdiyhh Guaw ee miaa jiaplap jitt xee ginxaw :ee, dyrr si jiaplap Guaw; qniwnarr jiaplap Guaw :ee, dyrr si jiaplap crex Guaw :ee; in'ui linw jiongww langg ee diongqanx derr id biser :ee, ix si siongrr dua :ee."

49 Johan rinr qongxx, "Sensnix, guaw bad knuar qnir jit langg ing Liw ee miaa qnuaw qxuiw; guanw dyrr qimwjiw ix, in'ui ix byy qapp guanw duer Liw."

50 Jesus duiww ix qongw, "Byc did qimwjiw ix, in'ui qniwnarr byy qongqig linw :ee dyrr si rui linw."

51 Jesus siurr jicjiab jnriu tnix ee zidqii beh qaur, dyrr quat'ir ngr Jelusalem laii qniaa,

52 Crex suwjiaw juewtauu kir. Inx zip kir Samalialangg ee jit xee hniusia beh qra Ix virvan.

53 Danrsi inx m jiaplap Ix, in'ui Ix ngr Jelusalem decc qniaa.

54 Ix ee hagsingx James qapp Johan knuar qnir anxnix, dyrr qongw, "Jruw ar, Liw rair guanw qiyr huew dui' tnix lyc laii bet inx mah?"

55 Jesus uat dngw srinx jikvi inx.

56 Dairqex dyrr kir vadd xee hniusia.

57 Inx qnialo ee sii, u langg duiww Jesus qongw, "Liw bylun daxlyc kir, guaw beh duer Liw."

58 Jesus qra ix qongw, "Holii u kangx, tnidiongx ee vuejiauw u siu; dogdok Zinjuw byy kuar taukag ee soxjai."

59 Qycc duiww jit langg qongw, "Duer Guaw." Hitt langg qongw, "Jruw ar, hro guaw dyr kir singx baijongr guaw ee laurve."

60 Jesus qra ix qongw, "Cutjai sixlangg baijongr inx ee sixlangg; narr si liw, diyhh kir tuanvyr Siongrder ee qog."

61 Qycc u jit langg qongw, "Jruw ar, guaw beh duer Liw. Danrsi jrunw guaw singx kir qapp qrex-lai ee langg sna' srii."

62 Jesus duiww ix qongw, "Qniwnarr ciuw hnua lee-buew laii knuar aurbin :ee, byy hap dirr Siongrder ee qog."

10 Jiaxee dairjir liauxau, Jruw qycc setlip cid-jap langg, jit duir jit duir crex inx juer tauu kir Ix soxx beh qaur :ee ee dagg xee sniaa, dagg xee soxjai.

2 Ix dyrr duiww inx qongw, "Tangx siusingg :ee si je, juer qangx :ee si jiyw; soxiw linw diyhh qriuu hngjuw vig qangx kir qra Ix siusingg.

3 Linw kir ar. Guaw crex linw cincniu ngiuu-aw zip cailongg ee diongqanx.

4 Byc did duar jnide, daclenn, qapp ree; lo nirr byc did qra langg cingxanx.

5 Bylun zip simxmih cur, diyhh dairsingx qongw, 'Guan jitt qrex ving'anx.'

6 Setsuw u habgii did diyc ving'anx ee langg dirr hiax, linw ee ving'anx dyrr e qaur dirr ix; narr byy, dyrr dyww qruix dirr linw.

7 Diyhh diamr dirr hitt qrex, limjiac inx soxx qiongqib :ee, in'ui juewqanglangg kamx did did diyc ix ee qangjnii; byc did dui' jitt qrex suaw kir hitt qrex.

8 Bylun zip simxmih sniaa, langg narr jiaplap linw, diyhh jiac inx soxx vaii dirr linw binrjingg :ee.

9 Sniaa-lai u vni :ee, diyhh rix hyw inx, suar qra inx qongw, 'Siongrdewqog qin linw lar.'

10 Bylun zip simxmih sniaa, langg m jiaplap linw, dyrr diyhh cud kir inx ee dua quelo, qongw,

11 'Lenrr linw ee sniaa ee tohunw, diauu dirr guanw ee kax :ee, guanw iarr duiww linw qra crid .kir. Danrsi linw diyhh jaix Siongrder ee qog qin lar.'

12 Guaw qra linw qongw, dirr hitt zit, Sodom soxx sriu :ee e viw hitt xee sniaa soxx sriu :ee iauxx kacc kuair damdngx.

13 Kolazin ar, liw u jaiec! Betsaida ar, liw u jaiec! In'ui dirr linw diongqanx soxx qniaa jiaxee quanlingg, narr u qniaa dirr Tyle qapp Sidon, inx jaw jaw dyrr cing muasnax samw huexhux jre lehh laii huanxhuew.

14 Danrsi dng' simxpnuar ee sii, Tyle qapp Sodom soxx sriu :ee viw linw iauxx kacc kuair damdngx.

15 Kapernaum ar, liw qamxx e did diyc quw kiw qaur tnix mah? Liw beh ciax dyw imhuw.

16 Tniax linw :ee dyrr si tniax Guaw; kiwsag linw :ee dyrr si kiwsag Guaw; kiwsag Guaw :ee dyrr si kiwsag crex Guaw :ee."

17 Hiaxee cid-jap langg dywdngw laii decc hnuahiw qongxx, "Jruw ar, ing Liw ee miaa, qxuiw iarr hanghok guanw."

18 Jesus qra inx qongw, "Guaw u knuar qnir Satan cincniu sicnar dui' tnix vuac .lyc .laii.

19 Guaw ixqing’ hro linw u qxuann tangx dac juaa qapp get'axtangg, qycc ngiaa quer duiwdik longxjongw ee kuiwlat; quatduan byy jit hxang e hai diyc linw.

20 Danrsi, byc did in'ui jiaxee qxuiw hanghok linw laii hnuahiw, diyhh in'ui linw ee miaa qir dirr tnix nirr laii hnuahiw."

21 Dng' hitt sii, Jesus dirr Singwsinn diongx kuaiwlok, qongw, "Ve ar, tnide ee Jruw, Guaw ylyw Liw, in'ui Liw jiong' jiaxee su duiww diwhui cangmiaa :ee u unxbat ix, duiww sewqniaw u henxbingg ix; Ve ar, si lar, in'ui Liw knuar anxnix juer hnuahiw.

22 Banrhangrsu dui' Guaw ee Ve longxx qauhur Guaw; Ve ixgua byy jit xee bad Qniaw si jirjui; Qniaw qapp Qniaw soxx rair beh jixsi :ee ixgua, iarr byy jit xee bad Ve si jirjui."

23 Ix dyrr uat dngw srinx amwjni duiww hagsingx qongw, "Knuar qnir linw soxx knuar .qnir .ee, hiaxee bagjiux u hokkir.

24 In'ui Guaw qra linw qongw, jingg u jerje sendix qapp qun'ongg rair knuar linw soxx knuar .qnir .ee, iarr byy knuar .qnir; rair tniax linw soxx tniax .qnir .ee, iarr byy tniax .qnir."

25 U jit xee qar ludhuad ee sensnix kiw laii cir Ix qongxx, "Sensnix ar, guaw diyhh jaixngiu juer jiacc e did diyc ingxuac?"

26 Jesus duiww ix qongw, "Dirr ludhuad u qir simxmih? Liw tak liauw jnaixngiu?"

27 Ix rinr qongxx, "Liw diyhh jin simx, jin singr, jin lat, jin ir tniar Jruw, liw ee Siongrder; iarr diyhh tniar cuwvnix cincniu qaqi."

28 Jesus qra ix qongw, "Liw soxx rinr :ee si driyc; qniaa jitt xee, dyrr e uac."

29 Danrsi ix rair henxbingg qaqi juer driyc, dyrr duiww Jesus qongw, "Jirjui si guaw ee cuwvnix?"

30 Jesus rinr ix qongxx, "U jit langg dui' Jelusalem lyc kir Jeliqo, duw diyc cat. Cat vrag ix ee ijniu, pah ix qaur vnuar siw, dyrr qra vangr lehh, jueww inx kir.

31 Cauwkamw u jit xee jewsix dui' hitt diauu lo lyc .kir, knuar qnir ix, dyrr siamw dui' hitt vingg quer .kir.

32 Qycc u jit xee Levilangg qaur hitt soxjai, knuar liauw iuguann dui' hitt vingg quer .kir.

33 Dogdok u jit xee Samalialangg qnialo dui' hiax quer, knuar .qnir dyrr linbinw ix;

34 Qinruaw .kir, ing jiuw dryr dirr ix diyhsiongx ee soxjai, qra ix vaux lehh, jiong' qaqi ee jingsnix hro ix kiaa, cua ix qaur kecdiamr laii jiauwqor ix.

35 Qeh zit tec ginn-aw nng xee hro diamwjuw, qongw, 'Diyhh jiauwqor jitt langg; soxhuir narr kacc qex, guaw dywdngw .laii jiacc hingg liw.'

36 Jitt snax langg diongx liw pacsngr daxlyc jit xee juer duw diyc cat hitt langg ee cuwvnix?"

37 Ix qongw, "Linbinw ix :ee dyrr si." Jesus qra ix qongw, "Liw kir, jiauww anxnix laii qniaa."

38 Inx qniaa ee sii, Jesus zip jit xee hniusia. U jit xee hurzinlangg, miaa Marta, jiaplap Ix dirr ix ee cur.

39 Ix u jit xee jixbe, qiyr juer Malia, jre dirr Jruw ee kax-xe, laii tniax Ix ee ue.

40 Marta in'ui jiaptai inx, dairjir je, simx brangg, dyrr jiurqin Jesus qongw, "Jruw ar, guaw ee jixbe vangr guaw qaqi decc bongx, Liw byy decc iauwqinw mah? Diyhh qiyr ix laii jan guaw."

41 Danrsi Jruw rinr qongxx, "Marta ar, Marta ar, liw uirdiyhh jerje dairjir kuawlu hunjap,

42 Danrsi soxx kiamwing :ee si jit hxang nardnia. Malia ixqing’ qingw diyc hyw ee hunrgiac, hex si berdid tangx qra ix cniuw :ee."

11 Jesus dirr jit soxjai qidyw, suah liauxau, Ix ee hagsingx diongx ee jit langg duiww Ix qongw, "Jruw ar, qawsi guanw qidyw, cincniu Johan iarr bad qawsi ix ee hagsingx."

2 Ix dyrr qra inx qongw, "Linw qidyw ee sii diyhh qongw, 'Ve ar, guan Liw ee miaa sxingr; Liw ee qog limqaur;

3 Guanw ee zidsit zidzit hro guanw;

4 Siawbenw guanw ee jue, in'ui guanw iarr siawbenw qohu guanw ee langg; byc did cua guanw zip dirr cir.'"

5 Ix qycc duiww inx qongw, "Linw simxmih langg u ving'iuw, liw vnuawmii kir cue ix, qra ix qongw, 'Ving'iuw ar, tec snax xee vniaw jiyh guaw;

6 In'ui guaw u ving'iuw dui' lo nirr laii cue guaw, guaw byy mic tangx cniaw ix.'

7 Ix dui' lairbin rinr qongxx, 'Byc did jyjag guaw; mngg ixqing’ qnuaix, ginxaw qapp guaw dirr cngg nirr; guaw berdid tangx kiw laii tec hro liw.'

8 Guaw qra linw qongw, suizenn ix byy uirdiyhh ix si ving'iuw kiw laii tec hro ix, mrquxx uirdiyhh ix ee vikced diyhh kiw .laii, jiauww ix soxx kiamwing :ee hro ix.

9 Guaw qycc qra linw qongw, qriuu dyrr hro linw; cue dyrr duw .diyc; pah mngg :ee qra inx kuix.

10 In'ui qniwnarr qriuu :ee dyrr did .diyc; cue :ee dyrr duw .diyc; pah mngg :ee, dyrr qra inx kuix.

11 Linw daxlyc jit xee juer ve :ee, u qniaw laii tyw vniaw, qamxx beh jiong' jiyhtauu hro ix mah? Iacc si beh hii, qamxx beh jiong' juaa junw juer hii hro ix mah?

12 Iacc si tyw nxng, qamxx beh jiong' get'axtangg hro ix mah?

13 Linw jiaxee suizenn pnaiw, iauxquxx e hiauxdid ing hyw mic hro linw ee qniaxzii, hyhongr linw dirr tnix nirr ee Ve qamxx byy ing Singwsingg laii hro qriuu Ix ee langg mah?"

14 Jesus qnuaw jit xee exqauxquiw. Qxuiw cud .laii liauxau, exqauw :ee dyrr qongxue. Jiongww langg qiquair.

15 Lairdiongx u quixnarr langg qongw, "Ix qnuaw qxuiw si kyr quixongg Beelzebub."

16 Qycc u langg cir Ix, duiww Ix qriuu dui' tnix laii ee sinziah.

17 Jesus jaix inx ee iwsur, dyrr qra inx qongw, "Huanrnarr qog qaqi jingvniar, e drir qaur pahngx, cur jit qingx jit qingx dyxhuai.

18 Narr Satan qaqi jingvniar, ix ee qog taixtyw kia e diauu? In'ui linw qongw Guaw kyr Beelzebub qnuaw qxuiw.

19 Setsuw Guaw kyr Beelzebub qnuaw qxuiw, linw ee juxde qnuaw qxuiw uaxkyr jirjui ar? Anxnix inx beh gixduan linw.

20 Dogdok Guaw narr kyr Siongrder ee ciuw qnuaw qxuiw, Siongrder ee qog dyrr ixqing’ qaur dirr linw.

21 Bingw langg cing kueqah giac qesix qowsiuw ix ee cur, ix soxu :ee dyrr an'unw.

22 Danrsi viw ix kacc bingw :ee qaur laii ngiaa ix, dyrr cniuw ix soxx uaxkyr juanhur ee jenwkir, laii vunx ix ee mihqnia.

23 Byy qapp Guaw qangg :ee, dyrr si duiwdik Guaw; byy qapp Guaw siukiyh :ee dyrr si decc pacsnuar.

24 Siasinn ixqing’ lirkuix langg, qingquer byy juiw ee de, qriuu anhiyh; byy did .diyc, dyrr qongw, 'Guaw beh dyr kir soxx cud .laii ee cur.'

25 Qaur der, knuar qnir vniawsaur jingxjee;

26 Dyrr kir qycc duar cid xee viw qaqi kacc pnaiw ee qxuiw zip kir kiarkiw. Hitt langg ee lorbuew ee qingxhongw viw kixtauu kacc camw."

27 Ix qongw jiaxee ue ee sii, jiongww langg diongx u jit xee hurzinlangg dua sniax qra Ix qongw, "Snix Liw ee vakdow, hro Liw suh ee lintauu u hokkir ar."

28 Danrsi Jesus qongw, "Byy viw tniax diyc Siongrder ee dyrliw laii siuw :ee kacc u hokkir."

29 Langg jurjip naxx je, Jesus dyrr qongw, "Jitt sewdai si pnaiw ee sewdai, inx qriuu sinziah. Danrsi duliauw Jonah ee sinziah ixgua, byy beh sinziah hro ix.

30 Jonah jniaa juer sinziah laii hro Ninivelangg, cincniu anxnix, Zinjuw iarr beh jniaa juer sinziah laii hro jitt sewdai.

31 Dng' simxpnuar ee sii, lamhngx ee luxongg, beh qapp jitt sewdai ee langg snaqab kiw .laii, suar gixdnia jitt sewdai ee jue; in'ui ix dui' de ee qigtauu laii tniax Solomon diwsig ee ue, hyhongr dirr jiax u viw Solomon kacc dua :ee.

32 Dng' simxpnuar ee sii, Ninivelangg beh qapp jitt sewdai ee langg snaqab kia .kiw .laii, suar gixdnia jitt sewdai ee jue, in'ui inx dui' Jonah soxx tuann :ee laii huanxhuew, hyhongr dirr jiax u viw Jonah kacc dua :ee.

33 Byy langg diamw dingx he dirr unxbat ee soxjai, iacc si dirr dauw-xe; ingqaix he dirr dingdaii dingw, hro zip laii ee langg knuar qnir hitt xee qngx.

34 Bagjiux dyrr si liw sinkux ee dingx; liw ee bagjiux narr qimx, dyrr tong' sinkux iarr qngx; liw ee bagjiux narr huex, dyrr sinkux iarr amr.

35 Soxiw diyhh qinxsin, qniax liw lairbin ee qngx si amr.

36 Setsuw liw tong' sinkux longxx qngx, byy jit ziah amr, dyrr beh uanjuann qngx, cincniu dingx ee qngx nawnar decc jiyr liw."

37 Ix qongxue ee sii, u Faliselangg cniaw Ix snaqab jiac. Jesus dyrr zip kir jre.

38 Hitt xee Faliselangg knuar qnir Ix byy sew laii jiac, dyrr qiquair.

39 Jruw dyrr duiww ix qongw, "Dnaxx linw Faliselangg cingkir vxuex qapp vnuaa ee guarbin, danrsi linw lairbin u cniuxqiab qapp okdok muaw muaw.

40 Linw gong langg ar, congwjy guarbin :ee qamxx byy iarr congwjy lairbin mah?

41 Diyhh jiong' jiaxee lairbin ee mic jinxjer langg, dyrr dagg hxang mic jairr linw longxx cingkir.

42 Linw Faliselangg u jaiec ar! In'ui linw jiong' voghyy, unhiongx, qapp dagg ngiu ee caiwsex jap hxun tiux jit hxun, qonggi qapp tniar Siongrder ee su dyrr vangr byy iauwqinw; danrsi jiaxee si ingqaix diyhh qniaa :ee, hiaxee iarr m tangx vangwsag.

43 Linw Faliselangg u jaiec ar! In'ui linw air dirr huerdngg lai jre quann xui, queci nirr hro langg cingxanx.

44 Linw u jaiec ar! In'ui linw cincniu unxbat ee bong, langg qniaa dirr hitt dingxbin vingrr m jaix."

45 U jit xee qar ludhuad ee sensnix rinr Ix qongxx, "Sensnix, Liw qongw jiaxee ue iarr vorziok diyc guanw."

46 Danrsi Ix qongw, "Linw qar ludhuad ee sensnix iarr u jaiec ar! In'ui linw jiong' yh did dnax ee dnar hro langg dnax; danrsi linw vunxsinx byy ing jit qix jngxtauu-aw laii bongx hiaxee dnar.

47 Linw u jaiec ar! In'ui linw congr sendilangg ee bong, qycc linw ee jow bad hai siw inx.

48 Anxnix, linw ee jow soxx juer :ee, linw juer qanjingr, qycc hnuahiw; in'ui inx hai siw sendix, qycc linw congr sendix ee bong.

49 Soxiw Siongrder ee diwhui u qongw, 'Guaw beh crex sendix qapp suwdoo jiurqin inx. Inx qidiongx uree beh haiw siw ix, uree beh kunxdiok ix';

50 Drir qaur dui' congwjy sewqanx ixlaii soxx lrauu jiongww sendix ee huih longxx beh qra jitt sewdai tyw;

51 Dyrr si dui' Abel ee huih qaur Zeqaliah siw dirr dxen qapp dnxuaa ee diongqanx ee huih. Sidjai ar, Guaw qra linw qongw, longxx beh duiww jitt sewdai tyw.

52 Linw qar ludhuad ee sensnix u jaiec ar! In'ui linw jiong' jaibad ee syxsii giac .kir; linw qaqi m zip, decbeh zip ee langg linw dyrr joxdongr ix."

53 Jesus dui' hiax cud .laii ee sii, qinghagsu qapp Faliselangg cud lat vig Ix, qig ix qongxue;

54 Dngdanw Ix, rair liac Ix ee uerpang.

12 Hitt sii langg jurjip quixnarr bxan, drir qaur sna' tunxdac. Jesus kuix cuir dairsingx duiww Ix ee hagsingx qongw, "Linw diyhh dihongg Faliselangg ee qnar, dyrr si qew hyw :ee.

2 Byy u kamwbat ingxx byy lorhen :ee, unxbat byy hro langg jaix :ee.

3 Soxiw linw dirr oamr ee diongqanx soxx qongw :ee, beh dirr qngbingg diongx hro langg tniax .qnir; linw dirr bat vangg ngar hnirkangx vnix soxx qongw :ee, beh dirr cur-dingw vywiongg.

4 Guaw ee ving'iuw ar, Guaw qra linw qongw, hai siw linw sinkux liauxau be e juer vadd hxang :ee, byc did qniax inx.

5 Guaw beh jixsi linw soxx diyhh qniax :ee; diyhh qniax hitt xee hai siw liauxau qycc u qxuann qra hed dirr dergak :ee. Sidjai ar, Guaw qra linw qongw, soxx diyhh qniax :ee si jitt xee.

6 Go xee cikjiauw-aw qamxx m si bre nng hunx ginn mah? Dirr Siongrder ee binrjingg lenrr jit jiah iarr byy be qir .did.

7 Dyrr linw ee taumngg iarr longxx qewsngr. Byc did qniax; linw viw jerje cikjiauw-aw kacc quiwkir.

8 Guaw qycc qra linw qongw, "Qniwnarr dirr langg ee binrjingg zin Guaw :ee, Zinjuw dirr Siongrder ee tnisair ee binrjingg iarr beh zin ix.

9 Narr si dirr langg ee binrjingg byy zin Guaw :ee, dirr Siongrder ee tnisair ee binrjingg, iarr beh m zin ix.

10 Huanrnarr qongxue laii qogqig Zinjuw :ee, beh siawbenw ix; narr si setdok Singwsinn :ee, byy beh siawbenw ix.

11 Langg duar linw qaur huerdngg qapp vran jingwsu ixqip u qxuann :ee ee binrjingg, byc did kuawlu beh jnaixngiu hunsor, beh hunsor simxmih, beh qongw simxmih;

12 In'ui hitt sii Singwsinn beh qawsi linw soxx diyhh qongw :ee."

13 Jiongww langg diongx u jit langg qra Ix qongw, "Sensnix ar, cniaw liw qiyr guaw ee hniadi qapp guaw vunx joxgiap."

14 Jesus qra ix qongw, "Liw jitt xee langg ar, jirjui setlip Guaw juer linw ee simxpnuawqnuax, iacc si juer vunx qegiap :ee mah?"

15 Dyrr duiww jiongww langg qongw, "Diyhh qinxsin, ioksog qaqi, longxx byy tamsimx, in'ui langg ee uahmia vutjai ix soxx jikju ee hongsing."

16 Dyrr ing piwzu duiww inx qongw, "U jit xee vur langg, ix ee canhngg jin' hyw siux.

17 Ix sniu laii sniu kir, qongw, 'Guaw byy soxjai tangx dunw guaw ee toxsanw, dnaxx beh jnaixngiu?'

18 Qycc qongw, 'Guaw beh anxnix juer. Guaw beh tiah guaw ee cikcngx, kiw kacc dua xee; guaw ee gnoxqog qapp jaibut longxx beh dunw dirr hiax,

19 Iarr beh qra guaw ee linghunn qongw: Linghunn ar, liw u jerje jaibut jikju juer jerje nii ee loring, tangx cing'ingg, limjiac, kuaiwlok.'

20 Danrsi Siongrder qra ix qongw, 'Gong langg ar, qimmii beh duiww liw tyw liw ee linghunn; liw soxx virvan :ee beh qruix simxmih langg ar?'

21 Qniwnarr uirdiyhh qaqi jikju jaivyw, dirr Siongrder ee binrjingg byy hyxgiac :ee, iarr si anxnix."

22 Ix qycc duiww Ix ee hagsingx qongw, "Soxiw Guaw qra linw qongw, byc did uirdiyhh sniwmia kuawlu beh jiac simxmih, iacc si uirdiyhh linw ee sinkux kuawlu beh cing simxmih;

23 In'ui sniwmia viw bixniuu kacc duiwdiong, sinkux viw ijniuu kacc duiwdiong.

24 Diyhh cir sniu oax, inx byy jingwjyh byy siusingg, iarr byy kowvangg, byy cikcngx, Siongrder iauxquxx ngiuxci inx; linw viw jiauw-aw kacc quiwkir qaur jnaixngiu?

25 Linw simxmih langg e in'ui kuawlu, hro sniwmia kacc dngg jit kig quw ar?

26 Anxnix jiww siyxkuaw :ee, linw iauxquxx byy hxuad .did, sniaw su kuawlu qi'uu :ee ar?

27 Cir sniu vikhabhuex jnaixngiu naxx duarjangg, ix byy diyhbuaa, byy pangxjeh; danrsi Guaw qra linw qongw, dng' Solomon qik hang'gnow ee sii, ix soxx cing, m dat jitt hy huex ee jit luiw.

28 Dnaxx snuax nirr ee cauw, qinaxzit dilehh, binaxzit hed dirr huexloo, Siongrder siongrcniaw hro ix cing qaur anxnix, hyhongr linw, siyxsinr ee langg ar?

29 Linw byc did qriuu beh jiac simxmih, beh limx simxmih, iarr byc did huansimx;

30 In'ui jiaxee longxx si sewqanx ee ledvanglangg soxx qriuu :ee, linw ee Ve iarr jaix jiaxee si linw kiamwing :ee.

31 Dogdok linw diyhh qriuu Ix ee qog, jiaxee mic dyrr beh suar hro linw.

32 Linw ser qrunn :ee ar, byc did qniax, in'ui linw ee Ve hnuahiw ing qog hro linw.

33 Diyhh bre linw soxu :ee laii jinxjer langg; uirdiyhh linw vunxsinx virvan be qu ee jnide, dirr tnix nirr ing be liauw ee jaivyw, dyrr si cat be qaur, tangg be jiur ee soxjai.

34 In'ui linw ee jaivyw dirr hiax, linw ee simx iarr beh dirr hiax.

35 Linw ee iyx diyhh haa duar, linw ee dingx diyhh diamw lehh.

36 Linw diyhh cincniu langg decc tingwhau inx ee juxlangg dui' hun'inx ee endyh dyr .laii.

37 Ix qaur der, pah mngg. Linw tangx liamvnix qra ix kuix. Juxlangg qaur, knuar qnir inx qingxsingw, hiaxee lovok u hokkir. Guaw sidjai qra linw qongw, juxlangg beh hro inx jerdyh, qaqi haa duar, qaqi jinwjingg laii suhau inx.

38 Qiamxcaiw ix zi qnxix iacc si snax qnxix qaur, knuar qnir inx anxnix, hiaxee lovok u hokkir.

39 Qejuw narr jaix cat simxmih sii beh qaur, ix dyrr dniudii, vutdir ix ee cur siurr iah kangx; jex si linw soxx jaix.

40 Linw iarr diyhh virvan ven, in'ui linw byy pacsngr ee sii, Zinjuw laii lar."

41 Peter qongw, "Jruw ar, Liw sed jitt xee piwzu si duiww guanw qongw, iacc si duiww jiongww langg ar?"

42 Jruw qongw, "Simxmih langg si jinrdiongx diwsig ee quanxqex, juxlangg soxx beh setlip laii quanxliw ix qrex-lai ee langg, jiauww sii huad bixniuu hro inx ar?

43 Ix ee juxlangg laii knuar qnir ix anxnix qniaa, hitt xee lovok u hokkir.

44 Guaw sidjai qra linw qongw, juxlangg beh setlip ix laii quanxliw ix itcer soxu :ee.

45 Setsuw hitt xee lovok simlai pacsngr qongxx, 'Guaw ee juxlangg encenn jiacc beh laii', dyrr pah hiaxee lovok luxvi, limjiac qycc jiuxjuir.

46 Dirr byy pacsngr ee zit, m jaix ee sii, hitt xee lovok ee juxlangg beh qaur, dang dang hinghuat ix, qapp m sinr ee langg dangdingw laii vran ix.

47 Lovok jaix ix ee juxlangg ee iwsur, iarr byy virvan, iarr byy sun ix ee iwsur laii qniaa, beh siurr pah je xee.

48 Narr si m jaix laii qniaa ingqaix siurr pah ee su, ix beh siurr pah jiyw xee. Qniwnarr hro ix je :ee, beh qra ix tec je; tokdiong ix je :ee, beh qra ix tyw kacc je.

49 Guaw laii si beh ing huew hed dirr de nirr; huew narr ixqing’ dyc, Guaw iauxquxx rair simxmih?

50 Guaw u ingqaix sriu ee sew; hitt xee sew iauxx bue jniaa, Guaw si zuarr vikced lehh?

51 Linw pacsngr Guaw laii si beh hro derjniu hyvingg mah? Guaw qra linw qongw, m si, huanxdngw si beh hro uanqex.

52 Dnaxx liauxau jit qrex go langg beh uanqex, snax xee qapp nng xee uanqex, nng xee qapp snax xee uanqex.

53 Ve qapp qniaw, qniaw qapp ve, laurbuw qapp jaboxqniaw, jaboxqniaw qapp laurbuw, daqex qapp ix ee simvu, simvu qapp daqex, inx longxx beh uanqex."

54 Ix dyrr qycc duiww jiongww langg qongw, "Linw knuar qnir hunn duiww saisir kir, linw dyrr qongw, 'Beh lyc ho'; qyxzenn u anxnix;

55 Knuar qnir hongx dui' lamsir cuex laii, linw dyrr qongw, 'Beh siyzuac'; iarr u anxnix.

56 Qew hyw ee langg ar, tnix qapp de ee hingsig linw dy' knuar e cud, jnaixngiu be e knuar cud jitt xee sii ar?

57 Linw qaqi jnaixngiu byy singxcad hitt xee hap dirr gi :ee ar?

58 Liw qapp qryr liw :ee kir qnir qnuahuw, iauxx dirr lo nirr, diyhh ing'uii hro ix vangr liw suah; qniax ix tuax liw qaur simxpnuawqnuax hiax, simxpnuawqnuax jiong' liw qaux hro ce'iac, ce'iac suar jiong' liw qnuaix lyc qnax.

59 Guaw qra liw qongw, jit sxix jit lii bue hingg, liw quatduan be e cud hiax."

13 Dng' hitt sii, u quixnarr langg dilehh, jiong' Pilate qra Galilee ee langg ee huih camx dirr inx ee singlew ee jitt hxang su qra Jesus qongw.

2 Jesus rinr qongxx, "Jiaxee Galilee ee langg siurr jitt hy ee hai, linw pacsngr inx viw jiongww Galilee ee langg kacc u jue mah?

3 Guaw qra linw qongw, m si; linw narr byy huanxhuew, longxx beh cincniu anxnix bedbyy.

4 Iacc si Siloam ee tah dyw .lyc .laii, deh siw jap-veh langg, linw pacsngr inx viw longxjongw dirr Jelusalem kiarkiw ee langg huanrjue kacc dang mah?

5 Guaw qra linw qongw, m si; linw narr byy huanxhuew, longxx beh jiauww anxnix bedbyy."

6 Ix dyrr sed jit xee piwzu, qongw, "Boxlangg u jit jangg buhuaqyxciu jraix dirr ix ee pudyhngg nirr. Ix dyrr laii dirr hiax decc cue quexjiw; cue byy,

7 Dyrr duiww quanw hngg :ee qongw, 'Liw knuar, guaw lenlenn snax nii laii duiww jitt jangg buhuaqyxciu cue quexjiw, cue byy. Diyhh qra ix cyr .kiw .laii; sniaw su hro ix decc dinr soxjai?'

8 Quanw hngg :ee rinr ix qongxx, 'Jruw ar, qinnii cniaw qycc iong'unw ix; tingwhau guaw dirr ix siwuii qrut sangx ingr vuii.

9 Au .laii narr qed quexjiw, dyrr hyw; narr byy, liw jiacc qra ix cyr .kiw .laii.'"

10 Anhiyczit, Jesus dirr jit xee huerdngg decc qawsi langg;

11 Duxdng u jit xee huan diyc siasinn ee hurzinlangg, ix drir vni jap-veh nii quw, unxqux longxx be crunx dit.

12 Jesus knuar .qnir dyrr qiyr ix, qongw, "Hurzinlangg ar, dnaxx liw tuatli liw ee vni lar."

13 Ix dyrr ing siangciuw qra ix hnua; ix jiksii crunx dit, dyrr qruix ingqngx Siongrder.

14 Quanw huerdngg :ee in'ui Jesus dirr Anhiyczit rix vni, dyrr siurkir, duiww jiongww langg qongw, "U lak zit ingqaix diyhh juer qangx, hitt lak zit qranx tangx laii siurr rix; Anhiyczit m tangx."

15 Danrsi Jruw rinr ix qongxx, "Qew hyw ee langg ar, dirr Anhiyczit linw qamxx byy dagg langg dui' jyy nirr kir qra ix ee guu iacc si luu-aw tauw .kuix, qra kanx kir jiac juiw mah?

16 Jitt xee hurzinlangg si Ablaham ee horer, ixqing’ hro Satan vak jap-veh nii quw, qamxx m ingqaix dirr Anhiyczit ho'ngg tauw ix ee qad mah?"

17 Jesus qongw anxnix, jiaxee duiwdik longxx qenwsiaur. Jiongww langg in'ui Ix soxx qniaa itcer ingqngx ee su, longxjongw hnuahiw.

18 Jesus dyrr qongw, "Siongrder ee qog cincniu simxmih? Guaw beh ing simxmih laii vixping ix?

19 Si cincniu jit liap quawcaiwjiw, langg tec kir jingr dirr ix qaqi ee hngg, dyrr duarjangg jniaa juer ciu. Kongdiongx ee jiauw laii hiyh dirr ix ee qix."

20 Qycc qongw, "Guaw beh ing simxmih laii vixping Siongrder ee qog?

21 Si cincniu qnar, hurzinlangg tec kir he dirr snax dauw ee mirhunw lai, qaur longxjongw huad qnar."

22 Jesus qingquer jiaxee sniaa, jiaxee hniusia decc qawsi langg, iarr ngr Jelusalem decc qniaa.

23 U jit langg qra Ix qongw, "Jruw ar, did diyc qiur ee langg si jiyw mah?"

24 Jesus duiww inx qongw, "Diyhh jin lat dui' ec mngg zip .kir; in'ui Guaw qra linw qongw, beh u jerje langg qriuu beh zip iarr be did .diyc.

25 Qaur qejuw kiw laii qnuaix mngg, linw jiacc kia dirr guarbin, pah mngg, qongw, 'Jruw ar, qra guanw kuix lehh.' Ix dyrr beh rinr linw qongxx, 'Linw dui' dyc'ui laii. Guaw m bad linw.'

26 Linw dyrr beh qongw, 'Guanw bad dirr Liw ee binrjingg limjiac; Liw iarr bad dirr guanw ee quelo qawsi.'

27 Ix beh qongw, 'Guaw qra linw qongw, Guaw m jaix linw dyc'ui laii; linw qniaa vutgi ee langg longxx diyhh lirkuix Guaw.'

28 Linw decbeh knuar qnir Ablaham, Isaac, Jakob, qapp jiongww sendix dirr Siongrder ee qog, acc linw qaqi siurr qnuaw cud dirr guarbin. Dng' hitt sii, dirr hiax beh u tikaur qargee cetkiw.

29 Dui' dangx, dui' saix, dui' lamm, dui' vag, beh u langg lai jerdyh dirr Siongrder ee qog.

30 U lorbuew :ee beh juer dairsingx, iarr u dairsingx :ee beh juer lorbuew."

31 Hitt sii u Falise quixnarr langg laii qra Ix qongw, "Liw diyhh lirkuix jiax kir vadd xui, in'ui Helod rair beh taii Liw."

32 Ix qra inx qongw, "Linw kir qra hitt jiah holii qongw, 'Liw knuar, qinaxzit qapp binaxzit Guaw qnuaw qxuiw rix vni, qaur derr snax zit Guaw dyrr uanjuann.'

33 Suizenn anxnix, qinaxzit, binaxzit qapp au .zit Guaw ingqaix diyhh qniaa; in'ui vutqaix u sendix dirr Jelusalem ee guarbin siurr hai siw.

34 Jelusalem ar, Jelusalem ar, dyrr si taiw siw sendilangg, ing jiyhtauu dimr hrong crex qaur dirr ix :ee, Guaw zuarr je vaiw rair jurjip liw ee qniaxzii, cincniu qebuw jurjip ix ee qe'ax dirr sxit-xe; danrsi linw m rair.

35 Knuar ar, linw ee cur pahngx vangr decc hro liw; qycc Guaw qra linw qongw, linw quatduan be knuar qnir Guaw, tingwhau linw qongw, 'Dirr Jruw ee miaa laii :ee did diyc hokkir.'"

14 Anhiyczit, Jesus zip jit xee Falise ee taulangg ee cur beh jiac; inx decc dngdanw Ix.

2 Duxdng dirr Ix ee binrjingg u jit xee qoxdiongr ee langg.

3 Jesus duiww qar ludhuad ee sensnix qapp Faliselangg qongw, "Anhiyczit rix vni tangx iacc m tangx?"

4 Inx jing jing. Jesus kanx hitt xee langg, rix hyw ix, hro ix kir.

5 Suar duiww inx qongw, "Linw diongqanx simxmih langg u luu-aw iacc si guu dirr Anhiyczit vuac lyc qaukud, suacc byy liamvnix kanx ix kiw .laii mah?"

6 Jiaxee ue inx be e rinr.

7 Jesus knuar hiaxee langkeh qingw duarui, dyrr sed piwzu duiww inx qongw,

8 "Linw hro langg cniaw kir hur hun'inx ee endyh, byc did jre duarui, qniax viw liw kacc junquir :ee iarr hro ix cniaw.

9 Cniaw liw qapp cniaw ix :ee laii qra liw qongw, 'Niu xui hro jitt langg'; liw dyrr qenwsiaur, trer kir jre dirr buexui.

10 Dogdok hro langg cniaw ee sii diyhh kir jre buexui, cniaw liw :ee laii qra liw qongw, 'Ving'iuw ar, laii jre duarui'; hitt sii liw dirr qangg dyh ee langg ee binrjingg dyrr u texben.

11 In'ui qniwnarr jurqyx :ee beh hro ix vibii; qaqi vibii :ee beh qysingx ix."

12 Jesus iarr qra cniaw Ix ee langg qongw, "Liw vran ziddauwdngr iacc si ehngdngr, m tangx cniaw liw ee ving'iuw, iacc si hniadi, iacc si cincig, iacc si hyxgiac ee cuwvnix, qniax inx dryr cniaw liw, liw dyrr siurr vywdab.

13 Narr si liw vran endyh ee sii, diyhh cniaw songwhiongx :ee, puawsniur :ee, vaixkax :ee, cnimii :ee, anxnix liw dyrr u hokkir;

14 In'ui inx byy tangx vywdab liw. Dirr girlangg qycc uac ee sii, liw beh did diyc vywdab."

15 Qangg dyh ee jit langg tniax qnir jiaxee ue, dyrr qra Ix qongw, "Beh dirr Siongrder ee qog jiac :ee, u hokkir :ar."

16 Danrsi Jesus qra ix qongw, "U jit langg vran dua ensiac, soxx cniaw :ee jerje.

17 Qaur beh cniaw ee sii, ix crex ix ee lovok qra soxx cniaw ee langg qongw, 'Diyhh laii, vachang mic ven lar.'

18 Jiongww langg dyrr qangg jit ngiu ee simx qra tesii. Tauu jit xee qra ix qongw, 'Guaw u brew hngg, qovutjiongx diyhh kir knuar ix. Cniaw hro guaw srii.'

19 Qycc u jit langg qongw, 'Guaw u brew guu go duir, beh kir giamrknuar. Cniaw hro guaw srii.'

20 Qycc u jit xee qongw, 'Guaw cuarbow, jiacc berdid laii.'

21 Lovok dyr .kir, jiong' jiaxee su qra ix ee juxlangg qongw, qejuw siurkir, qra ix ee lovok qongw, 'Qinw qinw cud kir qaur sniaa-lai ee dua quex siyw hxang, cua hiaxee songwhiongx :ee, puawsiur :ee, cnimii :ee, vaixkax :ee laii jiax.'

22 Lovok qongw, 'Jruw ar, liw soxx bingrling :ee ixqing’ qniaa :ar, danrsi iauxquxx u cunx xui.'

23 Juxlangg duiww ix ee lovok qongw, 'Cud kir lo nirr qapp livax vnix benxqiongw langg zip .laii, hro guaw ee cur muaw muaw.

24 In'ui guaw qra linw qongw, jingg soxx cniaw :ee byy jit langg erdid jiac guaw ee ensiac.'"

25 Jerje langg qapp Ix dangjee qniaa. Ix dyrr uat .quer .kir, duiww inx qongw,

26 "Narr u langg jiurqin Guaw, narr byy uanwhun ix ee verbuw, boxqniaw, hniadi, jixbe, ixqip qaqi ee sniwmia, dyrr be e juer Guaw ee hagsingx.

27 Byy giaa qaqi ee sibzirqer laii duer Guaw :ee, iarr be e juer Guaw ee hagsingx.

28 Linw diongqanx simxmih langg beh kiw tah, qamxx byy dairsingx jre lyc laii sngr hitt xee soxhuir, knuar e kiw qaur jniaa .be?

29 Qniax qiamxcaiw derqix he liauxau, iarr be e kiw qaur hyw; knuar .qnir ee langg dyrr longxx tixciyr ix, qongw,

30 'Jitt xee langg u dangrqangx, suacc be kiw qaur hyw.'

31 Iacc si simxmih ongg cud laii beh qapp vadd xee ongg qaujenr, qamxx byy dairsingx jre lecc camboo, knuar e ing jit-bxan vingx dixdik hitt xee cua nng-bxan vingx laii qongqig ix :ee iacc be?

32 Narr be, dyrr tanr ix iauxx hng, crex suwjiaw kir qapp ix qrangw hxyy.

33 Anxnix, linw diongqanx qniwnarr byy vangwsag itcer soxu :ee, be e juer Guaw ee hagsingx.

34 Iamm si hyw. Iamm narr sid bi, beh ing simxmih hogdyr ix ee bi?

35 Iarr be lyc hngg .did, iarr be juer vuii .did; jixu hed dirr guarbin. U hnirkangx tangx tniax :ee, diyhh tniax."

15 Jiongww tiux hxiongr :ee qapp pnaiw langg decc jiurqin Jesus laii tniax Ix.

2 Faliselangg qapp qinghagsu gnauhgnauc liam qongxx, "Jitt xee langg jiaplap pnaiw langg, suar qapp inx jiac."

3 Jesus sed jit xee piwzu duiww inx qongw,

4 "Linw diongqanx simxmih langg u jit-vah jiah ngiuu, sitlyc jit jiah, qamxx byy jiamrcniaw qra qauw-jap-qauw jiah vangr dirr snuax nirr, kir cue soxx sitlyc :ee qaur did .diyc mah?

5 Cue .diyc .ar dyrr hnuahiw, qra ix pnai dirr qingtauu dingw dngw kir cur nirr.

6 Dyrr jurjip ix ee ving'iuw cuwvnix, qra inx qongw, 'Diyhh qapp guaw hnuahiw, in'ui soxx sitlyc ee ngiuu guaw ixqing’ cue .diyc.'

7 Guaw qra linw qongw, pnaiw langg diongx u jit langg huanxhuew, dirr tnix nirr iarr beh anxnix uirdiyhh ix hnuahiw, viw uirdiyhh qauw-jap-qauw xee girlangg mrbenw huanxhuew :ee, qyckacc hnuahiw.

8 Iacc si simxmih hurzinlangg u jap xee ginn-aw, narr sitlyc jit xee, qamxx byy diamw dingx, saur cur, kunkunn cue qaur diyc mah?

9 Cue .diyc liauxau, dyrr jurjip ix ee ving'iuw cuwvnix, qongw, 'Diyhh qapp guaw hnuahiw, in'ui soxx sitlyc ee ginn-aw, guaw ixqing’ cue .diyc.'

10 Guaw qra linw qongw, pnaiw langg diongx u jit langg huanxhuew, dirr Siongrder ee tnisair ee binrjingg uirdiyhh ix hnuahiw iarr si anxnix."

11 Qycc qongw, "Boxlangg u nng xee qniaw.

12 Hitt xee derr zi :ee qra laurve qongw, 'Avar ar, jiong' guaw ingqaix did ee giap, vunx hro guaw.' Ix ee laurve dyrr qra inx vunx qehuew.

13 Qycc byy quiw zit, hitt xee derr zi qniaw itjin siusip ix ee mic, cutgua kir hng hng ee soxjai; dirr hiax hongwdong huixhuai ix ee giap.

14 Ixqing’ srngw liauw liauw, duw diyc hitt soxjai dua qihngx, ix jiacc jaix kiamwkueh ee qankow.

15 Ix dyrr kir uaw hitt soxjai jit xee vecsnir; hitt langg crex ix kir snuax nirr cri dix.

16 Ix rair jiong' dix soxx jiac ee daurqueh tec laii jixqix, iarr byy langg hro ix.

17 Ix cnixgo, dyrr qongw, 'Guaw ee laurve u zuarr je dngqangx, bixniuu jiac u cunx; guaw suacc dirr jiax decbeh gy .siw .ar!

18 Guaw beh kir cue guaw ee laurve, qra ix qongw: Avar ar, guaw u dikjue tnix qapp liw.

19 Dnaxx liauxau, guaw be kamx did qiyr juer liw ee qniaw. Diyhh hro guaw cincniu liw ee dngqangx ee jit xee.'

20 Ix dyrr kiw laii kir cue ix ee laurve. Sna' li iauxquxx hng, ix ee laurve knuar qnir ix, dyrr linbinw ix, jauw kir py ix ee amrqunw, diddit qra ix jimx.

21 Qniaw dyrr qra ix qongw, 'Avar ar, guaw u dikjue tnix qapp liw; dnaxx liauxau, be kamx did qiyr juer liw ee qniaw.'

22 Danrsi laurve duiww ix hiaxee lovok qongw, 'Qinw qinw hniah siongrr hyw ee snxax laii qra ix cing, qycc qra ix qruar ciuxjiw, suar qra ix cing ree;

23 Qycc kanx hitt jiah vuii ee guu-aw laii taii, lanw jiacc laii hnuahiw.

24 In'ui guaw jitt xee qniaw siw u qycc uac, sitlyc u qycc did .diyc.' Inx dyrr snaqab hnuahiw.

25 Hitt sii, ix ee dua-qniaw dirr hngg nirr, dyr laii beh qaur cur, tniax qnir jokgak qapp tiauwbuw ee sniax.

26 Dyrr qiyr jit xee lovok laii mng qongxx si sniaw dai.

27 Lovok qra ix qongw, 'Linw siyxdi laii lar; linw laurve in'ui did diyc ix hyw hyw dyr .laii, soxiw taii hitt jiah vuii ee guu-aw.'

28 Dua-qniaw siurkir, m zip .kir; ix ee laurve cud laii krngr ix.

29 Ix rinr ix ee laurve qongxx, 'Guaw hogsai liw hiacc je nii, longxx m bad uiqec liw ee bingrling; liw iarr m bad hro guaw jit jiah ngiu'axqniaw, tangx qapp guaw ee ving'iuw snaqab hnuahiw.

30 Danrsi liw jitt xee qniaw, qauvuee ciongqix, itjin puawhuir liw ee giap, jid'err dyr .laii, liw dyrr uirdiyhh ix taii vuii ee guu-aw.'

31 Laurve dyrr qra ix qongw, 'Qniaw ar, liw siongsiongg qapp guaw dilehh, huanrr guaw soxu :ee longxx si liw ee;

32 Danrsi liw jitt xee siyxdi siw u qycc uac, sitlyc u qycc did .diyc, lanw ingqaix diyhh hnuahiw kuaiwlok.'"

16 Jesus qycc duiww hagsingx qongw, "Bxow xee hyxgiahlangg u jit xee quanxqex ; u langg duiww juxlangg qryr ix puawhuir juxlangg ee giap.

2 Juxlangg qiyr ix laii, qra ix qongw, 'Guaw soxx tniax qnir liw jitt xee dairjir si jnaixngiu? Dnaxx liw quanxqex ee su diyhh qapp guaw cingcyw, in'ui liw bersaih iuguann juer quanxqex.'

3 Quanxqex ee simlai sniu qongxx, 'Juxlangg beh qra guaw srii taulo, guaw beh jnaixngiu ar? Giac ditauu, byy kuiwlat; juer kitjiac, qycc qenwsiaur.

4 Dnaxx guaw jaix soxx diyhh juer :ee lar, qaur inx qra guaw srii taulo, hitt sii langg beh jiaplap guaw zip inx ee qrex.'

5 Ix dyrr qiyr kiamr ix juxlangg ee jxer :ee, jit xee aw jit xee laii; qra tauu jit xee qongw, 'Liw kiamr guaw ee juxlangg zuarr je?'

6 Rinr qongxx, 'Iuu, jit-vah tangw.' Dyrr qra ix qongw, 'Tec liw ee siaur, qinw qinw jre .lyc .laii, siaw go-jap.'

7 Qycc qra vadd xee qongw, 'Liw kiamr zuarr je?' Ix qongw, 'Bec, jit-vah jiyc.' Qra ix qongw, 'Tec liw ee siaur, siaw veh-jap.'

8 Juxlangg dyrr ylyw jitt xee vutgi ee quanxqex ee soxx juer u diwsig; in'ui jitt sewqanx ee langg uirdiyhh sewjingg laii doboo, viw qngbingg ee langg kacc u diwsig.

9 Guaw iarr qra linw qongw, diyhh ing vutgi ee jnijaii qetqaux ving'iuw, qaur jnijaii liauw kir ee sii, inx jiacc beh jiaplap linw zip ingxuanw ee dniuwvangg.

10 Dirr jiww siyxkuaw ee su jinrdiongx :ee, dirr dua :ee iarr jinrdiongx; dirr jiww siyxkuaw ee su vutgi :ee, dirr dua :ee iarr vutgi.

11 Dirr vutgi ee jnijaii linw narr byy jinrdiongx, jirjui beh ing jinx :ee tokdiong linw?

12 Qycc dirr sriok vadd langg :ee, linw narr byy jinrdiongx, jirjui beh ing sriok linw :ee hro linw ar?

13 Jit xee lovok be e hogsai nng xee juxlangg, in'ui ix e uanwhun jitt xee, tniax hitt xee; iacc si e duiwdiong jitt xee, knuawkinx hitt xee. Linw be e hogsai Siongrder suacc qycc hogsai jnijaii."

14 Faliselangg si tamjaii :ee, tniax qnir jiaxee longxjongw ee ue, dyrr lingxciyr Ix.

15 Jesus qra inx qongw, "Linw si dirr langg ee binrjingg qaqi cxingx juer gi :ee; danrsi Siongrder jaix linw ee simx. In'ui dirr langg ee diongqanx soxx cuijunx :ee, dirr Siongrder ee binrjingg si koxngor.

16 Ludhuad qapp sendix qaur Johan uijiw. Dui' hitt sii, Siongrdewqog ee hok'imx tuanvyr, langg jinrlat beh zip .kir.

17 Tnide ee huewbyy viw ludhuad jitt uec ee sitlyc si kacc kuair.

18 Qniwnarr si qniaa qan'imm, crua vadd langg soxx lii :ee, iarr si qniaa qan'imm.

19 U jit xee vur langg cing jxiw sig qapp iuwdervor ee ijniuu, dagg zit ciahuax enlok.

20 Qycc u jit xee kitjiac miaa Lazalus, venww srinx sngtniar. Ix ho'ngg he dirr vur langg ee duarmngkauw,

21 Rair jiong' vur langg dyh-kax soxx qalauc :ee laii dro vaw; qxauw iarr laii ji ix sngtniar ee xui.

22 Songwhionglangg siw, hro tnisair huu ix qaur Ablaham ee hxingx-jingg; vur langg iarr siw, suar baijongr.

23 Dirr imqanx, ix dirr tongwkow ee diongqanx, giahbak hng hng knuar qnir Ablaham, qycc knuar qnir Lazalus dirr ix ee hxingx-jingg,

24 Dyrr qiyr qongxx, 'Guaw ee jow Ablaham ar, kyxlinn guaw, crex Lazalus ing jngxtauu-aw buew unr juiw laii liangg guaw ee jic, in'ui guaw dirr jitt huexiam diongx jin' cnicamw.'

25 Danrsi Ablaham qongw, 'Qniaw ar, diyhh qir did liw jairsnix ee sii u hiongxsiu liw ee hokkir, Lazalus sriu diyc qankow. Dnaxx ix dirr jiax did diyc an'uir, acc liw siurr cnicamw.

26 M na anxnix, dirr guanw qapp linw ee diongqanx u dua cim'enx qeh lehh, drir qaur beh dui' jiax quer kir linw hiax be e, dui' hiax quer laii guanw jiax iarr be e.'

27 Ix dyrr qongw, 'Qiwzenn anxnix, qriuu jow liw crex Lazalus kir guanw ve ee cur.

28 Guaw u go xee hniadi, hro ix duiww inx juer qanjingr, benw did inx iarr qaur jitt xee tongwkow ee soxjai.'

29 Ablaham qongw, 'Inx u Moses qapp hiaxee sendix, inx tangx tniax inx.'

30 Ix rinr qongxx, 'Guaw ee jow Ablaham ar, be lar. Narr u langg dui' sixlangg diongx kir cue inx, inx dyrr beh huanxhuew.'

31 Ablaham qra ix qongw, 'Inx narr m tniax Moses qapp sendix, dyrr u langg dui' sixlangg diongx qycc uac, inx iarr m siurr koxkngr.'"

17 Jesus qycc duiww Ix ee hagsingx qongw, "Tatgai langg ee su be benw did u; danrsi knuar dui' jirjui laii, hitt langg u jaiec!

2 Ix lingkow hro langg ing dua jiyhby diaur ix ee amrqunw, qra ix hed lyc haiw, kacc hyw hro jiaxee biser ee jit xee siurr tatgai.

3 Linw diyhh qaqi qinxsin. Narr linw ee hniadi huanrjue, diyhh jikvi ix; ix narr huanxhuew, diyhh siawbenw ix.

4 Narr si ix jit zit dikjue liw cid vaiw, ix iarr cid vaiw uat dngw qra liw qongw, 'Guaw huanxhuew lar', liw iarr diyhh siawbenw ix."

5 Suwdoo qra Jruw qongw, "Qetnix guanw ee sinr."

6 Jruw qongw, "Linw narr u sinr cincniu jit liap quawcaiwjiw, dyrr si bingrling jit jangg sngjaiciu qongxx, 'Vuic liw ee qinx kir jraix dirr haiw nirr', ix iarr beh sunrtanr liw.

7 Linw diongqanx simxmih langg u lovok decc jyh hngg, iacc si qor ngiuu, dui' hngg nirr dyr .laii, qamxx beh qra ix qongw, 'Jiksii jre lyc laii jiac'?

8 Qamxx m si qra ix qongw, 'Virvan hro guaw jiac, haa duar laii hogsai guaw; tingwhau guaw limjiac suah, liw jiacc tangx limxjiac' mah?

9 Lovok qniaa soxx bingrling :ee. Ix qamxx diyhh qra lovok suecsia mah?

10 Anxnix, linw ixqing’ itjin qniaa soxx bingrling linw :ee, diyhh qongw, 'Guanw si byy lirig ee lovok, qniaa soxx ingqaix qniaa :ee nardnia.'"

11 Jesus kir Jelusalem ee sii, dui' Samalia qapp Galilee ee qauqair qingquer.

12 Zip jit xee hniusia ee sii, u jap xee taixqyx :ee duw diyc Ix, hng hng decc kia,

13 Cud sniax qongw, "Jesus, Sensnix, linbinw guanw."

14 Jesus knuar .qnir, qra inx qongw, "Linw kir jiong' vunxsinx hro jewsix giam." Inx kir ee sii dyrr did diyc cingkir.

15 Qidiongx jit langg knuar qnir qaqi ixqing’ hyw, dyrr dywdngw laii dua sniax ylyw Siongrder,

16 Qycc pag lyc dirr Jesus ee kax-jingg, laii qamxsia Ix; jitt langg si Samalialangg.

17 Jesus rinr qongxx, "Qamxx m si u jap langg longxx did diyc cingkir mah? Hitt qauw langg dirr daxlyc?

18 Duliauw jitt xee vadd jok ee langg ixgua, byy vadd langg dywdngw laii qruix ingqngx Siongrder mah?"

19 Dyrr qra hitt langg qongw, "Kiw .laii, jueww liw kir, liw ee sinr u qiur liw."

20 Faliselangg mng Siongrder ee qog dirsii e limqaur. Jesus rinr qongxx, "Siongrder ee qog limqaur m si henxzenn;

21 Iarr be qongw did "Dirr jiax!", iacc si "Dirr hiax!" In'ui Siongrder ee qog si dirr linw lairdiongx."

22 Ix qycc duiww hagsingx qongw, "Sizit beh qaur. Linw jin' rair knuar qnir Zinjuw ee jit zit, iarr byy tangx knuar .qnir.

23 Beh u langg qra linw qongw, 'Liw knuar, dirr jiax!' 'Liw knuar, dirr hiax!' Linw byc did kir, byc did duer inx.

24 In'ui Zinjuw Ix ee zit, beh cincniu sicnar dui' tnix jitt vingg decc sih, qngx jiyr qaur tnix hitt vnix anxnix.

25 Danrsi Ix dikkag diyhh dairsingx siurr jerje qankow, iarr hro jitt sewdai kiwsag.

26 Cincniu dirr Noah ee zit jnaixngiu, dirr Zinjuw ee zit iarr beh anxnix.

27 Inx decc limjiac, decc qewcua, qaur Noah zip dua junn ee zit, duarjuiw qaur, bet inx jiongww langg.

28 Qycc cincniu dirr Lot ee zit, inx decc limjiac, bexbe, jingwjyh, kiw cur.

29 Qaur Lot cud Sodom ee zit, dui' tnix lyc huew qapp ziu'ngg, bet jiongww langg;

30 Dirr Zinjuw henxhen ee zit iarr beh anxnix.

31 Dng' hitt zit, dirr cur-dingw :ee, ix ee mic dirr cur-lai, byc did lyc laii tec; dirr hngg nirr :ee iarr byc did dywdngw .laii.

32 Diyhh qir did Lot ee bow.

33 Qniwnarr diwir qor ix ee sniwmia :ee, beh sitlyc sniwmia; qniwnarr sitlyc sniwmia :ee, beh vyxjuann sniwmia.

34 Guaw qra linw qongw, hitt mii nng langg siangrr cngg. Beh cruw jit xee, vangr jit xee.

35 Nng xee hurzinlangg dangjee decc ex bry. Beh cruw jit xee, vangr jit xee.

36 Nng xee hurzinlangg dirr hngg nirr, beh cruw jit xee, vangr jit xee."

37 Inx rinr Ix qongxx, "Jruw ar, dirr simxmih soxjai ar?" Ix qra inx qongw, "Sinsix narr dirr hiax, ingjiauw iarr beh jurjip dirr hiax."

18 Jesus sed jit xee piwzu, qawsi inx diyhh siongsiongg qidyw, m tangx iar. Ix qongw,

2 "Bxow sniaa u jit xee simxpnuawqnuax, byy qniax Siongrder iarr byy duiwdiong langg.

3 Dirr hitt xee sniaa-lai u jit xee jiuxqnuaxlangg vutsii kir qnir ix, qongw, 'U langg qapp guaw juer duiwdik, qriuu liw ter guaw sin'uanx.'

4 Ix quw quw longxx byy rinw ix; au .laii sniu qongxx, 'Guaw suizenn byy qniax Siongrder, byy duiwdiong langg;

5 Danrsi jitt xee jiuxqnuaxlangg dniardnia laii qiuaxziauw, guaw beh ter ix sin'uanx, benw did ix itdit laii koxcow guaw.'"

6 Jruw qycc qongw, "Linw tniax jitt xee vutgi ee qnruax soxx qongw :ee.

7 Hyhongr Siongrder qingw ee vecsnir mizit auqiyr Ix, Ix kuan'iongg inx, qamxx byy beh ter inx sin'uanx mah?

8 Guaw qra linw qongw, Ix beh qinw qinw ter inx sin'uanx. Suizenn anxnix, Zinjuw qaur ee sii, qamxx e duw diyc sewqanx u sinr :ee mah?"

9 U uaxkyr qaqi juer gi laii knuawkinx vadd langg :ee, Jesus sed jit xee piwzu qongxx,

10 "U nng langg jnriu dxen beh qidyw, jit xee si Faliselangg, jit xee si tiux hxiongr :ee.

11 Faliselangg kia lehh, qaqi qidyw qongxx, 'Siongrder ar, guaw qamxsia Liw, in'ui guaw byy cincniu vadd langg, ligsig, vutgi, qan'imm, iarr byy cincniu jitt xee tiux hxiongr :ee.

12 Guaw jit lexvair qimwjiac nng vaiw, qycc jiong' huanrr soxx did .diyc .ee, jap hxun tiux jit hxun.'

13 Hitt xee tiux hxiongr :ee, ix hng hng kia lehh, lenrr giahbak ngr tnix iarr m qnaw; qandna' duii hxingx qongw, 'Siongrder ar, linbinw guaw jitt xee u jue ee langg.'

14 Guaw qra linw qongw, jitt xee langg dyr kir ix ee cur, did diyc soxx qongw ee gi kacc ngiaa quer hitt xee langg. In'ui qniwnarr jurqyx :ee beh hro ix vibii; qaqi vibii :ee beh qysingx ix."

15 U langg duar ngex-aw jiurqin Jesus, beh hro Ix bongx inx. Hagsingx knuar .qnir dyrr jikvi inx.

16 Danrsi Jesus qiyr hiaxee ngex-aw laii, qongw, "Iong'unw sewqniaw jiurqin Guaw, byc did qra qimr; in'ui Siongrder ee qog si jitt hy langg ee.

17 Guaw sidjai qra linw qongw, huanrnarr singjiab Siongrder ee qog byy cincniu sewqniaw :ee, quatduan berdid tangx zip .kir."

18 U jit xee juer qnruax :ee mng Ix qongxx, "Hyw ee sensnix ar, guaw diyhh jnaixngiu juer, jiacc tangx singjiab ingxuac?"

19 Jesus qra ix qongw, "Liw sniaw su cinghox Guaw si hyw ar? Byy jit xee hyw, dogdok Siongrder nardnia.

20 Jiaxee qaiwbing liw ixqing’ jaix: byc did qan'imm, byc did taii siw langg, byc did tautec, byc did lamrsamw juer qanjingr, diyhh qingr liw ee verbuw."

21 Ix dyrr qongw, "Jiaxee guaw dui' sewhanr longxx u siuw lar."

22 Jesus tniax .qnir dyrr qra ix qongw, "Liw iauxx kiamr jit hxang. Diyhh bre liw itcer soxu :ee laii hro songwhionglangg, liw dyrr beh u jaivyw dirr tnix nirr; iaxqycc, laii duer Guaw."

23 Hitt langg tniax qnir jiaxee ue jin' iubun, in'ui ix jin' hyxgiac.

24 Jesus knuar qnir ix dyrr qongw, "Vur langg zip Siongrder ee qog yh ar.

25 In'ui logdyy cngx quer jiamx pni, viw vur langg zip Siongrder ee qog, iauxx kacc kuair."

26 Tniax .qnir ee langg qongw, "Anxnix jirjui e did diyc qiur ar?"

27 Jesus qongw, "Jairr langg soxx be e :ee, jairr Siongrder si e."

28 Peter qongw, "Guanw ixqing’ vangwsag qaqi soxu :ee laii duer Liw."

29 Jesus qra inx qongw, "Guaw sidjai qra linw qongw, byy u langg uirdiyhh Siongrder ee qog laii vangwsag cuwtec, iacc si bow, iacc si hniadi, iacc si verbuw, iacc si qniaxzii,

30 Suacc byy dirr jitt sxir did diyc quixnarr vxue kacc je, dirr laiser did diyc ingxuac."

31 Jesus duar jap-zi xee hagsingx, duiww inx qongw, "Knuar ar, lanw jnriu Jelusalem, qniwnarr sendix soxx qir :ee, longxx beh ingwgiam dirr Zinjuw.

32 In'ui Ix beh siurr qewsangr hro ngirvanglangg, qycc siurr hiwlang, lingziok, pruir nxua;

33 Inx beh vnipah laii hai siw Ix; derr snax zit Ix beh qycc uac."

34 Jiaxee dairjir, hagsingx byy jit hxang e hiauxdid; in'ui jitt xee ue si duiww inx unxbat, inx m jaix Ix soxx qongw :ee.

35 Qin Jeliqo ee sii, u jit xee cnimii :ee jre dirr lo-vnix decc kid jiac;

36 Ix tniax qnir jerje langg qingquer, dyrr mng si simxmih dairjir.

37 Langg qra ix qongw, "Nazalet ee Jesus dui' jiax quer."

38 Ix dyrr auqiyr qongxx, "David ee Horer, Jesus, kyxlinn guaw."

39 Taujingg qniaa ee langg jikvi ix, qiyr ix diyhh jing jing; danrsi ix ithuad dua sniax auqiyr qongxx, "David ee Horer ar, kyxlinn guaw."

40 Jesus tingkax, qiyr langg kanx ix laii. Ix ixqing’ qinruaw .laii. Jesus dyrr mng ix qongxx,

41 "Rair Guaw qra liw juer simxmih?" Ix dyrr qongw, "Jruw ar, guaw rair did diyc knuar .qnir."

42 Jesus qra ix qongw, "Liw tangx did diyc knuar .qnir, liw ee sinr u qiur liw lar."

43 Ix liamvnix did diyc knuar .qnir, dyrr duer Jesus, qruix ingqngx Siongrder; jiongww langg knuar .qnir, iarr longxx qruix ingqngx Siongrder.

19 Jesus zip Jeliqo. Ix beh quer .kir ee sii,

2 U jit langg miaa qiyr Zacqaeus, si juer tiux hxiongr :ee ee taulangg, iarr si hyxgiahlangg.

3 Ix rair beh knuar Jesus si simxmih langg, danrsi langg je, knuar be diyc, in'ui ix sinkux exser.

4 Ix dyrr jauw juer jingg, vreh jriu sngjaiciu, beh knuar Ix, in'ui Jesus beh dui' hiax quer.

5 Jesus qaur hitt xui, giac tauu knuar ix qongw, "Zacqaeus, linw qinw qinw lyc .laii, in'ui qinaxzit Guaw dikkag diyhh diamr liw ee qrex."

6 Ix dyrr qinw qinw lyc .laii, hnuahiw jiaplap Ix.

7 Jiongww langg knuar .qnir, gnauhgnauh liam qongxx, "Ix zip kir hiyh dirr pnaiw langg ee cur."

8 Zacqaeus kia lehh, duiww Jruw qongw, "Jruw ar, guaw jiong' soxu ee jidvnuar hro songwhionglangg; narr si bad nguaix simxmih langg, dyrr vuee ix sir vxue."

9 Jesus duiww ix qongw, "Qniaxzit jinxqiur qaur dirr jitt xee qrex; in'ui ix iarr si Ablaham ee qniaxsunx.

10 Zinjuw qaur, si beh cue sitlyc :ee, laii qiur ix."

11 Inx tniax qnir jiaxee ue ee sii, Jesus qycc sed jit xee piwzu, si in'ui Ix ixqing’ qin Jelusalem, inx iarr pacsngr Siongrder ee qog beh liamvnix henxbingg. Ix dyrr qongw,

12 "U jit xee junquir ee langg kir hng hng ee soxjai, ix beh siurr hrongx laii did diyc qog jiacc dywdngw .laii.

13 Dyrr qiyr ix jap xee lovok, ing ginn jap qinx hro inx, duiww inx qongw, 'Kir juer singliw qaur guaw dyr .laii.'

14 Danrsi ix vunxqog ee vecsnir uanwhun ix, crex suwjiaw duewau kir, qongw, 'Guanw byy rair jitt langg juer guanw ee ongg.'

15 Ix did diyc qog dywdngw .laii, dyrr huanhur qiyr hiaxee dui' ix niaw ginn ee lovok laii, rair beh jaix inx juer singliw soxx tanr :ee.

16 Tauu jit xee laii ix ee binrjingg, qongw, 'Jruw ar, liw jit qinx ee ginn ixqing’ tanr jap qinx lar.'

17 Ix qra ix qongw, 'Hyw ar, hyw ee lovok, in'ui liw dirr jiww siyxkuaw ee su ixqing’ jinrdiongx, dnaxx hro liw quanw jap xee sniaa.'

18 Hitt xee derr zi xee laii, qongw, 'Jruw ar, liw jit qinx ee ginn ixqing’ did diyc go qinx lar.'

19 Ix qra ix qongw, 'Hro liw iarr quanw go xee sniaa.'

20 Qycc jit xee laii, qongw, 'Jruw ar, liw knuar, liw jit qinx ee ginn dirr jiax, guaw ing ciuxqinx vaux kngr lehh;

21 In'ui guaw qniax liw, liw si giamhat ee langg, tec soxx byy he :ee, quah soxx byy ia :ee.'

22 Ix qra ix qongw, 'Pniaw ee lovok ar, jiurr liw soxx qongw :ee guaw beh gixduan liw. Liw qiwzenn jaix guaw si giamhat ee langg, tec soxx byy he :ee, quah soxx byy ia :ee;

23 Sniaw su m jiong' guaw ee ginn kir log dirr jnidiamr, qaur guaw laii ee sii, tangx lenrr hitt xee lirsig suar tec .dngw .laii?'

24 Ix dyrr qra vnix:a kia ee langg qongw, 'Jiong' ix jit qinx ee ginn qra ix tec .laii, hro hitt xee u jap qinx :ee.'

25 Inx qra ix qongw, 'Jruw ar, ix u jap qinx lar.'

26 'Guaw qra linw qongw, qniwnarr u :ee, beh qycc hro ix; byy :ee, lenrr ix soxx u :ee iarr beh qra ix tec .kir.

27 Narr si guaw hiaxee duiwdik, m rair guaw juer inx ee ongg :ee, diyhh tuax inx laii, dirr guaw ee binjingg taii siw inx.'"

28 Jesus qongw suah, dyrr jinwjingg qniaa, jnriu Jelusalem.

29 Qniaa qin Betfage qapp Betani, dirr hitt xee miaa qiyr Qnanaw ee snuax, dyrr crex nng xee hagsingx, qongw,

30 "Linw kir duiwbin ee hniusia, zip kir ee sii, beh duw diyc jit jiah luu-aw vak dirr hiax iauxx m bad u langg kiaa :ee. Qra tauw .kuix, qra kanx .laii.

31 Narr u langg mng linw, 'Tauw luu beh sniaw su?' Linw diyhh qongw, 'Jruw kiamwing ix.'"

32 Soxx crex ee langg kir, qyxzenn duw diyc jiauww Ix soxx qra inx qongw :ee.

33 Inx decc tauw luu-aw ee sii, juxlangg duiww inx qongw, "Tauw luu-aw beh sniaw su?"

34 Inx qongw, "Jruw kiamwing ix."

35 Dyrr kanx ix jiurqin Jesus, jiong' inx ee snxax puac dirr luu-aw dingw, huu Jesus kiaa ix.

36 Ix qniaa ee sii, langg ing inx ee snxax pox dirr lo nirr.

37 Ixqing’ qin, beh lyc Qnanaw Snuax, qui' din ee hagsingx dyrr hnuahiw, dua sniax ylyw Siongrder, uirdiyhh soxx knuar .qnir longxjongw ee quanlingg, qongw,

38 "Dirr Jruw ee miaa laii ee Ongg, ingqaix did diyc ylyw, dirr tnix nirr hyvingg, dirr jiww quann ee xui ingqngx."

39 Jiongww langg diongx u quixnarr xee Faliselangg duiww Ix qongw, "Sensnix ar, diyhh jikvi Liw ee hagsingx."

40 Ix rinr qongxx, "Guaw qra linw qongw, inx narr jing jing, hiaxee jiyhtauu beh auqiyr."

41 Ix ixqing’ qin, knuar qnir sniaa, dyrr uirdiyhh ix tikaur, qongw,

42 "Kow byy liw jaix dirr jitt zit quanhe ving'anx ee su! Dnaxx, kiokk duiww liw ee bagjiux unxbat.

43 In'ui sizit beh qaur, liw ee duiwdik beh jiu'uii kiw tosniaa laii uii liw, siwbin kunwkow liw;

44 Qycc beh hro liw qapp liw lairdiongx ee qniaxzii longxx dyw dirr de; byy lauu nng der jiyc sna' tac; in'ui liw m jaix quanwqor liw ee zit."

45 Ix ixqing’ zip denrdngg, dyrr qnuaw cud hiaxee bre mic :ee,

46 Qra inx qongw, "U qiwjair qongxx, 'Guaw ee cur beh juer qidyw ee cur, danrsi linw hro ix juer cadsiu.'"

47 Jesus zidzit dirr dxen nirr qawsi langg. Jiaxee jewsitauu qinghagsu ixqip vecsnir ee sirdua qewboo beh bet Ix;

48 Danrsi cue byy vo, in'ui vecsnir longxx diwir tniax Ix.

20 U jit zit, Jesus dirr dxen nirr qawsi vecsnir, tuann hok'imx ee sii, hiaxee jewsitauu, qinghagsu qapp dniuxlyw vig uaw laii duiww Ix qongw,

2 "Diyhh qra guanw qongw, Liw ing simxmih qxuann qniaa jiaxee su? Qycc, hro Liw jitt xee qxuann :ee si jirjui?"

3 Ix rinr qongxx, "Guaw iarr mng linw jit qxur ue, linw qra Guaw qongw.

4 Johan ee sexlew si dui' tnix iacc si dui' langg ar?"

5 Inx snaqab girlun qongxx, "Narr qongw, 'Dui' tnix', Ix beh qongw, 'Anxnix, linw sniaw su m sinr ix?'

6 Narr qongw, 'Dui' langg', vecsnir longxx beh ing jiyhtauu dimr lanw; in'ui vecsnir longxx cimx sinr Johan si sendix."

7 Inx dyrr rinr qongxx m jaix si dui' daxlyc.

8 Jesus dyrr qra inx qongw, "Guaw iarr byy beh qra linw qongw Guaw si ing simxmih qxuann qniaa jiaxee dairjir."

9 Jesus dyrr sed jit xee piwzu duiww vecsnir qongw, "U jit langg jraix pudyhngg, jox hro denrho, dyrr kir vadd xui quw quw.

10 Qaur qrii, ix crex jit xee lovok jiurqin denrho, qiyr inx jiong' hngg-lai ee quexjiw lap ix; danrsi denrho pah ix, hro ix kangx kangx dyr .kir.

11 Ix qycc crex vadd xee lovok; inx iarr pah ix, iarr lingziok ix, hro ix kangx kangx dyr .kir.

12 Qycc crex derr snax xee; inx siongx ix, qycc qra ciax .cud .kir.

13 Hngjuw dyrr qongw, 'Guaw beh jnaixngiu juer ar? Guaw beh crex guaw soxx tniar ee qniaw, inx qnaxx e qingr ix.'

14 Danrsi denrho knuar qnir ix, dyrr snaqab girlun qongxx, 'Jitt xee si ix singjiab giap ee qniaw, lanw laii hai siw ix, hro jitt xee giap qruix dirr lanw.'

15 Dyrr qra ix ciax cud hngg-gua, laii hai siw ix. Hngjuw beh jnaixngiu laii vran inx ar?

16 Ix beh laii bet hiaxee denrho, jiong' ix ee hngg qaudair vadd langg." Inx tniax .qnir, dyrr qongw, "Byc did anxnix."

17 Jesus knuar inx, dyrr qongw, "Soxx qiwjair qongxx, 'Saihu soxx kiwsag ee jiyc, jniaa juer cuwqaktauu ee jiyc.' Jitt qxur jnaixngiu ar?

18 Qniwnarr vuac dyw dirr jitt der jiyc-dingw :ee decbeh puar qoqoo; hro jitt der jiyc deh dirr dingxbin :ee beh iur buahbuac."

19 Hitt sii, hiaxee qinghagsu qapp jewsitauu jaix Ix jitt xee piwzu si qiw inx laii qongw, dyrr rair beh herciuw liac Ix; danrsi qniax vecsnir.

20 Inx dyrr dngx Ix, iarr crex sewjyh qew juer girlangg, beh liac Ix ee uerpang, tangx jiong' Ix qauhur dirr jongxdog ee jingwdi qapp quanvingr.

21 Sewjyh dyrr mng Ix qongxx, "Sensnix ar, guanw jaix Liw soxx qongw soxx qawsi :ee si jingwdit, Liw iarr byy ing guarmau cruw langg, si jinsit ing Siongrder ee lo qawsi langg.

22 Guanw lap suer hro Kaesar, habgii iacc byy?"

23 Jesus jaix inx ee qanjar, dyrr duiww inx qongw,

24 "Jiong' jit xee ginn-aw hro Guaw knuar. Jitt xee sxiong qapp hy si jirjui ar?" Inx qongw, "Kaesar."

25 Ix dyrr qra inx qongw, "Anxnix, linw diyhh jiong' Kaesar ee mic lap hro Kaesar, jiong' Siongrder ee mic lap hro Siongrder."

26 Inx dng' vecsnir ee binrjingg be e liac Ix ee uerpang; qycc qiquair Ix ee inwdab, dyrr jing jing.

27 U Sadducelangg, dyrr si qongw langg byy qycc uac :ee, quixnarr xee jiurqin laii mng Jesus qongxx,

28 "Sensnix ar, Moses u qir laii jixsi guanw qongxx, 'Narr u langg siw ee sii, u bow, byy qniaw, siyxdi diyhh crua ix ee bow, snix qniaw laii suawjiab ix ee hniax.

29 Anxnix, u hniadi cid langg, dua :ee cuarbow, byy qniaw dyrr siw;

30 Derr zi xee, derr snax xee iarr crua dua-hniax ee bow;

31 Cid xee longxx anxnix, byy lauu qniaw dyrr siw .kir.

32 Au .laii hurzinlangg iarr siw.

33 Anxnix, dirr qycc uac ee sii, jitt xee hurzinlangg beh juer inx diongqanx daxlyc jit xee ee bow? In'ui jitt cid langg longxx u crua ix juer bow."

34 Jesus qra inx qongw, "Jitt sewqair ee langg u qer u crua.

35 Narr si sngr juer e kamx did did diyc hitt xee sewqair :ee, qycc dui' sixlangg diongx qycc uac :ee, dyrr byy qer byy crua;

36 In'ui be e qycc siw, si cincniu tnisair jidngiu. Ixqing’ juer qycc uac ee langg, dyrr juer Siongrder ee qniaw.

37 Lun sixlangg qycc uac, Moses dirr ciwper hitt pnxix u jixbingg, cinghox Jruw si Ablaham ee Siongrder, Isaac ee Siongrder, Jakob ee Siongrder.

38 Ix m si sixlangg ee Siongrder, si uahlangg ee Siongrder; jiongww langg si in'ui Ix laii uac."

39 U qinghagsu quixnarr langg rinr qongxx, "Sensnix ar, Liw soxx qongw :ee si hyw."

40 Ixau inx m qnaw qycc mng Ix simxmih.

41 Jesus dyrr duiww inx qongw, "Langg jnaixngiu qongw Krist si David ee Horer ar?

42 Dirr Sipenx diongx, David qaqi qongw, 'Jruw qra guaw ee Jruw qongw: Jre Guaw ee duarvingg,

43 Tingwhau Guaw jiong' Liw ee duiwdik juer Liw ee kadah'iw.'

44 David qiwzenn cxingx Ix juer Jruw, Krist jnaixngiu juer ix ee Horer ar?"

45 Dng' jiongww vecsnir decc tniax ee sii, Ix dyrr qra Ix ee hagsingx qongw,

46 "Diyhh dihongg hiaxee qinghagsu. Inx air cing dngg snxax siwquer qniaa, jin' air dirr queci nirr hro langg cingxanx, huerdngg lai jre quann xui, endyh nirr jre duarui;

47 Inx hiautunx jiuxqnuaxlangg ee qehuew, qexir dngdngg qidyw; inx beh siurjue qyckacc dang."

21 Jesus giahbak knuar qnir jiaxee hyxgiahlangg jiong' inx soxx henr :ee hed lyc kowvangg,

2 Qycc knuar qnir jit xee songwhiongx ee jiuxqnuaxlangg jiong' nng xee vnuar lii hed .lyc .kir.

3 Dyrr qongw, "Guaw jinsit qra linw qongw, jitt xee songwhiongx ee jiuxqnuaxlangg soxx hed :ee, viw jiongww langg soxx hed :ee kacc je.

4 In'ui jiongww langg si dui' inx u cunx :ee hed lyc kir henr; danrsi jitt xee hurzinlangg si dui' ix ee byy qraur :ee, ix soxx uaxkyr laii uac :ee itjin qra hed .lyc .kir."

5 U langg qongw kiw denrdngg si ing hyw jiyc qapp soxx henr ee mic laii jngtna.

6 Hitt sii Jesus qongw, "Linw soxx knuar qnir hiaxee mic, zidjiw beh qaur, dirr jiax beh byy jit der jiyc lauu dirr lingrgua jit der jiyc ee dingxbin :ee byy ho'ngg ciax .lyc .kir."

7 Inx dyrr mng Ix qongxx, "Sensnix ar, anxnix simxmih sii beh u hiaxee su? Qycc jiaxee su beh jniaa ee sii, u simxmih diaurtauu ar?"

8 Jesus rinr qongxx, "Diyhh qinxsin, benw did siurr behik. In'ui beh u jerje langg tog Guaw ee miaa laii qongw, 'Guaw dyrr si Krist'; qycc qongw, 'Siqanx qin lar; linw m tangx kir duer inx.'

9 Linw beh tniax qnir qaujenr qapp ziauxluan ee su, hitt sii, mrbenw qniahniaa. In'ui jiaxee dairjir dikkag dairsingx u, danrsi buadqii byy liamvnix qaur."

10 Ix dyrr qra inx qongw, "Vecsnir beh kiw laii qongqig vecsnir, qog iarr beh kiw laii qongqig qog.

11 De beh dua dinxdang, jerje soxjai u qihngx un'ik; dui' tnix nirr iarr beh u tangx qniax ee siongr qapp dua ee sinziah.

12 Jiaxee su ee dairsingx, langg beh herciuw liac linw, kunxdiok linw, jiong' linw sangr qaux dirr huerdngg qapp qnalyy, iarr uirdiyhh Guaw ee miaa duar linw qaur dirr qun'ongg qapp qnuahuw ee binrjingg.

13 Jiaxee su beh jniaa juer linw ee qanjingr.

14 Soxiw linw ee simjir diyhh quatduan byy dairsingx kuawlu beh jnaixngiu hunsor.

15 In'ui Guaw beh sniuxsur linw kauxjaii qapp diwhui, dyrr si linw ee jiongww duiwdik soxx be e dixdng venrvok :ee.

16 Linw iarr beh hro verbuw, hniadi, cincig, ving'iuw qewsangr. Linw diongqanx uree beh hro inx hai siw.

17 Linw in'ui Guaw ee miaa beh hro jiongww langg uanwhun;

18 Danrsi linw jit qix taumngg iarr be sitlyc.

19 Linw ing tunlunw did diyc linw ee uahmia.

20 Linw knuar qnir Jelusalem hro qun'ongg soxx uii, dyrr jaix ix ee pahngx qin lar.

21 Hitt sii dirr Judea :ee diyhh jauw kir snuax nirr; dirr sniaa-lai :ee diyhh cud .laii; dirr hngg nirr :ee m tangx zip sniaa.

22 In'ui jiaxee zit si sin'uanx ee zit, hro soxu qiwjair :ee longxx ingwgiam.

23 Dng' hiaxee zit, u sin'in qapp hro ngex-aw jiac linx ee hurzinlangg u jaiec; in'ui beh u dua ee kunwkow qaur dirr hitt xee derhngx, iarr u siurkir qaur dirr jitt xee vecsnir.

24 Inx beh hro dyx taii siw, siurr liac qaur banrvangx. Jelusalem beh hro ledvanglangg tunxdac, qaur ledvangx ee qrii muaw.

25 Zit, guec, cnisinn decbeh u diaurtauu, dirr derjniu :ee u ledvangx kunwkow; uirdiyhh haiw qapp ingw ee huarhua hauw dyrr hunluan;

26 In'ui tnisiongr beh dinxdang, langg dui' qniahniaa ixqip tingwhau soxx beh qaur dirr tnie ee su dyrr hrun .kir.

27 Dirr hitt sii beh knuar qnir Zinjuw ing quanlingg qapp dua ingqngx jre hunn laii.

28 Duxduxx u jiaxee su, linw diyhh tingxsinx giac tauu, in'ui linw ee sioghuee qin lar."

29 Qycc ing piwzu qra inx qongw, "Cir knuar buhuaqyw qapp longxjongw ee ciu,

30 Linw knuar qnir inx vuh ngiw ee sii, dyrr jaix hertnix qaur lar.

31 Anxnix, linw knuar qnir jiaxee su dyrr diyhh jaix Siongrder ee qog qin lar.

32 Guaw sidjai qra linw qongw, jitt sewdai iauxx bue quer .kir, jiaxee dairjir longxx beh jniaa.

33 Tnix qapp de beh byy .kir, Guaw ee ue be byy .kir.

34 Danrsi linw diyhh qaqi qinxsin, qniax linw ee simx hro tamjiac, jiuxjuir, qapp jitt sewqanx ee kuawlu pacluan, hitt zit dyrr e cincniu uahdauh hutzenqanx qaur dirr linw,

35 In'ui hitt zit beh cincniu anxnix qaur dirr qniwnarr kiarkiw dirr juann derbin ee jiongww langg.

36 Linw diyhh dagg sii qingxsingw, qidyw, hro linw erdid siamxvi jionglaii longxjongw ee su, laii kia dirr Zinjuw ee binrjingg."

37 Jesus zit .sii dirr dxen nirr qawsi langg, mii .sii cud .kir, hiyh dirr hitt xee miaa juer Qnanaw ee snuax.

38 Jiongww vecsnir tauwjaw kir dxen nirr cue Ix, rair beh tniax Ix.

22 Duqnawjeh, iarr qiyr juer Vnuaquewjeh, qin larr.

2 Jiaxee jewsitauu qapp qinghagsu cue knuar u simxmih hxuad tangx hai siw Jesus; in'ui inx qniax vecsnir.

3 Satan zip dirr hitt xee qiyr juer Iskaliot ee Judas, si jap-zi xee hagsingx ee jit xee.

4 Ix kir qapp jiaxee jewsitauu iuxsiqnuax snaqab camsiongg, beh ing simxmih hxuad jiong' Jesus qaux inx.

5 Inx jin' hnuahiw, iog beh ginn hro ix.

6 Judas rinw inx, dyrr cue qihue, beh dng' vecsnir byy dilehh ee sii, jiong' Jesus qaux inx.

7 Duqnawjeh, ingqaix taii Vnuaquewjeh ee ngiuqyx ee hitt zit ixqing’ qaur.

8 Jesus crex Peter qapp Johan, qongw, "Linw kir ter lanw virvan Vnuaquewjeh ee ensiac, hro lanw tangx laii jiac."

9 Inx qra Ix qongw, "Rair guanw dirr simxmih soxjai virvan?"

10 Ix qra inx qongw, "Linw zip sniaa, beh duw diyc jit langg duar juixvann. Linw diyhh duer ix zip ix soxx zip ee cur.

11 Qra hitt qingx cur ee juxlangg qongw, 'Sensnix mng qongxx, 'Kectniax dirr daxlyc? Guaw beh dirr hiax qapp Guaw ee hagsingx jiac Vnuaquewjeh.'

12 Ix beh ing laudingw vailet hyxser ee duartniax hro linw knuar; linw diyhh dirr hiax virvan."

13 Inx kir, qyxzenn duw diyc jiauww Ix soxx qra inx qongw :ee, dyrr dirr hiax virvan Vnuaquewjeh.

14 Sii qaur, Jesus jerdyh, suwdoo iarr qapp Ix jre.

15 Ix duiww inx qongw, "Dirr siurr hai ee dairsingx, Guaw vutjiw iwair qapp linw jiac jitt xee Vnuaquewjeh;

16 In'ui Guaw qra linw qongw, Guaw byy beh qycc jiac jex, itdit qaur dirr Siongrder ee qog ingwgiam uijiw."

17 Ix dyrr qra vxuex jrih .laii, jioksia liauw, qongw, "Linw jiong' jitt xee vunx hro linw dagg langg;

18 In'ui Guaw qra linw qongw, dnaxx liauxau, Guaw byy beh qycc limx pudyjiab, qaur Siongrder ee qog laii."

19 Ix qycc tec vniaw jioksia laii vreh hro inx, qongw, "Jitt xee si Guaw ee sinkux, uirdiyhh linw laii henr :ee; linw qniaa jitt xee laii qiwliam Guaw."

20 Jiac liauxau, pangg vxuex iarr si anxnix, qongw, "Jitt xee vxuex si sinx iog, dirr Guaw ee huih laii setlip :ee, dyrr si uirdiyhh linw lrauu .cud .ee.

21 Narr si bre Guaw ee langg, ix ee ciuw qapp Guaw qangg dirr dyh nirr.

22 In'ui Zinjuw jinjniar e kir, jiauww soxx dniardiyc :ee. Danrsi Ix hro simxmih langg bre, hitt langg u jaiec!"

23 Inx dyrr sna' duiwmng qidiongx simxmih langg beh juer jitt xee dairjir.

24 Inx u decc sna' jnex, knuar jiongdiongx simxmih langg sngr siongrr dua.

25 Jesus qra inx qongw, "Ledvangx ee qun'ongg juer jruw laii dirliw inx; quanxhad inx :ee cxingx juer unjuw.

26 Danrsi linw dyrr m si anxnix; linw diongqanx siongrr dua :ee diyhh cincniu sirser, juer tauu :ee diyhh cincniu ce'ing. Simxmih langg siongrr dua?

27 Si jerdyh :ee, iacc si juer ce'ing :ee ar? Qamxx m si jerdyh :ee mah? Danrsi Guaw dirr linw diongqanx cincniu juer ce'ing :ee.

28 Linw dyrr si siongsiongg qapp Guaw dirr ciwlen diongx :ee.

29 Guaw ing qog hrongx linw, cincniu Guaw ee Ve bad ing qog hrongx Guaw jidngiu;

30 Dirr Guaw ee qog, hro linw dirr Guaw ee dyh limjiac. Linw iarr beh jre dirr jyrui, simxpnuar Islael jap-zi xee jipair."

31 Qycc qongw, "Simon, Simon ar, liw knuar Satan bad rair did diyc linw, rair vuar linw cincniu vuar bec;

32 Danrsi Guaw u ter liw qidyw, hro liw ee sinr byy sitlyc. Liw quijingr liauxau, diyhh qenqor liw ee hniadi."

33 Peter qra Ix qongw, "Jruw ar, guaw junxvi qapp Liw qnuaix lyc qnax, qapp Liw dauwdin siw."

34 Ix dyrr qongw, "Peter ar, Guaw qra liw qongw, qinaxzit qxex iaxx bue tii, liw beh snax vaiw m zin Guaw."

35 Ix qycc qra hagsingx qongw, "Guaw jingg:a crex linw byy duar jnide, qapp daclenn, qapp ree, linw u kiamr simxmih bor?" Inx qongw, "Byy."

36 Ix dyrr qra inx qongw, "Dnaxx u jnide :ee diyhh duar lehh, u daclenn :ee iarr diyhh anxnix; byy dyx :ee, diyhh bre ix ee snxax laii brew dyx.

37 In'ui Guaw qra linw qongw, soxx qiwjair :ee qongxx, 'Sngr Ix qapp vuthuad ee langg danglet', jitt qxur ue dikkag ingwgiam dirr Guaw; in'ui quanhe Guaw :ee, dnaxx beh jniaa lar."

38 Inx qongw, "Jruw ar, Liw knuar, dirr jiax u nng qix dyx." Ix qra inx qongw, "Qauwgiac lar."

39 Jesus cud .kir, jiauwsiongg kir Qnanaw Snuax; hagsingx iarr duer Ix.

40 Qaur hitt soxjai, Ix dyrr qra inx qongw, "Lanw diyhh qidyw, benw did zip behik."

41 Dyrr lirkuix inx iokliok u hed jiyhtauu ee hng, Ix qui lyc kir qidyw qongxx,

42 "Ve ar, Liw narr kingw, diyhh jiong' jitt xee vxuex lirkuix Guaw; dogdok m si Guaw ee iwsur, si beh jniaa Liw ee iwsur."

43 U jit xee tnisair dui' tnix cuthen, laii jrongr Ix ee lat.

44 Jesus koxtangr qaur qik, qidyw naxx vikced. Ix ee qnua si cincniu dua diamw huih dih lyc de.

45 Qidyw suah, Ix kiw .laii, kir jiurqin hagsingx, knuar qnir inx uirdiyhh iubun decc kunr,

46 Dyrr qra inx qongw, "Sniaw su decc kunr? Kiw laii qidyw, benw did zip behik."

47 Iauxx decc qongw ee sii, u qui' din langg qaur. Jap-zi hagsingx ee jit xee, hitt xee qiyr juer Judas :ee, qniaa dirr inx ee taujingg, qinruaw Jesus beh qra Ix jimx.

48 Jesus qra ix qongw, "Judas, liw ing jimx bre Zinjuw mah?"

49 Jyxiu ee langg knuar qnir soxx beh qaur ee su dyrr qongw, "Jruw ar, guanw diyhh ing dyx laii taii inx mah?"

50 Qidiongx jit langg taii jewsitauu ee lovok, siah kir ix jniawvingg ee hni-aw.

51 Jesus rinr qongxx, "Dairjir qaur anxnix, cniaw iong'unw jex." Ix dyrr bongx hitt xee langg ee hni-aw, laii rix hyw ix.

52 Jesus duiww hiaxee laii qongqig Ix ee jewsitauu, denrsix, qapp dniuxlyw qongw, "Linw giac dyx qapp tuii .cud .laii, cincniu decc qongqig cat mah?

53 Guaw zidzit qapp linw dirr dxen nirr, linw byy crunx ciuw qongqig Guaw. Danrsi jitt diap si linw ee sii, si oamr ee quanser."

54 Inx dyrr liac Ix, duar Ix kir, duar Ix zip jewsitauu ee cur. Peter hng hng decc duer Ix.

55 Langg dirr dniaa nirr kiw huew, snaqab decc jre, Peter iarr jre dirr inx diongqanx.

56 U jit xee luxvi knuar qnir ix ngr huexqngx decc jre, juwbak knuar ix, qongw, "Jitt langg iarr si qapp Ix juewdin :ee."

57 Ix m zin, qongw, "Hurzinlangg ar, guaw m bad Ix."

58 Diap aw quw qycc jit langg knuar qnir, qongw, "Liw iarr si inx ee langg." Peter qongw, "Langg ar, guaw m si."

59 Quer vnuar sii quw, qycc jit langg cud lat qongw, "Jitt langg jinjniar qapp Ix juewdin, in'ui ix iarr si Galileelangg."

60 Danrsi Peter qongw, "Langg ar, liw soxx qongw :ee, guaw m jaix." Iauxdecc qongw ee sii, qxex liamvnix tii.

61 Jruw uat tauu knuar Peter. Peter dyrr qir did Jruw ee ue, u jnaixngiu qra ix qongw, "Qinaxzit qxex tii ee dairsingx, liw beh snax vaiw m zin Guaw."

62 Ix dyrr cud kir guarbin, dua tikaur.

63 Qowsiuw Jesus ee langg hiwlang Ix, pah Ix,

64 Ngx Ix ee bin, mng Ix qongxx, "Liw diyhh juer sendix laii qongw, pah Liw :ee si jirjui ar."

65 Qycc qongw jerje laii setdok Ix.

66 Qaur tnixqngx, vecsnir ee dniuxlyxhue jurjip, qidiongx u jiaxee jewsitauu qapp qinghagsu. Inx dyrr duar Jesus qaur inx ee qonghue, qongw,

67 "Liw narr si Krist, diyhh qra guanw qongw." Jesus qra inx qongw, "Guaw narr qra linw qongw, linw m sinr;

68 Narr mng linw, linw iarr m rinr.

69 Danrsi dnaxx liauxau, Zinjuw beh jre dirr Siongrder quanlingg ee duarvingg."

70 Dairqex qongw, "Anxnix, Liw dyrr si Siongrder ee Qniaw mah?" Ix duiww inx qongw, "Linw qongw Guaw dyrr si."

71 Inx qongw, "Micsaiw ing vadd hxang ee qanjingr? Lanw vunxsinx u tniax qnir Ix cincuir soxx qongw :ee."

23 Inx juann hue ee langg longxx kiw .laii, duar Ix qaur Pilate ee binrjingg,

2 Qryr ix qongxx, "Guanw knuar jitt langg behik guanw ee vecsnir, qimr langg lap suer hro Kaesar, qaqi cxingx juer Krist, jit xee Ongg."

3 Pilate mng Ix qongxx, "Liw si Judealangg ee Ongg mah?" Rinr ix qongxx, "Liw qongw, dyrr si."

4 Pilate duiww hiaxee jewsitauu qapp qui' din ee langg qongw, "Guaw knuar jitt xee Langg byy jue."

5 Danrsi inx naxx cud lat qongw, "Ix iydang vecsnir, venww Judea tuann qxaur, dui' Galilee kiw qaur jiax."

6 Pilate jid'err tniax .qnir, dyrr mng knuar jitt langg si Galileelangg iacc m si.

7 Ixqing’ jaix Ix sriok dirr Helod soxx quanhad, dyrr qra sangr kir hro Helod; hitt sii Helod iarr dirr Jelusalem.

8 Helod knuar qnir Jesus dyrr jin' hnuahiw, ix quw quw ixjingg dyrr rair beh knuar qnir Ix, in'ui bad tniax qnir Ix ee su, qycc ngwbang knuar qnir Ix qniaa sinziah.

9 Dyrr ing jerje ue mng Ix; danrsi Jesus byy rinr ix jit qxur.

10 Hiaxee jewsitauu qapp qinghagsu kia lehh, cud lat qryr Ix.

11 Helod qapp ix ee vxingx bagde byy Ix, hiwlang Ix; ing suiw ee snxax qra Ix cing, qycc sangr hingg Pilate.

12 Helod qapp Pilate vingsii qet'uanx, hitt zit dyrr juer ving'iuw.

13 Pilate driaur hiaxee jewsitauu qapp iuxsix cam' vecsnir laii,

14 Duiww inx qongw, "Linw duar jitt xee Langg qaur guaw jiax, qongw Ix si behik vecsnir :ee. Knuar ar, guaw dirr linw ee binrjingg ixqing’ simxmng Ix. Danrsi lun qaur linw soxx qryr Ix ee su, guaw craa cud Ix longxx byy juer.

15 Helod iarr si anxnix, mrjiacc jiong' Ix sangr hingg lanw. Ix soxx qniaa :ee byy jit hxang si ingqaix siw ee su.

16 Soxiw guaw beh qra pah, liauxau tauxvangr Ix."

17 Dng' jecqii, jiauww le, diyhh vangr jit xee huanrlangg hro inx.

18 Inx dangjee auqiyr qongxx, "Diyhh druu kir jitt xee Langg, vangr Balabbas hro guanw."

19 Jitt xee Balabbas in'ui dirr sniaa-lai jokluan jiacc lyc qnax.

20 Pilate rair vangr Jesus, dyrr qycc qapp inx qongw.

21 Danrsi inx rinr qongxx, "Dingr Ix dirr sibzirqer, dingr Ix dirr sibzirqer."

22 Pilate snax vaiw duiww inx qongw, "Si jnaixngiu? Ix u qniaa simxmih pnaiw? Guaw knuar Ix byy jit hxang ingqaix siw ee jue. Soxiw guaw beh qra pah, liauxau tauxvangr Ix."

23 Inx dua sniax vikced qriuu diyhh dingr Ix dirr sibzirqer. Inx ee sniax kacc ngiaa.

24 Pilate jiauww inx soxx qriuu :ee gixduan laii qniaa.

25 Ix dyrr tauxvangr inx soxx qriuu hitt xee uirdiyhh jokluan suar taii siw langg qnuax lyc qnax :ee, jiong' Jesus qaux inx, laii sun inx ee iwsur.

26 Ix duar Jesus kir ee sii, u jit xee Kylenian ee langg, Simon, dui' jngkax laii. Inx dyrr kiuw ix laii, jiong' sibzirqer kuar dirr ix ee qingtauu, qiyr ix giaa lehh laii duer Jesus.

27 Duer Ix ee langg u vecsnir qapp hurzinlangg jerje, hurzinlangg uirdiyhh Ix duii hxingx aisiongx.

28 Jesus uat tauu duiww inx qongw, "Jelusalem ee hurzinlangg ar, byc did uirdiyhh Guaw tikaur, diyhh uirdiyhh linw qaqi qapp qaqi ee qniaxzii laii tikaur.

29 In'ui sii beh qaur, langg beh qongw, 'Be e huaiin ee hurzinlangg, m bad singsanw ee txex, m bad hro ginxaw suh ee lintauu, u hokkir.'

30 Hitt sii, langg dyrr beh duiww snuax qongw, 'Deh guanw'; iarr duiww snuax-aw qongw, 'Kamr guanw'.

31 In'ui duiww cnix ee ciurbak narr qniaa anxnix, duiww dax ee ciurbak beh jnaixngiu ar?"

32 Qycc u nng xee huanrlangg hro langg duar .kir, qapp Jesus qangg siurr siw.

33 Qaur jit xee soxjai miaa qiyr Taukak'nguaw :ee, dyrr dirr hiax dingr Ix dirr sibzirqer; qycc dingr hitt nng xee huanrlangg, jit xee dirr jniawvingg, jit xee dirr dywvingg.

34 Jesus qongw, "Ve ar, siawbenw inx, in'ui inx soxx juer :ee, inx m jaix." Langg dyrr liamx kaux vunx ix ee snxax.

35 Hiaxee iuxsix qicir Ix qongxx, "Ix bad qiur vadd langg. Ix narr si juer Siongrder ee Krist, siurr qingxsuanw :ee, diyhh qiur qaqi."

36 Vingdingx iarr hiwlang Ix, qinruaw kir ing cor hro Ix, qongw,

37 "Liw narr si Judealangg ee Ongg, diyhh qiur qaqi."

38 Dirr Ix ee dingxbin u jamxdiauu siaw qongxx: JITT XEE SI JUDEALANGG EE ONGG.

39 Siurr diaur lehh ee huanrlangg ee jit xee setdok Ix, qongw, "Liw qamxx m si Krist mah? Diyhh qiur qaqi qapp guanw."

40 Derr zi xee jikvi ix, rinr qongxx, "Liw qiwzenn qangg siurjue, lenrr Siongrder iarr m qniax mah?

41 Lanw siurjue si qongdy, in'ui lanw soxx sriu :ee hap lanw soxx qniaa :ee; danrsi jitt Langg soxx qniaa :ee, byy jit hxang m driyc."

42 Dyrr qongw, "Jesus ar, Liw dirr Liw ee qog laii ee sii, diyhh qir did guaw."

43 Jesus dyrr qra ix qongw, "Guaw sidjai qra liw qongw, qinaxzit liw beh qapp Guaw dirr Loghngg."

44 Ziddiongdaur, juann de oamr. Qaur snax diamw ee sii,

45 Zit ee qngx byy .kir; dxen-lai ee dniur duiwdiongx lic .kuix.

46 Jesus dua sniax qiyr, dyrr qongw, "Ve ar, Guaw ee sinn qaudair dirr Liw ee ciuw." Jiaxee ue qongw suah, kuir dyrr dng.

47 Vexjongw knuar qnir jitt xee dairjir, qruix ingqngx Siongrder, qongw, "Jitt xee jinjniar si gi ee Langg."

48 Jurjip decc knuar ee jiongww langg knuar qnir jiaxee dairjir, longxx duii hxingx dyr .kir.

49 Hiaxee qapp Jesus sna' bad :ee, ixqip hiaxee dui' Galilee duer Ix laii ee hurzinlangg, longxx hng hng decc kia, laii knuar jiaxee su.

50 U jit langg, miaa Josef, ix si giruann, juewlangg hyw qycc u gi.

51 Ix qapp hiaxee decc qewboo soxx juer :ee byy qangg, ix si sriok Judealangg ee Alimatea Sniaa :ee, vingsor himbo Siongrdewqog :ee.

52 Jitt langg kir qnir Pilate, laii qriuu Jesus ee sinsix.

53 Ix siux Ix lyc .laii, ing iuwdervor vaux Ix, qra he dirr jiyc cak ee bong, longxx m bad baijongr langg :ee.

54 Hitt zit si virvan jeh ee zit, Anhiyczit qin lar.

55 Dui' Galilee qapp Jesus snaqab laii :ee hiaxee hurzinlangg duer dirr aurbin. Inx decc knuar Ix ee bong, qycc knuar jnaixngiu he Ix ee sinsix.

56 Inx dyr kir virvan hniuliau, hniu'iuu. Dng' Anhiyczit, inx jiauww qaiwbing laii hiyh.

24 Cid zit ee tauu jit zit, tnix puxqngx, hiaxee hurzinlangg duar soxx virvan ee hniuliau qaur bong,

2 Knuar qnir jiyc ixqing’ dui' mngg qy .kuix.

3 Inx dyrr zip .kir, byy knuar qnir Jruw ee sinsix.

4 Uirdiyhh anxnix decc diuduu ee sii, hutzenqanx u nng langg kia dirr inx sinvnix, ijniuu qngx nawnar.

5 Hurzinlangg qniahniaa, bin ngar lyc de. Hitt nng langg qra inx qongw, "Sniaw su dirr sixlangg diongx cue uahlangg ar?

6 Ix byy dirr jiax, ixqing’ qycc uac. Linw diyhh qir did Ix iauxx dirr Galilee ee sii u jnaixngiu qra linw qongw,

7 'Zinjuw dikkag diyhh qaux dirr juerzinn ee ciuw, hro inx dingr dirr sibzirqer, derr snax zit qycc uac.'"

8 Inx dyrr qir did Ix ee ue.

9 Inx dui' bong nirr dyr .kir, jiong' jiaxee su longxx vyr hro jap-id xee hagsingx qapp qi'uu ee jiongww langg jaix.

10 Kir duiww suwdoo qongw jiaxee dairjir :ee, dyrr si Magdalene ee Malia, qapp Johanna, qapp James ee laurbuw Malia, ixqip qi'uu qapp inx juer pnua ee hurzinlangg.

11 Suwdoo knuar hiaxee ue juer byngiaw, iarr m sinr inx.

12 Danrsi Peter kiw laii jauw qaur bong nirr, ngar lyc kir knuar, jixu knuar qnir iuwdervor nardnia. Ix dyrr dyr kir cur nirr; simlai decc qiquair soxx qingquer ee su.

13 Siang hitt zit, hagsingx diongx u nng langg kir jit xee hniusia, miaa Emmaus, li Jelusalem zi-jap-go lxiw.

14 Inx snaqab damlunn soxx qingquer longxjongw ee su.

15 Inx decc damlunn sna' mng ee sii, Jesus vunxsinx qinruaw, qapp inx snaqab qniaa.

16 Inx nng langg bebak, drir qaur be zin did Ix.

17 Ix duiww inx qongw, "Linw qniaa ee sii, decc snaqab venrlun simxmih?" Inx dyrr kia lehh, bin dair iu'iongg.

18 Qidiongx jit xee, miaa Kleopas, rinr Ix qongxx, "Liw qamxx dnuasinx cutgua dirr Jelusalem, iaxx m jaix qinaxzit dirr hiax soxx qingquer ee su mah?"

19 Ix qra inx qongw, "Simxmih su ar?" Inx qra Ix qongw, "Dyrr si Nazaletlangg Jesus ee su. Ix si Sendilangg, dirr Siongrder qapp jiongww vecsnir ee binrjingg soxx qongw soxx qniaa :ee u quanlingg.

20 Hiaxee jewsitauu qapp lanw ee sirdua qewsangr Ix kir dring sixjue, dingr Ix dirr sibzirqer.

21 Guanw vingsor decc ngwbang hitt xee beh sioghuee Islael :ee dyrr si Ix. M na anxnix, qycc jiaxee su jniaa liauxau ixqing’ snax zit lar.

22 Qycc guanw diongqanx quixnarr xee hurzinlangg hro guanw jin' gonggniac; in'ui inx pacpuxqngx qaur bong nirr,

23 Byy knuar qnir Ix ee sinsix, dyrr dyr .laii, qongw inx u knuar qnir tnisair cuthen, qongw Ix qycc uac lar.

24 Guanw diongqanx quixnarr langg quar bong nirr, qyxzenn knuar qnir jiauww hurzinlangg soxx qongw :ee; danrsi byy knuar qnir Ix."

25 Jesus duiww inx qongw, "Budix ee langg ar, sendix soxx qongw itcer ee ue, linw ee simx jnaixngiu hiacc yh sinr ar!

26 Krist siurr jiaxee qankow, laii zip Ix ee ingqngx, qamxx byy ingqaix mah?"

27 Ix dyrr dui' Moses qapp jiongww sendix kiw, quixnarr xui Singwqingx diongx soxx qiw Ix :ee, longxx qra inx quexbingg.

28 Jiongqin inx soxx beh kir ee hniusia. Jesus qaxnaxx beh qniaa kacc hng.

29 Inx qiongg lauu Ix, qongw, "Cniaw qapp guanw druar; sii ixqing’ nguar, zit beh lyc lar." Ix dyrr zip .kir, beh qapp inx druar.

30 Snaqab jerdyh ee sii, Jesus tec vniaw jioksia, vreh laii hro inx.

31 Inx ee bagjiux kuix, dyrr zin did Ix; liamvnix byy qycc knuar qnir Ix.

32 Inx dyrr snaqab qongw, "Lo nirr, Ix qapp lanw qongxue, kuitiah Singwqingx ee sii, lanw ee simx qamxx byy zet mah?"

33 Dyrr jiksii kixsinx, dyr kir Jelusalem, duw diyc jap-id xee hagsingx, qapp qangg dilehh decc jurjip ee langg, dyrr qongw,

34 "Jruw qyxzenn qycc uac, iarr cuthen hro Simon knuar .qnir."

35 Inx nng langg iarr qongw kiw dirr lo nirr soxx duw .diyc ee su, qapp dirr vreh vniaw ee sii inx jnaixngiu zin did Ix.

36 Inx decc qongw jiaxee ue ee sii, Jesus vunxsinx kia dirr inx diongqanx, qra inx qongw, "Guan linw ving'anx."

37 Inx gonggniac qycc qniax, liac juer soxx knuar .qnir .ee si sinn.

38 Ix dyrr qra inx qongw, "Linw sniaw su zuluan, simlai snix kiw giaugii ar?

39 Diyhh knuar Guaw ee ciuw, Guaw ee kax, dyrr jaix si Guaw vunxsinx; bongx Guaw, dyrr jaix; in'ui sinn byy qud byy bah, danrsi jiauww linw knuar .diyc .ee, Guaw jiaxee longxx u."

40 Qongw anxnix, dyrr jiong' ciuw qapp kax hro inx knuar.

41 Hagsingx uirdiyhh hnuahiw ee enqor, iauxquxx byy sinr, qycc decc qiquair, Ix qra inx qongw, "Linw dirr jiax u simxmih tangx jiac bor?"

42 Inx dyrr jiong' vrig hyw ee hii jit pnir hro Ix;

43 Ix tec .kir, dng' inx ee binrjingg jiac.

44 Ix qycc duiww inx qongw, "Jiaxee dyrr si Guaw iauxquxx qapp linw dilehh ee sii soxx duiww linw qongw ee ue, qongw qniwnarr dirr Moses ee ludhuad, qapp hiaxee sendix, ixqip sipenx soxx qiwjair qiw Guaw ee ue longxx dikkag diyhh ingwgiam."

45 Ix dyrr kuix inx ee simkiaur, hro inx e hiauxgno Singwqingx.

46 Qycc qra inx qongw, "U anxnix qiwjair, Krist diyhh siurkow, derr snax zit dui' sixlangg diongx qycc uac;

47 Qycc huanxhuew qapp siar jue ee dyrliw beh dirr Ix ee miaa dui' Jelusalem kiw laii tuann qaur banrvangx.

48 Linw juer jiaxee dairjir ee qanjingr.

49 Guaw beh jiong' Guaw ee Ve soxx ingxunw :ee qaur dirr linw. Danrsi linw diyhh diamr dirr jitt xee sniaa, tingwhau dui' dingxbin lyc .laii ee quanlingg cincniu snxax qra linw cing."

50 Ix dyrr cua inx cud kir qaur Betani ee duiwbin, ciuw giac .kiw .laii qra inx jiokhog.

51 Jiokhog ee sii, dyrr qapp inx lirvet, siurr jicjiab jnriu tnix.

52 Inx dyrr vair Ix, dywdngw kir Jelusalem, dua dua hnuahiw,

53 Siongsiongg dirr dxen-lai, ylyw Siongrder.

huedngw tauu iac