"Iuqycc, Ananda, anxjnuaw qongw lak xee zibkauw guanvunw dyrr si Zulaijongr, dyrr si bibiau jinsit ee vunxsingr? Ananda, hitt xee bagjiux jinn quw kiw pilyy :ee, bagjiux qapp pilyy vnivnii si potee vunxsingr jinn quw kiw pilyy ee siongr. In'ui dirr bingqngx qapp oamr nng jiongw bongrsiongw siogdinn, quanqnir dui' hitt diongqanx kipsiux jitt xee siogdinn ee kiwsiong, hy miaa qiyr juer qenwsingr. Jitt xee qenwsingr narr lirkuix bingqngx qapp oamr hitt nng xee siogdinn, vitqingr dyrr byy jursinx ee siongwtew. Cincniu jitt kuanw, Ananda, qaidongx jaix jitt xee qenwsingr m si an' bingqangx iacc oamr laii :ee, m si an' bagjiux jitt xee qinkir cud :ee, iarr m si an' kanghux snix :ee. Sniaxmih enqor? Narr an' bingqngx laii :ee, oamr ee sii dyrr sui' bet .kir, ingqaix be qnir diyc oamr. Narr an' oamr laii :ee, bingqngx ee sii dyrr sui' bet .kir, ingqaix be qnir diyc bingqngx. Narr an' qinkir snix :ee, vitdnia byy bingqngx iacc oamr. Cincniu jitt kuanw quanqnir vunxlaii dyrr byy jursingr. Narr an' kanghux cud :ee, jinwjingg knuar .diyc ee siogdinn kiwsiong qaidongx qruix qnir ee qinkir. Qycc narr kanghux qaqi u quanqnir, qapp liw bagjiux u sniaw dirdai? Soxiw qongxx qaidongx jaix bagjiux zip hubuu bongrsiongw, vunxguann m si inenn camcab, iarr m si jurhuad tenzenn :ee."
"Ananda, vixlun qongxx u langg iong nng qix jingxtau'aw kuaiwqinw qra ix ee hni-aw trad lehh. Hni-aw ee qinkir pilyy soxx drir, taukag lairdew u juer sniax. Hni-aw qapp pilyy vnivnii si potee vunxsingr tniax quw kiw pilyy ee siongr. In'ui dirr drang qapp jing nng jiongw bongrsiongw ee siogdinn, tniabunn dirr hitt diongqanx kipsiux jitt xee siogdinn ee kiwsiong, hy miaa qiyr juer tniabunsingr. Jitt xee tniabunsingr narr lirkuix drang qapp jing hitt nng xee siogdinn, vitqingr dyrr byy jursinx ee siongwtew. Cincniu jitt kuanw, Ananda, qaidongx jaix jitt xee tniabunsingr m si an' drang iacc jing laii :ee, m si an' qinkir cud :ee, m si an' kanghux snix :ee. Sniaxmih enqor? Narr an' jing laii :ee, drang ee sii sui' bet .kir, ingqaix be tniax diyc drang. Narr an' drang laii :ee, jing ee sii sui' bet .kir, ingqaix be diwqag diyc jing. Narr an' qinkir snix :ee, vitdnia be tniax diyc drang iacc jing. Cincniu jitt kuanw tniax ee siongwtew vunxlaii dyrr byy jursingr. Narr an' kanghux cud :ee, u tniax .diyc dyrr u jit xee singr dilehh, dyrr m si hukongx. Qycc narr kanghux qaqi tniax .diyc, qapp liw hni-aw u sniaw dirdai? Soxiw qongxx qaidongx jaix hni-aw zip hubuu bongrsiongw, vunxguann m si inenn camcab, iarr m si jurhuad tenzenn :ee."
"Ananda, vixlun qongxx u langg pni-aw kuaiwqinw kipkir, kib quw kiw pilyy, dirr pni-aw lairdew u pnri diyc lingw ee qakciog. In'ui qakciog e hunvet tongtaur, satbat, hubuu, iacc badjat. Cincniu jitt kuanw, simrjiww soxu pangx bi qapp caur bi, vauquad pni-aw qapp pilyy, vnivnii si potee vunxsingr pnri quw kiw pilyy ee siongr. In'ui dirr tongtaur qapp satbat nng jiongw bongrsiongw ee siogdinn, pnirbi ee qakciog dirr hitt diongqanx kipsiux jitt xee siogdinn ee kiwsiong, hy miaa qiyr juer pnri ee qaksingr. Jitt xee pnri ee qaksingr narr lirkuix tongtaur qapp satbat hitt nng xee siongdinn, vitqingr dyrr byy jursinx ee siongwtew. Qaidongx jaix jitt xee pnri ee qaksingr m si an' tongtaur iacc satbat laii :ee, m si an' qinkir cud :ee, iarr m si an' kanghux snix :ee. Sniaxmih enqor? Narr an' tongtaur laii :ee, satbat ee sii pnri ee qaksingr dyrr bet .kir. Mng qongxx anxjnuaw jaix satbat? Narr in'ui satbat jiacc u, tongtaur ee sii dyrr pnri be diyc. Mng qongxx anxjnuaw u pangx qapp caur dingxdingw jiaxee qakciog laii huatkiw? Narr an' qinkir snix :ee, vitdnia byy tongtaur iacc satbat. Cincniu jitt kuanw, pnirbi ee qijer vunxlaii dyrr byy jursingr. Narr an' kanghux cud :ee, jitt xee pnri ee qaksingr qaidongx uat dywdngw laii pnri diyc liw qaqi ee pni-aw. Kanghux qaqi pnri e diyc, qapp liw ee pni-aw sniaw dirdai? Soxiw qongxx qaidongx jaix pni-aw zip hubuu bongrsiongw, vunxguann m si inenn camcab, iarr m si jurhuad tenzenn :ee."
"Ananda, vixlun qongxx u langg iong cuiwjic ji cuiwdunn. Jiap ji suacc kiw pilyy. Hitt xee langg narr puawvni, dyrr u kow bi. Narr byy puawvni, e siyxkuaw qamxqag diyc dnix. An' dnix qapp kow henxsi jitt xee jihqinx byy dinxdang ee sii, ciangjai si jniaw jniaw. Cuiwjic qapp pilyy vnivnii si potee vunxsingr ji quw kiw pilyy ee siongr. In'ui dnix-kow qapp jniaw jitt nngw jiongw bongrsiongw ee siongdinn, cuiwlo dirr hitt diongqanx kipsiux jitt nng xee siongdinn ee kiwsiong, hy miaa qiyr juer jaibirsingr. Jitt xee jaibirsingr narr lirkuix dnix-kow qapp jniaw jitt nng xee siogdinn, vitqingr dyrr byy jursinx ee siongwtew. Cincniu anne, Ananda, qaidongx jaix cincniu jitt xee damx kow-jniaw jaix bi :ee, m si an' dnix-kow laii :ee, m si in'ui jniaw jiacc u :ee, m si an' qinkir cud :ee, m si an' kanghux snix :ee. Sniaxmih enqor? Narr an' dnix-kow laii :ee, jniaw ee sii jaibirsingr dyrr bet .kir. Anxjnuaw tangx qongw jaix jniaw bi? Narr an' jniaw bi cud :ee, dnix ee sii jabirsingr dyrr brongg ar. Qycc anxjnuaw tangx jaix dnix-kow nng xee siongr? Narr an' cuiwjic snix :ee, vitdnia byy dnix, jniaw, qapp kow jiaxee siogdinn. Jurr anne jaix bi ee qinkir vunxlaii dyrr byy jursingr. Narr an' kanghux cud :ee, hukongx qaqi dyrr u damx diyc bi, m si liw ee cuiwjic qakdix :ee. Qycc kanghux qaqi u qakdix, qapp liw ee cuiwjic sniaw dirdai? Soxiw qongxx qaidongx jaix cuiwjic zip hubuu bongrsiongw, vunxguann m si inenn camcab, iarr m si jurhuad tenzenn :ee."
"Ananda, vixlun qongxx u langg iong jit qix lingw qiqix ee ciuw kir bongx siyly ee ciuw. Narr lingw ee sewlik kacc dua, siyx :ee e duer lecc lingw. Narr siyx ee qonglik kacc ngiaa, lingw :ee e vnir siyx. Cincniu jitt kuanw bongkap camcab ee qamxsiu henxhen dirr hunlii ee qakdix. Quansiap ee sewlik narr hingsingg si in'ui bongkap kiw pilyy. Sintew qapp pilyy vnivnii si potee vunxsingr bongx quw kiw pilyy ee siongr. In'ui dirr hunlii qapp camcab nng jiongw bongrsiongw ee siogdinn, bongkap dirr hitt diongqanx kipsiux jitt nng xee siongdinn ee kiwsiong, miaa qiyr juer qakdisingr. Jitt xee qakdisingr ee vunxtew narr lirkuix lii-hap qapp vrue-sun nng xee siogdinn, vitqingr dyrr byy jursinx ee siongwtew. Cincniu jitt kuanw, Ananda, qaidongx jaix jitt xee qakdisingr m si an' lii-hap laii :ee, m si an' vrue-sun laii :ee, m si an' qinkir cud :ee, qycc m si an' kanghux snix :ee. Sniaxmih enqor? Narr si hap ee sii laii :ee, lii ee sii qaidongx ixx bet .kir, anxjnuaw qongw jaix qakdix lirkuix? Vrue-sun nng xee siongr iarr si qangrkuanw. Narr an' qinkir cud :ee, vitdnia byy lii, hap, vrue, qapp sun sir jiongw siongr. Anne liw ee sintew ee qakdix vunxlaii dyrr byy jursingr. Narr vitdnia an' kanghux cud :ee, kanghux qaqi u qakdisingr, qapp liw sintew sniaw dirdai? Soxiw qongxx qaidongx jaix sintew zip hubuu bongrsiongw, vunxguann m si inenn camcab, iarr m si jurhuad tenzenn :ee."
"Ananda, vixlun qongxx u langg pilyy iawsen dyrr kunr. Kunr vaw dyrr jingsinn. Huesiongw jinwjingg siogdinn ee qiwdii, qiwdii srid .kir si be qir .did. Jex si snix, druar, venr, qapp bet dendywtauu, kipsiux quanwsir dngw kir qaur diong'iongx, byy horsiongx ciamwhun. Jex qiyr juer iwdiqinx. Iwsig qapp pilyy vnivnii si potee vunxsingr iwsig kiw pilyy ee siongr. In'ui dirr snix qapp bet nng jiongw bongrsiongw ee siogdinn, kiycjip qakdix dirr hitt diongqanx kipsiux kansingrr luervo siogdinn. Qenwbunn dywtauu lrauu, lrauu qaur soxx be qaur ee soxjai, miaa qiyr juer qakdisingr. Jitt xee qakdisingr narr lirkuix cniw-kunr qapp snix-bet jitt nng xee siogdinn, vitqingr dyrr byy jursinx ee siongwtew. Cincniu jitt kuanw, Ananda, qaidongx jaix jitt xee qakdix ee qinkir m si an' cniw-kunr laii :ee, m si an' snix-bet jiacc u :ee, m si an' qinkir cud :ee, iarr m si an' kanghux snix :ee. Sniaxmih enqor? Narr an' cingcniw laii :ee, kunr dyrr sui' bet .kir, anne sniaxmih si kunr? Narr vitdnia snix ee sii jiacc u, bet dyrr qapp byy qangrkuanw. Anne sniaw e bet .kir? Narr an' bet jiacc u, snix dyrr bedbyy. Sniaw tangx qakdix snix? Narr an' qinkir cud :ee, cniw-kunr nng xee siongwtew duer sintew kuix-hap. Nar lirkuix jitt nngw xee siongwtew, jitt xee e qakdix :ee qapp kangx huex qangrkuanw, vitqingr dyrr byy vunxsingr. Narr an' kanghux snix :ee, kanghux qaqi dyrr u qakdix, qapp liw sniaw dirdai? Soxiw qongxx qaidongx jaix, iwsig zip hubuu bongrsiongw, vunxguann m si inenn camcab, iarr m si jurhuad tenzenn :ee."
"Iauxqycc u, Ananda. Anxjnuaw qongw jitt jap-zi xui vunxdew dyrr si Zulaijongr bibiau jinsit jurzuu ee vunxsingr?"
"Ananda, liw cniaw knuar jitt xee Jeta Ciurnaa qapp soxu ee jnuajuiw, juixdii. Liw sniu :ee si sniaw kuanw? Jiaxee si sikdinn soxx snix, bagjiux soxx knuar :ee, iacc bagjiux snix siktew? Ananda, narr si bagjiux ee qinkir snix siktew, qnir diyc kanghux dyrr m si siktew, siktew ee vunxsingr ingdongx dyrr siauduu ar. Siauduu dyrr henxhen itcer dy' hubuu :ee. Sikdinn ee siongwtew qacc hubuu, si'angw tangx bingvik kanghux ee singwjid? Kanghux marr si jitt kuanw. Narr si sikdinn soxx snix, bagjiux soxx knuar :ee, knuar diyc kanghux dyrr m si siktew, qnir dyrr bedbongg. Narr bedbongg dyrr longxx hubuu :ee. Si'angw tangx bingvik kanghux ee siktew? Soxiw qongxx qaidongx jaix quanqnir, siktew, qapp kanghux longxx byy jit xee jursow. Anne dyrr siktew qapp quanqnir jitt nng xui si hubuu bongrsiongw, vunxguann m si inenn camcab, iarr m si jurhuad tenzenn :ee."
"Ananda, liw qycc tniax knuar jitt xee Jeta Hngg lairdew, jiahvng ee sii longr qow, jurjip jingwlangg ee sii kar jxingx. Jxingx qapp qow ee imsniax jing'au lensiysuar. Jex sniaxmih iwbi? Si jiaxee sniax laii hnirkangx-vnix, iacc hni-aw ongw sniax ee soxjai kir? Ananda, narr si jitt xee sniax laii hnirkangx-vnix, dyrr kyxviw guaw kir Shravasti Sniaa qiukid jiahsit, dirr Jeta Ciurnaa dyrr byy u guaw dilehh. Jitt xee sniax narr vitdnia laii Ananda ee hnirkangx-vnix, Maudgalyayana iacc Kashyapa ingqaix longxx tniax be diyc. Hongwqiamx qidiongx jit-cingx nng-vah go-jap xee sharmana. Jid'err tniax diyc jxingx-sniax dyrr dangjee laii jiahvng ee soxjai. Narr liw ee hni-aw ongw snia'imx hitt vingg kir, jex dyrr bersux guaw dngw laii druar dirr Jeta Ciurnaa lairdew, dirr Shravasti sniaa dyrr byy guaw dilehh. Liw tniax diyc qow-sniax, liw ee hni-aw ixqingx ongw longr qow ee soxjai kir. Jxingx-sniax narr dangjee cud .laii, ingqaix tniax be diyc. Hongwqiamx qidiongx ee cnxiu, bew, guu, iacc ngiuu jiaxee jiongxjiongw imhiongw. Narr byy laii laii kir kir, iarr tniax be diyc. Soxiw qongxx qaidongx jaix tniax qapp imsniax longxx byy jit xee jursow. Dyrr si qongxx tniax qapp sniax jitt nng xui si hubuu bongrsiongw, vunxguann m si inenn camcab, iarr m si jurhuad tenzenn :ee."
"Ananda, liw qycc pnri jitt xee hniuloo lairdew ee dancaa knuar mai. Jiaxee hniux narr diamw jit jangg, Shravasti Sniaa sir-jap lxiw lai qang sijun longxx pnri e diyc pangkuir. Jex sniaxmih iwbi? Jitt xee pangkuir si dancaa soxx snix .ee, liw ee pni-aw soxx snix .ee, iacc kanghux soxx snix :ee? Ananda, narr jitt xee pangkuir si an' pni-aw snix .cud .laii, qiyr juer pni-aw soxx snix :ee, qaidongx an' pni-aw cud .laii. Pni-aw m si dancaa. Anxjnuaw qongw pni-aw lairdew u dancaa ee pangkuir? Narr qongw liw pnri .diyc ee pangkuir qaidongx an' pni-aw zip .kir. Pni-aw lairdew cud pangkuir, qongxx liw pnri .diyc si byy hac lixlo. Narr kanghux soxx snix :ee, kanghux ee vunxsingr ciangjai, pangkuir ingdongx marr suwsiongg dilehh. Tacc diyhh jiyh hniuloo laii siyx jitt xee qobok? Narr si caa soxx snix :ee, jitt xee pangkuir ee guanjid in'ui diamw huew siyx vniwjniaa hniuenx. Narr pni-aw tangx pnri .diyc, si qapp huexenx siy' qab. Hitt xee huexenx cingwquann be tangx qaur zuarr iau'uanw. Anxjnuaw sir-jap lxiw lai :ee longxx pnri e diyc? Soxiw qongxx qaidongx jaix, pangkuir, pni-aw, qapp pnri longxx byy jit xee jursow. Dyrr si qongxx pnri qapp pangkuir jitt nng xui si hubuu bongrsiongw, vunxguann m si inenn camcab, iarr m si jurhuad tenzenn :ee."
"Ananda, liw suwsiongg dirr nng xee sisinn kir jinglangg lairdew tog vxuah. Qiqanx qiamxcaiw e duw diyc kauxsox, gulingdangr, iacc qiamm gulingx, qra qiyr juer siongrdingw hyw bi. Jex sniaxmih iwbi? Jitt xee jubi si an' kanghux lairdew snix :ee, an' cuiwjic lairdew snix :ee, iacc an' jiahsit lairdew snix :ee? Ananda, narr jitt xee jubi si an' liw ee cuiwjic snix :ee, dirr liw ee cuir lairdew qandna' u jit xee cuiwjic. Jitt xee cuiwjic hitt sii ixqingx vniwjniaa kauxsox ee jubi, duw diyc ox jiyc bit ingqaix be qaixii. Narr byy venwsii, berdangr qiyr juer jaix jubi. Narr e venwii :ee, cuiwjic vingrr byy je xee, anxjnuaw jit xee cuiwjic tangx jaix je jiongw jubi? Narr junw an' jiahsit snix :ee. Jiahsit vingrr byy qakdix, anxjnuaw qongw qaqi jaix jubi? Qycc narr jiahsit qaqi jaix jubi, bersux vadd langg decc jiac mihqnia, qapp liw sniaw dirdai? Miaa qiyr juer jaix jubi :ee, narr an' kanghux snix :ee, liw jiac hukongx, qaidongx si sniaw kuanw jubi? Jitt xee hukongx narr si qiamm bi, qacc hro liw ee cuiwjih e qiamm, iarr tangx hro liw ee bin e qiamm. Anne jitt xee sewqair ee langg qapp haiw nirr ee hii qangrkuanw, qacc suwsiongg sriu qiamm bi, juanzenn m jaix jniaw si sniaw jubi. Narr m bad jniaw ee jubi, iarr be qamxqag qiamm. Anne vitdnia sniaxmih jubi longxx m jaix, anxjnuaw qiyr juer jaix jubi? Soxiw qongxx qaidongx jaix, jubi, cuiwjic, qapp damx longxx byy jit xee jursow. Dyrr si qongxx damx qapp jubi jitt nng xee si hubuu bongrsiongw, vunxguann m si inenn camcab, iarr m si jurhuad tenzenn :ee."
"Ananda, liw dniardnia dirr jaixkiw iong ciuw syx tauu. Jex sniaxmih iwbi? Jai'ngiaw u syx tauu, jex si si'angw u bongkap ee qakdix? Si ciuxqud jaix iacc taukag jaix? Narr qakdix dirr ciuw, tauu dyrr ingqaix m jaix. Anxjnuaw qongw ho'ngg bongx .diyc? Narr qakdix dirr tauu, dyrr byy ing diyc ciuw. Anxjnuaw qongw kir bongx .diyc? Narr tauu qapp ciuw longxx u qakdix, anne, liw Ananda ingdongx u nng xee sintew. Narr junw bongkap ee qakdix si tauu qapp ciuw soxx snix .cud .ee, anne ciuw qapp tauu ingdongx si ittew. Narr si ittew, bongkap ee qakdix dyrr be singlip. Narr junw u nng xee sintew, si'angw u bongkap ee qakdix? U jaidiau bongx :ee byy qakdix. Ho'ngg bongx :ee byy jaidiau kir bongx. Byy ingdongx hukongx qapp liw e snix cud bongkap ee qakdix. Soxiw qongxx qaidongx jaix, bongkap ee qakdix qapp sintew longxx byy jitt xee jursow. Dyrr si qongxx sintew qapp bongkap jitt nng xee si hubuu bongrsiongw, vunxguann m si inenn camcab, iarr m si jurhuad tenzenn :ee."
"Ananda, liw dniardnia dirr iwliam lairdew knikib sxenx, og, qapp byy soxx qir jitt snax jiongw jitsingr laii snijniaa jingwhuad ee junxjig. Jitt xee jingwhuad si simx soxx snix :ee iacc lirkuix simx dirr vadd xui soxx snix :ee? Ananda, narr junw si simx soxx snix :ee, jingwhuad dyrr m si dinenn, m si simx soxx knikib :ee. Anxjnuaw qongw u jit xui dilehh? Narr lirkuix simx lingrgua dirr vadd xui, anne jingwhuad ee jursingr si u qakdix iacc byy qakdix? U qakdix dyrr hy miaa qiyr juer simx. Qapp liw byy qang, m si sriok dinenn. Cincniu vadd langg ee simx. Liw dyrr si simx. Anxjnuaw qongw liw ee simx qapp liw dirr nng xui? Narr m si u qakdix :ee, Jitt xee dinenn qacc m si siktew, snia'imx, pangkuir, iacc kiwbi, lirkuix lingxluanw qapp hukongx ee siongr, qaidongx dirr dyc'ui? Dnaxx dirr sikdinn kanghux dy' byy viauxsi .cud .laii, byy ingqaix dirr zinsewqanx qycc u vadd xee kanghux ee soxjai dilehh. Simx m si soxx knikib :ee, an' sniaw laii qenwlip jit xee soxjai? Soxiw qongxx qaidongx jaix, jingwhuad ee junxjig qapp simx longxx byy jit xee jursow. Dyrr si qongxx iwliam qapp jingwhuad jitt nng xee si hubuu bongrsiongw, vunxguann m si inenn camcab, iarr m si jurhuad tenzenn :ee."
"Iauxqycc u, Ananda. Anxjnuaw qongw jitt jap-veh xee qaiwjiw vunxdew dyrr si Zulaijongr bibiau jinsit jurzuu ee vunxsingr?"
"Ananda, dyrr cincniu liw soxx bingvik :ee, bagjiux qapp sikdinn juewjniaa inenn snix cud ganxsig. Jitt xee ganxsig si knikib bagjiux ee qinkir soxx snix :ee, ixx bagjiux jyr hanrqair? Iacc knikib sikdinn soxx snix :ee, ixx sikdinn jyr hanrqair? Ananda,narr knikib bagjiux soxx snix :ee, qacc byy sikdinn qapp kanghux, dyrr byy sniaw tangx hunvet :ee. Dyrr junw u liw ee ganxsig, u sniaw loring lehh? Liw ee qenwsingr iarr m si cnix :ee, ngg :ee, angg :ee, iacc vec :ee. Byy sniaw soxx viauxsi :ee beh an' dyhh qenwlip hanrqair? Narr knikib sikdinn soxx snix :ee, kanghux byy sikdinn ee sii, liw ee ganxsig ingdongx bet .kir. Anxjnuaw ganxsig jaix jitt xee hukongsingr? Narr siksiong quexvnir ee sii, liw iarr jaix hitt xee siksiong venwcenx. Mrqycc liw ee ganxsig byy venwcenx, hanrqair an' dyhh qenwlip? Duer quexvnir laii quewvnir, vitdnia byy hanrqair ee siongwtew. Byy quexvnir dyrr si vutsii ciangjai. Qacc an' sikdinn soxx snix :ee, ingqaix m jaix hukongx ee soxjai. Narr liongw qiamx, ganxsig si bagjiux ee qinkir qapp sikdinn snaqab snisingg :ee. Hap jywhuew dyrr ganxsig diongx:a u lirpang; hunlii dyrr ganxsig nng jiongw longxx u camcab. Texsingr capjap, hanrqair anxjnuaw singlip? Soxiw qongxx qaidongx jaix bagjiux qapp sikdinn juewjniaa inenn snix ganxsig ee hanrqair, jitt snax xui longxx byy junjai. Dyrr si bagjiux qapp sikdinn, ixqip sikdinn ee hanrqair jitt snax xee vunxguann m si inenn camcab, iarr m si jurhuad tenzenn :ee."
"Ananda, qycjaiww liw soxx bingvik :ee, hni-aw qapp snia'imx juewjniaa inenn snix cud hnirsig. Jitt xee hnirsig si knikib hni-aw ee qinkir soxx snix :ee, ixx hni-aw jyr hanrqair? Iacc knikib snia'imx soxx snix :ee, ixx snia'imx jyr hanrqair? Ananda, narr knikib hni-aw soxx snix :ee, drang qapp jing nng xee siongwtew, qacc byy henxhen dirr binrjingg, qinkir dyrr byy juewjniaa qakdix, vitdnia byy soxx qakdix :ee. Qakdix dy' byy juewjniaa, hnirsig si sniaw hingboo? Narr caixcuw hni-aw tniax :ee jitt xee qongxhuad, byy drang byy jing soxx drir, tniax dyrr byy soxx juewjniaa. Anxjnuw hni-aw ee hingboo, camcab sikdinn qapp tapkab, qra hy miaa qiyr sikbad-hanrqair? Anne hni ee sikbad-hanrqair qycc an' sniaw laii juewjniaa? Narr an' snia'imx snix .cud .laii .ee, hnirsig in'ui u snia'imx jiacc u, dyrr qapp tniax byy dirdai. Byy tniax, snia'imx siongwtew ee soxjai dyrr brongg .kir. Hnirsig an' snia'imx snix :ee, snia'imx in'ui tniax u sniax ee siongwtew. Tniax ingdongx tniax e diyc hnirsig. Tniax e diyc dyrr byy hanrqair. Tniax qapp sniaimx qangrkuanw, hnirsig ixx virr tniax .diyc, si'angw jaix hnirsig? Narr byy qacc jit xee jai'ngiaw :ee, quibuew bersux cauxbok, byy ingqaix sniax qapp tniax camcab juewjniaa diongqanx ee hanrqair. Hanrqair byy diongx:a ee xui, anne lairgua ee siongwtew beh an' dyhh juewjniaa? Soxiw qongw qaidongx jaix, hni-aw qapp snia'imx juewjniaa inenn snix cud hnirsig ee hanrqair, jitt snax xui longxx byy junjai. Anne hni-aw qapp snia'imx ixqip sniax ee hanrqair jitt snax xee vunxguann m si inenn camcab, iarr m si jurhuad tenzenn :ee."
"Ananda, qycjaiww liw soxx bingvik :ee, pni qapp pangkuir juewjniaa inenn snix cud pnirsig. Jitt xee pnirsig si knikib pni-aw ee qinkir soxx snix :ee ixx pni-aw jyr hanrqair? Iacc knikib pangkuir soxx snix :ee, ixx pangkuir jyr hanrqair? Ananda, narr knikib pni-aw soxx snix :ee, anne liw simdiongx ixx sniaw jyr pni-aw? Si cruw ziogtew ee hingjong quanrr siangx ziauw ee siongr, iacc cruw pnri .diyc qakdix dongriauu ee texsingr? Narr cruw ziogtew ee hingjong, ziogtew ee guanjig si siksinx. Siksinx u qakdix dyrr si bongkap, miaa si srinx m si pni, jex qiyr juer bongkap, m si pnri. Pnirsig iauxx byy jit xee miaa, beh anxjnuaw juewjniaa hanrqair? Narr cruw pnri .diyc juer qakdix, qycc liw simdiongx ixx sniaw juer qakdix? Ixx ziogtew juer qakdix, anne ziogtew ee qakdix guanvunw si bongkap m si pnri .diyc. Narr ixx kanghux juer qakdix, kanghux qaqi u qakdix, ziogtew ingqaix byy qakdix. Anne dyrr ingqaix hukongx si liw, liw ee siksinx vingrr byy qakdix. Qinaxzit ee Ananda ingqaix byy junjai. Narr ixx pangkuir juewjniaa qakdix, qakdix jurzenn sriok pangkuir, qapp liw u sniaw dirdai? Narr pangx qapp caur ee bi vitdnia an' liw ee pni-aw snix :ee, anne hitt xee pangx qapp caur nng jiongw kuiwlauu dyrr m si ilann qapp dancaa soxx snix :ee. Nng jiongw budtew byy laii, liw qaqi pnri liw ee pni-aw, si pangx iacc caur? Caur dyrr m si pangx :ee, pangx dyrr m si caur :ee. Narr pangx qapp caur nng jiongw longxx erdangr pnri .diyc .ee, anne liw jit langg ingqaix u nng xee pni-aw. Hiongr guaw mng dyrliw :ee u nng xee Ananda. Dycc jit xee si liw ee sintew? Narr pni-aw si jit xee, pangx qapp caur iarr byy nng jiongw bi. Caur qacc si pangx, pangx qycc vniwjniaa caur. Nng jiongw texsingr longxx byy. Hanrqair an' dyhh juewjniaa? Narr knikib pangkuir laii snix :ee, pnirsig knikib pangkuir jiacc u. Cincniu bagjiux u ganxsig suacc berdangr knuar diyc bagjiux qangrkuanw. Knikib pangkuir jiacc u :ee, ingqaix m jaix pangkuir. Narr jaix dyrr m si ix snix :ee. M jaix dyrr m si pnirsig. Pangkuir m jaix u pangkuir, pangkuir ee hanrqair berdangr juewjniaa. Pnirsig m jaix pangkuir, knikib ee hanrqair dyrr m si an' pangkuir qenwlip :ee. Qacc byy diongqanx, be juewjniaa lairgua. Hex jiongxjiongw pnri ee texsingr vitqingr si hukongx. Soxiw qongxx qaidongx jaix pni-aw qapp pangkuir juewjniaa inenn snix pnirsig hanrqair, jitt snax xui longxx byy :ee. Anne pni-aw qapp pangkuir ixqip pangkuir ee hanrqair jitt snax xee vunxguann m si inenn camcab, iarr m si jurhuad tenzenn :ee."
"Ananda, qycjaiww liw soxx bingvik :ee, cuiwjic qapp kiwbi juewjniaa inenn snix cud jihsig. Jitt xee jihsig si knikib cuiwjic soxx snix :ee ixx cuiwjic juer hanrqair? Iacc knikib kiwbi soxx snix :ee ixx kiwbi juer hanrqair? Ananda, narr knikib cuiwjic soxx snix :ee, anne soxu sewqanx ee qamjiar, omm, ngnii, jiyh'iamm, sewsinx, qniux, ziogquir dy' longxx byy kiwbi. Liw qaqi damx qaqi ee cuiwjic knuar si dnix si kow? Narr cuiwjic ee texsingr si kow, si'angw laii damx cuiwjic? Cuiwjic berdangr qaqi cir qiamjniaw. Anne si'angw tangx qakdix kiwbi? Cuiwjic ee texsingr m si koxbi, kiwbi be qaqi snix .cud .laii. Anxjnuaw tangx juewjniaa hanrqair? Narr knikib kiwbi laii snix :ee, jihsig qaqi dyrr si kiwbi, qapp cuiwjic qinkir qangrkuanw, ingqaix berdangr qaqi cir qiamjniaw. Anxjnuaw qongw jihsig tangx qakdix si kiwbi iacc m si kiwbi? Iuqycc itcer kiwbi m si jit xee budtew soxx snix :ee. Kiwbi qacc si je jiongw laii snisingg :ee, jihsig ingqaix u je jiongw texsingr. Jihsig ee texsingr narr dna' jit xee, jitt xee texsingr qycc vitdnia si kiwbi soxx snix :ee, qiamm, jniaw, qamx, qapp hiamx camcab dangjee snix .cud .laii. Soxu venwhuar qyc'ngiu ee siongwtew qang jit xee kiwbi, ingqaix byy huatdo hunvet. Qacc byy huatdo hunvet, dyrr berdangr qiyr juer jihsig. Anxjnuaw qycc qra qiyr juer cuiwjic, kiwbi, qapp jihsig ee hanrqair? Byy ingdongx si hukongx laii snix cud liw ee simsig. Cuiwjic qapp kiwbi camcab, iarr dyrr si hitt diongqanx guanvunw byy jursingr. Anxjnuaw e snix cud hanrqair? Soxiw qongxx qaidongx jaix, cuiwjic qapp kiwbi juewjniaa inenn snix cud jihsig ee hanrqair, jitt snax xui longxx byy :ee. Anne cuiwjic qapp kiwbi ixqip cuiwjic ee hanrqair jitt snax xee vunxguann m si inenn camcab, iarr m si jurhuad tenzenn :ee."
"Ananda, iuqycc liw soxx bingvik :ee, sintew qapp bongkap juewjniaa inenn snix cud sinsig. Jitt xee sinsig si knikib sintew soxx snix :ee ixx sintew juer hanrqair? Iacc knikib bongkap soxx snix :ee ixx bongkap juer hanrqair? Ananda, narr knikib sintew soxx snix :ee, vitdnia byy hap qapp lii nng jiongw qakcad laii knikib, sintew beh anxjnuaw u iwsig? Narr knikib bongkap soxx snix :ee, vitdnia byy liw sintew junjai. Qamxx u dycc jit xee byy sintew qycc tangx qakdix hap qapp lii :ee? Ananda, budtew be in'ui bongkap u qakdix. Sintew tangx qakdix u bongkap. Qakdix sintew dyrr si bongkap. Qakdix bongkap dyrr si sinsig. Jitt xee bongkap m si sintew. Jitt xee sintew m si bongkap. Sintew qapp bongkap nng jiongw siongwtew guandew vingrr byy jit xui. Hap jywhuew dyrr si sintew qaqi ee texsingr. Lirkuix dyrr si hukongx dingxdingw ee siongr. Lairgua be juewjniaa, diongqanx beh anxjnuaw singlip? Diongqanx qacc be singlip, lairgua ee texsingr longxx si kangx :ee. Anne liw ee sinsig snix .cud .laii si an' sniaw laii qenwlip hanrqair? Soxiw qongxx qaidongx jaix sintew qapp bongkap juewjniaa inenn snix cud sinsig ee hanrqair, jitt snax xui longg byy :ee. Anne sintew qapp bongkap ixqip sinsig ee hanrqair jitt snax xee vunxguann m si inenn camcab, iarr m si jurhuad tenzenn :ee."
"Ananda, qycjaiww liw soxx bingvik :ee. Iwliam qapp huatdinn juewjniaa inenn snix cud iwsig. Jitt xee iwsig si knikib iwliam soxx snix :ee ixx iwliam juer hanrqair? Iacc knikib huatdinn soxx snix :ee ixx huatdinn juer hanrqair? Ananda, naxx knikib iwliam soxx snix :ee, dirr liw ee iwliam lairdew vitdnia u soxx susniu :ee laii kexhuad viauxbingg liw ee iwsur. Narr byy taujingg ee huatdinn, iwliam sniaxmih dy' be snix .cud .laii. Lirkuix soxx knikib :ee dyrr byy jit xee hxingg, jitt xee iwsig u sniaw loring? Iuqycc liw ee iwsiksimx qapp soxu suniuu qiamx tangx liauxqaiw hunvet ee texsingr si qangrkuanw iacc byy byy qangg? Narr qapp iwliam qangrkuanw, anne dyrr si iwliam, anxjnuaw qongw si soxx snix :ee? Narr qapp iwliam byy qangg, ingqaix byy soxx iwsig :ee. Narr byy soxx iwsig :ee, anxjnuaw e snix cud iwliam? Narr u soxx iwsig :ee, anxjnuaw qongw iwsig diyc iwliam? Dandanx qangg qapp byy qangg, jitt nng xee texsingr dy' be juewjniaa, hanrqair beh anxjnuaw qenwlip? Narr knikib huatdinn soxx snix :ee, sewqanx soxu ee hxuad li be kuix (sig, sniax, pangx, bi, qapp bongkap) go jiongw siogdinn. Liw quancad sig ee huatdinn qapp soxu sniax ee huatdinn, pangx ee huatdinn, bi ee huatdinn, ixqip bongkap ee huatdinn, siongwtew hingjong hunbingg, tangx laii duiwingr go xee qinkir, vingrr m si iwsig soxx cruw :ee. Liw ee iwsig narr quatding uaw huatdinn laii snix :ee, jitmaw liw jimjiog quancad, itcer ee hxuad si sniaw hingjong? Narr lirkix siktew qapp kanghux, drang-jing, tongx-trad, hap-lii, qapp snix-bet, ciauquer jiaxee soxu siongwtew, quibew sniaw longxx byy. Iwsig snix cud, anne siktew, kanghux qapp soxu ee hxuad iarr snix .cud. Iwsig bet .kir, anne siktew, kanghux qapp soxu hxuad iarr bet .kir. Soxx knikib :ee qacc byy ar, knikib snix cud jiacc u ee iwsig si sniaw kuanw hingtew? Byy hingtew, hanrqair anxjnuaw snix cud? Soxiw qongxx qaidongx jaix iwliam qapp huatdinn juewjniaa inenn snix cud iwsig ee hanrqair, jitt snax xui longxx byy :ee. Anne iwliam qapp huatdinn ixqip iwsig ee hanrqair jitt snax xee vunxguann m si inenn camcab, iarr m si jurhuad tenzenn :ee."
Ananda qra Vuddyy qongw, "Sewjunx, Zulaii suwsiongg decc qangxsuad inenn camcab. Itcer sewqanx jiongxjiongw venwhuar longxx knikib (de, juiw, huew, hongx) sir dua camcab jiacc laii huatsnix binghen. Anxjnuaw Zulaii beh hutliok inenn, qra jitt nng xee longxx kiwsag? Guaw dnaxx m jaix jitt xee ywgi sriok sniaw? Dogdok brang liw juvix linbinw, duiww jiongwsingx kaisi laii liauxted diongqanx dyrlo ee ywgi, lun hxuad byy qunxciyr."
Hitt sii Sewjunx qra Ananda qongw, "Liw jinwjingg in'ui iamwor jiacc laii lirkuix tniax quer jingwhuad :ee qapp knikib qakdix :ee jiaxee siyxsingg huatqaur, huatsimx beh qutlat qriuu did busiong potee. Soxiw guaw jitt jun uirr liw kaisi derr id jinliw ywgi. Anxjnuaw liw qycc jiong' sewqanx vutqed ee lunrsuad bongrsiongw inenn knikib laii hro qaqi dnii kax dnii ciuw? Liw suizenn qenwbunn je, bersux jit xee qaixsuad iyhcauw ee langg. Jinjniar ee iyc-aw henxhen dirr ganw-jingg iarr berdangr hunvet. Zulaii qongw liw jin' tangx kyxlenn. Liw dnaxx jimjiog tniax. Guaw beh uirr liw hunved kaisi, iarr hro beh laii siulen dairsing :ee tongdat sit siongr."
Ananda diam diam singsiu singwjiaw ee vudjiw.
"Ananda, cincniu liw soxx qongw :ee (de, huew, juiw, hongx) sir dua inenn camcab, huatsnix binghen sewqanx jiongxjiongw venwhuar. Ananda, narr junw hitt sir dua ee vunxsingr vingr be camcab, dyrr berdangr qapp soxu jabbut puewhyy. Kyxviw hukongx be qapp soxu ee siktew camcab puewhyy. Narr junw camcab, qapp siktew dangjee kiw venwhuar, an' tauu jiww buew horsiongx kansingg, snix-bet siy' suar. Snix liauxua siw .kir, siw liauxau qycc snix. Snix qycc snix, siw qycc siw, bersux dngxsec ee huexlunn, m bad u hiyckunr ee sijun. Ananda,cincniu juiw vniwjniaa vingx, vingx huedngw venr juiw. Liw quanknuar de. Codang :ee si dairde, iuwnngw :ee si biser ee din'aix, biser qaur linqin hukongx din'aix hiacc ser. Huntiah inx qik biser siktew venqair ee siongr si cid xui soxx jyrjniaa :ee. Qycjaiww huntiah linqin hukongx din'aix dyrr si sidjer kanghux ee vunxsingr. Ananda, narr jitt xee linqin ee hukongx din'aix tangx huntiah juer hukongx, qaidongx jaix hukongx snix cud siktew ee siongr. Liw dnaxx mng qongxx, inenn camcab ee enqor snix cud sewqanx soxu venwhuar ee siongr. Liw cniaw quanknuar jitt xee linqin hukongx din'aix si iong quiw xee hukongx camcab laii juewjniaa :ee? Byy ingqaix linqin hukongx din'aix habsingg linqin hukongx din'aix. Qycjaiww linqin hukongx din'aix huntiah qaur kanghux :ee si iong quiw xee siktew ee siongr? Narr sikdinn habsingg hukongx, sikdinn camcab ee sii, camcab ee sikdinn dyrr m si kanghux. Narr kanghux camcab ee sii, camcab kanghux dyrr m si sikdinn. Siktew iauxx erdangr huntiah. Kanghux beh anxjnuaw camcab? Liw guandew m jaix Zulaijongr lairdew sikdinn vunxjniaa si kongsingr. Kongsingr si jinsit ee siksiongr, vunxzenn cingjing. Siwlinn huatqair venww de longxx si. Duer jiongwsingx snix cud simsingr, huanxingr soxx qamdix ee hunliong, jiauww giab'enn laii huatsnix binghen. Sewqanlangg byy liauxqaiw, liahjunw si inenn ixqip jurhuad tenzenn. Jex longxx si iwsig ee simliam hunvet kir qewsngr cikliong soxx drir. Jiaxee qandna' si jit quaw gensuu qongxhuad, longxx byy sidjer iwgi."
"Ananda, huexsingr byy ix qaqi, si qiawtog dirr itcer soxx knikib :ee. Liw knuar sniaa-lai iauxx bue jiahvng ee zinqex. Inx beh juxjiac ee sii, ciuw tec dangg-qniar kir qra zidtauu qriuu huew. Ananda, hy juer camcab :ee, dyrr bersux guaw qapp liw, ixqip jit-cingx nng-vah go-jap xee bikiu qandna' jit qrunn. Jitt qrunn suizenn si jit xee, kingqiur ix ee qinvunw, qokk langg u qaqi ee sintew, longxx u cutsir ee jogsnir qapp miazi. Kyxviw qongxx Shariputra si Brahman, Uruvilva si Kasyapa jongjok. Simrjiww Ananda si sriok Gautama ee sner. Ananda, narr junw jitt xee huexsingr in'ui camcab jiacc u. Liw ee ciuw tec qniar dirr zidtauu-kax qriuu huew. Jitt xee huew si an' qniar-lai laii :ee , an' hniarcauw snix .cud .laii .ee, iacc an' zidtauu laii :ee? Ananda, narr an' zidtauu laii :ee, jurzenn tangx siyx liw ciuw-diongx ee hniarcauw. Laii qaur ciurnaa, ingqaix longxx e qra siyx .kir. Narr an' qniar-laii cud .laii .ee, jurenn e an' qniar-lai dyc huew siyx hniarjauw. Anxjnuaw qniar be rngiuu .kir? Knuar liw ciuw tec lehh dy' be siyx ee kuanw. Anxjnuaw e siyx rngiuu .kir lehh? Narr junw si hniarcauw snix :ee, nacc diyhh jiyh zidtauu qapp qniar ee qngx horsiongx lenjiab jiacc laii snix huew? Liw qycc jimjiog knuar. Qniar si kyr ciuw tec lehh. Zidtauu an' tnidingw laii. Hniarcauw vunxdew si toxde huad .cud .laii .ee. Huew an' dyc'ui iulik qaur jiax? Zidtauu qapp qniar horsiongx li hng hng, byy-cam.-byy-cab. Byy ingqaix qongxx jitt xee huexqngx jurhuad tenzenn, byy jit xee kixguann. Liw iuguann m jaix dirr Zulaijongr lairdew, huew ee vunxsingr si jniar kongsingr. Kongsingr si jniar huew, guanvunw si cingjing :ee, dirr huatqair siwlinn longxx u. Ixx jiongwsingx ee simsingr tangx duiwingr soxx qakdix ee hunliong. Ananda, qaidongx jaix sewqanlangg dirr jit xui tec qniar, hitt xui dyrr e snix cud huew. Dirr huatqair siwqer longxx tec qniar, sewqanx muaw siwqer longxx u huew decc siyx. Qacc dirr sewqanx siwqer longxx u huew decc siyx, beh tacc u jit xee qowding ee soxjai? Si srunn giab'enn huatsnix henxhen. Sewqanlangg byy liauxqaiw, liahjunw si inenn qapp jurzensingr. Jex longxx si iwsiksimx hutved qewsngr qapp cikdok ee qetqyw. Jiaxee dna' u jit quaw gensuu lunrsuad, longxx byy sidjer iwgi."
"Ananda, juiw ee vunxsingr be dniardiy, beh lrauu iacc beh hiyh vutciangjai. Bersux Shravasti Sniaa-diongx ee Kapila, Chakra, Padma, qapp Hasta dingxdingw juui dua qisut srux qiucuw taiwimx jinghuaa iong laii qab behuanwiyc. Jiaxee dairsux dirr guec qngx qaxx naxx zit .sii ee sii ciuw tec u bingjux ee qesix kir srinn guec-diongx-juiw. Jitt xee juiw si an' bingjux lairdew snix .cud .laii .ee, hukongx qaqi u :ee, iacc an' guec laii :ee? Ananda, narr an' guec laii :ee, qycc tangx dirr hng hng hro bingjux cud juiw, soxx qingquer ee ciurnaa qapp cauxbok longxx ingqaix lrauu juiw .cud .laii. U juiw .lrauu .cud .laii, tacc diyhh danxtai bingjux lrauu juiw .cud .laii? Narr byy lrauu juiw .cud .laii, tangx jaix m si an' guec qangr lyc juiw .ee. Narr an' bingjux lairdew snix .cud .laii .ee, anne jitt liap binjux ingqaix suwsiongg u juiw lrauu .cud .laii. Tacc diyhh danw vnuawmii kir srinn naxx zit .sii hiacc qngx ee guec ee juiw? Narr an' hukongx snix .cud .laii .xee, hukongx ee vunxsigr byy venqair, juiw qaidongx byy hanrqair. An' langg qaur tnix longxx e hro juiw rimx .kir. Anxjnuaw qycc u tangx dirr juiw nirr, liogde, iacc kongdiongx unrhingg? Liw qycjaiww jimjiog knuar. Guec dirr tnidingw, bingjux ciuw tec lehh. Kngr bingjux ee juixvnuaa guanvunw si langg posed :ee. Juiw an' dyc'ui lrauu qaur jitt xui? Guec qapp bingjux li hng hng, byy-cam.-byy-cab. Byy ingqaix qongxx juiw ee jinghuaa jurhuad tenzenn, byy jit xee kixguann. Liw iauxx m jaix dirr Zulaijongr lairdew, juiw ee vunxsingr si jniar kongsingr. Kongsingr si jniar juiw, guanvunw si cingjing :ee, dirr huatqair siwlinn longxx u. Ixx jiongwsingx ee simsingr tangx duiwingr soxx qakdix ee hunliong. Dirr jit xui tec bingjux, hitt xui dyrr u juiw lrauu .cud .laii. Dirr huatqair siwqer longxx u tec bingjux, sewqanx muaw siwqer longxx u juiw decc snix .cud .laii. Qacc dirr sewqanx siwqer longxx u juiw snix .cud .laii, beh tacc u jit xee qowding ee soxjai? Si srunn giab'enn huatsnix henxhen. Sewqanlangg byy liauxqaiw, liahjunw si inenn qapp jurzensingr. Jex longxx si iwsiksimx hunved qewsngr qapp cikdok ee qetqyw. Jiaxee dna' u jit quaw gensuu lunrsuad, longxx byy sidjer iwgi."
"Ananda, hongx ee vunxsingr byy siongwtew. Drang qapp jing vutciangjai. Liw qniaa zip jingwlangg lairdew dniardnia e dnaxjingw liw ee qasex. Samghati qasex ee snaaxqix huee diyc vnix:a ee langg, dyrr u bibii ee hongx cuex duiww hitt xee langg ee bin .kir. Jitt xee hongx si qasex ee snaaxqix sanxsingx :ee, si hukongx huad .cud .laii .ee, iacc hitt xee langg ee bin qaqi snix :ee? Ananda, jitt xee hongx narr si qasex ee snaaxqix sanxsingx :ee, anne liw muax :ee si hongx, jitt niaw snxax e vuex e iyy, ingqaix e vuex lirkuix liw ee sintew. Guaw jinw dirr qangxhuad ee huathue lairdew, snxax diaur lehh. Liw knuar guaw ee snxax, hongx dirr sniaxmih soxjai? Byy ingqaix dirr snxax lairdew u cangr hongx ee soxjai. Narr hukongx snix :ee, liw ee snxax byy dinxdang, hongx byy cuex dinxdang si sniaw indnuax? Kongsingr ciangjai dilehh. Hongx ingdongx suwsiongg e kiw. Narr byy hongx ee sii, hukongx qaidongx bet .kir. Hongx dnia .kir knuar e diyc. Hukongx byy .kir si sniaw hingjong? Narr u snix qapp bet, dyrr berdangr qiyr juer hukongx. Miaa qiyr juer hukongx, anxjnuaw qycc e kiw hongx? Narr hongx si an' hitt xee hro snaaxqix huee .diyc ee langg ee bin sanxsingx :ee, qaidongx iarr e cuex diy liw. Liw qaqi dnaxjingw snxax, anxjnuaw liw dendyww byy hro hongx cuex .diyc? Liw qinxsin jimjiog knuar. Dnaxjingw snxax :ee si liw. Bin sriok hitt xee langg. Hukongx jigjing anzenn, m bad dinxdang. Hongx an' dycc jit xui qoxdong laii jiax? Hongx qapp kongsingr siy' qecdng, byy-cam.-byy-cab. Byy ingqaix qongxx hongx ee vunxsingr jurhuad tenzenn, byy jit xee kixguann. Liw iauxx m jaix dirr Zulaijongr lairdew, hongx ee vunxsingr si jniar kongsingr. Kongsingr si jniar hongx, guanvunw si cingjing :ee, dirr huatqair siwlinn longxx u. Ixx jiongwsingx ee simsingr tangx duiwingr soxx qakdix ee hunliong. Ananda, kyxviw liw jit langg siyxkuaw dinxdang diyc snaaxkor dyrr u bibii ee hongx sanxsingx. Dirr huatqair siwqer narr longxx u snaaxqix siyxkuaw kir huee .quer, qui' qoktew sewqanx muaw siwqer longxx u hongx sanxsingx. Beh tacc u jit xee qowding ee soxjai? Si srunn giab'enn huatsnix henxhen. Sewqanlangg byy liauxqaiw, liahjunw si inenn qapp jurzensingr. Jex longxx si iwsiksimx hunved qewsngr qapp cikdok ee qetqyw. Jiaxee dna' u jit quaw gensuu lunrsuad, longxx byy sidjer iwgi."
"Ananda, kongsingr byy hingjong, si knikib siktew jiacc henxbingg huatsnix .cud .laii. Kyxviw Shravasti Sniaxx li hyy jin' hng. Kshatriyas ixqip Brahmans, Vaishyas, Shudras, qiamx Bharadvajas qapp Chandalas dringw soxu inx jiaxee sinx qenwlip jit xee anzenn kiarkiw ee soxjai, kuix jnew qriuu juiw. Qrut jit ciyh cimx ee too .cud .laii, diongx:a dyrr u jit ciyh cimx ee hukongx. Jiauww anne, simrjiww qrut jit dxng cimx ee too, diongx:a iauxx tangx u jit dxngx cimx ee hukongx. Hukongx cimx-cenw jiauww qrut .cud .laii ee too jerjiyw u jingcax. Jitt xee hukongx si too snix .cud .laii .ee, si kuix jnew jiacc u :ee, iacc si byy-in.-byy-dnuax qaqi snix .cud .laii .ee? Ananda, narr junw jitt xee hukongx byy-in.-byy-dnuax qaqi sniax .cud .laii .ee, too buerjingrr qrut jinwjingg, anxjnuaw berdangr byy joxgai, suacc qandna' qnir diyc dairde, siwkolenwdngw longxx byy tongtauw. Narr knikib too laii snix .cud .ee, anne too ho'ngg qrut .cud .laii ee sii ingqaix qnir diyc kanghux zip .kir. Narr too singx cud .laii byy kanghux zip .kir .ee, anxjnuaw qongw hukongx si knikib too laii snix .cud .laii .ee? Narr byy cutzip, anne ingqaix si hukongx qapp too guanvunw dy' byy jingcax ee enqor. Byy jingcax dyrr si qangrkuanw. Anne too ho'ngg qrut .cud .laii ee sii, anxjnuaw hukongx byy ho'ngg qrut .cud .laii? Narr hukongx si u qrut jiacc u .ee, anne qrut .cud .laii .ee ingqaix si hukongx m si too. Narr hukongx m si u qrut jiacc u :ee, jid'err qrut dyrr u too qrut .cud .laii, anxjnuaw qycc qnir diyc kanghux? Liw qycjaiww sniu jimjiog, jimjiog sniu jimjiog knuar. Qrut si iong qorr langg ee ciuw qrut, duer honghiongr unrjuanw. Too in'ui dertow ho'ngg qrut suaw xui. Anne jitt xee hukongx si an' dyhh snix .cud .laii .ee? Qrut kanghux, hukongx qapp sidsiongr be horsiong jok'iong, byy-cam.-byy-cab. Byy ingqaix qongxx hukongx si jurhuad tenzenn, byy jit xee kixguann. Narr jitt xee hukongx venwvenr uanbuanw, vunxguann be-dinx.-be-dang, qaidongx jaix qapp henxhen dirr taujingg ee de, juiw, huew, ixqip hongx qiyr juer go dua, vunxsingr si jinsit uabuanw, longxx si Zulaijongr, guanvunw byy snix byy bet. Ananda, qaidongx quanknuar hukongx si cud si zip, iacc byy cud byy zip. Liw juanzenn m jaix dirr Zulaijongr lairdew, qakdix ee vunxsingr si jniar kongsingr. Kongsingr si jniar qakdix, guanvunw si cingjing :ee, dirr huatqair siwlinn longxx u. Ixx jiongwsingx ee simsingr tangx duiwingr soxx qakdix ee hunliong. Ananda, kyxviw jit xee jnew hukongx, hukongx snex jit xee jnew. Sibhongx hukongx iarr si anne, uanbuanw venwvenr sibhongx. Beh tacc u jit xee qowding ee soxjai? Si srunn giab'enn huatsnix henxhen. Sewqanlangg byy liauxqaiw, liahjunw si inenn qapp jurzensingr. Jex longxx si iwsiksimx hunved qewsngr qapp cikdok ee qetqyw. Jiaxee dna' u jit quaw gensuu lunrsuad, longxx byy sidjer iwgi."
"Ananda, qnir ee qaksingr byy qakdix, si knikib siktew qapp kanghux jiacc u :ee. Kyxviw liw jitmaw dirr Jeta Ciurnaa, jaixsii bingqngx, honghunx amr amr. Setsuw dirr vnuawmii, vec guec dyrr qngx, ox guec dyrr amr. Anne bingg qapp amr dingxdingw si knikib qnir laii juer huntiah. Jitt xee qnir qapp bingg-amr siongwtew ixqip hukongx si ittew iacc m si itter? Si qangrkuanw iacc byy qangrkuanw? Si u jingcax iacc byy jingcax? Ananda, jitt xee qnir narr qapp bingg-amr ixqip hukong guanvunw si ittew :ee, anne bingg qapp amr nng xee siongwtew longxx bedbongg. Amr ee sijun byy bingg, bingg ee sii byy amr. Narr qapp amr si ittew :ee, bingqngx ee sii, qnir ee vunxsingr dyrr bedbongg. Narr vitzenn qapp bingqngx si ittew :ee, amr ee sii qaidongx bet .kir. Bet .kir, anxjnuaw qycc qongw qnir diyc bingg iacc qnir diyc amr? Narr bingg qapp amr ee texsingr byy qangg, qnir ee vunxsingr byy snix iacc bet. Ittew ee qongxhuad dyrr be singlip. Narr junw jitt xee qnir ee jingbiau qapp bingg-amr m si ittew. Liw lirkuix bingg, amr, qapp hukongx, huntiah qnir ee vunxguann si sniaw hingjong? Lirkuix bingg, lirkuix amr, ixqip lirkuix hukongx, jitt xee qnir ee vunxguann dyrr qapp qux ee mox ham' tor ee qag qangrkuanw, longxx byngiaw :ee. Bingg, amr, qapp hukongx, jitt snax hxang longxx byy qangg. An' dyhh qenwlip qnir ee qaksingr? Bingg qapp amr si duiwhuanw :ee. Anxjnuaw tangx qongw qangrkuanw? Lirkuix jitt snax hxang, guanvunw dy' sniaxmih longxx byy. Anxjnuaw qongw inx byy qangg? Huntiah kanghux qapp huntiah qnir ee vunxsingr. Inx vunxguann si byy vniqair. Anxjnuaw qongw inx byy qangg? Qnir amr iacc qnir bingg, qnir ee vunxsingr byy qaixii. Anxjnuaw qongw byy jingcax? Liw qycjaiww jimjiog knuar, sewzi siongser knuar. Jimjiog sniu, jimjiog knuar. Bigqngx an' Zidtauu laii. Oamr duer ox guec laii. Tongtaur sriok hukongx. Satbat sriok dairde. Cincniu jitt kuanw qnir ee jingbiau si knikib sniaw laii snix .cud .laii .ee? Qnir ee vunxsingr si u qakdix, kanghux ee vunxsingr si longxx byy :ee. Byy-cam.-byy-cab. Byy ingqaix qongxx qnir ee jingbiau si jurhuad tenzenn, byy jit xee kixguann. Narr qnir ee vunxsingr e tniax e jaix, venwvenr uanbuanw, vunxguann be-dinx.-be-dang, qaidongx jaix byy vniqair be dinxdang ee hukongx qapp e drang e iyy ee de, juiw, huew, qapp hongx hap .kiw .laii qiyr juer lak dua. Ix ee vunxsingr si jinsit uabuanw, longxx si Zulaijongr, guanvunw byy snix iacc bet. Ananda, liw ee simsingr dimdunn, berdangr qamxgno liw ee qenwbunn qakdix guanvunw si Zulaijongr. Liw qaidongx quanknuar jitt xee qenwbunn qakdix si snix iacc si bet; si qangg iacc si u jingcax; si byy snix iacc byy bet; si byy qangg iacc byy jingcax. Liw bad m jaix dirr Zulaijongr lairdew, qnir ee vunxsingr bingqngx u qakdix, qaksingr jingbiau hunbingg tangx knuar qnir. Ix guanvunw si cingjing :ee, dirr huatqair siwlinn longxx u. Ixx jiongwsingx ee simsingr tangx duiwingr soxx qakdix ee hunliong. Kyxviw jit xee qnir ee qinkir dirr huatqair siwqer longxx u. Tniax, pnri, damx, bongkap, qapp bongkap ee qakdix iarr si anne, bibiau ee qonglingg knuar hen hen. Dirr huatqair siwlingg longxx u, uanbuanw venwvenr sibhongx. Beh tacc u jit xee qowding ee soxjai? Si srunn giab'enn huatsnix henxhen. Sewqanlangg byy liauxqaiw, liahjunw si inenn qapp jurzensingr. Jex longxx si iwsiksimx hunved qewsngr qapp cikdok ee qetqyw. Jiaxee dna' u jit quaw gensuu lunrsuad, longxx byy sidjer iwgi."
"Ananda, iwsig ee vunxsingr byy guantauu, si knikib lak jiongw qinkir qapp sikdinn snix cud bongrsiongw. Liw dnaxx siwqer knuar jitt xee huathue lairdew ee singwhenn qapp jiongwsingx, iong bagjiux sui' xee aw kir srunn. Liw ee bagjiux siwqer knuar, cincniu decc knuar qniar-lai, byy hunved kir huntiah. Liw ee iwsig dirr hitt diongx:a sui' xee aw qra piaubingg jixzin. Jitt xee si Manjushri, hitt xee si Purna; jitt xee si Maudgalyayana, hitt xee si Subhuti, qycc hitt xee si Shariputra. Jitt xee iwsig e liauxted e hunhiauw vunxsingr si an' qnir snix .cud .laii .ee, an' siongwtew snix .cud .laii .ee, an' hukongx snix .cud .laii .ee, iacc byy soxx knikib, dudzenn snix .cud .laii .ee? Ananda, narr junw liw iwsig ee vunxsingr si an' qnir snix .cud .laii .ee, dirr byy bingg, amr, ixqiq siktew qapp kanghux, jex sir jiongw longxx byy, dyrr byy liw ee qenwsingr. Qenwsingr dy' byy, an' dyhh snix cud iwsig? Narr junw liw iwsig ee vunxsingr si an' siongwtew snix .cud .laii .ee, m si an' qnir snix .cud .laii .xee. Qacc byy qnir diyc bingg, iarr byy qnir diyc amr. Bingg qapp amr longxx byy knuar qnir, dyrr byy siktew qapp kanghux. Lenrr siongwtew dy' byy, iwsig an' dyhh huad .cud .laii? Narr junw si an' kanghux snix .cud .laii .ee, m si siongwtew, iarr m si qenwsingr. M si qenwsingr dyrr be hunven, jurzenn dyrr berdangr hunhiauw. Bingg, amr, siktew, iacc kanghux, byy siongwtew, soxx knikib :ee dyrr bet .kir. Qenwbunn qakdix byy jit xee tangx anzenn kiarkiw ee soxjai. Diamr jitt xee byy siktew byy kanghux ee soxjai, kangx dyrr qapp byy si qangrkuanw :ee. Narr u, marr m si qapp budtew qangrkuanw. Dyrr junw liw ee iwsig huatsnix .cud .laii, beh anxjnuaw hunved? Narr byy soxx knikib dudzenn snix .cud .laii .ee, jnuaxngiu berdangr dirr zidtauu lairdew lingrgua venrved cud bingguec? Liw qycjaiww siongser, sewzi siongser jimjiog knuar. Qnir tokdiong liw ee bagjiux, bagjiux-jingg ee qxingw cud sxiong. Tangx hunven hingjong vniwjniaa u, byy siongwtew :ee vniwjniaa byy. Cincniu anne, jitt xee iwsig si knikib sniaw laii snix .cud .laii .ee? Iwsig uahdang, qenwsingr cingjing, byy-cam.-byy-cab. Qenwbunn qakdix iarr si anne. Byy ingqaix qongxx iwsig si jurhuad tenzenn, byy jit xee kixguann. Narr iwsig ee simx vunxdew byy jit xee kixguann, qaidongx jaix liauxted e hunven ee qenwbunn qakdix uanbuanw jingrjig, vunxsingr byy knikib zimrhyy mic laii :ee.Ix qapp hukongx, kangx, de, juiw, huew, qapp hongx hap .kiw .laii qiyr juer cid dua. Ix ee vunxsingr si jinsit uanbuanw, longxx si Zulaijongr, guanvunw byy snix qapp bet. Ananda, liw ee simx cohoo puu puu, berdangr liauxgno qenwbunn, huatsnix cud liauxted hunhiauw. Jiaxee guanvunw si Zulaijongr. Liw ingqaix quanknuar jitt lak ee soxjai iwsig ee simx si qangg iacc u jingcax; si kangx iacc si u, si byy qangg iacc byy jingcax, si byy kangx iacc byy u. Liw guanvunw m jaix dirr Zulaijongr lairdew, iwsig ee vunxsingr bingqngx hunhiauw, qakdix hunbingg si jinx iwsig. Bibiau ee qakdix jigjing, dirr huatqair siwlinn longxx u. Ix vauhamm sibhongx hukongx. Beh tacc u jit xee qowding ee soxjai? Si srunn giab'enn huatsnix henxhen. Sewqanlangg byy liauxqaiw, liahjunw si inenn qapp jurzensingr. Jex longxx si iwsiksimx hunved qewsngr qapp cikdok ee qetqyw. Jiaxee dna' u jit quaw gensuu lunrsuad, longxx byy sidjer iwgi."
Hitt sii Ananda qapp juui dairjiongr singsiu Vuddyy Zulaii bibiau ee kaisi, srinx-simx bingcingx tongtauw, longxx byy kuawgai. Dirr hiax, juui dairjiongr qokk langg qaqi jai'ngiaw inx ee vunxsimx venww muaw sibhongx. Quanknuar sibhongx ee kanghux kyxviw decc quanknuar ciuw-diongx soxx tec ee ciurhiyc iacc mihqnia. Itcer sewqanx soxu ee mic longxx si potee bibiau bingqngx guandew ee vunxsimx. Simx jingbiau siwqer buanw buanw, vauhamm sibhongx. Huantauu quanknuar verbuw soxx snix ee siksinx, bersux hex sibhongx hukongx lairdew siurr hongx cuex ee jit liap din'aix. Ursii junjai, ursii bedbongg. Naxx cincniu cingbingg duarhaiw lairdew jtt xee pu'iuu ee juixpyx, snix kiw iacc bet .kir longxx byy jongjiah. Jingwlangg juanzenn liauxted, qaqi jai'ngiaw did dicy vunxguann bibiau vunxsimx e ciangjai dilehh be bet .kir. Inx habjiongw hiongr Vuddyy qnialew, did .diyc .ee m bad jingrr u. Inx dirr Zulaii ee binrjingg liam jimgensix qra Vuddyy janwlew.
Jimgensix janwlew huatguan:
Bibiau bingcingx ee dharma, Sewjunx cisiuw byy isuaw.
Shurangama Ongg jiww Sxingr, Sewqanx hanxiuw.
Buacsiaux gunw ee bongrsiongw, jingrr qaur dnaxx qui' ig qiab.
Did did huatsnix, benw qinglik asamkhyeya qiab.
Guan qimsingx did diyc qongqyw, jniaa juer quiwkir ee ongg.
Dngw laii dorhuar cincniu Gange Hyy ee suax hiacc je ee jiongwsingx.
Jiong' jex cimdimm ee simx hongrhenr hro cniurr din'aix hiacc je ee qoktow.
Anne jiacc tangx qiyr juer vywdab Vuddyy ee singwunx.
Cutcniaw Sewjunx laii jingwbingg,
Libser singx zip go lyy og sxer.
Narr u jit xee jiongwsingx iauxx bue jniaa vud,
Quibuew dirr jiax byy cruw diyc Nirvana.
Sibhongx hiongjong u ligliong dua juvix :ee,
Hibang linw jo guaw qycjaiww siongser kiwduu biser ee gignaiw.
Hro guaw jaxzit dat qaur busiong kaigno qingxqair,
Dirr sibhongx huatqair dyrdniuu duanjy.
Junw narr kongsingr e buacsiaux bedbongg,
Vajra ee simx iarr byy dongriauu juanxvenr.