Timoti 2
SXINGR PAUL SIAW HRO TIMOTI EE DERR ZI DNIUX PUEX
1. Dui' Siongrder ee jixir, jiauww dirr Krist Jesus uahmia ee ingwunw, juer Krist Jesus ee suwdoo ee Paul,
2 Siaw puex qiar hro guaw soxx tniar ee qniaw Timoti: Guan liw dui' Ve Siongrder qapp lanw ee Jruw Krist Jesus did diyc undenw, linbinw, ving'anx.
3 Guaw qamxsia ledjow, ing cingkir ee liongsimx soxx hogsai :ee, dirr qidyw ee sii guaw siauwliam liw byy suah,
4 Qir did liw ee lrauu bagsaiw, mizit himbo qnir diyc liw, hro guaw muaxsimx hnuahiw;
5 Liam diyc liw simlai byy qew ee sinr, jitt xee sinr si dairsingx diamr dirr liw ee guarmaw Lois, qapp liw ee laurbuw Eunice, guaw cimx sinr jitt xee sinr iarr si diamr dirr liw.
6 Uirdiyhh jitt xee enqor, guaw diamw cnew liw, air liw jiong' Siongrder duiww guaw ee hnua ciuw soxx hro liw ee unsur qycc hunwjir, cincniu hro huew qycc iam jidngiu.
7 In'ui Siongrder soxx sniuxsur lanw :ee, m si qniahniaa ee simsinn, si quanlingg, zin'air, siuxqiw ee simsinn. Soxiw qra lanw ee Jruw juer qanjingr,
8 Byc did liac guaw juer Jruw ee siuhuan laii qenwsiaur; diyhh jiauww Siongrder ee quanlingg uirdiyhh hok'imx snaqab siurkow.
9 Ix qiur lanw, m si jiauww lanw ee qniajuer, si jiauww Ix qaqi ee jixir qapp undenw, jitt xee undenw dyrr si ing sewdai ee dairsingx dirr Krist Jesus sniuxsur lanw :ee,
10 Danrsi henrjai dui' lanw ee Qiuwjuw Krist Jesus ee henxhen laii viauxbingg :ee. Ix ixqingx huewbyy siw, qycc dui' hok'imx hro uahmia qapp be vairhuai :ee longxx henxbingg;
11 Guaw uirdiyhh jitt xee siurr setlip juer suantuann :ee, juer suwdoo, juer qauwsux.
12 Uirdiyhh jitt xee enqor guaw iarr siurr jiaxee qankow; danrsi guaw byy liac juer qenwsiaur, in'ui guaw bad guaw soxx sinr :ee, iarr cimx sinr Ix e vyxsiuw guaw soxx qautog Ix :ee, itdit qaur hitt zit.
13 Liw dui' guaw soxx tniax .qnir hiaxee duanjingr ee ue ee bongiu, diyhh ing dirr Krist Jesus ee sinr qapp zin'air laii jipsiuw.
14 Soxx qautog liw ee hyw su, liw diyhh uaxkyr diamr dirr lanw ee Singwsinn laii qowsiuw ix.
15 Huanrnarr dirr Asia ee langg ixqingx vue guaw, jex si liw soxx jaix :ee; qidiongx u Fygellus qapp Hermogenes.
16 Guan Jruw linbinw Onesifolus ee qrex, in'ui ix dniardnia vow guaw ee jingsinn, iarr byy liac guaw qruar ticlen juer qenwsiaur.
17 Ix dirr Rloma ee sii unkunn cue guaw qaur qnir .diyc.
18 Guan Jruw hro ix dirr hitt zit dui' Jruw laii did diyc linbinw; qycc ix dirr Efesus ing zuarr je hxang hogsai guaw, jex liw iarr bingg jaix :ee.
2 Soxiw, guaw ee qniaw ar, liw diamr dirr Krist Jesus ee xunx diyhh iongxqnia.
2 Liw dirr jerje qanjingr ee langg ee binrjingg soxx dui' guaw tniax .qnir jiaxee su, diyhh qautog diongsinr ee langg, jionglaii kamx did qawsi vadd langg :ee.
3 Liw diyhh cincniu Krist Jesus jinglen ee vxingx qapp guaw siurkow.
4 Qniwnarr cutqunx ee vxingx byy hro sewsu dnivnuaa, tangx hro jiybo ix :ee hnuahiw.
5 Dauwlat :ee narr byy jiauww quiqiw laii dauwlat, dyrr berdangr did diyc benxliuu.
6 Cud lat diyhbuaa ee jycsitlangg kacc dairsingx did diyc toxsanw si habgii.
7 Guaw soxx qongw :ee liw diyhh qra sniu, in'ui Jruw beh hro liw dirr dagg hxang dairjir cangmiaa.
8 Liw diyhh qir did dui' David ee horer soxx cud ee Jesus Krist, Ix dui' sixlangg diongx qycc uac, duxduxx jiauww guaw soxx tuann ee hok'imx.
9 Guaw uirdiyhh jitt xee siurkow, simrjiww siurr vak, cincniu qniaa pnaiw ee langg jidngiu; danrsi Siongrder ee dyrliw byy siurr vak.
10 Soxiw guaw uirdiyhh siurr qingw ee langg laii tunlunw itcer ee su, hro inx iarr u hxun dirr Krist Jesus ee jinxqiur, qapp ingxsewdai ee ingqngx.
11 U jit qxur tangx sinr ee ue, dyrr si qongxx, "Lanw narr qapp Ix dangjee siw, iarr beh qapp Ix dangjee uac;
12 Lanw narr tunlunw, iarr beh qapp Ix snaqab juer ongg; lanw narr m zin Ix, Ix iarr beh m zin lanw;
13 Lanw narr sitsinr, Ix iuguann si sinwsit, in'ui Ix be e vue Qaqi."
14 Liw diyhh jiong' jiaxee dairjir hro langg qir .did, iarr dirr Jruw ee binrjingg huanhur inx m tangx in'ui gengiw laii sna' jnex; jex si byy lirig, qycc e vairhuai tniax ee langg.
15 Liw diyhh diwir hro Siongrder knuar liw juer kyxcuw :ee, juer benw qenwsiaur ee juewqanglangg, jiauww jniawir laii kuitiah jinliw ee dy.
16 Diyhh siamxvi cosiok ee husuu, in'ui inx beh naxx drir qaur vutkenn,
17 Inx ee ue beh snitnuar cincniu cngdok; qidiongx u Hymenaeus qapp Filetus,
18 Lun qaur jinliw inx ixqingx cabiu, qongw qycc uac ee su ixqingx quewsinx, jex dyrr vairhuai quixnarr langg ee sinr.
19 Danrsi Siongrder qenqor ee derqix kia jai, u kamr inr, qongw, "Jruw bad Ix Qaqi ee langg"; qycc qongw, "Huanrnarr cinghox Jruw ee miaa :ee diyhh lirkuix vutgi."
20 Dnaxx dirr duarcur lai, ix ee kiwqu m na u qimx :ee ginn :ee, iarr u caa :ee too :ee, uree juer quiwkir ee loring, uree juer harjen ee loring.
21 Soxiw langg narr cingkir qaqi tuatli jiaxee, dyrr beh juer quiwkir ee kiwqu, jniaa sxingr, hap dirr juxlangg ee loring, ven ven tangx juer dagg hxang hyw ee su.
22 Diyhh siamxvi siauwlenlangg ee su'iok, laii qapp hiaxee cud dirr cingkiwsimx qiuqiyr Jruw ee langg snaqab duizib gi, sinr, zin'air, hyvingg.
23 Narr gugong byy hagbun ee vnerlun, liw diyhh lirkuix inx; in'ui jaix dui' jiaxee ue snix cud uanqex.
24 Dogdok Jruw ee lovok m tangx uanqex, diyhh unziuu laii kuanxtai jiongww langg, gauu qawsi, zimxsiu buxban,
25 Ing unziuu qingxqair hiaxee gigliw ee langg; qiamxcaiw Siongrder hro inx huanxhuew, tangx laii bad jinliw;
26 Qycc iarr qaqi cnexgno, laii tuatli moquiw ee uahdauh, laii jniaa Siongrder ee jixir.
3 Liw diyhh jaix dirr jiaxee lorbuew ee zit u guihiamw ee sii beh qaur.
2 In'ui langg beh qor qaqi, tamjaii, kuakauw, qiaugno, vongwdok, vuergik verbuw, bongrunx, byy singwqed;
3 Bujingg, vue iog, huixvongr, byy qaqi ioksog, janzimw, uanwhun hyw,
4 Qanquiw, jippiah, pongwhongx, air kuaiwlok kacc quewtauu dirr tniar Siongrder;
5 U qingwkenn ee guarmau, danrsi ixqingx kiwsag qingwkenn ee quanlingg; cincniu jitt hy langg, liw diyhh lirkuix inx.
6 In'ui inx diongqanx u langg amwjni zip langg ee qrex, behik gong gong ee hurluw, dyrr si hro dang ee jue soxx deh, hro jerje jing'iok soxx inxiuw :ee;
7 Jiaxee hurluw siongsiongg decc hagsip, qaur buew iarr be e bingvik jinliw.
8 Jaw Jannes qapp Jambles duiwdik Moses, jitt hy langg iarr cincniu anxnix duiwdik jinliw, inx ee simjir ixqingx vairhuai, lun qaur dyrliw, inx si vutdiongwiong :ee.
9 Danrsi inx be e qycc jinwvo, in'ui inx ee gugong beh lorhen dirr jiongww langg ee binrjingg cincniu hitt nng langg jidngiu.
10 Dogdok liw u sunrtanr guaw ee qawsi, pinxhing, jiwhiongr, sinwkyr, kuan'iongg, zin'air, tunlunw,
11 Qapp jiaxee kunxdiok, ixqip koxlan; iarr jaix guaw dirr Antioc, dirr Ikonium, qapp dirr Lystla soxx duw diyc simxmih su, qapp siurr simxmih kunxdiok; danrsi Jruw longxx qiur guaw tuatli.
12 Qycc qniwnarr rair diamr dirr Krist Jesus, qingwkenn laii quer zit :ee beh siurr kunxdiok.
13 Dogdok pnaiw langg qapp muapenr langg :ee, beh naxx quw naxx pnaiw; behik langg, qaqi iarr siurr behik.
14 Liw diyhh dngdngg druar dirr soxx hagsip, soxx cimx sinr hiaxee su, in'ui liw jaix si dui' simxmih langg yc :ee,
15 Iarr jaix liw dui' sewhanr ixqingx bad hiaxee singwceh, dyrr si e hro liw u diwhui, dui' sinr Krist Jesus laii did diyc qiur :ee.
16 Singwqingx si Siongrder soxx bigsi :ee, u lirig dirr qawsi, dirr dokjig, hro langg quijingr, inxcua langg yc girliw,
17 Hro hogsai Siongrder ee langg lenrdat, ven ven laii qniaa longxjongw ee hyw su.
4 Guaw dirr Siongrder ee binrjingg qapp beh simxpnuar uahlangg sixlangg ee Krist Jesus ee binrjingg, uirdiyhh Ix ee henxhen qapp Ix ee qycc laii,
2 Huanhur liw diyhh tuann dyrliw, bylun diksii vutdiksii, diyhh juanbu laii tuann, ing vacvnuax ee kuan'iongg, laii qra langg qawsi, jikvi, qingxqair, kuanwbenw.
3 In'ui sizit beh qaur, langg beh m iong'unw duanjniar ee qawsi, beh hnirkangx jniu, air tniax jerje sensnix, jiauww qaqi ee su'iok;
4 Qycc uat tauu m tniax jinliw, kir ngr byngiaw ee ue.
5 Dogdok liw huanrsu diyhh jetjer, zimxsiu qankow, qniaa tuann hok'imx :ee ee qangx, lai jin liw ee jithun.
6 In'ui dnaxx guaw ee huih decc juer quanwden, guaw quewsir ee qrii qaur lar.
7 Guaw ixqingx jingjenr hyw ee jingjenr, ixqingx jin pauxjauw ee lorjam, ixqingx siuw soxx sinr ee dyrliw.
8 Dnaxx liauxau u gi ee benxliuu qra guaw virvan he lehh, dyrr si Jruw juer qonggi ee Simxpnuawsix dirr hitt zit beh hro guaw; m na hro guaw, iarr beh hro qniwnarr himbo Ix henxhen ee langg.
9 Liw diyhh diwir qinw qinw laii cue guaw.
10 In'ui Demas himbo jitt xee sewqanx, dyrr lirkuix guaw, kir Tessalonika; Klescens kir Galatia, Titus kir Dalmatia.
11 Jixu Luka qapp guaw dilehh. Diyhh cua Marko qapp liw snaqab laii, in'ui ix dirr hogsai ee qangx u lirig guaw.
12 Tyqikus, guaw ixqingx crex ix kir Efesus.
13 Guaw dirr Tloas lauu dirr Karpus inx daux ee guarsnax, liw laii ee sii diyhh suar duar .laii, iarr diyhh duar hiaxee ceh; hiaxee ngiupuee :ee qyckacc iauwqinw.
14 Pacdangg saihu Alesander jerje hxang hai guaw, Jruw beh jiauww ix ee soxx qniaa laii vywingr ix.
15 Liw iarr diyhh dniudii ix, in'ui ix vutjiw duiwdik guanw ee ue.
16 Guaw tauu jit vaiw hunsor ee sii byy langg uaw qin guaw, jiongww langg longxx lirkuix guaw; guan jitt xee jue byy qruix dirr inx.
17 Danrsi Jruw kia dirr guaw sinvnix, hro guaw iongxqnia, hro soxx diyhh suantaunn :ee dui' guaw laii itjin vywiongg, qycc hro guarvangx longxx tniax .qnir; guaw iarr did diyc qiur dui' sraix ee cuir.
18 Jruw beh qiur guaw tuatli longxjongw ee pnaiw dai, iarr beh qiur guaw zip Ix tnix nirr ee qog: guan ingqngx qruix Ix qaur dairdai byy jin. Amen.
19 Cingxanx Pliska qapp Aquila, ixqip Onesifolus ee qrex.
20 Elastus diamr dirr Kolinto; Tlofimus puawvni, guaw lauu ix dirr Miletus.
21 Diyhh diwir dirr dangtnix jingg laii. Eubulus, Pudens, Linus, Klaudia, qapp jiongww hniadi longxx cingxanx liw.
22 Guan Jruw qapp liw ee sinn dilehh; guan undenw qapp linw dilehh.